Акафист преподобному Петру, царевичу Ростовскому
Празднование 30 июня/13 июля
Кондак 1
Избра́нный Богом от ага́рянскаго рода царска и вчине́нный в недра Православныя Христовы Це́ркве, науче́нный святыми апостолы Петром и Павлом к созида́нию во имя их святы́я обители, приими́ от нас недостойных хвалебную песнь, тебе приноси́мую: Радуйся, преподобне царевиче Пе́тре, Ростовский чудотворче.
Икос 1
Ангела тя земнаго видяще, о небесный жителю, преподобне царевиче Пе́тре, возревнова́хом мы недостойнии похвальная воспети тебе си́це: Радуйся, терпением угоди́вый Господу; радуйся, яко Господь внят ти, и услыша молитву преподобнаго Своего. Радуйся, яко удалился еси, бегая от дому и пле́мене твоего; радуйся, яко жительствуя посреде́ язы́ка безбожнаго, желание возыме́л еси ко Христу обрати́тися. Радуйся, яко бдел еси в молитве сердечней к Богу; радуйся, яко плоть твоя измени́ся трудов и поще́ния ра́ди, но дух твой возвы́сися в воздержа́нии. Радуйся, яко испове́дятся Го́сподеви о обращении твоем преподобнии Его; радуйся, яко с ними воспеваеши на небесе́х славу Божию. Радуйся, преподобне царевиче Пе́тре, Ростовский чудотворче.
Кондак 2
Видя святы́й Петр себе непорабоще́нна плотскому сладостра́стию, радовашеся духом, желая прилепи́тися Христу всем сердцем и воспевати Богу: Аллилуиа.
Икос 2
Разум, недоразумева́емый о Триипоста́сном Божестве и о безсе́меннем воплощении Бога Слова, разуме́ти не иска́ша ослепле́ннии прелестию идолослужения древнии ханы Орды́нстии; ты же, святы́й Пе́тре, по благодати Божии, озари́вшей тя, и в неверии еще ти су́щу, светильника Ростовския паствы епископа Кирилла в науче́ние тя христианстей вере взыскал еси. Сего ра́ди ублажаем тя си́це: Радуйся, подобне Корни́лию со́тнику, и в язычестве добродетельми сия́вый; радуйся, подобне ему, вместо апостола Петра прее́мника апостольскаго епископа Кирилла взыска́вый. Радуйся, яко на тебе сбы́сться апостолькое слово: «Во всяком язы́це боя́йся Бога и де́лаяй правду прия́тен Ему есть»; радуйся, яко всевидящее око Божие, узре́в твое усердие, благодатию Святаго Духа озари тя. Радуйся, яко неизрече́нный Божий Промысл потре́бы ра́ди Це́ркве, тебе же во спасение, епископа Кирилла во Орду́ приведе́, радуйся, яко Ростовский иерарх царя Берка́я, сро́дника твоего, беседою о чудесе́х, в Церкви Христовой явля́емых, услади́. Радуйся, яко ты, млад быв юноша, глаго́лами святителя Кирилла сердце свое умили́л еси; радуйся, яко размышлением о христианстей вере ум твой просвети́ся. Радуйся, преподобне царевиче Пе́тре, Ростовский чудотворче.
Кондак 3
Сила Вышняго осени́ тя, царевиче Пе́тре, отвергша бесо́вское служение твари, прилепи́тися Христовой вере православней. Темже яко ревнитель святы́я веры показался еси крепок всем, тя воспевающим и радостно пою́щим Богу: Аллилуиа.
Икос 3
Имы́й богоприятную мысль, святы́й Пе́тре, познати истины христианския веры, при инем пришествии во Орду Ростовскаго святителя Кирилла, ра́ди исцеления царе́ва сына, и видев чудесное сего оздравле́ние, благодатию Христовою и молитвами архиереа Божия совершившееся, ты крепчае прилепился еси ко Христу и возжелал еси быти христианин. Темже радостно взываем ти таковая: Радуйся, яко подо́бник был еси соиме́нному ти верховному апостолу Петру; радуйся, подобна ему, оставившему мре́жи и отца своего, и ты дом царский и сро́дство свое оставил еси. Радуйся, яко славу наследия земнаго царства во Орде́ ты презре́л еси; радуйся, яко вся красная мира сего во уме́ты Христа ра́ди вмени́л еси. Радуйся, яко во след Христа Бога радостно потекл еси; радуйся, яко теплою душе́ю Крещения Святаго ты взыскал еси. Радуйся, яко тем осия́ние Христово в сердце твоем прия́л еси; радуйся, яко благо́е иго Христово прия́ти восхотел еси. Радуйся, преподобне царевиче Пе́тре, Ростовский чудотворче.
