19.11 Святи́теля Филаре́та, митрополи́та Моско́вскаго и Коло́менскаго, чудотво́рца

НА МАЛЕЙ ВЕЧЕРНИ

На Го́споди, воззва́х: стихи́ры на 4, глас 1.

Подо́бен: Небе́сных чино́в:

От ю́ности приста́нища немяте́жнаго взыска́л еси́, / в многомяте́жнем ми́ре пребыва́я, свя́те Филаре́те, / и суеты́ земны́я моли́твою избе́гл еси́. / Во святи́телех мона́шески пожи́в, / в мона́сех архиере́й изря́ден был еси́, // моли́ о всех, любо́вию блажа́щих тя.

Та́йну я́вльшагося Бо́га пропове́дуя / и свяще́нныя кни́ги изъясня́я, / свя́те Филаре́те, / сло́вом Бо́жиим насыща́л еси́ лю́ди а́лчущия, / да позна́ют И́стину; / и уразуме́ют, я́ко благ Госпо́дь.

Годи́ну гне́ва бу́дущаго о Оте́честве на́шем / дарова́ тебе́ Госпо́дь предзре́ти, святи́телю Филаре́те, / сего́ ра́ди, ско́рбный плач подъе́м, / ве́ру кре́пку в милосе́рдие Госпо́дне о Росси́и храни́л еси́, / и ны́не у Престо́ла Бо́жия // усе́рдно мо́лишися о спасе́нии ея́.

Ду́хом прови́дел еси́, святи́телю Филаре́те, / бу́дущая земли́ Росси́йския, / мра́ком объя́тая и бра́ней испо́лненная, / и за преумноже́ние беззако́ния любве́ ума́ленная, / те́мже моли́лся еси́ усе́рдно // ве́ре Правосла́вней непоколеби́мей пребыва́ти.

Сла́ва, глас 6:

Филаре́та Ми́лостиваго подража́теля, / всея́ Руси́ моли́твенника, / святы́х подви́жников собесе́дника, / сиро́т серафи́мовых засту́пника, / ста́рцев о́птинских покрови́теля, / скито́в и оби́телей устрои́теля, / учи́телей учи́теля, царе́й наста́вника, / А́нгелов слико́вника во Ца́рствии Небе́снем, / архиере́я Бо́жия, Филаре́та досточу́днаго / прииди́те, бра́тие, восхва́лим священноле́пно.

И ны́не, Богоро́дичен, глас то́йже:

Богоро́дице, Ты еси́ лоза́ и́стинная, / возрасти́вшая нам плод живота́, / Тебе́ мо́лимся, / моли́ся, Влады́чице, со святы́ми апо́столы, // поми́ловати ду́ши на́ша.

На стихо́вне стихи́ры, глас 7:

Преподо́бным по́двиги твои́ми уподо́бился еси́, / чудотво́рцем дре́вним благода́тию, / учи́телем вселе́нским богому́дрием, / первосвяти́телем Моско́вским правле́нием пра́вым, // Филаре́те присносла́вный.

Стих: Свяще́нницы Твои́ облеку́тся в пра́вду // и преподо́бнии Твои́ возра́дуются.

Простеце́м оте́ц милосе́рдный был еси́, / па́стырем архипа́стырь и́стинный, / и́ноком а́вва богому́дрый, / святи́телем о́браз ве́ры и благоче́стия, // Филаре́те благоиску́сный.

Стих: Блаже́н муж, боя́йся Го́спода, // в за́поведех Его́ восхо́щет зело́.

При трие́х земны́х царе́х святи́тельствуя, / еди́ному Царю́ Небе́сному служи́л еси́, / сла́ву челове́ческую ни во что же вменя́я, / и́го Христо́во пресла́вно поне́сл еси́, / Филаре́те неботе́чный.

Сла́ва, глас 8:

Украше́ние Це́ркве Христо́вы / и Росси́йских святы́х похвалу́, / прославля́ем тя днесь, святи́телю Филаре́те, / и мо́лим усе́рдно: / я́ко предстои́ши у Престо́ла Небе́снаго Царя́ / и дерзнове́нное хода́тайство и́маши, / моли́ спасти́ся душа́м на́шим.

И ны́не, Богоро́дичен, глас то́йже.

Подо́бен: О, пресла́внаго чудесе́:

О, пресла́внаго чудесе́! / Небесе́ и земли́ Цари́ца, / от святы́х сро́дников на́ших умоля́емая, / до ны́не зе́млю Ру́сскую покрыва́ет / и ли́ка Своего́ изображе́нии ми́лостивно обогаща́ет. / О Влады́чице Держа́вная! / Не преста́ни и на бу́дущее вре́мя / во утвержде́ние на Руси́ Правосла́вия // ми́лости и чудеса́ излива́ти до ве́ка. Ами́нь.

Тропа́рь, глас 4: Ду́ха Свята́го благода́ть стяжа́в: зри на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 6:

Днесь благода́ть Свята́го Ду́ха нас собра́, / с ли́ком а́нгельским и собо́ром Моско́вских святи́телей / пра́здновати па́мять Филаре́та достохва́льнаго, / той бо мо́лит дерзнове́нно о Це́ркви Росси́йстей, / во е́же в ми́ре и благостоя́нии ей бы́ти // и спасти́ся душа́м на́шим.

И́ны стихи́ры, глас 2:

Архиере́ю блаже́нне Пе́тре, / по́двиги и мощми́ твои́ми первопресто́льный град Москву́ освяти́вый, / прииди́ с на́ми ны́не, / да воспои́м Филаре́та святи́теля, / и́же насле́дова ти пресла́вно / и яви́ся Це́ркве на́шея похвала́ и утвержде́ние.

Ли́ки пра́зднующих возгла́ви ны́не, святи́телю Алекси́е, / да воспои́м Филаре́та достосла́внаго, / и́же от гро́ба твоего́ клобу́к прие́мый, / труды́ мно́гими тебе́ уподо́бися // и яви́ся Це́ркве на́шея похва́ла и утвержде́ние.

