Ноябрь

Ме́сяца ноября́ в 3-й день

Новому́чеников Бы́ковских: священному́чеников пресви́теров Иоа́нна Кесари́йскаго и Петра́ Косминко́ва, диа́кона Симео́на Кречко́ва и му́ченицы Евдоки́и Сафро́новой

На вели́цей вече́рни

Блаже́н муж: 1-й антифо́н. На Го́споди, воззва́х: стихи́ры на 8, глас 1:

Нача́ло ны́не положи́м, о бра́тие,/ моле́нию те́плому к но́вым уго́дником Бо́жиим:/ ти́и бо, страда́ньми очища́еми,/ ро́ждие плодоно́сныя лозы́ Христо́вы показа́шася/ и, сла́достию благода́ти оби́льно напая́еми,/ во благоуха́нии свя́тости нам яви́шася,/ я́ко да и мы по́двигу их поревну́ем// и принесе́м Бо́гу плод покая́ния.

Кро́тцы, но непоколеби́ми пребы́ли есте́,/ новому́ченицы Бы́ковстии,/ Иоа́нне, Пе́тре, Симео́не и Евдоки́е,/ гони́телями на смерть обрече́ннии;/ вам бо и жизнь есть Христо́с, и смерть приобре́тение./ Ны́не же, на Небесе́х пребыва́юще,/ нетле́нныя сла́вы наслажда́етеся и воспева́ете:// благослове́н еси́, Бо́же, во ве́ки.

Адама́нтово му́жество ва́ше/ сла́ва есть Це́ркве Ру́сския,/ страстоте́рпцы и испове́дницы но́вии,/ вы бо, гони́ми и убива́еми,/ непоколеби́ми и тве́рди пребы́сте в беда́х./ Кто изочте́т муче́ния ва́ша, ско́рби и боле́зни?/ Ве́лия бысть ко Го́споду любо́вь ва́ша// и во всем яви́сте себе́ я́ко дру́зи Христо́ви.

Глас 6:

Го́споди, а́ще не бы́хом святы́я Твоя́ име́ли моли́твенники/ и благосты́ню Твою́, ми́лующую нас,/ ка́ко возмогли́ бы́хом враго́м на́шим противуста́ти/ и оте́ц на́ших ве́ру сохрани́ти?/ Го́споди, Многоми́лостиве и Многоблагоутро́бне!/ Вонми́ моли́тве засту́пников на́ших Небе́сных,/ Иоа́нна, Петра́, Симео́на и Евдоки́и,/ и всех новому́ченик Це́ркве Ру́сския,/ непреста́нно вопию́щих к Тебе́:// утверди́, Бо́же, ве́ру правосла́вную во Оте́честве на́шем.

Отъя́т Госпо́дь поноше́ние от люде́й Свои́х,/ уста́ви гоне́ние, посрами́ безбо́жныя,/ дарова́ торжество́ Це́ркви Свое́й кровьми́ новому́чеников и испове́дников./ Те́мже, благодаря́ще Бо́га о ве́лиих благодея́ниих, на нас бы́вших,/ соверша́ем днесь па́мять святы́х уго́дников Бы́ковских// и мо́лимся о спасе́нии душ на́ших.

Сла́ва, глас 8:

Прехва́льнии священному́ченицы Иоа́нне, Пе́тре и Симео́не,/ ку́пно с му́ченицею Евдоки́ею,/ вы сквозе́ огнь и во́ду проидо́сте,/ сего́ ра́ди отверзо́шася вам две́ри ра́йския./ Я́ко ве́лие дерзнове́ние ко Пресвяте́й Тро́ице стяжа́вше,/ Христу́ за ны моли́теся// дарова́ти душа́м на́шим мир и ве́лию ми́лость.

И ны́не, Богоро́дичен: Царь Небе́сный:

Вход. Проки́мен дне и чте́ния три му́ченическая.

На лити́и стихи́ра хра́ма.

Сла́ва, святы́х, глас 8:

Ны́не Це́рковь Небе́сная ликовству́ет о мно́жестве чад свои́х,/ му́ченицех и испове́дницех земли́ Ру́сския,/ ти́и бо, муче́ния многообра́зная и смерть лю́тую за Христа́ прие́мше,/ внидо́ша в жизнь безконе́чную./ Сего́ ра́ди даде́ся им благода́ть моли́тися за ны// и возвеща́ти ми́лости Спа́са на́шего.

И ны́не, Богоро́дичен, глас то́йже:

Засту́пнице усе́рдная,/ Пресвята́я Влады́чице Богоро́дице,/ скорбя́щих при́сное ра́дование/ и Уте́шительнице призыва́ющих Тя в час испыта́ния!/ Услы́ши моли́твы раб Твои́х/ и со страстоте́рпцы святы́ми земли́ на́шея// моли́ спасти́ся нам.

На стихо́вне стихи́ры, глас 6:

Святи́и страстоте́рпцы,/ Иоа́нне, Пе́тре, Симео́не и Евдоки́е,/ мо́лим вас мы, недосто́йнии:/ при́зрите на храм Бо́жия Ма́тере, иде́же подвиза́стеся,/ утверди́те ны в ве́ре правосла́вней/ и вознеси́те моли́тву ко Пресвяте́й Тро́ице// о земно́м оте́честве ва́шем.

Стих: Честна́ пред Го́сподем// смерть преподо́бных Его́.

Священному́ченицы Бы́ковстии,/ вы в стра́шную годи́ну гоне́ний,/ мучи́телей безбо́жных суровства́ не убоя́вшеся,/ многоразли́чныя му́ки претерпе́ли есте́/ и зало́г, вруче́нный вам,/ цел и невреди́м сохрани́ли есте́,/ му́жески Спа́са пропове́давше./ Сего́ ра́ди, дерзнове́ние иму́ще ко Го́споду,// моли́теся о душа́х на́ших.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

Моли́тву вознесо́сте ко Го́споду,/ Иоа́нне, Пе́тре и Симео́не,/ и Тому́ возвести́сте печа́ли своя́, глаго́люще:/ се ны́не ду́ши на́ша полага́ем за слове́сныя о́вцы./ Приими́, Го́споди, моли́твы му́ченик Твои́х,/ я́ко кади́ло пред Тобо́ю,/ да храни́т Русь Свята́я// ве́ру правосла́вную во ве́ки.

Сла́ва, и ны́не, Богоро́дичен, глас то́йже:

Богоро́дице, ве́рным Помо́щнице,/ помози́ и ны́не рабо́м Твои́м,/ в тя́жких обстоя́ниих су́щим./ К Тебе́ прибега́ем, Влады́чице,/ со святы́ми новому́ченики Це́ркве Ру́сския,// моли́ся спасти́ ду́ши на́ша.

На благослове́нии хле́бов тропа́рь, глас 6:

В годи́ну о́гненных искуше́ний Це́ркве Ру́сския,/ кро́тость и смире́ние стяжа́вше,/ любо́вь Христо́ву к па́стве свое́й яви́сте/ и, я́ко па́стыри до́брии,/ ду́ши своя́ за ню положи́сте./ Моли́теся о нас священному́ченицы Иоа́нне, Пе́тре и Симео́не,/ ку́пно с му́ченицею Евдоки́ею,// спасти́ и просвети́ти ду́ши на́ша.

На у́трени

По 1-м стихосло́вии седа́лен, глас 6:

Крест на ра́мо взе́мше/ и Христа́ всем се́рдцем возлюби́вше, му́ченицы достохва́льнии,/ Того́ стопа́м после́довали есте́/ и за́поведь Госпо́дню до конца́ испо́лнили есте́:/ я́ко бо́льши сея́ любве́ никто́же и́мать,/ да кто ду́шу свою́ положи́т за дру́ги своя́./ И вы ду́ши ва́ша положи́сте за Це́рковь Правосла́вную./ Ны́не же, я́ко иму́ще дерзнове́ние ко Христу́ Бо́гу,/ моли́теся о чту́щих па́мять ва́шу.

Сла́ва, и ны́не, Богоро́дичен:

Те́плое заступле́ние су́щим в беда́х/ и Помо́щницу на́шу,/ Е́юже безбо́жия избавля́емся,/ Богоро́дицу, ве́рнии, ублажа́ем.

По 2-м стихосло́вии седа́лен, глас 8:

Ра́дуйтеся, новому́ченицы блаже́ннии,/ я́ко ни скорбь, ни теснота́, ни гоне́ние,/ ни меч возмого́ша разлучи́ти вас от любве́ Христо́вы./ И ны́не приле́жно мо́лим вас мы, недосто́йнии:/ не забу́дите посеща́ти чад свои́х,/ соверша́ющих свяще́нную па́мять ва́шу.

Сла́ва, и ны́не, Богоро́дичен:

Безневе́стная, Чи́стая Богоро́дице Де́во,/ не лиши́ нас покро́ва Твоего́ и заступле́ния во дни искуше́ний и бед./ Мы же со святы́ми новому́ченики и засту́пники на́шими/ арха́нгельский глас прино́сим Ти:/ ра́дуйся, Обра́дованная, Госпо́дь с Тобо́ю.

Велича́ние:

Велича́ем вас,/ священному́ченицы Христо́ви Иоа́нне, Пе́тре, Симео́не и свята́я му́ченице Евдоки́е,/ и чтим честна́я страда́ния ва́ша,/ я́же за Христа́// претерпе́ли есте́.

Или́ сие́:

Велича́ем вас,/ святи́и му́ченицы Христо́ви Иоа́нне, Пе́тре, Симео́не и Евдоки́е,/ и чтим честна́я страда́ния ва́ша,/ я́же за Христа́// претерпе́ли есте́.

Псало́м избра́нный: Бог нам прибе́жище и си́ла:

По полиеле́и седа́лен, глас 1:

Проидо́сте сквозе́ огнь муче́ний и во́ду слез,/ и введе́ вы Госпо́дь в поко́й Свой,/ те́мже ны́не те́плии хода́таи к Бо́гу яви́стеся нам,/ лобыза́ющим по́двиг ваш, страстоте́рпцы Бы́ковстии./ Сла́ва Предуве́девшему произволе́ние ва́ше,/ сла́ва Предуста́вившему вас к сла́ве Небе́сней,/ сла́ва Подаю́щему нам моли́твами ва́шими ве́лию ми́лость.

Сла́ва, и ны́не, Богоро́дичен:

Ублажи́м Честне́йшую го́рних во́инств Де́ву Пречи́стую Богоро́дицу,/ Та бо две́ри Ца́рствия Небе́снаго отве́рзе/ и ны́не на путь спасе́ния наставля́ет нас гре́шных.

Степе́нна, 1-й антифо́н 4-го гла́са. Проки́мен, глас 4: Тебе́ ра́ди, Го́споди,// умерщвля́еми есмы́ весь день. Стих: Вмени́хомся, я́ко о́вцы заколе́ния. Ева́нгелие от Матфе́я, зача́ло 36.

По 50-м псалме́ стихи́ра, глас 6:

Любве́ Христо́вы и благода́ти Ду́ха Свята́го испо́лнени,/ душетле́нныя стра́сти победи́ли есте́,/ всеблаже́ннии страстоте́рпцы Бы́ковстии,/ и, гоне́ния от беззако́нников лю́тых претерпе́вше,/ преми́рных селе́ний дости́гли есте́/ и с ли́ки новому́чеников Це́ркве Ру́сския та́мо водвори́лися есте́.// Те́мже испроси́те душа́м на́шим мир и ве́лию ми́лость.

Кано́н святы́х на 8, глас 6.

Песнь 1.

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,// Бо́гу побе́дную песнь пои́м, вопия́ше.

Припе́в: Святи́и новому́ченицы Бы́ковстии, моли́те Бо́га о нас.

Го́споди Бо́же наш, помози́ нам смире́нно воспе́ти по́двиги новому́чеников Бы́ковских, пресви́теров Иоа́нна и Петра́, диа́кона Симео́на и Евдоки́и, и́же страда́нии свои́ми внидо́ша в Черто́г Твой Небе́сный.

Кий слове́сный дар принесе́м вам, до́блии страстоте́рпцы Бы́ковстии, ве́рнии свиде́телие Сло́ва? Недоумева́ем бо досто́йно воспе́ти вели́чие по́двигов ва́ших, дре́вних му́чеников подража́телие.

Мно́ги ско́рби пра́ведным, и от всех изба́вит я́ Госпо́дь, рече́ проро́к. Те́мже и вы, проше́дше сквозе́ огнь и во́ду, в ра́дость жи́зни ве́чныя внидо́сте и со все́ми святы́ми ны́не сла́ву Бо́жию воспева́ете.

Богоро́дичен: Во успе́нии Твое́м ми́ра не оста́вила еси́, Влады́чице, те́мже покрыва́еши при́сно лю́ди Твоя́ от вся́ких обстоя́ний и моли́твами Твои́ми избавля́еши от сме́рти ду́ши на́ша.

Песнь 3.

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

Кровь ва́шу, я́ко спаси́тельное се́яние, земля́ Ру́сская прия́т и сла́ва по́двигов ва́ших преде́лы ея́ облиста́. Те́мже, благодаря́ще Го́спода, торжеству́ем па́мять ва́шу, му́ченицы Бы́ковстии.

Кто Бог ве́лий, я́ко Бог наш? Ты еси́ Бог, творя́й чудеса́, – си́це вопия́ху новому́ченицы Бы́ковстии, претерпева́юще мучи́тельства безбо́жных и ве́ру Христо́ву кровьми́ свои́ми утвержда́юще.

Служи́телие Бо́жия Ма́тере бы́сте, страстоте́рпцы Иоа́нне и Пе́тре, Симео́не и Евдоки́е. Те́мже, ве́лиею любо́вию к Ро́ждшемуся от Нея́ испо́лнившеся, не убоя́стеся ни мук, ни са́мыя сме́рти и венцы́ по́двигов свои́х прия́сте.

Богоро́дичен: Премилосе́рдая Ма́ти, Пречи́стая Де́во, ве́мы Тя ско́рую Уте́шительницу в напа́стех и ско́рбех, подаю́щую по́мощь рабо́м Твои́м.

Седа́лен, глас 4:

Тьму́ неве́рия сло́вом и́стины просвеща́юще,/ на брань духо́вную проти́ву отсту́пников и безбо́жников лю́тых дерзнове́нно подвиго́стеся,/ сла́внии па́стырие на́ши Иоа́нне и Пе́тре, с Симео́ном диа́коном./ Сего́ ра́ди, укрепля́юще нас му́жески испове́дати ве́ру правосла́вную,/ моли́теся о спасе́нии душ на́ших.

Сла́ва, и ны́не, Богоро́дичен:

Чудотво́рною ико́ною Твое́ю Влади́мирскою дре́вле Оте́чество на́ше укрепи́ла еси́, Пресвята́я Де́во,/ та́кожде и в годи́ну безбо́жных гоне́ний/ но́выя ратобо́рцы к подвиго́м му́ченическим утверди́ла еси́./ Те́мже с любо́вию и благодаре́нием ублажа́ем Тя, Пречи́стая.

Песнь 4.

Ирмо́с: Христо́с моя си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,// от смы́сла чи́ста, о Го́споде пра́зднующи.

Сла́вный священному́чениче Иоа́нне, прему́дрость кни́жную разуме́в, вы́сшее и соверше́ннейшее уче́ние Ева́нгельское пости́гл еси́, и ду́шу твою́ за о́вцы ста́да Христо́ва положи́л еси́.

Ди́вный священному́чениче Пе́тре, ты, науча́я люби́ти Христа́ всем се́рдцем, чад ма́лых и соверше́нных во́зрастом учи́тель был еси́, ты и кро́вию му́ченическою уче́ние запечатле́л еси́, те́мже па́стырь усе́рдный и страстоте́рпец пресла́вный яви́лся еси́.

Прехва́льный му́чениче Симео́не диа́коне! Возлюби́л еси́ нача́ло прему́дрости, страх Госпо́день, те́мже, во олтаре́ святе́м усе́рдно служа́, мно́гим благогове́нием Бо́гу угоди́л еси́. Ны́не пред лице́м Его́ пое́ши, ра́дуяся.

Богоро́дичен: Богоро́дице Де́во Пречи́стая, я́ко Госпожу́, Цари́цу и Влады́чицу пою́т Тя святи́и новому́ченицы Це́ркве Ру́сския. С ни́миже приими́ и на́ша моле́ния и спаси́ ду́ши на́ша.

Песнь 5.

Ирмо́с: Бо́жиим Све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.

Оскверне́нная де́лы безбо́жными земля́ Ру́сская кропле́нием крове́й ва́ших па́ки освяща́ется, да позна́ют язы́цы, я́ко с на́ми Бог, и покоря́тся пра́вде Его́.

Вси лю́дие правосла́внии ско́рби испо́лнишася, егда́ безбо́жнии мучи́тели на Це́рковь Ру́сскую ополчи́шася. Вы же, я́ко во́ини кре́пцыи, беззако́нию их му́жественне противуста́сте и ве́ру правосла́вную до́бле утверди́сте.

Во мра́це безбо́жия заблу́ждшим яви́стеся огневи́днии свети́льницы, Иоа́нне, Пе́тре, Симео́не и Евдоки́е, новому́ченицы пресла́внии, указу́юще благоче́стия путь спаси́тельный.

Богоро́дичен: Пречи́стая Де́во Богома́ти, Наста́внице и́щущим спасе́ния, сподо́би и нас мы́слити, глаго́лати и де́яти то́чию пра́вая, после́дующе новому́чеником Це́ркве Ру́сския, я́ко испове́дником тве́рдым.

Песнь 6.

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:// возведи́ от тли живо́т мой, Многоми́лостиве.

Еде́ма сладча́йшаго насле́дницы показа́стеся, новому́ченицы Бы́ковстии, вы бо, ско́рбни бы́вше в ми́ре сем, на Небеси́ ны́не утеша́етеся; непра́вды же и гоне́ния претерпе́вше, жизнь ве́чную, я́ко воздая́ние пра́ведное, от Бо́га улучи́ли есте́.

Cвященному́ченицы Бы́ковстии Иоа́нне, Пе́тре, Симео́не с му́ченицею Евдоки́ею! Вы заточе́ния темни́чнаго и лю́тыя сме́рти не убоя́лися есте́, ны́не же в ри́зах све́тлых с чи́нми А́нгельскими Святе́й Тро́ице предстои́те и мо́литеся о душа́х на́ших.

О ра́тницы Христо́ви непобеди́мии, новому́ченицы Бы́ковстии! Вы опло́т Правосла́вия яви́стеся; огради́те убо и нас, немощны́х в ве́ре, по́двиг ваш кре́стный помина́ющих.

Богоро́дичен: Богоро́дице Де́во, упова́ние христиа́ном, покры́й, соблюди́, сохрани́ и спаси́ Русь Правосла́вную, к заступле́нию Твоему́ прибега́ющую.

Конда́к, глас 2:

О́браз есте́ чту́щим по́двиги ва́ша,/ но́вии страстоте́рпцы Бы́ковстии,/ испове́днически по́прище земно́е прете́кшии./ Вас бо ни скорбь, ни теснота́, ни смерть/ от любве́ Бо́жия разлучи́ти возмого́ша./ Те́мже, страда́ньми дерзнове́ние стяжа́вше,/ моли́теся Христу́, вас укрепи́вшему,// да и мы му́жества дар от Бо́га восприи́мем.

И́кос:

Прииди́те, правосла́внии лю́дие, пе́сньми ублажи́м но́выя свети́льники Це́ркве Ру́сския, Иоа́нна, Петра́, Симео́на и Евдоки́ю, те́плыя моли́твенники, усе́рдныя предста́тели, проти́ву безбо́жия тве́рдыя ору́жники, ду́ши своя́ за Христа́ положи́вшия и венце́в му́ченических сподо́бльшияся. К ни́мже с любо́вию припа́даем, зову́ще си́це: ра́дуйтеся, страстоте́рпцы Бы́ковстии, ве́ру правосла́вную по́двигом до́брым утверди́вшии.

Песнь 7.

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие, мучи́теля увеща́ вопи́ти:// благослове́н еси́, Бо́же оте́ц на́ших.

Го́споди Бо́же наш, при́зри на Це́рковь Ру́сскую, отврати́ гнев Твой, на ны дви́жимый, прости́ грехи́ и беззако́ния на́ша и поми́луй нас, предста́тельством святы́х сро́дников на́ших, непреста́нно за ны моля́щихся.

Го́споди, моли́твами новому́чеников Це́ркве Ру́сския отжени́ тьму от серде́ц на́ших сло́вом Твоея́ и́стины, не даждь сатане́ льсти́вому погуби́ти ду́ши на́ша, утверди́ нас в Правосла́вии и да́руй нам в благоче́стии пожи́ти вся дни живота́ на́шего.

Ди́внии уго́дницы Бо́жии, сла́внии му́ченицы Бы́ковстии, вы, не убоя́вшеся преще́ний безбо́жных, рекли́ есте́: не пощади́м естества́ тле́ннаго, изво́лим смерть, да венцы́ побе́дными увязе́мся от Христа́, Бо́га на́шего.

Богоро́дичен: Засту́пнице усе́рдная, Ма́ти Го́спода Вы́шняго, покры́й Це́рковь Ру́сскую держа́вным Твои́м покро́вом, христолюби́вым лю́дем на враги́ спобо́рствуй и належа́щих скорбе́й душе́вных и теле́сных свободи́, Ма́ти Де́во Пречи́стая.

Песнь 8.

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.

Убели́сте ри́зы ва́ша, до́блии новому́ченицы, кро́вию А́гнца Бо́жия, за челове́ки закла́ннаго. Его́же, о́троцы благослови́те, свяще́нницы, воспо́йте, лю́дие, превозноси́те во вся ве́ки.

Вои́стину дру́зи Христо́ви яви́стеся, новому́ченицы Бы́ковстии, плоть бо и мир возненави́девше, ве́тхаго челове́ка совлеко́стеся, во оде́жду же нетле́ния обле́кшеся, реко́сте: не ктому́ уже́ мы живе́м, но живе́т в нас Христо́с.

Рече́ Госпо́дь Свои́м ученико́м: не бо́йся, ма́лое ста́до, я́ко благоизво́ли Оте́ц ваш да́ти вам Ца́рство. Вы же, сло́ву сему́ после́дующе, черто́га Небе́снаго достиго́сте. Те́мже, сла́внии добропобе́дницы, помози́те и нам спасе́ние улучи́ти.

Богоро́дичен: Пресвята́я Влады́чице Богоро́дице, защити́ и спаси́ нас от ко́зней вра́жиих и многоразли́чных напа́стей, да́руй нам кре́пость в терпе́нии, на Тебе́ бо наде́емся и Тобо́ю хва́лимся.

Песнь 9.

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с Небе́сными во́и Тя ублажа́ем.

На Пречи́стую Богоро́дицу все упова́ние возложи́вше, страстоте́рпцы Бы́ковстии, да́же до сме́рти пострада́ли есте́ и, то́кмо Еди́наго на Небесе́х Живу́щаго боя́щеся, Того́ со вся́ким дерзнове́нием испове́дали есте́.

Блаже́ннии страстоте́рпцы Бы́ковстии, приими́те сие́ смире́нное и убо́гое моле́ние на́ше, да, ве́рно почита́юще па́мять ва́шу, улучи́м от Го́спода и Влады́ки живота́ на́шего оставле́ние грехо́в и ве́лию ми́лость.

О богоизбра́ннии новому́ченицы Бы́ковстии, я́ко зве́зды, Не́бо церко́вное украси́вшии, моли́теся ко Го́споду о земне́м оте́честве ва́шем и о ве́рою и любо́вию вас почита́ющих.

Богоро́дичен: О Всепе́тая Ма́ти, а́ще и разори́ся от злых храм Твой Влади́мирский, иде́же новому́ченицы Бы́ковстии подвиза́шася, но ми́лостию Твое́ю благоволи́ла еси́ его́ во сла́ве обнови́ти. Те́мже, соше́дшеся днесь, благода́рственными пе́сньми Тя велича́ем.

Свети́лен, глас 1:

Све́том Христо́вым просвети́вшеся,/ святи́и новому́ченицы Бы́ковстии,/ во мра́це безбо́жия свети́льницы ве́рным яви́стеся,/ страда́ньми бо ва́шими и доны́не ве́ра правосла́вная пропове́дуется,/ наде́жда укрепля́ется, любо́вь умножа́ется/ и Це́рковь Ру́сская до́блестию ва́шею озаря́ется.

Сла́ва, и ны́не, Богоро́дичен, глас то́йже:

Прииди́те, восхва́лим Пречи́стую Ма́терь Бо́жию,/ Вы́шшую всех земноро́дных/ и Честне́йшую го́рних во́инств,/ Засту́пницу усе́рдную ро́да христиа́нскаго.

На хвали́тех стихи́ры на 4, глас 6:

Прииди́те, возра́дуемся, лю́дие,/ собра́вшеся в честне́м хра́ме Бо́жия Ма́тере,/ и воспое́м испове́дники Христо́вы,/ и́хже смерть но́вое рожде́ние бысть/ и страда́ние венце́в прия́тие./ Те́мже ку́пно со все́ю Це́рковию// страстоте́рпцы Бы́ковския прославля́ем.

Во́ини добропобе́днии/ и свети́льницы, ве́рою сия́ющии,/ безбо́жия обличи́телие/ и пре́лести разруши́телие,/ велегла́снии и́стины пропове́дницы,/ святи́и страстоте́рпцы Иоа́нне, Пе́тре, Симео́не и Евдоки́е,/ му́ченическою кро́вию в Ца́рствие Небе́сное возше́дшии,/ Христа́ Бо́га моли́те// спасти́ и просвети́ти ду́ши на́ша.

Водо́ю жи́зни ве́чныя напои́сте ве́рныя,/ страстоте́рпцы всесла́внии,/ жа́жду и́стины утоля́юще/ и огнь безбо́жных преще́ний угаша́юще,/ те́мже Боже́ственныя сла́вы прича́стницы яви́стеся/ и страда́ньми ва́шими Христу́ обручи́стеся./ Того́ приле́жно, му́ченицы, моли́те/ мир ми́рови дарова́ти// и душа́м на́шим ве́лию ми́лость.

Новому́ченицы и испове́дницы Христо́ви,/ со все́ми святы́ми земли́ Ру́сския Влады́це предстоя́ще, усе́рдно моли́теся,/ да от ересе́й и раско́лов Це́рковь Свою́ изба́вит,/ Оте́чество на́ше в Правосла́вии утверди́т/ и нас Ца́рствия Небе́снаго сподо́бит,// да всегда́ прославля́ем ва́ше ми́лостивное предста́тельство.

Сла́ва, глас 8:

Реко́ша испове́дницы ве́рнии отсту́пником и безбо́жником:/ всу́е тружда́етеся, не льсти́теся;/ не поги́бнет бо земля́ Ру́сская, Бо́гом возлю́бленная,/ но, кро́вию но́вых му́чеников напое́нная,/ па́ки просия́ет ве́рою и́стинною./ Ны́не сло́во сие́ испо́лнися,/ я́ко Бог просла́ви уго́дники Своя́// и посрами́ сопроти́вныя.

И ны́не, Богоро́дичен, глас то́йже:

Я́ко Госпожу́, Цари́цу и Влады́чицу на́шу,/ пое́м Тя со священному́ченики Бы́ковскими,/ в держа́вный Твой покро́в прибега́юще,/ и благода́рне зове́м Ти, спаса́емии:// ра́дуйся, Благода́тная, с Тобо́ю Госпо́дь.

Славосло́вие вели́кое, ектении́ и отпу́ст.

На Литурги́и

Блаже́нны от кано́на святы́х, пе́сни 3-я и 6-я. Проки́мен, глас 7: Тебе́ ра́ди, Го́споди,// умерщвля́еми есмы́ весь день. Стих: Вмени́хомся, я́ко о́вцы заколе́ния. Апо́стол к Ри́мляном, зача́ло 99. Аллилу́ия, глас 4: Воззва́ша пра́веднии, и Госпо́дь услы́ша их. Стих: Мно́ги ско́рби пра́ведным, и от всех их изба́вит я́ Госпо́дь. Ева́нгелие от Луки́, зача́ло 106. Прича́стен: Ра́дуйтеся, пра́веднии, о Го́споде, пра́вым подоба́ет похвала́.

Моли́тва

О святи́и священному́ченицы Бы́ковстии Иоа́нне, Пе́тре, Симео́не и му́ченице Евдоки́е, в годи́ну лю́тых гоне́ний за Христа́ пострада́вшии, ве́рность Ему́ да́же до сме́рти сохрани́вшии и вене́ц жи́зни от Него́ прие́мшии! Вы, во дни искуше́ния тя́жкаго, прише́дшаго на Це́рковь Ру́сскую от безбо́жных, муче́ния многоразли́чная и лю́тую смерть претерпе́вше, любо́вь ко Го́споду и о́браз непосты́днаго упова́ния на Него́ му́жественно яви́ли есте́. И ны́не, в раи́ сла́дости наслажда́ющеся, Престо́лу Бо́жию во сла́ве предстои́те и при́сно хвалу́ со А́нгелы и все́ми святы́ми Триеди́ному Бо́гу возно́сите. Сего́ ра́ди мы, недосто́йнии, мо́лим вас: умоли́те Го́спода сил, да утверди́т Це́рковь Ру́сскую непоколеби́му в многомяте́жнем ми́ре сем, да да́рует нам дух братолю́бия и ми́ра, и приведе́т нас, заблу́ждших, к покая́нию, да водворя́тся в душа́х на́ших любо́вь и благогове́ние, да испо́лнятся уста́ на́ша непреста́ннаго благодаре́ния Спаси́телю на́шему. Моли́твенным же предста́тельством ва́шим да возгори́тся в сердца́х на́ших ре́вность о сла́ве Бо́жией и о вся́ком де́лании пра́вды, да сподо́бимся при́сно с ва́ми прославля́ти Еди́наго во Святе́й Тро́ице и́стиннаго Бо́га, Отца́, и Сы́на, и Свята́го Ду́ха, во ве́ки веко́в. Ами́нь.

Источник: Текст утвержден Священным Синодом Русской Православной Церкви 14 мая 2018 года (журнал № 37)

Ме́сяца ноября́ в 5-й день

Святы́х оте́ц Поме́стнаго Собо́ра Це́ркве Ру́сския

На ма́лей вече́рни

На Го́споди, воззва́х: стихи́ры на 4, глас 4.

Подо́бен: Зва́нный свы́ше:

Прииди́те, ве́рнии,/ похвала́ми и пе́сньми увенча́им/ му́ченики и испове́дники,/ святи́тели и преподо́бныя,/ отцы́ единому́дренныя,/ пе́рвее на Собо́ре Це́ркве Ру́сския потруди́вшияся,/ по́слежде гоне́ния за ве́ру Христо́ву претерпе́вшия/ и Це́рковь Ру́сскую по́двиги свои́ми украси́вшия./ Прииди́те, воспои́м побо́рники ре́вностныя/ и заве́т их услы́шим:/ о ча́да, храни́те ве́ру правосла́вную,// в не́йже земли́ на́шея утвержде́ние.

Зва́ннии свы́ше/ возвести́ти во Оте́честве на́шем/ собо́рнаго ра́зума глас,/ наро́да Бо́жия избра́нницы,/ единоду́шнии страда́льцы ве́рнии,/ со́весть до́бру иму́щии/ и мир Христо́в в себе́ нося́щии,/ испове́дницы и му́ченицы,/ венцы́ нетле́нными увенча́ннии/ и Тро́ицу Единосу́щную просла́вившии./ Ю́же приле́жно моли́те// на по́двиг ве́ры укрепи́ти ду́ши на́ша.

Це́ркве Ру́сския печа́льницы/ и ве́ры Христо́вы ревни́телие показа́стеся,/ святи́и отцы́ на́ши,/ вы бо, Про́мыслу Бо́жию после́дующе,/ избра́нию Патриа́рха/ на престо́л Ру́сский поревнова́сте/ и Го́спода, я́ко Всеви́дца,/ та́йны серде́ц ве́дуща,/ еди́на от трие́х досто́йнейша/ жре́бием Бо́жиим указа́ти умоли́сте,/ те́мже и в Це́ркви благочи́ние возста́висте// благослове́нием собо́рным.

Свети́льницы церко́внии яви́стеся,/ избра́нницы Руси́ Святы́я,/ Свяще́ннаго Собо́ра ре́вностнии де́лателие,/ новому́ченицы и испове́дницы,/ во страда́ниих и гоне́ниих ве́ру Христо́ву до конца́ соблю́дшии,/ вы бо, Влади́миру священному́ченику подо́бящеся,/ в бу́рю мяте́жную убие́ни бы́сте,/ Вениами́ну крепча́йшему подража́юще,/ от власте́й безбо́жных осужде́ние прия́сте/ и, я́коже Петр местоблюсти́тель, темни́чная заключе́ния претерпе́сте,/ до́блим Кири́ллу и Агафа́нгелу после́дующе,/ во изгна́ниих томи́ми бы́сте/ и, я́коже све́тлый Иларио́н,/ во ста́не страда́ний пожи́сте/ и Бо́га тве́рдо испове́дасте.// Его́же моли́те о ве́рою соверша́ющих святу́ю па́мять ва́шу.

Сла́ва, глас 2:

Сою́зом любве́ Христо́вы соедине́ни/ и Ду́хом Святы́м во еди́но со́брани, святи́и,/ и́менем Патриа́рха Ти́хона украси́лися есте́./ В годи́ну же гоне́ний,/ заве́т его́ испо́лнивше,/ досто́йно пострада́ли есте́/ и, гони́ми бы́вше, я́ко ученицы́ Христо́вы,/ заключе́ние и убие́ние претерпе́ли есте́.// Тех моли́твами, Го́споди, спаси́ ду́ши на́ша.

И ны́не, Богоро́дичен.

На стихо́вне стихи́ры, глас 8:

О, кре́пости ва́шея,/ новому́ченицы и испове́дницы!/ Вы бо, в темни́цах и заточе́ниих томя́щеся/ и на смерть мучи́тельми ведо́мии,/ моли́твами святы́х земли́ Ру́сския/ сердца́ своя́ на ка́мени ве́ры утверди́сте/ и словесы́ Афана́сия гимнотво́рца ра́достне воспева́сте:// Русь Свята́я, храни́ ве́ру правосла́вную!

Стих: Восхва́лятся преподо́бнии во сла́ве// и возра́дуются на ло́жах свои́х.

О, тве́рдости ва́шея,/ новому́ченицы и испове́дницы!/ Вы бо, смире́нием и ре́вностию ра́ны раско́ла врачу́юще/ и му́дростию боле́знь разделе́ния исцеля́юще,/ страда́ньми единомы́слие в Це́ркви гони́мей яви́сте./ Те́мже мо́лим вас, христолю́бцы добропобе́днии:// помози́те нам глас и́стины при́сно разуме́ти.

Стих: Возноше́ния Бо́жия в горта́ни их,// и мечи́ обою́ду остры́ в рука́х их.

О, братолю́бия ва́шего,/ новому́ченицы и испове́дницы!/ Вы бо устрое́ния жития́ церко́внаго ра́ди/ Собо́р соста́вили есте́,/ по́слежде страда́ния и смерть вку́пе восприя́ли есте́,/ науча́юще нас житие́ благоче́стне провожда́ти,/ упова́ние на Го́спода возлага́ти// и сме́рти от безбо́жных не страши́тися.

Сла́ва, глас то́йже:

Па́стве Це́ркве Ру́сския святы́й Собо́р завеща́,/ никогда́же отрека́тися гони́мых за пра́вду Бо́жию,/ но имена́ их, я́ко би́сер многоце́нный,/ усе́рдне храни́ти поминове́ния ра́ди./ Мы же, очи́ма на ли́ки новому́чеников благогове́йне взира́юще,/ житию́ их да потщи́мся ре́вностне подража́ти,// во спасе́ние душ на́ших.

И ны́не, Богоро́дичен: Влады́чице, приими́:

Тропари́ пи́саны на вели́цей вече́рни.

На вели́цей вече́рни

На Го́споди, воззва́х: стихи́ры на 8, глас 1:

Да восхва́лим днесь свята́го Патриа́рха Ти́хона,/ на путь испове́дничества избра́ннаго,/ и́же с па́ствою Ру́сскою/ ча́шу страда́ния испи́ за ве́ру правосла́вную,/ и си́це воззове́м ему́:/ первосвяти́телю о́тче наш,/ прииди́ и осени́ ве́рныя лю́ди// благослове́нием Небе́сным.

Брань братоуби́йственная, глад и кро́вная сму́та/ жре́бий твой тя́жкий яви́ся,/ святи́телю Патриа́рше Ти́хоне!/ Ты же, в покая́нии путь спасе́ния всем указу́я,/ лю́дем, во озлобле́нии су́щим, взыва́л еси́:/ возлюби́те бли́жняго своего́,// обрати́теся ко Го́споду, и спасе́теся.

К па́стве твое́й взыва́л еси́,/ свя́те Ти́хоне Патриа́рше:/ сы́нове мои́ и дще́ри во Христе́,/ потщи́теся с про́поведию покая́ния,/ противуста́ните враго́м Це́ркве си́лою ве́ры на́шея,/ не убо́йтеся тя́жких страда́ний,/ па́мятующе словеса́ свята́го апо́стола:// кто ны разлучи́т от любве́ Бо́жия?

Страда́ния мно́гая претерпе́л еси́, о́тче Ти́хоне:/ оклевета́ния, суды́ и заточе́ния,/ преда́тельства лжебра́тии и угро́зы сме́ртныя,/ наси́льства и нападе́ния враго́в Це́ркве Христо́вы,/ но пребы́л еси́ му́жествен и кро́ток, веща́я:/ не ожесточа́йте серде́ц ва́ших,// но возмога́йте о Го́споде!

И́ны стихи́ры, глас 5:

Днесь, ве́рнии, восхва́лим святи́теля Влади́мира,/ и́же у стен ла́вры Ки́евския от рук беззако́нник смерть прия́т,/ о не́мже глас пла́ча отцы́ Собо́ра/ в первопресто́льнем гра́де вознесо́ша/ и всем, за ве́ру Христо́ву во дни гоне́ний пострада́вшим,/ па́мять церко́вную уста́виша,/ я́ко новому́чеником и испове́дником Це́ркве Ру́сския,// в и́хже чи́не и са́ми по́слежде просла́вишася.

Святе́йший Ти́хон во у́зах наме́стники себе́ поставля́ет,/ святи́тели изря́дныя Вениами́на и Агафа́нгела,/ пома́ле же пе́рвый на беззако́ннем суди́щи к сме́рти осужда́ется,/ други́й же, па́ству призва́вый,/ е́же глас волко́в, губя́щих ста́до, отве́ргнути,/ в преде́лы се́верныя а́бие изгоня́ется./ О́ба сия́ адама́нта тверде́йша,/ путь страда́ния за ве́ру Христо́ву в гоне́ниих нам показу́юща,// днесь све́тло в пе́снех прославля́ются.

Це́ркве Ру́сския ве́рнии послу́шницы да́же до сме́рти,/ Петр и Кири́лл священному́ченицы,/ святи́телем Ти́хоном блюсти́ престо́л Патриа́рший благословля́ются,/ оба́че еди́н изгна́ние и в темни́це пребыва́ние неисхо́дное прия́т,/ вторы́й же препровожде́н бысть от гони́телей в пусты́ню Туруха́нскую./ О́ба сия́, Ду́хом Святы́м укрепля́ема,/ еди́нства ра́ди Це́ркве Ру́сския// му́ченическаго венца́ сподо́бишася.

О святи́и отцы́, первому́ченицы Собо́ра Поме́стнаго Це́ркве Ру́сския,/ по́двига Андрони́ка и Гермоге́на подража́телие!/ О ры́барие богосло́вцы солове́цтии, Иларио́на сла́внаго сподви́жницы!/ О страда́льцы безчи́сленнии земли́ Зыря́нския, Нары́мския и Туруха́нския!/ О же́ртвы чи́стыя,/ в ро́вех Бу́товских и по всей земли́ Ру́сстей со архипа́стыри упоко́ившияся!/ Имена́ ва́ша на Небесе́х напи́сана суть// и в ли́це новому́ченик и испове́дник Це́ркве на́шея ны́не прославля́ются.

Сла́ва, глас 8:

Царь Небе́сный,/ Боже́ственное Сло́во и Прему́дрость си́це рече́:/ а́ще кто Мне слу́жит, Мне да после́дствует./ Те́мже и вы, святи́и отцы́ Свяще́ннаго Собо́ра,/ избра́ннии от люде́й церко́вных,/ я́ко в доброде́телех преизя́щнии,/ на земли́ во одея́ние нищеты́ Христо́вы обле́кшеся,/ темни́цы, у́зы и поноше́ния за Христа́ претерпе́ли есте́./ Ны́не же, на Небеси́ веселя́щеся,// моли́теся о чту́щих любо́вию па́мять ва́шу.

И ны́не, Богоро́дичен, глас то́йже: Царь Небе́сный:

Вход. Проки́мен дне. И чте́ния новому́ченическая.

Дея́ний святы́х апо́стол чте́ние (глава́ 4):

В ты́я дни собра́шася во Иерусали́м кня́зи, ста́рцы, кни́жницы/ и ели́цы бе́ша от ро́да архиере́йска./ И, поста́вльше Петра́ и Иоа́нна посреде́, вопроша́ху:/ ко́ею си́лою, или́ ко́им и́менем исцели́ста хрома́го?/ Петр, испо́лнився Ду́ха Свя́та, рече́:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния./ Несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам./ Ви́дяще же Петро́во дерзнове́ние и Иоа́нново, и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста./ Ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся друг со дру́гом, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма, ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́дь не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га, суди́те? Не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем./ Лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния./ Отпуще́на же бы́вша, приидо́ста к свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре, и вся, я́же в них,/ И́же Ду́хом Святы́м усты́ отца́ на́шего Дави́да, о́трока Твоего́, рекл еси́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.

К Тимофе́ю посла́ния свята́го апо́стола Па́вла чте́ние (глава́ 4):

Ча́до Тимофе́е,/ засвиде́тельствую у́бо аз пред Бо́гом и Го́сподем на́шим Иису́с Христо́м,/ хотя́щим суди́ти живы́м и ме́ртвым в явле́нии Его́ и ца́рствии Его́:/ пропове́дуй сло́во,/ насто́й благовре́менне и безвре́менне,/ обличи́, запрети́, умоли́ со вся́ким долготерпе́нием и уче́нием./ Бу́дет бо вре́мя, егда́ здра́ваго уче́ния не послу́шают,/ но по свои́х по́хотех изберу́т себе́ учи́тели, че́шеми слу́хом,/ и от и́стины слух отвратя́т, и к ба́снем уклоня́тся./ Ты же трезви́ся о всем, злопостражди́,/ де́ло сотвори́ благове́стника,/ служе́ние твое́ изве́стно сотвори́./ Аз бо уже́ жрен быва́ю,/ и вре́мя моего́ отше́ствия наста́./ По́двигом до́брым подвиза́хся,/ тече́ние сконча́х, ве́ру соблюдо́х./ Про́чее у́бо соблюда́ется мне вене́ц пра́вды,/ его́же возда́ст ми Госпо́дь в день он, пра́ведный Судия́,/ не то́кмо же мне, но и всем возлю́бльшим явле́ние Его́.

