Акафист преподобному Макарию Желтоводскому, Унженскому
Празднование 25 июля/7 августа
Кондак 1
Избра́нный от Воеводы сил небесных и Господа Иисуса Христа, преподобне отче наш Макарие, яко име́яй ве́лие дерзновение к Богу, молися вы́ну о спасении душ наших и избавлении нас от всяких бед и напастей, да зовем ти: Радуйся, Макарие, предивный чудотворче.
Икос 1
Ангела на земли́ яви́ тя Творец небесе́ и земли́, вся бо земная вмени́л еси за уме́ты, да обря́щеши Единаго Христа; темже вси, зря́ще твое христоподобное на земли́ житие, вопием ти: Радуйся, от утробы ма́терния предугото́ванный в чистое и непорочное жилище Пресвяты́я Троицы; радуйся, Богом Отце́м предызбра́нный. Радуйся, Богом Сыном искупле́нный; радуйся, Богом Духом Святым освященный. Радуйся; Господа паче всего возлюбивый; радуйся, отца и матерь ра́ди Христа оставивый. Радуйся, званию Духа благодати повину́вшийся; радуйся, отвергшийся себе ра́ди Христа Иисуса. Радуйся, крест Христов на себе вземший; радуйся, вслед Христа последовавший. Радуйся, до конца жизни твоея́ в терпении и подвизех неослабно пребы́вый; радуйся, яко претерпевая мужественно вре́менная и настоящая веселился еси будущими и вечными. Радуйся, Макарие, предивный чудотворче.
Кондак 2
Преподобне отче Макарие, ты, сый еще младенец, егда быва́ше звон церковный, плача и детски крича́, яко смысляй, изъявля́л еси желание, да в церковь несе́н будеши. Совершающуся же церковному в храме Божием пению радовался и веселился еси. Сего ра́ди благовернии родителие твои ноша́ху тя на каждое церковное пение и прославля́ху о тебе Господа Бога, вопиюще: Аллилуиа.
Икос 2
Разум, неразумева́емый мудрствующим плотска́я, стяжа́л еси, и все сердце твое впери́л еси в небесная, сего ра́ди вопием ти: Радуйся, яко по вся дни в церковь Божию ходил еси; радуйся, яко в сладость церковнаго чтения и пения послушал еси. Радуйся, от юности навы́кший богоугодному добронравию; радуйся, возлюбивший красоту дома Божия и место селения славы Господни. Радуйся, изво́ливый примета́тися в дому́ Божии паче, неже жити в селениих гре́шничих; радуйся, во дни и в нощи́ непрестанно молитвы к Богу возноси́вый. Радуйся, в чисту жертву Бо́гови не то́чию тело, но и душу всю принесы́й; радуйся, всего себе на служение Богу преда́вый. Радуйся, яко превыше сверстников твоих в разумении Слова Божия бы́ша паче меда и сота усто́м твоим; радуйся, яко ма́слина в дому Божии насажде́нная. Радуйся, блаженне, яко уподо́бился еси древу, насажде́нному при исхо́дищих вод, принося́щему плоды; радуйся, Макарие, предивный чудотворче.
Кондак 3
Согревающу Духу Святому сердце твое, преподобне отче, возжелел еси вельми́ и́ноческаго чина, возлюбив Отца Небеснаго паче земных родителей твоих, и изшел еси ота́й из до́му родителей в и́ноческую обитель; обре́т же на пути ни́ща, худу одежду нося́ща, испросил еси ту себе, дав ему свое доброе одея́ние ра́ди Господа Бога Иисуса Христа, нас ра́ди обнищавшаго, да мы нищетою Его обогатимся и вопием Ему вы́ну: Аллилуиа.
