Акафист Пресвятой Богородице в честь иконы Ее Афонской («Экономисса»)

Празднование 5/18 июля

Кондак 1

Избра́нней от сложения мира Пресвяте́й Деве Марии Богородице, яко воистину пло́тию рождшей Иисуса Христа, Спаса и Бога нашего, Владычице всея́ вселе́нныя, зело́ возлюбившей род преподобных Христа и вземшей под Свой державный покров их святы́я обители, похва́льная приносим пения. Ты же, о всечестна́я наша Мати Игу́мение, храни и спасай нас от всех врагов видимых и невидимых, да зовем Ти: Радуйся, Пресвятая Богородице Дево, Святы́я Горы́ Афо́на и всея́ вселе́нныя православных обителей всечестна́я Игу́мение.

Икос 1

Ангели плотию су́ще вси преподобнии отцы́ и матери, юноши и девы, от ве́ка просиявшии во святых, православно ше́ствоваху в небесная селения под сиянием Честна́го и Животворящаго Креста Христова на земном поприще, во юдо́ли плача и скорбе́й, под державным покровительством Матере Христа Бога нашего, всечестне́йшия Игу́мении православнаго монашескаго жития, Ея́же милостивому заступлению радостно взываем си́це: Радуйся, всечестне́йшая наша Мати Игу́мение; радуйся, наде́ждо нашего спасения. Радуйся, Святы́я Горы́ Афо́нския хранительнице; радуйся, тамо живущих иноков Спасительнице. Радуйся, веселие и славо Христовых подвижников; радуйся, отрадо Божественная святых пусты́нников. Радуйся, яко Тобою вси святи́и спасаются; радуйся, яко вся вселенная Тобою украшается. Радуйся, мира видимаго и невидимаго о Бозе Владычице; радуйся, в селения рая́ небесная Руководительнице. Радуйся, благо́е начало и славный конец всех святых жития; радуйся, святыя радости Божественная струя. Радуйся, Пресвятая Богородице Дево, Святы́я Горы́ Афо́на и всея́ вселе́нныя православных обителей всечестна́я Игу́мение.

Кондак 2

Видя скорбный путь спасения для всех преподобных Своих, Господь наш Иисус Христос благоволи́ Матери Своей, Всепречистей Деве Марии Богородице, да про́стрет Она Свой божественный покров игуменства над всеми святыми обительми Святы́я Афо́нския Горы́ и всея́ вселе́нныя православнаго монашескаго спасения, да вси спасающиися в преподобии и святости, верою видяще сие́, взывают непрестанно Спасителю Богу: Аллилуиа.

Икос 2

Разум иму́ще божественный, вси преподобнии отцы́ и матери от всея́ души́ возлюби́ша славу небесную, мир же со всеми его прелестьми возненавидевше, ногами попра́ша, и шествоваху в по́двизех святых за Христом, в мире жития своего безбедно руководимии свое́ю Приснодевственною Небесною Игу́мениею, ю́же верою зряще в ли́це святых Ея икон, умильно взываем та́ко: Радуйся, нашего спасения глави́зно; радуйся, радосте наша в сей и в будущей жизни. Радуйся, дивная Строительнице наших святых обителей; радуйся, Экономиссо милосердная иноческих общежителей. Радуйся, цвете божественнаго прозябе́ния; радуйся, радосте всемирнаго воскресения. Радуйся, всех святых божественное веселие; радуйся, православнаго монашества украшение. Радуйся, истинная Мати нашего Спасителя; радуйся, яко плотию родила еси ада Победителя. Радуйся, яко на Афо́не духовный сад насадила еси; радуйся, яко та́мо в преподобии живущих в рай руководила еси. Радуйся, Пресвятая Богородице Дево, Святы́я Горы́ Афо́на и всея́ вселе́нныя православных обителей всечестна́я Игу́мение.

Кондак 3

Сила Вышняго осеняет всех в преподобии и святости и в правде живущих, и́же возненавидеша суету мира сего и бежа́ша во святы́я монашеския обители и та́мо во о́бразе ангельском, взе́мше на ся благо́е иго Христово, свято подвизающеся, чрез все житие свое взывают непрестанно ко Пресвятей Троице: Аллилуиа.

