[Глава 1] Слу́жба о́бща пра́здником, и предпра́зднством и попра́зднством Го́спода на́шего Иису́са Христа́

Ве́чер, на Го́споди воззва́х, стихи́ры, гла́с 6.

Подо́бен: Го́споди, Ла́зарев гро́б:

Го́споди, И́же Божество́м вся́ исполня́яй, бла́гостию к челове́ком соедини́вся, еди́н от двою́ неви́димь сы́й, проше́д от Чи́стыя ви́димь бы́сть: зра́ка же плотска́го показу́еши о́браз и́мярек Твоего́: в ня́же прише́дше покланя́емся Тебе́, Влады́це, оде́теля позна́вше мо́лим Тя́: благослове́н еси́, Спа́се, поми́луй на́с. [Два́жды.]

Го́споди, непостижи́мую смотре́ния Твоего́ та́йну, ю́же от ве́ка пронарече́нную, прише́дый назна́менуеши, и то́ уверя́я показа́л еси́ ми́рови Боже́ственное и́мярек Твое́, и испо́лнил еси́ вся́ческая ра́дости, и обнови́л еси́ па́ки челове́ческое существо́, спасти́ хотя́: благослове́н еси́, Бо́же, поми́луй на́с. [Два́жды.]

Го́споди, пресла́вное соше́ствие Твоего́ милосе́рдия, в Вы́шних живы́й в не́дрех оте́ческих, неопи́санно и непостижи́мо, и к земны́м прише́д, ви́ден бы́л еси́ ны́не: и почита́ем пра́здник Тво́й и́мярек, да изба́виши на́с от страсте́й его́  ра́ди чту́щих Тя́ Влады́ку, оживи́вша ны́ уме́ршыя от гре́х: благослове́н еси́, Спа́се, поми́луй на́с. [Два́жды.]

Го́споди, воплоти́вся я́коже восхоте́л еси́, изво́лих нищету́ на́шу и бога́тство благосе́рдия Твоего́ показа́ти, и́мже мя́ пе́рсть обожи́л еси́. Сла́вим Тя́, Человеколю́бче, смотре́ния о́браз ви́девше и́мярек Твоего́: си́м невозбра́нно, е́же во Еде́м вхо́д, Спа́се, да́руй рабо́м Твои́м, презря́ и́м вся́ согреше́ния. [Два́жды.]

Сла́ва, и ны́не, гла́с 8:

Влады́ко Человеколю́бче, вели́ка Твоего́ смотре́ния глубина́, в ро́д и ро́д Твое́ благоде́тельствуеши созда́ние. Не́др Оте́ческих не отсту́пль: пло́тию Челове́к яви́лся еси́ на земли́, прии́де призыва́я все́х к покая́нию: Царю́ и Бо́гу Тебе́ покланя́емся, я́ко погубля́еши враги́ на́ша, и спаса́еши лю́ди Твоя́ изря́дныя, пра́зднующыя честно́е и́мярек Твое́.

Проки́мен дне́.

Исхо́да чте́ние [глава́ 24].

Рече́ Госпо́дь к Моисе́ю: взы́ди ко Мне́ на гору́, и ста́ни та́мо, и да́м ти́ скрижа́ли ка́менны, зако́н и за́поведи, я́же написа́х, взако́нити лю́дем. И воста́в Моисе́й, и Иису́с предстоя́й ему́, взыдо́ша на гору́ Бо́жию, и ста́рцем рече́: безмо́лвствуйте та́мо, до́ндеже возврати́мся к ва́м. И се́ Ааро́н и О́р с ва́ми: а́ще кому́ прилучи́тся су́д, да и́дут к ни́м. И взы́де Моисе́й на гору́ и покры́ о́блак го́ру, и сни́де сла́ва Бо́жия на гору́ Сина́йскую, и покры́ и о́блак ше́сть дне́й. И призва́ Госпо́дь Моисе́а в де́нь седмы́й, из среды́ о́блака. Виде́ние же сла́вы Госпо́дни я́ко о́гнь паля́ на версе́ горы́, пря́мо сыно́в Изра́илевых. И вни́де Моисе́й посреде́ о́блака, и взы́де на гору́: и бе́ та́мо на горе́ четы́редесять дне́й и четы́редесять ноще́й.

