[Глава 14] Слу́жба о́бща му́ченику еди́ному

Ве́чера,

на Го́споди воззва́х, стихи́ры, гла́с 1.

Подо́бен: Всехва́льнии му́ченицы:

Серде́чною пра́востию, ꙳ Бо́га необъиме́ннаго, ꙳ разуме́в всече́стне, ꙳ в Того́ ве́ровал еси́ несумне́нно блаже́нне, ꙳ соблю́д неизрече́нная Его́ повеле́ния спаси́тельная, ꙳ изя́щне прему́дре ꙳ пострада́в терпели́вно, Ца́рство восприя́л еси́ недви́жимое.

Кро́вию твое́ю честно́ю ꙳ зе́млю освяти́л еси́, ꙳ и скве́рныя кро́ви упраздни́л еси́, ꙳ приноси́мыя бесо́м беззако́нно, ꙳ и вене́ц нетле́нный прия́л еси́, ꙳ на версе́ твое́м всече́стне. ꙳ Те́мже моли́ся, ꙳ дарова́ти душа́м на́шым ꙳ ми́р и ве́лию ми́лость.

Освяща́еми есмы́, ꙳ твоя́ свяще́нная боре́ния и по́двиги сла́вящии ꙳ му́чениче всече́стне, и́мярек, ꙳ и́миже сограждани́н а́нгелом бы́л еси́, ꙳ и все́м страстоте́рпцем соприча́стник. ꙳ С ни́миже моли́ся, ꙳ дарова́ти душа́м на́шым ми́р и ве́лию ми́лость.

Сла́ва, и ны́не, Богоро́дичен:

Увы́ мне́, что́ бу́ду, у́м и ду́шу и те́ло оскверни́в прегреше́ньми, что́ сотворю́, ка́ко же избе́гу пла́мене нестерпи́маго, нереши́мых у́з и ве́чных? Но, о Всенепоро́чная, пре́жде конца́ моли́ Сы́на Твоего́, пода́ти ми́ оставле́ние.

Крестобогоро́дичен: Своего́ А́гнца, А́гница и непоро́чная Влады́чица, на Кресте́ я́ко ви́девши, ви́да не иму́ща ниже́ добро́ты, увы́ мне́ рыда́ющи глаго́лаше: где́ добро́та Твоя́ за́йде Сладча́йший, где́ благоле́пие, где́ благода́ть блиста́ющая зра́ка Твоего́, Сы́не Мо́й вселюбе́знейший?

А́ще и́мать самогла́сен. Сла́ва, гла́с 6:

Дне́сь вселе́нная вся́ страстоно́сца просвеща́ется заря́ми, и Бо́жия це́рковь цветы́ украша́ема му́чениче, и́мярек, вопие́т ти́: уго́дниче Христо́в, и предста́телю тепле́йший, не преста́й моли́ти о все́х рабе́х твои́х.

И ны́не Богоро́дичен:

Бо́га из Тебе́ воплоти́вшагося разуме́хом, Богоро́дице Де́во: Того́ моли́ о спасе́нии ду́ш на́ших.

Крестобогоро́дичен:

Подо́бен: Всю́ отложи́вше:

А́гнца своего́, А́гница нескве́рная дре́вле, и непоро́чная Влады́чица, на Кре́ст воздвиза́ема я́ко ви́де, ма́терски восклица́ше, и удивля́ющися вопия́ше: что́ виде́ние сие́, Ча́до сла́дкое, но́вое и пресла́вное, ка́ко лю́дие неблагода́рнии суди́щу Пила́тову предаю́т Тя́, и осужда́ют сме́ртию живота́ все́х, но пою́ Твое́ неизрече́нное, Сло́ве схожде́ние.

А́ще пра́зднуеши с полиеле́ем, глаго́ли Богоро́дичен: воскре́сный:

Кто́ Тебе́ не ублажи́т:

Вхо́д. Проки́мен дне́.

Чте́ния му́ченическая, [пи́сана в конце́ кни́ги сея́].

На стихо́вне стихи́ры, гла́с 4.

Подо́бен: Я́ко до́бля:

Многообра́зными муче́нии, ꙳ лю́тый мучи́тель ка́знем злы́м преда́в казни́ти ꙳ многострада́льное и многотерпели́вое те́ло твое́, ꙳ Богомы́сленне, и́мярек, ꙳ не отве́рглся еси́ Христа́, ꙳ ни куми́ром поже́рл еси́: ꙳ но терпе́л еси́ я́ко ино́му стра́ждущу, ꙳ ожида́я бу́дущаго воздая́ния ꙳ и безсме́ртнаго богосло́вия.