Икос 3
Пришед во святую обитель, преподобне отче наш Макарие, молил еси святаго Дионисия архимандрита, да приня́т будеши в чин и́ноческий, сказу́я себе безродна, сиро́тствующа, ни́ща, желающа работати Богу. Архимандрит же проразуме́ в тебе иму́ща быти сосуд избра́нный Святому Духу, прия́ и облече́ тя в ангельский образ. Ты же вся добродетели, подоба́ющия иноком, исполнял и во всем угождал еси Богу и наставнику твоему, якоже самому Христу, та́кожде и братиям, и показался еси в новонача́лии своем совершен быти инок и добрый подвижник. Темже достойно вопием ти: Радуйся, от рук святаго Дионисия и́ночество любезне прия́вый; радуйся, сожительство и собеседничество с преподобными избра́вый. Радуйся, и́ноческаго жития скорби и тесноту возлюбивый паче утешений и сладостей мира; радуйся, поревнова́вый житию и подвигом древних преподобных отец. Радуйся, истиннаго послушания настоятелю и всей во Христе братии образ показа́вый; радуйся, всякое послуша́ние со смирением и кротостию соверши́вый. Радуйся, чистоты душевныя и телесныя крепкий ревнителю и хранителю; радуйся, бдением, постом и коленопреклонении плоть свою умертви́вый. Радуйся, безмолвию и богомыслию от юности научивыйся; радуйся, вы́ну молчание с незлобием хранивый. Радуйся, Словом Божиим, аки мече́м, супроти́вныя силы побеждавый; радуйся, по́стничеством и добродетельми превозшедый бывших с тобою иноков. Радуйся, Макарие, предивный чудотворче.
Кондак 4
Буря помыслов смуща́ше родители твоя, отче наш Макарие, егда внеза́пу оставил еси ота́й дом их; чрез три же лета обретше тя во святе́й обители, радовахуся и славяху Бога, вопиюще Ему: Аллилуиа.
Икос 4
Слышавше, преподобне отче Макарие, ближнии и дальнии, я́же о по́стничестем житии твоем, удивляхуся и прославляху тя всюду, ты же, яко и́щущий славы Единаго Бога, бегал еси славы, я́же от человеков, скрываяся в пустынях. Вся же на пользу строяй, Бог прослави тебе, раба Своего, не то́чию в христианех, но и в ага́рянех. Темже мы вопием ти: Радуйся, граде верху́ стоя́й, не моги́й укрытися; радуйся, свети́льниче, вся озаряющий чудесы́ и подвиги твоими. Радуйся, звездо́, показующая Солнце правды; радуйся, заре́ Божественнаго Света. Радуйся, добрыми делы твоими всех, зря́щих тя, подвиза́яй к прославлению Отца, И́же на небесе́х; радуйся, яко потща́лся еси прежде сам сотворити волю Божию и после научити других. Радуйся, твердый сто́лпе и́ночества; радуйся, яко мудр вождь, приведы́й многих к вечному спасению. Радуйся, по́стничества, терпения, жажды и а́лчбы, и наготы образе предивный; радуйся, благо́е иго и легкое бремя Христово измла́да возлюби́вый. Радуйся, на земли́ ангельски поживый; радуйся, земный ангеле и небесный человече. Радуйся, Макарие, предивный чудотворче.
Кондак 5
Боготечная звезда всея́ страны́ яви́лся еси, преподобне отче Макарие, всем быв образ словом, житием, любовию, духом, верою, чистотою, воспевая Господу Богу: Аллилуиа.
