Источник

В 30-й день

Святы́я му́ченицы Ани́сии, и преподо́бныя ма́тере на́шея Мела́нии, и преподо́бнаго Зо́тика

На Го́споди, воззва́х: стихи́ры святы́я Ани́сии 3, глас 4.

Подо́бен: Я́ко до́бля:

Де́вства све́тлостию/ уясни́вшися, всехва́льная,/ муче́ния облиста́ла еси́ по́двиги:/ поклони́тися бо со́лнцу не повину́вшися,/ непра́ведное претерпе́ла еси́ заколе́ние/ и, обагри́вшися кровьми́,/ предста́ла еси́ Со́лнцу сла́вы, венцено́сице,/ и отту́ду испуща́емыми/ озаря́ема светлостьми́.

Серде́чное раче́ние явля́ющи,/ слеза́ми умиле́ния, сла́вная,/ зе́млю омочи́ла еси́/ и власы́ отира́ла еси́ Христо́во подно́жие,/ помышля́ющи, и Того́ я́ко прису́ща предзря́щи,/ Его́же вожделе́ла еси́,/ и, стопа́м прикаса́ющися мы́слию,/ виде́нии Боже́ственнейшими/ твою́ ду́шу просвети́ла еси́.

И бога́тство расточи́вши,/ и ни́щия удовли́вши,/ уневе́стилася еси́ Нетле́нному Жени́ху́ твоему́/ и, я́коже ве́но, принесла́ еси́ тому́, всесла́вная,/ крове́й то́ки и страсте́й подража́ние,/ я́же претерпе́ла еси́, Ани́сие./ Еди́н в черто́г всели́в тя Вы́шний,/ я́ко страстоте́рпицу и му́ченицу.

И́ны стихи́ры преподо́бный Мела́нии, глас то́йже.

Подо́бен: Зва́нный свы́ше:

А́нгельским лико́м сочта́вшаяся,/ егда́ тя Боже́ственное раче́ние распали́/ и прелете́ти повине́ ви́димых/ безстра́стия ра́ди и чистоты́,/ тогда́ твоего́ супру́га словесы́ улови́ла еси́ Богопоко́рными,/ нестоя́нную отлага́ющи жития́ молву́ теку́щую./ Те́мже с ним, ве́чную обре́тши жи́знь и наслажде́ние,/ мо́лиши Влады́ку спасти́ ду́ши на́ша.

А́нгельское вожделе́вши житие́,/ егда́ сла́дкую пи́щу поплева́ла еси́,/ воздержа́нием упражня́ющися и бде́нием,/ ни́зу лежа́нием и чистото́ю,/ тогда́ чисте́йший сосу́д была́ еси́ Ду́ха Боже́ственнаго,/ дарова́нии пресве́тлыми укра́шена Тому́, всечестна́я;/ те́мже к ре́вности Его́ Боже́ственней привлекла́ еси́ лю́ди/ и привела́ еси́ Влады́це, Мела́ние,/ и Спа́су душ на́ших.

Добро́тами доброде́телей укра́шена,/ егда́ спаси́тельное сло́во испо́лнила еси́,/ расточи́вши, подала́ еси́/ тьмы твоего́ зла́та ни́щим и убо́гим,/ тогда́ Небе́сное бога́тство восприя́ла еси́,/ пра́вдою обогати́вшися во век,/ и нетле́нием, и избавле́нием./ Те́мже чтим твое́ успе́ние/ и приле́жно мо́лим тя:/ моли́ Зижди́теля просвети́ти ду́ши на́ша.

Сла́ва, и ны́не, пра́здника, глас 1:

Сла́ва в Вы́шних Бо́гу,/ в Вифлее́ме слышу от Безпло́тных днесь,/ на земли́ ми́р Благоволи́вшему бы́ти./ Ны́не Де́ва Небе́с ши́рши,/ возсия́ бо свет омраче́нным/ и смире́нныя вознесе́, а́нгельски пою́щия:/ сла́ва в Вы́шних Бо́гу.

На стихо́вне стихи́ры, глас 2.

Подобен: До́ме Евфра́фов:

Звезда́ от Иа́кова,/ Христо́с возсия́в,/ просвети́ язы́ки/ све́том Богозна́ния,/ Того́ славосло́вим.

Стих: Из чре́ва пре́жде денни́цы роди́х Тя,/ кля́тся Госпо́дь и не раска́ется.

Гра́де Дави́дов,/ Вифлее́ме, весели́ся:/ из тебе́ бо, и́же безма́терний,/ безо́тчий воплоти́ся,/ от Де́вы Чи́стыя, Богоотрокови́цы.

Стих: Рече́ Госпо́дь Го́сподеви моему́:/ седи́ одесну́ю Мене.

Сло́во О́тчее,/ плоть прие́мь, роди́ся,/ пелена́ми пови́тся,/ во я́слех возлеже́,/ безслове́сия разреша́я мя.

Сла́ва, и ны́не, глас 1:

По о́бразу и по подо́бию,/ истле́вша преступлени́ем, ви́дев Иису́с,/ приклони́в Небеса́, сни́де/ и всели́ся во утро́бу де́вственную неизме́нно,/ да в ней истле́вшаго Ада́ма обнови́т, зову́ща:/ сла́ва я́вле́нию Твоему́,/ Изба́вителю мой и Бо́же.

Тропа́рь пра́здника, глас 4:

Рождество́ Твое́, Христе́ Бо́же наш,/ возсия́ ми́рови свет ра́зума:/ в нем бо звезда́м служа́щии/ звездо́ю уча́хуся/ Тебе́ кла́нятися, Со́лнцу Пра́вды,/ и Тебе́ ве́дети с высоты́ восто́ка./ Го́споди, сла́ва Тебе́.

Слу́жба свята́го Зо́тика поется на пове́черии

Кано́н, глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.

Свы́ше просвети́тися омраче́нней мое́й мы́сли,/ пе́ти тя досто́йно, Зо́тике, Христа́ умоли́.

Житие́м твои́м А́нгелом на земли́, Богому́дре,ревну́я,/ показа́лся еси́ досто́йно,/ жите́йских красо́т гнуша́яся.

Богоро́дичен: Род челове́ческий Тебе́ ра́ди, Де́во, назида́ется,/ Бог бо, Вы́шних не оста́вив, на зе́млю прии́де.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Прииди́те, стра́ннии, днесь,/ ра́достно глас вознесе́м во светле́м сем торже́стве́,/ Зо́тика ублажа́юще.

Поста́вил еси́ дом твой, я́коже Авраа́м ски́нию днесь,/ вся ни́щия прие́млющий и бога́тно пита́ющий.

Богоро́дичен: Бу́рю вся́ку уста́вила еси́ в Рождестве́ Твое́м, Всечи́стая,/ те́мже враги́ ве́рнии побежда́ют, в ми́ре лику́юще.

Седа́лен, глас 5.

Подо́бен: Собезнача́льное Сло́во:

Страсте́й пе́щи, преподо́бне, угаси́л еси́ воздержа́ния росо́ю,/ дарова́нием обогати́вся, врачева́ния от Бо́га, Зо́тике, прия́л еси́/ врачева́ти ве́рных боле́зни лю́тыя и де́монов отгони́ти полки́;/ сего́ ра́ди с весе́лием почита́ем тя.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Светоно́сное торжество́ сие́ преподо́бнаго ны́не просия́ Зо́тика,/ к Рождеству́ Христо́ву призыва́ющи вся на чрежде́ние.

Чудесы́ преле́потствовав, чудеса́ пресла́вная оста́вил еси́ нам,/ честна́я твоя́ исправле́ния на земли́, преблаже́нне, о́браз Боже́ствен.

Богоро́дичен: Очисти́лище обрето́хом Тя, Богороди́тельнице,/ и прибе́жище во бране́х непобеди́мо,/ ве́рнии же держа́ву, Чи́стая, нося́т.

Песнь 5

Ирмо́с: Просвети́ нас повеле́нии Твои́ми, Го́споди/ и мы́шцею Твое́ю высо́кою/ Твой ми́р пода́ждь нам,/ Человеколю́бче.

Украше́ние доброде́тели показа́ся, чу́дне, честна́я твоя́ исправле́ния,/ Боже́ственный дом, наги́х одея́ние.

Прокаже́ние, свяще́нне, исцеля́я, о́тче,/ воздви́гл еси́ враче́бницу твой дом честны́й,/ в не́мже досто́йно всяк неду́г врачу́ется.

Богоро́дичен: Ве́лие и честно́е е́же в Тебе́ я́вльшееся та́инство, Богоро́дице Присноде́во:/ се бо вои́стинну, земни́и, к Бо́гу примири́хомся.

Песнь 6

Ирмо́с: Бе́здна грехо́в и прегреше́ний бу́ря мя смущает/ и во глубину́ ну́жднаго ре́ет мя отча́янияу/ но твою́ кре́пкую ру́ку мне простри́, я́ко Петро́ви,/ о Упра́вителю! и спаси́.

Храм тя, вси ве́рнии, ду́ха ве́мы,/ храм бо всеблаголе́пен твой сотвори́л еси́ дом, пресла́вне,/ в не́мже всяк неду́г моли́твами твои́ми отгоня́ется.

Странноприя́тие на земли́, Авраа́му подо́бяся, поста́вил еси́,/ всеблагоче́стно безкро́вныя прие́мля, наги́я, и мимоходя́щия,/ и хромы́я, и стра́нныя, и ни́щия вводя́.

Богоро́дичен: Не́бо на земли́, Де́во, показа́вый верте́п,/ Небе́сный Тя храм, А́нгельскими окруже́н ли́ки, показа́,/ сла́ва в Вы́шних вопию́щих Твоему́ Рождеству́ ве́рно.

Конда́к, глас 2.

Подо́бен: Тве́рдыя:

За любо́вь Христо́ву, преподо́бне, ни́щия возлюби́в,/ и сих удово́лил еси́,/ и Небе́сное бога́тство ны́не восприя́л еси́, Зо́тике пребога́те./ Сего́ ра́ди вси тя почита́ем,/ соверша́юще па́мять твою́.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Всем преподо́бным сочи́слился еси́/ и лико́м Боже́ственным безтеле́сным, Зо́тике преблаже́нне,/ с ни́миже и взыва́еши:/ благослове́н еси́, Го́споди Бо́же, во ве́ки.

Си́лою и благода́тию, Богому́дре, был еси́ вдов и не́мощны́х,/ сиро́т же оте́ц показа́лся еси́, зовы́й:/ благослове́н еси́, Го́споди Бо́же, во ве́ки.

Богоро́дичен: Кре́пость ва́рваров, Богоро́дице, истреби́ и спаси́ лю́ди Твоя́./ Ве́рныя же утверди́, вопию́щия:/ благослове́н, Всечи́стая, Плод Твоего́ чре́ва.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Сия, му́дре, победи́тельная, сия́ исправле́ния,/ и я́же убо́гих и жен сле́зы,/ твой храм показа́ша Небесе́ вы́шший,/ и ца́рствия тебе́ вхо́ды отверзо́ша./ Ве́рою бо вопия́л еси́:/ о́троцы, благослови́те, свяще́нницы, воспо́йте Го́спода,/ лю́дие, превозноси́те во вся ве́ки.

Сна твои́м не дал еси́ очесе́м, досточу́дне,/ ниже́ ве́ждам дрема́ния, Богоприя́тне,/ до́ндеже де́ло Боже́ственное, слове́сный рай Христо́в, до конца́ соверши́л еси́, поя́:/ о́троцы, благослови́те, свяще́нницы, воспо́йте Го́спода/ и превозноси́те во вся ве́ки.

Богоро́дичен: Человеколю́бием ми́лости Твоея́ к нам прише́л еси́,/ и́же спасе́ния ра́ди быв я́ко Челове́к,/ и в верте́п всели́лся еси́, пелена́ми повива́емь,/ и земноро́дныя от страсте́й воздви́гл еси́, согла́сно пою́щия:/ свяще́нницы, воспо́йте Го́спода,/ лю́дие, превозноси́те во вся ве́ки.

Песнь 9

Ирмо́с: У́жасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком плотски́/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Благода́ть тебе́, о́тче, от Бо́га даде́ся лечи́ти неду́ги,/ ни́щия, и сухи́я, и хромы́я;/ я́же я́ко люби́мичи Христо́вы ве́рно прие́мля, с си́ми ра́дуешися при́сно,/ в не́дрех Авраа́мовых водворя́яся.

Напита́л еси́, о́тче, оби́льно вся́каго стра́нна, и на́га, и мимоходя́ща;/ с патриа́рхи при́сно и с пра́ведными ны́не ра́дуешися све́тло/ иде́же бога́тство и сла́дость,/ иде́же присносу́щное спаса́емых упова́ние,/ иде́же всем бога́тство есть Христо́с.

Богоро́дичен: Я́ко су́щи Ма́ти Бо́жия,/ я́ко Предста́тельница и приста́нище чту́щих Тя,/ я́ко прибе́жище всех, Де́во, притека́ющих к Тебе́,/ я́ко ве́рных же ра́дость,/ и сла́ва, и утвержде́ние, и вене́ц досто́ин,/ лю́ди Твоя́, Богоро́дице, спаса́й.

Стихи́ры, глас 6.

Подо́бен: Тридне́вен:

Я́ко Авраа́м нра́вы, му́дре,/ показа́лся еси́ по обоему́:/ твой дом дово́льное оби́льство отве́рзл еси́ всем,/ подая́ тре́бующим/ и да́руя ни́щим ми́лость.

Вдов и ни́щих Тя Христо́с показа́ прие́мника,/ вре́дных засту́пника те́пла,/ предста́теля в бе́дах,/ побо́рника и изба́вителя восхваля́ющих, о́тче наш.

Сла́ва, глас то́йже:

Си́лою укрепля́емь и благода́тию украша́емь/ Ро́ждшагося в верте́пе, Зо́тике,/ поще́нием и воздержа́нием стра́сти победи́л еси́/ и прия́л еси́ победи́тельная.

И ны́не, глас то́йже:

Я́ко Младе́нца в я́слех восклони́, Христе́ Бо́же,/ безсе́менно ро́ждшая Тя Де́ва,/ ли́цы же Безпло́тных с высоты́ вопия́ху:/ сла́ва Зижди́телю и Бо́гу всех.

НА У́ТРЕНИ

Тропа́рь пра́здника, трижды.

По 1-й стихологии седа́лен, глас 1.

Подо́бен: Ка́мени запеча́тану:

Прему́дрость и ра́зум пре́жде веков Сый,/ Сын, Единосу́щный Отцу́ и Ду́ху,/ восхоте́ в после́дняя времена́ роди́тися от Де́вы нас ра́ди,/ да спасе́т ми́р от мучи́тельства вра́жия и чужда́го;/ сла́ва Рожде́нному пло́тию,/ сла́ва Благоизво́лившему,/ сла́ва Избавльшему́ нас Рождество́м Свои́м.

Сла́ва, и ны́не, то́йже.

По 2-й стихологии седа́лен, глас 8.

Подо́бен: Повеле́нное:

Да ра́дуется Не́бо, земля́ да весели́тся,/ я́ко роди́ся на земли́ А́гнец Бо́жий, подая́й ми́ру избавле́ние:/ Сло́во, и́же в не́дрех Сый Отца́,/ про́йде из Де́вы без се́мене./ Его́же волсви́ дивля́хуся, зря́ще Бо́га во пло́ти,/ па́стырие же взыва́ху:/ сла́ва вои́стинну еди́ному Бо́гу.

Сла́ва, и ны́не, глас то́йже.

