[Глава 41] Апо́столи и евангелия о́бщыя коему́ждо свято́му

Проро́ку Илии́:

Апо́стол, от собо́рнаго посла́ния Иа́ковля чте́ние, зача́ло 57.

Бра́тие, о́браз приими́те злострада́ния и долготерпе́ния проро́ки, и́же глаго́лаша и́менем Госпо́дним. Се́ блажи́м терпя́щыя: терпе́ние И́овле слы́шасте, и кончи́ну Госпо́дню ви́десте, я́ко многоми́лостив е́сть Госпо́дь, и ще́др. Пре́жде же все́х, бра́тие моя́, не клени́теся, ни не́бом, ни земле́ю: ни ино́ю ко́ею кля́твою: бу́ди же ва́м, е́же е́й, е́й: и е́же ни́, ни́: да не в лицеме́рие впаде́те. Злостра́ждет ли кто́ в ва́с? да моли́тву де́ет. Благоду́шствует ли кто́? да пое́т. Боли́т ли кто́ в ва́с? да призове́т пресви́теры церко́вныя, и да моли́тву сотворя́т над ни́м, пома́завше его́ еле́ем во и́мя Госпо́дне. И моли́тва ве́ры спасе́т боля́щаго. И воздви́гнет его́ Госпо́дь: и а́ще грехи́ бу́дет сотвори́л, отпу́стятся ему́. Испове́дайте у́бо дру́г дру́гу согреше́ния, и моли́теся дру́г за дру́га, я́ко да исцеле́ете: мно́го бо мо́жет моли́тва пра́веднаго, поспе́шествуема. Илиа́ челове́к бе́ подобостра́стен на́м, и моли́твою помоли́ся, да не бу́дет до́ждь: и не одожди́ по земли́ ле́та три́ и ме́сяц ше́сть. И па́ки помоли́ся, и не́бо до́ждь даде́, и земля́ прозябе́ пло́д сво́й. Бра́тие, а́ще кто́ в ва́с заблу́дит от пути́ и́стины, и обрати́т кто́ его́: Да ве́сть, я́ко обрати́вый гре́шника от заблужде́ния пути́ его́, спасе́т ду́шу от сме́рти, и покры́ет мно́жество грехо́в.

Ева́нглие от Луки́, зача́ло 14.

Во вре́мя о́но, дивля́хуся наро́ди о словесе́х благода́ти, исходя́щих из у́ст Иису́совых, и глаго́лаху: не Се́й ли е́сть Сы́н Ио́сифов? И рече́ к ни́м: вся́ко рече́те Ми́ при́тчу сию́: врачу́, исцели́ся са́м: ели́ка слы́шахом бы́вшая в Капернау́ме, сотвори́ и зде́ во оте́чествии свое́м. Рече́ же: ами́нь глаго́лю ва́м, я́ко ни кото́рый проро́к прия́тен е́сть во оте́чествии свое́м. Пои́стинне же глаго́лю ва́м: мно́ги вдови́цы бе́ша во дни́ Илиины́ во Изра́или, егда́ заключи́ся не́бо три́ ле́та и ме́сяц ше́сть, я́ко бы́сть гла́д вели́к по все́й земли́. И ни ко еди́ной и́х по́слан бы́сть Илиа́, то́кмо в Саре́пту Сидо́нскую, к жене́ вдови́це. И мно́зи прокаже́ни бе́ху при Елиссе́и проро́це во Изра́или: и ни еди́н же от ни́х очи́стися, то́кмо Неема́н сириани́н. И испо́лнишася вси́ я́рости в со́нмищи, слы́шавшии сия́. И воста́вше, изгна́ша Его́ во́н из гра́да: и ведо́ша Его́ до верху́ горы́, на не́йже гра́д и́х со́здан бя́ше, да бы́ша Его́ низри́нули. О́н же проше́д посреде́ и́х, идя́ше.

Проро́ком:

Апо́стол, к кори́нфяном, зача́ло 156.

Бра́тие, не де́ти быва́йте умы́, но зло́бою младе́нствуйте, умы́ же соверше́ни быва́йте. В зако́не пи́шет: я́ко ины́ми язы́ки, и устны́ ины́ми возглаго́лю лю́дем си́м: и ни та́ко послу́шают Мене́, глаго́лет Госпо́дь. Те́мже язы́цы в зна́мение су́ть не ве́рующым, но неве́рным, а проро́чество, не неве́рным, но ве́рующым. А́ще у́бо сни́дется це́рковь вся́ вку́пе, и вси́ язы́ки глаго́лют: вни́дут же и неразу́мивии или́ неве́рнии, не реку́т ли, я́ко бесну́етеся? А́ще же вси́ проро́чествуют, вни́дет же не́кий неве́рен, или́ неве́жда, облича́ется все́ми, и истязу́ется от все́х. И си́це та́йная се́рдца его́ явле́на быва́ют: и та́ко па́д ни́ц, покло́нится Бо́гови, возвеща́я, я́ко вои́стинну Бо́г с ва́ми е́сть.

Ева́нглие от Матфе́а, зача́ло 96.

Рече́ Госпо́дь ко прише́дшым к нему́ иуде́ем: го́ре ва́м кни́жницы и фарисе́е лицеме́ри, я́ко зи́ждете гро́бы проро́ческия, и кра́сите ра́ки пра́ведных. И глаго́лете: а́ще бы́хом бы́ли во дни́ оте́ц на́ших, не бы́хом у́бо о́бщницы и́м бы́ли в кро́ви проро́к. Те́мже са́ми свиде́тельствуете себе́, я́ко сы́нове есте́ изби́вших проро́ки. И вы́ испо́лните ме́ру оте́ц ва́ших. Змия́, порожде́ния ехи́днова, ка́ко убежите́ от суда́ огня́ гее́нскаго? Сего́ ра́ди се́ А́з послю́ к ва́м проро́ки, и прему́дры, и кни́жники: и от ни́х убие́те и ра́спнете, и от ни́х бие́те на со́нмищах ва́ших, и изжене́те от гра́да во гра́д. Я́ко да прии́дет на вы́ вся́ка кро́вь пра́ведна, пролива́емая на земли́, от кро́ве А́веля пра́веднаго, до кро́ве Заха́рии сы́на Варахи́ина, его́же уби́сте между́ це́рковию и олтаре́м. Ами́нь глаго́лю ва́м, я́ко прии́дут вся́ сия́ на ро́д се́й. Иерусали́ме, Иерусали́ме, изби́вый проро́ки, и ка́мением побива́яй по́сланныя к нему́, колькра́ты восхоте́х собра́ти ча́да твоя́, я́коже собира́ет ко́кошь птенцы́ своя́ под криле́, и не восхоте́сте! Се́ оставля́ется ва́м до́м ва́ш пу́ст. Глаго́лю бо ва́м, я́ко не и́мате Мене́ ви́дети отсе́ле, до́ндеже рече́те: благослове́н гряды́й во и́мя Госпо́дне.

Апо́столу еди́ному и мно́гим:

Апо́стол, к кори́нфяном, зача́ло 131.