Икос 5
Господь Бог, очища́яй скорбьми́ и напастьми избра́нныя Своя, яко злато и сребро, попусти разоритися созда́нней тобою обители, на нюже внеза́пу нападше, ага́ряне всех, в ней бывших, мечным посечением, аки класы на ниве, пожа́ша, тебе же, преподобне отче наш, жива приведо́ша к воеводе своему. Сей же, узре́в ангелоподобное лице твое и уведе́в, яко ты никомуже зло соделал еси, но всем едино добро творил еси, Богу жестокое сердце его умягча́ющу, даде́ свободу тебе и еще же тебе ра́ди свободы прочил пленныя до четы́редесяти мужей, разве жен и детей. Темже вопием ти сицева́я: Радуйся, кротостию и благостию свое́ю сердца неверных победивый; радуйся, злобу на жалость преложи́вый. Радуйся, благочестивыя люди от плена ага́рянскаго свободи́вый; радуйся, многия от тяжких напастей и скорбе́й изба́вивый. Радуйся, яко честно́му погребению предал еси братию обители, сарацы́нами избиенную, якоже оныя дре́вле преподобныя отцы, и́же в Сина́е и Раи́фе; радуйся, яко единою уме́рый ми́рови не о себе, а о ближних печалился еси. Радуйся, яко люди, с тобою отпу́щенныя из плена, тща́ливе охранял еси, да не паки в ага́рянския руки впадут, радуйся, яко научил еси изведе́нныя тобою люди возложи́ти всю надежду на Единаго Бога. Радуйся, яко был еси им в пути и вождь, и учитель, и уте́шитель; радуйся, яко с молитвою изшел еси в страну Га́лическую. Радуйся, яко, шествуя путе́м, положил еси основание Свияжския обители; радуйся, яко ревностию поревновал еси о спасении душ, искупле́нных Иисусом Христом. Радуйся, Макарие, предивный чудотворче.
Кондак 6
Все житие твое, преподобне отче Макарие, есть немо́лчное пропове́дание веры, надежды и любве́, я́же к Богу и к ближним, влия́нныя в душу твою Святым Духом, Емуже вопием: Аллилуиа.
Икос 6
Новаго Моисея показа́ тя, преподобне отче наш Макарие, Господь Бог, егда люди, свободи́вшияся от плена, безбедно провел еси непроходи́мыми лесами и блатами и изнемога́ющия от глада дивно препита́л еси. Сего ра́ди вопием ти: Радуйся, яко гладным людем возбрани́л еси разорити пост, от Святы́я Це́ркве уста́вленный; радуйся, яко уте́шил еси оныя словесы́ богодухнове́нными, укрепля́я в терпении. Радуйся, яко от юности навы́кший поще́нию, небрегл еси о себе; радуйся, яко о народе гла́днем истаева́я печалию, твоими словесы́ и молитвами укрепил еси его в изнеможе́нии от неяде́ния. Радуйся, яко гладнии лю́дие пищею духовною, аки хлебом, укрепля́еми, му́жествоваху; радуйся, яко у Бога испросил еси скота, и́же бысть на довольную пищу алчущим. Радуйся, яко вся люди привел еси безбедне в пределы Га́лическия страны, во град Унжу; радуйся, яко благовернии лю́дие срето́ша тебе че́стне, прия́ша любезне, яко ангела Божия. Радуйся, яко ведо́мыя тобою люди испове́даша пред всеми на себе милость Божию; радуйся, яко слышащий, ка́ко Господь Бог свободи́ благоверныя люди от пленения и гладныя на́сыти, прославиша Бога и тебе, Его угодника. Радуйся, яко Га́лическую страну чудесы́ твои ми озарил еси; радуйся, яко светильник горя́й и светя́й яви́лся еси. Радуйся, Макарие, предивный чудотворче.
Кондак 7
Почитания и славы, я́же от человек, во граде не терпя́, паки пустыннаго безмолвия возжелел еси, преподобне отче, и, обре́т пустынное место, возлюбил е, водрузил еси крест, водворился еси в созда́нной тобою келлии, да пое́ши вы́ну Богу: Аллилуиа.