Подо́бен: Прему́дрости:

Нетле́нная сла́ва и Боже́ственная,/ из ложе́сн проше́л еси́ де́вственных/ и це́лу соблю́л еси́ и Де́ву ро́ждшую,/ и я́ко престо́л я́сли, в ни́хже роди́вся, почи́л еси́/ и кра́сну пала́ту верте́п показа́л еси́;/ поя́ху Тя па́стырие я́ко Царя́ всех,/ звезда́ же спутеше́ствова Боже́ственный Свет показа́ти волхво́м./ Те́мже вси вопие́м Ти:/ Влады́ко Христе́ Бо́же, прегреше́ний оставле́ние низпосли́/ пра́зднующим ве́рою Твое́ Боже́ственное Рождество́.

Кано́н пра́здника, глас 1, со ирмосо́м на 6, творе́ние кир Иоа́нна

(зри день 25-й).

И святы́х два кано́на. Кано́н святы́я Ани́сии, глас 4. Творе́ние Фео́фа́ново.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Пою́щу светоно́сную па́мять твою́, Свет мне низпосли́,/ я́ко Отцу́ Све́тов предстоя́щи в ра́дости, всехва́льная,/ страсте́й мои́х бу́рю твои́ми моли́твами отгоня́щи.

Воздержа́нием душе́вную обнови́ла еси́, Богому́драя, ни́ву,/ муче́ния клас плоди́вши де́лателю, соблю́дшему и кре́пость тебе́ вдохну́вшему,/ де́во му́ченице досточу́дная.

Руце́ твое́й, богате́йше подаю́щей бога́тство тле́нное,/ бога́тотворную приобрела́ еси́ жи́знь, ника́може мимотеку́щую,/ и сокро́вище неистощи́мое, му́ченице, и сла́ву Небе́сную.

Богоро́дичен: Из Тебе́, Неискусобра́чная, днесь вся́ческих Творе́ц пло́тски ражда́ется по нам/ и пелена́ми повива́ется, повива́яй мо́ре мгло́ю,/ Ма́ти Присноде́во.

Кано́н преподо́бныя Мела́нии, глас то́йже. Творе́ние Фео́фа́ново.

Песнь 1

Ирмо́с: Отве́рзу уста́ моя́,/ и напо́лнятся ду́ха,/ и сло́во отры́гну Цари́це Ма́тери,/ и я́влю́ся, све́тло торжеству́я,/ и воспою́, ра́дуяся, Тоя́ чудеса́.

Страсте́й омраче́нием очерне́вша мя всю́ду, просвети́в,/ очи́сти светоно́сными моли́твами преподо́бныЯ Твоея́, Человеколю́бче, Мела́нии/ и, сию́ чтущу, сло́во ми вдохни́.

Те́пле после́довала еси́ тебе́ ра́ди во́льное распя́тие Претерпе́вшему,/ на ра́мех нося́щи, всеблаже́нная, усе́рдно крест твой,/ и сего́ сохрани́ла еси́ опра́вдания.

Роди́телей пристра́стия и пло́ти любосла́стия до конца́ уклони́лася еси́,/ еди́наго вожделе́вши рачи́теля – Христа́, Богому́драя, добро́ты;/ его́же вся жела́ют, Сло́ва причаща́ющиися.

Богоро́дичен: Обнищава́ет бога́тый, мене́ обогаща́я Божество́м,/ зле обнища́вшаго невоздержа́нием пе́рвее,/ и Безнача́льный се́ нача́ло прие́млет,/ от Де́вы ражда́емь Богоотрокови́цы.

Песнь 3. Ин. Святы́я Ани́сии

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Добро́ты твоея́ душевныя Творе́ц твой вожделе́в,/ неве́сту тя, вои́стинну добру́ и непоро́чну, му́ченице,/ Себе́ обручи́л есть.

Стра́сти Безстра́стнаго, умертви́вшагося нас ра́ди,/ умерщвле́ние, му́ченице честна́я, лю́бящи,/ му́ченическою умира́еши сме́ртию.

Я́ко заколе́ние духо́вно,/ я́ко же́ртва чиста́ соверше́на Тебе́, Бо́гу, принесе́ся,/ я́же Твой Крест в озлюби́вшая.

Богоро́дичен: Село́ вме́стно Невмести́маго Соде́теля была́ еси́,/ Сего́ пло́тию вмести́вши, Обра́дованная Пречи́стая.

Ин. Преподо́бныя Мела́нии

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ несть бо свят, па́че Тебе́, Человеколю́бче.

Я́же ни́жних отсту́пльше жела́ний,/ все жела́ние дала еси́ благоче́стно произво́лением, сла́вная,/ к бу́дущим то́кмо и ве́чнующим.

Приле́жными моли́твами чу́вствия украси́ла еси́/ и Ду́ха заря́ми светови́дна была́ еси́ вся,/ в телеси́ невеще́ственное житие́ подража́вши.

И веща́ющи, и молча́щи, яви́лася еси́ наказа́ние,/ неутвержде́ных утвержде́ние, мона́шествующих о́браз, Мела́ние Богому́драя;/ те́мже пое́м тя.

Богоро́дичен: Облага́яй Небеса́ о́блаки хоте́нием/ повива́ется во́лею, рука́ми Де́вы держи́мь,/ руки́ мя исхища́я борца́.

Конда́к Ани́сии, глас 4:

Наста́ светоно́сный день чуде́сных по́двиг твои́х, страстоте́рпице пресла́вная,/ днесь Бо́жия честна́я Це́рковь пра́зднует и созыва́ет вопи́ти тебе́:/ ра́дуйся, де́во му́ченице Ани́сие всеблаже́нная.

Конда́к Мела́нии, глас 3.

Подо́бен: Де́ва днесь:

Де́вства чистоты́ возлю́бльши и обру́чника к благи́м увеща́вши,/ премно́жество бога́тства расточи́/ в пребыва́ние и́ночествующим, Богоблаже́нная, и оби́тели воздви́же./ Те́мже в Небе́сная оби́тели всели́ся,/ помина́й нас, Мела́ние всечестна́я.

Седа́лен Ани́сии, глас 4.

Подо́бен: Вознесы́йся на Крест:

Над страстьми́ плотски́ми ца́рствующи,/ страстьми́ живо́творными воцари́лася еси́,/ от твоея́ кро́ве обагри́вши, честна́я,/ червлени́цу нетле́нну благоче́стно, Ани́сие;/ те́мже Всецаря́ неве́ста непоро́чна яви́лася еси́./ Но от бед изба́ви нас,/ соверша́ющих сла́вную па́мять твою́.

Сла́ва, Мела́нии, глас то́йже.

Подо́бен: Ско́ро предвари́:

Боже́ственная повеле́ния соверша́ющи со тща́нием,/ расточи́вши, разда́ла еси́ тьмы зла́та твоего́ ни́щим:/ взе́мши же крест твой на ра́мена, Мела́ние,/ вку́пе с твои́м жени́хом после́довала еси́ ве́рою Христу́,/ распе́ншемуся пло́тию, еди́ному Бо́гу на́шему.

И ны́не, пра́здника, глас то́йже:

Боже́ственне весели́тся тварь вся ны́не:/ Христо́с бо Госпо́дь, Бо́жий Сын, от Де́вы ражда́ется Чи́стыя,/ весь челове́ческий род обезсме́ртствуя,/ реша́ же кля́тву прама́тере Е́вы./ Те́мже я́ко Благоде́телю на́шему пе́ние принесе́м.

Песнь 4. Ин. Святы́я Ани́сии

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Живоно́сным твои́м стопа́м после́дующи,/ копие́м в ре́бра уязвля́ется и обраща́емое неле́стно прохо́дит ору́жие/ раба́ Твоя́, Влады́ко Христе́, воспева́ющи Тя.

Муче́ния сия́ющи светлостьми́ и нетле́ния венце́м увя́зшися,/ ра́дующися, предстои́ши Христу́, Жени́ху́ твоему́,/ му́ченице Ани́сие всехва́льная.

Запе́ншаго ле́стию пе́рвую Е́ву,/ му́ченическими противле́ньми побе́ждши, низложи́ла еси́,/ показа́вши некре́пка, Христу́ воспева́ющи:/ сла́ва си́ле Твое́й, Го́споди.

Богоро́дичен: И́же невеще́ственная существа́ Созда́вый,/ теле́сно, я́ко Челове́к, из Тебе́, Богома́ти, днесь ражда́ется,/ Тому́ воспои́м:/ сла́ва си́ле Твое́й, Го́споди.

Ин. Преподо́бный Мела́нии

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ слава, Христе́, си́ле Твое́й.

Воздержа́нием по́хоти плотски́я умертви́вши,/ жи́знь живу́щих име́ла еси́, все́лльшуюся в тя, всечестна́я;/ к не́йже, от земли́ преста́вльшися, всели́лася еси́,/ Ца́рствия Небе́снаго наслажда́ющися.

Мно́гия твоя́ тьмы зла́та разда́вши а́лчущим,/ вои́стинну сия́ скрыва́еши в сокро́вищах, никогда́же ветша́ющих,/ во ве́ки же соблюда́ющим тебе́ дово́льное пребыва́ние.

Ми́лования твоего́ бога́тство я́коже река́ бысть,/ напая́ющи вся́кое ни́щих се́рдце, сла́вная, скве́рну отмыва́ющи нищеты́,/ бога́тство некрадо́мо исхода́тайствующи тебе́ на Небесе́х неистощи́мое.

Богоро́дичен: Похоте́м повину́вся страсте́й, я́коже безслове́сен,/ слове́сен сый, приложи́хся ското́м;/ но, Сло́во поро́ждшая Присносу́щное,/ не пре́зри мене́, всегда́ погиба́ющаго.

Песнь 5. Ин. Святы́я Ани́сии

Ирмо́с: Ты, Го́споди, мой Свет,/ в ми́р прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Тя, Го́споди, исто́чник спасе́ния ве́дящи,/ ча́шу спасе́ния несумне́нным се́рдцем му́ченица Твоя́ испи́.

Ю́ница Христо́ва, Богоприя́тное заколе́ние, Богопринесе́нная же́ртва,/ страстоно́сице Госпо́дня, моли́ спасти́ся нам.

Свет была́ еси́, Све́ту вели́кому ясне́е прибли́жившися,/ и просвеща́еши светоно́сную па́мять твою́ пра́зднующия.

Богоро́дичен: Тя ору́жие непобеди́мое на враги́ предлага́ем,/ Тя утвержде́ние и наде́жду на́шего спасе́ния,/ Богоневе́сто, стяжа́хом.

Ин. Преподо́бныя Мела́нии

Ирмо́с:

Нечести́вии не узрят сла́вы Твоея́, Христе́,/ но мы Тя, Единоро́дне,/ Оте́ческия сла́вы Сия́ние Божества́,/ от но́щи у́тренююще, воспева́ем Тя, Человеколю́бче.

Безобра́зныя ви́ды страсте́й до конца́ от души́ острога́вши, честна́я,/ ша́ром воздержа́ния живонаписа́ла еси́ в ней безстра́стие/ и любо́вь нелицеме́рну.

Све́тло, я́ко зерца́ло, бы́вши я́ве,/ светле́ дарова́ния Ду́ха Боже́ственнаго, сла́вная, восприя́ла еси́/ и ве́рныя просвети́ла еси́ све́тлостию жития́ твоего́.

Воздержа́нием погаси́вши страсте́й распале́ние,/ огнь возжгла́ еси́ душе́вный, во всем житии́ твое́м блиста́ющися/ и омраче́ния де́монская отража́ющи.

Богоро́дичен: Де́ва роди́ Бо́га Емману́ила во гра́де Вифлее́ме, Еде́м отверза́ющаго,/ дре́вле ми заключе́нный невоздержа́нием сне́ди и ле́стию зми́я.

Песнь 6. Ин. Святы́я Ани́сии

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Му́жеский в же́нстем телеси́ ум восприи́мши,/ к боре́нию враго́в безпло́тных, му́ченице, изшл́ еси́/ и ору́жием терпе́ния ты́я умертви́ла еси́.

Кровными наводне́нии мо́ре изсуши́ла еси́ злове́рия,/ Христо́ву же честну́ю напои́ла еси́ Це́рковь, Ани́сие страстоте́рпице,/ дев похвало́.

Немо́кренно подвиго́в прешла́ еси́ бу́рю непотопле́нно,/ те́мже в приста́нище невла́емо устреми́лася еси́/ и и́стинныя наслажда́ешися тишины́, пресла́вная.

Богоро́дичен: Созда́вый по о́бразу Своему́ челове́ка/ за мно́гое благоутро́бие назидает того́,/ из Тебе́, Де́во Богома́ти, весь в него́ обле́кся.

Ин. Преподо́бныя Мела́нии. Ирмо́с то́йже

Немо́кренно жите́йское прешла еси́ обурева́ние,/ направля́ема манове́нием вся сло́вом Сотво́ршаго,/ и в приста́нище спасе́ния, Мела́ние, дости́гла еси́.

И́скрами те́плаго твоего́ е́же к Го́споду раче́ния/ разжже́нныя стре́лы грехо́вныя вся попали́шася,/ и де́монское злоде́йство до конца́ погубле́но бысть.

Ум твой, к лу́чшему едине́нием обожа́емь,/ су́щия к пло́ти любве́ отлучи́ся манове́нием всеси́льным;/ сего́ ра́ди поще́ния труды́ понесла́ еси́.

Богоро́дичен: Обожа́ет мя от Де́вы рожде́йся Госпо́дь,/ и пелена́ми повива́ется, разреше́ние творя́ мои́х прегреше́ний,/ и вмеща́ется в верте́п,/ И́же все́ми невмести́мый.

Конда́к и и́кос пра́здника.

Песнь 7. Ин. Святы́я Ани́сии

Ирмо́с: Спасый во огни́ Авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Твою хра́мину душе́вную, му́ченице,/ мы́сленно водруже́нную испове́данием Христо́вым,/ мучи́тельныя поте́кше пото́ки ника́коже поколеба́ша,/ Бо́же, – вопию́щую, – благослове́н еси́.

Пра́вды Со́лнца, Христа́, ве́дящи, му́ченице,/ не восхоте́ла еси́ злочести́вне пожре́ти со́лнцу,/ повелева́ющу мучи́телю, но пе́ла еси́:/ Бо́же оте́ц на́ших, благослове́н еси́.

От твои́х крове́й свяще́нных омочи́вши себе́ багряни́цу,/ победи́тельным главу́, му́ченице, венце́м венча́ла еси́,/ и Бо́гу ны́не предстои́ши, Царю́ Безсме́ртному, веселя́щися.

Богоро́дичен: Пови́вый не́бо о́блаки, зе́млю же мгло́ю,/ от Твоего́ чре́ва ро́ждся, пелена́ми повива́ется/ и во я́слех полага́ется, Богома́ти Всенепоро́чная,/ спаса́я ве́дущия Тя, Богоро́дицу.

Ин. Преподо́бныя Мела́нии. Ирмо́с то́йже.

С супру́жником Христо́во и́го нося́щи, Богоно́сная,/ обнови́сте моли́тв ра́лом ду́ши и, ни́ву до́брых возде́лавше,/ наслажда́етеся во ве́ки Вы́шния сла́вы.

Я́ко ма́слина, псало́мски в до́му Бо́жии насажде́на,/ умаща́еши та́инственно сердца́, преподо́бная,/ и ли́ца еле́ем боле́зней твои́х ве́рно восхваля́ющих твоя́ по́двиги.