От Го́спода избра́нный / и собо́ром утвержде́нный / пасти́ наро́д Моско́вский, / Ио́на благосла́вный / днесь славосло́вит с на́ми / прему́дра Филаре́та, / упа́сша Це́рковь Ру́сскую / и ей во всем сла́вна я́вльшася, // я́ко похвала́ и утвержде́ние.

Прему́дрость кни́жную возлюби́вый / и собо́р святы́х ру́сских просла́вивый, / святи́телю чу́дный Мака́рие, / восхвали́ ны́не труды́ и по́двиги Филаре́та богому́драго, // я́ко Це́ркве на́шея похвалу́ и утвержде́ние.

Па́стырю до́брый Фили́ппе, / со дерзнове́нием пред царе́м пра́вду глаго́лавый, / возра́дуйся днесь с на́ми / торжеству́ Филаре́та богоревни́ваго, / его́же укрепля́л еси́ моли́твами твои́ми, // да яви́тся Це́ркви на́шей похвала́ и утвержде́ние.

Пе́рвый от Патриа́рхов Росси́йских, / И́ове многомоли́твенный, / при́зри днесь на пра́зднество на́ше, / е́же твори́м в па́мять Филаре́та, / я́ко иера́рха пречу́днаго // и Це́ркве на́шея похвалы́ и утвержде́ния.

Патриа́рший по́двиг страда́ньми увенча́вша, / Ермоге́на сла́внаго призове́м моли́твенно, / да ку́пно с ним ина́го печа́льника земли́ на́шея, / Филаре́та любосмире́нна досто́йно почти́м, // я́ко Це́ркве Росси́йския похвалу́ и утвержде́ние.

Сла́ва, глас 8:

О пречу́дный святи́телю Филаре́те, / а́ввы Се́ргия учениче́ ве́рный, / Ла́вры Тро́ицкия усе́рдный попечи́телю, / святи́теля Инноке́нтия, апо́столом равноче́стна, покрови́телю, / преподо́бнаго Анто́ния сотаи́нниче, / Серафи́ма досточу́днаго почита́телю / и всех прибега́ющих к тебе́ кре́пкий засту́пниче, // моли́ спасти́ся душа́м на́шим.

И ны́не, Богоро́дичен, глас то́йже: Царь Небе́сный: Та́же вход. Проки́мен дне. И чте́ния.

К Тимофе́ю посла́ния свята́го апо́стола Па́вла чте́ние (главы́ 3 и 4):

Ча́до Тимофе́е! / Вся́ко писа́ние богодухнове́нно и поле́зно есть ко уче́нию, / ко обличе́нию, ко исправле́нию, к наказа́нию е́же в пра́вде, / да соверше́н бу́дет Бо́жий челове́к, / на вся́кое де́ло благо́е угото́ван. / Засвиде́тельствую у́бо аз пред Бо́гом и Го́сподем на́шим Иису́с Христо́м, / хотя́щим суди́ти живы́м и ме́ртвым в явле́нии Его́ и Ца́рствии Его́. / Пропове́дуй сло́во, / насто́й благовре́менне и безвре́менне, / обличи́, запрети́, умоли́ со вся́ким долготерпе́нием и уче́нием. / Бу́дет бо вре́мя, / егда́ здра́ваго уче́ния не послу́шают, / но по свои́х по́хотех изберу́т себе́ учи́тели, че́шеми слу́хом. / И от и́стины слух отвратя́т и к ба́снем уклоня́тся. / Ты же трезви́ся о всем, / злопостражди́, де́ло сотвори́ благове́стника, / служе́ние твое́ изве́стно сотвори́. / Аз бо уже́ жрен быва́ю, / и вре́мя моего́ отше́ствия наста́. / По́двигом до́брым подвиза́хся, / тече́ние сконча́х, ве́ру соблюдо́х. / Про́чее у́бо соблюда́ется ми вене́ц пра́вды, / его́же возда́ст ми Госпо́дь в день он, Пра́ведный Судия́. / Не то́кмо же мне, / но и всем возлю́бльшим явле́ние Его́.

Ко Ефесе́ем посла́ния свята́го апо́стола Па́вла чте́ние (глава́ 6):

Бра́тие! / Возмога́йте во Го́споде и в держа́ве кре́пости Его́. / Облецы́теся во вся ору́жия Бо́жия, / я́ко возмощи́ вам ста́ти проти́ву ко́знем диа́вольским. / Я́ко несть на́ша брань к кро́ви и пло́ти, / но к нача́лом и ко власте́м, и к миродержи́телем тьмы ве́ка сего́, / к духово́м зло́бы поднебе́сным. / Сего́ ра́ди приими́те вся ору́жия Бо́жия, / да возмо́жете проти́витися в день лют и вся соде́явше ста́ти. / Ста́ните у́бо препоя́сани чресла́ ва́ша и́стиною, / и обо́лкшеся в броня́ пра́вды, / и обу́вше но́зе во угото́вание благовествова́ния ми́ра, / над все́ми же восприи́мше щит ве́ры, / в не́мже возмо́жете вся стре́лы лука́ваго разжже́нныя угаси́ти. / И шлем спасе́ния восприими́те, / и меч духо́вный, и́же есть глаго́л Бо́жий.

