Последование (текст службы) 24 июля 2026. Пятница. Равноап. Ольги, вел. княгини Российской.

Полный текст службы 24 июля для клироса

Файлы для скачивания

Великая Вечерня (приходская)

24 июля 2026. Пятница. Равноап. Ольги, вел. княгини Российской. Вечерня (ворд)

24 июля 2026. Пятница. Равноап. Ольги, вел. княгини Российской. Вечерня (PDF)

Полиелейная Утреня (приходская), 1 час

24 июля 2026. Пятница. Равноап. Ольги, вел. княгини Российской. Утреня 1 час (ворд)

24 июля 2026. Пятница. Равноап. Ольги, вел. княгини Российской. Утреня 1 час (PDF)

3,6 час. Литургия.

24 июля 2026. Пятница. Равноап. Ольги, вел. княгини Российской. 3,6 час. Литургия. (ворд)

24 июля 2026. Пятница. Равноап. Ольги, вел. княгини Российской. 3,6 час. Литургия. (PDF)

 

Составить свой вариант службы можно здесь

Текст службы 24 июля 2026 года онлайн

24 июля 2026. Пятница. Равноап. Ольги, вел. княгини Российской.

Великая Вечерня (приходская)

Священник произносит начальный возглас:

Благослове́н Бог наш всегда́, ны́не и при́сно, и во ве́ки веко́в.

Чтец: Ами́нь. Сла́ва Тебе́, Бо́же на́ш, сла́ва Тебе́.

Царю́ небе́сный, Уте́шителю, Ду́ше и́стины, И́же везде́ сы́й и вся́ исполня́яй, Сокро́вище благи́х и жи́зни Пода́телю: прииди́ и всели́ся в ны́, и очи́сти ны́ от вся́кия скве́рны, и спаси́, Бла́же, ду́шы на́шя.

Святы́й Бо́же, Святы́й Кре́пкий, Святы́й Безсме́ртный, поми́луй на́с. (три́жды, с покло́ны). Сла́ва Отцу́, и Сы́ну, и Свято́му Ду́ху, и ны́не и при́сно, и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́шя; Влады́ко, прости́ беззако́ния на́ша; Святы́й, посети́ и исцели́ не́мощи на́шя, и́мене Твоего́ ра́ди.

Го́споди, поми́луй. (три́жды). Сла́ва Отцу́, и Сы́ну, и Свято́му Ду́ху, и ны́не и при́сно, и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́, и на земли́. Хлеб наш насу́щный да́ждь нам днесь, и оста́ви нам до́лги на́шя, я́коже и мы́ оставля́ем должнико́м на́шым; и не введи́ нас во искуше́ние, но изба́ви нас от лука́ваго.

Священник: Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Ами́нь. Го́споди, поми́луй. (12)

Сла́ва Отцу́, и Сы́ну, и Свято́му Ду́ху, и ны́не и при́сно, и во ве́ки веко́в. Ами́нь.

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́ Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Аллилу́иа, аллилу́иа, аллилу́иа, сла́ва Тебе́ Бо́же (трижды).

Ектения великая

Диакон: Ми́ром Го́споду помо́лимся.

Лик: Го́споди, поми́луй. (на каждое прошение)

Диакон: О свы́шнем ми́ре и спасе́нии душ на́ших, Го́споду помо́лимся.

Диакон: О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

1 антифон 1 кафизмы («Блажен муж»)

Блаже́н муж, и́же не и́де на сове́т нечести́вых. Аллилуия (трижды).

Я́ко весть Госпо́дь путь пра́ведных, и путь нечести́вых поги́бнет. Аллилуия (трижды).

Работайте Господеви со страхом и радуйтеся Ему с трепетом. Аллилуия (трижды).

Блажени вси надеющиися Нань. Аллилуия (трижды).

Воскресни, Господи, спаси мя, Боже мой. Аллилуия (трижды).

Господне есть спасение и на людех Твоих благословение Твое. Аллилуия (трижды).

Слава Отцу и Сыну и Святому Духу, и ныне и присно и во веки веков. Аминь. Аллилуия (трижды).

Аллилуиа, аллилуиа, аллилуиа. Слава Тебе, Боже. (Трижды).

Ектения малая

Диакон: Па́ки и па́ки, ми́ром Го́споду помо́лимся.

Лик: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: Я́ко Твоя́ держа́ва, и Твое́ есть ца́рство, и си́ла, и сла́ва, Отца́ и Сы́на и Свята́го Ду́ха, ныне, и при́сно, и во ве́ки веко́в.