Кондак 4
Буря страсте́й ю́ностнаго телесе́ и мирски́х прелестей и славы земныя не поколеба́ храма души твоея́, преподобне Пе́тре, основан бо бе на ка́мени краеугольном исповедания Христа, Емуже яко Богу и Спасителю нашему воспеваем: Аллилуиа.
Икос 4
Слыша князь и вси лю́дие богоспасаемаго града Ростова, яко первосвятитель их Кирилл грядет из посольства с дарами и че́стию от царя, име́я при себе приобре́тенное его наставле́ньми духовное сокровище, тебе, блаженне Пе́тре, хотя́щаго прия́ти православную веру во граде Ростове, возрадовашася радостию духовною. Темже и мы, аще и недостойнии, дерза́ем в радости сердец взывати тебе си́це: Радуйся, от любве́ душевныя к Богу отечество твое оставивый; радуйся, единаго Христа возлюби́вый. Радуйся, с любовию сердечною наставле́ние епископа Кирилла о вере христианской послу́шавый; радуйся, отшествия епископа Кирилла из Орды́ в Россию усердно назира́вый. Радуйся, в благочести́вом твоем намерении препятствия сро́дников не убоя́выйся; радуйся, тайно из дому твоего удали́выйся. Радуйся, епископа на пути достигнувый и поя́ти тя с собою его умоли́вый; радуйся, яко незло́бивое овча́ Христова ста́да со пастырем Це́ркве во ограду христоимени́тых людей вшедый. Радуйся, преподобне царевиче Пе́тре, Ростовский чудотворче.
Кондак 5
Боготечней звезде ты, преподобне царевиче Пе́тре, подобен был еси, егда из нечести́выя Орды́ к богоспасаемому граду Ростову путь шествия творил еси. Святитель же Божий Кирилл, радуяся душе́ю о твоем благом произволе́нии, с трепетом воспеваше Богу: Аллилуиа.
Икос 5
Видеша лю́дие Ростовстии, яко возсия́ в сердце твоем свет Христа Бога и из неверия обрати́ тя в правоверие, возрадовашася сердцы своими. Сего ра́ди и мы, дивя́щеся неизрече́нному смотрению Божию, вопием ти: Радуйся, по пришествии в Ростов благоле́пие храмов Божиих с любовию и благогове́нием созерцавый; радуйся, и не быв еще просвеще́н Святым Крещением, в Церкви Божии пребыва́вый. Радуйся, по уме́ртвии царя Берка́я во Орде́ возврати́тися туда́ не восхоте́вый; радуйся, и взысканию о тебе бы́вшу, под кровом святителя Ростовскаго себе укры́вый. Радуйся, Крещения Святаго со усердием и верою испроси́вый и оное рукою епископа прие́мый; радуйся, во имя апостола Петром нарече́нный. Радуйся, письмени́ язы́ка словенскаго и церковному чтению и пению прилежно научивыйся; радуйся, утверждения ра́ди в вере христианстей в доме архиерейстем всели́выйся. Радуйся, преподобне царевиче Пе́тре, Ростовский чудотворче.
Кондак 6
Проповедует созда́нная тобою во имя святых верховных апостол Петра и Павла святая обитель, яко ты, блаженне Пе́тре, был еси всем благоприветлив и любезен, и якоже древний И́ов, око слепым и нога хромым. Сего ра́ди воспеваем Богу: Аллилуиа.
Икос 6
Возсия́вый во Египте просвещение истины и отгна́вый лжи тьму, Христос Бог наш благоволи возсия́ти и во язы́ческой Орды́нской стране́ молитвами и крепкою верою святителя Кирилла, исцелившаго царе́ва сына от болезни, и тебе, святы́й Пе́тре царевиче, светом познания веры христианския озарившаго. Того ра́ди си́це вопием ти: Радуйся, от язы́ческаго племене в веру Христову призва́нный; радуйся, от ти́ны идолослужения ба́нею пакибытия́ обновле́нный. Радуйся, от ко́рене злорастле́ннаго благовонный цвет произра́стший; радуйся, злосмраднаго зловония страсте́й избегший. Радуйся, яко пчела люботрудная, сладкий сот добродетелей сотворивший; радуйся, бдению и воздержа́нию себе с терпением изрядне научи́вый. Радуйся, молитвы сердечныя к Богу возсыла́вый; радуйся, всякими добродетельми себе украси́вый. Радуйся, преподобне царевиче Пе́тре, Ростовский чудотворче.