К Евре́ем посла́ния свята́го апо́стола Па́вла чте́ние (глава́ 11):

Бра́тие,/ святи́и вси ве́рою победи́ша ца́рствия,/ соде́яша пра́вду, получи́ша обетова́ния,/ загради́ша уста́ льво́в,/ угаси́ша си́лу о́гненную,/ избего́ша о́стрея меча́,/ возмого́ша от не́мощи,/ бы́ша кре́пцы во бране́х,/ обрати́ша в бе́гство полки́ чужди́х./ Прия́ша жены́ от воскресе́ния ме́ртвых свои́х./ Ини́и же избие́ни бы́ша, не прие́мше избавле́ния,/ да лу́чшее воскресе́ние улуча́т./ Друзи́и же руга́нием и ра́нами искуше́ние прия́ша,/ еще́ же и у́з и темни́ц./ Ка́мением побие́ни бы́ша,/ претре́ни бы́ша, искуше́ни бы́ша,/ уби́йством меча́ умро́ша,/ проидо́ша в ми́лотех и в ко́зиях ко́жах,/ лише́ни, скорбя́ще, озло́блени./ И́хже не бе досто́ин весь мир,/ в пусты́нях скита́ющеся, и в гора́х, и в верте́пах, и в про́пастех земны́х./ И си́и вси, послу́шествовани бы́вше ве́рою, не прия́ша обетова́ния,/ Бо́гу лу́чшее что о нас предзре́вшу,/ да не без нас соверше́нство прии́мут.

На лити́и стихи́ра, глас 3:

Глас святы́я Це́ркве Правосла́вныя/ во дни разоре́ния Руси́ вопие́т, глаго́ля:/ прииди́те, ча́да ве́рная,/ приими́те да́ннаго вам от Бо́га предстоя́теля,/ прииди́те, послу́шайте отца́ ва́шего,/ прииди́те и ви́дите на всяк день умира́ющаго,/ прииди́те, словесе́м того́ после́дуйте/ и припади́те ко Христу́, из глубины́ души́ моля́щеся:/ сохрани́, Го́споди, на Руси́ ве́ру правосла́вную,/ моли́твами первосвяти́теля Ти́хона// и му́чеников и испове́дников Це́ркве на́шея.

Сла́ва, и ны́не, глас то́йже: Без се́мене от Боже́ственнаго Ду́ха:

На стихо́вне стихи́ры, глас 4:

Ве́ре в лю́дех оскуде́вшей,/ любви́ истощи́вшейся,/ наде́жди изся́кнувшей,/ попусти́ Госпо́дь/ мор жéсток, боле́знь и глад на лю́ди Оте́чества на́шего./ Ты же, святи́телю Ти́хоне,/ святы́ни Бо́жия от поруга́ния неве́рных защища́я,/ о стра́ждущих боле́зновал еси́/ и к милосе́рдию и же́ртве поси́льней/ от щедро́т свои́х для о́ных// па́ству Ру́сскую призыва́л еси́.

Стих: Го́споди, Госпо́дь наш,// я́ко чу́дно и́мя Твое́ по всей земли́.

Боже́ственное смотре́ние о тебе́ испо́лнися, святи́телю Влади́мире,/ егда́ к па́стырскому де́ланию призва́ тя Госпо́дь,/ та́же и святи́тельством увенча́/ и ду́ши слове́сных ове́ц твоему́ попече́нию предаде́,/ да соблюде́ши я́ во еди́нем ста́де// Еди́наго Па́стыря Христа́ Бо́га на́шего.

Стих: Святы́м, и́же суть на земли́ Его́,// удиви́ Госпо́дь вся хоте́ния Своя́ в них.

Измла́да неле́ностно поуча́яся в зако́не Госпо́днем,/ чи́стою любо́вию к Бо́гу возгоре́лся еси́/ и му́ченическаго по́двига жела́нием уязви́лся еси́,/ священному́чениче Вениами́не,/ святи́телю сла́вный Це́ркве Ру́сския./ Егда́ же приведе́ тя Христо́с ко жре́бию о́ному,/ ничесо́же убоя́вся, благода́рне рекл еси́:// сла́ва Тебе́, Бо́гу на́шему, во ве́ки.

Сла́ва, глас 8:

Дру́зи мои́ есте́, рече́ Госпо́дь ученико́м Свои́м,/ а́ще за́поведи Моя́ соблюде́те./ Вы же, отцы́ Собо́ра Церко́внаго,/ в темни́цах и изгна́ниих нищете́ ева́нгельстей навы́кше/ и чистоту́ серде́чную и любо́вь нелицеме́рную стяжа́вше,/ за́поведи Христо́вы усе́рдне соблюдо́сте./ Сего́ ра́ди житие́ ва́ше,/ братолю́бия испо́лненное,/ дру́жество и́стинное нам явля́ет,// ему́же научи́ти нас усе́рдно мо́лим вы.

И ны́не, Богоро́дичен, глас то́йже.

Подо́бен: О, пресла́внаго чудесе́:

О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ правосла́вия// ми́лости и чудеса́ излива́ти до ве́ка. Ами́нь.

Тропа́рь святы́м отце́м, глас 6:

Днесь благода́ть Свята́го Ду́ха нас собра́,/ просла́вити отцы́ Собо́ра Це́ркве Ру́сския/ с Первосвяти́телем Моско́вским Ти́хоном,/ и́же ве́рныя лю́ди земли́ на́шея/ на по́двиг испове́дания пра́выя ве́ры благослови́ша// и страда́нии свои́ми Це́рковь на́шу просла́виша.

Тропа́рь свято́му Патриа́рху Ти́хону, глас 1:

Апо́стольских преда́ний ревни́теля/ и Христо́вы Це́ркве па́стыря до́браго,/ ду́шу свою́ за о́вцы положи́вшаго,/ жре́бием Бо́жиим избра́ннаго/ Патриа́рха Ти́хона восхва́лим/ и к нему́ с ве́рою и упова́нием возопии́м:/ предста́тельством святи́тельским ко Го́споду/ Це́рковь Ру́сскую в тишине́ соблюди́,/ расточе́нная ча́да ея́ во еди́но ста́до собери́,/ отступи́вшия от пра́выя ве́ры к покая́нию обрати́,/ страну́ на́шу от междоусо́бныя бра́ни сохрани́// и мир Бо́жий лю́дем испроси́.

Ин тропа́рь свято́му Патриа́рху Ти́хону, глас 3:

В годи́ну тя́жкую Бо́гом избра́нный/ в соверше́нней свя́тости и любви́ Бо́га просла́вил еси́,/ во смире́нии вели́чие, в простоте́ и кро́тости си́лу Бо́жию явля́я,/ положи́л еси́ ду́шу за Це́рковь, за лю́ди своя́,/ испове́дниче свя́те Патриа́рше Ти́хоне,/ моли́ Христа́ Бо́га,/ Ему́же сораспя́лся еси́,// и ны́не спасти́ зе́млю Ру́сскую и па́ству твою́.

На у́трени

По 1-м стихосло́вии седа́лен, глас 3.

Подо́бен: Красоте́ де́вства:

Красоту́ Правосла́вия возлюби́вше, отцы́ святи́и,/ зако́нов ра́ди оте́ческих подвиза́тися вожделе́ли есте́/ и, от коне́ц земли́ Ру́сския сте́кшеся,/ я́ко наро́да церко́внаго избра́нницы лу́чшии,/ дея́ния церко́вная учини́ли есте́./ Те́мже похвалу́ ны́не смире́нно вам прино́сим,/ свети́льники ве́ры имену́юще,/ и, дивя́щеся терпе́нию ва́шему во страда́ниих, взыва́ем си́це:/ ра́дуйтеся, дре́вних му́чеников ревни́телие и подража́телие.

Сла́ва, и ны́не, Богоро́дичен:

Милосе́рдому заступле́нию и мно́жеству чуде́с Твои́х/ страда́льцы, во у́зах су́щии, удиви́шася, Де́во Богоро́дице,/ посреде́ бо го́рьких бед покро́вом Твои́м храни́ми/ и благода́тию Твое́ю све́тло утеша́еми,/ моли́твами, я́же к Тебе́, укрепля́хуся./ Те́мже и глас а́нгельский приноша́ху Ти:/ ра́дуйся, Благода́тная.

По 2-м стихосло́вии седа́лен, глас 2.

Подо́бен: Благоутро́бия су́щи:

Благоутро́бия Бо́жия не разуме́вше,/ лю́дие Ру́сскии от Го́спода отступи́ша,/ ты же, святы́й Патриа́рше, призыва́л еси́ зако́ны Христо́вы храни́ти,/ в ни́хже и сам день и нощь усе́рдне подвиза́лся еси́./ Те́мже днесь соше́дшеся, си́це вопие́м:/ ра́дуйся, святи́телю Ти́хоне, ли́ка но́вых му́чеников нача́льниче.

Сла́ва, и ны́не, Богоро́дичен:

Гони́мых су́щи прибе́жище, Богоро́дице,/ Це́рковь Ру́сскую от бед огради́,/ на ча́да ея́, Тебе́ моля́щаяся, при́зри/ и дела́ на́ша, во сла́ву Бо́жию начина́емая, благослови́./ На Тя бо упова́юще, с наста́вники на́шими, новому́ченики и испове́дники, вопие́м Ти:/ ра́дуйся, Пречи́стая Де́во.

Велича́ние:

Велича́ем вас,/ святи́телю о́тче Ти́хоне/ и святи́и отцы́ Собо́ра Це́ркве Ру́сския,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.

Псало́м избра́нный:

Бог нам прибе́жище и си́ла.

Го́споди, воздви́гни си́лу Твою́ и прииди́, во е́же спасти́ нас.

Тебе́ ра́ди умерщвля́емся весь день, вмени́хомся я́ко о́вцы заколе́ния.

Кре́пость моя́ и пе́ние мое́ Госпо́дь, и бысть мне во спасе́ние.

По полиеле́и седа́лен, глас 8.

Подо́бен: Повеле́нное та́йно:

Повеле́нное в Ева́нгелии начерта́в в ра́зуме,/ в ри́зы свяще́нныя, я́ко любя́й Христа́, обле́клся еси́, святи́телю Ти́хоне;/ сказу́я па́стве сло́во утвержде́ния,/ учи́л еси́ Це́ркве ра́ди живота́ не щади́ти и да́же до сме́рти во и́стинней ве́ре стоя́ти,/ ю́же сло́вом моли́твенным и кре́стным по́двигом утверди́в,/ с новому́ченики на Небесе́х взыва́еши:/ Пресвята́я Тро́ице, Бо́же наш, сла́ва Тебе́.

Сла́ва и ны́не, Богоро́дичен:

Беззако́нное та́йно содева́юще истяза́ние,/ вину́ небы́вшую святы́м подпису́ют мучи́телие,/ но сокрове́нная вся я́ве зрит Госпо́дь,/ приклони́вый сни́тием к лю́дем Небеса́,/ и ве́чною сла́вою свиде́тели Своя́ одева́ет,/ Ма́тери Его́ Пречи́стей в ско́рбех вопию́щия:/ Засту́пнице на́ша и наде́ждо, ра́дуйся, Неве́сто Неневе́стная.

Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.

По 50-м псалме́ стихи́ра, глас 6:

Многострада́льнии Руси́ Святы́я моли́твенницы,/ мно́гия ду́ши заблу́ждшия ко Христу́ обрати́вшии,/ новому́ченицы, испове́дницы и пра́ведницы,/ Патриа́рха Ти́хона самови́дцы и послу́шницы,/ заве́том того́ ве́рно после́довавшии,/ лише́ния и ско́рби претерпе́вшии,/ моли́теся ны́не о чту́щих ве́рою и любо́вию// собо́рную па́мять ва́шу.

Кано́н, глас 6.

Песнь 1.

Ирмо́с: Жезло́м проро́ка разсече́ся/ дре́вле мо́ре Чермно́е,/ прехожде́ние волн разделя́я та́инственно/ в поги́бель во́инству мучи́телеву, ве́рным же во спасе́ние,/ песнь богокра́сную воспева́ющим:// сла́вно просла́вися Христо́с Бог наш.

Припе́в: Святи́и отцы́ на́ши, моли́те Бо́га о нас.

Мгло́ю безбо́жия помрачи́ся Русь Правосла́вная, отступи́ша бо мно́зи от ве́ры оте́ческия и отпадо́ша Небе́снаго Ца́рствия. Оба́че Госпо́дь украси́ Це́рковь на́шу, и́менем Патриа́рха Ти́хона нарица́емую, со́нмом му́чеников и испове́дников Свои́х.

Смотре́ние Бо́жие утаи́ся от люде́й, умо́м помраче́нных, ю́зником ца́рственным руга́ющихся; егда́ же слух убие́ния царе́ва ве́рных дости́же, Патриа́рх со отцы́ Свяще́ннаго Собо́ра моли́тву сотвори́ша, со дерзнове́нием злоде́йство облича́юще.

О святи́телю Влади́мире, пра́ведный и тве́рдый душе́ю, ве́рный сы́не Це́ркве Ру́сския! Убие́ние твое́ у стен оби́тели Киево-Пече́рския положи́ нача́ло поминове́ния собо́рнаго но́вых му́ченик. Ны́не же, Престо́лу Бо́жию предстоя́, моли́ся Го́сподеви спасти́ и просвети́ти ду́ши на́ша.

Святи́тель Пе́рмский Андрони́к да почти́тся, ве́ры Христо́вы свети́льник горя́й, самоде́ржцу отве́рженну сострада́лец ве́рный, па́ствы своея́ учи́тель усе́рдный, му́ченик, еще́ жив сый, в земли́ погребе́нный, и, я́ко зе́рно пшени́чное, плод стори́цею принесы́й.

Заключе́ние темни́чное Андрони́ково слы́шавше, мучениколю́бцы святи́тель Васи́лий Черни́говский, и Матфе́й, пе́рмских па́стырей воспита́тель, и Алекси́й, ве́ры Христо́вы побо́рник, повеле́ние собо́рное потща́шася испо́лнити об изъявле́нии убие́ния священному́ченика Пе́рмскаго. Последи́ же за ве́рность и любо́вь к собра́ту своему́ му́ченических венце́в сподо́бишася.

Святи́телю Христо́в Гермоге́не, гра́да Сара́това в ве́ре утвержде́ние, тобо́льския па́ствы му́дрый наста́вниче, безбо́жных преда́телей же и крамо́льников обличи́телю. Ты, ца́рственныя ю́зники кресто́м на страда́ния проро́чески благослови́в, сам смерть му́ченическую чрез утопле́ние прия́л еси́.

Варлаа́ме пречу́дне, и́ноков похвало́ и благочи́ния церко́внаго ревни́телю! Ты я́ко Афо́н други́й Бе́лую го́ру показа́л еси́, и преде́лы Ура́льския по́двиги твои́ми благода́тно освяти́л еси́. Му́ченический же вене́ц прие́м, ны́не моли́твами твои́ми оби́тель твою́ укрепля́еши.

Богоро́дичен: Я́ко апо́столов иногда́, успе́ние Твое́ чад Це́ркве Ру́сския собра́, Введе́ние же Твое́ богоизбра́ннаго Патриа́рха во храм Госпо́день введе́, от всех воспева́емая, Преблага́я Ма́ти Бо́га на́шего.

Песнь 3.

Ирмо́с: На тве́рдем ве́ры Твоея́ ка́мени/ помышле́ние утверди́в души́ моея́, утверди́, Го́споди:/ Тя бо и́мам, Бла́же,// прибе́жище и утвержде́ние.

Благоче́стие на Руси́ погуби́ти возжеле́вше, сло́ву гро́зному Патриа́рха гони́телие не внима́ху и но́вых му́ченик кровь пролива́ху, оба́че сия́ яви́ся Це́ркве Ру́сския утвержде́ние.

Да почти́м, ве́рнии, святи́теля Ти́хона, печа́льника гони́мых и па́ствы ру́сския утвержде́ние, и́же, власти́тели злы́я облича́я и поги́бель тем предрека́я, за стра́ждущих и во у́зах су́щих небоя́зненно предста́тельствует.

Тща́ние и благонра́вие твое́ в де́лех церко́вных уве́дев, священному́чениче сла́вне Лавре́нтие, архиере́я тя святи́тель Ти́хон поставля́ет, оба́че же без ми́лости гони́ма тебе́ ви́дя, судия́м непра́ведным возопи́: за ку́ю вину́ чи́стаго на смерть осуди́сте?

Христо́ви свиде́телие и пропове́дницы святи́телие Ефре́м со Никола́ем, му́ки прие́мше, ра́дуются ны́не на Небеси́, с ни́миже и ты́сящи ве́рных сликовству́ют, я́ко не убоя́шася заступи́ти отцы́ своя́ пред гони́тели.

Му́жество и кре́пость почти́м, бра́тие, святи́телей Митрофа́на Астраха́нскаго и Плато́на Ре́вельскаго, и́же лю́тых страда́ний не уклони́шася, но муче́ние и убие́ние му́жественно претерпе́ша.

Прича́стницы Страсте́й Христо́вых яви́стеся, святи́и Ти́хоне Воро́нежский и Сильве́стре О́мский, я́ко даде́ся вам благода́ть, не то́чию во Христа́ ве́ровати, но и по Нем страда́ти.

О священному́чениче Си́моне, благоле́пия дре́вняго ревни́телю, единове́рия дру́же и еди́нства Це́ркве Ру́сския побо́рниче! Дерзнове́нною твое́ю моли́твою, я́ко друг Христо́в, ра́ны церко́вныя уврачу́й.

Богоро́дичен: Братоуби́йство крова́вое слы́шавше, не́цыи, я́ко безу́мнии, реко́ша: несть Бог. Оба́че попече́нием Христа́ Жизнода́вца и моли́твами Ма́тере Его́ Пресвяты́я врата́ а́дова Це́рковь Ру́сскую не одоле́ша.

Седа́лен, глас 2:

Но́вии страстоте́рпцы Це́ркве Ру́сския,/ му́ченически по́прище земно́е сконча́вшии и страда́ньми дерзнове́ние ко Го́споду приобре́тшии,/ моли́теся Ему́, вас укре́пльшему,/ да и мы, егда́ на́йдет на ны испыта́ния час,/ му́жества дар Бо́жий восприи́мем.

Сла́ва, и ны́не, Богоро́дичен, глас 4:

Не премолчи́м при́сно, Богоро́дице Де́во,/ благода́рственно воспева́ти от се́рдца Твоя́ ми́лости, Влады́чице, раби́ Твои́,/ вопию́ще и глаго́люще:/ Пресвята́я Де́во, предвари́, и изба́ви нас от враг ви́димых и неви́димых,/ и от ну́жды и вся́каго преще́ния,/ Ты бо еси́ на́ше заступле́ние.

Песнь 4.

Ирмо́с: Удиви́ся Твой ра́зум от Мене́,/ услы́шавшу пресла́вная вели́чия смотре́ния Твоего́,/ укрепи́ся же возлюбле́нием Твоего́ схожде́ния:// Ты бо моея́ нищеты́ не отве́рглся еси́.

О свя́те Патриа́рше наш Ти́хоне! Ка́ко досто́йно ублажи́м ве́рность тебе́ сохра́ньших, егда́ лжепа́стырие, гони́тельми науща́емии, я́ко власти́телие зако́ннии в Це́ркви, твоего́ отрече́ния иска́ху?

Гла́ду бы́вшу во Оте́честве на́шем, от братоуби́йства погиба́ющем, па́стыри увещава́л еси́, святи́телю Ти́хоне, Го́спода умоля́ти, да омы́ется земля́ Ру́сская слеза́ми покая́ния и Святы́ми Та́йнами да обнови́тся.

У́зы и суди́ще, заплева́ние и клеветы́, преда́тельство и суде́й лука́вых сме́ртное изрече́ние претерпе́в, о Це́ркви и па́стве боле́зновал еси́, святи́телю Петрогра́дский Вениами́не, му́ченики возлюби́вый изде́тска. С ни́миже ны́не Бо́га прославля́еши.

Мона́шество и свяще́нство в час испыта́ния Це́ркве Ру́сския прия́ти не убоя́вся, о́тче богому́дре Се́ргие, священному́ченика Вениами́на сподви́жник ве́рный яви́лся еси́. С ни́мже и осужде́ние непра́ведное и смерть му́ченическую претерпе́л еси́.

Похвало́ Солове́цкая, священному́чениче Иларио́не, Це́ркве Ру́сския свети́льниче, Патриа́рха Ти́хона ве́рный спобо́рниче, крамолы́ лжеобнови́телей ре́вностный обличи́телю, исцели́ и ны́не ра́ны церко́вныя.

Преподо́бне о́тче Алекси́е, наста́вников духо́вных насле́дниче, уче́ний святооте́ческих сокро́вищнице и мно́гих му́ченик воспита́телю! Не преста́й Зоси́мову пу́стынь храни́ти и мона́шество правосла́вное в по́двизех духо́вных утвержда́ти.

Не солга́ся проро́чество преподо́бнаго Амвро́сия, ста́рца оби́тели О́птинския: прее́мник бо его́ Исаа́кий разоре́ния тоя́ самови́дец быва́ет и, крест свой му́жественне прие́м, в годи́ну лю́тую сме́рти за Христа́ сподобля́ется.

Богоро́дичен: Кня́зю ми́ра, порабо́тити Це́рковь тща́щуся, да́же до уз и сме́рти противоста́ша отцы́ святи́и и все упова́ние свое́ по Бо́зе на Де́ву Пречи́стую возложи́ша.

Песнь 5.

Ирмо́с: Свет и мир Твой, Христе́,/ рабо́м Твои́м пода́ждь, Бла́же:/ Ты бо еси́ всех мир,/ и сою́з любве́, Человеколю́бче,/ Тя позна́вшим у́тро све́тлое,// и Влады́ку вои́стину, и Го́спода.

Собо́рное веле́ние исполня́я, святы́й Патриа́рх прее́мники себе́ указу́ет, в та́йне завеща́ние храня́ да́же до вре́мене преставле́ния своего́, и сим показу́ет лжесобо́ров бе́гати, созыва́емых веле́нием вла́сти безбо́жныя.

Умира́ние тя́жкое за Це́рковь Ру́сскую на всяк день претерпева́л еси́, Патриа́рше Ти́хоне, мно́гажды от безбо́жных искуша́емь, но чист от греха́ яви́лся еси́, па́ству от волко́в соблюды́й непоро́чно.

Пра́ведно и благоче́стно жити́е твое́ бысть, святи́телю Кири́лле. А́ще и во изгна́нии мно́гая ле́та пребы́л еси́, оба́че собра́тий твои́х утверди́л еси́ на ка́мени ве́ры Христо́вы, смерть же твоя́ в земли́ пусты́нней му́ченичество за ве́ру правосла́вную яви́ся.

Ле́стию и нече́стием тща́щимся премени́ти ве́ру святу́ю оте́ческую противуста́л еси́ небоя́зненно, свя́те Агафа́нгеле, сего́ ра́ди изгна́н был еси́, да уве́дят ве́рнии, я́ко вре́мя приспе́ за пра́вду Христо́ву страда́ти.

О кре́посте несокруши́мая, святи́телю о́тче Пе́тре! Страда́нием бо лю́тым Це́рковь Ру́сскую от раско́ла храни́л еси́, я́ко ве́рный до сме́рти Патриа́рха Ти́хона послу́шник, не вне́мля глаго́лом мучи́телевым зову́щим, е́же сни́ти со креста́.

О вели́кая оби́теле Солове́цкая, коли́ко новому́ченик в стена́х твои́х по́двиг понесо́ша и страда́ния прия́ша! От ни́хже святы́х отце́в Собо́ра ны́не восхва́лим: после́дняго настоя́теля Вениами́на, в пустынножи́тельстве от злоде́ев убие́ннаго, архиере́и Евге́ния и Васи́лия, еще́ же Михаи́ла пресви́тера и ины́я, и в богосло́вцех изря́дна, сим спострада́вша, му́ченика Иоа́нна.

Колькра́ты беззако́ннии иска́ху уби́ти тя, святи́телю Иоа́нне, чистоты́ Правосла́вия ревни́теля, раско́ла ху́льнаго пе́нзенскаго обличи́теля, земли́ Латви́йския те́плаго моли́твенника, в не́йже му́ченичества венце́м украси́лся еси́.

Богоро́дичен: Слу́жбу Бо́жию в ме́стех потае́нных и́же за ве́ру страда́льцы соверша́юще, о́браз Твой, на дщи́цах и ка́менех ма́лых пи́санный и на холсте́х истка́нный, о Богома́ти, я́ко зе́ницу о́ка храня́ху и благогове́йне Тя почита́ху.

Песнь 6.

Ирмо́с: Зве́рю бе́здны предае́тся/ проро́к Ио́на, глубине́ морско́й,/ прообразу́я Твое́, Сло́ве, тридне́вное воста́ние,/ тем и взыва́ше:/ из глубины́ преиспо́дния// возведи́ живот мой, Благоутро́бне.

В ле́то три́десять седьмо́е ве́ка го́рькаго ве́лие губи́тельство на Руси́ бысть, и о́ви лю́дие наси́льством умро́ша, о́ви же в го́рьких рабо́тах погибо́ша. Те́мже, ве́рнии, моли́твенно просла́вим та́ко уму́ченныя сподви́жники святи́теля Ти́хона Патриа́рха.

Дре́вле в ко́емждо гра́де Руси́ едва́ еди́н мучи́тель обрета́шеся. Ка́ко же в ле́та гоне́ния безбо́жнаго толи́ка тьма душегу́бцев во́льных воста́? Ка́ко сы́нове а́довы сме́рти преда́ти святы́я во́ины Христо́вы не устраши́шася?

В земли́ Зыря́нстей, во гра́де скорбе́й зе́льных, го́рьких рабо́т, гла́да и уничиже́ния, мно́гия му́ки претерпе́л еси́, священному́чениче Анато́лие, архиере́ю Оде́сский, о ни́хже по́слежде самови́дцы с пла́чем пове́даша, ве́рность твою́ Ева́нгелию свиде́тельствующе.

Сама́рския преде́лы, в ни́хже до́бльственно потруди́лся еси́, ны́не с на́ми сла́вят мно́гая страда́ния твоя́, архипа́стырю Алекса́ндре, засту́пниче и прибе́жище гони́мых, я́ко Христа́ ра́ди и смерть прия́л еси́ за дру́ги своя́.

Житие́м и словесы́ Христа́ пропове́дал еси́, Серафи́ме священному́чениче преди́вный, в преде́лех Хо́лмских, Орло́вских и Смоле́нских му́дростию и любо́вию па́ству уча́ и от собла́зн огражда́я. Те́мже вене́ц тебе́ терно́вен исплете́ся.

Градо́в Росси́и Вели́кия и Ма́лыя пропове́дницы, Патриа́рха же Ти́хона сы́нове ве́рнии, святи́телие Никоди́м и Проко́пий досто́йно да почту́тся, и́же по́двиг служе́ния архиере́йскаго, сугу́бейший по́двига, всем ве́рным о́бщаго, му́ченичеством увенча́ша, я́ко богому́дрии.

Священноиспове́дника пресви́тера Василия почти́м, во изгна́нии в преде́лех Арха́нгельских живо́т сконча́вша, свяще́нники же Госпо́дни просла́вим, Илию́, сострада́льца Фадде́ю, Тверско́му архипа́стырю, Константи́на же, Во́логды моли́твенника, убие́нныя в годи́ну, крове́й испо́лнену.

Богоро́дичен: Законопресту́пен и сме́рти пови́нен, реко́ша на Сы́на Твоего́ челове́цы нечести́вии, Ему́же сострада́ла еси́, Богороди́тельнице Пречи́стая, та́кожде и оклевета́нныя служи́тели Его́, я́ко Ма́ти Благоутро́бная, утеша́ла еси́.

Конда́к, глас 3:

Гоне́ния и страда́ния да́же до сме́рти претерпева́юще/ и правосла́внаго ца́рства Ру́сскаго разоре́ние облича́юще,/ отцы́ Собо́ра Це́ркве на́шея/ к покая́нию ча́да ве́рная призыва́ют// и стоя́ти тве́рдо за ве́ру Христо́ву благословля́ют.

Ин конда́к, свято́му Патриа́рху Ти́хону, глас 5:

Служе́ние твое́ испо́лнено сто́на и го́ря,/ священному́чениче Ти́хоне, Патриа́рше наш,/ но был еси́ пра́вило ве́ры и о́браз кро́тости,/ побежда́я ра́спри и разделе́ния;/ си́лою смире́ния и любве́ Христо́вы противоста́л еси́ зло́бе сатани́нстей,/ возгла́вил еси́ до́брое во́инство но́вых му́чеников,// Це́рковь Ру́сскую утверди́вших во ве́ки.

И́кос:

Хотя́й Госпо́дь ве́рныя подви́гнути к прославле́нию по́двига святы́х новому́чеников и испове́дников Це́ркве Ру́сския, дом Бо́жий, святи́телем Влади́миром созда́нный и от безбо́жных в годи́ну лю́тых гоне́ний пору́ганный, благоле́пно па́ки возставля́ет, подвиза́я в нем ико́ну святы́х отце́в Свяще́ннаго Собо́ра изобрази́ти, я́ко да ли́ки их ви́дяще, поуча́ются в по́вестех дея́ний сла́вных и страда́ний безме́рных всех, свято́му Патриа́рху Ти́хону после́дующих и и́менем того́ в годи́ну гоне́ний нарица́емых. И́хже по́двигом мир в Це́ркви на́шей утверди́ся.

Песнь 7.

Ирмо́с: О́троцы в Вавило́не дре́вле/ во огни́ не опали́шася,/ на му́ки бо дерзну́вше за ве́ру оте́ческую,/ в о́ней непоколе́блеми пребы́ша,/ и зре́ти Го́спода и пе́ти Тому́ сподо́бишася:// Изба́вителю Бо́же, благослове́н еси́.

На ме́сте, иде́же ны́не храм новому́чеников Бу́товских устро́ися, три́десять ты́сящ ю́зник в ле́та зла́я убие́ни бы́ша, и́же, на смерть за Христа́ ведо́ми, ве́рою взыва́ху: Бо́же, благослове́н еси́.

Списа́теля жития́ Саро́вскаго чудотво́рца священному́ченика Серафи́ма днесь восхва́лим, и́же, в боле́зни сый и ста́рости масти́тей, вскрай ро́ва Бу́товскаго мучи́тели приво́дится и убие́ние неви́нно прие́млет, воспева́я: Изба́вителю Бо́же, благослове́н еси́.

Ве́рность храня́ святи́телю Петру́, в скита́нии нево́льнем су́щему, страда́ния мно́гая претерпе́л еси́, архипа́стырю гра́да Влади́мира, свя́те Нико́лае, те́мже и виде́ние ли́ка твоего́ ве́рным бысть утвержде́ние. Ты же, смерть за Христа́ до́блественне прия́ти угото́вився, взыва́л еси́: Бо́же, благослове́н еси́.

Днесь почти́тся и пресви́тер Се́ргий, слу́жбы Бо́жия усе́рдный рачи́тель, на путь свяще́нства Патриа́рхом Ти́хоном благословле́нный, и́же, красото́ю слове́с церко́вных окриля́емь, посреде́ гоне́ния лю́таго до́бре ше́ствова и, му́ченичества дости́гнув, благода́рственно Христу́ воззва́: Изба́вителю Бо́же, благослове́н еси́.

В прему́дрости кни́жней ум изостри́в, некни́жному ученику́ Петру́, верхо́вному апо́столу, подража́ти потща́лся еси́, Иоа́нне, служи́телю престо́ла Бо́жия, глас же ева́нгельский, е́же отве́ргнутися себе́ и взя́ти крест свой, услы́шав, со дерзнове́нием на по́двиг му́ченический устреми́лся еси́, зовы́й: Христе́, Спа́се ми́ра, благослове́н еси́.

Се́ргия преподо́бнаго от ю́ности послу́шник изря́ден был еси́, а́вво Крони́де богому́дре! Ты бо, попече́ние усе́рдное о оби́тели Тро́ицтей, я́ко игу́мен, явля́я, о и́ноцех ея́ во благоде́нствии и злоде́нствии ру́це моли́твенно воздвиза́л еси́, с ни́миже ны́не во Ца́рствии Бо́жии взыва́еши: О́тче, Сы́не и Святы́й Ду́ше, благослове́н еси́.

Во Аме́рице да́льней и в первопресто́льнем гра́де Москве́ святи́телю Ти́хону помо́щника ве́рнаго, Алекса́ндра пресви́тера почти́м, близ гро́ба патриа́ршаго к му́ченичестей кончи́не при́званнаго, свинце́м устреле́ннаго и огне́м сожже́ннаго, ны́не же пою́щаго: Бо́же, благослове́н еси́.

Богородичен: О Ма́ти Бо́жия, Преми́лостивая! Кто бы возмо́гл есть из люде́й ве́рных у́зы, бие́ния, уничиже́ния и лю́тую смерть претерпе́ти, а́ще бы не Ты предстоя́ла еси́ стра́ждущим, ско́рби и страда́ния му́ченическая утоля́ющи и науча́ющи пе́ти: Спаси́телю, Христе́ Бо́же, благослове́н еси́.

Песнь 8.

Ирмо́с: Преподо́бнии Твои́ о́троцы/ в пещи́ Херуви́мы подража́ху,/ Трисвяту́ю песнь воспева́юще:/ благослови́те, по́йте// и превозноси́те во вся ве́ки.

Ве́лия страда́ния претерпе́ли есте́, Оте́чества на́шего церко́внии избра́нницы, вы бо вои́стину яви́лися есте́ я́ко соль земли́ Ру́сския и утвержде́ние ве́ры правосла́вныя в ней во ве́ки.

Се́рдце твое́, о Русь Свята́я, про́йде ору́жие во́ев герма́нских, твоя́ преде́лы плени́ти восхоте́вших, оба́че сы́нове твои́, жизнь за тебе́ положи́вшии, вку́пе со страда́льцы, во у́зах уму́ченными, Христу́ песнь но́ву воспева́ют во ве́ки.

Исчи́слил еси́ дни страда́ний и сострада́льцев имена́, суды́ Бо́жия благослови́в, святи́телю Афана́сие, зане́, во у́зах сый, святы́х ру́сских иску́сный песносло́вец яви́лся еси́, о новому́ченицех же почи́вших моли́твенник усе́рдный, с ни́ми Бо́га сла́виши во вся ве́ки.

Юне́йший от отце́в Собо́ра Це́ркве Ру́сския в пещи́ гоне́ний искуша́емь быва́ет и я́ко исто́чник богому́дрых уче́ний в земли́ Влади́мирстей явля́ется, священноиспове́дник Великодво́рский Петр, любве́ Христо́вы испо́лненный, я́же не изся́кнет во ве́ки.

Вся по и́мени помяну́вше отцы́ святы́я, в ли́це новому́ченик просла́вленныя, и о про́чих моли́твы вознесе́м ко Го́споду, и́хже жития́ и по́двизи безве́стни суть, да ми́лость улуча́т от Бо́га, созда́вшаго ве́ки.

Мо́щи твоя́ огне́м откры́шася, святи́телю о́тче Ти́хоне, Патриа́рше святы́й, оба́че обря́щем ли мо́щи мно́гих сподви́жник твои́х, в ме́стех безве́стных и непрохо́дных погребе́нных, и́хже па́мять нетле́нна во ве́ки?

Богоро́дичен: И́мже пе́ние надгро́бное никто́же принесе́, Сама́ предста́ла еси́, Чи́стая, с ли́ки а́нгельскими; и́мже беззако́нное мучи́тельство безве́стну кончи́ну угото́ва, Сама́ отве́рзла еси́, Препе́тая, ра́йския вхо́ды, да ца́рствуют со Христо́м во ве́ки.

Песнь 9.

Ирмо́с: Сло́вом Сло́во Еди́на Ро́ждшая,/ ерети́ческая уста́ загради́ злоре́чивая./ И́но но́во не́бо, некра́домый рай, Пречи́стая,// Тя велича́ем.

В па́мять святи́теля Ти́хона Патриа́рха соше́дшеся, ве́рнии, и вся сподви́жники его́, и́же от Собо́ра святы́х отце́в, помяну́вше, на ме́сте, иде́же ти́и бя́ху со́брани, Христа́ велича́ем.

Ерети́ческая злоре́чивая уста́ загради́вшии, святи́и отцы́ новому́ченицы, Собо́ров вселе́нских догма́ты в сердца́х ва́ших сохрани́ли есте́, те́мже вас велича́ем.

Святы́я Руси́ собо́ри преста́ша иногда́, с патриа́ршеством упраздни́вшеся вку́пе, но глас собо́рный, я́ко крин, посреде́ ка́мене прозя́бший, в годи́ну бе́дствия возвести́ся.

Уста́ми проро́к, Го́споди, Изра́иля наставля́я, лю́дем, проро́ки изби́вшим, царя́ поставля́еши; лю́дем же, правосла́внаго царя́ отве́ргшим, гоне́ния посыла́еши, да во́ли Твоея́ позна́ние покая́нием обря́щут.

Це́ркве уста́вы собо́рне определи́вше, по́слежде же сию́ гони́му ви́девше, судьба́м Бо́жиим непостижи́мым удиви́стеся, о святи́и отцы́ новому́ченицы, по́двиги свои́ми Христа́ возвели́чившии.

Нарекли́ есте́ прозорли́во, святи́и отцы́, страда́льцы за ве́ру Христо́ву новому́ченики и испове́дники Це́ркве Ру́сския и па́мять ежеле́тную сим уста́вили есте́. Ны́не же с ни́ми вку́пе велича́етеся.

О́тче, Сы́не и Ду́ше Всесвяты́й, при́зри с Небесе́ на Це́рковь Ру́сскую, в пра́вой ве́ре сию́ соблюди́, да и мы, ча́да ея́, вои́стину Тя велича́ем.

Богоро́дичен: Догма́ты храни́ти и за́поведи Христо́вы с любо́вию твори́ти наста́ви нас, Богоневе́сто Влады́чице, да и мы, ве́ру непоро́чно соблю́дше, в Ца́рствие Бо́жие вход улучи́ти возмо́жем.

Свети́лен:

Свет Отца́, и Сы́на, и Ду́ха Свята́го/ всели́ся в ду́шы ва́ша, о святи́и отцы́ Свяще́ннаго собо́ра, новому́ченицы и испове́дницы,/ сего́ ра́ди па́мять ва́шу со святи́телем Патриа́рхом Ти́хоном вку́пе прославля́ем.

Сла́ва, и ны́не, Богоро́дичен:

Свет Христо́в яви́ся всем Тобо́ю, Ма́ти Де́во,/ всели́ся бо во утро́бу Твою́ Сло́во па́че сло́ва,/ сего́ ра́ди род наш пе́сньми немо́лчными Тя велича́ет.

На хвали́тех стихи́ры, глас 5.

Подо́бен: Ра́дуйся:

Ра́дуйся, святи́телю о́тче наш Ти́хоне,/ па́че жи́зни па́ству твою́ возлюби́вый/ и ду́шу твою́ за ча́да церко́вная положи́вый,/ к нимже со ско́рбию тя́жкою взыва́л еси́:/ се́рдце мое́ гори́т жа́лостию до сме́рти:/ очи́ститеся, бра́тие, от грехо́в свои́х,/ и бу́дем вку́пе моли́ти Го́спода:// О́тче наш, оста́ви нам до́лги на́ша.

Ра́дуйся, святы́й Патриа́рше наш Ти́хоне,/ ты бо, Це́рковь Ру́сскую на по́двиг Христо́в укрепля́я/ и но́вое во́инство Христо́во cобира́я,/ ве́рою, любо́вию и кро́тостию/ зло́бу вра́жию побежда́ти науча́л еси́/ и во смире́нии си́лу Бо́жию стяжа́ти наставля́л еси́./ Бу́ди и нам ны́не воево́да взбра́нный,/ мо́лим тя, па́стырю наш до́брый,// и не оста́ви чад Твои́х во ве́ки.

Глас и подо́бен то́йже.

[Творе́ние святи́теля Афана́сия Ковро́вскаго:]

Прииди́те, Небе́снии предста́телие на́ши, к нам,/ ва́шего тре́бующим ми́лостивнаго посеще́ния,/ и изба́вите ны, озло́бленныя мучи́тельскими преще́нии,/ лю́таго неи́стовства безбо́жных,/ от ни́хже я́ко пле́нницы и на́зи гони́ми есмы́,/ от ме́ста на ме́сто ча́сто преходя́ще,/ и заблужда́юще в верте́пех и гора́х./ Уще́дрите у́бо, прехва́льнии,/ и да́руйте нам осла́бу,/ утоли́те бу́рю,/ и угаси́те е́же на ны негодова́ние,/ Бо́га моля́ще,// подаю́щаго ва́ми земли́ на́шей ве́лию ми́лость.

И́ны стихи́ры, глас 4.

Подо́бен: Дал еси́ зна́мение:

В па́мять святы́х отце́в соше́дшеся,/ на ме́сте, иде́же ти́и бя́ху со́брани/ в годи́ну испыта́ний земли́ Ру́сския,/ воспои́м Христо́вых во́инов полк,/ бра́тство же свято́е,/ строи́телей де́ла церко́внаго,/ страда́льцев за ве́ру лик Небе́сный,/ и сим наста́вником на́шим да подража́ем,// ду́хом и и́стиною их почита́юще.

О, неизрече́ннаго Твоего́ смотре́ния, Христе́!/ Ка́ко жи́зни церко́вныя устрои́телие/ плач Иереми́ин восприе́млют,/ хра́мы зря́ще разруша́емы?/ Ка́ко святи́телие и иере́и/ от престо́лов Бо́жиих во узи́лища отсыла́ются/ и та́мо, я́коже на река́х Вавило́нских,/ о служе́нии сле́зы пролива́ют?/ О, неизсле́димых суде́б Твои́х, Христе́,// и́миже спасе́ние душ на́ших содева́еши!

Взыгра́йте, лю́дие,/ в день па́мяти Христо́вых страда́льцев,/ и́хже ра́ди ве́ра не поги́бе,/ но па́ки процвете́ в земли́ на́шей./ Те́мже и мы, в дом Бо́жий соше́дшеся,/ с любо́вию возопии́м:/ моли́теся о нас,/ отцы́ святи́и,// да проба́вит Госпо́дь нам ми́лость Свою́.

Сла́ва, глас 1:

О святи́и отцы́, мно́гих церко́вных дел устрои́телие,/ вы, главу́ правосла́вных явля́юще,/ патриа́ршество возста́висте,/ пра́здник Ру́сских святы́х ра́достне возобнови́сте,/ но́вых му́чеников па́мять учини́сте,/ па́стве Це́ркве Ру́сския путь по́двига испове́днаго указа́сте/ и на защище́ние святы́нь церко́вных и па́стырей гони́мых вся призва́сте,/ по́слежде же и са́ми крест му́ченичества прия́сте./ Те́мже к вам усе́рдно взыва́ем:// сподо́бите нас любве́ и ве́ры ва́шея насле́дники бы́ти.

И ны́не, глас то́йже:

Це́ркве Христо́вы Храни́тельнице,/ Ма́ти Бо́жия Пречи́стая,/ сохрани́ в чистоте́ ве́ру на́шу,/ моли́твы бо святы́х отце́в на́ших Тебе́ предлага́ем,/ зане́ ве́рная ча́да Твоя́ суть,// я́ко за́поведи Сы́на Твоего́ непоро́чне соблюдо́ша.

На Литурги́и

Блаже́нна от кано́на святы́х оте́ц, Песнь 3.-я и 6-я. Проки́мен, глас 7: Бог нам прибе́жище// и си́ла. Стих: Помо́щник в ско́рбех, обре́тших ны зело́. Апо́стол к Ри́мляном, зача́ло 99 (гл. 8, ст. 31–39). Аллилу́ия, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь. Ева́нгелие от Луки́ зача́ло 105–106 (гл. 21, ст. 8–19). Коне́ц: В терпе́нии ва́шем стяжи́те душа́ ва́ша. Прича́стен: Ра́дуйтеся, пра́веднии, о Го́споде, пра́вым подоба́ет похвала́.