Бра́тие, Бо́г ны́ посла́нники после́дния яви́ я́ко насме́ртники: зане́ позо́р бы́хом ми́ру, и а́нгелом и челове́ком. Мы́ у́бо бу́и Христа́ ра́ди, вы́ же му́дри о Христе́: мы́ не́мощни, вы́ же кре́пцы: вы́ сла́вни, мы́ же безче́стни. До ны́нешняго часа́ и а́лчем, и жа́ждем, и наготу́ем, и стра́ждем и скита́емся, И тружда́емся, де́лающе свои́ми рука́ми: укоря́еми, благословля́ем: гони́ми, терпи́м: ху́лими, утеша́емся: я́коже отре́би ми́ру бы́хом, все́м попра́ние досе́ле. Не срамля́я ва́с сия́ пишу́, но я́коже ча́да моя́ возлю́бленная наказу́ю. А́ще бо и мно́ги пе́стуны и́мате о Христе́, но не мно́ги отцы́: о Христе́ бо Иису́се благовествова́нием а́з вы́ роди́х. Молю́ же ва́с: подо́бни мне́ быва́йте, я́коже а́з Христу́.

Апо́столу и безме́здником:

Ева́нглие, от Матфе́а, зача́ло 34:

Во вре́мя о́но, ви́дев Иису́с наро́ды, милосе́рдова о ни́х, я́ко бя́ху смяте́ни, и отве́ржени, я́ко о́вцы не иму́щыя па́стыря. Тогда́ глаго́ла ученико́м свои́м: жа́тва у́бо мно́га, де́лателей же ма́ло. Моли́теся у́бо Господи́ну жа́твы, я́ко да изведе́т де́латели на жа́тву свою́. И призва́ обана́десять ученики́ Своя́, даде́ и́м вла́сть на дусе́х нечи́стых, я́ко да изго́нят и́х, и цели́ти вся́к неду́г, и вся́ку боле́знь. Сия́ обана́десять посла́ Иису́с, запове́да и́м, глаго́ля: на пу́ть язы́к не иди́те, и во гра́д самаря́нский не вни́дите. Иди́те же па́че ко овца́м поги́бшым до́му Изра́илева. Ходя́ще же пропове́дуйте, глаго́люще: я́ко прибли́жися Ца́рствие небе́сное. Боля́щыя исцеля́йте, прокаже́нныя очища́йте, ме́ртвыя воскреша́йте, бе́сы изгоня́йте: ту́не прия́сте, ту́не дади́те.

Апо́столом:

Ева́нглие от Луки́, зача́ло 50.

Во вре́мя о́но, я́вль Госпо́дь и ине́х се́дмьдесят ученик свои́х, и посла́ и́х по двема́ пред лице́м свои́м, во вся́к гра́д и ме́сто, а́може хотя́ше са́м ити́. Глаго́лаше же к ни́м: жа́тва у́бо мно́га, де́лателей же ма́ло: моли́теся у́бо Господи́ну жа́тве, да изведе́т де́латели на жа́тву свою́. Иди́те: се́ А́з посыла́ю вы́, я́ко а́гнцы посреде́ волко́в. Не носи́те влага́лища: ни пи́ры, ни сапоги́: и никого́же на пути́ целу́йте. Во́ньже а́ще до́м вни́дете, пе́рвее глаго́лите: ми́р до́му сему́. И а́ще у́бо бу́дет ту́ сы́н ми́ра, почи́ет на не́м ми́р ва́ш: а́ще ли же ни́, к ва́м возврати́тся. В то́м же дому́ пребыва́йте, яду́ще, и пию́ще, я́же су́ть у ни́х: досто́ин бо е́сть де́латель мзды́ своея́. Не преходи́те из до́му в до́м. И во́ньже а́ще гра́д вхо́дите, и прие́млют вы́, яди́те предлага́емая ва́м. И исцели́те неду́жныя, и́же су́ть в не́м, и глаго́лите и́м: прибли́жися на вы́ Ца́рствие Бо́жие. Во́ньже а́ще гра́д вхо́дите, и не прие́млют ва́с, изше́дше на распу́тия его́, рцы́те: И пра́х приле́пший на́с от гра́да ва́шего, оттряса́ем ва́м: оба́че сие́ ве́дите, я́ко прибли́жися на вы́ Ца́рствие Бо́жие. Глаго́лю ва́м, я́ко содо́мляном в де́нь то́й отра́днее бу́дет, не́же гра́ду тому́. Го́ре тебе́ Хорази́не, го́ре тебе́ Вифсаи́до, я́ко а́ще в Ти́ре и Сидо́не бы́ша си́лы бы́ли бы́вшыя в ва́ю, дре́вле у́бо во вре́тищи и пе́пеле седя́ще пока́ялися бы́ша. Оба́че Ти́ру и Сидо́ну отра́днее бу́дет на суде́, не́же ва́ма. И ты́ Капернау́ме, и́же до небе́с вознесы́йся, до а́да низведе́шися.

Святи́телю еди́ному и мно́гим:

Апо́стол ко евре́ем, зача́ло 318.

Бра́тие, тако́в на́м подоба́ше архиере́й, преподо́бен, незло́бив, безскве́рнен, отлуче́н от гре́шник, и вы́шше небе́с бы́в: И́же не и́мать по вся́ дни́ ну́жды, я́коже первосвяще́нницы, пре́жде о свои́х гресе́х же́ртвы приноси́ти, пото́м же о людски́х: сие́ бо сотвори́ еди́ною, себе́ прине́с. Зако́н бо челове́ки поставля́ет первосвяще́нники, иму́щыя не́мощь: сло́во же кля́твенное, е́же по зако́не, сы́на во ве́ки соверше́нна. Глава́ же о глаго́лемых, такова́ и́мамы первосвяще́нника, и́же се́де одесну́ю Престо́ла вели́чествия на небесе́х: Святы́м служи́тель и ски́нии и́стинней, ю́же водрузи́ Госпо́дь, а не челове́к.

Святи́телю:

Ева́нглие от Иоа́нна, зача́ло 36.

Рече́ Госпо́дь ко прише́дшым к нему́ иуде́ем: А́з е́смь две́рь, Мно́ю а́ще кто́ вни́дет, спасе́тся, и вни́дет, и изы́дет, и па́жить обря́щет. Та́ть не прихо́дит, ра́зве да укра́дет, и убие́т, и погуби́т: А́з приидо́х да живо́т и́мут, и ли́шше и́мут. А́з е́смь па́стырь до́брый: па́стырь до́брый ду́шу свою́ полага́ет за о́вцы. А нае́мник, и́же не́сть па́стырь, ему́же не су́ть о́вцы своя́, ви́дит во́лка гряду́ща, и оставля́ет о́вцы, и бе́гает, и во́лк расхи́тит и́х, и распу́дит о́вцы. А нае́мник бежи́т, я́ко нае́мник е́сть, и не ради́т о овца́х. А́з е́смь па́стырь до́брый, и зна́ю Моя́, и зна́ют Мя́ Моя́. Я́коже зна́ет Мя́ Оте́ц, и А́з зна́ю Отца́: и ду́шу Мою́ полага́ю за о́вцы. И и́ны о́вцы и́мам, я́же не су́ть от двора́ сего́, и ты́я Ми́ подоба́ет привести́: и гла́с Мо́й услы́шат, и бу́дет еди́но ста́до, и еди́н па́стырь.