Втора́го зако́на чте́ние [глава́ 4].

Рече́ Моисе́й к лю́дем: ны́не слы́ши, Изра́илю, оправда́ния и судьбы́, ели́ка а́з научу́ ва́с дне́сь твори́ти, да жи́ви бу́дете. И сохрани́те, и сотвори́те, я́ко сия́ прему́дрость ва́ша, и ра́зум пред все́ми язы́ки, ели́цы а́ще услы́шат оправда́ния сия́, и реку́т: си́и лю́дие му́дри и худо́жни, и язы́к вели́кий се́й, я́ко Госпо́дь Бо́г на́ш е́сть во все́х, и́же а́ще Того́ призове́м. И ны́не внемли́те себе́ ве́сь до́м Изра́илев, и сохрани́те ду́шы своя́ зело́, и не забу́дите вся́ словеса́, я́же ви́деша о́чи ва́ши, и да не отсту́пят от серде́ц ва́ших во вся́ дни́ живота́ ва́шего. И приведо́сте сы́ны ва́шя, и сы́ны сыно́в ва́ших в де́нь, во́ньже ста́сте пред Го́сподем Бо́гом в Хори́ве, в де́нь во́ньже рече́ Госпо́дь ко мне́: собери́ в це́рковь лю́ди, и да услы́шат глаго́лы моя́, я́ко да навы́кнут боя́тися Мене́ во вся́ дни́, ели́ки поживу́т они́ на земли́, и сы́ны своя́ да науча́т. И приступи́сте и ста́сте под горо́ю, и гора́ горя́ще огне́м да́же до небесе́, тьма́, сумра́к и ды́м. И глаго́ла Госпо́дь Бо́г к ва́м на горе́ от среды́ огня́: гла́с слове́с Его́ вы́ слы́шасте, и подо́бия не ви́десте, но гла́с. И возвести́ ва́м заве́т Сво́й, и́же завеща́ ва́м твори́ти, и мне́ завеща́ Госпо́дь во вре́мя о́но, научи́ти ва́с оправда́нием и судьба́м, твори́ти ва́м та́ на земли́. Глаго́ла Госпо́дь к ва́м на горе́ в Хори́ве, от среды́ огня́.

Втора́го зако́на чте́ние [глава́ 5].