Ко Ефесе́ем посла́ния свята́го апо́стола Па́вла чте́ние (глава́ 6):

Ча́да! / Послу́шайте свои́х роди́телей о Го́споде, / сие́ бо есть пра́ведно. / Чти отца́ твоего́ и ма́терь, / я́же есть за́поведь пе́рвая во обетова́нии, / да бла́го ти бу́дет и бу́деши долголе́тен на земли́. / И отцы́, не раздража́йте чад свои́х, / но воспитова́йте их в наказа́нии и уче́нии Госпо́дни. / Раби́, послу́шайте госпо́дий свои́х по пло́ти, со стра́хом и тре́петом, / в простоте́ се́рдца ва́шего, я́коже и Христа́, / не пред очи́ма то́чию рабо́тающе, я́ко человекоуго́дницы, / но я́коже раби́ Христо́вы, / творя́ще во́лю Бо́жию от души́, / со благоразу́мием служа́ще, я́коже Го́споду, а не я́ко челове́ком, / ве́дяще, я́ко ко́ждо, е́же а́ще сотвори́т благо́е, / сие́ прии́мет от Го́спода, а́ще раб, а́ще свобо́дь. / И госпо́дие, та́яжде твори́те к ним, / послабля́юще им преще́ния, / ве́дуще, я́ко и вам саме́м и тем Госпо́дь есть на Небесе́х, / и обинове́ния лица́ несть у Него́.

На лити́и стихи́ры, глас 8:

О, благоутро́бия Бо́жия неизрече́ннаго, / о, человеколю́бия неизглаго́ланнаго: / яви́ бо нам Госпо́дь святи́теля чу́дна, Филаре́та велему́дреннаго, / моли́твенника и печа́льника, / судию́ и прови́дца, / кни́жника и вети́ю, / чудотво́рца и пра́ведника, / да спасу́тся вси, // и́же спасе́ния ча́ют.

Я́коже патриа́рхом дре́вним иногда́, / век до́лгий дарова́ ти Госпо́дь, святи́телю Филаре́те, / е́же о гресе́х наро́да пла́кати, / о царе́х моли́тися, / о сла́ве Оте́чества Бо́га хвали́ти, / корми́лом церко́вным му́дро пра́вити, / па́дших воздвиза́ти к покая́нию, / суд пра́ведный твори́ти, / да спасу́тся вси, // и́же спасе́ния ча́ют.

И́же плато́новым многому́дрием не прельсти́выйся, / ина́го Плато́на, архиере́я сла́вна, / учени́к яви́лся еси́, богому́дре Филаре́те, / не суему́дрием мирски́м просла́вився, / но смиренному́дренно Христу́ и лю́дем послужи́л еси́, / да спасу́тся вси, // и́же спасе́ния ча́ют.

Сла́ва, глас то́йже:

Я́ко прее́мник апо́стольский, / во благове́стии Христо́ве до́бре потруди́лся еси́, святи́телю, / е́же изложи́ти сло́во Бо́жие / и писа́ния святы́х оте́ц росси́йскою ре́чию, / удо́бь разумева́емою людьми́ земли́ на́шея, / и пра́вила ве́ры и благоче́стия начерта́л еси́, / ве́рным утвержде́ние подава́яй / и заблу́ждшим путь к покая́нию указу́яй, / да спасу́тся вси, // и́же спасе́ния ча́ют.

И ны́не, Богоро́дичен, глас то́йже: Влады́чице, приими́ моли́твы раб Твои́х / и изба́ви нас // от вся́кия ну́жды и печа́ли.

На стихо́вне стихи́ры, глас 2.

Подо́бен: До́ме Евфра́фов:

Сосу́де избра́нный, / слеза́ми омы́тый, / благода́ти и ми́лости, / я́ко ми́ра, испо́лненный, / Филаре́те, святи́телю прему́дрый.

Стих: Восхва́лятся преподо́бнии во сла́ве // и возра́дуются на ло́жах свои́х.

О́ко у́мное Це́ркве, / све́том и́стины / пресла́вно возсия́вшее, / сто́лпе богомы́слия, // Филаре́те, избра́нниче Христо́в.

Стих: Свяще́нницы Твои́ облеку́тся в пра́вду, // и преподо́бнии Твои́ возра́дуются.

Царя́ Небе́снаго архитекто́н изря́дный, / царе́й земны́х побо́рниче, / труба́ злата́я богосло́вия, / уста́ благоче́стия, // Филаре́те, святи́телю прехва́льный.

Сла́ва, глас 8:

Днесь Коло́мна имени́тая, / пресла́вно возрасти́вшая тя, / благоче́стием твои́м хва́лится, / днесь оби́тель Тро́ицы Живонача́льныя, / обре́тши мо́щи твоя́, я́ко сокро́вище пребога́тое, лику́ет, / днесь Москва́ первопресто́льная святи́тельство твое́ велича́ет, / днесь Русь свята́я пра́зднует све́тло // честну́ю па́мять твою́, Филаре́те, святи́телю достохва́льный.

И ны́не, Богоро́дичен, глас то́йже: Безневе́стная Де́во:

Тропа́рь, глас 4:

Ду́ха Свята́го благода́ть стяжа́в, / богому́дре святи́телю Филаре́те, / и́стину и пра́вду ра́зумом просвеще́нным / лю́дем пропове́дал еси́, / мир и ми́лость се́рдцем умиле́нным / стра́ждущим яви́л еси́, / я́ко учи́тель ве́ры и страж неусы́пный / па́ству росси́йскую жезло́м пра́вости сохрани́л еси́. / Сего́ ра́ди дерзнове́ние ко Христу́ Бо́гу име́я, / моли́ дарова́ти Це́ркви утвержде́ниеу / и душа́м на́шим спасе́ние.

НА У́ТРЕНИ

На Бог Госпо́дь: тропа́рь святи́теля два́жды. Сла́ва, и ны́не, Богоро́дичен.

По 1-м стихосло́вии седа́лен, глас 8:

Ны́не ра́дуется душа́ твоя́, святи́телю Филаре́те, / Го́споду предстоя́щи, / облече́ бо тя в ри́зу спасе́ния, / и, я́ко жениху́, возложи́ ти вене́ц, / и, я́ко неве́сту, украси́ тя доброде́телей красото́ю, / те́мже моли́ спасти́ся всем нам.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь, / А́нгельский собо́р и челове́ческий род, / освяще́нный хра́ме и раю́ слове́сный, / де́вственная похвало́, / из Нея́же Бог воплоти́ся и Младе́нец бысть пре́жде век сый Бог наш: / ложесна́ бо Твоя́ Престо́л сотвори́ и чре́во Твое́ простра́ннее Небе́с соде́ла. / О Тебе́ ра́дуется, Благода́тная, вся́кая тварь, сла́ва Тебе́.

