ID=7363
date=0--8
Четверопеснец господина Космы, глас 8
Песнь 6
Любо́вь Тебе́ в Вифа́нию, Го́споди, отведе́ к Ла́зарю, / и сего́ уже́ смердя́ща воскреси́л еси́ я́ко Бог, / и от уз а́довых спасл еси́.
Ма́рфа у́бо отча́яшеся Ла́заря, я́ко ви́де четверодне́вна, / Христо́с же истле́вшаго воскреси́ я́ко Бог, / и к жи́зни преста́ви глаго́лом.
Песнь 7
Прослези́вся я́ко челове́к, Ще́дре, / воскреси́л еси́ я́ко Бог су́щаго во гро́бе, / и разре́шся от а́да Ла́зарь взыва́ше: / благослове́н еси́ Го́споди Бо́же во ве́ки.
Изы́де пово́йми обвя́зан, / про́пасти а́да же и тьмы убе́г Влады́чним сло́вом, Ла́зарь взыва́я: / благослове́н еси́ Го́споди Бо́же во ве́ки.
Песнь 8
Я́ко Па́стырь а́гнца взыска́л еси́, / от во́лка лю́таго губи́теля восхи́тив, / растле́вша обнови́л еси́, пою́ща Тебе́: / по́йте и превозноси́те во вся ве́ки.
Я́ко Челове́к гро́ба взыска́л еси́, / ме́ртваго я́ко Соде́тель воскреси́л еси́, / повеле́нием Твои́м Влады́чним, Его́же ад ужасе́ся, / вопию́ща Тебе́: по́йте и превозноси́те во вся ве́ки.
Песнь 9
Лю́дие ви́девше ходя́ща мертвеца́ четверодне́вна, / удиви́вшеся чудеси́, вопия́ху Изба́вителю, / Бо́га Тя в пе́снех велича́юще.
Предуверя́я сла́вное воста́ние Твое́, о Спа́се мой, / ме́ртва четверодне́вна, из а́да свобожда́еши Ла́заря, / пе́сньми Тя велича́юща.