Собра́ Моисе́й вся́ лю́ди Изра́ильтеския, и рече́ к ни́м: слы́ши, Изра́илю, все́х оправда́ний мои́х, и суде́б мои́х, ели́ко а́з глаго́лю во у́ши ва́шя: во дни́ ты́я научи́теся и́м, и сохрани́ти я́ и сотвори́ти. Госпо́дь Бо́г завеща́ ва́м заве́т в Хори́ве: Не еди́ным отце́м ва́шым завеща́ Госпо́дь заве́т се́й, но и ва́м. Лице́м к лицу́ глаго́ла Госпо́дь в Хори́ве из среды́ огня́ на горе́: А́з же стоя́х между́ Го́сподем и ва́ми во вре́мя о́но, возвести́ти ва́м глаго́лы Госпо́дни, глаго́ля: А́з е́смь Бо́г тво́й, изведы́й тя́ из земли́ Еги́петския, из до́му рабо́ты, не су́ть бо́зи и́ни ра́зве Мене́: а́з бо е́смь Госпо́дь Бо́г тво́й Ревни́тель, творя́ ми́лость ты́сящами лю́бящым Мя́, и храня́щым за́поведи Моя́. И бы́сть я́ко услы́шасте гла́с посреди́ огня́, и гора́ горя́ще огне́м, и приступи́сте ко Мне́ вси́, и реко́сте: Се́ показа́ Госпо́дь Бо́г на́ш на́м сла́ву Свою́, и гла́с слы́шахом посреди́ огня́: в де́нь о́н ви́дехом, я́ко возглаго́лет Госпо́дь Бо́г к челове́ку, и жи́в бу́дет. И ны́не да не у́мрем, я́ко погуби́т ны́ о́гнь вели́кий се́й, а́ще приложи́м послу́шати гла́с Го́спода Бо́га на́шего еще́, и у́мрем. Ка́я бо пло́ть, или́ кто́ слы́ша гла́с Бо́га глаго́люща посреди́ огня́, и жи́в бу́дет: И слы́ша Госпо́дь Бо́г гла́с слове́с глаго́лющих ко мне́, и ре́х к ни́м: и за́поведи и оправда́ния и суды́, ели́ко запове́да ва́м Госпо́дь Бо́г, да убоите́ся все́х оправда́ний его́, да ми́лостив бу́дет, и умно́житеся на земли́. Слы́ши, Изра́илю, Госпо́дь Бо́г ва́ш, Госпо́дь еди́н е́сть: и возлю́биши Го́спода Бо́га твоего́ от всего́ помышле́ния твоего́, и от всего́ се́рдца твоего́, и от всея́ души́ твоея́, и от всея́ кре́пости твоея́, и Того́ убои́шися, и Тому́ еди́ному послу́жиши, и к Нему́ прилепи́шися, и И́менем Его́ клене́шися, и уго́дная Ему́ сотвори́ши: да добро́ тебе́ бу́дет.

На стихо́вне стихи́ры, гла́с 2.

Подо́бен: До́ме Евфра́фов:

Прии́де просвеще́ние, ꙳ благода́ть яви́ся, ꙳ и избавле́ние наста́, ꙳ ми́р просвети́ся: ꙳ лю́дие ра́дости испо́лнитеся.

Сти́х: Бо́г от ю́га прии́дет и святы́й от горы́ приосене́нныя ча́щи.

По́йте оте́чествия язы́к, ꙳ хвалу́ и сла́ву возсыла́юще ꙳ Христу́ Бо́гу, ꙳ усе́рдно поспе́шшеся, ꙳ сла́вяще и́мярек сего́.

Сти́х: Го́споди, услы́шах слу́х Тво́й, и убоя́хся.

Сло́во О́тчее, и́мже вся́ бы́ша, ꙳ безстра́стно и неизрече́нно, ꙳ ипоста́сь зри́тся еди́на, ꙳ от двою́ естеству́, ꙳ прии́де спасти́ челове́чество.

Сла́ва, и ны́не, гла́с 8:

Го́споди, испо́лнити хотя́ я́же повеле́л еси́ от ве́ка, от всея́ тва́ри служи́тели та́йны Твоея́ прия́л еси́: от а́нгел Гаврии́ла: от челове́к Де́ву: от небе́с звезду́: от земли́ го́ру: от пусты́ни  я́сли, от во́д Иорда́н, в не́мже беззако́ния все́х потреби́л еси́, Спа́се на́ш, сла́ва Тебе́.

Тропа́рь настоя́щаго пра́здника.

А́ще ли не́сть, глаго́ли тропа́рь, гла́с 2: Пречи́стому Твоему́ о́бразу:

На у́трени,

на Бо́г Госпо́дь, тропа́рь то́йже, три́жды.

По 1-й кафи́сме, седа́лен, гла́с 1.

Подо́бен: Гро́б тво́й:

Благода́ть Твоя́, Спа́се, на на́с излия́ся, ви́диму бы́вшу Ти́, непостижи́ме, и пре́лести тьма́ угасе́: те́м во све́те лица́ Твоего́ стопы́ на́ша напра́ви, да в за́поведех Твои́х ходя́ще, Тебе́ сподо́бимся узре́ти, Све́те непристу́пный.

Сла́ва, и ны́не, то́йже.

По 2-й кафи́сме, седа́лен, гла́с 5.