Икос 7
В пустыни, в нюже вселился еси, преподобне отче Макарие, по малом вре́мени обитель иноком в пребывании устроися Божиим изволе́нием, и якоже обыкл еси, в преподобии и в правде дни и нощи работал еси Бо́гови. Мы же, прославляюще о тебе Господа Бога, вопием ти: Радуйся, единое на потребу всегда иска́вый; радуйся, и́щущему добрый бисер уподо́бивыйся и ра́ди сего вся земная оста́вивый. Радуйся, очи ума и сердца своего на высоту небесную вперивый; радуйся, труды и Подвиги своими ангелов и человеков удививый. Радуйся, нищетою телесною и духовною Царствие Божие обреты́й; радуйся, умиления и сокрушения слеза́ми на небесе́х вечное утешение прия́вый. Радуйся, яко ра́ди а́лчбы и жажды на земли́ насыща́ешися блаженством на небеси́; радуйся, яко кротостию твое́ю и незло́бием твоим наследовал еси вечную землю. Радуйся, яко мир Божий и сам тщался име́ти со всеми, и водворя́л еси среди враждующих, и сего ра́ди вчине́н еси в лик сынов Божиих; радуйся, имене ра́ди Христова многи скорби, болезни, всено́щная бдения, коленопреклонения, подвиги и труды понесы́й. Радуйся и веселися, яко мзда твоя многа на небесе́х; радуйся, Макарие, предивный чудотворче.
Кондак 8
Дивный во святых Господь Бог дивно прославляется в тебе, преподобне отче Макарие; облече́ бо тя силою свыше цели́ти неду́ги и болезни душевныя и телесныя и подавати полезная всем, с верою и любовию вопиющим к Нему о тебе: Аллилуиа.
Икос 8
Благодать Божию, сущую в тебе, преподобне отче Макарие, неоску́дно подавая требующим, отрокови́цу некую бесну и слепу крестным зна́мением с молитвою исцелил еси. Дивя́щеся силе Божией, обитающей в тебе, взываем ти: Радуйся, благодатный источниче исцелений; радуйся, ту́не прия́вый благодать от Господа Бога, ту́не и подава́яй. Радуйся, име́яй ве́лие дерзновение ко Господу Богу; радуйся, яко никтоже с верою прося́й от тебе. Радуйся, яко всено́щными молитвами всю бесо́вскую прелесть посрами́вый; радуйся, слепым зрение и всем боля́щим исцеление подаваяй. Радуйся, сокровище дарований Божественных; радуйся, яко хода́тайством твоим даров Духа Святаго, укрепляющих в брани против врагов спасения, сподобля́емся. Радуйся, яко крин неувядаемый, в пустыни яви́лся еси; радуйся, цвете, благоуханием своим вся исполня́яй. Радуйся, ре́ки воды живыя источаяй; радуйся, верных Господа рабов благую часть избра́вый. Радуйся, Макарие, предивный чудотворче.
Кондак 9
Егда преста́вился еси от земли́ к небесным обителем, лики ангелов и избра́нных Божиих радостно срето́ша тебе, с ними же ты вы́ну вопие́ши к Богу: Аллилуиа.
Икос 9
Егда прибли́жися время преставле́ния твоего по Божию смотрению, ты, преподобне, пришел еси в град Унжеск, иде́же испо́лнь дней и богоугождения, святую душу твою предал еси в ру́це Божии. А́бие исполнися чуднаго благоухания весь град, и окре́стнии лю́дие обоня́ху благоухание, дивное, аки от фимиама и смирны исходя́щее. Вси удивляющеся, яко аще Господь Бог почтил есть преставле́ние тебе, угодника Своего, прославля́ху Господа Бога. Стече́ся к нетленному и благоухающему телу твоему множество народа, и со свещьми́ и со псалмы несоша е в пустынную обитель, иде́же погребо́ша честно́ и вопия́ху ти: Радуйся, Господу до конца послужи́вый; радуйся, кончину свою предуве́девый. Радуйся, к сонму избра́нных Божиих сопричтенный; радуйся, воздаяние от Бога по правым делом твоим восприя́вый. Радуйся, с пророки водвори́выйся; радуйся, со апостолы вселивыйся. Радуйся, венце́м нетленным увенча́нный; радуйся, яко Господа Бога со всеми святыми о нас грешных умоляеши. Радуйся, на браце Небеснаго Жениха быти достоин я́вльшийся; радуйся, тленную жизнь на нетленную премени́вый. Радуйся, угодниче Христов, блаженству тезоимени́тый; радуйся, в радость Господа твоего вшедый. Радуйся, Макарие, предивный чудотворче.
