Акафист преподобному Паисию Галичскому
Празднование 23 мая/5 июня
Кондак 1
Возбра́нный чудотворче, угодниче Христов, к тебе прибегаем и тебе ми́лися де́ем, услыши нас в час сей, моля́щихся тебе, и бу́ди нам скорый помощник и заступник, да твоими молитвами изба́вльшеся от всяких бед, вопием ти: Радуйся, Паи́сие преподобне.
Икос 1
Ангела во плоти су́ща тя зна́ем, отче преподобне, и сего ра́ди призыва́ем тя, предста́ни нам скоро в помощь и изба́ви нас от всякаго зла, да тобою спа́сшеся, всегда вопием ти: Радуйся, от утробы ма́терния освященный; радуйся, светом богове́дения просвеще́нный. Радуйся, яко мира сего красоту ни во чтоже вмени́вый; радуйся, яко ангельское житие возлюби́вый. Радуйся, яко собрал еси инок множество; радуйся, яко научил еси име́ти крепкое мужество. Радуйся, яко учением твоим мно́зи получи́ша спасение; радуйся, яко тобою улучи́ша общее небесное селение. Радуйся, яко чи́сте зри́ши Святую Троицу; радуйся, яко всегда о нас мо́лиши Пресвятую Богородицу. Радуйся, яко вся проше́ния наша исполня́ются; радуйся, Паи́сие преподобне.
Кондак 2
Видя телесныма очи́ма от Бога по́сланный к тебе Пречистыя Богоматере образ, принесе́нный боля́рином Иоанном Овином, радости многия напо́лнився, вскоре повеле́нное от ангел делом совершил еси, вопия́ к Богу: Аллилуиа.
Икос 2
Разум твердый во удивлении своем сохраняя, отче преподобне, видев боля́рина во внезапном изменении, вопросил еси его о приклю́чшихся ему, уве́дев же бывшая, радовашеся. Сего ра́ди и мы вопием ти: Радуйся, от рук Иоа́нновых образ Богоро́дичен прие́мый; радуйся, яко вся дни живота своего ему послужи́вый. Радуйся, яко образом тем Владыка Христос обитель твою прослави; радуйся, яко и тебе обители тоя́ высочайшаго пастыря постави. Радуйся, яко чудесе́м, от образа быва́емым, самовидец яви́ся; радуйся, яко того ра́ди во всей России имя твое просла́вися. Радуйся, яко от всех стран наро́ди во обитель твою притека́ху; радуйся, яко твоими молитвами от образа Богоро́дична вся полезная приима́ху. Радуйся, ста́да Христова словесных овец добрый пастырю; радуйся, наставниче заблуждших и благи́й учителю. Радуйся, избавля́яй во тьме прегрешений блудя́щих; радуйся, наставля́яй на путь спасения хотя́щих. Радуйся, Паи́сие преподобне.
Кондак 3
Силою Вышняго по́сланнии к тебе два ангела, нося́ще образ Пречистыя Богородицы, срето́ша некоего благоговейна человека именем Иоанна, вручивше его, неви́дими бы́ша от о́чию его, он же, образ прие́м, возопи к Богу: Аллилуиа.
Икос 3
Имы́й сумнение в се́рдцы своем боля́рин Иоанн о юношах, прине́сших образ Пречистья Богородицы, вскоре возвратися в дом свой, хотя́й паки видети их, не улучи́в же видети их, притек во обитель твою, вопия́ше тебе: Радуйся, отче, образа Богоматере хранителю; радуйся, Пресвяты́я Троицы служителю. Радуйся, недове́домыя тайны зрителю; радуйся, чудесе́м, от образа бываемым, блюсти́телю. Радуйся, преподобных всех известная похвало́; радуйся, по́стников многослову́щая славо. Радуйся, монахов божественное правило; радуйся, всей Га́личской стране великое светило. Радуйся, ангелов собеседниче; радуйся, святым всем сопричастниче. Радуйся, Троицы Святы́я чистый служителю; радуйся, Паи́сие преподобне.
