Молебные пения на различные потребы

Последование молебного пения на всякое прошение

По обычном начале псалом 142:

Господи, услыши молитву мою, внуши моление мое во истине Твоей, услыши мя в правде Твоей: и не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой, посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делex Твоих, в творениих руку Твоею поучахся. Воздех к Тебе руце мои, душа моя яко земля безводная Тебе. Скоро услыши мя, Господи, исчезе дух мой: не отврати лица Твоего от Мене и уподоблюся нисходящим в ров. Слышану сотвори мне заутра милость Твою, яко на Тя уповах. Скажи мне, Господи, путь воньже пойду, яко к Тебе взях душу мою. Изми мя от враг моих, Господи, к Тебе прибегох, научи мя творити волю Твою, яко Ты еси Бог мой, Дух Твой Благий наставит мя на землю праву. Имене Твоего ради, Господи, живиши мя, правдою Твоею изведеши от печали душу мою. И милостию Твоею потребиши враги моя, и погубиши вся стужающия души моей, яко аз раб Твой есмь.

Слава, и ныне. Аллилуия (трижды).

На Бог Господь тропари, глас 6:

Помилуй нас, Господи, помилуй нас, всякаго бо ответа недоумеюще, сию Ти молитву яко Владыце, грешнии приносим: помилуй нас.

Слава. Господи, помилуй нас, на Тя бо уповахом, не прогневайся на ны зело, ниже помяни беззаконий наших, но призри и ныне яко Благоутробен, и избави нас от враг наших, Ты бо еси Бог наш, и мы людие Твои, вси дела руку Твоею, и имя Твое призываем.

И ныне. Милосердия двери отверзи нам, благословенная Богородице, надеющиися на Тя да не погибнем, но да избавимся Тобою от бед, Ты бо еси спасение рода христианскаго.

Псалом избранный:

Внегда призвати ми, услыша мя Бог правды моея; ущедри мя и услыши молитву мою (4/2). Услыши, Боже, моление мое (60/2). Боже в помощь мою вонми, Господи, помощи ми потщися (69/2). Воньже аще день призову Тя, скоро услыши мя (137/3). Аще не Господь созиждет дом, всуе трудишася зиждущии (126/1). Близ Господь всем призывающим Его, всем призывающим Его во истине; волю боящихся Его сотворит и молитву их услышит (144/18–19), и поможет им Господь (36/40). Услышит тя Господь, послет ти помощь от Святаго; даст ти Господь по сердцу твоему и весь совет твой исполнит. Исполнит Господь вся прошения твоя (19/2, 3, 5, 6). Не остави мене, Господи Боже мой, не отступи от Мене, вонми в помощь мою (37/22–23), во еже помощи ми вонми (39/14). И буди светлость Господа Бога нашего на нас и дела рук наших исправи на нас, и дело рук наших исправи (89/17).

На каноне припев: Милостиве Господи, услыши молитву paбов Твоих, молящихся Тебе (раба Твоего, молящегося Тебе), (рабы Твоея, молящейся Тебе).

По 3-й песни катавасия:

Услыши молитву рабов Твоих, молящихся Тебе, Владыко наш Господи, яко мы усердно к Тебе прибегаем, ко Отцу и Сыну и Святому Духу, в Троице Святой славимому Богу, Помощнику нашему.

Ектения сугубая.

Помилуй нас, Боже:

Призри, Владыко Человеколюбче милостивым Твоим оком на рабов Твоих (раба Твоего, рабy Твою) (имя рек) и услыши моления наша с верою приносимая, яко Сам рекл еси: вся, елика молящеся просите, веруйте, яко приимете, и будет вам. Сего ради и мы, аще и недостойнии, уповающе на милость Твою, просим: подаждь благость рабам Твоим (рабу Твоему, рабе Твоей) (имя рек) и исполни благая желания их (его, ея), мирно же и тихо во здравии и долгоденствии вся дни их (его, ея) соблюди, рцем вси: скоро услыши милостивно помилуй.

Возглас: Яко милостив:

По 6-й песни и катавасии ектения малая.

Прокимен, глас 4:

Господи, услыши молитву мою, приими моление мое.

Стих: Скоро услыши мя, Господи.

Евангелие от Матфея, зач. 20 от полу (7, 7–11).

Рече Господь: просите, и дастся вам; ищите, и обрящете; толцыте, и отверзется вам. Всяк бо просяй приемлет, и ищай обретает, и толкущему отверзется. Или кто есть от вас человек, егоже аще вопросит сын его хлеба, еда камень подаст ему? Или аще рыбы просит, еда змию подаст ему? Аще убо вы, лукави суще, умеете даяния блага даяти чадом вашим, кольми паче Отец ваш Небесный даст блага просящим у Него.

Или от Марка, зач. 51 (11, 23–26).

Рече Господь Своим учеником: имейте веру Божию. Аминь бо глаголю вам, яко иже аще речет горе сей, двигнися, и верзися в море: и не размыслит в сердце своем, но веру имет, яко еже глаголет, бывает: будет ему, еже аще речет. Сего ради глаголю вам: вся, елика аще молящеся просите, веруйте, яко приемлете: и будет вам; и егда стоите молящеся, отпущайте, аще что имате на кого: да и Отец ваш, Иже есть на Небесех, отпустит вам согрешения ваша. Аще ли же вы не отпущаете, ни Отец ваш, Иже есть на Небесех, отпустит вам согрешений ваших.

Или от Луки, зач. 88 (18, 2–8).

Рече Господь притчу сию: судия бе некий в некоем граде, Бога не бояся, и человек не срамляяся. Вдова же некая бе во граде том, и прихождаеши к нему, глаголющи: отмсти мене от соперника моего. И не хотяше на долзе времени: последи же рече в себе: аще и Бога не боюся, и человек не срамляюся, но зане творит им труды вдовица сия, отмщу ея: да не до конца приходящи застоит мене. Рече же Господь: слышите, что судия неправды глаголет? Бог же не имать ли сотворити отмщение избранных Своих, вопиющих к Нему день и нощь, и долготерпя о них? Глаголю; вам, яко сотворит отмщение их вскоре.

По Отче наш: Тропари: Помилуй нас, Господи: и прочие.

Ектения сугубая.

Помилуй нас, Боже:

Еще молимся Тебе, Господу Богу нашему, еже услышатися. гласу моления нашего и молитве, и помиловати рабов Твоих (раба Твоего, рабу Твою) (имя рек), благодатию и щедротами Твоими, и исполнити вся прошения их (его, ея) и простити им (ему, ей) вся согрешения вольная и невольная, благоприятным же быти мольбам и милостыням их (его, ея) пред престолом владычества Твоего, и покрыти их (его, ее) от всех врагов их видимых и невидимых, от всякой напасти, беды и скорби и недугов избавити, и подати здравие с долгоденствием, рцем вси, Господи, услыши и помилуй.

Возглас: Услыши ны, Боже:

И молитва:

Господи Иисусе Христe, Сыне Божий! Ты рекл еси пречистыми устами Твоими, яко без Мене не можете творити ничтоже. Господи наш, Господи! Верою объемлюще в душах и сердцах наших Тобою реченная, припадаем Твоей благости: помоги рабам Твоим (рабу Твоему, рабе Твоей) желаемое ими о Тебе Самом совершити. Ты бо еси всесильный Помощник всем с верою у тебе помощи просящим, и Тебе славу вси возсылаем, купно и Безначальному Твоему Отцу и Святому Духу, ныне в присно и во веки веков. Аминь.

На отпусте поминаются святые, в тот день празднуемые.

Последование молебного пения перед началом дела

По обычном начале псалом 142: Господи, услыши молитву мою:

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О еже благословити доброе намерение рабов Своих (раба Своего, рабы Своея) (имя рек), да благополучно предположенное ими (им, ею) начнут (начнет) и спешно без всякаго препятствия во славу Божию совершат (совершит), Господу помолимся.

О еже подати им (ему, ей) силу к совершению желаемаго ими (им, ею), Господу помолимся.

О еже благопоспешество во исполнение их (его, ея) благаго намрения подати, Господу помолимся.

О еже приставити делу, ими (им, ею) начинаемому, Ангела Хранителя, да отразит все козни врагов видимых и невидимых, Господу помолимся.

О избавитися нам:

Заступи, спаси, помилуй:

Пресвятую, Пречистую:

Возглас: Яко подобает:

На Бог Господь тропарь, глас 2:

Творче и Создателю всего, Боже, доброе намерение рабов Твоих (раба Твоего, рабы Твоея) Твоим благословением к Твоея славе спешно исправи, и от всякаго зла избави, молитвами Богородицы, Едине Всесильне и Человеколюбче. (Дважды.)

Слава, и ныне. Тойже.

Псалом избранный: Внегда призвати ми:

На каноне припев:

Милостиве Господи, помоги рабам Твоим (рабу Твоему, рабе Твоей).

По 3-й песни катавасия:

Помоги, Милостиве, рабам Твоим (рабу Твоему, рабе Твоей) в деле, ими начинаемом, яко мы усердно к Тебе, Всемогущему Помощнику, прибегаем и Твоея помощи во исполнение намерения их (его, ея) просим.

Ектения сугубая:

Помилуй нас, Боже:

Призри, Человеколюбче, милостивым Твоим оком на рабов Твоих (раба Твоего, рабу Твою) (имя рек), к Тебе с верою припадающих (припадающаго, припадающую) и услыши моления их (его, ея), благое намерение и дело их (его, ея) благослови и благополучно начати и спешно без всякаго препятствия во славу Твою совершити помоги, яко всесильному Царю, молимся Тебе, услыши и помилуй.

Во всем поспешествуя во благое, Господи, милостивно, и рабам Твоим (рабу Твоему, рабе Твоей) нами Тебе молящимся (молящемуcя, молящейся), поспешествуй, Спасе, и дело ими (им, ею) начинаемое, благополучно совершити помози, молимся Тебе, Всемогущий Владыко, услыши и помилуй.

Ангела Твоего Хранителя пристави делу сему, Благоуветливе Господи, да отразит все препятствия от видимых и невидимых врагов, и делающим во всем да поможет к благополучному совершению, молимся Тебе, Преблагий Господи, услыши и помилуй.

Возглас: Яко милостив:

По 6-й песни и катавасии, ектения малая.

Кондак, глас 6:

Скорый в заступление и крепкий в помощь, предстани благодатию силы Твоея ныне, и, благословив, укрепи, и к славе Твоея дело, рабами Твоими (рабом Твоим, рабою Твоею) начинаемое, в совершение произведи, вся бо елика хощеши, яко сильный Бог творити можеши.

Прокимен, глас 4:

Буди светлость Господа Бога нашего на нас, и дела рук наших исправи.

Стих: И призри на рабы Твоя и на дела Твоя.

Евангелие от Матфея, зач. 20 от полу (7, 7–11).

По Достойно есть: и Отче наш:

Тропарь: Творче и Создателю:

Слава. Кондак: Скорый в заступление:

И ныне. Богородичен: Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас верно зовущих Ти, ускори на молитву и потщися, на умоление, предстательствующи присно, Богородице, чтущих Tя.

Ектения сугубая:

Помилуй наc, Боже:

Во славу Твою все творити повелеваяй, Господи, рабам Твоим (рабу Твоему, paбе Твоей), к Твоей славе дело свое начинающим (начинающему, начинающей) благословением Твоим поспешество к совершению подаждь, здравие им (ему, ей) со благоденствием даруя, молимся Тебе, Вседаровитый Творче, услыши и помилуй.

Еще молимся и о еже услышати Господу Богу:

Возглас: Услыши нас, Боже:

Молитва

Господи Иисусе Христе Боже наш! Приими усердное моление наше и благослови благое намерение рабов Твоих (раба Твоего, рабы Твоей), да благополучно предположенное ими (им, ею) начнут (начнет) и без всякаго препятствия к Твоея славе совершат (совершит); делателям же благопоспеши и дела рук их исправи и в совершение силою Пресвятаго Твоего Духа успешно произведи. Ты бо еси во всем потребном нам, и в добрых делах наших Помощник наш Всемогущий, Боже наш, и Тебе славу возсылаем со Безнальным Твоим Отцем и Пресвятым Духом, ныне и присно и во веки веков.

Иная молитва в сборнике молитв протоиерея A. Ставровскаго.

Последование молебного пения о недугущих

По обычном начале псaлoм избранный:

На Тя, Господи, уповах, да не постыжуся в век. Приклони ко мне ухо Твое и спаси мя. Буди ми в Бога Защитителя и в место крепко спасти мя, яко утверждение мое и прибежище мое еси Ты (70/1, 2, 3). Господи, да не яростию Твоею обличиши мене, ни гневом Твоим накажеши мене; яко стрелы Твои унзоша во мне и утвердил еси на мне руку Твою. Несть исцеления в плоти моей от лица гнева Твоего. Несть мира в костях моих от лица грехов моих, яко беззакония мои превзыдоша главу мою, яко бремя тяжкое отяготеша на мне. Возсмердеша и согниша раны мои от лица безумия моего, пострадах и слякохся до конца; и несть исцеления в плоти моей. Остави мя сила моя (37/2–7, 8, 11). Помилуй мя, Господи, яко скорблю, смятеся яростию око мое, душа моя и утроба моя, яко исчезе в болезни жизнь моя (30/10–11). Болезнь моя предо мною есть (37/18). Боляй есмь аз, спасение Твое, Боже, да приимет мя (68/30). Одержаша мя болезни смертныя, болезни адовы обыдоша мя, предвариша мя сети смepтныя. И внегда скорбети ми, призвах Господа, и к Богу моему воззвах (17/5–7). Скорбь и болезнь обретох и имя Господне призвах (114/3). Помилуй мя, Господи, яко смятошася кости мои, и душа моя смятеся зело (6/3–4). Отстави от Мене раны Твои, от крепости бо руки Твоея aз исчезох (38/11). Господи, помилуй мя, исцели душу мою, яко согреших Teбe (40/5). Услыши молитву мою, Господи, и моление мое приими, слез моих не премолчи, яко пресельник аз есмь у тебе и пришлец, яко вси отцы мои (38/13). Внегда оскудевати крепости моей, не остави мене, и даже до старости и престарения, Боже мой, не остави мене (70/9, 18). Ослаби ми да почию, прежде даже не отыду и уже не буду (38/14) По множеству болезней моих в сердце моем, утешения Твоя возвеселиша душу мою (93/19). Благо есть надеятися на Господа, нежели надеятися на человека (117/8). Благослови, душе моя, Господа, исцеляющего все недуги твои (102/1, 3).

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О еже простити всякое прегрешение вольное и невольное рабов Своих (раба, Своего, рабы Своея) (имя рек), и милостиву им (ему, ей) быти, Господу помолимся.

О еже благосердия ради милости Своея грехов юности и неведения их (его, ея) не помянути, но милостивно здравие им (ему, ей) даровати, Господу. помолимся.

О еже не презрети прилежное моление рабов Своих (раба. Своего, рабы Своея), нами ныне молящихся (молящегося, молящейся), но милостивно услышати и Благоуветливу и Человеколюбцу им (ему, ей) быти, Господу помолимся.

О еже якоже некогда расслабленнаго словом Божественной Своей благодати недугующих рабов Своих (недугующего раба Своего, недугующую рабу Свою) от одра9 болезни скоро воздвигнути и здравых (здрава, здраву) сотворити, Господу помолимся.

О еже посетити рабов Своих (раба Своего, рабу Свою) посещением Святаго Своего Духа, и исцелити всякий недуг и всякую болезнь в них (в ней, в нем) гнездящуюся, Господу помолимся.

О еже милостивно, якоже хананеянку, услышати глас молитвы нас недостойных рабов Своих, к Нему вопиющих, и якоже той дщерь помиловати и исцелити болящих рабов Своих (болящего раба Своего, болящую рабу Свою) (имя рек), Господу помолимся.

О избавитися нам:

Зacтупи, спаси, помилуй:

Пресвятую, Пречистую:

Возглас: Яко Бог милости и щедрот и человеколюбия еси, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

На Бог Господь:

Тропарь, глас 4:

Скорый в заступлении един сый, Христе, скорое свыше покажи посещение страждущим рабам Твоим (страждущему рабу Твоему, страждущей рабе Твоей), избави от недуг и горьких болезней; и воздвигни во еже пети Тя и славити непрестанно, молитвами Богородицы, Едине Человеколюбче. (Дважды.)

Слава, и ныне. Тойже.

Псалом 50.

Канон10 глас 3:

Песнь 1

Ирмос: Пресекаемое море:

Запев: Милостиве Господи, исцели болящаго раба Твоего (болящих рабов Твоих, болящую рабу Твою).

В день печали, нашедшей на нас, к Тебе, Христе Спасе, припадающе, Твоея милости просим: облегчи болезнь рабов Твоих (раба Твоего, рабы Твоей), изреки нам, якоже и сотнику: иди, се здрав есть отрок твой.

Милостиве Господи, исцели болящего раба Твоего.

Мольбы и моления с воздыханием приносим Тебе, Сыне Божий, и вопием: помилуй нас, воздвигни лежащих (лежащего, лежащую) на одре (или: исцели болящих, болящего, болящую), возглаголи им (ему, ей), яко разслабленному древле: возьми одр твой, отпущаются тебе грехи твои.

Слава. Твоего, Христе, образа подобию покланяющеся, верою сие целуем, и болящим (болящему, болящей) здравия просим, подражающе кровоточивой, яже краю ризы Твоея коснуся и исцеление недуга прият.

И ныне. Пресвятая Госпоже Богородице, всем скорая Помощница, не презри нас, к Тебе припадающих, моли яко благая, Твоего Сына и Бога нашего, дати здравие болящим (болящему, болящей), да Тя с нами прославляют (прославляет).

Песнь 3

Ирмос: Иже от не сущих:

Милостиве Господи, исцели болящего раба Твоего.

Тяжкою болезнию одержимые (одержимый, одержимая) к Тебе, Христе, с нами вопиют (вопиет): подаждь здравие телеси, якоже Езекии, плакавшему пред Тобою.

Милостиве Господи, исцели болящаго раба Твоего.

Призри Господи, на наше смирение и не помяни беззаконий наших, но веры ради болящих (болящего, болящей), яко древле прокаженнаго, словом исцели их (его, ея) болезнь, да Твое, Христе, славится имя.

Слава. Не даждь, Христе, поношения на Церковь, юже eси освятил, но ради приносимых в ней молитв воздвигни в недузе на одре лежащих (лежащаго, лежащую), да не рекут невернии: где есть Бог их.

И ныне. К Твоему, Пречистая Богородице, образу руки воздеюще, вопием: услыши рабов Твоих молитву, и спаси в болезни лежащих (лежащаго, лежащую), да от болезни воставше воздадут (востав, воздаст) обеты, яже в печали глаголаша уста их (его, ея).

По 3-й песни катавасия:

Исцели болящих рабов Твоих (болящаго раба Твоего, болящую рабу Твою), Милостиве, яко мы усердно к Тебе прибегаем, яко ко Всемилостивому Врачу и всех недугов Целителю.

Ектения сугубая:

Помилуй нас, Боже:

Не хотяй смерти грешных, но да обратятся и живи будут, пощади и помилуй, Милостиве, рабов Твоих (раба Твоего, рабу Твою) (имя рек), запрети болезни, остави всю страсть и весь недуг, и простри крепкую Твою руку и, якоже Иаирову дщерь, от одра болезни воздвигни и здравых (здрава, здраву) сотвори, молимся Тебе, услыши и помилуй.

Огненную болезнь Петровой тещи прикосновением Твоим исцеливый и ныне люте страждущих рабов Твоих (страждущаго раба Твоего, страждущей рабы Твоей) болезнь благосердием Твоим исцели, здравие им (ему, ей) скоро подавая, прилежно молимся Тебе, Источниче цельбам, услыши и помилуй.

Езекиины слезы, Манассиино и Ниневитан покаяние и Давидово исповедание приемый и скоро тех помиловавый, и наша во умилении приносимыя Тебе мольбы приими, Всеблагий Царю, и яко Щедр помилуй люте болящих рабов Твоих (болящаго раба Твоего, болящую рабу Твою), здравие им (ему, ей), даруя, прилежно молимся Тебе, Источниче жизни и бессмертия, услыши, и скоро помилуй.

Возглас: Яко милостив:

Седален, глас 8:

Якоже древле воздвигл еси Петрову тещу и спасл еси расслабленнаго, носимаго со одром, тако и ныне посети, Милостиве, болящих (болящаго, болящую), на одре греховнем лежащих (лежащаго, лежащую) и страстьми уязвленных (уязвленнаго, уязвленную). Ты бо еси понесый недуги рода нашего, Тебе единаго вемы терпеливаго и милостиваго врача душ и телес наших, Христа Бога нашего, попускающаго недуги и паки исцеляющаго, подающаго прощение кающимся о согрешениях, Единаго милосердаго и многомилостиваго.

Слава. Болезнию одержимых (одержимому, одержимой) и на одре своем лежащим (лежащему, лежащей) облегчение подаждь, Христе Боже, и от болезни воздвигни, и яже от юности грехи совориша (сотворил есть, сотворила есть), прощение сих молитвами Богородицы даруй.

И ныне Умилосердися и спаси рабов Твоих (раба Твоего, рабу Твою), воздвигни их (его, сию) от одра болезни, сила бо их (его, ея) изнеможе, и вси (весь, вся) отчаянием одержими суть (одержим есть, одержима есть), Мати Божия Пречистая, исцели недугующих (недугующаго, недугующую) люте, Ты бо еси Помощница христианом.

Песнь 4

Ирмос: Положил еси к нам:

Милостиве Господи, исцели болящаго раба Твоего.

Уже лишившихся (лишившагося, лишившуюся) надежды на избавление от лютаго недуга, и к смерти приближавшихся (приближавшагося, приближавшуюся) возврати, Христе, на жизнь, и даждь плачущим утешение, да вси прославляем святые Твои чудеса.

Милостиве Господи, исцели болящаго раба Твоего.

Тебе, Творче, каемся в своих грехах; Ты же, не хотяй смерти грешника, оживи, даруй здравие болящим (болящему, болящей), да востав послужит Тебе, исповедая с нами Твою благость.

Слава. Слезы Манасиины, Ниневитян покаяние и Давидово исповедание прием, вскоре спасл еси их. И наши молитвы ныне приими, даждь здравие болящим (болящему, болящей), о них (нем, ней) же Тя молим

И ныне. Подаждь Твою милость, Госпоже, нам, всегда на Тя надеющимся, испроси здравие болящим (болящему, болящей), молебныя Твои руце, Богородице, ко Господу Богу простирающе.

Песнь 5

Ирмос: На земли невидимый явился:

Милостиве Господи, исцели болящаго раба Твоего.

Дщерь Иарову, уже умершую, яко Бог оживил еси; и ныне, Христе Боже, возведи от врат смертных болящих (болящего, болящую). Ты бо еси путь и жизнь всех.

Милостиве Господи, исцели болящаго раба Твоего.

Сына вдовицы оживив, Спасе, тоя слезы преложил еси на радость; и ныне спаси рабов Своих (раба Своего, рабу Свою) от недуга изнуряющаго, да и наша скорбь и болезнь на радость прейдет.

Слава. Огненную болезнь Петровой тещи прикосновением Твоим исцеливый, и ныне востави болящих рабов Твоих (болящего раба Твоего, болящую рабу Твою), да яко и она востав послужат (послужит) Ти.

И ныне. Скорбные, смиренные, грешные, не имущии дерзновения к Тебе, Пречистая Богомати, вопием: умоли Сына Своего, Христа Бога нашего, дати болящим (болящему, болящей) здравие телеси.

Песнь 6

Ирмос: Бездна последняя:

Милостиве Господи, исцели болящаго раба Твоего.

Бездну Милосердия и милости имея, Христе Боже, услыши моления рабов Твоих, чрез Петра Тавифу воскресивый, Ты и ныне в болезни лежащих (лежащаго, лежащую) исцели, улышав приносимыя Тебе в церкви молитвы.

Милостиве Господи, исцели болящаго раба Твоего.

Врачу душ и телес наших, понесый недуги всего мира, Христе, и Енея Павлом исцеливый, Ты и ныне болящих (болящего, болящую) исцели, святых апостол молитвами.

Слава. Преложи, Христе, на радость рыдание скорбящих о недужных (недужном, недужной), да Твою получивше милость, внидут в дом Твой со обетными дарами, славяще Тя, в Троице Единаго Бога.

И ныне. Приидите, о друзи, припадем к Божией Матери, молящеся о болящих (болящем, болящей). Та бо вкупе с безмездниками имеет власть недужных исцеляти, духовным невидимо помазающе елем.

Катавасия: Исцели болящих рабов Твоих (болящаго раба Твоего, болящую рабу Твою), Милостиве, яко мы усердно к Тебе прибегаем, яко ко Всемилостивому Врачу и всех недугов Целителю.

По 6-й песни и катавасии, ектения малая.

Кондак, глас 2:

Якоже древле воздвигл еси, Спасе, Петрову тещу и расслабленнаго, на одре носимаго, сице и ныне, Милосерде, облезнию одержимых (одержимаго, одержимую) и недугом ослабленных (ослабленнаго, ослабленную) посети и исцели. Ты бо Един еси недуги и болезни рода нашего понесый и вся могий, яко Многомилостив.

Прокимен, глас 7:

Помилуй мя, Господи, яко немощен есмь, и исцели мя, яко смятошася кости моя.

Стих: Яко несть в смерти поминаяй Тебе.

Евангелие от Матфея, зач. 25 (8, 5–13).

Во время оно, вшедшу Иисусу в Капернаум, приступи к Нему сотник, моля Его и глаголя: Господи, отрок мой лежит в дому ослаблен, люте стражда. И глагола ему Иисус: Аз пришед исцелю его. И отвещав сотник рече Ему: Господи, несмь достоин, да под кров мой внидеши: но токмо рцы слово, и исцелеет отрок мой. Ибо аз человек есмь под властию, имый под собою воины: и глаголю сему: иди, и идет. И другому: прииди, и приидет: и рабу моему: сотвори сие, и сотворит. Слышав же Иисус, удивися, и рече грядущим по Нем: аминь глаголю вам, ни во Израили толики веры обретох. Глаголю же вам, яко многози от восток и запад приидут, и возлягут со Авраамом, и Исааком, и Иаковом во Царствии Небеснем: сынове же Царствия изгнани будут во тьму кромешнюю: ту будет плачь и скрежет зубом. И рече Иисус сотнику: иди и якоже веровал еси, буди тебе. И исцеле отрок его в той час.

Слава. Отче, Сыне и Душе, Троице Святая, очисти множество согрешений наших.

И ныне. Молитвами Богородицы:

Помилуй мя Боже:

Стихира, глас 6:

Бесконечна есть святых благодать, еяжe от Христа прияти сподобишася; их имена, верою призываемыя, неисцельныя болезни исцеляют. Их предстательством, Господи, и болящих рабов Твоих (болящаго раба Твоего, болящую рабу Твою) от душевных и телесных недугов свободи, яко Человеколюбец.

Посем глаголет диакон:

Спаси, Боже, людей Твоих и благослови достояние Твое, посети мир Твой милостию и щедротами и возвыси рог христиан православных, исцели болящих и ниспосли на нас милости Твои богатыя, молитвами Всепречистыя Владычицы нашея Богородицы и Приснодевы Марии, силою Честнаго и Животворящего Креста, предстательством святых Ангелов Хранителей наших и прочих Небесных Сил бесплотных, честнаго славнаго пророка, Предтечи и Крестителя Иоанна, святаго славнаго всехвальнаго апостола и евангелиста Луки11 и прочих святых славных и всехвальных апостолов, святых славных добропобедных мучеников, преподобных и богоносных отцев наших, святаго благовернаго равноапостольнаго великаго князя Владимира; иже во святых отца нашего Ефрема, епископа Переяславскаго12, преподобных отец наших Агапита, врача безмезднаго13 и Пимена Многоболезненнаго14 Печерских, святаго (имя рек русских святых, в тот день празднуемых и ихже имена носят болящие) и всех святых в земле Русской просиявших; святых и исцелителей безсребреников Космы и Дамиана Римских15, Космы и Дамиана Асийских16, Кира и Иоанна17, Пантелеимона18 и Ермолая19, Сампсона20 и Диомида21, Фотия и Аникиты22, святаго праведнаго Иова Многострадальнаго23; святых (имя рек вселенских святых, в тот день празднуемых; и ихже имена носят болящие), святых праведных Богоотцев Иоакима и Анны, и всех святых, молим Тя, Многомилостиве Господи, услыши нас грешных молящихся Тебе и помилуй нас.

Певцы: Господи, помилуй (12).

Возглас: Милостию и щедротами:

Песнь 7

Ирмос: Прежде образу златому:

Милостиве Господи, исцели болящаго раба Твоего.

О, Кресте пресвятый Христов, жизни древо честное, тобою смерть погибе и мертвии воскресоша. И ныне болящих (болящаго, болящую) исцели и оживи, якоже при Елене оживил еси умершую девицу.

Милостиве Господи, исцели болящаго paба Твоего.

Долгую и лютую болезнь Иова, на гноищи и в червех молящегося Тебе, исцелил еси, Господи. Ныне же в церкви о болящих (болящем, болящей) молим Тя: яко Благ исцели их (его, ее) молитвами святых Твоих.

Слава. Вемы, яко всем нам умрети предстоит, Тебе Богу тако изволившему. Но на малое время, Милостиве, здравия просим болящим (болящему, болящей)! Премени от смерти на жизнь, даждь скорбящим утешение.

И ныне. Пособствуй и помогай нашему сиротству, Богородице. Ты бо веси время и час, когда умолити Сына Своего и Бога нашего, дати болящим (болящему, болящей) здравие и прощение от всех грехов.

Песнь 8

Ирмос: Служити Живому Богу:

Милостиве Господи, исцели болящаго раба Твоего.

Paбов Твоих (раба Твоего, рабу Твою) скоро исцели, Милостиве Христе Боже, и еще смерти не предаждь судней, да Тебе покаяние воздадут (воздаст). Сам бо рекл еси: не хощу смерти грешника.

Милостиве Господи, исцели болящаго раба Твоего.

Господи Милостиве, да достигнут и до нас Твоя преславныя чудеса: бесов прожени, недуги отгони, раны исцели, болезни уврачуй, и от чародеяний и от всякой язвы избави нас.

Слава. Запретивый, Христе, морским ветрам, и страх учеников на радость преложивый, запрети и ныне тяжким болезням, утруждающим рaбов Твоих (раба Твоего, рабу Твою), да все возвеселимся, хваляще Тя во веки.

И ныне. Избави Богородице, от обышедших нас печалей, от бед и скорбей и от всех различных недугов, отравы же и чародейства и бесовскаго мечтания, и от навета злых человек и от внезапной смерти, молимся.

Песнь 9

Ирмос: На Синайстей горе:

Милостиве Господи, исцели болящего раба Твоего.

Источниче жизни, Подателю, Христе, милости, не отврати лица Твоего от нас, облегчи болезнь утружденным (утружденному, утружденной) болезнию, и воздвигни их (eго, ее) яко Фаддеем Авгаря, да присно Тебя славят (славит) со Отцем и Святым Духом.

Милостиве Господи, исцели болящего раба Твоего.

Евангельскому верующе гласу, уповаем на Твое обещание, Христе: просите бо, рекл еси, и дастся вам. Тем ныне просим Тя: возстави со одра здравым поверженнаго лютым недугом, да Тя с нами вкупе величает.

Славa. Страждущий от недуга и внутренних невидимых ран Тебе, Христе, с нами вопиет: не ради нас, Господи, ибо вси мы исполнены грехов, но ради молитв Матери Твоея и Предтечи Твоего и всех святых даждь исцеление болящему, да Тя вси возвеличим.

И ныне. Божия Мати Пречистая, со всеми святыми, призывам Тя, со Ангелами и Архангелами, с пророками и патриархами, со апостолами и святителями, с преподобными и праведными, молися Христу Богу нашему дати здравие болящим (болящему, болящей), да Тя вси величием.

По 9-й песни: Достойно есть: Трисвятое. Отче наш: По возгласе тропарь: Слава, и ныне. Кондак.

Ектения сугубая:

Помилуй нас Боже:

Врачу душ и телес! Co умилением в сердце сокрушенном к Тебе припадаем и стеняще вопием Ти: исцели болезни, уврачуй страсти душ и телес (души и тела) рабов Твоих (раба Твоего, рабы Твоея) (имя рек) и прости им (ему, ей) яко Благосерд вся прегрешения вольная и невольная, и скоро воздвигни от одра болезни, молимся Тебе, услыши и помилуй.

Еще молимся и о еже услышати Господу Богу:

Возглас: Услыши ны, Боже:

Молитва

Владыко Вседержителю, Святый Царю, наказуяй и не умерщляяй, утверждаяй низпадающих и возводяяй низверженных, телесныя человеком скорби исцеляяй! Молимся Тебе, Боже наш, рабов Твоих (раба Твоего, рабу Твою) (имя рек) немощствующих (немощствующаго, немощствующую) посети милостию Твоею, прости им (ему, ей) всякое согрешение вольное и невольное. Ей, Господи, врачебную Твою силу с небесе ниспосли, прикоснися телеси, угаси огневицу, облегчи страдания, исцели всякую немощь таящуюся; буди врачом рабов Твоих (раба Твоего, рабы Твоея), воздвигни их (его, оную) от одра болезни и от ложа озлобления (1) целых и всесовершенных (цела и всесовершенна, целу и всесовершенну), даруй их (его, оную) Церкви Твоей благоугождающих и творящих (благоугождающа и творяща, благоугождающую и творящую) волю Твою. Тебе бо свойственно миловать и спасать нас, Боже наш, и Тебе славу возсылаем, Отцу и Сыну и Святому Духу, ныне и присно, и во веки веков. Аминь.

Иная молитва

Боже сильный милостию, строяй вся на спасение роду человеческому, посети раба Своего сего (имя рек), нарицающа имя Христа Твоего, исцели его от всякаго недуга плотскаго и душевнаго, и отпусти ему грехи и греховные соблазны, и всякую напасть, и всяко нашествие неприязненное далече сотвори от раба Твоего. И воздвигни от одра греховнаго, и устрой его во святую Твою церковь, здрава душою и телом, и делами добрыми, славящего со всеми людьми имя Христа Твоего. Яко Тебе славу возсылаем, с Собезначальным Твоим Сыном и со Святым Духом, ныне и присно и во веки веков. Аминь.

На отпусте поминаются святые, в тот день празднуемые и ихже имена носят болящие.

Иное последование молебного пения о недугующих (Без канона)

По обычном начале псалом избранный: На Тя, Господи, уповах:

Слава, и ныне. Аллилуия (трижды).

Посем Символ веры .

Ектения великая с ея прошениями.

По возгласе абие Бог Господь.

Тропарь, глас 4: Скорый в заступлении:

Слава, и ныне. Кондак, глас 2: Якоже древле:

Прокимен, глас 4: Помилуй мя, Господи, яко немощен есмь, исцели мя, яко смятошася кости моя.

Стих: Яко несть в смерти поминаяй Тебе.

Апостол: Соборнаго послания Иаковля, зач. 57 (5, 10–16).

Братие образ приимите злострадания и долготерпения, пророки, иже глаголаша именем Господним. Се блажим терпящия: терпение Иовле слышасте, и кончину Господню видесте, яко Многомилостив есть Господь и Щедр. Прежде же всех, братие моя, не кленитеся ни небом, ни землею, ни иною коею клятвою: буди же вам еже ей, ей и еже ни, ни: да не в лицемерие впадете. Злостраждет ли кто в вас, да молитву деет. Благодушествует ли кто, да поет. Болит ли кто в вас, да призовет пресвитеры церковныя, и да молитву сотворят над ним, помазавше его елеем во имя Господне. И молитва веры спасет болящего, и воздвигнет его Господь: и аще грехи будет сотворил, отпустятся ему. Исповедайте убо друг другу согрешения, и молитеся друг за друга, яко да исцелеете. Много бо может молитва праведнаго поспешествуема.

Аллилуия, глас 7.

Стих: Господи, да не яростию Твоею обличиши мене.

Стих: Спаси мя ради милости Твоея, Господи.

Евангелие от Матфея, зач. 25 (8, 5–13).

Во время оно, вшедшу Иисусу в Капернаум, приступи к Нему сотник, моля Его и глаголя: Господи, отрок мой лежит в дому ослаблен, люте стражда. И глагола ему Иисус: Аз пришед исцелю его. И отвещав сотник рече Ему: Господи, несмь достоин, да под кров мой внидеши: но токмо рцы слово, и исцелеет отрок мой. Ибо аз человек есмь под властию, имый под собою воины: и глаголю сему: иди, и идет. И другому: прииди, и приидет: и рабу моему: сотвори сие, и сотворит. Слышав же Иисус, удивися, и рече грядущим по Нем: аминь глаголю вам, ни во Израили толики веры обретох. Глаголю же вам, яко многози от восток и запад приидут, и возлягут со Авраамом, и Исааком, и Иаковом во Царствии Небеснем: сынове же Царствия изгнани будут во тьму кромешнюю: ту будет плачь и скрежет зубом. И рече Иисус сотнику: иди и якоже веровал еси, буди тебе. И исцеле отрок его в той час.

Ектения сугубая:

Помилуй нас Боже:

Врачу душ и телес:

Не хотяй смерти:

Огненную болезнь:

Езекиины слезы:

Возглас: Услыши ны, Боже:

Молитва и отпуст.

Псалом избранный, ектенийные прошения, тропарь, кондак и молитву см. выше.

Последование молебного пения о путешествиях

По обычном начале псалом избранный:

Господь просвещение мое и Спаситель мой, кого, убоюся? Господь Защититель жизни моея, от кого устрашуся (26/1)? Ибо Той Бог мой и Спас мой, Заступник мой, не подвижуся наипаче (61/3). От Господа стопы человеку исправляются и пути его восхощет зело (36/23). Боже мой, не удалися от Мене, Боже мой, в помощь мою вонми (70/12). Скажи мне, Господи, путь, воньже пойду, яко к Тебе взях душу мою (142/8). Стезю мою Ты еси изследовал и все пути мои провидел еси (138/3). Стопы моя направи (118/133), пути Твоя, Господи, скажи ми, и стезям Твоим научи мя (24/4). Вси путие мои пред Тобою, Господи (118/168). От всякаго пути лукава возбраних ногам моим (118/101). Исправи пред Тобою путь мой (5/9). На Бога уповах, не убоюся, что сотворит мне человек (55/12)? Аще бо и пойду посреде сени смертной, не убоюся зла, яко Ты со мною еси. Жезл Твой и палица Твоя, тии мя утешат (22/4). Рука Твоя наставит мя и удержит мя десница Твоя (138/10). Ополчится Ангел Господень окрест боящихся Его и избавит их (33/8). Открый ко Господу путь твой, и уповай на Него, и Той сотворит (36/5). Господь сохранит тя, Господь покров твой на руку десную твою. Господь сохранит вхождение твое и исхождение твое (120/5, 8).

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О еже помиловати рабов Своих (раба Своего, рабу Свою) и простите им (ему, ей) всякое прегрешение, вольное же и невольное, и благословите путешествие их (его, ея) Господу помолимся.

О еже послати им (ему, ей) Ангела мирна, спутника и наставника, сохраняюща, защищающа, заступающа и невредимо соблюдающая от всякаго злаго обстояния, Господу помолимся.

О еже покрыти рабов Своих (раба Своего, рабу Свою) и невредимых (невредима, невредиму) соблюсти от всех вражиих наветов и обстояний, и благополучно препроводити и возвратити24, Господу помолимся.

О еже безбедное и мирное путешествие и благополучное во здравии возвращение во всяком благочестии подати им (ему, ей), Господу помолимся.

O еже сохранити сих рабов Своих (сего раба Своего, сию рабу Свою) невредимыми и непреоборимыми (невредимым и непреоборимым, невредимой и непреоборимой) от всяких козней лукавых и невидимых врагов и от злобы лукавых людей, Господу помолимся.

О еже благословити благое их (его, ея) намерение и благополучно к пользе душевной и телесной устроити Своею благодатию, Господу помолимся.

О избавитися нам:

Заступи, спаси:

Пресвятую, Пречистую:

Возглас: Яко подобает:

На Бог Господь тропарь глас 2:

Путь и истина сый, Христе, спутника Ангела Твоего рабам Твоим (рабу Твоему, рабе Твоей) ныне, якоже древле Товии посли, сохраняюща, и невредимых (невредимаго, невредимую) к славе Твоей, от всякаго зла во всяком благополучии соблюдающа, молитвами Богородицы, Едине, Человеколюбче. (Дважды).

Слава, и ныне. Тойже.

Псалом 90: Живый в помощи:

На каноне припев:

Милостиве Господи, сохрани в пути рабов Твоих (раба Твоего, рабу Твою).

По 3-й и 6-й песни катавасия:

Благослови, Милостиве, исхождение и вхождение рабов Твоих (раба Твоего, рабы Твоея). Сам спутником, наставником и хранителем их (его, ея) буди, яко мы усердно к Тебе прибегаем, к Милостивому Владыке и на всех путях наших Хранителю.

Ектения сугубая.

Помилуй нас, Боже:

Стопы.человеческия исправляяй, Господи, призри милостивно на рабов Твоих (раба Твоего, рабу Твою) (имя рек) и простив им (ему, ей) всякое прегрешение вольное же и невольное, благослови благое намерение совета их (его, ея) и исходы и входы с путешествием благополучными соделай, прилежно молимся Тебе, услыши и помилуй.

Иосифа от озлобления братий его преславно свободивый и во Египет того приведый и благословением Твоея благости во всем благополучна сотворивый, и рабов Твоих (раба Твоего, рабу Твою) путешествовати хотящих (хотящаго, хотящую)25, благослови и шествие их (его, ея) безмятежно и благополучно сотвори, молимся Тебе, услыши и помилуй.

Исааку и Товии Ангела спутника пославый, и тем путешествие и возвращение их мирное и благополучное сотворивый, и ныне, Преблаже, Ангела мирна рабам Твоим (рабу Твоему, рабе Твоей) ныне Тебе молящимся (молящемуся, молящейся) посли, да наставит их (его, сию) на всякое дело благое и избавит от врагов видимых и невидимых и от всякаго злаго обстояния, во здравии же мирно и благополучно к славе Твоей возвратит26, усердно молимся Тебе, услыши и помилуй.

Возглас: Яко милостив:

По 6-й песни и катавасии ектения малая.

Кондак, глас 2:

Луце и Клеопе во Еммаус спутешествовавый, Спасе, сшествуй и ныне рабам Твоим (рабу Твоему, рабе Твоей) путешествовати хотящим (хотящему, хотящей), от всякаго избавляя злаго обстояния; вся бо Ты, яко Человеколюбец, можеши, аще токмо восхощеши.

Прокимен, глас 4:

Скажи ми, Господи, путь, воньже пойду, яко к Тебе взях душу мою.

Стих: Изми мя от враг моих Господи, к Тебе прибегох.

Евангелие от Иоанна, зач. 47 (14, 1–11).

Рече Господь Своим учеником: да не смущается сердце ваше: веруйте в Бога, и в Мя веруйте. В дому Отца Моего обители многи суть: аще ли же ни, рекл бых вам: иду уготовати место вам. И аще уготовлю место вам, паки прииду, и поиму вы к Себе: да идеже есмь Аз, и вы будете. И аможе Аз иду, весте, и путь весте. Глагола Ему Фома: Господи, не вемы, камо идеши, и како можем путь ведети? Глагола ему Иисус: Аз есмь путь и истина и живот: никтоже приидет ко Отцу, токмо Мною. Аще Мя бысте знали, и Отца Моего знали бысте убо: и отселе познасте Его и видесте Его. Глагола Ему Филипп: Господи, покажи нам Отца, и довлеет нам. Глагола ему Иисус: толико время с вами есмь, и не познал еси Мене Филиппе! Видевый Мене, виде Отца: и како ты глаголеши, покажи нам Отца? Не веруеши ли, яко Аз во Отце, и Отец во Мне есть? Глаголы, яже Аз глаголю вам, о Себе не глаголю: Отец же во Мне пребываяй, Той творит дела. Веруйте Мне, яко Аз во Отце и Отец во Мне.

По 9-й песни: Достойно есть: Трисвятое. Отче наш:

По возгласе

Тропарь, глас 2:

Путь и истина сый, Христе, спутника Ангела Твоего рабам Твоим (рабу Твоему, рабе Твоей) ныне, якоже древле Товии, посли сохраняюща и невредимых (невредимаго, невредимую), к славе Твоей, от всякаго зла во всяком благополучии соблодающа, молитвами Богородицы, Едине Человеколюбче.

Слава.

Кондак, глас 2:

Луце и Клеопе во Еммаус спутешествовавый, Спасе, сшествуй и ныне рабам Твоим (рабу Своему, рабе Твоей) путешествовати хотящим (хотящему, хотящей), от всякаго злаго обстояния избавляя; вся бо Ты, яко Человеколюбец, можеши, аще токмо восхощеши.

И ныне. Богородичен, глас 6:

Предстательство христиан непостыдное, ходатайство ко Творцу непреложное, не презри грешных молений гласы, но предвари яко Благая на помощь нас верно зовущих Тебе, ускори на молитву и потщися на умоление, предстательствующи, присно Богородице, чтущих Тя.

Ектения сугубая:

Помилуй нас Боже:

Луке и Клеопе во Еммаус спутешествовавый и весело во Иерусалим возврататися Твоим преславным познанием сотворивый, спутешествуй Твоею благодатию и Божественным благословением и ныне рабам Твоим (рабу Твоему, рабе Твоей ) (имя рек), нами Тебе прилежно молящимся (молящемуся, молящейся) и во всяком деле благом, к славе пресвятаго Твоего имени благопоспеши во здравии и благополучии соблюдая и возвращая во время благоподобно, яко Всещедрому Благодетелю молимся Тебе, скоро услыши и милостивно помилуй.

Еще молимся и о еже услышати:

Возглас: Услыши ны Боже:

Диакон: Паки и паки со умилением колена душ и телес наших преклоньше27, Господу помолимся

Певцы: Господи, помилуй (трижды).

Предстоятель чтет молитву:

Господи Иисусе Христе Боже наш, истинный и живый Путю, состранствовати названному Твоему отцу Иосифу и Твоей Пречистой Деве Матери во Египет изволивый и Луке и Клеопе во Еммаус спутешествовавый, и ныне, смиренно молим Тя, Владыко Пресвятый, и рабам Твоим сим (рабу Твоему сему, рабе Твоей сей) Твоею благодатию спутешествуй. И якоже рабу Твоему Товии Ангела Хранителя и наставника посли, сохраняюща и избавляюща их (его, сию) от всякаго злаго обстояния видимых и невидимых врагов, и ко исполнению заповедей Твоих наставляюща, мирно же и благополучно и здраво препровождающа и паки цело и безмятежно возвращающа, и даждь им (ему, ей) все благое свое намерение ко благоугождению Твоему, благополучно в славу Твою исполнити. Тебе бо свойственно миловати и спасати нас, и Тебе славу возсылаем со Безначальным Твоим Отцем и с Пресвятым и Благим и Животворящим Твоим Духом, ныне и присно и во веки веков. Аминь.

Отпуст:

Христос истинный Бог наш, молитвами Пречистыя Своея Матери, силою Честнаго и Животворящаго Креста; предстательством святых Ангелов Хранителей наших; святаго праведнаго Иосифа Обручника28; святых славных и всехвальных апостолов Иaкова брата Божия29, Луки и Клеопы30 и прочих святых славных и всехвальных апостолов, святаго праведнаго праведнаго Товии31, святаго благовернаго равноапостольнаго великаго Владимира, преподобнаго отца нашего Макария Унженскаго32, святаго (Русскаго святаго, в тот день празднуемаго) и всех прочих святых в земле Русской просиявших; святаго (вселенскаго святаго, в тот день празднуемаго); святых праведных Богоотцев Иоакима и Анны и всех святых, помилует и спасет нас яко Благ и Человеколюбец.

И дает иерей путешествующим лобызать святый крест и кропит их священною водою, глаголя:

Да благословит вас (тя) Господь от Сиона и узрите (узриши) благая Иерусалима во вся дни жизни вашей (твоей) и да исправит путь ваш (твой) в мире во славу святаго имени Своего. Аминь.

Иное последование молебного пения о путешестующих (без канона)

По обычном начале псалом избранный: Господь просвещение: (см. выше).

Слава, и ныне. Аллилуия (трижды).

Ектения великая с ея прошениями; Бог Господь:

Тропарь, глас 2:

Путь и истина сый, Христе, спутника Ангела Твоего рабам Твоим (рабу Твоему, рабе Твоей) ныне, якоже древле Товии, посли сохраняюща и невредимых (невредимаго, невредимую), к славе Твоей, от всякаго зла во всяком благополучии соблюдающа, молитвами Богородицы, Едине Человеколюбче.

Слава.

Кондак, глас 2:

Луце и Клеопе во Еммаус спутешествовавый, Спасе, сшествуй и ныне рабам Твоим (рабу Своему, рабе Твоей) путешествовати хотящим (хотящему, хотящей), от всякаго злаго обстояния избавляя; вся бо Ты, яко Человеколюбец, можеши, аще токмо восхощеши.

И ныне. Богородичен, глас 6:

Предстательство христиан непостыдное, ходатайство ко Творцу непреложное, не презри грешных молений гласы, но предвари яко Благая на помощь нас верно зовущих Тебе, ускори на молитву и потщися на умоление, предстательствующи, присно Богородице, чтущих Тя.

Прокимен, глас 4: Скажи мне, Господь, путь, воньже пойду, яко к Тебе взях душу мою.

Стих: Изми мя от врагов моих, Господи, к Тебе прибегох.

Апостол: Деяний, зач. 20 (8, 25–39).

Во дни оны Ангел Господень рече к Филиппу, глаголя: востани и иди на полудне, на путь сходящий от Иерусалима в Газу, и той есть пуст. И востав пойде: и се муж мурин, евнух, силен Кандакии царицы Муринския, иже бе над всеми сокровищи ея: иже прииде поклониться во Иерусалим. Бе же возвращаяся, и седя на колеснице своей, чтяше пророка Исаию. Рече же Дух к Филиппу: приступи и прилепися колеснице сей. Притек же Филипп, услыша его чтуща пророка Исаию, и рече: убо разумееши ли, яже чтеши? Он же рече: како убо могу разумети, аще не кто наставит мя? Умоли же Филиппа возшедша сести с ним. Слово же Писания, еже чтяше, бе сие: яко овча на заколение ведеся, и яко агнец прямо стригущему его безгласен, тако не отверзает уст Своих. Во смирении Его суд Его взятся: род же Его кто исповесть? яко вземлется от земли живот Его. Отвещав же каженик к Филиппу рече: молю тя, о ком пророк глаголет сие? о себе ли, или о ином некоем? Отверз же Филипп уста своя, и начен от Писания сего, благовести ему Иисуса. Якоже идяху путем, приидоша на некую воду и рече каженик: се вода. Что возбраняет мне креститися? Рече же Филипп: аще веруеши от всего сердца твоего, мощно ти есть. Отвещав же рече: верую Сына Божия быти Иисуса Христа. И повеле стати колеснице: и снидоста оба на воду, Филипп же и каженик, и крести его. Егда же изыдоста от воды, Дух Святый нападе на каженика. Ангел же Господень восхити Филиппа, и не виде его к тому каженик, идяше бо в путь свой радуяся.

Аллилуия, глас 1:

Стих: От Господа стопы человеку исправляются.

Стих: Открый ко Господу путь твой и уповай на Него, и Той сотворит.

Евангелие от Иоанна, зач. 47 (14, 1–11).

Ектения сугубая с прошениями.

Возглас: Усльши ны, Боже:.

Предстоятель чтет молитву и творит отпуст.

И дает иерей путешествующим лобызать святый крест и кропит их священною водою, глаголя:

Да благословит вас (тя) Господь от Сиона и узрите (узриши) блага Иерусалима во вся дни жизни вашей (твоей) и да исправит путь ваш (твой) в мире во славу святаго имени Своего. Аминь.

Псалом избранный, ектенийные прошения, Евангелие, молитву и отпуст смотри выше, в предыдущем последовании.