Подо́бен: Собезнача́льное:

Собезнача́льный Сы́н Отцу́ и преве́чный, и неви́димый существо́м, и неосяза́емый, под ле́том бы́в, за ми́лость неизрече́нную, опи́саныя пло́ти Твоея́, Влады́ко, на́м оста́ви сла́дкое изъображе́ние и́мярек на спасе́ние ду́ш на́ших.

Сла́ва, и ны́не, то́йже.

Велича́ние настоя́щему пра́зднику. По полиеле́и седа́лен, гла́с 4.

Подо́бен: Вознесы́йся:

Не ктому́ се́тование на лице́ Ада́мове, во Ада́ма обо́лкшуся и́же того́ созда́вшему, и лица́ подо́бием себе́ все́м явля́ющу и к любви́ подви́жущу благочести́вых составле́ния, единогла́сно воспева́ти: Сла́ва, Влады́ко Человеколю́бче, кра́йнему схожде́нию Твоему́.

Сла́ва, и ны́не, то́йже.

Степе́нна, 4-го гла́са, 1-й антифо́н.

Проки́мен:

Го́споди, во све́те Лица́ Твоего́ по́йдем, и о И́мени Твое́м возра́дуемся во ве́ки.

Сти́х: Ви́деша вси́ концы́ земли́ спасе́ние Бо́га на́шего.

Ева́нглие прилучи́вшемуся пра́зднику. По 50-м псалме́, стихи́ра, гла́с 8: Го́споди, испо́лнити хотя́: [пи́сана на стихо́вне ве́чера. Сла́ва.]

Кано́н, гла́с 4: ирмо́с по два́жды, тропари́ же на 12.

Пе́снь 1.

Ирмо́с: Наста́вльшему дре́вле Изра́иля, бежа́щаго от рабо́ты фарао́новы, и в пусты́ни пита́вшему, пои́м Изба́вителю Бо́гу на́шему: я́ко просла́вися.

В наро́читый де́нь пра́здника на́шего отве́рзем уста́, челове́цы, и уясни́м язы́к, явле́ние Боже́ственное, и́мярек, Христа́ Бо́га на́шего све́тло пою́ще: я́ко просла́вися.

Све́т преве́чный, О́тча исполня́я словеса́, хотя́ сказа́сти свою́ благода́ть, о́браз ра́бий прии́м на́с ра́ди, яви́ся о́бразом Боже́ственнаго и́мярек Своего́, све́том облиста́я на́с.

Прииди́те, вси́, Христо́во и́мярек ве́рою пра́зднуем, и разу́мно пе́ние предлага́юще Боже́ственное, сла́вим и возопие́м согла́сно: Христо́с прии́де те́мным на обновле́ние. Пое́м Ему́, я́ко просла́вися.

Богоро́дичен: Явле́ние дне́сь Боговочелове́чнаго рождества́, вои́стинну позна́хом Тобо́ю, Всечи́стая: и чту́щии Тя́ сподо́блени бы́хом ви́дети и́мярек Сы́на Твоего́, его́же моли́ спасти́ на́с от вся́кия бе́ды.

Катава́сиа, настоя́щаго пра́здника, ирмосы́, или́ сия́:

Боже́ственным покрове́н, медленоязы́чный мра́ком, извити́йствова Богопи́санный зако́н: ти́ну бо оттря́с очесе́ у́мнаго, ви́дит Су́щаго, и науча́ется Ду́ха ра́зуму, хваля́ Боже́ственными пе́сньми.

Пе́снь 3.

Ирмо́с: Не му́дростию, и си́лою и бога́тством хва́лимся, но Тобо́ю О́тчею Ипоста́сною му́дростию, Христе́: не́сть бо свя́т, па́че Тебе́, Человеколю́бче.

Влады́ко сы́й по существу́, соедини́вся рабо́м пло́тию, и ви́ден бы́л еси́, на́м де́тельствуя разли́чное спасе́ние, Христе́, е́же ны́не прославля́ем и́мярек Твое́: я́ко не́сть свя́т па́че Тебе́, Человеколю́бче.

