[Глава 15] Слу́жба о́бща му́чеником, двема́ и мно́гим

Ве́чера,

на Го́споди воззва́х, стихи́ры, гла́с 4.

Подо́бен: Я́ко до́бля:

Просвети́вшеся Ду́хом Святы́м прехва́льнии, ꙳ на мироде́ржца ополчи́стеся, ꙳ и ко́зни его́ му́жески победи́сте, ꙳ посо́бием Бо́жиим ꙳ на него́ подви́гшеся.  ꙳ Те́м дне́сь пресве́тлую ва́шу па́мять соверша́юще, ꙳ по до́лгу хвала́ми ва́ше ꙳ почита́ем страда́ние.

Ра́нам преда́вшеся ꙳ и му́кам святи́и, ꙳ непрекло́нни прему́дростию пребы́сте, ꙳ я́ко све́щы разже́гшеся ꙳ теплото́ю духо́вною, ꙳ просвети́сте сердца́ ве́рных благода́тию. ꙳ Те́мже вся́ческий ро́д и во́зраст ꙳ пра́зднует святу́ю ва́шу па́мять, ꙳ пе́сньми сла́вяще Го́спода.

Све́тлостию му́ченицы чуде́с ва́ших ꙳ всю́ просвети́сте тва́рь, ꙳ отгна́вше мглу́ страсте́й и скорбе́й ꙳ от притека́ющих к ва́м, ꙳ и ве́рою прося́щих ꙳ ва́шего заступле́ния, ꙳ до́блии страда́льцы Спа́совы: ꙳ те́мже ве́рою свято́е и светоно́сное ва́ше соверша́ем торжество́.

Сла́ва, и ны́не, Богоро́дичен:

Де́монскими преклоне́на прило́ги, и в ро́в поги́бели вве́ржена, уще́дри Влады́чице, и утверди́ мя на ка́мени доброде́тели, и наве́ты вра́жия разори́вши, сподо́би мя́ твори́ти повеле́ния Твоего́ Сы́на, и Бо́га на́шего: я́ко да улучу́ оставле́ние в де́нь суда́.

Крестобогоро́дичен: Распина́ема ви́дящи, ꙳ и в ре́бра пробода́ема копие́м, ꙳ Пречи́стая Христа́ человеколю́бца, ꙳ пла́чущи вопия́ше: ꙳ что́ сие́ Сы́не Мо́й? ꙳ что́ Тебе́ неблагода́рнии лю́дие возда́ша, ꙳ вме́сто я́же сотвори́л еси́ до́брая и́м, ꙳ и тщи́шися безча́дствовати Мя́ Вселюбе́знейше? ꙳ дивлю́ся Благоутро́бне, Твоему́ во́льному распя́тию.

А́ще и́мут самогла́сен, Сла́ва, гла́с 3:

Се́ ко́ль добро́, и ко́ль красно́, самобра́тная любо́вь му́ченик Твои́х Христе́ Бо́же: и́хже бо рождество́ плотско́е бра́тий не сотвори́, но братолю́бная ве́ра му́дрствовати и до кро́ве научи́ла е́сть: моли́твами и́х, Христе́ Бо́же, спаси́ ду́шы на́ша.

И ны́не, Богоро́дичен:

Богоро́дице предста́тельнице все́х моля́щихся Тебе́. Тобо́ю дерза́ем, и Тобо́ю хва́лимся, и к Тебе́ все́ упова́ние на́ше е́сть: моли́ ро́ждшагося из Тебе́ за непотре́бныя рабы́ Твоя́.

Крестобогоро́дичен.

Подо́бен: Ве́лия Креста́ Твоего́:

Зря́щи ро́ждшагося от Тебе́, Всенепоро́чная, пове́шена на Дре́ве, пла́чущи вопия́ла еси́: Возлю́бленное Мое́ Ча́до, где́ Твоя́ за́йде добро́та светоно́сная, удобри́вшаго ро́д челове́ческий?

А́ще пра́зднуеши с полиеле́ем. И ны́не, Богоро́дичен воскре́сный: Ка́ко не диви́мся:

Вхо́д. Проки́мен дне́.

Чте́ния 3 му́ченическая, [пи́саны в конце́ кни́ги сея́.]

На стихо́вне стихи́ры, гла́с 4.

