Неделя первая торжества Православия

В неделю вечера

поставим стихов 10, и глаголем стихиры Осмогласника 4, со стиховны вечерни и утрени; и Триоди подобны господина Иосифа.

Глас 4.

Подобен: Дал еси́ зна́мение:

Стих: Аще беззакония назриши, Господи, Господи, кто постоит? / я́ко у Тебе очище́ние есть.

Даждь ми умиление, / и злых отчуждение, / и совершенное исправле́ние, / в стра́сти теле́сней ны́не погруже́ному, / и отдале́ному от Тебе́ Бо́же Всецарю́, / и ниотку́дуже упова́ния иму́щу; / и спаси́ мя блу́днаго за мно́гую бла́гость, // Иису́се всеси́льне, Спа́се душ на́ших.

Стих: Имене ра́ди Твоего́ потерпе́х Тя Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

Моисе́й ди́вный, / посто́м очи́щься, / ви́де жела́емаго. / Сему́ у́бо поревнова́вши смире́нная душе́ моя́, / потщи́ся в день воздержа́ния от злых очи́ститися, / я́ко да Го́спода даю́щаго Тебе́ оставле́ние, / и очище́ние и избавле́ние, // у́зриши су́щаго Блага́го и Человеколюби́ваго.

Другий кир Феодора, глас 6:

Подобен: Арха́нгельски:

Стих: От стра́жи у́тренния до но́щи, от стра́жи у́тренния, / да упова́ет Изра́иль на Го́спода.

Постов ныне двоеседмичие светло начнем, / совершающее день от дне бра́тие, / колесни́цу о́гненну соде́лавше нам, / я́коже Илия́ Фесви́тянин, / четы́ре вели́кия доброде́тели, / ум возвы́сим безстра́стием, / плоть вооружи́м чистото́ю, // теку́ще и побежда́юще врага́.

И Минеи стихиры рядовому святому, 3. Аще имать святый, Слава: стихиру самогласну. Аще ли несть, Слава, и ныне, Богородичен во глас Минеи, от менших. Вход с кадильницею. Све́те ти́хий:

Прокимен, глас 8: Дал еси́ достоя́ние / боя́щимся Тебе́ Го́споди.

Стих: От коне́ц земли́ к Тебе́ воззва́х.

Стих: Покры́юся в кро́ве кри́л Твои́х.

Стих: Та́ко воспою́ Имени Твоему́ во ве́ки.

И паки высочайшим гласом: Дал еси́ достоя́ние:

Сподо́би Го́споди: и ектения просительная.

На стиховне стихиры самогласны, глас 8:

Прииди́те, очи́стим себе́ ми́лостынями и щедро́тами убо́гих, / не трубя́ще, ни явля́юще на́ше благотворе́ние, / да не уве́сть шу́ица десни́цы де́ло, / да не расточи́т тщесла́вие плод ми́лостыни, / но в та́йне та́йная ве́дущему воззове́м: / Отче, оста́ви прегреше́ния на́ша, // я́ко Человеколю́бец.

Стих: К Тебе́ воздвиго́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́; та́ко о́чи на́ши ко Го́споду Бо́гу на́шему, / до́ндеже уще́дрит ны.

Паки таже стихира.

Стих: Поми́луй нас, Го́споди, поми́луй нас, яко по мно́гу испо́лнихомся уничиже́ния; наипа́че напо́лнися душа́ на́ша поноше́ния гобзу́ющих / и уничиже́ния го́рдых.

Мученичен:

Му́ченицы Госпо́дни, / вся́ко ме́сто освяща́ете, / и всяк неду́г врачу́ете; / и ны́не моли́те, изба́витися се́тей вра́жиих // душа́м на́шим, мо́лимся.

Сла́ва: святаго Минеи, аще есть. И ны́не: Богородичен, по гласу Минеи. Аще же ни, Слава, и ныне: Богородичен, глас тойже:

Небе́сная пою́т Тя, / обра́дованная Ма́ти безневе́стная, / и мы славосло́вим неизсле́дованное Твое́ рождество́, Богоро́дице, // моли́ спасти́ся душа́м на́шим.

Посем: Ныне отпущаеши: И прочее последование, яко в сыропустную неделю указуяся, зри стр. выше.