Икос 3

Иму́ще пламенное желание спасения, и ныне подвиги совершающии во обителех иноческаго жития, в лаврах, в монастыре́х, ски́тех, кинови́ях, ке́ллиях и на всяком месте всея́ вселе́нныя, иму́ще дивный щит спасения, божественное игуменство Матере Божия, хвалебно Ей песнопоют: Радуйся, Собирательнице наша среди мира греховнаго; радуйся, Строительнице нашего спасения духовнаго. Радуйся, спасшая весь род Адама падшаго; радуйся, плотию рождшая неизреченно Спаса и Бога нашего. Радуйся, всечестне́йшая Монахине, образе спасающимся; радуйся, праведная Игу́мение всех нас, подвизающихся. Радуйся, веры православныя воеводо непобедимая; радуйся, божественная крепосте всесильная. Радуйся, Мати Господня и наша Благодатная; радуйся, всем святым благоприятная. Радуйся, двере милосердия кающимся; радуйся, упование о Бозе подвизающихся. Радуйся, Пресвятая Богородице Дево, Святы́я Горы́ Афо́на и всея́ вселе́нныя православных обителей всечестна́я Игу́мение.

Кондак 4

Бурю сомнений грехолюбивых оставльше отцы́ преподобнии и матери, возлюби́ша тернистый путь спасения, живуще посреде́ скорбе́й и лишений, Царствия ради Небеснаго, украсиша своим богоугодным житием премногая ме́ста вселе́нныя, иде́же основа́ша святы́я обтели иноческаго спасения, в нихже спасающиися при́сно поют ангельскую песнь Христу Богу нашему: Аллилуиа.

Икос 4

Слышавше святы́я глаголы Христова Евангелия, избранницы небеснии вся презреша су́етная мира сего и в путь свя́тый поидоша, нося́ще благо́е иго Спаса нашего, житием своим во пло́ти ангелом святым уподо́бишася, иму́ще предивную Игу́мению над всеми их святыми обительми, по всей вселенной, яко зве́зды небесныя, сияющими, к нейже и вопием всегда: Радуйся, премудрая Игу́мение монашества православнаго; радуйся, спасение народа богоизбра́ннаго. Радуйся, сто́лпе девства и океане милосердия; радуйся, вечная отрадо райскаго веселия. Радуйся, прибежище кающимся грешником; радуйся, сокровище убогим подвижником. Радуйся, всю вселенную любовию покрывающая; радуйся, славою небесною сатану во ад низвергающая. Радуйся, божественная радосте ангелов и человеков; радуйся, яко плач принесла еси демоном во веки. Радуйся, единая надеждо веры православныя; радуйся, Мати Господня и наша всеславная. Радуйся, Пресвятая Богородице Дево, Святы́я Горы́ Афо́на и всея́ вселе́нныя православных обителей всечестна́я Игу́мение.

Кондак 5

Боготечную жизнь праведницы проидоша и небеснаго отечества с радостию достиго́ша, веселятся о Господе со ангелы святыми во вся ве́ки. Мы же, их собратия и соратницы на поприщи спасения, милостию Божиею подвизаемся во святых обителех, пою́ще хвалебныя песни к Богу: Аллилуиа.

Икос 5

Ви́деша избранницы Господни скоропреходящую славу мира сего, яко непостоянно богатство, красота увядает, счастие скоротечно, скорби же, печали и отчаяние и всякая злоключения – при́снии спутницы жизни сея́, в конце же смерть телесная, всем лю́дем неизбежная, – святою убо верою вечная селения небесная созерцаху и возлюби́ша тесный и прискорбный путь монашескаго жития, иде́же Пресвятая Богородица Сама о Господе игуменствует, руководящи спасающихся духовных чад Ея, хвалебно к Ней взывающих: Радуйся, единое спасение душ наших; радуйся, райское утешение всех скорбящих. Радуйся, Святы́я Горы́ Афо́нския Просветительнице; радуйся, всея́ вселе́нныя Покровительнице. Радуйся, надежное прибежище всем кающимся; радуйся, тихое пристанище от бед спасающимся. Радуйся, Лавры Пече́рския Строительнице; радуйся, Поча́евския обители Защитнице. Радуйся, Экономиссо Лавры Афанасия Афо́нскаго; радуйся, книго Христова Завета новосио́нскаго. Радуйся, всех святых во едино собравшая; радуйся, христианом православным путь в рай указавшая. Радуйся, Пресвятая Богородице Дево, Святы́я Горы́ Афо́на и всея́ вселе́нныя православных обителей всечестна́я Игу́мение.

Кондак 6

Проповедницы благодатнаго равноангельнаго жития во пло́ти яви́шася отцы́ преподобнии Антоний Великий, Пахомий, Макарий, Феодосий и прочии преподобнии отцы́ и матери, ихже житию со́нми последоваша всех преподобных, наследницы бывше райских обителей со всеми святыми. И мы, им ныне подражающе, во ангельском чине живуще, воспеваем Спасителю мира хвалебныя гласы: Аллилуиа.