Моли́тва святи́телю Ти́хону, Патриа́рху Всеросси́йскому, испове́днику

О па́стырю до́брый, святи́телю о́тче наш Ти́хоне, Патриа́рше Це́ркве Ру́сския! Ты мно́гия труды́ в жи́зни вре́менней подъя́л еси́. Простота́ и любы́ твоя́, дух ми́рен и кро́ток, та́же и сло́во, благода́ти испо́лненное, по се́рдцу бы́ша лю́дем земли́ на́шея, и́же и предложи́ша тя Бо́гу на по́двиг вели́кий и многотру́дный. Егда́ же богобо́рцы и хули́телие воздвиго́ша на Це́рковь Христо́ву гоне́ние, ему́же не бе ра́внаго от ве́ка, Сам Госпо́дь Вседержи́тель избра́ и соде́ла тя Патриа́рха. Ты же, святи́телю, сраспина́яся Христу́ и Це́ркви Его́, со ско́рбию лю́ди к покая́нию призыва́л еси́. И кто изочте́т страда́ния твоя́? Заточе́ние бо темни́чное, клеветы́ и суды́ гони́телей со смире́нием претерпева́я, враго́м Христо́вым моли́твою сле́зною и кро́ткою противуста́л еси́ и архиере́и, пресви́теры, мона́хи и мирски́я на по́двиг му́ченический благослови́л еси́. Те́мже мо́лим тя, святи́телю Христо́в, бу́ди нам дерзнове́нный засту́пник и не оста́ви ны, немощна́я ча́да твоя́. Испроси́ у Го́спода нам грехо́в проще́ние, ве́ры утвержде́ние, скорбе́й осла́бу, по́мыслов чистоту́, да, в покая́нии и моли́тве пребыва́юще, украси́м себе́ целому́дрием, любо́вию и смире́нием, и та́ко Ца́рствия Небе́снаго дости́гнем, иде́же с тобо́ю сподо́бимся прославля́ти Святу́ю Тро́ицу, Отца́, и Сы́на, и Свята́го Ду́ха. Ами́нь.

И́на моли́тва, святы́м отце́м, на Собо́ре Це́ркве Ру́сския потруди́вшимся

О святи́и уго́дницы Бо́жии, со́нма но́вых му́чеников и испове́дников Це́ркве Ру́сския прича́стницы, на Собо́ре Це́ркве Ру́сския в годи́ну ско́рби до́бре потруди́вшиися и му́жески за ве́ру Христо́ву в ле́та гоне́ния лю́таго пострада́вшии! Помина́юще труды́ на ни́ве Бо́жией, ва́ми подъя́тыя, и по́двиги во страда́нии за ве́ру сверше́нныя, славосло́вим доброде́тели ва́ша, воспева́ем братолю́бие, прославля́ем любо́вь ко Спаси́телю Христу́ и Це́ркви Его́ Святе́й, и, я́ко ча́да ва́ша по ду́ху, мо́лим: научи́те нас ра́зум ева́нгельский приле́жне стяжа́ти, на вся́кое де́ло благо́е потре́бен, помози́те во испыта́ниих кре́пость ве́ры име́ти, сподо́бите нас насле́дники по́двига ва́шего бы́ти, да неосужде́нно Ца́рствия Бо́жия дости́гнем, иде́же ку́пно с ва́ми просла́вим Тро́ицу Единосу́щную во ве́ки веко́в. Ами́нь.

Стихи́ры, пое́мыя по обы́чаю в 5-й день ноября́ в домо́вом хра́ме святы́х отце́в Поме́стнаго Собо́ра в Моско́встем епархиа́льнем до́ме

На Го́споди, воззва́х: стихи́ры, глас 1:

Избра́нный на путь кре́стный и испове́дный,/ святы́й Патриа́рх да восхва́лится днесь,/ и́же с па́ствою свое́ю ча́шу му́ченичества испи́ за ве́ру правосла́вную,/ воззове́м ему́: святи́телю о́тче наш Ти́хоне,/ прииди́ и осени́ благослове́нием Небе́сным// Бо́гом со́бранныя лю́ди твоя́.

Во́йны и глад и крова́вая сму́та/ жре́бий твой тя́жкий, святи́телю наш!/ Ты же, в покая́нии путь спасе́ния нам указу́я, звал еси́ озло́бленныя:/ возлюби́те бли́жняго своего́,// обрати́теся ко Го́споду и спасе́теся.

Взыва́ю к вам, архипа́стырие и па́стырие,/ веща́л еси́, свя́те Ти́хоне, Патриа́рше наш:/ сы́нове мои́ и дще́ри во Христе́, спеши́те с про́поведию покая́ния,/ противоста́ните враго́м Це́ркве си́лою ве́ры на́шея./ Зове́м вы на страда́ния вме́сте с собо́ю/ свята́го апо́стола словесы́:// кто ны разлучи́т от любве́ Бо́жия?

Страда́ния мно́гая претерпе́л еси́, о́тче Ти́хоне:/ клеветы́, суды́, заточе́ния,/ преда́тельства лжебра́тий и угро́зы сме́ртныя,/ наси́льства и нападе́ния враго́в Це́ркве Христо́вы;/ но ты пребы́л еси́ му́жествен и кро́ток, веща́я:/ не ожесточа́йте серде́ц ва́ших,// но возмога́йте о Го́споде!

На стихо́вне стихи́ры, глас 1.

Подо́бен: Небе́сных чино́в:

Во́ли Бо́жия пра́ведный иска́телю и побо́рниче,/ о́тче Ти́хоне, моли́твенниче пла́менный за Це́рковь и зе́млю Ру́сскую,/ любве́ Христо́вы святы́й и кро́ткий подви́жниче,/ засту́пниче безстра́шный неви́нно стра́ждущих!/ Проро́честв твои́х ви́дехом стра́шное сбытие́.// Моли́ спасти́ся душа́м на́шим.

Стих: Го́споди, Госпо́дь наш,// я́ко чу́дно и́мя Твое́ по всей земли́.

Простоту́, мир и кро́тость с любо́вию/ возгрева́л еси́ в се́рдце твое́м, о́тче Ти́хоне,/ моли́твою ти́хою огражда́л еси́ ста́до Христо́во// от волко́в, губя́щих е́.

Стих: Возноше́ния Бо́жия в горта́ни их,// и мечи́ обою́ду остры́ в рука́х их.

Све́тлым о́блаком страда́льцев Христо́вых,/ и́хже на по́двиг укрепи́л есть Собо́р Це́ркве Ру́сския,/ Небеса́ небе́с освяща́ют нас,/ соше́дшихся в па́мять святы́х собо́рян во храм,/ иде́же ти́и с Патриа́рхом Ти́хоном воспева́ху:// днесь благода́ть Свята́го Ду́ха нас собра́.

На хвали́тех стихи́ры, глас 5.

Подо́бен: Ра́дуйся:

Ра́дуйся, святе́йший о́тче наш Ти́хоне,/ возлюби́вый бо́льше жи́зни па́ству твою́/ и положи́вый ду́шу свою́ за Це́рковь Бо́жию, за Бо́жий наро́д,/ к нему́же со ско́рбию тя́жкою взыва́л еси́:/ се́рдце мое́ гори́т жа́лостию до сме́рти./ Очи́ститеся, бра́тие, от грехо́в свои́х/ и бу́дем вме́сте моли́ти Го́спода:/ О́тче наш,// оста́ви нам до́лги на́ша.

Ра́дуйся, святы́й Патриа́рше наш Ти́хоне,/ укрепля́я Це́рковь Ру́сскую на по́двиг Христо́в,/ cобира́я но́вое Христо́во во́инство,/ науча́я ве́рою и любо́вию/ в кро́тости побежда́ти зло́бу вра́жию,/ во смире́нии стяжа́ти си́лу Бо́жию./ Воево́да взбра́нный ны́не сно́ва бу́ди нам!/ Мо́лим, па́стырю люби́мый наш:// не оста́ви чад твои́х во ве́ки.

Источник: Текст утвержден Священным Синодом Русской Православной Церкви 15 октября 2018 г. (журнал № 85)

Месяца ноября в 7-й день

священномученика Кирилла, митрополита Казанскаго

На велицей вечерни

Блажен муж: 1-й антифон. На Господи, воззвах: стихиры, глас 8.

Подобен: О, преславнаго чудесе:

Приидите, вернии, почтим святителя Кирилла,/ благочестия твердаго поборника,/ светильника земли Русския,/ во стране пустынней днесь почившаго,/ иже, тяготу дел и горечь страданий отложив,/ на Небеси Присноживущему взывает:/ утверди, Господи, Церковь Русскую/ и низложи шатания врагов Ея,/ да людие, ходящии во тьме, видят свет велий.

Мир дольний ущедряя,/ Христос со Отцем и Духом Святым/ обитель творит во избранных Своих,/ ихже весь мир недостоин есть;/ темже избраннаго от мира воспоим,/ Кирилла, священномученика богоприятна,/ иже, сердце освятив страданием,/ тече на мучение за Церковь Христову,/ юже не возмогут врата адова одолети.

Иоанну, чудотворцу Кронштадтскому,/ иноков и пастырей наставнику,/ пение надгробное принесл еси,/ святителю Кирилле, кроткий послушниче,/ последи же, яко мученик истинный,/ Небеснаго чертога достигл еси/ и тамо отца духовнаго во славе узрел еси,/ веселящася с новыми мученики и глаголюща:/ се аз и дети, яже ми даде Бог.

Небесных граждан любителя/ прославляет тя ныне страна Тамбовская,/ в ней бо добре потрудился еси,/ святителю Кирилле, смиренный пастырю,/ и апостола ея, Питирима чуднаго,/ в лице святых прославил еси,/ Феофана же богомудраго почитая,/ тому духовне подражал еси,/ сего ради с ними купно ликуеши.

Ины стихиры, глас 6.

Подобен: Все отложше:

Отцы Собора Церкве Русския,/ Духом Святым водими,/ поставляют на престол первосвятительский/ смиреннаго Тихона, архипастыря добраго,/ не самовластием того облекающе,/ но знамение победы Божия являюще./ Темже лик новых мученик/ патриаршим именем украсися/ и в земли Русской возсия пресветло,/ от нихже и святитель Кирилл, митрополит Казанский,/ днесь нами прославляется,/ яко веры неусыпный страж/ и хранитель Дома Господня.

Светлое торжество града Казани приспе,/ с нимже вси гради земли нашея радуются/ и вся Церковь Русская красуется/ в памяти святителя Кирилла,/ архипастыря преизящнаго/ и мученика добропобедна,/ посту, молитве и богомыслию прилежащаго,/ кровию своею священную одежду обагрившаго/ и от страдания в Божественную славу пришедшаго,/ идеже со всеми святыми,/ предстоит Престолу Святыя Троицы/ и молится даровати душам нашим/ мир и велию милость.

Любодружное святое единство/ всеусердно возлюбив от юности,/ мужественне к страданию потекл еси,/ со други разлучаяся,/ обаче, ангельския крепости исполнен,/ изгнание, яко жительство безмолвное, вменил еси/ и тесное жилище, яко Горницу Сионскую,/ идеже, неустанно моляся/ и словом истины заблуждшия назидая,/ во единомыслие церковное многия привел еси/ и яко един от древних отцев просиял еси,/ величие веры являя,/ священномучениче Кирилле досточудне.

Кия страдания претерпел еси,/ киими добротами обогатился еси,/ кия венцы от Бога приял еси,/ священномучениче Кирилле терпеливодушне?/ Непостижно есть любящим тя:/ како, подобострастен нам быв человек,/ уз мирских до конца совлеклся еси/ жития ради крестнаго?/ Како, скорбьми отвсюду утесняемь,/ Именем Господним вся победил еси,/ призывая Его со дерзновением многим?/ И ныне помолися о нас, угодниче Христов,/ чтущих святую память твою.

Слава, глас тойже:

Слово Господне услышал еси,/ святителю отче Кирилле:/ Царство Мое несть от мира сего,/ темже, к стопам Владычним любовию устремився,/ яко бисер многоценный,/ учение Христово обрел еси,/ во уничижениих и скорбех земных сокровенное./ Ныне же, мучения багряницею украшенный,/ Престолу Божию во славе предстоиши/ и светом Небеснаго блаженства/ верныя люди озаряеши.

И ныне, Богородичен, глас тойже: Кто Тебе не ублажит, Пресвятая Дево:

Вход. Прокимен дне. И чтения 3 мученическая.

На литии стихира храма.

Слава, глас 2:

Не вы Мене избрасте, но Аз вы избрах,/ сие слово Господне на тебе исполнися,/ святителю Кирилле, отче наш,/ Создатель бо твой Господь украси тя даровании/ и Церкви Своей в час испытания яви яко истины поборника,/ в раи же светлости всели тя, подая веселие вечное,/ зане во странствии земнем Того возлюбил еси/ всем сердцем, еже очистити потщался еси,/ всею душею, юже за други твоя положил еси,/ всею мыслию, еюже Слову Божию прилежал еси./ Молися о нас, да со избранными сопричтени будем.

И ныне, Богородичен.

На стиховне стихиры, глас 5.

Подобен: Радуйся:

Радуйся, святителю Кирилле преславне,/ Вышняго Царствия наследниче/ и Небесному Владыце Господу/ в скорбех и гонениих подобниче:/ Сей бо, крова на земли не имея,/ поругание и смерть лютую прият безчестно,/ ты же зиму и зной пустыни терпел еси,/ таже пищи, сна лишение и со злодеи заточение,/ еще же во узах от града во град прехождение/ и от судей лукавых изречение,/ яко повинен есть смерти./ Темже, яко дар Небесный, восприим страдания,/ Христа приобрел еси,/ Подающаго миру велию милость.

Стих: Праведник яко финикс процветет,/ яко кедр, иже в Ливане, умножится.

Радуйся, святителю Кирилле всечестне,/ истины твердый исповедниче,/ ты бо, веры поругание видев,/ пред гонители со дерзновением рекл еси:/ сие, очима нашима зримое,/ скорбь есть Церкве, но не смерть Ея,/ воля Божия несть человек деяние,/ но попущение, к покаянию зовущее;/ обаче силен Бог простити грехи наша/ и Церкви Своей даровати житие мирно и безпечально./ Темже, ныне благоденствующи,/ паства Всероссийская взывает ти:/ испроси нам веру тверду и велию милость.

Стих: Насаждени в Дому Господни/ во дворех Бога нашего процветут.

Из глубины темничныя взывая,/ сице вещал есть святитель Кирилл пречудный:/ не от мира Церковь Православная,/ мир апостольски освящающая,/ но Тело Христово, Духом созидаемое,/ Царствие Божие, с Небесе сшедшее,/ и причастники Божественнаго естества нас творящее,/ Матерь, чада на служение братолюбное воздвизающая/ и ко спасению их наставляющая,/ и како сия земных ради благ от Небесныя славы отступит?/ Темже да неколеблема пребудет в служении Церковь Русская,/ Ейже молитвами новых мученик подает Христос/ благостояние и велию милость.

Слава, глас тойже:

О, чада светообразная церковная!/ Веселитеся днесь в памяти святителя честнаго,/ сей бо, во свете невечернем Богу предстоя, взывает:/ призри, Боже, с небесе на Землю Русскую,/ аще и попраша люди ея иногда труды/ и течения слез преподобных Твоих,/ но крове ради пролитыя новых мученик/ возстави землю сию и приведи воспевати:/ Светодавче Господи, слава Тебе.

И ныне, Богородичен, глас тойже: Храм и Дверь еси:

На благословении хлебов, тропарь святаго дважды, и Богородице, Дево: единожды.

Тропарь святаго, глас 3:

Велика в скорбех утешителя/ обрете тя Церковь Русская, святе Кирилле,/ ты бо, в годину гонения чашу страданий прием,/ жаждущия правды воедино собрал еси,/ яко орел небесный под криле птенцы своя,/ и вся научил еси/ веры доброму исповеданию./ Темже в лице новых мученик/ Престолу Божию предстоиши,/ моляся о чтущих любовию память твою.

Ин тропарь, глас 5:

Якоже солнце светозарное,/ возсия днесь память твоя, святителю Кирилле,/ лучами благодати озаряющи верных сердца/ к прославлению дивнаго во святых Своих Бога,/ даровавшаго тебе крепость во исповедании и терпение в скорбех./ Темже молим тя:/ не премолчи о нас ко Господу/ и избави от всякаго зла,/ Церковь Русскую от раздоров и нестроений сохрани,/ мир мирови испроси/ и душам нашим велию милость.

На утрени

На Бог Господь: тропарь священномученника дважды. Слава, и ныне, Богородичен.

По 1-м стихословии седален, глас 4:

Тайну велиих подвигов твоих, святителю, о сем познахом: яко от юности словеса евангельская, яко сребро разженно, прилежно в сердце слагая, вседушне Христа возлюбил еси. Темже и Церкви Православней чрез все житие усердне послужил еси и славы Небесныя сподобился еси.

Слава, и ныне, Богородичен:

Пристанище нам, обуреваемым, буди, Пресвятая Владычице, не имамы бо крепости и произволения тверда не стяжахом. Обаче уповаем молитвами Твоими пути спасительнаго не уклонитися и завет святителя Кирилла исполнити:/ аще кто хощет Горняго Иерусалима достигнути, всяку язву страстнаго сердца из корене мужески да исторгнет.

По 2-м стихословии седален, глас 2:

Егда время исповедания чадом Церкве Русския наста, тогда смерти никакоже устрашился еси, священномучениче добропобедне, залог Царствия Небеснаго в сердце имея. Темже и ныне смертию смерть Поправшаго во Царствии Небеснем духовне созерцаеши.

Слава, и ныне, Богородичен:

Воспоим, людие, помощь и заступление Девы Чистыя, поминающе отец наших, присно в бедах и напастех пред Нею с мольбою припадающих и зрак чудотворнаго Ея образа в сердце носящих.

Величание:

Величаем тя,/ священномучениче Кирилле,/ и чтим честная страдания твоя,/ яже за Христа во утверждение на Руси Православия/ претерпел еси.

Псалом избранный:

Бог нам Прибежище и Сила.

Господи, воздвигни силу Твою и прииди, во еже спасти ны.

Глаголах о свидениих Твоих пред цари и не стыдяхся.

Вси язы́цы обыдоша мя и именем Господним противляхся им.

Тебе ради умерщвляемся весь день, вменихомся, яко овцы заколения.

Крепость моя и пение мое Господь и бысть мне во спасение.

По полиелеи седален, глас 5:

Кий образ в сердце твоем зрел еси, святителю, от беззаконных убиваемь? Сына ли Божия, на Кресте висяща во тьме часа шестаго? Стефана ли, о убийцех молящася: не постави им, Отче, греха сего? Церковь ли Русскую, смутою терзаему? Обаче в руце Божии вся предал еси, взывая: спаси, Спасе, души верно покланяющихся Тебе.

Слава, и ныне, Богородичен:

Что Тя наречем, Богородице? Пристанище ли духовное, Рай сладости Небесныя или Ходатаицу жизни некончаемыя? Вся бо имущи, едина Непорочная и Добрая в женах, о нас молися Христу Богу спастися душам нашим.

Степенна, 1-й антифон 4-го гласа. Прокимен, глас 4: Проидохом сквозе огнь и воду/ и извел еси ны в покой. Стих: Разжегл ны еси, якоже разжизается сребро. Всякое дыхание: Евангелие от Матфеа, зачало 36.

По 50-м псалме стихира, глас 6:

Целомудрия от юности исполнен,/ страданьми горькими и молитвами слезными/ во глубину смиренномудрия снизшел еси/ и терпение твердое богоподражательное стяжал еси./ Темже и плод красный любве Христовы принесл еси,/ еюже воспламени сердца наша,/ святителю Кирилле, богомудре.

Канон, глас 1.

Песнь 1.

Ирмос: Поим, вси людие,/ от горькия работы фараони Израиля Изменшему/ и во глубине морстей ногами немокрыми Наставльшему/ песнь победную,/ яко прославися.

Припадем, братие, ко Господу, промышление творящему о Церкви Своей Святей, Емуже новии мученицы и исповедницы Русстии воспевают непрестанно песнь победную, яко прославися.

Воспоим, братие, Церкве Русския украшение, святителя Кирилла богомудраго, от юности Христа возлюбившаго и чистотою жития Бога прославившаго.

Прославление святителя Питирима в Церкви Русстей трудами твоими свершися, преславне Кирилле, темже ныне купно с ним чадами ея прославляешися.

Богородичен: Дево Чистая, примирения Cкиние, Небо Божие на земли и ко граду Небесному Лествице! Прозябением Твоим от неплодове мир возвеселися, темже молимся: подаждь благоплодие земли Русстей, уделу Твоему избранному.

Песнь 3.

Ирмос: Утверди мене, Христе,/ на недвижимом камени заповедей Твоих/ и просвети мя светом лица Твоего:/ несть бо свят, паче Тебе,/ Человеколюбче.

Утвердил еси сердце твое, святе Кирилле, мирови умрети и, ангельским образом украсився, воззвал еси Христу: Твой есмь аз, спаси мя, Едине Человеколюбче.

В бдениих и пощениих страстьми обнищав, богатство дарований духовных приял еси. Темже и нас от страстей избави молитвами твоими, Кирилле многострадальне.

Одежду священную кровию украсив, блаженне Кирилле, в Церковь Небесную священно вшел еси, идеже, Святей Троице предстоя, взываеши: несть свят, паче Тебе, Человеколюбче.

Богородичен: Чудно Твое, Богоотроковице Марие, во храм Господень вхождение, Храм бо явилася еси Богу, темже и приведутся девы вслед Тебе: души взыскующих спасение.

Ин кондак, глас 3:

Столп и жертва Церкве Христовы быв,/ сию непоколебиму от искушений лукаваго премудро соблюл еси/ и, козни вражия твердым умом разорив,/ едину Церковь апостольскую проповедал еси,/ Кирилле богоблаженне,/ святителей Русских похвало,/ моли спастися душам нашим.

Седален, глас 2:

Сердце твое, святителю Кирилле, горе устремляемо, чисто приражений страстных показася, сего ради помышления световидная породи. Уста же твоя восприяша глагол Божий, яко меч духовный, во еже враги расточити и стадо Христово укрепити.

Слава, и ныне, Богородичен:

Светоносная Слова Палато, Ковчеже, позлащенный Духом, явилася еси, Пресвятая Дево. Темже молим Тя: вкупе со святыми сродники нашими Христу молися, от страстей очистити православно Богородицу исповедающих Тя.

Песнь 4.

Ирмос: Духом провидя, пророче Аввакуме, Словесе воплощение,/ проповедал еси, вопия:/ внегда приближитися летом – познаешися,/ внегда приити времени – покажешися./ Слава силе Твоей, Господи.

Сердце сокрушенно и умиления исполнено имея, узким и скорбным путем неотступно шествовал еси, отче Кирилле. Темже и рова страстей избегл еси и яко град, на горе стояй, явился еси.

Святительства ризу светлу сохранил еси и овцы словесныя добре упасл еси, иже, чуждаго гласа не послушавше, тебе последоваша. К сим же и нас сопричти, поющих: слава Господу, дивному во святых Своих.

Молитвою усердною дух твой к Богу воскрилял еси, святителю, труды ко трудом на всяк день прилагая, да процветет, яко крин, Земля Русская. Юже и ныне соблюди от гордых супостат невоевану молитвами твоими.

Богородичен: Дверь Небесная явилася еси, Дево, вход отверзающи Архиерею Великому Христу, нас ради Небеса прошедшему. Темже глас ангельский Тебе взываем: радуйся, Благодатная, Господь с Тобою.

Песнь 5.

Ирмос: Просветивый сиянием/ пришествия Твоего, Христе,/ и осветивый Крестом Твоим мира концы,/ сердца просвети светом Твоего Богоразумия/ православно поющих Тя.

Кто изъяснит красоту души твоея, блаженне Кирилле, и кто изследит еже ко грешным твое милосердие, о нихже и ныне неотступно молишися Христу: спаси и помилуй, Господи, православно поющих Тя.

Дадеся тебе благодать от Бога благолепно погребсти тело праведнаго Иоанна Кронштадтскаго, пастыря Всероссийскаго; с нимже ныне моли Христа, еже светом любве просветити нас, православно Его почитающих.

Слово Божие и писания отеческая предпочел еси мудрости века сего, святителю, сего ради, божественным отцам во всем последовав, ныне молишися Христу: светом любве Твоея, Господи, просвети православно поющих Троицу Единосущную.

Богородичен: Яко дождь на руно низшед, во утробу Девичу вселился еси, Христе, и паче солнца миру возсиял еси, Свете Разума, и яко Младенец на руку Девы Матере положился еси, Слове Божий. Ея же молитвами просвети сердца пощих Тя.

Песнь 6.

Ирмос: Обыде нас последняя бездна,/ несть избавляяй,/ вменихомся, яко овцы заколения,/ спаси люди Твоя, Боже наш,/ Ты бо крепость немощствующих и исправление.

Егда бездна страдания обыде землю нашу, тогда со слезами молился еси, святителю, о безвинно убиенных и о спасении людей Российских, взывая: милостив буди нам, Боже, Ты бо крепость немощствующих и исправление.

Святаго Патриарха Тихона чадо послушное быв, волю того всеусердно исполнити потщался еси, сего ради непреткновенно и Царства Небеснаго достигл еси, идеже о спасении людей Российских молиши: милостив нам буди, Боже, Ты бо крепость наша и исправление.

Со апостолы и мученики, со святители и преподобными, яко верный ученик Христов, вселился еси, святе Кирилле. Сего ради и ныне призри от святаго жилища твоего на нас, спасение улучити чающих и вопиющих: спаси люди Твоя, Боже наш, Ты бо крепость немощствующих и исправление.

Богородичен: Егоже старец Симеон прият на руки своя, Того, Владычице Чистая, моли о нас, яко Сына Твоего, да милость обрящем егда приидет на облацех судити миру всему, Ты бо еси упование христианом, Богородице Дево.

Кондак, глас 5:

Лучезарною твоею благодатию нас просвети,/ поющих мужества твоего крепость,/ яже воителем тьмы бе неприступна,/ и молитвами твоими Церковь Русскую в единомыслии утверди/ и от бед отечество наше огради,/ святителю Кирилле, мучениче славный.

Икос:

Егда все житие твое Богу предал еси, тогда прият тя Господь, яко ковач железо, в руце Свои и в горниле страданий искуси тя. Сего ради даровася тебе сила и благодать, крепость и премудрость, и, яко свет, пред человеки дела твоя просветишася в похвалу Пресвятыя Троицы. И ныне молитвами твоими Церковь Русскую в единомыслии утверди и от бед отечество наше огради, святителю Кирилле, мучениче славный.

Песнь 7.

Ирмос: Сущим в пещи отроком Твоим, Спасе,/ не прикоснуся, ниже стужи огнь./ Тогда трие, яко единеми усты, пояху/ и благословляху, глаголюще:/ благословен Бог отец наших.

Прежде Креста преобразися Господь пред ученики Своими. Ты же, отче, в светозарный день Преображения во узы заключен быв, отселе восхождение на крест начал еси, небоязненно глаголя: благословен Бог отец наших.

Во узилищи мрачнем пение победное Христу воспел еси, исповедниче славне: блажени изгнани правды ради. Темже умудри и нас во всяцей скорби Царю небесе и земли достойно воспевати: благословен Бог отец наших.

В темнице хладней Пасху поюще и Господа очима веры зряще, во узах сущии с тобою, святе Кирилле, дивляхуся благоговеинству служения твоего. Темже, на муки и смерть уготовани, Христу глаголаху: подавай нам истее Тебе причащатися в невечернем дни Царствия Твоего.

Богородичен: Осудися на Крест Судия живых и мертвых, безчестие претерпе Царь Славы, смерти вкуси Иже Даруяй мирови жизнь. Сего ради, уяснивше страшное сие смотрение, грехов оставление просим улучити нам молитвами Твоими, Дево Пречистая.

Песнь 8.

Ирмос: Егоже ужасаются Ангели и вся воинства,/ яко Творца и Господа,/ пойте, священницы, прославите, отроцы,/ благословите, людие,/ и превозносите во вся веки.

Смиренномудраго Тихона патриарха сотаинник и Петра крепчайшаго сострадалец явился еси, отче Кирилле богоблаженне, и ныне с сими Небесныя славы наслаждаешися, Христа, мир от тли греховныя спасшаго, превознося во веки.

Веру непорочну сохраньше, исповедницы мнози прихождаху к тебе, Кирилле богомудре: Афанасий и Дамаскин, святителие славнии, Александр преподобный и друзии, да купно с тобою расточенныя люди Церкве Русския соберут, Христа превозносяще во веки.

Твое крестоносное в вере стояние единство Церкве Русския сохрани, имя бо твое, в молитвах по всей Руси купно возносимое, разделение соедини, сомнение умири и любовь умножи.

Богородичен: Радость Воскресения Сына Твоего первее прияла еси, Богомати, Той бо обетование даде учеником Своим: паки узрю вы и возрадуется сердце ваше. Молися, Госпоже, и нам Владычния радости сподобитися.

Песнь 9.

Ирмос: Неизглаголанное Девы таинство:/ Небо бо Сия, и Престол Херувимский/ и светоносный чертог показася/ Христа Бога Вседержителя./ Сию благочестно яко Богородицу величаем.

Издетска Крещение водою и Духом приим, последи же кровию своею исполнил и совершил еси е, да в ризу белую за Слово Божие убиенных облечешися и новую песнь на земли живых Христу воспоеши.

Егда приспе час кончины твоея, страха мучителей безбожных не устрашился еси и равноангельное житие смертию мученическою запечатал еси. Сего ради со ангельскими лики ныне Христа созерцаеши.

Мзды своея не лишается, иже чашу воды ученику подаде. Сего ради рцы нам, отче святый, кую мзду Евдокия, печальница твоя, улучила есть, вся тяготы с тобою понесшая? Вемы бо, яко в лице мученик Христу предстоит.

Богородичен: К жизни присносущней на объятиих Сына Твоего возшедшая, Пречистая, матернима Твоима рукама в вечныя кровы о имени Его пострадавшия прияла еси. Темже и нас в час кончины нашея милостивно срящи.

Светилен, глас 6:

Пресветлым лицем и милостивным оком призри на чада твоя, благоговейно совершающая память твою, святителю, и Света Подателя моли спасти и просветити души наша.

Слава, и ныне, Богородичен:

Стена и покров буди нам, Владычице, да Тобою прейдем стену, юже суета житейская воздвиже. Не презри, Чистая, моления нашего, молитвенника бо на сие, Кирилла славнаго, Тебе предлагаем.

На хвалитех стихиры, глас 4.

Подобен: Дал еси знамение:

Служения иго Божественное/ и бремя еже о Христе страдания,/ радуяся, подъял еси,/ святителю Кирилле терпеливе,/ оттуду и дар приял еси,/ еже звездою путеводною Церкви быти/ и истину, яже есть Христос, явити./ егоже и мы воспомянем глас:/ иго Мое благо и бремя Мое легко есть.

Радость воскресения возвещая/ и благодарение за вся Богу воздая,/ Безкровную Жертву в темнице приносил еси,/ святителю Кирилле священне,/ соузницы же твоя воспеваху пение Воскресшему Христу,/ неприступным светом блистающему/ и страждущим о Имени Его рекущему:/ радуйтеся и веселитеся,/ яко мзда ваша многа на Небесех.

Мудростию свыше осолен и со единомудрыми мирствуяй,/ святаго Патриарха преемник духовный был еси,/ святителю Кирилле всечестне./ С нимже имеяй един дух во двою телесу/ и еже о Церкви помышление едино,/ единства Ея и истины ради смерть приял еси,/ завет Пастыреначальника Христа исполнив:/ имейте соль в себе/ и мир имейте между собою.

Светлостию братолюбия увенчан и святому Патриарху последуя,/ смертию за Христа усовершился еси,/ святителю Кирилле всехвальне./ Петру же крепчайшему спострадав,/ о нем и о Церкви слезно молился еси,/ с нимже ныне на Небеси радуяся,/ поминай паству Всероссийскую, тебе поющую:/ больше сия любве никтоже имать,/ да кто душу положит за други своя.

Слава, глас 1:

Кто возможет священства высоту разумети:/ како перстен человек, служитель Божий бывает/ и Огнь Божественный в причащение верным подает,/ Таинство совершая, всех сокровищ вышшее,/ и милостивно обязует струпы людей согрешающих,/ в сердце нося предания апостольская и отеческая?/ Сего ради, святителю Кирилле, Церкве Русския похвало,/ испроси пастырем земли нашея, еже в правду облещися,/ людем же учению сих прилежно внимати,/ да будет едино стадо и един Пастырь Христос.

И ныне, Богородичен, глас тойже:

Успение Твое, Пречистая,/ апостольский лик песньми почти/ и ангелы крилы покрываху священное тело Твое;/ страдальцем же Христовым, от беззаконных тайно убиенным,/ в местех пустынных и непроходных/ никтоже от человек пение надгробное сотвори,/ обаче Ты Сама предстала еси, Владычице,/ со ангельскими доброгласными чинми./ И ныне вси концы земнии/ новых мучеников прославляют/ во храме Господни, во дворех Бога нашего.

Славословие великое. Ектении. И отпуст.

На Литургии

Блаженна от канона песни 3-я и 6-я. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Римляном, зачало 99 (8, 28–39). Аллилуиа, глас 2: Священницы Твои облекутся в правду/ и преподобнии Твои возрадуются. Стих: Бог нам Прибежище и Сила, Помощник в скорбех, обретших ны зело. Евангелие от Луки, зачало 106, (21, 12–19). Конец: В терпении вашем стяжите души ваша: Причастен: В память вечную будет праведник:

Молитва

О, пречудный святителю Кирилле, новых мученик и исповедник украшение, святаго Патриарха Тихона верный последователю и Церкве Русския великое светило! По имени твоему тако и житие твое бысть, ты бо в Дому Божии сладостию словес церковных воспитанный, в юных летех благодать священства приял еси и паству твою богоугодно жити поучал еси. Помози ныне пастырем Церкве нашея в сердцах своих дар любве Христовы возгревати, отроки настави, еже в кротости и смирении возрастати, и вся люди православныя научи силу благочестия благими делы стяжевати.

Ты, святителю Кирилле, правило монашескаго жития явился еси, архиереев похвала и градовом в вере утверждение. Сего ради споспешествуй иноком в дусе и истине ревностно подвизатися, архипастыри научи слово правды Христовой в мире сем непорочно хранити. Заступи страну нашу от нашествия иноплеменник, грады и веси ея от всяких бед сохрани, домы миром огради и вся чада ея заблуждшая на путь покаяния настави. Вемы воистинну и усты исповедуем, яко можеши испросити у Великодаровитаго Бога, елика хощеши, ты бо правды ради изгнание и заточение претерпети сподобился еси и посреде злостраданий и крайния нищеты богатство благодушия явил еси, ты и веру Православную пред сильными мира сего небоязненно исповедал еси. Вразуми нас, в добродетелех убогих, земному богатству сердца не прилагати и укрепи нас, немощных, в час испытания веру во Христа сохранити. И якоже во истине стоял еси, егда вознесошася до небес и низпадоша до бездн волны смут церковных, тако умудри и нас прилежно вере нашей поучатися и в разум истины восходити, избирающе правая, благая и полезная. Ты смерть за Христа приял еси, яко венец праведнаго жития твоего, тако направи и нас не прилеплятися славе и довольству века сего, но почести вышняго звания искати, да твоими отеческими молитвами возможем земное наше житие без порока прейти, христианскую кончину улучити и сподобитися в Царствии Небеснем купно с тобою прославляти Отца и Сына и Святаго Духа, Троицу Единосущную во веки веков. Аминь.

Источник: Текст службы утвержден к общецерковному богослужебному употреблению на заседании Священного Синода 29 декабря 2022 года (журнал № 130).

На велицей вечерни

Стихиры, гл. 6

Прехвальнии новомученицы и исповедницы Русстии,/ восхваляем вы с любовию,/ вас бо не потопила вода безверия, / ни буря ярости беззакония,/ ни ветры ересей погибельных,/ но Духом Святым просвещеннии,/ яко жертвы непорочныя Царю Славы принесостеся./ Емуже молитеся о душах наших.

Прокопие священномучениче,/ в лике новомученик прославленный,/ гласом немолчным паству наставлял еси,/ от волков хищных и наемник лукавых защищал еси,/ душу твою полагая за овцы, яко пастырь добрый./ И ныне Христу молися,/ даровати душам нашим мир и велию милость.

Всехвальне Прокопие новомучениче,/ за чистоту души твоея,/ увенча тя Владыка венцем славы вечныя,/ прияв твоя страдания и смерть,/ яко жертву всесовершенну./ Темже и во светлостех небесных ныне ликовствуеши,/ Христу молящеся, / о спасении тя призывающих.

Слава, глас 4:

Отрасле благочестиваго рода,/ Дарами Святаго Духа преизобильно украшенный,/ служителю Христов Прокопие,/ на ниве Господней потрудился еси,/ плод сторицею во ученицех принесл еси./ Ты бо молитвою недуги душевныя и телесныя исцелял еси,/ Прокопие, исповедниче,/ и богодухновенными возгремел еси глаголы/ сораспятися призывая Христу,/ и яве образ тебе самаго предлагая.

И ныне, Богородичен, глас тойже:

Иже Тебе ради богоотец пророк Давид / песненно о Тебе провозгласи, величия тебе Сотворшему: / предста Царица одесную Тебе. / Тя бо Матерь, Ходатаицу живота показа, / без отца из Тебе вочеловечитися Благоволивый Бог: / да Свой паки обновит образ, истлевший страстьми, / и заблуждшее горохищное обрет овча, / на рамо восприим, к Отцу принесет, / и Своему хотению, / с Небесными соединит Силами, / и спасет, Богородице, / мир, Христос имеяй велию и богатую милость.

Вход. Прокимен дне. И чтения 3:

Деян. Зач. 10;

Деян. Зач. 11;

Деян. Зач. 12.

На литии стихиры, глас 1:

Прокопия священномученика,/ приидите вернии вси почтим,/ пеньми и песньми духовными,/ сей бо мужеством препоясася,/ исповедник был еси крепок;/ и мучения венец светел восприим благодатию,/ Христа прославил еси.

Цвете еси прекрасный, Прокопие богомудре,/ ты бо храмы душевныя чад своих созидая;/ егда же время приспе, душу твою за овцы положил еси,/ яко пастырь добрый и исповедник, кровь твою честную за Христа излиял еси;/ темже от Вседержителевы руки подвигов почесть прияв,/ украсился еси неувядаемаго цвета сиянием.

Слава: глас 8:

В небесный вшед Чертог/ багряницею украшен,/ и Троице с велиим сонмом новомучеников и исповедников ныне предстоиши,/ Прокопие многострадальне,/ мы же днесь, память твою светоносную совершающе,/ прославльшаго тя Господа величаем.

И ныне, Богородичен, глас тойже:

Приидите, людие, / ублажим Заступницу усердную рода христианскаго,/ се бо предстоит Престолу Царя славы/ и со слезами молит о земнем уделе Своем,/ с Неюже вкупе и собори святых новомучеников вопиют немолчно:/ Владыко Христе, спасе землю Русскую.

На стиховне, глас 4:

Исповедник и священномученик явился еси,/ Прокопие славне,/ во изгнании и темнице паству твою наставлял еси,/ и мучением сияя, ангелом уподобился еси./ Темже тя чтим и любовию празднуем / светоносную память твою.

Стих: Праведник яко финикс процветет, яко кедр, иже в Ливане, умножится.

Православныя веры ревнителю,/ богословия догматов и святоотеческаго учения проповедниче и исполнителю,/ и Божественныя службы пламенный служителю,/ плоды трудов твоих Христу принесл еси,/ Емуже и до смерти последовал еси./ егоже ныне зриши в сиянии славы вечныя,/ священномучениче Прокопие.

Стих: Насаждении в дому Господни, во дворех Бога нашего процветут.

Не скорбети, но радоватися повелел еси чадом твоим,/ Прокопие блаженне,/ егда призва тя Господь последовати Ему страданием;/ аще гоним и истязуем бе,/ всего себе в руце Владычни предаяй,/ телесныя раны превозмогаяй / силою вседетельною Духа.

Слава, глас 8:

Кровию обагрив твою священную одежду,/ вшел еси во Святая Святых,/ свят быв, Прокопие славне,/ мужественно страдания и смерть за Христа приял еси,/ лесть и неистовство богоборческое поправше,/ врага победил еси;/ темже молим тя:/ укрепи молитвами твоими души наша.

И ныне, Богородичен, глас тойже:

Призри на моления Твоих раб, Всенепорочная,/ и всякия скорби избави землю Русскую,/ дом Твой нареченную/ и кровьми новомученик освященную./ Да не постыдимся, Владычице Державная,/ Тя призывающии,/ Ты бо еси православных помощь,/ радость и покров/ и спасение душ наших.

Тропарь, глас 1

Светильник всесветлый во граде Херсоне явился еси,/ пастырю добрый, священномучениче Прокопие./ Любовь и милосердие в сердцах верных насаждая,/ твердо стояти во исповедании веры Православныя призывал еси./ Темже со пресвитером Иоанном за Христа пострадал еси,/ и ныне купно с ним на небеси престолу Божию предстоя,/ моли Милостиваго Бога/ отечество наше в Православии и благочестии утвердити,/ мир Церкви даровати/ и душам нашим велию милость.

На утрени

По первом стихословии седален, глас 6:

Отвергнувся себе, ярем делания пастырскаго мужественно подъял еси, не убоявся прещения власти богоборческия, чадолюбиве отче и исповедниче Христов; ни гонения бо, ни темница не возможе отлучити тя от служения сего.

Слава и ныне, Богородичен:

О, Всепетая Дево, Тя вемы Покров земли Русския, Тебе бо, грешнии, имамы предстательство, Тебе стяжахом в напастех спасение, Едину Всенепорочную.

По втором стихословии, седален, глас 2:

О благолепии храма и Божественныя службы благоговейнаго совершения ревнуя, наставник и учитель благославный многих явился еси, Прокопие достохвальне, к познанию неизреченныя сладости жизни вечныя возводя послушная чада твоя.

Слава и ныне, Богородичен, глас 2:

Молитвеннице Теплая, Заступнице рода христианскаго,/ приими моления раб Твоих/ и осени Русь Православную покровом Твоея благости.

По полиелеи седален, глас 2:

Светло торжествующе празднуем память твою,/ отче Прокопие священномучениче,/ и верою исполняемся,/ яко не оставляеши паствы твоея своим попечением;/ предстояще незримо со Ангелы и всеми святыми,/ моление сие приемлеши,/ предстательствуя о спасении поющих тя.

Слава и ныне, Богородичен, глас 2:

Молитвеннице Теплая, Заступнице рода христианскаго,/ приими моления раб Твоих/ и осени Русь Православную покровом Твоея благости.

Прокимен, глас 4:

Проидохом сквозе огнь и воду,/ и извел еси ны в покой.

Стих: Разжегл ны еси, якоже разжизается сребро.

Всякое дыхание:

Евангелие от Матфея, зачало 36.

По 50-м псалме стихира, глас 6:

Сосуд священ Духа Святаго ты был еси,/ от корене праведнаго плод совершен,/ Прокопие священномучениче,/ чада твоя любовию Христовою возлюбил еси,/ и за тех душу свою положил еси, взывая:/ Господи, ихже дал еси мне, сохранил есть,/ да не погибнут.

Канон святаго, глас 2

Песнь 1.

Ирмос: Грядите людие:

Престолу ныне предстоя Христову, яко архиерей и мученик преславный, Прокопие всечестне, приими молитвы наша с любовию тебе возсылаемыя.

Плод благославен древа праведнаго прозябл еси, избранниче Божий, от источника святости отеческия питаемь, подвигом исповедническим достойно трапезе райския принеслся еси.

Дар Богу, всеблаженне, себе самаго принесл еси, житием многотрудным и честным страданием, священномучениче Прокопие.

Богородичен: Бога без семени рождшая, паче ума человеча, Дево Пречистая и Мати; егоже моли помиловати поющих Тя.

Песнь 3.

Ирмос: Утверди нас в Тебе Господи:

Миром помазания духовнаго украшен, Прокопие славне, добре священствовал еси, жезлом веры отгоняя ересей ловитвы и сохраняя стадо словесное от волков губящих е.

Нощь отгнал еси суетства, богоглаголиве отче, блистании премудраго проповедания, и верных мысли просветил еси.