Кондак 10
Спасти хотя́й вся, Господь Бог исполня́ет Своими великими даровании избра́нных рабов Своих, да их чудесы́, молитвами и равноангельным житием мы возбуждаемся от жизни греховныя ка жизни святе́й, воспевая вы́ну Ему: Аллилуиа.
Икос 10
Стена и помощник яви́лся еси, блаженне Макарие, всем прибегающим к тебе; темже и нам, призывающим тя, бу́ди заступник, избавляя ны от искушений, скорбе́й и напастей, да восхваляем тя, зовуще: Радуйся, яко твоими молитвами от грехов, падений, страсте́й и злых обычаев воздвигаеши нас грешных; радуйся, яко при́сно возбуждаеши нас к подражанию твоему святому житию. Радуйся, истиннаго покаяния наставниче; радуйся, обличителю немо́лчный нерадя́щим о вечнем спасении. Радуйся, о всех верных, притекающих к тебе, предста́телю; радуйся, на невидимыя и видимыя враги поборниче. Радуйся, в беда́х, напастех и ну́ждах душевных и телесных утешение и помощь подаваяй; радуйся, от смертоносныя язвы избавляяй. Радуйся, нашествие сопроти́вных отгоняяй; радуйся, пла́мень, губящий град, погашаяй. Радуйся, ум и смысл врагов помрача́яй; радуйся, лю́бящия Отечество и благочести́выя цари на победу умудря́яй. Радуйся, Макарие, предивный чудотворче.
Кондак 11
Пение благодарственное Господу Богу, в Троице покланяемому и славимому, приносим, яко дарова́л нам в тебе, преподобне отче Макарие, теплаго молитвенника, скораго помощника и дивнаго чудотворца, воспевающе Ему: Аллилуиа.
Икос 11
Светоприе́мна светильника яви́ тя Господь Бог, преподобне Макарие, егда обре́тены бы́ша честны́я мощи твоя, благословенныя нетлением, благоухание испущающия и чудесы́ окре́стныя страны озаряющия; темже вси радующеся, вопием ти: Радуйся, яко и по смерти жив пребываеши, явля́я в себе силы Божественныя; радуйся, чудесы́ твоими землю наполня́яй. Радуйся, яко благочести́вую жену от плена ага́рянскаго свободи́л еси; радуйся, яко немому уста отверзл еси. Радуйся, яко пока́явшемуся во гресе́х зрение возвратил еси; радуйся, яко разсла́бленному здравие дарова́л еси. Радуйся, яко многи слепыя и немощству́ющия исцелил еси; радуйся, яко верныя люди от нападения ля́хов избавил еси. Радуйся, яко молитвами твоими врази, нападшии с оружием на обитель твою, слепотою пораже́ни и страхом смяте́ни бы́ша, и мнози в реце́ потопо́ша; радуйся, ограждаяй вы́ну обитель твою от бед и зол. Радуйся, отчаянных надеждо и помоще; радуйся, от Бога проси́мая тобою прие́мляй. Радуйся, Макарие, предивный чудотворче.
Кондак 12
По плене́нии и опустошении Желтоводския обители от ага́рян летом многим прешедшим трикра́ты яви́лся еси некоему иноку богоугодну Аврамию, повелевая, да и́дет в Желтоводскую пустыню и всели́тся на месте, иде́же бе обитель. Инок Аврамий водвори́ся ту и ходи в обитель Унженскую, иде́же икону твою списа́в, принесе́ ю на благословение, и нача́ша бывати чудеса от сея́ честны́я иконы. Темже мы вопием прославльшему тя Богу: Аллилуиа.