Кондак 4
Бурю внутрь име́яй многих смущений, аз многогрешный недоумева́юся, ка́ко возмогу́ достойно воспети твоя подвиги, преподобне, никтоже бо от человек нынешняго рода может я исчести́, аще бы и ри́торски кто глаго́лати восхоте́. Сего ра́ди Богу, тя прославляющему, дерза́юще воспеваем: Аллилуиа.
Икос 4
Слышавше града Га́лича и окрестных градо́в наро́ди о принесе́нии ангелы Пречистыя Богородицы образа во обитель твою, преподобне, стека́хуся отвсюду, нося́ще неду́жныя своя, желающе получити исцеление, е́же молитвами и прикосновением же пречуднаго образа получи́вше, отхожда́ху в до́мы своя, радующеся. Мы же, дивя́щеся, похвальная вопием: Радуйся, о христианстем роде теплый к Богу хода́таю; радуйся, неду́жным и скорбным здравия пода́телю. Радуйся, яко твоими молитвами обитель твоя, яко солнце, просвети́ся; радуйся, яко о ней народ не то́чию видевый, но и слышавый возвесели́ся. Радуйся, яко ученицы́ твои душа́ми просвеща́хуся; радуйся, яко твоими чудесы́ телесне веселя́хуся. Радуйся, яко твоими молитвами от сетей вражиих свобожда́емся; радуйся, яко от ра́ки твоея́ святы́я благоухания насыщаемся. Радуйся, яко прикоснове́нием тояже ра́ки от болезней исцеляемся; радуйся, яко таковый дар от Бога прия́л еси. Радуйся, яко приходя́щим к тебе с верою неоску́дно исцеление подаваеши; радуйся, Паи́сие преподобне.
Кондак 5
Боготе́чная звезда яви́лся еси, преподобне, Церковь Святую, аки небо, украси́л еси, образ, по́сланный со двема́ ангелома, в ней поставив, и от всех стран ве́рнии ра́ди моления во обитель твою стека́хуся; ты же данною от Христа Бога тебе благодатию тех озарял еси, якоже чудесы́, та́ко и учением наставляя их на путь спасения и повелева́я вопити к Богу: Аллилуиа.
Икос 5
Видев ученик твой преподобный Иа́ков во обители святе́й созда́нную тобою и боля́рином Иоанном церковь возгоре́вшуся, в нейже принесе́нный ангелы Пречистыя Богородицы образ стоя́ше, ревностию разже́гся, и всю надежду на Самую Богоматерь и на твоя молитвы возложи́в, разби́ двери бервно́м и сквозе́ пламень в церковь вни́де, и образ Богородицы изнесе́, пла́мени же отвсюду окружающу его, образ ничтоже пострада́. Сего ра́ди похвальная прино́сим ти, вопиюще: Радуйся, твердое веры основание; радуйся, в таковых крепкое имы́й упование. Радуйся, такова ученика стяжа́вый; радуйся, на твердем краеугольном ка́мени того назда́вый. Радуйся, яко учением своим, а не млеко́м сего воспита́; радуйся, яко в несуме́нную веру сего наказа́. Радуйся, яко оба Господу угоди́ста; радуйтеся, яко мно́ги ученики своим учением воздои́ста. Радуйтеся, яко многим ко спасению яви́стася предводи́тели; радуйтеся, яко и нам от волко́в адских бы́сте хранители. Радуйтеся, яко ку́пно предстои́те Святе́й Троице; радуйтеся, яко Царю небесе́ и земли́ о нас мо́литеся. Радуйся, Паи́сие преподобне.
Кондак 6
Пропове́данную ангелы принесе́нием честна́го образа Пречистыя Богородицы милость, хотя́щую быти роду христианскому, возобнови́ша ве́рнии, и на созида́ние новыя це́ркве от име́ний своих подая́ху кийждо по силе своей. Ты же, преподобне, оным подая́нием новую церковь вскоре воздвигл еси и к содействующему сия́ Богу возопил еси: Аллилуиа.