Последование молебного пения о хотящих по водам плыти

По обычном начале псалом избранный:

Исповедайтеся Господеви, яко Благ, яко в век милость Его. Кто возглаголет силы Господни? Слышаны сотворит вся хвалы Его (105/1–2)? Сотворшаго небо и землю, море и вся, яже в них (145/6). Боже сил, кто подобен Тебе (88/9)? Ты утвердил еси силою Твоею море (73/13). Ты владычествуеши державою морскою, возмущение же волн его Ты укрочаеши (88/10). Сходящии в море в кораблях, творящии делания в водах многих, тии видеша дела Господня и чудеса Его во глубине. Рече и ста дух бурен и вознесошася волны его, восходят до небес и нисходят до бездн, душа их в злых таяше. Смятошася, подвигошася, яко пияный, и вся мудрость их поглощена бысть. И воззваша ко Господу, внегда скорбети им и от нужд их изведе их. И повеле бури, и ста в тишину, и умолкоша волны его. И возвеселишася, яко умолкоша, и настави их в пристанище хотения Своего. Да исповедятся Господеви милости Его, и чудеса Его сыновом человеческим, да вознесут Его в церкви людстей (106/23–32). Услыши ны, Боже, Спасителю наш, упование всех концев земли и сущих в мори далече (64/6). Скажи мне, Господи, путь воньже пойду (142/8). Спаси мя от брения, да не углебну, за избавлюся от глубоких вод. Да не потопит мене буря водная (68/15–16). Боже мой, не удалися от Мене, Боже мой в помощь мою вонми (70/12). Аще бо и пойду посреде сени смертной, не убоюся зла, яко Ты мною еси; жезл Твой и палица Твоя та мя утешиста (22/4). Благо, есть надеятися на Господа, нежели надеятися на человека (117/8). Ополчится Ангел Господень окрест боящихся Его и избавит их (33/8). Господь сохранит тя, Господь покров твой на руку десную твою. Господь сохранит вхождение твое и исхождение твое (120/5, 8).

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О еже милостиву, благоуветливу и благопременительну быти к рабам Своим (рабу Своему, paбe Своей) (имя рек), и простив им (ему, eй) вся согрешения вольная и невольная, и благословити водное путешествие их (его, ея), Господу помолимся.

О еже утолити бурю, уставити ветры, и тишину к безмятежному плаванию, якоже древле апостолам Своим, яко милостив, подати им (eму, ей), Господу помолимся.

O eжe послати им (ему, ей) Ангела Своего Хранителя, от всякаго зла видимых и невидимых врагов покрывающа, Господу помолимся.

О еже благословити намерение совета и дела их (его, ея), к полезному совершению, в славу пресвятаго имене Своего, им же (ему же, ей же) в душевную и телесную пользу, Господу помолимся.

О еже избавити сих рабов Своих (сего раба Своего, сию рабу Свою) силою благодати Своей от всяких бед и нужд душевных и телесных, от недуга же и внезапной смерти, и всякой смертоносной раны; здравие же с благополучием и благовременный во свояси возвращением33 милостивно подати, Господу помолимся.

О избавитися нам:

Заступи, спаси, помилуй:

Пресвятую, Пречистую:

Возглас: Яко подобает Тебе:

На Бог Господь тропарь, глас 3:

К Тебе, Спасе прибегающих (прибегающаго, прибегающую) и от Твоей всесильной десницы помощи и благословения яко от Творца и Владыки ищущих (ищущаго, ищущей) не презри; но якоже иногда на мори словом тишину апостолам Своим подал еси, и ныне тихое и безмятежное плавание со здравием им (ему, ей) даруй, молитвами Богородицы, Едине Человеколюбче. (Дважды.)

Слава, и ныне. Тоже.

Псалом 90.

На каноне припев: Милостиве Господи, сохрани рабов Твоих (раба Твоего, рабу Твою) по водам плыти хотящих (хотящаго, хотящую)34.

Катавасия: Благослови, Милостиве, исхождение и вхождение рабов Твоих (paбa Tвоего, рабы Твоея) по водам плыти хотящим (хотящего, хотящей)35; Сам спутником, кормчим и хранителем им (ему, ей) буди, яко мы усердно к Тебе прибегаем, к милостивому Владыце и на всех путях наших Хранителю.

Ектения сугубая:

Помилуй нас Боже:

Запретивый некогда ветрам и морю, волнами бушевавшему, кораблю же тишину словом подавый и учеников успокоивый, призри, Милостиве и ныне на молитву рабов Твоих (раба Твоего, рабы Твоея) (имя рек), к Тебе прилежно припадающих (припадающего, припадающую), и благослови плавание их (его, ея) и тихое же, мирное и безмятежное шествие им (ему, ей) даруй, молимся Тебе, услыши и помилуй.

По водам, яко по суху ходивый, Cпace, и Петра всесильною Твоею десницею от потопления избавивый, и рабов Твоих (раба Твоего, рабу Твою) к плаванию устремляющихся (устремляющегося, устремляющейся)36 и с верою ко Твоему заступлению прибегающих от всех бед и бурь ветреных избави, благополучное им (ему, ей) шествие и во свояси возвращение37, милостиво даруя, молимся Тебе, Всещедрый Господи, услыши и помилуй.

Возглас: Яко милостив:

По 6-й песни катавасия и ектения малая.

Кондак, глас 5:

Всю надежду на Тя, Спасе, возложившим (возложившему, возложившей) буди помощником и избавителем, и благое намерение их (его, ея) с путешествием благослови, да все славим Тя, Единаго, всех благ Подателя.

Прокимен, глас 4: Аще и пойду посреде сени смертныя, не убоюся зла, яко Ты со мною еси.

Стих: И милость Твоя предварит мя во вся дни жизни моея.

Евангелие от Марка, зач. 18 (4, 36–41).

Рече Господь Своим учеником: прейдем на он пол. И отпущше народы, пояша Его, якоже бе в корабли: и инии же корабли бяху с Ним. И бысть буря ветрена велика: волны же вливахуся в корабль, яко уже погружатися ему. И бе Сам на корме на возглавнице спя, и возбудиша Его, и глаголаша Ему: Учителю, не радиши ли, яко погибаем? И востав запрети ветру, и рече морю: молчи, престани, и улеже ветр, и бысть тишина велия. И рече им: что тако страшливы есте? Како не имате веры? И убояшася страхом велиим, и глаголаху друг ко другу: кто убо сей есть, яко и ветр и море послушают Его?

По 9-й песни: Достойно есть: Трисвятое. Отче наш: По возгласе

Тропарь, глас 3:

К Тебе, Спасе прибегающих (прибегающаго, прибегающую) и от Твоей всесильной десницы помощи и благословения яко от Творца и Владыки ищущих (ищущаго, ищущей) не презри; но якоже иногда на мори словом тишину апостолам Своим подал еси, и ныне тихое и безмятежное плавание со здравием им (ему, ей) даруй, молитвами Богородицы, Едине Человеколюбче. (Дважды.)

Слава, глас 5:

Всю надежду на Тя, Спасе, возложившим (возложившему, возложившей) буди помощником и избавителем, и благое намерение дела их (его, ея) с путешествием благослови, да все славим Тя, Единаго всех благ Подателя.

И ныне. Богородичен:

Под Твой покров прибегаем, Богородице Дево, молитв наших не презри в скорбях, но от бед избави нас, Едина Чистая и Благословенная.

Ектения сугубая:

Помилуй нас, Боже:

Ангела Твоего, Всемилостивый Гoсподи, посли рабам Твоим (рабу Твоему, рабе Твоей) (имя рек) спутником, и хранителем от всех видимых и невидимых врагов, от всякой скорби, беды, недуга и смертоносной раны, во здравии же и всяком благополучии в пути сохрани, и во время благопотребно во свояси возврати молимся Тебе, Всемогущий Владыко, услыши и милостивно помилуй.

Еще молимся и о еже услышати:

Возглас: Услыши ны, Боже:

Диакон: Паки и паки со умилением колена душ и телес наших преклоньше38, Господу помолимся.

Певцы: Господи, помилуй (трижды).

Предстоятель чтет молитву:

Владыко Господи Иисусе Христе, Боже наш, по водам, яко по суху, ходивый и святых Твоих учеников и апостолов в корабли соплавателями Своими быти сподобивый, бури же ветреной запретивый и морским волнам утишитися повелевый; Ты и ныне, смиренно молим Тя, Спасе, с рабами Твоими сими (рабом Твоим сим, рабою Твоею сею) купно плыти (в корабли сем или в ладии сей) изволи, всякий противный ветр и бурю утоляя; воздвигни же изрядные и благовременные ветры ко благополучному плаванию, кормчий им (ему, ей) Сам всегда буди, спасительное, небурное и ведренное пристанище им (ему, ей и кораблю или ладии) бывая, и якоже Петра от потопления, тако и рабов Твоих сих (раба Твоего сего, рабу Твою сию) от наветования всех врагов видимых и невидимых, бед же и нужд и устрашений, всесильною Твоею десницею державно избави и во свояси добре и благополучно, свое предложение и благое намерение совершивших (совершившаго совершившую) здраво и весело в мире возвратитися благоизволи39, Твою богатую и неистощимую благодать во всех делах их (его, ея) богатно им (ему, ей) даруй и корабль цел и невредим (или ладию целу и невредиму) соблюди. Ты бо еси Спас, Избавитель, и всех благ небесных и земных богатый Податель, и Тебе славу возсылаем со Безначальным Твоим Отцем и Пресвятым и Благим и Животворящим Твоим Духом, ныне и присно и во веки веков. Аминь.

Отпуст:

Христос истинный Бог наш, молитвами Пречистыя Своея Матери; силою Честнаго и Животворящаго Креста; предстательством святых Ангелов Хранителей наших; святаго славнаго и всехвальнаго апостола Петра40 и прочих святых славных и всехвальных апостолов; святаго благовернаго равноапостольнаго князя Владимира; преподобнаго отца нашего Варлаама Керетскаго41; святаго (Русскаго святаго в тот день празднуемаго) и всех прочих святых в земле Русской просиявших; святаго пророка Ионы42; иже во святых отца нашего Николая, архиепископа Мир Ликийских, чудотворца и священномученика Фоки, епископа Синопийскаго43; святаго (вселенскаго святаго в тот день празднуемаго); святых праведных Богоотцев Иоакима и Анны и всех святых помилует и спасет нас, яко Благ и Человеколюбец.

И дает иерей путешествующим лобызать святый крест и кропит их священною водою глаголя:

Да благословит вас (тя) Господь от Сиона и узрите (узриши) благая Иерусалима во вся дни жизни вашей (твоей) и да исправит путь ваш (твой) в мире во славу святаго имени Своего, аминь.

Иное последование молебного пения о хотящих по водам плыти (Без канона)

По обычном начале псалом избранный: Исповедайтеся Господеви, яко Благ

Слава, и ныне. Аллилуия (трижды).

Ектения великая с ее прошениями.

Возглас: Яко подобает:

По возгласе абие Бог Господь.

Тропарь, глас 3:

К Тебе Спасе прибегающих (прибегающаго, прибегающую) и от Твоей всесильной десницы помощи и благословения яко от Творца и Владыки ищущих (ищущаго, ищущей) не презри; но якоже иногда на мори словом тишину апостолам Своим подал еси, и ныне тихое и безмятежное плавание со здравием им (ему, ей) даруй, молитвами Богородицы, Едине Человеколюбче. (Дважды.)

Слава, глас 5:

Всю надежду на Тя, Спасе, возложившим (возложившему, возложившей) буди помощником и избавителем, и благое намерение дела их (его, ея) с путешествием благослови, да все славим Тя, Единаго всех благ Подателя.

И ныне, Богородичен:

Под Твой покров прибегаем, Богородице Дево, молитв наших не презри в скорбях, но от бед избави нас, Едина Чистая и Благословенная.

Прокимен, глас 4: Аще и пойду посреде сени смертныя, не убоюся зла, яко Ты со мною еси.

Стих: И милость Твоя предварит мя во вся дни жизни моея.

Апостол: Деяний зач. 44 (к концу) (21, 1–7).

Во дни оны, якоже бысть отвезтися нам отторгшимся от них, прямо шедше приидохом в Кон, в другий же день в Родос, и оттуду в Патару. И обретше корабль преходящ в Финикию, возшедше отвезохомся. Возникший же нам Кипр оставльше ошуюю, плыхом в Сирию, и пристахом в Тире: тамо бо бяше кораблю изложити бремя. И обретше ученики, пребыхом ту дний седмь: иже Павлови глаголаху духом не восходити во Иерусалим. Егда же бысть нам скончати дни, изшедше идохом, провождающим нас всем, с женами и детьми даже до вне града, и преклоньше колена при брезе, помолихомся. И целовавше друг друга внидохом в корабль, они же возвратишася во свояси. Мы же плавание наченше от Тира, пристахом во Птолемаиде, и целовавше братию пребыхом день един у них.

Аллилуия, глас 1:

Избави мя от ненавидящих мя, и от глубоких вод.

Стих: Да не потопит мене буря водная, и да не дожрет мене глубина.

Евангелие от Марка, зач. 18 (4, 36–41).

Ектения сугубая:

Помилуй нас Боже:

Запретивый некогда ветрам и морю, волнами бушевавшему, кораблю же тишину словом подавый и учеников успокоивый, призри, Милостиве и ныне на молитву рабов Твоих (раба Твоего, рабы Твоея) (имя рек), к Тебе прилежно припадающих (припадающего, припадающую), и благослови плавание их (его, ея) и тихое же, мирное и безмятежное шествие им (ему, ей) даруй, молимся Тебе, услыши и помилуй.

По водам, яко по суху ходивый, Cпace, и Петра всесильною Твоею десницею от потопления избавивый, и рабов Твоих (раба Твоего, рабу Твою) к плаванию устремляющихся (устремляющегося, устремляющейся)44 и с верою ко Твоему заступлению прибегающих от всех бед и бурь ветреных избави, благополучное им (ему, ей) шествие и во свояси возвращение45, милостиво даруя, молимся Тебе, Всещедрый Господи, услыши и помилуй.

Ангела Твоего, Всемилостивый Гoсподи, посли рабам Твоим (рабу Твоему, рабе Твоей) (имя рек) спутником, и хранителем от всех видимых и невидимых врагов, от всякой скорби, беды, недуга и смертоносной раны, во здравии же и всяком благополучии в пути сохрани, и во время благопотребно во свояси возврати46 молимся Тебе, Всемогущий Владыко, услыши и милостивно помилуй.

Еще молимся и о еже услышати:

Возглас: Услыши ны, Боже:

Молитва и отпуст.

И дает иерей путешествующим лобызать святый крест и кропит их священною водою глаголя:

Да благословит вас (тя) Господь от Сиона и узрите (узриши) благая Иерусалима во вся дни жизни вашей (твоей) и да исправит путь ваш (твой) в мире во славу святаго имени Своего, аминь.

Псалом избранный, ектенийные прошения, Евангелие, молитву и отпуст смотри выше, в предыдущем последовании.

Последование молебного пения о хотящих по воздуху шествовати

По обычном начале псалом 120:

Возведох очи мои в горы, отнюдуже приидет помощь моя. Помощь моя от Господа, сотворшаго небо и землю. Не даждь во смятение ноги твоея, ниже воздремлет храняй тя; се не воздремлет, ниже уснет храняй Израиля. Господь сохранит тя, Господь покров твой на руку десную твою. Во дни солнце не ожжет тебе, ниже луна нощию. Господь сохранит тя от всякаго зла, сохранит душу твою Господь; Господь сохранит вхождение твое и исхождение твое, от ныне и до века.

Слава, и ныне. Аллилуиа (трижды).

Ектения великая:

Миром Господу помолимся.

О свышнем мире:

О мире всего мира:

О рабах Божиих (рабе Божием, рабе Божией) (имя рек) по воздуху шествовати хотящих (хотящем, хотящей)47, Господу помолимся.

О еже милостиву быти к ним и, простив им (ему, ей) вся согрешения, благословити путешествие их (его, ея), Господу помолимся.

О еже послати им (ему, ей) Ангела мирна, спутника и наставника, сохраняющаго, заступающего и от всякаго зла избавляющаго, Господу помолимся.

О еже утолити бури, уставити ветры и тишину ко безмятежному по воздуху шествию подати им (ему, ей) Господу помолимся.

О избавитися:

Заступи, спаси:

Пресвятую, Пречистую:

Возглас: Яко подобает Тебе:

На Бог Господь

Тропарь, глас 3:

Возводяй облаки от последних земли, молнии и дождь сотворивый, изводяй ветры от сокровищ Своих, благослови по воздуху шествие рабов Твоих (раба Твоего, рабы Твоей), Твоея помощи смиренно просящих (просящаго, просящей), всякий противный ветр и бурю утоли, целых, здравых и безмятежных (цела, здрава и безмятежна; целу, здраву и безмятежну) в пути сохрани, и вся благая хотения их (его, ея) исполни, Едине Человеколюбче и Многомилостиве. (Дважды.)

Слава, и ныне. Богородичен, глас тойже:

Прибежище и сила наша Богородица, державная христианам Помощница, молитвами Твоими покрый от всякия беды рабов Твоих (раба Твоего, рабу Твою), по воздуху шествовати хотящих (хотящаго, хотящую)48, Едина Чистая и Благословенная.

Псалом 90.

На каноне припев: Милостиве Господи, сохрани рабов Твоих (раба Твоего, рабу Твою) по воздуху шествовати хотящих (хотящего, хотящую)49.

По 3-й песни катавасия:

Благослови, Милостиве, исхождение и вхождение рабов Твоих (раба Твоего, рабы Твоея), по воздуху шествовати хотящих (хотящаго, хотящую)50, Сам спутником, кормчим и хранителем их (его, ея) буди, яко мы усердно к Тебе прибегаем, ко всех стихий Владыце и на всех путях наших Хранителю.

Ектения сугубая:

Помилуй нас Боже:

Призри, Владыко Человеколюбче на рабов Твоих (раба Твоего, рабу Твою) (имя рек), по воздуху шествовати хотящих (хотящаго, хотящую)51, и к Тебе смиренно припадающих (припадающаго, припадающую), Твое благословение им (ему, ей) ниспосли, и тихое мирное и безмятежное путешествие им (ему, ей) устрой, молимся Тебе, Всемилостивый Господи, услыши и помилуй.

К путешествию по воздуху устремляющихся (устремляющагося, устремляющуюся)52 и со смирением и верою к Твоему, Всемилостивый Владыко, заступлению прибегающих (прибегающаго, прибегающую), от всяких бед и бурей ветреных избави, благополучное им (ему, ей) шествие и благовременное во свояси возвращение53 милостивно даруй, молимся Тебе, Всещедрый Владыко, услыши и помилуй.

Ангела Твоего, Всеблагий Господи, пристави рабам Твоим (рабу Твоему, рабе Твоей), хранителем от всех врагов видимых и невидимых, от всякой беды и нужды, от недугов и смертоносной раны, во здравии же и всяком благополучии к славе пресвятагo имени Твоего в пути сохрани и по исполнении благаго намерения во свояси возврати54, молимся Тебе, услыши и помилуй.

Возглас: Яко милостив:

По 6-й песни и катавасии, ектения малая.

Кондак, глас 5:

Всю надежду на Тя, Спасе, возлагающим (возлагающему, возлагающей) буди помощником и хранителем, путешествие их (его, ея) по воздуху благослови и исполнению добраго намерения благопоспеши, да благодарно славят (славит) Тя Единаго всех благ Подателя.

Прокимен, глас 4:

Аще и пойду посреде сени смертной, не убоюся зла, яко Ты со мною еси.

Стих: И милость Твоя предварит мя во вся дни жизни моея.

Евангелие от Матфея, зач. 20 от полу (7, 7–11).

Рече Господь: просите, и дастся вам; ищите, и обрящете; толцыте, и отверзется вам. Всяк бо просяй приемлет, и ищай обретает, и толкущему отверзется. Или кто есть от вас человек, егоже аще вопросит сын его хлеба, еда камень подаст ему? Или аще рыбы просит, еда змию подаст ему? Аще убо вы, лукави суще, умеете даяния блага даяти чадом вашим, кольми паче Отец ваш Небесный даст блага просящим у Него.

По 9-й песни: Достойно есть: Трисвятое. Отче наш:

По возгласе

Тропарь, глас 3:

Возводяй облаки от последних земли, молнии и дождь сотворивый, изводяй ветры от сокровищ Своих, благослови по воздуху шествие рабов Твоих (раба Твоего, рабы Твоея), Твоея помощи смиренно просящих (просящаго, просящую), всякий противный ветр и бурю утоли, целых, здравых и безмятежных (цела, здрава и безмятежна; целу, здраву и безмятежну) в пути сохрани, и вся благая хотения их (его, ея) исполни, Едине Человеколюбче и Многомилостиве.

Слава.

Кондак, глас 5:

Всю надежду на Тя, Спасе, возлагающим (возлагающему, возлагающей) буди помощником и хранителем, путешествие их (его, ея) по воздуху благослови и исполнению добраго намерения благопоспеши, да благодарно славят (славит) Тя, Единаго всех благ Подателя.

И ныне. Богородичен, глас тойже:

Скорый Твой покров и помощь покажи на рабах Твоих (рабе Твоем, рабе Твоей), Чистая, благослови благое намерение совета их (его, ея), тихое и безмятежное по воздуху шествие им (ему, ей) даруй и от всякой беды и скорби избави, благодатная христиан Помощница.

Ектения сугубая:

Помилуй нас Боже:

Еще молимся Тебе, Благому и Человеколюбивому Богу нашему, еже помиловати paбов Своих (раба Своего, рабы Своея) (имя рек), и избавити их (его, сию) силою благодати Твоея от всех козней врагов видимых и невидимых, от злорастворений воздушных, от недуга, смертоносной раны и внезапной смерти, здравие со благополучием и благовременное во свояси возвращение милостивно подати, во смирении припадающе просим, услыши и человеколюбно помилуй.

Певцы: Господи, помилуй (3†12 раз).

Еще молимся и о еже услышати:

Возглас: Услыши ны, Боже:

Диакон: Паки и паки со умилением колена душ и телес наших преклоньше, Господу помолимся.

Певцы: Господи, помилуй (трижды).

Молитва

Господи Боже наш, Творче неба и земли и всех стихий земных и воздушных Владыка и Повелитель! Создавый человека яко венец творeний Твоих, малым чим умалив от Ангелов и почтив его быти начальником всего видимаго на земле, Ты, по неизреченному милосердию и человеколюбию и по грехопадении, достойно осудив несоблюдшаго заповедь Твою трудиться до пота лица, сохранил еси ему разум богоподобный, способный проникать в тайны вышедшей из повиновения природы и побеждать оную для облегчения труда. Разрушив гордые замыслы строителей башни Вавилонской и разсеяв людей по всей земле, Ты сохранил еси в них сознание единства рода человеческаго, возжег в сердцах их святое чувство братства и любви, потребность дружбы и стремление к сближению ради взаимопомощи. В Завете же Новом новою заповедию Ты завещал Твоим последователям совершеннейшую любовь и теснейшее единение во образ Твоего таинственнаго Триипостаснаго единства. Ради осуществления сих высоких и святых потребностей Ты во все времена вразумлял людей изыскивать и усовершенствовать пути и способы сближения по суше и по водам. Избранным же Твоим рабам Ты подавал благодать употреблять на сие превыше естества и воздушную стихию. Твоим повелением древле пророк Аввакум был перенесен по воздуху от Иудеи до Вавилона, напитать Даниила, во рве со львами заключеннаго. Богоносные апостолы, рассеянные по вселенной ради проповеди Евангелия, восхищены быша на облацех по широте воздушной на погребение Пречистой Богоматери. Твои святые угодники многажды легкими благодатными крылами по воздуху предваряли и ускоряли на помощь к сущим в нуждах и бедственных обстояниях. В последния же лета, в наше греховное время оскудения в мире братской любви и умножения вражды и разделений, дабы облегчить еще более возможность сближения и сделать безответными разделящихся, Ты умудрил мужей разума измыслить быстроходные корабли, с применением сил естественных по воздуху шествующие. Благодарим Тя, Великодаровитый и Всещедрый за сей дар любви Твоей нам грешным, и смиренно припадающе молим: не попусти враждебным силам употреблять его во зло, но да послужит он к вящему укреплению дружбы и братства людей, к мирному сотрудничеству народов для общаго блага, во славу Твою. И ныне, благослови, Владыко, рабов Твоих (раба Твоего, рабу Твою) (имя рек), по воздуху шествовати хотящих (хотящаго, хотящую); Сам кормчим их (его, ея) буди; Ангелам Твоим заповедай хранити их (его, сию) в пути; пророком Илиею, емуже наипаче даровал еси власть над стихиями воздушными, всякий противный ветр и бурю утоли, воздвигни же изрядныя и благовременныя ветры к благополучному по воздуху шествию; от всех видимых и невидимых врагов наветования, от бед же и различных обстояний всесильною Твоею десницею избави; благослови исхождение их (его, ея) и вхождение, и целых и здравых (цела и здрава, целу и здраву) на дело свое во славу Твою и во благо ближних, и на делание даже до вечера жизни изведи. Ты бо еси на всех путях наших Хранитель и во всех добрых делах Помощник и Тебе славу возсылаем, Отцу и Сыну и Святому Духу, Единому в Троице славимому Богу, ныне и присно и во веки веков. Аминь.

Отпуст:

Христос истинный Бог наш, молитвами Пречисты Своея Матери, силою Честнаго и Животворящаго Креста; предстательством святых Ангелов Хранителей наших; святых славных и всехвальных апостолов; святаго славнаго и небошественнаго пророка Илии; святаго бларовернаго равноапостольнаго великаго князя Владимира; святаго (Русскаго святаго в тот день празднуемаго) и всех прочих святых в земле Русской просиявших; святаго (вселенскаго святаго в тот день празднуемаго); святых праведных Богоотцев Иоакима и Анны и всех святых помилует и спасет нас, яко Благ и Человеколюбец.

И дает иерей путешествующим лобызать святый крест, и кропит их священною водою глаголя:

Да благословит вас (тя) Господь от Сиона и узрите (узриши) благая Иерусалима во вся дни жизни вашей (твоей) и да исправит путь ваш (твой) в мире во славу святаго имени Своего. Аминь.

В древности наиболее опасным видом путешествия было плавание, когда путешественники «вверивши судьбу свою малому древу, непостоянное стремление волн предпочитали твердейшей стихии – земле (Кирилл Иерусалимский). Тогда Церковь, входя в нужды и душевные состояния своих чад к общему ежедневному молению о путешествующих по суше присоединила особое моление о плавающих, сущих в мори далече.

В наше время открылся третий способ путешествия – по воздуху, еще более непостоянной стихии, чем волны морские. Поэтому было бы соответственным там, где на общественном богослужении возносится моление о путешествующих вообще, присоединять и особое моление о путешествующих по воздуху. Так по великой ектении могло бы быть такое прошение: «О по воздуху шествующих, плавающих, путешествующих». На ектении полунощницы и повечерия «Помолимся», после прошения: «О в мори плавающих» прибавить прошение: «О по воздуху шествующих».

И четвертую молитву шестопсалмия следовало бы так дополнить: «…всю братию нашу, яже на земле, на мори, на воздусе и на всяком месте…»

Иное последование молебного пения о хотящих по воздуху шествовати (Без канона)

По обычном начале псалом 90:

Живый в помощи Вышняго, в крове Бога Небеснаго водворится, речет Господеви: Заступник мой еси и Прибежище мое, Бог мой, и уповаю на Него. Яко Той избавит тя от сети ловчи, и от словесе мятежна, плещма Своима осенит тя, и под криле Его надеешися; оружием обыдет тя истина Его. Не убоишися от страха нощнаго, от стрелы летящия во дни, от вещи во тьме преходящия, от сряща и беса полуденнаго. Падет от страны твоея тысяща, и тма одесную тебе, к тебе же не приближится; oбaче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближится телеси твоему, яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою, на аспида и василиска наступиши, и попереши льва и змия. Яко на Мя упова, и избавлю и; покрыю и, яко позна имя Мое. Воззовет ко Мне, и услышу его; с ним есмь в скорби, изму его, и прославлю его, долготою дней исполню его, и явлю ему спасение Мое.

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О рабах Божиих (рабе Божием, рабе Божией) (имя рек) по воздуху шествовати хотящих (хотящем, хотящей), Господу молимся.

О еже милостиву быти к ним и простив им (ему, ей) вся согрешения, благословити путешествие их (его, ея), Господу помолимся.

О еже послати им (ему, ей) Ангела мирна, спутника и наставника, сохраняющаго, заступающаго и от всякаго зла избавляющаго, Господу помолимся.

О еже утолити бури, уставити ветры и тишину ко безмятежному по воздуху шествию подати им (ему, ей) Господу помолимся.

О избавитися:

Заступи, спаси…

Пресвятую, Пречистую:

Возглас: Яко подобает Тебе:

По возгласе абие Бог Господь и

Тропарь, глас 3:

Возводяй облаки от последних земли, молнии и дождь сотворивый, изводяй ветры от сокровищ Своих, благослови по воздуху шествие рабов Твоих (раба Твоего, рабы Твоея), Твоея помощи смиренно просящих (просящаго, просящей), всякий противный ветр и бурю утоли, целых, здравых и безмятежных (цела, здрава и безмятежна, целу здраву и безмятежну) в пути сохрани, и вся благая хотения их (его, ея) исполни, Едине Человеколюбче и Многомилостиве.

Слава.

Кондак, глас 5:

Всю надежду на Тя, Спасе, возлагающим (возлагающему, возлагающей) буди помощником и хранителем, путешествие их (его, ея) по воздуху благослови и исполнению добраго намерения благопоспеши, да благодарно славят (славит) Тя, Единаго всех благ Подателя.

И ныне. Богородичен, глас тойже:

Скорый Твой покров и помощь покажи на рабах Твоих (рабе Твоем, рабе Твоей), Чистая, благослови благое намерение совета их (его, ея), тихое и безмятежное по воздуху шествие им (ему, ей) даруй и от всякой беды и скорби избави, благодатная христиан Помощница.

Прокимен, глас 4: Аще и пойду посреде сени смертной, не убоюся зла, яко Ты со мною еси.

Стих: И милость Твоя предварит мя во вся дни жизни моея.

Евангелие от Матфея, зач. 20 от полу (7, 7–11).

Рече Господь: просите, и дастся вам; ищите, и обрящете; толцыте, и отверзется вам. Всяк бо просяй приемлет, и ищай обретает, и толкущему отверзется. Или кто есть от вас человек, егоже аще вопросит сын его хлеба, еда камень подаст ему? Или аще рыбы просит, еда змию подаст ему? Аще убо вы, лукави суще, умеете даяния блага даяти чадом вашим, кольми паче Отец ваш Небесный даст блага просящим у Него.

Ектения сугубая

Помилуй нас, Боже:

Призри, Владыко Человеколюбче на рабов Твоих (раба Твоего, рабу Твою) (имя рек), по воздуху шествовати хотящих (хотящаго, хотящую)55, и к Тебе смиренно припадающих (припадающаго, припадающую), Твое благословение им (ему, ей) ниспосли, и тихое мирное и безмятежное путешествие им (ему, ей) устрой, молимся Тебе, Всемилостивый Господи, услыши и помилуй.

К путешествию по воздуху устремляющихся (устремляющагося, устремляющуюся)56 и со смирением и верою к Твоему, Всемилостивый Владыко, заступлению прибегающих (прибегающаго, прибегающую), от всяких бед и бурей ветреных избави, благополучное им (ему, ей) шествие и благовременное во свояси возвращение 57 милостивно даруй, молимся Тебе, Всещедрый Владыко, услыши и помилуй.

Ангела Твоего, Всеблагий Господи, пристави рабам Твоим (рабу Твоему, рабе Твоей), хранителем от всех врагов видимых и невидимых, от всякой беды и нужды, от недугов и смертоносной раны, во здравии же и всяком благополучии к славе пресвятагo имени Твоего в пути сохрани и по исполнении благаго намерения во свояси возврати58, молимся Тебе, услыши и помилуй.

Еще молимся Тебе, Благому и Человеколюбивому Богу нашему, еже помиловати рабов Своих (раба Своего, рабу Свою) (имя рек), избавити их (его, сию) силою благодати Твоея от всех козней врагов видимых и невидимых, от злорастворений воздушных, от недуга, смертоносной раны и внезапной смерти, здравие со благополучием и благовременное во свояси возвращение59 милостивно подати, во смирении припадающе просим, услыши и человеколюбно помилуй.

Возглас: Услыши ны, Боже:

Молитва и отпуст (см. предыдущее последование).

И дает иерей путешествующим лобызать святый крест, и кропит их священною водою, глаголя:

Да благословит вас (тя) Господь от Сиона и узрите (узриши) благая Иерусалима во вся дни жизни вашей (твоей) и да исправит путь ваш (твой) в мире во славу святаго имени Своего. Аминь.

Последование молебного пения пред началом учения в низших и средних школах

По обычном начале псалом избранный:

Хвалите, отроцы, Господа, хвалите имя Господне (112/1). Приступите к Нему и просветитеся. Приидите, чада, послушайте мене, страху Господню научу вас (33/6, 12). В чесом исправит юнейший путь свой? Внегда сохранити словеса Твоя (118/9). Начало премудрости страх Господень (110/10). Закон Господень непорочен, обращаяй души, свидетельство Господне верно, умудряющее младенцы. Оправдания Господня права, веселящая сердце, заповедь Господня светла, просвещающая очи (18/8–9). Юнейший аз есмь, оправданий Твоих не зaбых (118/141). Готово сердце мо, Боже, готово сердце мое. (56/8). Сердце чисто созижди во мне, Боже. Господи, устне мои отверзеши, и уста моя возвестят хвалу Твою (50/12, 17). Коль сладка гортани моему словеса Твоя, паче меда устом моим (118/103). Господь просвещение мое (26/1). Господи, настави мя правдою Твоею (5/9). Вразуми мя, и увем свидения Твоя (118/125). Настави мя на истину Твою, и научи мя (24/5). Посли свет Твой и истину Твою, та мя настависта (42/3). Во свете Твоем узрим свет (35/10). Боже сил, обратися убо, и призри с Небесе и виждь, и посети виноград сей, и соверши и, егоже насади десница Твоя (79/15–16).

Слава, и ныне. Аллилуия (трижды).

Великая ектения:

Миром Господу помолимся.

О свышнем мире:

О мире всего мира:

О еже ниспослати на отроков сих (отрока сего, отроковицу сию) духа премудрости и разума и отверзти ум и уста и просветити сердца их к приятия наставления добрых учений, Господу помолимся.

О еже всадити в сердца их (в сердце его, ея) начало премудрости, страх Свой Божественный и тем буесть юности отгнати от сердец их (его, ея) и просветити ум их (его, ея), да будут уклоняться от зла и творить благое, Господу помолимся.

О еже отверзти ум их (его, ея) да приимут и разумеют (да приимет и разумеет) и памятствовати будут (будет) все добрыя и душеполезныя учения, Господу помолимся.

О еже подати им (ему, ей) приседящую престолу Его премудрость и сию всадити в сердца их (в сердце его, ея), яко да научит, что есть благоугодно пред Ним, Господу помолимся.

О еже преспеяти им (ему, ей) премудростию и возрастом во славу Божию, Господу помолимся.

О еже быти им (ему, ей) премудростию и добродетельным житием, и благостоянием в православной вере, радостию и утешением родителям своим, и Церкви Святой во утверждение, Господу помолимся.

О еже избавитися нам:

Заступи, спаси, помилуй:

Пресвятую, Пречистую:

Возглас: Яко подобает Тебе:

На Бог Господь:

Тропари, глас 6:

Яко посреде учеников Твоих пришел еси, Спасе, мир дая им, прииди к нам, и спаси нас.

Безкнижных учеников Дух Твой Святый учителями содела, Христе Боже, и многовещанною проповедию их языческое обольщение упраздни, яко Всесилен.

Слава, глас 8:

Благословен еси, Христе Боже наш, иже премудры ловцы явлей, ниспослав им Духа Святаго, и теми уловлей вселенную, Человеколюбче, слава Тебе.

И ныне. Богородичен, глас 6:

Предстательство христиан непостыдное, ходатайство ко Творцу непреложное, не презри грешных молений гласы, но предвари яко Благая на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя.

Прокимен, глас 4: Хвалите, отроцы, Господа, хвалите имя Господне.

Стих: Буди имя Господне благословенно от ныне и до века.

Апостол к Ефесеям, зач. 218 (1, 16–19; 3, 19–21).

Братие, не престаю благодаря о вас, поминание о вас творя в молитвах моих. Да Бог Господа нашего Иисуса Христа, Отец славы даст вам духа премудрости и откровения, в познание Его. Просвещенна очеса сердца вашего, яко уведети вам, кое есть упование звания Его, и кое богатство славы достояния Его во святых. И кое преспеющее величество силы Его в нас, верующих по действу державы крепости Его. Разумети же преспеющую разум любовь Христову, да исполнитеся во всяко исполнение Божие. Могущему же паче вся творити по преизбыточествию, ихже просим или разумеем; по силе действуемой в нас, Тому слава в Церкви о Христе Иисусе, во вся роды века веков. Аминь.

Евангелие от Марка, зач. 44 (10, 13–16).

Во время оно, приношаху ко Иисусови дети, да коснется их: ученицы же прещаху приносящим. Видев же Иисус, негодова, и рече им: оставити детей приходити ко Мне, и не браните им: тацех бо есть Царствие Божие. Аминь глаголю вам, иже аще не приимет Царствия Божия яко отроча, не имать внити в не. И объем их, возложь руце на них, благословляше их.

Ектения сугубая:

Помилуй нас, Боже:

Еще молимся Господу Богу нашему да призрит на отроков сих (отрока сего, отроковицу сию) и низпошлет в сердце, во ум и во уста их (его, ея) духа премудрости, разумения, благочестия и страха Своего и просветит их светом Своего благоразумия, и подаст им силу и крепость к скорому восприятию и спешному научению, божественнаго закона Его наставлению, и всему благому и полезному учению, да преуспевают они (преуспевает он, она) премудростию и paзумом и всеми благими делами во славу пресвятаго Его имени, к созиданию и славе Церкви Своея, рцем вси, Господи, услыши и милостивно помилуй.

Возглас: Услыши ны, Боже:

Молитва

Господи Боже и Создателю наш, почтивший людей образом Своим, научивший избранных Твоих, яко дивишася вси внимавшие учению их, открывший премудрость младенцам, научивший Соломона и всех искавших премудрости Твоей! Отверзи сердца, умы и уста отроков сих (отрока сего, отроковицы сея), да приимут силу закона Твоего, и разумеют благую и совершенную волю Твою, и со успехом познают преподаваемые им (ему, ей) полезныя учения во славу пресвятаго имене Твоего, в пользу и созидание святой Твоей Церкви. Избави сих рaбов Твоих (сего раба Твоего, сию рабу Твою) от всякаго соблазна вражия, соблюди их в православной вере и во всяком благочестии и чистоте во все дни жизни их (его, ея), да преуспеют (преуспеет) в разуме и во исполнении заповедей Твоих, да тако предуготовани (предуготован, предуготована) прославят (прославит) пресвятое имя Твое и будут (будет) наследниками (наследником, наследницею) Царствия Твоего. Яко Ты еси Бог силен в милости и благ в крепости, и Тебе подобает всякая слава, честь и поклонение Отцу и Сыну и Святому Духу всегда, ныне и присно и во веки веков. Аминь.

Отпуст:

Христос, истинный Бог наш, молитвами Пречистыя Своея Матери, предстательством святых Ангелов Хранителей наших; святых славных всехвальных духоносных и богопроповедников апостолов; святаго благовернаго равноапостольнаго князя Владимира; преподобнаго и богоноснаго отца нашего Сергия, игумена Радонежскаго60, святаго (Русскаго святаго в тот день празднуемаго) и всех прочих святых, в земле Русской просиявших; святых мучеников Вавилы епископа Никомидийскаго и учеников его61>, святаго (вселенскаго святаго в тот день празднуемаго); святых праведных Богоотцев Иоакима и Анны и всех святых, помилует и спасет нас, яко Благ и Человеколюбец.

По отпусте поет диакон:

Рабам Божиим начальствующим, учащим и учащимся подаждь, Господи, здравие и спасение, и в трудах их благое поспешение, и сохрани их на многая лета.

Певцы: Многая лета (трижды).

И целуют учащиеся крест святый. Иерей же кропит их освященною водою.

Последование молебного пения перед началом в высшей школе

По обычном начале псалом избранный:

Велий Господь наш, и велия крепость Его, и разума Его несть числа (146/5). Исповедайтеся Господеви, яко благ, яко в век милость Его. Сотворшему чудеса велия единому. Сотворшему небеса разумом. Утвердившему землю на водах. Сотворшему светила велия единому. Солнце во область дне. Луну и звезды во область нощи (135/1, 5–9). Вся премудростию сотворил еси (103/24). Яко возвеличишася дела Твоя, Господи, зело углубишася помышления Твоя. Муж безумен не познает и не разумеет сих (91/6–7). Блажен человек, егоже аще наставиши, Господи, и от закона Твоего научиши (93/12). Блажен муж, иже не иде на совет нечестивых, и на пути грешных не ста, и на седалищи губителей не седе. Но в законе Господни воля его, и в законе Его поучится день и нощь. И будет яко древо, насажденное при исходищих вод, еже плод свой даст во время свое, и лист его не отпадет, и вся, елика аще творит, успеет. Не тако нечестивии, не тако (1/1–4). Уклонися от зла в сотвори благо (33/15). Не ревнуй еже, лукавновати, зане лукавнующии потребятся (36/8–9). Удержи язык твой от зла, и устне твои, еже не глаголати льсти (33/14). Не ревнуй лукавнующим (36/1). Да возвеселится сердце ищущих Господа. Взыщите Господа и утвердитеся (104/3–4). Начало премудрости страх Господень (110/10). Словеса Господня, словеса чиста, сребро разжжено, искушено земли, очищено седмерицею (11/7). Закон Господен непорочен, обращаяй души, свидетельство Господне верно, умудряющее младенцы (18/8).

Разжжено слово Твое зело, и раб Твой возлюби е. Благ мне закон уст Твоих, паче тысящ злата и сребра (118/140, 72). Господи, устне мои отверзеши, и уста мои возвестят хвалу Твою (50/17). Не уклони сердце мое в словеса лукавствия (140/4). Сердце чисто созижди во мне, Боже (50/12). Посли свет Твой и истину Твою, и та мя настависта (42/3). Потоком сладости Твоея напоиши я (35/9). Безвестная и тайная премудрости Твоея явил ми еси (50/8). Язык мой поучится правде Твоея, весь день хвале Твоей (34/28). Поучуся во всех делех Твоих (76/13). О заповедях Твоих размышляти буду и уразумею пути Твоя. Во оправданиих Твоих поучуся, не забуду словес Твоих (118/15–16). Научу беззаконныя путем Твоим (50/15). Не нам, Господи, не нам, но имени Твоему даждь славу, о истине Твоей (113/9). Юноши и девы да восхвалят имя Господне (148/12, 13). Боже сил, обратися убо, и виждь, и посети виноград сей, и соверши и, егоже насади десница Твоя (79/15–16).

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О еже ниспослати на рабов сих (раба сего, рабу сию) духа премудрости и разума, и отверзти ум и уста, и просветити сердца их (его, ея) к приятию наставления добрых учений, Господу помолимся.

О еже всадити в сердца их (его, ея) начало премудрости, страх Свой божественный и тем очистити сердца их (его, ея) и просветити ум их (его, ея) да будут уклоняться от зла и творити благое, Господу, помолимся.

О еже отверзти ум их (его, ея) да приимут и разумети и памятствовати будут (будет) все добрыя и душеполезныя учения, Господу помолимся.

О еже подати (ему, ей) приседящую престолу Его премудрость и сию вселити в сердца их (его, сия), яко да научит, что есть благоугодное пред Ним, Господу помолимся.

О еже преспеяти им (ему, ей) премудростию и добродетельным житием, и благостоянием в православной вере во славу Божию, Церкви Святой на утверждение, к созиданию и пользе Отечества нашего, во благо народа нашего, Господу помолимся.

О избавитися нам:

Заступи, спаси, помилуй:

Пресвятую, Пречистую:

Возглас: Яко подобает:

На Бог Господь:

Тропари, глас 6:

Яко посреде учеников Твоих пришел еси, Спасе, мир дая им, прииди к нам, и спаси нас.

Безкнижных учеников Дух Твой Святый учителями содела, Христе Боже, и многовещанною проповедию их языческое обольщение упраздни, яко Всесилен.

Слава, глас 8:

Благословен еси, Христе Боже наш, иже премудры ловцы явлей, ниспослав им Духа Святаго, и теми уловлей вселенную, Человеколюбче, слава Тебе.

И ныне. Богородичен, глас 6:

Предстательство христиан непостыдное, ходатайство ко Творцу непреложное, не презри грешных молений гласы, но предвари яко Благая на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя.

Прокимен, глас 4: Начало премудрости страх Господень.

Стих: Благословлю Господа, вразумившаго мя.

Апостол к Коринфянам, зач. 125 (1Кор. 1, 18–26; Кол. 2, 8; 1Кор. 1, 27–31).

Братие, слово крестное погибающим убо юродство есть, а спасаемым нам сила Божия есть. Писано бо есть: погублю премудрость премудрых, и разум разумных отвергу. Где премудр? Где книжник? Где совопросник века сего? Не обуи ли Бог премудрость мира сего? Понеже бо в премудрости Божией не разуме мир премудростию Бога, благоизволил Бог буйством проповеди спасти верующих. Понеже и иудее знамения просят, и еллини премудрости ищут. Мы же проповедуем Христа распята, иудеем убо соблазн, еллином же безумие. Самем же званным иудеем же и еллином, Христа, Божию силу и Божию премудрость. Зане буее Божие, премудрее человек есть, и немощное Божие, крепчае человек есть. Братие, блюдитеся, да никтоже вас будет прельщая философиею и тщетною лестию, по преданию человеческому, по стихиям мира, а не по Христе. Но буяя мира избра Бог, да премудрыя посрамит: и немощная мира избра Бог, да посрамит крепкая. И худородная мира и уничиженная избра Бог, и не сущая, да сущая упразднит. Яко да не похвалится всяка плоть пред Богом. Из Него же вы есте о Христе Иисусе, Иже бысть нам премудрость от Бога, правда же и освящение и избавление. Да, якоже пишется, хваляйся, о Господе да хвалится.

Евангелие от Иоанна, зач. 29 (8, 12, 31–32; 12, 36; 14, 6, 21, 23; 16, 1–2, 4–5, 7, 13).

Рече Господь ко пришедшим к Нему иудеем: Аз есмь свет миру. Ходяй по Мне, не имать ходити во тьме, но имать свет животный. Аще вы пребудете во словеси Моем, воистинну ученицы Мои будете. И уразумеете истину, и истина свободит вы. Дóндеже свет имате, веруйте во свет, да сынове света будете. Aз есмь путь, и истина, и живот: никтоже приидет ко Отцу, токмо Мною. Имеяй заповеди Моя, и соблюдаяй их, той есть любяй Мя: а любяй Мя, возлюблен будет Отцем Моим: и Аз возлюблю его, и явлюся ему Сам. Аще кто любит Мя, слово Мое соблюдет: и Отец Мой возлюбит его, и к нему приидема, и обитель у него сотворима. Сия глаголах вам, да не соблазнитеся. От сонмищ ижденут вы: но приидет час, да всяк, иже убиет вы, мнится службу приносити Богу. Но сия глаголах вам, да егда приидет час, поминайте се, яко Аз Рех вам: Сих же вам исперва не рех, яко с вами бех. Ныне же иду к Пославшему Мя, и никтоже от вас вопрошает Мене: камо идеши? Но Аз истину вам глаголю: уне есть вам, да Аз иду. Аще бо не иду Аз, Утешитель не приидет к вам. Аще ли же иду, послю Его к вам. Егда же приидет Он, Дух истины, наставит вы на всяку истину.

Ектения сугубая:

Помилуй нас Боже:

Еще молимся Господу Богу нашему, да призрит на сих рабов (сего раба, сию рабу) Его и да ниспослет в сердца, во ум и во уста их (его, ея) духа премудрости, разума же и благочестия, и страха Своего и просветит их (его, сию) светом Своего благоразумия и подаст им (ему, ей) силу и крепость к скорому восприятию и спешному научению божественнаго закона Его наставлению и всему благому и полезному учению, да преуспевают они (преуспевает он, она) премудростию и разумом и всеми благими делами, во славу пресвятаго Его имени, Церкви и Отечеству на пользу, рцем вси, Господи, услыши и помилуй.

Возглас: Услыши ны, Боже:

Молитва

Господи, Боже и Создателю наш, почтивший людей образом Своим, научивший избранных Твоих, яко дивишася вси внимавшии учению их, открывший премудрость младенцам, научивший Соломона и всех искавших премудрости Твоей; отверзи сердце, умы и уста рабов Твоих (сердце, ум и уста раба Твоего, рабы Твоея) да приимут (приимет) силу закона Твоего и уразумеют (уразумеет) благую и совершенную волю Твою и со успехом познают (познает) преподаваемая им (ему, ей) полезная учения во славу пресвятаго имени Твоего, во утверждение Святыя Церкви, на пользу и созидание Отечества нашего, во благо народа нашего. Избави сих рабов Твоих (сего раба Твоего, сию рабу Твою) от всякаго соблазна вражия, соблюди их в православной вере и во всяком благочестии и чистоте во вся дни жизни их (его, ея), да преуспевают (преуспевает) в разуме и во исполнении заповедей Твоих; да тако предуготовани (предуготован, предуготована) прославят (прославит) пресвятое имя Твое и будут наследницами (будет наследником, наследницей) Царствия Твоего. Яко Ты еси премудрости Наставник и смысла Податель, и Тебе подобает всякая слава, честь и поклонение, Отцу и Сыну и Святому Духу всегда, ныне и присно и во веки веков. Аминь.

Отпуст:

Христос, истинный Бог наш, молитвами Пречистыя Своея Матери; предстательством святых Ангелов Хранителей наших; святых славных, всехвальных, духоносных и богопроповедников апостолов; иже во святых отцев наших и вселенских великих учителей и святителей Василия Великого, Григория Богослова и Иоанна Златоустаго62, святаго благовернаго равноапостольнаго великаго князя Владимира; преподобных отец наших Нестора, перваго летописца Российскаго63 и Агапита64 врача; святаго (Русскаго святаго в тот день празднуемаго) и всех прочих святых в земли Русской просиявших; святаго мученика Иустина Философа65; святаго (вселенскаго святаго, в тот день празднуемаго), святых праведных Богоотцев Иоакима и Анны и всех святых, помилует и спасет нас, яко Благ и Человеколюбец.

По отпусте поет диакон:

Рабам Божиим начальствующим, учащим и учащимся подаждь, Господи, здравие и спасение и трудах их благое поспешение и сохрани их на многая лета.

Певцы: Многая лета (трижды).

И целуют учащиеся святый крест, иерей же кропит их освященною водою.

Последование молебного пения во время бездождия

Иерей обычно начинает: Благословен Бог наш:

Чтец же абие чтет: Трисвятое: Пресвятая Троице: Отче наш:

Иерей: Яко Твое есть Царство:

Чтец: Господи, помилуй (12).

Слава, и ныне. Приидите, поклонимся: (трижды).

Псалом 64

Тебе подобает песнь, Боже, в Сионе, и Тебе воздастся молитва во Иерусалиме. Услышу молитву мою, к Тебе всяка плоть приидет. Словеса беззаконник премогоша нас, и нечестия наша Ты очистиши. Благая, егоже избрал еси и приял, вселится во дворех Твоих. Исполнимся во благих дому Твоего, свят храм Твой, дивен в правде. Услыши ны, Боже, Спасителю наш, упование всех концей земли, и сущих в мори далече. Уготовляяй горы крепостию Своею, препоясан силою, смущаяй глубину морскую, шуму волн его кто постоит? Смятутся язы́цы и убоятся живущии в концах от знамений Твоих, исходы утра и вечера украсиши. Посетил еси землю и упоил еси ю, умножил еси обогатити ю. Река Божия наполнится вод. Уготовал еси пищу им, яко тако (есть) уготование. Бразды ея упой, умножи жити ея, в каплях ея возвеселится возсияющи. Благословиши венец лета благости Твоея, и поля Твоя исполнятся тука. Разботеют красная пустыни, и радостию холми препояшутся. Одеяшася овни овчии, и удолия умножат пшеницу, воззовут, ибо воспоют.

Слава, и ныне. Аллилуиа (трижды).

Диакон же абие глаголет ектению великую:

Миром Господу помолимся.

Даже до: О плавающих:

Таже прилагает сия:

О еже не помянути беззаконий и неправд людей Своих, и отвратити от нас весь гнев Свой праведно движимый на ны, и не уморити нас гладом и жаждою, Господу помолимся.

О еже благорастворенные воздухи и дожди благовременные к плодоношению милостивно послати земли, и людем Своим, Господу помолимся.

О еже во гневе Своем не погубити людей Своих, и скотов, но повелети облакам свыше одождити и к плодоношению оросити землю, Господу помолимся.

О еже повелети земли прозябати плоды на веселие и пищу людей Своих, и злак на службу человекам, траву же скотом, Господу помолимся.

О еже милостивно призрети на вопль, плач, стенания, и умиленныя молитвы старых и юных, младенцев же и всех людей Своих, и не погубити нас гладом грех ради наших, но пощадити от смерти души наша, и препитати нас в гладе, Господу помолимся.

