В 18-й день

Свята́го апостола и Евангелиста Луки́

В той же день. Преподобнаго Ио́сифа Волоцкаго

НА ВЕЧЕ́РНИ

Блажен муж: 1 антифон.

На Го́споди, воззва́х: стихиры на 8, глас 8.

Подо́бен: Что вас наречем:

Что тя ны́не нареку, апостоле:/ небо, я́ко Славу Божию поведал еси,/ блистание, я́ко мир озаряеши светом,/ облак, одождя́ющь Божественныя воды,/ чашу мудрости Божественнейшую,/ вино нам источающую, сердца веселящее./ Моли спастися душам нашим.

Что тя ны́не нареку, Богоприятне,/ кивот златый Завета, егoже завеща́ Христос,/ реку́, из рая́ истекающую нам,/ свети́ло, умный свет просиява́ющее,/ светильник, Церковь всю осиявающий,/ хлеб жизни Божественныя трапезы,/ крати́р²⁵ духовнаго пива./ Моли спастися душам нашим.

Что тя ны́не, Боговидче, наречем,/ служителя тайн де́лательнейшаго Христовых,/ Скинии мысленныя началохудо́жника му́дра,/ скрижа́ли изсекающаго благодати,/ закон написавшаго новейший,/ от Сиона происходящий/ и тобою проповедуемый./ Моли спастися душам нашим.

Что тя ны́не наречем, славне,/ сокровище Небесных даров твердое,/ врача душ и телес изве́стна,/ Павлова содейственника и сошественника,/ дея́ния апостольская излага́юща./ Многая, Луко́, имена добродетель тебе́ сотвори́./ Моли спастися душам нашим.

Что тя ны́не, Богоглаголиве, провеща́ю,/ ученика, я́ко нам благовествовал еси Христа,/ врача, я́ко стра́сти исцеляеши душевныя,/ светильника, умный свет облиста́вшаго,/ степень и основание веры,/ ты бо нам написал еси всечестное Евангелие./ Моли спастися душам нашим.

Что тя ны́не нареку́, чу́дне,/ зрителя мудрости учений нелжи́ва,/ списа́теля Деяний апостольских учений,/ или столпа́ благочестия непоколеби́ма,/ или сте́ну Церкве неразруши́мую./ Многая твоя, Луко́, имена/ и бо́льшая дарования./ Моли спастися душам нашим.

Сла́ва, глас 6. Анатолия:

Апостоле Христов, и Боже́ственных догма́т списа́телю,/ и церковное утверждение:/ ты я́ко истинно сущия во мра́це неве́дения сердца́,/ зашедшая во глубину́ отчаяния, уврачил еси Боговещаньми/ и спасл еси я́ко от бури треволне́ния,/ последователь быв сосу́да избра́ннаго, Павла, и ученик./ Тем молим тя, Луко́ досточудне, Антиохи́аном удобре́ние,/ молися Спасу и Бо́гу/ о иже верою совершающих присно честную память твою́.

И ны́не, Богоро́дичен: Кто Тебе́ не ублажи́т:

Вход. Прокимен дне и чтения три, и лития (зри сего месяца в 6-й день)

На стиховне стихиры, глас 5.

Подо́бен: Радуйся, постников:

Благодать устна́м твоим, Луко́,/ о́гненным язы́ком излия́ся, апостоле,/ и язык огненный показался еси,/ словеса испущая света,/ света достойным проповеданием;/ стре́лы же паля́щия тьмы желающим,/ пиша́ и уча́ честно́е Евангелие,/ и воня́ жизненная Жизни воистинну хотящим явился еси,/ я́коже Павел рече́, егoже имел еси учителя:/ воня́ же смерти паки Жизнь не возлюби́вшим./ Но нам мир, и Жизнь, и свет подаждь, и велию милость.

Стих: Небеса́ пове́дают славу Божию,/ творение же руку́ Его возвещает твердь.

Позна́хом от словес твоих,/ я́коже рекл еси, словес утверждение,/ яже рекл еси, Божественне таи́нниче,/ поне́же писати нам о ве́щех начал еси,/ о нихже извеще́н был еси,/ и я́коже тебе́ преда́ша, иже испе́рва самовидцы;/ имже и ты равен был еси, служитель Слова воплоще́ния,/ Егoже по востании во Еммау́се видел еси/ и горя́щим сердцем с Клео́пою хлеб ял еси./ Того Божественныя теплоты́/ и на́ша чтущих тя ду́ши исполни.