Лик: Ами́нь.

Стихиры на «Господи, воззвах»

Канонарх: Глас 4, Го́споди, воззва́х к Тебе́, услы́ши мя.

Лик: Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ же́ртва вече́рняя. // Услы́ши мя, Го́споди.

равноап. кнг. Ольги на 6

На 6, cтих: А́ще беззако́ния на́зриши, Го́споди, Го́споди, кто постои́т?/

Я́ко у Тебе́ очище́ние есть.

Я́ко со́лнце, возсия́ нам/ пресла́вная па́мять твоя́, О́льго Богому́драя,/ ма́ти князе́й Росси́йских,/ Христо́ва мизи́ница,/ апо́стольским уче́нием воспита́на,/ возмогла́ еси́ на куми́ры,/ па́че же на диа́вола,/ си́лою Свята́го Ду́ха просвеща́ема,/ от тьмы неразу́мия всю страну́/ и лю́ди к Бо́гу привела́ еси́,// Его́же моли́ о творя́щих твою́ па́мять.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/

упова́ душа́ моя́ на Го́спода.

Я́ко со́лнце, возсия́ нам/ пресла́вная па́мять твоя́, О́льго Богому́драя,/ ма́ти князе́й Росси́йских,/ Христо́ва мизи́ница,/ апо́стольским уче́нием воспита́на,/ возмогла́ еси́ на куми́ры,/ па́че же на диа́вола,/ си́лою Свята́го Ду́ха просвеща́ема,/ от тьмы неразу́мия всю страну́/ и лю́ди к Бо́гу привела́ еси́,// Его́же моли́ о творя́щих твою́ па́мять.

На 4, cтих: От стра́жи у́тренния до но́щи, от стра́жи у́тренния,/

да упова́ет Изра́иль на Го́спода.

В ра́зуме духо́вном,/ и́мже посрами́ла еси́ врага́, прельсти́вшаго Е́ву,/ и сего́ ору́жие сломи́ла еси́,/ богосажде́нный рай церко́вный создала́ еси́,/ в не́мже дре́во живо́тное, Крест, водрузи́ла еси́,/ и трапе́зу Бо́жия бра́шна иму́щи,/ исто́чник неисчерпа́емый кро́ве Христо́вы,/ его́же пи́вши, нетле́нна пребыва́еши,// за вся ны моля́щися при́сно.

Стих: Я́ко у Го́спода ми́лость, и мно́гое у Него́ избавле́ние,/

и То́й изба́вит Изра́иля от все́х беззако́ний его́.

В ра́зуме духо́вном,/ и́мже посрами́ла еси́ врага́, прельсти́вшаго Е́ву,/ и сего́ ору́жие сломи́ла еси́,/ богосажде́нный рай церко́вный создала́ еси́,/ в не́мже дре́во живо́тное, Крест, водрузи́ла еси́,/ и трапе́зу Бо́жия бра́шна иму́щи,/ исто́чник неисчерпа́емый кро́ве Христо́вы,/ его́же пи́вши, нетле́нна пребыва́еши,// за вся ны моля́щися при́сно.

На 2, cтих: Хвали́те Го́спода вси́ язы́цы,/

похвали́те Его́ вси́ лю́дие.

Духо́вно возвесели́теся, росси́йстии концы́,/ па́мять чту́ще Ольги Богому́дрыя:/ мо́лится бо вы́ну ко Христу́/ с чудотво́цами и му́чениками,/ помо́щницу иму́щи Святу́ю Богоро́дицу,/ изба́витися от бед и печа́лей/ ве́рою пою́щим ю́// и кла́няющимся ра́це нетле́ннаго ея́ те́ла.

Стих: Я́ко утверди́ся ми́лость Его́ на на́с,/

и и́стина Госпо́дня пребыва́ет во ве́к.

Духо́вно возвесели́теся, росси́йстии концы́,/ па́мять чту́ще Ольги Богому́дрыя:/ мо́лится бо вы́ну ко Христу́/ с чудотво́цами и му́чениками,/ помо́щницу иму́щи Святу́ю Богоро́дицу,/ изба́витися от бед и печа́лей/ ве́рою пою́щим ю́// и кла́няющимся ра́це нетле́ннаго ея́ те́ла.

Сла́ва, глас 6:

Слава Отцу́, и Сы́ну, и Свято́му Ду́ху.