Подо́бен: Я́ко до́бля:

Я́ко зве́зды многосве́тлыя, ꙳ страстоте́рпцы прехва́льнии, ꙳ Боже́ственными светлостьми́ ꙳ озаря́ете вселе́нныя концы́, ꙳ де́монскаго омраче́ния, ꙳ и страсте́й тлетво́рных и бе́д изъима́юще. ꙳ Те́мже дне́сь све́тлое и светоно́сное ꙳ и свято́е ва́ше торжество́, ꙳ соше́дшеся восхва́лим сла́внии.

Сти́х: Воззва́ша пра́веднии, и Госпо́дь услы́ша и́х.

Чу́днии Боже́ственнии, ꙳ прему́дрии страстоте́рпцы, ꙳ пе́сньми свяще́нными ꙳ да почту́тся: ꙳ Тро́ицу бо несозда́нную ꙳ пред враги́ свяще́нно пропове́дающе, ꙳ многобо́жную угаси́ша ле́сть кро́вными излия́нии, ꙳ и сла́ву прия́ша неувяда́емую.

Сти́х: Мно́ги ско́рби пра́ведным, и от все́х и́х изба́вит я́ Госпо́дь.

Мучи́теля беззако́нна, ꙳ беззако́нно повелева́ющаго, поклони́тися ꙳ и че́сти принести́ безслове́сным бого́м безду́шным ꙳ блаже́ннии, му́дре посрами́сте, ꙳ му́ченицы великоимени́тии. ꙳ И пострада́вше терпели́вно и зако́нно, ꙳ венцы́ исплето́сте побе́ды, о ми́ре моля́щеся.

Сла́ва, гла́с 6: По́лк Боговенча́нен ны́не я́вльшихся му́ченик, заколе́ние непоро́чное за Христа́ пожре́ное усе́рдно, святоизбра́нное во́инство, му́чениколю́бцы прииди́те, всесвяще́нную па́мять духо́вно соверши́вше возопие́м к ни́м: сокруши́те свере́пство ага́рян безбо́жных, и изба́вите лю́ди благочестному́дренныя моли́твами ва́шими вся́каго обстоя́ния.

И ны́не, Богоро́дичен:

Бо́га из Тебе́ воплоти́вшагося разуме́хом, Богоро́дице Де́во: Того́ моли́ о спасе́нии ду́ш на́ших.

Крестобогоро́дичен: Зря́щи Ро́ждшагося Непоро́чная и Богоневе́стная я́ко осужде́на, и ко Кресту́ пригвожда́ема, вопия́ше: сла́ва Твоему́, Сы́не Мо́й, долготерпе́нию, и мно́гому милосе́рдию.

Тропа́рь во уста́ве.

А́ще не́сть уста́ва, глаго́ли се́й тропа́рь, гла́с 1:

Боле́зньми святы́х, и́миже о Тебе́ пострада́ша, умоле́н бу́ди Го́споди, и вся́ на́ша боле́зни исцели́, Человеколю́бче, мо́лимся.

Сла́ва, и ны́не, Богоро́дичен, или́ Крестобогоро́дичен.

На у́трени,

на Бо́г Госпо́дь, тропа́рь то́йже.

По 1-й кафи́сме седа́лен, гла́с 4.

Подо́бен: Яви́лся еси́:

Честну́ю тве́рдь церко́вную, я́ко зве́зды велича́йшыя просвеща́ете при́сно, и ве́рныя озаря́ете, му́ченицы Боже́ственнии Христо́вы во́ини. [Два́жды.]

Сла́ва, и ны́не, Богоро́дичен:

В кро́в Тво́й, Пречи́стая Де́во, прибега́ющих, мольбу́ прие́млеши от на́с, не преста́й моля́щи Человеколю́бца, спасти́ рабы́ Твоя́.

По 2-й кафи́сме, седа́лен, гла́с 4.

Подо́бен: Вознесы́йся:

Му́жественнейшим по́мыслом преше́дше муче́ние, чу́днии страстоте́рпцы сквозе́ о́гнь и во́ду проидо́сте, и премину́сте ко спасе́ния широте́, насле́дие прие́мше Небе́сное Ца́рство. В не́мже твори́те о на́с Боже́ственныя мольбы́, му́дрии великому́ченицы. [Два́жды.]

Сла́ва, и ны́не, Богоро́дичен:

И́же благода́рно воспева́ющии от се́рдца, и прося́щии приле́жно Твоя́ ми́лости, Богоро́дице Влады́чице, рабы́ Твоя́ зову́т и глаго́лют: Пресвята́я Де́во, предвари́ и изба́ви от вра́г ви́димых и неви́димых, и вся́каго преще́ния: Ты́ бо еси́ на́ше заступле́ние.