Возносимую презрел еси зиму безбожия, возлюбив учения святых отец догматы, теплотою Божественнаго Духа невредимо сердца чад твоих соблюл еси.

Богородичен: Утверждение буди и прибежище, и покров Дево Пречистая, верою к Тебе прибегающим, и любовию воспевающих Рождшагося из Тебе.

Седален, глас 3:

В незлобии Христу подражавый, истязания и раны от безбожных лютых кротко претерпел еси, Стефана первомученика гласом моляся за обидящих тя, Прокопие многострадальне.

Слава, и ныне, Богородичен, глас 3:

Не имамы инаго прибежища, разве Тебе, Богородице,/ Отечества нашего усердная Заступнице:/ всяк бо, почитаяй Тя, надежду обретает.

Песнь 4.

Ирмос: Услышах, Господи, славное Твое смотрение:

Паству твою премудро наставляя, богословия поборник явился еси, священнодейственне путеводящь добродетельных, Прокопие, деяний.

Тайны горняго мира чрез участие в богослужении познавати учил еси, богомудре отче, прилеплятися же всем сердцем небесным покровителем нашим и тем приуготовитися вечности.

Утеснил еси нечестие, святче, пространством истиннаго благочестия, и пути в сие ведущия, показал еси, спасая души, потопляемыя прелести богоборчества водами.

Богородичен: Просвети, Пречистая, омраченную душу мою светом Твоим, яже Свет рождшая Един Ипостасный.

Песнь 5.

Ирмос: Света Подателю:

На Древе Простершемуся волею подобяся, егоже милосердию подражая, Евангельски молил еси: Отче Благий, ихже дал еси мне, сохрани, да никтоже от них погибе.

Смиряяся оскорбляемь, темницы и изгнания горечь претерпел еси, темже блаженную улучил еси, многострадальне, славу и светлость.

Душа твоя крепкая козни вражеская низложи, мрак неверия и лукавствия разгнася твердейшею верою твоею, Прокопие всехвальне, архиереев похвало.

Богородичен: Иже образ Ипостаси Отчи, из Тебе прият смешение Богородительнице, и истлевший образ прослави, и сего нова сотвори.

Песнь 6.

Ирмос: В бездне греховней:

Падшаго естества возношение, Духом укрепляемь, поправ, мужественно облеклся еси багряницею нетления, Прокопие священномучениче: темже прославляемь Ангелы и человеки.

Кровию страдания, блаженне, освятил еси землю, духом же на Небеса возшед, присовокупися гласу святых новомучеников, воспевающих Святую Троицу.

Молитва святыя души твоея прията бысть, яко кадило, отче: в воню благоухания духовнаго, Возсиявшаго от Девы исповедуя.

Богородичен: Вземлющаго грехи всего мира, Христа заченши, Пречистая, не престай просящи грехов прощения воспевающим Тя.

Кондак, глас 4

Во святителех благочестно пожив,/ и мучения путь прошед,/ безбожия силу побеждая,/ поборник быв Херсонстей пастве, богомудре./ Темже тя почитающе, тако вопием/: от бед избави нас присно твоими мольбами,/ отче священномучениче Прокопие.

Икос

К высшему подвигу мученичества устремися, Прокопие преславне, яко всесожжение Божественное и жертва живая принеслся еси Спасу всех. Темже вопием ти: Радуйся, исповедническаго подвига сияние прославивый; радуйся, мученический крест во дни гонений на Церковь избравый. Радуйся, Христа распинаемаго паче жизни временныя возлюбивый; радуйся, темницу, страдания и смерть за Него претерпевый. Радуйся, паству Христову, вверенную тебе, от расхищения соблюдый; радуйся, и во изгнании сирых чад твоих не оставивый, пламенною молитвою от звероуловления тех оградив. Радуйся, со иереем Иоанном за веру Христову и смерть приявый. Радуйся, теплый предстателю наш пред Богом, отче священномучениче Прокопие.

Песнь 7.

Ирмос: Образу златому:

Не поклонився, священномучениче, делом рук беззаконных, претерпе поношения, и заточение, и раны, чистоту веры Православныя непоколебимо исповедал еси.

Святых жития не токмо умом познавати учил еси, житием бо твоим и деяньми тех подвиги проповедуя, Божественным разумом души пасомых просвети.

Глагол твоих вещание и святоотеческих преданий сила обтече, богодухновенне отче, землю Русскую, иссохшую от зноя гонений и нечестия, напаяя сию Божественною благодатию.

Богородичен: Радосте скорбящих и отчаянных, Ты еси Мати Преблагая, Спаса рождшая рода нашего.

Песнь 8.

Ирмос: В пещь огненную:

Ни темница, ни ярость мучителей, ни страдания, ни даже смерть не возмогли разлучити тя от любве Божия, но тою укрепляяся, воспевал еси: благословен Бог отец наших.

Возмогл еси Божиею вседетельною силою богоборческия прелести вселукавое мудрование, страстотерпче, победити, и венец нетленный от всех Владыки прияти, поя: благословен Бог отец наших.

Воистину блажен ты, Прокопие многострадальне, ибо сподобился еси соделатися общником страстей Христовых, себе самаго в дар Зиждителю принося, вопиял еси: благословен Бог отец наших.

Богородичен: Столп крепости тверд, и Хранительницу, и Заступницу стяжавше Тя верою поющии: благословен Бог отец наших.

Песнь 9.

Ирмос: От Бога Бога Слова:

Возвышен явился еси страдании честными, приял еси венцы победы, священномучениче, и ныне в лике новомученик и исповедник Русских предстояще Божественному Престолу, радуешися вечною радостию.

Наставниче и молитвениче наш, отче Прокопие, со иереем Иоанном, сподвижником твоим, и новомученики прииди, стани с нами; днесь бо празднуем честную память вашу.

Верою просящия тя спасай от всякия беды, Прокопие блаженне, во Отечествии Небеснем пребываеши бо присно, яко мученик непобедим.

Богородичен: Ты Едина Богу всяческая мудростию создавшему, Мати позналася еси Неискусобрачная, Дево Пречистая. Темже Тя Ангели и человецы песньми величают.

Светилен:

Одежды твоя, Прокопие досточудне, кровию обагришася, страданием светло просветися лик твой, темже Христос венцем мученическим увенча тя.

Слава, и ныне, Богородичен:

О Тебе мы хвалимся, Богородительнице,/ и к Богу Тя имамы Предстательство,/ простри руку Твою необоримую/ и сокруши враги Церкве Русския.

На хвалитех, стихиры на 4, глас 4:

Отче всемудре Прокопие,/ сквозе бурю безумнаго неистовства / к тихому пристанищу таинств церковных / всепобеждающею Божественною силою / Христово стадо, вверенное ти, направил еси./ Темже воспевающе, молим тя:/ помози и нам не погибнути / во страстей пучине.

Кто изглаголет страдания твоя,/ егда виде Церковь Святую попираему,/ чада же ея расхищаемии,/ тогда яко светильник Божественный и подражатель святых, / на крове проповеда,/ еже слыша в сердце Духу глаголему;/ страдальческое избрал еси житие,/ священства одежду обагрив кровию,/ мучениче непобедиме Прокопие.

Предстателю Церкве Русския,/ священномучениче Прокопие всехвальне,/ выну зряй Лице Господа на Небесех,/ не презри ни единаго/ от малых чад ея,/ но радостно покаяние наше приими/ и моли присно/ сыновом русским спастися.

Слава, глас 8:

Срадуйтеся нам Ангельския чины и святии вси,/ днесь бо празднуем память священномученика Прокопия,/ кровию Царствия вечнаго достигшаго,/ веруем, яко духом вкупе с нами пребывая,/ моление сие приимет и Христу принесет,/ ходатайствуя о спасении нашем.

И ныне, глас тойже:

О, преславнаго чудесе!/ Небесе и земли Царица,/ от святых сродников наших умоляемая, до ныне землю Русскую покрывает/ и лика Своего изображении милостиво обогащает./ О, Владычице Державная!/ Не престани и на будущее время/ во утверждение на Руси Православия/ милости и чудеся изливати до века. Аминь.

На Литургии

Прокимен, глас 7:

Честна пред Господем/ смерть преподобных Его.

Стих: Что воздам Господеви о всех, яже воздаде ми.

Апостол, к Римляном, зачало 99

Аллилуия, глас 6:

Священницы Твои облекутся в правду и преподобнии Твои возрадуются.

Стих: Бог нам прибежище и сила, Помощник в скорбех, обретших ны зело.

Евангелие, от Луки, зачало 106.

Причастен:

В память вечную будет праведник.

Источник: Православная Херсонщина

На велицей вечерни

Блажен муж: 1-й антифон.

На Господи, воззвах: стихиры, глас 5.

Подобен: Радуйся, Живоносный Кресте:

Радуйся, священная главо, / святителю Августине богомудре, / Церкве красото, града Калуги предивное удобрение, / благочестия пучино неисчерпаемая, / столпе Православия непоколебимый, / слава мучеников, / преподобных подражателю, исповедников подобниче, / за Христа душу твою положивый, / егоже моли / даровати душам нашим мир и велию милость.

Радуйся, сосуде Духа Божественнаго, / от юности Богом избранный стадо Его хранити, / любовию Тому уподобился еси: / смирения высото, правило добродетелей, / нищих питателю, обидимых заступниче, / Истины ревнителю, / за неяже пострадал еси даже до крове, / сего ради от Христа венец приял еси, блаженне / егоже моли / даровати душам нашим мир и велию милость.

Радуйся и ликуй, земле Российская, / украсившися кровьми святых страстотерпец, / сии бо веру твердо исповедаша, / прещения мучителей не устрашишася / не уклонишася скорби, ни темницы, / новозакланнии агнцы, от нихже и ты, святителю Августине, / ангеле церкве Калужския и служителю Христов. / егоже моли / даровати душам нашим мир и велию милость.

Ины стихиры, глас 1:

Придите, вернии, / прославим иерарха всечестна, / в лютая времена безбожнаго гонения / право правивша слово Божественныя истины, / пасшаго паству свою многотрудно, / научая ю отеческим преданием следовати / и, яве образ себе самаго предлагая, / душу за Христа положившаго. / Сего ради, священномучениче Августине, / усердно тя прославляем.

Жертву первее Богу принося безкровную, / яко священник законнейший, отче, / послежде яко всеплодие и приятну жертву, / кровь твою, яко мученик истинный, за Христа излиял еси, / исповедник непоколебим явился еси; / сего ради с любовию тя ублажаем.

Пастырю истинный, святителю Августине, / Церкве Христовы усердный ревнителю, / противу беззаконник дерзновенно стал еси / и обратил еси суд на главу судивших тя, / светильник веры неугасимый, воин неустрашимый Небеснаго Царя. / Сего ради почитаем священную твою память.

Слава, глас 6:

Приидите, российстии собори, / благочестно песньми восхвалим / честное торжество святителя и мученика; / звезду нову на Небесех в сонме святых явленную, / архипастыря богомудраго, / на камене веры твердо стоявшаго, / егда богоборцы пастырей Церкви побиваху, / о согрешивших братоубийством ходатай быв. / И ныне Престолу Божию предстоит, / выну моляся о душах наших.

И ныне, Богородичен воскресен.

Вход. Прокимен дне. И чтения три святительския.

На литии стихира, глас 2:

Столп несокрушим Христовы Церкве / явился еси, святителю Августине, / егда на землю нашу адова злоба устремися, / и потоцы беззакония смятоша ю. / Но живо слово Господне: / не убойтеся от убивающих тело, души же не могущих убити. / Потерпе душа твоя за Возлюбившаго нас Господа, / ругание, и клеветы, и узы, и темницы и лютую смерть; / ныне же, со страстотерпцы в Церкве Небесней торжествующе, / моли о земнем отечестве твоем, / да хранит веру православную, / в нейже Руси утверждение.

Слава, глас 4:

Кровию обагрив священныя одежды, / достигл еси Небеснаго чертога, славне, / яко мученик непобедим и священнодейственник законнейший. / Христу Пастыреначальнику последуя прилежно, / не оставил еси паствы твоея даже до смерти. / Темже, отче наш святителю Августине блаженне, / не остави град, идеже пострадал еси, / и твоими молитвами избави от бед / празднующих всечестную память твою.

И ныне, Богородичен.

На стиховне стихиры, глас 8.

Подобен: О, преславнаго чудесе:

Святый священномучениче Августине! / Небоязненно стоял еси за веру православную, / за нюже муки мнози претерпел еси: / заушения и уничижения, / гладом и хладом изморен в темнице, / яко злато в горниле искушен быв, / и обрете тя Бог достойна Себе. / егоже моли, святителю, / даровати нам велию милость.

Стих: Честна пред Господем / смерть преподобных Его.

Святый священномучениче Августине! / Божественною ревностию распалаем, / огнь горящ явился еси / воздвиже глас свой на отступники Христовы веры, / суду Божию предая их, / праведно обличи неправедная начинания / паству же боятися Единаго Бога научал еси. / К Тому преселился еси, радуяся, / и молишися о нас, чадех твоих.

Стих: Священницы Твои облекутся в правду, / и преподобнии Твои возрадуются.

Святый священномучениче Августине! / Архиереев похвало и монашествующих славо, / ты, измлада Христа возлюбльше, / чувственныя страсти увядил еси воздержанием, / потщався хуждшее покорити лучшему / и плоть поработити духу, / добродетельми, и словесы, и делы возсиял еси. / Тем ныне предстоиши Престолу Славы всех Царя / и молишися о душах наших.

Слава, глас тойже:

Яко светозарная звезда возсиял еси, блаженне, / новый мучениче, исповедниче Христов, / ныне же, со ангелы радуяся, / помощник буди нам в скорбех и болезнех, / наставниче заблудших, плачущих утешение, / заступниче немощных, прибежище отчаянных, / молитвенниче о душах наших.

И ныне, глас тойже.

Подобен: О, преславнаго чудесе:

Творение святителя Афанасия Ковровскаго

О, преславнаго чудесе! / Небесе и земли Царица, / от святых сродников наших умоляемая, / до ныне землю Русскую покрывает / и лика Своего изображении милостивно обогащает. / О Владычице Державная! / Не престани и на будущее время / во утверждение на Руси Православия / милости и чудеса изливати до века. Аминь.

Тропарь, глас 4:

Священноначальников сопрестольник и новый мучениче, / неусыпный земли нашея к Богу предстателю, / нечестие беззаконных дерзновенно отринул еси / увещая паству твою небоязненно стояти в Православии; / темже сугубым венцем венча тя Христос. / Того моли, святителю отче наш Августине, / умирити мир и спасти души наша.

На утрени

На Бог Господь: тропарь святому, дважды.

Слава и ныне, Богородичен.

По 1-й кафисме седален:

Правило веры и образ кротости / явился еси, священномучениче Августине, / пастырю добрый и угодниче Христов, / ярости мучителей не убоялся еси / и суемудренная свирепства обличил еси; / молитвами твоими подай чтущим тя любовию / добродетелей исправление.

Слава и ныне, Богородичен:

Дивно чудо зачатия / и неизреченен образ Рождества Твоего, Дево Чистая, / удивляет ум и ужасает помысл; / Тя воспеваем, яко палату Всецаря / и мира спасение.

По 2-й кафисме седален:

Яко светозарная звезда, / во граде нашем возсиял еси ученьми словес твоих, / отче Августине приснопамятне, / премудрый Слова проповедатель показался еси, / утверждая люди учением Христовым, / за Негоже пострадал еси даже до смерти, / и ныне со апостолы и архиереи радуешися, / предстоя престолу Господню.

Слава и ныне, Богородичен:

Всех Творца и Бога, Всенепорочная, / нетленно родила еси, / Духом Божественным в ложеснах заченши, / егоже славяще, Тя воспеваем, Дево, / яко всех христиан спасение и надежду.

По полиелеи седален:

Иже добродетелей подвижник и архиереев украшение, / Богоблаженне Августине, / любовию евангельскою укрепляемь, / небоязнен пастырь и наставник заблуждших явился еси, / темже земля наша, / кровьми твоими орошенная, / восприяла тело твое, / яко многоценный бисер Христов.

Слава и ныне, Богородичен:

Небесную дверь и кивот, / пресвятую гору и светлый облак, / неопалимую купину и словесный рай, / вселенныя великое сокровище, / Царицу Небесе и земли воспоим, / Та бо молится Сыну Своему спастися нам.

Степенна, 1-й антифон 4-го гласа.

Прокимен, глас 2: Священницы Твои облекутся в правду / и преподобнии Твои возрадуются.

Стих: Блажен муж, бояйся Господа, в заповедех Его восхощет зело.

Всякое дыхание: Евангелие от Луки, зачало 67.

По 50-м псалме стихира, глас 6:

Придите, вернии, / восхвалим страстотерпца святителя, / той бо, в страх Божий вооружився, / благодатию Христовою укрепляемь, / силу вражию низложил еси преславно, / в жертву непорочную принеслся заклатися, / во свидетельство Распеншагося за нас, / ныне же в Царстве Его водворился еси / со всеми исповедники земли Российския.

Канон Богородице, глас 8: Воду прошед:

И священномученика канон, глас 6.

Песнь 1.

Ирмос: Яко по суху пешешествовав Исраиль, по бездне стопами, гонителя фараона видя потопляема, Богу победную песнь поим, вопияше.

Песнь воспети Твоему угоднику, егоже избрал еси, / святителю Августину, / сподоби, Господи, нас недостойных, / и слово Сам вдохни восхвалити светоносное житие его / и подвиги, имиже украсился еси, / путем тесным земное шествие совершая.

На гору добродетелей востекл еси, блаженне, / от юности суетныя славы и мирския чести отрицаяся, / славы Единаго Бога ища и выну Тому работая прилежно.

Любовию Христовою уязвився, / фараонит мысленных нетрудно избег, богомудре, / ревнитель явился еси неустрашимый веры и благочестия, / непорочне и праведне на земли пожил еси / и приял еси осияние Духа.

Богородичен: Дево, в женах благословенная, / Твоя милости подаждь людем немощным, / страстотерпца Христова молением, / Милостиваго бо явилася еси Мати.

Песнь 3.

Ирмос: Несть свят якоже Ты, Господи Боже мой, вознесый рог верных Твоих, Блаже, и утвердивый нас на камени исповедания твоего.

Благочестиваго корене отрасль плодоносна показася, / добрым нравом от младенчества твоего, святе, радость родителем был еси, / чистою душею от пелен Господеви прилепился еси, / отонудуже старец некий и странник Божий благослови тя, / провидев яко архиерея и избранника Христова.

Яко елень на источники водныя, / измлада к храму Божию устремлялся еси, отче, / вся красная мира ни во чтоже вменив, / ведый же твое благое изволение Сердцеведец / постави тя на свещнице, / яко пастыря Церкве Своея и служителя.

Небесную премудрость яко талант от Бога обрел еси, / егоже приумножи, блаженне, от сокровищ богословия, / твердый адамант явился еси догматов веры; / егда свирепеющия волки, / Церковь православную разорити хотя, / со безбожники совокупишася, / словом твоим демонскую лесть обличил еси.

Богородичен: Сохрани, Владычице, надеющияся на Тя, / и нахождения варварскаго избави / и зловерных учений мутныя волны укроти, / Тя бо в скорбех и напастех всегда призываем.

Седален, глас 2:

Серафимскою любовию ко Господу пламенея, / яко столп огнен явился еси, священномучениче, / попаляющ словеса нечестивых, / верных же души просвещающ ученьми Богоразумия; / темже Горняго Иерусалима с соузники твоими и чады достигл еси, / идеже молиши Христа о нас, / светло празднующих твою память.

Слава и ныне, Богородичен:

Спасай нас, Всесвятая Чистая, / от сопротивных обстояний и соблазнов бесовских, / и умоли Сына Твоего, / да возведет от нетления к жизни Небесней / прибегающих к покрову Твоему.

Песнь 4.

Ирмос: Христос моя сила, Бог и Господь, честная Церковь боголепно поет, взывающи, от смысла чиста о Господе празднующи.

Объятия Отча отверз ти Господь, / иго благое и бремя легкое подъяти призва тя, / тогда образ ангельский восприял еси, мудре, / да приидеши в меру мужа совершенна.

Всем честен явился еси, Августине, / богоданней пастве твоей, / словом и житием, кротостию и милосердием, верою и чистотою; / сего ради людие боголюбивии восхотеша / во епископы избрати тя, / да храниши Церковь от лжепастырей, / раздрати хотящих хитон Господень.

Терпение неленостное во искушениих показал еси, / гонения, поношения и заточения подъяти не убояся, / в пощениих непреклонен пребыл еси, отче, / даже и в темнице храня сия опасно.

Богородичен: Из Тебе Христос возсия, Всепетая Дево, / не остави нас милостию Твоею, / яко да славим и поем Тя, / Пречистая.

Песнь 5.

Ирмос: Божиим светом Твоим, Блаже, утренюющих Ти души любовию озари, молюся, тя ведети, Слове Божий, Истиннаго Бога, от мрака греховнаго взывающа.

Изволися Духу Святому поставити тя на свещнице / во дни мятежа и нестроения велия, / егда рыданием и плачем земля Российская огласися, / и кровьми мученическими обильно обагрися, храмы Божий попранию предашася: / возста бо диаволе ополчение на Господа и на Христа Его.

Смотрению Архипастыря следуя / и велению Матере Церкве повинуяся, / в земли Ивановстей начало положил еси / святительским подвигом твоим.

Труды святительския возложил еси на себе, Богом званный, / воистину чести сия достоин явился еси, отче, / словом премудр быв, / житием же добродетелен, / в Божественных писаниех искусен.

Богородичен: Помощницу надежную имамы Тя, Богородице, / Предстательницу о нас к Сыну Твоему, / ведаеши бо скорби сердечный чад Церкве Православныя / и слышиши молитвы их.

Песнь 6.

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Августину учителю тезоименит, премудре, / пищею евангельских словес разумно чада церковная питал еси, устнама твоима истину Христову возвещая, / верных просвещая души ученьми Богоразумия, / в Горний Иерусалим вводящими.

Епископ был еси добрый, святителю Августине, / подобает бо премудрому немудрыя просвещати, / сильному о Господе немощи слабых носити, / малодушнии укрепляти, отчаяннии утешати; / и всех к житию богоугодному управляти.

Скорбьми и печальми море житейское преходя, / «се есть путь наш», – рекл еси, святителю, / разумея, яко ни скорбь, ни теснота, / ни гонение, ни глад, ни нагота, ниже беда, / ниже смерть не возмогут разлучити от любве Христовы чада Его, / льстивии ловительства вражия отринувшия.

Богородичен: К Тебе, о Богомати, ныне слезно взываем: вонми предстательству святителя о нас / и Сыну Твоему молитвы вознеси о спасении душ наших.

Кондак, глас 2:

От юности глаголом Божественным последуя, / верен даже до смерти пребыл еси, / блаженне Августине, / святительским саном почтився, / Церкве Российския показася страж неусыпный; / и, житие твое страданиями за Христа увенчав, / преселился еси в Небесныя обители, / идеже молиши всех Владыку / умирити мир и спасти души наша.

Икос:

Похвальная принесем святителю и мученику, / доброму пастырю, овцы своя в Небесный чертог приведшу, / молитвеннику и хранителю Церкве Российския, / крепку противу врагов Ея стоятелю; / к нему же припадем, верою и любовию воспевающе: / радуйся, Единаго Бога ради на земли поживый; / радуйся, велению Его выну последовавый; / радуйся, свягительскаго избрания, аки монашескаго послушания, не уклонивыйся; / радуйся, неистовства зловерных безстрашно обличивый; / радуйся, венцем славы от Господа венчанный; / радуйся, священномучениче Августине, отче наш.

Песнь 7.

Ирмос: Росодательну убо пещь содела ангел преподбным отроком, халдеи же опаляющее веление Божие мучителя увеща вопити: благословен еси, Боже отец наших.

Истины свидетель непреложен явился еси во дни мятежа лютаго, / егда пастыри нецыи Матере Церкве отвергошася, / в смущение паству приведоша; / тогда православия ревнитель необоримый показался еси, иерарше, / и заблуждших на путь правый премудре наставил еси.

Благодати Христовы сосуде избранный, / досады и поношения, горькия обиды и уничижения, изгнания и темницы понесл еси, отче, / терпя вся сия радостно, / яко спасительный ярем Христов.

Креста Христова не постыдился еси, блаженне Августине, / анафему на богоборцы возгласил еси, / вражия прещения не убояся / и в жертву нескверну яко хлеб чистый Господеви принесеся, / с Нимже и в вечнем Царстве светло царствуеши.

Богородичен: Богородице, исцели от греховныя болезни разслабленныя души наша, / ловительствы лукавых враг сохрани ны / и славословящия Тя спаси от бед и обстояний.

Песнь 8.

Ирмос: Из пламене преподбным росу источил еси, и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.

Заповедей евангельских усердный рачителю, / иноческое нестяжание и худость ризную возлюбил еси, преподобне, / в трудах, бдениих и молитвах непрестанно подвизался еси, / всякия утехи телесныя отрицаяся; / темже убо дарова ти Христос смирение нелицемерное.

Никтоже от Тебе тощ отыде, отче Августине: / был еси нищих и сирых питатель, / вдов и сирот утешитель, / обидимых заступник и покровитель, / милосердием Спасителю Христу подражая.

Земнаго ангела и небеснаго человека образ был еси пастве твоей, святителю, / постников похвало и монахов сотрудниче, / кротостию и незлобием украсился еси, / в мире премирно пожив, / от него же собрал еси духовное сокровище, / яко пчела сладкий мед от кринов сельных.

Богородичен: Воистину Ты еси христианом спасение, Владычице, / Христа бо родила еси, / спасающаго ны от вечныя смерти.

Песнь 9.

Ирмос: Бога человеком невозможно видети, на Негоже не смеют чини ангельстии взирати: тобою же, Всечистая, явися человеком слово воплощенно, егоже величающе, с небесными вои, Тя ублажаем.

Ходатай и молитвенник о нас к Богу буди, милостиве, / отыми от нас всякую злобу, вражду и злословие, / вкорени в сердцах наших мир и единодушие, / во еже благоугодити нам Господу и Владыце.

Архиерею святый, / решити и вязати власть от Бога приемый, / разреши прегрешения наша, / и путем тесным, ведущим в жизнь вечную шествовати / настави нас, молящихся тебе.

Хваление сие от нас, недостойных и окаянных, / усердно тебе приносимое, / приими милостивно, святителю и отче, / и моли Пастыреначальника Христа, / да не паки гнев Его найдет на ны разслабленнии и малодушнии, / и да утвердит во веки Церковь Русскую, / кровьми мученик от пленения безбожнаго возставленную.

Богородичен: Огнь Божественный, / воплощенное Слово Отчее рождшая, / Всесвятая Дево, / Небесным любве Божия огнем / разжзи оледеневшая сердца наша.

Светилен:

От Бога Света Небесным светом осиянный, / последовал еси Христу неуклонно путем спасительным, / просвети и нас, помраченных страстьми житейскими, / и прелести мрак отгони, / и о земном отечестве твоем молися, Августине, / новый светильниче земли Российский.

Слава и ныне, Богородичен:

Просветившая род человеческий Рождеством Твоим, / Дево Пренепорочная и Неискусобрачная, / покровом Твоим сохраняй рабы Твоя / от наветов вражиих невредимы, / да кромешныя тьмы избавимся мольбами Твоими.

На хвалитех стихиры, глас 7:

Августина святителя, / иерарха всечестна, добраго пастыря / право правивша слово Божественныя истины, / благочестия наставника и чистоты, / кладезь неисчерпаемый дарований духовных, / сосуд избранный Божия благодати, / Православия ревнителя, Церкве поборника / немолчными песньми восхвалим.

Августина, новаго мученика, / страдания мнози незлобиво претерпевша, / душу и тело, память и волю, / слово, дело и помышление / любве Божии предавша, / и лютую смерть за Христа восприявша / благочестно вернии ублажаем.

Августина преподобнаго <почтим>, / духовнаго воина непобедимаго, / иноческаго жительства истинное правило; / той бо, плотское мудрование воздержанием умертвил еси, / в безстрастия тишину одеявся, / и сердце милующее стяжав, / возмогл еси коварствий лукавых избежати.

Слава, глас 4:

Благоуханием добродетелей / Богу в чистей совести угодил еси, / и ныне в Царствии Невечернем с Ним царствуеши, / Его же моли, святителю, / стадо твое милостивно зряще, / да подаст нам братолюбие и мир, / силу и крепость и терпение неослабное, / хранити веру Православную, / в нейже отечества нашего утверждение.

И ныне, Богородичен:

Пресвятая Богородице, христиан похвало! / со святыми сродники наши / вопием к милосердию Твоему: / крове ради новых мученик пролитыя, / даруй нам, молящимся Тебе, / дух страха Божия, / дух разума и благочестия, / да паки вера православная торжествует, / земля бо Российская древле дом Твой наречеся.

Славословие великое.

На Литургии

Прокимен, глас 7: Честна пред Господем / смерть преподобных Его. Стих: Что воздам Господеви о всех, яже воздаде ми?

Апостол ко Евреем, зачало 334.

Аллилуиа, глас 2: Священницы Твои облекутся в правду, и преподобнии Твои возрадуются. Стих: Блажен муж, бояйся Господа, в заповедех Его восхощет зело.

Евангелие от Иоанна, зачало 36.

Причастен: В память вечную:

Ме́сяца ноября́ в 18-й день

Собо́р святы́х земли́ Эсто́нския

На вели́цей вече́рни

На Го́споди, воззва́х, на 6: стихи́ры, глас 6.

Подо́бен: Все отло́жше:

Все отло́живше жите́йское томле́ние/ и сла́дость теку́щую презре́вше,/ святи́и земли́ Эсто́нския,/ крест взя́сте, я́ко и́го боже́ственное,/ и Христу́ после́довасте,/ в Небе́сный поко́й чу́дно всели́стеся,/ прииди́те к нам, я́ко ско́рии помо́щницы,/ сподобля́юще даро́в невеще́ственных/ и моля́щеся о нас усе́рдно,// ваш пра́здник соверша́ющих святоле́пно. (Два́жды.)

И́ны стихи́ры, глас 2.

Подо́бен: Ки́ими похва́льными венцы́:

Ки́ими похва́льными венцы́/ увязе́м благове́рнаго кня́зя Алекса́ндра?/ Тро́ицы Святы́я и Единонача́льныя испове́дника,/ Правосла́вныя Це́ркве защи́тника,/ земна́го Оте́чества на́шего/ му́драго и справедли́ваго прави́теля,/ победоно́снаго за Русь Святу́ю вои́теля,/ миролю́бия и благоче́стия наста́вника,/ ми́лостиваго моли́твенника и Небе́снаго о нас предста́теля./ Его́же моли́твами Христо́с Бог// да́рует земли́ Эсто́нстей мир и ве́лию ми́лость.

Ки́ими похва́льными пе́сньми/ просла́вим священному́ченика до́бляго Иси́дора?/ Му́чеников сонм Христу́ приве́дша/ и с ни́ми пред вероло́мными ливо́нцы/ пра́вую ве́ру просла́вльша/ и стра́нная уче́ния и льсти́вая увеща́ния их побе́дне отве́ргша./ Его́же моли́твами Христо́с Бог// да́рует земли́ Эсто́нстей мир и ве́лию ми́лость.

Ки́ими пе́сненными добро́тами/ ублажи́м преподо́бнаго Корни́лия?/ По́стников пресла́внаго вождя́,/ и́ноков кро́ткаго наста́вника,/ язы́ков чу́дских Христо́вы ве́ры учи́теля,/ милосе́рдие и нестяжа́ние в жи́зни яви́вшаго,/ земно́е ше́ствие страда́льчески сконча́вшаго/ и убие́ние непра́ведно от царя́ прие́мшаго./ Его́же моли́твами Христо́с Бог// да́рует земли́ Эсто́нстей мир и ве́лию ми́лость.

Ки́ими досто́йными венцы́/ венча́ем святи́теля Плато́на?/ Пресла́вную о́трасль Эсто́нския земли́,/ Оте́чества своего́ печа́льника и просвети́теля,/ Правосла́вныя ве́ры ревни́теля,/ и́стиннаго и милосе́рднаго архипа́стыря,/ му́ченика, кровь свою́ за Христа́ пролия́вшаго./ Его́же моли́твами Христо́с Бог// да́рует земли́ Эсто́нстей мир и ве́лию ми́лость.

Сла́ва, глас 8:

Ра́дуйся, Це́рковь Эсто́нская,/ во святы́х свои́х ди́вно просла́вльшаяся./ Ты бо, благода́ть изоби́льну от Го́спода стяжа́вши,/ по́стничеством и му́ченичеством,/ про́поведию сло́ва Бо́жия/ и хране́нием И́стины Правосла́вия/ вои́стину просла́вилася еси́./ Сего́ ра́ди, ны́не све́тло пра́здник твой соверша́юще,/ мо́лим Отца́ и Сы́на и Свята́го Ду́ха// поми́ловати ду́ши на́ша.

И ны́не, Богоро́дичен: Царь Небе́сный:

Вход. Проки́мен дне. И чте́ния.

Проро́чества Иса́иина чте́ние (глава́ 49):

Та́ко глаго́лет Госпо́дь:/ во вре́мя прия́тное послу́шах тя/ и в день спасе́ния помого́х тебе́./ И созда́х тя и дах тя в заве́т язы́ков,/ е́же устро́ити зе́млю и насле́дити насле́дие пусты́ни./ Глаго́люща су́щим во у́зах: изыди́те!/ И су́щим во тьме: откры́йтеся!/ На всех путе́х пасти́ся бу́дут,/ и на всех стезя́х па́жить их./ Не вза́лчут, ниже́ вжа́ждут,/ ниже́ порази́т их зной, ниже́ со́лнце,/ но Ми́луяй их уте́шит я/ и сквозе́ исто́чники вод проведе́т я./ И положу́ вся́кую го́ру в путь/ и вся́кую стезю́ в па́ству их./ Се си́и издале́ча прии́дут,/ си́и от се́вера и мо́ря, ини́и же от земли́ Пе́рсския./ Да веселя́тся Небеса́, и ра́дуется земля́,/ да отры́гнут го́ры весе́лие и хо́лми пра́вду,/ я́ко поми́лова Бог лю́ди Своя́/ и смире́нныя люде́й уте́ши./ Рече́ же Сио́н:/ оста́ви мя Госпо́дь, и Бог забы́ мя./ Еда́ забу́дет жена́ отроча́ свое́?/ Или́ не поми́лует изча́дия чре́ва своего́?/ А́ще ли же и сих забу́дет жена́,/ но Аз не забу́ду тебе́,– глаго́лет Госпо́дь.

Прему́дрости Иису́са, сы́на Сира́хова, чте́ние (глава́ 44):

Восхва́лим у́бо му́жи сла́вны и отцы́ на́ша в бытии́./ Мно́гу сла́ву созда́ Госпо́дь в них вели́чием Свои́м от ве́ка./ Госпо́дствующе во ца́рствиих свои́х/ и му́жие имени́ти си́лою, сове́тующе ра́зумом свои́м,/ провеща́вшии во проро́чествах;/ старе́йшины люди́й в сове́тех/ и в ра́зуме писа́ния люди́й./ Прему́драя словеса́ в наказа́нии их;/ и́щуще гла́са мусики́йска и пове́дающе по́вести во писа́ниих, му́жие бога́тии, обдарова́ни кре́постию,/ ми́рно живу́ще в жили́щих свои́х./ Вси си́и в ро́дех просла́влени бы́ша,/ и во днех их похвала́./ Суть от них, и́же оста́виша и́мя, е́же пове́дати хвалы́./ И суть, и́хже несть па́мяти, и погибо́ша, я́ко не су́щии,/ и бы́ша я́ко не бы́вше, и ча́да их по них./ Но си́и му́жие ми́лостивии,/ и́хже пра́вды не забве́ны бы́ша,/ с се́менем их пребу́дет до́брое насле́дие,/ изча́дия их в заве́тех./ Оста́ся се́мя их и ча́да их по них,/ до ве́ка пребу́дет се́мя их,/ и сла́ва их не потреби́тся./ Телеса́ их в ми́ре погребе́на бы́ша,/ а имена́ их живу́т в ро́ды./ Прему́дрость их пове́дят лю́дие,/ и похвалу́ их испове́сть Це́рковь.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле искуси́ их/ и я́ко всепло́дие же́ртвенное прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́,/ и посеще́ние во избра́нных Его́.

На лити́и стихи́ры, глас 1:

Сы́нове ве́ка сего́ а́ще и глаго́лют:/ прииди́те, отста́вим вся пра́здники Бо́жия от земли́,/ но Ца́рство Госпо́дне и еще́ держа́вствовати и́мать,/ де́рзость враго́в Це́ркве Христо́вы отража́юще./ Те́мже, настоя́щее торжество́ све́тло пра́зднующе,/ Еди́ному Царю́ и Бо́гу на́шему возопии́м:/ сла́ва Тебе́, зе́млю Эсто́нскую освяти́вшему,/ сла́ва Тебе́, святы́я в ней просла́вльшему,// сла́ва Тебе́, и ны́не ве́рным кре́пость да́рующему.

Прииди́те, празднолю́бцы,/ воспои́м святи́теля Агафанге́ла достоблаже́ннаго,/ до́блестию испове́дания своего́/ Це́рковь Прибалти́йскую просла́вившаго,/ и ны́не в со́нме святы́х Бо́га воспева́ющаго// и моля́щагося о душа́х на́ших.

Прииди́те, мучениколю́бцы,/ просла́вим архипа́стыря Бо́жия Арсе́ния,/ и́же за пра́вду беззако́нно изгна́н бысть,/ святи́тельскаго са́на совлече́н/ и в темни́це гра́да Ре́веля,/ я́ко у́зник, смерть прия́т./ Ны́не же на Небесе́х с ли́ки пра́ведных,/ я́ко испове́дник и́стинный,/ блаже́нством наслажда́ется// и мо́лится спасти́ся душа́м на́шим.

Сла́ва, глас 8:

Мужа́йся, Це́рковь Христо́ва,/ и держа́вствуй над всу́е борю́щими!/ Христо́ви бо дру́зи о тебе́ пеку́тся,/ и предстоя́ще, и обстоя́ще,// и́хже о́бщий пра́здник ны́не соверша́еши све́тло.

И ны́не, Богоро́дичен, глас то́йже:

Влады́чице, приими́ моли́твы святы́х сро́дников на́ших/ и изба́ви зе́млю Эсто́нскую// от вся́кия ну́жды и печа́ли.

На стихо́вне стихи́ры, глас 5.

Подо́бен: Ра́дуйся:

Ра́дуйся, пресла́вне о́тче Иоа́нне,/ земли́ На́ровския изря́дный учи́телю,/ Села́ Ца́рскаго пресви́тере/ и Це́ркве Росси́йския первому́чениче,/ благода́ть бо сугу́бая даде́ся ти/ пе́рвым пострада́ти за Христа́ от безбо́жных./ Сего́ ра́ди ны́не дерзнове́ние и́маши/ усе́рдно моли́тися за ро́ды на́ша// и не оставля́ти попече́нием свои́м па́ствы Эсто́нския.

Стих: Го́споди, Госпо́дь наш,// я́ко чу́дно и́мя Твое́ по всей земли́.

Ра́дуйся, священному́чениче Дими́трие,/ Зна́менския це́ркве имени́тый па́стырю,/ ты бо зало́г, да́нный ти от Христа́ Бо́га, и ве́рность Ему́/ да́же до сме́рти му́ченическия сохрани́л еси́,/ те́мже ны́не и со А́нгелы и ли́ки эсто́нских святы́х/ на Небесе́х све́тло ра́дуешися// и мо́лишися о душа́х на́ших.

Стих: Святы́м, и́же суть на земли́ Его́,// удиви́ Госпо́дь вся хоте́ния Своя́ в них.

Ра́дуйся, священному́чениче Алекса́ндре,/ честна́я похвало́ гра́да На́рова./ Ты бо, не убоя́вся гони́телей Це́ркве Бо́жия/ и кресто́м Христо́вым прогоня́я страх челове́ческий,/ к ме́сту твоего́ муче́ния/ пра́во и дерзнове́нно ше́ствовал еси́// и моли́лся еси́ усе́рдно за убива́ющих тя.

Сла́ва, и ны́не, глас и подо́бен то́йже:

Ра́дуйся, горо́ Пю́хтицкая,/ сла́ва бо Госпо́дня на тебе́ возсия́./ Се бо Пречи́стая Богоро́дица/ восхоте́ устро́ити зде оби́тель Свою́ честну́ю,/ и́нокиням ти́хое приста́нище,/ правосла́вным лю́дем свяще́нное прибе́жище// и ми́ру утеше́ние ве́лие.

Тропа́рь, глас 4:

Днесь лику́ет Це́рковь Эсто́нская,/ ветвь плодоно́сна дре́ва Росси́йския Це́ркве су́щи/ и, я́ко плоды́ кра́сны Христу́ принося́щи,/ святы́я своя́ прославля́ет./ Тех моли́твами, Го́споди, Правосла́вие в земли́ Балти́йстей сохрани́,/ па́ству от раско́лов и междоусо́бия изба́ви/ и всем христолюби́вым лю́дем// да́руй ве́лию ми́лость.

На у́трени

На Бог Госпо́дь: тропа́рь святы́х два́жды, глас 4. Сла́ва, и ны́не, тропа́рь Пю́хтицстей ико́не Пресвяты́я Богоро́дицы, глас 1:

На горе́ святе́й па́стырем о́вчих стад яви́лася еси́,/ Де́во, Пречи́стая Богоро́дице,/ оби́тель сла́вную на ме́сте сем устро́ити восхоте́ла еси́,/ в не́йже сердца́ на́ша ми́лостивно согрева́еши,/ и ду́ши на́ша просвеща́еши,/ от пре́лестей ве́ка сего́ благода́тию нас свобожда́еши,/ и к Небе́сней Отчи́зне вы́ну простира́тися наставля́еши,/ грехи́ на́ша мно́гия очища́еши./ Сего́ ра́ди во умиле́нии благода́рно вопие́м Ти:// Ра́досте на́ша, приими́ на́ше те́плое и смире́нное о Тебе́ похвале́ние.

По 1-м стихосло́вии седа́лен, глас 2:

Собо́ре святы́х Эсто́нских,/ по́лче боже́ственный,/ моли́теся ко Го́споду/ о земне́м Оте́честве ва́шем/ и о почита́ющих вас любо́вию.

Сла́ва, и ны́не, Богоро́дичен:

Я́коже купина́, огне́м опаля́ема и невреди́ма пребы́вши, яви́ся Моисе́ю в Сина́и иногда́,/ та́ко и оби́тель Пречи́стыя Присноде́вы на горе́ Пю́хтицстей, благода́тию сия́ющи,/ непоколеби́ма пребыва́ет, освяща́ющи всех, с ве́рою в ней водворя́ющихся.

По 2-м стихосло́вии седа́лен, глас 2:

Я́ко со́лнце све́тлое,/ возсия́ честна́я па́мять святы́х земли́ Эсто́нския,/ освеща́ющи и согрева́ющи сердца́ на́ша,/ па́че же призыва́ющи подража́ти житию́ их и ре́вности о ве́ре.

Сла́ва, и ны́не, Богоро́дичен:

Ико́ны Твоея́ явле́ние, Богоро́дице Пренепоро́чная,/ славосло́вим днесь и Твое́ заступле́ние пра́зднуем:/ я́ко бо Ма́ти су́щи Живота́,/ мо́лиши о нас Сы́на Твоего́ и Бо́га на́шего,/ на Тя упова́ние и наде́жду возложи́вших.

Велича́ние:

Велича́ем вас,/ святи́и земли́ Эсто́нския,/ и чтим святу́ю па́мять ва́шу,/ вы бо мо́лите за нас// Христа́, Бо́га на́шего.