Святи́телем:

Ева́нглие от Матфе́а, зача́ло 11.

Рече́ Госпо́дь Свои́м ученико́м: вы́ есте́ све́т ми́ра: не мо́жет гра́д укры́тися верху́ горы́ стоя́. Ниже́ вжига́ют свети́льника, и поставля́ют его́ под спу́дом, но на све́щнице, и све́тит все́м, и́же в хра́мине [су́ть]. Та́ко да просвети́тся све́т ва́ш пред челове́ки, я́ко да ви́дят ва́ша до́брая дела́: и просла́вят Отца́ ва́шего, и́же на небесе́х. [Да] не мни́те, я́ко приидо́х разори́ти зако́н, или́ проро́ки: не приидо́х разори́ти, но испо́лнити. Ами́нь бо глаго́лю ва́м: до́ндеже пре́йдет не́бо и земля́, ио́та еди́на, или́ еди́на черта́ не пре́йдет от зако́на, до́ндеже вся́ бу́дут. И́же а́ще разори́т еди́ну за́поведей си́х ма́лых, и научи́т та́ко челове́ки, мни́й нарече́тся в Ца́рствии небе́снем: а и́же сотвори́т и научи́т, се́й ве́лий нарече́тся в Ца́рствии небе́снем.

Преподо́бному еди́ному и преподо́бным, и Христа́ ра́ди юро́дивым:

Апо́стол к гала́том, зача́ло 213.

Бра́тие, пло́д духо́вный е́сть: любы́, ра́дость, ми́р, долготерпе́ние, бла́гость, милосе́рдие, ве́ра, кро́тость, воздержа́ние, на таковы́х не́сть зако́на. А и́же Христо́вы су́ть, пло́ть распя́ша со страстьми́ и похотьми́. А́ще живе́м ду́хом, ду́хом и да хо́дим. Не быва́им тщесла́вни, дру́г дру́га раздража́юще, дру́г дру́гу зави́дяще. Бра́тие, а́ще и впаде́т челове́к в не́кое прегреше́ние, вы́ духо́внии исправля́йте такова́го ду́хом кро́тости: блюды́й себе́, да не и ты́ искуше́н бу́деши. Дру́г дру́га тяготы́ носи́те, и та́ко испо́лните зако́н Христо́в.

Ева́нглие от Матфе́а, зача́ло 43.

Рече́ Госпо́дь свои́м ученико́м: вся́ Мне́ предана́ су́ть Отце́м мои́м: и никто́же зна́ет Сы́на, то́кмо Оте́ц: ни Отца́ кто́ зна́ет, то́кмо Сы́н: и ему́же а́ще во́лит Сы́н откры́ти. Прииди́те ко мне́ вси́ тружда́ющиися и обремене́ннии, и А́з упоко́ю вы́. Возми́те и́го Мое́ на себе́, и научи́теся от Мене́, я́ко кро́ток е́смь и смире́н се́рдцем: и обря́щете поко́й душа́м ва́шым. И́го бо Мое́ бла́го, и бре́мя Мое́ легко́ е́сть.

Му́ченику еди́ному:

Апо́стол к Тимофе́ю, зача́ло 292.

Ча́до Тимофе́е, возмога́й о благода́ти, я́же о Христе́ Иису́се: И я́же слы́шал еси́ от Мене́ мно́гими свиде́тели, сия́ преда́ждь ве́рным челове́ком, и́же дово́льни бу́дут и ины́х научи́ти. Ты́ у́бо злопостражди́, я́ко до́бр во́ин Иису́с Христо́в. Никто́же бо во́ин быва́я обязу́ется ку́плями жите́йскими, да воево́де уго́ден бу́дет. А́ще же и постра́ждет кто́, не венча́ется, а́ще незако́нно му́чен бу́дет. Тружда́ющемуся де́лателю пре́жде подоба́ет от плода́ вкуси́ти. Разуме́й я́же глаго́лю: да да́ст у́бо тебе́ Госпо́дь ра́зум о все́м. Помина́й Го́спода Иису́са Христа́ воста́вшаго от ме́ртвых, от се́мене Дави́дова, по благовествова́нию моему́. В не́мже злостражду́ да́же до у́з я́ко злоде́й: но сло́во Бо́жие не вя́жется. Сего́ ра́ди вся́ терплю́ избра́нных ра́ди, да и ти́и спасе́ние улуча́т, е́же о Христе́ Иису́се, со сла́вою ве́чною.

Ева́нглие от Луки́, зача́ло 63.

Рече́ Госпо́дь: ничто́же покрове́но е́сть, е́же не откры́ется: и та́йно, е́же не разуме́ется. Зане́ ели́ка во тьме́ ре́сте, во све́те услы́шится: и е́же ко у́ху глаго́ласте во хра́мех, пропове́стся на кро́вех. Глаго́лю же ва́м друго́м свои́м: не убо́йтеся от убива́ющих те́ло, и пото́м не могу́щих ли́шше что́ сотвори́ти: Сказу́ю же ва́м, кого́ убо́йтеся: убо́йтеся иму́щаго вла́сть по убие́нии воврещи́ в де́брь о́гненную: е́й глаго́лю ва́м, того́ убо́йтеся. Не пя́ть ли пти́ц це́нится пе́нязема двема́? и ни еди́на от ни́х не́сть забве́на пред Бо́гом. Но и власи́ главы́ ва́шея вси́ изочте́ни су́ть. Не убо́йтеся у́бо: мно́зех пти́ц у́нши есте́ вы́. Глаго́лю же ва́м: вся́к и́же а́ще испове́сть Мя́ пред челове́ки, и Сы́н Челове́ческий испове́сть его́ пред а́нгелы Бо́жиими: отверги́йся Мене́ пред челове́ки, отве́ржен бу́дет пред а́нгелы Бо́жиими. И вся́к и́же рече́т сло́во на Сы́на Челове́ческаго, оста́вится ему́: а на Свята́го Ду́ха ху́лившему, не оста́вится. Егда́ же приведу́т вы́ на собо́рища, и вла́сти, и влады́чества, не пецы́теся ка́ко или́ что́ отвеща́ете, или́ что́ рече́те: Святы́й бо Ду́х научи́т вы́ в то́й ча́с, я́же подоба́ет рещи́.

Му́чеником и преподо́бному́чеником:

Апо́стол к ри́мляном, зача́ло 99.