Кондак 7
Егда прибли́жися время епископу Кириллу оты́ти ко Господу, он, яко наставник твой, царевиче Пе́тре, в вере христианской не остави тя си́ра, но утверди на пребывании в доме архиерейстем до пришествия прее́мника своего. Святы́й же епископ Игнатий, по вступлении на престол Це́ркве града Ростова, зря тя преспева́юща в возрасте духовном, зело́ возлюби тя и, радуяся духом, воспеваше Богу: Аллилуиа.
Икос 7
Новое чудо и дивное, премудростию судеб Божиих, испо́лнися на тебе, блаженне царевиче Пе́тре, егда помышля́ющу ти создати церковь и при ней монастырь устроити, довольнаго же на дело сие́ не иму́щу стяжа́ния и о сем боле́знующу сердцем, случи́ся ти уснути на бре́зе е́зера Неро и видети во сне верховных апостол Петра и Павла, грядущих и два мешца злата и сребра на созида́ние обители во имя их вдаю́щих; возбну́в же от сна во у́жасе и я́ве оныя узре́в, и в ру́цех твоих злато и сребро обре́т, возрадовался еси с трепетом. Того ра́ди и мы воспевати тебе научи́хомся, глаго́люще: Радуйся, попечение о создании це́ркве от любве́ к Богу возыме́вый; радуйся, об устрое́нии обители неусыпно пеки́йся. Радуйся, свое и́ноческое житие пророчески предзнаменова́вый; радуйся, на создание храма и обители довольно не имев сокровища, желания своего не оставивый. Радуйся, несуменную на Господа надежду име́вый; радуйся, в соннем виде́нии и я́ве верховных апостол Петра и Павла узре́вый. Радуйся, дарова́ние их тебе злата и сребра в ру́це прие́мый; радуйся, заповедь их о приобре́тении трех икон на то́ржищи испо́лнивый. Радуйся, преподобне царевиче Пе́тре, Ростовский чудотворче.
Кондак 8
Странное чудо явля́ется и дивное, яко в ту́южде нощь, егда тебе, святы́й Пе́тре, яви́шася верховнии апостоли, и святителю Игнатию они же повелева́ху, да храм во имя их устро́ит, епископ же тому виде́нию ужасе́ся, и пригласив князя, пове́да бывшее, и вку́пе оба совет о сем сотвори́ша, и воспева́ху Богу: Аллилуиа.
Икос 8
Весь быв, блаженне царевиче Пе́тре, погруже́н в размышле́ние о Бозе по виде́нии апостол и о созида́нии обители, при моли́твенных же и постных труде́х смирению и послуша́нию и терпению научился еси. Сего ра́ди вопием ти: Радуйся, к созида́нию обители ревность ве́лию име́вый; радуйся, на совет о тебе князя со епископом пришедый. Радуйся, намерение их о сочетании тя браком без ро́пота прие́мый; радуйся, тем послуша́ние ко князю и епископу показа́вый. Радуйся, «Воля Господня и ваша да будет», – отвеща́вый; радуйся, самим епископом святым Игнатием браковенча́нный. Радуйся, апостольская словеса́ «Брак че́стен и ложе нескве́рно» верно сохранивый; радуйся, и в супружеской жизни в делании добродетелей иску́сна себе яви́вый. Радуйся, преподобне царевиче Пе́тре, Ростовский чудотворче.
Кондак 9
Всяк возраст и весь народ града Ростова, вку́пе с князем и святым епископом Игнатием, удиви́вшеся приобре́тенным тобою, блаженне Пе́тре, святым иконам, дивный свет испуща́ющим, вне́сше их во храм соборный, со усердием воспева́ху Богу: Аллилуиа.