Прииди́те, ро́ди росси́йстии,/ пе́сньми восхва́лим Ольгу прему́друю,/ прииди́те, ра́зумом богатя́щиися,/ ра́зум свой в послуша́ние ве́ры/ приводи́ти от нея́ научи́теся,/ прииди́те, му́жие, честь жене́ пресла́вней возда́йте,/ прииди́те, жены́, му́жеству ея́ вели́кому подража́йте,/ прииди́те, владя́щии, и уразуме́йте/ вся земна́я превосходя́щую сла́ву нетле́нную,/ прииди́те, вси вну́цы ея́,/ и в день ея́ све́тло восторжеству́йте,/ мо́лится бо те́пле ко Го́споду,// е́же просвети́ти ду́ши на́ша.

И ныне, глас 6:

и ны́не, и при́сно, и во ве́ки веко́в. Ами́нь.

Кто Тебе́ не ублажи́т, Пресвята́я Де́во?/ кто ли не воспое́т Твоего́ Пречи́стаго Рождества́?/ безле́тно бо от Отца́ возсия́вый Сын Единоро́дный,/ То́йже от Тебе́, Чи́стыя, про́йде,/ неизрече́нно вопло́щся:/ естество́м Бог Сый/ и естество́м быв Челове́к нас ра́ди;/ не во двою́ лицу́ разделя́емый,/ но во двою́ естеству́/ несли́тно познава́емый./ Того́ моли́, Чи́стая Всеблаже́нная,// поми́ловатися душа́м на́шим.

Вечерняя песнь Сыну Божию

Све́те Ти́хий святы́я сла́вы,/ Безсме́ртнаго, Отца́ Небе́снаго,/ Свята́го Блаже́ннаго, Иису́се Христе́./ Прише́дше на за́пад со́лнца,/ ви́девше свет вече́рний,/ пое́м Отца́, Сы́на и Свята́го Ду́ха, Бо́га./ Досто́ин еси́ во вся времена́/ пе́т бы́ти гла́сы преподо́бными,/ Сы́не Бо́жий, живо́т дая́й,/ те́мже мир Тя сла́вит.

Диакон: Во́нмем.

Священник: Мир всем.

Лик: И ду́хови твоему́.

Прокимен

В четверток вечера, глас 6:

Диакон: Прему́дрость. Во́нмем. Проки́мен, глас 6.

По́мощь моя́ от Го́спода, / сотво́ршаго не́бо и зе́млю.

Лик: По́мощь моя́ от Го́спода, / сотво́ршаго не́бо и зе́млю.

Диакон: Возведо́х о́чи мои́ в го́ры, отню́дуже прии́дет по́мощь моя́.

Лик: По́мощь моя́ от Го́спода, / сотво́ршаго не́бо и зе́млю.

Диакон: По́мощь моя́ от Го́спода

Лик: Сотво́ршаго не́бо и зе́млю.

Чтение паремий

Диакон: Прему́дрость.

Чтец: Суде́й Изра́илевых чте́ние.

Диакон: Во́нмем.