Бра́тие, ве́мы, я́ко лю́бящым Бо́га вся́ поспешеству́ют во благо́е, су́щым по предъуве́дению зва́нным. И́хже бо предъуве́де, те́х и предъуста́ви сообра́зным бы́ти о́бразу Сы́на Своего́, я́ко бы́ти Ему́ перворо́дну во мно́гих бра́тиях. А и́хже предъуста́ви, те́х и призва́: а и́хже призва́, си́х и оправда́, а и́хже оправда́, си́х и просла́ви. Что́ у́бо рече́м к си́м? а́ще Бо́г по на́с, кто́ на ны́? И́же у́бо своего́ Сы́на не пощаде́, но за ны́ вся́ пре́дал е́сть Его́: ка́ко у́бо не и с Ни́м вся́ на́м да́рствует? Кто́ пое́млет на избра́нныя Бо́жия? Бо́г оправда́яй. Кто́ осужда́яй? Христо́с Иису́с уме́рый, па́че же и воскресы́й, и́же и е́сть одесну́ю Бо́га, и́же и хода́тайствует о на́с. Кто́ ны разлучи́т от любве́ Бо́жия? ско́рбь ли, или́ теснота́, или́ гоне́ние, или́ гла́д, или́ нагота́, или́ беда́, или́ ме́чь? я́коже е́сть пи́сано я́ко Тебе́ ра́ди умерщвля́еми есмы́ ве́сь де́нь, вмени́хомся я́коже о́вцы заколе́ния. Но о си́х все́х препобежда́ем за возлю́бльшаго ны́. Извести́хся бо, я́ко ни сме́рть, ни живо́т, ни а́нгели, ни нача́ла, ниже́ си́лы, ни настоя́щая, ни гряду́щая, ни высота́, ни глубина́, ни и́на тва́рь ка́я, возмо́жет на́с разлучи́ти от любве́ Бо́жия, я́же о Христе́ Иису́се Го́споде на́шем.

Ева́нглие от Матфе́а, зача́ло 36.

Рече́ Госпо́дь Свои́м ученико́м: се́ а́з посыла́ю ва́с, я́ко о́вцы посреде́ волко́в: бу́дите у́бо му́дри я́ко змия́, и це́ли я́ко го́лубие. Внемли́те же от челове́к: предадя́т бо вы́ на со́нмы, и на собо́рищах и́х бию́т ва́с. И пред влады́ки же и цари́ веде́ни бу́дете Мене́ ра́ди, во свиде́тельство и́м и язы́ком. Егда́ же предаю́т вы́, не пецы́теся, ка́ко или́ что́ возглаго́лете: да́стся бо ва́м в то́й ча́с, что́ возглаго́лете. Не вы́ бо бу́дете глаго́лющии, но Ду́х Отца́ ва́шего глаго́ляй в ва́с. Преда́ст же бра́т бра́та на сме́рть, и оте́ц ча́до: и воста́нут ча́да на роди́тели, и убию́т и́х. И бу́дете ненави́дими все́ми, и́мене Моего́ ра́ди: претерпе́вый же до конца́, то́й спасе́н бу́дет.

Священному́ченику еди́ному и мно́гим, и на собо́ры святы́х оте́ц:

Апо́стол ко евре́ем, зача́ло 334.

Бра́тие, помина́йте наста́вники ва́шя, и́же глаго́лаша ва́м. Сло́во Бо́жие: и́хже взира́юще на сконча́ние жи́тельства, подража́йте ве́ре и́х. Иису́с Христо́с, вчера́ и дне́сь, то́йже и во ве́ки. В науче́ния стра́нна и разли́чна не прилага́йтеся: добро́ бо благода́тию утвержда́ти сердца́, а не бра́шны, от ни́хже не прия́ша по́льзы ходи́вшии в ни́х. И́мамы же олта́рь, от него́же не и́мут вла́сти я́сти служа́щии се́ни. И́хже бо кро́вь живо́тных вно́сится во свята́я за грехи́ первосвяще́нником, си́х телеса́ сжига́ются вне́ ста́на. Те́мже Иису́с да освяти́т лю́ди свое́ю кро́вию, вне́ вра́т пострада́ти изво́лил. Те́мже у́бо да исхо́дим к нему́ вне́ ста́на поноше́ние его́ нося́ще. Не и́мамы бо зде́ пребыва́ющаго гра́да, но гряду́щаго взыску́ем. Те́м у́бо прино́сим же́ртву хвале́ния вы́ну Бо́гу, си́речь пло́д усте́н испове́дающихся и́мени Его́, Благотворе́ния же и обще́ния не забыва́йте: таковы́ми бо же́ртвами благоугожда́ется Бо́г.

Священному́ченику еди́ному и мно́гим:

Ева́нглие от Луки́, зача́ло 67.

Рече́ Госпо́дь: не бо́йся ма́лое ста́до, я́ко благоизво́ли Оте́ц ва́ш да́ти ва́м Ца́рство. Продади́те име́ния ва́ша, и дади́те ми́лостыня: сотвори́те себе́ влага́лища неветша́ющя, сокро́вище неоскуде́емо на небесе́х, иде́же та́ть не приближа́ется, ни мо́ль растлева́ет. Иде́же бо е́сть сокро́вище ва́ше, ту́ и се́рдце ва́ше бу́дет. Да бу́дут чресла́ ва́ша препоя́сана, и свети́льницы горя́щии: И вы́ подо́бни челове́ком ча́ющым Го́спода своего́, когда́ возврати́тся от бра́к, да прише́дшу и толкну́вшу, а́бие отве́рзут ему́. Блаже́ни раби́ ти́и, и́хже прише́д Госпо́дь обря́щет бдя́щя. Ами́нь глаго́лю ва́м, я́ко препоя́шется, и посади́т и́х: и мину́в послу́жит и́м. И а́ще прии́дет во втору́ю стра́жу, лю́бо в тре́тию стра́жу прии́дет, и обря́щет и́х та́ко: блаже́ни су́ть раби́ ти́и. Се́ же ве́дите, я́ко а́ще бы ве́дал господи́н хра́мины, в ки́й ча́с та́ть прии́дет, бде́л у́бо бы́, и не бы да́л подкопа́ти до́му своего́. И вы́ у́бо бу́дите гото́ви: я́ко во́ньже ча́с не мните́, Сы́н Челове́ческий прии́дет.

На собо́ры святы́х оте́ц:

Ева́нглие от Иоа́нна, зача́ло 56.

Во вре́мя о́но, возведе́ Иису́с о́чи Свои́ на не́бо, и рече́: О́тче, прии́де ча́с: просла́ви Сы́на Твоего́, да и Сы́н Тво́й просла́вит Тя́. Я́коже да́л еси́ Ему́ вла́сть вся́кия пло́ти, да вся́ко е́же да́л еси́ Ему́, да́ст и́м живо́т ве́чный. Се́ же е́сть живо́т ве́чный, да зна́ют Тебе́ еди́наго и́стиннаго Бо́га, и его́же посла́л еси́ Иису́с Христа́. И просла́вих Тя́ на земли́: де́ло соверши́х, е́же да́л еси́ Мне́, да сотворю́. И ны́не просла́ви Мя́, Ты́ О́тче, у тебе́ Самаго́ сла́вою, ю́же име́х у тебе́, пре́жде ми́р не бы́сть. Яви́х и́мя Твое́ челове́ком, и́хже да́л еси́ Мне́ от ми́ра, Твои́ бе́ша, и да́л еси́, и сло́во Твое́ сохрани́ша. Ны́не разуме́ша, я́ко вся́, ели́ка да́л еси́ Мне́, от Тебе́ су́ть. Я́ко глаго́лы, и́хже да́л еси́ Мне́, да́х и́м: и ти́и прия́ша, и разуме́ша вои́стинну, я́ко от Тебе́ изыдо́х, и ве́роваша, я́ко Ты́ мя посла́. А́з о си́х молю́: не о все́м ми́ре молю́, но о Те́х, и́хже да́л еси́ Мне́, я́ко Твои́ су́ть. И моя́ вся́, Твоя́ су́ть: и Твоя́, Моя́: и просла́вихся в ни́х. И ктому́ не́смь в ми́ре, и си́и в ми́ре су́ть, и А́з к Тебе́ гряду́. О́тче святы́й, соблюди́ и́х во и́мя Твое́, и́хже да́л еси́ Мне́, да бу́дут еди́но я́коже и Мы́. Егда́ бе́х с ни́ми в ми́ре, А́з соблюда́х и́х во и́мя Твое́: и́хже да́л еси́ Мне́, сохрани́х, и никто́же от ни́х поги́бе, то́кмо сы́н поги́бельный, да сбу́дется писа́ние. Ны́не же к Тебе́ гряду́, и сия́ глаго́лю в ми́ре, да и́мут ра́дость Мою́ испо́лнену в себе́.

