Чин молебного пения о разрешении неплодства скорбящих супругов

Молебное пение ко Господу нашему Иисусу Христу разрешении неплодства скорбящих супругов

Иерей начинает: Благословен Бог наш:

Чтец: Царю Небесный: Трисвятое. Отче наш:

Возглас: Яко Твое есть Царство:

Господи, помилуй (12 раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем Самому Христу, Цареви и Богу нашему.

Псалом 70:

На Тя, Господи, уповах, да не постыжуся в век. Правдою Твоею избави мя и изми мя, приклони ко мне ухо Твое и спаси мя. Буди ми в Бога Защитителя и в место крепко спасти мя, яко утверждение мое и прибежище мое еси Ты. Боже мой, избави мя из руки грешнаго, из руки законопреступнаго и обидящаго, яко Ты еси терпение мое, Господи, Господи, упование мое от юности моея. В Тебе утвердихся от утробы, от чрева матере моея Ты еси мой Покровитель: о Тебе пение мое выну. Яко чудо бых многим, и Ты помощник мой крепок. Да исполнятся уста моя хваления, яко да воспою славу Твою, весь день великолепие Твое. Не отвержи мене во время старости, внегда оскудевати крепости моей, не остави мене. Яко реша врази мои мне, и стрегущии душу мою совещаша вкупе, глаголюще: Бог оставил есть его, пожените и имите его, яко несть избавляяй. Боже мой, не удалися от мене, Боже мой, в помощь мою вонми. Да постыдятся и исчезнут оклеветающии душу мою, да облекутся в студ и срам ищущии злая мне. Аз же всегда возуповаю на Тя и приложу на всяку похвалу Твою. Уста моя возвестят правду Твою, весь день спасение Твое, яко не познах книжная. Вниду в силе Господни, Господи, помяну правду Тебе Единаго. Боже мой, имже научил мя еси от юности моея, и до ныне возвещу чудеса Твоя, и даже до старости и престарения, Боже мой, не остави мене, дóндеже возвещу мышцу Твою роду всему грядущему, силу Твою и правду Твою, Боже, даже до вышних, яже сотворил ми еси величия. Боже, кто подобен Тебе? Елики явил ми еси скорби многи и злы, и обращься оживотворил мя еси, и от бездн земли возвел мя еси. Умножил еси на мне величествие Твое, и обращься утешил мя еси, и от бездн земли паки возвел мя еси. Ибо аз исповемся Тебе в людех, Господи, в сосудех псаломских истину Твою, Боже, воспою Тебе в гуслех, Святый Израилев. Возрадуетеся устне мои, егда воспою Тебе, и душа моя, юже еси избавил. Еще же и язык мой весь день поучится правде Твоей, егда постыдятся и посрамятся ищущии злая мне.

Слава, и ныне: Аллилуиа, аллилуиа, аллилуиа, слава Тебе, Боже. (Трижды).

Таже ектениа:

Миром Господу помолимся.

Лик: Господи, помилуй.

О свышнем мире:

О мире всего мира:

О святем храме сем:

О великом Господине:

О богохранимей стране нашей:

О еже простити всякое прегрешение вольное и невольное рабов Твоих (имярек) и милостиву быти им, Господу помолимся.

О еже податися им целомудрию и плоду чрева на пользу, Господу помолимся.

О еже благосердия ради милости Твоея, грехов юности и неведения их не помянути, но милостивно помиловати и здравие им даровати, Господу помолимся.

О еже не презрети прилежнаго моления рабов Твоих (имярек), но услышати, и благоуветливу и благопременительну и человеколюбиву быти и чада им подати, Господу помолимся.

О еже милостивно призрети на рабов сих (имярек), молящихся о даровании чад для продления рода и утешения, Господу помолимся.

О еже возложити им твердое упование на Бога и, прияти волю Его во смирении, понести крест свой, Господу помолимся.

О еже даровати им же и нам вся ко спасению прошения, Господу помолимся.

О избавитися нам от всякия скорби:

Заступи, спаси, помилуй:

Пресвятyю, Пречиcтую, Преблагословeнную, слaвную Владычицу нaшу Богородицу и Приснодеву Марию со всеми святыми помянyвше, сaми себе и дрyг дрyга, и вeсь живот нaш Христу Богу предадим.

Возглaс: Яко подобает Тебе всякая слава, честь, и поклонение, Отцу, и Сыну, и Святому Духу, ныне и присно, и во веки веков.

Лик: Аминь.

Таже, Бог Господь: и тропaрь, глaс 2:

Призри милостивно на моления наша,/ Отче наш Небесный,/ и не презри к Тебе припадающия,/ но посети милостию Твоею рабы сия,/ даруя им плод чрева,/ благочадия восприятие,/ молитвами Богородицы, Едине Человеколюбие.

Слава, и ныне, Богородичен:

Призри на моления Твоих раб, Всенепорочная,/ утоляющи лютая на ны востания,/ всякия скорби нас изменяющи,/ Тя бо, Едину, твердое и известное утверждение имамы,/ и Твое предстательство стяжахом./ Да не постыдимся, Владычице, Тя призывающии,/ потщися на умоление Тебе верно вопиющих:/ радуйся, Владычице, всех помоще, радосте и покрове,/ и спасение душ наших.