Стих: Во всю землю изы́де вещание их/ и в концы вселенныя глаголы их.

Радуйся, един, написавый нам, еже радуйся,/ радуяся, Чистыя Благове́щение/ и Сию Го́сподороди́тельницу,/ рекша Крестителя из чрева,/ егoже написав, и зачатие, и Слова воплощение,/ искушения же и чудеса, словеса и Страсти,/ Крест и смерть, и Востание,/ еже видел еси, и Восход,/ Духа же Сошествие,/ проповедник же дея́ния,/ и изряднее же Павлова,/ егoже показался еси соше́ственник,/ врач же и таинник,/ и светильник Церкве, юже соблюда́й всегда.

Сла́ва, глас 6:

Всемудрый ло́вче, святый учениче́,/ де́лателю Спасов и проповедниче Того Страсте́й,/ иже тварь верою претекий/ и от пре́лести язы́ки собра́в,/ и Бо́гу приве́д, я́ко воню́ добру́,/ на Небеса пости́гл еси./ Тем, предстоя́ Судии всех, молися/ изба́вити ны от беззаконий наших/ и в день Суда свободи́тися от му́ки.

И ны́не, Богоро́дичен воскресен: Творец и Избавитель:

Тропа́рь, глас 5:

Апостольских деяний сказа́теля/ и Евангелия Христова све́тла списателя,/ Луку́ препетаго, славна су́ща Христове Церкви,/ песньми священными свята́го апостола похва́лим,/ я́ко врача́ су́ща, человеческия не́мощи,/ естества неду́ги и я́зи душ исцеляюща/ и моля́щася непрестанно за ду́ши на́ша.

Сла́ва, и ны́не, Богоро́дичен воскресен.

НА У́ТРЕНИ

На Бог Господь: тропа́рь два́жды.

Сла́ва, и ны́не, Богоро́дичен:

По 1-й стихоло́гии, седален, глас 3:

Прииди́те вси, апостола Луку́ восхва́лим, я́ко кормчия,/ и́дольскую бо лесть упраздни́ и к Свету жизни возведе́,/ и в Троицу ве́ровати научи́./ Темже днесь благочестно того почитающе ве́рнии,/ славим Христа Бога нашего.

Сла́ва, и ны́не, Богоро́дичен:

Радуйся, Марие, Дево Мати,/ горо́ святая, Едемский раю́,/ из Неяже роди́ся Христос Бог,/ Безсеменное Слово,/ Имже Жизнь мирови прозябе́.

По 2-й стихоло́гии, седален, глас 3.

Подо́бен: Красоте девства:

Путешествовав ты по востании, Луко́ всесвященне,/ с Клео́пою про́чее во град Еммау́с,/ вопроше́ние творя́щу ти, предста́ Господь о́бразом прикрове́н,/ а́бие же прием хле́ба пода́ние, познал еси Спаса:/ Егoже моли даровати нам велию милость.

Сла́ва, и ны́не, Богоро́дичен:

Я́ко невозделанная, Дево, лоза, красне́йший Гроздь прозябла еси,/ источающ нам Вино спасения,/ всех веселящее ду́ши же и телеса./ Темже я́ко вину Тя добрых блажа́ще присно,/ со А́нгелом вопием Ти:/ радуйся, Обра́дованная.

По полиеле́и седален, глас 4:

Прему́дрости лови́тельною тро́стию, умнаго моря глубину возчерпа́я,/ из смертоносныя глубины́ верных души живоуловил еси, Луко́ всеблаженне./ Темже от Павла науче́н, все очистил еси твое́ сердце осия́нием Духа/ и догма́тами твоими язы́ки просветил еси,/ страсте́й неду́гования чудесы́ исцелил еси,/ Христа Бога за ны присно моля́/ спастися душам нашим.

Сла́ва, и ны́не, Богоро́дичен:

Иму́ще Тя, Богородице, упование и предстательство,/ вра́жиих наве́т не убоимся,/ я́ко спасаеши души на́ша.