Преподо́бному́ченику еди́ному:

Апо́стол к Тимофе́ю, зача́ло 291.

Ча́до Тимофе́е, не постыди́ся стра́стию Го́спода на́шего Иису́са Христа́, ни мно́ю ю́зником Его́: но спостражди́ благовествова́нию Христо́ву, по си́ле Бо́га, Спа́сшаго на́с, и призва́вшаго зва́нием святы́м, не по дело́м на́шым, но по своему́ благоволе́нию и благода́ти, да́нней на́м о Христе́ Иису́се, пре́жде ле́т ве́чных: Я́вльшися же ны́не просвеще́нием Спаси́теля на́шего Иису́са Христа́, разруши́вшаго у́бо сме́рть, и возсия́вшаго жи́знь и нетле́ние благовествова́нием: В не́же поста́влен бы́х а́з пропове́дник и апо́стол, и учи́тель язы́ков. Ея́же ра́ди вины́ и сия́ стражду́, но не стыжду́ся: ве́м бо, ему́же ве́ровах, и извести́хся, я́ко си́лен е́сть преда́ние мое́ сохрани́ти в де́нь о́н. О́браз име́й здра́вых слове́с, и́хже от Мене́ слы́шал еси́ в ве́ре и любви́, я́же о Христе́ Иису́се. До́брое завеща́ние соблюди́, Ду́хом Святы́м живу́щим в на́с. Ве́си ли сие́, я́ко отврати́шася от Мене́ вси́, и́же от Аси́и, от ни́хже е́сть Фиге́лл и Ермоге́н? Да да́ст же ми́лость Госпо́дь Ониси́форову до́му, я́ко мно́гажды мя́ упоко́и, и вери́г мои́х не постыде́ся. Но прише́д в Ри́м, то́щнее взыска́ мя́ и обре́те. Да да́ст ему́ Госпо́дь обрести́ ми́лость от Го́спода в де́нь о́н: и ели́ка во Ефе́се послужи́ ми, до́брее ты́ ве́си.

Ева́нглие от Ма́рка, зача́ло 37.

Рече́ Госпо́дь: и́же хо́щет по Мне́ ити́, да отве́ржется себе́, и во́змет кре́ст сво́й, и по Мне́ гряде́т. И́же бо а́ще хо́щет ду́шу свою́ спасти́, погуби́т ю́: а и́же погуби́т ду́шу свою́ Мене́ ра́ди и Ева́нглиа, то́й спасе́т ю́. Ка́я бо по́льза челове́ку, а́ще приобря́щет ми́р ве́сь, и оттщети́т ду́шу свою́? Или́ что́ да́ст челове́к изме́ну на души́ свое́й? И́же бо а́ще постыди́тся Мене́, и мои́х слове́с, в ро́де се́м прелюбоде́йнем и гре́шнем, и Сы́н Челове́ческий постыди́тся его́, егда́ прии́дет во сла́ве Отца́ Своего́ со а́нгелы святы́ми. И глаго́лаше и́м: ами́нь глаго́лю ва́м, я́ко су́ть не́цыи от зде́ стоя́щих, и́же не и́мут вкуси́ти сме́рти, до́ндеже ви́дят Ца́рствие Бо́жие прише́дшее в си́ле.

Му́ченице еди́ной, и мно́гим:

Апо́стол к кори́нфяном, зача́ло 181.

Бра́тие, поспе́шствующе мо́лим, не вотще́ благода́ть Бо́жию прия́ти ва́м. Глаго́лет бо: во вре́мя прия́тно послу́шах тебе́, и в де́нь спасе́ния помого́х ти́: се́ ны́не вре́мя благоприя́тно, се́ ны́не, де́нь спасе́ния: Ни еди́но ни в че́мже даю́ще претыка́ние, да служе́ние безпоро́чно бу́дет. Но во все́м представля́юще себе́ я́коже Бо́жия слуги́ в терпе́нии мно́зе, в ско́рбех, в беда́х, в теснота́х, в ра́нах, в темни́цах, в нестрое́ниих, в труде́х, во бде́ниих, в поще́ниих, во очище́нии, в ра́зуме, в долготерпе́нии, в бла́гости, в ду́се свя́те, в любви́ нелицеме́рне, в словеси́ и́стины, в си́ле Бо́жией: ору́жии пра́вды, десны́ми и шу́ими, сла́вою и безче́стием: гажде́нием, и благохвале́нием: я́ко лестцы́ и и́стинни: я́ко незна́еми, и познава́еми: я́ко умира́юще, и се́ жи́ви есмы́: я́ко наказу́еми, а не умерщвля́еми: я́ко скорбя́ще, при́сно же ра́дующеся: я́ко ни́щи, а мно́гих богатя́ще: я́ко ничто́же иму́ще, а вся́ содержа́ще.

Ева́нглие от Ма́рка, зача́ло 21.

Во вре́мя о́но, по Иису́се идя́ху наро́ди мно́зи, и угнета́ху его́. И жена́ не́кая су́щи в точе́нии кро́ве ле́т двана́десяте, и мно́го пострада́вши от мно́г враче́в, и изда́вши своя́ вся́, и ни еди́ныя по́льзы обре́тши, но па́че в го́ршее прише́дши: слы́шавши о Иису́се, прише́дши в наро́де созади́, прикосну́ся ри́зе Его́. Глаго́лаше бо: я́ко, а́ще прикосну́ся ри́зам его́, спасе́на бу́ду. И а́бие изся́кну исто́чник кро́ве ея́: и разуме́ те́лом, я́ко исцеле́ от ра́ны. И а́бие Иису́с разуме́ в себе́ си́лу изше́дшую от него́, и обра́щься в наро́де, глаго́лаше: кто́ прикосну́ся ри́зам Мои́м, И глаго́лаху ему́ ученицы его́: ви́диши наро́д угнета́ющ Тя́, и глаго́леши: кто́ ся́ прикосну́ Мне́? И обгля́даше ви́дети сотво́ршую сие́. Жена́ же убоя́вшися и трепе́щущи, ве́дящи е́же бы́сть е́й, прии́де и припаде́ к Нему́, и рече́ Ему́ всю́ и́стину. О́н же рече́ е́й: дщи́, ве́ра твоя́ спасе́ тя, иди́ в ми́ре, и бу́ди цела́ от ра́ны твоея́.