По 2-м стихосло́вии седа́лен, глас 3:

Измла́да ве́лию любо́вь стяжа́л еси́ к Бо́гу, / и си́ла Бо́жия в не́мощи пло́ти твоея́ соверши́ся, святи́телю Филаре́те, / егда́ ни́ву земли́ Ру́сския ра́лом Боже́ственных слове́с возде́лал еси́. / Ны́не же, я́ко вре́мя жа́твы прии́де, / испроси́ нам у Бо́га ве́лию ми́лость.

Сла́ва, и ны́не, Богоро́дичен:

Боже́ственная ски́ния была́ еси́ Сло́ва, / еди́на Пречи́стая Ма́ти Де́во, / чистото́ю А́нгелы превозше́дшая, / мене́, па́че всех персть бы́вша и оскверне́нна плотски́ми прегреше́ньми, / очи́сти моли́тв Твои́х вода́ми, / подаю́щи, Чи́стая, ве́лию ми́лость.

По полиеле́и седа́лен, глас 4:

От ю́ности ру́ку возло́жь на ра́ло Христо́во, / по́ты и слеза́ми мно́гими се́рдце до́бре угобзи́л еси́, / клас духо́вный серпо́м смире́ния пожа́л еси́ / и, плод стори́чный собра́в, / пи́щею духо́вною ты́сящи насы́тил еси́. / Сподо́би и нас ея́ прича́стниками бы́ти, пра́зднующих любо́вию святу́ю па́мять твою́.

Сла́ва, и ны́не, Богоро́дичен:

О всепе́тая Ма́ти! Усты́ святы́х просла́вленная, / псалмы́ духо́вными воспе́тая, / имены́ та́инственными нарече́нная, / приими́ от нас, гре́шных, арха́нгелов глас, / вопию́щих Ти: / ра́дуйся, Благода́тная, Госпо́дь с Тобо́ю.

Степе́нна, 1-й антифо́н 4-го гла́са. Проки́мен, глас 4: Благовести́х пра́вду // в Це́ркви вели́цей. Стих: Уста́ пра́веднаго ка́плют прему́дрость, и язы́к его́ возглаго́лет суд. Ева́нгелие от Иоа́нна, зача́ло 35 от полу́.

По 50-м псалме́ стихи́ра, глас 6:

Па́стырю му́дрый Филаре́те, / звездо́ светоза́рная, / в Це́ркви Росси́йстей возсия́вшая, / я́коже ина́я волхво́м иногда́, / приведи́ и нас поклони́тися ро́ждшемуся Христу́ Спа́су / и ми́ро покая́ния, / лива́н милосе́рдия // и сми́рну дел благи́х принести́ Ему́.

Кано́н Богоро́дицы на 6 и свята́го на 8.

Кано́н свята́го, глас 6.

Песнь 1

Ирмо́с: Помо́щник и Покрови́тель / бысть мне во спасе́ние, / Сей мой Бог, / и просла́влю Его́, / Бог отца́ моего́ / и вознесу́ Его́, // сла́вно бо просла́вися.

Всеми́лостиве Го́споди, / даждь ми мысль бла́гу и наста́ви се́рдце мое́ / во е́же просла́вити ди́внаго во святи́телех Филаре́та прехва́льнаго.

Я́ко плодоно́сная ветвь, от благочести́ваго ко́рене и свяще́нническаго дре́ва произше́д, свя́те Филаре́те, / благода́ть архиере́йства досто́йно восприя́л еси́. / Сего́ ра́ди благода́рне псало́мски вопие́м: / род пра́вых благослови́тся.

Юн ра́зум к Боже́ственным уче́нием напра́вив, прему́дре Филаре́те, / да́же до честны́х седи́н в зако́не Госпо́дни поуча́лся еси́ день и нощь, / сего́ ра́ди плод стори́чный Бо́гу прине́сл еси́.

Богоро́дичен: Богоро́дице Де́во, / я́коже во успе́нии Твое́м ми́ра не оста́вила еси́, / бу́ди и нам Путеводи́тельница во Ца́рствие Сы́на Твоего́ и Бо́га на́шего.

Песнь 3

Ирмо́с: Утверди́, Го́споди, / на ка́мени за́поведей Твои́х / подви́гшееся се́рдце мое́, // я́ко еди́н свят еси́ и Госпо́дь.

Филаре́та Ми́лостиваго и́мя прие́м, святи́телю Филаре́те, / сосу́д доброде́телей твои́х ми́лостию украси́л еси́, / сего́ ра́ди я́ко оте́ц чадолюби́вый лю́дем росси́йским яви́лся еси́.

Во всем после́дуяй Боже́ственным отце́м, / прему́дрость Бо́жию я́ко наста́вницу избра́л еси́, святи́телю, / и, Це́ркве Росси́йския до́брый па́стырь быв, / благоче́стию па́ству научи́л еси́.

Златоу́сту сла́вному си́лою сло́ва подо́бяся, / Бо́га Сло́ва вои́стину возсла́вил еси́, святи́телю Филаре́те, / те́мже слове́сными венцы́ тя велича́ем.

Богоро́дичен: Несть пречи́ста, я́ко Ты, Де́во, / и несть гре́шен, я́ко аз, окая́нный, / те́мже, безнаде́жен сый, на Тя упова́ние мое́ возлага́ю.

Седа́лен, глас 8:

Ты еси́ па́стырь до́брый и учи́тель богому́дрый, / святи́телю о́тче Филаре́те, / тобо́ю Бог украси́ Це́рковь Свою́ / и те́ло твое́, многоле́тно покрове́нное в земли́, нетле́нно яви́ лю́дем Свои́м. / Те́мже не преста́й моли́тися о хва́лящих тя и чту́щих па́мять твою́, / прося́ оставле́ния грехо́в и спасе́ния душа́м на́шим.

