Акафист преподобному Никодиму Кожеезерскому
Празднование 3/16 июля
Кондак 1
Избра́нный от Воеводы сил небесных, прии́м крест свой, последовал еси Христу, преподобне отче наш Никодиме. Темже, яко дерзновение име́яй ко Господу, моли́ся вы́ну, от всяких бед и скорбе́й избавитися нам и душ спасение получи́ти, да благодарственне зовем ти: Радуйся, Никодиме, скорый наш помощниче, Кожеезе́рский чудотворче.
Икос 1
Ангела на земли́ яви́ тя милосердый Творец небесе́ и земли́: вся бо земная в уме́ты вмени́л еси, преподобне Никодиме, да Христа приобря́щеши. Темже вси, многотрудное житие и блаженную кончину твою зря́ще, радостно тебе вопием: Радуйся, от детства твоего в жилище Духа Святаго чистое и непорочное предугото́ванный; радуйся, ко и́ночеству гласом свыше призва́нный. Радуйся, от лютаго неду́га чудесне исцеле́нный; радуйся, еще в мире яко пустынник Хозью́гский просла́вленный. Радуйся, от Пафну́тия ко стаду Христову причте́нный и Божественным Писанием науче́нный во спасение; радуйся, от царствующаго града во страну полунощную устремивыйся. Радуйся, во обители Кожеезе́рстей безплотных житие показа́вый; радуйся, в пустыни Хозью́гстей водвори́вся, со врагом спасения брань совершивый. Радуйся, вся прираже́ния того отгнавый, на высоту же добродетелей востеки́й; радуйся, благодати сосуде избра́нный. Радуйся, с небесными лики нетленнаго Царя ублажаяй, на земли́ же вы́ну прославляемый; радуйся, Никодиме, скорый наш помощниче, Кожеезе́рский чудотворче.
Кондак 2
Видя тя Владыка угодна Себе быти, преподобне отче Никодиме, егда млад сый, пасл еси в поли стадо отца твоего, призва́ тя, су́ща именем Никиту, гласом: «Никодиме, Никодиме!» Ты же, сего убоявся, возвратился еси ко родителем, пове́дав им бывшая. Они же, видевше Владычнее к тебе милосердие, благодарственне воспе́ша Богу: Аллилуиа.
Икос 2
Разум добрый от юности стяжа́в, к небесным чистое сердце твое устремил еси, преподобне Никодиме. Сего ра́ди вопием ти: Радуйся, сыне молитвы, рождших тя земледельцев похвало́; радуйся, от младых лет к Церкви Божии прилепи́выйся. Радуйся, труды своя молитвою вы́ну услажда́вый; радуйся, на селе трудя́щу ти ся, к деланию духовному предуказа́нный. Радуйся, родители своя до скончания их че́стне упокоева́вый; радуйся, послуша́ния сыновняго наставниче. Радуйся, от Ива́ньковы ве́си во грады Ярославль и Москву кроткий пресельниче; радуйся, кова́нием гво́здий приобрета́вый потребная. Радуйся, от техже пита́вый и гла́дныя; радуйся, целомудрия и чистоты душевныя рачи́телю. Радуйся, Тайн Божиих верный хранителю; радуйся, Никодиме, скорый наш помощниче, Кожеезе́рский чудотворче.
Кондак 3
Силою свыше от лютыя смерти изба́влен был еси, преподобне Никодиме. Су́щу бо неду́гующу, предста́ ти святы́й Василий, Христа ра́ди юро́дивый, и от чаши своея́ повеле́ испити; ты же, с верою сие́ сотворив, а́бие здрав был еси и благодарственне воспел еси Богу, дивному во святых Своих: Аллилуиа.