Преподо́бней жене́ еди́ной, и мно́гим:

Апо́стол к гала́том, зача́ло 208.

Бра́тие, пре́жде прише́ствия ве́ры, под зако́ном стрего́ми бе́хом, затворе́ни в хотя́щую ве́ру откры́тися. Те́мже зако́н пе́стун на́м бы́сть во Христе́ да от ве́ры оправди́мся. Прише́дши же ве́ре, уже́ не под пе́стуном есмы́. Еси́ бо вы́ Сы́нове Бо́жии есте́, ве́рою о Христе́ Иису́се. Ели́цы бо во Христа́ крести́стеся, во Христа́ облеко́стеся. Не́сть иуде́й, ни е́ллин: не́сть ра́б, ни свобо́дь: не́сть му́жеский по́л, ни же́нский: вси́ бо вы́ еди́но есте́ о Христе́ Иису́се. А́ще ли вы́ Христо́вы, у́бо Авраа́мле се́мя есте́, и по обетова́нию насле́дницы.

Ева́нглие от Матфе́а, зача́ло 104.

Рече́ Госпо́дь при́тчу сию́: уподо́бися Ца́рствие небе́сное десяти́м де́вам, я́же прия́ша свети́льники своя́, и изыдо́ша в сре́тение жениху́. Пя́ть же бе́ от ни́х му́дры, и пя́ть юро́дивы. Юро́дивыя же прие́мше свети́льники своя́, не взя́ша с собо́ю еле́а. Му́дрыя же прия́ша еле́й в сосу́дех со свети́льники свои́ми. Косня́щу же жениху́, воздрема́шася вся́, и спа́ху. Полу́нощи же во́пль бы́сть: се́ жени́х гряде́т, исходи́те в сре́тение его́. Тогда́ воста́вше вся́ де́вы ты́я, и украси́ша свети́льники своя́, юро́дивыя же му́дрым ре́ша: дади́те на́м от еле́а ва́шего, я́ко свети́льницы на́ши угаса́ют. Отвеща́ша же му́дрыя, глаго́люще: еда́ ка́ко не доста́нет на́м и ва́м? иди́те же па́че к продаю́щым, и купи́те себе́. Иду́щым же и́м купи́ти, прии́де жени́х: и гото́выя внидо́ша с ни́м на бра́ки, и затворе́ны бы́ша две́ри. Последи́ же приидо́ша и про́чыя де́вы, глаго́люще: Го́споди, Го́споди, отве́рзи на́м. О́н же отвеща́в рече́ и́м: ами́нь глаго́лю ва́м, не ве́м ва́с. Бди́те у́бо, я́ко не ве́сте дне́, ни часа́, во́ньже Сы́н Челове́ческий прии́дет.

Испове́днику:

Апо́стол к ефесе́ем, зача́ло 233.

Бра́тие, возмога́йте о Го́споде, и в держа́ве кре́пости Его́. Облецы́теся во вся́ ору́жия Бо́жия, я́ко возмощи́ ва́м ста́ти проти́ву ко́знем диа́вольским: я́ко не́сть на́ша бра́нь к кро́ви и пло́ти, но к нача́лом и ко власте́м и к миродержи́телем тьмы́ ве́ка сего́, к духово́м зло́бы поднебе́сным. Сего́ ра́ди приими́те вся́ ору́жия Бо́жия, да возмо́жете проти́витися в де́нь лю́т, и вся́ соде́явше ста́ти. Ста́ните у́бо препоя́сани чресла́ ва́ша и́стиною, и обо́лкшеся в броня́ пра́вды: И обу́вши но́зе во угото́вание благовествова́ния ми́ра. Над все́ми же восприи́мше щи́т ве́ры, в не́мже возмо́жете вся́ стре́лы лука́ваго разжже́нныя угаси́ти: И шле́м спасе́ния восприими́те, и ме́чь духо́вный, и́же е́сть глаго́л Бо́жий.

Ева́нглие от Луки́, зача́ло 64.

Рече́ Госпо́дь: вся́к и́же а́ще испове́сть Мя́ пред челове́ки, и Сы́н Челове́ческий испове́сть его́ пред а́нгелы Бо́жиими. А отверги́йся Мене́ пред челове́ки, отве́ржен бу́дет пред а́нгелы Бо́жиими. И вся́к и́же рече́т сло́во на Сы́на Челове́ческаго, оста́вится ему́: а на Свята́го Ду́ха ху́лившему, не оста́вится. Егда́ же приведу́т вы́ на собо́рища, и вла́сти, и влады́чества, не пецы́теся, ка́ко или́ что́ отвеща́ете, или́ что́ рече́те: Святы́й бо Ду́х научи́т вы́ в то́й ча́с, я́же подоба́ет рещи́.

Безме́здником:

Апо́стол к кори́нфяном, зача́ло 153.

Бра́тие, вы́ есте́ те́ло Христо́во, и у́ди от ча́сти. И о́вы у́бо положи́ Бо́г в це́ркви, пе́рвее апо́столы, второ́е проро́ки, тре́тие учи́тели, пото́м же си́лы: та́же дарова́ния исцеле́ний, заступле́ния, правле́ния, ро́ди язы́ков. Еда́ вси́ апо́столи? еда́ вси́ проро́цы? еда́ вси́ учи́тели, еда́ вси́ си́лы? еда́ вси́ дарова́ния и́мут исцеле́ний? еда́ вси́ язы́ки глаго́лют? еда́ вси́ сказу́ют? ревну́йте же дарова́ний бо́льших, и еще́ по превосхожде́нию пу́ть ва́м показу́ю. А́ще язы́ки челове́ческими глаго́лю и а́нгельскими, любве́ же не и́мам, бы́х [я́ко] ме́дь звеня́щи, или́ кимва́л звяца́яй. И а́ще и́мам проро́чество, и ве́м та́йны вся́, и ве́сь ра́зум: и а́ще и́мам всю́ ве́ру, я́ко и го́ры преставля́ти, любве́ же не и́мам, ничто́же е́смь. И а́ще разда́м вся́ име́ния моя́, и а́ще преда́м те́ло мое́ во е́же сжещи́ е́, любве́ же не и́мам, ника́я по́льза ми́ е́сть. Любы́ долготерпи́т, милосе́рдствует: любы́ не зави́дит, любы́ не превозно́сится, не горди́тся: ни безчи́нствует, не и́щет своя́ си, не раздража́ется, не мы́слит зла́: не ра́дуется о непра́вде, ра́дуется же о и́стине. Вся́ лю́бит, всему́ ве́ру е́млет, вся́ упова́ет, вся́ терпи́т: любы́ николи́же отпа́дает.

Ева́нглие от Матфе́а, апо́столу еди́ному:

Безпло́тным:

Апо́стол к евре́ем, зача́ло 305.