Воздержа́ния ороше́нием угаси́вши страсте́й пе́щи,/ одожде́нием моли́тв врачева́ний пучи́ны источи́ла еси́,/ и страсте́й приверже́ния потопля́ющи, Мела́ние, чту́щих тя.

Богоро́дичен: Руно́ Тя, рече́ Дави́д, я́ко дождь прие́мшу Небе́сный, Чи́стая,/ беззако́ния пото́ки изсуша́ющь/ и ве́рных напоя́ющь смы́слы, грехо́м пресо́хшия.

Песнь 8. Ин. Святы́я Ани́сии

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Вдова́м, сирота́м же, и ни́щим,/ и всем тре́бующим бога́тство расточи́ла еси́,/ Вседержи́теля лю́бящи несомне́нно повеле́ния,/ и муче́ния же честны́я и́щеши ча́ши,/ Ю́же испи́вши, уста́вила еси́, де́во честна́я, жела́ния.

Я́ко ве́но, принесла́ еси́ Христу́ пост и сле́зы,/ страсте́й умерщвле́ние и кро́ве проли́тие, ребр прободе́ние:/ не обветша́ющий Сам тем тебе́ вене́ц/ и черто́г нетле́нен подае́т и сла́ву Небе́сную.

Живе́ши со А́нгелы во Све́те, дев с чи́нми,/ и собо́ры му́ченик спра́зднующи,/ лице́ Жениха́ твоего́ к лицу́ зря́щи,/ и све́тлыя сла́вы причаща́ющися, и вопию́щи: благослови́те, вся дела́ Госпо́дня, Го́спода.

Богоро́дичен: Се ны́не оскуде́ я́ве от Иу́дова пле́мене князь и вождь:/ Ты бо, Всенепоро́чная, родила́ еси́,/ я́же тому́ пре́жде отлежа́щая, жда́ние язы́ков, Христа́./ Ему́же пое́м: благослови́те, вся дела́ Госпо́дня, Го́спода.

Ин. Преподо́бный Мела́нии

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Храм се́рдце и те́ло Тро́ице Пребоже́ственней соверши́вши,/ Боже́ственныя возсозда́ла еси́ хра́мы, достосла́вная,/ в ни́хже дев чи́ны и мона́шествующих ли́ки совокупи́ла еси́,/ пою́щия согла́сно и превознося́щия Христа́ во вся ве́ки.

Ми́лостынею ми́лость стяжа́ла еси́,/ расточи́вши, дала́ еси́ убо́гим,/ пра́вда твоя́ пребыва́ет, ве́чнующи,/ и е́же от сея́ приобре́тение тебе́ неветша́емое, Мела́ние, Богоно́сице преподо́бная./ Те́мже тя чтим, я́ко вои́стинну победоно́сицу.

Смы́слом, му́жеством, целому́дрием и Боже́ственною пра́вдою блиста́ющи,/ име́ла еси́ вознося́щее тя на высоту́ Небе́сную высокотво́рное смире́ние,/ и́мже низложи́ла еси́, преподо́бная, велича́ваго зми́я:/ тем тя почита́ем, я́ко и́стинную победоно́сицу.

Богоро́дичен: Страсте́й мя смуща́ют треволне́ния,/ глубина́ отча́яния потопля́ет мя,/ спаси́ мя, Всенепоро́чная Ма́ти, и спасу́ся:/ Спа́са бо Го́спода родила́ еси́, во я́слех я́ко Младе́нца положе́на,/ Его́же превозно́сим во вся ве́ки.

Песнь 9. Ин. Святы́я Ани́сии

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Ка́мению принося́щии че́сти па́че Зижди́теля,/ зре́ти тя, сла́вная, не терпя́ще, Бо́гу возложену́, мече́м ссека́ют,/ сме́ртию Боже́ственное безсме́ртие тебе́ обруча́юще.

Фессалони́тский град твои́ми пелена́ми и страда́ньми, му́ченице, хва́лится, де́во;/ Це́рковь же перворо́дных с пра́ведными и́мать твой дух Боже́ственный, веселя́щийся.

Лива́н, зла́то же и сми́рну/ в Вифлее́ме Рожде́нному волсви́ принесо́ша ве́рою,/ страстоте́рпица же кровь муче́ния излия́ние,/ о нас того́ моля́щи.

Богоро́дичен: Жезл прозябла́ еси́ из ко́рене Иессе́ева, Богороди́тельнице,/ цвет Божества́, Христа́, нам ро́ждши, Всечи́стая, днесь,/ Его́же, я́ко Бо́га Невмести́маго/ и ны́не я́ко Младе́нца, пелена́ми повива́ема, велича́ем.

Ин. Преподо́бныя Мела́нии

Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние про­цвела́ еси́./ Тем Тя вси велича́ем.

На высоту́ я́ве кра́йняго соверше́нства востекла́ еси́, блаже́нная,/ и пости́гла еси́ чи́ны Безтеле́сных,/ ко и́стинному жела́нию прибли́жившися,/ исто́чник благи́х ны́не прия́ла еси́;/ тем тя вси ублажа́ем.

С ли́ки весели́шися по́стников, воздержа́вшися и стра́сти умертви́вши,/ зри́ши откро́венным лице́м Бо́жию красоту́,/ Ю́же пре́жде я́вле́ния стяжа́ла еси́ целому́дрием,/ Мела́ние всеблаже́нная.

Ходи́вши стезе́ю те́сною, простра́ннаго ра́я широты́ дости́гла еси́,/ иде́же ра́дость пра́зднующих, иде́же дре́во жи́зни есть,/ нас непреста́нно помина́ющи, чту́щих твое́ успе́ние.

Богоро́дичен: И́же на плеща́х Херуви́мов стра́шно носи́мый,/ на руку́ ны́не седи́т Отрокови́цы Чи́стыя,/ и пелена́ми повива́ется, разреша́я плени́цы зол на́ших,/ и млеко́м я́ко Младе́нец пита́ется,/ пита́яй вся́кое дыха́ние.

Свети́лен пра́здника:

Посети́л ны есть свы́ше Спас наш, Восто́к восто́ков,/ и су́щии во тьме и се́ни обрето́хом и́стину,/ и́бо от Де́вы роди́ся Госпо́дь.

На стихо́вне стихи́ры, глас 6.

Подо́бен: А́нгельския:

Се А́гнец Бо́жий,/ ми́ра взе́мляй грех я́ко Бог,/ во я́слех возлежи́т я́ко Младе́нец,/ слове́сныя хотя́ изба́вити/ вся́ких страсте́й безслове́сия/ и ве́чнаго томле́ния./ К Нему́же зове́м:/ благослове́н рожде́йся,/ Бо́же наш, сла́ва Тебе́.

Стих: Из чре́ва пре́жде денни́цы роди́х Тя,/ кля́тся Госпо́дь и не раскается.

О, па́че ума́/ и неизглаго́ланных та́инств!/ Ражда́ется Бог на земли́ за благоутро́бие,/ ра́бий о́браз Себе́ Самому́ обложи́в,/ я́ко да от рабо́ты исхи́тит чужда́го/ ве́рою Тому́ зову́щия:/ благослове́н рожде́йся,/ Бо́же наш, сла́ва Тебе́.

Стих: Рече́ Госпо́дь Го́сподеви моему́:/ седи́ одесну́ю Мене́.

Станем благогове́йно в дому́ Госпо́дни,/ с восклица́нии воспои́м согла́сно/ Сего́ благоутро́бие/ и мно́гое низхожде́ние,/ ка́ко в Вифлее́ме Иуде́йстем/ Младе́нец изво́ли яви́тися?/ И возопии́м:/ благослове́н рожде́йся, Бо́же наш, сла́ва Тебе́.

Сла́ва, и ны́не, подо́бен то́йже:

Со́лнце, Сы́не,/ ка́ко Тя скры́ю пелена́ми?/ Ка́ко Тя млеко́м воздою́,/ всего́ естества́ Пита́теля?/ Ка́ко Тя рука́ми держу́,/ держа́щаго вся́ческая?/ Ка́ко на Тебе́ без стра́ха воззрю́,/ на Него́же не сме́ют зре́ти Многоочи́тии?/ Неискусобра́чная, Христа́ держа́щи, веща́ше.

НА ЛИТУРГИ́И

Блаже́нны пра́здника, песнь 8-я, на 6.

Святая мученица Анисия жила в III веке в городе Солуни (Фессалоники). Знатные и благочестивые родители наставили ее в истинной вере и дали хорошее воспитание и образование. Святая Анисия возлюбила всей душой Господа Иисуса Христа и усердно молилась, чтобы и ей пострадать за его святое имя.

Святая Анисия рано лишилась родителей. Она раздала богатое наследство нищим и убогим, а сама стала вести строгую подвижническую жизнь, питаясь от трудов своих рук. Святая Анисия ухаживала за больными, посещала заключенных в темницы и доставляла всякое утешение скорбным и несчастным. Пламенной молитвой святая дева преодолевала все смущения, искушения и трудности суровой жизни. В то время император Максимиан (285–305) издал указ, по которому всякий человек мог убивать христиан безнаказанно. В день языческого праздника святая Анисия пошла в храм на молитву. Ее дерзко остановил один воин и спросил, куда она идет. Святая молча оградила себя крестным знамением. Разъяренный язычник схватил деву и сказал, что поведет ее с собой на праздник солнца. При этом он пытался сорвать покров с головы Анисии, но святая, мужественно сопротивляясь, воскликнула: «Да запретит тебе Господь мой Иисус Христос!» Язычник, не вынося Имени Христова, обнажил меч и пронзил святую.

Святая Анисия упала на землю, обливаясь кровью, и предала свою чистую душу в руки Возлюбленного ею Христа Спасителя, за Которого жаждала пострадать. Это произошло около 298 года. Собравшиеся люди оплакивали безвременную кончину неповинной христианки. Раздавался ропот на императора, издавшего такой бесчеловечный указ. Честное тело святой мученицы погребли близ Городских ворот. Впоследствии над этим местом был выстроен молитвенный дом.

Преподобная Мелания родилась в знатной христианской семье в Риме. С юных лет она возлюбила Господа и пожелала сохранить девство. Но богатые родители святой Мелании, владевшие не только имениями и городами, но и целыми областями, в единственной дочери видели наследницу и продолжательницу рода. В четырнадцать лет святая Мелания против своей воли была выдана замуж за знатного юношу Апиниана. Она в слезах просила мужа оставить ее или жить с ней в чистоте, предлагая выкупом за себя все наследство. Апиниан не дал полного согласия на это предложение, но и не отверг совершенно ее просьбу. Он обещал исполнить ее желание, когда у них родится наследник. Когда родилась дочь, родители посвятили ее Богу.

Часто увещевала святая Мелания молодого супруга соблюдать телесное воздержание, но он не внимал ее мольбам. Она хотела тайно уйти из дома, но близкие напомнили ей слова апостола Павла – «почему ты знаешь, жена, не спасешь ли мужа?» (1Кор.7:16), – и она осталась. Под дорогой одеждой святая Мелания стала носить власяницу из грубой шерсти.

Через некоторое время святая Мелания родила мальчика, но младенец вскоре умер. Сама святая Мелания тяжело заболела и была близка к смерти. Муж в отчаянии молил Бога о сохранении ей жизни. «Если хочешь, чтобы я выздоровела, – сказала ему супруга,– то начнем хоть теперь проводить жизнь в чистоте». Апиниан дал обет Богу в исполнении желания супруги. С того момента святая Мелания начала выздоравливать. Неожиданно умерла их дочь, и тогда супруги решили исполнить свои обещания. Они стали упражняться в подвигах поста и молитвы, готовясь принять монашеский постриг. Но их желание встретило препятствие со стороны родителей. Это сильно огорчало юных подвижников, но однажды, во время молитвы, Господь утешил Своих избранников: они почувствовали необычное благоухание, и их печаль сменилась неизреченной радостью. С того времени они с терпением стали ждать возможности принять монаше­ство.

После смерти отца святой Мелании (в 401–407 году) супруги получили желанную свободу. Они поселились в пригороде Рима, где жили, строго храня чистоту. Святому Апиниану в то время было 24 года, а святой Мелании – 20. Они продавали имения и на вырученные деньги посещали больных, принимали странников, щедро помогали бедным, освобождали заключенных за долги в тюрьмах и рудниках. Не раз враг пытался отклонить святую Меланию от пути добродетели. Однажды он внушил ей не продавать любимое имение, расположенное в очень красивом месте, и оставить его для себя. Но святая Мелания, почувствовав в себе привязанность к земному, немедленно продала имение, чтобы не погубить своей бессмертной души ради временных благ. Постепенно они продали имения, находившиеся в Италии, Сицилии, Испании, Галлии (Франции) и Англии. Богатые подаяния святых Апиниана и Мелании потекли во все концы Запада и Востока: они посылали обильную милостыню в бедные обители, сооружали храмы и строили монастыри. На их средства было построено много больниц и странноприимных домов. Сама святая Мелания пользовалась только необходимым; одежду носила дешевую и грубую. К этому она склонила и святого Апиниана.

Когда святая Мелания вместе с матерью Альбиной и святым Апинианом посетила Сицилию, она встретилась со святителем Павлином, епископом Ноланским († 431; память 23 января), своим духовным отцом. Затем вся семья отплыла в Африку (Альбина до самой смерти не разлучалась с дочерью). Во время плавания началась сильная буря, продолжавшаяся несколько дней. Моряки говорили, что это гнев Божий, но блаженная Мелания поняла, что Господь по Своему Промыслу указывает иной путь, и велела корабельщикам предать корабль воле Божией. Волны прибили корабль к острову, на котором стоял город, осажденный варварами. Осаждавшие требовали от жителей выкуп за пленных, грозя городу и людям уничтожением. Святые внесли требуемую сумму и тем спасли от гибели город и его жителей.

В Карфагене (Северная Африка) святые продолжали дела милосердия. Они продали свои владения в Нумидии, Мавритании и самой Африке. По благословению епископа города Тагаста Алипия (там поселились святые, недалеко от Карфагена) они устроили два монастыря – мужской и женский, купив для них земли и обеспечив всем необходимым. Святая Мелания приучала себя к еще более строгому посту (она вкушала пищу через день, затем – через два дня и, наконец, оставалась без пищи всю неделю, кроме субботы и воскресенья), к постоянной молитве, воздержанию от сна. Душу святая утверждала чтением Слова Божия, перечитывая все Священное Писание ежегодно три-четыре раза. Она переписывала книги, шила одежды для нищих, себе же сшила власяницу, которую носила, не снимая, от Святой Пятидесятницы до пятницы Святой Пасхи. К такому подвижническому образу жизни святая Мелания приучила и живших с ней девиц. Немало и юношей склонила она жить в чистоте и хранить девство. Многих язычников и еретиков святая милостыней и увещаниями привела к Богу.

Через семь лет святые супруги решили поклониться святым местам в Иерусалиме. По пути в Святую Землю они сделали остановку в Александрии, где встретились со святителем Кириллом, архиепископом Александрийским (†444; память 9 июня и 18 января). В Иерусалиме святые обошли все места, освященные жизнью Господа Иисуса Христа и Божией Матери. Блаженная Мелания много ночей провела в молитве у Гроба Господня. На время оставив Иерусалим, она со святым Апинианом посетила отцов-пустынников в Египте, поучаясь у них духовной жизни. В их отсутствие Альбина построила на Елеонской горе дом, в котором они поселились по возвращении. Святая Мелания затворилась в тесной келлии, где провела 14 лет.

Только раз в неделю ее посещали святой Апиниан и мать. После смерти матери святая Мелания еще более стеснила себя подвигом: в течение года она жила в полном затворе в еще более тесной и темной келлии.