И приложи́ша сы́нове изра́илевы сотвори́ти зло́е пред Го́сподем, и Ао́д у́мре. И отдаде́ их Госпо́дь в ру́ку Иави́на, царя́ Ханаа́нска, и́же ца́рствова во Асо́ре. И воево́да си́лы его́ Сиса́ра, и той живя́ше во Арисо́фе язы́ков. И возопи́ша сы́нове изра́илевы ко Го́споду, я́ко де́вять сот колесни́ц желе́зных бя́ше ему́ и той озло́би Изра́иля зело́ лет два́десять. И Девво́ра, жена́ проро́чица, жена́ Лафидо́фова, сия́ судя́ше Изра́илю в то вре́мя и сия́ живя́ше под фи́ником Девво́ра между́ Ра́мою и между́ Вефи́лем, в горе́ Ефре́мли, и восхожда́ху сы́нове изра́илевы к ней та́мо на суд. И посла́ Девво́ра, и призва́ Вара́ка, сы́на Авинее́мля, из Кеде́са Неффали́мова и рече́ к нему́: не запове́да ли тебе́ Госпо́дь, Бог Изра́илев, и по́йдеши в го́ру Фаво́р, и по́ймеши с собо́ю де́сять ты́сящ муже́й от сыно́в Неффали́млих и от сыно́в Завуло́них, и приведу́ к тебе́ в водоте́чь Кисо́нь Сиса́ру, воево́ду си́лы Иави́ни, и колесни́цы его́, и мно́жество вой его́, и преда́м его́ в ру́ки твоя́. И рече́ к ней Вара́к: а́ще по́йдеши со мно́ю, пойду́, и а́ще не по́йдеши со мно́ю, не пойду́, я́ко не вем дне, в о́ньже благоустро́ит Госпо́дь А́нгела со мно́ю. И рече́ Девво́ра к нему́: иду́щи пойду́ с тобо́ю, оба́че веждь, я́ко не бу́дет тебе́ сла́ва на пути́, в о́ньже ты и́деши, поне́же в руку́ же́нску преда́ст Госпо́дь Сиса́ру. И воста́ Девво́ра и по́йде с Вара́ком до Ка́диса. И воззва́ Вара́к Завуло́на и Неффали́ма до Ка́диса, и поидо́ша вслед его́ де́сять ты́сящ муже́й, и и́де с ним Девво́ра. И Хаве́р Кине́й отлучи́ся от Ке́ны и от сыно́в Иова́ва, у́жика Моисе́ова, и потче́ ку́щу свою́ под ду́бом почива́ющих, и́же есть при Кеде́се. И возвести́ша Сиса́ре, я́ко взы́де Вара́к, сын Авинее́мль, на го́ру Фаво́р. И созва́ Сиса́ра вся колесни́цы своя́, де́вять сот колесни́ц желе́зных, и вся лю́ди, и́же с ним, от Арисо́фа язы́ков в водоте́чь Кисо́нь. И рече́ Девво́ра к Вара́ку: воста́ни, я́ко сей день, в о́ньже предаде́ Госпо́дь Сиса́ру в ру́ку твою́, зане́ Госпо́дь изы́дет пред тобо́ю. И сни́де Вара́к с горы́ Фаво́р и де́сять ты́сящ муже́й вслед его́. И сотре́ Госпо́дь Сиса́ру и вся колесни́цы его́ и весь полк его́ острие́м меча́ пред Вара́ком. И сни́де Сиса́ра с колесни́цы своея́ и побеже́ нога́ми свои́ми. И Вара́к гоня́й вслед колесни́ц его́ и вслед полка́, да́же до дубра́вы язы́ков. И паде́ весь полк Сиса́рин острие́м меча́, не оста́ся ни еди́н. И Сиса́ра убеже́ нога́ми свои́ми в ку́щу Иаи́ли, жены́ Хаве́ра Кине́ева, я́ко мир бя́ше между́ Иави́ном, царе́м Асо́рским, и между́ до́мом Хаве́ра Кине́ева. И изы́де Иаи́ль во сре́тение Сиса́ре и рече́ к нему́: уклони́ся, господи́не мой, уклони́ся ко мне, не бо́йся. И уклони́ся к ней в ку́щу, и покры́ его́ оде́ждею свое́ю. И рече́ Сиса́ра к ней: напо́й мя ма́ло воды́, я́ко возжажда́х. И отреши́ мех мле́чный, и напои́ его́, и покры́ его́. И рече́ к ней Сиса́ра: ста́ни во две́рех ку́щи, и бу́дет, а́ще кто прии́дет к тебе́, и вопро́сит тя, и рече́т: есть ли зде муж? И рече́ши: несть. И взя Иаи́ль, жена́ Хаве́рова, кол ку́щный, и взя млат в ру́ку свою́, и вни́де к нему́ ти́хо, и водрузи́ кол во скра́нии его́, и пронзе́ до земли́, и сей, утру́ждся, спа́ше, и и́здше. И се Вара́к, гоня́й Сиса́ру. И изы́де Иаи́ль во сре́тение ему́ и рече́ ему́: прииди́, и покажу́ тебе́ му́жа, его́же ты и́щеши. И вни́де к ней, и се Сиса́ра лежа́ше мертв, и кол во скра́нии его́. И покори́ Госпо́дь Бог в той день Иави́на, царя́ Ханаа́ня пред сы́ны изра́илевыми, и хожда́ше рука́ сыно́в изра́илевых, ходя́щи, и ожесточи́ся на Иави́на, царя́ Ханаа́нска, до́ндеже истреби́ша его́. И воспе́ Девво́ра и Вара́к, сын Авинее́мов, в той день и рече́: внегда́ нача́ти вождо́м во Изра́или, в произволе́нии люди́й, благослови́те Го́спода. Услы́шите, ца́рие, и внуши́те, кня́зи: аз Го́сподеви воспою́ и пою́ Бо́гу Изра́илеву: Го́споди, во исхо́де Твое́м от Сии́ра, внегда́ воздвиза́тися Тебе́ от села́ Едо́мова, земля́ потрясе́ся, и не́бо возмути́ся, и о́блацы иска́паша во́ду. Го́ры подвиго́шася от лица́ Го́спода Елои́, та́я Сина́ от лица́ Го́спода Бо́га Изра́илева. Во дни Самега́ра, сы́на Ана́фова, во дни Иаи́ли, оскуде́ша путие́, и идо́ша в пути́ кри́вы, и идо́ша в пути́ развраще́нны. Оскуде́ша жнву́щии во Изра́или, оскуде́ша, до́ндеже воста́ Девво́ра, до́ндеже воста́ ма́ти во Изра́или, избра́ша бо́ги но́вы, я́ко хлеб я́чен, тогда́ воева́ша гра́ды князе́й, щит не яви́ся, ниже́ копие́ в четы́редесяти ты́сящах во Изра́или. Се́рдце мое́ на учине́нная во Изра́или, си́льнии люди́й, благослови́те Го́спода. Е́здящии на осля́тех бе́лых в полу́дне, и седя́щии на суди́щи, и ходя́щии на пути́ со́нмов, провеща́йте. Глас пле́щущих посреде́ веселя́щихся: та́мо дадя́т пра́вду. Го́споди, пра́вды укрепи́ во Изра́или: тогда́ разыдо́шася во гра́ды своя́ лю́дие Госпо́дни. Воста́ни, воста́ни, Девво́ра; воста́ни, воста́ни, глаго́ли с пе́снию; воста́ни, Вара́че, и плени́ плен твой, сы́не Авинее́мль.