По полиеле́и седа́лен, глас 5:

Све́тло соверша́юще настоя́щее торжество́,/ восхва́лим уго́дники Бо́жия,/ зе́млю Эсто́нскую благове́стием ева́нгельским огласи́вшия,/ и ве́ру Правосла́вную в ней утверди́вшия,/ и ко Оте́честву Небе́сному путь нам указу́ющия.

Сла́ва, и ны́не, Богоро́дичен, глас то́йже:

Пречи́стая Богоро́дице Де́во,/ поми́луй нас, прибега́ющих к Тебе́ с ве́рою/ и прося́щих те́плаго Твоего́ заступле́ния:/ мо́жеши бо, я́ко Блага́я, всех спасти́ ма́терними Твои́ми моли́твами.

Степе́нна, 1-й антифо́н 4-го гла́са. Проки́мен, глас 4: Ра́дуйтеся, пра́веднии, о Го́споде,// пра́вым подоба́ет похвала́. Стих: Бу́ди, Го́споди, ми́лость Твоя́ на нас, я́коже упова́хом на Тя. Ева́нгелие от Матфе́я, зача́ло 10.

По 50-м псалме́ стихи́ра, глас 6:

Ежеле́тнюю па́мять днесь святы́х земли́ на́шея соверша́юще,/ досто́йно сия́ да ублажи́м./ Ти́и вои́стину путе́м Госпо́дним проидо́ша:/ обнища́ша бо ду́хом, и обогати́шася,/ кро́тцы бы́ша, и зе́млю кро́тких насле́доваша,/ пла́каша, и уте́шишася,/ ми́ловаша, и поми́ловани бы́ша,/ чистоты́ се́рдца достиго́ша, и Бо́га узре́ша,/ о ми́ре пеку́щеся, и боже́ственнаго сподо́бишася сыноположе́ния,/ гони́ми бы́ша пра́вды ра́ди, и ны́не на Небесе́х ра́дуются/ и приле́жно мо́лятся Го́сподеви// поми́ловатися душа́м на́шим.

Кано́н Богоро́дицы на 6 и святы́х на 8.

Кано́н Пресвяты́я Богоро́дицы, глас 8.

Песнь 1.

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Пресвята́я Тро́ице, Бо́же наш, сла́ва Тебе́.

О Тро́ице Вседержи́тельная и Еди́нице Триипоста́сная,/ ду́шу мою́, и се́рдце, и ум, молю́, просвети́ и благода́тию освяти́,/ к Боже́ственней Твое́й любви́ возведи́/ и наста́ви благоче́стно пе́ти благосе́рдие Присноде́вы Благослове́нныя.

Пресвята́я Богоро́дице, спаси́ нас.

Блага́го Царя́ Блага́я Ма́ти,/ Я́же всем благопослу́шная в проше́ниих и всеси́льная в благодея́ниих!/ Благода́ть све́та Твоего́ и нам низпосли́, Богоблагода́тная,/ песнь Тебе́ возсыла́ющим.

Лик А́нгельский ра́достно славосло́вит Тя, Влады́чице./ Мы же, бре́ннии, что Ти принесе́м?/ То́чию усе́рдная благодаре́ния.

Арха́нгельский глас вопие́м Ти: ра́дуйся, Благода́тная./ А́ще и недосто́йни есмы́, бла́гости ра́ди приими́ сей, Влады́чице,/ све́том ми́лости Твоея́ нас просвеща́ющи и благода́ть всем подаю́щи.

Кано́н святы́х земли́ Эсто́нския, глас и ирмо́с то́йже:

Вси святи́и земли́ Эсто́нския, моли́те Бо́га о нас.

Воспои́м согла́сно вси в пе́снех духо́вных/ во благоче́стии просия́вшия боже́ственныя отцы́ на́ша,/ освяти́вшия зе́млю Эсто́нскую, я́же Це́рковь Правосла́вная воспита́.

Я́ко меч обоюдоо́стрый был еси́, благове́рный кня́же Алекса́ндре,/ прогоня́я враги́ и защища́я преде́лы земли́ на́шея./ И ны́не ско́рое заступле́ние пода́ждь моля́щим тя усе́рдно.

Страда́льче святы́й, Иси́доре блаже́нне,/ и ли́че сла́вный му́чеников Ю́рьевских,/ вы, во уме́ты вме́нивше вся кра́сная ми́ра сего́,/ обрели́ есте́ Христа́, Бо́га на́шего,/ и́стинную Красоту́ и некра́домое Бога́тство.

Богоро́дичен: Сле́зы покая́ния пода́ждь ми, Пречи́стая,/ очи́сти мя от беззако́ний/ и чи́ста предста́ви Сы́ну Твоему́ и Бо́гу на́шему.

Песнь 3.

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,// я́ко несть свят, па́че Тебе́, Еди́не Человеколю́бче.

Гряди́те, ве́рнии,/ почти́м Пречи́стую Богома́терь,/ явле́нием свята́го о́браза Своего́ го́ру Пю́хтицкую освяти́вшую/ и мир и благослове́ние лю́дем правосла́вным да́рующую.

Освяща́ется, Богоро́дице, Твое́ю благода́тию всяк ум ве́рных/ и возвыша́ется к го́рнему чу́дным прише́ствием ико́ны Твоея́,/ ю́же благоче́стно почита́ем и Тебе́ ве́рно сла́вим.

Даждь нам, Богоневе́стная, ненаве́тно ше́ствовати стезе́ю богоуго́дных дея́ний,/ я́ко да Твои́м, Де́во, заступле́нием,/ злоко́зненнаго пути́ укло́ньшеся, присносу́щныя сла́вы бу́дем о́бщницы.

А́нгельскаго ми́ра вы́шшая, Пресвята́я Де́во, Влады́чице,/ омраче́нная грехми́ сердца́ на́ша просвети́/ и от земны́х попече́ний к Небе́сному поко́ю наста́ви.

Ин

Просвети́л еси́ све́том и́стинныя ве́ры Правосла́вныя лю́ди неве́рныя,/ преподобному́чениче Корни́лие./ Озари́ и нас, гре́шных, страсте́м свои́м служа́щих, благода́тию Всеблага́го Бо́га/ и на ка́мени за́поведей Христо́вых утверди́.

Удали́лася еси́ в пусты́ню с супру́гом твои́м, преподо́бная Ва́ссо,/ да Христу́ вя́щше послу́жиши;/ яви́лася еси́ до́брая строи́тельница оби́тели Пече́рския,/ немощно́е естества́ же́нскаго отри́нувши./ Те́мже и по кончи́не твое́й ди́вно просла́ви тя Госпо́дь Бог наш,/ Ему́же предстоя́щи, помина́й чту́щия тя.

Уязви́лся еси́, преподо́бне Ио́но, жела́нием жития́ страда́льческаго,/ егда́ услы́шал еси́ о кончи́не сопа́стыря твоего́ свята́го Иси́дора,/ и, оста́вив житие́ мирско́е, на по́двиги ве́лия устреми́лся еси́./ Сего́ ра́ди и ны́не оби́тель Пече́рская прославля́ет боле́зни и труды́ твоя́/ и благода́рно тебе́ вопие́т:/ ра́дуйся, устрои́телю и́ноческаго чи́на/ и моли́твенниче неусы́пный о душа́х на́ших.

Богоро́дичен: Пресвята́я Де́во,/ Ты еси́ вои́стину свяще́нников Хода́таица неусыпа́емая,/ му́чеников терпе́ние,/ преподо́бных укрепле́ние/ и всея́ земли́ Эсто́нския покро́в и защи́та./ Моли́ спасти́ся душа́м на́шим.

Седа́лен, глас 8:

Нощне́й тьме огустева́ющей,/ умножа́ется зве́здный блеск,/ и к тому́ о́чи заблу́ждших ра́достно возво́дятся./ Та́ко и умно́жившейся на земли́ грехо́вней тьме,/ возведе́м горе́ о́чи на́ша, бра́тие,/ и, сия́ние духо́вных звезд, зе́млю на́шу озаря́ющих, узре́вше,/ к Небе́сному Оте́честву потщи́мся,/ его́же да не лиши́т Госпо́дь нас, гре́шных,/ моли́твами святы́х Свои́х.

Сла́ва, и ны́не, Богоро́дичен:

Прииди́те, лю́дие,/ поклони́мся чудотво́рному и всечестно́му о́бразу Бо́жия Ма́тере,/ и к ней с любо́вию и благодаре́нием возопии́м:/ ра́дуйся, непреста́нно славосло́вимая и восхваля́емая,/ ра́дуйся, явле́нием Свои́м го́ру Пю́хтицкую освяти́вшая,/ ра́дуйся, оби́тель сла́вную зде устро́ившая,/ ра́дуйся, ико́ну Свою́, я́ко стра́жа неусы́пна и необори́ма, ей дарова́вшая,/ ра́дуйся, исто́чник воды́ живы́я в той откры́вшая,/ ра́дуйся, с се́страми неви́димо пребыва́ющая./ Ра́дуйся, Де́во Чи́стая,/ ру́це Свои́ ми́лостивно к нам простира́ющая.

Песнь 4.

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

О́браз честны́й Твой, Де́во,/ Творе́ц всех и Созда́тель, вседержи́тельною си́лою пресла́вно горе́ Пю́хтицстей дарова́/ на спасе́ние челове́ком и исцеле́ние./ Сего́ ра́ди гора́ сия́ ме́сто свя́то яви́ся.

Прииди́те, ве́рнии, поклони́мся/ и с любо́вию припаде́м чудотво́рному о́бразу Пречи́стыя Де́вы, уми́льно взыва́юще:/ низпосли́, Благода́тная, ми́лость рабо́м Твои́м.

Пречи́стый Твой о́браз, Всепе́тая,/ неизрече́нными чудесы́ и благода́тьми украси́вши,/ в земли́ Эсто́нстей просла́вила еси́./ Сего́ ра́ди мы, покланя́ющеся тому́,/ песнь благодаре́ния Тебе́ прино́сим.

Помо́щница всем христиа́ном, от Бо́га нам дарова́нная,/ Того́ моли́, Всеблага́я,/ да пре́зрит на́ша безчи́сленная согреше́ния/ и изба́вит тьмы кроме́шныя и му́ки ве́чныя.

Ин

Жезл архиере́йский вруче́н бысть тебе́, священному́чениче Плато́не,/ Патриа́рхом Всеросси́йским Ти́хоном/ на по́двиг кре́стный во дни мяте́жа крова́ваго и годи́ну лю́тых гоне́ний./ Ты же, па́стырю до́брый,/ не убоя́лся еси́ хули́телей ве́ры Правосла́вныя,/ па́стве твое́й ве́рен был еси́ да́же до сме́рти.

Еле́ем до́брых дел, священному́чениче Нико́лае,/ напо́лнил еси́ свети́ль¬ник свой,/ просвеща́я сердца́ пасо́мых све́том богоразу́мия/ и путеводя́ их в Черто́г Царя́ Небе́снаго./ Сего́ и нас сподо́би моли́твами твои́ми.

Серде́чным жела́нием распала́емь, о́тче Михаи́ле,/ е́же пострада́ти за Христа́ со святи́телем Плато́ном,/ во времена́ вла́сти безбо́жныя и годи́ны лю́тыя,/ предста́л еси́ вку́пе с ним пред гони́тели,/ показу́я нам, я́ко соверше́нная любы́ вон изгоня́ет страх.

Богоро́дичен: Ми́лостию Твое́ю, Де́во, исцели́ души́ моея́ я́звы грехо́вныя/ и ум мой просвети́, омраче́нный по́мыслы лука́выми и вра́жиею зло́бою.

Песнь 5.

Ирмо́с: У́тренюет дух мой к Тебе́, Бо́же,/ от Отца́ рожде́нному неизрече́нно// и воздви́гнувшему рог спасе́ния нам.

Ты, о Благода́тная, ми́лостивным Твои́м явле́нием го́ру Пю́хтицкую благослови́ла еси́/ и зе́млю Эсто́нскую тем просвети́ла еси́,/ к све́ту вы́шния сла́вы ве́рныя возводя́щи.

Омрачи́хомся по́мыслы, отягчи́хомся грехи́,/ но Ты, Милосе́рдная Ма́ти, просвети́ ны/ и на пра́вый путь наста́ви.

К пречестне́й Твое́й ико́не благоче́стно притека́ющия, о Богома́ти,/ и усе́рдно покланя́ющияся,/ и ве́рно повсю́ду Тя призыва́ющия предвари́,/ от бед вся́ких спаса́ющи,/ и лю́тых неду́г избавля́ющи,/ и ду́хи лука́выя прогоня́ющи,/ тишину́ и здра́вие подаю́щи всем, Влады́чице.

Не оста́ви нас, Богороди́тельнице,/ лю́тыми помышле́нии и воспомина́нии от лука́вых враго́в сту́жаемых зе́льне,/ но осени́ Твое́ю благода́тию,/ покрыва́ющи и спаса́ющи от всех их наве́т, Богоблаже́нная.

Ин

Ме́сто поко́я пра́веднаго и врата́ отве́рста в Ца́рство Небе́сное/ яви́ся ти Ре́вельская темни́ца, священному́чениче Арсе́ние./ Те́мже освяти́ся град сей и обре́те тя кре́пкаго своего́ засту́пника/ и моли́твенника о душа́х на́ших.

Ева́нгельски пожи́л еси́ на земли́, свя́те Арсе́ние,/ безро́потно претерпе́в бе́ды мно́гия:/ заточе́ние в темни́це, поноше́ние от си́льных ми́ра сего́,/ непра́ведное лише́ние са́на и про́чия злоко́зни диа́вольския./ Те́мже и Го́сподеви угоди́л еси́, кро́тко взыва́я:/ бла́го мне, я́ко смири́л мя еси́.

Благогове́йно почти́м, ве́рнии, святи́теля Агафанге́ла,/ архипа́стыря му́драго земли́ Балти́йския, хра́мов Бо́жиих созида́теля,/ Правосла́вия ревни́теля, иносла́вных попечи́теля,/ первосвяти́теля Це́ркве Росси́йския сподви́жника, му́жественнаго испове́дника/ и в сму́тная времена́ и́стиннаго миротво́рца.

Богоро́дичен: Ро́ди вси блажа́т Тя, Богоро́дице Де́во, я́коже иногда́ прорекла́ еси́./ Сего́ ра́ди и земля́ Эсто́нская арха́нгельски вопие́т Ти:/ ра́дуйся, Благода́тная, Го́сподь с Тобо́ю.

Песнь 6.

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.

Оби́тель Пю́хтицкая в пресла́внем прише́ствии Твоея́ ико́ны, Цари́це,/ чуде́с и Боже́ственных даро́в благода́тию Твое́ю испо́лнися/ во утвержде́ние благоче́стия всех ве́рных,/ е́юже днесь супоста́ты низлага́ются и сла́вящия Тя кре́пце утвержда́ются.

Селе́ние свято́е сие́, святы́й дом Твой, Де́во Богоневе́сто,/ сохрани́ от сопроти́вных нахожде́ния и от всех наве́т вра́жиих,/ и вся гра́ды и страны́ христиа́нския,/ любо́вию пою́щия Тя и ве́рно почита́ющия пречи́стый о́браз Твой.

Освяще́ние, здра́вие и спасе́ние подава́й душа́м и телесе́м на́шим, Ма́ти Бо́жия,/ благоче́стно покланя́ющимся ико́не Твое́й/ и усты́ и се́рдцем благогове́йно ю со стра́хом целу́ющим/ и ве́рою Тя при́сно сла́вящим.

Держа́вный покро́в и сте́ну необори́му стяжа́вше Тя, Присноде́во Богоро́дице,/ упова́ние на Тя с Бо́гом возлага́ем и приле́жно мо́лим:/ си́лою Твое́ю стре́лы вра́жия и ко́зни вся бесо́вския не́мощны покажи́/ и кре́пкая Помо́щница нам бу́ди.

Ин

Изря́дная похвало́ гра́да На́рова, му́чениче и па́стырю Дими́трие,/ не забу́ди нас, почита́ющих па́мять твою́,/ бу́ди щит и огражде́ние дре́внему гра́ду,/ в не́мже ду́шу свою́ положи́л еси́ за па́ству./ Бу́ди хода́тай и помо́щник правосла́вным лю́дем,/ прославля́ющим святу́ю па́мять твою́.

Воспои́м, ве́рнии, новому́ченика Алекса́ндра, па́стыря На́рвскаго,/ от гони́телей безбо́жных смерть прие́мшаго/ и кровь непови́нную за Христа́ пролия́вшаго.

Ре́вностно па́стырский долг испо́лнил еси́, священному́чениче Иоа́нне,/ моля́ся с сослужи́тели твои́ми, да преста́нет братоуби́йство во Оте́честве на́шем,/ и сего́ ра́ди, от безбо́жных убие́н,/ я́ко же́ртва благово́нная, в Ца́рство Небе́сное возше́л еси́.

Конда́к, глас 3:

Днесь святи́и земли́ Эсто́нския предстоя́т Бо́гу/ и усе́рдно за ны Ему́ мо́лятся,/ А́нгели славосло́вят с ни́ми,/ и вси святи́и Це́ркве Росси́йския им спра́зднуют,// о нас мо́лят вси ку́пно с Богоро́дицею Преве́чнаго Бо́га.

И́кос:

Еде́мскаго рая́ древеса́ добропло́дная и кра́сная яви́шася, святи́и,/ цветы́ благово́нныя уче́ний и плоды́ дел творя́щии,/ от ни́хже ду́ши на́ша пита́ются и глад наш духо́вный утоля́ется./ Прииди́те у́бо, притеце́м под сень их и ублажи́м,/ я́ко страны́ на́шея отра́ду и украше́ние/ и я́ко жития́ о́браз нам и начерта́ние./ Ти́и бо венцы́ прия́ша нетле́нныя от Преве́чнаго Бо́га.

Песнь 7.

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице, лику́юще, поя́ху:// благослове́н еси́, Бо́же оте́ц на́ших.

Честны́й о́браз Твой, Влады́чице, неизрече́нною благода́тию при́сно сия́ет,/ и дарова́нии духо́вными земны́я просвеща́ет,/ к Небе́сному наставля́ет, и к ве́чному животу́ устроя́ет/ за неизглаго́ланную Твою́ бла́гость.

Твоего́ боголе́пнаго явле́ния, Чи́стая,/ и пресла́внаго ико́ны прише́ствия и чуде́с пучи́ны/ вити́йствующих уста́ ника́коже возмога́ют испове́дати./ Мы же, немощни́и, что возглаго́лем?/ То́чию: поми́луй и спаси́ нас, Всеми́лостивая Влады́чице.

Изве́стная ве́рных Помо́щнице и всех благи́х Пода́тельнице,/ приими́ нас, с любо́вию к Тебе́ припа́дающих и вопию́щих:/ поми́луй нас, Госпоже́, поми́луй нас,/ я́коже ны́не, та́ко и во о́ный день бу́ди нам Помо́щница и Засту́пница.

Ма́ти Бо́жия Милосе́рдая,/ две́ри ми́лости Твоея́ отве́рзи нам/ и от уст мы́сленных волко́в исхити́, хотя́щих нас до конца́ погуби́ти./ Поми́луй, мо́лим Тя, Влады́чице, поми́луй,/ не отврати́ рабы́ Твоя́.

Ин

Не посрами́л еси́ досто́инства иере́йскаго,/ егда́ неве́рнии томи́ша тя стра́хом сме́ртным./ Вся ло́жныя глаго́лы, на тя возводи́мыя, отри́нул еси́ и безбоя́зненно рекл еси́:/ вина́ моя́ еди́ная, я́ко па́стырь Бо́жий есмь./ Сего́ ра́ди ублажа́ем тя, о́тче Се́ргие,/ му́ченическую кончи́ну в Везенбе́рзе за Христа́ прие́мшаго.

Всеросси́йский моли́твенниче, сла́во Кроншта́дта и Це́ркве Росси́йския, о́тче наш Иоа́нне,/ мно́гими хра́мы украси́вый зе́млю Эсто́нскую и сла́вную оби́тель Пю́хтицкую в ней утверди́вый,/ ны́не не преста́й насажда́ти и укрепля́ти в нас ве́ру Правосла́вную твои́ми к Бо́гу хода́тайствы,/ да с тобо́ю вы́ну сла́вим Всеблага́го Бо́га.

Любве́ ра́ди Христо́вы вся, я́же на земли́, приоби́дел еси́, преподо́бне Серапио́не,/ и, в пусты́ню всели́вся, мудрова́ние плотско́е умертви́л еси́,/ и по́стническими труды́ и зе́льным воздержа́нием свое́ житие́ уясни́л еси́./ Сего́ ра́ди почита́ем тя и светоно́сную па́мять твою́ пра́зднуем, богоблаже́нне.

Богоро́дичен: Ми́лостива мне бу́ди, Преблага́я Де́во,/ и, уязвле́на мя ору́жием греха́,/ врачевство́м Твоея́ моли́твы исцели́,/ благослове́н, зову́ща, Плод чре́ва Твоего́.

Песнь 8.

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,// я́ко Соде́телю всех во ве́ки.

Пресла́вная днесь пою́ще,/ святе́й ико́не Твое́й благогове́йне покланя́емся, Госпоже́ Цари́це./ Сла́вящия Тя благода́тию боже́ственною осени́,/ на враги́ укрепи́ и Оте́чество на́ше в ми́ре соблюди́.

Воспои́м с насе́льницами оби́тели Пю́хтицкия благо́й Влады́чице,/ то́ки благода́ти источа́ющей от Своея́ чудотво́рныя ико́ны:/ хва́лим, благослови́м, покланя́емся Ти, Богороди́тельнице,/ пою́ще и превознося́ще Твоя́ чудеса́ во ве́ки.

Ра́дости вина́, Всеблагослове́нная,/ ра́дуйся Всенепоро́чная, ра́дуйся, Благода́тная,/ держа́ва на́ша и огражде́ние и спаси́тельное прибе́жище./ Спаси́ ны, рабы́ Твоя́,/ на Тя бо наде́емся и Тебе́ пое́м во ве́ки.

Тя жи́зни на́шея Храни́тельницу кре́пку стяжа́хом и наде́жду спасе́ния./ Мо́лим Тя, Благосе́рдая:/ по кончи́не хода́тайствовати не преста́й о нас,/ я́ко да бу́дущих муче́ний изба́вимся/ и ми́лостива обря́щем Сы́на Твоего́ и Бо́га на́шего в день Су́дный.

Ин

Ди́вна про́поведь твоя́,/ незы́блемо упова́ние твое́,/ тве́рдо бо ве́ровал еси́ и учи́л еси́, святи́телю Плато́не,/ я́ко благоче́стие на вся поле́зно и на земли́ никогда́же исче́знет.

Ве́ру Правосла́вную пред ливо́ны пропове́давше,/ к ве́чным востеко́ша оби́телем Иси́дор пресви́тер/ и с ним собо́р му́ченический во гра́де Ю́рьеве./ Ны́не же, предстоя́ще Царю́ царе́й,/ мо́лятся о почита́ющих их па́мять.

Свяще́нством досто́йно облече́н бысть/ и преподо́бием зело́ удобре́н, преподобному́чениче Корни́лие,/ дом Богоро́дицы, украси́в, просла́вил еси́,/ чудь язы́ческую ко Христу́ приве́л еси́/ и зе́млю Эсто́нскую кро́вию свое́ю обагри́л еси́./ Те́мже со святы́ми Христу́ предстоя́,/ моли́ спасти́ся душа́м на́шим.

Богоро́дичен: Изба́ви мя от напа́стей, Влады́чице,/ и борю́щия мя враги́ побори́,/ утверди́ на ка́мени за́поведей Сы́на Твоего́/ и ду́шу мою́ просвети́, Две́ре Боже́ственнаго Све́та.

Песнь 9.

Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют.

Ико́на Твоя́, Влады́чице, святоле́пно яви́ся в Пю́хтицстей оби́тели,/ ве́рныя благода́тию озаря́ющи, вопию́щия:/ и́стинно честне́йши всех еси́, Де́во Чи́стая.

Благода́рственное пе́ние за неизрече́нное Твое́ милосе́рдие, Богоблагода́тная, от нас приими́,/ проше́ния на́ша на по́льзу исполня́ющи,/ и к высоте́ го́рней всех возведи́, ве́рно зову́щих:/ и́стинно вы́шши всех еси́, Де́во Всенепоро́чная.

Чуде́с и ми́лостей Твои́х, Влады́чице, к земли́ Эсто́нстей/ ника́коже досто́йно украси́ти мо́жем вити́йством слове́с,/ то́чию усе́рдно мо́лим Тя, Цари́це:/ прости́ нас, гре́шных и немощны́х,/ вои́стину серде́чно Тя почита́ющих.

Ро́ди вси, блажи́м Тя, Богоро́дице,/ я́ко ра́дости вся ны испо́лнила еси́/ пресла́вным явле́нием Пю́хтицкия ико́ны Твоея́, Пречи́стая;/ е́йже днесь покланя́ющеся, уми́льно мо́лим Тя:/ не лиши́, Влады́чице, Твои́х рабо́в в бу́дущем ве́це неизрече́нныя ра́дости.

Ин

Си́ла твоя́ необори́ма бысть по ве́ре твое́й, благове́рный кня́же Алекса́ндре,/ сего́ ра́ди просла́вися и́мя твое́ во всех язы́цех./ И ны́не мо́лим тя:/ враги́ на́ша неви́димо отража́й, ополча́ющияся на Правосла́вную ве́ру.

Небе́снии гра́ждане, святи́и земли́ Эсто́нския,/ не забу́дите земно́е Оте́чество ва́ше,/ я́ко на вас упова́ние по Бо́зе и Богоро́дице возложи́хом.

Прехва́льнии отцы́ на́ши,/ вас ни земля́ потаи́ла есть, но Не́бо прия́т вы,/ и отверзо́шася вам ра́йския две́ри,/ и, внутрь рая́ бы́вше, дре́ва жи́зни наслажда́етеся./ Христу́ моли́теся дарова́ти Оте́честву ва́шему мир и ве́лию ми́лость.

Богоро́дичен: Зе́млю созда́вый и не́бо одева́яй о́блаки,/ новотвори́т Госпо́дь Ада́ма,/ в плоть челове́чу от Тебе́, Де́вы Чи́стыя, оде́явся./ Сего́ ра́ди Тя, Пречи́стая, вои́стину Богоро́дицу почита́ем.

Свети́лен, глас 3:

В пе́снех восхва́лим свети́ла земли́ Эсто́нския,/ таи́нники Христа́, Боже́ственнаго Сло́ва,/ И́же сих просвети́вшаго и возлюби́вшаго/ и помо́щники нам ко спасе́нию дарова́вшаго.

Сла́ва, и ны́не, Богоро́дичен:

Пред ико́ною Твое́ю Пю́хтицкою/ и́нокинь собра́ние вопие́т Ти, Влады́чице:/ о сла́дкая Ма́ти Царя́ Христа́,/ бу́ди покро́в Твоея́ оби́тели и ра́дость всем ве́рным.

На хвали́тех стихи́ры на 4, глас 8.

Подо́бен: О, пресла́внаго чудесе́:

Днесь ра́дуется Це́рковь Эсто́нская,/ иму́щи сонм святы́х свои́х,/ ти́и бо суть пе́рвейшии хода́таи/ ко Влады́це, Христу́ Бо́гу на́шему,/ и наста́вницы ко и́стинней ве́ре,/ от земли́ в Ца́рство Бо́жие пресе́льшиися/ и ны́не усе́рдно моля́щиися/ дарова́ти душа́м на́шим мир// и ве́лию ми́лость.

Днесь, ве́рнии, похва́льными венцы́/ венча́им вся святы́я Це́ркве Эсто́нския,/ Престо́лу Бо́жию предстоя́щия/ и ми́лостивно нас посеща́ющия,/ страны́ на́шея храни́тели,/ ве́ры и́стинныя в ней утвержде́ние,/ правосла́вных побо́рники,/ и́хже моли́твами возноше́ние враго́в на́ших Христо́с Бог низложи́,// име́яй ве́лию ми́лость.

О вели́цыи сро́дницы на́ши,/ земли́ Эсто́нския засту́пницы,/ имено́ваннии и безыме́ннии,/ явле́ннии и неявле́ннии,/ Небе́снаго Сио́на дости́гшии/ и сла́ву мно́гу от Бо́га прии́мшии,/ утеше́ние нам, в ско́рби су́щим, испроси́те,/ Це́рковь на́шу во благоче́стии утверди́те// и от нас, я́ко дар, песнь благодаре́ния приими́те.

Сла́ва, глас 4:

Святи́и сро́дницы на́ши,/ цве́ти духо́внии земли́ Эсто́нския,/ похвало́ на́ша, утвержде́ние и благоути́шное приста́нище,/ ва́ми Це́рковь на́ша хва́лится,/ стяжа́вши, я́ко неистощи́мое сокро́вище,/ жития́ же ва́ша и мно́гая чудеса́/ прославля́ют просла́вльшаго вас Го́спода./ Его́же моли́те// дарова́ти душа́м на́шим ве́лию ми́лость.

И ны́не, Богоро́дичен, глас то́йже:

Днесь сия́ет благода́тию Бо́жиею гора́ Пю́хтицкая,/ иде́же яви́ся Жена́ Благоле́пная,/ све́том ди́вным облече́нная,/ Избра́нница всего́ ро́да челове́ча,/ изво́лившая сотвори́ти го́ру сию́/ ме́сто прославле́ния Своего́/ и чи́стаго, непоро́чнаго Христу́ Бо́гу служе́ния,// ме́сто святы́ни Госпо́дни в долготу́ дний.

Моли́тва

О, всеблаже́нии и богому́дрии уго́дницы Бо́жии, по́двиги свои́ми зе́млю Эсто́нскую освяти́вшии и телеса́ своя́, я́ко се́мя ве́ры, в ней оста́вльшии, душа́ми же свои́ми Престо́лу Бо́жию предстоя́щии и непреста́нно о ней моля́щиися! Се ны́не, в день о́бщаго ва́шего торжества́, мы, гре́шнии, ме́ньшии бра́тия ва́ши, дерза́ем приноси́ти вам сие́ хвале́бное пе́ние. Велича́ем ва́ша вели́кия по́двиги, духо́внии во́ини Христо́ви, терпе́нием и му́жеством до конца́ врага́ низложи́вшии и нас от пре́лести и ко́зней его́ избавля́ющии. Ублажа́ем ва́ше свято́е житие́, свети́льницы Боже́ственнии, све́том ве́ры и доброде́телей светя́щиися и на́ша умы́ и сердца́ богому́дренно озаря́ющии. Прославля́ем ва́ша вели́кая чудеса́, цве́ти ра́йстии, в стране́ на́шей прекра́сне процве́тшии и арома́ты дарова́ний и чуде́с повсю́ду благоуха́ющии. Восхваля́ем ва́шу богоподража́тельную любо́вь, предста́телие на́ши и покрови́телие, и, упова́юще на по́мощь ва́шу, припа́даем к вам и вопие́м: вси святи́и сро́дницы на́ши, от лет дре́вних просия́вшии и в после́дния дни подвиза́вшиися, явле́ннии и неявле́ннии, ве́домии и неве́домии! Помяни́те на́шу не́мощь и уничиже́ние и моли́твами ва́шими испроси́те у Христа́ Бо́га на́шего, да и мы, безбе́дно преплы́вше жите́йскую пучи́ну и невреди́мо соблю́дше сокро́вище ве́ры, в приста́нище ве́чнаго спасе́ния дости́гнем и в блаже́нных оби́телех го́рняго Оте́чества вку́пе с ва́ми и со все́ми угоди́вшими Ему́ от ве́ка святы́ми водвори́мся благода́тию и человеколю́бием Спаси́теля на́шего, Го́спода Иису́са Христа́, Ему́же со Преве́чным Отце́м и со Пресвяты́м Ду́хом подоба́ет непреста́нное славосло́вие и поклоне́ние от всех тва́рей во ве́ки веко́в. Ами́нь.

Источник: Текст утвержден Священным Синодом Русской Православной Церкви 26 января 2003 года (журнал № 88)

Месяца ноября в 19-й день

Преподобномучеников Гуслицких

Серафима Булашова, Иоасафа Крымзина и Петра Мамонтова

На велицей вечерни

На Господи, воззвах: стихиры на 8, глас 1.

Подобен: Небесных чинов радование:

Преподобнии мученицы Христови,/ волю свою в руце Божия предавше,/ подвигом добрым подвизастеся/ и, кровь свою пролиявше,/ венцами доблими увязостеся./ Темже, велию милость приимше,/ Престолу Господа предстоите/ и молитеся о душах наших.

Преподобнии мученицы Христови,/ во иночестем лице усердне потрудившеся,/ в скорбех и гонениих веру Православную сохранили есте/ и, крест свой на рамена вземше,/ любовь Божию, яже есть крепльши смерти, явили есте./ Ныне, в Чертозе Небеснем пребывающе,/ Престолу Господа предстоите/ и молитеся о душах наших.

Преподобнии мученицы Христови,/ в смирении и кротости Небесному Владыце подражающе,/ огненныя стрелы злобы угасили есте/ и, заповеди Господни соблюдающе,/ диавола мужественне посрамили есте./ Ныне в Горних селениих пребываете/ и Престолу Господа предстоите,/ молящеся о душах наших.

Преподобнии страстотерпцы,/ цвети райстии сада Христова,/ Серафиме, Иоасафе и Петре,/ благоуханием подвигов и страданий ваших,/ Церковь Русскую украсили есте/ и Отечество ваше земное прославили есте./ Темже молите Христа Бога/ да спасет души наша.

Слава, глас 8:

Приидите, христоименитии людие,/ прославим преподобномучеников Гуслицких,/ иже, заповеди Христовы сохранивше,/ в Царствие Божие внидоша/ и мзду обещанную прияша./ Ныне, в лице святых почивающе,/ прославляют Отца и Сына и Святаго Духа,/ Троицу Единосущную и Нераздельную.

И ныне, Богородичен: Царю Небесный:

Вход. Прокимен дне. И чтения три мученическая.

На литии стихира храма.

На стиховне стихиры, глас 5.

Подобен: Радуйся, Живоносный Кресте:

Радуйтеся, новомученицы Гуслицтии,/ теплии заступницы наши,/ Царствия Небеснаго наследницы,/ Духа Святаго причастницы,/ велие дерзновение ко Спасу имущии!/ Молитеся о Церкви Русстей,/ да слово истины ею неустанно возвещается,/ христоименнии людие в вере Православней утверждаются/ и в единомыслии Бога прославляют.

Стих: Честна пред Господем/ смерть преподобных Его.

Радуйтеся, новомученицы Гуслицтии,/ Серафиме, Иоасафе и Петре,/ ангели земнии и человецы Небеснии!/ Вы, жертву безкровную усердне приносивше,/ жертва живая Господеви соделастеся/ и кровь вашу за веру пролиясте./ О, преподобнии мученицы Христови,/ испросите нам прощение согрешений,/ яко предстателие наши теплии пред Господем.

Стих: Блажен муж, бояйся Господа,/ в заповедех Его восхощет зело.

Радуйтеся, преподобнии мученицы Христови!/ Вы, соблазны лукаваго отвергше,/ крест свой мужественне подъяли есте/ и, в темнице заточение претерпевше,/ лютыя смерти не убоялися есте./ Темже, яко жертвы непорочныя Господу принесшеся,/ ныне во обителех Небесных пребываете/ и нас на подвиги доброделания/ молитвами вашими укрепляете.

Слава, глас 2:

Егда оскуде вера в земли нашей,/ беззаконнии воздвигоша брань братоубийственную/ и восташа на христоименитыя люди,/ тогда новомученицы и исповедницы преславнии,/ ревностию о Бозе вооружившеся,/ мужественне подвизашася,/ да утвердится Церковь Русская.

И ныне, Богородичен, глас тойже: О, чудесе новаго:

Тропарь, глас 4:

Днесь светло красуется обитель Гуслицкая/ прославляющи преподобных мученик своих,/ Серафима, Иоасафа и Петра,/ тии бо, гонений многоразличных и смерти не убоявшеся,/ веры Православныя твердии исповедницы явишася/ и, крест страдания на месте мучения в Бутове подъемше,/ венцы нетленными от Христа увязошася./ Темже, новомученицы святии,/ молите Всемилостивого Спаса/ долгов разрешения нам даровати/ и душам нашим велию милость.

На утрени

По 1-м стихословии седален, глас 1:

Семя евангельское всем сердцем восприимше, преподобномученицы добропобеднии, благодатию Духа Святаго возрасли есте, воздержанием же и терпением, яко клас зрелый, в житницу Небесную принесени бысте. Темже, со всеми святыми ликовствующе, молите спастися душам нашим.

Слава, и ныне, Богородичен:

Настави ны на путь покаяния, уклоняющихся присно к безпутием зол и Преблагаго Господа прогневляющих, Неискусобрачная Благословенная Марие, Заступнице Усердная рода христианскаго.

По 2-м стихословии седален, глас 7:

Кто достойную похвалу принесет подвигом вашим, преподобнии страдальцы? Вы бо, евангельски неключимыя рабы себе почитающе, твердым исповеданием веры даже до смерти Христу угодили есте. Темже любовию величаем вас, теплых молитвенников о душах наших.

Слава, и ныне, Богородичен:

Стена и покров еси, Владычице, и пристанище небурное всем, в бедах сущим и к Твоему заступлению с верою притекающим. Темже и мы усердно вопием Ти: соблюди землю Русскую в Православии и единомыслии, Дево Пречистая.

Величание:

Величаем вас,/ преподобномученицы Серафиме, Иоасафе и Петре/ и чтим подвиги и страдания ваша,/ яже за Христа/ претерпели есте.

Псалом избранный:

1-й лик: Весть Господь путь праведных и путь нечестивых погибнет.

2-й лик: Работайте Господеви со страхом и радуйтеся Ему с трепетом.

1-й лик: Ты же, Господи, Заступник мой еси, Слава моя и возносяй главу мою.

2-й лик: Помилуй мя, Господи, яко немощен есмь, исцели мя, Господи, яко смятошася кости моя.

1-й лик: Отступите от Мене вси делающии беззаконие, яко услыша Господь глас плача моего.

2-й лик: Господи, Боже мой, на Тя уповах, спаси мя от всех гонящих мя и избави мя.

1-й лик: Помощь моя от Бога, спасающаго правыя сердцем.

2-й лик: Да уповают на Тя знающии имя Твое, яко не оставил еси взыскающих Тя, Господи.

1-й лик: Ты, Господи, сохраниши ны и соблюдеши ны от рода сего и во век.

2-й лик: Воздаст ми Господь по правде моей и по чистоте руку моею воздаст ми.

1-й лик: С преподобным преподобен будеши и с мужем неповинным неповинен будеши.

2-й лик: Закон Господень непорочен, обращаяй души, свидетельство Господне верно, умудряющее младенцы.

По полиелеи седален, глас 4:

Обитель Гуслицкая ныне торжествует, прославляющи преподобныя мученики своя, тии бо, на месте сем начало подвигом положивше, поты и слезами души своя возделаша, послежде, страдания и изгнания правды ради претерпевше, кровию своею землю Бутовскую обагриша. Темже, святии, молитеся за ны ко Господу.

Слава, и ныне, Богородичен:

На Тя, Богородице, упование возлагаем, вернии людие, да не постыдимся никогдаже, но имуще Тя Покров и Стену Нерушимую, вопием Ти: радуйся, Благодатная, Господь с Тобою.

Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех,/ яже воздаде ми? Всякое дыхание: Евангелие от Марка, зачало 37.

По 50-м псалме стихира, глас 6:

О, преподобнии мученицы Христови,/ Серафиме, Иоасафе и Петре,/ ангели земнии и человецы небеснии!/ Вы, жертву безкровную усердне приносивше,/ жертва живая Господеви соделастеся/ и кровь вашу за веру пролиясте./ Ныне же, во свете невечернем пребывающе,/ теплии предстателие наши,/ поминайте совершающих честную память вашу.

Канон, глас 4.

Песнь 1.

Ирмос: Моря чермную пучину/ невлажными стопами/ древний пешешествовав Израиль,/ крестообразныма Моисеовыма рукама/ Амаликову силу в пустыни победил есть.

Припев: Святии преподобномученицы Серафиме, Иоасафе и Петре, молите Бога о нас.

Трие мученицы преподобнии, благодатию Живоначальныя Троицы явственно просвещаеми, терпеливно за веру Христову подвизашася и лесть безбожную мужественне посрамиша.

Подвиги вашими и кровьми мученическими земля Гуслицкая освятися, вы же, на Христа все упование возложивше, во обители Небеснаго Отца вселилися есте.

Яви нам Господь преподобных отцев Серафима, Иоасафа и Петра и венцами победными их увенча, да прославим Бога, дивнаго во святых Своих, и исправимся покаянием.

Богородичен: Паче ума родила еси, о Дево, и по рождестве явилася еси, девствующи паки. Тем немолчными гласы, радуйся, Тебе, Владычице, верою несомненною вопием.

Песнь 3.

Ирмос: Веселится о Тебе Церковь Твоя, Христе, зовущи:/ Ты моя Крепость, Господи,/ и Прибежище, и Утверждение.

На Бога упование возлагая, преподобномучениче Серафиме, подвиги постническими и страданьми за Христа веру пламенеющую стяжал еси, сего ради во обителех Небесных с безплотными лики веселишися.

На камени веры утвердився, преподобне Петре, и мужественно гонения претерпевая, вечнующаго утешения сподобился еси, темже и нас в Православней вере утверди.

Неправедному судищу предстоя, Бога Единаго Судию имел еси, отче Иоасафе, и, путем Господним шествуя, соблазны безбожных отринул еси. Сего ради вкупе с новомученики тя величаем.

Богородичен: Смиренно приношу Ти моление, благоутробная Мати, и к Твоему прибегаю милосердию: не отврати мя, неразумнаго, от лица Твоего.

Седален, глас 8:

Мирскаго мятежа удалившеся, новомученицы Церкве Русския, преподобнии Серафиме, Иосафе и Петре, едино на потребу взыскали есте и благую часть в Царствии Небеснем наследовали есте.

Слава, и ныне, Богородичен:

О, Всепетая Богородице Владычице, преподобных похвало, мучеников славо, Ангелы восхваляемая и человеки воспеваемая, и всего мира крепкая Помощнице, избави Церковь Русскую всякаго злаго обстояния, Едина Благословенная.

Песнь 4.

Ирмос: Вознесена Тя видевши Церковь на Кресте,/ Солнце праведное,/ ста в чине своем,/ достойно взывающи:/ слава силе Твоей, Господи.

Троицы равночисленнии, преподобнии отцы Гуслицтии, треми добродетельми Духа Святаго светло украшеннии, верою несумненною, надеждею известною, любовию нелицемерною в мире просияли есте.

Исповедающе небоязненно Христа Бога нашего, твердою верою все безбожие мучителей попрасте, преподобнии отцы, и венцы нетленныя обретосте.

С благоговением притецем, вернии, к светоносным отцем и светозарным мучеником, тьму бо страстей наших разгоняют и пети нас подвизают: слава силе Твоей, Господи.

Богородичен: Обновляет человечество ново Отроча превечный Бог, явлься от Девы и Человек быв. Тому воспоим: слава силе Твоей, Господи.

Песнь 5.

Ирмос: Ты, Господи, мой свет,/ в мир пришел еси,/ Свет Святый, обращаяй из мрачна неведения/ верою воспевающия Тя.

Воини искуснии Царя Небеснаго, новомученицы Церкве Русския, полк Божественный составивше и верою Христовою вооружившеся, свободите от рабства диавольскаго люди, безбожием плененныя.

Благодать Святаго Духа возсия в сердцах ваших, преподобнии страдальцы, сего ради, ран и мучений телесных не убоявшеся, узкими враты и тесным путем Горняго Сиона достигли есте.

Яко чада Божия непорочна, святии новомученицы, неповинни и цели, посреде рода строптива и развращенна, якоже светила в мире, явилися есте.