Повсюду разнеслась слава о подвижнице, и многие приходили к ней за духовными советами. Святая Мелания вышла из затвора, чтобы послужить спасению других людей. Постепенно вокруг ее келлии возник монастырь, где собралось до девяноста дев, но святая, по смирению своему, не согласилась быть их игуменией. Как мать, она заботилась о всех сестрах. Она наставляла сестер бодрствовать во время ночной службы и противостоять лукавым помыслам, не дозволять мысленного блуда, но собирать и направлять все мысли на песнопения. «Вне послушания, – наставляла святая, – даже мирские дела устроиться не могут». О любви же, и смиренномудрии, и кротости говорила: «Никому не следует ни чрево свое винить, ни другую какую часть тела, ибо нет оправдания ни одному человеку, не трудящемуся над заповедями Господа». Особо увещала святая Мелания хранить святую Православную веру, быть послушными воле Божией.

В обители ее стараниями была построена молельня и алтарь, где находились мощи святых: пророка Божия Захарии († ок. 520 до Р.Х.; память 8 февраля), святого первомученика и архидиакона Стефана († ок. 34; память 27 декабря) и сорока Севастийских мучеников († ок. 320; память 9 марта).

В 431 году святой Апиниан в иноческом чине отошел ко Господу. Через 4 года после его смерти святая Мелания задумала построить мужской монастырь. Однако все ее средства были израсходованы, сама святая жила в крайней нищете. Некий христианин пожертвовал праведнице 200 монет, на которые и был построен монастырь на горе Вознесения Господня.

Незадолго до смерти святая Мелания просветила светом Христовой веры своего дядю-язычника Волусиана. Для этого она путешествовала в Константинополь с пресвитером Геронтием, своим духовным сыном, воспитанным ею с детства (впоследствии им написано житие преподобной Мелании).

В то время жителей столицы соблазняло еретическое учение Нестория. Многих людей святая Мелания спасла от ереси, так как, благодаря прекрасному знанию Священного Писания, могла разъяснять Православное учение о Святой Троице.

Святая получила от Господа дар исцеления различных болезней.

Царица Евдокия, жена императора Феодосия II (408–450), вывихнула ногу и сильно страдала. Когда же святая Мелания коснулась больной ноги – та стала здоровой. Людей, одержимых бесом, преподобная врачевала помазанием святым елеем.

Однажды пояс святой Мелании был возложен на женщину (при трудных родах), и тем спасли ее от смерти.

Провидя свою кончину, святая Мелания посетила Вифлеем на праздник Рождества Христова и обошла (в последний раз) святые места в Иерусалиме. В день первомученика архидиакона Стефана преподобная Мелания читала сестрам житие святого и сказала им, что читает в последний раз. Неутешно плакали сестры обители о предстоящей разлуке с любимой духовной матерью и наставницей. Святая Мелания утешала их и долго поучала добродетельной жизни.

31 декабря 439 года преподобная, несмотря на телесную боль, присутствовала на Богослужении и, причастившись Святых Христовых Таин, мирно предала дух свой Богу.

Священномученик Зотик был одним из приближенных сановников при дворе императора Константина Великого (324–337). В 330 году столица империи была перенесена из Рима в Константинополь. Вместе с другими придворными туда переселился и святой Зотик, но вскоре он оставил блестящую придворную жизнь, принял священство и всецело посвятил себя служению ближним. Он открыл двери своего дома для всех нуждавшихся в помощи: лишенным крова, странникам, больным и нищим. За исключительную доброту и сострадательность святой был прозван «сиропитателем».

В то время на Востоке свирепствовала эпидемия проказы. Чтобы прекратить ее распространение, был издан приказ: всякого зараженного проказой топить в море. Святой Зотик скорбел о несчастных, обреченных на гибель. Он пошел к императору и попросил у него золота, якобы на покупку драгоценных камней и жемчуга для украшения царского венца. Константин Великий исполнил просьбу своего любимца. Святой Зотик получил золото и стал выкупать прокаженных у воинов, которым было приказано уничтожать их. На берегу Босфора, на горе, недалеко от столицы, святой Зотик построил больницы для прокаженных, истратив все деньги, данные ему благочестивым императором.

После смерти Константина Великого на престол вступил его сын Констанций II (337–361), последователь арианской ереси. На святого донесли, что он получил от покойного императора много золота. Допрошенный об этом святой Зотик показал императору больницы, где содержались прокаженные, и сказал: «Вот, царь, драгоценный жемчуг и камни, приобретенные мной на деньги твоего родителя для спасения его и тебя».

Констанций пришел в ярость и приказал привязать старца к диким мулам, которые поволокли за собой тело мученика. В тяжких страданиях святой мученик предал дух свой Богу. Господь прославил по смерти своего верного раба, свято выполнявшего заповедь его о милосердии и любви к ближним: на месте кончины священномученика Зотика забил источник воды, от которой многие получали исцеление.

Преподо́бнаго Дании́ла, игу́мена Переясла́вскаго, чудотво́рца

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 6:

Воспои́м Го́сподеви,/ удиви́вшему вся хоте́ния Своя́ во святы́х,/ в ни́хже и су́ща на земли́ его́ просла́вил чудоде́йствии/ уго́дника Своего́ Дании́ла.

Всем благочестному́дрствующим/ зело́ че́стен был еси́,/ я́ко друг Бо́жий, блаже́нне Дании́ле,/ тем оби́тель угото́вася тебе́ в дому́ Отца́ Небе́снаго,/ в не́йже Единоро́дный Сын его́/ с труди́вшимися упокой тя ве́чно.

О́тче Дании́ле,/ уго́дниче, дру́же и слуго́ Госпо́день,/ сый и торжеству́яй та́мо,/ иде́же и Госпо́дь твой,/ помяни́ и нас, обремене́нных греха́ми,/ да и мы, взе́мше и́го Христо́во на себе́,/ научи́мся незло́бию и серде́чному смире́нию/ от Спа́са душ на́ших.

Сла́ва, глас 8:

Днесь све́тится град Переясла́вль,/ прии́де бо его́ свет/ и сла́ва Госпо́дня на нем возсия́,/ днесь похваля́ему пра́веднику веселя́тся лю́дие,/ я́ко просла́ви Бог просла́вившего его́ в телеси́ свое́м и в души́ свое́й./ Те́мже и те́ло его́ соблюде́ нетле́нно нам,/ моля́щимся и прося́щим его́ ра́ди/ от Христа́ Бо́га грехо́в оставле́ния.

И ны́не, Богоро́дичен:

Дух Святы́й, наше́д на Тя,/ и си́ла Вы́шняго, осени́в Тя,/ соде́ла прия́телище невмести́маго Бо́га./ Покажи́ и нас храм свят Уте́шителя Пресвята́го Ду́ха,/ Безневе́стная Дево.

На стихо́вне стихи́ры, глас 2:

Бо́дрствовал, стоя́л в ве́ре,/ му́жался, утвержда́лся еси́/ и, по́двиг твой над все́ми запечатле́в тве́рдою на Бо́га наде́ждою,/ сконча́л еси́ тече́ние, блаже́нне.

Стих: Честна́ пред Го́сподем/ смерть преподо́бных Его́.

А́ще и заше́л еси́ от нас во гроб,/ усну́в сном сме́рти, блаже́нне,/ оба́че в воскреше́ние пра́ведных просвети́шися, я́ко со́лнце,/ в Ца́рствии Отца́ Небе́снаго.

Стих: Блаже́н муж, боя́йся Го́спода,/ в за́поведех Его́ восхо́щет зело́.

В сию́ за́поведию/ е́же лю́бити Бо́га и бли́жняго,/ весь зако́н и проро́цы ви́сят,/ Христо́с рече́, И́стина;/ ты, рабо́тав Го́сподеви со стра́хом,/ вся сия́ сохрани́л еси́ от ю́ности твоея́, блаже́нне.

Сла́ва, глас 3:3:

Марфа печа́шеся и мо́лвяше о мно́зе,/ Мари́и небре́гшей о ея́ службе,/ я́ко седя́ше при ногу́ Иису́сову,/ прилежа́ слы́шанию сло́ва Бо́жия;/ сопричти́ и нас избра́вшей благу́ю часть,/ разгоня́я мрак су́еты жите́йския/ твои́ми моли́твами, преподо́бне.

И ны́не, Богоро́дичен:

Да не хва́лится си́льный си́лою свое́ю,/ да не хва́лится бога́тый бога́тством свои́м,/ велича́яся благи́ми ми́ра сего́,/ я́ко ничто́же су́щими,/ но хваля́йся да хва́лится о Тебе́,/ я́ко неотъе́млемой от нас, христиа́н, части,/ Блага́я Предста́тельница на́ша, Влады́чице.

Та́же Ны́не отпуща́еши:

Трисвято́е и по

О́тче наш:

тропа́рь, пи́сан на вели́цей вече́рни. Сла́ва, и ны́не, Богоро́дичен.

НА ВЕЛИЦЕЙ ВЕЧЕРНИ

На Го́споди, воззва́х: стихи́ры на 8, глас 6:

Беззако́нноваша иуде́е, изше́дшии из Еги́пта,/ сли́тием тельца́ в Хори́ве,/ пред ни́мже ядо́ша и пи́ша,/ сего́ ра́ди и гнев Бо́жий взы́де на Изра́иля;/ да не подо́бное что постра́ждем и мы,/ служа́ще мамо́не, а не Бо́гу рабо́тающе,/ ты, свя́те, предста́ни нам,/ да Госпо́дь исто́ргнет ка́менное се́рдце от пло́ти на́шея/ и даст нам се́рдце пло́тяно,/ покая́нием удобопреклоня́ющееся к творе́нию святы́х его́ за́поведей.

Согреши́ша изра́ильтестии лю́дие,/ испроси́вше себе́ царя́,/ и бысть о них предста́тель ве́рен Самуи́л Го́споду во проро́цех;/ согреши́хом и мы, вожделе́вше по́хоть плотску́ю,/ и по́хоть оче́с, и го́рдость жите́йскую,/ но, о блаже́нне,/ я́коже Самуи́л о тех лю́дех,/ си́це о нас помоли́ся,/ да не у́мрем во гресе́х на́ших.

Яви́ся дре́вле от враго́в бе́дствовавшим лю́дем/ моля́йся о о́нех и о святе́м гра́де/ Иереми́я, Бо́жий проро́к,/ и прии́де от Бо́га иуде́ом спасе́ние./ Воста́ша и на ны врази́ наши,/ мир, плоть и диа́вол,/ и оскверни́ша святы́ню хра́ма душе́внаго и теле́снаго,/ но ты, преподо́бне, сый братолю́бец,/ прииди́ к нам и сокруши́, я́ко мече́м, твои́ми моли́твами/ о́ных кова́рства.

Глас 2:

Пока́йтеся – сей глас Предте́чи, вопию́щаго в пусты́ни;/ бу́дите гото́ви, – сей Христа́ Го́спода, веща́ющаго нам;/ на́ше же се́рдце одебеле́, и уши́ма тя́жко слы́шим./ Избра́нниче Бо́жий Дании́ле,/ твои́м предста́тельством наста́ви,/ во е́же возмощи́ нам убежа́ти от суда́ огня́ гее́нскаго,/ и да, сотво́рше плоды́ досто́йны покая́ния,/ благоугожда́им вы́ну пред Го́сподем,/ и́же хо́щет всем спасти́ся, я́ко Милосе́рд.

Сла́ва, глас 8:

Прииди́те, лю́дие,/ восхва́лим му́жа сла́вна/ и отца́ на́шего Дании́ла:/ сей бо смиренному́дрствоваше вы́ну,/ ниже́ хожда́ше в вели́ких, ниже́ в ди́вных па́че себе́,/ но терпе́нием теча́ше на предлежа́вший ему́ по́двиг,/ усе́рдно облобыза́в кро́тость и незло́бие,/ нищету́ же и скорбь./ Сего́ ра́ди Бог си́це искуше́нна обре́те его́, досто́йна Себе́,/ дарова́в ему́ вене́ц пра́вды от руки́ Своея́./ Сей да соблюде́тся и нам,/ и всем, возлю́бльшим я́ле́ние его́,/ не премолчи́, преподо́бне, вопия́ о всех ко Го́споду.

И ны́не, Богоро́дичен гла́са. Вход. Проки́мен дне. И чте́ния.

Прему́дрости Соломо́новы чте́ние

(глава 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша в очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле наказа́ни бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во время посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние

(главы́ 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бне,/ поостри́т же напра́сный гнев во ору́жие,/ споборе́т же с ним ми́р на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ реки же пото́пят я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щимся о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние

(глава 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На литии́ стихи́ры, глас 2:

Ублажи́ша лю́ди,/ и́мже бы́ша храни́лища испо́лнена,/ о́вцы многопло́дны, воло́ве то́лсти/ и и́но попече́ние вся́ческое,/ но ты, преподо́бне,/ ничесо́же от подо́бных сим пожела́л еси́,/ вся приобре́тения ми́ра сего́ вмени́в уме́ты бы́ти./ Те́мже блаже́н вои́стинну,/ я́ко бысть тебе́ Госпо́дь Бог твой,/ ему́же предстоя́ ны́не, моли́ся,/ да Бог ми́ра бу́дет с на́ми.

Горды́ня и бога́тство с велича́нием что по́льзуют?/ сим рабо́тающий беззако́нных исполня́ются стезь и поги́бели,/ пути́ бо Госпо́дня не разуме́ют./ Ты же, блаже́нне, вы́ну Го́рняя му́дрствовавый, а не земна́я,/ на пути́ гре́шных не стал еси́,/ тем и во святы́х жре́бий твой есть./ Моли́ Бо́га и нам насле́дити часть благослове́нных.

Сла́ва, глас 1:

Умерщвле́нием, и порабоще́нием,/ и суровым мучи́тельством томя́ те́ло твое́,/ самоизво́льный му́ченик был еси́, преподо́бне о́тче:/ вся возмогл еси́ о укрепля́вшем тя Иису́се Христе́./ И та́ко теки́й, не я́ко безве́стно,/ но наде́ждою бу́дущих благ веселя́ся, рекл Го́сподеви:/ Засту́пник мой еси́ и Прибе́жище/ Бог мой, и упова́ю на него́.

И ны́не, Богоро́дичен гла́са.

На стихо́вне стихи́ры, глас 5:

У́тренюя к Бо́гу, не утруди́лся еси́, блаже́нне,/ я́ко бре́мя понесы́й ле́гкое;/ таково́му тече́нию после́довати и нас вразуми́,/ да пости́гнем прия́ти по́честь от Великодарови́таго Подвигополо́жника/ и Спа́са душ на́ших.

Стих: Честна́ пред Го́сподем/ смерть преподо́бных Его́.

Не уподо́бился еси́ рабу́,/ косне́ние господи́на своего́ наблюда́ющему,/ но твое́ бде́ние бысть гото́вое/ сре́сти Го́спода своего́,/ тем и Госпо́дь введе́ тя в ра́дость неконча́емую.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Го́ре пи́шущим лука́вство!/ го́ре привлача́ющим грехи́,/ я́ко у́жем до́лгим! – вопие́т Иса́ия,–/ сего́ ра́ди и пови́нни суть гне́ву Пра́веднаго Судии́,/ сия́ зла́я возблага́я, мы, неблагода́рни, воздае́м Го́сподеви./ Сего́ преще́ния изба́ви нас, преподо́бне,/ да мы, покая́нием преме́ньшеся от злых,/ поживе́м в пра́вде и преподо́бии и́стины.