Бра́тие, а́ще глаго́ланное а́нгелы сло́во бы́сть изве́стно, и вся́ко преступле́ние и ослуша́ние пра́ведное прия́т мздовоздая́ние: Ка́ко мы́ убежи́м о толи́цем неради́вше спасе́нии е́же зача́ло прие́мше глаго́латися от Го́спода, слы́шавшими в на́с извести́ся, Сосвиде́тельствующу Бо́гу, зна́меньми же и чудесы́, и разли́чными си́лами, и Ду́ха Свята́го разделе́ньми, по свое́й ему́ во́ли. Не а́нгелом бо покори́ Бо́г вселе́нную гряду́щую, о не́йже глаго́лем. Засвиде́тельствова же не́где не́кто, глаго́ля: что́ е́сть челове́к, я́ко по́мниши его́, или́ Сы́н челове́ческий, я́ко посеща́еши и́; ума́лил еси́ Его́ ма́лым не́чим от а́нгел: сла́вою и че́стию венча́л еси́ Его́, и поста́вил еси́ Его́ над де́лы руку́ Твое́ю: Вся́ покори́л еси́ под но́зе Его́. Внегда́ же покори́ти Ему́ вся́ческая, ничто́же оста́ви Ему́ непокоре́но: ны́не же не у́ ви́дим Ему́ вся́ческая покоре́на. А ума́ленаго ма́лым чи́м от а́нгел ви́дим Иису́са, за прия́тие сме́рти, сла́вою и че́стию ве́нчанна, я́ко да благода́тию Бо́жиею за все́х вку́сит сме́рти. Подоба́ше бо Ему́, Его́же ра́ди вся́ческая, и И́мже вся́ческая, приве́дшу мно́ги сы́ны в сла́ву, нача́льника спасе́ния и́х страда́ньми соверши́ти.

Ева́нглие от Луки́, зача́ло 51.

Рече́ Госпо́дь свои́м ученико́м: слу́шаяй ва́с, Мене́ слу́шает: и отмета́яйся ва́с, Мене́ отмета́ется. Отмета́яйся же Мене́, отмета́ется Посла́вшаго Мя́. Возврати́шася же се́дмьдесят с ра́достию, глаго́люще: Го́споди, и бе́си повину́ются на́м о и́мени Твое́м. Рече́ же и́м: ви́дех сатану́ я́ко мо́лнию с небесе́ спа́дша. Се́ даю́ ва́м вла́сть наступа́ти на змию́ и на скорпи́ю, и на всю́ си́лу вра́жию: и ничесо́же ва́с вреди́т. Оба́че о се́м не ра́дуйтеся, я́ко ду́си ва́м повину́ются: ра́дуйтеся же, я́ко имена́ ва́ша напи́сана су́ть на небесе́х. В то́й ча́с возра́довася ду́хом Иису́с, и рече́: испове́даю ти ся О́тче, Го́споди небесе́ и земли́, я́ко утаи́л еси́ сия́ от прему́дрых и разу́мных, и откры́л еси́ та́ младе́нцем: е́й О́тче, я́ко та́ко бы́сть благоволе́ние пред Тобо́ю.

Предте́чи Иоа́нну:

Апо́стол дея́ний, зача́ло 33.

Во дни́ о́ны, я́коже скончава́ше Иоа́нн тече́ние, глаго́лаше: кого́ мя непщу́ете бы́ти, не́смь а́з: но се́ гряде́т по мне́, Ему́же не́смь досто́ин разреши́ти реме́нь сапогу́ Его́. Му́жие бра́тие, сы́нове ро́да Авраа́мля, и и́же в ва́с боя́щиися Бо́га, ва́м сло́во спасе́ния сего́ посла́ся. Живу́щии бо во Иерусали́ме, и кня́зи и́х сего́ неразуме́вше, и гла́сы проро́ческия, по вся́ суббо́ты что́мыя, осуди́вше Его́, испо́лниша: И ни еди́ныя вины́ сме́ртныя обре́тше, проси́ша у Пила́та уби́ти Его́. Я́коже сконча́ша вся́, я́же о Не́м пи́сана, сне́мше с дре́ва, положи́ша во гро́бе. Бо́г же воскреси́ Его́ от ме́ртвых: И́же яви́ся на дни́ мно́ги, совозше́дшым с ни́м от Галиле́и во Иерусали́м, и́же ны́не су́ть свиде́телие Его́ к лю́дем. И мы́ ва́м благовеству́ем обетова́ние бы́вшее ко отце́м, я́ко сие́ Бо́г испо́лнил е́сть на́м ча́дом и́х, воздви́г Иису́са.

Ева́нглие от Матфе́а, зача́ло 40.

Во вре́мя о́но, слы́шав Иоа́нн во узи́лищи дела́ Христо́ва, посла́ два́ от учени́к свои́х, рече́ Ему́: Ты́ ли еси́ гряды́й, или́ ино́го ча́ем. И отвеща́в Иису́с рече́ и́м: ше́дша возвести́та Иоа́ннови, я́же слы́шита и ви́дита. Слепи́и прозира́ют, и хро́мии хо́дят: прокаже́ннии очища́ются, и глуси́и слы́шат: ме́ртвии востаю́т, и ни́щии благовеству́ют. И блаже́н е́сть, и́же а́ще не соблазни́тся о Мне́. Те́ма же исходя́щема, нача́т Иису́с наро́дом глаго́лати о Иоа́нне: чесо́ изыдо́сте в пусты́ню ви́дети? тро́сть ли ве́тром коле́блему? Но чесо́ изыдо́сте ви́дети? челове́ка ли к мя́кки ри́зы облече́нна? се́ и́же мя́ккая нося́щии, в доме́х ца́ских су́ть. Но чесо́ изыдо́сте ви́дети? проро́ка ли? е́й, глаго́лю ва́м, и ли́шше проро́ка. Се́й бо е́сть, о не́мже е́сть пи́сано: се́ А́з посыла́ю а́нгела Моего́ пред лице́м Твои́м, и́же угото́вит пу́ть Тво́й пред Тобо́ю. Ами́нь глаго́лю ва́м: не воста́ в рожде́нных жена́ми бо́лий Иоа́нна Крести́теля: мни́й же во Ца́рствии небе́снем бо́лий его́ е́сть. От дне́й же Иоа́нна Крести́теля досе́ле Ца́рствие небе́сное ну́дится, и ну́ждницы восхища́ют е́: Вси́ бо проро́цы и зако́н до Иоа́нна прореко́ша. И а́ще хо́щете прия́ти, то́й е́сть Илиа́ хотя́й приити́. Име́яй у́ши слы́шати, да слы́шит.

Честно́му и Животворя́щему Кресту́:

Апо́стол к кори́нфяном, зача́ло 125.

Бра́тие, сло́во кре́стное погиба́ющым у́бо юро́дство е́сть, а спаса́емым на́м си́ла Бо́жия е́сть. Пи́сано бо е́сть: погублю́ прему́дрость прему́дрых, и ра́зум разу́мных отве́ргу. Где́ прему́др? где́ кни́жник? где́ совопро́сник ве́ка сего́? не обуи́ ли Бо́г прему́дрость ми́ра сего́: Поне́же бо в прему́дрости Бо́жией, не разуме́ ми́р прему́дростию Бо́га, благоизво́лил Бо́г бу́йством про́поведи спасти́ ве́рующих. Поне́же, и иуде́е зна́мения про́сят, и е́ллини прему́дрости и́щут: Мы́ же пропове́дуем Христа́ ра́спята, иуде́ем у́бо собла́зн, е́ллином же безу́мие: Саме́м же зва́нным, иуде́ем же и е́ллином, Христа́, Бо́жию си́лу, и Бо́жию прему́дрость.