Лю́дие Твои́, Христе́, и́же в Тя́ ве́рою просвеще́ни, Боже́ственный Тво́й пра́здник и́мярек сотворя́ют све́тло: то́же чту́ще от бе́д избавля́емся, и Ца́рствию Небе́сному, Спа́се, сподо́би на́с.

Животе́ ипоста́сный, ны́не вку́шь сме́рти пло́тию, е́юже живо́т источи́л еси́ ме́ртвым, воста́нием Твои́м, Христе́, и Твои́м и́мярек, я́ко живота́ хода́тая дарова́л еси́ на́м.

Богоро́дичен: Спасе́ние из Тебе́ пре́жде в ми́ре возсия́ пло́тию, ны́не же ве́рных Тобо́ю, Богома́ти, живо́т яви́ся, светоно́сное Христо́во и́мярек, его́же ра́ди, Богоро́дице, моли́ Сы́на Твоего́, изба́вити на́с от бе́д и ве́чнаго муче́ния.

Катава́сиа: Разве́рзе утро́бы неча́дствовавшия у́зы, доса́ду же неудоботерпи́му благоча́дствующия, еди́на моли́тва проро́чицы дре́вле А́нны, нося́щия ду́х сокруше́н, к си́льному и Бо́гу ра́зумов.

Седа́лен, гла́с 4.

Подо́бен: Вознесы́йся на Кре́ст:

Мо́лим Тя́, Влады́ко ми́лостиве Спа́се, изба́ви на́с от все́х ви́димых и неви́димых вра́г, и иноплеме́нных нахожде́ний, и вся́ких бе́д и смуще́ния, пра́зднующих ве́рою и любо́вию Боже́ственное и́мярек, его́же ра́ди сподо́би на́с получи́ти ве́чных благи́х наслажде́ние.

Сла́ва, и ны́не, то́йже.

Пе́снь 4.

Ирмо́с: Неизсле́дный Бо́жий сове́т, е́же от Де́вы воплоще́ния Тебе́, Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди.

Светоподо́бный Боже́ственный пра́здник, пло́тию прибли́жшагося челове́ком, прии́де к новоизбра́нному Изра́илю, и просвеща́ет дне́сь всего́ ми́ра концы́ и́мярек свои́м: сла́ва си́ле Твое́й Го́споди.

Боговиде́ния сла́вы дре́вле Твои́х зна́мений сподо́бися Моисе́й, просия́в: но́вый же Изра́иль лице́м ны́не к лицу́, я́сно Тя́, Изба́вителя, зри́т: сла́ва си́ле Твое́й, Го́споди.

Ви́дите чу́дная вси́ лю́дие, духо́вно ны́не возвесели́теся, Христо́во пою́ще и́мярек, и́же на земли́ я́вльшагося челове́ком на спасе́ние: сла́ва си́ле Твое́й, Го́споди.

Богоро́дичен: Пречи́стая Богоро́дице, спаси́ ны к Тебе́ прибега́ющыя, и пра́зднующыя Сы́на твоего́ Боже́ственное и́мярек и всегда́ моли́ его́, грехо́в проще́ние дарова́ти на́м.

Катава́сиа: Царю́ царе́й, яковы́й от якова́го еди́н, Сло́ве, произше́дый от Отца́ безвино́внаго, равномо́щнаго Твоего́ Ду́ха апо́столом и́стинно посла́л еси́, я́ко благоде́теля, пою́щым: сла́ва держа́ве Твое́й, Го́споди.

Пе́снь 5.

Ирмо́с: От Све́та пресеки́й перворо́дный све́т, я́ко во све́те де́ла пою́т Тя́, Христе́, Соде́теля, во све́те Твое́м пути́ на́ша напра́ви.

Воспле́щем дне́сь рука́ми, и воскли́кнем гла́сом хвале́ние Го́сподеви: се́ бо прии́де и яви́ся вои́стинну, вся́ просвеща́я ве́рныя Боже́ственным и́мярек, пречи́стыя пло́ти своея́.