О еже благоприятным быти мольбам нашим и якоже Илию иногда послушати нас и дождь и благорастворение воздуха подати, и помиловати нас, Господу помолимся.

О еже милостивно услышати глас молитвы нашея, и избавити нас от глада, губительства, землетрясения, потопа, огня, града, меча, нашествия иноплеменников, междоусобной брани, и всякой смертоносной язвы, Господу помолимся.

О избавитися нам:

Заступи, спаси:

Пресвятую, Пречистую, Преблагословенную:

Возглас: Яко подобает Тебе всякая слава:

Лик: Аминь.

И абие поет Бог Господь: глас 2.

Тропарь

Воздуха растворение повелением Твоим изменяяй Господи, вольный дождь с теплотою солнечною даруй земли, да приносит людем Твоим плоды изобильныя, и насытити все живущее Твоим благоволением, молитвами Богородицы и всех святых Твоих. (Дважды.)

Слава, глас 6:

Всех Творца и Зиждителя, и благих Дателя Тя ведуще, Господи, к Тебе припадаем, и прилежно молим: пощади, Милосерде, и прости яко Благ беззакония наша, и настоящаго праведнаго гнева избави рабов Твоих, подай яко Благ жаждущей земли благоплодныя дожди, яко Един Многомилостив.

И ныне. Богородичен, глас тойже:

Предстательство христиан непостыдное, ходатайство ко Творцу непреложное, не презри грешных молений гласы, но предвари яко Благая на помощь нас, верно зовущих Ти: ускори на молитву, и потщися на умоление, предстательствующи присно Богородице, чтуших Тя.

Таже, псалом 50:

Помилуй мя, Боже, по велицей милости Твоей и по множеству щедрот Твоих очисти беззаконие мое! Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе единому согреших, и лукавое пред Тобою сотворих: яко да оправдишися во словесех Твоих, и победиши внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне Боже, и дух прав обнови во утробе моей. Не отвержи мене от лица Твоего и Духа Твоего Святаго не отыми от Мене. Воздаждь ми радость спасения Твоего, и Духом владычним утверди мя. Научу беззаконныя путем Твоим и нечестивии к Тебе обратятся. Избави мя от кровей Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен, сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда блароволиши жертву правды, возношение и всесожегаемая: тогда возложат на олтарь Твой тельцы.

Канон молебный, глас 2:

К Человеколюбцу Господу в бездождие

/его же краестрочие: даждь дождь земле жаждущей, Спасе/

Поем канон без ирмосов.

Песнь 1

Ирмос: Грядите людие:

Припев: Даждь дождь земле жаждущей, Спасе.

Приими, Спасе, моление от недостойных наших уст и низпосли с небесе земли дожди плодоносны, Человеколюбец сый и Многомилостив.

Даждь дождь земле жаждущей, Спасе.

Очисти ныне, Господи, грехи наша и праведный гнев Твой отврати, Спасе, и подаждь с небесе дожди потребные земле.

Слава: Приидите человецы, восплачем к Богу всех, во умилении зовуще: прости Человеколюбче, наша прегрешения, и посли с небесе дожди жаждущей земле.

И ныне, Богородичен:

Свет Тобою познахом, Богородительнице, темже Тя молим и умилостивляем: молящи не престай Творца и Сына Твоего, послати земли дождь.

Катавасия по каждой песни:

Даждь дождь земле жаждущей, Спасе, и к плодоношению ороси сию, яко мы усердно к Тебе прибегаем, яко ко Творцу, Владыце и Промыслителю нашему.

Спаси от настоящия беды рабов Твоих, Пресвятая Богородице Дево, яко мы вси по Бозе к Тебе прибегаем, яко к милосердой Матери нашей и Предстательнице.

Песнь 3

Ирмос: Утверди нас в Тебе Господи:

Даждь дождь земле жаждущей, Спасе.

Всю тварь дланию содержай, Господи, услыши яко Щедр моления рабов Твоих и низпосли воду на всю землю.

Даждь дождь земле жаждущей, Спасе.

Сый Благ и Благопременитель яко имый бездну милосердия, не презри моления наша, но посли нам мирный дождь.

Слава: Богатство еже нам дал еси, иждихом блудно: но яко имеяй, Господи, бездну милосердия, и Отец благ сый умилосердися и дожди благовременныя подаждь земле.

И ныне, Богороцичен:

Яко имущая к Человеколюбцу Сыну Твоему благоприятное дерзновение, умоли, Чистая, подати земли дожди плодоносны, по ходатайству Твоему.

Катавасия:

Даждь дождь земле страждущей, Спасе, и к плодоношению ороси сию, яко мы усердно к Тебе прибегаем, яко ко Творцу, Владыце и Промыслителю нашему.

Спаси от настоящая беды рабов Твоих, Пресвятая Богородице Дево, яко мы вси по Бозе к Тебе прибегаем, яко к милосердой Матери нашей и Предстательнице.

Песнь 4

Ирмос: Пою Тя, слухом бо Господи:

Даждь дождь земле жаждущей, Спасе.

Свыше призри, Блаже, на нас согрешивших, и даруй, Господи, милость Твою по всей земли, и низпосли, молимся, богатно милости Твоя, Человеколюбче.

Даждь дождь земле жаждущей, Спасе.

Найде на нас согрешивших гнев Твой, Человеколюбче, и небеса заключи не дати дождев земли Твоей: темже молим Тя раби Твои, да не яростию Твоею, Слове, накажеши нас.

Слава: Растворение изменяяй воздуха, повелением Твоим, Господи, дождь вольный даруй нам, да принесет земля плоды изобильныя в насыщение всего живущаго, благоволением Твоим.

И ныне, Богородичен:

Ты, Богородице, Материю была Бога нашего: темже верою вси молим Тя, Владычице, яко имущую дерзновение: Того моли о всех нас, да низпослет воду по всей земли.

Катавасия:

Даждь дождь земле жаждущей, Спасе, и к плодоношению ороси сию, яко мы усердно к Тебе прибегаем, яко ко Творцу, Владыце и Промыслителю нашему.

Спаси от настоящия беды рабов Твоих, Пресвятая Богородице Дево, яко мы вси по Бозе к Тебе прибегаем, яко к милосердой Матери нашей и Предстательнице.

Песнь 5

Ирмос: Света Подателю:

Даждь дождь земле жаждущей, Спасе.

Молитвами, Спасе, безплотных, благосердно услыши всех наc, присно молящихся, и даждь дождь земле Твоей жаждущей, яко един Человеколюбец.

Даждь дождь земле жаждущей, Спасе.

Двоенадесятице учеников со страдальцами к Богу молитву о нас творите, яко да избавит нас от всякия нужди, гнева же и скорби.

Слава: Буди нам Благосерд во время искушения, Господи, и прещения належащаго спаси нас и посли земли Твоей дождь волен.

И ныне, Богородичен:

Вси земнороднии воистинну Ходатаицу Тя ныне к Богу имамы. Темже молимся, покровом Твоим, Чистая, покрывай людей Твоих от всякаго зла.

Катавасия:

Даждь дождь земле жаждущей, Спасе, и к плодоношению ороси сию, яко мы усердно к Тебе прибегаем, яко ко Творцу, Владыце и Промыслителю нашему.

Спаси от настоящия беды рабов Твоих, Пресвятая Богородице Дево, яко мы вси по Бозе к Тебе прибегаем, яко к милосердой Матери нашей и Предстательнице.

Песнь 6

Ирмос: В бездне греховней:

Даждь дождь земле жаждущей, Спасе.

Множество мучеников, яко имущии ко Господу дерзновение многое, молите ныне дождь даровати, и плод изобилия по всей земле.

Даждь дождь земле жаждущей, Спасе.

Молимся Тебе, Господи, молитвами Твоих учеников, ослаби, остави грехи наша, и гнев отврати от нас, и подаждь земле дождь.

Слава: Молим, Владыко Господи, Тебя, яко Благаго Человеколюбца, любовию душевною пощадив нас, и даруй дожди плодоносны жаждущей земле.

И ныне, Богородичен:

Молити не престай, молимся, Сына Твоего, Пречистая Богородительнице, о нас рабех Твоих, умирити, и спасти от всякаго гнева.

Катавасия:

Даждь дождь земле жаждущей, Спасе, и к плодоношению ороси сию, яко мы усердно к Тебе прибегаем, яко ко Творцу, Владыце и Промыслителю нашему.

Спаси от настоящия беды рабов Твоих, Пресвятая Богородице Дево, яко мы вси по Бозе к Тебе прибегаем, яко к милосердой Матери нашей и Предстательнице.

Песнь 7

Ирмос: Телу златому:

Даждь дождь земле жаждущей, Спасе.

Душами всеми господствующа Тебе ведуще, Блаже, молим: пощади, прости, яко Благ и Человеколюбец, и настоящаго праведнаго прещения нас избави, и даруй яко Благ дожди жаждущей земле.

Даждь дождь земле жаждущей, Спасе.

Якоже иногда Манассию покаявшагося, Спасе, избавил еси, и спасл еси от смертоноснаго случая, Благоутробне, Щедре, подаждь и нам милости Твоя, и сохрани нас от губительства и глада.

Слава: Умилосердися ныне на нас яко Благ и Милостив, ибо согрешихом, беззаконновахом, и неправдовахом вси. Темже молим Тя со страхом: не гневом Твоим, Человеколюбче, накажи причет и люди, но воду посли земле.

И ныне, Богородичен:

Тебе вси человецы прибежище твердое и оружие необоримое, Богородительнице, вемы и молим рабы Твои, избави прещения варварскаго людей Твоих: от глада же и губительства, землетрясения и всякия беды.

Катавасия:

Даждь дождь земле жаждущей, Спасе, и к плодоношению ороси сию, яко мы усердно к Тебе прибегаем, яко ко Творцу, Владыце и Промыслителю нашему.

Спаси от настоящия беды рабов Твоих, Пресвятая Богородице Дево, яко мы вси по Бозе к Тебе прибегаем, яко к милосердой Матери нашей и Предстательнице.

Песнь 8

Ирмос: В пещь огненную:

Даждь дождь земле жаждущей, Спасе.

Илия словом дождь удерживает и паки словом с небесе на землю низводит. Тем же молим Тя: того молитвами, Щедре, посли и ныне земле дожди водныя с небесе.

Даждь дождь земле жаждущей, Спасе.

С ликами безплотных, апостолов, пророков же и мучеников, священников собор и преподобных множество, яко Создателя всех и Господа, Тебе молит спасти поющих.

Слава: Якоже Иону от зверя и моря и Даниила от рова и зверей яко Бог избавил еси, тако и ныне услыши, Блаже, рабов Твоих и избави от всякия нужды людей Твоих.

И ныне, Богородичен:

Тебе рождшую, Иисусе, Богородицу на молитву ныне подвизаем, ущедрити и спасти людей согрешивших и паки с любовию к Тебе прибегающих и превозносящих во вся веки.

Катавасия:

Даждь дождь земле жаждущей, Спасе, и к плодоношению ороси сию, яко мы усердно к Тебе прибегаем, яко ко Творцу, Владыце и Промыслителю нашему.

Спаси от настоящия беды рабов Твоих, Пресвятая Богородице Дево, яко мы вси по Бозе к Тебе прибегаем, яко к милосердой Матери нашей и Предстательнице.

Песнь 9

Ирмос: От Бога, Бога Слова:

Даждь дождь земле жаждущей, Спасе.

Земле жаждущей, Щедре, и нам просящим Твоего человеколюбия, Блаже, милостивый Владыко, явися, яко Бог Вседержитель, и даруй нам яко Благ дожди плодоносны, и спаси души наша.

Даждь дождь земле жаждущей, Спасе.

Помилуй, Милостиве, рук Твоих дело, прости нас яко Благ: не яростию Твоею обличи людей, но преклони ухо Твое, и вонми молитве нашей, и подаждь земле Твоей дожди водныя, Господи.

Слава: Избави от язычников и варваров и всякаго супостата землю нашу и всех людей, и дожди нам даруй плодоносны, Щедре, во изобилие всех плодов, и спасение низпосли, Человеколюбче.

И ныне, Богородичен:

Тебе прообразующи халдейская пещь, Богородице, отроков росою прохлаждаше, посреде пламене ликовствующих, ныне же и нас яко в пещи огненной горящих от сухости дождем прохлади, Владычице, и спаси рабов Твоих, Твоими молитвами, Мати Бога Человеколюбца.

Посем абие оба лика сошедшеса поют: Достойно есть:

Чтец: Трисвятое. Пресвятая Троице: Отче наш:

Иерей: Яко Твое есть Царство:

Тропари, глас 6:

Помилуй нас, Господи, помилуй нас: всякаго бо ответа недоумеюще, сию Ти молитву яко Владыце, грешнии приносим: помилуй нас.

Слава: Господи помилуй нас, на Тя бо уповахом, не прогневайся на ны зело, и не помяни беззаконий наших, но призри и ныне яко Благосерд, и избави нас; от врагов наших: Ты бо еси Бог наш, и мы людие Твои, вси дела рук Твоих, и имя Твое призываем.

И ныне, Богородичен:

Милосердия двери отверзи нам, благословенная Богородице, надеющиися на Тя да не погибнем, но да избавимся Тобою от бед: Ты бо еси спасение рода христианского.

Посем абие иерей возглашает: Яко Свят еси Боже наш, и на святых почиваеши, и Тебе славу возсылаем, Отцу и Сыну и Святому Духу, ныне и присно и во веки веков.

Лик: Аминь.

И абие поет: Святый Боже: (Трижды.)

Слава, и ныне.

По скончании же трисвятаго пения, диакон глаголет:

Вонмем.

Иерей: Мир всем.

Чтец: И духови твоему.

Диакон: Премудрость, вонмем.

Чтец: Прокимен, глас 4:

Бразды земныя упой, и умножи жита ея.

Стих: В каплях ея возвеселится возсияющи.

Посем чтет Апостол зач. 56 и 57 (Иак. 5, 7–9, 17–18).

Соборного послания Иаковля чтение.

Братие, долготерпите до пришествия Господня: се земледелец ждет честнаго плода от земли, долготерпя о нем, Дóндеже приимет дождь ран и позден. Долготерпите убо и вы, утвердите сердца ваша, яко пришествие Господне приближися. Не воздыхайте друг на друга, да не осуждени будете: се Судия пред дверьми стоит. Илия человек бе подобострастен нам, и молитвою помолися, да не будет дождь: и не одожди по земли лета три и месяц шесть. И паки помолися, и небо дождь даде, и земля прозябе плод свой.

Иерей: Мир ти.

Чтец: И духови твоему.

Диакон: Премудрость, вонмет.

Чтец: Псалом Давидов, Аллиалуия, глас 8.

Певцы поют: Аллилуия.

Чтец же глаголет стихи.

Стих 1. Благословиши венец лета благости Твоея, Господи, и поля Твоя насытятся тука.

Стих 2: Разботеют красная пустыни, и радостию холми препояшутся.

Диакон: Премудрость, прости услышим Святаго Евангелия.

Иерей: Мир всем. От Матфея Святаго Евангелия чтение.

Лик: Слава Тебе, Господи, слава Тебе.

Диакон: Вонмем.

Иерей же чтет Евангелие от Матфея, зач. 65 (16, 1–3; Лк. 4, 24–26; Ин. 6, 30–33).

Во время оно, приступиша ко Иисусу фарисее и саддукее, искушающе вопросиша Его, знамение с небесе показати им. Он же отвещав рече им: вечеру бывшу, глаголете, ведро, чермнует бо ся небо. И утру, днесь зима: чермнеет бо ся дряселуя небо. Лицемери, лице убо небесе умеете разсуждати, знамений же временом не можете искусити. Аминь глаголю вам, яко ни который пророк приятен есть во отечествии своем. Поистинне же глаголю вам: многи вдовицы беша во дни Илиины во Израили, егда заключися небо три лета, и месяц шесть, яко бысть глад велик по всей земли. И ни ко единой их послан бысть Илия, токмо в Сарепту сидонскую, к жене вдовице. Реша же Ему: кое убо Ты твориши знамение, да видим, и веру имем Тебе, что делаеши? Отцы наши ядоша манну в пустыни, якоже есть писано: хлеб с небесе даст им ясти. Рече убо им Иисус: аминь аминь глаголю вам: не Моисей даде вам хлеб с небесе, но Отец Мой даст вам хлеба истиннаго с небесе. Хлеб бо Божий есть сходяй с небесе, и даяй живот миру.

Лик: Слава Тебе, Господи, слава Тебе.

Диакон же абие со всяким умилением, ничтоже борзяся во услышание всем, глаголет ектении сия:

Помилуй нас, Боже, по велицей милости Твоей, молим Ти ся, услыши и помилуй.

Господи, помилуй (трижды).

Не хотяй смерти грешанаго, но ожидаяй обращения и покаяния его, услыши нас Тебе молящих.

Господи, помилуй (трижды).

Возводяй облаки от последних земли, повели тем подати на ню дождь мирен, молимся Тебе.

Господи, помилуй (трижды).

Призываяй воду морскую и изливаяй оную на лице всея земли, низпосли благословение Твое на нас молящихся Тебе.

Господи, помилуй (трижды).

Одеваяй небо облаки и уготовляяй земли дождь, низпосли нам милости Твоя, молящимся Тебе.

Господи, помилуй (трижды).

Прозябаяй траву скотам и злак на службу человекам, спаси человеков со скотами, Тебе молящихся.

Господи, помилуй (трижды).

Дождь волен и тучу мирную подаждь земли, и спаси всяческая, Человеколюбче, и нас молящихся Тебе.

Господи, помилуй (трижды).

Низпосли дожди Твоя на требующая и просящая места, Человеколюбче, и услыши нас молящихся Тебе.

Господи, помилуй (трижды).

Щедре и Милостиве, ущедри, Человеколюбче, и возвесели нас, молящихся Тебе.

Господи, помилуй (трижды).

Услыши нас, Боже, яко блага милость Твоя, и Твоим благосердием помилуй нас молящихся Тебе.

Господи, помилуй (трижды).

Возглас:

Яко милостив и Человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков, аминь.

Еще молимся, о еже сохранитися земли нашей, и всякому граду и стране, от глада, губительства, землетрясения, потопа, огня, меча, саранчи, града, нашествия иноплеменников и междоусобной брани и внезапной смерти: и милостиву, благоветливу и благоприменительному быти, благому и человеколюбцу Богу, о гресех наших, отвратити и расточити всякий гнев на нас движимый и избавити нас от належащаго праведнаго Своего прещения: и низпослати нам дождь мирный, и одождити земли дождь благости, и помиловати нас молящихся Ему.

Господи, помилуй (40 раз).

Услыши ны, Боже, Спасителю наш, упование всех концев земли, и сущих в мори далече, и милостив, милостив буди, Владыко, о гресех наших, и помилуй нас: милостив бо и Человеколюбец Бог еси, и Тебе славу возсылаем, Отцу и Сыну и Святому духу, ныне и присно и во веки веков.

Лик: Аминь.

Молитвы в бездождие

(творение Каллиста, патриарха Константинопольскаго)

Молитва первая

Господу помолимся.

Владыко Господи Боже наш, послушавый Илию Фесвитянина ради ревности его о славе Твоей, и во время посылаемому земли дождю удержатися повелевый, таже паки молитвою его дождь плодоносный ей даровавый: Сам, Владыко всех, от самаго Твоего благосердия умоляемь, дождь волен даждь наследию Твоему, и согрешенная нами презрев, дожди Твоя низпосли на требующая и просящая места; возвесели лице земли, нищих ради людей Твоих, младенцев, и скотов и иных всех творений Твоих, понеже все от Тебе чают получати пищу во благо время. Ты бо еси наш Бог, Бог милующий и спасющий, и Тебе славу возсылаем, Отцу и Сыну и Святому Духу, ныне и присно и во веки веков, аминь.

Молитва вторая

Господу помолимся.

Господи Боже Вседержителю, возводяй облаки от последних земли, молнии в дождь сотворивый, изводяй ветры от сокровищ своих, призываяй воду морскую, и проливаяй сию на лице всея земли, Тебе молимся, и Тебя умилостивляем, исповедающе грехи наша, и от Тебе богатые милости просяще: заповеждь облакам одождити дождь, ущедри все земныя творения Твоя; умилосердися о старцах и юношах, и грудных младенцев, о мужах и женах, сынах и дщерей и о всех скотах земных, да изведет земля хлеб в cнедь нам, и злак скотам. Приими моления всех людей Твоих и не отрини воздыхания убогих, и яростию Твоею не обличиши нас, и гневом Твоим не называй нас и не растли гладом, и жаждою людей Твоих: всех бо очи на Тя уповают, прияти от Тебе пищу во благо время. На Тя надеемся, и кроме Тебе иного не вемы, от Тебе богатые милости ожидаем, яко Благ и Человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков, аминь.

Молитва третия

Господу помолимся.

Господи Боже наш, вемы, яко недостойни есмы Твоих щедрот, и несмы достойни возвести очи наши, зрети на небо, и стати пред Тобою, и прошения наша глаголати к Тебе. Кое бо добро сотворихом, да и прошения получим? Ибо Твоея ради безмерныя благости от небытия нас в бытие привед, образом Твоим почел еси, и тварь всю нам покорил еси. Но мы толико облагодетельствовани бывше, якоже врази представихомся, и Твои, Благодетелю, заповеди презрехом, и житие порочно и мысль скверну и нечисту стяжахом. И не точию Твою любовь отвергохом, но и якоже зверие друг на друга носимся, и плоти друг друга снедаем лихоимственными образы, и неправедным произволением нашим. Како убо достойни есмы Твоих благодетельств восприяти? Ты бо Праведен, мы неправедни; Ты любиши, мы враждуем; Ты Милосерд, мы немилосердны; Ты Благодетель, мы хищницы. Кое общение к Тебе имамы, да и Твоих благих приобщимся? Исповедуем правду Твою, познаваем осуждение наше, проповедуем благодеяния Твоя, тьмам смертей повинни есмы. Се под Твоею действительною, и вся содержащею рукою пребываем: удобно есть Твоей всесильной руке во мгновение ока погубити нас. И ради нашего греховнаго жития, праведно было бы нас пагубе предати, Праведнейший Судие, но Твоей непобедимей благости и неизреченней благостыни сие не свойственно, Человеколюбнейший Владыко. Сего ради на неизследимое и непамятозлобное Твое милосердие дерзающе, приступаем к Тебе, Благодетелю, неразумнии и неблагодарнии. Не предаждь нас грех ради наших в руце сухости, и беззаконий ради наших, не сокрушиши нас узами глада. Но благости ради Твоея, подаждь земли и наследию Твоему дождь обильный и исполни недра земныя живородными Твоими водами и водными облаками воздух благораствори. И богатым Твоим дождем землю ороси и прозябения ея оживи, и возвеянием добрейших ветров плоды целы и полны сотвори, и умножи их благосердием Твоим. Теми бо определил еси телесную жизнь поддерживати, аще бо Ты вольными Твоими дождями не явишь благость, земля наша не даст плода своего. Но множества ради щедрот Твоих услыши моление нас недостойных рабов Твоих. Ты бо Источник милости, и благих Подателю, и Тебе славу возсылаем, со Безначальным Твоим Отцем и с Пресвятым и Благим и Животворящим Твоим Духом, ныне и присно и во веки веков, аминь.

Молитва четвертая

Господу помолимся.

Ты еси повелевый земли различныя изращати плоды; в наслаждение наше, Ты за грехи живших при Нои людей источники бездн и хляби небесные отверз, лице земли наводнил еси во истребление всякия плоти. Ты еси водами покрываяй превыспренняя Твоя. Ты еси облаки возвышаяй, и сим повелеваяй дождевныя испущати капли. Ты еси возводяй воду морскую, и изливаяй на лице земли. Ты еси дожди определивый, и дожди обильные посылаяй, и реки вод наполняяй, и напояяй землю, и упоевай бразды ея, во умножение прекрасных ея плодов, ты еси разделивый море и реку проходиму соделавый, и воду из камене источивый, и горесть водную в сладость преложивый. Весть водное естество своего Творца, знает своего Владыку, но не весть должное свое служение. Аще узрит Тебе, Владыку, гневающагося на нас, или безмерно движимо, погибель соделовает, или спрятаемо удерживается, и сухость и пламеновидный воздух бывает, и земная прозябения увядают, и мы в руце беды впадаем. Аще же паки видит Тебе, Человеколюбца Бога, благоуветлива и благопременительна, дожди уготовляет, и тучи на землю низносятся, и воздух благодышущий бывает, и земля Твое повеление услышавши, изобильныя плоды от своих недр прозябает. Тебе убо Творца и Создателя всех молим, глаголюще: помилуй нас, Господи, помилуй нас: помяни яко дела рук Твоих есмы, вонми неможению естества нашего, яко Ты оотворил еси нас. Виждь птиц стенание, скотов вопиение, младенческий плач, юношей вопль, старых сокрушение, сирот лишение, вдовиц уединение, убогих недостаточество, и всех людей Твоих молебный глас, и посети землю, и упой оную тучными дождями: мокроты бо лишающися, своим убо прозябением увядение, человекам же к скотам пагубою претит. Водою пагубу навед иногда, помянул еси Ноя носимаго в ковчеге, от безмерных вод оных: помянул же еси его, и птиц и скотов, и зверей, и ползающих и навел еси ветр на землю, и преста вода: и Ноя, и с ним животных, якоже семя соблюл еси, в бытие втораго мира; и ныне содержащее сухостию воздух гладом угрожает нам и смертию. Помяни уповающих на Тя людей: помяни и птиц, помяни и скотов, и дух росы наведи, и сухость да престанет, и семена земли сотвори к питанию человеков же и животных: и всех паки Твоего попечения сподоби. Ты бо еси Прозябаяй траву скотам, злак на службу человеков: и Ты еси изводяй хлеб от земли и вино источаяй, и елеем умащаяй человеческая лица: яко да подаваемым от Тебе благим во изобилии причащающеся, в веселии сердца прославим Твою благость, Отца и Сына и Святаго Духа, ныне и присно и во веки веков, аминь.

Молитва пятая

Господу помолимся.

Владыко Господи Иисусе Христе Боже наш, глаголом Своим все от небытия в бытие приведый, персть вземый от земли, и создавый человека, и душею словесною и образом Твоим почтый того, и рекий: раститеся и множитеся, и наполняйте землю; даяй пищу скотом и птенцем врановым. Ты и в дни великаго и спасительнаго Твоего во плоти пришествия, прежде убо седмию, потом же пятию хлебами, тысящи насытил еси многия: Сам, всеблагий Владыко, и Твоих людей сих призывающих Пресвятое Твое имя, Твоею вседетельною и великодарною десницею богатно препитай. Призри, Господи, на убогих людей Твоих, отверзающи руку Твою, и насыщающи всякое животно благоволения, ущедри всех нас милостивно. Ты бо, Владыко Человеколюбче, един еси Отец всех нас, и к Тебе единому очи возводим, яко младенцы к матери своей. Твое есть слово, Преблагий Владыко: просите и дастся вам, ищите, и обрящете. Подаждь убо просящим ныне, Владыко, с духовною пищею и нужную для плоти, и препитай алчущих людей Твоих, дожди благовременны и благорастворение воздухов, и плодов различных изобилие земли даруй: в немощи и губительстве, и огевице, и в недугах различных бедствующих посети. Избави, Господи, имя Твое призывающий всякий град и страну от глада, губительства, землетрясения, потопа, огня, меча и убийства, даруй нам милости Твоя, благодатию Безначальнаго и Единосущнаго Твоего Отца и Пресвятаго и Единочестнаго Твоего Духа: молитвами и моленьми Преблагословенныя Богородицы, богоглаголивых Твоих апостолов, и всех святых Твоих, аминь.

Молитва шестая

Господу помолимся.

Господи Иисусе Христе Боже наш, нашего ради спасения изволивый плоть носити, да прославиши чудно словесное естество, неизреченным Твоим благоусердием и благостию, и во истинном познании обращающихся из глубины греховныя простити обещаяй: егда бо к Тебе воззрят со смирением яко раби, исполяюще божественныя Твои заповеди, тогда со дерзновением возмогут Тя, Бога Милостиваго и Благосердаго имети. Ныне убо остави вся беззакония наша, и приклони к нам ухо Твое, и услыши нас смиренных и грешных, якоже иногда Фесвитянина Илию услышал еси, яко же глаголом единым связати небо к целомудрию непокоривых оных людей: таже тем паки обычное человеколюбие употребивый облакам повелевый, землю всю напоил еси водою благою: сице и ныне паки моленьми и теплыми молитвами того Твоего угодника, презри беззакония наша и грехи, и приими молитвы наша, и услыши нас в час сей тепле молящихся Тебе и разреши сухость сию земную, ради исповедания и вопля людей Твоих, и низпосли на нас дождь благий, яко да насытимся воды и земля наша даст плоды во время благопотребно в пищу нашу, и безсловесных животных. Ей, Господи Боже, наш, услыши нас грешных; и недостойных рабов Твоих, и не презри моления наша, и да не победит беззаконие наше милость Твою, но приклони, Господи, ухо Твое, и услыши нас. Виждь сокрушение и умилосердися, виждь от святаго Твоего жилища, виждь воздыхание убогих; виждь незрелый возраст младенцев, зельнейшею жаждею изнуряемый. Виждь незлобивых младенцев озлобление, виждь утробы матерни, виждь сосцы изсушаемые убиенных младенцев, виждь состаревшихся и юношей, и презри убо согрешения наша, яже в ведении и не в ведении, яже во уме и помышлении, и не отрини нас доконца. Не бо воды единыя жаждею таем, но и тьмами иных зол, грех наших ради: и к Тебе зрим, да полиет на нас дождь зрелейший же и изобильнейший, да и праведный Твой гнев уставиши лютаго сего пленения. Обоя убо просим, и молимся Тебе, Человеколюбче, да кладязи и поля наша наполниши водою, душевныя наша нивы в сытость напоиши, и исполниши Твоея благости: и кладези, сиречь сердца наша, веселием и неизреченною радостию и радованием упоиши и уставиши належащее на нас нестерпимое стремление злочестивых супостат. Ты бо еси Свободитель душ и телес наших, и Тебе славу возсылаем, Отцу и Сыну и Святому Духу, ныне и присно и во веки веки веков, аминь.

Молитва седьмая

(о бездождии и изменении ветров)

Господу помолимся.

Благий Человеколюбче Господи, землю единым словом соделавый, и из нея человека создавый, последи же неизреченным человеколюбием падшего сего, и раба греху бывша восприемый и освятивый, яко до не погибнет до конца дело рук Твоих, давый же сему и Своя заповеди в память Твоего пришествия и Твоих повелений, и Божественнаго вочеловечения. Темже трудился еси, и подвизался еси, и взалкал и вжадал еси, исполнивый вся нас ради: вшедый же в корабль, и по морю ходивый, и волны дивия и зельности ветров обуздавый, и вся пострадати претерпевый, даже до Креста и смерти: да в немже пострадал еси, и искусился еси, поможеши нам немощствующим. Сам и ныне, Царю Святый, наше неможение человеколюбно восприемый, умилосердися о нас обуреваемых зело, и скудостию потребных изнуряемых: подаждь нам Твою благость, упой землю нашу водой чистою, к плодоношению ея, полезныя нам воздухи даруй. И якоже иногда учеников Твоих погружаемых спасл еси от моря, и зельности ветров: такоже и ныне спаси нас от содержащаго нас обстояния. Утоли и ныне морское свирепство, укроти сопротивных духов Твоим повелением Божественным: даждь нам тишину и упокоение от скорбных. Ей Господи Иисусе Христе Боже наш, виждь и призри от святаго жилища Твоего на виноград сей, и соверши его, егоже насади десница Твоя, и даждь Духа праваго ко избавлению от находящих на нас напастей, молитвами рождшия Тя Матере, и всех святых Твоих, аминь.

И обычный отпуст.

Последование молебного пения во время безведрия

Иерею рекшу: Благословен Бог наш:

Чтец: Царю Небесный: Трисвятое. Отче наш:

Иерей же: Яко Твое есть Царство:

Чтец: Господи, помилуй (12 раз). Приидите, поклонимся: (трижды).

И псалом (68/2–4, 14–19, 30–31, 33–37):

Спаси мя, Боже, яко внидоша воды до души моея. Углебох в тимении глубины, и несть постояния: приидох во глубины морския, и буря потопи мя Утрудихся зовый, измолче гортань мой: исчезосте очи мои, от еже уповати ми на Бога моего. Аз же молитвою моею к Тебе, Боже, время благоволения, Боже, во множестве милости Твоея услыши мя, во истине спасения Твоего. Спаси мя от брения, да не углебну, да избавлюся от ненавидящих мя, и от глубоких вод. Да не потопит мене буря водная, ниже да пожрет мене глубина, ниже сведет о мне ровенник уст своих. Услыши мя, Господи, яко блага милость Твоя, по множеству щедрот Твоих призри на мя. Не отврати лица Твоего от отрока Твоего, яко скорблю, скоро услыши мя. Вонми души моей, и избави ю, враг моих ради избави мя. Нищ и боляй есмь аз, спасение Твое, Боже, да приимет мя. Восхвалю имя Бога моего с песнею, возвеличу Его во хвалении. Да узрят нищии и возвеселятся: взыщите Бога, и жива будет душа ваша. Яко услыша убогия Господь, и окованныя Своя не уничижи. Да восхвалят Его небеса и земля, море и вся живущая в нем. Яко Бог спасет Сиона. И семя рабов Твоих удержит его, и любящии имя Твое вселятся в нем.

Слава, и ныне.

Аллилуия, аллилуия, аллилуия, слава Тебе Боже. (Трижды.)

Посем диакон глаголет ектению великую.

Миром Господу помолимся.

И прочая, даже до: О плавающих:

И абие прилагает сия:

О еже не в гневе прещения Своего погубити нас, грехов ради и беззаконий наших: но милости и щедроты Своя от века сущия помянути, и помиловати нас, Господу помолимся.

О еже помянути завет Свой, иже к Ною, и не растлити безвременною мокротою, и мрачным злорастворным воздухом, и темною мглою землю, и нищих людей Своих: но милостивно пощадити достояние Свое, и солнцу плодоносными лучами и мерною теплотою возсияти на земли повелети, Господу помолимся,

О еже повелети облакам престати от безвременнаго дождя, и мраку разъитися, светлости же солнечной возсияти, Господу помолимся.

О еже пощадити людей и скотов, и всю землю сию, и не растлити оную безвременным дождевным лиянием, Господу помолимся.

О еже подати благорастворенное ведро достоянию Своему, и умножити плоды земныя, Господу помолимся.

О еже не по грехам нашим воздати нам, ни по беззакониям нашим наказовати нас, но по великой милости Своей, и по многим щедротам Своим, явити на нас скорое Свое человеколюбие и благость, Господу помолимся.

О еже не растлити плоды и семена земная грехов ради наших, безвременным дождевным лиянием, но вольным ведром пощадити и умножити их нищих ради людей Своих, Господу помолимся.

О еже благоприятным быти молитвам нашим, и избавити нас от глада, губительства, землетрясения, потопа, огня, града, меча, нашествия иноплеменников, междоусобной брани, и всякой смертоносной язвы, Господу помолимся.

О избавитися нам:

Заступи, спаси:

Пресвятую, Пречистую:

Возглас: Яко подобает Тебе всякая слава, честь и поклонение:

Бог Господь и явися нам: на глас 2.

Тропарь, глас тойже:

Призри милостивно Боже, на людей согрешивших, и не презри в покаянии к Тебе припадающих, но яко Благ помилуй, и вскоре праведнаго Твоего избави прещения, молитвами Богородицы, едине Человеколюбче. (Дважды.)

Слава, и ныне. Богородичен:

Скорая миру Помощнице, Дево Богородице, Твоего предстательства, и крепкаго заступления усердно просим: умилосердися о скорбящих людех, и умоли милостивого Сына Твоего и Бога, избавити нас от належащия беды, и праведнаго Своего прещения, едина в женах Благословенная.

Таже псалом 50: Помилуй мя Боже:

По скончании же псалма, абие певцы поют канон, глас 6.

Поем же его без ирмосов.

Песнь 1

Ирмос: Яко по суху пешешествовав:

Припев: Помилуй нас, Господи, людей согрешивших.

Приидите, вернии, песнь нову воспоим Владыце Богу, глаголюще: умилосердися яко Щедр, и помилуй безмерно согрешивших. (Дважды.)

Слава: Приими молитвы и слезы, Христе Боже, молящихся Тебе ныне нас рабов Твоих, и подаждь времена ведренна к плодоношению земли.

И ныне: Ускори, Владычице Марие, пречистеи Твои руце милостивно воздети к Сыну Твоему и Богу, да подаст ведро, и пищу верным рабам Своим.

Катавасия по всякой песни:

Помилуй нас, Владыко Всемилостиве, людей согрешивших и не растли плоды и семена земные безвременным дождем, яко мы усердно к Тебе прибегаем, яко ко Творцу, Владыце и Промыслителю нашему.

Спаси от настоящие беды рабов Твоих, Пречистая Богородице Дево, яко мы вси по Бозе к Тебе прибегаем, яко к милосердой Матери нашей и Предстательнице.

Песнь 3

Ирмос: Несть свят:

Помилуй нас, Господи, людей согрешивших.

Не яростию Твоею обличи нас, Господи, якоже пророк вопиет, ни гневом Твоим накажи нас, но молитвами Пречистыя Твоея Матере, излей на нас обильно милости Твоя. (Дважды.)

Слава: Люди Твои со слезами вопиют Тебе Владыко: умилосердися яко щедр, и подаждь нам ведро и воздухи благорастворны, обилие же и велию милость.

И ныне: Не презри слез наших, Богородице Владычице, и не, отвергни воздыхания наша, но моли Сына Твоего прилежно, подати ведро земли, и людем Твоим велию милость.

Катавасия: Помилуй нас, Владыко Всемилостиве, людей согрешивших и не растли плоды и семена земные безвременным дождем, яко мы усердно к Тебе прибегаем, яко ко Творцу, Владыце и Промыслителю нашему.

Спаси от настоящие беды рабов Твоих, Пречистая Богородице Дево, яко мы вси по Бозе к Тебе прибегаем, яко к милосердой Матери нашей и Предстательнице.

Ектения великая:

Помилуй нас Боже, по велицей милости Твоей:

Достойная казнем сотворихом, и праведен суд Твой постиже нас, Господи, но пощади, пощади людей согрешивших, и отврати гнев Твой, праведно на нас движимый, в покаянии к Тебе припадаем и смиренно молим Тя, услыши и помилуй.

Да не потопит нас, Господи, буря водная, и да не растлиши землю, и гладом да не умориши нас людей Твоих, но яко Благ устави водное лияние и теплоте солнечной возсияти на земли яко Всемогущий повели, прилежно молимся Тебе, Царю Пресвятый, услыши и помилуй.

Нищих ради людей Твоих и скотов, мрачному воздуху и темной мгле разъитися, и лучам солнечным возсияти повели, Всещедрый Господи, да не безвременно скончаемся, молимся Тебе, скоро услыши и помилуй.

Спаси нас, Господи, от мрачнаго злораствореннаго воздуха, от безвременныя мокроты и темныя мглы, да не исчезнут в суете дние наши, и лета наша в воздыханиих, но помяни завет Твой, иже к Ною, и сотвори с нами по милости Твоей, сокрушенным сердцем молимся Тебе, услыши и помилуй.

В скорби и печали нашей к Тебе, Господу Богу нашему, умиленно вопием: да приидет к Тебе молитва наша, да изыдет из истления жизнь наша, и да не исчезнет безвременно, милостивно услыши глас нищих людей Твоих, и человеколюбно помилуй.

Не на дугу, юже в знамение завета на облацех поставил еси, Господи, но на Твоя щедроты взираем, и Твою милость привлещи ищем, к Тебе богатому в милости и безмерному в щедротах, сердцем сокрушенным молимся: подаждь нам мерное, и плодоносное ведро с благорастворенным воздухом, и скоро яко Щедр услыши и помилуй.

Возглас: Яко милостив:

Седален, глас 5:

К Тебе, Спасе наш Иисусе превечный Боже, прибегаем грешнии раби Твои, и со слезами в покаянии припадающе вопием Тебе: пощади, пощади, Щедре, людей безответных, и не растли нас безвременным дождевным лиянием и злорастворением воздушным, но подаждь ведро, и умножи плоды земныя, яко Человеколюбец.

Слава, и ныне. Богородичен:

Тя, Препетая Богородице, воистинну Святейшую Херувимов и высшую небес исповедующе, имамы грешнии Заступницу и Тобою обретаем во время бед спасение: тем не престай за нас молящи, державо и прибежище душам нашим.

Песнь 4

Ирмос: Христос моя сила:

Помилуй нас, Господи, людей согрешивших.

В руках Твоих, Владыко Христе, содержиши превышенебесныя и поднебесная воды и теплоту солнечную. Темже молим Тя: обое по мере требования даруй на пользу рабам Твоим. (Дважды.)

Слава: Исповедающим Твое владычество, Строителю всея твари Христе, содержай скипетро небесное и откормляяй всю тварь, подаждь благорастворныя воздухи и плодородие земли, молитвами Пречистая Твоея Maтере.

И ныне: Великое дерзновение имаши к Рождшемуся из Тебе, яко никтоже ин: тем Владычице, молися о рабах Твоих, избавитися нам от глада и от нашествия иноплеменник.

Катавасия:

Помилуй нас, Владыко Всемилостиве, людей согрешивших и не растли плоды и семена земныя безвременным дождем, яко мы усердно к Тебе прибегаем, яко ко Творцу, Владыце и Промыслителю нашему.

Спаси от настоящие беды рабов Твоих, Пречистая Богородице Дево, яко мы вси по Бозе к Тебе прибегаем, яко к милосердой Матери нашей и Предстательнице.

Песнь 5

Ирмос: Божиим светом:

Помилуй нас, Господи, людей согрешивших.

Плавающих Пристанище, и Надеждо ненадежных, Христе, и всех христиан в бедах скорый Послушателю: услыши и нас ныне, и подаждь ведро к плодоношению земли. Дважды.

Слава: Врачу болящих, и скорбящих Утешителю, Небесный Царю Христе, призри с высоты святаго Твоего жилища, и услыши плач и стенание рабов Твоих, и яко Щедр подаждь ведро к плодоношению земли.

И ныне: Скоро приими, Госпоже, молитву рабов Твоих, не поминающи наших безчисленных грехов и испроси нам, Дево, ведро на пользу, к плодоношению земли.

Катавасия:

Помилуй нас, Владыко Всемилостиве, людей согрешивших и не растли плоды и семена земныя безвременным дождем, яко мы усердно к Тебе прибегаем, яко ко Творцу, Владыце и Промыслителю нашему.

Спаси от настоящия беды рабов Твоих, Пречистая Богородице Дево, яко мы вси по Бозе к Тебе прибегаем, яко к милосердой Матери нашей и Предстательнице.

Песнь 6

Ирмос: Житейское море:

Помилуй нас, Господи, людей согрешивших.

Молением пророка Твоего, Господи, затворил еси небеса три лета и месяцей шесть, к познанию и покаянию противных: егоже ныне от нас Господи, не истязуй, но милостию Твоею ущедри нас. (Дважды.)

Слава: Приимый разбойничо покаяние, Христе, и того единем часом спасый вопиюща: помяни мя, Спасе, во Царствии. И нас ныне в покаянии Тебе припадающих пощади, и помилуй.

И ныне: Помолися о нас, Владычице, к Сыну Твоему и Богу, да не якоже при Нои лиянием водным, грех ради наших, растлит нас, но якоже ниневитян покаявшихся помилует.

Катавасия:

Помилуй нас, Владыко Всемилостиве, людей согрешивших и не растли плоды и семена земныя безвременным дождем, яко мы усердно к Тебе прибегаем, яко ко Творцу, Владыце и Промыслителю нашему.

Спаси от настоящия беды рабов Твоих, Пречистая Богородице Дево, яко мы вси по Бозе к Тебе прибегаем, яко к милосердой Матери нашей и Предстательнице.

Ектения малая.

Возглас: Ты бо еси Царь мира:

Кондак, глас 2:

Не отрини до конца согрешивших людей Твоих, Владыко и не отстави милости и щедроты Твоя от нас, но яко бездна сый щедрот и милосердия пучина, приими мольбы наша, в избави нас от належащия беды и нужды, един бо еси Благоуветлив.

Таже, степенна, антифон 1-й, глас 6:

На небо очи мои возвожу к Тебе, Слове, ущедри мя, да живу Тебе. (Дважды.)

Помилуй нас уничиженных, устрояя благопотребныя Твоя сосуды, Слове. (Дважды.)

Слава: Святый Дух виновник спасения всех: аще коему Сей по достоянию дхнет, скоро вземлет от земных, окриляет, возращает, устрояет горе.

И ныне. Тойже.

Таже прокимен, глас 4: Спаси мя, Боже, яко внидоша воды во души моея.

Стих: Углебох в тимении глубины, и несть постояния.

Таже: Всякое дыхание:

От Матфея Святаго Евангелия чтение. Зач. 20 от полу.

Рече Господь: просите и дастся вам; ищите, и обрящете; толцыте, и отверзется вам. Всяк бо просяй приемлет, и ищай обретает, и толкущему отверзется. Или кто есть от вас человек, егоже аще воспросит сын его хлеба, еда камень подаст ему? Или аще рыбы просит, еда змию подаст ему? Аще убо вы, лукави суще, умеете даяния блага даяти чадом вашим: кольми паче Отец ваш Небесный даст блага просящим у Него.

Слава: Отче, Слове и Душе, Троице Святая, очисти множества согрешений наших.

И ныне: Молитвами Богородицы, Милостиве, очисти множества согрешений наших.

Помилуй мя, Боже, по велицей милости Твоей, и по множеству щедрот Твоих очисти беззаконие мое.

Стихира, глас 6:

Страшен еси, Господи, и кто стерпит праведный Твой гнев? Или кто Тебе умолит, Благий, о людех согрешивших и отчаявшихся? Токмо небеснии Ангели, Начала и Власти, Престоли и Господьствия, Херувими и Серафими, непрестанно Тебе вопиющии: Свят, Свят, Свят еси, Господи. Тем, Пресвятый Владыко, дела рук Твоих не презри, но по милосердию Твоея милости, спаси людей Твоих, и грады и веси погибающие.

Слава, и ныне. Богородичен:

Никтоже притекаяй к Тебе посрамлен от Тебе исходит, Чистая Дево Богородице, но просит благодати и приемлет дарования к полезному прошению.

Иерей: Спаси Боже, люди Твоя:

Лик: Господи, помилуй (15).

Возглас: Милостию и щедротами:

Песнь 7

Ирмoc: Росодательну убо пещь:

Помилуй нас, Господи, людей согрешивших.

Никогдаже отлучайся от нас, Спасе щедрый, яко пастырь, овец Своих, но присно с нами неотступно пребывая, от всяких бед свободи верно Тебе от сердца вопиющих: благословен еси, Боже, и препрославленный. (Дважды.)

Слава: Ты, Боже Всесильный, и Царю Пресвятый, простерший небо яко шатер, и море песком оградивый, посли нам теплоту солнечную, и благорастворенны воздухи, верно Тебе вопиющих: благословен еси, Боже, и препрославленный.

И ныне: Научи, Владычице, язык мой глаголати полезная, Надежде всем концем земли, и молися Сыну Твоему и Богу, подати ведро на земли, и ущедрити Христу вопиющих: благословен еси, Боже, и препрославленный.

Катавасия:

Помилуй нас, Владыко Всемилостиве, людей согрешивших и не растли плоды и семена земныя безвременным дождем, яко мы усердно к Тебе прибегаем, яко ко Творцу, Владыце и Промыслителю нашему.

Спаси от настоящия беды рабов Твоих, Пречистая Богородице Дево, яко мы вси по Бозе к Тебе прибегаем, яко к милосердой Матери нашей и Предстательнице.

Песнь 8

Ирмос: Из пламене преподобным:

Помилуй нас, Господи, людей согрешивших.

Чии раби и создание есмы? Не Твои ли Превечный Боже? Услыши убо наши молитвы худыя и даруй ведро на землю и росу полезную, да Тя превозносим во вся веки. (Дважды.)

Слава: Рекл еси, Милостивый Владыко, ищите и обрящете; толцыте и отверзется вам; просите и приимете. Темже к Тебе припадаем, и прилежно молим: пощади нас, Милостиве, превозносящих Тя во вся веки.

И ныне: Чистая Владычице Богородице, избави молитвами Твоими людей Твоих от бед и скорбей всяких, подающи обильныя милости и плоды на пищу чтущим Тя и превозносящим во вся веки.

Катавасия:

Помилуй нас, Влыдыко Всемилостиве, людей согрешивших и не растли плоды и семена земныя безвременным дождем, яко мы усердно к Тебе прибегаем, яко ко Творцу, Владыце и Промыслителю нашему.

Спаси от настоящия беды рабов Твоих, Пречистая Богородице Дево, яко мы вси по Бозе к Тебе прибегаем, яко к милосердой Матери нашей и Предстательнице.

Песнь 9

Ирмос: Бога человеком:

Помилуй нас, Господи, людей согрешивших.

Павел гонитель покаявся, сосуд избранен бьсть Тебе Владычице и Богу всех: и мы грешнии надеющеся на Твое милосердие, в покаянии Тебе вопием: прости вся согрешения наша, и посли ведро земли, и росу благую и полезную, молитвами Пречистая Твоея Матере. (Дважды.)

Слава: Верховный ученик Твой Петр, трижды отвергся Тебе, плачем горьким обрете у тебе, Милосерде Христе, прощение: и мы того ревнующе покаянию, Тебе во умилении со слезами вопием: согрешихом, прости, милосерде, и избави нас от всякаго зла, молитвами пречистыя Своея Матере.

И ныне: Избави нас, Пречистая, от всякаго злаго обстояния, и от безвременнаго лияния дождевнаго, нашедшаго ныне на нас, и испроси свыше у Сына Твоего и Бога, подати благовременное ведро рабам Своим, и изобильный плод земный на пищу людем, да Тя непрестанном величаем.

Таже: Достойно ecть: Трисвятое. Отче наш:

Тропарь: Помилуй нас, Господи, помилуй нас:

Слава: Господи помилуй нас:

И ныне: Милосердия двери отверзи нам:

Ектения сугубая:

Помилуй нас, Боже, по велицей милости Твоей, молим Ти ся, услыши и помилуй.

Еще молимся о Великом Господине:

Еще молимся о Богохранимей стране:

Еще молимся о еже отвратити от нас всяк гнев Свой, праведно движимый на нас, и простити нам всякое согрешение вольное же и невольное, и помиловати нас недостойных рабов Своих, в сердце сокрушенном рцем вси: Господи, услыши и помилуй.

Еще молимся о еже услышати Господу Богу глас молитвы нашея, и помиловати нас, и послати благовременное ведро на земли, и утешити нас скорбных рабов Своих, рцем вси со слезами: услыши, Милостиве, и помилуй.

Собираяй воды во облацех от концев земных, повелением Твоим удержи их и даждь ведро на землю, со умилением молимся Тебе, Всещедрый Владыко, услыши и милостивно помилуй.

Призываяй воду морскую, и сию паки всемогущею силою Твоею удержати могий, и просветити поднебесную, в покаянии молимся Тебе, Всемилостиве Господи, услыши и человеколюбно помилуй.

Ведро вольное пошли Господи на землю, и от истления скоро избави нас, болезненным сердцем молимся Тебе, услыши и щедротно помилуй.

Посещаяй землю и умножаяй жита ея, Прозябаяй траву, плоды же на службу человекам, помилуй людей и скотов, и запрети безвременному дождевному лиянию, солнцу же благовременно возсияти на земли, и умножити плоды ея повели, молимся Тебе, Благосерде Господи, услыши и яко Благ помилуй.

Яко очи раб в руку господий своих: тако очи наши к Тебе, Боже наш, взирают, Дóндеже ущедриши нас. Темже не погуби нас безмерною мокротою, но милостивно призри на нас ведром и щедротно помилуй.

Осияваяй солнце на злых и благих, и подаваяй ведро, и росу благоплодоносну, и благорастворныя воздухи на пользу созданию Твоему, не яростию Твоею накажи нас, но милостивно умножи семена земныя и плоды ея, в покаянии молимся Тебе, Человеколюбче Господи, услыши и яко Щедр помилуй.

Одеяйся светом яко ризою, возсияй свет солнечный на земли нашей, и изсуши излишнюю мокроту ея ко изобильному плодоношению, молимся Тебе, услыши и милостивно помилуй.

He помяни беззаконий наших, Владыко, аще бо беззакония назриши, никтоже постоит пред Тобою: но скоро да предварят нас щедроты Твои, Господи, яко обнищахом зело: да не растлит нас безведрие, и до конца да не погубит, молимся Тебе, скоро услыши и милостивно помилуй.