Икос 3
Име́яй богатство милосердия неизрече́нное, скоро ру́ку помощи Своея́ простре́ ти Господь, преподобне Никодиме: зане́ с верою к Тому притекл еси, на Него единаго все упование свое возложи́в. Темже мы, видяще веру твою и оправдание ея дивное, умиле́нно вопием ти: Радуйся, благочести́ваго дружества наставниче; радуйся, благонравия ра́ди, злою женою единохудожнаго ти мужа возненавиденный. Радуйся, от тоя́ вкуси́вый я́ства со ядом, имже муж ея у́мре абие; радуйся, Божиим смотрением от верныя смерти изба́вленный. Радуйся, яко, неду́гом чре́вным одержи́м быв, христианскаго терпения наставник показался еси; Градуйся, я́вльшагося ти блаженнаго Василия собеседниче. Радуйся, яко от чаши сего вкуси́в, от неду́га исцелился еси; радуйся, по исцелении единому Богу порабо́тати возжелавый. Радуйся, молитвою указания пути себе проси́вый; радуйся, сие́ прие́мый во гла́се Илии́, пустынное житие ти предре́кшаго. Радуйся, в мире пожив, ничимже Бога прогневавый; радуйся, Никодиме, скорый наш помощниче, Кожеезе́рский чудотворче.
Кондак 4
Бу́ри многих бед и напастей в мире сем бегая, пришел еси, преподобне Никодиме, ко блаженному Илии́, вразумле́ния иский, и тому последовав, вселился еси во обитель и́ноческую Архистрати́га Михаила, отню́дуже, подвигом пустыннаго жития, преселился еси во обители небесныя, иде́же с лики ангельскими пое́ши Богу: Аллилуиа.
Икос 4
Слышав Пафну́тий о гласе, к тебе бывшем, абие проразуме́ тя благодати сосуд избра́н, яви́тися хотя́щь, и во и́ноческий образ облече́ тя, преподобне. Мы же, проразуме́ние того сбывшееся зря́ще, вопием ти: Радуйся, во обитель Архистрати́га Михаила вшедый на спасение; радуйся, от архимандрита Пафну́тия любезне прия́тый. Радуйся, четыредесятодне́вный пост по образу Христову соверши́вый; радуйся, вся испытания люботрудне испо́лнивый. Радуйся, образом равноангельным достойне почтенный; радуйся, труды ко трудом, посты ко постом прилагавый. Радуйся, кротостию сугубую любовь озлобля́вших тя стяжа́вый; радуйся, со свеще́ю во храме достойне Бо́гови предстоя́вый. Радуйся, во всем житии зде преподобному Адриану, собрату. Пафну́тиеву, поревновавый; радуйся, добрый подвижниче благочестия. Радуйся, новоначальным иноком правило; радуйся, Никодиме, скорый наш помощниче, Кожеезе́рский чудотворче.
Кондак 5
Богото́чную кровь Христа, за ны пролия́нную, духовныма очи́ма вы́ну созерцая, преподобне отче Никодиме, прилепился еси совершенною к Тому любовию. Темже Пафну́тия, в митрополита на Кру́тицы преведе́нна, оставил еси, преселив же ся в пустыню Хозью́гскую, со единем Христом в делании духовнем пребывал еси, поя́ Тому вы́ну: Аллилуиа.
Икос 5
Врагу, при́сно на пустынныя ополча́ющуся, жестоким житием противуста́л еси, преподобне Никодиме, плоть ду́хови твоему порабо́тив воздержа́нием. Темже мы, подвигом твоим чудя́щеся, зовем ти: Радуйся, в Кожеезе́рскую обитель от Кру́тиц удаливыйся, славы и молвы уклоняяся; радуйся, ангелу своему житием зде уподо́бивыйся. Радуйся, от Серапио́на и Авраа́мия благословение прии́м, келлию в пустыни согради́вый; радуйся, яко хлад тоя́ не превозмо́же пламенныя веры твоея́. Радуйся, ту ветхаго человека в себе умертви́вый; радуйся, дни и нощи в слезней молитве стоя́вый. Радуйся, от млека́ и иных яств отреки́йся, плоды же се́льными питавыйся; радуйся, от рыб вкуша́вый, то́чию егда ква́сны су́ща червьми́ исполня́хуся. Радуйся, воздержа́ния образе; радуйся, сластолюбцев посрамле́ние. Радуйся, со врагом спасения брань ве́лию ведший; радуйся, Никодиме, скорый наш помощниче, Кожеезе́рский чудотворче.
Кондак 6
Пропове́дают подвиги твоя, преподобне Никодиме, вси концы земли́, люботрудному житию твоему чудя́щеся. Воздви́же бо на тя брань лютую враг спасения, прираже́ньми плоти и уныния тебе искушая; ты же постом и молитвою таковая соодолел еси, благодарственне воспев Богу: Аллилуиа.