Сла́ва, глас 6:

Днесь све́тлый нам возсия́ день,/ соста́вите пра́здник/ и, веселя́щеся, прииди́те,/ ублажи́м хваля́щася преподо́бнаго во сла́ве/ и ра́дующася на ло́жи свое́м:/ сей бо, вшед в мы́сленный вертогра́д,/ испра́ви вся́кую доброде́тель,/ безпомо́щныя заступи́,/ заблу́ждшия на путь спасе́ния наста́ви,/ ни́щия напита́, си́рым помоществова́,/ и си́це благоуго́ден Бо́гови./ И, возлю́блен быв, преста́вися,/ иде́же све́тится Свет невече́рний.

И ны́не, Богоро́дичен гла́са.

Тропа́рь, глас 3:

От ю́ности, блаже́нне, всего́ себе́ Го́сподеви возложи́в,/ вы́ну повину́яся Бо́гу,/ проти́вяся же диа́волу,/ над страстьми́ грехо́вными воцари́лся еси́,/ тем сам храм Бо́жий быв,/ и оби́тель кра́сну во сла́ву Пресвяты́я Тро́ицы воздви́гнув/ и собра́нное тобо́ю в ней ста́до Христо́во Богоуго́дно упа́сши,/ преста́вился еси́ к ве́чным оби́телем,/ о́тче Дании́ле,/ моли́ Триипоста́снаго во еди́ном существе́ Бо́га спасти́ся душа́м на́шим.

Сла́ва, и ны́не, Богоро́дичен.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1: Умножа́шеся на тя непра́вда го́рдаго велиа́ра,/ сеть положи́ти умы́слившаго де́явшу ти свое́ спасе́ние;/ ты же, от вся́каго пути́ лука́ва возбрани́в нога́м твои́м,/ всем се́рдцем твои́м испыту́яй за́поведи Госпо́дни,/ те́ми растерза́л еси́ се́ти зло́бнаго искуси́теля./ Даждь и нам безбе́дно мину́ти его́ лови́тельства моли́твами твои́ми, преподо́бне.

Сла́ва, и ны́не, Богоро́дичен:

Приско́рбна есть душа́ моя́ и смущает мя,/ я́ко не упова́ет на Бо́га,/ язы́к же льсти́в, ре́я во отча́яние, глаго́лет ми:/ где есть Бог твой?/ и, си́ми стужа́емаго, и́щет диа́вол поглоти́ти мя./ Влады́чице моя́, рцы души́ мое́й:/ спасе́ние твое́ есмь Аз,/ да, не се́туя, хожду́ и просла́влю заступле́ние твое́.

По 2-м стихосло́вии седа́лен, глас 2:

Не всу́е рыда́ше проро́к Твой, Го́споди,/ я́ко прише́льствие его́ продолжи́ся:/ есть бо искуше́ние житие́ челове́ку на земли́,/ но он свят бе, на́ши же путие́ оскверня́ются на вся́ко вре́мя./ Го́споди, моли́твами Твоего́ уго́дника/ не отве́ржи нас от лица́ Твоего́,/ да не ка́ко обря́щемся, зело́ неключи́ми пред Тобо́ю,/ не сокраща́юще грехи́, но умножа́юще я,/ дел же благи́х не творя́ще.

Сла́ва, и ны́не, Богоро́дичен: Вои́стинну безу́мен есть муж той, и́же рече́т: несть Бог./ Ты, Мари́е, заче́нши, родила́ еси́ Его́,/ в Него́же ве́рующе и упова́юще Нань, мы, христоимени́тии,/ оставле́ние грехо́в получи́ти наде́емся/ Тобо́ю, Благослове́нная в жена́х, Де́во Чи́стая.

По полиеле́и седа́лен, глас 1:

Поноше́ние враго́в, велере́чие ненави́дящих,/ озлобле́ние же и кля́тва их/ и сим подо́бная злая напада́ху на тя,/ но от всех сих изба́ви тя Госпо́дь,/ я́ко непоро́чен быв в пути́, ходи́л еси́ в зако́не его́,/ тем, ублажи́в тя, Пра́ведный Судия́/ о нас моли́твенника соде́ла, преподо́бне.

Сла́ва, и ны́не, Богоро́дичен:

Вся́кая тварь к хвале́нию Сы́на Твоего́ созыва́ется, я́ко рабо́тает ему́,/ а гре́шник не прибли́жится, я́ко прогневля́ет его́;/ аз есмь возненави́девый наказа́ние/ и отве́ргий словеса́ его́ вспять,/ сего́ ра́ди а́ще и пове́даю опра́вдания Госпо́дня, но вску́ю?/ Не оста́ви мене́, Влады́чице моя́,/ вонми́ в по́мощь мою́,/ да бу́дет и мне Сын Твой во спасе́ние.

По 50-м псалме́ стихи́ра, глас 6:

Приклони́л еси́ у́хо твое́/ во глаго́лы уст Христа́ Спаси́теля, ре́кшаго:/ возьми́те и́го Мое́ на себе́./ И быв творе́ц сло́ва, а не то́чию слы́шатель,/ входи́л еси́ у́зкими враты́,/ простра́нная же и широ́кий путь мину́в,/ изво́лил еси́ страда́ти с людьми́ Бо́жиими/ и си́це, день от дне, простира́яся на лу́чшее/ и на соверше́нство восходя́, обре́л еси́ поко́й душе́ твое́й./ Напра́ви стопы́ и на́ша на путь, вводя́щий в живо́т,/ твои́м предста́тельством, блаже́нне.

Кано́н преподо́бнаго, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

Благослове́нный Бо́же, в ми́р прише́дый,/ Его́же, кроме́ ино́го, не ча́ем,/ не посрами́ нас от ча́яния на́шего,/ внегда́ призва́ти нам о И́мени Твое́м/ и́мя свята́го Твоего́, призыва́вшаго Тя во и́стине, Дании́ла.

Возбрани́в се́рдцу твоему́ от вся́каго весе́лия,/ ничто́же восхоте́л еси́ на земли́,/ я́ко ра́дование се́рдца твоего́ бя́ху свиде́ния Госпо́дня;/ я́же да насле́дим и мы, моли́твы твоя́/ с на́шими моли́твами соедини́, блаже́нне.

Возжада́ Го́спода душа́ твоя́, преподо́бне,/ и не лиши́лся еси́ от жела́ния твоего́:/ ны́не бо насыща́ешися от пото́ка сла́дости Госпо́дни, во Све́те его́ узрев све́т./ Го́споди, проба́ви ми́лость твою́ и нам, ве́дущим Тя, моли́твами отца́ на́шего.

Богоро́дичен: И́щущии зла́я мне глаго́лют су́етная,/ врази́ же мои укрепля́ются па́че мене́,/ и умножа́ются ненави́дящии мя без пра́вды,/ сего́ ра́ди се́рдце мое смяте́ся толи́ко,/ я́ко оста́ви мя и си́ла моя́./ Но, о всеблагомо́щная Цари́це! помози́ ми,/ да, спасе́н быв Тобо́ю от них, поучу́ся во оправда́ниих Сы́на Твоего́ вы́ну.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Тве́рдым позна́нием Ева́нгельския и́стины име́яй препоя́санны чре́сла твоя́,/ свиде́тельствовался еси́ бы́ти ве́рен о мно́зех, служи́тель Христо́в,/ утверди́ и нас в добро́м по́двизе, придержа́щихся спасе́ния,/ твои́ми моли́твами, преподо́бне.

Оболки́йся в броня́ пра́вды, я́же о Христе́,/ име́л еси́ до́бру со́весть,/ и, прие́м дерзнове́ние к Бо́гу,/ да приступа́ют и вси ве́рнии со дерзнове́нием ко престо́лу благода́ти,/ тайново́дствовал еси́ и уче́нии, и моли́твами твои́ми, блаже́нне.

Над все́ми благи́ми де́лы восприя́вшу тебе́ щит ве́ры,/ ничто́же возмого́ша стре́лы лука́ваго разжже́нныя,/ и, шлем спасе́ния восприя́в, наде́ждно утверди́лся еси́ на ка́мени испове́дания Христо́ва;/ помяни́ и нас, смире́нных и коле́блемых, блаже́нне,/ да обря́щем утеше́ние.

Богоро́дичен: Что стужа́еши ми, душе́ моя́,/ я́ко оте́ц мой и ма́ти моя́ оста́виста мя?/ И по сему́ зна́мению, а́ки отринове́н, преврати́хся па́сти,/ вои́стинну не́си си́ра и отринове́на,/ и́бо отца́ и́маши Бо́га, ма́терь же – Ро́ждшую его́./ Благоутро́бием ея́ гряди́ ко Христу́,/ и Госпо́дь восприи́мет тя.

Седа́лен, глас 2:

Потща́вся себе́ иску́сна поста́вити пред Го́сподем/ де́лателя непосты́дна,/ после́довал еси́ блаже́ннаго Па́вла уче́нию,/ житию́, приве́ту, ве́ре, долготерпе́нию, любви́, терпе́нию./ И си́це на вся́кое де́ло благо́е угото́ван, я́ко свети́льник, поста́вился еси́ на све́щнице,/ да, тобо́ю освеща́еми, мно́зи на путь спасе́ния наста́вятся./ Помоли́ся и о нас, о́тче преподо́бне,/ да даст и нам Бог приити́ в покая́ние и в ра́зум и́стины.

Сла́ва, и ны́не, Богоро́дичен:

В со́бственный вертогра́д вшед,в Тя, Пресвята́я Де́во,/ восприя́т Себе́ плоть от Тебе́,/ со благоуха́нием Божества́ соедине́нную, Сын Твой, Сло́во, и бысть Богочелове́к./ Моли́ его́ бла́гость,/ да всели́тся и в нас, творя́ сердца́ на́ша благоуха́ние Бо́гови в спаса́емых,/ да бу́дем и мы воня́ живо́тная в живо́т.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Услажда́я ду́шу твою́ сло́вами зако́на Госпо́дня,/ не удержа́л стремле́ния твоего́ к благочести́ю,/ но, и́мже о́бразом жела́ет еле́нь на исто́чники водны́я,/ бы́стро текл еси́, вопия́:/ си́це жела́ет душа́ моя́ к Тебе́, Бо́же./ Ча́сти с тобо́ю име́ти и нам, твои́м ча́дом, моли́ся, о́тче наш Дании́ле.

Чистото́ю и любо́вию был еси́, я́ко хлеб, сла́док Го́сподеви,/ ходя́ бо досто́йне Бо́гу во вся́ком угожде́нии,/ досто́йно жи́тельствовал еси́ благовествова́нию Христо́ву,/ да и мы во вся́ком деле бла́зе преуспе́ем,/ предста́тельствуй твои́ми моли́твами, о́тче наш преподо́бне.

Виждь, уго́дниче Христо́в, смирени́е на́ше,/ я́ко возвели́чися враг, ища́й поги́бели на́шея,/ сего́ ра́ди и ров изры́, и ископа́ и́;/ ты помоли́ся, да Госпо́дь разори́т сове́т его́,/ и впаде́т в яму, Ю́же соде́ла.

Богоро́дичен: Несть ми ослабле́ния,/ зане́ не сотвори́х во́ли Сы́на Твоего́ и не сохрани́х повеле́ний его́,/ и ны́не приклони́ ми у́хо Твое́ в покая́нии, тре́бующему бла́гости, Ма́ти Бо́жия,/ да не осу́дит мя Судия́ Пра́ведный в преиспо́дних земли́:/ на Тя бо упова́ю, о Предста́тельнице моя́!

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Весели́лся еси́ о ре́кших ти: в дом Госпо́день по́йдем,/ иде́же, благочи́нно предстоя́, воздава́л еси́ Вы́шнему́ моли́твы твоя́ за вся челове́ки,/ я́же и мно́го можа́ху, я́ко пра́веднаго./ Поспешеству́й о́ными и нам,/ огражда́я нас от губи́теля,/ ловя́щаго ду́ши на́ша, блаже́нне.

Жив ве́рою Иису́с Христо́вою,/ не свои́х си исќав, но я́же Христа́ Иису́са,/ пости́гнул еси́ в житие́ на Небесе́х,/ иде́же водворя́лся со Христо́м, помина́й нас,/ да и мы, теку́ще, пости́гнем, о́тче наш Дании́ле.

Жела́ние име́яй соедини́тися с Го́сподем,/ рабо́тал еси́ ему́ во и́стине и всем се́рдцем твои́м/ и, си́це прилепля́лся Го́сподеви, еди́н дух был еси́ с Го́сподем,/ днесь же лице́м к лицу́ зря его́,/ покажи́ нас прича́стники Боже́ственнаго лицезре́ния, приснопа́мятне.

Богоро́дичен: Бо́же Спаси́телю мой! коли́ко есть дней раба́ Твоего́?/ когда́ уте́шиши мя? и сотвори́ши ми от гоня́щих мя суд?/ Се бо, обыше́дше, обыдо́ша мя и́же искони́ человекоуби́йцы врази́,/ на мя вся помышле́ния их на зло./ Удержи́ их стремле́ние, сокруши́ че́люсти,/ да, прии́м от них свобо́ду, сохра́ню за́поведи Твоя́,/ Тя с Ро́ждшею при́сно велича́я.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Серде́чную возлюби́в пра́вость, ми́р име́л еси́ и святы́ню со все́ми,/ тем ублажи́вся, узре́л еси́ Бо́га,/ его́же Свет присносу́щный да возсия́ет и нам, помоли́ся, преподо́бне.

Ве́рою во Христа́ дела́, я́же Он сотвори́, и ты сотвори́л еси́,/ умно́жив иногда́ хле́бы, блаже́нне, зане́ ми́лостив и сострада́телен быв,/ а́лчущия пита́л еси́,/ и ны́не милосе́рдуй о наро́дех, предстоя́щих и и́щущих Го́спода,/ да не лиша́тся вся́каго бла́га.

Кро́тких зе́млю и смире́нных благода́ть насле́довал еси́,/ го́рдости и тщесла́вия вся́чески удаля́лся,/ и бы́вшу ти восприе́мником чад вели́каго князя, я́ко и́стинный учени́к Иису́са Христа́ к бога́тству не прилага́л еси́ се́рдца,/ но во́льною нището́ю благоугожда́л еси́ пред Ним во вся дни живота́ твоего́,/ о́тче наш Дании́ле.

Богоро́дичен: Сын Твой, Влады́чице, прише́д, не́мощи на́ша понесе́/ и печа́ли преложи́ на ра́дость:/ Жени́ху́ бо прису́щу всем ра́доватися досто́ит, и никому́же пла́кати,/ сея́ ра́дости плоды́ вкуша́ют ве́рующия в Него́./ О́ная чрез печа́ль ве́ка сего́ да не во́змется от нас,/ исто́ргни небреже́ние от серде́ц на́ших, Ма́ти Бо́га Вы́шняго.

Конда́к, Глас 1:

От позна́ния себе́ прише́д в позна́ние Бо́га/ и благоче́стием к Нему́ восприи́м нача́ло чу́вства вну́тренняго,/ ра́зум свой плени́л в послуша́ние ве́ры;/ тем и, по́двигом до́брым подвиза́вся,/ дости́гнул еси́ в ме́ру во́зраста соверше́нна исполне́ния Христо́ва,/ я́ко Бо́жие тяжа́ние, Бо́жие зда́ние, дела́л еси́ бра́шно, не ги́блющее,/ но бра́шно, пребыва́ющее в живо́т ве́чный./ Да бу́дут единоду́шно вси насажде́ние Госпо́дне в сла́ву,/ моли́, блаже́нне, Еди́наго Человеколю́бца Бо́га.