Икос 6
Возсия́ во обители новосозда́нная церковь, аки второе солнце на небеснем кру́зе, наро́ди же, видевше сие́, радовахуся и, любовию притекающе, от неистощи́маго источника целе́б образа Пресвяты́я Богородицы да́ры прие́млюще и восхваляюще тя, си́це вопия́ху: Радуйся, добрый винограда Христова строителю; радуйся, ста́да Его хранителю. Радуйся, всем верным во спасение учителю; радуйся, темже до Царствия Небеснаго предводи́телю. Радуйся, незло́бивых ста́да Христова овец воедино совокупи́телю; радуйся, злосмра́дных ко́злищ от ста́да Христова прогонителю. Радуйся, молитвенниче о нас к Богу теплый; радуйся, хода́таю к Богородице о нас скорый. Радуйся, яко тобою дерзновение в молитве к Богородице и́мамы; радуйся, яко тобою вся полезная от Бога прие́млем. Радуйся, скорый наш помощниче; радуйся, готовый наш заступниче. Радуйся, Паи́сие преподобне.
Кондак 7
Хотя́щу великому князю Московскому Василию плени́ти удел князя Гео́ргиа, пришед в страны́ Га́личския на стольный сро́дника своего град Га́лич, тогда же ят и чудотворный образ, егоже принесо́ша ангели, и отнесе́ его в свой стольный град Москву, и аки пленницу заключи́, преслу́шав моление твое, преподобне; ты же, наде́явся несумненно, яко паки образ к вам во обитель возвратится, пел еси Богу песнь ангельскую: Аллилуиа.
Икос 7
Новое бе чудо и у́жаса испо́лненное тогда, принесе́ну бо бывшу образу Царицы Небесныя в Москву и в церкви заключе́ну, замки́ и печа́тьми утвержде́ну; и стра́жами обстои́ма Свободи́вшая Адама и Еву от ада, хранима аки пленница, невидимою же силою Божиею тоя́же нощи обре́теся в твоей честне́й обители в церкви; ты же, сию́ узре́в, радостне похвальная к Богородице возсыла́ше, си́це глаго́люще: Радуйся, Адамово исправление и Евино свобожде́ние; радуйся, пророков оглаше́ние и апостолов удобрение. Радуйся, мучителя безчеловечнаго измета́ющая от начальства; радуйся, Сына Своего и Бога крепкую силу показавшая. Радуйся, море, потопившее гордую лютость великаго князя; радуйся, ка́меню, напои́вый нас жаждущих потоком чудес Твоих. Радуйся, судие́, непра́веден суд судя́щаго, обличи́вшая; радуйся, во тьме плачевней нас грешных просвети́вшая. Радуйся, рождшая Радость всему миру; радуйся, отгнавшая от всех верных печалей зи́му. Радуйся, яко пришествием святаго Твоего образа и нам радость дарова́; радуйся, яко прежнюю нашу печаль всю отгна́. Радуйся, Мати Господня. Радуйся, и ты, преподобне, образ Матере Господни прие́мый. Радуйся, Паи́сие преподобне.
Кондак 8
Странное сие́ и преславное чудо егда уве́де великий князь Василий, тогда печали и у́жаса сердце свое испо́лни, зазира́ше себе, ка́ко сия́ дерзновенно соде́ла, я́же не леть делати, и сего ра́ди со слеза́ми и рыданием моля́шеся к Богородице, да яви́т ему о образе Своем. Егда же от по́сланных извести́ся, яко во обители твоей, преподобне отче, яви́ся, отню́дуже насилием бысть тогда ята, воспел есть к Богу песнь ангельскую: Аллилуиа.
Икос 8
Весь радости исполнися великий князь и синкли́т его о обре́тении чудотворнаго образа Пречистыя Богородицы, дивя́щеся неизрече́нной Божии премудрости, ка́ко невидимо силою Сына Своего из це́ркве изы́де, замко́м и печа́тем целым сущим и стра́жем бдя́щим. Мы же, ве́дуще, яко твоих ра́ди молитв сия́ соде́яся, вопием ти: Радуйся, светлый светильниче; радуйся, пастырю словесных овец. Радуйся, монахов истинный отче; радуйся, яко твоими молитвами великаго князя суровое дерзновение обличи́вый. Радуйся, яко его вся тщетная мысль упраздни́ся; радуйся, яко ты во смирении своем возвеселися. Радуйся, яко чудотворный образ сподо́бися зрети; радуйся, яко пред ним вся дни живота своего изволил еси бде́ти. Радуйся, яко и по смерти своей Самую Пречистую Богородицу зри́ши; радуйся, яко Престолу Сына Ея предстои́ши. Радуйся, Паи́сие преподобне.