Икос 6
Возсия́ благодать в подвизех пустыннаго жития твоего, преподобне Никодиме. Не то́чию бо на тя бывшая искушения мужественне отразил еси, но и всем во искушениих мудрый спобо́рник яви́лся еси, да с радостию тебе вопием: Радуйся, святаго ра́ди жития от Бога зело́ возлю́бленный; радуйся, яко сего ра́ди ду́си злобы в конец на тя озло́бишася. Радуйся, искушение плотско́е твердо отразивый; радуйся, яко молитву сотворив, силою Креста в зра́ке жены древо ветхо объявил еси. Радуйся, исхити́вшим потребная именем Иисуса возвратити та́я повеле́вый; радуйся, сущей келлии потопля́еме, от молитвы в ней не преставый. Радуйся, зря оную во огненнем запале́нии, ника́коже устраши́выйся; радуйся, безстрастия проявителю. Радуйся, твердый в беда́х на Бога упователю; радуйся, тща́вшияся тя погубити безсильны сотворивый. Радуйся, в покров себе имы́й Пресвятую Богородицу, пред Еяже образом вы́ну умиле́нно прекланялся еси; радуйся, Никодиме, скорый наш помощниче, Кожеезе́рский чудотворче.
Кондак 7
Хотя́й Владыка яви́ти тя, преподобне отче Никодиме, мужа во всем совершенна, попусти́ врагу последи́ искусити тя по всяческим гордыни своея́ прираже́нием: представа́ху бо ти множества льстивых духов, глаго́лавших свята и велика тя быти, да возгордевся паде́ши. Ты же смирением искушения посрами́в, победне воспел еси Богу: Аллилуиа.
Икос 7
Новая купе́ль Силоа́мская яви́ся ти, преподобне, пустыня Хозью́гская, в нейже от всякия болезни душевныя исцелился еси, и яко муж в меру возраста Христова, Бо́гови предстал еси. Тем же вопием ти: Радуйся, вся прираже́ния духов злобы яко дым разсеявый; радуйся, поне́же Сам Христос спобора́ше бо тебе. Радуйся, истиннаго трезве́ния учителю; радуйся, спасительнаго созерцания любителю. Радуйся, бодрственнаго к себе внимания стяжа́телю; радуйся, Антония, Ону́фрия и Павла Фиве́йскаго единонравниче. Радуйся, яко со о́неми днесь на небесе́х ликуеши; радуйся, яко с теми Христу ныне мо́лишися, да низложи́тся сила диа́воля. Радуйся, от Бога над многими, яко ве́рен раб, поставленный; радуйся, еще в житии на земли́, яко чудотворец дивен явле́нный. Радуйся, страны нашея славо и украшение; радуйся, Никодиме, скорый наш помощниче, Кожеезе́рский чудотворче.
Кондак 8
Странники су́ща на земли́ сей, преподобне Никодиме, враг при́сно искушает ны и многи поставля́ет препо́ны, да не достигнем отечествия небеснаго; но ты, яко сокрушивый того ухищрения, помози́ нам, житие твое поминающим. Даде́ся бо ти благодать помыслы разумети, неду́ги цели́ти и вы́ну быти со призывающими тя верою и ку́пно Богу пою́щими: Аллилуиа.
Икос 8
Все житие наше на земли́ печали и скорби полно есть, искушения же и падения предлежи́т нам, претерпети; но ты помози́ нам, преподобне, да благодарственне зовем ти: Радуйся, помышле́ния сердец прови́девый; радуйся, злонравнаго Феодосия на путь спасения призыва́вый. Радуйся, гордыню того обличи́вый; радуйся, Иоанну ученику твоему и ине́м от зубна́го неду́га дарова́вый исцеление. Радуйся, тогожде очи́ма возврати́вый зрение; радуйся, в мори потопляемым ловце́м скорое избавление приведы́й. Радуйся, яко никтоже, вразумления иски́й, тощь от тебе оты́де; радуйся, сердец скорбных уврачева́телю. Радуйся, яко коегождо от мудрости жития твоего наставлял еси; радуйся, нищ сый плотию богатство многоценное дарова́ний духовных име́вый. Радуйся, аки крин в Хозью́гстей пустыни яви́выйся; радуйся, Никодиме, скорый наш помощниче, Кожеезе́рский чудотворче.