Упование и спасение православно в Тя верующих, Господи, избави землю нашу (град сей, или всю страну) от глада, губительства, землетрясения, потопа, огня, меча, нашествия иноплеменных и междоусобной брани, и всякой смертоносной язвы, и милостив, и тих, и благоуветлив буди, Человеколюбче, о гресех наших, и помилуй нас. И отврати весь гнев Твой праведно движимый на нас. И избави нас от угрожающего праведнаго прещения Твоего. И просвети благодатию Твоею всю поднебесную к плодоношению земли, и ко окормлению жития нашего, рцем вси со слезами: Господи Святый, скоро услыши и милостивно помилуй.

Все поют: Господи, помилуй (трижды).

Возглас: Услыши ны, Боже:

Диакон глаголет: Со умилением вси колена преклоньше, Господу помолимся.

Все поют: Господи, помилуй (трижды).

И приклоняют колена.

Иерей чтет велегласно:

Молитва

Владыко Господи Боже наш, древле ревнителя Илии пророка Твоего мольбу послушавый, и на время дождь удержати изволивый. И ныне человеколюбивый Творче и милостивый Господи, призри и на нас смиренных и недостойных рабов Твоих, приими наши смиренныя мольбы, и яко Щедр презри наша прегрешения и умолен быв от самаго Твоего человеколюбия, подаждь ведро достоянию Твоему, и солнце просвети на требующих и просящих от Тебе милости. Возвесели лице земли нищих ради людей Твоих, младенцев же и скотов и иных всех животных, ихже насыщаеши Твоим благоволением и даеши пищу им во благо время. Ей, Господи Боже наш, не отрини вотще мольбу нашу, и не посрами нас от чаяния нашего, но пощади нас по милости Твоей, и посети щедротами Твоими, исчезают бо всуе дние наши, и оскудевает в болезни жизнь наша. Не погуби убо нас беззаконий ради наших, имиже негодование и ярость Твою на себе привлекохом, но сотвори с нами по тихости Твоей, и по множеству милости Твоея. Се бо душею сокрушенною, и духом смиренным пред Тобою припадаем, и яко раби непотребнии, паче же большия казни достойнии, в покаянии умиленно Тебе вопием: согрешихом и беззаконновахом, и прегрешихом во всем, заповеди Твоя преступающе и сего ради вся, яже наводиши на нас, истиною и судом наводиши. Но не до конца тлению, гладу же и погибели предаждь нас, и да не потопит нас буря водная, но во гневе милости помяни, и туне щедрот Твоих ради умилостивися, и Твое создание и дело рук Твоих яко Благ помилуй, и от всякаго зла скоро избави. Тебе бо свойственно есть миловати и спасати нас, Боже наш, и Тебе славу возсылаем, Отцу и Сыну и Святому Духу, ныне и присно и во веки веков.

Лик: Аминь.

И бывает отпуст.

Последование молебного пения о сущих в скорбях и различных обстояниях

По обычном начале псалом избранный:

Господи, да не яростию Твоею облечиши мене, ниже гневом Твоим накажеши мене, яко стрелы Твои унзоша во мне, и утвердил еси на мне руку Твою. Несть исцеления в плоти моей от лица гнева Твоего, несть мира в костях моих от лица грехов моих. Яко беззакония моя превзыдоша главую мою, яко бремя тяжкое отяготеша на мне. Возсмердеша и согниша раны мои от лиц безумия моего. Пострадах и слякохся до конца, весь день сетуя хождах. Озлоблен бых и смирихся до зела, рыках от воздыхания сердца моего (37/2–7, 9). Исполнися зол душа моя и жизнь моя аду приближися (87/4). Душа моя смятеся (41/7), скорби сердца моего умножишася (24/17). Исчезе в болезни жизнь моя, и лета моя в воздыханиях, изнеможе нищетою крепость моя и кости моя смятошася (30/11). На мне приидоша гневи Твои, устрашения Твоя возмутиша мя (87/17). Рех во изступлении моем: отвержен есмь от лица очей Твоих (30/23). Вскую, Господи, отрееши душу мою, отвращаеши лице Твое от Мене (87/15)? Аз же на Тя, Господи, уповах, рех: Ты еси Бог мой. В руках Твоих жребии мои, избави мя из руки врагов моих и от гонящих мя. Просвети лице Твое на раба Твоего, спаси мя милостию Твоею. Господи, да не постыжуся яко призвах Тя (30/15–18).

Слава, и ныне. Аллилуия (трижды).

На Бог Господь:

Тропарь, глас 1:

Спаси, Господи, людей Твоих и благослови достояние Твое, помоги труждающимся и обремененным, утеши скорбящих и унывающих и от всех бед сохрани рабов Твоих. (Дважды.)

Слава, глас 8: С вышних презираяяй, убогих приемляй, посети нас грехов ради наших беды и скорби терпящих, Владыко Всемилостиве, молитвами Богородицы и святых даруй душам нашим велию милость.

И ныне, глас 2: Всех скорбящих Радосте и обидимых Заступнице, алчущих Питательнице, странников Руководительнице и обуреваемых Пристанище, немощных Покров и Заступнице, Жезл старости, Мати Бога и Вышнего, Ты еси, Пречистая; потщися, молимся, спастися рабам Твоим.

Посем иной псалом избранный:

Вскую прискорбна еси душе моя, и Вскую смущаеши мя? Уповай на Бога, яко исповемся Ему. Реку Богу: Зacтупник мой еси, почто мя забыл еси и Вскую сетуя хожду (41/6, 10). Ко Господу внегда скорблю, воззвах (119/1). В день скорби моей Бога взысках руками моими (76/3). Из глубины воззвах к Тебе, Господи, Господи, услыши глас мой. Да будут уши Твои внемлюще гласу моления моего (129/1–2). Бог нам Прибежище и Сила, Помощник в скорбях, обретших нас зело (45/2). Услыши мя, Господи, яко блага милость Твоя, по множеству щедрот Твоих призри на мя. Не отврати лица Твоего от отрока Твоего, яко скорблю, скоро услыши мя, вонми души моей и избави мя (68/17–19). Боже, в помощь мою вонми, Господи, помощи ми потщися (69/2). Сохрани душу мою и избави мя, да не постыжуся, яко уповах на Тя (24/20). На Тя, Господи, уповах, да не постыжуся в век (70/1).

Канон, глас 6:

Песнь 1

Милостиве Господи, помилуй рабов Твоих, милости ожидающих.

Пресвятая Богородице, спаси нас.

Святии Ангели Хранители наши, молите Бога о нас.

Крестителю Спасов Иоанне, моли Бога о нас66.

Слава, и ныне.

Песнь 3

Милостиве Господи, помилуй рабов Твоих, милости ожидающих.

Святый праведный Иове, моли Бога о нас67.

Святый пророче Божий Илие, моли Бога о нас68.

Святый праведньй Симеоне, моли Бога о нас69.

Слава, и ныне.

Катавасия:

По молитвам святых Твоих, Милостиве, избави от бед и скорбей рабов Твоих, милости ожидающих, яко мы усердно к Тебе прибегаем, к милости Подателю и всех скорбных Утешителю.

Спаси от бед и скорбей рабов Твоих, Пресвятая Богородице Дево, яко мы все по Бозе к Тебе прибегаем, яко к милосердой Матери нашей и всех скорбящих Радости.

Ектения сугубая:

Помилуй нас Боже:

Еще молимся о милости, жизни, мире, здравии, спасении, посещении, прощении и оставлении грехов рабов Божиих (имя рек) и всех скорбящих, своими грехами беды на себя навлекающих, и от злобы людской терпящих.

Еще молимся о братиях наших на судищи, в темницах, узах, заточении, изгнании и горьких работах сущих.

Еще молимся о врагах наших, ненавидящих и гонящих нас, и всех сущих вне Православной Церкви и заблуждших.

Еще молимся за всю братию и за всех христиан.

Возглас: Яко милостив:

Песнь 4

Милостиве Господи, помилуй рабов Твоих, милости ожидающих.

Святый апостоле Петре, моли Бога о нас70.

Святый апостоле Павле, моли Бога о нас71.

Первомучениче и архидиаконе Стефане, моли Бога о нас72.

Слава, и ныне.

Песнь 5

Милостиве Господи, помилуй рабов Твоих, милости ожидающих.

Священномучениче Клименте, моли Бога о нас73.

Святителю отче Афанасие, моли Бога о нас74.

Святителю отче Иоанне Златоусте, моли Бога о нас75.

Слава, и ныне.

Песнь 6

Милостиве Господи, помилуй рабов Твоих, милости ожидающих.

Священномучениче Клименте, моли Бога о нас76.

Святая великомученица Анастасие, моли Бога о нас77.

Священномучениче Ермогене, моли Бога о нас78.

Слава, и ныне.

Катавасия и ектения малая.

Прокимен, глас 4:

Господи, услыши молитву мою и вопль мой к Тебе да приидет.

Стих: Воньже аще день скорблю, приклони ко мне ухо Твое.

Евангелие от Матфея, зачало 43 от полу (11, 28–30).

Рече Господь: приидите ко Мне вси труждающиися и обремененнии, и Аз упокою вы. Возмите иго Мое на себе, и научитеся от Мене, яко кроток есмь к смирен сердцем: и обрящете покой душам вашим. Иго бо Мое благо и бремя Мое легко есть.

Песнь 7

Милостиве Господи, помилуй рабов Твоих, милости ожидающих,

Святителю отче Николае, моли Бога о нас79.

Преподобная и благоверная княгиня Анно, моли Бога о нас80.

Преподобне и благоверне княже Иоанне, моли Бога о нас81.

Слава, и ныне.

Песнь 8

Милостиве Господи, помилуй рабов Твоих милости ожидающих.

Преподобне отче Пимене, моли Бога о нас82>.

Святый великомучениче Евстафие, моли Бога о нас83.

Преподобнии Ксенофонте и Марие, Иоанне и Аркадие, молите Бога о нас84.

Слава, и ныне.

Песнь 9

Милостиве Господи, помилуй рабов Твоих, милости ожидающих.

Святителю отче Иоанне, моли Бога о нас85.

Святый праведный Филарете, моли Бога о нас86.

Святая праведная Иулиание, моли Бога о нас87.

Преподобне отче Сампсоне, моли Бога о нас88

Преподобне отче Зотике, моли Бога о нас89.

Слава, и ныне.

Достойно есть: Трисвятое. Отче наш:

Тропарь, глас 7:

Святии мученицы, добре страдальчествовашии к венчавшиися, молитеся ко Господу, помиловатися душам нашим.

Слава, и ныне. Богородичен, глас 5:

Утоли болезни многовоздыхающей души моей, утолившая всяку слезу от лица земли; Ты бо человеков болезни отгоняеши и грешных скорби разрушаеши. Тебе бо вси стяжахом надежду и утверждение, Пресвятая Мати Дево.

Ектения сугубая:

Помилуй нас Боже:

Еще молимся Тебе, Господу Богу нашему, о еже помиловати всех нас скорбящих, своими грехами беды на себя навлекающих и от злобы людской терпящих, и о еже милостиву и благоуветливу быти к нам Тебе, благому и человеколюбивому Богу нашему, отвратити гнев Свой, праведно на нас движимый, избавити нас от заслуженного нами и праведнаго наказания и помиловати нас.

Господи, помилуй (15).

Еще молимся и о еже услышати:

Возглас: Услыши ны, Боже:

Молитва

Владыко Господи Иисусе Христе Боже наш, Боже всякаго милосердия и щедрот, долготерпеливый и многомилостивый, любящий праведных и грешных милующий. Ты рекл еси пречистыми Твоими устами: приидите ко Мне вси труждающиися и обремененнии, и Аз упокою вас. Се мы, грешные и недостойные, в скорбях и бедах изнемогающии, к Тебе притекаем и припадающе молим: вонми предстательству о нас рождшей Тя Богоматери, приими молитвы святых Твоих, снизойди к нашим немощам и яви милость людям Твоим в различных состояниях сущим и на Твое человеколюбие уповающим: скорбящих утеши, унывающих ободри, ослабевших укрепи, больных исцели, изувеченным и расслабленным терпение пошли, гладных напитай, нагих одей, безприютным приют даруй, труждающимся помоги, обремененным заботами житейскими и тяжелыми трудами облегчение подаждь, на судилищах, в темницах, узах, заточении, изгнании и горьких работах сущих в терпении укрепи и на свободу скоро изведи, на брани сущих сохрани, плененных возврати, разлученных соедини, враждующих примири, всем во всем милость яви и всех Церкви Твоей Святой представи благоугождающими. Тебе бо свойственно есть миловати и спасати нас, Господи Боже наш, и Тебе славу возсылаем со Безначальным Твоим Отцем и Святым Духом, ныне и присно и во веки веков. Аминь.

Отпуст:

Христос истинный Бог наш, молитвами Пречистой Своей Матери, предстательством святых Ангелов Хранителей наших, святых славных и всехвальных апостолов, святых славных и добропобедных мучеников и всех святых, помилует и спасет нас, яко Благ и Человеколюбец.

Лик: Господи, помилуй (трижды).

Последование молебного пения о умножении любви и о искоренении ненависти и всякой злобы

По обычном начале псалом 132:

Се что добро, или что красно; но еже жити братии вкупе? Яко миро на главе, сходящее на браду, браду Аароню, сходящее на ометы одежды его; яко роса Аермонская, сходящая на горы Сионския, яко тамо заповеда Господь благословение и живот до века.

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О еже очистити нас от грехов и беззаконий наших, изсушающих в нас любовь к Богу и к ближним, водрузити же оную силою, действом и благодатию Пресвятаго Своего Духа и вкоренити в сердца всех нас, прилежно Господу помолимся.

О еже всеяти в нас и благодатию Пресвятаго Своего Духа вкоренити новую Своего Новаго Завета заповедь любити друг друга и не себе угождати, но о славе Божией и о созидании ближняго всегда ревновати, Господу помолимся.

О еже искоренити в нас ненависть, зависть, злобу и все прочие страсти, братолюбие разрушающия, и нелицемерную любовь всеяти, усердно Господу помолимся.

О еже теплую любовь к Богу и к ближним в нас благодатию Пресвятаго Своего Духа распалити, и тою все страсти душ и телес наших из корене сожещи, Господу помолимся.

О еже искоренити в нас страсть самолюбия, добродетель же братолюбия силою Пресвятаго Своего Духа вкоренити, сердцем сокрушенным Господу помолимся.

О еже не любити нам мира и всего яже в мире, но истинною любовию Бога и славу Его, и пользу и спасение ближних возлюбити, и на небеси уготованная благая присно зрети, и искати сих вседушно, Господу помолимся.

О еже принудити нас силою, действом и благодатию Пресвятаго Своего Духа не точию друзей и братий наших, но и врагов истинно любити, и ненавидящим нас благотворити, о них молитися, и о спасении их тщание имети, Господу помолимся.

О еже себе внегда внимати, себя окаявати и своя согрешения всегда зрети, себя пред Богом и пред всеми смиряти, брата никогдаже осуждати, но яко самаго себя того любити, силою, действом и благодатию Пресвятаго Духа, Господу помолимся.

О еже поревновати нам древних христиан к Богу и к братиям горящей любви, и наследниками и преемниками тех быти, не образом точию, но детельною истиною, силою, действом и благодатию Пресвятаго Духа, Господу помолимся.

О еже в правоверии непозыблемых, в мире и союзе любви горящих, и во всех добродетелях преспевающих нас всегда сохранити и от всех душетленных страстей невредимыми соблюсти, силою, действом и благодатию Пресвятаго Духа, Господу помолимся.

О избавитися нам:

Заступи, спаси:

Пресвятую, Пречистую:

Возглас: Яко подобает:

На Бог Господь:

Тропарь, глас 4:

Союзом любви апостолов Твоих связавый, Христе, и нас Твоих верных рабов к Себе тем крепко связав, творити заповеди Твоя и друг друга любити нелицемерно сотвори, молитвами Богородицы, Едине Человеколюбче. (Дважды).

Слава, и ныне.

Кондак, глас 5:

Пламенем любви к Тебе распали сердца наши, Христе Боже, да тою разжигаеми, сердцем, мыслию же и душею, и всею крепостию нашею возлюбим Тя, и ближних наших яко себя, и повеления Твоя храняще славим Тя, всех благ Дателя.

Вонмем.

Прокимен, глас 7: Возлюблю Тя, Господи, крепосте моя, Господь утверждение мое.

Стих: Бог мой, Помощник мой и уповаю на Него.

Премудрость.

Соборного послания Иоаннова чтение (1Ин. 3, 1, 10–11, 16, 18; 4, 9–11, 20–21).

Возлюбленнии, видите, какову любовь дал есть Отец нам, да чада Божия наречемся и есмы. Сего ради явлена суть чада Божия и чада диаволя. Всяк не творяй правды, несть от Бога, и не любяй брата своего. Яко се есть завещание, еже слышасте исперва, да любим друг друга. О сем познахом любовь, яко Он по нас душу Свою положи: и мы должны есмы по братии души полагати. Чадца моя, не любим словом, ниже языком, но делом и истиною. О сем явися любы Божия в нас, яко Сына Своего Единороднаго посла Бог в мир, да живи будем Им. О сем есть любы, не яко мы возлюбихом Бога, но яко Той возлюби нас, и посла Сына Своего во очищение о гресех наших. Возлюбленнии, аще сице возлюбил есть нас Бог, и мы должни есмы друг друга любити. Аще кто речет, яко люблю Бога, а брата своего ненавидит, лож есть: ибо не любяй брата своего, егоже виде, Бога, егоже не виде, како может любити? И сию заповедь имамы от Него, да любяй Бога, любит и брата своего.

Или:

К Коринфянам послания святаго апостола Павла чтение, зач. 153 от полу (1Кор. 13, 1–8а, 13; 14, 1а).

Братие, аще языки человеческими глаголю и ангельскими, любве же не имам, бых яко медь звенящи, или кимвал звяцаяй: И аще имам пророчество, и вем тайны вся и весь разум, и аще имам всю веру, яко и горы преставляти, любве же не имам, ничтоже есмь. И аще раздам вся имения моя, и аще предам тело мое во еже сжещи е, любве же не имам, никая польза ми есть. Любы долготерпит, милосердствует; любы не завидит, любы не превозносится, не гордится, ни безчинствует, не ищет своя си, не раздражается, не мыслит зла, не радуется о неправде, радуется же о истине, вся любит, всему веру емлет, вся уповает, вся терпит. Любы николиже отпадает. Ныне же пребывает вера, надежда, любы, три сия: больше же сих любы. Держитеся любве.

Аллилуия, глас 8:

Стих 1: Возлюбите Господа вси преподобнии Его.

Стих 2: Яко истины взыскает Господь.

Премудрость. Прости. Услышим Святаго Евангелия.

Мир всем.

От Иоанна Святаго Евангелия чтение, зач. 46 от полу (13, 34–35; 15, 12–14).

Рече Господь Своим учеником, заповедь новую даю вам, да любите друг друга: якоже возлюбих вы, да и вы любите себе. О сем разумеют вси, яко Мои ученицы есте, аще любовь имате между собою. Сия есть заповедь Моя, да любите друг друга, якоже возлюбих вы. Больши сея любве никтоже имать, да кто душу свою положит за други своя. Вы друзи Мои есте, аще творити, елика Аз заповедаю вам.

Ектения сугубая.

Помилуй нас, Боже:

Господи Боже наш, милостивно яко Благ призри на изсохшую в любви землю сердца нашего, тернием ненависти, самолюбия и неисчетных беззаконий люте оляденевшую, и каплю благодати Пресвятаго Твоего Духа испустив, богатно ороси сию, да будет плодоносна и возрастит от горящей к Тебе любви корень всех добродетелей, страх Твой, и о спасении ближняго неленостное попечение, всех же страстей и многообразных лукавств и лицемерия искоренение, прилежно яко всех благ Дателя молим, скоро услыши и человеколюбно помилуй.

Заповедь Твою любити друг друга давый Твоим ученикам, Владыко, обнови сию благодатию Пресвятаго Твоего Духа действительно в душах и в сердцах наших, да николиже о своей токмо пользе, но всегда о благоугождении Тебе и о спасении и пользе ближних наших попечение творити потщимся, молимся Тебе, Благодателю Милостивый, услыши и помилуй.

Первую и большую заповедь, любити Тебя, Бога и Творца нашего, от всея души, от всея мысли и крепости нашей, и вторую, подобную ей, любити ближних наших, яко самих себя даровавый нам, Владыко. Сам подвигни нас делом сия исполняти, да Тебе Спасу нашему угождающе и о спасении ближних наших ревнующе, обетованная Твоя получим благая, яко Владыце и Спасу нашему, прилежно припадающе, молимся, скоро услыши и помилуй.

Да совершени в любви к Тебе, Боже наш, будем, к ближним нелицемерную любовь иметь подвигни нас Твоего Духа благодатию, Владыко. К Тебе бо любовь имети мняйся, брата же своего ненавидяй, ложь есть и во тьме ходит. Тем же, Милостиве, любовию к Тебе и к братии распали души и сердца наши молимся, яко Милостив скоро услыши и яко Щедр помилуй.

Сице в нас Твою любовь силою благодати Пресвятаго Твоего Духа, всели, Всещедрый Господи, да не точию братию и друзей, но и врагов наших по Твоему Божественному повелению истинно любити и ненавидящим нас благотворити будет, и о спасении их искренно тщатися, молимся Тебе, благости Источниче в человеколюбия Пучино, скоро услыши и яко Благосерд помилуй.

Возглас: Услыши ны, Боже:

Предстоятель чтет молитву Господу Иисусу Христу:

Господи Иисусе Христе Боже наш, давый ученика Твоим заповедь новую любити друг друга, приими молитву сию во оставление грехов всех нас, правоверных рабов Твоих, и иссякшую в нас к Тебе и к братиям любовь Духом Твоим Святым обнови и крепко сию водрузи в сердца наши, да тою заповеди Твои исполняюще, не своей пользы на земле искати, но о Твоей славе и о созидании и спасении ближних ревновати будем, да тако в любви и мире со всеми в веке сем поживше, сподобимся, вкупе с угодившими Тебе, в горних обителях славити Тя и Безначального Твоего Отца и Святаго Духа в бесконечные веки веков.

Отпуст:

Христос истинный Бог наш, молитвами Пречистыя Своея Матери, святаго славного и всехвальнаго апостола и евангелиста Иоанна Богослова и всех святых помилует и спасет нас, яко Благ и Человеколюбец.

Иное последование молебного пения о умножении любви в соединении с параклисом пресвятой Богородице

По обычном начале псалом 142.

Ектения великая:

Миром Господу помолимся.

О свышнем мире:

О мире всего мира:

О еже очистити нас от грехов и беззаконий наших, изсушающих в нас любовь к Богу и к ближним, водрузити же оную силою, действом и благодатию Пресвятаго Своего Духа и вкоренити в сердца всех нас, прилежно Господу помолимся.

О еже всеяти в нас и благодатию Пресвятаго Своего Духа вкоренити новую Своего Новаго Завета заповедь любити друг друга и не себе угождати, но о славе Божией и о созидании ближняго всегда ревновати, Господу помолимся.

О еже искоренити в нас ненависть, зависть, злобу и все прочие страсти, братолюбие разрушающия, и нелицемерную любовь всеяти, усердно Господу помолимся.

О еже теплую любовь к Богу и к ближним в нас благодатию Пресвятаго Своего Духа распалити, и тою все страсти душ и телес наших из корене сожещи, Господу помолимся.

О еже искоренити в нас страсть самолюбия, добродетель же братолюбия силою Пресвятаго Своего Духа вкоренити, сердцем сокрушенным Господу помолимся.

О еже не любити нам мира и всего яже в мире, но истинною любовию Бога и славу Его, и пользу и спасение ближних возлюбити, и на небеси уготованная благая присно зрети, и искати сих вседушно, Господу помолимся.

О еже принудити нас силою, действом и благодатию Пресвятаго Своего Духа не точию друзей и братий наших, но и врагов истинно любити, и ненавидящим нас благотворити, о них молитися, и о спасении их тщание имети, Господу помолимся.

О еже себе внегда внимати, себя окаявати и своя согрешения всегда зрети, себя пред Богом и пред всеми смиряти, брата никогдаже осуждати, но яко самаго себя того любити, силою, действом и благодатию Пресвятаго Духа, Господу помолимся.

О еже поревновати нам древних христиан к Богу и к братиям горящей любви, и наследниками и преемниками тех быти, не образом точию, но детельною истиною, силою, действом и благодатию Пресвятаго Духа, Господу помолимся.

О еже в правоверии непозыблемых, в мире и союзе любви горящих, и во всех добродетелях преспевающих нас всегда сохранити и от всех душетленных страстей невредимыми соблюсти, силою, действом и благодатию Пресвятаго Духа, Господу помолимся.

На Бог Господь:

Тропарь, глас 4:

Союзом любви апостолов Твоих связавый, Христе, и нас Твоих верных рабов к Себе тем крепко связав, творити заповеди Твоя и друг друга любити нелицемерно сотвори, молитвами Богородицы, Едине Человеколюбче. (Дважды).

Слава:

Тропарь Богородице, глас 4:

К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

И ныне:

Не умолчим никогда, Богородице, силы Твоя глаголати, недостойнии, аще бо Ты не бы предстояла молящи, кто бы нас избавил от толиких бед? Кто же бы сохранил до ныне свободны? Не отступим, Владычице, от Тебе, Твоя бо рабы спасаеши присно от всяких лютых.

Псалом 50.

И поем канон Богородице, глас 8, без ирмосов.

Песнь 1

Ирмос: Воду прошед:

Припев: Пресвятая Богородице, спаси нас.

Многими содержим напастьми, к Тебе прибегаю, спасения иский: о, Мати Слова и Дево, от тяжких и лютых мя спаси.

Пресвятая Богородице, спаси нас.

Страстей мя смущают прилоги, многаго уныния исполняющи мою душу, умири, Отроковице, тишиною Сына и Бога Твоего, Всенепорочная.

Слава: Спаса родшую Тя и Бога, молю, Дево, да избавлюся от лютых: к Тебе бо ныне прибегая, простираю и душу и помышление.

И ныне: Недугующа телом и душею, посещения Божественнаго и промышления от Тебе сподоби, едина Богомати, яко благая, Благаго же Родительнице.

Катавасия: Спаси от бед рабов Твоих, Богородице, яко вси по Бозе к Тебе прибегаем, яко к нерушимей стене и предстательству.

Призри благосердием, Всепетая Богородице, на мои лютыя скорби телесныя, и исцели души моея болезнь.

Песнь 3

Ирмос: Небеснаго круга:

Пресвятая Богородице, спаси нас.

Предстательство и покров жизни моея полагаю Тя, Богородительнице Дево: Ты мя направи ко пристанищу Твоему, благих виновна, верных утверждение, едина Всепетая.

Пресвятая Богородице, спаси нас.

Молю, Дево, душевное смущение и печали моея бурю разорити: Ты бо, Богоневестная, начальника тишины Христа родила еси, едина Пречистая.

Слава: Благодетеля рождши добрых виновнаго, благодеяния богатство всем источи, вся бо можеши, яко сильнаго в крепости Христа рождши, Богоблаженная.

И ныне: Лютыми недуги и болезненными страстьми истязаему, Дево, Ты ми помози: исцелений бо неоскудное Тя знаю сокровище, Пренепорочная, неиждиваемое.

Катавасия: Спаси от бед рабов Твоих, Богородице, яко вси по Бозе к Тебе прибегаем, яко нерушимей стене и предстательству.

Призри, благосердием, всепетая Богородице, на мои лютыя скорби телесныя и исцели души моея болезнь.

Ектения сугубая:

Помилуй нас, Боже:

Господи Боже наш, милостивно яко Благ призри на изсохшую в любви землю сердца нашего, тернием ненависти, самолюбия и неисчетных беззаконий люте оляденевшую, и каплю благодати Пресвятаго Твоего Духа испустив, богатно ороси сию, да будет плодоносна и возрастит от горящей к Тебе любви корень всех добродетелей, страх Твой, и о спасении ближняго неленостное попечение, всех же страстей и многообразных лукавств и лицемерия искоренение, прилежно яко всех благ Дателя молим, скоро услыши и человеколюбно помилуй.

Заповедь Твою любити друг друга давый Твоим ученикам, Владыко, обнови сию благодатию Пресвятаго Твоего Духа действительно в душах и в сердцах наших, да николиже о своей токмо пользе, но всегда о благоугождении Тебе и о спасении и пользе ближних наших попечение творити потщимся, молимся Тебе, Благодателю Милостивый, услыши и помилуй.

Первую и большую заповедь, любити Тебя, Бога и Творца нашего, от всея души, от всея мысли и крепости нашей, и вторую, подобную ей, любити ближних наших, яко самих себя даровавый нам, Владыко. Сам подвигни нас делом сия исполняти, да Тебе Спасу нашему угождающе и о спасении ближних наших ревнующе, обетованная Твоя получим благая, яко Владыце и Спасу нашему, прилежно припадающе, молимся, скоро услыши и помилуй.

Да совершени в любви к Тебе, Боже наш, будем, к ближним нелицемерную любовь иметь подвигни нас Твоего Духа благодатию, Владыко. К Тебе бо любовь имети мняйся, брата же своего ненавидяй, ложь есть и во тьме ходит. Тем же, Милостиве, любовию к Тебе и к братии распали души и сердца наши молимся, яко Милостив скоро услыши и яко Щедр помилуй.

Возглас: Яко милостив:

Кондак Богородицы, глас 6:

Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.

Седален, глас 2:

Моление теплое и стена необоримая, милости источниче, мирови прибежище, прилежно вопием Ти: Богородице Владычице, предвари и от бед избави нас, едина вскоре предстательствующая.

Песнь 4

Ирмос: Услышах, Господи:

Пресвятая Богородице, спаси нас.

Страстей моих смущение и бурю моих прегрешений утиши, Богоневестная, кормчаго рождшая Господа.

Пресвятая Богородице, спаси нас.

Милосердия Твоего бездну призывающу подаждь ми, Благосердаго рождая и Спаса всех поющих Тя.

Пресвятая Богородице, спаси нас.

Наслаждающеся, Пречистая, Твоих дарований, благодарственное воспеваем пение, ведуще Тя Богоматерь.

Слава: На одре болезни моея и немощи низлежащу ми, благолюбива, помози, Богородице, едина Приснодево.

И ныне: Надежду и утверждение и спасения стену недвижиму имуще Тя, Всепетая, неудобства всякаго избавляемся.

Катавасия: Спаси от бед рабов Твоих, Богородице, яко вси по Бозе в Тебе прибегаем, яко нерушимей стене и предстательству.

Призри благосердием, Всепетая Богородице, на мои лютыя скорби телесныя и исцели души моея болезнь.

Песнь 5

Ирмос: Просвети нас:

Пресвятая Богородице, спаси нас.

Исполни, Чистая, веселия сердце мое, Твою нетленную дающи радость, веселия родшая Виновнаго.

Пресвятая Богородице, спаси нас,

Избави нас от бед, Богородице чистая, вечное родши избавление, и мир, всяк ум превосходящий.

Слава: Разреши мглу прегрешений моих, Богоневесто, просвещением Твоея светлости, Свет родшая Божественный и превечный.

И ныне: Исцели, Чистая, души моея неможение, посещения Твоего сподобльши, и здравие молитвами Твоими подаждь ми.

Катавасия: Спаси от бед рабов Твоих, Богородице, яко вси по Бозе к Тебе прибегаем, яко нерушимей стене и предстательству.

Призри благосердием, Всепетая Богородице, на мои лютыя скорби телесныя и исцели души моея болезнь.

Песнь 6

Ирмос: Молитву пролию ко Господу:

Пресвятая Богородице, спаси нас.

Господа и Сына Твоего, Своею вольною смертию от смерти и тления спасшаго наше естество, объято бывшее тлением и смертию, моли, Дево, да от злодействия врагов избавит мя.

Пресвятая Богородице, спаси нас.

Предстательницу Тя жизни вем и хранительницу тверду, Дево, и напастей решащу молвы, и нападения бесов отгоняющу, и молюся всегда от растлевающих страстей моих избавити мя.

Слава: Яко стену прибежища стяжахом, и душ всесовершенное спасение, и утешение в скорбех, Отроковице, и просвещением Твоим присно радуемся: о, Владычице и ныне нас от страстей и бед спаси.

И ныне: На одре ныне немощствуяй лежу, и несть исцеления плоти моей; но Бога и Спаса миру и Избавителя недугов рождшая, Тебе молюся, Благой: от растлевающих недугов возстави мя.

Катавасия: Спаси от бед рабов Твоих, Богородице, яко вси по Бозе к Тебе прибегаем, яко нерушимей стене и предстательству.

Призри благосердием, Всепетая Богородице, на мои лютыя скорби телесныя и исцели души моея болезнь

Ектения малая.

Кондак, глас 5:

Пламенем любви к Тебе распали сердца наши, Христе Боже, да тою разжигаеми, сердцем, мыслию же и душею, и всею крепостию нашею возлюбим Тя, и ближних наших яко себя, и повеления Твоя храняще, славим Тя, всех благ Дателя.

Прокимен, глас 7: Возлюблю Тя, Господи, крепосте моя, Господь утверждение мое.

Стих: Бог мой, Помощник мой и уповаю на Него.

Прокимен Богородице, глас 4: Помяну имя Твое во всяком роде и роде.

Стих: Слыши Дщи и виждь и приклони ухо Твое.

Всякое дыхание: глас 4.

Евангелие от Иоанна, зач. 46 от полу.

Рече Господь Своим учеником, заповедь новую даю вам, да любите друг друга: якоже возлюбих вы, да и вы любите себе. О сем разумеют вси, яко Мои ученицы есте, аще любовь имате между собою. Сия есть заповедь Моя, да любите друг друга, якоже возлюбих вы. Больши сея любве никтоже имать, да кто душу свою положит за други своя. Вы друзи Мои есте, аще творити, елика Аз заповедаю вам.

К Богородице (Лк. зач. 4).

Во дни оны, воставши Мариам, иде в Горняя со тщанием, во град Иудов. И вниде в дом Захариин, и целова Елисавет. И бысть, яко услыша Елисавет целование Мариино, взыграся младенец во чреве ея; и исполнися Духа Свята Елисавет. И возопи гласом велиим и рече: благословенна Ты в женах, и благословен Плод чрева Твоего. И откуду мне сие, да прииде Мати Господа моего ко мне? Се бо, яко бысть глас целования Твоего во ушию моею, взыграся младенец радощами во чреве моем. И блаженна Веровавшая, яко будет совершение глаголанным Ей от Господа. И рече Мариам: величит душа Моя Господа; и возрадовася дух Мой о Бозе Спасе Моем: яко призре на смирение Рабы Своея, се бо отныне ублажат Мя вси роди: яко сотвори Мне величие Сильный, и свято имя Его. Пребысть же Мариам с нею яко три месяцы, и возвратися в дом Свой.

Слава: Отче, Слове и Душе, Троице Святая, очисти множество согрешений наших.

И ныне: Молитвами Богородицы, Милостиве, очисти множество согрешений наших.

Помилуй мя, Боже, по велицей милости Твоей и по множеству щедрот Твоих очисти беззаконие мое.

Стихира, глас 6:

Не ввери мя человеческому предстательству, Пресвятая Владычице, но приими моление раба Твоего, скорбь бо обдержит мя: терпети не могу демонскаго стреляния, покрова не имам, или где прибегну окаянный, всегда побеждаем, и утешения не имам, кроме Тебе, Владычице мира, упование и предстательство верных, не презри моление мое, полезно сотвори.

Ектения:

Спаси, Боже, людей Твоих и благослови достояние Твое, посети мир Твой милостию и щедротами, возвыси рог христиан православных и ниспосли на нас милости Твоя богатыя, молитвами Всепречистой Владычицы нашей Богородицы и Приснодевы Марии; силою Честнаго и Животворящего Креста; предстательством честных Небесных Сил бесплотных; честнаго славнаго пророка Предтечи и Крестителя Иоанна, святаго славнаго и всехвалънаго апостола Иоанна Богослова и всех прочих святых славных и всехвальных апостолов; святых славных и добропобедных мучеников; преподобных и богоносных отцев наших; святаго благовернаго равноапостольнаго великаго князя Владимира и всех прочих святых, в земле Русской просиявших; святых праведных Богоотцев Иоакима и Анны и всех святых; молим Тя, Многомилостиве Господи, услыши нас грешных, молящихся Тебе, и помилуй нас.

Певцы: Господи, помилуй (12).

Возглас: Милостию и щедротами:

Песнь 7

Ирмос: От Иудеи дошедше:

Пресвятая Богородице, спаси нас.

Наше спасение якоже восхотел еси, Спасе, устроити, во утробу Девы вселился еси, Юже миру предстательницу показал еси: отец наших Боже, благословен еси.

Пресвятая Богородице, спаси нас.

Подателя милости, егоже родила еси, Мати Чистая, умоли избавитися от прегрешений и душевных скверн, верою зовущим: отец наших Боже, благословен еси.

Слава: Сокровище спасения и Источник нетления, Тя родшую, и столп утверждения, дверь покаяния, показал еси зовущим: отец наших Боже, благословен еси.

И ныне: Телесныя слабости и душевныя недуги, Богородительнице, любовию приступающих к крову Твоему, Дево, исцелити сподоби, Спаса Христа нам родшая.

Катавасия: Спаси от бед рабов Твоих, Богородице, яко вси по Бозе к Тебе прибегаем, яко нерушимей стене и предстательству.

Призри благосердием, Всепетая Богородице, на мои лютыя скорби телесныя и исцели души моея болезнь.

Песнь 8

Ирмос: Царя Небеснаго:

Пресвятая Богородице, спаси нас.

Помощи от Тебе требующих не презри, Дево, поющих и превозносящих Тя во веки.

Пресвятая Богородице, спаси нас.

Неможение души моея исцеляеши и телесныя болезни, Дево, да Тя прославлю, Чистая, во веки.

Слава: Исцелений богатство изливаеши верно поющим Тя, Дево, и превозносящим неизреченное Твое Рождество.

И ныне: Напастей Ты прилоги отгоняеши и страстей нападения, Дево; темже Тя поем во вся веки.

Хвалим, благословим, поклоняемся Господеви, поюще и превозносяще Его во веки.

Царя Небеснаго, егоже поют вои ангельстии, хвалите и превозносите во вся веки.

Песнь 9

Ирмос: Воистину Богородицу Тя исповедуем, спасеннии Тобою, Дево Чистая, с бесплотными лики Тя величающе.

Пресвятая Богородице, спаси нас.

Тока слез моих не отвратися, от всякаго лица всяку слезу отъемшаго, Дево, Христа родшая.

Пресвятая Богородице, спаси нас.

Радости мое сердце исполни, Дево, радости премшая исполнение, греховную печаль потребляющи.

Пресвятая Богородице, спаси нас.

Пристанище и предстательство к Тебе прибегающих буди, Дево, и стена нерушимая, прибежище же и покров и веселие.

Слава: Света Твоего зарями просвети, Дево, мрак неведения отгоняющи, благоверно Богородицу Тя исповедающих.

И ныне: На месте озлобления немощи смирившегося, Дево, исцели, из нездравия во здравие претворяющи.

Таже: Достойно есть:

И кадит священник алтарь и храм весь и людей. Мы же поем настоящия Богородичны:

Высшую небес и чистшую светлостей солнечных, избавльшую нас от клятвы, Владычицу мира песньми почтим.

От многих моих грехов немощствует тело, немощствует и душа моя, к Тебе прибегаю Благодатней, надеждо ненадежных, Ты ми помози.

Владычице и Мати Избавителя, приими моление недостойных раб Твоих, да ходатайствуеши к Рождшемуся от Тебе; о Владычице мира, буди Ходатаица.

Поем прилежно Тебе песнь ныне, всепетой Богородице радостно, со Предтечею и всеми святыми: моли, Богородице, еже ущедри ны.

Вся Ангелов воинства, Предтече Господень, апостолов двоенадесятице, святии вси с Богородицею, сотворите молитву, во еже спастися нам.

Посем: Трисвятое. Отче наш:

Тропарь, глас 4:

Союзом любви апостолов Твоих связавый, Христе, и нас Твоих верных рабов к Себе тем крепко связав, творити заповеди Твоя и друг друга любити нелицемерно сотвори, молитвами Богородицы, Едине Человеколюбче. (Дважды).

Слава:

Кондак, глас 5:

Пламенем любви к Тебе распали сердца наши, Христе Боже, да тою разжигаеми, сердцем, мыслию же и душею, и всею крепостию нашею возлюбим Тя, и ближних наших яко себя, и повеления Твоя храняще, славим Тя, всех благ Дателя.

И ныне. Богородичен, глас 6:

Милосердия двери отверзи нам, благословенная Богородице, надеющиися на Тя да не погибнем, но да избавимся Тобою от бед: Ты бо еси спасение рода христианского.

Ектения сугубая:

Помилуй нас, Боже:

Сице в нас Твою любовь силою благодати Пресвятаго Твоего Духа, всели, Всещедрый Господи, да не точию братию и друзей, но и врагов наших по Твоему Божественному повелению истинно любити и ненавидящим нас благотворити будем, и о спасении их искренно тщатися, молимся Тебе, благости источниче и человеколюбия пучина, скоро услыши и яко Благосерд помилуй.

Еще молимся и о еже услышати:

Возглас: Услыши ны, Боже:

Диакон: Господу помолимся.

Певцы: Господи, помилуй.

Предстоятель чтет молитву:

Господи Иисусе Христе Боже наш, давый ученика Твоим заповедь новую любити друг друга, приими молитву сию во оставление грехов всех нас, правоверных рабов Твоих, и иссякшую в нас к Тебе и к братиям любовь Духом Твоим Святым обнови и крепко сию водрузи в сердца наши, да тою заповеди Твои исполняюще, не своей пользы на земле искати, но о Твоей славе и о созидании и спасении ближних ревновати будем, да тако в любви и мире со всеми в веке сем поживше, сподобимся, вкупе с угодившими Тебе, в горних обителях славити Тя и Безначального Твоего Отца и Святаго Духа в бесконечные веки веков.

Молитва Пресвятой Богородице:

О, Пресвятая Госпоже Владычице! Вышши еси всех Ангел и Архангел и всея твари честнейши, помощница еси обидимых, ненадеющихся надеяние, убогих заступница, печальных утешение, алчущих кормилице, грешных спасение, христиан всех поможение и заступление. О всемилостивая Госпоже Дево Богородице Владычице! Милостию Твоею спаси и помилуй Великого Господина и отца нашего Святейшего Алексия, Патриарха Московскаго и вся Руси, и преосвященные митрополиты, архиепископы и епископы, и весь священнический и иноческий чин, и всех христиан ризою Твоею честною защити; и умоли, Госпоже, из Тебе без семени воплотившегося Христа Бога нашего, да препояшет нас силою Своею свыше на невидимыя и видимыя враги наша. О, всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, землетрясения и потопа, от огня и меча, от нахождения иноплеменных и междоусобныя брани, и от внезапной смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабам Твоим всем православным христианам, и просвети им ум и очи сердечныя, еже ко спасению: и сподоби нас грешных рабов Твоих Царствия Сына Твоего, Христа Бога нашего: яко держава Его благословенна и препрославленна, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.

Отпуст:

Христос истинный Бог наш, молитвами Пречистыя Своея Матери, святаго славного и всехвальнаго апостола и евангелиста Иоанна Богослова и всех святых помилует и спасет нас, яко Благ и Человеколюбец.

Последование молебного пения о врагах ненавидящих и обидящих нас

По обычном начале псалом избранный:

Господи, почто умножаются стужащии мне? Мнози восстают на мя, мнози глаголют душе моей: несть спасения ему в Бозе его. Ты же, Господи, Заступник мой еси, слава моя и возносяй главу мою (3/2–4). К Тебе, Господи, воздвигох душу мою, Боже мой, на Тя уповах, да не постыжуся во век и да не посмеются о мне врази мои (24/1). Господи Боже мой, на Тя уповах, спаси мя от всех гонящих мя и избави мя (7/2). Избавит мя от врагов моих сильных и от ненавидящих мя (17/18). Виждь смирение мое и труд мой и остави все грехи мои. Виждь врагов моих, яко умножишася и ненавидением неправедным возненавидеша мя (24/18–19). Во множестве милости Твоея услыши мя. Спаси мя, да избавлюся от ненавидящих мя. Услыши мя, Господи, яко блага милость Твоя, по множеству щедрот Твоих призри на мя. Не отврати лица Твоего от отрока Твоего, яко скорблю, скоро услыши мя. Вонми душе моей и избави ю, врагов моих ради избави мя. Ты бо веси поношение мое и стыд мой и срамоту мою, пред Тобою все оскорбляющии мя (68/14, 15, 17–20). Суди, Господи, обидящих мя, побори борющих мя. Приими оружие и щит и востани в помощь мою. Рцы душе моей: спасение твое есмь Аз. Востани, Господи, и вонми суду моему, Боже мой и Господи мой. Суди ми, Господи, по правде Твоей, Господи Боже мой (34/1–2, 3, 23, 24). Буди ми в Бога Защитителя и в место крепко спасти мя, яко утверждение мое и прибежище мое еси Ты. Боже мой, избави мя из руки обидящего (70/3–4). Помилуй мя Господи, яко скорблю, смятеся яростию око мое, душа моя и утроба моя, яко исчезе в болезни жизнь моя и лета моя в воздыханиях. Изнеможе нищетою крепость моя и кости мои смятошася. От всех врагов моих бых поношение (30/10–12). Аз же на Тя, Господи, уповах, рех: Ты еси Бог мой. В руках Твоих жребии мои: избави мя из руки врагов моих (30/15–16). Боже, от востающих на мя избави мя, яко Ты, Боже, заступник мой еси. Бог мой, милость Его предварит мя. Аз же воспою силу Твою и возрадуюся заутра о милости Твоей, яко был еси заступник мой и прибежище мое в день скорби моея. Помощник мой еси, Тебе пою: яко Бог заступник мой еси, Бог мой милость моя (58/1, 10–11, 17–18). На Тя, Господи, уповах, да не постыжуся в век (70/1).

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О еже простити нам все согрешения наши и милостивно избавити нас от обстояния врагов наших, Господу помолимся.

О еже не воздати врагам нашим по делам их, ни по лукавству начинания их, но обратити их от злаго их расположения ко благотворению и любви, Господу помолимся.

О еже неверных к правоверию обратити, верных же к благочестию, всех же вражду и ненависть в братолюбие, мир и совершенную любовь претворити, Господу помолимся.

О еже не оставити ни единаго из врагов наших нас ради погибнути, ни нас тех ради, но всех уклонятися от зла и творити благое научити и благодатию Своею спасти, Господу помолимся.

О еже вражды, ненависти же и все злые дела во всех нас искоренити, любовь же нелицемерную и мирное и добродетельное житие в преспеянии веры вкоренити, Господу помолимся.

О еже умягчити сердца злых людей, беспричинно злобствующих на нас, обезвредить злобу их, злые замыслы их разрушить, злые их начинания во благо нам обратить и тако их, врагов наших, сделать невольными нашими благодетелями и чрез сие и их помиловать, Господу помолимся.

О еже возглаголати в сердцах всех окружающих нас, наипаче же начальствующих над нами благое и мирное о нас, за зло, причиняемое нам, простить их, не ведят бо, что творят, а за добро, хотя бы и в малом, оказываемое нам, воздать сторицею, добрых в добре укрепить, злых к добру обратить и всех подвигнуть творить добро ради добра, Господу помолимся.

Заступи, спаси:

Пресвятую, Пречистую:

Возглас: Яко подобает:

На Бог Господь:

Тропарь, глас 4:

О распенших Тя моливыйся, любодушне Господи, и рабам Твоим о врагах молитися повелевый, ненавидящих и обидящих нас прости, и от всякаго зла и лукавства к братолюбному и добродетельному настави жительству, смиренно мольбу Тебе приносим, да в согласном единомыслии славим Тя, Единаго Человеколюбца. (Дважды).

Слава, ныне.

Кондак, глас 5:

Якоже первомученик Твой Стефан о убивающих его моляше Тя, Господи, и мы припадающе молим: ненавидящих всех и обидящих нас прости, да не един от них нас ради погибнет, но да вси спасутся благодатию Твоею, Боже Всещедрый.

Покимен, глас 4: Изми мя от враг моих, Боже, и от востающих на мя избави мя.

Стих: На Бога уповах, не убоюся, что сотворит мне человек.

Апостол к Римлянам, зaч. 110 от полу (12, 10, 14, 17–21).

Братие, будите братолюбием друг ко другу любезни, честию друг друга больша творяще. Благословляйте гонящия вы: благословите, а не кляните. Ни единому же зла за зло воздающе: промышляюще добрая пред всеми человеки. Аще возможно, еже от вас, со всеми человеки мир имейте. Не себе отмщающе, возлюбленнии, но дадите место гневу: писано бо есть: Мне отмщение, Аз воздам, глаголет Господь. Аще убо алчет враг твой, ухлеби его: аще ли жаждет, напой его. Сие бо творя, углие огнено собираеши на главу его. Не побежден бывай от зла, но побеждай благим злое.

Аллилуия, глас 1:

Стих: Бог нам Прибежище и Сила.

Стих 2: Помощник в скорбях, обретших нас зело.

Евангелие от Матфея, зач. 15 (5, 42–48)

Рече Господь: просящему у тебе дай; и хотящаго от Тебе заяти, не отврати. Слышасте, яко речено есть: возлюбиши искренняго твоего, и возненавидиши врага твоего. Аз же глаголю вам: любите враги ваша, благословите кленущия вы, добро творите ненавидящим вас, и молитеся за творящих вам напасть, и изгоняющия вы. Яко да будете сынове Отца вашего, Иже есть на небесех: яко солнце Свое сияет на злыя и благия, и дождит на праведныя и на неправедныя. Аще бо любите любящих вас, кую мзду имате? He и мытари ли тожде творят? И аще целуете други ваша токмо, что лишше творите? Не и язычницы ли такожде творят? Будите убо вы совершени, якоже Отец ваш Небесный совершен есть.

Ектения сугубая:

Помилуй нас, Боже:

Заповедь Твою, Спасе, еже любити врагов наших и благотворити ненавидящим нас, по силе исполняюще, прилежно молим: обрати яко Милостив всех врагов наших лукавое на нас, и на Церковь Твою намерение, к любви и к примирению и ко всякой благостыни, да не в злобах своих погибнут, молимся Тебе, Всемилостивый Господи, услыши и помилуй.

О распенших Тя моливыйся, Человеколюбче Владыко, и нас озлобляющих врагов от злоб к добродетельному жительству обрати, яко да ни един нас ради погибнет, но все в покаянии да спасемся, молимся Тебе, Любодушне Господи, услыши и помилуй.

Неверных врагов наших к правоверию и благочестию, верных же к примирению и братолюбию обратитися принуди, Всещедрый Господи, да в любви и согласии заповеди Твои исполняюще, Тебя славим всех благ Дателя, молимся Тебе, услыши и помилуй.

Со святым Стефаном вопием к Тебе: Боже отмщений Господи, не постави греха врагам ненавидящим и обидящим нас, но по велицей милости Твоей к покаянию обрати и помилуй их. Нас же от всякаго злаго их обстояния (советы лукавые и коварства их разорив), всесильною Твоею десницею изми и избави, молимся Тебе, Вседержавный Царю, скоро услыши и милостивно помилуй.

Возглас: Услыши ны, Боже:

Молитва

Господи Иисусе Христе Боже наш, приими от нас, недостойных рабов Твоих молитву сию, и простив нам все согрешения наша, помяни всех врагов наших, ненавидящих и обидящих нас, и не воздаждь им по делам их, но по великой милости Твоей обрати их: неверных к правоверию и благочестию, верных же уклонитися от зла и творити благое, яко да ни един от них погибнет нас ради недостойных. Нас же и Церковь Твою Святую всесильною Твоею крепостию от всякаго злаго обстояния милостивно избави, да все славим Тя и Безначальнаго Твоего Отца и Святаго Духа, ныне и присно и во веки веков. Аминь.

Отпуст:

Христос, истинный Бог наш, молитвами Пречистыя Своея Матери, святаго апостола первомученика архидиакона Стефана, святых славных и добропобедных мучеников и всех святых, помилует и спасет нас, яко Благ и Человеколюбец.

Сие последование молебнаго пения о врагах может, быть соединяемо с параклисом Пресвятой Богородице по чину «Молебнаго пения о умножении любви в соединении с параклисисом».