Богородичен: О, Владычице Богородице, буди нам щит и заступление во дни испытаний, находящих на ны, разве бо Тебе иного предстательства не вемы.

Песнь 6.

Ирмос: Пожру Ти, со гласом хваления, Господи,/ Церковь вопиет Ти,/ от бесовския крове очищшися,/ ради милости от ребр Твоих/ истекшею Кровию.

Волны нечестия и безбожия сокрушишася о камень веры твоея, святе Петре, темже и благодать за ны молитися приял еси.

Егда разлучиша безбожнии душу твою от телесе, отче Серафиме, паче Богу соединился еси, достоблаженне, и Христа приобрел еси. Темже молися о почитающих тя.

Житие и страдания твоя, преподобне Иоасафе, украсиша Церковь Русскую, сего ради с новомученики тя величаем.

Богородичен: Смиренно приношу Ти моление, благоутробная Мати, и к Твоему прибегаю милосердию: не отврати мя, неразумнаго, от лица Твоего.

Кондак, глас 6:

Преподобномученицы Твои, Господи,/ руганием и ранами искушения многая прияша,/ еще же узами и темницею томими быша./ Обаче, даже до крове противу греха подвизавшеся,/ правду содеяша и Воскресению Твоему приобщишася./ Тех молитвами, Христе Боже,/ даруй нам с терпением предлежащий подвиг совершити/ и Царствия Небеснаго достигнути.

Икос:

Яко доблии оружницы Бога нашего,/ преподобномученицы преславнии,/ Серафиме, Иоасафе и Петре,/ подвиги вашими ко Христу востекли есте,/ ныне же, Престолу Божию предстояще,/ обитель вашу в мире сохраните/ и молитеся о нас, любовию вас почитающих и вопиющих сице:

радуйтеся, страстотерпцы Христа Бога нашего;

радуйтеся, венец нетленный от Него приемшии.

Радуйтеся, Православия непобедимии исповедницы;

радуйтеся, Царствия Небеснаго наследницы.

Радуйтеся, земли Московския доброе прозябение;

радуйтеся, обители нашея преславное украшение.

Радуйтеся, прибегающих к вам мудрии наставницы;

радуйтеся, призывающих вас скории помощницы.

Радуйтеся, преподобномученицы преславнии, обители Гуслицкия похвало и утверждение.

Песнь 7.

Ирмос: В пещи Авраамстии отроцы персидстей/ любовию благочестия паче,/ нежели пламенем, опаляеми, взываху:/ благословен еси в храме славы Твоея, Господи.

Раскольническая мудрования отринув, отче Серафиме преподобне, истину в Церкви Православней обрел еси и, иноческия обеты прилежно исполняя, до конца верен и послушлив Господеви пребыл еси, во дни же гонений лютых венца мученическаго сподобился еси.

Милосердный Господь, видя страдания и болезни твоя, десною Своею рукою покры тя, преподобномучениче Иоасафе, и во огни лютых испытаний помощь ти подаде.

Прещений и клеветы мучителей не убоявся, преподобномучениче Петре, воли Господней всего себе предал еси и, силою Животворящаго Креста укрепляемь, всех научал еси Христу вопити: благословен еси, Боже отец наших.

Богородичен: На Тя, Богородице, упование возлагаем, вернии людие, да не постыдимся никогдаже, но, имуще Тя Покров и Стену Нерушимую, вопием Ти: радуйся, Благодатная, Господь с Тобою.

Песнь 8.

Ирмос: Руце распростер Даниил,/ львов зияния в рове затче;/ огненную же силу угасиша,/ добродетелию препоясавшеся,/ благочестия рачители, отроцы, взывающе:/ благословите, вся дела Господня, Господа.

Божественною любовию распалаеми, древним отцем уподобилися есте, преподобнии страдальцы, и лютая мучения претерпели есте. Темже молите Господа, да не оскудеет в земли Русстей вера Православная.

Дадеся вам благодать, преподобномученицы святии, не токмо во Христа веровати, но и о Нем страдати, темже, узы тяжкия и смерть лютую претерпевше, ныне во Царствии Небеснем радуетеся и веселитеся, мзду многую обретше.

Словеса Давидова приемлюще, се что добро или что красно, но еже жити братии вкупе, вы, преподобнии, в дусе братолюбия иноческий подвиг совершали есте, темже, любовь Христову стяжавше, за веру истинную мужественне пострадали есте.

Богородичен: Егда приидеши во славе судити всяческая, Владыко Господи, десным овцам сопричти мя, грешнаго, Матере Твоея мольбами, да славлю Тя во веки.

Песнь 9.

Ирмос: Камень нерукосечный/ от несекомыя горы, Тебе, Дево,/ краеугольный отсечеся, Христос,/ совокупивый разстоящаяся естества,/ тем, веселящеся, Тя, Богородице, величаем.

Заповедь Господню исполняюще, преподобнии страстотерпцы, крест свой на рамена взяли есте и стопам Христовым последовали есте, достославнии.

Оболгания, хуления и истязания многая претерпевше, преподобнии страдальцы, Христа подвиги вашими прославили есте. егоже о нас прилежно молите, да спасет души наша.

Аще и телом сокрушени бысте, обаче светлость ваша душевная возсия благодатию Духа Святаго. Темже Христа Бога молите землю Русскую от проказы безбожия исцелити, преподобномученицы блаженнии Серафиме, Иоасафе и Петре.

Богородичен: Богородице Дево, моли Сына Твоего и Бога нашего со всеми святыми в земли Русстей просиявшими, да избавит Отечество наше от неверия и сохранит нерушиму Церковь Православную.

Светилен:

Света преумнаго зарею просвещаемии, преподобномученицы Гуслицтии прехвальнии, в нощи гонений безбожных, яко светильницы Христови многосветлии, явилися есте и, страданьми своими землю нашу просветивше, тьму нечестия в ней разсеяли есте.

Слава, и ныне, Богородичен:

Под Твою милость прибегаем, Богородице Дево, молений наших не презри в скорбех, но от бед избави нас, Едина Чистая и Благословенная.

На хвалитех стихиры, глас 1:

Отче Серафиме прехвальне,/ преподобный мучениче Христов,/ оклеветан от безбожных быв,/ поношение претерпел еси,/ за врагов же моляся,/ кончину мученическую приял еси/ и яко жертва благоприятная Господеви принеслся еси./ Темже поминай нас, чтущих святую память твою.

Преподобне отче Иоасафе,/ путь монашества от юности избрав,/ житием добродетельным достойныя плоды Владыце принесл еси,/ обаче Христос путь превосходнейший уготова ти,/ венцем страдания украсив./ Ныне же, пастырю наш добрый,/ во святых обителех пребываеши/ и имаши велию милость ко Господу молитися за ны.

Мучениче Христов, преподобне отче Петре,/ измлада Бога возлюбив,/ вся мирская во уметы вменил еси/ и, во обитель Гуслицкую пришед,/ иноческаго звания сподобился еси./ Во дни же гонений на Церковь Русскую/ прещений безбожных не убоявся,/ твердость в вере показал еси./ Темже молися, преподобномучениче,/ от страстей греховных нам избавитися/ и жизни вечныя сподобитися.

Яко звезды пресветлыя,/ на тверди церковней возсияли есте,/ новомученицы Гуслицтии,/ вы бо, Истины поборницы явившеся,/ безбожных козни сокрушили есте/ и нечестие в земли нашей обличили есте./ Темже, Царствия Небеснаго достигше,/ молите Милостиваго Бога,/ грехов оставление нам даровати/ и спастися душам нашим.

Слава, глас 6:

Днесь, вернии, сошедшеся,/ воспоим и прославим преподобных мучеников/ Серафима, Иоасафа и Петра,/ тии бо предстоят Престолу Божию/ и молятся о душах наших.

И ныне, Богородичен:

Богородице, Ты еси лоза истинная,/ возрастившая нам Плод Живота,/ Тебе молимся, молися, Владычице,/ со святыми преподобномучениками Гуслицкими,/ помиловатися душам нашим.

На Литургии

Блаженна от канона, песни 3-я и 6-я. Прокимен, глас 7: Восхвалятся преподобнии во славе/ и возрадуются на ложах своих. Стих: Воспойте Господеви песнь нову, хваление Его в церкви преподобных. Апостол к Тимофею, зачало 291. Аллилуиа, глас 6: Блажен муж, бояйся Господа,/ в заповедех Его восхощет зело. Стих: Сильно на земли будет семя его. Евангелие от Матфеа, зачало 36. Причастен: В память вечную будет праведник:

Молитва

О, всеблаженнии угодницы Христови, исповедницы Церкве Русския пресветлии, тричисленнии мученицы Серафиме, Иоасафе и Петре, веры Православныя поборницы и всех христиан теплии предстателие!

Вы, в годину лютых гонений терпением мужеским облекшеся, оболгания и хуления злобная, еще же и раны многоразличныя от нечестивых мучителей претерпели есте и, древним мучеником подражающе, любовию ко Христу Богу возгорелися есте.

Ныне же, Престолу Вседержителеву предстояще, испросите молитвами вашими веры Православныя укрепление, Отечеству нашему на враги одоление и сыновом Российским спасение. Молитеся, да поможет Господь братии обители Гуслицкия обеты иноческия сохранити, всем же верным дарует покаяние всецелое и любовь совершенную. Будите нам твердии ходатаи пред Господем в час отшествия нашего, да со всеми святыми сподобимся в Царствии Небеснем достойно воспевати Пресвятую Троицу, Отца и Сына и Святаго Духа во веки веков. Аминь.

Источник: Текст службы утвержден на заседании Священного Синода 23–24 сентября 2021 года (журнал № 67).

На велицей вечерни

На Господи, воззвах: стихиры, глас 8.

Приидите, вернии, / песньми священное и честное / преподобнаго Геннадия торжество днесь воспоим: / се бо воистину божественнаго сияния / сподобился свет прияти. / О, неизреченнаго благосердия Твоего, Владыко Господи, / имже мы познахом, // славити Тя Преблагаго.

Вожделенную благодать нося Небесную, / земных небрег еси, Геннадие священночестне: / сего ради яко безплотен, / страдательное избрал еси житие, / яко присносущая сладости потока, / благонасладитися хотя богоприятне, / и слезами, преподобномучениче, изсушил еси / мутный источник страстей, // и напоил еси душепищныя класы.

Добре подвизавшеся в житии, преподобне, / мучительския прилоги претерпел еси доблественне: / душу разжегл еси любовию божественною, / мученическим украсился еси венцем: / ангелом сликуеши достойно. / Много твое терпение, и велие дарование, // молися, отче Геннадие, о душах наших.

Христов преподобномучениче, / волею попрал еси плотскую мудрость мужески: / о временных небрегл еси, небесным ревнуя, / и тако о Христе скончався, / со ангелы водворяешися достойно. / Сего ради, твою память чтуще, молим: // молися Господеви, помиловатися душам нашим.

Слава, глас 4:

Жертву первее Богу принося безкровную, / яко священник законнейший, / преподобне отче Геннадие, / послежде яко всеплодие и приятну жертву, / тебе самаго кровию, яко мученик истиннейший, / Христу принесл еси, / егоже моли с верою и любовию совершающих твою пречестную память, / почитающим сию избавитися напастей // и всяких бед и обстояний.

И ныне, Богородичен: Иже Тебе ради Богоотец пророк Давид:

Вход. Свете Тихий. Прокимен дне. Чтения три.

Притчей чтение:

Память праведнаго с похвалами.

Притчей чтение:

Уста праведнаго каплют премудрость,

Премудрости Соломоновы чтение:

Праведных души в руце Божией,

На стиховне стихиры, глас 4.

Подвиги мудраго постника, / и болезни воина Христова / восхваляюще по долгу вернии, / возопием Господеви: / того молитвами, Христе Боже, // от всякия беды избави нас.

Стих: Честна пред Господем / смерть преподобных Его.

В Церковь Небесную священно вшел еси, / священно обогряемь, блаженне, кровию, / и Троице предстоиши, богатно сияя оттуду блистании истекающими пребогате. / Тем же днесь, отче Геннадие, / твою память светоносную совершающе, // чувствия души просвещаем.

Стих: Блажен муж бояйся Господа, / в заповедех Его восхочет зело.

Пребогатый страстей победитель быв, / мучителей победил еси: / венценосцем сликовствуя, блаженне отче Геннадие, / о всех поминай совершаюших твою память. / И ныне Христу молися, // даровати душам нашим мир и велию милость.

Слава, глас 6:

Преподобне отче Геннадие, / не дал еси сна очима твоима, / ни веждома твоима дремания, / дóндеже душу и тело от страстей свободил еси, / и себе уготовал еси Духа жилище: / пришед бо Христос со Отцем, обитель в тебе сотвори. / Единосущныя Троицы благодать приим, / великопроповедниче преподобне, // молися о душах наших.

И ныне, Богородичен, глас той же: Творец и Избавитель мой, Пречистая:

Тропарь, глас 4:

Любовию божественною пламенея, яко серафим, / сугубый крест на рамена своя подьял еси, отче преподобне: / постнически и равноангельно пожив, / иго злоключений и страданий за Христа восприял еси, / от Него же в Царствии Божией Славы, / яко доблий воин увенчан был еси. / Сего ради, вопием ти: / спасай нас молитвами твоими, // пастырю наш добрый и страстотерпче Геннадие.

На утрени

По 1-м стихословии седален, глас 4:

Земных и тлеющих наслаждения небрегл еси, и в пустыни житие возлюбил еси, мира красоты и пищи временныя возненавидел еси, и отсюду сподобился еси мученическому и постническому сочтатися лику: с ними же моли спастися нам.

Слава, и ныне, Богородичен, глас тойже:

Избави нас от нужд наших, Мати Христа Бога, рождшая всех Творца, да вси зовем Ти: радуйся, едино предстательство душ наших.

По 2-м стихословии седален, глас 2:

Дастся ти от Бога мног мир предоблий, бурю пришедшу ти лютых, преподобне отче Геннадие, непобедимый воине, и молитвенниче о хвалящих тя.

Слава, и ныне, Богородичен, глас тойже:

Пречистии руче Твои, Дево мати, простерши, покрый уповающих на Тя, и Сыну Твоему зовущия: всем подаждь, Христе, милости Твоя.

По полиелеи седален, глас 4:

В пощении искусен быв, / во страдании просиял еси / и просветил еси верныя твоими подвиги, блаженнее отче Геннадие: / темже тя вси согласно величаем.

Слава, и ныне, Богородичен, глас тойже:

Надеждо непостыдная надеющихся на Тя, / Едина Рождшая паче естества плотию Христа Бога нашего: / Того со святым преподобномучеником Геннадием моли, / подати вселенней очищение прегрешений / и всем нам прежде конца жития исправление.

Степенна, 1-й антифон 4-го гласа.

Прокимен, глас 4-й: Честна пред Господем смерть преподобных Его.

Стих: Что воздам Господеви о всех, яже воздаде ми.

Вся́кое дыхание:

Евангелие от Марка, зачало 37.

По 50-м псалме, глас 6:

Иже по образу соблюдый невредимо, / преподобне отче Геннадие, / еже по Христове вере, сопротивился еси терпеливо, / не устрашился мучительскаго прещения / и ярости богоборцев, / но духовным мечем тех посекл еси: / тем дерзновение стяжав к Богу, / спасай чтущих тя от всяких бед, // преподобный страдальче и новый мучениче Христов.

Канон Богородицы со ирмосом на 6 и святаго на 8.

Канон святаго, глас 8.

Песнь 1.

Ирмос: Воду прошед:

Пеcнь Твоему угоднику, прославльшему Имя твое, Слове Божий, даждь принести ми, яко Промыслителя и Спасителя нашего песньми возвеличу Тя.

Тя, отче преподобне, в тяжкую годину испытаний, Господь показа светильника Своего, просвещающаго души верных светом боговедения.

Отче преподобне, в странствии твоем Господа избрал еси Помощника и Покровителя, и ко спасению стопы своя направил еси, и Царствия достиг еси, идеже со Владыкою царствуеши во веки.

Богородичен: Богородице Чистая, Херувим и Серафим превысшая, Тя со Иаковом зрим Лествицу Небесную, Еюже сниде Бог.

Песнь 3.

Ирмос: Небеснаго круга:

Доблестнаго воина Христова, Геннадия преподобномученика сошедшеся похвалим достойно, прегордаго врага поправшаго и Церковь кровьми своими украсившаго.

Печальным был еси утешитель и малодушных ободритель, отче священнейший, тако и ныне не забуди нас тя прославляющих.

Троицы Святей служитель неленостный явился еси и пастырь словестному стаду Христову богомудрый, отче Геннадие, молися о чтущих тя.

Богородичен: Безмолвствуем и дивимся, Пренепорочная, како страшное и великое сие таинство совершается: Жезл Аронов прозябает и миру Творца и Жизнодавца являет.

Седален, глас 2:

Божественным Духом просвещен, свирепство богоборцев дерзновением пастырским преподобномучениче велемудренно посрамил еси: и прешед прелести пучину, ко пристанищу Божественному достигл еси, отче Геннадие. Христа Бога моли даровати нам велию милость

Слава, и ныне, Богородичен, глас тойже:

Кийждо идеже спасается, тамо праведно и притекает: и кое иное таковое прибежище, яко Ты, Богородице, покрывающее души наша.

Песнь 4.

Ирмос: Услышах, Господи:

Тебе взываем, преблаженне отче: зловерных шатания низложи и благочестие в людех утверди, яко да во гласех хвалений тя ублажаем.

Отечеству нашему в годину безверия был еси светильник, озаряющий сердца верных и просвещающий светом Благовестия Христова.

Божественных Таинств Христовых раздаятель и душ людских врачеватель явился еси, отче прехвальне, яко да твоими теплыми молитвами низпошлет нам Господь благодать Утешителя Своего Духа.

Богородичен: Царь Славы миру в зраце рабием является и дверьми затворенными с Небес на землю сходит, с человеки Слово Божие вселяется, показуя Тя, Чистая, Богородице Приснодево.

Песнь 5.

Ирмос: Просвети нас повелении Твоими:

Якоже Креститель Иоанн безмолвие возлюбил еси и пустынею воспитан был еси, громогласный проповедник покаяния явился еси, отче треблаженне Геннадие.

Якоже Илия пламенноглаголивый, ревностию по славе Господней распалаемый, молниегласный обличитель нечестия богоборцев явился еси, отче преславне Геннадие.

Богоглаголивым апостолом последуя, явился еси саможертвенный служитель и проповедатель Святыя Троицы, отче Геннадие достохвальне.

Богородичен: Заступницу рода христианскаго зрим Тя, Пречистая Дево, во бранех стену нерушимую и щит веры, тем Тя молим: не остави нас погибнути, Вседержавная Владычице.

Песнь 6.

Ирмос: Молитву пролию ко Господу:

Ни князя мира сего, ни владык богохульных, ни меча, ни огня претящих тебе не убоялся, отче преподобне, верою и упованием на Господа был еси крепок.

Заповедей Господних известный хранитель и благочестия трудолюбный насадитель был еси, отче блаженне, призывая чад своих к терпению скорбей и стяжанию смирения Христова.

Мысленных супостат главы сокрушити молимся и видимых враг Церкве и отечества нашего под нозе покорити; молися, преподобномучениче, о чтущих любовию святую память твою.

Богородичен: Руно Гедеоново, преестественно орошаемое, показует нам Рождество Твое, Спасе, и паки являет нам образ Нетления Твоея Пречистыя Матери: росу по всей земли, руно же сухо. Темже молитвами Пренепорочныя сохрани нас в мире, Господи.

Кондак, глас 3:

Послушливую отрасль винограда Глинскаго, / плодами усердия и молитвы прославленную, / добролозную ветвь вертограда Христова, / гроздами веры и благочестия украшенную, / Геннадия преподобномученика дивнаго вси ублажим, / ризы своя убелившаго токами кровей своих, / и на брак Агнца Божественнаго возшедшаго, // и выну солящагося о душах наших.

Икос:

Обнищав духом, отче преподобне, крест свой на рамена подъял еси; слезы умиленныя источая, душетлителя кротостию попрал еси; ревнуя по славе Божией и алча правды Небесней, милостивым и чистым сердцем Господа узрел еси; мир Утешителев водворяя в душах чал твоих, заповедь любви евангельской совершил еси; изгнание, поношение, злословие и самую смерть за возлюбленнаго тобою Христа претерпел еси, Геннадие священночестне, ныне же радуешися и веселишися с лики святых и выну молишися о душах наших.

Песнь 7.

Ирмос: От Иудеи дошедше отроцы:

Согрешихом, беззаконновахом пред Господем и предал еси в руце отступников мерзких, ты же, отче преподобне, к покаянию и терпению людей призывал еси и научал их вопити: благословен еси, Господи Боже отец наших.

Граду Одессе явилася еста столпа непоколебимии веры православныя: священночестне Анатолие митрополите и преподобне Геннадие досточудне. О, божественная и священная двоице! Исходатайствуйте у Бога мир отечеству нашему и Церкви Святей устроение.

В жертву непорочную все житие свое от юности Владыце Христу принесл еси, отче блаженне, Небеснаго Отечества вожделев, в воздержании бо всяком пожил еси. Ныне же вечнюеши со Христом, благословенным на престоле Славы Царствия Своего во веки.

Богородичен: Божество неопально вместившая и Превечным Светом мир осветившая, рождшая Спаса и Господа, молим Тя, Дево Всечистая: спаси и просвети души наша.

Песнь 8.

Ирмос: Царя Небеснаго:

Правилом веры и образом благочестия был еси, отче Геннадие, да подаст нам Господь молитвами твоими вся полезная ко спасению.

Кровь твоя, отче преподобне, добрым семенем веры явися, удобренным подвигами трудов твоих и орошенным слезами воздыханий твоих. Ныне же плоды славословия приими от нас, чад твоих, мучениче прехвальне.

Троичен: О, Пребезначальное Естество и Трисоставное Единство, Отче, и Сыне, и Душе Всесвятый, приими о нас молитвенника Твоего, угодника и страстотерпца, и подаждь нам прегрешений оставление и житию исправление.

Богородичен: Мати Преблагословенная, спаси нас, грешных, Царице Небесная, и отверзи нам врата Горнего Царствия воскресшаго Сына Твоего, Христа Бога нашего.

Песнь 9.

Ирмос: Воистину Богородицу Тя исповедуем:

Земля наша освятися, сокрыша тело твое честное, отче добропобедне, и Небеснии лицы возрадовашася, сретше душу твою светоносную; мы же, веселящеся в торжестве памяти твоея, величаем тя предстателя и молитвенника о нас грешных.

Причелся еси мученическим ликом, отче Геннадие, со священномучеником митрополитом Анатолием и со множеством чад твоих, сострадавших ти и за Христом на Голгофу возшедшими, с ними же тя верно ублажаем.

К Свету Незаходимому, отче, востекл еси, и в Славе Отца Небеснаго пребывая, не забуди нас, чад твоих, память твою светолепную совершающих.

Богородичен: Упование христиан, Благословенная Дево Богородице, не остави Покровом Твоим землю Русскую навеки возлюбившую Сына Твоего и Бога нашего.

Светилен:

Страданием первая добре искусився, второе же постом течение божественное совершив, на Небеса возшел еси, Христу предстоиши, преподобне отче Геннадие, за нас молися тепле поющих тя.

Слава, и ныне, Богородичен:

Сиянием, Дево, из Тебе возсиявшаго Света ум мой озари, сердце просвети, тьму греховную отгоняющи и мглу лености моея потребляющи.

На хвалитех стихиры на 4, глас 6:

Приидите песньми венчаем / Геннадия новаго страдальца Христова, / яко крин сельный и рая божественнаго благорасленный цвет: / Православныя веры утверждение, / чистоты доброта, / слава воздержания, явися явственно мирови: // темже венец прият Царствия непременен.

Мученическими кровьми священную ризу очервленив, преподобне, / вшел еси во Святая Святых достойно, славне, / идеже Свет неизреченный, / идеже Божественная Слава, / идеже глас празднующих: / от Негоже трудов твоих мученическия восприял еси победы, / и венец неувядающий, / и вечнующую добрую славу, / и райское житие, Геннадие премудре. //Со дерзновением молися о душах наших.

Мучений треволнения не поколебаша твоея души, / ни затворение долготы во мрачней темнице, / тя сокрывающее, страдальче славне: / но яко свет возсиял еси во тьме бедствующим суетия, / ихже сыны дне показал еси банею крещения, / порождением большим и спасительным, / и божественным пребыванием, // яко страдалец богоприятен, премудре Геннадие.

Кто достойно добродетелей твоих исповесть победы, / кая уста мучения и терпения изрекут, / в обоих бо благоугодил еси Христу, Геннадие блаженне: / и ныне непрестай моляся, угодниче, / спасти души наша, // яко имея, преподобномучениче, дерзновение многое.

Слава, глас 6.

Подобен: Тридневен:

Ликуй ныне, богоспасаемый граде Одессо, / яко лучами солнечными просвещаемый чудотворным образом Касперовским; / се бо богомудрый Иннокентий / со твердыми во мучениих Анатолием и Григорием, / пречудный Гавриил-храмостроитель / и дивный в чудотворениих Иона / со преподобным отцем Кукшею, / яко звезды небесныя сияющи, / присно молятся спастися граду нашему // и всем верою живущим в нем.

И ныне, Богородичен, глас тойже:

Богородице, Ты еси лоза истинная, / возрастившая нам Плод Живота, / Тебе молимся, молися Владычице / со святыми апостолы, // помиловати души наша.

На Литургии

Блаженны от канона, песни 3-я и 6-я.

Прокимен, глас 7: Честна пред Господем // смерть преподобных Его.

Стих: Что воздам Господеви о всех, яже воздаде ми.

Апостол к Тимофею, зачало 291.

Евангелие от Матфея, зачало 36.

Причастен: В память вечную будет праведник:

Источник: Службы Одесским святым. / Под общей редакцией митр. Одесского и Измаильского Агафангела; сост.: архим. Тихон (Василиу), прот. Илия Тетерько, прот. Андрей Николаиди. – Одесса: Издание Одесской духовной семинарии, Астропринт, 2009.

Ме́сяца ноября́ в 19-й день

Святи́теля Филаре́та, митрополи́та Моско́вскаго и Коло́менскаго, чудотво́рца

На ма́лой вече́рни

На Го́споди, воззва́х: стихи́ры на 4, глас 1.

Подо́бен: Небе́сных чино́в:

От ю́ности приста́нища немяте́жнаго взыска́л еси́,/ в многомяте́жнем ми́ре пребыва́я, свя́те Филаре́те,/ и суеты́ земны́я моли́твою избе́гл еси́./ Во святи́телех мона́шески пожи́в,/ в мона́сех архиере́й изря́ден был еси́,// моли́ о всех, любо́вию блажа́щих тя.

Та́йну я́вльшагося Бо́га пропове́дуя/ и свяще́нныя кни́ги изъясня́я,/ свя́те Филаре́те,/ сло́вом Бо́жиим насыща́л еси́ лю́ди а́лчущия,/ да позна́ют И́стину// и уразуме́ют, я́ко благ Госпо́дь.

Годи́ну гне́ва бу́дущаго о Оте́честве на́шем/ дарова́ тебе́ Госпо́дь предзре́ти, святи́телю Филаре́те,/ сего́ ра́ди, ско́рбный плач подъе́м,/ ве́ру кре́пку в милосе́рдие Госпо́дне о Росси́и храни́л еси́,/ и ны́не у Престо́ла Бо́жия// усе́рдно мо́лишися о спасе́нии ея́.

Ду́хом прови́дел еси́, святи́телю Филаре́те,/ бу́дущая земли́ Росси́йския,/ мра́ком объя́тая и бра́ней испо́лненная,/ и за преумноже́ние беззако́ния любве́ ума́ленная,/ те́мже моли́лся еси́ усе́рдно// ве́ре Правосла́вней непоколеби́мей пребыва́ти.

Сла́ва, глас 6:

Филаре́та Ми́лостиваго подража́теля,/ всея́ Руси́ моли́твенника,/ святы́х подви́жников собесе́дника,/ сиро́т серафи́мовых засту́пника,/ ста́рцев о́птинских покрови́теля,/ скито́в и оби́телей устрои́теля,/ учи́телей учи́теля, царе́й наста́вника,/ А́нгелов слико́вника во Ца́рствии Небе́снем,/ архиере́я Бо́жия, Филаре́та досточу́днаго// прииди́те, бра́тие, восхва́лим священноле́пно.

И ны́не, Богоро́дичен, глас то́йже:

Богоро́дице, Ты еси́ лоза́ и́стинная,/ возрасти́вшая нам плод живота́,/ Тебе́ мо́лимся,/ моли́ся, Влады́чице, со святы́ми апо́столы// поми́ловати ду́ши на́ша.

На стихо́вне стихи́ры, глас 7:

Преподо́бным по́двиги твои́ми уподо́бился еси́,/ чудотво́рцем дре́вним благода́тию,/ учи́телем вселе́нским богому́дрием,/ первосвяти́телем Моско́вским правле́нием пра́вым,// Филаре́те присносла́вный.

Стих: Свяще́нницы Твои́ облеку́тся в пра́вду// и преподо́бнии Твои́ возра́дуются.

Простеце́м оте́ц милосе́рдный был еси́,/ па́стырем архипа́стырь и́стинный,/ и́ноком а́вва богому́дрый,/ святи́телем о́браз ве́ры и благоче́стия,// Филаре́те благоиску́сный.

Стих: Блаже́н муж, боя́йся Го́спода,// в за́поведех Его́ восхо́щет зело́.

При трие́х земны́х царе́х святи́тельствуя,/ еди́ному Царю́ Небе́сному служи́л еси́,/ сла́ву челове́ческую ни во что же вменя́я,/ и́го Христо́во пресла́вно поне́сл еси́,// Филаре́те неботе́чный.

Сла́ва, глас 8:

Украше́ние Це́ркве Христо́вы/ и Росси́йских святы́х похвалу́,/ прославля́ем тя днесь, святи́телю Филаре́те,/ и мо́лим усе́рдно:/ я́ко предстои́ши у Престо́ла Небе́снаго Царя́/ и дерзнове́нное хода́тайство и́маши,// моли́ спасти́ся душа́м на́шим.

И ны́не, Богоро́дичен, глас то́йже.

Подо́бен: О, пресла́внаго чудесе́:

О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О, Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.

Тропа́рь, глас 4: Ду́ха Свята́го благода́ть стяжа́в: зри на вели́цей вече́рни.

На вели́цей вече́рни

На Го́споди, воззва́х: стихи́ры, глас 6:

Днесь благода́ть Свята́го Ду́ха нас собра́,/ с ли́ком а́нгельским и собо́ром Моско́вских святи́телей/ пра́здновати па́мять Филаре́та достохва́льнаго,/ той бо мо́лит дерзнове́нно о Це́ркви Росси́йстей,/ во е́же в ми́ре и благостоя́нии ей бы́ти// и спасти́ся душа́м на́шим.

И́ны стихи́ры, глас 2:

Архиере́ю блаже́нне Пе́тре,/ по́двиги и мощми́ твои́ми первопресто́льный град Москву́ освяти́вый,/ прииди́ с на́ми ны́не,/ да воспои́м Филаре́та святи́теля,/ и́же насле́дова ти пресла́вно// и яви́ся Це́ркве на́шея похвала́ и утвержде́ние.

Ли́ки пра́зднующих возгла́ви ны́не, святи́телю Алекси́е,/ да воспои́м Филаре́та достосла́внаго,/ и́же от гро́ба твоего́ клобу́к прие́мый,/ труды́ мно́гими тебе́ уподо́бися// и яви́ся Це́ркве на́шея похва́ла и утвержде́ние.

От Го́спода избра́нный/ и собо́ром утвержде́нный/ пасти́ наро́д Моско́вский,/ Ио́на благосла́вный/ днесь славосло́вит с на́ми/ прему́дра Филаре́та,/ упа́сша Це́рковь Ру́сскую/ и ей во всем сла́вна я́вльшася,// я́ко похвала́ и утвержде́ние.

Прему́дрость кни́жную возлюби́вый/ и собо́р святы́х ру́сских просла́вивый,/ святи́телю чу́дный Мака́рие,/ восхвали́ ны́не труды́ и по́двиги Филаре́та богому́драго,// я́ко Це́ркве на́шея похвалу́ и утвержде́ние.

Па́стырю до́брый Фили́ппе,/ со дерзнове́нием пред царе́м пра́вду глаго́лавый,/ возра́дуйся днесь с на́ми/ торжеству́ Филаре́та богоревни́ваго,/ его́же укрепля́л еси́ моли́твами твои́ми,// да яви́тся Це́ркви на́шей похвала́ и утвержде́ние.

Пе́рвый от Патриа́рхов Росси́йских,/ И́ове многомоли́твенный,/ при́зри днесь на пра́зднество на́ше,/ е́же твори́м в па́мять Филаре́та,/ я́ко иера́рха пречу́днаго// и Це́ркве на́шея похвалы́ и утвержде́ния.

Патриа́рший по́двиг страда́ньми увенча́вша,/ Ермоге́на сла́внаго призове́м моли́твенно,/ да ку́пно с ним ина́го печа́льника земли́ на́шея,/ Филаре́та любосмире́нна досто́йно почти́м,// я́ко Це́ркве Росси́йския похвалу́ и утвержде́ние.

Сла́ва, глас 8:

О, пречу́дный святи́телю Филаре́те,/ а́ввы Се́ргия учениче́ ве́рный,/ Ла́вры Тро́ицкия усе́рдный попечи́телю,/ святи́теля Инноке́нтия, апо́столом равноче́стна, покрови́телю,/ преподо́бнаго Анто́ния сотаи́нниче,/ Серафи́ма досточу́днаго почита́телю/ и всех прибега́ющих к тебе́ кре́пкий засту́пниче,// моли́ спасти́ся душа́м на́шим.

И ны́не, Богоро́дичен, глас то́йже: Царь Небе́сный:

Та́же вход. Проки́мен дне. И чте́ния.

К Тимофе́ю посла́ния свята́го апо́стола Па́вла чте́ние (главы́ 3 и 4):

Ча́до Тимофе́е!/ Вся́ко писа́ние богодухнове́нно и поле́зно есть ко уче́нию,/ ко обличе́нию, ко исправле́нию, к наказа́нию е́же в пра́вде,/ да соверше́н бу́дет Бо́жий челове́к,/ на вся́кое де́ло благо́е угото́ван./ Засвиде́тельствую у́бо аз пред Бо́гом и Го́сподем на́шим Иису́с Христо́м,/ хотя́щим суди́ти живы́м и ме́ртвым в явле́нии Его́ и Ца́рствии Его́./ Пропове́дуй сло́во,/ насто́й благовре́менне и безвре́менне,/ обличи́, запрети́, умоли́ со вся́ким долготерпе́нием и уче́нием./ Бу́дет бо вре́мя,/ егда́ здра́ваго уче́ния не послу́шают,/ но по свои́х по́хотех изберу́т себе́ учи́тели, че́шеми слу́хом./ И от и́стины слух отвратя́т и к ба́снем уклоня́тся./ Ты же трезви́ся о всем,/ злопостражди́, де́ло сотвори́ благове́стника,/ служе́ние твое́ изве́стно сотвори́./ Аз бо уже́ жрен быва́ю,/ и вре́мя моего́ отше́ствия наста́./ По́двигом до́брым подвиза́хся,/ тече́ние сконча́х, ве́ру соблюдо́х./ Про́чее у́бо соблюда́ется ми вене́ц пра́вды,/ его́же возда́ст ми Госпо́дь в день он, Пра́ведный Судия́./ Не то́кмо же мне,/ но и всем возлю́бльшим явле́ние Его́.

Ко Ефесе́ем посла́ния свята́го апо́стола Па́вла чте́ние (глава́ 6):

Бра́тие!/ Возмога́йте во Го́споде и в держа́ве кре́пости Его́./ Облецы́теся во вся ору́жия Бо́жия,/ я́ко возмощи́ вам ста́ти проти́ву ко́знем диа́вольским./ Я́ко несть на́ша брань к кро́ви и пло́ти,/ но к нача́лом и ко власте́м, и к миродержи́телем тьмы ве́ка сего́,/ к духово́м зло́бы поднебе́сным./ Сего́ ра́ди приими́те вся ору́жия Бо́жия,/ да возмо́жете проти́витися в день лют и вся соде́явше ста́ти./ Ста́ните у́бо препоя́сани чресла́ ва́ша и́стиною,/ и обо́лкшеся в броня́ пра́вды,/ и обу́вше но́зе во угото́вание благовествова́ния ми́ра,/ над все́ми же восприи́мше щит ве́ры,/ в не́мже возмо́жете вся стре́лы лука́ваго разжже́нныя угаси́ти./ И шлем спасе́ния восприими́те,/ и меч духо́вный, и́же есть глаго́л Бо́жий.

Ко Ефесе́ем посла́ния свята́го апо́стола Па́вла чте́ние (глава́ 6):

Ча́да!/ Послу́шайте свои́х роди́телей о Го́споде,/ сие́ бо есть пра́ведно./ Чти отца́ твоего́ и ма́терь,/ я́же есть за́поведь пе́рвая во обетова́нии,/ да бла́го ти бу́дет и бу́деши долголе́тен на земли́./ И отцы́, не раздража́йте чад свои́х,/ но воспитова́йте их в наказа́нии и уче́нии Госпо́дни./ Раби́, послу́шайте госпо́дий свои́х по пло́ти, со стра́хом и тре́петом,/ в простоте́ се́рдца ва́шего, я́коже и Христа́,/ не пред очи́ма то́чию рабо́тающе, я́ко человекоуго́дницы,/ но я́коже раби́ Христо́вы,/ творя́ще во́лю Бо́жию от души́,/ со благоразу́мием служа́ще, я́коже Го́споду, а не я́ко челове́ком,/ ве́дяще, я́ко ко́ждо, е́же а́ще сотвори́т благо́е,/ сие́ прии́мет от Го́спода, а́ще раб, а́ще свобо́дь./ И госпо́дие, та́яжде твори́те к ним,/ послабля́юще им преще́ния,/ ве́дуще, я́ко и вам саме́м и тем Госпо́дь есть на Небесе́х,/ и обинове́ния лица́ несть у Него́.

На лити́и стихи́ры, глас 8:

О, благоутро́бия Бо́жия неизрече́ннаго,/ о, человеколю́бия неизглаго́ланнаго:/ яви́ бо нам Госпо́дь святи́теля чу́дна, Филаре́та велему́дреннаго,/ моли́твенника и печа́льника,/ судию́ и прови́дца,/ кни́жника и вети́ю,/ чудотво́рца и пра́ведника,/ да спасу́тся вси,// и́же спасе́ния ча́ют.

Я́коже патриа́рхом дре́вним иногда́,/ век до́лгий дарова́ ти Госпо́дь, святи́телю Филаре́те,/ е́же о гресе́х наро́да пла́кати,/ о царе́х моли́тися,/ о сла́ве Оте́чества Бо́га хвали́ти,/ корми́лом церко́вным му́дро пра́вити,/ па́дших воздвиза́ти к покая́нию,/ суд пра́ведный твори́ти,/ да спасу́тся вси,// и́же спасе́ния ча́ют.

И́же плато́новым многому́дрием не прельсти́выйся,/ ина́го Плато́на, архиере́я сла́вна,/ учени́к яви́лся еси́, богому́дре Филаре́те,/ не суему́дрием мирски́м просла́вився,/ но смиренному́дренно Христу́ и лю́дем послужи́л еси́,/ да спасу́тся вси,// и́же спасе́ния ча́ют.

Сла́ва, глас то́йже:

Я́ко прее́мник апо́стольский,/ во благове́стии Христо́ве до́бре потруди́лся еси́, святи́телю,/ е́же изложи́ти сло́во Бо́жие/ и писа́ния святы́х оте́ц росси́йскою ре́чию,/ удо́бь разумева́емою людьми́ земли́ на́шея,/ и пра́вила ве́ры и благоче́стия начерта́л еси́,/ ве́рным утвержде́ние подава́яй/ и заблу́ждшим путь к покая́нию указу́яй,/ да спасу́тся вси,// и́же спасе́ния ча́ют.

И ны́не, Богоро́дичен, глас то́йже: Влады́чице, приими́ моли́твы раб Твои́х/ и изба́ви нас// от вся́кия ну́жды и печа́ли.

На стихо́вне стихи́ры, глас 2.

Подо́бен: До́ме Евфра́фов:

Сосу́де избра́нный,/ слеза́ми омы́тый,/ благода́ти и ми́лости,/ я́ко ми́ра, испо́лненный,// Филаре́те, святи́телю прему́дрый.

Стих: Восхва́лятся преподо́бнии во сла́ве// и возра́дуются на ло́жах свои́х.

О́ко у́мное Це́ркве,/ све́том и́стины/ пресла́вно возсия́вшее,/ сто́лпе богомы́слия,// Филаре́те, избра́нниче Христо́в.

Стих: Свяще́нницы Твои́ облеку́тся в пра́вду,// и преподо́бнии Твои́ возра́дуются.

Царя́ Небе́снаго архитекто́н изря́дный,/ царе́й земны́х побо́рниче,/ труба́ злата́я богосло́вия,/ уста́ благоче́стия,// Филаре́те, святи́телю прехва́льный.

Сла́ва, глас 8:

Днесь Коло́мна имени́тая,/ пресла́вно возрасти́вшая тя,/ благоче́стием твои́м хва́лится,/ днесь оби́тель Тро́ицы Живонача́льныя,/ обре́тши мо́щи твоя́, я́ко сокро́вище пребога́тое, лику́ет,/ днесь Москва́ первопресто́льная святи́тельство твое́ велича́ет,/ днесь Русь свята́я пра́зднует све́тло// честну́ю па́мять твою́, Филаре́те, святи́телю достохва́льный.

И ны́не, Богоро́дичен, глас то́йже: Безневе́стная Де́во:

Тропа́рь, глас 4:

Ду́ха Свята́го благода́ть стяжа́в,/ богому́дре святи́телю Филаре́те,/ и́стину и пра́вду ра́зумом просвеще́нным/ лю́дем пропове́дал еси́,/ мир и ми́лость се́рдцем умиле́нным/ стра́ждущим яви́л еси́,/ я́ко учи́тель ве́ры и страж неусы́пный/ па́ству росси́йскую жезло́м пра́вости сохрани́л еси́./ Сего́ ра́ди дерзнове́ние ко Христу́ Бо́гу име́я,/ моли́ дарова́ти Це́ркви утвержде́ние// и душа́м на́шим спасе́ние.

На у́трени

На Бог Госпо́дь: тропа́рь святи́теля два́жды. Сла́ва, и ны́не, Богоро́дичен.

По 1-м стихосло́вии седа́лен, глас 8:

Ны́не ра́дуется душа́ твоя́, святи́телю Филаре́те,/ Го́споду предстоя́щи,/ облече́ бо тя в ри́зу спасе́ния,/ и, я́ко жениху́, возложи́ ти вене́ц,/ и, я́ко неве́сту, украси́ тя доброде́телей красото́ю,/ те́мже моли́ спасти́ся всем нам.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь,/ А́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́,/ из Нея́же Бог воплоти́ся и Младе́нец бысть пре́жде век сый Бог наш:/ ложесна́ бо Твоя́ Престо́л сотвори́ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

По 2-м стихосло́вии седа́лен, глас 3:

Измла́да ве́лию любо́вь стяжа́л еси́ к Бо́гу,/ и си́ла Бо́жия в не́мощи пло́ти твоея́ соверши́ся, святи́телю Филаре́те,/ егда́ ни́ву земли́ Ру́сския ра́лом Боже́ственных слове́с возде́лал еси́./ Ны́не же, я́ко вре́мя жа́твы прии́де,/ испроси́ нам у Бо́га ве́лию ми́лость.

Сла́ва, и ны́не, Богоро́дичен:

Боже́ственная ски́ния была́ еси́ Сло́ва,/ еди́на Пречи́стая Ма́ти Де́во,/ чистото́ю А́нгелы превозше́дшая,/ мене́, па́че всех персть бы́вша и оскверне́нна плотски́ми прегреше́ньми,/ очи́сти моли́тв Твои́х вода́ми,/ подаю́щи, Чи́стая, ве́лию ми́лость.