Сла́ва, и ны́не, Богоро́дичен:

Я́ко Всенепоро́чная Неве́ста Творца́, / я́ко Неискусобра́чная Ма́ти Изба́вителя, / прия́телище я́ко су́щи Уте́шителя, Препе́тая, / све́тлое жили́ще доброде́телей соверши́ мя, / отжени́ о́блак страсте́й и Вы́шняго прича́стия сподо́би / и све́та невече́рняго моли́твами Твои́ми.

Песнь 4

Ирмо́с: Услы́ша проро́к / прише́ствие Твое́, Го́споди, и убоя́ся, / я́ко хо́щеши от Де́вы роди́тися / и челове́ком яви́тися, и глаго́лаше: / услы́шах слух Твой и убоя́хся, // сла́ва си́ле Твое́й, Го́споди.

Христа́ Бо́га Помо́щника и Засту́пника при́сно име́я в се́рдце твое́м, святи́телю Филаре́те, / я́ко дре́вле Моисе́й началово́ждь, в беда́х и искуше́ниих лю́ди укрепли́л еси́ / и науча́л еси́ взыва́ти к Нему́ я́ко Помо́щнику и Засту́пнику.

Сугу́бое попече́ние о ю́ных лю́дех име́л еси́, святи́телю Филаре́те, / е́же бы́ти им благочести́вым, трудолюби́вым и рачи́тельно уча́щимся зако́ну Госпо́дню / и служи́ти Це́ркви на похвалу́ и Оте́честву на по́льзу.

Любо́вь Небе́сную на земли́ ева́нгельски стяжа́вый, / горе́ упра́вил еси́ ду́шу твою́, пресла́вне Филаре́те, / наставли́я ве́рныя лю́ди го́рняя помышли́ти, а не себе́ угожда́ти.

Богоро́дичен: Сове́та преве́чнаго смотре́ние разуме́в проро́к, / та́йну рождества́ Де́вы преднапису́яй, взыва́ше: / возвеселю́ся о Бо́зе, Спа́се Мое́м.

Песнь 5

Ирмо́с: Сою́зом любве́ связу́еми апо́столи, / влады́чествующему все́ми себе́ Христу́ возло́жше, / кра́сны но́ги очища́ху, // благовеству́юще всем мир.

Апо́стольское рече́ние, я́ко си́ла Бо́жия в не́мощи соверша́ется, / на тебе́ испо́лнися, святи́телю. / Ты бо, не́мощен пло́тию, па́жить земли́ Ру́сския Боже́ственными словесы́ возде́лал еси́ / и мно́гия лю́ди ко Христу́ приве́л еси́.

Благода́ти Свята́го Ду́ха испо́лнься, / сло́во Бо́жие ре́вностно пропове́дал еси́ / и та́йну Пресвяты́я Тро́ицы и воплоще́ния Бо́га Сло́ва преизи́щно изъясни́л еси́. / Ны́не же Бо́гу предстоя́, / моли́ся о почита́ющих тя, Филаре́те достопа́мятне.

Я́ко зе́ницу о́ка и сокро́вище многоце́нное, / храни́ти ве́ру Правосла́вную запове́дал еси́ нам, святи́телю Филаре́те, / в ней бо есть утвержде́ние Це́ркве и Оте́чества благоде́нствие.

Богоро́дичен: О́тчую Прему́дрость во утро́бе Свое́й носи́вшая, Влады́чице, / в нощи́ ми́ра блужда́ющих к све́ту Христо́ву наста́ви и сою́зом любве́ соедини́, / я́ко Богоро́дица еси́ и Ма́ти Све́та.

Песнь 6

Ирмо́с: Возопи́х всем се́рдцем мои́м к Ще́дрому Бо́гу, / и услы́ша мя от а́да преиспо́дняго, / и возведе́ // от тли живо́т мой.

Прему́дростию Бо́жиею вразумля́емь, / я́ко Соломо́н му́дрый, суд пра́вый и ми́лостивый потща́лся еси́ твори́ти, / да ве́дают лю́дие, я́ко пра́ви суть пути́ Госпо́дни.

Ве́дая го́рькия рабо́ты и тяготы́ жития́ земледе́лателей, святи́телю Филаре́те, / потща́лся еси́ помощи́ росси́йскому госуда́рю / провозгласи́ти лю́дем ча́емое свобожде́ние.

О, любы́ Бо́га Отца́, распина́ющая, / любы́ Сы́на, распина́емая, / и любы́ Ду́ха Свята́го, торжеству́ющая си́лою кре́стною,– / благогове́йне взыва́л еси́, святи́телю Филаре́те.

Богоро́дичен: О Де́во Пречи́стая, / Сло́вом Бо́жиим, да бу́дет, отрази́ла еси́ от Себе́ зако́нное по естеству́ недоуме́ние, / егда́ Гаврии́л Арха́нгел Ти предста́, благовеству́я рождество́ Емману́ила,– / благогове́йне взыва́л еси́, святи́телю Филаре́те.

Конда́к, глас 2:

Я́ко и́стинный подража́тель преподо́бнаго Се́ргия, / доброде́тель измла́да возлюби́л еси́, богоблаже́нне Филаре́те, / я́ко па́стырь пра́ведный и испове́дник непоро́чный, / по святе́м преставле́нии от безбо́жных поруга́ние и поноше́ния прия́л еси́, / Бог же зна́меньми и чудесы́ тя просла́ви / и засту́пника Це́ркве на́шея яви́.