Последование молебного пения о сущих в темницах и заточении

По обычном начале псалом 141:

Гласом моим ко Господу воззвах, гласом моим ко Господу помолихся. Пролию пред Ним моление мое, печаль мою пред Ним возвещу, Внегда исчезати от Мене духу моему: и Ты познал еси стези моя: на пути сем, по немуже хождах, скрыша сеть мне. Смотрях одесную и возглядах, и не бе знаяй мене: погибе бегство от Мене, и несть взыскаяй душу мою. Воззвах к Тебе, Господи, рех: Ты еси упование мое, часть моя еси на земли живых. Вонми молению моему, яко смирихся зело: избави мя от гонящих мя, яко укрепишася паче мене. Изведи из темницы душу мою, исповедатися имени Твоему. Мене ждут праведницы, Дóндеже воздаси мне.

Псалом избранный:

Бог нам Прибежище и Сила, Помощник в скорбях обретших нас зело (45/2). Скорбь и болезнь обретох, и имя Господне призвах: о Господи, избави душу мою (114/3–4). Не удали щедрот Твоих от Мене, яко одержаша мя злая, имже несть числа (39/12, 13). Господи, услыши молитву мою и вопль мой к Тебе да придет. Не отврати лица Твоего от Мене; воньже аще день скорблю, приклони ко мне ухо Твое; воньже аще день призову Тя, скоро услыши мя. Яко исчезоша яко дым дние мои, и кости моя яко сушило сосхошася. Уязвен был яко трава, и изше сердце мое, яко забых снести хлеб мой. От гласа воздыхания моего прильпе кость моя плоти моей (101/2–6). Благоволи, Господи, избавити мя, во еже помощи ми вонми (39/14). Услыши, Боже, моление мое, вонми молитве моей. К Тебе воззвах, внегда уны сердце мое (60/2, 3). Внуши, Боже, молитву мою и не презри моления моего, вонми ми и услыши мя; возскорбех во искушении моем и смятохся. Сердце мое смятеся во мне и боязнь смерти нападе на мя, страх и трепет прииде на мя и покры мя тьма. И рех: кто даст ми крыле, яко голубине, и полещу, и почию (54/2–3, 5–7). Очи мои изнемогосте от нищеты, воззвах к Тебе, Господи, весь день, воздех к Тебе руце мои (87/10). В день скорби моея воззвах к Тебе (85/7). Господи Боже сил, доколе гневаешися на молитву рабов Твоих? Напитаеши нас хлебом слезным, напоиши нас слезами в меру (79/5–6). Душ убогих Твоих не забуди до конца (73/19). Не остави мене, Господи Боже мой, не отступи от Мене, вонми в помощь мою, Господи спасения моего (37/22–23). Сотвори со мною знамение во благо, и да видят ненавидящии мя, и постыдятся, яко Ты, Господи, помогл ми и утешил мя еси (85/17).

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О еже простити рабам Своим (рабу Своему, рабе Своей) (имя рек) во узилищах сущим, все согрешения их (его, ея) и милостиву и благоуветливу быти им (ему, ей), Господу помолимся.

О еже вскоре услышати глас моления нашего и от уз и темницы милостивно свободити рабов Своих (раба Своего, рабу Свою), Господу помолимся.

О еже, якоже иногда прилежную Церкви Своея о Петре молитву, и нашу ныне милостивно услышати и от уз свободити рабов Своих (раба Своего, рабу Свою) Господу помолимся.

О еже сотворити милость с рабами Своими (рабом Своим, рабой Своей) и от всех бед и нужды и от узилища, якоже древле Иосифа во Египте, силою Своею скоро свободити их (его, ея), Господу помолимся.

О избавитися:

Заступи, спаси:

Пресвятую, Прeчистую:

Возглас: Яко подобает:

На Бог Господь:

Тропарь, глас 2:

Манассию от уз и горькаго заточения молитв ради свободивый, Всещедрый Боже, и рабов Твоих, о нихже (и раба, Твоего о нем же; и рабу Твою, о ней же) мы ныне моление Тебе приносим, от уз и заточения свободи и от всякаго злаго обстояния избави, яко Един Человеколюбец.

Слава, и ныне.

Кондак, глас 5:

Яко милосердия Источник и благости Пучина, Христе Боже, не презри в скорбях и бедах сущих (сущаго, сущую), Тебе верою призывающих (призывающаго, призывающую), но яко Щедр помилуй, и от уз скоро свободи, да поем Ти: аллилуия.

Прокимен, глас 7: Изведи из темницы душу мою, исповедатися имени Твоему.

Стих: Вонми молитве моей, яко смирихся зело.

Апостол в Деяниях, зач. 29 (12, 1–11).

Во дни оны, возложи Ирод царь руце озлобити некия иже от Церкве. Уби же Иакова брата Иоаннова мечем. И видев, яко годе есть иудеем, приложи яти и Петра: бяху же дние опресночнии. егоже и ем всади в темницу, предав четырем четверицам воинов стрещи его, хотя по Пасце извести его к людем. И убо Петра стрежаху в темнице: молитва же бе прилежна бываемая от Церкви к Богу о нем. Егда же хотяше его извести Ирод, в нощи той бе Пeтp спя между двема воинома, связан железнома ужема двема, стражие же пред дверьми стрежаху темницы. И се Ангел Господень предста, и свет возсия в храмине: толкнув же в ребра Петра, воздвиже его глаголя: востани вскоре. И спадоша ему ужа железная с руку. Рече же Ангел к нему: препояшися, и вступи в плесницы твоя: сотвори же тако. И глагола ему: облецыся в ризу твою, и последствуй ми. И изшед в след его идяше: и не ведаше, яко истина есть бывшее от Ангела, мняше же видение зрети. Прошедша же первую стражу и вторую, приидоста ко вратом железным, вводящим во град, яже о себе отверзошася има: И изшедше преидоша стогну едину, и абие отступи Ангел от него. И Петр быв в себе, рече: ныне вем воистину, яко посла Бог Ангела Своего, и изъят мя из руки Иродовы, и от всего чаяния людей Иудейских.

Аллилуия, глас 4:

Стих: Из глубины воззвах к Тебе, Господи, Господи услыши глас мой.

Стих 2: Да будут уши Твои внемлюще гласу моления моего.

Евангелие от Иоанна, зач. 31 (8, 31–36).

Рече Господь к веровавшим к Нему иудеем: аще вы пребудете во словеси Моем, воистинну ученицы Мои будете. И разумеете истину, и истина свободит вы. Отвещаша и реша Ему: семя Авраамле есмы, и никомуже работахом николиже, како Ты глаголеши, яко свободни будете? Отвеща им Иисус: аминь аминь глаголю вам, яко всяк творяй грех, раб есть греха. Раб же не пребывает в дому во век: сын пребывает во век. Аще убо Сын вы свободит, воистинну свободни будете.

Ектения сугубая:

Помилуй нас Боже:

Петра от уз и темницы изведый и невредна Церкви Твоей представивый, Христе, и рабов Твоих в заточении сущих (раба Твоего в заточении суща, рабу Твою, в заточении сущую), яко Милосерд помилуй и от уз свободи, молимся Тебе, Всемилостивый Спасе, услыши и помилуй.

Избавляяй нища от сильна, и убога емуже несть помощника, в беде и в заточении, и во узах сущих (суща, сущую), яко Щедр милостивно свободи, прилежно молимся Тебе, скоро услыши и яко Щедр помилуй.

Иосифа в темницы древле во Египте заключеннаго преславно свободивый и ныне рабов Твоих (раба Твоего, рабу Твою) в заточении сущих (сущаго, сущую) от уз и горькия беды избави, молимся Тебе, Избавителю милостивый, услыши и скоро помилуй.

Возглас: Услыши ны, Боже:

Молитва

Господи Иисусе Христе Боже наш, святаго апостола Твоего Петра от уз и темницы без всякаго вреда свободивый, смиренно молим Тя: приими милостивно моление наше о оставлении грехов рабов Твоих (раба Твоего, рабы Твоея) в темницу всажденных (всажденнаго, всажденную) и молитвами апостола Твоего и всех святых, яко Человеколюбец, всесильною Твоею десницею от всякаго злаго обстояния избави и на свободу скоро изведи, да благодарно славят (славит) Тя и Безначальнаго Твоего Отца и Святаго Духа во веки веков. Аминь.

Отпуст:

Христос, истинный Бог наш, молитвами Пречистыя Своея Матери, силою Честнаго и Животворящаго Креста; предстательством святых Ангелов Хранителей наших;святых славных первоверховных апостолов Петра и Павла, и прочих святых славных и всехвальных апостолов; святаго праведнаго Иосифа Прекраснаго; святой великомученицы Анастасии Узорешительницы; святаго священномученика Ермогена, патриарха Московскаго и всея Руси; преподобнаго и благовернаго князя Иоанна Угличскаго, во иноцех Игнатия, Вологодскаго чудотворца; святых славных добропобедных мучеников; святых праведных Богоотцев Иоакима и Анны и всех святых, помилует и спасет нас, яко Благ и Человеколюбец.

Последование молебного пения во время войны

Возгласившу архиерею, или иерею: Благословен Бог наш:

Чтец: Слава Тебе, Боже наш, слава Тебе.

Царю Небесный: Трисвятое. Отче наш: Господи, помилуй (12). Слава, и ныне. Приидите, поклонимся: (трижды).

Посем певцы поют по клиросам:

С нами Бог, разумейте, язы́цы, и покоряйтеся. Яко с нами Бог.

Услышите до последних земли. Яко с нами Бог.

Могущии покаряйтеся. Яко с нами Бог.

Аще бо паки возможете, и паки побеждени будете. Яко с нами Бог.

И иже аще совет совещаваете, разорит Господь. Яко с нами Бог.

И слово, еже аще возглаголете, не пребудет в вас. Яко с нами Бог.

Страха же вашего не убоимся, ниже смутимся. Яко с нами Бог.

Господа же Бога нашего Того освятим, и Той будет нам в страх: Яко с нами Бог.

И аще на Него надеяся буду, будет мне во освящение. Яко с нами Бог.

И уповая буду на Него, и спасуся Им. Яко с нами Бог.

Се аз и дети, яже ми даде Бог. Яко с нами Бог.

Людие, ходящии во тьме, видеша свет велий. Яко с нами Бог.

Живущии во стране и сени смертней, свет возсияет на вы. Яко с нами Бог.

Яко Отроча родися нам, Сын, и дадеся нам. Яко с нами Бог.

Егоже начальство бысть на раме Его. Яко с нами Бог.

И мира Его несть предела. Яко.с нами Бог.

И нарицается имя Егo, велика совета Ангел. Яко с нами Бог.

Чуден Советник. Яко с нами Бог.

Бог крепок, Властитель, Начальник мира. Яко с нами Бог.

Отец будущего века. Яко с нами Бог.

С нами Бог, разумейте язы́цы, и покаряйтеся. Яко с нами Бог.

Слава Отцу и Сыну и Святому Духу.

С нами Бог, разумейте, язы́цы, и покаряйтеся. Яко с нами Бог.

И ныне и присно и во веки веков, аминь.

С нами Бог, разумейте язы́цы, и покаряйтеся. Яко с нами Бог.

Ектения обычная:

Миром Господу помолимся.

Лик: Господи, помилуй.

И прочая, даже до: О плавающих:

Таже прилагает и сия:

О еже лук медян положити мышцы верных Своих, и укрепити десницу их силою крепости Своея, в побеждение и попрание супостат наших, Господу помолимся.

Лик: Господи, помилуй.

О еже неослабну, непребориму, победительну же силу, крепость и мужество с храбростию христоименитым воинам нашим, на сокрушение врагов и супостат наших и всех хитрообразных их наветов, подати, Господу помолимся.

Лик: Господи, помилуй.

О еже студа и безчестия лица противящихся нам исполнити, сердце их страха и ужаса, и Ангел Господень да будет погоняяй и поражаяй их, Господу помолимся.

Лик: Господи, помилуй.

О еже услышати от Церкве Святыя Своея вопль и воздыхание единоверных наших, и от врагов и супостат порабощенных рабов Своих в печали и скорби своей к Нему вопиющих, и извести от погибели жизнь их, Господу помолимся.

Лик: Господи, помилуй.

Заступи, спаси, помилуй:

Лик: Господи, помилуй.

Пресвятую, Пречистую, Преблагословенную:

Лик: Тебе, Господи.

Архиерей или иерей возглашает:

Яко подобает Тебе всякая слава:

Лик: Аминь.

Посем, Бог Господь: со стихи на глас 1.

Тропарь, глас тойже:

Спаси, Господи, люди Твоя и благослови достояние Твое, победы православным христианам на сопротивныя даруя, и Твое сохраняя Крестом Твоим жительство.

Слава, тойже.

И ныне, Богородичен:

Предстательство страшное и непостыдное, не презри, Благая, молитв наших, всепетая Богородице: утверди православных жительство, спаси христолюбивых людей и подаждь им с небесе победу, зане родила еси Бога, едина Благословенная.

Диакон: Вонмем.

Иерей: Мир всем.

Чтец: И духови твоему.

Диакон: Премудрость, вонмем.

Чтец: Прокимен, глас 4:

Господь, крепость людям Своим даст, Господь благословит люди Своя миром.

Стих: Глас Господень в крепости, глас Господень в великолепии.

Посем чтет Апостол к Коринфянам, зач. 172 (2Кор. 2, 14–16; 1Тим. 1, 17).

Братие, Богу благодарение, всегда победители нас творящему о Христе Иисусе, и воню разума Его являющу нами во всяком месте. Яко Христово благоухание есмы Богови, в спасаемых и в погибающих. Овем убо воня смертная в смерть: овем же воня животная в живот. И к сим кто доволен? Царю же веков нетленному, невидимому, единому, премудрому Богу, честь и слава во веки, аминь.

Иерей: Мир ти.

Чтец. И духови твоему.

Диакон: Премудрость, прости услышим Святаго Евангелия.

Иерей: Мир всем.

Лик: И духови твоему.

Иерей; От Матфея Святаго Евангелия чтение.

Лик: Слава Тебе, Господи, слава Тебе.

Диакон: Вонмем.

Иерей чтет Евангелие от Матфея, зач. 20 от полу (7, 7–11).

Рече Господь: просите и дастся вам; ищите и обрящете; толцыте, и отверзется вам. Всяк бо просяй приемлет, и ищяй обретает, и толкущему отверзется. Или кто есть от вас человек, егоже аще воспросит сын его хлеба, еда камень подаст ему? Или аще рыбы просит, еда змию подаст ему? Аще убо вы лукави суще, умеете даяния блага даяти чадом вашим: кольми паче Отец ваш Небесный даст блага просящим у Него.

Лик: Слава Тебе, Господи, слава Тебе.

Диакон:

Помилуй нас, Боже, по велицей милости Твоей, молимся Ти, услыши и помилуй.

Лик: Господи, помилуй (трижды).

Таже: Не на лук наш уповаем, ни оружие наше спасет нас, Господи, но Твоея всемогущия помощи просим, и на Твою силу дерзающе, на врагов наших ополчаемся, и имя Твое верно призывающе, со умилением молимся Тебе: Всемогий Господи, милостивно услыши и помилуй.

Лик: Господи, помилуй (трижды).

Защитниче правоверных, посли стрелы Твоя, Господи, и смятение сотвори врагам нашим, блесни молния, и разжени иx: посли руку Твою свыше, и покори их, и в руки верных предаждь, молимся Тебе, услыши и помилуй.

Лик: Господи, помилуй (трижды).

Во веки пребываяй, Милосерде Господи, запрети языком в достояние Твое приходящим и оскверняющим Церковь Святую Твою: пожени их бурею Твоею, и гневом Твоим смути их, исполни лица их безчестия, да постыдятся и смятутся в век века, да посрамятся и силою судеб Твоих гордость их да сокрушится, имя же Твое святое да прославится в нас, прилежно молимся Тебе, услыши и помилуй.

Лик: Господи, помилуй (трижды).

Возглас: Услыши ны, Боже Спасителю наш:

Лик: Аминь.

Диакон: Со умилением преклонше колена, Господу помолимся.

Лик: Господи, помилуй.

Предстоятель, преклонив колени, со всяким вниманием и умилением чтет молитву сию велегласно:

Молитва

Господи Боже наш, послушавый Моисея, простерша к Тебе руце, и людей израилевых укрепивый на Амалика, ополчивый Иисуса Навина на брань, и повелевый солнцу стати: Ты и ныне, Владыко Господи, услыши нас молящихся Тебе: укрепи силою Твоею людей православных, благослови их дела, умножи славу их победами над противоборствующими Православной Церкви, утверди всесильною Твоею десницею, сохрани воинов православных, посли Ангела Твоего укрепляющаго их. Отыми от них всяк глад и пагубу, и избави их от огня и меча и нападения врагов, и от всякаго востания противнаго: подаждь им вся, яже ко спасению прошения, споспешествуя им во всем. Посли, Господи, невидимо десницу Твою, рабов Твоих заступающую во всем: яко Твоя держава, Царство и сила, от Тебе помощь вси приемлем, на Тя уповаем и Тебе славу возсылаем, Отцу и Сыну и Святому Духу, ныне и присно и во веки веков.

Лик: Аминь.

И обычный отпуст.

Последование молебного пения в нашествие варваров

Благословишу иерею, начинаем:

Слава Тебе, Боже наш, слава Тебе.

Царю Небесный: Трисвятое. Отче наш:

Иерей глаголет: Яко Твое есть Царство:

Чтец же, псалом 142: Господи, услыши молитву мою:

Слава, и ныне.

Аллилуия, аллилуия, аллилуия, слава Тебе, Боже. (Трижды.)

Посем, Бог Господь: со стихи, на глас 1.

Тропарь, глас тойже:

Спаси, Господи, люди Твоя и благослови достояние Твое, победы православным христианам, на сопротивныя даруя, и Твое сохраняя Крестом Твоим жительство.

Слава, и ныне. Богородичен:

Предстательство страшное и непостыдное не презри, Благая, молитв наших, всепетая Богородице: утверди православных жительство, спаси христаименитых людей, подаждь им с небесе победу, зане родила еси Бога, едина Благословенная.

Начинаем канон без ирмосов, глас 8

Песнь 1

Ирмос: Колесницегонителя фараона:

Припев: Многомилостиве Господи, сокруши врагов под ноги наша.

Грех ради наших и беззаконий попустил еси, Правосуде, врагам нашим озлобити нас, но милосердия ради Твоего, Человеколюбче, отврати от нас праведный гнев Твой и помилуй нас.

Многомилостиве Господи, сокруши врагов под ноги наша.

Якоже древле на Амалика победу угоднику Твоему Моисею даровал еси, Милостиве Боже; тако и ныне молим Тя, победу на врагов православным людям даруй.

Слава: Крестообразно простертыми руками Моисеовыми Амаликову силу низложил, Всесильне: и ныне молим Тя, подаждь крестоносным людям силу на сокрушение и попрание возстающих на Тя.

И ныне: Силою неизреченною Твоею, Многомилостиве Христе, защити людей Твоих от всякая напасти, победу даруя на врагов православным людям, ради Пречистыя Твоея Матере и всех святых.

Катавасия по каждой песни: Избави от бед рабов Твоих, Милостиве, яко мы усердно к Тебе прибегаем, к Милостивому Избавителю, всех Владыце, Господу Иисусу.

Песнь 3

Ирмос: Небеснаго круга:

Многомилостиве Господи, сокруши врагов под ноги наша.

Неизреченным милосердием Твоим защити, Христе, людей Твоих, и низложи дерзость врагов наших.

Многомилостиве Господи, сокруши врагов под ноги наша.

Якоже древле предал еси, Боже, иноплеменников верному рабу Твоему Иисусу Навину: тако и ныне, Многомилостиве, предаждь сопротивныя полчища в руки верным рабам Твоим.

Слава: Не предаждь нас, Владыко, грех ради наших и беззаконий в руки врагов, но преложи праведный гнев Твой на милость, и подаждь утешение рабам Твоим.

И ныне: Мати Божия, сохрани под кровом Твоим христолюбивых воинов и Отечество наше, и Своим предстательством у Сына Своего Христа Бога нашего, испроси нам победу на врагов и супостатов наших.

Катавасия: Избави от бед рабов Твоих, Милостиве, яко мы усердно к Тебе прибегаем, к Милостивому Избавителю, всех Владыце, Господу Иисусу.

Ектения:

Помилуй нас, Боже, по велицей милости Твоей, молимся Тебе, услыши и помилуй.

Лик: Господи, помилуй (трижды).

He на лук наш уповаем, ни оружие наше спасет нас, Господи, но Твоея всемогущия помощи просим, и на Твою силу дерзающе, на врагов наших ополчаемся, и имя Твое верно призываем: со умилением молимся Тебе, Всемогий Господи, милостивно услыши и помилуй.

Лик: Господи, помилуй (трижды).

Во веки пребываяй, Милосерде Господи, запрети языкам, в достояние Твое приходящим, и оскверняющим Церковь Святую Твою, пожени их бурею Твоею, и гневом Твоим смути их: исполни лица их безчестия, да постыдятся и смутятся в век века, да посрамятся, и силою судеб Твоих гордость их да сокрушится, имя же Твое да прославится в нас, прилежно молимся Тебе, услыши и помилуй.

Лик: Господи, помилуй (трижды).

О еже услышати от Церкве Святыя Своея вопль и воздыхание единоверных наших, и от врагов и супостат порабощенных рабов Своих, в печали и скорби своей к Тебе вопиющих, и извести от тления жизнь их, прилежно молимся Тебе, Господи, услыши и помилуй.

Лик: Господи, помилуй (трижды).

Возглас: Яко милостив и Человеколюбец Бог еси:

Седален:

Церковь вопиет Ти, Христе Боже: силою Креста Твоего укрепи верных рабов Твоих и подаждь им победы на сопротивных.

Слава, и ныне. Богородичен:

Богородице Дево, скорая миру Помощнице, Твоего предстательства и заступления просим; умоли Милостивого Сына Твоего и Бога, от належащих бед избавити нас.

Песнь 4

Ирмос: Ты моя Крепость:

Многомилостиве Господи, сокруши врагов под ноги наша.

Владыко Боже, милосердием щадяй людей Твоих, напастьми же и скорбьми обращаяй их паки к Себе, отврати гнев Твой, и преложи скорбь нашу на радость, победу на сопротивных даруя.

Многомилостиве Господи, сокруши врагов под ноги наша.

Не вниди в суд с рабами Твоими, Правосуде, ибо никтоже постоит пред Тобою: но призирая милостивно на смирение наше, помилуй нас, и подаждь нам утешение.

Слава: Владыко Господи, рукою Твоею всесильною во глубине погрузивый фараона, Ты и ныне дерзость супостатов наших силою Креста Твоего низложи, презирая согрешения наша, яко един Милосерд.

И ныне: Великое дерзновение имаши к Рождшемуся из Тебе, яко никтоже ин, темже, Владычице, молимся о рабах Твоих, избавитися нам от нашествия иноплеменников.

Катавасия: Избави от бед рабов Твоих, Милостиве, яко мы усердно к Тебе прибегаем, к Милостивому Избавителю, всех Владыце, Господу Иисусу.

Песнь 5

Ирмос: Вскую мя отринул еси:

Многомилостиве Господи, сокруши врагов под ноги наша.

Не поминай Владыко, безчисленныя соблазны наша: но вскоре преложив гнев Твой на милосердие, низложи врагов наших и людей Твоих сохрани милостию Твоею.

Многомилостиве Господи, сокруши врагов под ноги наша.

Призри, Милостиве, на людей Твоих, сущих в скорбях, и подаждь помощь Твою на одоление врагов наших.

Слава: Укрепивый древле на гордаго Голиафа мышцу кроткаго Давида, и ныне, Владыко, укрепи православных людей, победу дая им на супостатов.

И ныне: Тя едину Пречистую Заступницу имамы непобедимую, и на Тя уповающе вопием Ти: избави нас, Владычице, от всех бед и зол.

Катавасия: Избави от бед рабов Твоих, Милостиве, яко мы усердно к Тебе прибегаем, к Милостивому Избавителю, всех Владычице, Господу Иисусу.

Песнь 6

Ирмос: Очисти мя, Спасе:

Многомилостиве Господи, сокруши врагов под ноги наша.

Избавивый, Владыко, в скорби сущих людей еврейских, и Сампсону подавый крепость Твоею силою: Ты и ныне, Милостиве, избави людей Твоих от сопротивных, и побори борющих нас.

Многомилостиве Господи, сокруши врагов под ноги наша.

Дивен еси, Боже, Твоею всесильною десницею спасаяй уповающих на Тя: вся бо рука Твоя может. Темже и ныне молим Тя, избави нас от врагов наших.

Слава: Оком Твоим всевидящим видя наследие Твое, Боже, от сопротивных озлобляемо, умилосердися, Владыко, о людях Твоих, и низложи вражию дерзость.

И ныне: Под Твое благоутробие прибегаем, Богородице Дево, моления наша не презри во обстоянии, но от бед избави, едина Чистая и Благословенная.

Катавасия: Избави от бед рабов Твоих, Милостиве, яко мы усердно к Тебе прибегаем, к Милостивому Избавителю, всех Владыце, Господу Иисусу.

Ектения малая.

Возглас: Ты бо еси Царь мира:

Кондак, глас 4:

Вознесыйся на Крест волею, тезоименитому Твоему новому жительству щедроты Твоя даруй, Христе Боже: возвесели силою Твоею христоименитых людей, победы дая им на супостаты, пособие имущим Твое оружие мира, непобедимую победу.

Прокимен, глас 6:

Господь крепость людем Своим даст, Господь благословит люди Своя миром.

Стих: Глас Господень в крепости, глас Господень в великолепии.

Посем Апостол ко Евреям, зач. 329 от полу (11, 32–34; 12, 1–2).

Братие, не достанет ми повествующу лета, о Гедеоне, Вараце же и Сампсоне, и Иеффаи, о Давиде же и Самуиле, и о других пророцех. Иже верою победиша царствия, содеяша правду, получиша обетования, заградиша уста львов. Угасиша силу огненную, избегоша острея меча, возмогоша от немощи, быша крепцы во бранех, обратиша в бегство полки чужих. Темже убо и мы, толик имуще облежащ нас облак свидетелей, гордость всяку отложше, и удобь обстоятельный грех, терпением да течем на предлежащий нам подвиг: Взирающе на начальника веры, и совершителя Иисуса.

Иерей: Мир ти.

Чтец: И духови твоему.

Диакон: Премудрость, прости услышим Святаго Евангелия.

Иерей: Мир всем.

Лик: И духови твоему.

Иерей: От Матфея Святаго Евангелия чтение.

Лик: Слава Тебе, Господи, слава Тебе.

Диакон: Вонмем.

Иерей чтет Евангелие от Матфея, зач. 20 от полу (7, 7–11).

Рече Господь: просите и дастся вам; ищите и обрящете; толцыте, и отверзется вам. Всяк бо просяй приемлет, и ищяй обретает, и толкущему отверзется. Или кто есть от вас человек, егоже аще воспросит сын его хлеба, еда камень подаст ему? Или аще рыбы просит, еда змию подаст ему? Аще убо вы лукави суще, умеете даяния блага даяти чадом вашим: кольми паче Отец ваш Небесный даст блага просящим у Него.

Лик: Слава Тебе, Господи, слава Тебе.

Слава, глас 6: Отче, Слове и Душе, Троице Святая, очисти множества согрешений наших.

И ныне: Молитвами Богородицы, Милостиве, очисти множества согрешений наших.

Помилуй мя, Боже, по велицей милости Твоей, и по множеству щедрот Твоих очисти беззаконие мое.

Стихира, глас 4:

Пособивый, Господи, кроткому Давиду победити иноплеменника, и верным рабам Твоим способствуй оружием Креста низложити врагов наших: покажи, Милосерде, на нас древния Твоя милости, да разумеют воистинну, яко Ты еси Бог наш, и Тя призывающе побеждаем.

Иерей: Спаси, Боже, люди Твоя, и благослови достояние Твое:

Возглас: Милостию и щедротами:

Песнь 7

Ирмос: Божия снисхождения:

Многомилостиве Господи, сокруши врагов под ноги наша.

Престани от гнева, и призри милостивно на скорбь нашу, и не предаждь нас врагам нашим, отцев Боже.

Многомилостиве Господи, сокруши врагов под ноги наша.

Coгpешихом, Господи, пред Тобою: но вемы, яко несть грех побеждающ милосердие Твое, и сего ради во умилении взываем к Тебе: помилуй нас, отцев Боже.

Слава: Вемы Господи, яко наказуеши нас, яко отец сынов, да скорбьми обратиши нас к Тебе. Темже в покаянии зовем Тебе: остави нам долги наша, и избави нас от врагов наших, отцев Боже.

И ныне: Подвигни, Владычице, Ангелов и Архангелов, лики же пророков, апостолов и мучеников, согласно умолити Сына Твоего и Бога, да избавит нас от всех вражеских наветов и нахождений.

Катавасия: Избави от бед рабов Твоих, Милостиве, яко мы усердно к Тебе прибегаем, к Милостивому Избавителю, всех Владыце, Господу Иисусу.

Песнь 8

Ирмос: Седмерицею пещь:

Многомилостиве Господи, сокруши врагов под ноги наша.

Кто изочтет, Христе, неизреченныя Твоя милости? Презираеши бо грехи кающихся, болезни же исцеляеши, и брани вся отвращаеши, и безумных укрощаеши страсти. Темже молимся Тебе, Человеколюбче Господи, обрати гнев Твой на милосердие к нам.

Многомилостиве Господи, сокруши врагов под ноги наша.

Разжени врагов наших рукою Твоею, Господи, и защити нас людей Твоих. Победу, якоже древле Давиду и Иисусу Навину на иноплеменников, подая на всех возстающих на нас супостатов.

Слава: Пророцы со апостолами, мученицы со святителями, и преподобнии отцы со всеми святыми, молитву творити ко Христу за нас прилежно: да преложит гнев на милость, победу подая нам на сопротивных врагов.

И ныне: Богородице всепетая, Ты вся можеши у Превечнаго Сына Твоего: моли убо Его, яко Милосердая Мати, избавити нас от всех зол, да Тя непрестанно величаем.

Катавасия: Избави от бед рабов Твоих, Милостиве, яко мы усердно к Тебе прибегаем, к Милостивому Избавителю, всех Владыце, Господу Иисусу.

Песнь 9

Ирмос: Ужасеся о сем небо:

Многомилостиве Господи, сокруши врагов под ноги наша.

Дивны, Христе, щедроты Твоя, ихже на согрешивших Тебе показал еси исперва обильно: на нихже уповающе, и мы грешнии припадаем Тебе и молимся: и нам ныне яви милосердие и щедроты Твои, да Тя непрестанно величаем.

Многомилостиве Господи, сокруши врагов под ноги наша.

Призри милостивно, Господи, на смиренных рабов Твоих ко Твоему милосердию припадающих, и на Тя единаго все упование возлагающих, и подаждь нам силу и крепость на одоление всех врагов наших, да Тя, Всесильнаго Помощника, непрестанно величаем.

Слава: Яко очи рабов в руку господий своих: тако всегда очи наши к Тебе, Многомилостиве Господи Боже наш: призри убо милостивно на нас, и низложи силою Твоею гордыню врагов наших, и под нозе наша тех покори, да Тя непрестанно величаем.

И ныне: Мати Божия, принеси усердныя молитвы наши Сыну Твоему и Богу нашему, да спасет нас Тобою от всех врагов наших.

Достойно есть: Трисвятое. По Отче наш: Иерей: Яко Твое есть Царство:

Тропари:

Помилуй нас, Господи, помилуй нас, всякаго бо ответа недоумеюще, сию Ти молитву яко Владыце грешнии приносим: помилуй нас.

Слава: Господи, помилуй нас, на Тя бо уповахом, не прогневайся на ны зело, ниже помяни беззаконий наших, но призри и ныне яко Милосерд, и избави нас от врагов наших: Ты бо еси Бог наш, и мы людие Твои, вси дела руку Твоею, и имя Твое призываем.

И ныне: Милосердия двери отверзи нам, благословенная Богородица, надеющиися на Тя да не погибнем, но да избавимся Тобою от бед: Ты бо еси спасение рода христианскаго.

Ектения:

Помилуй нас, Боже, по велицей милости Твоей, молимся Ти, услыши и помилуй.

Еще молимся, о еже сохранитися земле Русской от глада, губительства, землетрясения, потопа, огня, меча, нашествия иноплеменников и междоусобной брани: о еже милостиву и благоуветливу быти благому и человеколюбивому Богу нашему, отвратити всякий гнев на нас движимый, и избавити нас от належащаго и праведнаго Своего прещения, и помиловати нас.

Возглас: Услыши ны, Боже Спасителю наш:

Диакон: Вонмем, и во умилении сердца колена душ и телес наших преклоньше, Господу помолимся.

Иерей чтет молитву:

Господи Боже сил, Боже спасения нашего, Боже, творяй чудеса един, призри в милости и щедротах на смиренных рабов Твоих, и человеколюбно услыши нас: се бо врази наша собрашася на нас. Ей, Господи Боже Спасителю наш, крепость и упование и заступление наше, не помяни беззаконий и неправд людей Твоих, и не отвратися от нас гневом Своим, но в милости и щедротах Твоих посети смиренных рабов Твоих, ко Твоему милосердию припадающия: возвесели сердца наши, укрепи нас силою Твоею: востани в помощь нашу и разруши лукавые советы мыслящих нам злое: суди обидящих и побори борющих нас, и обрати нечестивое дерзновение их в страх и бегство; православному же воинству нашему, на Тя уповающему подаждь во мнозем дерзновении и мужестве погнати и постигнути их, и о имени Твоем победити; а имже судил еси положити на брани души Своя за веру и Отечество, тем прости согрешения их. Ты бо еси заступление, и победа и спасение уповающим на Тя, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

И отпуст.

Последование молебного пения о прекращении войн и о мире всего мира

По обычном начале ектения великая:

Миром Господу помолимся.

О свышнем мире:

О мире всего мира:

О еже все распри, раздоры, разделения, вражду и злобу, междоусобия и войны всеконечно истребити, тишину же всем народам земли даровати и миром вожделенным их оградити, Господу помолимся.

О еже пощадити грады и веси воюемые ради младенцев тамо сущих, иже десницы своей и шуйцы не познаша, и ради скотов безсловесных, Господу помолимся.

О еже всех людей, сущих среди ужасов современных войн, оградити Ангелами Своими, сохранити их от страха нощнаго, от стрелы, летящей во дни, от вещи во тьме приходящей, от ран, болезней, глада, разорения и иных бед, Господу помолимся.

О еже утешить скорбящих людей земель и царств, войнами разоряемых, Господу помолимся.

О избавитися нам:

Заступи, спаси:

Пресвятую, Пречистую:

Возглас: Яко подобает:

На Бог Господь:

Тропарь, глас 6:

Помилуй нас, Господи, помилуй нас людей согрешивших и страшными бедствиями войн наказуемых. Истинный же мир сый и Начальник мира, на землю мир Твой принесший и благовестивший его нам, дальним и ближним, умягчи сердца людския, утоли вражду и несогласия, устави войны и кровопролития, ради избранных Твоих сократи дни ужасов военных и мир мирови Твоему даруй, молитвами Богородицы и святых, и спаси нас. (Дважды.)

Слава, и ныне. Богородичен, глас 3:

Прибежище и сила наша, Богородице, державная помощь мира, молитвами Твоими покрый рабов Твоих от всяких бед и скорбей, едина Благословенная.

Прокимен, глас 7:

Господь крепость людям Своим даст, Господь благословит люди Своя миром.

Стих: Глас Господень в крепости, глас Господень в великолепии.

Апостол к Коринфянам, зач. 197 от полу (2Кор. 13, 11–13).

Братие, радуйтеся, совершайтеся, утешайтеся, тожде мудрствуйте. Мир имейте и Бог любве и мира будет с вами. Целуйте друг друга лобзанием святым. Целуют вы святии вси. Благодать Господа нашего Иисуса Христа и любы Бога и Отца и общение Святаго Духа со всеми вами. Аминь.

Аллилуия, глас 4:

Буди мир в силе Твоей и обилие в столпостенах Твоих.

Стих: Ради братий моих и ближних моих глаголах убо мир о Тебе.

Евангелие от Матфея, зач. 98 (24, 6–8, 22).

Рече Господь Своим учеником, услышати имате брани и слышания бранем, зрите, не ужасайтеся; подобает бо всем сим быти, но не тогда есть кончина. И аще не быша, прекратилися дние оны, не бы убо спаслася всяка плоть. Избранных же ради прекратятся дние оны.

Ектения сугубая:

Помилуй нас, Боже:

Еще молимся Тебе, Господу Богу нашему, о еже призрети на стенания, слезы и вопли людей Своих и видев скорби, беды и страдания наши, милостиву быти и отвратити весь гнев Свой, праведно движимый на нас и помиловати нас.

Еще молимся и о еже услышати:

Возглас: Услыши ны Боже:

Молитва

Владыко Вседержителю, Святый Царю. Призри с небесе и виждь, како враждуют народы и замышляют друг на друга суетное и злобное, како содрогаются все от воспоминания о бывших ужасах военных и трепещут от ожидания уготовляемых новых, еще более страшных. О, Многомилостиве! Умилосердись о созданиях Твоих. Прости грехи и беззакония наши, ихже ради многия скорби, беды и устрашения приидоша на нас. Благодатию Пресвятаго Духа ороси изсохшия любовию сердца людския, тернием самолюбия, ненависти и зависти, злобы, вражды и лукавства и иных беззаконий поросшия, да возрастят они горящую к Тебе и братиям любовь, и ею да будут истреблены все распри, раздоры, разделения, междоусобия и войны, да все народы не устами едиными глаголют о мире, но всем сердцем возлюбивше его, непритворно раскуют мечи свои и копья на орудия мирнаго делания и к мирному токмо труду обратятся. Человеколюбивый и Милостивый! Усердно молим Тя: мир миру Твоему даруй, Церквам Твоим, людям православным и всем творениям Твоим. Ты бо еси Царь мира и мира Твоего несть предела, и Тебе слава и благодарение и поклонение от всех да возсылается, и ныне и присно и до скончания века веков.

Певцы: Аминь.

И поют славословие великое:

Слава в вышних Богу и на земли мир, в человецех благоволение. Хвалим Тя, благословим Тя, кланяемтися, славословим Тя, благодарим Тя, великия ради славы Твоея. Господи, Царю Небесный, Боже Отче, Вседержителю, Господи Сыне Единородный Иисусе Христе и Святый Душе. Господи Боже, Ангче Божий, Сыне Отечь, вземляй грех мира, помилуй нас, вземляй грехи мира, приими молитву нашу. Седяй одесную Отца, помилуй нас. Яко Ты еси един Свят, Ты еси един Господь, Иисус Христос, во славу Бога Отца, аминь.

На всяк день благословлю Тя, и восхвалю имя Твое во веки, и в век века.

Сподоби Господи в день сей без греха сохранитися нам. Благословен еси Господи, Боже отец наших, и хвально и прославлено имя Твое во веки, аминь.

Буди Господи, милость Твоя на нас, якоже уповахом на Тя.

Благословен еси, Господи, научи мя оправданием Твоим. Благословен еси Владыко, вразуми мя оправданием Твоим. Благословен еси Святый, просвети мя оправдании Твоими.

Господи, милость Твоя во век, дел руку Твоею не презри: Тебе подобает хвала, Тебе подобает пение, Тебе слава подобает, Отцу и Сыну и Святому Духу, ныне и присно и во веки веков. Аминь.

И отпуст.

Последование молебного пения об отечестве (Составлено в августе 1941 г.)

По обычном начале

Псалом 43.

Боже ушима нашима услышахом, и отцы. наши возвестиша нам дело, еже соделал еси во днех их, во днех древних. Рука Твоя языки потреби, и насадил еси их: озлобил еси людей, и изгнал еси их. Ибо не мечем своим наследиша землю, и мышца их не спасе их, но десница Твоя и мышца Твоя, и просвещение лица Твоего, яко благоволил еси в них. Ты еси Сам Царь мой и Бог мой, заповедаяй спасения Иаковля. О Тебе врагов наших избодем роги, и о имени Твоем уничижим востающих на ны. Не на лук бо мой уповаю, и меч мой не спасет мене. Спасл бо еси нас от стужающих нам, и ненавидящих нас посрамил еси. О Бозе похвалимся весь день, и о имени Твоем исповемыся во век. Ныне же отринул еси, и посрамил еси нас, и не изыдеши, Боже, в силах наших. Возвратил еси нас вспять при вразех наших, и ненавидящии нас расхищаху себе. Дал еси нас яко овцы снеди, и во языцех разсеял еси нас. Отдал еси людей Твоих без цены, и не бе множества в восклицаниих наших. Положил еси нас поношение соседам нашим, подражнение и поругание сушим окрест нас. Положил еси нас в притчу во языцех, покиванию главы в людех. Весь день срам мой предо мною есть, и студ лица моего покры мя, от гласа поношающаго и оклеветающаго, от лица вражия и изгоняющаго. Сия вся приидоша на нас, и не забыхом Тебе, и не неправдовахом в завете Твоем. И не отступи вспять сердце наше, и уклонил еси стези наша от пути Твоего. Яко смирил еси нас на месте озлобления, и прикры ны сень смертная. Аще забыхом имя Бога нашего и аще воздехом руки наша к богу чуждему. Не Бог ли взыщет сих? Той бо весть тайная сердца. Зане Тебе ради умерщвляемся весь день, вменихомся яко овцы заколения. Востани, Вскую спиши Господи? Воскресни, и не отрини до конца. Вскую лице Твое отвращаеши? Забываеши нищету нашу и скорбь нашу? Яко смирися в персть душа наша, прильпе земли утроба наша. Воскресни Господи, помози нам, и избави нас имене ради Твоего.

Псалом 73.

Вскую Боже отринул еси до конца? Разгневася ярость Твоя на овцы пажити Твоея? Помяни сонм Твой, егоже стяжал еси исперва, избавил еси жезл достония Твоего, гору Сион сию, в ней же вселился еси. Воздвигне руце Твои на гордыни их в конец, елика лукавнова враг во святем Твоем. И восхвалишася ненавидящии Тя посреде праздника Твоего; положища знамения своя, знамения, и не познаша яко во исходе превыше, яко в дубраве древяне секирами разсекоша двери его вкупе, сечивом и оскордом разрушиша их. Возжгоша огнем святило Твое, на земли оскверниша жилище имени Твоего. Реша в сердце своем южики их вкупе: приидите и отставим вся праздники Божия от земли. Знамения их не видехом: несть уже пророка, и нас не познает уже. Доколе Боже поносит враг? Раздражит противный имя Твое до конца? Вскую отвращаеши руку Твою и десницу Твою от среды недра Твоего в конец? Бог же Царь наш прежде века содела спасение посреде земли. Ты утвердил еси силoю Твоею море, Ты стерл еси главы змиев в воде, Ты сокрушил еси главу змиеву, дал еси того брашно людем Ефиопским. Ты расторгл еси источники и потоки, Ты изсушил еси реки многоводныя. Твой есть день и Твоя есть нощь, Ты совершил еси зарю и солнце. Ты сотворил еси вся пределы земли, жатву и весну Ты создал еси я. Помяни сия: враг поноси Господеви, и людие безумнии раздражиша имя Твое. Не предаждь зверем душу, исповедащуюся Тебе, душ убогих Твоих не забуди до конца. Призри на завет Твой, яко исполнишася помраченнии земли домов беззаконий. Да не возвратится смиренный посрамлен, нищ и убог восхвалят имя Твое. Востани, Боже, разсуди судом Твоим, помяни поношение Твое, еже от безумнаго весь день. Не забуди гласа молитвенник Твоих: гордыня ненавидящих Тя да восходит всегда к Тебе.

Псалом 78.

Боже, приидоша язы́цы в достояние Твое, оскверниша храм свяый Твой, положиша Иерусалим яко овощное хранилище: положиша трупия рабов Твоих брашно птицам небесным, плоти преподобных Твоих зверем земным. Пролияша кровь их яко воду окрест Иерусалима, и не бе погребаяй. Быхом поношение соседом нашим, подражнение и поругание сущим окрест нас. Доколе, Господи, прогневаешися до конца, разжжется яко огнь рвение Твое? Пролей гнев Твой на языки не знающия Тебе, и на царствия, яже имени Твоего не призваша, яко поядоша Иакова, и место его опустошиша. Не помяни наших беззаконий первыx, скоро да предварят нас щедроты Твоя, Господи, яко обнищахом зело. Помози нам, Боже, Спасителю наш, славы ради имене Твоего, Господи, избави нас и очисти грехи наша имене ради Твоего. да не когда рекут язы́цы, где есть Бог их? И да увестся во языцех пред очами нашими отмщение крове рабов Твоих пролитыя. Да внидет пред Тя воздыхание окованных: по велишию мышцы Твоея снабди сыны умерщвленных. Воздаждь соседом нашим седмерицею в недро их поношение их, имже поносиша Тя, Господи. Мы же людие Твои и овцы пажити Твоея, исповемыся Тебе, Боже, во век, в род и род возвестим хвалу Твою.

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О святых храмах и с верою, благоговением и страхом Божиим входящих в них и о всех вне храмов воздыхающих, Господу помолимся.

О Святейшем Патриархе:

О стране нашей:

О еже помиловать Церковь Православную Российскую, утвердить, укрепить, расширить, умирить и непоколебиму адовыми вратами во веки сохранить сию, Господу помолимся.

О еже все ереси, расколы, разделения и отступления вскоре испразднить и всех отступльших паки во ограду Церкви Православной возвратить, Господу помолимся.

О еже все козни отступников веры и врагов Церкви Святой разорить, православных же пастырей и верных мирян беспечальными сохранить, Господу помолимся.

О еже сохранить от растления души православных, наипаче юношей, дев, отроков, младенцев наших, оградить их от злых влияний и сохранить для Церкви Святой, Господу помолимся.

О еже помиловать рабов Своих, прежде прилежавших Святой Церкви, ныне же охладевших к ней, помянуть их прежнюю ревность, услышать слезы и воздыхания их близких, скорбящих об их отпадении и паки возвратить их на путь веры и на послушание Церкви, Господу помолимся.

О всех и в равнодушии к вере хранящих доброе расположение сердца и добро творящих, еже и их, яко Корнилия сотника привлечь ко Святой Церкви, Господу помолимся.

О еже все языки словенския утвердить в Православии и единомыслии и от всякаго иновернаго и иноязычнаго засилия оградить, Госпопу помолимся.

О избавитися нам:

Заступи, спаси:

Пресвятую, Пречистую:

Возглас: Яко подобает:

Бог Господь: во глас 8.

Тропарь, глас 8:

С вышних призираяй, убогих приемляй, посети нас, беды и скорби грехов ради наших терпящих, Владыко Всемилостиве, молитвами Богородицы и всех святых Русских даруй земле нашей велию милость. (Дважды.)

Слава. Ин тропарь, глас 4:

Иерусалима вышняго граждан,/ от земли нашей возсиявших/ и Богу во всяком чине и всяким подвигом угодивших,/ приидите, воспоим, вернии/ О, всеблаженнии земли Русской заступницы,/ молитеся ко Господу,/ да помилует сию от гнева Своего,/ исцеляя сокрушение ея,/ и верных людей Своих утешит.

И ныне. Богородичен, глас тойже:

К Заступнице страны нашей Приснодеве Богородице притецем,/ и к первописанной иконе Ея ныне припадем,/ с верою зовуще из глубины души:/ О Мати Божия, спаси землю Русскую,/ исцели сокрушение ея,/ и верных людей утеши.

Псалом 136.

На реках Вавилонских тамо седохом и плакахом, внегда помянути нам Сиона. На вербиих посреде его обесихом органы наша. Яко тамо вопросиша ны пленшии нас о словесех песней, и ведшии нас о пении: воспойте нам от песней Сионских. Како воспоем песнь Господню на земле чуждей? Аще забуду тебе, Иерусалиме, забвена буди десница моя. Прильпни язык мой гортани моему, аще не помяну тебе, аще не предложу Иерусалима, яко в начале веселия моего. Помяни, Господи, сыны едомския, в день Иерусалимль глаголющия: истощайте, истощайте до оснований его. Дщи Вавилоня окаянная, блажен иже воздаст тебе воздание твое, еже воздала еси нам: блажен иже имет, и разбиет младенцы твоя о камень.

Канон, глас 6, на немже припевы:

Милостиве Господи,/ по молитвам святых Твоих помилуй землю Русскую. (Дважды.)

Мати Божия, спаси землю Русскую. (Дважды.)

Слава, и ныне.

По 3-й песни катавасия:

По молитвам святых Твоих, Милостиве,/ избави от бед и обстояний землю Русскую,/ яко мы усердно/ к Тебе прибегаем/ к Милостивому Избавителю и Владыце нашему.

Спаси от бед и обстояний землю Русскую, Пресвятая Богородице Дево,/ яко мы вси по Бозе/ к Тебе прибегаем,/ яко к нерушимей стене и заступлению.

Ектения сугубая.

Помилуй нас Боже:

Еще молимся о Святейшем Патриархе нашем:

Еще молимся о стране нашей:

На неложное слово Твое: просите и дастся вам, уповающе к Тебе, Господу Богу нашему, прибегаем и просим помощи Твоей, ищем спасения Твоего, толцем в двери милосердия Твоего: даруй нам блага Твои, Отче Небесный, и не отрини прошения нашего, его же с воплем крепким и стенанием сердечнем дерзаем приносити Тебе: пощади, пощади, Господи, Отечество наше, Русскую землю и весь народ наш, человеколюбно и скоро помилуй.

Первозданных прародителей наших за нарушение заповеди Твоей райскаго блаженства, едемской красоты и сладости лишившихся и о сем пред вратами рая рыдавших, обетованием о Спасителе утешивый, умилосердися, Долготерпеливе, и о многосогрешившем народе русском, достойно за многия беззакония, за нарушение всех Твоих заповедей оскудением красоты церковной, лишением благодатной сладости святых Таинств, гладом слышания слова Твоего и иными скорбями наказуемом; утеши и его надеждою скораго избавления от всех бед, его обышедших, и тако пощади, пощади Господи, Отечество наше, Русскую землю, и весь народ наш человеколюбно и скоро помилуй.

Якоже пред потопом, развратися многое множество русских людей, сташа плотию и духа несть в них; но человеколюбия ради Твоего и по молитвам Богоматери и святых, пощади, пощади Господи, Отечество наше, Русскую землю, и не токмо праведных, якоже Ноя, но и весь народ наш, огнем скорбей и страданий, яко водами потопными омыв и покаянными слезами убелив, человеколюбно и скоро помилуй.

Аврааму праотцу обещавый пощадити и зело согрешившие Содом и Гоморру ради немногаго числа праведников, ради сущих и ныне в народе нашем сокровенных рабов Твоих, пощади, пощади Господи, Отечество наше, Русскую землю, и весь народ наш человеколюбно и скоро помилуй.

Езекиины слезы, Манассиино и ниневитян покаяние и Давидово исповедание приемый и скоро тех помиловавый, услыши, Многомилостиве, моление рабов Твоих, о своих согрешениях и о согрешениях народа русскаго слезы проливающих, и покаянные вопли их вменив яко покаяние всего народа нашего, пощади, пощади Господи, Отечество наше, Русскую землю, и весь народ наш человеколюбно и скоро помилуй.

Иеремии, о разорении Сиона рыдавшему, подражающе, ревнители Православия рыдают о разорении храмов и обителей, о осквернении святынь. Услыши, Милосерде, стенания их, возврати пленение наше, возврати нам уцелевшия еще святыни и тако пощади, пощади Господи, Отечество наше, Русскую землю, и весь народ наш человеколюбно и скоро помилуй.

Якоже древле евреи в Вавилоне, тако и мы, обесившие безмолвные органы, рыдаем о разорении Сионов наших, паче же о разорении храма души народа нашего, о его развращении, озлоблении, падении. Но, о Многомилостиве! Без Твоея помощи мы и помыслить что доброе не можем. Темже Ты и Сам подвигни всех русских людей, и архипастырей и пастырей, и монахов и мирян, и во власти сущих и подвластных, и мужей и жен, и старцев и юных: припасть к Тебе с покаянными слезами и положить начало исправления, и тако пощади, пощади Господи, Отечество наше, Русскую землю и весь народ наш человеколюбно и скоро помилуй.

Не точию Петра, отвержение свое горько оплакивавшаго, на степени верховнаго апостольства возставивый, и разбойника, мал глас испустившаго во едином часе рая сподобивый, но и о распинателях Твоих моливый, и Павла, гонителя и хульника, к Себе призвавый и сосудом избранный Твоим соделавый, помилуй, Человеколюбче, всех русских людей, не токмо кающихся о своих согрешениях, но и сих, иже о покаянии не помышляют, иже враждуют на Тя и в злобе своей утверждаются. Призови и их всех к Себе и тако пощади, пощади Господи, Отечество наше, Русскую землю, и весь народ наш, и добрых и злых, сих в добре укрепив, оных от зла к добру обратив, человеколюбно и скоро помилуй.