Степенна, 1-й антифон 4-го гласа. Прокимен, глас 4: Во всю землю: Стих: Небеса поведают: Вся́кое дыхание: Евангелие от Иоанна, зачало 67.

По 50-м псалме стихира, глас 3:

Путеходи́в ты по Востании,/ Луко́ всесвященне, со Клео́пою/ во град убо Еммау́с,/ совопроше́ние творя́щу ти предста́ Господь,/ зра́ком непознаваемый,/ а́бие же, прием хле́ба подая́ние,/ познал еси Спаси́теля,/ Емуже молися даровати нам велию милость.

Канон Богоро́дицы со ирмо́сом на 6 и апостола на 8, глас 8.

Песнь 1

Ирмо́с: Песнь возслем, людие,/ Чу́дному Бо́гу нашему,/ свободившему Израиля от работы,/ песнь победную поюще и вопиюще,/ пои́м Тебе́, Единому Владыце.

Колесница Божия пресветлая был еси,/ Всесвятое нося́ Имя пред человеки, Луко́ всече́стне,/ колесницы и триста́ты пре́лести погружая крепко.

Струю́ прии́м жизни, зно́ем изсыхаемый безбожия, напоил еси мир, Луко́ всеблаженне,/ тучами Богоразумия,/ из чрева твоего изска́чущими.

Блистанием Духа, Луко́, и жития́ чистотою озаря́ем,/ я́ко молния, треблаженне, Богоданно сиял еси всей вселенней, просвещая верных сердца́.

Богоро́дичен:

Радуйся, всесвятый хра́ме, руно́ Богоро́сное,/ запеча́танный источниче безсмертныя Струи́,/ стадо Твое́, Владычице, сохраняй от всех ра́тных неплени́мо.

Катава́сия: Отве́рзу уста́ моя

Песнь 3

Ирмо́с: Несть свят, я́ко Господь,/ и несть праведен, я́ко Бог наш,/ Егoже поет вся тварь:/ несть праведен, па́че Тебе́, Го́споди.

Возсияв, я́ко солнце, проповеданием,/ Церкве укра́сил еси, Луко́, утверждение,/ прелести мглу теплотою веры иста́ив, всеблаженне.

Скрижа́ли изсекл еси Боголепныя от ка́мене, пребогате, Божия воплощения,/ оско́рд²⁶ имея Боже́ственный язык твой и уста́ Богодухновенная.

Во о́блак всесветлый входя́й/ и о́блаком покрываемь,/ приял еси, премудре, Новый Закон,/ пе́рстом Духа пи́санный на сердцы твое́м.

Богоро́дичен:

Несть непоро́чны, я́ко Ты, Владычице,/ и несть пречисты, па́че Тебе́, Всенепоро́чная:/ во чре́ве бо Бога Слова вместила еси,/ Единаго Многомилостиваго.

Седален, глас 8.

Подо́бен: Премудрости:

Я́ко соше́ственник Павлов явився,/ различныя беды́ терпеливне претерпел еси,/ всехвальне Господень апостоле,/ и течение страданием совершив веры,/ с ним в вышних веселишися, блаженне./ Тем и миру Христово Евангелие проповедав,/ просветил еси подсолнечную всю, Луко́ всечестне./ Моли Христа Бога грехов оставление пода́ти празднующим любовию святую память твою́.

Сла́ва, и ны́не, Богоро́дичен:

Солнца о́блаче разумнаго,/ Божественнаго Света свети́льниче златокова́нный,/ Нескве́рная, Небла́зная, Всенепорочная Владычице,/ омраче́нную ду́шу мою ослеплением страсте́й/ безстрастия зарею просвети, молюся,/ и оскверне́нное мое сердце омы́й пото́ки умиления,/ покаяния же слезами,/ и от тиме́ния²⁷ мя очи́сти дел моих, да любовию зову Ти:/ Богородице Приснодево, моли Христа Бога/ прегрешений оставление подати ми,/ Тебе́ бо имею надежду, раб Твой.

Песнь 4

Ирмо́с: Из горы́ приосене́нныя, Слове, пророк,/ Единыя Богоро́дицы,/ хотя́ща воплотитися, Боговидно усмотри́/ и со страхом славословите силу Твою́.