Сти́х: Пра́ведник я́ко фи́никс процвете́т, я́ко ке́др, и́же в лива́не, умно́жится.

Воздви́жен и стру́жемь, ꙳ и ка́мением посыпа́емь ꙳ и желе́зом ураня́емь, ꙳ и мече́м скончава́емь, ꙳ непрекло́нен пребы́л еси́, ꙳ на ка́мени у́мнем ꙳ ду́шу твою́ водрузи́в. ꙳ И сего́ ра́ди а́нгельским лико́м сочета́лся еси́, ꙳ све́та невече́рняго сподобля́емь.

Сти́х: Насажде́ни в дому́ Госпо́дни, во дво́рех Бо́га на́шего процвету́т.

Исцеле́ние дарова́ний ꙳ жела́ющым, источа́ют сла́вне, твоя́ мо́щи, ꙳ потопля́ют стра́сти, ꙳ и неду́ги, и́мярек, ꙳ и разоря́ют лука́вых де́монов толпы́: ꙳ напая́ют же ве́рных сердца́, ꙳ прозяба́ющая доброде́телей ꙳ плоды́ Боже́ственныя, ꙳ и благоче́стия разуме́ние.

Сла́ва, гла́с 6:

Прииди́те му́чениколю́бцы вси́, Христо́ва страстоте́рпца тече́ние соверши́вша, благоче́стно просла́вим, и́мярек, сла́внаго: се́й бо зми́еву главу́ сокруши́, и кро́вию зе́млю освяти́, от су́щих зде́ преста́вися к ве́чным жили́щем: и от вседержи́тельныя руки́ подвиго́в по́честь прия́т, про́сит очище́ния душа́м на́шым и ве́лия ми́лости.

И ны́не, Богоро́дичен:

Богоро́дице, Ты́ еси́ лоза́ и́стинная:

Крестобогоро́дичен: Пречи́стая я́ко ви́де Тя́ на кресте́ пове́шена, пла́чущи вопия́ше ма́терски: Бо́же Мо́й, Сладча́йшее Ча́до Мое́, ка́ко терпи́ши стра́сть поно́сную?

Тропа́рь во уста́ве.

А́ще ли не́сть уста́ва, глаго́ли се́й тропа́рь, гла́с 4:

Му́ченик Тво́й Го́споди, и́мярек, во страда́нии свое́м вене́ц прия́т нетле́нный от Тебе́ Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости, того́ моли́твами спаси́ ду́шы на́ша.

Сла́ва, и ны́не, Богоро́дичен, или́ Крестобогоро́дичен.

На у́трени,

на Бо́г Госпо́дь, тропа́рь то́йже.

По 1-й кафи́сме седа́лен, гла́с 1.

Подо́бен: Ли́к а́нгельский:

Во́инство е́же на земли́ возненави́дев му́чениче, ю́же на небесе́х возжела́л еси́ сла́ву, и боле́зни претерпе́л еси́, и ну́жную сме́рть: те́мже дне́сь всесвяту́ю твою́ па́мять пра́зднуем, Христу́ принося́ще хвалу́, преблаже́нне, и́мярек. [Два́жды.]

Сла́ва, и ны́не, Богоро́дичен:

Ма́терь Тя́ Бо́жию и Де́ву мо́лим вси́ вои́стинну, в щедро́ты Твоя́ вопие́м, любо́вию прибега́юще к Твое́й бла́гости: Тя́ бо и́мамы гре́шнии Засту́пницу, и Тебе́ стяжа́хом в напа́стех спасе́ние, Еди́ну Пречи́стую.

По 2-й кафи́сме седа́лен, гла́с 4.

Подо́бен: Яви́лся еси́ дне́сь:

Тече́ние соверши́в и́стинное, мучи́телей всю́ кре́пость победи́л еси́, и прия́л еси́ вене́ц от руки́ Вседержи́теля, и́мярек, всече́стне, и показа́лся еси́ а́нгелом соприча́стник. [Два́жды.]

Сла́ва, и ны́не, Богоро́дичен:

Сло́во О́тчее, Христа́ Бо́га на́шего, от Тебе́ воплоти́вшагося позна́хом Богоро́дице Де́во, еди́на чи́стая, еди́на благослове́нная: те́м непреста́нно Тя́ воспева́юще велича́ем.