Просвети́шася дне́сь правосла́вных собо́ри, ерети́ческая же ополче́ния посрами́шася, ви́дяще покланя́емо Христо́во и́мярек, о́бразом плотски́м изба́вителя прело́жшася.

Прии́де у́бо торжество́, и вели́кая та́йна от лица́ Госпо́дня све́т возсия́ ми́рови, благоустро́енный пра́здник Боже́ственнаго и́мярек Госпо́дня: и́мже бо дарова́ся пле́нным все́м ми́р и весе́лие.

Богоро́дичен: О́блацы свы́ше да кропя́т сла́дость землены́м, Твои́м хода́тайством, Пресвята́я Де́во. Уще́дрив ми́р Сы́н Тво́й и Бо́г на́ш, дне́сь, воздви́же ро́г христиа́нский: дне́сь спасе́ние ве́рным, Боже́ственным и́мярек свои́м дарова́.

Катава́сиа: Реши́тельное очище́ние грехо́в, огнедохнове́нную приими́те Ду́ха ро́су, о ча́да светообра́зная, церко́вная! Ны́не от Сио́на бо изы́де Зако́н, языкоогнеобра́зная Ду́ха благода́ть.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те рука́ми воспле́щим, от нея́ ро́ждшагося Бо́га сла́вим.

Возсия́ живо́т ме́ртвым, и све́т уже́ слепы́м прише́ствова, и лю́те немощны́м врачевство́ отве́рзеся: и все́м спасе́ние прибли́жися, светоно́сным и́мярек Христо́вым.

Да пра́зднствует вся́к ра́зум, ны́не я́сно ви́дя невеще́ственный пра́здник Боже́ственнаго и́мярек, и́же просвеще́ние источа́ет покланя́ющымся ему́.

Го́споди, ви́дяще Тя́, небеса́ пове́дают сла́ву Твою́, Иису́се Христе́, вся́ ве́рныя Твоя́ созыва́ют воспева́ти Боже́ственное и́мярек Твое́, гряду́щих к позна́нию и́стиннаго покая́ния.

Богоро́дичен: Бо́жия Ма́ти, яви́ся страна́м зна́мение, и зна́емое спасе́ние, Чи́стая Де́во, све́том Сы́на Твоего́ честна́го и́мярек, то́же моли́ спасти́ на́с помина́ющих Тя́, и изба́ви бе́д и пога́ных нахожде́ния, моли́твами Твои́ми.

Катава́сиа: Очище́ние на́м, Христе́, и спасе́ние, Влады́ко, возсия́л еси́ от Де́вы: да я́ко проро́ка от зве́ря морска́го пе́рсей Ио́ну, от тли́ исхи́тиши всего́ Ада́ма, всеро́дна па́дшаго.

Конда́к пра́здника.

А́ще ли не́сть, глаго́ли се́й конда́к, гла́с 2:

Неизрече́ннаго и Боже́ственнаго Твоего́ к челове́ком смотре́ния, неопи́санное Сло́во О́тчее, и о́браз непи́санный и Богопи́санный, победи́телен ве́дяще нело́жнаго Твоего́ воплоще́ния, почита́ем того́ лобыза́юще.

И́кос: Уверя́я и челове́ком Госпо́дь вочелове́чения Своего́ та́йну, Са́м опису́ется Богому́жным Свои́м о́бразом, и первообра́зное у́бо посажда́ет на Престо́ле О́тчи, покланя́тися от безпло́тных А́нгел: подо́бию же первообра́знаго и на́м дарова́ покланя́тися. Его́же объима́юще душе́ю и се́рдцем, почита́ем Того́ лобыза́юще.

Пе́снь 7.

Ирмо́с: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Вся́к гра́д и страна́ сра́дуется, пра́зднуя ве́рно с но́вым Сио́ном, Ца́рь бо его́ сла́вы Христо́с прише́л е́сть о́бразом честна́го пра́здника Своего́ и́мярек, и спаса́я покланя́ющихся ему́ и вопию́щих: оте́ц на́ших Бо́же, благослове́н еси́.