Кондак 9
Всею душе́ю прилепи́вся Бо́гови, славою земною не уязви́лся еси, преподобне Никодиме, дар бо патриарха, аще и с честию прия́л еси, а́бие обители пре́дал еси, глаголя: «Довле́ет моей худости единаго ру́бища». Темже и нас добродетели сей научи, во е́же чистыми усты́ пети Богу: Аллилуиа.
Икос 9
Вити́и премудрии высоту твоих подвигов всюду возвести́ша, преподобне, темже и первосвятитель Це́ркве даром своим смирение твое чествовати хотя́ше. Мы же, добродетели твоя воспевающе, в похвалу тебе сия́ вопием: Радуйся, из пустыни, яко солнце светлое, вся осия́вый; радуйся, от патриарха ублаже́нный. Радуйся, тем не возгорде́выйся; радуйся, моления и воздержа́ние усугуби́вый. Радуйся, четы́редесять дний и но́щий в пещере моли́выйся, ничимже питаяся; радуйся, славословием непрестанным ангелом уподо́бивыйся. Радуйся, лютость зве́рей ди́виих благостию свое́ю укроти́вый; радуйся, яко еле́ни мно́жицею прихожда́ху, моля́щу ти ся, и хожда́ху о́крест тебе, ника́коже боящеся. Радуйся, тридесять лет в пустыни непреткновенно поживый; радуйся, оскуде́вшу ти последи́ силами, ликом небесным восхотевый приложи́тися. Радуйся, к сему душу подвигом добрым предочи́стивый; радуйся, Никодиме, скорый наш помощниче, Кожеезе́рский чудотворче.
Кондак 10
Спастися хотя и со Христом быти, о сем Господа молил еси, преподобне Никодиме. Человеколюбец же Бог, прии́м моление сие́, посла́ ти в виде́ниих святителя Алекси́я и Дионисия архимандрита, скорое твое отшествие и ко избра́нным причте́ние пове́дати, с нимиже ныне пое́ши. Ему: Аллилуиа.
Икос 10
Стена́ ти бысть, преподобне Никодиме, икона Пресвяты́я Владычицы, е́юже прежде в путешествие благослови тя Пафну́тий: тою бо осеня́ем, течение жития сконча́в на земли́, слышати небесную весть сподо́бился еси. Темже ныне радостно вопием ти: Радуйся, Пречистою Владычицею соблюде́нный; радуйся, в молитве скоро от Бога услышанный. Радуйся, святителем Алекси́ем и преподобным Дионисием посеще́нный; радуйся, яко ти́и ревнителя тя преподобным любезне нарица́ху. Радуйся, скорое сопричте́ние ко ангелом уве́девый; радуйся, по умолению Ио́ны паки в Кожеезе́рскую обитель пришедый на скончание. Радуйся, до конца повинова́выйся начальником; радуйся, радостно братиею во обители целова́нный. Радуйся, ко блаженному пристанищу прибли́живыйся; радуйся, яко приспе́ час скончания твоего тих и радостен. Радуйся, Никодиме, скорый наш помощниче, Кожеезе́рский чудотворче.
Кондак 11
Пение всеумиле́нное принесо́ша Богу Кожеезе́рская братия, преподобне Никодиме, блаженную кончину твою зря́ще. Обрето́ша бо тогда лице́ твое, яко лице́ ангела, и благоухание дивное всю обитель испо́лни, от святаго телесе́ твоего исходя́щее и всех научающее пети: Аллилуиа.