Возглас: Яко милостив:

Седален, глас 6:

Подобен: Еже о нас исполнив:

Отцам нашим милости обильно Источавший,/ и Отечество наше, святую Русь, дивно хранивший,/ не отлучайся, Пастырю добрый, и от нас,/ скорбящих и бедствующих,/ но неотступен буди с нами,/ всегда вопия любящим Тя:/ Аз есмь с вами/ и никтоже на вас.

По 6-й песни катавасия и ектения малая.

Возглас: Ты бо еси Царь мира:

Кондак, глас 6:

Подобен: Предстательство христиан:

Предстательства ради Пречистой Богоматери,/ ходатайства ради святых сродников наших,/ не презри грешных молений гласы,/ но предвари, яко Благий на помощь к нам,/ из глубины сердечной взывающим:/ помилуй, помилуй, помилуй нас.

Прокимен, глас 6: Господи, воздвигни силу Твою и прииди спасти нас.

Стих: Господи Боже сил, доколе гневаешися на молитву рабов Твоих.

Евангелие от Матфея, зач. 20 от полу (7, 7–11).

Рече Господь: просите, и дастся вам; ищите, и обрящете; толцыте и отверзется вам. Всяк бо просяй приемлет, и ищай обретает, и толкущему отверзается. Или кто есть от вас человек, егоже аще воспросит сын его хлеба, еда камень подаст ему? Или аще рыбы просит, еда змию подаст ему? Аще убо вы, лукави суще, умеете даяния блага даяти чадом вашим, кольми паче Отец ваш Небесный даст блага просящим у Него?

Слава: Отче, Слове и Душе,/ Троице Святая,/ очисти множество согрешений народа русскаго.

И ныне: Молитвами Богородицы,/ Милостиве, очисти,/ множество согрешений народа русскаго.

Помилуй мя, Боже, по велицей милости Твоей, и по множеству щедрот Твоих очисти беззакония моя.

Стихира, глас 6:

Подобен: Не ввери мя человеческому предстательству:

Не ввери нас человеческому предстательству,/ Владыко наш Господи!/ Скорби бо велии обдержат нас;/ терпети уже не можем нашедших на нас обстояний;/ помощи на земле не имамы,/ или к кому от человек прибегнем,/ всегда и от всех оскорбляемии,/ и утешения не имамы,/ кроме Тебе, Владыко наш Господи/ и Пречистой Богоматери и святых./ Темже, яко Щедрый Господи,/ умилосердися о людях Твоих,/ яко Долготерпелив примирися/ и помилуй нас.

Посем глаголет диакон:

Спаси, Боже, людей Твоих и благослови достояние Твое, посети милостию и щедротами землю Русскую, утверди в ней веру истинную, расшири, умножи, умири и непоколебиму и адовыми вратами во веки сохрани Церковь Святую, умудри архипастырей и пастырей наших право править слово Твоея истины, сохрани в мире паству православную, разори и вскоре искорени всякое разделение и ересей возстание, возвыси рог ревнителей веры отеческой и ниспосли на нас милости Твоя богатыя, молитвами Всепречистой Владычицы нашея Богородицы и Приснодевы Марии, силою Честнаго и Животворящаго Креста и честныя и многоцелебныя Ризы Своея90. Предстательством честнаго Архистратига Михаила91 и прочих Небесных Сил бесплотных, честнаго славнаго пророка, Предтечи и Крестителя Иоанна; святых славных и всехвальных апостолов Андрея Первозваннаго92, Симона Кананита93, Варфоломея94 и Матфея95 и прочих святых славных и всехвальных апостолов; святаго праведнаго Иова Многострадальнаго96; святаго славнаго пророка Божия Илии97; святых великих мучеников Георгия Победоносца98 и Димитрия Солунскаго99; святой великомученицы Варвары100; иже во святых отцев наших и вселенских великих учителей и святителей Василия Великаго, Григория Богослова и Иоанна Златоустаго101; иже во святых отца нашего Николая, архиепископа Мир Ликийских, чудотворца102; святых священномучеников в Херсоне епископствовавших Василия, Ефрема, Капитона, Евгения, Еферия, Елпидия и Агафодора103; иже во святых отец наших Климента104 и Мартина105, пап Римских, Фотия патриарха Константинопольскаго106 и Стефана архиепископа Сурожскаго107; преподобнаго отца нашего Максима исповедника108; святой равноапостольной Нины, просветительницы Иверии; святых благоверных царя Давида Возобновителя и царицы Тамары, Грузинских и всех святых в странах кавказских просиявших; святаго священномученика Григория, просветителя Великой Армении, святых равноапостольных Мефодия и Кирилла, учителей Словенских; святых равноапостолов Русских благовернаго великаго князя Владимира и благоверной великой княгини Ольги; иже во святых отец наших всея России чудотворцев Михаила и Макария, митрополитов Киевских, Петра, Алексия, Ионы и Филиппа, Фотия, Киприана и Феогноста, и священномученика Патриарха Ермогена, Московских; Никиты, Нифонта, Иоанна, Ионы, Моисея, Евфимия, Феоктиста и Серапиона, Новгородских; Леонтия, Исаии, Игнатия, Иакова, Феодора и Димитрия Ростовских; Феодора, Симона, Дионисия и Иоанна Суздальских; Ефрема Переяславскаго; Амфилохия и Стефана Волынских; Кирилла и Лаврентия Туровских; Василия Рязанскаго, Арсения Тверскаго, Стефана, Герасима, Питирима и Ионы Великопермских; Гурия, Варсонофия и Германа Казанских; Афанасия патриарха Цареградскаго, Лубенскаго; Митрофана и Тихона Воронежских; Иннокентия и Полония Иркутских; Феодосия Черниговскаго, Иосафа Белгородскаго; Питирима Тамбовскаго; Иоанна Тобольскаго и Иосифа убиеннаго, Астраханскаго; преподобных и богоносных отец наших Антония и Феодосия, первоначальников монашескаго жития в Русской земле; Нестора летописца, Алипия иконописца, Агапита врача безмезднаго и прочих преподобных отцев Киево-Печерских; Сергия, Никона, Михея и Дионисия, Радонежских; Саввы Сторожевскаго; Иосифа Волоколамскаго, Стефана Махрищскаго, Мефодия Песнощскаго, Ферапонта Можайскаго; Андроника и Саввы, Московских; Антония Римлянина, Варлаама Хутынскаго, Арсения Новгородскаго, Михаила Клопскаго, Саввы Вишерскаго, Ефрема Перекомскаго, Кирилла Белоезерскаго, Кирилла Новоезерскаго, Нила Сорскаго, Константина и Космы Старорусских, Антония Леохновскаго, Антония Дымскаго, Мартирия Зеленецкаго, Мартиниана Белоезерскаго, Макария Римлянина, Никандра Городноезерскаго, Евфросина Синезерскаго, Сергия Шухтовскаго, Ксенофонта Робейскаго, Филиппа Ирапскаго, Новгородских; Никандра пустынножителя, Корнилия преподобномученика, Саввы Крыпецкаго, Иоасафа Снетогорскаго, Досифея Верхнеостровскаго, Стефана Озерскаго, Онуфрия Мальскаго, Евфросина и Серапиона Спасоелеазаровских, Псковских; Илариона Гдовскаго, Иакова и Феофила Омучских; Сергия и Германа Валаамских; Арсения Коневскаго; Зосимы и Савватия, Германа и Иринарха Соловецких; Елеазара Анзерскаго; Трифона Печенгскаго; Афанасия и Лазаря Олонецких; Никифора и Геннадия Важеезерских; Ионы Климнецкаго, Ионы Яшезерскаго, Корнилия Палеостровскаго, Афанасия Сянжемскаго; Александра Свирскаго; Варлаама Керетскаго; Елисея Сумскаго, Александра Ошевенскаго, Диодора Юрьегорскаго, Никодима и Серапиона Кожеезерских; Кирилла Челмогорскаго, Пахомия Кенскаго, Иоанна и Лонгина Яренгских, Вассиана и Ионы Пopтолинских, Даниила Шужгорскаго, Варлаама Важескаго, Иова Унзельскаго, Антония Сийскаго, Симона Воломскаго, Архангельских; Герасима и Галактиона Вологодских, Дмитрия Прилуцкаго, Дионисия, Макария и Амфилохия Глушицких, Григория Пельшемскаго, Павла, Сергия и Сильвестра Обнорских, Корнилия и Арсения, Кассиана и Лаврентия Комельских, Лонгина Коряжемскаго, Евфимия и Хоритона Сянжемских; Иосифа Заоникиевскаго; Александра Куштскаго, Григория и Кассиана Авнежских, Иосафа и Василия Спасокубенских; Феодосия Тотемскаго, Иннокентия Грязовецкаго, Онуфрия и Авксентия Перцовских и прочих преподобных отцев Вологодских; Трифона Вятскаго, Геннадия Любимоградскаго, Игнатия Ломскаго, Адриана и Севастиана Пошехонских, Ярославских; Макария Унженскаго, Аврамия и Паисия Галичских; Пахомия Нерехтскаго, Тихона Лухскаго, Адриана Монзенскаго, Варнавы Ветлужскаго, Иакова Железноборскаго и сподвижника его Иакова, Макария Писемскаго, Ферапонта Монзенскаго, Костромских; Евфимия Суздальскаго; Космы Яхромскаго; Никиты Столпника и Даниила игумена, Переяславских; Аврамия архимандрита, Петра царевича Ордынскаго и Иринарха затворника Ростовских; Паисия и Кассиана Угличских; Макария Калязинскаго, Нила Столобенскаго, Ефрема и Аркадия Новоторжских; Аврамия Смоленскаго, Поликарпа Брянскаго; Афанасия Брестскаго, Макария Овручскаго, Иова Почаевскаго; Макария Белевскаго, Пафнутия Боровскаго, Тихона Калужскаго и Серафима Саровскаго; святых благоверных князей и страстотерпцев: Бориса и Глеба, Игоря Черниговскаго, Ярополка Волынскаго, Андрея Боголюбскаго, Георгия Владимирскаго, Василия Ростовскаго, Романа Рязанскаго, Михаила Тверскаго, Михаила Черниговскаго и боярина его Феодора; святых мучеников Феодора варяга и сына его Иоанна, Аврамия Болгарскаго, Mеpкурия Смоленскаго, Антония, Иоанна и Евстафия Литовских; Исидора пресвитера и с ним седмидесяти и двух во Юрьеве, граде Ливонском; Иоанна, Петра и Стефана Казанских; Гавриила младенца Белостокскаго, и мученицы Иулиании, княгини Вяземской; преподобных и благоверных великого князя Александра Невскаго, Владимирскаго и Новгородскаго, и сына его князя Даниила Московскаго; Николы Святоши Черниговскаго; Феодора Острожскаго, Петра и Февронии Муромских; Иоанна Угличскаго и Олега Брянскаго, святых благоверных князей Владимира и Анны, Мстислава и Феодора Новгородских; Всеволода и Довмонта Псковских; Константина и чад его Михаила и Феодора Муромских, Глеба Владимирскаго, Феодора и чад его Давида и Константина Ярославских; Андрея Смоленскаго, Романа и Димитрия царевича, Угличских; преподобных и благоверных княгинь Евфpосинии Полоцкой, Евфросинии Суздальской, Анны Кашинской, Евдокии Московской, Харитины Литовской; святых блаженных и Христа ради юродивых Василия, Иоанна и Максима, Московских, Прокопия и Иоанна Великоустюжских, Николая и Феодора Новгородских, Николая Псковскаго, Исидора и Иоанна Ростовских, Прокопия Вятскаго и Лаврентия Калужскаго; святых праведных Максима иерея Тотемскаго, Иакова Боровицкаго, Симеона Верхотурскаго, Симона Воломскаго, Прокопия Усьянскаго; Афанасия Наволоцкаго; Артемия отрока Веркольскаго; Иакова и Иоанна отроков Менюжских; Иулиании милостивой Муромской, Иулиании Ольшанской, Гликерии Новгородской и всех прочих святых в земле Русской просиявших, святых славных добропобедных мучеников, преподобных и богоносных отцев наших святаго (имя рек) (вселенскаго святаго в тот день празднуемаго), святых праведных Богоотцев Иоакима и Анны и всех святых, молим Тя, Многомилостиве Господи, услыши нас грешных, молящихся Тебе, и помилуй нас.

Лик: Господи, помилуй (12).

Возглас: Милостию и щедротами:

По 9-й песни за Достойно:

О пресветлый облаче, Мати Божия! Нас побеждающих победи державною Твоею и всесильною десницей и сущим в скорбех предстани, обидимых заступи и грехи разреши молитвенников Твоих, елика бо хощеши и можеши.

По Отче наш:

Тропарь, глас 4:

Скоро предвари, прежде даже не поработимся врагам, хулящим Тя и претящим нам, Христе Боже наш, погуби Крестом Твоим борющих нас, да уразумеют, како может православных вера, молитвами Богородицы, Едине Человеколюбче.

Ектения сугубая:

Помилуй нас Боже:

Еще молимся о еже сохранитися великому царствущему граду Москве, граду сему (или веси сей) и всем градом и весям Русским и всей земле нашей от глада, губительства, земли трясения, потопа, огня, меча, нашествия иноплеменников и междоусобныя брани: о еже милостиву и благоуветливу быти Благому и Человеколюбивому Богу нашему, отвратити всякий гнев на нас движимый и избавити нас от належащаго и праведнаго Своего прещения, и помиловати ны.

Лик: Господ, помилуй (40).

Еще молимся и о еже услышати Господу Богу глас моления нас грешных и помиловати нас.

Лик: Господи, помилуй (трижды).

Возглас: Услыши ны, Боже:

Посем возглашает диакон:

Паки и паки со умилением и стенанием сердечным, колена душ и телес наши преклоньше109, Господу помолимся.

Лик: Господи, помилуй (трижды).

И чтет предстоятель со всяким умилением молитву сию:

Молитва

Согрешихом, беззаконовахом, неправдовахом пред Тобою, Господи Боже наш; не сохранихом заповедей Твоих, не соблюдохом повелений Твоих, но возжелахом ходити в волях сердец наших. Не хранили мы первой любви к Тебе, Жениху душ наших, нашему Владыце и Благодетелю, к матери нашей Церкви Православной и ея уставами, ко Отечеству нашему, Святой Руси и ее святыням, к памяти отцев наших и благочестивым обычаям и заветам предков. Не к Тебе, Востоку светлому, но к темному западу с вожделением устремляли мы взоры наши. Темже, имже согрешихом, сим и наказуемся. В праведном гневе Твоем на несохранивших верности, на хромавших на оба колена, Ты с запада навел еси иноплеменников на Отечество наше. Лютая война, посем нестроения внутренния, смуты и раздоры церковныя причиняли неисчеслимыя бедствия и страдания народу русскому. За беззакония наши небо заключилось и земля не давала плодов. То гладом, жаждою и мором поражал еси нас. Напоследок же паки попустил еси приити во Отечество наше иноплеменникам, буиим и зверонравным, пришедшим с злобными замыслами поработить и истребить народ русский, уничтожить государство Российское. Но, долготерпеливый и в гневе, человеколюбивый и в наказании, Ты не попустил исполниться злым намерениям их и не отдал на конечное разорение и уничтожение землю, собранную воедино и устроенную молитвами, слезами и потом, трудами и подвигами благочестивых предков наших и святых мужей и жен от рода нашего. Проникшие вглубь страны нашей, враги наши со стыдом обратились вспять и сами богопораженною язвою трупиями достойно падоша. Но от незалеченных еще ран военных и доселе страждут многия из народа русскаго. Непрекращающееся же во всем мире бряцание оружием и ожидание новых ужасов военных в трепет повергает всех. Зело умножаются стужающие нам, мнози возстают на нас, мнози глаголют: несть спасения Святой Руси, несть спасения православному народу русскому в Бозе его.

Но, о Многомилостиве, не до конца гневайся на нас! Помилуй землю русскую, пощади русский народ! Призови его к покаянию, якоже древле ниневитян. Бывшими бедствиями и скорбями омой нас от беззаконий наших, очисти от грехов наших. Возгрей сердца наши верою в Tя, окрили их надеждою на Тя, распали их любовию к Тeбе. Умножь в нас веру, помоги нашему неверию. Скоро да предварят нас щедроты Твои, Господи, яко обнищахом зело. Помози нам, Боже, Спасителю наш, славы ради имени Твоего, да не когда рекут языци: где есть Бог их, и да увестся во языцех пред очами нашими отмщение крови рабов Твоих пролитой. Наказуя накажи нас, Господи, смерти же не предаждь, да не умрем, но живи будем и поведаем дела Твои. Не гнушайся быти, якоже во дни отцев наших, Господом и Владыкою нашим, Помощником нашим, Заступником нашим, Спасителем нашим, Прибежищем в дни скорби, Веселием в дни радости, Славою нашею, Возношением глав наших.

Приклонися, Милостиве, ко предстательству Пречистой Богоматери день и нощь, якоже дерзновенно исповедует Святая Церковь, молящейся о нас и скипетры царств Своими молитвами утверждающей. Вонми Ея ходатайству о нас и не возбрани Ей и на будущее время быти нашей теплой Предстательницей и Помощницей, сопротивных нашествия от Отечества нашего отгоняющей и ко спасению всех нас наставляющей, не возбраняй Ей и на будущее время быть Царицею Небесной Русской земли, Владычицей Державной и Взбранной Воеводой православнаго народа русскаго.

Приими, Святе святых, молитвы святых сродников наших, чудотворцев Русских, непрестанно, якоже мы твердо веруем, молящихся о земном Отечестве и о нас, аще и недостойных меньших братиях их. По молитвам святых очисти, Господи, Русскую землю от нечестия, безбожия, развращения. По молитвам святых очисти, Господи, русских людей от всех злых навыков во дни отступления от веры усвоенных, и да украшаются они верою, благочестием, смирением, терпением и прочими добродетелями христианскими, ими же обиловали отцы наши. По молитвам святых умудри, Господи, архипастырей и пастырей наших право править слово Твоея истины, дерзновенно, везде и пред всеми исповедывать имя Твое, безбоязненно, не взирая на лица, возвещать правду Твою, не уклоняяся ни на десно, ни на шуее, руководить ко спасению Тобою вверенную им паству. По молитвам святых да исчезнут грешницы от лица Русской земли и беззаконницы, еже не быти им на ней.

Помяни, Боже отцев наших, Царю царей и Господи господствующих, труды и подвиги подвижников благочестия, строителей и правителей Святой Руси и всех благочестивых предков наших. Сохрани и возстави еже собирали и созидали они. Сохрани Отечество наше, яко Русь Святую, яко Русь великую, могущественную и славную. Сохрани во Отечестве нашем до скончания веков веру истинную, утверди в нем Церковь Православную, да ими руководимые русские люди, подвизаясь о христианском устроении земнаго Отечества, паче о жизни будущего века помышляют. Сохрани Отечество наше, яко светоч Православия не токмо для языков, в нем обитающих, но и для всего мира, паче же для единоплеменных нам народов словенских. Сохрани великий царствующий град Москву, яко сердце Святой Руси, яко средоточие святынь наших, и жизни церковной и государственной. Сохрани священный Кремль Московский и в нем матерь церквей русских, собор Успения Богоматери и все уцелевшие еще храмы, обители и святыни. Возврати их верным людям и помоги возстановить в прежнем благолепии, да ими по-прежнему красуется святорусская земля, да к ним прибегающие приемлют благодать, освящение; умножение радостей, облегчение скорбей.

Вонми, Агнче, за мир закланный, воплю крови рабов Твоих, за Tя пролитой и помилуй землю, сими кровьми напоенную, помилуй землю, в недрах своих сокрывшую телеса, пострадавших за имя Твое, за веру и Отечество и за братий души свои положивших.

Призри, Неложный во обетованиях, на ревнителей веры в наши дни воинствующаго безбожия дерзновенно имя Твое пред сынами века сего исповедавших, и на сокровенных среди мира рабов Твоих, в наше лукавое время служения похоти плоти, похоти очес и гордости житейской, колен своих пред современными ваалами не преклонивших и риз своих не осквернивших. Ради сих избранных Твоих сократи по Твоему обещанию дни скорби нашей, дни бед и страданий, от нихже изнемогаем, от нихже истаявают сердца наши и мы близимся ко отчаянию.

Не отрини, Безмерный в милости, моления и нас грешных и недостойных рабов Твоих. Аще бо и согрешихом, но не отступихом от Тебя. Тя единаго, яко Господа нашего знаем, к Тебе единому во всякое время и во всяком обстоянии прибегаем, от Тебя единаго помощи ожидаем, к Тебе единому присно очи наши возводим. Не отврати и Tы лица Твоего от нас. Буди милостив к нам грешным. Спаси людей Твоих и благослови достояние Твое и упаси нас и вознеси нас до века.

Услыши, Владыко всех концев земли, всех племен и народов, во всяком языце во Отечестве нашем обитающем, боящихся Тя, по законам веры своей добро творящих и молящихся Тебе. Приими их молитвы о спасении земнаго Отечества, в паче их и соплеменников их во ограду Церкви Твоей Святой введи, да все народы, во всех концах Русской земли обитающие, едино стадо церковное будут и различными языками, но единым сердцем Тя славят, самобытность же свою и добрые обычаи предков храняще и дружелюбно вкупе со всем народом русским о устроении земнаго Отечества пекущеся, паче Отечества горняго взыскуют.

Не прогневайся до конца, Творче и Создателю всех, не хотяй смерти грешных но ожидаяй их обращения и покаяния, и на братий наших, иже по неведению, по наущению или по злобе враждуют на Тя, хулят превеликое имя Твое, в кощунство обращают святейшие предметы веры. И сии бо творение Твое. Темже и их, яко дело рук Твоих не презри, но сих скорбями и наказаниями, оных милостями и благодеяниями, иных же чудесными знамениями к Себе призови и делателями искусными заповедей Твоих яви.

О Небесный Царю, Человеколюбче Господи, Долготерпеливе и Многомилостиве! Паки и паки к Тебе припадаем и вопием.

Предстательству Богоматери и святых вняв, молитвы живых и усопших не отринув и величайшия страдания всех тварей Твоих и скотов бессловесных и самой матери-земли помянув, пощади, пощади, Отечество наше, Русскую землю, и весь народ наш человеколюбно и скоро помилуй. За дни, в нихже поражал еси нас, за лета, в нихже видехом злая, призри на рабов Твоих, православных русских людей и даруй нам утешение. Даруй нам утешение всегда видеть Отечество наше во всей славе, силе и величии. Даруй нам утешение всегда видеть во Отечестве нашем Церковь Православную возвеличенную и прославленную, якоже во дни отцев наших. Даруй нам утешение всегда свободно и беспрепятственно ходить в храмы Твои покланяться святыням нашим, услаждаться красотою церковною, укрепляться Таинствами веры, утолять глад наш духовный. Даруй нам утешение вскоре увидеть братий наших, от веры отпавших, паки к Тебе возвратившимися и вкупе с нами во дворах Твоих славословящими Тя. Даруй нам утешение вскоре увидеть прекращение не токмо войн, но и слухов о войнах, да народы мира, расковавше мечи своя и копья на орудия мирнаго делания, все способности ума своего богоподобнаго, Тобою, а не темными силами водимые, обратят не на измышление человеконенавистнических способов истребления друг друга, но на облегчение и сокращение труда человеческаго, да избыточествующие время и силы будут употребляемы на богоугождение, на творение добрых дел, на приготовление к жизни будущего века. Даруй нам утешение вскоре увидеть дни мирныя и лета благ духовных и телесных исполненные, да всегда, всякое довольство и духовное и телесное имуще, изобиловать будем и в дела благая, и тако во Отечестве нашем и во всем мире от всех да прославляется пречестное в великолепное имя Бога отцев наших, в Троице Святой славимаго и поклоняемаго до скончания века веков. Аминь.

Отпуст.

Христос истинный Бог наш, молитвами Пречистыя Своея Матери, святаго благовернаго, равноапостольнаго великаго князя Владимира и всех святых в земле Русской просиявших, помилует и спасет наш, яко Благ и Человеколюбец.

Певцы: Господи, помилуй (трижды).

Посем поем сие:

Утверждение на Тя надеющихся, утверди, Господи, Церковь, юже стяжал еси честною Твоею кровию.

Под Твою милость прибегаем, Богородице Дево, молений наших не презри в скорбях, но от бед избави нас, едина Чистая и Благословенная.

Пресвятая Богородице, спаси нас.

Все святии земли Русской молите Бога о нас.

Последование молебного пения об отечестве (Чин совершаемый мирянином)

Первее сотвори три поклона, глаголя:

Боже, очисти мя грешнаго (грешную) и помилуй мя. (Поклон).

Создавый мя Господи, и помилуй мя. (Поклон).

Без числа согреших, Господи, помилуй и прости мя грешнаго (грешную). (Поклон).

Посем начинай:

Молитвами святых отец наших, Господи Иисусе Христе Боже наш, помилуй нас. Аминь. (Поклон).

Слава Тебе, Боже наш, слава Тебе (крестное знамение без поклона). Царю Небесный: Святый Боже: (трижды с тремя поклонами). Слава, и ныне. Пресвятая Троице:Господи, помилуй (трижды). Слава, и ныне. Отче наш:(крестное знамение без поклона).

Молитвами святых отец наших: (поклон). Господи, помилуй (12). Слава, и ныне.

Приидите, поклонимся Цареви нашему Богу. (Поклон).

Приидите, поклонимся и припадем Христу Цареви нашему Богу. (Поклон).

Приидите, поклонимся и припадем Самому Христу, Цареви и Богу нашему. (Поклон).

Псалмы 43, 73 и 78.

Слава, и ныне.

Аллилуия, аллилуия, аллилуия, слава Тебе Боже (трижды с тремя поклонами).

Посем поем во глас 8:

Бог Господь и явися нам, благословен грядый во имя Господне.

Исповедайтеся Господеви, яко Благ, яко в век милость Его.

Бог Господь и явися нам, благословен грядый во имя Господне.

Обышедше, обыдоша мя и именем Господним противляся им.

Бог Господь и явися нам, благословен грядый во имя Господне.

Не умру, но жив буду и повем дела Господни.

Бог Господь и явися нам, благословен грядый во имя Господне.

Камень, его же небрегоша зиждущии, сей бысть во главу угла. От Господа бысть сей, и есть дивен во очесех наших:

Бог Господь и явися нам, благословен грядый во имя Господне.

Тропарь, глас 8:

С вышних призираяй, убогих приемляй, посети нас, грехов ради наших скорби терпящих, Владыко Всемилостивый, молитвами Богородицы и всех святых Русских даруй земле нашей велию милость. (Поклон. Дважды.)

Слава:

Тропарь, глас 4:

Иерусалима Вышняго граждане от земли нашей возсиявших к Богу во всяком чине и всяким подвигом угодивших, придите воспоем вернии: о всеблаженнии земли Русской заступницы, молитеся ко Господу, да помилует сию от гнева Своего, исцеляя сокрушение ея, и верных людей Своих утешит. (Поклон.)

И ныне: Богородичен глас тойже:

К Заступнице страны нашей Приснодеве Богородице притецем, и к первописанной иконе Ея ныне припадем и с верою зовуще из глубины души: О, мати Божия, спаси землю Русскую, исцели сокрушение ея и верных людей утеши. (Поклон.)

Псалом

136 На реках Вавилонских:

По окончании псалма поем канон.

Песнь 1

Милостивый Господи, по молитвам святых Твоих помилуй землю Русскую. (Поклон. Дважды.)

Мати Божия спаси землю Русскую. (Дважды. Поклон.)

Слава, и ныне.

Песнь 3

Милостивый Господи, по молитвам святых Твоих, помилуй землю Русскую. (Дважды.)

Мати Божия, спаси землю Русскую. (Дважды.)

Слава, и ныне.

Катавасия:

По молитвам святых Твоих, Милостиве, избави от бед и обстояний землю Русскую, яко мы усердно к Тебе прибегаем, к милостивому Избавителю и Владыце нашему. (Поклон.)

Спаси от бед и обстояний землю русскую, Пресвятая Богородице Дево, яко мы вси по Бозе к Тебе прибегаем, яко к нерушимой стене и заступлению. (Поклон.)

По сем читай сии моления:

На неложное слово Твое: просите и дастся вам, уповающе, к Тебе, Господу Богу нашему прибегаем, просим помощи Твоей, ищем спасения Твоего, толцем в двери милосердия Твоего. Даруй нам блага Твои, Отче Небесный, и не отрини прошения нашего, его же с воплем крепким и стенанием сердечным дерзаем произносити Тебе: пощади, пощади Господи, Отечество наше, Русскую землю и весь народ наш человеколюбно и скоро помилуй. (Поклон.)

Господи, помилуй (трижды).

Первозданных прародителей наших за нарушение заповеди Твоей, райского блаженства, Едемской красоты и сладости лишившихся, и о сем пред вратами рая рыдавших, обетованием о Спасителе утешивый, умилосердись Долготерпеливе и о многосогрешившем народе русском, достойно за многие беззакония, за нарушения всех Твоих заповедей, оскудением красоты церковной, лишением благодатной сладости святых Таинств, гладом слышания слова Твоего и иными скорбями наказуемом, утеши и его надеждою скорою избавления от всех бед, его обышедших, тако пощади, пощади Господи, Отечество наше, Русскую землю и весь народ наш человеколюбно и скоро помилуй. (Поклон.)

Господи, помилуй (трижды).

Якоже пред потопом развратися многое множество русских людей, сташа плотию и духа нет в них, но человеколюбия ради Твоего и по молитвам Богоматери и святых, пощади, пощади Господи, Отечество наше, Русскую землю и не токмо праведных, якоже Ноя, но и весь народ наш, огнем скорбей и страданий, яко водами потопными омыв и покаянными слезами убелив, человеколюбно и скоро помилуй. (Поклон.)

Господи, помилуй (трижды).

Аврааму праотцу обещавый пощадить и зело согрешивших Содом и Гомору ради немного числа праведников, ради сущих и ныне в народе нашем сокровенных рабов Твоих, пощади, пощади Господи, Отечество наше, Русскую землю и весь народ наш человеколюбно и скоро помилуй. (Поклон.)

Господи, помилуй (трижды).

Иезекиилевы слезы, Манасиино и ниневитянов покаяние и Давидово исповедание приемый и скоро тех помиловавый, услыши, Многомилостиве, моления рабов Твоих о своих согрешениях, и о согрешениях народа русского, слезы проливающих и покаянные вопли их, вменив яко покаяние всего народа нашего, пощади, пощади Господи, Отечество наше, Русскую землю и весь наш народ человеколюбно и скоро помилуй. (Поклон.)

Господи, помилуй (трижды).

Иеремии, о разорении Сиона рыдавшему, подражающе ревнители Православия рыдают о разорении храмов и обителей, о осквернении святынь. Услыши многогрешное стенание их, возврати нам уцелевшие еще святыни и тако пощади, пощади Господи, Отечество наше, Русскую землю и весь народ наш человеколюбно и скоро помилуй. (Поклон.)

Господи, помилуй (трижды).

Яко же древле евреи в Вавилоне, тако и мы повесивше безмолвные органы рыдаем о разорении Сионов русских, паче же о разорении храма души народа нашего, о его развращении, озлоблении, падении. Но, о Многомилостиве, без Твоей помощи мы и помыслить что доброе не можем. Тем же Ты Сам подвигни всех русских людей и архипастырей, и пастырей, и монахов, и мирян, и во власти сущих, и подвластных, и мужей, и жен, и старцев и юных припасть к Тебе с покаянными слезами и положить начало исправления и тако пощади, пощади Господи, Отечество наше, Русскую землю и весь народ наш человеколюбно и скоро помилуй. (Поклон.)

Господи, помилуй (трижды).

Не токмо Петра отречение свое горько оплаковавшего, на степень верховного апостольства воставивый и разбойника, мал глас на кресте испустившаго, во едином часе раеви сподобивый, но и о распинателях Твоих молившийся, и Павла, гонителя и хульника, к Себе призвавый и сосудом избранным Твоим соделавший, помилуй, Человеколюбче, всех русских людей, не токмо кающихся о своих согрешениях, но и сих, иже о покаянии не помышляют, иже враждуют на Тя и в злобе своей утверждаются, призови и их всех к Себе и тако пощади, пощади Господи, Отечество наше, Русскую землю, и весь народ наш, и добрых и злых, сих добре укрепив, оных от зла к добру обратив, человеколюбно и скоро помилуй. (Поклон.)

Господи, помилуй (трижды).

По сем вместо возгласа глаголи:

Молитвами святых отец наших, Господи Иисусе Христе, Боже наш, помилуй нас. Аминь. (Поклон.)

Седален, глас 6:

Отцам нашим милости обильно источавший и Отечество наше, Святую Русь дивно хранящий, не отлучайся, Пастырю Добрый, и от нас скорбящих и бедствующих, но неотступен буди с нами всегда, вопия любящим Тя: Аз есмь с вами и никтоже на вас. (Поклон.)

Песнь 4

Милостиве Господи, по молитвам святых Твоих помилуй землю Русскую. (Дважды.)

Мати Божия, спаси землю Русскую. (Дважды.)

Слава, и ныне.

Песнь 5

Милостиве Господи, по молитвам святых Твоих помилуй землю Русскую. (Дважды.)

Мати Божия, спаси землю Русскую. (Дважды.)

Слава, и ныне.

Песнь 6

Милостиве Господи, по молитвам святых Твоих помилуй землю Русскую. (Дважды.)

Мати Божия, спаси землю Русскую. (Дважды.)

Слава, и ныне.

По сем катавасия:

По молитвам святых Твоих, Милостиве, избави от бед и обстояний землю Русскую, яко мы усердно к Тебе прибегаем, к милостивому Избавителю и Владыце нашему. (Поклон.)

Спаси от бед и обстояний землю Русскую, Пресвятая Богородице Дево, яко мы вси по Бозе к Тебе прибегаем, яко к нерушимой стене заступлению. (Поклон.)

Господи, помилуй (трижды).

Слава, и ныне.

Кондак, глас 6:

Предстательства ради Пречистой Богоматери, ходатайства ради святых сродников наших, не презри грешных молений гласы, но предвари яко Благий, на помощь к нам, из глубины сердечной взывающим, помилуй, помилуй, помилуй нас, Господи. Поклон.

Прокимен, глас 6:

Господи, воздвигни силу Твою и приди спасти нас.

Господи, воздвигни силу Твою и приди спасти нас.

Стих: Господи Боже сил, доколе гневаешися на молитву рабов Твоих.

Господи, воздвигни сиду Твою и приди спасти нас.

Господи, воздвигни силу Твою и приди спасти нас.

Господи, помилуй (трижды).

Слава, и ныне. (Поклон.)

Всякое дыхание да хвалит Господа.

Всякое дыхание да хвалит Господа.

Всякое дыхание да хвалит Господа.

Хвалите Господа с небес, хвалите Его в вышних.

Всякое дыхание да хвалит Господа.

От Матфея Святаго Евангелия чтение.

Слава Тебе, Господи, слава Тебе (крестное знамение без поклона).

Рече Господь: просите, и дастся вам; ищите, и обрящете; толцыте и отверзется вам. Всяк бо просяй приемлет, и ищай обретает, и толкущему отверзается. Или кто есть от вас человек, егоже аще воспросит сын его хлеба, еда камень подаст ему? Или аще рыбы просит, еда змию подаст ему? Аще убо вы, лукави суще, умеете даяния блага даяти чадом вашим, кольми паче Отец ваш Небесный даст блага просящим у Него?

Слава Тебе, Господи, слава Тебе. (Поклон.)

Слава: Отче, Слове и Душе, Троица Святая, очисти множества согрешений народа русского. (Поклон.)

И ныне: Молитвами Богородицы и святых, Милостиве, очисти множество согрешений народа русского. (Поклон.)

Помилуй мя, Боже, по велицей милости Твоей и по множеству щедрот Твоих, очисти беззакония моя. (Поклон.)

Стихира, глас 6:

Не ввери нас человеческому предстательству, Владыко наш Господи, скорби бо велии обдержат нас. Терпеть уже не можем нашедших на нас обстояний. Помощи на земле не имамы или к кому от человек прибегнем, всегда и от всех оскорбляемы и утешения не имамы, кроме Тебе и Пречистой Богоматери и святых. Тем же, яко Щедрый Господи, умилосердись о людях Твоих, яко Долготерпелив, примирися и помилуй нас. (Поклон.)

Спаси, Боже, людей Твоих и благослови достояние Твое, посети милостию и щедротами Твоими землю Русскую, утверди в ней веру истинную; расшири, умножи, умири и непоколебимому и адовыми вратами во веки сохрани Церковь Святую; умудри архипастырей и пастырей наших право править слово Твоей истины, разори и вскоре испраздни всякое разделение и ересей востание; соблюди в мире паству православную; возвыси ревнителей веры отеческой и ниспосли на нас и нас всех верных людей Твоих милости Твои богатыя, молитвами Всепречистыя Владычицы нашей Богородицы и Приснодевы Марии, силою Честнаго и Животворящаго Креста (крестное знамение без поклона) и честныя и многоцелебныя ризы Своея, предстательством честных Небесных Сил бесплотных, честнаго и славнаго пророка, Предтечи и Крестителя Иоанна, святаго славнаго и всехвальнаго апостола Андрея Первозваннаго и прочих святых славных и всеславных апостолов, святаго великомученика и победоносца Георгия, святыя великомученицы Варвары, иже во святых отец наших и вселенских учителей и святителей Василия Великаго, Григория Богослова, Иоанна Златоустаго, иже во святых отца нашего Николая, архиепископа Мирликийскаго, чудотворца, святых равноапостольных Мефодия и Кирилла, учителей Словенских, святых равноапостолов Русских благоверного великого князя Владимира и благоверной великой княгини Ольги, иже во святых отец наших и всея России чудотворцев Михаила, митрополита Киевскаго, Петра, Алексия, Ионы, Филиппа и священномученика Ермогена, святителей Московских; Никиты и Иоанна Новгородских; Леонтия и Димитрия Ростовских; Стефана Великопермскаго, Гурия и Варсонофия Казанских; Мирофания и Тихона Воронежских; Иннокентия Иркутскаго; Питирима Тамбовского и Иосифа убиенного, Астраханскаго, чудотворцев; святых благоверных князей и страстотерпцев Бориса и Глеба; преподобнаго и благовернаго великаго князя Александра Невскаго; преподобных и богоносных отец наших Антония и Феодосия и прочих чудотворцев Киево-Печерских; Сергия и Никона Радонежских; Антония Римлянина и Варлаама Хутынскаго, Новгородских; Сергия и Германа Вааламских; Зосима и Саватия Соловетских; Димитрия Прилутскаго и Дионисия Глушицакаго, Вологодских; Макария Унжетскаго; Евфимия Суздальскаго; Никиты столпника, Переславскаго; Аврамия Ростовскаго; Макария Калязинскаго; Ефрема Новоторжского; Аврамия Смоленскаго; Иова Почаевскаго и Серафима Саровскаго; святаго (русскаго святаго в тот день празднуемаго) и всех святых в земле Русской просиявших, святых славных и добропобедных мучеников, преподобных и богоносных отец наших; святых и праведных Богоотцев Иоакима и Анны, и святаго (вселенскаго святаго в тот день празднуемаго) и всех святых; молим Тя, Многомилостиве Господи, услыши нас грешных молящихся Тебе и помилуй.

Господи, помилуй (12).

Молитвами святых отец наших, Господи Иисусе Христе, Боже наш, помилуй нас. Аминь. (Поклон.)

Песнь 7

Милостиве Господи, по молитвам святых Твоих помилуй землю Русскую. (Дважды.)

Мати Божия, спаси землю Русскую. (Дважды.)

Слава, и ныне.

Песнь 8

Милостиве Господи, по молитвам святых Твоих помилуй землю Русскую. (Дважды.)

Мати Божия, спаси землю Русскую. (Дважды.)

Слава, и ныне.

Песнь 9

Милостиве Господи, по молитвам святых Твоих помилуй землю Русскую. (Дважды.)

Мати Божия, спаси землю Русскую. (Дважды.)

Слава, и ныне.

По 9 песне за Достойно:

О пресветлое облаче, Мати Божия, нас побеждающих победи державою Твоею и всесильною десницею, и сущим в скорбях предстани, обидимых заступи и грехи разреши молитвенников Твоих, елико бо хощеши и можеши. (Поклон.)

Святый Боже: (трижды с тремя поклонами).

Слава, и ныне.

Пресвятая Троица:

Господи, помилуй (трижды).

Слава, и ныне.

Отче наш: (крестное знамение без поклона).

Господи Иисусе Христе, Боже наш, помилуй нас. Аминь. (Поклон.)

Молитвами святых отцев наших:

Тропарь, глас 4:

Скоро предвари, прежде даже не поработимся врагам, хулящим Тя и претящим нам, Христе Боже наш, погуби Крестом Твоим борющих нас, да уразумеют, како может православных вера, молитвами Богородицы, Едине Человеколюбче. (Поклон.)

По сем глаголи сие моление:

Сохрани Господи, великий царствующий град Москву, все грады и селения русския, и всю землю нашу от глада, губительства, землетрясения, потопа, огня, меча, нашествия иноплеменников и междоусобной брани, и милостив, благоуветлив буди к нам, Благий и Человеколюбче, Боже наш, отврати всякий гнев, на нас движимый, и избави нас от належащего и праведнаго Своего прещения и помилуй нас.

Господи, помилуй (40). (Три поклона.)

Молитвами святых отец наших, Господи Иисусе Христе, Боже наш, помилуй нас. Аминь. (Поклон.)

Паки и паки, со умилением сердечным колени душ и телес наших преклонше, Господу помолимся.

Господи, помилуй (трижды).

Преклонив колена со умилением чти молитву сию.

Зри: В воскресные и другие праздничные дни, когда коленопреклонения воспрещаются, зде глаголю:

Господу помолимся.

Господи помилуй.

И чти молитву без коленопреклонения.

Молитва

Согрешихом, беззаконовахом, неправдовахом пред Тобою, Господи и Боже наш, не сохранихом заповедей Твоих, не соблюдохом повелений Твоих, но возжелахом ходит в волях сердец наших. Не хранили мы первой любви к Тебе, Жениху душ наших, нашему Владыце и Благодетелю, к матери нашей Церкви Православной и ее уставам, ко Отечеству нашему, Святой Руси и ее святыням, к памяти отцев наших и благочестивым обычаям и заветам предков. Не к Тебе, Востоку светлому, но к темному западу с вожделением устремляли мы взоры наши. Темже, имже согрешихом, сим и наказуемся. В праведном гневе Твоем на несохранивших верности, на хромавших на оба колена, Ты с запада навел еси иноплеменников на Отечество наше. Лютая война, посем нестроения внутренния, смуты и раздоры церковные причиняли неисчислимые бедствия и страдания народу русскому. За беззакония наши небо заключилось и земля не давала плодов; Ты гладом, жаждею и мором поражал еси нас. Напоследок же паки допустил еси приити во Отечество наше иноплеменникам, буиим и зверонравным, пришедшим со злобными замыслами поработить и истребить народ русский, уничтожить государство Российское. Долготерпеливый и в гневе, человеколюбивый и в наказании, Ты не попустил исполниться злым намерениям их и не отдал на конечное разорение и уничтожение землю, собранную воедино и устроенную молитвами, слезами и потом, трудами и подвигами благочестивых предков наших и святых мужей и жен от рода нашего. Проникшие вглубь страны нашей враги наши со стыдом обратились вспять и сами богопораженною язвою трупиями достойно падоша. Но от незалеченных еще ран военных и доселе страждут многие из народа русскаго. Непрекращающееся же во всем мире бряцание оружием и ожидание новых ужасов военных в трепет повергает всех. Зело умножаются стужающие нам, мнози возстают на нас, многи глаголют: несть спасения Святой Руси, несть спасения правосланному народу русскому в Бозе его.

Но, о Многомилостиве, не до конца гневайся на нас! Помилуй землю Русскую, пощади русский народ! Призови его к покаянию, якоже древле ниневитян. Бывшими бедствиями и скорбями омой нас от беззаконий наших, очисти от грехов наших. Возгрей сердца наши верою в Тя, окрили их надеждою на Тя, распали их любовию к Тебе. Умножь в нас веру, помоги нашему неверию. Скоро да предварят нас щедроты Твои, Господи, яко обнищахом зело. Помози нам, Боже, Спасителю наш, славы ради имени Твоего, да не когда рекут язы́цы: где есть Бог их, и да увестся во языцех пред очами нашими отмщение крови рабов Твоих пролитой. Наказуя накажи нас, Господи, смерти же не предаждь, да не умрем, но живы будем и поведаем дела Твои. Не гнушайся быти, якоже во дни отцев наших, Господом и Владыкою нашим, Помощником нашим Заcтупником нашим, Спасителем нашим, Прибежищем в дни скорби, Веселием в дни радости, Славою нашею, Возношением глав наших.

Приклонися, Милостиве, ко предстательству Пречистой Богоматери, день и нощь, якоже дерзновенно исповедует Святая Церковь, молящейся о нас и скиптры царств Своими молитвами утверждающей. Вонми Ее ходатайству о нас и не возбрани Ей и на будущее время быти нашей теплой Предстательницей и Помощницей, сопротивных нашествия от Отечества нашего отгоняющей и ко спасению всех нас наставляющей, не возбраняй Ей и на будущее время быть Царицею Небесною Русской земли, Владычицей Державной и Взбранной Воеводой православнаго народа русскаго.

Приими, Святе святых, молитвы святых сродников наших, чудотворцев Русских, непрестанно, якоже мы твердо веруем, молящихся о земном Отечестве и о нас, аще и недостойных меньших братиях их. По молитвам святых очисти, Господи, Русскую землю от нечестия, безбожия, развращения. По молитвам святых очисти, Господи, Русских людей от всех злых навыков, во дни отступления от веры усвоенных, и да украшаются они верою, благочестием, смирением, терпением и прочими добродетелями христианскими, ими же обиловали отцы наши. По молитвам святых умудри, Господи, архипастырей и пастырей наших право править слово Твоея истины, дерзновенно, везде и пред всеми исповедывать имя Твое, безбоязненно, не взирая на лица, возвещать правду Твою, не уклоняяся ни на десно, ни на шуе, руководить ко спасению Тобою вверенную им паству. По молитвам святых да исчезнут грешницы от лица Русской земли и беззаконницы, еже не быти им на ней.

Помяни, Боже отцев наших, Царю царей и Господи господствующих, труды и подвиги подвижников благочестия, строителей и правителей Святой Руси и всех благочестивых предков наших. Сохрани и возстави еже собирали и созидали они. Сохрани Отечество наше, яко Русь Святую, Русь великую, могущественную и славную. Сохрани во Отечестве нашем до скончания веков веру истинную, утверди в нем Церковь Православную, да ими руководимые русския люди, подвизаясь о христианском устроении земнаго Отечества, паче о жизни будущаго века помышляют. Сохрани Отечество наше, яко светоч Православия не токмо для языков, в нем обитающих, но для всего мира, паче же для единоплеменных нам родов словенских. Сохрани великий царствующий град Москву, яко сердце Святой Руси, яко средоточие святынь наших, и жизни церковной и государственной. Сохрани священный Кремль Московский и в нем матерь церквей русских, собор Успения Богоматери, и все уцелевшие еще храмы, обители и святыни. Возврати их верным людям и помоги возстановить их в прежнем благолепии, да ими по-прежнему красуется святорусская земля, да к ним прибегающие приемлют благодать, освящение, умножение радостей, облегчение скорбей.

Вонми, Агнче, за мир закланный, воплю крови рабов Твоих, за Тя пролитой и помилуй землю, сими кровьми напоенную, помилуй землю, в недрах своих сокрывшую телеса пострадавших за имя Твое, за веру и Отечество и за братий души свои положивших.

Призри, Неложный во обетованиях, на ревнителей веры в наши дни воинствующего безбожия дерзновенно имя Твое пред сынами века сего исповедавших, и на сокровенных среди мира рабов Твоих, в наше лукавое время служения похоти плоти, похоти очес и гордости житейской, колен своих пред современными ваалами не преклонивших и риз своих не осквернивших. Ради сих избранных Твоих сократи по Твоему обещанию дни скорби нашей, дни бед и страданий, от нихже изнемогаем, от нихже истаявают сердца наши и мы близимся ко отчаянию.

Не отрини, Безмерный в милости, моления и нас грешных и недостойных рабов Твоих. Аще бо и согрешихом, но не отступихом от Тебя. Тя единаго, яко Господа нашего знаем, к Тебе единому во всякое время и во всяком обстоянии прибегаем, от Тебя единаго помощи ожидаем, к Тебе единому присно очи наши возводим. Не отврати и Ты лица Твоего от нас. Буди Милостив к нам грешным. Спаси людей Твоих и благослови достояние Твое и упаси нас и вознеси нас до века.

Услыши, Владыко всех концев земли, всех племен и народов, во всяком языце во Отчестве нашем обитающих, боящихся Тя, по законам веры своей добро творящих и молящихся Тебе. Приими их молитвы о спасении земнаго Отечества, а паче их и соплеменников их во ограду Церкви Твоей Святой введи, да все народы, во всех концах Русской земли обитающие, едино стадо церковное будут и различными языками, но единым сердцем Тя славят, самобытность же свою и добрые обычаи предков храняще и дружелюбно вкувпе со всем народом русским о устроении земнаго Отечества пекущеся, паче Отечества горняго взыскуют.

Не прогневайся до конца, Творче и Создателю всех, не хотяй смерти грешных, но ожидаяяй их обращения и покаяния, и на братий наших, иже по неведению, по наущению или по злобе враждуют на Тя, хулят превеликое имя Твое, в кощунство обращают святейшие предметы веры. И сии бо творение Твое. Темже и их, яко дело рук Твоих не презри, но сих скорбями и наказаниями, оных милостями и благодеяниями, иных же чудесными знамениями к Себе призови и делателями искусными заповедей Твоих яви.

О Небесный Царю, Человеколюбче Господи, Долготерпеливе и Многомилостиве! Паки и паки к Тебе припадаем и вопием: Предстательству Богоматери и святых вняв, молитвы живых и усопших не отринув и величайшия страдания всех творений Твоих и скотов безсловесных и самой матери-земли помянув, пощади, пощади Отечество наше, Русскую землю и весь народ наш человеколюбно и скоро помилуй. За дни, в нихже поражал еси нас, за лета, в нихже видехом злая, призри на рабов Твоих, православных русских людей и даруй им утешение. Даруй нам утешение всегда видеть Отечество наше во всей славе, силе и величии. Даруй нам утешение всегда видеть во Отечестве нашем Церковь Православную возвеличенную и прославленную, якоже во дни отцев наших. Даруй нам утешение всегда свободно и беспрепятственно ходить в храмы Твои, покланяться святыням нашим, наслаждаться красотою церковною, укрепляться Таинствами веры, утолять глад наш духовный. Даруй нам утешение увидеть братий наших, от веры отпавших, паки к Тебе возвратившимися и вкупе с нами во дворах Твоих славословящими Тя. Даруй нам утешение вскоре увидеть прекращение не токмо войн, но и слухов о войнах, да народы мира, расковавше мечи своя и копья на орудия мирнаго делания, все способности ума своего богоподобнаго, Тобою, а не темными силами водимые, обратят не на измышление человеконенавистнических способов истребления друг друга, но на облегчение и сокращение труда человеческаго, да избыточествующие время и силы будут употребляемы на богоугождение, на творение добрых дел, на приготовление к жизни будущего века. Даруй нам утешение вскоре увидеть дни мирныя и лета благ духовных и телесных исполненные, да всегда, всякое довольство и духовное и телесное имуще, изобиловать будем и в дела благая, и тако во Отечестве нашем и во всем мире от всех да прославляется пречестное в великолепное имя Бога отцев наших, в Троице Святой славимаго и поклоняемаго до скончания века веков. Аминь.

По прочтении молитвы:

Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем. (Поклон.)

Слава Отцу и Сыну и Святому Духу (поклон).

И ныне и присно и во веки веков. Аминь. (Поклон).

Господи, помилуй (3). (Поклон).

Благослови (мысленно обращаясь к отцу своему духовному).

И отпуст:

Господи Иисусе Христе Боже наш (крестное знамение без поклона), молитвами Пречистыя Своея Матери, святых славных и всехвальных апостолов, святаго равноапостольнаго благовернаго великаго князя Владимира и всех святых, в земле Русской просиявших и всех святых, помилуй и спаси нас грешных. (Поклон).

Господи, помилуй (трижды).

По сем глаголи со умилением сии стихи:

Утверждение на Тя надеющихся, утверди, Господи, Церковь, юже стяжал еси честною Твоею кровию. (Поклон.)

Под Твою милость прибегаем, Богородице Дево, молений наших не презри в скорбех, но от бед избави нас, Едина Чистая и Благословенная. (Поклон.)