Таже прокимен, глас 7: В Тебе утвердихся от утробы,/ от чрева матере моея Ты еси мой Покровитель. Стих: На Тя, Господи, уповах, да не постыжуся во век.

Соборнаго послания Петрова, чтение

(главы 1,25 – 2,5):

Возлюбленнии! Глагол Господень пребывает во веки. Се же есть глагол благовествованный в вас. Отложше убо всяку злобу и всяку лесть и лицемерие и зависть и вся клеветы, яко новорождени младенцы, словесное и нелестное млеко возлюбите, яко да о нем возрастете во спасение. Понеже вкусисте, яко благ Господь. К Немуже приходяще, Камени Живу, от человек убо уничижену, от Бога же избранну, честну, и сами яко камение живо зиждитеся в храм духовен, святительство свято, возносити жертвы духовны, благоприятны Богови Иисус Христом.

Аллилyиа, глaс 4: Стих: Помощь моя от Господа, сотворшаго небо и землю. Стих: Услыши, Боже, глас мой, внегда молити ми ся к Тебе.

От Луки святаго Евангелиа чтение

(глава 1, 5–13, 23–25).

Во время оно бысть во дни Ирода царя иудейска, иерей некий, именем Захариа, от дневныя чреды Авиани: и жена его от дщерей Аароновех, и имя ей Елисавет. Беста же праведна оба пред Богом, ходяща во всех заповедех и оправданиих Господних безпорочна. И не бе има чада, понеже Елисавет бе неплоды, и оба заматоревша во днех своих беста. Бысть же служащу ему в чину чреды своея пред Богом, по обычаю священничества ключися ему покадити, вшедшу в церковь Господню: и все множество людей бе молитву дея вне, в год [во время] фимиама: явися же ему ангел Господень, стоя одесную олтаря кадильнаго: и смутися Захариа видев, и страх нападе нань. Рече же к нему ангел: не бойся, Захарие: зане услышана бысть молитва твоя, и жена твоя Елисавет родит сына тебе, и наречеши имя ему Иоанн. И бысть яко исполнишася дние службы его, иде в дом свой. По сих же днех зачат Елисавет жена его, и таяшеся месяц пять, глаголющи: яко тако мне сотвори Господь во дни, в няже призре отъяти поношение мое в человецех.

Таже ектениа: Помилуй нас, Боже, по велицей милости Твоей:

Лик: Господи, помилуй. Трижды.

Еще молимся о Великом Господине:

Еще молимся о богохранимей стране нашей:

Еще молимся о милости, жизни, мире, здравии, спасении, посещении, прощении и оставлении грехов рабов Божиих (имярек).

Еще молимся Тебе, Господу Богу нашему, о еже призрети на рабов Твоих (имярек) и прияти молитвы их Тебе возносимыя, да, неплодства разрешение улучивше, благочадие восприимут и видением сынов и дщерей своих возвеселятся и восхвалят Тя во вся дни живота своего.

Еще молимся Тебе, Творцу и Создателю нашему, о еже услышати усердная прошения рабов Твоих (имярек) о даровании им чадородия, да узрят сыны сынов своих, яко новосаждения масличная окрест трапезы своея.

Еще молимся Тебе, Подателю вечных благ, о еже милостивно призрети на нас и вся прошения наша ко спасению исполнити, Господу помолимся.

Возглас: Услыши ны, Боже Спасителю наш, Упование всех концев земли и сущих в мори далече, и Милостив, Милостив буди, Владыко, о гресех наших и помилуй ны, Милостив бо и Человеколюбец Бог еси, и Тебе славу возсылаем, Отцу и Сыну и Святому Духу ныне и присно и во веки веков. Аминь.

Молитва

Владыко Вседержителю, Святый Царю, наказуяй и не умервщляяй, утверждаяй низпадающая и возводяй низверженныя, телесныя человеков скорби исправляяй! Молимся Тебе, Боже наш, посети милостию Твоею рабы Твоя (имярек), прости им всякое согрешение вольное и невольное, низпосли с Небесе врачебную Твою силу, исцели болезни таящияся, даруй им плод чрева, благочадия восприятие.

Ей, Господи, Иисусе Христе Боже наш! Не вмени во грех моление наше, вемы бо глаголы пророка, имже рекл еси: яко небо отстоит от земли, тако отстоит путь Мой от путий ваших, и помышления ваша от мысли Моея. Обаче вемы и яже Сам рекл еси: раститеся и множитеся; и паки рекл еси: просите и дастся вам. Сего ради, на милость Твою уповающе, разрешения безплодия и дарование благочадия рабом Твоим (имярек) дерзаем просити. Ты бо еси Источник исцелений и Спас душ наших, Христе Боже наш, и Тебе славу возсылаем, со Безначальным Твоим Отцем, Пресвятым Благим и Животворящим Твоим Духом ныне и присно и во веки веков. Аминь.

Премудрость. И отпуст.