По Хвали́те и́мя Госпо́дне:

Припе́в:

Велича́ем тя́ страстоте́рпче святы́й, и́мярек, и чте́м честна́я страда́ния твоя́, я́же за Христа́ претерпе́л еси́.

Псало́м избра́нный: Бо́г на́м прибе́жище и си́ла:

По полиеле́и, седа́лен, гла́с 4:

Во́ина Христо́ва непобеди́маго, победи́теля на враги́ до́бляго, в вели́ких чудесе́х возсия́вшаго, при́сно вси́ восхва́лим ве́рою, и́мярек, страстоте́рпца: то́чит бо цельбы́ притека́ющым с ве́рою, и утоля́ет стра́сти лю́тыя, и су́щыя в ско́рбех челове́ки заступа́ет. [Два́жды.]

Сла́ва, и ны́не, Богоро́дичен:

Стена́ непобеди́мая на́м Христиа́ном еси́ Богоро́дице Де́во, к Тебе́ бо прибега́юще невреди́ми пребыва́ем, и па́ки согреша́юще, и́мамы Тя́ моли́твенницу. Те́м благодаря́ще вопие́м Ти́: ра́дуйся, Благода́тная, Госпо́дь с тобо́ю.

Степе́нна, 1-й антифо́н, 4-го гла́са.

Проки́мен: Пра́ведник я́ко фи́никс процвете́т, я́ко ке́др, и́же в лива́не умно́жится.

Сти́х: Насажде́ни в дому́ Госпо́дни, во дво́рех Бо́га на́шего процвету́т.

Вся́кое дыха́ние:

Ева́нглие, му́ченическое, [пи́сано в конце́ кни́ги сея́.]

По 50 псалме́ стихи́ра, гла́с 6:

Дне́сь вселе́нная вся́: [пи́сана на вече́рни]

Кано́н. Гла́с 5.

Пе́снь 1.

Ирмо́с: Коня́ и вса́дника в мо́ре Чермно́е, сокруша́яй бра́ни, мы́шцею высо́кою Христо́с истрясе́, Изра́иля же спасе́, побе́дную пе́снь пою́ща.

Престо́лу Бо́жию предстоя́ Богоблаже́нне со дерзнове́нием, я́ко страда́лец непобеди́мь, любо́вию соверша́ющих твое́ свято́е страда́ние, моли́твами твои́ми сохраня́й.

Име́яй в души́ твое́й, свя́те, во́ду жи́ву пребыва́ющу, му́тныя зло́бныя пото́ки изсуши́л еси́ всесла́вне, благода́тию Спа́совою укрепля́ем Богоблаже́нне.

Си́лою Бо́жиею укрепля́емь Богоблаже́нне, возмо́гл еси́ вра́жия возноше́ния сокруши́ти, и бы́л еси́ победоно́сец изря́ден, и вы́шняго гра́да граждани́н.

Богоро́дичен: Яви́ милосе́рдие Твое́ Госпоже́ Пречи́стая, на мне́ окая́ннем, приле́жно к Сы́ну Твоему́ Пресвята́я моля́щися, да избу́дем огня́ ве́чнаго Твои́ми моли́твами.

Пе́снь 3.

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем Христе́ ка́мени за́поведей Твои́х Це́рковь Твою́ утверди́, Еди́не Бла́же и Человеколю́бче.

От ка́ла страсте́й му́дре удаля́яся, и Бо́гу приближа́яся Боже́ственными чистота́ми, Боже́ственное прия́т просвеще́ние, показу́ющаго тя́ Сы́на све́ту достосла́вне, я́ко де́ло све́та де́лающаго.

Во́инство земно́е и вели́кую сла́ву, нивочто́же вмени́л еси́ Богоблаже́нне: те́м въво́инился еси́ Христу́, и лико́м му́ченическим причте́н бы́л еси́, веселя́ся му́чениче Богоно́се блаже́нне, и́мярек.

Стези́ ше́ствия твоего́ досточу́дне, напра́вишася на пу́ть ми́рен, в Ца́рствие Бо́жие входя́, в ра́йскую широту́, и в поко́й ве́чнующий сла́вне.

Богоро́дичен: Влады́ку и Творца́ все́х тва́рей ро́ждши, яви́лася еси́ Влады́це чи́стая херуви́м и серафи́м честне́йши: те́мже Тя́ вси́ ро́ди по до́лгу ублажа́ем.