По Хвали́те и́мя Госпо́дне:

Припе́в: Велича́ем ва́с, страстоте́рпцы святи́и: и чте́м честна́я страда́ния ва́ша, я́же за Христа́ претерпе́ли есте́.

Псало́м избра́нный: Бо́г на́м прибе́жище и си́ла:

По полиеле́и, седа́лен, гла́с 8:

Ведо́ми бы́сте свя́зани от враго́в, и в темни́це заключе́ни на времена́ мно́га, ве́рою соблюда́еми, невре́дни пребы́сте и отре́шшеся мечи́ теле́с, святи́и, Боже́ственным жела́нием я́ве связа́стеся: те́мже я́ко свети́ла просия́сте в ми́ре, вся́ просвеща́юще Ду́ха благода́тию, страстоте́рпцы блаже́ннии. Моли́те Христа́ Бо́га, грехо́в оставле́ние дарова́ти, пра́зднующым любо́вию святу́ю па́мять ва́шу. [Два́жды.]

Сла́ва, и ны́не, Богоро́дичен:

Я́ко Де́ву и еди́ну в жена́х, Тя́ без се́мене ро́ждшую Бо́га пло́тию, вси́ ублажа́ем ро́ди челове́честии: о́гнь бо всели́ся в Тя́ Божества́, и я́ко Младе́нца дои́ши зижди́теля и Го́спода. Те́м а́нгельский и челове́ческий ро́д, досто́йно сла́вим пресвято́е рождество́ Твое́, и согла́сно вопие́м Ти́: моли́ Христа́ Бо́га, согреше́ний оставле́ние дарова́ти, покланя́ющымся ве́рою пресвято́му рождеству́ Твоему́.

Степе́нна, 1-й антифо́н 4-го гла́са.

Проки́мен: Воззва́ша пра́веднии, и Госпо́дь услы́ша и́х.

Сти́х: Мно́ги ско́рби пра́ведным, и от все́х и́х изба́вит я́ Госпо́дь.

Вся́кое дыха́ние: Ева́нглие му́ченическое.

По 50-м псалме́, стихи́ра, гла́с 2:

Прииди́те возра́дуемся Го́сподеви, в па́мять страстоте́рпцев, о празднолю́бцы! прииди́те воспое́м та́йно, восхваля́юще страда́лец Христо́вых, ле́сть и́дольскую па́губе преда́вших, и Христа́ посреде́ суди́ща я́сно пропове́давших. Те́мже, о всеблаже́ннии и многострада́льнии, не преста́йте моля́щеся о душа́х на́ших.

А́ще ли 40 му́ченик, и ты́ глаго́ли проки́мен:

Проидо́хом сквозе́ о́гнь и во́ду, и изве́л еси́ ны́ в поко́й.

Сти́х: Разже́гл ны́ еси́, я́коже разжиза́ется сребро́.

Стихи́ра, гла́с 2:

Проро́чески вопия́ше Дави́д во псалме́х: проидо́хом сквозе́ о́гнь и во́ду, и изве́л ны́ еси́ в поко́й: вы́ же му́ченицы Христо́вы, саме́ми де́лы сло́во исполня́юще, проидо́сте сквозе́ о́гнь и во́ду, и внидо́сте в Ца́рство Небе́сное. Те́мже моли́теся четы́редесяте су́ще страда́льцы, дарова́ти на́м ве́лию ми́лость.

Кано́н, гла́с 5.

Пе́снь 1.

Ирмо́с: Спаси́телю Бо́гу, в мо́ри лю́ди немо́крыми нога́ми наста́вльшему, и фарао́на со всево́инством пото́пльшему, Тому́ еди́ному пои́м, я́ко просла́вися.

Богому́дренно ве́рнии, во́ины Христо́вы и страстоте́рпцы воспое́м я́ко потреби́тели ле́сти, и победи́тели све́тлы, Бо́гу побе́дную пе́снь пою́ще: я́ко просла́вися.

На земли́ страда́льцы подвиза́вшеся све́тло, му́ки претерпе́сте, и на небесе́х венцы́ прия́сте, согла́сно воспева́юще пе́снь побе́дную: я́ко просла́вися.

Еди́нством душе́вным свя́зани ве́рно, от ле́сти отврати́стеся, и победи́тели венцено́сцы яви́стеся, согла́сно воспева́юще пе́снь побе́дную: я́ко просла́вися.