Пресвятая Богородице, спаси нас. (Поклон.)

Вси святии земли Русской молите Бога о нас. (Поклон.)

И заключительные поклоны.

Боже очисти мя грешнаго (грешную) и помилуй мя. (Поклон.)

Создавый мя, Господи, помилуй мя. (Поклон.)

Без числа согреших, Господи, помилуй и прости мя грешнаго (грешную). (Поклон.)

Все последования Молебных пений в отсутствие священника может совершать каждый мирянин, опуская только нарочитые священнические и диаконские возглашения и соответственно изменяя некоторые молитвословия, а все возгласы священнические: Благословен Бог: и подобные заменяя одним возгласом: Молитвами святых отец наших, Господи Иисусе Христе, Боже наш, помилуй нас.

В качестве образца помещен здесь чин Молебного пения об Отечестве, совершаемый мирянином.

Последование молебного пения во время губительного поветрия и смертоносные заразы

Иерей начинает: Благословен Бог наш:

Клир: Царю Небесный:

Чтец: Трисвятое. Приидите, поклонимся: (трижды).

Псалом 37.

Господи, да не яростию Твоею обличиши мене, ниже гневом Твоим накажеши мене. Яко стрелы Твоя унзоша во мне, и утвердил еси на мне руку Твою. Несть исцеления в плоти моей, от лица гнева Твоего: несть мира в костех моих, от лица грех моих. Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя, от лица безумия моего. Пострадах и слякохся до конца, весь день сетуя хождах. Яко лядвия моя наполнишася поруганий, и несть исцеления в плоти моей. Озлоблен бых, и смирихся до зела, рыках от воздыхания сердца моего. Господи, пред Тобою все желание мое, и воздыхание мое от Тебе не утаися. Сердце мое смятеся, остави мя сила моя, и свет очию моею, и той несть со мною. Друзи мои и искреннии мои прямо мне приближишася, и сташа: И ближнии мои отдалече мене сташа, и нуждахуся ищущии душу мою; и ищущии злая мне глаголаху суетная, и льстивным весь день поучахуся. Аз же яко глух не слышах, и яко нем не отверзаяй уст своих, И бых яко человек не слышай, и не имый во устех своих обличения. Яко на Тя, Господи, уповах, Ты услышиши, Господи Боже мой. Яко рех: да не когда порадуют ми ся врази мои, и внегда подвижатися ногам моим, на мя велеречеваша. Яко аз на раны готов, и болезнь моя предо мною есть выну. Яко беззаконие мое аз возвещу, и попекуся о гресе моем. Врази же мои живут, и укрепишася паче мене, и умножишася ненавидящии мя без правды. Воздающии ми злая воз благая, оболгаху мя, зане гонях благостыню. Не остави мене, Господи Боже мой, не отступи от Мене. Вонми в помощь мою, Господи спасения моего.

Или псалом 90.

Живый в помощи Вышняго, в крове Бога Небеснаго водворится. Речет Господеви: Заступник мой еси, и Прибежище мое, Бог мой, и уповаю на Него. Яко Той избавит тя от сети ловчи, и от словесе мятежна: Плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тьме преходящия, от сряща и беса полуденнаго. Падет от страны твоея тысяща, и тьма одесную тебе, к тебе же не приближится. Обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближится телеси твоему. Яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою. На аспида и василиска наступиши, и попереши льва и змия. Яко на Мя упова и избавлю и: покрыю и, яко позна имя Мое. Воззовет ко Мне, и услышу его: с ним есмь в скорби, изму его, и прославлю его. Долготою дней исполню его, и явлю ему спасение Мое.

Слава, и ныне.

Аллилуия, аллилуия, аллилуия, слава Тебе, Боже. (Трижды.)

Таже великая ектения, до: О плавающих: и прилагаются сия:

О еже не помянути беззаконий и соблазнов нас грешных и недостойных рабов Своих, но милостивно очистити грехи наша, и отвратити гнев Свой, праведно движимый на нас, Господу помолимся.

О еже не яростию Своею обличити, ни гневом наказати нас, но милостивно пощадити от смерти души наша, Господу помолимся.

О еже не внити в суд с рабами Своими, и не помянути беззакония наша, но очистити их, и милостиву быти, и пощадити людей согрешивших, Господу помолимся.

О еже помянути щедроты и милости Своя, от века сущия, грехов же юности и неведения нашего и старости окаянства не помянути, и помиловати нас, Господу помолимся.

О еже услышати от храма Святаго Своего глас наш, и исцелити болезни смертныя одержащия нас, и потоки беззакония смутившия нас изсушити, Господу помолимся.

О еже вскоре изъяти нас от сетей смертных и от болезней избавити, Господу помолимся.

О еже милостивно продолжити рабам Своим покаяния время, и не безгодно яко неплодную смоковницу посещи, но благосердием окопати, и милосердия росою напоити, плодов покаяния и обращения нашего человеколюбно еще ожидая, Господу помолимся.

О еже вознести нас от врат смертных, и меч изъятый, и лук Свой напряженный, и в нем сосуды смертныя на нас праведно уготованныя со стрелами горящими, милостивно от нас отвратити, Господу помолимся.

О еже услышати молитву нашу, и моление наше прияти, и слез наших не премолчати: но ослабити нам, да почием прежде даже не отыдем, и ктому не будем, Господу помолимся.

О избавитися нам:.. и проч.

Возглас: Яко подобает Тебе:

Глас 2: Бог Господь, и явися нам: со стихами.

Тропарь:

Во гневе Твоем, Боже, помяни щедроты Твоя, прах бо и пепел есмы, и не яростию Твоею обличи нас, да не погибнем до конца, но пощади души наша, яко един Милосерд. (Дважды.)

Слава, и ныне. Богородичен:

Заступнице усердная, Мати Господа Вышняго, за всех молиши Сына Твоего Христа Бога нашего, и всем твориши спастися, в державный Твой покров прибегающим. Всех нас заступи, о Госпоже Царице и Владычице, иже в напастех и в скорбех и в болезнех, обремененных грехи многими, предстоящих и молящихся Тебе умиленною душею и сокрушенным сердцем пред пречистым Твоим образом со слезами, и невозвратно надежду имущих на Тя, избавления всех зол, всем полезная даруй и вся спаси, Богородице Дево: Ты бо еси Божественный покров рабом Твоим.

Псалом 50: Помилуй мя Боже:

Канон, глас 8,

ко Пресвятей и Единосущней и Животворящей и Неразделимей Троице

Песнь 1

Ирмос: Колесницегонителя фараона:

Припев: Господи, помилуй рабов Твоих.

Вседетельная и Единосущная, и Сопрестольная, и Единосильная, и Трисветлая Славо, Отче Непостижиме, Сыне и Душе Святый, от лютыя болезни рабов Твоих свободи, яко да благодарственно Тя славим.

Милостиве Господи, помилуй рабов Твоих.

Грехов буря изрину нас в глубину немощи, и частыя болезни, якоже треволнение нас обуревают окаянных: Единосильная Державо, Троице Святая, умилосердися, и спаси нас, люте погибающих.

Слава: О Троице нераздельная, избави нас Твоих рабов от грехов наших, росою милости Твоея угашающи зной лютых наших болезней, и здравие подающи, яко да православно воспеваем Тя.

И ныне. Богородичен: Избавителя и Вседетеля и Господа во чреве носившая, наша недуги понесшаго, Того убо Всечистая моли, от лютыя немощи Твоих рабов избавити, едина человеков Помоще.

Катавасия по каждой песни:

Избави от бед и болезней рабов Твоих Многомилостиве, яко мы усердно к Тебе прибегаем, к Милостивому Избавителю всех Владыце в Троице славимому Богу.

Песнь 3

Ирмос: Небеснаго круга:

Милостиве Господи, помилуй рабов Твоих.

Небесныя лики, ангельския чины, Престоли, и Начала, и Силы, и Господьства, молят Тя, Благаго и Спаса: от губительнаго недуга свободи рабов Твоих.

Милостиве Господи, помилуй рабов Твоих.

Да Твоего многаго человеколюбия покажеши бездну, Владыко Всесильне, от недуга свободи смертоноснаго, и болезней лютых рабов Твоих, едине Долготерпеливе.

Слава: Яко Божии предстоятели, служебнии дуси, Ангелы и Архангелы, Сего молите, утолити недуг, разорити печаль, и от смертоносныя опасности избавити.

И ныне. Богородичен: Исцелений источника Тя благих показа, бездна из Тебе прошедшая, Христос Господь, Отроковице Пренепорочная: темже рабов Твоих бурею болезней потопляемых избави от опасностей.

Катавасия:

Избави от бед и болезней рабов Твоих, Многомилостиве, яко мы усердно к Тебе прибегаем, к Милостивому Избавителю всех Владыце в Троице славимому Богу.

Ектения сугубая:

Помилуй нас, Боже:

Согрешихом и беззаконновахом, и сего ради праведный Твой гнев постиже нас, Господи Боже наш, и сень смертная обыде нас, и ко адовым вратом приближихомся. Но к Тебе, Богу нашему, в скорби нашей умильно вопием: пощади, пощади людей Твоих, и не погуби до конца, смиренно молимся Тебе, услыши и помилуй.

Господи, помилуй (трижды).

Жизнию и смертию владычествующий, Господи, не затвори в смерти души рабов Твоих, но престани от гнева, и остави ярость, ибо исчезает яко дым дние наши, и изсше крепость наша, и погибаем до конца грех ради наших. Милостив буди рабам Твоим, в покаянии со слезами молимся Тебе, услыши и помилуй.

Господи, помилуй (трижды).

Помяни яко плоть есмы, Господи, и милостивно отврати гнев Твой, праведно на нас движимый, имже яко мечем безгодно посецаеши нас: устави болезнь и утоли язву внезапно нашедшую на нас. Не мертвии бо восхвалят Тя, и не вси низходящии во ад: но мы живии хвалим Тя, и в болезни сердца стеняще молимся Тебе, услыши и помилуй.

Господи, помилуй (трижды).

Паче всех согрешихом Тебе и беззаконновахом, Владыко: и аще покаяния не стяжахом, предложение наше вместо покаяния приими, и на милость преложися, от глада, смертоноснаго недуга, и болезней лютых, яко Всесилен свободи рабов Твоих, болезненно стеняще молимся Тебе, скоро услыши и помилуй.

Господи, помилуй (трижды).

Не помяни беззаконий и неправд людей Твоих, и не вниди в суд с рабами Твоими, и не уклонися гневом от рабов Твоих. Аще беззакония помянеши, Господи, кто постоит? Прах бо и пепел есмы, и состав наш яко ничтоже пред Тобою: но яко Щедр и Человеколюбец умилосердися, и не погуби нас во гневе Твоем со беззаконными нашими, молимся Тебе, Боже Преблагий, услыши и помилуй.

Господи, помилуй (трижды).

Не хотяй смерти грешных, но еже обратитися и живым быти им, яко жизни Источник, оживотвори нас, неправедных, Твоему суду смерти достойных: Бог бо еси, живыми и мертвыми обладаяй, и не погуби нас во гневе прещения Твоего, воплем крепким в горести сердца со слезами молимся Тебе, услыши и помилуй.

Господи, помилуй (трижды).

Возглас: Яко милостив:

Седален, глас 2:

Не отрини до конца согрешивших людей Твоих, Владыко, и не отстави милости и щедроты Твоя от нас: но яко Бездна сый щедрот, и милосердия Пучина, приими мольбы наша, и избави нас от угрожающия нам беды и нужды, един бо еси Благоуветливый.

Песнь 4

Ирмос: Ты моя крепость, Господи:

Милостиве Господи, помилуй рабов Твоих.

Ныне воистину сень смертная обыде нас, и ко адовым вратам приближихомся, но Ты, Спасе, яко силен нас возставляя удиви милости Твоя, спасаяй в вере несумненной вопиющих: силе Твоей слава, Человеколюбче.

Милостиве Господи, помилуй рабов Твоих.

Христовы таинницы, самовидцы и проповедницы, приимшии дар исцеления и врачеве суще душевнии, апостоли, избавите нас oт угрожающего недуга, Иисуса моляще Владыку, и Избавителя, и Господа.

Слава: Грехов буря ныне нас постиже, немощи волны обуревают, болезни погружают частыя, скорби бо и болезни нас окаянных обретоша, апостоли Господни, вашими мольбами помощи руку подайте.

И ныне. Богородичен: Болезньми лютыми и частыми ударяеми, Дево, вси Тебе припадаем: державным покровом Твоим, Чистая, спаси нас всех. Ущедри, Богоневестная, избави от мора и лютой немощи, и болезни исцели, Владычице.

Катавасия:

Избави от бед и болезней рабов Твоих, Многомилостиве, яко мы усердно к Тебе прибегаем, к Милостивому Избавителю всех Владыце в Троице славимому Богу.

Песнь 5

Ирмос: Вскую мя отринул еси:

Милостиве Господи, помилуй рабов Твоих.

Моря лести медоточными вашими моленьми, священнии пророцы, потопивше, ныне преложите горесть всю губительныя нынешния немощи, на божественную благомощия сладость.

Милостиве Господи, помилуй рабов Твоих.

Пронзени быхом стрелами немощи повелением Твоим, Господи, и утвердися на нас рука Твоя, Всесильне. Яко Бог Щедрый, ущедри всех Твоею милостию, молитвами святых мучеников Твоих.

Слава: Якоже древле сына вдовицы умерша возставил еси Твоим повелением, Слове, тако и ныне лютыя немощи рабов Твоих, яко един Благ и Милостив избавив, оживотвори, едине Человеколюбче.

И ныне. Богородичен: В нощи житейской буря постиже всякаго озлобления, и покрыла нас, Дево, немощи глубокая тьма: но возсияй нам, Пречистая, прохлаждения свет, и к свету заповедей Христовых пути наша направи.

Катавасия:

Избави от бед и болезней рабов Твоих, Многомилостиве, яко мы усердно к Тебе прибегаем, к Милостивому Избавителю всех Владыце в Троице славимому Богу.

Песнь 6

Ирмос: Очисти мя, Спасе:

Милостиве Господи, помилуй рабов Твоих.

В пучине немощей погружаемся и волны губительной напасти обуревают нас, Управителю Господи, помощи руку простер ныне, спаси.

Милостиве Господи, помилуй рабов Твоих.

Якоже древле разслабленнаго возставил еси, Божественным манием от недуга болезненнаго, и нас от одра озлобления и от недуга тягчайшаго, ущедрив, возстави и здравие подаждь, Многомилостиве.

Слава: Пророческий лик, апостолов собрание, полк страдальцев ныне молят Тя, едине Многомилостиве, о людех Твоих, Блаже, сих ущедри.

И ныне. Богородичен: Марие, чистое девства Сокровище, Ты очисти нас, и недугов и скорбей, и содержащия ныне немощи избави, да верою Тя прославим.

Катавасия:

Избави от бед и болезней рабов Твоих, Многомилостиве, яко мы усердно к Тебе прибегаем, к Милостивому Избавителю всех Владыце в Троице славимому Богу.

Ектения малая.

И по возгласе

Кондак, глас 6:

Болезни адовы обыдоша нас, и покры нас сень смертная, и яко воск от огня, дние наши тают от лица гнева Твоего, Господи: но яко Щедр, во гневе милости помяни и пощади людей Твоих, да живи суще в покаянии славим Тя, единаго Человеколюбца.

Вонмем. Премудрость. Вонмем.

Прокимен, глас 4: Господи, да не яростию Твоею обличиши мене, ни гневом Твоим накажеши мене.

Стих: Яко стрелы Твоя унзоша ко мне, и утвердил еси на мне руку Твою.

Апостол ко Евреем, зач. 331 от полу (12, 6–13).

Братие, егоже любит Господь, наказует: биет же всякаго сына, егоже приемлет. Аще наказание терпите, якоже сыновом обретается вам Бог. Который бо есть сын, егоже не наказует отец? Аще же без наказания есте, емуже причастницы быша вси, убо прелюбодейчищи есте, а не сынове. К сим, плоти нашей отца имехом наказателя, и срамляхомся: не много ли паче повинемся Отцу духовом, и живи будем? Они бо в мало дней, якоже годе им бе, наказоваху нас, а Сей на пользу, да причастимся святыни Его. Всякое бо наказание в настоящее время не мнится радость быти, но печаль: последи же плод мирен наученым тем воздает правды. Темже ослабленныя руки, и ослабленная колена исправите. И стези правы сотворите ногами вашими: да не хромое совратится, но паче да исцелеет.

Аллилуия, глас 4.

Стих 1: Одержаша мя болезни смертныя, и потоцы беззакония смятоша мя.

Стих 2: Болезни адовы обыдоша мя, предвариша мя сети смертныя.

И о сподобитися нам слышанию Святаго Евангелия, Господа Бога молим.

Евангелие от Луки, зач. 16 (4, 37–44).

Во время оно, вниде Иисус в дом Симонов, теща же Симонова бе одержима огнем велиим, и молиша Его о ней. И став над нею, запрети огню, и остави ю: абие же воставши служаше им. Заходящу же солнцу, вси елицы имеяху болящия недуги различными, привождаху их к Нему: Он же на едином коегождо их руце возложь, исцеляше их. Исхождаху же и беси от многих, вопиюще и глаголюще: яко Ты еси Христос Сын Божий. И запрещая не даяше им глаголати, яко ведяху Христа Самаго суща. Бывшу же дни изшед иде в пусто место: и народи искаху Его и приидоша до Него, и держахуся Его, да не бы отшел от них. Он же рече ним: яко и другим градовом благовестити Ми подобает Царствие Божие, яко на се послан есмь. И бе проповедая на сонмищах галилейских.

Песнь 7

Ирмос: Божия снисхождения:

Милостиве Господи, помилуй рабов Твоих.

Опаляет пещь безмерных болезней, и сжигает мя непрестанно огневиц губительных пламень безстуднейший: но росою милости Твоея, Спасе, прохлади поюща: благословен, Бог отец наших.

Милостиве Господи, помилуй рабов Твоих.

Пророцы, апостоли, мучеников собори, божественнии учителие, болезни недугующих нас мольбами вашими укротите, и здравие даруйте поющим: благословен, Бог отец наших.

Слава: Словом Лазаря воскресивый, ныне яко из гроба от лютой немощи возставив нас оживи, Господи, да вопием песнь благодарственную: благословен, Бог отец наших.

И ныне. Богородичен: Щедра сущая и Мати Всещедраго, ущедривши избави Твоих людей, призывающих милости Твоя, Дево, и поющих: благословен, Бог отец наших.

Катавасия:

Избави от бед и болезней рабов Твоих, Многомилостиве, яко мы усердно к Тебе прибегаем, к Милостивому Избавителю всех Владыце в Троице славимому Богу.

Песнь 8

Ирмос: Седмерицею пещь:

Милостиве Господи, помилуй рабов Троих.

Болезненно стенем от одра болезни нашея, и от губительныя немощи вопием к Тебе, Человеколюбцу, сердечныя очи ныне простирающе, здравия просим. Посети нас, Спасе, и возстави пети: отроцы благословите, священницы воспойте, людие превозносите во вся веки.

Милостиве Господи, помилуй рабов Твоих.

В нашу немощь милостивне облекшийся, и уподобитися человекам изволивый, молитвами преподобных Твоих, погибающих спаси нас, воздвигни из гроба отчаяния пети: отроцы благословите, священницы воспойте, людие превозносите во вся веки.

Слава: Содетелю естества, Подателю исцеления, яко имеяй бездну щедрот и милосердия пучину, Долготерпеливе, посещением посети от губительныя немощи людей Твоих и оживи вопити: отроцы благословите, священницы воспойте, людие превозносите во вся веки.

И ныне. Богородичен: Крепкая Помоще, и надежное Заступление, отчаявшихся Надежде, Пренепорочная, посети страждущих болезненно рабов Твоих: облегчи тяжесть горькой немощи: отжени недуг губительной болезни, и спаси рабов Твоих, Дево Богородице.

Катавасия:

Избави от бед и болезней рабов Твоих, Многомилостиве, яко мы усердно к Тебе прибегаем, к Милостивому Избавителю всех Владыце в Троице славимому Богу.

Песнь 9

Ирмос: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес: тем Тя, Богородицу, Ангелов и человек чиноначалия величают.

Милостиве Господи, помилуй рабов Твоих.

Чудеса велия имже несть числа сотворивый, Безсмертне, на рабах Твоих, милости Твои, Боже, яко Милостив покажи, и от содержащая нас ныне болезни свободи, моленьми рождшия Тя, и лика страстотерпцев Твоих.

Милостиве Господи, помилуй рабов Твоих.

Ангелов, Архангелов и пророков, апостолов, мучеников, преподобных же, иерархов, священномучеников Твоих молитвами, плач рабов Твоих обрати, Всесильне, в радость: исцели болезнь, облегчи недуги, и здравие нам даруй.

Слава: Душ же и телес Врача, в милости богатаго Господа, Тебе молим: исцели страсти наши многия, от болезней и скорбей избави нас яко Благ и един Благодетель, и спасай верою чистою Тя величающих.

И ныне. Богородичен: Щедраго рождшая и Милостиваго, и Владыку, и Создателя и Господа, ныне на нас покажи Твоя обычно щедроты, и лютаго недуга нас изнуряющего избави нас, Дево Богородице, и подаждь нам здравие, яко да непрестанно величаем Тя.

Посем: Достойно есть: Трисвятое. Отче наш: Возглас.

И по возгласе, тропари: Помилуй нас Господи, помилуй нас:

Господи, помилуй нас, на Тя бо уповахом:

Милосердия двери отверзи нам:

Сугубая ектения:

Помилуй нас, Боже:

Милостивно призри Господи, на озлобление людей Твоих и умилосердися, и повели Ангелу простершему руку свою, еже погубити всех нас, якоже иногда при Давиде повелел еси, удержати руку свою, да не до конца нас погубит. И мы бо в покаянии Тебе исповедающеся, яко Давид вопием: согрешихом и беззаконновахом, и несмы достойни Твоего милосердия; но Ты Сам яко Щедр, единаго ради благосердия Твоего умолен быв, покажи милости Твоя древния и пощади людей и овец пажити Твоея, молимся Тебе, скоро услыши и помилуй.

Господи, помилуй (трижды).

Возглас: Услыши ны, Боже:

И по возгласе: Со умилением паки и паки преклоньше колена, Господу помолимся.

Господи, помилуй (трижды).

Молитва

Господи Боже наш, призри с высоты святыя Твоея на молитву нас грешных и недостойных рабов Твоих, беззаконьми нашими Твою благость прогневавших, и милосердие Твое раздраживших, и не вниди в суд с рабами Твоими, но отврати страшный гнев Твой праведно на нас движимый, утоли губительное прещение, устави грозный Твой меч, невидимо безвременно секущий нас, и пощади нищих и убогих рабов Твоих, и не затвори в смерти души наша, в покаянии сокрушенным сердцем и со слезами к Тебе, Милосердому, Благоуветливому, и Благопременительному Богу нашему припадающих.

Твое бо есть еже миловати и спасати нас, Боже наш, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

И отпуст.

Последование в различные литии и бдения молебнов

По обычном начале: Царю Небесный:

Чтец. Трисвятое. Пресвятая Троице: Отче наш:

Возглас: Яко Твое есть Царство:

Чтец: Аминь. Господи, помилуй (12). Слава, и ныне. Приидите, поклонимся:(трижды).

Псалом 142: Господи, услыши молитву мою:

Слава, и ныне. Аллилуия (трижды).

Ектения великая.

Тропари, глас 6:

Помилуй нас, Господи, помилуй нас: всякаго бо ответа недоумеюще, сию Ти молитву яко Владыце грешнии приносим, помилуй нас.

Слава: Господи, помилуй нас, на Тя бо уповахом, не прогневайся на ны зело, ниже помяни безааконий наших, но призри и ныне яко Милосерд, и избави ны от врагов наших: Ты бо еси Бог наш, и мы людие Твои, вси дела руку Твоею, и имя Твое призываем.

И ныне. Богородичен: Милосердия двери отверзи нам, Благословенная Богородице, надеющиися на Тя да не погибнем, но да избавимся Тобою от бед: Ты бо еси спасение рода христианскаго.

Посем начинаем стихословити псалмы со сладкопением, во глас 6:

Первее поем

Тропарь, глас 6:

Благоутробне, Долготерпеливе и Всещедрый Господи, низпосли милость Твою на люди Твоя.

И паки тойже тропарь.

Посем канонарх поет по по стихам псалом 6, певцы же к каждому стиху припевают тойже тропарь.

Господи, да не яростию Твоею обличиши мене, ниже гневом Твоим накажеши мене.

Благоутробне, Долготерпеливе и Всещедрый Господи, низпосли милость Твою на люди Твоя.

Помилуй мя Господи, яко немощен есмь: исцели мя Господи, яко смятошася кости моя.

Благоутробне, Долготерпеливе и Всещедрый Господи, низпосли милость Твою на люди Твоя.

И душа моя смятеся зело и Ты, Господи, доколе.

Благоутробне, Долготерпеливе и Всещедрый Господи, низпосли милость Твою на люди Твоя.

Обратися Господи: избави душу мою, спаси мя ради милости Твоея.

Благоутробне, Долготерпеливе и Всещедрый Господи, низпосли милость Твою на люди Твоя.

Яко несть в смерти поминаяй Тебе, во аде же кто исповестся Тебе.

Благоутробне, Долготерпеливе и Всещедрый Господи, низпосли милость Твою на люди Твоя.

Утрудихся воздыханием моим, измыю на всяку нощь ложе мое, слезами моими постелю мою омочу.

Благоутробне, Долготерпеливе и Всещедрый Господи, низпосли милость Тбою на люди Твоя.

Смятеся от ярости око мое, обетшах во всех вразех моих.

Благоутробне, Долготерпеливе и Всещедрый Господи, низпосли милость Твою на люди Твоя.

Отступите от Мене вси делающии беззаконие, яко услыша Господь глас плача моего.

Благоутробне, Долготерпеливе и Всещедрый Господи, низпосли милость Твою на люди Твоя.

Услыша Господь моление мое, Господь молитву мою прият.

Благоутробне, Долготерпеливе и Всещедрый Господи, низпосли милость Твою на люди Твоя.

Да постыдятся и смятутся вси врази мои, да возвратятся, и устыдятся зело вскоре.

Благоутробне, Долготерпеливе и Всещедрый Господи, низпосли милость Твою на люди Твоя.

Слава: Яко Щедрый Господи, умилосердися на люди Твоя и яко Долготерпелив презри прегрешения наша, и помилуй нас.

И ныне. Богородичен: Пресвятая Владычице Всепетая, Благословенная, яко Благолюбивая, заступи и помилуй ны.

Посем глаголет священник молитву литии, сиречь о чесом прошение будет, аще о ведре или о дожде, или о прочих прошениях случится.

По молитве ектения малая.

Возглас: Яко Твоя держава:

И начинаем вторую статию литии и поем ин тропарь, глас тойже:

Милостиве, помилуй, помилуй, помилуй нас, Господи.

По тому же чину поется канонархом псалом 101 по два стиха за един. Певцы же припевают к ним тойже тропарь.

Господи услыши молитву мою, и вопль мой к Тебе да приидет. Не отврати лица Твоего от Мене, воньже аще день скорблю, приклони ко мне ухо Твое: воньже аще день призову Тя, скоро услыши мя.

Милостиве, помилуй, помилуй, помилуй нас, Господи.

Яко исчезоша яко дым дние мои, и кости моя яко сушило сосхошася. Уязвен бых яко трава, и изсше сердце мое, яко забых снести хлеб мой.

Милостиве, помилуй, помилуй, помилуй нас, Господи.

От гласа воздыхания моего прильпе кость моя плоти моей. Уподобихся неясыти пустынней, бых яко нощный вран на нырищи.

Милостиве, помилуй, помилуй, помилуй нас Господи.

Бдех и бых яко птица особящаяся на зде. Весь день поношаху ми врази мои, и хвалящии мя мною кленяхуся.

Милостиве, помилуй, помилуй, помилуй нас Господи.

Зане пепел яко хлеб ядях, и питие мое с плачем растворях. От лица гнева Твоего и ярости Твоея, яко вознес низвергл мя еси.

Милостиве, помилуй, помилуй, помилуй нас Господи.

Дние мои яко сень уклонишася, и аз яко сено изсох. Ты же Господи во век пребываеши, и память Твоя в род и род.

Милостиве, помилуй, помилуй, помилуй нас Господи.

Ты воскрес ущедриши Сиона, яко время ущедрити его, яко прииде время. Яко благоволиша раби Твои камение его и персть его ущедрят.

Милостиве, помилуй, помилуй, помилуй нас Господи.

И убоятся язы́цы имене Господня, и вси царие земстии славы Твоея. Яко созиждет Господь Сиона и явится во славе Своей.

Милостиве, помилуй, помилуй, помилуй, нас Господи.

Призре на молитву смиренных, и не уничижи моления их. Да напишется сие в род их, и людие зиждемии восхвалят Господа.

Милостиве, помилуй, помилуй, помилуй, нас Господи.

Яко приниче с высоты святыя Своея, Господь с небесе на землю призре. Услышати воздыхание окованных, разрешити сыны умерщвленных.

Милостиве, помилуй, помилуй, помилуй, нас Господи.

Возвестити в Сионе имя Господне, и хвалу Его в Иерусалиме. Внегда собратися людем вкупе, и царем еже работати Господеви. Отвеща Ему на пути крепости Его: умаление дней моих возвести ми.

Милостиве, помилуй, помилуй, помилуй, нас Господи.

Не возведи мене во преполовение дней моих: в роде родов лета Твоя. В началех Ты, Господи, землю основал еси, и дела руку Твоею суть небеса.

Милостиве, помилуй, помилуй, помилуй, нас Господи.

Та погибнут, Ты же пребываеши: и вся яко риза обетшают, и яко одежду свиеши я, и изменятся; Ты же тойжде еси, и лета Твоя не оскудеют.

Милостиве, помилуй, помилуй, помилуй, нас Господи.

Сынове раб Твоих вселятся, и семя их во век исправится.

Милостиве, помилуй, помилуй, помилуй, нас, Господи.

Слава: Яко Щедрый Господи, умилосердися на люди Твоя, и яко Долготерпелив, презри прегрешения наша, и помилуй нас.

И ныне. Богородичен: Пресвятая Владычице Всепетая, Благословенная, яко Благолюбивая, заступи и помилуй ны.

И чтет священник иную молитву.

По молитве ектения малая.

Возглас: Яко Благ и Человеколюбец:

И начинаем по томуже чину третию статию.

Лик поет тропарь, глас 6:

Яко Щедрый Господи, умилосердися на люди Твоя, и яко Долготерпелив презри прегрешения наша и помилуй ны.

И паки тойже тропарь.

Канонарх поет псалом 129, по стиху:

Из глубины воззвах к Тебе Господи, Господи услыши глас мой.

Яко Щедрый Господи, умилосердися на люди Твоя, и яко Долготерпелив презри пререшения наша и помилуй ны.

Да будут уши Твои внемлюще гласу моления моего.

Яко Щедрый Господи, умилосердися на люди Твоя, и яко Долготерпелив презри прегрешения наша и помилуй ны.

Аще беззакония назриши Господи, Господи, кто постоит; яко у тебе очищение есть.

Яко Щедрый Господи, умилосердися на люди Твоя, и яко Долготерпелив презри прегрешения наша и помилуй ны.

Имене ради Твоего потерпех Тя, Господи, потерпе душа моя в слово Твое: упова душа моя на Господа.

Яко Щедрый Господи, умилосердися на люди Твоя, и яко Долготерпелив презри прегрешения наша и помилуй ны.

Яко у Господа милость, и многое у Него избавление: и Той избавит Израиля от всех беззаконий его.

Яко Щедрый Господи, умилосердися на люди Твоя, и яко Долготерпелив презри прегрешения наша и помилуй ны.

Слава: Яко Щедрый Господи, умилосердися на люди Твоя, и яко Долготерпелив презри прегрешения наша и помилуй ны.

И ныне. Богородичен: Пpесвятая Владычице, Всепетая, Благословенная яко Благолюбивая, помози предстательством Твоим и помилуй ны.

Посем степенны, первый антифон 4-го гласа: От юности моея мнози борют мя страсти, но Сам мя заступи и спаси, Спасе мой. (Дважды.)

Ненавидящии Сиона посрамитеся от Господа, яко трава бо огнем будете изсохше. (Дважды.)

Слава: Святым Духом всяка душа живится и чистотою возвышается, светлеется Троическим единством священнотайне.

И ныне: Святым Духом изливаются благодати струи, напаяющии всяку тварь ко оживлению.

Посем прокимен, Евангелие, канон и молитва, о чем прошение будет, и отпуст по обычаю.

Канон покаянный ко Господу нашему Иисусу Христу

Глас 6

(поем его без ирмосов)

Песнь 1

Ирмос: Помощник и Покровитель:

Припев. Помилуй мя, Боже, помилуй мя.

Избавителю мой, Иисусе, якоже избавил еси от многих прегрешений блудницу, иногда покаявшуюся сокрушенно, молюся Тебе, и мене очисти от безчисленных зол моих, яко Милостив.

Помилуй мя, Боже, помилуй мя.

Плавая в суетном помышлении жития, по лютой сей пучине, во истопления впадох многая, от нихже избавив, спаси, Иисусе, мя.

Слава: Разреши мя, Слове, от соуз безчисленных моих зол, да свободне шествую в покаянии праведныя стези Твоя, в божественное наставляющия покоище вечных радостей.

И ныне: Покаяния ми, Дево, покажи пути, и на отводящия мя от греха возврати стези: да Тя пою Многопетую Божию Родительницу.

Песнь 3

Ирмос: Утверди, Господи:

Помилуй мя, Боже, помилуй мя.

Милостивным Твоим оком призри на мя, егда пред Тобою предстану на суд, едине Благопременителю Господи.

Помилуй мя, Боже, помилуй мя.

Воздыхающа мя приими, якоже мытаря, из глубины душевныя, и покаяние ми даруй, Спасе, греха всякаго мя избавляющее.

Слава: Скверны злобныя омыв моего сердца, и явитися мне непорочну пред Тобою в день страшный сподоби, Христе мой, яко Преблагий.

И ныне: Низпадшим исправление, Богородице, падшаго мя воздвигни из рова зол многих: и утверди, Владычице, на камени заповедей Божиих.

Катавасия: Избави от бед рабов Твоих, Милостиве, яко мы усердно к Тебе прибегаем, к Милостивому Избавителю всех Владыце Господу Иисусу.

Ектения:

Помилуй нас, Боже:

Господи, помилуй (трижды).

Достойная казнем сотворихом, и праведный суд Твой постиже нас, Господи: но пощади, пощади людей согрешивших, и отврати гнев Твой праведно на нас движимый, в покаянии к Тебе припадаем, и смиренно молим Тя, услыши и помилуй.

Господи, помилуй (трижды).

Да не потопит нас, Господи, буря водная, и да не растлиши землю, и да не умориши нас людей Твоих: но яко Благ устави водное стремление, и мерному онаго течению с благорастворением воздушным быти яко силен повели, к Тебе богатому в милости и безмерному в щедротах, сердцем сокрушенным молимся, услыши и помилуй.

Возглас: Яко милостив:

Песнь 4

Ирмос: Услыша пророк:

Помилуй мя, Боже, помилуй мя.

Токи слез даждь ми, изсушающия страстей моих источники, и греха всякаго нечистоту омывающие, Щедре Многомилостиве, и угашающия огня геенскаго вечный пламень неугасимый.

Помилуй мя, Боже, помилуй мя.

Непрестанно умножаю струпы души моея сластолюбием, и пребываю неисцелен, в чувство сам прийти не хотя, кто буду, и что сотворю? Христе Щедрый, исцелив спаси мя.

Слава: Прельсти мя вкушением греховным враг льстец и от Тебе, Блаже, далече удали, и зубам своим снедь содела мя: Едине Спасе, потщися изъяти мя.

И ныне: Всепетая Владычице, велегласно воспевающаго Ти исполни всякия радости мою мысль, подающи ми плач утешный, и покаяния сладость, и разум спасения.

Песнь 5

Ирмос: От нощи утренююща:

Помилуй мя, Боже, помилуй мя.

Се талант Твой сокрывый, Христе, ленивый paб Tвой аз есмь и упражняющийся в лукавых деяниях страстей, темже не посли мене во огнь.

Помилуй мя, Боже, помилуй мя.

Твой сын быв благодатию, Благоутробне Христе, поработихся врагу, и от Тебе удалихся жив блудно; темже обратив мя спаси.

Слава: Очистивый блудницу и прокаженных Твоим повелением, Содетелю всяческих, от сквернаго греха смиренную душу мою очисти, и одеждами блистающими красну соделай, Владыко, молюся.

И ныне: Врата непроходимая, отверзи ми врата, молюся, покаяния истиннаго: и покажи ми стезю покаяния, Чистая, всех Наставнице.

Песнь 6

Ирмос: Возопих всем сердцем:

Помилуй мя, Боже, помилуй мя.

Не покажи мене бесом радование в день страшный, Христе Иисусе, да не услышу тогда гласа, отсылающего во огнь геенский.

Помилуй мя, Боже, помилуй мя.

Погрузи мя во глубине прегрешений, праведных враг: но к щедрот Твоих притекаю пучине, Иисусе, к пристанищу жизни ныне направи мя.

Слава: Яко мытарь воздыхаю, якоже блудница слезю, яко Петр вопию, многими погружаемь прегрешениями Христе: помощи ми руку даждь, и спаси мя.

И ныне: Святая Богородице, Иже Святое Слово рождшая плотию, Единаго освящающего всех святых, освяти мой ум в лукавых делах присно пребывающий.

Катавасия: Избави от бед рабов Твоих, Милостиве, яко мы усердно к Тебе прибегаем, к Милостивому Избавителю всех Владыце Господу Иисусу.

Ектения малая.

Возглас: Ты бо еси Царь мира:

Прокимен, глас 5: Господи, да не яростию Твоею обличиши мене, ни гневом Твоим накажеши мене.

Стих: Не отврати лица Твоего от отрока Твоего.

Премудрость.

Апостол ко Евреем, зач. 331 от полу (12, 6–13).

Братие, егоже любит Господь, наказует: биет же всякаго сына, егоже приемлет. Аще наказание терпите, якоже сыновом обретается вам Бог. Который бо есть сын, егоже не наказует отец? Аще же без наказания есте, емуже причастницы быша вси, убо прелюбодейчищи есте, а не сынове. К сим, плоти нашей отца имехом наказателя, и срамляхомся: не много ли паче повинемся Отцу духовом, и живи будем? Они бо в мало дней, якоже годе им бе, наказоваху нас, а Сей на пользу, да причастимся святыни Его. Всякое бо наказание в настоящее время не мнится радость быти, но печаль: последи же плод мирен наученым тем воздает правды. Темже ослабленныя руки, и ослабленная колена исправите. И стези правы сотворите ногами вашими: да не хромое совратится, но паче да исцелеет.

Евангелие от Матфея, зач. 27 (8, 23–27).

Во время оно, влезшу Иисусу в корабль, по Нем идоша ученицы Его. И се трус велик бысть в мори, якоже кораблю покрыватися волнами: Той же спаше. И пришедше ученицы Его, возбудиша Его, глаголюще: Господи, спаси ны, погибаем. И глагола им: что страшливи есте маловери? Тогда востав, запрети ветром и морю: и бысть тишина велия. Человецы же чудишася, глаголюще: кто есть Сей, яко и ветри и море послушают Его?

Песнь 7

Ирмос: Согрешихом, беззаконовахом:

Помилуй мя, Боже, помилуй мя.

Взираю на милость Твою безмерную, безмерно согрешивый, вем Твое милосердие, вем долготерпение в незлобие: покаяния ми даруй плоды щедрый Христе, и спаси мя.

Помилуй мя, Боже, помилуй мя.

Уврачуй, Щедре, сердца моего неисцельныя страсти, даруй отпущение долгов моих, тяжкое бремя облегчи: да во умилении Тя славлю присно отцев Бога.

Слава: В беззакониях зачат и родихся окаянный, и согреших паче всех человек: но обращения ми подаждь время исправляющее мя.

И ныне: Емуже предстоят с трепетом небеснии чини, Того родила еси, Чистая, примирившагося человекам, но благости егоже прилежно моли ущедрити рабы Твоя.

Песнь 8

Ирмос: егоже воинства:

Помилуй мя, Боже, помилуй мя.

Взираю на великое богатство щедрот Твоих, Христе, и якоже Давид, согрешив паче онаго, зову со онем: едине Милостиве, помилуй мя вскоре.

Помилуй мя, Боже, помилуй мя.

Конец благий подати мне молюся, и положити же предел лукавым деянием: аще же аз не усердствую, ожесточенное имея сердце: Сам обрати мя, Божий Слове.

Слава: Руце всякими осквернила еси злодеяньми душе моя; и како оныя воздеваеши на высоту беседующи Богу; нозе блазненне сотворила еси, на дела ходящи студная: како не обращаешися ходити покаянием в пути спасительныя.

И ныне: Волнуема мя бурею греховною, вопию Ти Владычице Чистая, Твоим ходатайством направи мя ко спасительному покаянию и ко всеутишному пристанищу, яко да увижу свет спасения, омрачаемый присно нечестию.

Егоже Воинства Небесная славят и трепещут Херувими и Серафими, всяко дыхание и тварь пойте, благословите и превозносите во вся веки.

Песнь 9

Ирмос: Безсеменнаго зачатия рождество несказанное, Матере безмужныя нетленен Плод: Божие во рождение обновляет естества. Тем же Тя вси роди, яко Богоневестную Матерь, православно величаем.

Помилуй мя, Боже, помилуй мя.

Иисусе Человеколюбче, едине немощь нашу ведый, в сию бо облеклся еси милосердия ради, хотя сию подкрепити: темже утверди нас на пути спасения и скверны лукавыя, и гноения зол моих очисти, и спаси мя.

Помилуй мя, Боже, помилуй мя.

Яко блудница, слезы вместо дел приношу Тебе, Человеколюбче: яко мытарь, стеня покаянием взываю Ти: якоже хананея, со смирением вопию: и якоже Петр покаявшийся, прощения умоляю.

Слава: Да и аз спасаемь благодарственно Тебе, Христе, величаю, призри на мя, многи раны от душевреднаго врага на плечи приемшаго, и исцели яко в разбойники впадшаго, вино на них и елей возливая Твоего, Спаса, милосердия.

И ныне: Просветительными молениями, Всенепорочная, к рожденному от Тебе Сыну Божию, верою поющих Тя просвети: и тьмы нас кромешния, и от вечныя муки изми, Твоим предстательством.

Лик: Достойно есть:

Чтец: Трисвятое. Отче наш:

И по возгласе, тропарь Богородице:

Заступнице усердная, Мати Господа Вышняго, за всех молиши Сына Твоего Христа Бога нашего, и всем твориши спастися, в державный Твой покров прибегающим: всех нас заступи, о Госпоже Царице и Владычице! иже в напастех и в скорбех, и в болезнех обремененных грехи многими, предстоящих и молящихся Тебе умиленною душею, и сокрушенным сердцем, пред пречистым Твоим образом со слезами, и непостыдну надежду имущих на Тя, избавления всех зол, всем полезная даруй, и вся спаси, Богородице Дево: Ты бо еси Божественный покров рабом Твоим.

Ектения:

Помилуй нас, Боже:

Еще молимся, о еже сохранитися царствующему граду сему, и всякому граду и стране, от глада, губительства, земли трясения, потопа, огня, меча, нашествия иноплеменников и междоусобныя брани: о еже милостиву и благоуветливу быти благому и человеколюбивому Богу нашему, отвратити всякий гнев на ны движимый и избавити ны от належащаго и праведнаго Своего прещения, и помиловати ны.

Еще молимся, и о еже услышати:

Возглас: Услыши ны, Боже:

Диакон: Вонмем, и во умилении сердца, колена душ и телес наших преклоньше, Господу помолимся.

Предстоятель преклонь колена, со всяким вниманием и умилением сердца, глаголет молитву сию велегласно:

Молитва

Господи, Едине в милости богатый, и множеством благости приклоняяйся к молением нас грешных и недостойных раб Твоих: все нам на полезную строяй, и премудрым Твоим Промыслом житие наше исправляяй, и всяким образом спасения нашего желаяй, естеством Долготерпелив сый и Многомилостив, наказуяй, и паки милуяй, и наказание во благо нам обращаяй; не во еже погубити создание рук Твоих, но паче еже к начальной доброте паки привести, и всеми образы смотряяй, еже паки спасти, и падшее от падежа возстановити. Сам Владыко Вседержителю, призри на нас, и вонми молением нас грешных: аще бо множество беззаконий наших недерзновенными нас сотвори, и не смеем отнюдь просити прощения о прегрешениях; но ведущее Твое человеколюбие, благосердие, многую милость, долготерпение, беззлобие, и премногую благость, дерзающе на множество сих и на богатство благости Твоея, воздеем руце и прилежно вопием Ти: согрешихом беззаконновахом, нечиствовахом, забывахом заповеди Твоя, и в след мысли нашея лукавыя ходихом, и яко недостойно званию и Евангелию Христа Твоего жительствовахом, и святым Его страстям и от нас истощанию не последовахом, яко быхом поношение имене христианскому и Церкви, вси вкупе уклонихомся, непотребни быхом, несть творяй благостыню, суд и правду, несть до единаго. Темже затворихом щедроты Твоя, и человеколюбие Твое, и милости Бога нашего, злобы ради нашея и лукавства начинаний. Ты Благ еси, но мы люте беззаконновахом; Ты Долготерпелив, но мы нераскаянни пребыхом; вемы же Твою благость, аще и неразумиви есмы: ныне исповедуем, яко мало, о нихже согрешихом, биени быхом, яко Ты страшен еси, и кто противостанет Тебе, трепет приимут от Тебе горы, и вeличeствy мышцы Твоея кто противоречет; аще заключиши небо, кто отверзет; и аще отверзеши хляби Твоя, кто отвратит; легко есть пред очима Твоими оскудити и обогатити, оживити и умертвити, поразити и исцелити: но мы всякия казни достойни сотворихомся: мы согрешихом, Tы же праведно разгневался еси. Но престани, Господи, от гнева, ослаби Господи, умилостивися Господи, и не предаждь нас до конца беззаконий ради наших; милость бо Твоя неизреченна, и человеколюбие Твое непобедимо, и богатство благости Твоея неистощимо и неоскудеваемо: на няже и дерзающе, молимся и умилостивляем Тя, преклоняющи колена сердец наших; укроти ярость Твою праведную, и даждь алчущим пищу, нагим одеяние, сиротам пристанище, страждущим здравие, немощствующим крепость, всяк недуг, и всякую язву, и всяку нужду и скорбь отжени от людей Твоих: всех же от напасти свободи, соблюдаяй безнаветны по бывшей скорби, и сохраняяй вседержительною Твоей рукою всегда неприкосновенны от лютаго озлобления и губительнаго сокрушения. Аще же обратимся на беззакония, Ты Сам направи от лукавыя совести всех нас к покаянию, и даждь во всяком благодеянии благоугодити Тебе: молитвами неискусомужно Тебе рождшия, Пречистыя Богоматере Приснодевы Марии, предстательствы святых и хранителей наших Ангелов. Яко Ты еси милости Источник, и благости неизследимая Пучина, и Тебе славу возсылаем, со Безначальным Твоим Отцем и с Пресвятым и Благим и Животворящим Твоим Духом, ныне и присно и во веки веков. Аминь.

Диакон: Премудрость.

И отпуст со крестом.

Последование благодарственного молебного пения о получении прошения и о всяком благодеянии Божием

Диакону рекшу: Благослови владыко.

Возглашает предстоятель:

Слава Святей и Единосущней и Нераздельней Троице, всегда, ныне и присно и во веки веков.

Лик: Аминь.

Канонарх: Слава Тебе, Боже наш, слава Тебе.

Лик: Царю Небесный:

Канонарх: Трисвятое. Отче наш:

Возглас: Яко Твое есть Царство:

Канонарх: Аминь. Господи, помилуй (12). Слава, и ныне.

Приидите, поклонимся: (трижды).

Псалом 117.

Исповедайтеся Господеви, яко Благ, яко в век милость Его. Да речет убо дом Израилев: яко Благ, яко в век милость Его. Да речет убо дом Ааронь: яко Благ, яко в век милость Его. Да рекут убо вси; боящиися Господа: яко Благ, яко в век милость Его. От скорби призвах Господа и услыша мя в пространство. Господь мне Помощник, и не убоюся, что сотворит мне человек: Господь мне Помощник, и аз воззрю на врагов моих. Благо есть надеятися на Господа, нежели надеятися на человека. Благо есть уповати на Господа, нежели уповати на князи. Вси язы́цы обыдоша мя, и именем Господним противляхся им. Обышедше обыдоша мя, и именем Господним противляхся им. Обыдоша мя яко пчелы сот, и разгорешася яко огнь в тернии; и именем Господним противляхся им. Отриновен превратихся пасти, и Господь прият мя. Крепость моя и пение мое Господь, и бысть мне во спасение. Глас радости и спасения в селениих праведных. Десница Господня сотвори силу. Десница Господня вознесе мя, десница Господня сотвори силу. Не умру, но жив буду, и повем дела Господня. Наказуя наказа мя Господь, смерти же не предаде мя. Отверзите мне врата правды, вшед в ня исповемся Господеви. Сия врата Господня: праведнии внидут в ня. Исповемся Тебе, яко услыша мя еси, и был еси мне во спасение. Камень, егоже небрегоша зиждущии, сей бысть во главу угла. От Господа бысть сей, и есть дивен во очесах наших. Сей день, егоже сотвори Господь, возрадуемся и возвеселимся вонь. О Господи! спаси же! О Господи! поспеши же! Благословен грядый во имя Господне, благословихом вы из дому Господня. Бог Господь, и явися нам, составите праздник во учащающих до рог олтаревых. Бог мой еси Ты, и исповемся Тебе, Бог мой еси Ты, и вознесу Тя. Исповемся Тебе, яко услышал мя еси, и был еси мне во спасание. Исповедайтеся Господеви, яко Благ, яко в век милость Его.

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О еже милостивно нынешнее благодарение и мольбу нас недостойных рабов Своих в пренебесный Свой жертвенник прияти и по благосердию помиловати нас, Господу помолимся.

О еже не возгнушатися благодарением нас непотребных рабов Своих, еже о приятых от Него благодеяниях во смиренном сердце приносим, но яко кадило благовонное и всесожжение тучное благоприятно Ему да будет, Господу помолимся110.

О еже и ныне послушати глас моления нас недостойных рабов Своих и доброе намерение и желание верных Своих во благое всегда исполнити, и всегда яко Щедр благодеяти нам и Церкви Своей Святой и всякому верному Своему рабу прошения даровати, Господу помолимся.

О еже избавити Церковь Свою Святую и рабов Своих (раба Своего, рабу Свою) (имя рек), и всех нас от всякой скорби, беды, гнева и нужды, и от всех врагов видимых и невидимых; здравием же, долгоденствием и миром и Ангелов Своих ополчением верных Своих оградити, Господу помолимся.

О избавитися нам:

Заступи, спаси, помилуй:

Пресвятую, Пречистую:

Возглас: Яко подобает:

На Бог Господь:

Тропарь, глас 4:

Благодарни суще недостойнии раби Твои, Господи, о Твоих великих благодеяниях на нас бывших, славяще Тя, хвалим, благословим, благодарим, поем и величаем Твое благосердие, и рабски любовию вопием Ти: Благодетелю Спасе наш, слава Тебе. (Дважды.)

Слава, и ныне: той же.

Псалом избранный:

Благо есть исповедатися Господеви, и пети имени Твоему, Вышний, возвещати заутра милость Твою (91/2–3). Коль многое множество благости Твоея, Господи, юже скрыл еси боящимся Тебе (30/20). Радуйтеся Богу, Помощнику нашему, воскликните Богу Иаковлю (80/2). Исповемся Тебе, Господи, всем сердцем моим, повем вся чудеса Твоя. Возвеселюся и возрадуюся о Тебе, пою имени Твоему, Вышний (9/2–3), возрадуюся и возвеселюся о милости Твоей (30/8). Яко Ты, Боже, услышал еси молитвы моя (60/6). Да исполнятся уста моя хваления, яко да воспою славу Твою (70/8). Возрадуется сердце мое, воспою Господеви, благодеявшему мне, и пою имени Господа Вышняго (12/7). Не нам, Господи, не нам, но имени Твоему даждь славу, о милости Твоей (113/9). Благослови, душе моя, Господа, и вся внутренняя моя имя святое Его. Благослови, душе моя, Господа, и не забывай всех воздаяний Его, венчающаго тя милостию и щедротами, исполняющаго во благих желание твое (102/1–2, 4–5). Хвалу Господню возглаголют уста моя (144/21). Принесите Господеви славу и честь, принесите Господеви славу имени Его (95/7–8); воспойте, и радуйтеся, и пойте. Пойте Господеви в гуслех, в гуслех и гласе псаломском (97/4–5). Исповедайтеся Господеви, яко благ, яко в век милость Его (135/1).