Богогла́сных проро́к рече́ние испо́лнися Боже́ственными писа́ньми: ны́не бо ви́дехом сбытие́ и́мярек Христо́вым просвеща́ется ми́р, и светоза́рным сия́нием спаса́ет пою́щих: оте́ц на́ших Бо́же, благослове́н еси́.

Богоро́дичен: Веселя́тся с земны́ми небе́сная, и сра́дуется все́х святы́х мно́жество, бога́тии и убо́зии пра́зднуем. Се́ у́бо угото́ва просвеще́ние на́м Христо́с, изъображе́ние пра́здника Своего́, благоде́тельное подо́бие, е́же прия́т от Де́вы.

Катава́сиа: Согла́сная возшуме́ орга́нская пе́снь, почита́ти златосотворе́нный безду́шный истука́н: Уте́шителева же светоно́сная благода́ть почеству́ет, е́же вопи́ти: Тро́ице Еди́ная, Равноси́льная, Безнача́льная, благослове́нна еси́.

Пе́снь 8.

Ирмо́с: В Вавило́не о́троцы Боже́ственною распала́еми ре́вностию, мучи́теля и пла́мене преще́ние му́жески попра́ша, и посреде́ огня́ вве́ржени ороша́еми поя́ху: благослови́те, вся́ дела́ Госпо́дня, Го́спода.

Соверше́н сы́й по существу́ Бо́г, и челове́к ви́ден бы́сть соверше́н, спаса́я по обоему́ Своя́ вои́стинну сво́йства, я́ко Бо́г плотско́е уверя́я Боже́ственное и́мярек, ему́же покланя́ющеся пое́м: благослови́те, вся́ дела́ Госпо́дня, Го́спода.

Вознеси́ ро́г, Бо́жий Сло́ве, испове́дающих Тя́, Бо́га и Челове́ка, и сла́вящих и́мярек Твое́, и́мже живо́т ве́чный все́м дарова́л еси́ ве́рным, и разруши́ пога́нская шата́ния Твоея́ ненави́дящих Боже́ственныя си́лы.

Све́тится но́вый зако́н, и це́рковь украша́ется: сла́вы бо Твоея́ Боже́ственныя све́т возсия́л еси́, Христе́ Бо́же, светоподо́бное лице́ Твое́ яви́л и́мярек Твои́м, на спасе́ние лю́дем Твои́м, Тебе́ вопию́щым: благослови́те, вся́ дела́ Госпо́дня, Го́спода.

Богоро́дичен: Па́дшым возста́ние, уныва́ющым ра́дование, и заблу́ждшым наста́внице, боля́щым исцеле́ние, и все́м христиа́ном спасе́ние, соблюди́ на́с, госпоже́ Богоро́дице, чту́щих и́мярек Сы́на Твоего́: моли́ Его́, изба́вити на́с иноплеме́нных нахожде́ний.

Катава́сиа: Разреша́ет у́зы, и ороша́ет пла́мень, трисве́тлый Богонача́лия о́браз, пою́т о́троцы: благослови́т же еди́наго Спа́са и Вседе́теля, я́ко Благоде́теля, сотворе́ная вся́ческая тва́рь.

Пе́снь 9.

Ирмо́с: Рождество́ Твое́ нетле́нно яви́ся, Бо́г из боку́ Твое́ю про́йде, я́ко плотоно́сец яви́ся на земли́, и с челове́ки поживе́. Тя́, Богоро́дице, те́м вси́ велича́ем.

Пое́м Бо́гу пе́снь благода́рную, изво́лившему бога́тство превели́кое пода́ти на́м: кре́пкое во бране́х утвержде́ние Боже́ственныя пло́ти своея́ и́мярек, то́же чту́ще ве́рнии, тебе́ велича́ем.