Богоро́дичен: Пречи́стая Ма́ти Бо́жия, воплоще́ннаго из Тебе́, и от не́др роди́тельных не отлучи́вшагося Бо́га непреста́нно моли́, от вся́каго обстоя́ния спасти́, я́же созда́.

Пе́снь 3.

Ирмо́с: Си́лою Креста́ Твоего́ Христе́, утверди́ мое́ помышле́ние, во е́же пе́ти и сла́вити спаси́тельное Твое́ вознесе́ние.

Ра́зумом Христо́вым во́ини укра́шени, нечести́ваго врага́ потопи́сте струя́ми крове́й ва́ших.

Те́ло свое́ преда́вше го́рьким и лю́тым му́кам достохва́льнии му́ченицы, Боже́ственное насле́дие восприя́сте ве́рою.

Ка́менным страстоте́рпцы мета́нием повеле́нием мучи́теля сокруша́еми, благове́рия держа́ву кре́пко соблюдо́сте.

Богоро́дичен: Непреста́нно моли́ Чи́стая, с му́ченики, проше́дшаго из чре́сл Твои́х, изба́вити от ле́сти диа́воли пою́щыя Тя́ Всенепоро́чная.

Седа́лен, гла́с 4.

Подо́бен: Вознесы́йся:

Во́ини Христо́вы до́блии, подви́гшеся до́бре, лука́ваго врага́ до конца́ потопи́ша кро́вными струя́ми, ка́мением сокруша́еми и мечи́ ссека́еми, огне́м сожига́еми и в во́ду вмета́еми, венцено́сцы показа́шася я́ве: те́мже что́ми су́ть, и ве́рою сла́вими.

Сла́ва, и ны́не, Богоро́дичен:

Не премолчи́м при́сно Богоро́дице Де́во, благода́рственно воспева́ти от се́рдца Твоя́ ми́лости Влады́чице, раби́ Твои́ вопию́ще и глаго́люще: Пресвята́я Де́во, предвари́, и изба́ви на́с от вра́г ви́димых и неви́димых, и от ну́жды и вся́каго преще́ния, Ты́ бо еси́ на́ше заступле́ние.

Крестобогоро́дичен:

Де́ва и А́гница ви́девши на Кресте́ без се́мене из нея́ А́гнца ро́ждшагося, и копие́м прободе́на, печа́ли уя́звлена стрела́ми, вопия́ше боле́зненно восклица́ющи: что́ но́вое та́инство, ка́ко умира́еши, и́же живота́ еди́н Госпо́дь, те́мже воскресни́, па́дшаго воздвиза́я пра́отца.

Пе́снь 4.

Ирмо́с: Услы́шах слу́х си́лы Креста́, я́ко ра́й отве́рзеся и́м, и возопи́х: сла́ва си́ле Твое́й, Го́споди.

Боголюби́выми содержи́ми обы́чаи, богопроти́внаго врага́ страда́льческий ли́к победи́л е́сть, благода́тию Спа́совою укрепля́емь.

Богозва́нный по́лк страстоте́рпец Христо́вых, богопроти́вных мно́жество злочести́вых вра́г победи́сте, воспева́юще: сла́ва си́ле Твое́й Го́споди.

Све́т непристу́пный ви́девше страстоте́рпцы, в темни́це седя́ще, многобо́жия тьму́ и́дольския ле́сти разори́ша, Бо́жиею си́лою укрепля́еми.

Богоро́дичен: Осени́ Тя, Де́во, Вы́шняго си́ла, и ра́й соде́ла Тя́, живо́тное дре́во иму́щи посреде́, хода́тая и Го́спода.

Пе́снь 5.

Ирмо́с: У́тренююще вопие́м Ти́, Го́споди, спаси́ ны: Ты́ бо еси́ Бо́г на́ш, ра́зве бо Тебе́ ино́го не зна́ем.

Словесы́ воспита́ни Ду́ха Свята́го, и́дольское безслове́сие му́ченицы упраздни́ша.

Зве́зды светоно́сныя бы́вше страстоте́рпцы, и цве́ты ве́ры, благоуха́ния испуща́юще.

Ни́ва яви́стеся святи́и вы́шняго, серпы́ муче́ния пожина́еми всехва́льнии.

Богоро́дичен: Не преста́й моля́щи Богоро́дице, Его́же родила́ еси́, спасти́ ду́шы на́ша, приле́жно воспева́ющих Тя́.