Икос 12
Пою́ще зна́мения и чудеса, я́же твори́ши живущею в тебе благодатию Божиею, блаженне Макарие, восхваляем тя си́це: Радуйся, яко и по преставле́нии твоем возставил еси запустевшую обитель твою; радуйся, яко паки собрал еси и́щущих спасения и обнови́л еси Божественную хвалу. Радуйся, яко святое место, тобою любезне избра́нное, не оставляти заповедал еси Аврамию; радуйся, яко тобою монахов множество в подвизех и ско́рбех своих укрепление прие́млют. Радуйся, яко обители, тобою созда́нныя, молитвами твоими, аки покровом, покрываются; радуйся, стране сей и Отечеству нашему украшение. Радуйся, надеждо и прибежище в мори жития сего плавающих; радуйся, твердое ограждение усердно работающих Господу Богу. Радуйся, царе́м благочести́вым помоще; радуйся, патриархов и святителей утешение. Радуйся, всех, усердно притекающих к тебе, от искушений и бед скорое избавление; радуйся, яко хода́тайством твоим ве́рнии жизнь вечную получают. Радуйся, Макарие, предивный чудотворче.
Кондак 13
О преподобне и богоносне отче наш Макарие! Приими́ сие́ ма́лое молитвенное приноше́ние наше и со Пресвятою Владычицею Богородицею и всеми святыми принеси́ молитву к Господу Богу, да изба́вит нас от врагов видимых и невидимых, от всяких скорбе́й и бед, от напрасныя смерти и от будущих мук, и сподо́бит Своего Небеснаго Царствия, иде́же вси, при́сно веселя́щеся и торжествующе, немо́лчно вопиют к Богу: Аллилуиа.
Этот кондак читается трижды, затем 1-й икос «Ангела на земли яви тя Творец...» и 1-й кондак «Избранный от Воеводы сил небесных и Господа Иисуса Христа...».
Молитва
О преподобне и богоно́сне отче наш Макарие! Веруем, яко ты, предстоя́ Престолу Пресвяты́я Троицы, ве́лие и́маши дерзновение в молитвах ко Всемилостивому Господу Богу, и́же всегда послушает тебе, вернаго раба и угодника Своего. Сего ра́ди со умилением смиренно припа́даем к тебе, святче Божий, не премолчи́ о нас молитися ко Господу Богу, в Троице покланяемому и славимому, да милостиво призре́в на ны, не попусти́т нам погибнути во гресе́х наших, но да возста́вит падших, да подаст исправление злому и окаянному нашему житию, от грядущих грехопадений восхища́я, и да простит нам вся, ели́ка сами собою или чрез других кого согреши́хом мыслию, словом и делом, от рождения до сего часа́. Ты, подвижниче добродетелей, отче наш Макарие, ве́си не́мощь естества́ нашего и тяжесть и скорбь времен настоящих, моли убо вы́ну Господа Бога, да николи́же нас оставляет Его неизрече́нное милосердие, но да хранит нас от мирски́х искушений, от диа́вольских сетей и от плотски́х похотей, да прии́мем от Господа Бога тобою и вся потребная к жизни вре́менней, освобождение от бед и напастей, а среди их неосла́бное терпение до конца. Испроси нам у Господа Бога в мире и покаянии скончати живот наш и невозбра́нно прейти от земли́ на небо, мыта́рств же и бесо́в воздушных и вечныя муки избавитися и сподо́битися Царства Небеснаго, с тобою и со всеми святыми, угодившими Господу Богу и Спасителю нашему Иисусу Христу. Емуже подобает всякая слава, честь и поклонение со Безначальным Его Отце́м и с Пресвятым и Благим и Животворящим Его Духом, ныне и при́сно и во веки веков. Аминь.