Икос 9
Вити́и суему́дреннии е́ллинскаго нече́стия исполненнии, последи́ же Магоме́товым зловерием испо́лненнии, не могу́ще истинных догмат православныя веры позна́ти, умолко́ша. Мы же, слышаще предивное твое из язычества в христианскую веру обращение, похвальная, блаженне Пе́тре, прино́сим ти, вопиюще: Радуйся, по виде́нии апостолов сладость духовную в сердце твоем обреты́й; радуйся, помышле́ния твоя в тайны смотрения Божия углуби́вый. Радуйся, яко о премене́нии себе из язычества в христианина весели́выйся; радуйся, из вруче́нных тебе от верховных апостол, девятьми сре́бренниками и единою зла́тицею, чудныя три иконы приобреты́й. Радуйся, яко в радости духа к епископу с теми иконами поспешивый; радуйся, и князя, ко епископу пришедша, совет благи́й о устрое́нии храма радостно слышавый. Радуйся, яко от икон, тобою принесе́нных, палата архиерейская дивным светом озарися; радуйся, яко чудеса в Церкви Христианстей тобою и до днесь совершаются. Радуйся, преподобне царевиче Пе́тре, Ростовский чудотворче.
Кондак 10
Спасти хотя душу свою, преподобне царевиче Пе́тре, всякими добрыми нравы себе украшал еси, по словеси́ апостола Павла: ели́ка истинна, ели́ка честна́, ели́ка прелюбезна, ели́ка доброхвальна; сия́ помышля́я, научился еси в умилении духовнем воспевати Богу: Аллилуиа.
Икос 10
Стена был еси ограждения, блаженне царевиче Пе́тре, всем к тебе усердно притекающим. Темже и мы, аще и недостойнии, прибегающе и с любовию тя хваля́ще, вопием: Радуйся, благослове́ние архипастыря на устрое́ние храма и обители прия́вый; радуйся, у князя Ростовскаго землю на созида́ние обители испроси́вый. Радуйся, князя искушающа тя, да сребро́м и зла́том, апостолами данным, место иску́пиши, незло́биво послу́шавый; радуйся, назначение цены за урече́нное место в девяте сре́бренник и едину зла́тицу послушливо испо́лнивый. Радуйся, пророчество святителя Игнатия о неоскуде́нии сребра и злата из мешце́в разуме́вый; радуйся, в виде́нии верховных апостол назначенное обители место узре́вый. Радуйся, сребро и злато, яко дарова́ние от апостол, с верою прие́мый; радуйся, яко лише того сребра и злата на удивление и благогове́ние до позднейших времен оставивый. Радуйся, преподобне царевиче Пе́тре, Ростовский чудотворче.
Кондак 11
Пение церковное во святе́й новосозда́нней тобою обители во имя святых верховных апостол соверша́шеся, ты же, блаженне царевиче Пе́тре, яко строитель храма и обители святы́я, радовался еси душе́ю, поя́ Богу: Аллилуиа.
Икос 11
Яко светозарную звезду во обители и светоносную свещу́ на све́щнице Це́ркве Христовы, зрим тя, преподобне царевиче Пе́тре, и во умилении душ и сердец наших пою́ще, взываем ти си́це: Радуйся, по скончании супружницы твоея́ отверги́йся мира; радуйся, в созда́нней тобою обители монашеское житие восприя́вый. Радуйся, образ добродетельнаго жития всей братии бы́вый; радуйся, смирение глубльшее стяжа́вый. Радуйся, поще́нию внима́вый; радуйся, молитвы твоя к Богу, яко благовонный фимиам, возноси́вый. Радуйся, по труде́х многих во обители твоей ко Господу в невечерний свет отшедый; радуйся, яко Преблагий Господь за премногия твоя добродетели святы́я твоя мощи нетлением прослави. Радуйся, преподобне царевиче Пе́тре, Ростовский чудотворче.
Кондак 12
Ве́лия благодати сподо́бился еси от Бога, преподобне царевиче Пе́тре, яко из языческия прелести в веру христианскую тя Бог обрати́, и из тьмы поклонения твари в познание евангельския благодати призва́; последи́ же из мирска́го мяте́жа исхи́тив, ангелоподобному житию в тишине святы́я обители сподо́би, по кончине же мощи твоя святы́я нетлением прослави. Темже толи́ко тя прославившему Богу со страхом и радостию вопием: Аллилуиа.