По полиеле́и седа́лен, глас 4:

От ю́ности ру́ку возло́жь на ра́ло Христо́во,/ по́ты и слеза́ми мно́гими се́рдце до́бре угобзи́л еси́,/ клас духо́вный серпо́м смире́ния пожа́л еси́/ и, плод стори́чный собра́в,/ пи́щею духо́вною ты́сящи насы́тил еси́./ Сподо́би и нас ея́ прича́стниками бы́ти, пра́зднующих любо́вию святу́ю па́мять твою́.

Сла́ва, и ны́не, Богоро́дичен:

О, всепе́тая Ма́ти! Усты́ святы́х просла́вленная,/ псалмы́ духо́вными воспе́тая,/ имены́ та́инственными нарече́нная,/ приими́ от нас, гре́шных, арха́нгелов глас,/ вопию́щих Ти:/ ра́дуйся, Благода́тная, Госпо́дь с Тобо́ю.

Степе́нна, 1-й антифо́н 4-го гла́са. Проки́мен, глас 4: Благовести́х пра́вду// в Це́ркви вели́цей. Стих: Уста́ пра́веднаго ка́плют прему́дрость, и язы́к его́ возглаго́лет суд. Ева́нгелие от Иоа́нна, зача́ло 35 от полу́.

По 50-м псалме́ стихи́ра, глас 6:

Па́стырю му́дрый Филаре́те,/ звездо́ светоза́рная,/ в Це́ркви Росси́йстей возсия́вшая,/ я́коже ина́я волхво́м иногда́,/ приведи́ и нас поклони́тися ро́ждшемуся Христу́ Спа́су/ и ми́ро покая́ния,/ лива́н милосе́рдия// и сми́рну дел благи́х принести́ Ему́.

Кано́н Богоро́дицы на 6 и свята́го на 8. Кано́н свята́го, глас 6.

Песнь 1.

Ирмо́с: Помо́щник и Покрови́тель/ быстъ мне во спасе́ние,/ Сей мой Бог,/ и просла́влю Его́,/ Бог отца́ моего́/ и вознесу́ Его́,// сла́вно бо просла́вися.

Всеми́лостиве Го́споди,/ даждь ми мысль бла́гу и наста́ви се́рдце мое́/ во е́же просла́вити ди́внаго во святи́телех Филаре́та прехва́льнаго.

Я́ко плодоно́сная ветвь, от благочести́ваго ко́рене и свяще́нническаго дре́ва произше́д, свя́те Филаре́те,/ благода́ть архиере́йства досто́йно восприя́л еси́./ Сего́ ра́ди благода́рне псало́мски вопие́м:/ род пра́вых благослови́тся.

Юн ра́зум к Боже́ственным уче́нием напра́вив, прему́дре Филаре́те,/ да́же до честны́х седи́н в зако́не Госпо́дни поуча́лся еси́ день и нощь,/ сего́ ра́ди плод стори́чный Бо́гу прине́сл еси́.

Богоро́дичен: Богоро́дице Де́во,/ я́коже во успе́нии Твое́м ми́ра не оста́вила еси́,/ бу́ди и нам Путеводи́тельница во Ца́рствие Сы́на Твоего́ и Бо́га на́шего.

Песнь 3.

Ирмо́с: Утверди́, Го́споди,/ на ка́мени за́поведей Твои́х/ подви́гшееся се́рдце мое́,// я́ко еди́н свят еси́ и Госпо́дь.

Филаре́та Ми́лостиваго и́мя прие́м, святи́телю Филаре́те,/ сосу́д доброде́телей твои́х ми́лостию украси́л еси́,/ сего́ ра́ди я́ко оте́ц чадолюби́вый лю́дем росси́йским яви́лся еси́.

Во всем после́дуяй Боже́ственным отце́м,/ прему́дрость Бо́жию я́ко наста́вницу избра́л еси́, святи́телю,/ и, Це́ркве Росси́йския до́брый па́стырь быв,/ благоче́стию па́ству научи́л еси́.

Златоу́сту сла́вному си́лою сло́ва подо́бяся,/ Бо́га Сло́ва вои́стину возсла́вил еси́, святи́телю Филаре́те,/ те́мже слове́сными венцы́ тя велича́ем.

Богоро́дичен: Несть пречи́ста, я́ко Ты, Де́во,/ и несть гре́шен, я́ко аз, окая́нный,/ те́мже, безнаде́жен сый, на Тя упова́ние мое́ возлага́ю.

Седа́лен, глас 8:

Ты еси́ па́стырь до́брый и учи́тель богому́дрый,/ святи́телю о́тче Филаре́те,/ тобо́ю Бог украси́ Це́рковь Свою́/ и те́ло твое́, многоле́тно покрове́нное в земли́, нетле́нно яви́ лю́дем Свои́м./ Те́мже не преста́й моли́тися о хва́лящих тя и чту́щих па́мять твою́,/ прося́ оставле́ния грехо́в и спасе́ния душа́м на́шим.

Сла́ва, и ны́не, Богоро́дичен:

Я́ко Всенепоро́чная Неве́ста Творца́,/ я́ко Неискусобра́чная Ма́ти Изба́вителя,/ прия́телище я́ко су́щи Уте́шителя, Препе́тая,/ све́тлое жили́ще доброде́телей соверши́ мя,/ отжени́ о́блак страсте́й и Вы́шняго прича́стия сподо́би/ и све́та невече́рняго моли́твами Твои́ми.

Песнь 4.

Ирмо́с: Услы́ша проро́к/ прише́ствие Твое́, Го́споди, и убоя́ся,/ я́ко хо́щеши от Де́вы роди́тися/ и челове́ком яви́тися, и глаго́лаше:/ услы́шах слух Твой и убоя́хся,// сла́ва си́ле Твое́й, Го́споди.

Христа́ Бо́га Помо́щника и Засту́пника при́сно име́я в се́рдце твое́м, святи́телю Филаре́те,/ я́ко дре́вле Моисе́й началово́ждь, в беда́х и искуше́ниих лю́ди укрепля́л еси́/ и науча́л еси́ взыва́ти к Нему́ я́ко Помо́щнику и Засту́пнику.

Сугу́бое попече́ние о ю́ных лю́дех име́л еси́, святи́телю Филаре́те,/ е́же бы́ти им благочести́вым, трудолюби́вым и рачи́тельно уча́щимся зако́ну Госпо́дню/ и служи́ти Це́ркви на похвалу́ и Оте́честву на по́льзу.

Любо́вь Небе́сную на земли́ ева́нгельски стяжа́вый,/ горе́ упра́вил еси́ ду́шу твою́, пресла́вне Филаре́те,/ наставля́я ве́рныя лю́ди го́рняя помышля́ти, а не себе́ угожда́ти.

Богоро́дичен: Сове́та преве́чнаго смотре́ние разуме́в проро́к,/ та́йну рождества́ Де́вы преднапису́яй, взыва́ше:/ возвеселю́ся о Бо́зе, Спа́се Мое́м.

Песнь 5.

Ирмо́с: Сою́зом любве́ связу́еми апо́столи,/ влады́чествующему все́ми себе́ Христу́ возло́жше,/ кра́сны но́ги очища́ху,// благовеству́юще всем мир.

Апо́стольское рече́ние, я́ко си́ла Бо́жия в не́мощи соверша́ется,/ на тебе́ испо́лнися, святи́телю./ Ты бо, не́мощен пло́тию, па́жить земли́ Ру́сския Боже́ственными словесы́ возде́лал еси́/ и мно́гия лю́ди ко Христу́ приве́л еси́.

Благода́ти Свята́го Ду́ха испо́лнься,/ сло́во Бо́жие ре́вностно пропове́дал еси́/ и та́йну Пресвяты́я Тро́ицы и воплоще́ния Бо́га Сло́ва преизя́щно изъясни́л еси́./ Ны́не же Бо́гу предстоя́,/ моли́ся о почита́ющих тя, Филаре́те достопа́мятне.

Я́ко зе́ницу о́ка и сокро́вище многоце́нное,/ храни́ти ве́ру Правосла́вную запове́дал еси́ нам, святи́телю Филаре́те,/ в ней бо есть утвержде́ние Це́ркве и Оте́чества благоде́нствие.

Богоро́дичен: О́тчую Прему́дрость во утро́бе Свое́й носи́вшая, Влады́чице,/ в нощи́ ми́ра блужда́ющих к све́ту Христо́ву наста́ви и сою́зом любве́ соедини́,/ я́ко Богоро́дица еси́ и Ма́ти Све́та.

Песнь 6.

Ирмо́с: Возопи́х всем се́рдцем мои́м к Ще́дрому Бо́гу,/ и услы́ша мя от а́да преиспо́дняго,/ и возведе́// от тли живо́т мой.

Прему́дростию Бо́жиею вразумля́емь,/ я́ко Соломо́н му́дрый, суд пра́вый и ми́лостивый потща́лся еси́ твори́ти,/ да ве́дают лю́дие, я́ко пра́ви суть пути́ Госпо́дни.

Ве́дая го́рькия рабо́ты и тяготы́ жития́ земледе́лателей, святи́телю Филаре́те,/ потща́лся еси́ помощи́ росси́йскому госуда́рю/ провозгласи́ти лю́дем ча́емое свобожде́ние.

О, любы́ Бо́га Отца́, распина́ющая,/ любы́ Сы́на, распина́емая,/ и любы́ Ду́ха Свята́го, торжеству́ющая си́лою кре́стною, / благогове́йне взыва́л еси́, святи́телю Филаре́те.

Богоро́дичен: О, Де́во Пречи́стая,/ Сло́вом Бо́жиим, да бу́дет, отрази́ла еси́ от Себе́ зако́нное по естеству́ недоуме́ние,/ егда́ Гаврии́л Арха́нгел Ти предста́, благовеству́я рождество́ Емману́ила,/ благогове́йне взыва́л еси́, святи́телю Филаре́те.

Конда́к, глас 2:

Я́ко и́стинный подража́тель преподо́бнаго Се́ргия,/ доброде́тель измла́да возлюби́л еси́, богоблаже́нне Филаре́те,/ я́ко па́стырь пра́ведный и испове́дник непоро́чный,/ по святе́м преставле́нии от безбо́жных поруга́ние и поноше́ния прия́л еси́,/ Бог же зна́меньми и чудесы́ тя просла́ви// и засту́пника Це́ркве на́шея яви́.

Песнь 7.

Ирмо́с: О́троцы в Вавило́не пе́щнаго пла́мене не убоя́шася,/ но, посреде́ пла́мене вве́ржени,/ ороша́еми поя́ху:// благослове́н еси́, Го́споди Бо́же оте́ц на́ших.

Я́коже Елисе́й иногда́ ми́лоть Илиину́,/ клобу́к от гро́ба святи́теля Алекси́я прия́л еси́, святи́телю Филаре́те,/ да благода́ть сугу́бую получи́ши, воспева́я:/ благослове́н еси́, Бо́же оте́ц на́ших.

А́ще и чтил еси́ царя́ земна́го,/ но раболе́пствовати пред ним не восхоте́л еси́, святи́телю,/ Царю́ же Небе́сному боголе́пную честь воздава́л еси́, взыва́я:/ благослове́н еси́, Бо́же оте́ц на́ших.

Рабо́тая Го́сподеви со стра́хом,/ не взира́л еси́ на похвале́ния и поноше́ния, святи́телю Филаре́те,/ то́кмо в се́рдце с тре́петом взыва́л еси́ к Судии́ Пра́веднейшему:/ благослове́н еси́, Бо́же оте́ц на́ших.

Ум чист, чу́вства до́брая и во́лю благу́ю,/ я́ко еди́но во о́браз Тро́ицы Святы́я име́я, святи́телю Филаре́те,/ Тро́ицы единосу́щие просла́вил еси́, взыва́я:/ благослове́н еси́, Бо́же оте́ц на́ших.

Богоро́дичен: Отрокови́це Пречи́стая,/ чудеси́ рождества́ Твоего́ дивя́щеся,/ Избра́вшему Тя зове́м:/ благослове́н еси́, Бо́же оте́ц на́ших.

Песнь 8.

Ирмо́с: За зако́ны оте́ческия/ блаже́ннии в Вавило́не ю́ноши, предбе́дствующе,/ царю́ющаго оплева́ша повеле́ние безу́мное/ и, совокупле́ни, и́мже не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́,// и превозноси́те во вся ве́ки.

Егда́ благи́й Госпо́дь попусти́ пове́трие губи́тельное во гра́де Москве́,/ тогда́ ты, святи́телю Филаре́те, к покая́нию и моле́бствию наро́д призыва́л еси́ взыва́ти:/ Го́спода по́йте, дела́, и превозноси́те во вся ве́ки.

И́же моли́твами твои́ми исцеле́ние обре́тшии/ и спасе́ние от сме́рти улучи́вшии,/ благода́рственное пе́ние принесо́ша, глаго́люще:/ Го́спода по́йте, дела́, и превозноси́те во вся ве́ки.

Отце́м святы́м подража́я,/ уста́вы и́ночеству препо́дал еси́, свя́те,/ да А́нгелом сослу́жат и́ноков собо́ри и с ни́ми ли́ки неве́ст Христо́вых, взыва́юще:/ Го́спода по́йте, дела́, и превозноси́те во вся ве́ки.

Богоро́дичен: Цари́цу Небесе́ и земли́, А́нгелов со́нми и челове́ков собо́ри,/ по́йте и превозноси́те во вся ве́ки.

Песнь 9.

Ирмо́с: Стра́нствия Влады́чня/ и Безсме́ртныя Трапе́зы/ на го́рнем ме́сте/ высо́кими умы́, ве́рнии, прииди́те, наслади́мся,/ возше́дша Сло́ва, от Сло́ва научи́вшеся,// Его́же велича́ем.

Ре́вностию по Бо́зе на высоту́ доброде́телей возше́д,/ сла́вы ми́ра сего́ удаля́лся еси́, свя́те,/ взыску́яй сла́вы то́кмо от Христа́,/ Той бо есть еди́ный Царь ми́ра и Спас душ на́ших.

Егда́ сверши́ся кончи́на свята́я твоя́,/ возскорбе́ша лю́дие росси́йстии, достохва́льне святи́телю,/ ты же не оста́вил еси́ их си́ры,/ дерзнове́нно моля́ся еди́ному Царю́ ми́ра и Спа́су душ на́ших.

Торжеству́йте, лю́дие,/ святи́теля Филаре́та па́мять чту́ще,/ и́же служи́тель до́ма Богоро́дицы быв,/ просла́ви Ту, я́ко в моли́твах неусыпа́ющую Засту́пницу.

Богоро́дичен: Русь Свята́я, лику́й ны́не,/ за тя бо мо́лит Сы́на Своего́/ Пречи́стая Богоро́дица Де́ва с Филаре́том приснохва́льным/ и все́ми святы́ми твои́ми.

Свети́лен:

Я́ко благоче́стия лампа́ду светолу́чну,/ ри́тора преизя́щна, па́стыря милосе́рдна, судию́ прему́дра,/ прииди́те, ве́рнии, Филаре́та благопода́теля любо́вию ублажи́м.

Сла́ва, и ны́не, Богоро́дичен:

Что Ти принесе́м, Благода́тная, ру́ки иму́ще оскверне́ны?/ Ка́ко воспое́м Тя, уста́ иму́ще нечи́ста?/ Ка́ко восхва́лим Тя, се́рдце иму́ще лука́во?/ Оба́че моли́твами святи́теля Филаре́та взыва́ем Ти:/ ра́дуйся, Неве́сто Неневе́стная.

На хвали́тех стихи́ры на 4, глас 5.

Подо́бен: Ра́дуйся, живоно́сный Кре́сте:

Ра́дуйся, святи́телю о́тче Филаре́те!/ Та́инство Креста́ позна́вый/ и стезе́ю неботе́чною/ чрез ско́рби и сла́ву ми́ра ше́ствовавый,/ пред цари́ и ни́щими/ сло́во кре́стное глаго́лал еси́/ и сие́ нело́жно житие́м запечатле́л еси́,// прие́м от Го́спода вене́ц и ве́лию ми́лость.

Ра́дуйся, святи́телю о́тче Филаре́те!/ Ты Христу́ во́лею после́довал еси́,/ не то́кмо на Фаво́ре во сла́ве с Ним бы́ти жела́вый,/ но и на Голго́фу ве́рно возше́дый,/ по сме́рти же поруга́нию телесе́ пре́дан был еси́/ и, я́ко зерца́ло све́тлое Со́лнца и́стины,/ стране́ Росси́йстей яви́лся еси́.// Сего́ ра́ди обре́л еси́ у Го́спода вене́ц и ве́лию ми́лость.

Ра́дуйся, святи́телю о́тче Филаре́те!/ Ты и́го Христо́во благо́е до́бре поне́сл еси́,/ ри́зу души́ своея́ истка́в,/ светле́йшу па́че риз земны́х./ Благода́ть же Бо́жия,/ ю́же по́двигом та́йным стяжа́в,/ яви́ тя те́пла моли́твенника/ и да́ром проро́чества, зна́меньми и чудесы́ просла́ви тя.// Сего́ ра́ди тя ублажа́ем.

Сла́ва, глас 2:

О, Филаре́те сла́вный,/ сло́ву и́стины де́лом после́дуя,/ по́двигом сокрове́нным подвиза́лся еси́,/ те́мже, я́ко и апо́столом иногда́,/ даде́ся ти власть от Христа́ Бо́га/ бе́сы изгоня́ти и немощны́я цели́ти,/ гряду́щая прорица́ти и от бед избавля́ти./ Сего́ ра́ди у́бо просла́вльшаго тя Го́спода сла́вы/ умиле́нною душе́ю// правосла́вно велича́ем.

И ны́не, Богоро́дичен:

Все упова́ние мое́ на Тя возлага́ю,/ Ма́ти Бо́жия,// сохрани́ мя под кро́вом Твои́м.

На Литурги́и

Блаже́нны от кано́на, пе́сни 3-я и 6-я. Проки́мен, глас 1: Уста́ моя́ возглаго́лют прему́дрость,// и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси живу́щии по вселе́нней. Апо́стол ко Ефесе́ем, зача́ло 233. Аллилу́ия, глас 4: Уста́ пра́веднаго поуча́тся прему́дрости. Стих: Язы́к его́ возглаго́лет суд. Ева́нгелие от Матфе́я, зача́ло 11. Прича́стен: В па́мять ве́чную бу́дет пра́ведник:

Молитва

О, преславне и богомудре святителю Христов Филарете, Российския Церкве светильниче, земли нашея похвало и граду Москве украшение! Ты житием и служением твоим трием вселенским святителем был еси подобник:

Василию Великому – яко бытие сущих изъяснил еси, Церкве Божия и Таин Христовых строитель добрый явился еси, иноческих уставов быв ревностный исполнитель и покровитель;

Григорию Богослову – яко неботаинственных созерцаний о Святей Троице и о Бозе Слове сподобился еси и сих искусный провозвестник явился еси;

Иоанну Златоустому – яко неустанный проповедник и учитель покаяния народа Божия был еси.

И ныне, вкупе с ними предстоя во славе Престолу Божию и ходатайствуя о нас, моли Церкви Российстей на камени исповедания Православныя веры утвержденней быти, стране нашей мир и единение даровати, пастырем слово Божественныя Истины право правити, град Москву и паству твою от всяких напастей сохранити.

Призри с Небесе, святителю, на ны, чада твоя, и даруй нам теплым твоим ходатайством ко Господу в заповедех Его преспевати, веру тверду, любовь нелицемерну и благочестие до последняго часа смертнаго сохранити, да непостыдно предстанем Спасителю нашему Господу Иисусу Христу, Емуже со Отцем и Святым Духом подобает слава, честь и поклонение ныне, и присно, и во веки веков. Аминь.

(Молитва утверждена Священным Синодом в составе акафиста свт. Филарету 24.12.2004.)

Источник: Текст утвержден Священным Синодом Русской Православной Церкви 26 января 2003 года (журнал № 88)

Ме́сяца ное́мврия в 27-й день

Собо́р новому́чеников и испове́дников Ра́донежских

На вели́цей вече́рни

На Го́споди, воззва́х: стихи́ры, глас 6.

Подо́бен: Все отло́жше:

Все отложи́вше мирско́е пристра́стие,/ новому́ченицы и испове́дницы Ра́донежстии,/ Христа́ всем се́рдцем возлюби́ли есте́/ и, взе́мше крест свой,/ Тому́ после́довали есте́ невозвра́тным по́мыслом./ Сего́ ра́ди, благода́ть восприе́мше,/ изгна́ния и у́зы темни́чныя,/ бе́дствия, лише́ния, глад и хлад,/ и муче́ния теле́сная претерпе́ли есте́/ и ве́ру Правосла́вную сохрани́ли есте́./ Ны́не же, с преподо́бным Се́ргием/ во сла́ве Бо́гу предстоя́ще,// моли́те спасти́ся душа́м на́шим.

Все мирско́е мудрова́ние отри́нувше,/ святи́и новому́ченицы Ра́донежстии,/ в вертогра́де духо́внем до́ма Святы́я Тро́ицы учи́вшии и учи́вшиися,/ Христа́ Прему́дрость Бо́жию возлюби́ли есте́,/ му́дрость бо Небе́сная/ чиста́, ми́рна, кротка́, благопокорли́ва,/ нелицеме́рна и несумне́нна,/ е́юже испо́лнившеся,/ Христа́ небоя́зненно пропове́дали есте́/ и вене́ц страда́ния восприя́ли есте́./ Ны́не же, с преподо́бным Се́ргием/ во сла́ве Бо́гу предстоя́ще,// моли́те спасти́ся душа́м на́шим.

Все упова́ние на Бо́га возложи́вше,/ святи́и новому́ченицы Ра́донежстии,/ свяще́нницы достоблаже́ннии,/ я́ко и́стиннии служи́телие Бо́га жива́го,/ во дни разоре́ния Тро́ицкия ла́вры/ во окре́стных хра́мех же́ртву безкро́вную приноси́ли есте́,/ па́ству без попече́ния не оставля́юще,/ о беззако́нных же моли́лися есте́:/ Го́споди, прости́ им,/ не ве́дят бо что творя́т./ Ны́не же, с преподо́бным Се́ргием/ во сла́ве Бо́гу предстоя́ще,// моли́те спасти́ся душа́м на́шим.

Все́ю душе́ю Бо́га возлюби́вше,/ святи́и новому́ченицы Ра́донежстии,/ посреде́ мирска́го мяте́жа/ во вся́цем ро́де и зва́нии/ во благоче́стии пожи́ли есте́./ Во дни же гоне́ний лю́тых,/ покро́ва и заступле́ния преподо́бнаго Се́ргия взыску́юще,/ гра́да его́ не оста́вили есте́/ и, до́бре Це́ркви Правосла́вней послужи́вше,/ я́ко и́стиннии му́ченицы и испове́дницы пострада́ли есте́./ Ны́не же, со святы́м а́ввою/ во сла́ве Бо́гу предстоя́ще,// моли́те спасти́ся душа́м на́шим.

Сла́ва, глас то́йже:

Измла́да по́стническому житию́ навы́к,/ о́тче преподо́бне Крони́де,/ во оби́тель Святы́я Тро́ицы всели́лся еси́/ и и́стинный учени́к преподо́бнаго Се́ргия яви́лся еси́./ Те́сным путе́м и́ноческим после́дуя,/ удо́бь возше́л еси́ во оби́тель Небе́сную,/ иде́же воздая́ние трудо́в твои́х/ и вене́ц неувяда́емый прия́л еси́./ Те́мже моли́ся вку́пе с преподо́бным Се́ргием,/ е́же святе́й Ла́вре утвержде́нней бы́ти// и душа́м на́шим спасти́ся.

И ны́не, Зна́мения, глас то́йже:

Весели́теся, лю́дие,/ и вси правосла́внии собо́ри вели́каго Нова́града днесь,/ и рука́ми восплещи́те, язы́цы, с весе́лием:/ се бо Цари́ца, Царя́ Христа́ ро́ждшая,/ святи́телю яви́ся чу́дным о́бразом,/ дерза́ти наро́дом повелева́я,/ я́коже не́кий воево́да;/ в печа́ли су́щим тогда́ ра́дость сотвори́,/ сопроти́вных победи́вши./ И Тебе́, ра́дость ро́ждшей всем, любо́вию вопие́м:// Де́во Пречи́стая, моли́ спасти́ся душа́м на́шим.

Вход. Проки́мен дне. И чте́ния му́ченическая.

На лити́и стихи́ра хра́ма.

Сла́ва, святы́х, глас 5:

Прииди́те, лю́дие,/ новому́чеников и испове́дников Ра́донежских пе́сньми и пе́нии восхва́лим,/ честну́ю па́мять их соверша́юще и глаго́люще:/ ра́дуйтеся, оте́чества на́шего пресла́внии свети́льницы,/ ра́дуйтеся, я́ко кровь свою́ за Христа́ пролия́ли есте́,/ ра́дуйтеся, я́ко у́зким путе́м на Не́бо возшли́ есте́,/ ра́дуйтеся, я́ко с преподо́бным Се́ргием предстоите́ Пресвяте́й Тро́ице,/ Ю́же непреста́нно моли́те// дарова́ти душа́м на́шим мир и ве́лию ми́лость.

И ны́не, Зна́мения, глас 6:

Се день избавле́ния на́шего наста́,/ и сме́рти премене́ние,/ ра́дуйтеся, собо́ри, днесь вели́каго Нова́града,/ и веселя́щеся торжеству́йте:/ и́же бо на нас подви́гшиися,/ коне́чне Богора́нными я́звами уязви́шася./ Те́мже Пречи́стей, и из Нея́ нетле́нно воплоще́нному Сло́ву вопие́м:/ Иису́се всеси́льне,/ моли́твами ро́ждшия Тя,// спаси́ всех нас, я́ко милосе́рд.

На стихо́вне стихи́ры, глас 2.

Подо́бен: До́ме Евфра́фов:

Святи́и сро́дницы на́ши,/ Небе́снии предста́телие,/ те́плии моли́твенницы,/ ча́да Се́ргия преподо́бнаго,// моли́теся о нас ко Го́споду.

Стих: Воззва́ша пра́веднии,// и Го́сподь услы́ша их.

Земле́ избра́нная,/ Ма́ковец издре́вле имену́емая,/ собо́ром му́ченик све́тло украше́нная,/ досто́йно весели́ся и ра́дуйся// в сей день пресла́внаго торжества́.

Стих: Честна́ пред Го́сподем// смерть преподо́бных Его́.

Преподобному́чениче Крони́де,/ ве́рный прее́мниче а́ввы Се́ргия,/ нача́льниче ли́ка новому́ченик,/ в земли́ Ра́донежстей подвиза́вшихся,// с ни́ми моли́ся о нас ко Го́споду.

Сла́ва, глас то́йже:

Те́плии на́ши засту́пницы,/ Ра́донежстии му́ченицы и испове́дницы,/ Правосла́вныя ве́ры побо́рницы/ и Святы́я Тро́ицы ве́рнии служи́телие,// моли́теся о е́же спасти́ся нам.

И ны́не, Зна́мения, глас 8:

Мня́щеся непокори́вии/ от основа́ния разори́ти град Твой, Пречи́стая,/ не разуме́вше по́мощь Твою́, Влады́чице;/ но си́лою Твое́ю низложе́ни бы́ша,/ на бежа́ние устремля́хуся,/ и я́коже ю́зами желе́зными, слепото́ю свя́зани бы́вше,/ и мра́ком, я́коже дре́вле Еги́пет, объя́ти не разуме́вше,/ до́ндеже и коне́чне побежде́ни бы́ша./ Те́мже чи́стою ве́рою сла́вим Тя,/ и Сы́ну Твоему́ любе́зно вопие́м:/ моли́твами ро́ждшия Тя,/ Иису́се всеси́льне, неизрече́нная ра́досте,/ сохраня́й град Твой невреди́м,// я́ко милосе́рд и Человеколю́бец.

Тропа́рь, глас 5:

Новому́ченицы и испове́дницы земли́ Ра́донежския,/ ве́рная ча́да Се́ргия преподо́бнаго,/ вы, гоне́ний лю́тых не убоя́вшеся,/ ве́ры ра́ди до́бре подвиза́стеся/ и страда́ния Христа́ ра́ди претерпе́сте./ Те́мже ны́не в Небе́сных черто́зех пребыва́ете/ и прославля́ете Тро́ицу Живонача́льную,// Ю́же моли́те спасти́ся душа́м на́шим.

На у́трени

По 1-м стихосло́вии седа́лен, глас 2:

Ве́лия ве́ры исправле́ния,/ во изгна́нии и го́рьких рабо́тах новому́ченицы и испове́дницы Ра́донежстии,/ я́ко в раи́ сла́дости, любве́ Бо́жия приобща́хуся,/ и́мже преподо́бный Се́ргий кре́пкий защи́тник явля́шеся./ Тех моли́твами, Христе́ Бо́же, спаси́ ду́ши на́ша.

Сла́ва, и ны́не, Зна́мения, глас 4.

Подо́бен: Яви́лся еси́ днесь:

О́чи мы́сленныя очи́стивше, прииди́те, ли́цы вели́каго Нова́града, днесь,/ торжеству́им све́тло, чту́ще Богоотрокови́цу, добро́ту Иа́ковлю,/ и Неве́сту всех Царя́ Христа́ Бо́га на́шего:/ Сия́ бо показа́ся Не́бо, и кра́сная пала́та, и храм одушевле́нный,/ и Сея́ си́лою проти́вныя побежда́ем.

По 2-м стихосло́вии седа́лен, глас 8:

Я́ко му́ченики и испове́дники и́стинныя,/ восхва́лим, ве́рнии, до́брыя па́стыри ста́да Христо́ва/ вку́пе с бра́тиею оби́тели Святы́я Тро́ицы и учи́тели вертогра́да духо́внаго и та́ко им возопии́м:/ ра́дуйтеся, пре́лесть безбо́жия до́блественне обличи́вшии,/ ра́дуйтеся, за Христа́ страда́ния претерпе́вшии,/ Ему́же моли́теся согреше́ний оставле́ние дарова́ти/ пра́зднующим любо́вию святу́ю па́мять ва́шу.

Сла́ва, и ны́не, Зна́мения, глас 1.

Подо́бен: Гроб Твой, Спа́се:

Пречи́стая Твоя́ ико́на, Богоро́дице Де́во,/ врачевство́ гра́ду Твоему́ дарова́ся духо́вное,/ к не́йже приходя́ще покланя́емся и честву́ем,/ и от жела́ния се́рдца целу́ем, исцеле́ний благода́ть почерпа́юще,/ и неду́г теле́сных, и душе́вных страсте́й, Твои́ми моли́твами свобожда́емся.

Велича́ние:

Велича́ем вас,/ святи́и новому́ченицы и испове́дницы Ра́донежстии,/ и чтим честна́я страда́ния ва́ша,/ я́же за Христа́// претерпе́ли есте́.

Псало́м избра́нный: Бог нам Прибе́жище и Си́ла:

По полиеле́и седа́лен, глас 1:

Яви́ся стране́ на́шей новому́чеников и испове́дников Ра́донежских па́мять,/ све́та и́стинно испо́лнена и заре́ю благода́ти облиста́ема./ Христо́с бо, Со́лнце све́тлое, свы́ше просия́в от Восто́ка,/ собо́р и́стинных Свои́х свиде́телей в муче́ниих укрепи́,/ воплоще́ние Его́ испове́давший и страда́ньми засвиде́тельствовавший./ Вси у́бо, ве́рою Рождество́ Христо́во благоче́стно чту́ще,/ воспева́ем хвалу́ предпра́зднственную.

Сла́ва, и ны́не, Зна́мения, глас 8.

Подо́бен: Повеле́нное:

Я́же Небе́с превы́шши су́щи,/ и Херуви́м вои́стину сла́внейши,/ и всея́ тва́ри честне́йши, Де́во Пречи́стая,/ днесь благода́рственная раби́ Твои́ прино́сим о́бразу честна́го Твоего́ подо́бия:/ Ты бо стра́нную побе́ду, и ди́вное одоле́ние гра́ду Твоему́ дарова́ла еси́./ Те́мже согла́сно пою́ще, вопие́м Ти:/ Влады́чице Богоро́дице,/ моли́ Христа́ Бо́га грехо́в оставле́ние дарова́ти,/ Тебе́ бо наде́жду и́мамы раби́ Твои́.

Степе́нна, 1-й антифо́н 4-го гла́са.

Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36 (10, 16–22).

По 50-м псалме́ стихи́ра, глас 6:

Прииди́те, ве́рнии,/ новому́ченики и испове́дники Ра́донежския почти́м,/ ти́и бо во дни гоне́ний безбо́жных/ о́браз благочести́ваго жития́ показа́ша,/ ве́ру Правосла́вную испове́даша/ и страда́ния за Христа́ му́жественне восприя́ша./ Ны́не же во Ца́рствии Небе́снем,/ с преподо́бным Се́ргием Бо́гу предстоя́ще,// приле́жно мо́лятся спасти́ся душа́м на́шим.

Кано́н, глас 8

Песнь 1.

Ирмо́с: Колесницегони́теля фарао́ня погрузи́,/ чудотворя́й иногда́/ Моисе́йский жезл, крестообра́зно порази́в,/ и раздели́в мо́ре,/ Изра́иля же беглеца́, пешехо́дца спасе́,// песнь Бо́гови воспева́юща.

Припе́в: Пресвята́я Тро́ице, Бо́же наш, сла́ва Тебе́.

Благослове́н еси́, Христе́ Бо́же наш,/ И́же новому́ченики Ра́донежския в на́шей Це́ркви явле́й,/ низпосла́в им в страда́ниих Ду́ха Свята́го,/ и те́ми прославле́й Отца́ Небе́снаго,/ Человеколю́бче, сла́ва Тебе́.

Припе́в: Пресвята́я Тро́ице, Бо́же наш, сла́ва Тебе́.

Го́споди, Бо́же наш, при́сно прославля́яй святы́я Твоя́,/ ны́не и нас, недосто́йных,/ сподо́би просла́вити святы́х предста́телей на́ших,/ новому́чеников и испове́дников Ра́донежских.

Припе́в: Пресвята́я Тро́ице, Бо́же наш, сла́ва Тебе́.

Весели́ся, земле́ Ра́донежская,/ торжеству́йте, лю́бящии оби́тель Се́ргиеву:/ днесь моли́твами святы́х новому́чеников гоне́ние на ве́ру и Це́рковь Бо́жию преста́,/ и и́мя Святы́я Тро́ицы достодо́лжно прославля́ется.

Богоро́дичен: Я́коже жи́ву Ма́терь Сло́ва ви́девше Тя суему́дренных многочи́сленное во́инство,/ я́коже бо́дреннаго блюсти́теля, на забра́лех обстои́му ве́рными,/ а́бие ру́це их с про́чими у́ды ослабе́ша.

Песнь 3.

Ирмо́с: Утвержде́й в нача́ле Небеса́ ра́зумом,/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят па́че Тебе́, Еди́не Человеколю́бче.

Припе́в: Святи́и новому́ченицы и испове́дницы Ра́донежстии,/ моли́те Бо́га о нас.

Принесе́м, ве́рнии, похвалу́ преподобному́ченику Крони́ду,/ и́же, я́ко до́брый ко́рмчий, бра́тию оби́тели Се́ргиевы му́дре упра́ви / и страда́ньми за Христа́ житие́ свое́ увенча́.

От Бо́жия Ма́тере в ю́ности науче́нный поще́нием чти́ти страда́ния Сы́на Ея́,/ на ка́мени за́поведей Госпо́дних житие́ твое́ утверди́л еси́, преподобному́чениче Крони́де,/ и да́же до сме́рти му́ченически пострада́л еси́.

А́ще и изгна́н бысть безбо́жники из оби́тели,/ оба́че крест игу́менства не оста́вил еси́, преподобному́чениче Крони́де./ Те́мже, бра́тию гони́мую утеша́я и наставля́я,/ любо́вь Христо́ву пред мучи́тели испове́дал еси́.

Богоро́дичен: Ны́не наста́ день весе́лия,/ Зна́мения ико́ны Твоея́, Де́во Богороди́тельнице,/ и пра́здник све́тел, его́же соверша́юще, вопие́м:/ несть Пречи́стыя, па́че Тебе́, Богоневе́сто.

Седа́лен, глас 1:

Уче́ния безбо́жнаго не поче́тше,/ но ве́рою и́стинною защити́вшеся, новому́ченицы Ра́донежстии,/ в по́двизе испове́дания просла́вистеся,/ посреде́ же страда́ний нестерпи́мых пребыва́юще, Бо́га призыва́сте:/ ускори́, о Ще́дрый, и потщи́ся, я́ко ми́лостив, в по́мощь на́шу,/ я́ко мо́жеши хотя́й.

Сла́ва, и ны́не, Зна́мения, глас 8.

Подо́бен: Прему́дрости:

Я́же дре́вле проро́ки пропове́дася дверь Небе́сная,/ неопали́мая купина́, све́щник многосве́тлый,/ злата́я кади́льница, ру́чка и жезл,/ пресла́вно днесь чу́дному святи́телю явля́ется,/ наро́дом дерза́ти повелева́ет, и ди́вную побе́ду показу́ет./ Те́мже благода́рная Той возопии́м:/ Де́во Богороди́тельнице,/ моли́ Христа́ Бо́га, грехо́в оставле́ние дарова́ти нам,/ Тебе́ бо и́мамы наде́жду раби́ Твои́.

Песнь 4.

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Дре́вних му́ченик стопа́м после́дующе,/ во дни гоне́ний подвиза́стеся тве́рдо,/ святи́и преподобному́ченицы оби́тели Тро́ицкия./ Ны́не же, лику́юще во Ца́рствии Бо́жии,/ Христу́, укре́пльшему вы, подвиза́ете нас взыва́ти:/ си́ле Твое́й сла́ва, Человеколю́бче.

Лик преподобному́чеников Ра́донежских ублажа́юще,/ просла́вим Тро́ицу Живонача́льную,/ Ея́же оби́тель ны́не све́тло красу́ется,/ и с любо́вию Бо́гу возопии́м:/ си́ле Твое́й сла́ва, Человеколю́бче.

Хвалу́ Единосу́щней Тро́ице ны́не принося́ще, мо́лим вас, преподобному́ченицы:/ помози́те нам дух братолю́бия, терпе́ния и смире́ния стяжа́ти,/ единомы́слие храни́ти и с чи́стым се́рдцем взыва́ти:/ си́ле Твое́й сла́ва, Человеколю́бче.

Богоро́дичен: Собо́ри ве́рных и вся́ко состоя́ние челове́ческое весели́тся,/ совоку́пльшеся в честне́м хра́ме Твое́м,/ зря́ще в нем, я́коже пресве́тлое со́лнце, честны́й о́браз Твой, Влады́чице.

Песнь 5.

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя, и к све́ту за́поведей Твои́х// пути́ моя́ напра́ви, молю́ся.

И́стинней му́дрости сло́вом уча́ще своя́ ученики́, новому́ченицы и испове́дницы Ра́донежстии,/ ученики́ а́ввы Се́ргия де́лом себе́ яви́ли есте́,/ страда́ньми пропове́дующе Христа́, Бо́жию Си́лу и Прему́дрость.

Я́ко и́стиннии учи́телие, новому́ченицы Ра́донежстии,/ ве́ре и благоче́стию ученики́ научи́ли есте́,/ и с ве́рою несумне́нною Христу́ после́довали есте́,/ смири́вше себе́ да́же до сме́рти.

Свы́ше назира́юще, му́ченицы сла́внии,/ с любо́вию хода́тайствуйте о нас, па́мять ва́шу соверша́ющих,/ и небе́сныя му́дрости испроси́те нам у Даропода́теля Всевы́шняго.

Богоро́дичен: Тя бога́тство неистощи́мое и́мамы и исцеле́ний исто́чник/ ве́рою прибега́ющии хра́му Твоему́,/ иде́же пребыва́ет честны́й о́браз Твой, Влады́чице.

Песнь 6.

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́.

Возставле́ния чи́на патриа́ршаго в Це́ркви Ру́сстей ревни́тель быв, священному́чениче Иларио́не,/ Патриа́рху испове́днику во всем помо́щник яви́лся еси́/ и лжепонови́телей чи́на Церко́внаго обличи́л еси́,/ те́мже и Христа́ со дерзнове́нием испове́дал еси́, во у́зах Того́ прославля́я.

Любому́дрию отце́в сина́йских поуча́яся,/ по́двигом до́брым подвиза́лся еси́, священному́чениче Иоа́нне,/ ра́зум же и́стине Христо́вой покори́в,/ па́стве о́браз чистоты́ и благоче́стия яви́л еси́/ и кро́вию му́ченическою житие́ твое́ запечатле́л еси́.

Ве́лие попече́ние о ве́ре и благоче́стии при́сно име́я, му́чениче Иоа́нне,/ потща́лся еси́ во дни разоре́ния Ла́вры мо́щи преподо́бнаго Се́ргия от поруга́ния сохрани́ти./ Сего́ ра́ди ны́не с ним во Ца́рствии Бо́жии лику́еши.

Богоро́дичен: Честну́ю ико́ну Твою́ ра́достным се́рдцем и душе́ю облобыза́ем, веселя́щеся,/ и, те́плою ве́рою прикаса́ющеся, исцеле́ние почерпа́ем.

Конда́к, глас 3:

Я́ко цве́ти кра́снии и благоуха́ннии,/ святи́и новому́ченицы и испове́дницы,/ зе́млю Ра́донежскую украси́сте,/ ю́же Се́ргий преподо́бный житие́м просла́ви./ С ни́мже моли́теся ко Го́споду,/ е́же во и́стинней ве́ре нам ходи́ти// и спасти́ся душа́м на́шим.

И́кос:

Су́щая в ми́ре возненави́дев,/ преми́рная и нетле́нная селе́ния, отцы́ богому́дрии, стяжа́ли есте́,/ и венце́м по́чести, я́ко победи́тели, увенча́лися есте́,/ моли́твами ва́шими всех покрыва́юще, восхваля́ющих вас си́це:/ ра́дуйтеся, преподобному́ченицы,/ я́ко Христа́ всем се́рдцем возлюби́вше,/ Тому́ невозвра́тным по́мыслом да́же до сме́рти после́довали есте́;/ ра́дуйтеся, наста́вницы вертогра́да духо́внаго,/ я́ко Христа́, Прему́дрость Бо́жию, и́стинно и небоя́зненно пропове́дали есте́;/ ра́дуйтеся, священному́ченицы,/ я́ко во дни разоре́ния оби́тели Тро́ицкия/ во окре́стных хра́мех же́ртву безкро́вную приноси́ли есте́;/ ра́дуйтеся, святи́и,/ я́ко во вся́цем ро́де и зва́нии до́бре Це́ркви Правосла́вней послужи́ли есте́;/ ра́дуйтеся, новому́ченицы и испове́дницы Ра́донежстии,/ я́ко ны́не с преподо́бным Се́ргием во сла́ве Бо́гу предстоя́ще,/ мо́лите спасти́ся душа́м на́шим.

Песнь 7.

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:// благослове́н еси́, Бо́же оте́ц на́ших.

Па́стырь до́брый и служи́тель ве́рный яви́лся еси́, преподобному́чениче Маври́кие,/ те́мже, от богобо́рцев до сме́рти пострада́в,/ му́ченический вене́ц с Васи́лием сла́вным от Христа́ восприя́л еси́./ С ни́мже, предстоя́ Престо́лу Госпо́дню, помина́й нас, чту́щих святу́ю па́мять твою́.

Во оби́тели Тро́ицтей преподобному́ченику Крони́ду сыно́вне послужи́л еси́, свя́те Ксенофо́нте,/ та́же, мно́гая испыта́ния и темни́чная заключе́ния претерпе́в,/ вку́пе с ним пострада́ти за Христа́ сподо́бился еси́./ Ны́не же во оби́телех Небе́сных ра́достно лику́ете.