Пе́снь 6.

Ирмо́с: Обы́де мя́ бе́здна, гро́б мне́ ки́т бы́сть, а́з же возопи́х к Тебе́ Человеколю́бцу, и спасе́ мя десни́ца Твоя́, Го́споди.

Веселя́щеся му́ченицы вопия́ху: в руце́ Твои́, Влады́ко Человеколю́бче, приими́ ду́хи на́ша, и поко́й и́х, Тебе́ бо лю́бим Еди́наго многоми́лостиваго.

А́нгелом равносе́льницы бы́ша ли́к му́ченик Твои́х Человеколю́бче: тече́ние бо сконча́вше, ны́не мо́лят спасти́ся душа́м на́шым.

Му́ченическая сла́ва, му́ченическая красота́, му́ченический ли́че Богоизбра́нный, приле́жно моли́те спасти́ся все́м прибега́ющым к ва́м.

Богоро́дичен: Зача́тия Твоего́ безсе́меннаго чу́до, ко́е сло́во изрещи́ мо́жет, Пренепоро́чная? Бо́га бо зачала́ еси́, за милосе́рдие к на́м прише́дшаго.

Конда́к во уста́ве.

А́ще ли не́сть уста́ва, глаго́ли се́й конда́к, гла́с 8:

Подо́бен: Вы́шних ищя́:

Свети́льницы све́тлии я́вльшеся, Боже́ственнии му́ченицы, тва́рь всю́ све́тлостию чуде́с озаря́ете, неду́ги разреша́юще, и глубо́кую тьму́ всегда́ отгоня́юще, Христу́ Бо́гу моля́щеся непреста́нно о все́х на́с.

И́кос: Кра́сный ли́че, светоза́рнии и Боже́ственнии свети́льницы, Све́ту вели́кому предстоя́ще при́сно, Богоблаже́ннии му́ченицы, и отту́ду испуща́емыми невече́рняго Божества́ сия́нии, всегда́ просвеща́еми и обожа́еми, ве́рою па́мять ва́шу соверша́ющыя Боже́ственную просвети́те, и омраче́ния и страсте́й и бе́д и зло́бы изба́вите, моля́щеся непреста́нно о все́х на́с.

Пе́снь 7.

Ирмо́с: В пещи́ о́гненней песносло́вцы спасы́й о́троки, благослове́н Бо́г оте́ц на́ших.

В пещи́ Христе́, страстоте́рпцы твои́ вопия́ху: благослове́н Бо́г оте́ц на́ших.

Просвеще́ни све́том Тро́ическим страда́льцы, с весе́лием ду́шы своя́ преда́ша, пою́ще: благослове́н Бо́г оте́ц на́ших.

Предстоя́ще Бо́гу венцено́сцы страда́льцы с весе́лием, Тому́ за ны́ моли́теся.

Богоро́дичен: Я́ко спасе́ние на́ше, Тя́ Богоро́дице, мо́лим: моли́ за ны́ вопло́щшагося из Тебе́.

Пе́снь 8.

Ирмо́с: Из Отца́ пре́жде ве́к рожде́ннаго Сы́на и Бо́га, и в после́дняя ле́та воплоще́ннаго от Де́вы Ма́тере, свяще́нницы по́йте, лю́дие превозноси́те во вся́ ве́ки.

С му́ченики бу́ди проше́ние на́ше ве́рных, и те́х насле́дия прича́стницы бу́дем, Христа́ пою́ще, и превознося́ще Его́ во ве́ки.

Ра́достию серде́чною, ли́к терпели́вых страда́лец, от Христа́ венцы́ Боголе́пно прие́млет, и све́тло пое́т, и превозно́сит Его́ во ве́ки.

Струя́ми крове́й ва́ших обагри́вшеся достохва́льнии, и на небесе́х во ве́ки со Христо́м ца́рствуете, благоче́стно пою́ще, и превознося́ще Его́ во ве́ки.

Богоро́дичен: Херуви́м вы́шши яви́лася еси́, Богоро́дице чи́стая, во чре́ве Твое́м седя́щаго на ни́х поне́сши: Его́же со безпло́тными земни́и славосло́вим, и превозно́сим во ве́ки.

Пе́снь 9.

Ирмо́с: Тя́ па́че ума́ и словесе́ Ма́терь Бо́жию, в ле́то безле́тнаго неизрече́нно ро́ждшую, ве́рнии единому́дренно велича́ем.