Кондак 9
Всякое естество́ ангельское удивися великому дарова́нию, свыше от Бога тебе данному, преподобне, яко в немощне́й своей человечестей плоти сущий, по всему уподо́бися ангелом, и силою Вышняго укрепля́ем, во всех добродетелех довольно изобиловал еси, сего ра́ди чистою свое́ю душе́ю причте́н ко ангельским силам, поя́ всеси́льному Богу: Аллилуиа.
Икос 9
Вити́йския и ри́торския многовеща́нныя глаго́лы вся отве́ргше, истинным своим сердцем и чистою совестию в песнех величаем тя, преподобне, и почитаем богоугодная твоя дела и славу, приглашающе пети тебе таковая: Радуйся, яко Христа ра́ди распя́ся ми́рови; радуйся, яко вся мирска́я во уме́ты вмени́вый. Радуйся, яко плоть свою порабо́тивый духу; радуйся, яко духом служа́ше Бо́гови день и нощь. Радуйся, яко телом живяше во юдо́ли земней; радуйся, яко душевныма очи́ма взираше на Иерусалим горний. Радуйся, яко и ныне тамо пребываеши; радуйся, яко нас, на земли́ сущих, не оставляеши. Радуйся, яко о нас грешных мольбы́ к Богу приносиши; радуйся, яко от Него к нам милость хода́тайством своим изно́сиши. Радуйся, яко мы тя за сие́ благодарим; радуйся, яко имя твое святое всегда славим. Радуйся, Паи́сие преподобне.
Кондак 10
Спастися хотя́щим вождь был еси, преподобне, и ныне нам грешным, спасения желающим, помози́ Святыми своими молитвами; и якоже жив сый, многи ученики своя, Христови угодивших, предста́вил еси, та́ко и нас, свободи́в от прелести греховныя, чистых Христу предста́ви, да зовем Ему: Аллилуиа.
Икос 10
Стена крепкая и необоримая, и покров, был еси своим учеником, защищая их от волко́в адских, сохраняя от стреля́ний бесо́вских, и ныне нам грешным бу́ди стена и покров, прибегающим к тебе и требующим от тебе помощи, да зовем ти: Радуйся, отце́в славо; радуйся, преподобных похвало́. Радуйся, по́стников украшение; радуйся, мучеников сопричастниче. Радуйся, пустынножителем сообщниче; радуйся, истинныя христианския веры ревнителю. Радуйся, проти́вящихся вере святе́й искоренителю; радуйся, церковное украшение. Радуйся, обители святе́й разширение; радуйся, яко обитель твоя ныне молитвами твоими стоит неруши́ма. Радуйся, яко и во веки и́мать стоя́ти невреди́ма; радуйся, Паи́сие преподобне.
Кондак 11
Пением всяким Бога и Его Пречистую Богоматерь, жив на земли́, прославлял еси вся дни живота своего, сего ра́ди и мзду трудов своих восприя́в, вселился еси в небесных селениих, иде́же вы́ну пою́т ангельстии чи́нове; с нимиже сый, пое́ши всегда к Богу песнь сию́: Аллилуиа.
Икос 11
Светоприе́мный све́щник на месте высоце, а не под спудом стоя́щий, во тьме грехо́вней сущии зрим тя, преподобне, с невещественными бо в вышних предстои́ши Престолу Пресвяты́я Троицы, радости превеликия испо́лнився и Божественными лучами Трисолнечнаго Света осиява́ем, облиста́еши верных, вопиющих тебе таковая: Радуйся, заре, явля́ющая покаянием день спасения; радуйся, всех грешных покаянием ко Христу приводя́й. Радуйся, яко данным ти от Христа ключе́м Царствие Небесное отверза́еши; радуйся, яко покаянием грешников в него вво́диши. Радуйся, кормчий корабля Христова, в немже спасо́шася мно́зи; радуйся, яко учением своим многотекущую источи́л еси реку. Радуйся, яко жаждущих твоего учения напои́л еси потоком сладости; радуйся, яко твоего учения рекою доплы́хом в землю обетованную. Радуйся, яко приста́хом в тихое пристанище; радуйся, яко наследовахом землю обетованную. Радуйся, яко получи́хом прежде многих лет обещанное; радуйся, Паи́сие преподобне.