Седа́лен, гла́с 5.

Подо́бен: Собезнача́льное Сло́во:

Доброде́тельными светлостьми́ просвеща́емь, и муче́ния све́том украша́емь, па́че со́лнца прему́дре, сия́еши тве́рде, и просвеща́еши вои́стинну, творя́щих ве́рно па́мять твою́ светоно́сную, пресла́вный страстоте́рпче, и́мярек, покланя́ющихся моще́м твои́м спаса́й.

Сла́ва, и ны́не, Богоро́дичен:

Ужа́сно чу́до зача́тия, и несказа́нен о́браз рождества́, в Тебе́ позна́ся чи́стая Присноде́во, ужаса́ет мо́й у́м, и удивля́ет по́мысл. Сла́ва Твоя́ Богоро́дице, все́м простре́ся во спасе́ние ду́ш на́ших.

Крестобогоро́дичен: Кресто́м Сы́на Твоего́ Богоблагода́тная, и́дольская пре́лесть вся́ упраздни́ся, и де́монская кре́пость попра́ся: сего́ ра́ди ве́рнии по до́лгу Тя́ при́сно пое́м и благослови́м, и Богоро́дицу вои́стинну испове́дающе Тя́ велича́ем.

Пе́снь 4.

Ирмо́с: Боже́ственное Твое́ разуме́в истоща́ние прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Любо́вию и наде́ждею ко Го́споду украша́емь прему́дре, му́ченически просвети́лся еси́ преблаже́нне, и а́нгелом сограждани́н бы́л еси́ пресла́вне.

Бы́л еси́ недви́жимь и непрекло́нен, во изгна́нии живя́й свои́х себе́ лиша́емь, Влады́ки ра́ди все́х Бо́га Богоблаже́нне прему́дре.

До́бре подвиза́вся сла́вне, добро́тами му́ченическими укра́шен, прише́л еси́ к неви́димым добро́там, пожина́я трудо́в твои́х по́чести.

Богоро́дичен: И́же горе́ со Отце́м разумева́емый, до́лу на́с ра́ди воплоща́ется из Тебе́, всенепоро́чная Влады́чице, премно́жеством благосе́рдия, Еди́н Благи́й Человеколю́бец.

Пе́снь 5.

Ирмо́с: Одея́йся све́том я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную Христе́, я́ко Еди́н Благоутро́бен.

Зако́ны укрепля́емь Вседержи́телевыми, сове́ты беззако́нных отрази́л еси́, и зако́нно пострада́в, нетле́ния вене́ц му́чениче, прия́л еси́.

У́глие ле́сти угаси́л еси́ прему́дре, крове́й твои́х струя́ми: и ны́не источа́я целе́бныя во́ды, пла́мень боле́зни отго́ниши Бо́жиею благода́тию.

Возмо́гл еси́ му́чениче, в не́мощи плотсте́й зми́я многоко́зненнаго погуби́ти: и сего́ мно́гия пре́лести му́дре благода́тию низве́ргл еси́.

Богоро́дичен: Умертви́ Пренепоро́чная Де́во, молю́ Тя, пло́ти моея́ душетле́нныя стра́сти, ро́ждшая пло́тию безстра́стия исто́чника, Христа́ Бо́га.

Пе́снь 6.

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя́, я́ко Благоутро́бен.

Ста́л еси́ на суди́щи законопресту́пных му́чениче Христо́в, и́мярек, и ле́сть всю́ искорени́л еси́, суди́мь бы́л еси́ Христа́ ра́ди, и мужему́дренне обличи́л еси́.

Укра́шен бы́в прему́дре, му́чениче Христо́в, Боже́ственными добро́тами во страда́нии твое́м: те́мже тя́ просвети́ Христо́с, и нетле́нен пребы́л еси́.

Кро́вию зе́млю освяти́л еси́, не́бо же душе́ю свяще́нною озари́л еси́ преблаже́нне, и ли́ки му́ченическия весе́лия испо́лнил еси́.

Богоро́дичен: Науче́н бы́в Ду́хом проро́к, две́рь Тя́ прови́де, е́юже Бо́г про́йде воплоща́емь, оста́вль па́ки запеча́тану Пренепоро́чная.

Конда́к во уста́ве.

А́ще ли не́сть уста́ва, глаго́ли се́й конда́к, гла́с 2.