И́кос:

А́нгел па́ствы росси́йския яви́лся еси́ в житии́ твое́м, святи́телю Филаре́те, / охраня́я и защища́я ю и боле́знуя се́рдцем о Оте́честве твое́м. / Пы́не же, с ли́ки Небе́сными совокупле́н, / наипа́че мо́лишися за ны, усе́рдно прославля́ющих тя и зову́щих: / ра́дуйся, святи́телей Моско́вских прее́мниче и в благода́ти им насле́дниче; / ра́дуйся, я́ко Петр, град Москву́ возлюби́вый; / ра́дуйся, я́ко Алекси́й, о нем усе́рдно моли́выйся; / ра́дуйся, я́ко Ио́на, бо́дрственне град стреги́й; / ра́дуйся, я́ко Мака́рий, ру́сских святы́х ре́вностно почита́вый; / ра́дуйся, Фили́пповым по́двигом утвержда́выйся; / ра́дуйся, И́овлеву благоче́стию подража́вый; / ра́дуйся, Ермоге́новою любо́вию ко Оте́честву распала́емый; / ра́дуйся, святи́телю Филаре́те, ве́ры Правосла́вныя богому́дрый учи́телю.

Песнь 7

Ирмо́с: О́троцы в Вавило́не пе́щнаго пла́мене не убоя́шася, / но, посреде́ пла́мене вве́ржени, / ороша́еми поя́ху: // благослове́н еси́, Го́споди Бо́же оте́ц на́ших.

Я́коже Елисе́й иногда́ ми́лоть Илиину́, / клобу́к от гро́ба святи́теля Алекси́я прия́л еси́, святи́телю Филаре́те, / да благода́ть сугу́бую получи́ши, воспева́я: / благослове́н еси́, Бо́же оте́ц на́ших.

А́ще и чтил еси́ царя́ земна́го, / но раболе́пствовати пред ним не восхоте́л еси́, святи́телю, / Царю́ же Небе́сному боголе́пную честь воздава́л еси́, взыва́я: / благослове́н еси́, Бо́же оте́ц на́ших.

Рабо́тая Го́сподеви со стра́хом, / не взира́л еси́ на похвале́ния и поноше́ния, святи́телю Филаре́те, / то́кмо в се́рдце с тре́петом взыва́л еси́ к Судии́ Пра́веднейшему: / благослове́н еси́, Бо́же оте́ц на́ших.

Ум чист, чу́вства до́брая и во́лю благу́ю, / я́ко еди́но во о́браз Тро́ицы Святы́я име́я, святи́телю Филаре́те, / Тро́ицы единосу́щие просла́вил еси́, взыва́я: / благослове́н еси́, Бо́же оте́ц на́ших.

Богоро́дичен: Отрокови́це Пречи́стая, / чудеси́ рождества́ Твоего́ дивя́щеся, / Избра́вшему Тя зове́м: / благослове́н еси́, Бо́же оте́ц на́ших.

Песнь 8

Ирмо́с: За зако́ны оте́ческия / блаже́ннии в Вавило́не ю́ноши, предбе́дствующе, / царю́ющаго оплева́ша повеле́иие безу́мное / и, совокупле́ни, и́мже не свари́шася огне́м, / Держа́вствующему досто́йную воспева́ху песнь: / Го́спода по́йте, дела́, // и превозноси́те во вся ве́ки.

Егда́ благи́й Госпо́дь попусти́ пове́трие губи́тельное во гра́де Москве́, / тогда́ ты, святи́телю Филаре́те, к покая́нию и моле́бствию наро́д призыва́л еси́ взыва́ти: / Го́спода по́йте, дела́, и превозноси́те во вся ве́ки.

И́же моли́твами твои́ми исцеле́ние обре́тшии / и спасе́ние от сме́рти улучи́вшии, / благода́рственное пе́ние принесо́ша, глаго́люще: / Го́спода по́йте, дела́, и превозноси́те во вся ве́ки.

Отце́м святы́м подража́я, / уста́вы и́ночеству препо́дал еси́, свя́те, / да А́нгелом сослу́жат и́ноков собо́ри и с ни́ми ли́ки неве́ст Христо́вых, взыва́юще: / Го́спода по́йте, дела́, и превозноси́те во вся ве́ки.

Богоро́дичен: Цари́цу Небесе́ и земли́, А́нгелов со́нми и челове́ков собо́ри, / по́йте и превозноси́те во вся ве́ки.

Песнь 9

Ирмо́с: Стра́нствия Влады́чня / и Безсме́ртныя Трапе́зы / на го́рнем ме́сте / высо́кими умы́, ве́рнии, прииди́те, наслади́мся, / возше́дша Сло́ва, от Сло́ва научи́вшеся, // Его́же велича́ем.

Ре́вностию по Бо́зе на высоту́ доброде́телей возше́д, / сла́вы ми́ра сего́ удаля́лся еси́, свя́те, / взыску́яй сла́вы то́кмо от Христа́, / Той бо есть еди́ный Царь ми́ра и Спас душ на́ших.

Егда́ сверши́ся кончи́на свята́я твоя́, / возскорбе́ша лю́дие росси́йстии, достохва́льне святи́телю, / ты же не оста́вил еси́ их си́ры, / дерзнове́нно моля́ся еди́ному Царю́ ми́ра и Спа́су душ на́ших.

Торжеству́йте, лю́дие, / святи́теля Филаре́та па́мять чту́ще, / и́же служи́тель до́ма Богоро́дицы быв, / просла́ви Ту, я́ко в моли́твах неусыпа́ющую Засту́пницу.

Богоро́дичен Русь Свята́я, лику́й ны́не, / за тя бо мо́лит Сы́на Своего́ / Пречи́стая Богоро́дица Де́ва с Филаре́том приснохва́льным / и все́ми святы́ми твои́ми.

Свети́лен:

Я́ко благоче́стия лампа́ду светолу́чну, / ри́тора преизя́щна, па́стыря милосе́рдна, судию́ прему́дра, / прииди́те, ве́рнии, Филаре́та благопода́теля любо́вию ублажи́м.