И́кос:

Славен еси́ вои́стинну,/ и тебе́ похвала́ не от челове́к, но от Бо́га,/ челове́к бо быв, по челове́ку не ходи́л еси́,/ но, я́ко слуга́ Христо́в,/ не ду́ха ми́ра сего́ прие́м,/ но Ду́ха, И́же от Бо́га,/ не соизво́лил еси́ о я́стии, или́ питии́, или́ оде́жде язы́ков попече́нию,/ благоволи́в же па́че иска́ти Ца́рствия Бо́жия и пра́вды его́,/ вшел еси́ в живо́т ве́чный,/ и нам во е́же насле́дити о́ный, моли́, блаже́нне, Еди́наго Человеколю́бца Бо́га.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увещ а вопи́ти:/ благослове́н еси́, Бо́же оте́ц на́ших.

Всегда́ имы́й па́мять Христо́вых пресвяты́х страсте́й,/ в ту́южде мысль вооружа́лся еси́ изволе́нием,/ во е́же после́довати стопа́м его́./ И нам па́мять сию́ в се́рдце и во у́ме на́шем водруже́нну име́ти/ моли́ пострада́вшаго за ны Христа́, о́тче Дании́ле.

Христо́с преда́н, я́звен и му́чен бысть за беззако́ние на́ше./ Ты, приобща́лся Христо́вым страсте́м,/ всегда́ ме́ртвость Го́спода Иису́са в те́ле свое́м носи́л еси́,/ и ны́не, просла́вився с Ним, умертви́ на́ши стра́сти, свя́те, твои́ми моли́твами.

Христо́с воста́ за опра́вдание на́ше,/ да ве́ра на́ша и упова́ние бу́дет на Бо́га,/ сия́ обоя, а́ки ко́тву29, име́в души́, тве́рду же и изве́стну,/ пресели́лся еси́, иде́же и Предте́ча о нас вни́де Иису́с,/ да та́мо и мы предста́нем ему́ в ра́дости,/ помяни́ нас, блаже́нне Дании́ле.

Богоро́дичен: Свята́я Мари́е, Ма́ти Бо́га Вы́шняго,/ мы еще́ в сем ми́ре,во зле лежа́щем, есмы́/ и сего́ ра́ди вне стои́м,/ хотя́ще вни́ти внутрь черто́га Небе́снаго./ По отше́ствии на́шем от те́ла благоволи́ нам ви́дети неизрече́нную красоту́ Сы́на Твоего́.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся веки.

Присво́ився Христу́ чрез ве́ру, преподо́бне, не повину́лся еси́ пло́ти,/ но, распя́в ю со страстьми́ и похотьми́/ и к до́брым дела́м устреми́вся,/ собо́ю и и́ных учи́л еси́ Христу́ вопи́ти:/ Тя превозно́сим во вся ве́ки.

Ходи́в ду́хом, плоды́ духо́вныя вкуша́я, блаже́нне,/ и сих наслажда́лся, неукло́нно взира́л еси́ на нача́льника ве́ры и Соверши́теля Иису́са,/ тем и благода́рственно к Нему́ взыва́л еси́:/ Тя превозно́сим во вся ве́ки.

Упова́нием объе́м благода́ть Бо́жию,/ за основа́ние о́наго положи́в заслу́ги Христо́вы/ и богоуго́дно управля́я жи́знь твою́ творе́нием добра́,/ Христу́ ра́достно воспева́л еси́:/ Тя превозно́сим во вся ве́ки.

Богоро́дичен: Тобо́ю, Пресвята́я Де́во, и́же во о́бразе Бо́жии Сый к нам прии́де,/ и, де́лав дела́ посла́вшаго его́,/ у́мре грех на́ших ра́ди,/ и воста́ в тре́тий день, по Писа́нием,/ Тя показа́в Предста́тельницу о нас,/ превознося́щих его́ во вся ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Единоро́дному Сы́ну, су́щему в ло́не О́тчи, послужи́л еси́,/ сего́ ра́ди почте́ тя Оте́ц Небе́сный,/ оби́тель у тебе́ сотвори́в с Ним и Пресвяты́м Ду́хом,/ и ны́не у́бо предстоя́ Единосу́щней Тро́ице,/ све́том твои́х моли́тв разжени́ мрак страсте́й от серде́ц на́ших, преподо́бне.

Мзда твоя́ мно́га на Небесе́х, я́ко возлюби́л еси́ мно́го,/ мно́гими скорбьми́ восходя́ к Бо́гу,/ к Нему́же и прибли́жився, призира́й на лю́ди,/ тре́бующия от Бо́га ми́лости, блаже́нне.

О́тче блаже́нне Дании́ле!/ Се твое́ оте́чество, в не́мже воспита́лся еси́./ Се оби́тель твоя́, в не́йже преподо́бно пожи́в,/ многотру́дным твои́м те́лом свя́то почива́еши./ А мы, твои́ чада, к тебе́ приве́ржены есмы́:/ не отступа́й от гра́да, и от нас, я́ко твое́й ча́сти,/ и от призыва́ющих и́мя твое́,/ поле́зная всем хода́тайствуя у Всеми́лостиваго Спа́са Христа́.

Богоро́дичен: А́ще мно́го мо́жет моли́тва пра́веднаго поспешеству́ема,/ Ты, святе́йша су́щи всея́ тва́ри, я́ко Ма́терь Бо́гу, несравне́нно мо́жеши./ При́зри на ны с преподо́бным Дани́илом и испроси́ нам вся блага́я от Бо́га:/ се бо мы к Тебе́ по Бо́зе, я́ко еди́ной наде́жде, прибега́я,/ во всех напа́стех ра́дости и утеше́ния/ от Тебе́ упова́ем.

Свети́лен:

Человеколю́бием подража́я Тови́ту,/ погребе́нию стра́нных прилежа́л еси́, о́тче Дании́ле./ Попецы́ся и о на́ших душа́х, мо́лим тя, преподо́бне,/ да не бу́дут в попра́ние велиа́ру,/ и́щущему поглоти́ти и низвести́ в бе́здну поги́бели,/ иде́же никто́же испове́стся Бо́гу на́шему.

Богоро́дичен:

Благора́зуме́н есть муж и мудр,/ и́же слы́шит словеса́ Бо́жия и твори́т я,/ и́бо зи́ждет хра́мину душе́вную на ка́мени повеле́ний Госпо́дних,/ а и́же слы́шит и не твори́т я,/ сицевы́й несмы́слен и уро́д,/ я́ко пренебреги́й о основа́нии, утвержда́емом на исполне́нии сло́вес Бо́жиих./ Ты, Влады́чице на́ша,/ нас све́том му́дрости просвети́, Твои́ми моли́твами/ тьму неразу́мия отгна́в от нас,/ да, соблюда́юще в сердца́х на́ших словеса́ Бо́жия,/ творе́нием о́ных досто́йныя принесе́м плоды́.

На хвали́тех стихи́ры, глас 8:

Обле́кся во вся ору́жия Бо́жия,/ возмо́гл еси́ стоя́ти проти́ву ко́знем диа́вольским,/ огражде́н душе́вною наде́ждою/ и духо́вною горя́чностию в моли́тве,/ и, быв но́ва тварь,/ Ду́ха Свята́го всели́л еси́ в се́рдце твое́,/ свиде́тельствовавшаго тя ча́до Бо́жие бы́ти;/ покажи́ и нас храм благоуго́ден ему́,/ твои́ми моли́твами, блаже́нне.

Всего́ возлюби́в Христа́,/ я́ко Бо́га и Челове́ка,/ угожда́л еси́ ему́ бла́готворе́нием,/ вспомоществова́нии, потре́бными бра́тии Его́ меньшей,/ над сим же просия́вшу ти бла́гостию,/ смире́нномудрием, кро́тостию и долготерпе́нием,/ был еси́ я́коже избра́нный Бо́жий, святы́й и возлю́бленный,/ тем и насле́довал еси́ угото́ванное тебе́ Ца́рствие от сложе́ния ми́ра./ И нас, свя́те, обле́кши во утро́бы щедро́т,/ пону́ди вни́ти во о́ное/ благоприя́тными твои́ми моли́твами.

Ходи́в про́чее благообра́зно,/ держа́лся еси́ о́нех, ели́ка суть и́стинна,/ и, испра́вив, ели́ка че́стна,/ утвержда́лся еси́ в пра́ведных,/ дости́гнувшу же ти и объе́мшу, ели́ка пречи́ста,/ с жела́нием упражня́лся еси́ в прелюбе́зных/ и, преспе́в стяжа́нием доброхва́льных,/ вся́кую доброде́тель и вся́кую похвалу́ соверши́л еси́;/ сия́ да помышля́ем и мы,/ лука́вое и проти́вное помышле́ние истребля́я от серде́ц на́ших,/ моли́ Христа́ Бо́га, блаже́нне Дании́ле.

Сла́ва, глас 4:

Коль просла́вился еси́ в сожи́тельстве люде́й,/ в житии́ с бра́тиею вку́пе!/ Сиял бо еси́, я́ко со́лнце, твои́ми уче́нии,/ блюды́й их от паде́ния,/ и, я́ко дуга́, на о́блацех свети́л еси́ твои́ми исправле́нии,/ во все́м сам себе́ подава́я о́браз до́брых дел,/ и отсю́ду был еси́ свети́льник, горя́ и светя́./ Преше́д же от здешних, глаго́ли, о́тче наш,/ в моли́тве к Бо́гу и о нас:/ се аз и де́ти, я́же ми дал еси́, Го́споди,/ спаси́ ду́ши их, Человеколю́бче.

И ны́не, Богоро́дичен:

Молим Тя, Влады́чице,/ сотвори́ моли́твы и моле́ния за ны, рабы́ Твоя́, к Сы́ну Твоему́,/ да, го́рдость вся́кую отло́жше/ и удо́бь обстоя́тельный грех,/ ти́хое и безмо́лвное житие́ поживе́м/ во вся́ком благочести́и и чистоте́.

На Литурги́и слу́жба вся преподо́бническая.

Преподобный Даниил Переяславский родился в октябре 1459 года в городе Переяславле, куда родители его, Константин и Феодосия (в иночестве Фекла), переселились из Мценска.

22-х лет вместе с братом Герасимом он тайно ушел в Пафнутьев монастырь, принял иноческий постриг и там под руководством святого старца Левкия († кон. XV в.; память 17 августа) подвизался около 12 лет. Затем он вернулся в родной Переяславль, поступил в Успенский Гориц кий монастырь и принял священный сан.

Преподобный Даниил прославился особенным попечением о душах усопших. Голод и моровые поветрия в XV-XVI веках были нередки; часто приходилось погребать большое число умерших в общих братских могилах – скудельницах. Тех, о которых некому было позаботиться, преподобный Даниил с любовью отпевал и сам погребал в скудельнице на Божедомье, на окраине Переяславля.

Заветным желанием милосердного священноинока было поставить над скудельницей храм, где бы совершалась Божественная Литургия и возносились молитвы о душах усопших. Три странника, опытные в духовной жизни старцы, посоветовали преподобному положиться на волю Божию и подождать три года. По истечении срока Господь явил Свою милость подвижнику. В 1508 году заложили деревянный храм, и вскоре образовался монастырь, названный по имени построенного храма Всехсвятским. Основатель обители – преподобный Даниил – составил для братии правило иноческого жития, но сам, хотя и посещал ежедневно своих духовных чад, оставался насельником Горицкого монастыря. Святой был и опытным духовником. Иноки, священники и множество мирян прибегали к его мудрому врачеванию.

После ухода на покой престарелого Горицкого архимандрита выбор братии пал на преподобного Даниила. Спустя год великий князь Василий поставил 65-летнего святого настоятелем Всехсвятского монастыря.

Кроме усердной молитвы об усопших, обитель преподобного Даниила славилась и попечением о голодных и бездомных.

Скончался преподобный Даниил в 1540 году и погребен в устроенной им обители.

Через 113 лет после кончины святого иноку Всехсвятского монастыря Иоанну в видении явился светлый муж и, назвав себя игуменом этой обители Даниилом, повелел сделать мощи его доступными для всеобщего поклонения. По благословению Патриарха Никона иноки с усердными молитвами открыли мощи преподобного Даниила, оказавшиеся нетленными, будто помазанными миром и благоухающими. Память преподобного Даниила установлена 7 апреля – в день преставления и 30 декабря – в день прославления.

Святи́тителя Мака́рия, митрополи́та Моско́вскаго и всея́ Руси́, чудотво́рца

НА ВЕЛИЦЕЙ ВЕЧЕРНИ

На Го́споди, воззва́х:

стихи́ры пра́здника на 3, глас 2

(зри день 25-й),

и свята́го на 5. А́ще кроме́ пра́здника, стихи́ры свята́го на 8.

Стихи́ры свята́го, глас 1.

Подо́бен: Небе́сных чино́в:

Блаже́нства вои́стину святы́х,/ и́хже просла́вил еси́,/ о́тче святи́телю Мака́рие,/ дости́гл еси́ во Ца́рствии Небе́снем,/ иде́же ны́не ра́дуяся,// моли́ся о спасе́нии душ на́ших.

Блаже́нства и ча́сти пра́ведных,/ с ни́миже сочета́лся еси́,/ о́тче святи́телю Мака́рие,/ вкуси́л еси́ во Ца́рствии Небе́снем,/ иде́же ны́не насыща́яся,// моли́ся о спасе́нии душ на́ших.

Блаже́нства ева́нгельская,/ и́хже на земли́ пропове́дал еси́,/ о́тче святи́телю Мака́рие,/ обре́л еси́ вои́стину на Небеси́,/ иде́же ны́не мздою веселя́ся,// моли́ся о спасе́нии душ на́ших.

Блаже́нство тезоимени́тое,/ его́же в житии́ возжеле́л еси́,/ о́тче святи́телю Мака́рие,/ стяжа́л еси́ в жи́зни ве́чней,/ иде́же ны́не поко́яся,// моли́ся о спасе́нии душ на́ших.

Сла́ва, глас 8:

Блаже́нный миротво́рец/ в стране́ Росси́йстей был еси́,/ о́тче святи́телю Мака́рие,/ сего́ ра́ди сын Бо́жий досто́ин еси́ нарещи́ся на Небеси́,/ иде́же ны́не во сла́ве пребыва́еши,// моли́ся при́сно о спасе́нии душ на́ших.

И ны́не, пра́здника, глас 1: Сла́ва в вы́шних Бо́гу: (зри день 30-й) .

Вход. Проки́мен дне. И чте́ния.

При́тчей чте́ние

(главы́ 10, 3 и 8):

Па́мять пра́веднаго с похвала́ми, и благослове́ние Госпо́дне на главе́ его́./ Блаже́н челове́к, и́же обре́те прему́дрость, и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных, все же честно́е недосто́йно ея́ есть./ Долгота́ бо дней и ле́та живота́ в десни́це ея́, в ш́уйце же ея́ бога́тство и сла́ва./ От уст ея́ исхо́дит пра́вда, зако́н же и ми́лость на язы́це но́сит./ Послуша́йте у́бо мене́, о ча́да, честна́я бо реку́: и блаже́н челове́к, и́же пути́ моя́ сохрани́т;/ исхо́ди бо мои́ – исхо́ди живота́, и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим:/ я́ко аз, прему́дрость, устро́их сове́т, и ра́зум и смысл аз призва́х./ Мой сове́т и утвержде́ние, мой ра́зум,моя́ же кре́пость./ Аз мене́ лю́бящия люблю́, и́щущии же мене́ обря́щут благода́ть./ Разуме́йте у́бо, незло́бивии, кова́рство, ненака́зании же, прилага́йте сердца́./ Послуша́йте мене́ и па́ки, честна́я бо реку́: и отве́рзу от усте́н пра́вая,/ я́ко и́стине поучи́тся горта́нь мой, ме́рзки же предо мно́ю устны́ лжи́выя./ С пра́вдою вси глаго́лы уст мои́х: ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Научу бо вас и́стине, да бу́дет о Го́споде наде́жда ва́ша и испо́лнитеся ду́ха.