Икос 6

Возсия́ образ жития равноангельскаго для всех, ищущих спасения вдали от всех суе́т мирски́х, примером Самого Христа Спаса и Бога нашего и Его Пречистыя Матере, Приснодевы Марии Богородицы, Предтечи Господня Иоанна и премногих святы́х угодников, ихже житию подражают вси преподобнии, под державным водительством Владычицы вселе́нныя, всечестне́йшия Игу́мении православных монашеских обителей, Марии Богородицы, хвали́мыя от всех святых предивными похвалами си́це: Радуйся, православнаго монашества Мати Игу́мение, радуйся, их ангельскаго жития вечное спасение. Радуйся, блага́я Наставнице на путь небесныя жизни; радуйся, Настоятельнице монашеския отчизны. Радуйся, скорая защито всех сиротствующих; радуйся, яко подвижником святым венцы всегда готовиши. Радуйся, всех праведников любящая; радуйся, кающихся грешников милующая. Радуйся, яко Твоя любы́ Божией любви уподобляется; радуйся, яко всяка тварь Тобою о Господе спасается. Радуйся, радосте божественнаго веселия; радуйся, всего мира покрове и спасение. Радуйся, Пресвятая Богородице Дево, Святы́я Горы́ Афо́на и всея́ вселе́нныя православных обителей всечестна́я Игу́мение.

Кондак 7

Хотя скорбный путь к небеси́ благоустроити, Господь наш Иисус Христос благослови Матери Своей, да игу́менствует над всеми православными иноческими обительми, по всей вселенней сущими, руководящи в селения небеснаго рая́ сонмы избранников, ищущих спасения и пою́щих Изба́вителю Богу нашему: Аллилуиа.

Икос 7

Новую жизнь образом ангельскаго жития показаша отцы́ преподобнии и матери, зане́, вся оста́вльше сладости мира ceгo греховнаго, возлюби́ша шествовати к небеси́ путем Царя Славы Христа Бога нашего, скорбьми и страда́ньми, и бы́ша мученицы без кро́ве, терпя́ще вся злая Царствия ради Божия, е́же и получи́ша. И ныне со́нми преподобных шествуют таковым путем, водимии Ма́терию Божиею, яко всечестне́йшею Игу́мениею их преподобнаго жития, превозносимою от них хвалами: Радуйся, Мати Господа, Судии́ всеправеднаго; радуйся, во Игу́мению от века предъизбранная. Радуйся, чистотою телесе́ всю тварь превозшедшая; радуйся, святостию души́ Своея́ небеса украси́вшая. Радуйся, благовестие небеснаго отечества; радуйся, духовный кри́не православнаго монашества. Радуйся, усердная Молитвеннице о всех православных; радуйся, благая Строительнице святым избра́нным. Радуйся, тихое пристанище всем странствующим; радуйся, поко́ище блаженныя старости. Радуйся, Неве́сто Неневе́стная; радуйся, яко на небеси́, та́кожде на земли́ и во аде зна́емая. Радуйся, Пресвятая Богородице Дево, Святы́я Горы́ Афо́на и всея́ вселе́нныя православных обителей всечестна́я Игу́мение.

Кондак 8

Странное житие иму́ще Христовы избранницы, оста́вльше телесныя сладости и утехи, возлюби́ша путь скорбе́й и страданий: в пустынях, на о́стровех, разселинах скал и дубравах со зверьми пожиша равноангельно, и та́мо устрои́ша Божиею волею святы́я обители, в нихже воспева́ху чрез все житие свое херувимский ко Господу глас: Аллилуиа.

Икос 8

Весь бе всемогущий Бог во уме́х и сердца́х избранных Своих угодников, по рече́нному: «Дивен Бог во святы́х Своих», прославляше святы́я Своя, собирая из среды мира греховнаго, водворяя во святы́я обители, да хва́лят имя святое Его со святыми ангелы во веки вечныя, и Владычица Богородица, Всеблага́я Мати Господня, в тех премудро игу́менствует, спасающи от бед и скорбе́й смиренно восхваляющих милости Ея: Радуйся, честнейшая всея́ твари вселе́нныя; радуйся, сладчайшая, яко Божие селение. Радуйся, святы́й покрове жизни нашея; радуйся, Божественный источниче сладости сладчайшия. Радуйся, вся наша наде́ждо спасения и покое; радуйся, по Бозе все наше упование в жизни земной. Радуйся, яко воскре́се Сын Твой и Господь; радуйся, яко воскресит Той всяку плоть. Радуйся, Ю́же воспевают небесная воинства; радуйся, хвалимая от всех святых по достоинству. Радуйся, великая радосте моего спасения; радуйся, всего мира Божественное утешение. Радуйся, Пресвятая Богородице Дево, Святы́я Горы́ Афо́на и всея́ вселе́нныя православных обителей всечестна́я Игу́мение.