Икос 12
Пою́ще память верховных апостол Петра и Павла и совершающе пра́зднество двана́десяти апостолов, воспомина́ем твоя подвиги с любовию, угодниче Божий, преподобне царевиче Пе́тре, и всечестну́ю память, и взываем сицева́я: Радуйся, Петру, ка́мени веры, последовавый; радуйся, Павлу, сосуду избра́нному, и всем святым апостолом во благочестии ревновавый. Радуйся, древних преподобных отце́в подражателю; радуйся, ангельских чино́в сопричастниче. Радуйся, лика преподобных красото́; радуйся, немощны́х целителю и злобных бесо́в прогонителю. Радуйся, телес болезней наших врачу; радуйся, о душа́х наших теплый к Богу молитвенниче. Радуйся, преподобне царевиче Пе́тре, Ростовский чудотворче.
Кондак 13
О препе́тый и прехвальный чудотворче отче наш преподобне царевиче Пе́тре, видимо в созда́нней тобою святе́й обители моща́ми твоими пребываяй, невидимо же от небесных чертог нас, грешных чад своих, назираяй! Приими сие́ ма́лое приноше́ние, от любве́ душевныя тебе возсылаемое, и от всякия изба́ви напасти всех; дерзновенным же твоим ко Христу Богу хода́тайством будущия нас изми́ муки, да с тобою в безконечныя веки воспеваем Богу: Аллилуиа.
Этот кондак читается трижды, затем 1-й икос «Ангела тя земнаго видяще...» и 1-й кондак «Избранный Богом...».
Молитвы
О преподобне Пе́тре царевиче, Ростовский чудотво́рче! Якоже из мрака языческаго во свет евангельскаго учения Господь тя призва́, та́ко умоли Его, да и нас по неизрече́нней Своей благости и человеколюбию изме́т всесильною Свое́ю десни́цею из тьмы греховныя, и осия́ет сердца́ наша к деланию Его Божественных заповедей. Якоже ты избег мятежа мирски́х волнений, во ангелоподобное безпечальное житие сподо́бился еси достигнути, та́ко сподо́би и нам грешным мо́ря сего, вла́емаго страстьми́, пучину безмятежно преплыти, иму́ще тя, отче, кормчаго о Господе нашем, и достигнути чистым покаянием ко пристанищу спасения вечнаго. И якоже имел еси споспе́шников тебе верховных апостолов Петра и Павла в созида́нии обители, та́ко подвигни их умилосердитися и о нас недостойных, и дарова́ти нам от сугубыя апостольския благости дерзновение ко Христу Богу. Веруем бо, яко аще мощи твоя святы́я и сокрове́нны в земли́, но ты царствуеши со избра́нными Божиими на небеси́: исхода́тайствуй убо, да и нам грешным молитвами твоими отве́рзется дверь Царствия Небеснаго в безконечныя веки. Аминь.
О преподобне отче Пе́тре царевиче, душе́ю на небеси Престолу Божию предстои́ши и Тро́ичныя славы наслаждаешися, телом же на земли́ в Божественном храме сем почиваяй, и данною ти свыше благодатию различная источа́яй чудеса, при́зри милостивым оком на предстоя́щия честне́й твоей ра́це люди и прося́щия умильно твоея́ помощи; се бо мы безмерными согрешении праведный гнев Божий на ся наведо́хом и всякия милости недостойни сотвори́хомся; тем же не сме́юще вознести́ очеса́ наша к высоте небесней, ниже́ вознести́ молебный глас ко Господу, сердцем сокруше́нным и смиренным духом тебе в хода́тайство и на помощь призываем, испроси у Господа Це́ркве благостоя́ние, возду́ха благорастворение, земли́ плодоносие; избави всех, верою несуменною к Богу приходя́щих и к ра́це моще́й твоих прибегающих, от всяких бед душевных и телесных; бу́ди печальным уте́шитель, неду́гующим врач, напа́ствуемым помощник, вдови́цам заступник, си́рым защитник, младенцем питатель, странствующим путево́ждь, старым укрепление, плавающим кормчий; исхода́тайствуй всем, твоея́ помощи требующим, вся, я́же ко спасению полезная, яко да твоими молитвами наставляеми, путь маловре́меннаго жития безбедне совершим, улучи́м на небеси́ вечный покой и прославим всех благих Да́теля, в Троице славимаго Бога, Отца и Сына и Святаго Духа, ныне и при́сно и во веки веков. Аминь.