Море язы́ков смутил еси, Богомудре,/ конь быв Всецаря́,/ сла́ное²⁸ неве́рствие со́лию Божественною ослажда́я, приснославне.

Лук Христос напря́г,/ пусти́ стрелу́ тя, Луко́, све́тло обощре́ну,/ лучами сияюща благочестия и просвещающа на́ша души.

Стра́сти душ ку́пно и телес твоих певцев уврачи́, всеблаженне,/ та́инственным рукоде́ланием,/ греха́ гни́лость изрезуя, всемудре.

Богоро́дичен:

Невесто Божия, Марие Богороди́тельнице,/ избави мя лютых прегрешений и бед/ и к тишины́ пристанищу и спасения Твоими моли́твами направи.

Песнь 5

Ирмо́с: Утренююще вопием Ти,/ Го́споди, спаси́ ны,/ Ты бо еси Бог наш,/ разве Тебе́ ино́го не ве́мы.

Я́ко роса с Небес спа́дающи, явился еси,/ пре́лести зной разоряя словесы́ твоими.

Страх во чреве твое́м Боже́ственный заче́н,/ спасение породи́л еси заблу́ждшим, апостоле.

На гору возшед, всеблаженне, добродетелей,/ всем Евангелие Царствия проповедал еси.

Богоро́дичен:

Марие, Богородице Безневестная,/ надежды врагов су́етны сотвори/ и поющия Тя возвесели.

Песнь 6

Ирмо́с: Ризу мне подаждь све́тлу,/ одеяйся Светом, я́ко ризою,/ Многомилостиве Христе Боже наш.

Мудрости чашу испи́в,/ напои́л еси всех позна́ния Спаса Христа,/ Луко́ всемудре.

Павлу соисхо́дник избрався, Луко́ всеблаженне,/ язы́ки уловил еси мре́жею, Богоглагольниче,/ догма́тов твоих.

Облак, тучу жизни нам одождя́ющь, явился еси, апостоле,/ от исто́чник спасения истекающую.

Богоро́дичен:

Куми́ров Разрушитель я́ко Бог/ бывшее Рождество Твое́, Марие Богоневесто,/ покланяемо есть со Отцем и Духом.

Конда́к, глас 2:

Подо́бен: Твердыя:

Истиннаго благочестия проповедника/ и таин неизреченных ри́тора,/ звезду церковную, Луку́ Божественнаго восхва́лим:/ Слово бо его избра́, с Павлом мудрым язы́ков учителя,/ Един ведый сердечная.

Икос:

Знанием обогати́вся Го́рнейшим от руки́ Владычни,/ вруче́н был еси язы́ков жребиоиму́ществу, всехвальне./ Тем, житие распали́в Словом, страна́м законоположник, Луко́, явился еси, па́че Моисея:/ перстом Божиим, я́ко скрижа́ли Богоначертанныя, тобою сложи́вшася Духом, Божественную уяснил еси веру./ Тем и Христос тя прослави, Един ведый сердечная.

Песнь 7

Ирмо́с: Отроцы Богочестивии в Вавилоне/ о́бразу злато́му не поклони́шася,/ но посреде́ пещи огненныя ороша́еми,/ песнь воспеваху, глаголюще:/ превозносимый отцев и нас Боже, благословен еси.

Ученик неизрече́нных та́ин Христа Бога ве́рен быв,/ Евангелие Сего Боже́ственное проповедал еси верным, всемудре, глаголющим:/ превозносимый отцев и нас Боже, благословен еси.

Утворе́нии добродетелей укра́шен явился еси, Луко́ всеблаженне,/ Божественнаго благолепия заря́ми просвещаемь,/ и вопия́ непрестанно Творцу твое́му:/ превозносимый отцев и нас Боже, благословен еси.

Испуща́я светоносныя лучи́, я́коже в нощи́ заря являемь,/ пре́лести тьму сиянием слове́с твоих,/ благочестно взывая, отгнал еси:/ превозносимый отцев и нас Боже, благословен еси.

Богоро́дичен:

Имея житие́, словом, Боговидче, мудрости просвеще́но, Луко́,/ Девы Рождество я́вственно исписал еси и иконами любезно вообразил еси:/ Ейже покланяемся верно, Христа славяще.