Кондак 12
Благодать даде́ся тебе от Бога, яко и прочим святым, цели́ти души и телеса́ с верою притекающим к ра́це твоей святе́й. Сего ра́ди молю ти ся, преподобне Паи́сие, и, к ра́це твоей святе́й припа́дая, вопию: Исцели́ мою душу и болезнь во здравие вскоре премени́, да тобою получи́в здравие, воспою́ Бо́гови песнь ангельскую: Аллилуиа.
Икос 12
Пою́ще твоя труды и подвиги, преподобне, восхваляем тя вси, яко от юности своея́ яви́лся еси храм Святаго Духа; сего ра́ди к ра́це твоей честне́й во храм Божия Матере притекающе, вопием ти: Радуйся, врачу́ душа́ми боле́знующих; радуйся, целителю телесными неду́ги озло́бленных. Радуйся, наказателю сущим во мла́дости; радуйся, же́зле сущим в старости. Радуйся, яко святая твоя душа в небесных ски́ниях почивает; радуйся, яко имя твое святое на земли́ прославля́емо бывает. Радуйся, яко призыванием имене твоего святаго болезни врачу́ются; радуйся, яко твоими молитвами бесну́ющиися от мучительства диа́воля свобожда́ются. Радуйся, яко всякая язва в людех цели́тся; радуйся, яко вси, притекающии ко гробу твоему с верою, спасаются. Радуйся, Паи́сие преподобне.
Кондак 13
О всеблаже́нный и приснопамятный угодниче Божий, преподобне отче Паи́сие, предстоя́й Престолу Владыки Христа, не забу́ди нас грешных и нынешнее наше приими́ приноше́ние, всегда о нас пребу́ди моля́ся, изба́витися нам от напастей и всяких болезней, и вечнаго мучения благоприятным твоим хода́тайством, да с тобою воспеваем к Богу всегда: Аллилуиа.
Этот кондак читается трижды, затем 1-й икос «Ангела во плоти...» и 1-й кондак «Возбранный чудотворче...».
Молитва
О священная главо́, преподобне отче, преблаже́нне авво Паи́сие великий! Не забу́ди нищих своих до конца, но поминай нас всегда во святых своих и благоприятных молитвах к Богу. Помяни́ стадо свое, е́же сам упа́сл еси, и не забу́ди посещати чад своих, моли за ны, отче наш, и ныне за чада своя духовная, яко име́яй дерзновение к Небесному Царю, не премолчи́ за ны, вопия́ ко Господу, и не пре́зри нас, верою и любовию чтущих тя, но поминай нас, недостойных, у Престола Вседержи́телева, и не преста́й моля́ся за нас ко Христу Богу, ибо дана́ тебе бысть благодать за ны молитися. Не мним бо тя су́ща ме́ртва: аще бо и телом преста́вился еси от нас, но и по смерти убо жив сый пребываеши неотступно от нас духом, сохраняя нас от стрел вражиих и всякия прелести бесо́вския и ко́зней диа́вольских. Пастырю наш добрый, аще бо и моще́й твоих ра́ка пред очи́ма нашима ви́дима есть всегда, но святая твоя душа со ангельскими во́инствы, со безплотными силами у Престола Вседержи́телева предстоя́щи, достойно весели́тся. Нам бо ве́дущим убо тя воистину и по смерти яко жи́ву ти су́щу, тебе припа́даем и тебе молимся и тебе ми́лися де́ем, е́же моли́тися о нас всесильному Богу о пользе душ наших и испроси́ти нам время на покаяние, и невозбра́нно прейти́ от земли́ на небо, от мыта́рств же горьких, бесо́в и воздушных кня́зей, и от вечныя муки избавитися, и Небесному Царствию наследником быти со всеми, я́же от века угодившими Господу нашему Иисусу Христу, Емуже подобает всякая слава, честь и поклонение со Безначальным Его Отце́м и с Пресвятым и Благим и Животворящим Его Духом, ныне и при́сно и во веки веков. Аминь.