Сла́ва, и ны́не, Богоро́дичен:

Что Ти принесе́м, Благода́тная, ру́ки иму́ще оскверне́ны? / Ка́ко воспое́м Тя, уста́ иму́ще нечи́ста? / Ка́ко восхва́лим Тя, се́рдце иму́ще лука́во? / Оба́че моли́твами святи́теля Филаре́та взыва́ем Ти: / ра́дуйся, Неве́сто Неневе́стная.

На хвали́тех стихи́ры на 4, глас 5.

Подо́бен: Ра́дуйся, живоно́сный Кре́сте:

Ра́дуйся, святи́телю о́тче Филаре́те! / Та́инство Креста́ позна́вый / и стезе́ю неботе́чною / чрез ско́рби и сла́ву ми́ра ше́ствовавый, / пред цари́ и ни́щими / сло́во кре́стное глаго́лал еси́ / и сие́ нело́жно житие́м запечатле́л еси́, // прие́м от Го́спода вене́ц и ве́лию ми́лость.

Ра́дуйся, святи́телю о́тче Филаре́те! / Ты Христу́ во́лею после́довал еси́, / не то́кмо на Фаво́ре во сла́ве с Ним бы́ти жела́вый, / но и на Голго́фу ве́рно возше́дый, / по сме́рти же поруга́нию телесе́ пре́дан был еси́ / и, я́ко зерца́ло све́тлое Со́лнца и́стины, / стране́ Росси́йстей яви́лся еси́. // Сего́ ра́ди обре́л еси́ у Го́спода вене́ц и ве́лию ми́лость.

Ра́дуйся, святи́телю о́тче Филаре́те! / Ты и́го Христо́во благо́е до́бре поне́сл еси́, / ри́зу души́ своея́ истка́в, / светле́йшу па́че риз земны́х. / Благода́ть же Бо́жия, / ю́же по́двигом та́йным стяжа́в, / яви́ тя те́пла моли́твенника / и да́ром проро́чества, зна́меньми и чудесы́ просла́ви тя. // Сего́ ра́ди тя ублажа́ем.

Сла́ва, глас 2:

О Филаре́те сла́вный, / сло́ву и́стины де́лом после́дуя, / по́двигом сокрове́нным подвиза́лся еси́, / те́мже, я́ко и апо́столом иногда́, / даде́ся ти власть от Христа́ Бо́га / бе́сы изгоня́ти и немощны́я цели́ти, / гряду́щая прорица́ти и от бед избавля́ти. / Сего́ ра́ди у́бо просла́вльшаго тя Го́спода сла́вы / умиле́нною душе́ю // правосла́вно велича́ем.

И ны́не, Богоро́дичен:

Все упова́ние мое́ на Тя возлага́ю, / Ма́ти Бо́жия, // сохрани́ мя под кро́вом Твои́м.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 1: Уста́ моя́ возглаго́лют прему́дрость, // и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси живу́щии по вселе́нней. Апо́стол ко Ефесе́ем, зача́ло 233. Аллилу́ия, глас 4: Уста́ пра́веднаго поуча́тся прему́дрости. Стих: Язы́к его́ возглаго́лет суд. Ева́нгелие от Матфе́я, зача́ло 11. Прича́стен: Впа́мять ве́чную бу́дет пра́ведник:

Моли́тва

О пресла́вне и богому́дре святи́телю Христо́в Филаре́те, Росси́йския Це́ркве свети́льниче, земли́ на́шея похвало́ и гра́ду Москве́ украше́ние! Ты житие́м и служе́нием твои́м трие́м вселе́нским святи́телем был еси́ подо́бник: Вели́кому Васи́лию – я́ко бытие́ су́щих изъясни́л еси́, Це́ркве Бо́жия и та́ин Христо́вых строи́тель до́брый яви́лся еси́, и́ноческих уста́вов быв ре́вностный исполни́тель и покрови́тель; Богосло́ву Григо́рию – я́ко, небота́инственных созерца́ний о Святе́й Тро́ице и о Бо́зе Сло́ве сподо́бивыйся, сих иску́сный провозве́стник яви́лся еси́; Златоу́стому Иоа́нну – я́ко неуста́нный пропове́дник и учи́тель покая́ния наро́да Бо́жия был еси́. И ны́не, вку́пе с ни́ми предстоя́ во сла́ве Престо́лу Бо́жию и хода́тайствуя о нас, моли́: Це́ркви Росси́йстей на ка́мени испове́дания правосла́вныя ве́ры утвержде́нней бы́ти, стране́ на́шей мир и едине́ние дарова́ти, па́стырем сло́во Боже́ственныя И́стины пра́во пра́вити, град Москву́ и па́ству твою́ от вся́ких напа́стей сохрани́ти. Святу́ю оби́тель, иде́же почива́ют честны́я мо́щи твоя́, по заве́том преподо́бнаго Се́ргия, я́ко учени́к его́ при́сный, до́бре упра́ви; и́ноки в по́двизех укрепи́; наста́вники умудри́; зва́нныя к па́стырскому де́ланию, уча́щияся ве́ре и благоче́стию в вертогра́де твое́м духо́внем, соде́лай избра́нны и досто́йны служе́ния сего́. При́зри с Небесе́, святи́телю, на ны, ча́да твоя́, и да́руй те́плым твои́м хода́тайством ко Го́споду в за́поведех Его́ нам преспева́ти, ве́ру тве́рду, любо́вь нелицеме́рну и благоче́стие до после́дняго часа́ сме́ртнаго сохрани́ти, да непосты́дно предста́нем Спаси́телю на́шему Го́споду Иису́су Христу́, Ему́же со Отце́м и Святы́м Ду́хом подоба́ет сла́ва, честь и поклоне́ние, ны́не и при́сно, и во ве́ки веко́в. Ами́нь.

Святитель Филарет, митрополит Московский

Святитель Филарет, митрополит Московский в миру – Василий Михайлович Дроздов, родился 26 декабря 1782 года в семье соборного диакона города Коломны Московской губернии.