Песнь 8

Ирмо́с: На горе святей прославльшася/ и в купине́ огне́м/ Приснодевы Моисеови тайну явльшаго,/ Господа пойте/ и превозносите во вся веки.

Росодательною мудростию слове́с твоих/ и ту́чами благодати Божественныя прелести пещь погаси́л еси,/ вестник Господень и священнопропове́дник, Богомудре, быв.

Я́ко красныя но́ги твоя, всеблаженне,/ мир благовествующаго,/ всяк ум преизвестно преиму́щь,/ Eгoже превозно́сим и славосло́вим во веки вся.

Свет мира просвеща́ти во тьме седя́щия/ яви́ тя Христос, о́тча Существа Сияние, Господь Славы,/ Егoже превозносим во веки.

Богоро́дичен:

Во утробе вселившагося Девы/ и от Нея страшно и па́че сло́ва/ древняго Адама обновившаго Господа поем и славословим во веки.

Песнь 9

Ирмо́с: Тя, Неискусобрачную Матерь Бога Вышняго,/ Тя, па́че ума́ рождшую Сло́вом воистину Бога,/ вышшую Пречистых сил,/ немо́лчными славословле́нии величаем.

Проповедник был еси всемирнаго спасения Евангельским пропове́данием,/ священная же и благознамени́тая труба́,/ вдохновением ды́шущи Духа, показался еси,/ священноглаго́льниче всече́стне.

Деянии украша́емь Спасовых апостолов,/ сия от Бога подви́жим, верным написал еси,/ я́коже образ одушевленный, присно пребывающь, объяви́в,/ священнопроповедниче всеславне.

Стал еси убо, Луко́, я́коже пости́г, Богоначальниче, желаний кра́йнейшее,/ Христу бо предстал еси,/ подае́маго от Него насыщаяся Боговидения./ Темже тя вси ублажаем.

Богоро́дичен:

Тя, Неприступнаго Бога носившую на объя́тиих,/ на Небесех поемаго от всякия силы/ и Тобою нам да́рующа всегда спасение,/ Богомати, величаем.

Светилен.

Подо́бен: Со ученики:

Луко́, Христов апостоле, таи́нниче неизрече́нных и язы́ков учителю/ с Павлом Божественным и Пречистою Богородицею,/ Еяже Божественную икону от любве́ изобрази́л еси,/ моли, Боговидче, о нас, блажа́щих тя/ и совершающих священное твое́ успе́ние, всемудре тайноглаго́льниче.

Сла́ва, ин.

Подо́бен: Духом во святи́лищи:

Я́ко ученика благодати и спосле́дователя Павлова,/ и словопи́сца изя́щнейша Божественнаго Евангелия похва́лим;/ Слова бо воплоще́ние и вочелове́чение, и Стра́сти, блаженне, пропове́дал еси./ Тем сошедшеся верно, Луко́, достойно тя почита́ем.

И ны́не, Богоро́дичен:

Неизрече́нно бысть рождение Пренепорочныя Невесты,/ я́ко бывши чисте́йший храм, Богородице,/ Советом бо Преве́чным в Тя Все́льшася,/ родила́ еси Бога Сло́ва./ Тем поюще Рождество Твое́,/ величаем достойно, Всенепорочная.

На хвалитех стихиры, на 4, глас 1.

Подо́бен: Облак Тя света:

Христова ученика, Евангелия списа́теля мудре́йша,/ сосу́да избра́нна кра́сна,/ образ одушевле́н, ве́рнии,/ егoже во всех це́рквах похвала́,/ Луку́ апостола в пе́снех почтим,/ той бо пропове́да Божия преславная чудеса,/ просвети́в яже на земли́ Богословия луча́ми,/ благости ра́ди.

Душ врачевству́, па́че теле́с научи́вся хитрости, мудре,/ и обою́ду вседо́бр показался еси,/ Божиею мудростию вдохнове́н;/ еюже врачу́я ду́ши же и телеса, Луко́ всеблаженне,/ призываеши к познанию, восперя́еши к желанию Божию,/ человеки всегда возво́диши на Небо,/ и о всех мо́лишися, восхваляющих тя.

