Чи́нъ бл҃гослове́нїѧ ко́лива, сі́есть, кꙋтїѝ, и҆лѝ варе́ныѧ пшени́цы, съ ме́домъ смѣше́нныѧ и҆ разли́чными сла́дкими ѻ҆вощьмѝ ᲂу҆кра́шенныѧ, и҆ въ че́сть и҆ па́мѧть гдⷭ҇скихъ пра́здникѡвъ, и҆лѝ ст҃ы́хъ бж҃їихъ въ цр҃ковь приноси́мыѧ.

Принесе́нꙋ бы́вшꙋ ко́ливꙋ въ цр҃ковь, а҆́ще на вече́рни, по Ны́нѣ ѿпꙋща́еши: Трист҃о́е. По Ѻ҆́ч҃е на́шъ: тропа́рь. Сла́ва, и҆ ны́нѣ: бг҃оро́диченъ, по гла́сꙋ тропарѧ̀ ст҃а́гѡ. А҆́ще же на лїтꙋргі́и по заамвѡ́ннѣй мл҃твѣ пое́тсѧ тропа́рь и҆ конда́къ ст҃а́гѡ.

Дїа́конъ, покади́въ, глаго́летъ:

Гдⷭ҇ꙋ помо́лимсѧ.

Ли́къ: Гдⷭ҇и, поми́лꙋй.

Сщ҃е́нникъ, ста́въ над̾ ко́ливомъ, глаго́летъ мл҃твꙋ сїю̀:

Всѧ̑ соверши́вый сло́вомъ твои́мъ, гдⷭ҇и, и҆ повелѣ́вый землѝ многоразли̑чныѧ прозѧба́ти плоды̀ въ наслажде́нїе и҆ пи́щꙋ на́шꙋ: и҆́же сѣ́менми трѝ ѻ҆́троки и҆ данїи́ла, сꙋ́щыѧ въ вавѷлѡ́нѣ, сластнопита́нныхъ свѣ́тлшыѧ показа́вый, са́мъ, всебл҃гі́й цр҃ю̀, и҆ сѣ́мена сїѧ̑ съ разли́чными плѡды̑ бл҃гословѝ, и҆ ѿ ни́хъ вкꙋша́ющыѧ ѡ҆ст҃ѝ, ꙗ҆́кѡ въ сла́вꙋ твою̀, и҆ въ че́сть ст҃а́гѡ и҆́мⷬ҇къ сїѧ̑ предложи́шасѧ ѿ твои́хъ рабѡ́въ, и҆ въ па́мѧть во бл҃гочести́вѣй вѣ́рѣ сконча́вшихсѧ: пода́ждь же, бл҃же, бл҃гоꙋкраси́вшымъ сїѧ̑ и҆ па́мѧть соверша́ющымъ, всѧ̑ ꙗ҆̀же ко сп҃се́нїю прошє́нїѧ и҆ вѣ́чныхъ твои́хъ бла́гъ наслажде́нїе, мл҃твами пречⷭ҇тыѧ влⷣчцы на́шеѧ бцⷣы и҆ приснодв҃ы мр҃і́и, и҆ ст҃а́гѡ и҆́мⷬ҇къ, є҆гѡ́же и҆ па́мѧть соверша́емъ, и҆ всѣ́хъ ст҃ы́хъ твои́хъ: ꙗ҆́кѡ ты̀ є҆сѝ бл҃гословлѧ́ѧй и҆ ѡ҆сщ҃а́ѧй всѧ́чєскаѧ, бж҃е на́шъ, и҆ тебѣ̀ сла́вꙋ возсыла́емъ, безнача́льномꙋ ѻ҆ц҃ꙋ̀, со є҆диноро́днымъ твои́мъ сн҃омъ, и҆ прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.

Ли́къ: А҆ми́нь.

И҆ а҆́ще на вече́рни, дїа́конъ: Премꙋ́дрость. Ли́къ: Бл҃гословѝ. Сщ҃е́нникъ: Сы́й бл҃гослове́нъ: и҆ прѡ́чаѧ до ѿпꙋ́ста.

А҆́ще же на лїтꙋргі́и, пое́тъ ли́къ: Бꙋ́ди и҆́мѧ гдⷭ҇не: три́жды, и҆ ѱало́мъ: Бл҃гословлю̀ гдⷭ҇а на всѧ́кое вре́мѧ:

Разда́въ же а҆нті́дѡръ, сщ҃е́нникъ твори́тъ ѡ҆бы́чный ѿпꙋ́стъ лїтꙋргі́и.


Источник: Служебник. - М.: Издательский Совет Русской Православной Церкви, 2003. - 464 с. ISBN 5-94625-063-9

Комментарии для сайта Cackle