Я́ко зла́то в горни́ле искуше́н быв, священнодиа́коне Феофа́не,/ богобо́рцев нечести́вых не убоя́лся еси́,/ и я́ко во́ин непобеди́мь я́влься,/ вене́ц сла́вы от Бо́га прия́л еси́./ Ему́же, во сла́ве Небе́сней ны́не предстоя́, моли́ся о душа́х на́ших.

Богоро́дичен: Светоно́сная благода́ть и исцеле́ния дарова́ние/ даде́ся гра́ду Твоему́ о́браз Тво́й, Пречи́стая,/ его́же любе́зно облобыза́юще, весели́мся.

Песнь 8.

Ирмо́с: Седмери́цею пещь,/ халде́йский мучи́тель,/ богочести́вым неи́стовно разжже́,/ си́лою же лу́чшею, спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

Мно́зи благочести́вии, зна́тнии и прости́и,/ ча́юще утеше́ния и укрепле́ния во дни гоне́ний,/ под покро́в преподо́бнаго Се́ргия собра́шася/ и удосто́ишася с бра́тией пострада́ти, я́ко ве́рнии ученицы́ его́.

Ре́вностию и любо́вию Бо́жиею распала́еми,/ благочести́вии лю́дие во дни разоре́ния Ла́вры святы́ни ея́ сохрани́ша/ и честну́ю главу́ а́ввы Се́ргия от поруга́ния сокры́ша,/ те́мже и пострада́ти сподо́бишася, я́ко ве́рнии ученицы́ его́.

Доброде́тель ева́нгельскаго милосе́рдия явля́ющи,/ в заточе́нии стра́ждущим усе́рдно послужи́ла еси́,/ му́ченице Татиа́но пресла́вная./ По́слежде и сама́, а́ще и естество́м жена́ су́щи,/ му́жески пострада́ти сподо́билася еси́, я́ко ве́рная учени́ца Се́ргиева.

Богоро́дичен: Что Ти принести́, Пречи́стая,/ от всея́ тва́ри сла́вимей, недоуме́емся, Влады́чице,/ то́чию е́же Гаврии́л нас научи́:/ ра́дуйся, Обра́дованная.

Песнь 9.

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее Небе́с./ Тем Тя Богоро́дицу,// А́нгелов и челове́к чинонача́лия велича́ют.

Свети́ся, свети́ся, гора́ Ма́ковец,/ сла́ва бо Госпо́дня на тебе́ возсия́./ Лику́й ны́не и весели́ся оби́тель Се́ргиева,/ днесь бо лик новому́чеников твои́х хвалу́ Тро́ице Живонача́льней возно́сит.

Ни скорбь, ни теснота́, ни гоне́ние,/ ни го́рькия рабо́ты, ни у́зы, ни са́мая смерть/ возмого́ша разлучи́ти вас, новому́ченицы Ра́донежстии, от любве́ Бо́жия,/ но, моли́твами а́ввы Се́ргия вся терпя́ще,/ благодаре́ние Бо́гу при́сно возноси́ли есте́.

О, Тро́ице Честна́я,/ приими́, я́же земля́ Ра́донежская прино́сит Ти,/ я́ко нача́тки и я́ко фимиа́м избра́нный,/ вся Бо́гу угоди́вшыя и пре́жде, и по́слежде в ней,/ и зна́емыя, и незна́емыя,/ и моли́твами их от вся́каго вре́да нас сохраня́й.

Богоро́дичен: Де́вства Твоего́ зна́мения невреди́мо сохрани́в, Сло́во Бо́жие, из Тебе́ проше́д,/ сохрани́ град Твой невреди́м, Де́во Всепе́тая,/ да Тя непреста́нно велича́ем.

Свети́лен:

И́же во све́те живы́й непристу́пнем и содержа́й вся́ческая,/ за благоутро́бие неизрече́нное от Де́вы ражда́ется/ и пелена́ми повива́ется, я́ко Младе́нец./ Волсви́ гряду́т в Вифлее́м на поклоне́ние Ему́,/ с ни́миже и собо́р новому́чеников Ра́донежских поспеша́ет,/ страда́ния и испове́дания своя́ принося́ще вопло́щшемуся Бо́гу, я́коже да́ры.

Сла́ва, и ны́не, Зна́мения.

Подо́бен: Посети́л ны есть:

Возжеле́в Твоея́ добро́ты Иису́с, Пречи́стая,/ в Тя всели́ся, и Тебе́ засту́пницу гра́ду Твоему́ Сло́во Бо́жие дарова́,/ его́же сохраня́й заступле́нием Твои́м при́сно,/ я́ко да Тя ублажа́ем, пренепоро́чная Отрокови́це.

На хвали́тех стихи́ры новому́чеником, глас 8.

Подо́бен: О, пресла́внаго чудесе́:

О, пресла́внаго чудесе́!/ Царя́ Небе́снаго избра́нная дружи́но,/ святи́и новому́ченицы Ра́донежстии,/ на ка́мени ве́ры житие́ свое́ утверди́ли есте́/ и, лю́тая гоне́ния нивочто́же вмени́вше,/ кровь свою́ за Христа́ пролия́ли есте́./ Ны́не же, в Небе́сных оби́телех пребыва́юще/ и ра́йскаго блаже́нства наслажда́ющеся,// мо́литеся о душа́х на́ших.

О, пресла́внаго чудесе́!/ Досто́йнии ученицы́ Христа́ Архипа́стыря,/ святи́и новому́ченицы Ра́донежстии,/ ничто́же вас разлучи́ от любве́ Бо́жия,/ те́мже и па́ству Христо́ву возлюби́ли есте́/ и Же́ртву Безкро́вную о всех и за вся приноси́ли есте́./ Ны́не же и́стее Сея́ причаща́етеся/ в невече́рнем дни Ца́рствия Бо́жия// и мо́литеся о душа́х на́ших.

О, пресла́внаго чудесе́!/ Де́лателие вертогра́да духо́внаго,/ святи́и новому́ченицы Ра́донежстии,/ ю́ная сердца́ и умы́ просвеща́юще,/ уче́ние Христо́во насажда́сте/ и о́браз терпе́ния показа́сте./ Ны́не же в вертогра́де Небе́снем/ ра́йския пи́щи наслажда́етеся// и мо́литеся о душа́х на́ших.

О, пресла́внаго чудесе́!/ Ве́рная ча́да Бо́жия,/ святи́и новому́ченицы Ра́донежстии,/ лише́ния, изгна́ния и муче́ния претерпе́вше,/ тве́рдостию ве́ры мучи́тели посрами́сте/ и си́лою Христо́вою си́лу вра́жию препобеди́сте./ Ны́не же Престо́лу Бо́жию во сла́ве предстоите́,/ му́ченическими венцы́ украше́ннии,// и мо́литеся о душа́х на́ших.

Сла́ва, глас то́йже:

Прииди́те, празднолю́бцы,/ святы́я новому́ченики Ра́донежския духо́вне почти́м,/ ти́и бо во дни гоне́ний лю́тых/ во мра́це нече́стия и безбо́жия,/ я́ко зве́зды, возсия́ша/ и ве́ру Правосла́вную утверди́ша,/ и́хже по́двиги оби́тель Святы́я Тро́ицы красу́ется,/ духо́вный вертогра́д плодоно́сит/ и хра́ми окре́стнии утвержда́ются./ Сего́ ра́ди благода́рне Христу́ Бо́гу возопии́м:// Ты еси́ му́чеников похвала́ и побе́да, Всеси́льне.

И ны́не, Зна́мения, глас то́йже:

Мня́щеся непокори́вии/ от основа́ния разори́ти град Твой, Пречи́стая,/ не разуме́вше по́мощь Твою́, Влады́чице;/ но си́лою Твое́ю низложе́ни бы́ша,/ на бежа́ние устремля́хуся,/ и я́коже ю́зами желе́зными, слепото́ю свя́зани бы́вше,/ и мра́ком, я́коже дре́вле Еги́пет, объя́ти не разуме́вше,/ до́ндеже и коне́чне побежде́ни бы́ша./ Те́мже чи́стою ве́рою сла́вим Тя,/ и Сы́ну Твоему́ любе́зно вопие́м:/ моли́твами ро́ждшия Тя,/ Иису́се всеси́льне, неизрече́нная ра́досте,/ сохраня́й град Твой невреди́м,// я́ко милосе́рд и Человеколю́бец.

На Литурги́и

Блаже́нны от кано́на, пе́сни 3-я и 6-я. Проки́мен, глас 7: Бог нам Прибе́жище// и Сила. Стих: Помо́щник в ско́рбех, обре́тших ны зело́. Апо́стол к Ри́мляном, зача́ло 99 (гл. 8, 31–39). Аллилу́ия, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь.

Ева́нгелие от Луки́, зача́ло 105–106. Коне́ц: В терпе́нии ва́шем стяжи́те душа́ ва́ша: (гл. 21, 8–19). Прича́стен: Ра́дуйтеся, пра́веднии, о Го́споде, пра́вым подоба́ет похвала́.

Моли́тва

О, святи́и новому́ченицы и испове́дницы земли́ Ра́донежския, за Христа́ пострада́вшии, ве́рность Ему́ да́же до сме́рти свиде́тельствовавшии и вене́ц жи́зни от Него́ прие́мшии!

Вы во дни гоне́ния лю́таго, зе́млю на́шу от безбо́жных пости́гшаго, на суди́щах, в заточе́ниих и про́пастех земны́х, в го́рьких рабо́тах и вся́ких ско́рбных обстоя́ниих о́браз терпе́ния и непосты́днаго упова́ния му́жественне яви́ли есте́. Ны́не же пред Престо́лом Бо́жиим во сла́ве предстоите́ и при́сно хвалу́ с преподо́бным Се́ргием и все́ми святы́ми Триеди́ному Бо́гу возно́сите.

Сего́ ра́ди мы, недосто́йнии, мо́лим вас, святи́и сро́дницы на́ши: моли́твами ва́шими сохрани́те оби́тель сию́, я́ко Дом Живонача́льныя Тро́ицы; наста́вите нас на путь жи́зни ве́чныя; укрепи́те в ве́ре и единомы́слии; согре́йте сердца́ на́ша ду́хом ева́нгельския любве́ и братолю́бия; помози́те по́двигом до́брым подвиза́тися проти́ву ко́зней диа́вольских и вся́каго греха́; умоли́те Го́спода Сил, да, прости́в нам согреше́ния на́ша, поми́лует по вели́цей Свое́й ми́лости и сподо́бит вку́пе с ва́ми прославля́ти Его́ в Небе́снем Ца́рствии, я́ко Ми́лостиваго и Человеколюби́ваго Бо́га на́шего, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Источник: Текст утвержден Священным Синодом Русской Православной Церкви 27 января 2011 года (журнал № 162)

Ме́сяца ноября́ в 27-й день

Пра́зднование Пресвяте́й Влады́чице на́шей Богоро́дице и Присноде́ве Мари́и, в честь ико́ны Ея́, имену́емыя Абала́кская

На вели́цей вече́рни

Блаже́н муж: 1-й антифо́н.

На Го́споди, воззва́х: стихи́ры на 8, глас 1:

Кра́йним Свои́м благоутро́бием Всеви́дец Госпо́дь,/ челове́ческим ро́дом ко спасе́нию управля́яй,/ мно́гую благода́ть дарова́ Тебе́, Богоро́дице Пречи́стая:/ во о́бразех бо мно́зех, и в зна́мениих,/ и в чудесе́х явля́ешися,// я́ко тве́рдое Правосла́вныя ве́ры утвержде́ние.

Неизрече́нную ми́лость Свою́ ро́ду челове́ческому да́руя,/ Христо́с Госпо́дь яви́ Тя, Чи́стая,/ ве́рным лю́дем Свои́м в защище́ние,/ и Твое́ю ико́ною чудотво́рною предста́тельство пока́за./ Е́юже укрепи́ стра́ждущия ду́ши на́ша,// да предста́нем чи́сты Сы́ну Твоему́, Богоневе́стная.

Ди́вным Свои́м Про́мыслом Влады́ка всех/ устроя́ет Тя, Нетле́нная Свята́я Де́во,/ в предста́тельство земны́м изве́стное:/ столп бо о́блачный Изра́илю/ путеводи́тель бысть в зе́млю обетова́нную,/ всемо́щное же моле́ние Твое́, Пречи́стая,// возно́сит ве́рныя в Небе́сное блаже́нство.

О́блак невеще́ственный в бре́нном телеси́ ви́дящи,/ и Твоего́, Богома́ти, чу́днаго явле́ния/ Боже́ственное де́йство разуме́вши,/ во у́жасе вдови́ца вопие́т:// несмь досто́йна ви́дети/ сла́ву Твою́, Пренепоро́чная.

Вдови́ца явле́ние ико́ны Богома́тере узре́вши на возду́се/ и мно́жицею о сем уве́рившися и́стинно,/ глаго́ла лю́дем о чудеси́, во Абала́це бы́вшем./ О, благонаде́жнаго Твоего́ промышле́ния, Де́во Чи́стая,/ ско́рая в беда́х Засту́пнице.

Цели́тельница безме́здная земли́ Сиби́рстей/ яви́лася еси́, Де́во Богоро́дице:/ кто бо, к ико́не Твое́й притека́яй,/ от смертоно́сныя я́звы не исцели́тся?/ Боле́зни бо и не́мощи врачу́еши,// чуде́сная ве́рным Помо́щнице.

Избра́нное ме́сто на Абала́це/ плодоно́сно чудесы́ Твои́ми яви́ла еси́,/ Пречи́стая Де́во Богоро́дице:/ повеле́ла бо еси́ но́ву це́рковь лю́дем Твои́м созда́ти,/ иде́же и́мя Твое́, Отрокови́це, просла́вится// во спасе́ние на́ше и утвержде́ние.

Сла́ва, и ны́не, глас 8:

Прииди́те, ве́рнии,/ почти́м ико́ну Пречи́стыя Богоро́дицы,/ во Абала́кской ве́си чу́дно яви́вшуюся,/ и досто́йно Присноде́ву восхва́лим,/ Сия́ Столп о́блачный яви́ся,/ и́мже рабо́ты фарао́на мы́сленнаго свободи́хомся,/ Сия́ Ка́мень горы́ Хори́в показа́ся,/ от него́же благода́ти ми́ро источа́ется/ во исцеле́ние неду́гов немощству́ющих,/ Сия́ есть Ста́мна манноприе́мная,// Е́юже Хле́ба Небе́снаго приобща́емся.

Вход. Проки́мен дне. Чте́ния три Богоро́дичная.

На лити́и стихи́ры, глас 2:

Прииди́те, Сиби́рстии наро́ди,/ восхва́лим Пречи́стую Богоро́дицу,/ Я́же явле́нием о́браза Своего́/ да́рует стра́ждущим осла́бу,/ скорбя́щим утеше́ние,/ бе́дствующим избавле́ние// и всем ве́рным ве́лию ми́лость.

Сла́ва, и ны́не, глас 8:

Кто, таково́е пресла́вное чу́до ви́дя, не диви́тся?/ Или́ кто, благоутро́бие Пречи́стыя разуме́в, не ужа́снется?/ Я́ко Де́ва Всенепоро́чная,/ в дожди́ ги́бельнем гнев Бо́жий на ми́лость преложи́вши,/ лю́дем Свои́м утеше́ние подаде́,/ преста́ бо тещи́ пото́к водны́й/ и затвори́шася исто́чницы возду́шнии./ Сего́ ра́ди вопие́м Ти:/ ра́дуйся, Благоутро́бная Влады́чице,// скорбь на ра́дость лю́дем Свои́м всегда́ претворя́ющая!

На стихо́вне стихи́ры, глас 8:

Что Тя нарече́м, Богоро́дице Де́во?/ Зарю́ ли у́треннюю,/ я́ко Христа́, Со́лнце пра́вды, нам предваря́ющая?/ Столп ли о́блачный,/ ве́рных в зе́млю обетова́нную путеводя́й?/ Ни́ву ли неора́нную,/ Хлеб Жи́зни лю́дем прозя́бшая?/ Его́же причаще́ния нас сподо́би,// да обря́щем живо́т ве́чный.

Стих: Освяти́л есть селе́ние Свое́ Вы́шний,/ Бог посреде́ его́ и не подви́жится.

Что Тя нарече́м, Богоро́дице Де́во?/ Цвет ли рая́ Божестве́ннаго,/ я́ко весь Абала́кскую украси́ла еси́?/ Крин ли благоуха́ния духо́внаго,/ я́ко оби́тель Свою́ облагоуха́ла еси́?/ Сосу́д ли ми́ра многоце́ннаго,/ я́ко цельбы́ неоску́дно излия́ла еси́?/ Сего́ ра́ди мо́лим Тя:// сотвори́ нас досто́йны ми́лости Твоея́.

Стих: Предста́ Цари́ца одесну́ю Тебе́ в ри́зах позлаще́нных/ оде́яна и преиспещре́на.

Что Тя нарече́м, Богоро́дице Де́во?/ Исто́чник ли живоно́сных вод,/ я́ко духо́вную жа́жду притека́ющих утоля́еши?/ Стену ли кре́пкую,/ я́ко лю́ди земли́ Сиби́рския наде́жно защища́еши?/ Ле́ствице изве́стнейшая,/ к Небеси́ пра́ведных ско́ро возводя́щая./ Те́мже моли́ Христа́ Бо́га// спасти́ся душа́м на́шим.

Сла́ва, и ны́не, глас то́йже:

Ра́дуйтеся, сиби́рстии наро́ди/ и вси лю́дие правосла́внии,/ я́ко явле́нием честна́го о́браза Пречи́стыя Де́вы во Абала́це/ град Тобо́льск просвеща́ется./ Сего́ ра́ди и мы от належа́щих нужд избавля́емся/ и вопие́м Ти, Влады́чице:// ра́дуйся, благи́х Вино́внице, изве́стное христиа́н Упова́ние.

На благослове́нии хле́бов тропа́рь, глас 4:

Днесь, я́ко со́лнце незаходи́мое,/ све́тло сия́ет образ Твой, Пречи́стая,/ в ве́си Абала́кской на возду́се/ вдови́це чу́дне яви́вшийся./ И мы, припа́дающе к нему́,/ Богоро́дице уми́льно вопие́м:/ о, Всепе́тая Влады́чице,/ мир оби́тели Твое́й да́руй// и душа́м на́шим ве́лию ми́лость.

На у́трени

На Бог Госпо́дь: тропа́рь Богоро́дицы, три́жды.

По 1-м стихосло́вии седа́лен, глас 4:

Пресве́тлый о́браз Твой ра́дость всем ве́рующим прино́сит/ и, скорбе́й и напа́стей нас свобожда́я,/ бога́тство бла́гости оби́тели Твое́й да́рует./ К Тебе́ же прибега́ющии лю́тых бед избавля́ются/ и ку́пно с Гаврии́лом пе́ние прино́сят:/ ра́дуйся, Благода́тная, Госпо́дь с Тобо́ю.

Сла́ва, и ны́не, то́йже.

По 2-м стихосло́вии седа́лен, глас 4:

Боже́ственным и светоно́сным явле́нием Твои́м, Пренепоро́чная Де́во, освяти́ сла́вящия Тя/ и к стяжа́нию и́стиннаго благоче́стия наста́ви,/ нело́жна бо еси́ Предводи́тельница к ве́чному ра́дованию./ Сего́ ра́ди с любо́вию пра́зднуем явле́ние о́браза Твоего́, славосло́вяще Ти:/ ра́дуйся, Благода́тная, Госпо́дь с Тобо́ю.

Сла́ва, и ны́не, то́йже.

Велича́ние о́бщее или́ сие́:

Велича́ем Тя,/ Пресвята́я Дево,/ Богоизбра́нная Отрокови́це,/ и чтим о́браз Тво́й святы́й,/ его́же земли́ Сиби́рстей// в покро́в и заступле́ние дарова́ла еси́.

Псало́м избра́нный:

Ве́лий Госпо́дь и хва́лен зело́, во гра́де Бо́га на́шего, в горе́ святе́й Его́.

Пресла́вная глаго́лашася о Тебе́, Гра́де Бо́жий.

Освяти́л есть селе́ние Свое́ Вы́шний.

Свят храм Твой, ди́вен в пра́вде.

Сия́ врата́ Госпо́дня, пра́веднии вни́дут в ня.

Предста́ Цари́ца одесну́ю Тебе́ в ри́зах позлаще́нных оде́яна, преиспещре́на.

Престо́л Твой, Бо́же, в век ве́ка: жезл пра́вости, жезл ца́рствия Твоего́.

По полиеле́и седа́лен, глас 8:

Вели́чие Твое́ кто пове́сть, Всенепоро́чная Де́во?/ Явле́нием Твои́м всю страну́ Сиби́рскую удиви́ла еси́,/ благода́ть бо от ико́ны Твоея́ неду́ги мно́гих уврачева́ и боле́зни исцели́./ Сего́ ра́ди к Тебе́ припа́даем и те́пле вопие́м:/ не лиши́ нас Твоея́ ми́лости, безме́здная Цели́тельнице.

Сла́ва, и ны́не:

О, Всеми́лостивая Влады́чице!/ Не отри́ни нас, в беда́х су́щих, от Твоего́ заступле́ния,/ но моли́твами Твои́ми защити́ и спаси́ страну́ на́шу от вся́каго зла./ Да, Тобо́ю хва́лящеся и на Тя все упова́ние возлага́юще,/ не постыди́мся во ве́ки.

Степе́нна, 1-й антифо́н 4-го гласа. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и виждь, и приклони́ у́хо Твое́. Вся́кое дыха́ние да хва́лит Го́спода: Ева́нгелие от Луки́, зача́ло 4.

По 50-м псалме́ стихи́ра, глас 6:

Ны́не наста́ пра́зднество ико́ны Твоея́, Пречи́стая,/ торжеству́йте, лю́дие,/ се бо светоно́сный о́браз на возду́се чуде́сне явля́ется/ и столпо́м о́блачным ви́димо утвержда́ется;/ днесь пра́вило ве́ры и о́браз кро́тости духо́вныя сказу́ется,/ днесь серде́чное к Бо́гу обраще́ние соверша́ется/ и полнота́ покая́ния пропове́дуется// во спасе́ние душ на́ших.

Кано́н, глас 8

Его́же краегране́сие: При́зри благосе́рдием, Всепе́тая, Богоро́дице.

Песнь 1.

Ирмо́с: Во́ду проше́д, я́ко су́шу,/ и еги́петскаго зла избежа́в,/ израильтя́нин вопия́ше:// Изба́вителю и Бо́гу на́шему пои́м.

Прекра́сный хра́ме Трисо́лнечнаго Све́та,/ украси́ моя́ чу́вства, молю́ся,/ да целому́дрен сый,/ честно́е Твое́ во Абала́це о́браза явле́ние воспою́, Чи́стая.

Ра́дуяся, к Твое́й честне́й ико́не припа́даю, Пречи́стая,/ ду́шу мою́ просвети́,/ те́ло от скве́рны очи́сти/ и, от лю́тых мя неду́гов свободи́вши,/ покажи́ прича́стника Небе́снаго Ца́рствия.

Изнемога́ющий ум мой напра́ви, молю́ Тя, Еди́на Присноде́во,/ к позна́нию Еди́наго Су́щаго Бо́га,/ и щедролю́бие да́руй ми,/ и благода́тию Христо́вою украси́ мя, Богоблагода́тная.

Зря́щи грехо́вность и ху́дость естества́ моего́,/ молю́ Тя, Де́во:/ даждь ми позна́ние моея́ не́мощи,/ да слеза́ми мно́гими омы́ю скве́рное мое́ житие́,/ Еди́на Богоблаже́нная.

Песнь 3.

Ирмо́с: Небе́снаго кру́га Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// еди́не Человеколю́бче.

Ра́ди ми́лости Твоея́ низложи́ во мне прило́ги бесо́вския,/ да, ум очи́стив и се́рдце уцелому́дрив,/ к и́стинному богопозна́нию устремлю́ся, Еди́на Де́во Всепе́тая.

Изво́лила еси́ сто́лпом о́блачным/ яви́ти добро́ту о́браза Твоего́ вдови́це смире́нней,/ та́ко и ны́не при́зри на рабы́ Твоя́,/ призыва́ющия Тя и тре́бующия Твоея́ по́мощи, Благода́тная.

Бу́дущее муче́ние, я́ко наказа́ние за суету́ дея́ний грехо́вных,/ и кра́ткий всех веще́й и всего́ ми́ра тле́ннаго коне́ц,/ помышля́ти сподоби́ мя, Де́во,/ да благода́тию Сы́на Твоего́,/ на путь и́стиннаго покая́ния наста́влен,/ ве́чнаго осужде́ния избе́гну, Пренепоро́чная.

Люби́ти бли́жняго и покрыва́ти согреше́ния его́ даждь ми, Де́во,/ честолю́бие же, осужде́ние и праздносло́вие отдали́ от Мене́,/ да плоды́ досто́йны принесу́ Сы́ну Твоему́, Еди́на Пречи́стая.

Ин конда́к, глас 4:

Абала́кской ико́не Влады́чицы на́шей Богоро́дицы,/ благогове́йно поклоня́ющеся,/ со умиле́нием взыва́ем:/ спаси́ нас моли́твами Твои́ми,// Пресвята́я Де́во.

Седа́лен, глас то́йже:

Глаго́лы на́ша услы́ши, Влады́чице,/ призыва́ющих Тя и тре́бующих Твоея́ по́мощи,/ да́руй нам на враги́ одоле́ние/ и душа́м на́шим спасе́ние,/ Ты бо еси́ Пода́тельница благи́х,/ Небеси́ Цари́ца/ и ми́ру Помо́щница.

Песнь 4.

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

О Тебе́, Богома́ти, небе́сное торжеству́ет сосло́вие,/ с ни́мже и мы, земноро́днии, пра́зднуем днесь,/ прославля́юще явле́ние о́браза Твоего́, Пречи́стая.

Се́рдце мое́ ожесточе́нное умягчи́, Де́во,/ и росо́ю милосе́рдия напои́ изсо́хшую ду́шу мою́,/ да, бли́жнему своему́ и́скренне послужи́в,/ просла́влю Тя, Богоневе́сто Влады́чице.

Еди́на Присноде́во,/ от тле́нных и вре́менных ум мой отврати́/ и, милосе́рдием Твои́м покры́вши,/ пла́мень страсте́й мои́х угаси́.

Ра́бское сребролю́бие и забве́ние благоче́стия потреби́ от правосла́вных, Влады́чице,/ да, жизнь нескве́рную восприе́мше,/ невозбра́нно еди́ными усты́ восхва́лят Тя, Присноде́во.

Песнь 5.

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою// Твой мир пода́ждь нам, Человеколю́бче.

Ди́внаго о́браза Богома́тере явле́ние,/ в не́мже святи́тель Никола́й наставля́ет вдови́цу чи́стую/ о Твое́м зна́мении пове́дати лю́дем, Пренепоро́чная,/ да, тьму суеве́рия отгна́вши,/ и́стинный свет спасе́ния восприи́мут.

Испо́лни ра́дости се́рдце мое́, Пречи́стая,/ и, лю́тых собла́знов изба́вльши,/ мглу грехо́вную разве́й/ и бла́гостию Твое́ю храм чистоты́ и вся́кия доброде́тели мя соде́лай.

Еди́но души́ моея́ упова́ние, Богоро́дице,/ кра́сная ми́ра сего́ возненави́дети мя наста́ви, молю́ Тя, Чи́стая,/ да помраче́ния мы́сленнаго изба́влься,/ улучу́ нетле́нное Сы́на Твоего́ насле́дие.

Молю́ Тя, Влады́чице,/ па́мять сме́ртную и благи́м воздая́ние во мне утверди́,/ да, сия́ вы́ну во уме́ содержа́,/ вся́кая беззако́ния оста́влю/ и Ца́ствия Небе́снаго дости́гну.

Песнь 6.

Ирмо́с: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся я́ко Ио́на:// от тли, Бо́же, возведи́ мя.

Возводя́щи лю́ди от тьмы грехо́вныя/ явле́нием о́браза Твоего́, Влады́чице,/ подае́ши заступле́ние и предста́тельство,/ да еди́ными усты́ и чи́стым се́рдцем просла́вят Тя, Еди́на Пречи́стая.

Сло́ва Бо́жия Роди́тельнице,/ за́висти грехо́вныя изба́ви мя,/ да, и́скреннее братолю́бие явля́я,/ жи́зни ве́чныя в Ца́рстве Сы́на Твоего́ сподо́блюся, Преблагослове́нная.

Еди́на Богома́ти,/ ра́дости мое́ се́рдце испо́лни/ и, печа́ли мглу грехо́вную ско́ро потребля́ющи,/ наста́ви мя пе́ти:/ ра́дуйся, Благода́тная, Спа́са Христа́ нам ро́ждшая.

Пресвята́я Богоро́дице,/ благода́тию Твое́ю любовь к Сы́ну Твоему́ во мне возгре́й/ и бли́жнему моему́ от души́ благотвори́ти наста́ви,/ да не пре́дан бу́ду Суду́ без ми́лости,/ я́ко не сотвори́вый ми́лости, Всенепоро́чная.

Конда́к, глас 4:

Ева́нгелия Христо́ва благове́стник Лука́/ о́бразы Твоя́, Пречи́стая, дре́вле изобрази́,/ вдови́ца же, еди́н от них чу́дне узре́вши,/ возвести́ нам повеле́ние Твое́,/ да ве́рнии, к Тебе́ притека́юще, зову́т:/ ра́дуйся, Влады́чице,// Зна́мение ми́лости Твоея́ нам явля́ющая.

И́кос:

Твоего́ пресла́внаго явле́ния чу́до, Богоро́дице, во Абала́це/ почита́ющих Тя утеша́ет и укрепля́ет:/ земноро́дным бо подае́ши незави́стную исцеле́ния ра́дость,/ е́юже и земля́ Сиби́рская, преизоби́льно обогати́вшися,/ весели́тся ны́не и непреста́нно вопие́т Ти:/ Ра́дуйся, прибе́жище на́ше и упова́ние;/ ра́дуйся, неисповеди́мая всем ра́досте./ Ра́дуйся, о́бразом Свои́м святы́м нас просвеща́ющая;/ ра́дуйся, исцеле́ние всем ско́ро подаю́щая./ Ра́дуйся, от бед и скорбе́й избавле́ние;/ ра́дуйся, оби́тели Абала́кской и всея́ Сиби́ри защище́ние./ Ра́дуйся, Влады́чице, зна́мение ми́лости Твоея́ нам явля́ющая.

Песнь 7.

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:// отце́в Боже, благослове́н еси́.

А́нгельский лик на небеси́ песносло́вит пресве́тлое Твое́ явле́ние/ и челове́ческий род восхваля́ет Тя на земли́, Пренепоро́чная Богоро́дице,/ я́ко Ма́ти су́щи Живота́,/ мо́лиши о нас Сы́на Твоего́, Христа́ Бо́га на́шего, пою́щих:/ отце́в Бо́же, благослове́н еси́.

Я́дию в тле́ние па́дших лю́те/ Рождество́м Твои́м возста́вила еси́, Богоро́дице Де́во./ Сего́ ра́ди презре́ние вре́менных и жела́ние благ ве́чных пода́ждь ве́рою пою́щим:/ отце́в Бо́же, благослове́н еси́.

Бесо́вския прило́ги потребля́ющи,/ по́хоти плотски́я укроти́ во мне, Де́во,/ и, души́ мое́й здра́вие да́рующи,/ сподо́би вку́пе со святы́ми пе́ти:/ отце́в Бо́же, благослове́н еси́.

Оскверни́х ду́шу мою́ греха́ми мно́гими/ и невоздержа́нием вся́ческим сотвори́х себе́ непотре́бна пред Тобо́ю, Пречи́стая Влады́чице,/ но очи́сти мя и на богоуго́дное житие́ наста́ви,/ да со святы́ми вку́пе воспою́:/ отце́в Бо́же, благослове́н еси́.

Песнь 8.

Ирмо́с: Ца́ря Небе́снаго,/ Его́же пою́т во́и А́нгельстии,// хвали́те и превозноси́те во вся ве́ки.

Грехо́вное томле́ние души́ моея́ утоли́, Богоро́дице,/ росою́ же благода́ти Твоея́ со́вестное жже́ние угаси́/ и, от клеветы́ наве́тующих изба́вльши,/ не́нависть и памятозло́бие отврати́ от Мене́, да благода́рне воспою́:/ хвали́те Бо́га и превозноси́те Его́ во вся ве́ки.

О́браз Твой, Богоро́дице, во Абала́це я́вльшийся,/ по́мощь и заступле́ние подае́т всем, с ве́рою к нему́ притека́ющим и благода́рне вопию́щим:/ хвали́те Бо́га и превозноси́те Его́ во вся ве́ки.

Ра́дость вме́сто печа́ли души́ моей пода́ждь, Всечи́стая,/ и ми́лостию Твое́ю утверди́ в ми́ре се́рдце мое,/ мяте́ж ми́ра сего́ потребля́ющи, да благода́рне воспою́:/ хвали́те Бо́га и превозноси́те Его́ во вся ве́ки.

О, Пренепоро́чная Де́во,/ терпе́ние тве́рдое да́руй ми во искуше́нии,/ кро́тостию и незло́бием испо́лни мя во озлобле́нии,/ да, ра́дуяся, воспою́:/ хвали́те Бо́га и превозноси́те Его́ во вся ве́ки.

Песнь 9.

Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,// со безпло́тными ли́ки Тя велича́юще.

Дом Пречи́стыя Богоро́дицы яви́ся оби́тель Абала́кская,/ в не́мже чудотво́рный о́браз пребыва́ет,/ я́ко зна́мение спасе́ния земли́ Сиби́рстей/ и всем, с ве́рою к нему́ притека́ющим.

Испо́лни ра́дости сердце мое́, Де́во Чи́стая,/ уныва́ющаго мя оживи́/ и отча́янием па́дшаго возста́ви,/ ле́ность же души́ моея́ потребля́ющи,/ во вся́цей доброде́тели укрепи́,/ да со безпло́тными ли́ки непреста́нно Тя велича́ю.

Целому́дренно се́рдце сози́жди во мне, Присноде́во Богоро́дице,/ ко исполне́нию во́ли Сы́на Твоего при́сно наставля́ющи,/ и в моли́тве постоя́нство даруй ми,/ Путеводи́тельнице моего́ спасе́ния.

Еди́ная Пречи́стая Чи́стая Присноде́во,/ мно́гия ми́лости о́бразом Твои́м чудотво́рным во Абала́це нам яви́вшая,/ ны́не благода́рственное славосло́вие воспева́ем Ти:/ ра́дуйся, Благода́тная, земли́ Сиби́рстей Покро́в и Утвержде́ние.

Свети́лен:

Досто́йное пе́ние воздади́м днесь, ве́рнии, Ро́ждшей всех святы́х Святе́йшее Сло́во,/ Сия́ бо есть нетле́нный Сосу́д чистоты и и́стинная Присноде́ва,/ от грехо́вныя нечистоты́ предста́тельством Свои́м нас избавля́ющая.

Сла́ва, и ны́не, то́йже.

На хвали́тех стихи́ры на 4, глас 4:

Днесь торжеству́ет сла́вный град Тобо́льск,/ ра́дуяся посеще́нию Де́вы Богоро́дицы,/ Сия́ бо явле́нием о́браза Своего́/ всей земли́ Сиби́рстей яви́лася еси́ Засту́пница/ от находя́щих бед и мно́гих скорбе́й,/ покрыва́ющи ве́рныя лю́ди// честны́м Свои́м омофо́ром.

Пресла́вное Твое́ во Абала́це явле́ние,/ Пренепоро́чная Влады́чице,/ неду́гующим есть исцеле́ние,/ слепы́м прозре́ние, хромы́м хожде́ние,/ гре́шным с Бо́гом примире́ние,/ всем ве́рным торжество́ спаси́тельное// и во и́стинней ве́ре утвержде́ние.

Ны́не проро́честии глаго́лы Твоя́, Богома́ти, исполня́ются,/ вси бо ро́ди Тя досто́йно ублажа́ют,/ с ни́миже и лю́дие Сиби́рстии днесь све́тло пра́зднуют,/ я́ко чудесы́ Твои́ми, Богома́ти,/ от Абала́кскаго о́браза Твоего́/ по́мощь благода́тную ско́ро получа́ют,/ в ве́ре и благоче́стии наставля́ются,/ в наде́жди на ми́лость Бо́жию укрепля́ются// и в любви́ к Тебе́ и Сы́ну Твоему́ утвержда́ются.

Росоно́сною Ду́ха благода́тию/ исцели́ боле́знующую мою́ ду́шу/ и даждь ми плач о гресе́х мои́х, Влады́чице,/ и не яви́ мя враго́м бы́ти ра́дование,/ но благода́тию Пречестна́го о́браза Твоего́/ отжени́ от Мене́ мглу страсте́й душевре́дную и просвети́ све́том Сы́на Твоего́,// Всенепоро́чная Влады́чице.

Ро́ди челове́честии с ве́рою несумне́нною/ притека́ют к Тебе́, Богоро́дице,/ ско́ро бо подае́ши душа́м на́шим исцеле́ние,/ враго́в на́ших сту́дно посрамля́еши/ и благода́тию пречи́стаго о́браза Твоего́/ просвеща́еши све́том Сы́на Твоего́,// Всенепоро́чная Влады́чице.

Сла́ва, и ны́не, глас 8:

Прииди́те, сиби́рстии наро́ди,/ прииди́те, приступи́те и просвети́теся,/ се бо во сла́ве Бо́жией Цари́ца Небе́сная/ со святи́телем и чудотво́рцем Никола́ем/ и преподо́бною Мари́ею Еги́петскою/ пресве́тлым Свои́м предстои́т о́бразом,/ да спасе́т оби́тель Свою́ и страну́ Сиби́рскую./ Е́юже ду́си лука́вии прогоня́ются,/ боле́зни исцеля́ются,/ и все естество челове́ческое,/ вину́ избавле́ния своего́ Тобо́ю прие́мши,/ с любо́вию вопие́т Ти:// ра́дуйся, Влады́чице, зна́мение ми́лости Твоея́ нам явля́ющая.

Славосло́вие вели́кое. Ектении́. И отпу́ст.

На Литурги́и

Блаже́нна от кано́на, пе́снь 3-я и 6-я. Проки́мен, глас 3, песнь Богоро́дицы: Вели́чит душа́ моя́ Го́спода/ и возра́довася дух Мой о Бо́зе, Спа́се Мое́м. Стих: Я́ко призре́ на смире́ние рабы́ Своея́, се бо от ны́не ублажа́т Мя вси ро́ди. Апо́стол ко Евре́ем, зача́ло 320. Ева́нгелие от Луки́, зача́ло 54. Прича́стен: Ча́шу спасе́ния прииму́:

Моли́тва

О, Пресвята́я Госпоже́, Де́во Богоро́дице, вы́шшая Херуви́м и Серафи́м, и всех святы́х Святе́йшая! Ты, Всеблага́я, во Абала́це ико́ну Твою́ многоцеле́бную яви́ти благоволи́ла еси́, и е́ю мно́гая и неизрече́нная чудеса́ соде́лала еси́, и ны́не содева́еши по Твоему́ неизрече́нному к нам милосе́рдию. Тебе́, Преблагослове́нней ро́да на́шего Засту́пнице, припа́даем и мо́лимся, вку́пе со святи́телем Никола́ем и преподо́бною Мари́ею Еги́петскою, да не лиши́мся их хода́тайства и Твоего́ заступле́ния и покро́ва держа́внаго. Спаси́ и защити́ нас, Влады́чице, от разжже́нных стрел лука́ваго, укрепи́ немощну́ю во́лю на́шу к де́ланию за́поведей Христо́вых, умягчи́ окамене́нная сердца́ на́ша любо́вию к Бо́гу и бли́жним, да́руй нам сокруше́ние серде́чное и покая́ние и́стинное, да очи́стившеся от скве́рны грехо́вныя и изба́вльшеся от неве́дения и забве́ния, восста́вше от ле́ности и нераде́ния, возмо́жем принести́ Творцу́ благоуго́дныя Ему́ плоды́ до́брых дел и сподо́битися ми́рныя христиа́нския кончи́ны и отве́та пра́ваго на Стра́шнем и нелицеприя́тнем Суде́ Его́. О, Госпоже́ Всеми́лостивая! В час гро́зный сме́ртный наипа́че яви́ нам Твое́ многомо́щное заступле́ние, ускори́ тогда́ на по́мощь к нам, и держа́вною руко́ю Твое́ю исхити́ нас из вла́сти лю́таго мироде́ржца, и́бо вои́стинну мно́го мо́жет моли́тва Твоя́ пред лице́м Го́спода, и вся возмо́жна суть хода́тайству Твоему́, а́ще то́кмо восхо́щеши. Те́мже на святы́й о́браз Твой умиле́нно взира́юще и пред ним Тебе́ покланя́ющеся, со упова́нием благим са́ми себе́, и друг дру́га, и весь живо́т наш Тебе́ по Бо́зе моли́твенно предае́м и Тя велича́ем с ро́ждшимся от Тебе́ Спаси́телем на́шим, Го́сподом Иису́сом Христо́м, Ему́же, со Безнача́льным Его Отце́м и Пресвяты́м Ду́хом, подоба́ет вся́кая сла́ва, честь и поклоне́ние, ны́не и при́сно и во ве́ки веко́в. Ами́нь.

И́на моли́тва

О, Всеблагослове́нная Влады́чице на́ша, Богоро́дице и Присноде́во Мари́е! Приими́ сию́ моли́тву, Тебе́ ны́не приноси́мую от нас, недосто́йных рабов Твои́х, к цельбоно́сному о́бразу Твоему́ со умиле́нием притека́ющих, и с ве́рою прося́щих благода́тныя по́мощи. О наде́ждо на́ша, Ма́ти Бо́жия, помози́ всем бе́дствующим, оби́димым, больны́м, путеше́ствующим, гла́дствующим, приюти́ сиро́т, благослови́ всех дете́й, напра́ви к добру́ вся́ку ю́ность, правосла́вному во́инству спобо́рствуй, укрепи́ в чи́стом житии́ во́зрастных, вся́ку ста́рость соде́лай о́бразом святы́я жи́зни, укрепи́ наде́ждою умира́ющих, всех гре́шников приведи́ к покая́нию, истреби́ тьму язы́чества, неве́рия, ересе́й и раско́лов, просвети́ нас све́том Небе́сным, да́руй мир душа́м на́шим, всех введи́ в позна́ние И́стины Бо́жией, всех напра́ви на путь и́стинный и спаси́ нас. Ами́нь.

И́на моли́тва

О, Пресвята́я Влады́чице на́ша Богоро́дице, милосе́рдия исто́чниче, покро́ве, упова́ние и прибе́жище христиа́н, к Тебе́ прибега́ющих! Тебе́, Всеси́льней Предста́тельнице и Спору́чнице покая́ния и спасе́ния на́шего, мы, гре́шнии раби́ Твои́, вруча́ем ду́ши и телеса́ на́ша, вхо́ды и исхо́ды, ве́ру и упова́ние на́ша, кончи́ну и число́ дней на́ших, глаго́лы и помышле́ния, дела́ и начина́ния. Ты же, Ми́лостивая Ма́ти Бо́жия, на́ми руково́дствуй, покрыва́й, соблюда́й и спаса́й нас от всех ко́зней вра́жеских невреди́мо, да немо́лчно до после́днего издыха́ния взыва́ем Ти: Радуйся, Неве́сто Неневе́стная! Ра́дуйся, Свята́я святы́х бо́льшая! Пресвята́я Богоро́дице, спаси́ нас. Ами́нь.

Источник: Текст утвержден Священным Синодом Русской Православной Церкви 21 октября 2016 года (журнал № 96)