Удицею слове́сною,/ яже во глубине́ неве́дения,/ я́ко ры́бы, внутрь вше́дшия,/ привлекл еси к познанию Божию;/ Христу пищу добру́ принесл еси, всеблаженне,/ честь достодо́лжную, жизнь нетле́нную, Луко́ священнейший./ Тем и апостол Христов был еси, мудрый благовестник,/ сказа́тель де́ятельных дел благодати.

Глас 8. Лео́нта маги́стра:

Прииди́те, вся тварь,/ истинно врача́ духовнаго/ и Спасова ученика, Луку́ приснопамятнаго,/ песньми похва́лим:/ сей бо безбожия неду́г/ пома́занием Христовы купе́ли уврачева́,/ и река́ми Боготочных вод от уст,/ одушевле́нная се́ла Евангелия напои́./ Тем изы́де пророчески веща́ние его во вселенную,/ и молится спасти́ся душа́м нашим.

Сла́ва, глас тойже:

Дави́дски, соше́дшеся, ве́рнии,/ в пе́снех тайному вити́и Сло́ва, Луце́ воззовем:/ язык твой трость пи́сменника яви́ся,/ Христа Скорописца украша́я зра́ки,/ к разуму язы́ков Божественнаго позна́ния;/ в немже пропове́дал еси Евангелие/ и ку́пно апостолов Деяния списа́в./ Тем, предстоя Троице и Бо́гу,/ молися о душах наших.

И ны́не, Богоро́дичен:

Владычице, приими́ молитвы раб Твоих/ и изба́ви нас/ от всякия ну́жды и печали.

Славословие великое и отпуст.

На Литургии: Блаженны, от канона апостола песни 3-я и 6-я. Прокимен, глас 8: Во всю землю изы́де веща́ние их и в концы вселенныя глаголы их. Стих: Небеса пове́дают славу Божию: Апостол к Колосса́ем, зачало 260, от полу́. Аллилуия, глас 1: Испове́дят Небеса чудеса Твоя, Го́споди: Евангелие от Луки, зачало 51. Причастен: Во всю землю изы́де вещание их:

Службу зри 9 сентября

Тропа́рь, глас 5:

Я́ко постников удобрение и отцев красоту,/ милости подателя, разсуждения светильника,/ вси ве́рнии, сошедшеся, восхвалим/ кротости учителя и ересей посрамителя,/ премудраго Иосифа, Российскую звезду,/ молящася Господу/ помиловатися душам нашим.

Конда́к, глас 8.

Подо́бен: Взбранной:

Жития треволнения, и мятеж мирский,/ и страстная взыграния в ничтоже вменив,/ пустынный гражданин показался еси,/ многих быв наставник, Иосифе преподобне:/ монахов собратель и молебник верен,/ чистоты рачитель,/ моли Христа Бога спастися душам нашим.

Молитва

О преблаженне и приснославне отче наш Иосифе! Ве́дуще твое́ великое к Бо́гу дерзновение и ко твое́му твердому заступлению прибегающе, в сокрушении сердца молим тя: озари нас светом дарованныя тебе́ благодати и моли́твами твоими помози нам бурное море жития сего безмятежно прейти и пристанища спасения неблазненно достигнути. Се бо, суетными порабощени суще, грехолюбиви же и немощни от обышедших нас зол возникнути являющеся, к кому прибегнем, аще не к тебе́, явившему неоскудеваемое богатство милости в земнем житии твое́м. Веруем же, я́ко и по отшествии твое́м множа́йшее стяжал еси дарование, еже о бедствующих милосердовати. Темже убо ны́не, к тебе́ прибегающе, умиленно просим тя, святче Божий: сам искушен быв, помози и нам искушаемым; постом и бдением поправый силу демонскую, и нас от нападений вражиих защити; препитавый гладом погибающия, и нам испроси у Господа изобилие плодов земных и вся ко спасению потребная; посрамивый еретическая мудрования, Церковь Святую от ересей и расколов и смущений моли́твами твоими огради, да тожде мудрствуем вси, единым сердцем славяще Святую, Единосущную, Животворящую и Нераздельную Троицу, Отца, и Сына, и Свята́го Духа во веки веков. Аминь.