Ева́нглие от Иоа́нна, зача́ло 42 от полу́.

Рече́ Госпо́дь: О́тче, просла́ви и́мя Твое́. Прии́де же гла́с с небесе́: и просла́вих, и па́ки просла́влю. Наро́д же стоя́й слы́шав, глаго́лаху: гро́м бы́сть. Ини́и глаго́лаху: а́нгел глаго́ла ему́. Отвеща́ Иису́с, и рече́: не Мене́ ра́ди гла́с се́й бы́сть, но наро́да ра́ди. Ны́не су́д е́сть ми́ру сему́: ны́не кня́зь ми́ра сего́ изгна́н бу́дет во́н. И а́ще А́з вознесе́н бу́ду от земли́, вся́ привлеку́ к себе́. Сие́ же глаго́лаше, назна́менуя, ко́ею сме́ртию хотя́ше умре́ти. Отвеща́ Ему́ наро́д: мы́ слы́шахом от зако́на, я́ко Христо́с пребыва́ет во ве́ки: ка́ко Ты́ глаго́леши: вознести́ся подоба́ет Сы́ну Челове́ческому? кто́ е́сть се́й Сы́н Челове́ческий? Рече́ же и́м Иису́с: еще́ ма́ло вре́мя све́т в ва́с е́сть. Ходи́те, до́ндеже све́т и́мате, да тьма́ ва́с не и́мет. И ходя́й во тьме́, не ве́сть, ка́мо и́дет. До́ндеже све́т и́мате, ве́руйте во све́т, да сы́нове све́та бу́дете.

Влады́чным пра́здником:

Апо́стол к колосса́ем, зача́ло 208.

Бра́тие, благодаря́ще Бо́га и Отца́, призва́вшаго ва́с в прича́стие насле́дия святы́х во све́те: И́же изба́ви на́с от вла́сти те́мныя, и преста́ви в Ца́рство Сы́на любве́ Своея́: О Не́мже и́мамы избавле́ние кро́вию Его́, и оставле́ние грехо́в: И́же е́сть о́браз Бо́га неви́димаго, перворожде́н всея́ тва́ри. Я́ко о Не́м создана́ бы́ша вся́ческая, я́же на небеси́, и я́же на земли́, ви́димая и неви́димая: а́ще престо́ли, а́ще Госпо́дьствия, а́ще нача́ла, а́ще вла́сти, вся́ческая те́м и о Не́м созда́шася. И То́й е́сть пре́жде все́х, и вся́ческая о Не́м состоя́тся. И То́й е́сть глава́ те́лу це́ркве, и́же е́сть нача́ток, перворожде́н из ме́ртвых, я́ко да бу́дет во все́х То́й пе́рвенствуя.

Ева́нглие от Луки́, зача́ло 48 от полу́.

Во вре́мя о́но, бы́сть егда́ скончава́хуся дни́е восхожде́нию Иису́сову, и То́й утверди́ лице́ свое́ ити́ во Иерусали́м. И посла́ ве́стники пред лице́м свои́м: и изше́дше внидо́ша в ве́сь Самаря́нску, я́ко да угото́вят ему́. И не прия́ша его́, я́ко лице́ его́ бе́ гряды́й во Иерусали́м. Ви́девша же ученика́ Его́, Иа́ков и Иоа́нн, ре́ста: Го́споди, хо́щеши ли, рече́ма, да о́гнь сни́дет с небесе́, и потреби́т и́х, я́коже и Илиа́ сотвори́? Обра́щься же запрети́ и́ма, и рече́: не ве́ста, ко́его ду́ха еста́ вы́. Сы́н бо Челове́ческий не прии́де ду́ш челове́ческих погуби́ти, но спасти́: и идо́ша во и́ну ве́сь. И обра́щься ко ученико́м, рече́: вся́ Мне́ предана́ бы́ша от Отца́ Моего́: и никто́же ве́сть, кто́ есть Сы́н, то́кмо Оте́ц, и кто́ есть Оте́ц, то́кмо Сы́н, и ему́же а́ще хо́щет Сы́н откры́ти. И обра́щься ко ученико́м, еди́н рече́: блаже́ни о́чи ви́дящии, я́же ви́дите. Глаго́лю бо ва́м: я́ко мно́зи проро́цы и ца́рие восхоте́ша ви́дети, я́же вы́ ви́дите, и не ви́деша: и слы́шати, я́же слы́шите, и не слы́шаша.

Богоро́дичным пра́здником:

Апо́стол к филипписи́ем, зача́ло 240.

Бра́тие, сие́ да му́дрствуется в ва́с, е́же и во Христе́ Иису́се, И́же во о́бразе Бо́жии сы́й, не восхище́нием непщева́ бы́ти ра́вен Бо́гу. Но себе́ ума́лил, зра́к раба́ прии́м, в подо́бии челове́честем бы́в, и о́бразом обре́теся я́коже челове́к. Смири́л себе́, послушли́в бы́в да́же до сме́рти, сме́рти же кре́стныя. Те́мже и Бо́г Его́ превознесе́, и дарова́ Ему́ и́мя, е́же па́че вся́каго и́мене: Да о и́мени Иису́сове вся́ко коле́но поклони́тся, небе́сных, и земны́х, и преиспо́дних: И вся́к язы́к испове́сть, я́ко Госпо́дь Иису́с Христо́с, в сла́ву Бо́га Отца́.

Ева́нглие от Луки́, зача́ло 54.

Во вре́мя о́но, вни́де Иису́с в ве́сь не́кую: жена́ же не́кая и́менем Ма́рфа прия́т его́ в до́м сво́й. И сестра́ е́й бе́, нарица́емая Мари́а, я́же и се́дши при ногу́ Иису́сову, слы́шаше сло́во его́. Ма́рфа же мо́лвяше о мно́зе слу́жбе, ста́вши же рече́: Го́споди, не бреже́ши ли, я́ко сестра́ моя́ еди́ну мя́ оста́ви служи́ти, рцы́ у́бо е́й, да ми́ помо́жет. Отвеща́в же Иису́с, рече́ е́й: Ма́рфо, Ма́рфо, пече́шися, и мо́лвиши о мно́зе: Еди́но же е́сть на потре́бу: Мари́а же благу́ю ча́сть избра́, е́же не оти́мется от нея́. Бы́сть же егда́ глаго́лаше сия́, воздви́гши не́кая жена́ гла́с от наро́да, рече́ ему́ блаже́но чре́во носи́вшее Тя́, и сосца́ я́же еси́ сса́л. О́н же рече́: те́мже у́бо блаже́ни слы́шащии сло́во Бо́жие, и храня́щии е́.


Источник: Минея общая – М. : Издательский Совет Русской Православной Церкви, 2002. – 516 с. ISBN 5-94625-045-0

Комментарии для сайта Cackle