Икос 11
Яко светоприе́мная свеща́, у́глем благодати Божия возжженная, озарил еси, преподобне Никодиме, чудесы́ твоими обитель Кожеезе́рскую, в нейже и цельбоносныя твоя мощи славно почивают. Темже радостно вопием ти: Радуйся, добрый воине, от Христа венце́м славы увязе́нный; радуйся, яко по пришествии во обитель, благословение твое аки дар Божественный прие́мля, кийждо упокоити тя хотя́ше. Радуйся, в келлии пу́сте уединения ра́ди водворивыйся; радуйся, в неду́зех сам себе послуживый. Радуйся, частым прия́тием Святых Таин со Христом сочетавыйся; радуйся, не́мощен сый, от молитвы ника́коже преставый. Радуйся, во псалмопении к Богу отшедый; радуйся, благоухания дивнаго источниче. Радуйся, святы́я бо мощи твоя, яко знамя победное, иноком яви́шася; радуйся, и по отшествии твоем нас не оставляяй. Радуйся, подвиза́ющимся о спасении невидимый споспе́шниче; радуйся, Никодиме, скорый наш помощниче, Кожеезе́рский чудотворче.
Кондак 12
Благодати великия носителя и будущаго всех, воскресения увери́теля людем Господь дарова́ тя, преподобне Никодиме. Вси бо, с верою к нетленным моще́м твоим притекающии, молитв исполне́ние и надежду общаго воскресения улуча́ют, благодарственне пою́ще Богу: Аллилуиа.
Икос 12
Пое́м твоя милости и чудеса, преподобне Никодиме: вы́ну бо и по отшествии твоем с нами пребываеши, Христу за ны моля́ся. Темже от благодарных усте́н в похвалу тебе прино́сим сицева́я: Радуйся, молитвенниче наш усердный; радуйся, помощниче наш скорый. Радуйся, от ломо́ты, че́рныя не́мощи и огневи́цы избавляяй; радуйся, яко жезл твой, аки Павлов убру́с, источник исцелений яви́ся. Радуйся, яко милоть твоя, аки Илиина́, чудотворения источа́ше; радуйся, на суши и мори от всех оставленным помощь подаваяй. Радуйся, неду́гующих от смертнаго одра к жизни возвращаяй; радуйся, от навождений духов злобы спасаяй. Радуйся, всех неду́гов душевных и телесных врачу; радуйся, о спасении всех христиан теплый молитвенниче. Радуйся, Никодиме, скорый наш помощниче, Кожеезе́рский чудотворче.
Кондак 13
О преподобне и богоносне отче наш Никодиме! Приими́ сие́ ма́лое со умилением ти приноси́мое хваление, и со Пресвятою Владычицею и всеми святыми молися Господу Иисусу Христу, да изба́вит нас от всяких бед и скорбе́й, от враг видимых и невидимых, от напрасныя смерти и будущих мук, и сподо́бит нас со избра́нными Своими воспевати Ему во веки: Аллилуиа.
Этот кондак читается трижды, затем 1-й икос «Ангела на земли...» и 1-й кондак «Избранный от Воеводы...».
Молитвы
О преподобне и богоносне отче наш Никодиме! Ве́лие име́я к Богу дерзновение, молися вы́ну о всех нас, зане́ буря многих бед и скорбе́й обдержи́т ны: неду́зи телеснии, болезни душевныя, прираже́ния вражия обуревают ны. Ходит бо враг наш, иски́й кого поглоти́ти, и ежечасно от того уловля́емся; о спасении же своем нерадя́ще, не́смы достойни воззрети на высоту небесную. Но ты бу́ди нам помощник скорый и изба́витель: яко сам искуше́н быв от врага, победив же сего доблественне, вразуми́ ны, да разумеем того ко́вы и прираже́ния. Пода́ждь убо нам память смертную, сле́зы покаяния и надежду спасения: да не во отчаяние впаде́м, ниже́ де́рзостным на милосердие Божие упованием, во гресе́х же пребыванием в конец себе погуби́м, но да будет нам память грехов наших во источник теплых слез и сокрушения сердечнаго, милосердие же Божие и благодать Его, молитвами твоими, во спасение наше, ныне и при́сно и во веки веков. Аминь.
О преподобне и богоносне отче наш Никодиме! Предстоя́й Престолу Пресвяты́я Троицы, молися вы́ну о епископе нашем (имя), о всем священнем и и́ночестем чине, игу́мене же и братии обители твоея́, о военачальницех и градоначальницех, и всех православных христианех: да хо́дим кийждо достойно звания нашего, в немже зва́ни бы́хом, и да будет земля наша земля добрая, и вси живущии на ней род избра́н, царское священие, язык свят, лю́дие обновле́ния, ныне и при́сно и во веки веков. Аминь.