О па́че ума́ чуде́с твои́х, Го́споди, и́хже сотвори́л еси́ на́м на Тя́ наде́ющымся, я́ко бо име́ и́мярек, неизрече́но и стра́шно все́м показа́в изъображе́ние: его́же чту́щыя изба́ви от вся́каго гне́ва и паде́ния.

О сло́во Бо́жие, му́дрость и си́ла, и о́браз Оте́чь! О Бо́же разумева́емый! Твоего́ пра́здника и́мярек све́тлое торжество́ на́с сподо́би соверши́ти, во све́те до́брых де́л, духо́вно велича́ющих.

Богоро́дичен: Вои́стинну высота́ Твоя́ та́йны Бо́жия пречи́стая, и глубина́ неизрече́нная прему́дрости Бо́жия: я́ко бо несказа́нно из Тебе́ роди́ся Вы́шний, и неви́димый ви́димь бы́сть, плотски́м свои́м и́мярек, мы́ же ве́рнии покланя́ющеся ему́, Тя́ велича́ем.

Катава́сиа: Ра́дуйся, Цари́це, ма́тероде́вственная Сла́во: вся́ка бо удобообраща́тельная благоглаго́ливая уста́ вити́йствовати не мо́гут, Тебе́ пе́ти досто́йно: изъумева́ет же у́м вся́к Твое́ рождество́ разуме́ти. Те́мже Тя́ согла́сно сла́вим.

Свети́лен.

Подо́бен: Жены́, услы́шите:

Та́инство превели́кое и а́нгелом несказа́нное, О́тчим благоволе́нием, и Ду́ха Свята́го де́йствием, проро́чеством соверше́ния испо́лнишася: Сло́во безнача́льное нача́ло прии́м, я́ко челове́к от Де́вы роди́ся, на спасе́ние ми́ра и челове́ком на избавле́ние. [Три́жды.]

На хвали́тех стихи́ры, гла́с 1.

Подо́бен: Небе́сных чино́в:

Прииди́те, вси́, ꙳ Христо́во и́мярек ве́рно пра́зднуем, ꙳ и разу́мно пе́ние предлага́ем, ꙳ глаго́люще Боже́ственное славосло́вие, ꙳ возопие́м согла́сно: ꙳ прии́де Христо́с, спасе́ние земны́м и обновле́ние. [Два́жды.]

Прииди́те пра́зднственными пе́сньми, ꙳ и мы́сленною пра́востию, Христо́во и́мярек сла́вим: ꙳ Отцу́ бо и Ду́ху Свято́му се́й равноче́стен, ꙳ за милосе́рдие Свое́ обо́лкся ꙳ в на́ше смеше́ние. ꙳ Его́же несказа́нно со а́нгелы пра́зднуем.

В кимва́лех усты́ возгласи́м, ꙳ и в пе́снех воскли́кнем, ꙳ Христо́во и́мярек показа́ся. ꙳ Проро́ческая пропове́дания коне́ц прия́ша: ꙳ Его́же бо реко́ша пло́тию к челове́ком яви́тися, ꙳ на спасе́ние на́м и на обновле́ние.

Сла́ва, и ны́не, гла́с 1. Самогла́сен:

Прииди́те пра́зднуим, лю́дие, Христо́во и́мярек, впери́м у́м и чу́вства, и у́зрим от Де́вы чи́стыя пло́ть прии́мшаго, соверше́нна Сы́на су́ща, того́же в Божестве́ и челове́честве, те́мже зове́м: Святы́й Бо́же, О́тче безнача́льный: Святы́й Кре́пкий, Сы́не воплоще́йся: Святы́й Безсме́ртный, Уте́шителю Ду́ше, Тро́ице Свята́я, сла́ва тебе́.

Славосло́вие вели́кое. И отпу́ст.

На литурги́и, блаже́нна от кано́на, пе́снь 3-я и 6-я.


Источник: Минея общая – М. : Издательский Совет Русской Православной Церкви, 2002. – 516 с. ISBN 5-94625-045-0

Комментарии для сайта Cackle