Кондак 9

Всякое мудрова́ние земное презревше святи́и угодницы, яко юродиви Христа ради яви́шася, странствующе на земли́, не иму́ще нигде телеснаго покоя Царствия ради Небеснаго, е́же получи́ша, и мы, им подражающе житием и подвиги, любовию ко Господу, егоже и восхваляем, ангельски поем: Аллилуиа.

Икос 9

Вити́и премудрости Господней яви́шася отцы́ преподобнии Пахомий Великий, Антоний Великий, Макарий Египетский и всех православных иноков начальницы, просиявшии во святых, ибо своим святым житием равноангельским на земли́ и словесы́ спасения спасо́ша премногия сонмы учеников, истинных рабов Христовых по всей вселенней, воле́нием Пресвятыя Троицы, под державным игу́менством Владычицы Богородицы, Ю́же от всея́ души всегда хвали́ша та́ко: Радуйся, державная Владычице вселе́нныя; радуйся, Игу́мение нашего спасения. Радуйся, Бога Отца Дщи вселюбезная; радуйся, яко Матерь Сыну Божию сподобилася еси́ быти за святость и смирение. Радуйся, Бога Духа Святаго прекрасная пала́то; радуйся, на небеси́ и на земли́ любовию всебогатая. Радуйся, Инокине честнейшая херувим; радуйся, Мати Бога, превысшая серафим. Радуйся, святых мучеников предивное терпение; радуйся, апостолов Христовых всемудрое учение. Радуйся, всех святых оправдание; радуйся, по́моще наша в земных страданиих. Радуйся, Пресвятая Богородице Дево, Святы́я Горы́ Афо́на и всея́ вселе́нныя православных обителей всечестна́я Игу́мение.

Кондак 10

Спасти хотя род человеческий, Господь наш Иисус Христос сни́де с небесе́ во юдо́ль плача и скорбе́й и Своими страданьми Божественнаго жития подаде́ пример всем святым, желающим достигнути небеснаго вечнаго покоя, в преподобии и правде хвалящим Его ангельскими гласы: Аллилуиа.

Икос 10

Стена крепости божественныя явися всечестна́я наша Мати Игу́мения, охраняющи, спасающи и покрывающи вся святы́я обители иноческия жизни во Святе́й Горе́ Афо́нстей и по всей вселенней, от зари веры христианския и до дне Страшнаго Суда Христова, спасающи божественною милостию преподобныя Своя, при́сно хвалящия Ея щедроты сими словесы́: Радуйся, Пресвятая Мати Игу́мение; радуйся, источниче духовнаго воскресения. Радуйся, всю вселенную покрывающая; радуйся, Церковь Христову увеселяющая. Радуйся, пророческая славо и ве́нце; радуйся, и моея́ жизни блаженный конце. Радуйся, яко краснейши неба еси и сладши рая́; радуйся, образе святаго жития. Радуйся, любящая Свой жребий Афо́н; радуйся, украшающая Иерусалим и Сион. Радуйся, Мати милосерднаго Судии́; радуйся, проливающая о мире Своя слезныя струи́. Радуйся, Пресвятая Богородице Дево, Святы́я Горы́ Афо́на и всея́ вселе́нныя православных обителей всечестна́я Игу́мение.

Кондак 11

Пение всеумиле́нное приносят вси святи́и в небесных селениих райских, со святыми ангелы хваля́ще и превознося́ще Пресвятую Троицу, «Свят, Свят, Свят» вопиюще. И мы, православнии и́ноцы, верою сие́ зряще, вопием непрестанно к Богу нашему: Аллилуиа.