За о́бщее спасе́ние моли́теся, пресла́внии му́ченицы, Христу́ предстоя́ще, Его́же ра́ди и му́ки претерпе́сте.

Си́лою кре́пкою преле́стную тве́рдость низложи́сте непобеди́мии, и ны́не в жили́щах небе́сных со а́нгелы жи́ти сподо́бистеся.

Зако́нными обы́чаи му́ченическими победи́вше го́рдаго мучи́теля, и венцы́ прия́сте пра́ведныя всечестни́и.

Богоро́дичен: Ра́дуйся Богоро́дице Ма́ти Христа́ Бо́га, Его́же родила́ еси́, моли́ с му́ченики, грехо́в оставле́ние дарова́ти ве́рою воспева́ющым Тя́.

Свети́лен:

Взя́стеся страстоно́сцы, во светови́дная ра́йская селе́ния, облача́еми во све́тлую ри́зу, ю́же истка́сте многови́дными ка́зньми, и предстоите́ Престо́лу Зижди́телеву, о все́х приле́жно моля́щеся.

Богоро́дичен: Держа́вным Твои́м покро́вом Чи́стая, на́с рабо́в Твои́х сохраня́й всегда́, от наве́т вра́жиих неврежде́нных: Тя́ бо еди́ну стяжа́хом прибе́жище в напа́стех.

На хвали́тех стихи́ры, гла́с 8.

Подо́бен: О пресла́внаго чудесе́!

Му́ченицы Христо́вы прехва́льнии, ꙳ гони́телей стремле́ния, ꙳ и ну́ждную сме́рть нивочто́же вмени́вше, ꙳ и благоде́рзостно ополчи́вшеся, ꙳ мужему́дренно к боре́нием, ꙳ победоно́сною сла́вою оде́ястеся, ꙳ и причто́стеся все́м пра́ведным, ꙳ с ни́миже ва́с всегда́ хва́ляще, ублажа́ем. [Два́жды.]

Му́ченицы Христо́вы преблаже́ннии, ꙳ на во́льное заколе́ние ꙳ са́ми себе́ преда́сте, ꙳ и зе́млю кро́вьми ва́шими освяти́сте, ꙳ и возду́х просвети́сте преставле́нием. ꙳ Ны́не же живете́ на небесе́х во све́те невече́рнем, ꙳ о на́с всегда́ моля́щеся Богови́дцы.

Му́ченицы Христо́вы непобеди́мии, ꙳ му́к разжже́ние  ꙳ росо́ю Боже́ственныя благода́ти ꙳ без вре́да преидо́сте, ꙳ и на воде́ поко́йне жи́ти сподо́бистеся, ꙳ венцы́ побе́ды прие́мше. ꙳ Те́м ра́дующеся дне́сь, пра́зднуем святу́ю ва́шу па́мять, ꙳ Христа́ сла́вяще.

Сла́ва, гла́с 8:

Во́инствовавше Христу́, я́же на земли́ кра́сная оста́висте, и кре́ст на ра́мена взе́мше, му́к ра́ди многоплете́нных Тому́ после́довали есте́, и пред цари́ и мучи́тели мно́гими не отверго́стеся Его́, а́нгели венцы́ побе́дными главы́ ва́шя увязо́ша, дерзнове́ннии душе́ю, све́тло в черто́г вели́кий внидо́сте. Те́мже дерзнове́ние иму́ще ко Спа́су все́х, моли́теся о душа́х на́ших.

И ны́не, Богоро́дичен:

Арха́нгела Гаврии́ла гла́с восприи́мше рце́м: ра́дуйся, Ма́ти Бо́жия, я́же жизнода́вца Христа́ ми́ру ро́ждши.

Крестобогоро́дичен: Го́споди, ꙳ егда́ Тя́ Со́лнца пра́веднаго ꙳ ви́де со́лнце на дре́ве пове́шена, ꙳ лучы́ скры́, ꙳ и луна́ све́т во тьму́ преложи́: ꙳ всенепоро́чная же Твоя́ Ма́ти ꙳ утро́бою уязвля́шеся.

А́ще и́мать Сла́ву на стихо́вне, и ты́ глаго́ли вече́рний.

И ны́не, Богоро́дичен, или́ Крестобогоро́дичен.


Источник: Минея общая – М. : Издательский Совет Русской Православной Церкви, 2002. – 516 с. ISBN 5-94625-045-0

Комментарии для сайта Cackle