Подо́бен: Вы́шних ищя́:

Звезда́ све́тлая яви́лся еси́, непреле́стная ми́рови, Со́лнце Христа́ возвеща́ющи, заря́ми твои́ми страстоте́рпче, и́мярек, и пре́лесть погаси́л еси́ всю́: на́м же подае́ши све́т, моля́ся непреста́нно о все́х на́с.

И́кос: Пе́ние ми́ да́руй Бо́же мо́й, воспева́ти и глаго́лати, и почита́ти по́двиги страстоте́рпца твоего́ и му́ченика, я́ко да благосочета́нно восхвалю́ до́бляго во страда́нии, и́мярек, победи́теля в страсте́х бы́вша всегда́, вели́каго во благоче́стии, и в ли́це му́ченик возсия́вшаго: в ни́хже пое́т непреста́нно Христа́, со мно́жеством а́нгельским прему́дрый, прие́мля свы́ше Боже́ственное осия́ние, и моля́ непреста́нно о все́х на́с.

Пе́снь 7.

Ирмо́с: Превозноси́мый отце́в Госпо́дь, пла́мень угаси́, о́троки ороси́, согла́сно пою́щыя: Бо́же, благослове́н еси́.

Пренося́ще страда́льческое те́ло твое́ наро́ди любочести́вии многострада́льне и прему́дре, вопия́ху благода́рственно: благослове́н Бо́г оте́ц на́ших.

Разори́л еси́ Бо́жиею благода́тию е́ллинская приноше́ния, и разреши́вся блаже́нне, сою́з теле́сных, муче́нием сконча́лся еси́ за Христа́, зако́нно пострада́в.

Я́коже на колесни́цу все́л еси́ на кро́вь твою́, страстоте́рпче достохва́льне, и ра́дуяся восте́кл еси́ в преми́рная поко́ища.

Богоро́дичен: Сла́ва все́м еси́, Чи́стая, и утвержде́ние испове́дающым тя́ Всенепоро́чная Ма́терь Бо́гу, проше́дшему из чре́ва Твоего́ па́че естества́.

Пе́снь 8.

Ирмо́с: Тебе́,  Вседе́телю, в пещи́ о́троцы всеми́рный ли́к спле́тше, поя́ху: дела́ вся́кая Го́спода по́йте, и превозноси́те во вся́ ве́ки.

Иерусали́ма вы́шняго насле́дник бы́л еси́, у́мер во изгна́нии прему́дре, поя́ непреста́нно: дела́ вся́кая Го́спода по́йте, и превозноси́те Его́ во ве́ки.

Приложи́вшуся ти́ печа́лем мно́гим блаже́нне, и ны́не безпеча́льное житие́ прия́т тя́, иде́же зове́ши: дела́ вся́кая Го́спода по́йте, и превозноси́те Его́ во ве́ки.

Возмо́гл еси́ Бо́жиею вседе́тельною си́лою, е́ллинския пре́лести, и вселука́вное мудрова́ние, му́чениче, погуби́ти, и вене́ц нетле́нный от все́х Влады́ки прия́ти.

Богоро́дичен: Пло́ть из Тебе́ Чи́стая, восприя́т Всеще́дрое Сло́во, и челове́ком приедини́ся: Того́ Пресвята́я моли́, пло́ти моея́ двиза́ния умертви́ти, и спасти́ ду́шу мою́.

Пе́снь 9.

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и Челове́ка, Восто́к и́мя Ему́: Его́же велича́юще, Де́ву ублажа́ем.

Прииди́те соше́дшеся ве́рнии, преблаже́ннаго и свяще́ннаго му́ченика Христо́ва, и́мярек, свяще́нное торжество́ соверши́м дне́сь: страда́льчески бо вся́ вра́жия мно́жества Боже́ственною си́лою победи́л е́сть.

Укра́шен бы́л еси́ сла́вне муче́ния Бо́жиими добро́тами, и возше́л еси́ я́ко на о́гненней колесни́це, твое́ю кро́вию веселя́ся, в небеса́ приспе́л еси́, взира́ти добро́ту неизрече́нную Спа́са на́шего.

Во́ин изря́ден Христа́ Бо́га, и до́блий показа́лся еси́ страда́лец: те́мже ны́не живе́ши в вы́шнем Ца́рствии, побе́дным венце́м увя́зся пресла́вно страстоте́рпче всехва́льне.