Прему́дрости Соломо́новы чте́ние

(главы́ 10, 6, 8 и 9):

Уста пра́веднаго каплют прему́дрость, устне́ же му- же́й му́дрых ве́дят благода́ть./ уста́ му́дрых поуча́тся прему́дрости, пра́вда же избавля́ет их от сме́рти./ Скон- чавшуся му́жу пра́ведну, не поги́бнет наде́жда./ Сын бо пра́веден ражда́ется в живо́т и во благи́х свои́х плод пра́вды обымет./ Свет пра́ведным всегда́, и от Го́спода обря́щут благода́ть и сла́ву./ Язы́к му́дрых до́брая свесть, и в се́рдце их почи́ет му́дрость./ Лю́бит Госпо́дь преподо́бная се́рдца́, прия́тни же ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Пости́гает бо жела́ющия ю, пре́жде да́же разуме́ти ю, и удо́бь у́зрится от лю́бящих ю./ Утреневавый к ней не утруди́тся, и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обходит, и́щущи, и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́, и возлюби́х ю, и поиска́х от ю́ности мое́й./ И взыска́х неве́сту привести́ себе́, я́ко всех Влады́ка возлюби́ ю./ Таи́нница бо есть Бо́жия хи́трости и обрета́тельница дел его́./ Труды́ ея́ суть доброде́тели: целому́дрию же и ра́зуму та учи́т, пра́вде и му́жеству,/ и́хже потре́бнее ничто́же есть в житии́ челове́ком./ А́ще же и мно́гаго иску́сства жела́ет кто, весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний, зна́мения и чудеса́ проразуме́ет, и сбы́тий време́н и лет;/ и всем сове́тник есть благ, я́ко безсме́ртие есть в ней и благосла́вие во обще́нии слове́с ея́./ Сего́ ра́ди бесе́довах ко Го́споду, и помоли́хся ему́, и рех от всего́ се́рдца моего́:/ Бо́же отце́в и Го́споди ми́лости, сотвори́вый вся сло́вом Твои́м/ и му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет ми́р в преподо́бии и пра́вде./ Даждь ми Твои́х престо́лов приседя́щую прему́дрость и не отлучи́ мене́ от о́трок Твои́х, я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́ и от престо́ла сла́вы Твоея́,/ да су́щи со мно́ю, научи́т мя, что благоуго́дно есть пред Тобо́ю,/ и наста́вит мя в ра́зум,и сохрани́т мя в сла́ве свое́й./ Помышле́ния бо сме́ртных вся боязли́ва, и погреши́тельна умышле́ния их.

Прему́дрости Соломо́новы чте́ние

(главы́ 4, 6, 7 и 2):

Похваля́ему пра́веднику, возвеселя́тся лю́дие:/ безсме́ртие бо есть па́мять его́, я́ко от Го́спода познава́ется и от челове́к, и уго́дна Го́сподеви душа́ его́./ Возлюби́ те у́бо, о му́жие, му́дрость и поживете́, восхощи́те ея́ и нака́зани бу́дете: нача́ло бо ея́ любы́ и соблю́де́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих./ Я́ко Той му́дрости Наста́вник есть, и му́дрых Испра́витель, и вся́кому смы́слу и де́лу Хитре́ц./ И всем смы́слом научи́т му́дрость: есть бо в ней Дух Разу́мен и Свят, и сия́ние Све́та Присносу́щнаго, и о́браз бла́гости Бо́жия./ Та дру́ги Бо́жия и проро́ки устроя́ет./ Благоле́пнейши же есть со́лнца и па́че вся́каго сотворе́ния звезд, све́ту сосужда́ема обрета́ется пе́рвейши./ Та угожда́ющих ей от боле́зней изба́ви и наста́ви на стези́ пра́выя./ Даде́ им ра́зум име́ти свят и сохрани́ я от ловя́щих, и по́двиг кре́пок подаде́ им./ Да разуме́ют вси, я́ко си́льнее всего́ есть благоче́стие;/ и никогда́же премо́жет зло́ба му́дрости, ниже́ пре́йдет злы́я облича́ющи суд./ Реко́ша же в себе́, помы́сливше непра́ведно: наси́льствуем пра́ведному/ и не пощади́м преподо́бства его́, ни усрами́мся седи́н ста́рости многоле́тны./ Бу́дет бо нам кре́пость зако́н, и улови́м пра́веднаго, я́ко неуго́ден нам есть,/ и проти́вится дело́м на́шим, и поно́сит нам отпаде́ние зако́на, и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий и о́трока Госпо́дня себе́ имену́ет./ Бысть нам на обличе́ние помышле́нием на́шим и тя́жек нам есть,/ и ви́дим, я́ко неподо́бно и́ным житие́ его́ и измене́ны стези́ его́./ В поруга́ние вмени́хомся ему́, и удаля́ется от путе́й на́ших, я́ко от нечисто́т, и блажи́т после́дняя пра́ведных./ Уви́дим у́бо, а́ще словеса́ его́ и́стинна суть, иску́сим, я́же сбыва́ются ему́./ Руга́нием и му́кою истя́жем его́, да разуме́ем кро́тость его́,/ и искуси́м беззлбо́ство его́, сме́ртию безобра́зною осуди́м его́, бу́дет бо посеще́ние от слове́с его́./ Сия́ помы́слиша и прельсти́шася: ослепи́ бо я зло́ба их,/ и не разуме́ша та́ин Бо́жиих и не разсуди́ша, я́ко Ты еси́ Бог Еди́н,/ живота́ име́яй и сме́рти власть, и спаса́яй во вре́мя ско́рби, и избавля́яй от вся́каго зла./ Щедр, и ми́лостив, и дай преподо́бным Свои́м благода́ть, и Свое́ю мы́шцею го́рдым проти́вляяся.

На стихо́вне стихи́ры пра́здника, глас 2

(зри день 30-й).

А́ще кроме́ пра́здника, стихи́ры свята́го, глас 2.

Подобен: До́ме Евфра́фов:

До́ме Ду́ха Свята́го/ и Ца́рствия насле́дниче,/ блаже́нства дости́гл еси́,/ свя́те Мака́рие,/ моли́ся о при́сно сла́вящих тя.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Блаже́нне и чу́дне,/ му́жу жела́ний Госпо́дних/ и за́поведей его́ ревни́телю,/ свя́те Мака́рие,/ моли́ся о при́сно воспева́ющих тя.

Стих: Препоясу́яся ору́жием твои́м, и наляцы́, и успева́й, и ца́рствуй/ и́стины ра́ди, кро́тости и пра́вды.

Же́зле милосе́рдия,/ па́лице благода́ти,/ уго́дниче Христо́в,/ па́стырю и́стинен,/ моли́ся о при́сно блажа́щих тя.

Сла́ва, глас и подо́бен то́йже:

Собо́р святы́х ру́сских,/ и́же тща́нием твои́м, святи́телю, ди́вно просла́влен бысть,/ с весе́лием вопие́т ти:/ ра́дуйся, Мака́рие,/ блаже́нству тезоимени́тый.

И ны́не, пра́здника, глас 1: По о́бразу и по подо́бию: (зри день 30-й) .

А́ще кроме́ пра́здника, Богоро́дичен.

Тропа́рь, глас 4:

Я́ко вели́ким па́стырем единонра́вна/ и учи́телем вселе́нныя единомы́сленна,/ Бо́жия Прему́дрости служи́теля изря́дна,/ и́же блаже́нству тезоимени́ту,/ днесь, ве́рнии, вси воспои́м:/ Христа́ Бо́га моли́, святи́телю Мака́рие,/ умири́ти ми́р и спасти́ ду́ши на́ша.

НА У́ТРЕНИ

На Бог Госпо́дь: тропа́рь пра́здника два́жды. Сла́ва, свята́го, и ны́не, пра́здника. А́ще кроме́ пра́здника, тропа́рь свята́го два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4.

Подо́бен: Вознесы́йся:

Днесь святи́теля Христо́ва Мака́рия пречестна́я па́мять све́тло возсия́ нам./ Сиянием кни́жных списа́ний просвети́л есть ве́рных собо́ры/ и ны́не мо́лит Христа́ Бо́га/ дарова́ти нам и́стинное ве́дение его́ Боже́ственных за́поведей.

Сла́ва, и ны́не, пра́здника или́ Богоро́дичен.

По полиеле́и седа́лен, глас 8.

Подо́бен: Повеле́нное та́йно:

Я́ко со́лнце пресве́тлое, возсия́л еси́ Ру́сстей земли́/ доброде́тельми твои́ми и непоро́чным житие́м,/ отгоня́я страсте́й омраче́ния, о́тче святи́телю Христо́в./ Сего́ ра́ди вопие́м ти:/ ра́дуйся, блаже́нне Мака́рие, похвало́ Це́ркве Христо́вы и вели́кий чудотво́рче.

Сла́ва, и ны́не, пра́здника или́ Богоро́дичен:

Ты еси́ Боже́ственная Сень Сло́ва, еди́на Пречи́стая Богома́ти,/ чистото́ю А́нгелы превозше́дшая,/ очи́сти нас от грехо́в и вся́кия скве́рны, Богоневе́стная.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих:Что возда́м Го́сподеви о всех, я́же воздаде́ ми? Ева́нгелие от Иоа́нна, зача́ло 36.

По 50-м псалме́ стихи́ра, глас 6:

Егда́ в нощи́ моля́шеся пречу́дный Мака́рий,/ тогда́ со тре́петом зря́ше виде́ние стра́шное/ и, у́жасом одержи́м,/ сле́зы источа́я, вопия́ше:/ о Го́споди,/ ка́ко мне ви́дети сие́:/ гряде́т нече́стие, кро́ве проли́тие/ и разделе́ние земли́ Ру́сския,/ но, о Иису́се,/ молю́ся приле́жно, пощади́// и, а́ще не поми́луеши, не даждь мне ви́дети сие́.

Кано́н пра́здника вторы́й, творе́ние кир Иоа́нна, на 6, глас 1

(зри день 29-й)

, и свята́го на 8. А́ще кроме́ пра́здника, кано́н Богоро́дицы на 6 и свята́го на 8.

Кано́н святи́теля, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Вели́кий Царю́, Соде́телю всех,/ очи́сти благоутро́бием ду́шу мою́ и отжени́ страсте́й омраче́ния,/ да возвели́чу, Спа́се, уго́дника Твоего́, святи́теля Мака́рия.

Пра́вды Бо́жия взыску́я, измла́да Христу́ после́дуя,/ оби́тели преподо́бнаго Пафну́тия дости́гл еси́, свя́те Мака́рие,/ иде́же мно́гая ле́та во уста́ве пребы́в, житие́ жесто́кое и благо́е вкуси́л еси́.

Ле́ствицею доброде́телей на Небеса́ возше́л еси́,/ тем и Христо́с тя, святи́телю, еще́ на земли́ су́ща, в ме́ру во́зраста приведе́/ и оби́тели Можа́йския наста́вника поста́ви.

Богоро́дичен: Ни́во духо́вная, я́коже из бразды́ клас,/ изнесла́ еси́ всю тварь Пита́ющаго вся́чески, Присноде́во.

Катава́сия: Христо́с ражда́ется:

А́ще кроме́ пра́здника, катава́сия по уста́ву.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

Еди́ным по́мыслом к Бо́гу устреми́вся,/ во оби́телех преподо́бных Пафну́тия и Ферапо́нта пребы́л еси́ во вся́цем воздержа́нии,/ отону́дуже ко святи́тельству Бо́гом призва́н быв, Мака́рие досточу́дне.

Святы́я Це́ркве Но́ваграда па́стырь и учи́тель был еси́,/ хра́мы украша́я и духо́вною добро́тою лю́ди исполня́я,/ преде́лы Новагра́да све́том Христо́вы ве́ры просвеща́я, блаже́нне о́тче Мака́рие.

Писа́ния оте́ческая возлюби́л еси́, блаже́нне святи́телю,/ и Це́рковь Прему́дрости Бо́жия свяще́нными ле́потами преукраси́л еси́,/ возвели́чив ю уче́нием богогла́сным.

Богоро́дичен: Ме́ртвости и тли изба́вися род челове́чь,/ естество́м бо Жизнода́вца безсе́менно родила́ еси́, Де́во Всенепоро́чная,/ во спасе́ние восхваля́ющих Тя ве́рно.

Конда́к и и́кос пра́здника, глас 3

Седа́лен, глас 1:

Наста́вника и́ночествующих, Пафну́тия преподо́бнаго, блажи́т град Бо́ровск,/ сла́вит Можа́йск Ферапо́нта блаже́ннаго,/ Но́вград восхваля́ет Александра Сви́рскаго со Ио́ною святи́телем,/ славосло́вит сла́внейший град Москва́ первопресто́льника Ио́ну со ины́ми чудотво́рцы,/ ты же от всех сих вку́пе славосло́вие прие́млеши, Мака́рие чу́дне.

Сла́ва, и ны́не, пра́здника, глас 4:Боже́ственне весели́тся тварь: (зри день 30-й) .

А́ще кроме́ пра́здника, Богоро́дичен:

Патриа́рх Иа́ков, я́сно прови́дев, Спа́се, вели́чия строе́ния Твоего́,/ вопия́ше ду́хом ко Иу́де, глаго́ля та́йно:/ от ле́торасли возше́л еси́, сы́не мой,/ возвеща́я Тя от Де́вы Бо́га.

Песнь 4

Ирмо́с: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,// кре́пость моя́ и хвале́ние.

Тро́ицу, Отца́, Сы́на и Свята́го Ду́ха, апо́стольски пропове́дати повеле́л еси́,/ непросвеще́нную лопь и ины́я се́верныя язы́ки ко Христу́ приве́л еси́, низверга́я бесо́вская тре́бища,/ и нас просвети́, святи́телю, све́том и́стиннаго позна́ния.

И́мя твое́, вели́кия доброде́тели ра́ди, всю́ду пропове́дано бысть,/ я́ко из самыя Святы́я Земли́, иде́же Госпо́дь наш пло́тию ра́спят бысть, свяще́нныя да́ры прия́ти сподо́бился еси́,/ нам же моли́, о́тче Мака́рие, Небе́снаго Иерусали́ма дости́гнути.

Архипа́стырски труди́вся,/ Бо́жиим про́мыслом прее́мник и насле́дник Моско́вских святи́телей бы́ти сподо́бился еси́,/ иде́же чу́дными доброде́тельми украси́лся еси́.

Богоро́дичен: Ада́м свободи́ся, и Е́ва лику́ет,/ и вопию́т ду́хом к Тебе́, Богоро́дице:/ Тобо́ю изба́вихомся перворо́дныя кля́твы, я́вльшуся Христу́.

Песнь 5

Ирмо́с: Ты, Го́споди, мой Свет,/ в ми́р прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Моско́вскаго престо́ла украше́ние ди́вное был еси́, святи́телю,/ те́мже и лю́дие вси чу́дна нареко́ша тя,/ с ни́миже и мы ны́не пра́зднующе па́мять твою́, согла́сно тя велича́ем.