На каноне припев: Слава Тебе, Боже Всещедрый111.

Катавасия:

Слава Тебе, Боже Всещедрый, за великия Твои милости на нас излиянныя, за нихже благодарение приносяще, Тя, яко Благодетеля нашего славим, хвалим, поем и величаем112.

Ектения сугубая.

Помилуй нас, Боже:

Благодаряще со страхом и трепетом, яко раби недостойнии Твоему благосердию, Спасе и Владыко наш Господи, о Твоих благодеяниях, ихже излиял еси изобильно на рабов Твоих (раба Твоего, рабу Твою), и припадаем и славословие Тебе яко Богу приносим и умильно вопием: избави от всех бед рабов Твоих и всегда яко Милостив исполни ко благу желания всех нас, прилежно молимся Тебе, услыши и помилуй113.

Якоже ныне милостивно услышал еси молитву рабов Твоих (раба Твоего, рабы Твоей), Господи, и явил еси на них (на нем, на ней) богатство человеколюбия Твоего, тако и на будущее время не презирая, исполни во славу Твою вся благая хотения верных Твоих и яви всем нам богатую милость Твою, все наши согрешения презираяй, молимся Тебе, услыши и помилуй.

Возглас: Яко милостив:

По 6-й песни катавасия и ектения малая.

Кондак, глас 3:

Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по силе приносим, и Тебе яко Благодетеля и Творца славяще, вопием: слава Тебе, Боже Всещедрый.

Прокимен, глас 4: Воспою Господеви благодеявшему мне и пою имени Господа Вышняго.

Стих: Возрадуется сердце мое о спасении Твоем.

Евангелие от Луки, зач. 85 (17, 12–19).

Во время оно, входящу Иисусови в некую весь, сретоша его десять прокаженных мужей, иже сташа издалеча. И тии вознесоша глас, глаголюще: Иисусе Наставниче, помилуй ны. И видев рече им: шедше покажитеся священником: и бысть идущим им, очистишася. Един же от них видев, яко исцеле, возвратися, со гласом велиим славя Бога. И паде ниц при ногу Его, хвалу Ему воздая. И той бе самарянин. Отвещав же Иисус, рече: не десять ли очистишася, да девять где? Како не обретошася возвращшеся дати славу Богу, токмо иноплеменник сей? И рече ему: востав иди, вера твоя спасе тя.

По 9-й песни: Достойно есть: Трисвятое. Отче наш: По возгласе

Тропарь, глас 4:

Благодарни суще недостойнии раби Твои, Господи, о Твоих великих благодеяниях на нас бывших, славяще Тя, хвалим, благословим, благодарим, поем и величаем Твое благосердие, и рабски любовию вопием Ти: Благодетелю Спасе наш, слава Тебе.

Слава:

Кондак, глас 3:

Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по силе приносим, и Тебе яко Благодетеля и Творца славяще, вопием: слава Тебе, Боже Всещедрый.

И ныне. Богородичен, глас тойже:

Богородице христианом Помощнице, Твое предстательство стяжавше раби Твои, благодарно Тебе вопием: радуйся, Пречистая Богородице Дево, и от всех бед нас Твоими молитвами всегда избави, едина вскоре предстательствующая.

Ектения сугубая.

Помилуй нас Боже:

Благоприятно, яко кадило благовонное и яко тучная всесожжения да будет, Всеблагий Владыко, благодарение сие наше пред величеством славы Твоея и низпосли всегда яко Щедр рабам Твоим (рабу Твоему, рабе Твоей) богатые милости и щедроты Твоя и от всех сопротивлений видимых и невидимых врагов Церковь Твою Святую, град сей (весь сию, дом сей, обитель сию) избави, людем же Твоим всем безгрешное со здравием долгоденствие и во всех добродетелях преспеяние даруй молимся Тебе, Всещедрый Царю, милостивно услыши и скоро помилуй.

Еще молимся и о еже услышати Господу Богу:

Возглас: Услыши ны, Боже:

Молитва

Господи Иисусе Хрсте Боже наш, Боже всякого милосердия и щедрот, егоже милость безмерна и человеколюбия неизследимая пучина: к Твоему величеству припадающе со страхом и трепетом, яко раби недостойнии, благодарение Твоему благосердию о Твоих благодеяниях на рабах Твоих (рабе Твоем, рабе Твоей) бывших ныне смиренно приносяще, яко Господа, Владыку и Благодетеля славим, хвалим, поем и величаем, и припадающе паки благодарим Твое безмерное и неизреченное милосердие, смиренно моляще. Да якоже ныне моления рабов Твоих (раба Твоего, рабы Твоея) прияти и милостивно исполнити сподобил еси, и на будущее время верным Твоим, в любви к Тебе и к братиям преспевающим, Твоя благодеяния всегда подавай; Церковь Твою Святую, град сей (весь сию, обитель сию, дом сей) от всякаго злаго обстояния избавляя, и мир и безмятежие тем даруй, и Тебе со Безначальным Твоим Отцем и Пpесвятым и Благим и Единосущным Твоим Духом во Едином Существе Славимому Богу, всегда благодарение приносити и преблагая глаголати и воспети сподоби: Слава Тебе Богу, Благодетелю нашему, во веки веков.

Лик: Аминь.

И поет песнь святаго Амвросия, епископа Медиоланскаго:

Тебе Бога хвалим, Тебе Господа исповедуем. Тебе Превечная Отца вся земля величает. Тебе вси Ангели, Тебе небеса и вся силы, Тебе Херувими и Серафими непрестанными гласы взывают: Свят, Свят, Свят Господь Бог Саваоф, полны суть небеса и земля величества славы Твоея. Тебе преславный апостольский лик, Тебе пророческое хвалебное число, Тебе хвалит пресветлое мученическое воинство. Тебе по всей вселенней исповедует Святая Церковь, Отца непостижимаго величества, покланяемаго Твоего истиннаго и Единороднаго Сына, и Святаго Утешителя Духа. Ты, Царю славы Христе, Ты, Отца присносущный Сын еси: Ты ко избавлению приемля человека, не возгнушался еси девическаго чрева. Ты, одолев смерти жало, отверзл еси верующим Царство Небесное; Ты одесную Бога седищи во славе Отчей, Судия приити веришися. Тебе убо просим: помози рабам Твоим, ихже честною кровию искупил еси. Сподоби со святыми Твоими в вечной славе Твоей царствовати. Спаси люди Твоя, Господи, и благослови достояние Твое, исправи их и вознеси их во веки: во вся дни благословим Тебе и восхвалим имя Твое во век и в век века. Сподоби, Господи, в день сей без греха сохранитися нам. Помилуй нас, Господи, помилуй нас: буди милость Твоя, Господи, на нас, якоже уповахом на Тя. На Тя, Господи, уповахом, да не постыдимся во веки. Аминь.

На отпусте иерей поминает святых в тот день празднуемых.

По отпусте поет диакон:

Рабом Божиим (рабу Божию, рабе Божией) подаждь, Господи, здравие и спасение и во всем благое поспешение, и сохрани их (его, сию) на многая лета.

Лик: Многая лета (трижды).

Иное последование благодарственного молебного пения о получении прошения и о всяком благодеянии Божием (Без канона)

По возгласе предстоятеля, обычное начало.

Псалом избранный114.

Слава, и ныне. Аллилуия (трижды).

Ектения великая с ея прошениями115.

На Бог Господь:

Тропарь, глас 4:

Благодарни суще недостойнии раби Твои, Господи, о Твоих великих благодеяниях на нас бывших, славяще Тя, хвалим, благословим, благодарим, поем и величаем Твое благосердие, и рабски любовию вопием Ти: Благодетелю Спасе наш, слава Тебе. (Дважды.)

Слава:

Кондак глас 3:

Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по силе приносим, и Тебе яко Благодетеля и Творца славяще, вопием: слава Тебе, Боже Всещедрый.

И ныне. Богородичен:

Богородице христианом Помощнице, Твое предстательство стяжавше раби Твои, благодарно Тебе вопием: радуйся, Пречистая Богородице Дево, и от всех нас бед Твоими молитвами всегда избави, едина вскоре предстательствующая

Прокимен, глас 4: Воспою Господеви благодеявшему мне и пою имени Господа Вышняго.

Стих: Возрадуется сердце мое о спасении Твоем.

Апостол ко Ефесеем, зач. 229–230 (5, 9–21).

Братие, яко чада света ходите: (Плод бо духовный есть во всякой благостыни и правде и истине). Искушающе, что есть благоугодно Богови. И не приобщайтеся к делом неплодным тьмы, паче же и обличайте. Бываемая бо отай от них, срамно есть и глаголати. Вся же обличаемая, от света являются: все бо являемое свет есть. Сего ради глаголет: востани спяй, и воскресни от мертвых, и осветит тя Христос. Блюдите убо, како опасно ходите, не якоже немудри, но якоже премудри. Искупующе время, яко дние лукави суть. Сего ради не бывайте несмысленни, но разумевающе, что есть воля Божия. И не упивайтеся вином, в немже есть блуд: но паче исполняйтеся духом, глаголюще себе во псалмех и пениих, и песнех духовных, воспевающе и поюще в сердцах ваших Господеви. Благодаряще всегда о всех, о имени Господа нашего Иисуса Христа, Богу и Отцу: повинующеся друг другу в страсе Божии.

Евангелие от Луки, зач. 85 (17, 12–19) 116.

Ектения сугубая.

Помилуй нас, Боже:

Благодаряще со страхом и трепетом, яко раби недостойнии Твоему благосердию, Спасе и Владыко наш Господи, о Твоих благодеяниях, ихже излиял еси изобильно на рабов Твоих (раба Твоего, рабу Твою), и припадаем и славословие Тебе яко Богу приносим и умильно вопием: избави от всех бед рабов Твоих и всегда яко милостив исполни ко благу желания всех нас, прилежно молимся Тебе, услыши и помилуй117.

Якоже ныне милостивно услышал еси молитву рабов Твоих (раба Твоего, рабы Твоей), Господи, и явил еси на них (на нем, на ней) богатство человеколюбия Твоего, тако и на будущее время не презирая, исполни во славу Твою вся благая хотения верных Твоих и яви всем нам богатую милость Твою, все наши согрешения презираяй, молимся Тебе, услыши и помилуй.

Благоприятно, яко кадило благовонное и яко тучная всесожжения да будет, Всеблагий Владыко, благодарение сие наше пред величеством славы Твоея и низпосли всегда яко Щедр рабам Твоим (рабу Твоему, рабе Твоей) богатыя милости и щедроты Твоя и от всех сопротивлений видимых и невидимых врагов Церковь Твою Святую, град сей (весь сию, дом сей, обитель сию) избави, людем же Твоим всем безгрешное со здравием долгоденствие и во всех добродетелях преспеяние даруй, молимся Тебе, Всещедрый Царю, милостивно услыши и скоро помилуй.

Возглас; Усльши ны, Боже:

Молитва и отпуст118.

Последование благодарственнаго пения следует совершать всакий раз пo получении той или иной милости Божией, по благополучном завершении каждого серьезного дела, в дни рождений, знаменательных годовщин и юбилеев. Но поток милостей Божиих безгранично велик. Господь изливает их на нас, можно сказать, на каждом шагу, и в великом и, еще чаще, в малом повседневном, что мы недооцениваем, а иногда и совсем не замечаем. Если мы людям и за малую услугу всякия раз говорим «спасибо», то тем более подобает приносить благодарение за бесчисленные милости Божии Подателю их, в особенности подводя итог всему прожитому в течение дня. Поэтому было бы соответственным ежедневно к вечерним молитвам присоединять благодарение по такому примерно чину:

После молитв: Богородице Дево, не презри мене грешнаго: и Упование мое Отец: читается или поется благодарственный тропарь: Благодарни суще: Слава. Кондак: Твоих благодеяний: И ныне. Богородичен: Богородице, христианом Помощница:

Посем:

Благодаряще со страхом и трепетом, яко раби непотребнии, Твоему благосердию, Спасе и Владыко наш Господи о всех милостях Твоих, ихже во все дни жизни нашея изобильно изливал еси на нас недостойных, имиже и в мимошедший день не оставил еси нас, припадаем и славословие Тебе яко Богу приносим и умиленно вопием: избави от всех бед братий наших, чрез них же Ты благодетельствуеши нам, и всегда яко Милостив исполни во благих желания их и наша, прилежно молимся Тебе, услыши и помилуй.

Молитвами святых отец наших:

Господу помолимся. Господи помилуй.

Молитва

Господи Иисусе Христе, Боже наш, Боже всякаго милосердия щедрот, егоже милость безмерна, и человеколюбия неизследимая пучино! К Твоему величествию припадающе со страхом и трепетом, благодарение Твоему благосердию о Твоих благодеяниях на нас, рабах Твоих, бывших ныне смиренно приносяще, Tя, яко Господа, Владыку и Благодетеля нашего хвалим, поем и величаем, и припадающе паки благодарим Твое безмерное и неизреченное милосердие смиренно моляще. Да якоже до ныне во все дни жизни нашей и в мимошедший день милостями Твоими нас ущедрял еси, тако и на будущее время Твои благодеяния нам и всем верным всегда подавай; братий наших на судилищах, в темницах, узах, заточении, изгнании и горьких работах сущих (чад наших духовных) и всех вне храмов воздыхающих, всех любящих, милующих, питающих, благодеющих и служащих нам, заповедавших и о них же заповедано молиться, и всех сродников их и наших от всякаго злаго обстояния избави, мир и безмятежие всем даруй. И Тебе, со Безначальным Твоим Отцем и Пресвятым и Благим и Единосущным Твоим Духом во Едином существе славимому Богу всегда благодарение приносити и преблагая глаголати и воспети сподоби: Слава Тебе Богу, Благодетелю нашему во веки веков. Аминь.

И песнь святаго Амвросия: Тебе Бога хвалим: и обычное окончание вечерних молитв: Достойно есть: Владыко Человеколюбче: и прочее.

Мирянин после благодарственных тропаря, кондака и Богородична читает одно благодарственное прошение: Благодаряще со страхом и трепетом: и непосредственно за ним произносит: Господу помолимся. Господи помилуй. Затем читает молитву с опущением слов, заключенных в скобки, и поет или читает песнь святаго Амвросия, после которой продолжает вечерния молитвы.

Последование благодарственного молебного пения по получении милостыни

Возглашает предстоятель: Слава Святей Единосущной и Нераздельной Троице, всегда, ныне и присно и во веки веков.

Лик: Аминь.

Слава Тебе, Боже наш, слава Тебе.

Царю Небесный: Трисвятое. Отче наш: Господи помилуй (12). Слава, и ныне. Приидите, поклонимся: (трижды).

Псалом избранный:

Благо есть исповедатися Господеви, и пети имени Твоему, Вышний, возвещати заутра милость Твою (91/2–3). Коль многое множество благости Твоея, Господи, юже скрыл еси боящимся Тебе (30/20). Радуйтеся Богу, Помощнику нашему, воскликните Богу Иаковлю (80/2). Исповемся Тебе, Господи, всем сердцем моим, повем вся чудеса Твоя. Возвеселюся и возрадуюся о Тебе, пою имени Твоему, Вышний (9/2–3), возрадуюся и возвеселюся о милости Твоей (30/8). Яко Ты, Боже, услышал еси молитвы моя (60/6). Да исполнятся уста моя хваления, яко да воспою славу Твою (70/8). Возрадуется сердце мое, воспою Господеви, благодеявшему мне, и пою имени Господа Вышняго (12/7). Не нам, Господи, не нам, но имени Твоему даждь славу, о милости Твоей (113/9). Благослови, душе моя, Господа, и вся внутренняя моя имя святое Его. Благослови, душе моя, Господа, и не забывай всех воздаяний Его, венчающаго тя милостию и щедротами, исполняющаго во благих желание твое (102/1–2, 4–5). Хвалу Господню возглаголют уста моя (144/21). Принесите Господеви славу и честь, принесите Господеви славу имени Его (95/7–8); воспойте, и радуйтеся, и пойте. Пойте Господеви в гуслех, в гуслех и гласе псаломском (97/4–5). Исповедайтеся Господеви, яко благ, яко в век милость Его (135/1).

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О еже милостивно нынешнее благодарение и мольбу нас недостойных рабов Своих в пренебесный Свой жертвенник прияти и по благосердию помиловати нас, Господу помолимся.

О еже не возгнушатися благодарением нас непотребных рабов Своих, еже о приятых от Него благодеяниях во смиренном сердце приносим, но яко кадило благовонное и всесожжение тучное благоприятно Ему да будет, Господу помолимся.

О еже и ныне послушати глас моления нас недостойных рабов Своих, и доброе намерение и желание верных Своих во благое всегда исполнити и всегда яко Щедр благодеяти нам и благодетелям нашим, милующим и питающим нас, и всем добро нам творящим и Церкви Своей Святой и всякому верному Своему рабу прошение даровати, Господу помолимся.

О еже избавити рабов Своих (имя рек), милостыню ныне сотворивших и всех милующих и питающих нас, благодеющих и служащих нам, заповедавших и о нихже заповедано нам молитися и всех нас от всякия скорби, беды, гнева и нужды, и от всех врагов видимых и невидимых; здравием же, долгоденствием и миром и Ангелов Своих ополчением верных Своих всегда оградити, Господу помолимся.

О избавитися нам:

Заступи, спаси:

Пресвятую, Пречистую:

Возглас: Яко подобает:

Ha Бог Господь:

Тропарь, глас 4:

Благодарни суще недостойнии раби Твои, Господи, о Твоих великих благодеяниях на нас бывших, славяще Тя хвалим, благословим, благодарим, поем и величаем Твое благосердие, и рабски любовию вопием Ти: Благодетелю Спасе наш, слава Тебе. (Дважды.)

Слава, и ныне. Борородичен, глас тойже:

Не умолчим никогда, Богородице, силы Твоя глаголати недостойнии и о всех милостях Твоих, на нас бывших, благодарныя хвалы приносити. Ты бо, яко милосердная и чадолюбивая Мати, в нуждах наших присно помогаеши нам. Темже не престанем, Владычице, Тя славити: радуйся, всех христиан радость и утешение.

Псалом избранный:

Вознесу Тя, Боже мой, Царю мой и благословлю имя Твое в век и .в век века. Очи всех на Тя уповают, и Ты даеши им пищу во благовремении. Отверзаевши Ты руку Твою и исполняевши всякое животное благоволения (144/1, 15–16). Вся к Тебе чают дати пищу им во благо время. Давшу Тебе им, соберут, отверзшу Тебе руку, всяческая исполнятся благости (103/27–28). Милостив и щедр Господь, пищу даде боящимся Его (110/4–5). Ядят убозии и насытятся и восхвалят Господа взыскающии Его. Жива будут сердца их во век века (21/27). Возверзи на Господа печаль твою, и Той тя пропитает (54/23). Бог мой, милость Его предварит мя (68/11). Милость Твоя, Господи, помогаше ми (93/18). Дал еси веселие в сердце моем, от плода пшеницы, вина и елея своего умножишася (4/8). Вкусите и видите, яко благ Господь. Блажен муж, иже уповает на Него (33/9). Хвали душе моя Господа, дающего пищу алчущим (145/1, 7). Любит милостыню Господь, милости Господни исполнь земля (32/5). Тебе оставлен есть нищий, сиру Ты буди помощником (9/35). Блажен разумеваяй на нища и убога, в день лют избавит его Господь (36/21). Весь день милует и взаим дает праведный (36/26). Сильно на земли будет семя его, род правых благословится. Милостив и щедр и праведен. Благ муж щедря и дая. Расточи, даде убогим. Слава и богатство в дому его и правда его пребывает в век века (111/3–4, 9).

На каноне припевы: Слава Тебе, Боже Всещедрый. (Дважды.)

Милостиве Господи, помилуй рабов Твоих, нас милующих. (Дважды.)

Слава, и ныне.

Катавасии:

Слава Тебе, Боже Всещедрый, за великия Твои милости, на нас излиянныя, за нихже благодарение приносяще, Тя, яко Благодетеля нашего славим, хвалим, поем и величаем.

Избави от бед и скорбей рабов Твоих, питающих нас, Милостиве, яко мы усердно к Тебе прибегаем, к милостивому Питателю нашему и всем милостивым помилование Обещавшему.

По 3-й песни, ектения сугубая:

Помилуй нас, Боже:

Еще молимся Тебе, Господу Богу нашему, еже услышати глас моления нашего и молитву и помиловати рабов Своих, милостыню нам ныне сотворивших, и всех любящих, милующих и питающих нас, добро нам творящих и служащих нам, заповедавших и о них же заповедано нам молитися, и всех сродников и знаемых их и наших благодатию и щедротами Твоими, исполнити им вся прошения их, и простити им вся согрешения их вольные и невольные, благоприятным же быти мольбам и милостыням их пред престолом владычествия Твоего, покрыти их от всех врагов видимых и невидимых, от всякия напасти, беды и скорби, и от недугов избавити и подати здравие с долгоденствием, рцем вси, Господи, услыши и помилуй.

Призри, Владыко Человеколюбче, милостивым Твоим оком на рабов Твоих, благодетелей наших, милующих и питающих нас, и на всех добро нам творящих, и услыши моления наши, с верою приносимыя, яко Сам рекл еси: вся елика молящеся просите, веруйте, яко приимите, и будет вам. И паки: просите и дастся вам. Сего ради и мы, аще и недостойнии, уповающе на милость Твою, просим: подаждь благость Твою рабам Твоим, благодетелям нашим, и исполни благая желания их, здравие и долгоденствие им даруй; преставльшимся же сродникам их грехи прости и Царствия Твоего сподоби. Рцем вси: скоро услыши и милостивно помилуй.

Возглас: Яко милостив:

По 6-й песни катавасия и ектения малая.

Кондак, глас 3:

Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по силе приносим, и Тебе яко Благодателя и Творца славяще, вопием: слава Тебе, Боже Всещедрый.

Прокимен, глас 4: Воспою Господеви благодеявшему мне и пою имени Господа Вышняго.

Стих: Возрадуется сердце мое о спасении Твоем.

Евангелие от Луки, зач. 85 (17, 12–19).

Во время оно, входящу Иисусови в некую весь, сретоша его десять прокаженных мужей, иже сташа издалеча. И тии вознесоша глас, глаголюще: Иисусе Наставниче, помилуй ны. И видев рече им: шедше покажитеся священником: и бысть идущим им, очистишася. Един же от них видев, яко исцеле, возвратися, со гласом велиим славя Бога. И паде ниц при ногу Его, хвалу Ему воздая. И той бе самарянин. Отвещав же Иисус, рече: не десять ли очистишася, да девять где? Како не обретошася возвращшеся дати славу Богу, токмо иноплеменник сей? И рече ему: востав иди, вера твоя спасе тя.

Слава: Отче, Слове и Душе, Троице Святая, очисти множество согрешений наших.

И ныне: Молитвами Богородицы, Милостиве, очисти множество согрешений наших.

Помилуй мя, Боже, по велицей; милости Твоей и по множеству щедрот Твоих очисти беззакония моя.

Посем глаголет диакон:

Спаси Боже люди Твоя и благослови достояние Твое, посети мир Твой милостию и щедротами, возвыси рог христиан православных, и ниспосли на благодетелей наших и на нас милости Твои богатыя; молитвами Всепречистыя Владычицы нашей Богородицы и Приснодевы Марии; силою Честнаго и Животворящаго Креста, предстательством честных Небесных Сил безплотных; честнаго славнаго пророка Предтечи и Крестителя Иоанна; святых славных и всехвальных апостолов; святаго славнаго пророка Божия Илии119; святаго благовернаго равноапостольнаго великаго князя Владимира; преподобнаго отца нашего Прохора Лебедника, Печерскаго120, святой праведной Иулиании Милостивой, Муромской121; святаго (русскаго святаго, в тот день празднуемаго) и всех прочих святых в земле Русской просиявших; иже во святых отцев наших Николая, архиепископа Мир Ликийских122, Иоанна, патриарха Александрийскаго123 и святаго праведнаго Филарета124, Милостивых; преподобных Маркиана пресвитера и иконома Великой церкви125, Сампсона Странноприимца126 и Зотика Сиропитателя127, святой мученицы Анастасии Узорешительницы128; святаго (вселенскаго святаго, в тот день празднуемаго); святых праведных Богоотцев Иоакима и Анны и Иосифа Обручника129 и всех святых, молим Тя, Многомилостиве Господи, услыши нас грешных молящихся Тебе и помилуй нас.

Певцы: Господи, помилуй (12).

Возглас: Милостию и щедротами:

По 9-й песни Достойно есть: Трисвятое. Отче наш: По возгласе

Тропарь, глас 4:

Благодарни суще недостойнии раби Твои, Господи, о Твоих великих благодеяниях на нас бывших, славяще Тя, хвалим, благословим, благодарим, поем и величаем Твое благосердие, и рабски любовию вопием Ти: Благодетелю Спасе наш, слава Тебе.

Слава:

Кондак, глас 3:

Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по силе приносим, и Тебе яко Благодетеля и Творца славяще, вопием: слава Тебе, Боже Всещедрый.

И ныне. Богородичен, глас тойже:

Богородице христианом Помощнице, Твое предстательство стяжавше раби Твои, благодарно Тебе вопием: радуйся, Пречистая Богородице Дево, и от всех нас бед Твоими молитвами всегда избави, едина вскоре предстательствующая.

Ектения сугубая:

Помилуй нас Боже:

Благодаряще со страхом и трепетом, яко раби непотребнии, Твоему благосердию, Спасе и Владыко наш Господи, о Твоих благодеяниях, ихже присно обильно изливаеши на нас недостойных, припадаем и славословие Тебе яко Богу приносим и умильно вопием: избави от всех бед братий наших, чрез нихже Ты благодетельствуеши нам и всегда яко Милостив исполни ко благу желания их и наши, прилежно молимся Тебе, услыши и помилуй.

Якоже ныне милостиво услышал еси молитвы наши, Господи, и чрез благодетелей наших явил еси на нас богатство милосердия Твоего, тако и на будущее время не презирая, исполни в славу Твою все благая желания верных Твоих и яви всем нам богатую милость Твою, все наша согрешения презирая, молимся Тебе, услыши и помилуй.

Благоприятно, яко кадило благовонное и яко всесожжения тучныя, да будет Всеблагий Владыко благодарение сие наше, пред величеством славы Твоея и ниспосли всегда яко Щедр рабам Твоим, милостыню нам ныне сотворившим и всем благодетелям нашим, милующим и питающим нас, заповедавшим и о нихже заповедано нам молитися, богатые милости и щедроты Твои, домы их и имения от всякаго зла избави, молимся Тебе, Всещедрый Царю, милостивно услыши и скоро помилуй.

Возглас: Услыши ны, Боже:

Молитва

Блаже и человеколюбче, Благосерде и Многомилостиве Господи, многий в милости и богатый в благостыни, Отче щедрот и Боже всякаго утешения. Благодарим Тя за все милости Твои, ихже от дня рождения нашего и до ныне изобильно изливаеши на нас, имиже непрестанно ущедряеши нас. Благодарим Тя, яко Ты не токмо Сам благодетельствуюши нам, но и рабов Твоих на дела милости подвизаеши. Молим Тя, помилование милостивым Обещавшаго: помяни братий наших, милостыню нам ныне сотворивших, и всех любящих, милующих и питающих нас, благодеющих и служащих нам, заповедавших и о нихже заповедано нам молитися, и всех сродников и знаемых их. Сам от Своих богатых щедрот воздай благодетелям нашим за их братскую любовь. Приими их приношение нам, яко благовонный фимиам, яко жертву приятную Тебе, яко дело милости, Тебе Самому оказанное. Даждь им от росы небесной свыше и от тука земнаго; исполни домы их пшеницы, вина и елея и всякой благостыни; от всякаго злаго обстояния неврежденных их соблюди и всякое изобилие небеснаго и земнаго благословения им даруй. Помяни во Царствии Твоем их сродников и друзей представльшихся, за них же милостыню они творят, прощение грехов и наследие вечных небесных благ тем даруй. Приими милостивно и наше благодарение, егоже яко раби непотребнии со страхом и трепетом дерзаем приносити Тебе, от глубины сердца с любовию, благодарно и хвалебно взывающе: Слава Тебе Богу, Благодетелю нашему, во веки веков. Аминь.

И поется песнь святаго Амвросия: Тебе Бога хвалим:

Отпуст:

Христос, истинный Бог наш, молитвами Пречистыя Своея Матери и всех святых, помилует и спасет нас и благодетелей наших, яко Благ и Человеколюбец.

По отпусте поет диакон:

Рабам Божиим (имя рек) и всем любящим, милующим и питающим нас, благодеющим и служащим нам, заповедавших и о нихже заповедано нам молитися, подаждь, Господи, здравие и спасение, и во всем благое поспешение, и сохрани их на многая лета.

Лик: Многая лета (трижды).

Последование молебнаго пения с акафистом

Диакон: Благослови владыко.

Иерей: Благословен Бог наш всегда, ныне и присно, и во веки веков.

Лик: Аминь. Царю Небесный:

Таже чтец: Трисвятое по Отче наш: Возглас: Яко Твое есть Царство, и сила и слава, Отца, и Сына, и Святаго Духа, и ныне и присно, и во веки веков.

Чтец: Аминь. Господи, помилуй, 12.

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем Самому Христу, Цареви и Богу нашему.

Псалом 142:

Господи, услыши молитву мою, внуши моление мое во истине Твоей:

Слава, и ныне: Аллилуиа, трижды.

Ектения великая: Миром Господу помолимся:

Возглас: Яко подобает Тебе всякая слава:

По гласу тропаря.

Бог Господь, и явися нам, благословен грядый во имя Господне.

Стих 1: Исповедайтеся Господеви, яко Благ, яко в век милость Его.

Стих 2: Обышедше обыдоша мя, и именем Господним противляхея им.

Стих 3: Не умру, но жив буду, и повем дела Господня.

Стих 4: Камень, егоже небрегоша зиждущий, сей бысть во главу угла: от Господа бысть сей, и есть дивен во очесех наших.

Таже тропарь, дважды:

Слава, и ныне: Богородичен его.

Таже псалом 50-ый.

Посем без ирмосов 1 и 3 песни канона, егоже припевы:

Иисусе Сладчайший, спаси нас,

Или: Пресвятая Богородице, спаси нас,

Или: коему-либо святому.

Поем же киижду песнь сице:

Иерей и диакон: Припев

Лик: Припев

Иерей и диакон: Слава:

Лик: И ныне:

По 3-й песни поем:

Спасителю: Избави от бед/ рабы Твоя, Многомилостиве,/ яко мы усердно/ к Тебе прибегаем,/ милостивому Избавителю, всех Владыце, Господу Иисусу.

Богородице: Спаси от бед/ рабы Твоя, Богородице,/ яко вси по Бозе/ к Тебе прибегаем,/ яко Нерушимей Стене и Предстательству.

Призри благосердием,/ Всепетая Богородице,/ на мое лютое/ телесе озлобление,/ и исцели души моея болезнь.

Святому: Моли Бога о нас, имярек,/ яко мы усердно/ к тебе прибегаем,/ скорому помощнику и молитвеннику о душах наших.

Таже ектениа: Помилуй нас, Боже, по велицей милости Твоей, молим Ти ся, услыши и помилуй.

Еще молимся о Великом Господине и отце нашем Святейшем Патриархе Кирилле и о Господине нашем Высокопреосвященнейшем митрополите (архиепископе, или Преосвященнейшем епископе) имярек, и о всей во Христе братии нашей.

Еще молимся за всю братию и за вся христианы.

Возглас: Яко Милостив и Человеколюбец Бог еси и Тебе славу возсылаем Отцу и Сыну и Святому Духу, ныне и присно и во веки веков.

Лик: Аминь.

Также 4, 5 и 6 песни канона.

По 6-й песни: поем, якоже и по 3-й песни.

Таже ектениа: Паки и паки миром Господу помолимся.

Заступи, спаси, помилуй, и сохрани нас, Боже, Твоею благодатию.

Пресвятую, Пречистую, Преблагословенную, славную Владычицу нашу Богородицу, и Приснодеву Марию, со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Возглас: Ты бо еси Царь мира, и Спас душ наших, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Таже лик поет кондак 1-й акафиста Спасителю или Богородице или святому. По прочтении 12 кондаков и икосов иерей чтет кондак 13-й трижды. Таже икос 1-й и кондак 1-й.

Диакон: Вонмем, премудрость, вонмем. Прокимен [Господу, Божией Матери или святому].

Лик поет прокимен.

Диакон: Господу, помолимся.

Лик: Господи, помилуй.

Иерей: Яко свят еси, Боже наш, и во святых почиваеши, и Тебе славу возсылаем, Отцы и Сыну и Святому Духу, ныне и присно и во веки веков.

Лик: Аминь.

Диакон и лик: Всякое дыхание да хвалит Господа:

Диакон: И о сподобитися нам слышанию святаго евангелиа, Господа Бога молим.

Лик: Господи, помилуй (трижды).

Диакон: Премудрость, прости, услышим святаго евангелиа.

Иерей: Мир всем.

Лик: И духови твоему.

Иерей: От имярек святаго евангелиа чтение.

Лик: Слава Тебе, Господи, слава Тебе.

Диакон: Вонмем.

И чтет иерей прилучившееся евангелие.

Посем поются песни 7, 8 и 9.

Таже: Достойно есть: Трисвятое, по Отче наш: и тропари.

По тропарех, ектениа:

Помилуй нас, Боже, по велицей милости Твоей, молим Ти ся, услыши и помилуй.

Лик: Господи, помилуй (трижды).

Еще молимся о Великом Господине и отце нашем Святейшем Патриархе Кирилле и о господине нашем Высокопреосвященнейшем митрополите (архиепископе или Преосвященнейшем епископе) имярек, и о всей во Христе братии нашей.

Еще молимся о богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.

Еще молимся о милости, жизни, мире, здравии, спасении, посещении, прощении и оставлении грехов рабов Божиих (имярек).

Еще молимся за всю братию, и за вся христианы.

Возглас: Услыши ны, Боже Спасителю наш, упование всех концов земли и сущих в море далече: и милостив, милостив буди, Владыко, о гресех наших и помилуй ны. Милостив бо и человеколюбец, Бог еси, и Тебе славу воссылаем, Отцу и Сыну, и Святому Духу, ныне и присно и во веки веков.

Лик: Аминь.

По ектении иерей чтет молитву. Посем поется величание.

Диакон: Премудрость:

Иерей: Пресвятая Богородице, спаси нас.

Лик: Честнейшую Херувим:

Иерей: Слава Тебе, Христе Боже, Упование наше, слава Тебе.

Лик: Слава, и ныне: Господи, помилуй, (трижды) Благослови.

Иерей отпуст:

Христос истинный Бог наш, молитвами Пречистыя Своея Матере, преподобных и богоносных отец наших, [имярек святаго, емуже молебен], и всех святых, помилует и спасет нас, яко Благ и Человеколюбец.

Лик: Аминь.

Чин краткого молебного пения о сохранении творения Божия

Благословен Бог наш:

Царю Небесный:

Трисвятое по Отче наш:

Псалом 103-й.

Бог Господь: глас 6:

Помилуй нас, Господи, помилуй нас,/ всякаго бо ответа недоумеюще,/ сию Ти молитву, яко Владыце,/ грешнии, приносим, помилуй нас.

Слава:

Иже древле в Вавилоне гордыя языки поразивый, Господи,/ праведнаго Твоего прещения избави ны./ Пощади грешныя люди Твоя,/ яже стяжал еси Твоею Кровию;/ не предаждь нас погибели от дел рук наших,/ иного бо, разве Тебе, Бога не вемы,/ и воззови погибающим:/ Аз есмь с вами, и никтоже на вы.

И ныне, Богородичен:

Милосердия двери отверзи нам,/ Благословенная Богородице,/ надеющиися на Тя, да не погибнем,/ но да избавимся Тобою от бед,/ Ты бо еси спасение рода христианскаго.

Прокимен, глас 1: Буди, Господи, милость Твоя на нас, якоже уповахом на Тя. Стих: Господи, услыши молитву мою, и вопль мой. Апостол к Римляном, зачало 98 (глава 8, 22–27). Аллилуиа, глас 4: Боже, ущедри ны и благослови ны. Стих: Просвети лице Твое на ны, и помилуй ны.

Евангелие от Матфеа, зачало 100.

Помилуй нас, Боже:

Еще молимся о Великом Господине:

Еще молимся о богохранимей стране нашей:

Сотворивый мир и вся, яже в нем, Господи, приими покаяние наше и во время потребно посли земли дождь и благорастворение воздухов, умири стихии, да грех наших ради не мучается и страждет тварь, молимтися, услыши и милостивно помилуй.

Делом гордых противящийся, Господи, дела рук наших исправи, да не обратятся на главы наша и не погубят ны беды и напасти, но призри на смирение наше и низпосли благодать и мир, молимтися услыши и милостивно помилуй.

Да не страждет лихоимств и беззаконий ради наших творение Твое, Господи, но да сохранится неврежденно от всех навет вражиих, молимтися, услыши и помилуй.

Еще молимся о еже не помянути беззаконий и неправд людей Своих, и отвратити от нас весь гнев Свой, праведно на ны движимый, и не погубити мир сей гладом, жаждею и иными бедами, но сохранити его и нас пощадити, молимтися услыши и помилуй.

Услыши ны, Боже:

Молитва о благостоянии мира

Благословен еси, Господи, Боже Вседержителю, сотворивый небо и землю со всею лепотою их, просветивый день светом солнечным и нощь уяснивый зарями огненными, всякия твари Творче, создавый от земли человека, отпавшаго же и предавшаго Тя, наздавый паки Честною Кровию Единороднаго Сына Твоего!

Призри с Небесе, Боже, и виждь, яко сетует земля, и древеса и былие изчезают, зверие и скоти, и птицы небесныя погибают за нечестие живущих на ней. Сего ради в покаянии припадаем и вопием Ти, да не погубиши мир Твой и нас со беззаконьми нашими, но даруй обращение безумным сыном человеческим и спасение им и твари им покоренной.

Благословен еси, Господи, потопом омывый при Ное грех человеческий! Даруй нам потоки слезныя и омовение скверн наших, да обратимся от злых дел, хищений и неправд наших, во еже хранити достояние Твое.

Благословен еси, Господи, Боже Вседержителю, при Лоте попаливый мерзости Содомския и Гоморрския и очистивый Землю Обетованную от скверн их! Даруй исправление извращенным и стропотным умам и сердцем человеческим, да познают путь Твой.

Благословен еси, Господи Боже Вседержителю, Иже пришествием Возлюбленнаго Сына Твоего обновивый и очистивый всю тварь! Даруй, да уверуют людие всем сердцем и прославят Тя и Единороднаго Сына Твоего и Утешителя Духа Святаго, да человеки и стихиями и всею тварию славится пречестное и великолепое Имя Святыя Троицы во веки веков. Аминь.

Ина молитва

Господи, Боже Вседержителю, Содетелю и Творче всяческих, покрываяй водами превыспренняя Своя, всю землю древесы многовидными и животными различными наполнивый, и животворяяй ю, да вся тварь благодарит Тя, Изряднохудожника. Ты еси Иже и человека сотворивый по образу и подобию Твоему, и в мире сем поставивый, во еже возделывати и хранити его.

Не отврати лица Твоего и ныне, Господи Человеколюбче, зря мир Твой расхищаемь от беззаконий и страстей наших. Яко сетует земля, древеса и былие исчезают, зверие и скоти, и птицы небесныя погибают за нечестие сынов человеческих.

Молимся Ти, Всемилосердый Боже, помилуй ны, исполни сердца наша светом Твоего богоразумия и приими покаяние наше, да возделываем мир Твой во благо душам и телесем нашим и во славу Пресвятаго Имени Твоего, Тебе бо подобает всякая слава, честь и поклонение Отцу и Сыну и Святому Духу ныне и присно и во веки веков. Аминь.

Премудрость.

Пресвятая Богородице, спаси нас.

Честнейшую Херувим:

Прочая и обычный (малый) отпуст.

* * *

9

Если моление возносится о болящих, которые, как говорят, ходят на своих ногах, а не лежат все время, слова «на одре» выпустить.

10

Канон сей в дониконовских канонниках. Он перепечатан в «Русском Иноке» и отдельно.

11

16 октября. Врач.

12

28 января. Первый устроитель больниц на Руси.

13

1 июня.

14

7 августа.

15

1 июля.

16

1 ноября.

17

28 января, 28 июня.

18

27 июля.

19

20 июля.

20

27 июня.

21

16 августа.

22

12 августа.

23

6 мая.

24

Если молебен совершается пред поездкой для переселения, или когда не предполагается обратного возвращения, слова о возвращени опустить.

25

Если моление возносится о находящихся уже в пути, слова «путешествовати хотящих» заменить словом «путешествующих (путешествующего, путешествующей)».

26

Если молебен совершается в воскресный день или в другие дни, когда коленопреклонения отменяются, эти слова опустить.

27

Если молебен совершается в воскресный день или в другие дни, когда коленопреклонения отменяются, эти слова опустить.

28

Сопутствовали Младенцу Христу во время бегства в Египет.

29

Сопутствовали Младенцу Христу во время бегства в Египет.

30

На пути в Еммаус имели спутником воскресшаго Христа.

31

Имел спутником Ангела. См. книгу Товита.

32

Вывел из татарского плена многих русских пленников и сопутствовал им при возвращении в Русскую землю.

33

Если молебен совершается пред поездкой для переселения, или когда не предполагается обратного возвращения, слова о возвращени опустить.

34

Если моление возносится о находящихся уже в пути, слова «по водам плыти восхотевших» заменить словами «по водам плавающих» (плавающаго, плавающую).

35

Если моление возносится о находящихся уже в пути, выражение «к плаванию устремляющихся заменить выражением: «в плавании сущих».

36

Если молебен совершается в храме, а не на самом корабле или на пристани вблизи корабля или лодки, слова заключенные в скобки опустить.

37

Если молебен совершается пред поездкой для переселения, или когда не предполагается обратного возвращения, слова о возвращени опустить.

38

Если молебен совершается в воскресный день или в другие дни, когда коленопреклонения отменяются, эти слова опустить.

39

Если молебен совершается пред поездкой для переселения, или когда не предполагается обратного возвращения, слова о возвращени опустить.

40

Чудесно спасен Господом от потопления.

41

Поморы считают его покровителем мореплавателей.

42

Чудесно спасен от потопления.

43

Спутники мореплавателей.

44

Если молебен совершается в храме, а не на самом корабле или на пристани вблизи корабля или лодки, слова заключенные в скобки опустить.

45

Если молебен совершается пред поездкой для переселения, или когда не предполагается обратного возвращения, слова о возвращени опустить.

46

Если молебен совершается пред поездкой для переселения, или когда не предполагается обратного возвращения, слова о возвращени опустить.

47

Если моление возноситя о находящихся уже в пути, выражение «шествовати хотящих» заменить выражением «шествующих» (шествующаго, шествующей).

48

Если моление возноситя о находящихся уже в пути, выражение «шествовати хотящих» заменить выражением «шествующих» (шествующаго, шествующей).

49

Если моление возноситя о находящихся уже в пути, выражение «шествовати хотящих» заменить выражением «шествующих» (шествующаго, шествующей).

50

Если моление возноситя о находящихся уже в пути, выражение «шествовати хотящих» заменить выражением «шествующих» (шествующаго, шествующей).

51

Если моление возноситя о находящихся уже в пути, выражение «шествовати хотящих» заменить выражением «шествующих» (шествующаго, шествующей).

52

Если моление возносится о находящихся уже в пути, выражение «устремляющихся» заменить выражением «устремившихся» (устремившагося, устремившуюся).

53

Если молебен совершается пред поездкой для переселения, или когда не предполагается, обратного возвращения, слова о возвращении опустить.

54

Если молебен совершается пред поездкой для переселения, или когда не предполагается, обратного возвращения, слова о возвращении опустить.

55

Если моление возноситя о находящихся уже в пути, выражение «шествовати хотящих» заменить выражением «шествующих» (шествующаго, шествующей).

56

Если моление возносится о находящихся уже в пути, выражение «устремляющихся» заменить выражением «устремившихся» (устремившагося, устремившуюся).

57

Если молебен совершается пред поездкой для переселения, или когда не предполагается, обратного возвращения, слова о возвращении опустить.

58

Если молебен совершается пред поездкой для переселения, или когда не предполагается, обратного возвращения, слова о возвращении опустить.

59

Если молебен совершается пред поездкой для переселения, или когда не предполагается, обратного возвращения, слова о возвращении опустить.

60

25 сентября, 5 июля. Сам в детстве неуспевавший в грамоте и чудесно наученный – помощник учащимся.

61

4 сентября.

62

30 января.

63

27 октября.

64

1 июня. Первый ученый врач на Руси.

65

1 июня.

66

В детстве был скрываем от Ирода, окончил жизнь мученически в темнице.

67

6 мая, Многострадальный, образец терпения (Иак. 7).

68

20 июля. Ревнитель, скрывался от преследования, питатель гладных.

69

3 февраля. Как приявший на руки Господа, имеет велие дерзновение. См. житие прп. Петра Афонскаго.

70

Дважды чудесно изведен из темницы (Деян. 5, 18–19; 12, 3–7).

72

27 декабря, 2 августа. (Деян. 11, 9–60). Первый повторил слова Господа о врагах: не постави им греха сего.

73

25 ноября. Папа Римский, был сослан в крымские каменоломни.

74

18 января, 2 мая. Архиепископ Александрийский, всю жизнь подвергался преследованиям, пять раз удалялся с кафедры.

75

13 ноября, 27 января. Дважды был удален с кафедры, скончался на пути в изгнание со словами: «Славу Богу за все».

76

23 января. Епископ Анкирский. Четыре седмицы лет (28 лет) был в ссылках, изгнаниях, заточениях и убит во время совершения литургии.

77

22 декабря. Узорешительница, много помогала узникам, потом сама была заключена в темницу и скончалась мученически.

78

17 февраля, 12 мая. Патриарх всея России. «Темницею и гладом изнуряем, даже до смерти верен пребыл» (кондак), помощник узникам.

79

6 декабря, 9 мая. Архиепископ Мир Ликийских, скорый помощник сущим в скорбях.

80

2 октября, 12 июня. Кашинская, многоскорбная княгиня-праведница.

81

19 мая. Князь Угличский, во иноцех Игнатий. С раннего детства был заключен в Вологде в темницу, в которой провел всю жизнь, в ней и скончался в глубокой старости.

82

7 августа. Печерский, Многоболезненный.

83

20 сентября. Плакида, претерпел многие скорби о разлучении с близкими.

84

26 января. Скорби о разлучении друг от друга претерпевше, остном сродства уязвляемии, мучеником уподобишася (канон).

85

12 ноября. Архиепископ Александрийский. Милостивый.

86

1 декабря. Милостивый.

87

2 января. Муромская.

88

27 июня. Странноприимец.

89

30 декабря. Сиропитатель.

90

Риза Господня с 1625 года находится в Московском Успенском соборе. Положение ея празднуется 10 июля.

91

8 ноября, 6 сентября. Русский народ особенно почитает Архангела Михаила, как новый Израиль, считая его своим нарочитым покровителем. Поэтому изображение Архангела было в гербе матери городов русских, Киева.

92

30 ноября. Проповедывал по берегам Черного моря. Был на горах киевских.

93

10 мая. Проповедывал на Кавказских берегах Черного моря, в Абхазии.

94

11июня, 25 августа. Пострадал в Баку.

95

16 ноября. Был в Алма-Ате.

96

6 мая. В г. Желобаде (Сpедняя Азия) его могила весьма почитаемая.

97

20 июля. Особливо почитается русским народом.

98

23 апреля. Его изображение, как покровителя русскаго народа, было в государственном гербе.

99

26 октября. Отечестволюбец словенских народов. Его изображение на гробовой доске было во Владимирском Дмитриевском соборе. Теперь оно в Московском Успенском соборе.

100

4 декабря. Ея святые мощи в Киевском Михайловском монастыре.

101

13 ноября, 27 января. Скончался на пути в ссылку на Кавказ.

102

9 декабря, 9 мая. По великой любви к нему русского народа стал нашим, Русским святым.

103

7 марта.

104

25 ноября. Был сослан в Крымские каменоломни, где мученически скончался.

105

14 апреля. Был в ссылке на Кавказе.

106

6 февраля. При нем было первое крещение Руси – князей Аскольда и Дира.

107

15 декабря. Сурож – ныне Судак в Крыму.

108

21 января, 13 августа. Был сослан в страну Лазов в Закавказье.

109

Если сие последование совершается в воскресный день или иные дни, когда коленопреклонения отменяются, эти слова опустить.

110

Если благодарственное молебное пение совершается в день рождения или по случаю годовщины брака, пострижения в монашество, или хиротонии, настоящее прошение может быть изменено:

О еже не возгнушатися благодарением нашим о благодеяниях на раба Божия (рабу Божию) (имя рек) в мимошедшия дни жизни его (ея) (в дни диаконства, или священства или иночества его; или на рабов Божиих имя рек во дни супружества их) излитыя, егоже во смиренном сердце приносим, но яко кадило благовонное и всесожжение тучное благоприятное Ему да будет, Господу помолимся.

111

Если благодарение возносится за избавление от опасности или болезни, на каноне припев: Слава Тебе Боже, Спасителю наш.

Катавасия: Слава Тебе Боже, Спасителю наш, за великия Твои милости на нас излиянныя, за нихже благодарение приносяще, Тя яко Спасителя и Благодетеля нашего славим, хвалим, поем и величаем.

112

Если благодарение возносится за избавление от опасности или болезни, на каноне припев: Слава Тебе Боже, Спасителю наш.

Катавасия: Слава Тебе Боже, Спасителю наш, за великия Твои милости на нас излиянныя, за нихже благодарение приносяще, Тя яко Спасителя и Благодетеля нашего славим, хвалим, поем и величаем.

113

Если благодарственное молебное пение совершается в день рождения или по случаю годовщины брака, пострижения в монашество, или хиротонии, настоящее прошение может быть изменено:

Благодаряще со страхом и трепетом, яко раби недостойнии Твоему благосердию, Спасе и Владыко наш Господи, о Твоих благодеяниях, ихже излиял еси изобильно на рабов Твоих (раба Твоего, рабу Твою) (имя рек) в мимошедшие дни жизни его (ея) (в дни диаконства его, священства его, иночества его, супружества их) и припадаем и славословие Тебе, яко Богу, приносим, и умильно вопием: избави и на будущее время от всех бед рабов Твоих (раба Твоего, рабу Твою) и всегда яко Милостив исполняй ко благу желание их (его, ея), прилежно молимся Тебе, услыши и помилуй.

114

Псалом избранный, ектению великую с ея прошениями, Евангелие, молитву и отпуст зри в предыдущем последовании.

115

Псалом избранный, ектению великую с ея прошениями, Евангелие, молитву и отпуст зри в предыдущем последовании.

116

Псалом избранный, ектению великую с ея прошениями, Евангелие, молитву и отпуст зри в предыдущем последовании.

117

Если благодарственное молебное пение совершается в день рождения или по случаю годовщины брака, пострижения в монашество, или хиротонии, настоящее прошение может быть изменено:

Благодаряще со страхом и трепетом, яко раби недостойнии Твоему благосердию, Спасе и Владыко наш Господи, о Твоих благодеяниях, ихже излиял еси изобильно на рабов Твоих (раба Твоего, рабу Твою) (имя рек) в мимошедшие дни жизни его (ея) (в дни диаконства его, священства его, иночества его, супружества их) и припадаем и славословие Тебе, яко Богу, приносим, и умильно вопием: избави и на будущее время от всех бед рабов Твоих (раба Твоего, рабу Твою) и всегда яко Милостив исполняй ко благу желание их (его, ея), прилежно молимся Тебе, услыши и помилуй.

118

Псалом избранный, ектению великую с ея прошениями, Евангелие, молитву и отпуст зри в предыдущем последовании.

119

20 июля. Питатель голодных.

120

10 февраля. Во время голода хлебами из лебеды кормил нуждающихся, которым они казались вкуснее приготовленных из хорошей муки.

121

2 января. Милостивая. Во время голода при Борисе Годунове, раздав все голодающим, питалась хлебами из лебеды и ими оделяла нуждающихся, которым эти хлебы были слаще приготовленных из пшеницы.

122

5 декабря, 9 мая.

123

12 ноября.

124

1 декабря.

125

10 января.

126

27 июня.

127

30 декабря.

128

22 декабря.

129

Неделя по Рождестве Христовом. Удостоился быть питателем Господа.


Комментарии для сайта Cackle

Открыта запись на православный интернет-курс