Икос 11

Светоприемную свещу́ православнаго жития собо́ри преподобных прие́мше, со всеми святыми, просиявшими от века, в путь небесный ше́ствоваху, иму́ще всемогущую о Господе Владычицу, Матерь Емману́илову, яко Игу́мению их богоподобнаго жития́, и с радостию вопия́ху к Ней похвала́ми си́це: Радуйся, Собирательнице наша в обители спасения; радуйся, подающая нам образ смирения. Радуйся, Игу́мение Святы́я Афо́нския Горы́; радуйся, Настоятельнице всех святых монастырей. Радуйся, Монахине, житием всечестне́йшая; радуйся, Воеводо во бране́х всесильнейшая. Радуйся, чад церковных Хранительнице; радуйся, живых и уме́рших Спасительнице. Радуйся, сиротствующих Мати благодатная; радуйся, в скорби сущих отра́до приятная. Радуйся, спасение православных христиан; радуйся, святых щедрот божественный океан. Радуйся, Пресвятая Богородице Дево, Святы́я Горы́ Афо́на и всея́ вселе́нныя православных обителей всечестна́я Игу́мение.

Кондак 12

Благодать подает всегда пресладкий Спаситель наш всем рабом Своим, в преподобии и святости подвизающимся на поприщи земна́го жития; уже́ бо со́нми святых, прославленных Православною Церковию, в райских селениих воспевают Пресвятую Троицу со всеми небесными силами, и мы, им подражающе, вопием дивному во святых Богу: Аллилуиа.

Икос 12

Пою́ще вся милости Господни и щедроты, нам, недостойным иноком, при́сно ниспосылаемыя, и всечестно́е игу́менство над всеми нашими обительми нашея всеблагодатныя Владычицы Богородицы, радуемся божественне и веселимся, яко сподо́бихомся спасение совершати во святых обителех, иде́же премнози со́нми преподобных подвижников достигоша Небеснаго Царствия, егоже и мы святым покровом нашея Небесныя Матере Игу́мении да достигнем за труды спасения и похвальная сия́ словеса́: Радуйся, Пречистая Дево Богородице; радуйся, спасения нашего Помощнице. Радуйся, Игу́мение всех всещедрая; радуйся, яко в преподобии Ты еси первая. Радуйся, покровом милости весь мир покрывающая; радуйся, сирот и странных питающая. Радуйся, юных целомудрия Наставнице; радуйся, о всех людех блага́я Печальнице. Радуйся, рода пра́отца Адама веселие; радуйся, тихое пристанище спасения. Радуйся, всещедрая наша Мати Игу́мение; радуйся, благое начало и конце́ нашего песнопения. Радуйся, Пресвятая Богородице Дево, Святы́я Горы́ Афо́на и всея́ вселе́нныя православных обителей всечестна́я Игу́мение.

Кондак 13

О Всепетая наша Мати Игу́мение, Преславная Владычице Богородице! Приими́ сия́ моления наша, от всея́ души́ Тебе ныне нами возносимая, и сподо́би нас в чи́не ангельском достигнути Небеснаго Царствия, иде́же вси святи́и со ангелы воспевают непрестанными гласы хвалу Пресвятей Троице, Богу нашему: Аллилуиа.

Этот кондак читается трижды, затем 1-й икос «Ангели плотию суще...» и 1-й кондак «Избранней от сложения мира...».

Молитва

О Пречистая Владычице Богородице, всечестне́йшая наша Мати Игу́мение всех православных святы́х обителей иноческаго жития, во Святе́й Горе́ Афо́нстей и по всей вселенней су́щих! Приими́ смиренная моления наша и принеси яко Всещедрому Богу нашему, да спасет ду́ши наша Своею благодатию. Воззри на ны милосердным Твоим оком и соверши Сама о Господе наше спасение, поне́же без милости Спаса нашего и Твоего святаго о нас хода́тайства не возможем окаяннии совершити своего спасения, яко окаля́хом житие наше в суета́х мирски́х, ибо время прибли́жися жа́твы Христовы и день Страшнаго Суда приспе́. Мы же, окая́ннии, погибаем в бездне греховней нераде́ния ради нашего, по рече́нному от святы́х отце́в, первоначальников ангельскаго во пло́ти жития, яко последнии монаси нерадением жития своего уподобятся мирски́м человеком, е́же и сбысться днесь, ибо последнее иночество наше плавает житием своим в мори житейском, посреде́ великия бури и непогоды, ибо наша святы́я обители во прасе пребывают, грехов бо ради наших Всеправедный Судия́ Господь наш Иисус Христос та́ко благоволи́, мы же, недосто́йнии, не и́мамы, где главы́ подклони́ти. О сладчайшая наша Мати Игу́мение! Собери ны, разсеянное стадо Христово, воедино и спаси православное монашество последняго века сего, и всех православных христиан сподо́би райския жизни со ангелы и всеми святыми во Царствии Христа Бога нашего, Емуже честь и слава, со Безначальным Его Отце́м и со Пресвятым, Благим и Животворящим Его Духом во веки веков. Аминь.