И́же добро́те церко́вней поревнова́в, вели́кия и ди́вныя собо́ры созва́л еси́,/ и́миже но́вым чудотво́рцем земли́ Росси́йския пра́зднование утверди́ся,/ и та́ко Це́рковь Ру́сская просия́ по́двиги чад свои́х, я́коже пе́рлы драгоце́нными.

Всея́ земли́ Ру́сския благоче́стие пости́гл еси́, о́тче Мака́рие, мучениколю́бче преизря́дне,/ я́ко пчела́, отовсю́ду духо́вное сокро́вище собра́в,/ и я́ко же́ртву благоприя́тную на све́щнице церко́вней возже́гл еси́.

Богоро́дичен: Руно́ ороше́нное, Де́во, пла́мень грехо́в мои́х угаси́,/ Купино́ неопали́мая, страсте́й мои́х те́рние попали́,/ подаю́щи ми на воде́ упокое́ния жи́ти, и гее́нскаго мя огня́ свободи́.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х// исте́кшею Кро́вию.

Сим же о́бразом, я́ко святи́и ди́вно просла́влени бы́ша,/ си́це ре́вностно потща́лся еси́, святи́телю, собесе́дник благочести́вых муже́й бы́ти,/ о́вых у́бо оби́тели стро́ити благослови́вый,/ о́вым потре́бная подава́я,/ и́ных же Христа́ пропове́дати посыла́я,/ блаже́ннаго же Васи́лия Моско́вскаго свои́ма рука́ма погребсти́ сподо́бивыйся,/ с ни́миже моли́ спасти́ся душа́м на́шим.

Всем о́браз ве́ры и воздержа́ния яви́лся еси́, о ста́де Христо́ве попече́ние неле́ностное име́я,/ Моско́вскаго первопресто́льнаго гра́да и всея́ Росси́йския земли́ утвержде́ние,/ Мака́рие Боголю́би́ве, моли́ спасти́ся душа́м на́шим.

Тро́ицкия оби́тели настоя́теля высо́ким са́ном почти́л еси́, поста́вив ю превы́ше всех,/ те́мже любо́вь к Се́ргию преподо́бному показу́я и гряду́щая святы́я оби́тели предначерта́вая./ Мы же, святи́телю, дивя́щеся твое́й прему́дрости, взыва́ем:/ моли́ спасти́ся душа́м на́шим.

Богоро́дичен: Ле́ствице Небе́сная и Голуби́це неземна́я,/ вси ро́ди ве́рных согла́сно Тя ублажа́ют,/ я́ко Богоневе́стную Ма́терь Христа́ Бо́га на́шего.

Конда́к, глас 3:

Богому́дрым уче́нием и кни́жным списа́нием/ потща́лся еси́, святи́телю Мака́рие,/ лю́ди росси́йския просвети́ти/ и святы́х земли́ на́шея просла́вити./ Сего́ ра́ди чу́ден пронарече́ся,/ прее́мниче первопресто́льников росси́йских,// моли́ сохрани́тися нам в ве́ре и благочести́и невреди́мо.

И́кос:

Па́влову словеси́ поревнова́в, святи́телю Мака́рие,/ пе́сньми почти́л еси́ росси́йских па́стырей, учи́телей и наста́вников,/ при́снобдящих пред Престо́лом Небе́снаго Царя́ о на́шем Оте́честве,/ с ни́миже ра́дуяся ны́не, моли́ Христа́ Бо́га сохрани́тися нам в ве́ре и благочести́и невреди́мо.

Песнь 7

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея́, Го́споди.

Вредная и па́губная ерети́ческих шата́ний собо́рне осуди́л еси́, святи́телю Христо́в,/ всех же правосла́вных в ве́ре в Тро́ицу Единосу́щную укрепи́л еси́, пред святы́ми ико́нами воспева́ющих:/ благослове́н еси́ в хра́ме сла́вы Твоея́, Го́споди.

Изнесе́ тя, святи́телю, земля́ Ру́сская побо́рника ве́ры и благоче́стия,/ ревни́теля оте́ческих преда́ний и утвержде́ний, да научи́ши нас взыва́ти:/ благослове́н еси́ в хра́ме сла́вы Твоея́, Го́споди.

Смире́н, кро́ток и ми́лостив был еси́, святи́телю,/ отроча́ нра́вом обрета́яся и соверше́н быв ра́зумом./ Мы же, дивя́щеся твои́м доброде́телем и по́двигом, взыва́ем:/ благослове́н еси́ в хра́ме сла́вы Твоея, Го́споди.

Богоро́дичен: Я́ко еди́ну преесте́ственно па́че челове́ка благода́ть во твою́ утро́бу прие́мшую,/ без истле́ния нетле́нно ро́ждшую Христа́ Бо́га на́шего,/ при́сно Тя сла́вим.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:// благослови́те, вся дела́ Госпо́дня, Го́спода.

Пе́ние сие́ на́ше ску́дное и похвале́ние недосто́йное приими́, чу́дне Мака́рие,/ да не вотще́ взыва́ем к Престо́лу Всевы́шняго:/ благослови́те, вся дела́ Госпо́дня, Го́спода.

Вели́кая дея́ния твоя́ о прославле́нии святы́х и просвеще́нии наро́да ру́сскаго/ подвиза́ют, досточу́дне Мака́рие, нас немо́лчно пе́ти Бо́гу:/ благослови́те, вся дела́ Госпо́дня, Го́спода.

Похвалу́ вели́кую Бо́гу возда́л еси́, всеблаже́нне,/ о просвеще́нии неве́рнаго гра́да Каза́ни, ему́же святи́теля Гу́рия поста́вил еси́,/ те́мже ру́сстии лю́дие о такове́й Бо́жией ми́лости ра́достию возопи́ша:/ благослови́те, вся дела́ Госпо́дня, Го́спода.

Богоро́дичен: Чу́дному благове́щению удиви́ся Пречи́стая Де́ва,/ неискусому́жному рождеству́ Ея́ возра́довахуся па́стырие,/ собо́ри ве́рных дивя́тся успе́нию Ея́ сла́вному, вопию́ще:/ благослови́те, вся дела́ Госпо́дня, Го́спода.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́.// Тем, веселя́щеся, Тя, Богоро́дице, велича́ем.

Мака́рия Вели́каго и́мя носи́л еси́,/ его́ житию́ после́дуя в посте́ и по́двизех, воздержа́нии и кро́тости,/ тем тя, святи́телю, велича́ем. (Два́жды)

Ри́зами погреба́льными оде́яну и на сме́ртнем одре́ ти лежа́щу,/ собо́р наро́да мно́жества, ви́девше тя не я́ко ме́ртва, но спя́ща,/ лик же твой, я́ко све́том, сия́ющ,/ удиви́шася и сла́ву возда́ша всеси́льному Бо́гу, прославля́ющему уго́дники Своя́.

Богоро́дичен: Ю́же иногда́ Иа́ков ви́де, чу́дную ле́ствицу, от земли́ просте́рту к небе́сней высоте́,/ испове́даем Тя, Пречи́стая Богоро́дице:/ Тобо́ю бо земна́я и Небе́сная о́бщницы яви́шася.

Свети́лен:

Све́том благода́ти просвеще́н был еси́, святи́телю Мака́рие,/ росси́йских уго́дников и моли́твенников на́ших пе́сньми све́тло просла́вил еси́,/ с ни́миже во све́тлостех святы́х веселя́ся ны́не,/ моли́ Христа́ Бо́га спасти́ся душа́м на́шим.

Сла́ва, и ны́не, пра́здника: Посети́л ны есть свы́ше: (зри день 30-й), или́ Богоро́дичен.

На хвали́тех стихи́ры пра́здника 3, глас 6 (зри день 30-й), свята́го 3.

А́ще кроме́ пра́здника, стихи́ры свята́го на 4.

Стихи́ры свята́го, глас 6.

Подо́бен: Тридне́вен:

Блаже́н и ми́лостив/ архиере́й яви́лся еси́,/ о́тче святи́телю Мака́рие,/ предста́л еси́ поми́лован Престо́лу Бо́жию,/ иде́же со все́ми святы́ми/ Бо́га в Тро́ице восхваля́еши.

Блаже́н и кро́ток/ па́стырь ове́ц духо́вных был еси́,/ о́тче святи́телю Мака́рие,/ насле́довал еси́ па́жити ве́чныя,/ иде́же со святы́ми земли́ на́шея/ Го́спода Сил прославля́еши.

Блаже́н и чист се́рдцем,/ и́мже Бо́га узре́л еси́,/ о́тче святи́телю Мака́рие,/ сподо́бился еси́ красоты́ ра́йския,/ иде́же с ли́ки а́нгельскими/ Отца́ Све́тов сла́вший.

Блаже́нства зре́лый клас,/ его́же нището́ю ду́ха во́зрастал еси́,/ о́тче святи́телю Мака́рие,/ пожа́л еси́ во Ца́рствии Небе́снем,/ к сему́ же бога́тству нетле́нному/ и нас, земноро́дных, призыва́еши.

Сла́ва, глас 2:

Па́стырю до́брый, святи́телю Христо́в Мака́рие чу́дный,/ благоче́стия столп был еси́,/ мно́гими доброде́тельми украси́вся:/ собесе́дниче святы́х муже́й,/ кни́жниче прему́дрый, иконопи́сче нарочи́тый,/ просвети́телю изря́дный, ересе́й искорени́телю,/ моли́твенниче неле́ностный,/ моли́ спасти́ся душа́м на́шим.

И ны́не, пра́здника, глас 6: Со́лнце, Сы́не: (зри день 30-й), или́ Богоро́дичен.

Славосло́вие вели́кое и отпу́ст.

НА ЛИТУРГИ́И: Слу́жба пра́здника и святи́теля.

Моли́тва

О вели́кий святи́телю, Це́ркве Росси́йския первопресто́льниче, гра́да Москвы́ па́стырю и учи́телю, о́тче наш Мака́рие блаже́нне, до́бре по́двиг жития́ твоего́ соверши́вый и дерзнове́ние у Го́спода стяжа́вый! К тебе́ во умиле́нии серде́ц на́ших припа́даем и усе́рдно мо́лим: бу́ди о нас те́плый предста́тель у Престо́ла Вседержи́телева и умоли́ Всеблага́го Бо́га, да не пре́зрит нас, во мно́гия и лю́тыя грехи́ впа́дших, но да́рует нам вся блага́я и потре́бная, я́же ко спасе́нию. Ве́мы бо, я́ко не́мощни есмы́, но мо́лим тя усе́рдно, святи́телю Бо́жий, предста́тельством твои́м сохрани́ невреди́мо всеросси́йскую па́ству, Ю́же во святи́тельстве твое́м до́бре упасл еси́. Архиере́ем и пресви́тером у Го́спода испроси́ му́дрость, во е́же пра́во пра́вити сло́во Боже́ственныя и́стины, же́ртвенную любо́вь и ре́вность о спасе́нии, да не поги́бнет ни еди́н от па́ствы их; и́ночествующих в по́двизех укрепи́, в ми́ре живу́щим и́стинный и потре́бный им, и́же во Христе́ Иису́се, о́браз жи́тельствования покажи́; ве́ру на́шу укрепи́, любви́ нелицеме́рней друг ко дру́гу научи́, в наде́жде на милосе́рдие Бо́жие утверди́.

Еще́ же мо́лим тя, святи́телю, испроси́ нам у Всеми́лостиваго Бо́га ду́ха ра́зума и прему́дрости, да укра́симся и́стинным богове́дением спаси́тельных писа́ний святы́х оте́ц и му́дростию их творе́ний.

Ей, святи́телю Бо́жий, о ми́ре всего́ ми́ра Го́спода умоли́, страну́ на́шу твои́м предста́тельством в ми́ре и безмяте́жии соблюди́; вся лю́ди оте́чества на́шего в до́брем расположе́нии друг ко дру́гу сохрани́ и чу́жды междоусо́бных нестрое́ний покажи́; вся гра́ды и ве́си до́бре сохрани́, святу́ю ве́ру в лю́дех непоро́чну соблюди́. Бу́ди всем нам ско́рый помо́щник в ну́ждах на́ших, да тобо́ю окормля́еми, ми́рно и благоче́стно поживе́м в жи́зни сей, да сподо́бимся и ве́чных благ восприя́тия на Небеси́, сла́вяще и превознося́ще Отца́ и Сы́на и Свята́го Ду́ха и твое́ ми́лостивное о нас предста́тельство во ве́ки веков. Ами́нь.

Святитель Макарий, митрополит Московский и всея Руси (в миру Михаил), родился в Москве около 1482 года в благочестивой семье. Отца звали Леонтием, имя матери в иночестве Евфросиния. В его роду среди многих лиц духовного звания был и преподобный Иосиф Волоцкий. Как и преподобный Иосиф, Михаил в юности поступил послушником в Пафнутьев Боровский монастырь, где постигал книжную премудрость и учился иконописи. При постриге ему было дано имя Макарий (в честь преподобного Макария Египетского). В сорок лет он стал архимандритом Лужецкого Рождество-Богородицкого монастыря близ Можайска, а через три года, в 1526 году, его посвятили в архиепископы Великого Новгорода и Пскова, одной из древнейших кафедр Русской Церкви. Годы архиерейства Макария в Великом Новгороде ознаменованы не только строительством и благоукрашением (владыка собственноручно «поновил», то есть отреставрировал, чудотворную икону Божий Матери – «Знамение»), но и неусыпным попечением о бедствующих соотечественниках (он сам собирал по своей епархии деньги для выкупа русских из татарского плена). В Новгороде в 1529 году святитель Макарий, продолжая труды святителя Геннадия, который собрал воедино библейские книги, предпринял и через 12 лет завершил составление Великих Четиих Миней – «всех чтомых книг на Руси» до XVI века. В 1542 году новгородский архиерей Собором русских епископов поставлен митрополитом Московским и всея Руси. Святитель Макарий, впервые в русской истории, совершил венчание на царство Московского государя – Иоанна IV. Событие это имело огромное значение и свидетельствовало о том, что Русь обрела политическую и церковную самостоятельность, ибо венчание на царство произошло в Москве, а не в Константинополе и совершилось русским митрополитом, а не греческим патриархом. Теперь православные всего мира с надеждой взирали на единственного в мире православного царя, так как в XVI в. Россия была единственной православной страной, над которой не тяготело иноземное иго. Святитель Макарий поддерживал созидательную политику нового государя, благословил его пойти в 1552 году походом на Казань и предсказал победу, в честь которой в Москве близ Кремля был выстроен собор Покрова Пресвятой Богородицы («что на рву», или храм Василия блаженного), освященный самим митрополитом.

В 1547 и 1549 годах святитель Макарий созвал Соборы с целью прославления русских святых, для чего собрал и написал их жития, объединенные в «Книгу новых чудотворцев». В 1551 году святитель созвал известный Собор по устройству церковных дел – «Стоглав». Под его руководством как итог работы Собора составлены многотомный «Лицевой летописный свод» и «Степенная книга царского родословия». Святитель Макарий был покровителем печатного дела на Руси: он благословил Ивана Федорова, диакона церкви Николы Гостунского в Кремле, на издание Часослова и Апостола.

Святитель почил 31 декабря 1563 года. На погребении в Успенском соборе Кремля «было лицо его как свет сияющее».

Прославлен святитель Макарий на Поместном Соборе в 1988 году. Память празднуется 30 декабря (12 января).

* * *

29

Ко́тву – якорь.


Источник: Минея - М. : Издат. совет Русской Православной Церкви, 2002-. 12 том. / Минея декабрь. - 2002. / Ч. 1. – 600; Ч. 2. - 560 с.

Комментарии для сайта Cackle