Богоро́дичен: Просвеще́ние ро́ждши Христа́ су́щым во тьме́, ослепле́нную ду́шу мою́ просвети́, и да́руй ми́ ше́ствовати по стезя́м веду́щым в живо́т Пресвята́я, наста́внице все́м пою́щым Тя́.

Свети́лен.

Я́коже со́лнце светоно́сно, чуде́сными заря́ми наставля́еши всю́ тва́рь, пресла́вне и́мярек, страстоте́рпче. Те́мже твою́ соверша́юще па́мять, про́сим от бе́д вся́ изба́вити воскре́сшаго из гро́ба.

Богоро́дичен: Держа́вным Твои́м покро́вом Чи́стая, на́с рабо́в Твои́х от наве́та вра́жия сохраня́й всегда́ невре́дны: Тя́ бо еди́ну стяжа́хом прибе́жище в беда́х.

На хвали́тех стихи́ры, гла́с 4.

Подо́бен: Зва́нный свы́ше:

Восхваля́ют лю́дие псалмы́, ꙳ вку́пе и пе́сньми ꙳ твою́ сла́вную па́мять, и́мярек, ꙳ я́ко благоле́пна бо возсия́ и светоно́сна, ꙳ укра́шена сла́вою и благода́тию. ꙳ Те́мже игра́ют ны́не а́нгельстии чи́ни, ꙳ хва́лят же му́ченицы со апо́столы, ꙳ твои́х по́двиг му́чениче страда́ния, ꙳ и воспева́ют просла́вльшаго тя́, ꙳ Спа́са Христа́ Бо́га на́шего, ꙳ Его́же моли́, ꙳ спасти́ и просвети́ти ду́шы на́ша. [Два́жды.]

Облече́н во Христо́во всеору́жие, ꙳ обре́лся еси́, и́мярек ꙳ не и́щущым тебе́: ꙳ ты́ бо за Христа́ огне́м распала́емь, ꙳ и руга́яся бого́в су́етных ꙳ безбо́жному свере́пству, ꙳ тогда́ беззако́нным взыва́л еси́: ꙳ во́инствую Христу́ моему́ Царю́, ꙳ ни зве́рие, ни коле́са, ни и́на му́ка,  ꙳ мене́ разлучи́ти возмо́гут когда́ любве́ Христа́ моего́. Его́же моли́, спасти́ и просвети́ти ду́шы на́ша.

Небре́г о сосуде́х многообра́зных, ꙳ и о разли́чных му́ках, ꙳ и о ору́жиях стра́шных, ꙳ венцено́сче и́мярек, ꙳ благоче́стия тече́ние му́ченически сконча́л еси́: те́мже пресве́тлую па́мять твою́, ꙳ цве́ты пе́сненными венча́ем, ꙳ и честны́я твоя́ мо́щи облобыза́ем ве́рою. Но я́ко Престо́лу предстоя́ Влады́ки, Христа́ Бо́га на́шего, моли́ непреста́нно спасти́ся душа́м на́шым.

Сла́ва, гла́с 1:

Му́чеников похвало́, све́тлы возста́вив побе́ды на ле́сть, теле́сную сла́ву твои́м раче́нием преблаже́нне, но́сиши везде́ кро́тко, я́ко победи́тель, и́мярек, и ны́не возста́ви от грехопаде́ний ве́рою чту́щих па́мять твою́.

И ны́не, Богоро́дичен:

Ра́дуйся Богоро́дице Де́во, я́ко родила́ еси́ Царя́ небе́снаго, Спа́са и просвети́теля ду́ш на́ших.

Крестобогоро́дичен.

Подо́бен: Всехва́льнии му́ченицы:

Своего́ А́гнца, ꙳ А́́гница и непоро́чная Влады́чица, на Кресте́ я́ко ви́девши ꙳ ви́да не иму́ща, ниже́ добро́ты, ꙳ увы́ мне́, рыдаю́щи глаго́лаше: ꙳ где́ добро́та Твоя́ за́йде Сладча́йший? где́ благоле́пие, где́ благода́ть блиста́ющая зра́ка Твоего́, ꙳ Сы́не Мо́й вселюбе́знейший?

А́ще и́мать на стихо́вне Сла́ву: и ты́ глаго́ли вече́рний,

И ны́не, Богоро́дичен, или́ Крестобогоро́дичен.


Источник: Минея общая – М. : Издательский Совет Русской Православной Церкви, 2002. – 516 с. ISBN 5-94625-045-0

Комментарии для сайта Cackle