С детства Василий обладал блестящими способностями и с величайшим успехом прошел курс Коломенской духовной семинарии, откуда перешел для прохождения академического курса в Троице-Сергиеву Лавру. Здесь у него проявилась склонность к уединенной монашеской жизни, и часто беседе с товарищами он предпочитал беседу с душеполезными книгами.

Прослышав об учености Василия Дроздова, коломенские граждане явились к митрополиту Московскому Платону с просьбой назначить им его в священники. Но митрополит отклонил это предложение. В 1808 году в Троице-Сергиевой Лавре Василий Дроздов был пострижен в монашество с именем Филарет в честь Филарета Милостивого, а через несколько дней рукоположен во иеродиакона.

В Лавре будущий святитель сформировался как выдающийся проповедник. Первое его слово было посвящено прославлению преподобного Сергия Радонежского, которому всю жизнь святитель Филарет был близок духом и образ которого яркими красками рисовал в своих проповедях.

В конце 1808 года иеродиакон Филарет отбывает в Санкт-Петербург, где получает должность преподавателя риторики в Александро-Невском училище. Позже он становится ректором этой духовной школы.

В 1809 году отец Филарет был назначен преподавателем философии во вновь открывшуюся Санкт-Петербургскую духовную академию, а в 1812 году, в звании архимандрита, его назначают ректором духовной академии Санкт-Петербурга. Неутомимо трудится отец Филарет на поприще духовного образования. Для супруги Императора Александра I, Императрицы Елизаветы Алексеевны, он пишет обширную записку «Изложение разности между Восточною и Западною Церковью», для студентов академии – «Введение к Книгам Ветхого Завета», «Записки о Книге Бытия», «Начертание церковно-библейской истории». Глубина мысли, четкость логических приемов, научная аргументация и неопровержимость доказательств – отличительные черты его произведений.

В академии за архимандритом Филаретом окончательно закрепилась слава лучшего русского проповедника. Проповеди святителя Филарета удивительны. С дерзновением беспредельной веры погружается он в созерцание Божественных тайн, ведя за собой слушателя в заоблачные высоты Божественного Откровения. Не только богослов, не только возгласитель церковного учения слышится в этих проповедях, а поэт, действующий на сердце человека яркими образами.

В 1817 году в Троицком соборе Александро-Невской Лавры состоялась хиротония архимандрита Филарета во епископа Ревельского, викария Санкт-Петербургской епархии. Вскоре епископ Филарет был переведен в Тверь, с возведением в сан архиепископа, и назначен членом Святейшего Синода. В Твери архиепископ Филарет за сто дней обозрел всю епархию, в каждом храме произнося поучение. В1820 году владыка Филарет был перемещен в Ярославль, а в 1821 году – в Москву.

Святитель Филарет всей душой отдался устройству Московской епархии, бывшей в запущенном состоянии. Строгий и настойчивый в своих требованиях, он был заботлив и внимателен к простому духовенству, входя во все подробности его нужд. Владыка оказывал особое почтение заслуженным священникам и материально помогал нуждающимся. Он был доступен просителям даже в ночные часы.

На коронации Государя Николая Павловича в 1826 году архиепископ Филарет был возведен в сан митрополита.

В Москве продолжается учено-литературная деятельность святителя. В 1823 году появился его знаменитый труд «Христианский катехизис Православной Кафолической Восточной Греко-Российской Церкви», по которому обучалась вере вся русская православная молодежь. Кладезем богословской мудрости явились проповеди владыки Филарета. Он толковал Евангелие в лучших святоотеческих традициях. Когда в подтверждение мысли о полном непротивлении злу указали на слова Спасителя: кто ударит тебя в правую щеку твою, обрати к нему и другую; ...любите врагов ваших, ...молитесь за обижающих вас и гонящих вас (Мф. 5, 39, 44), владыка Филарет ответил словами святителя Феодосия Черниговского: «Люби врагов своих, поражай врагов Отечества и ненавидь врагов Христовых».

Величайшее уважение всей России окружало митрополита Филарета. Иностранцы, приезжавшие в Москву, старались увидеть его как удивительное явление. Почитавший святителя Государь Александр Николаевич совещался с ним по важнейшим проблемам государственного управления. Митрополит Филарет составил Манифест об освобождении крестьян.

Святитель Филарет очень строго подходил к переводу Библии на русский язык, тщательно исследуя древние библейские списки.

Высокопреосвященный Филарет вел аскетический образ жизни. Никто не знал, сколько он спал, как рано вставал: уходя спать и вставая, келейник всегда заставал его за работой. Молитва, богослужения, прием посетителей, епархиальные дела, обширная переписка, подготовка проповедей, отдых, состоявший в чтении газет и журналов, за которыми митрополит следил как за отголоском жизни, – все это занимало непрерывно весь день до глубокой ночи.

За великую ревность по Бозе, за великие труды на благо Церкви, за строгое подвижничество и воздержание Бог даровал святителю Филарету благодатные дары прозорливости и исцелений.

19 ноября 1867 года, в воскресный день, владыка с особой бодростью и одушевлением совершил Божественную литургию в домашней церкви. Через несколько часов он безболезненно отошел в вечность.

Владыка Филарет был погребен в Троице-Сергиевой Лавре. Его святые мощи в годы гонений были вскрыты и подверглись поруганию. Прославлен митрополит Филарет в 1994 году. В 2004 году сохранившиеся честны́е мощи святителя Филарета были перенесены из Троице-Сергиевой Лавры в Москву, в Храм Христа Спасителя.

Память святителя совершается 19 ноября, а также 6 июля – в Соборе Радонежских святых, в воскресенье перед 26-м августа – в Соборе Московских святых и в 3-е воскресенье по Пятидесятнице – в Соборе Санкт-Петербургских святых.

Служба святителю Филарету составлена Синодальной Богослужебной комиссией и утверждена Святейшим Патриархом Московским и всея Руси Алексием II и Священным Синодом 26 декабря 2003 года.


Комментарии для сайта Cackle