Диакон: Прему́дрость.

Чтец: Иуди́фи чте́ние.

Диакон: Во́нмем.

Оста́ся же Иуди́ф еди́на в шатре́ и Олофе́рн пове́ржен на ло́жи свое́м, бя́ше бо преиспо́лнен вино́м. И рече́ Иуди́ф рабе́ свое́й, да стои́т вне ло́жницы ея́ и да смо́трит исхо́да ея́, я́коже по всяк день, рече́ бо, я́ко изы́ти и́мать на моли́тву свою́ и Ваго́ю глаго́ла по словесе́м сим. И отыдо́ша вси от лица́ ея́, и ни еди́н оста́ся в ло́жнице от ма́ла да́же до вели́ка. И ста́вши Иуди́ф при одре его́, рече́ в се́рдцы свое́м: Го́споди Бо́же всея́ си́лы, при́зри в час сей на дела́ рук мои́х ко возвыше́нию Иерусали́ма, я́ко ны́не вре́мя помоществова́ти насле́дию Твоему́ и соверши́ти начина́ние мое́ ко сокруше́нию враго́в, и́же воста́ша на нас. И приступи́вши к сто́лпнику одра́, и́же бя́ше у главы́ Олофе́рновы, снят меч его́ с него́, и прибли́жившися ко одру́, взя в горсть власы́ главы́ его́, и рече́: укрепи́ мя, Го́споди Бо́же Изра́илев, в день сей. И уда́ри в вы́ю его́ два́жды си́лою свое́ю, и отъя́ главу́ его́ от него́, и отвали́ те́ло его́ от посте́ли, и отъя́ заве́су от столпо́в, и по ма́ле изы́де и предаде́ рабы́ни свое́й главу́ Олофе́рнову. И вложи́ ю́ в меше́ц сне́дей свои́х, и изыдо́сте о́бе ку́пно по обы́чаю своему́ на моли́тву, и проше́дше полк, обыдо́сте дебрь о́ную, и взыдо́сте на го́ру Ветилу́и, и приидо́сте ко врато́м ея́. И рече́ Иуди́ф издале́ча стерегу́щим на врате́х: отве́рзите ны́не, отве́рзите врата́, с на́ми Бог, Бог наш, сотвори́ти еще́ кре́пость во Изра́или и си́лу на враги́, я́коже и днесь сотвори́. И бысть, я́ко услы́шаша му́жие гра́да того́ глас ея́, потща́шася сни́ти ко врато́м гра́да своего́ и созва́ша ста́рцев гра́да. И стеко́шася вси от ма́ла да́же до вели́ка, я́ко па́че ча́яния бе им, е́же приити́ ей, и отверзо́ша врата́ и восприя́ша их, и вже́гше огнь во свеще́ние, окружи́ша их. Она́ же рече́ к ним гла́сом вели́ким: хвали́те Бо́га, хвали́те, хвали́те Бо́га, И́же не отста́ви ми́лости Своея́ от до́му Изра́илева, но сокруши́ враги́ на́ша руко́ю мое́ю в нощь сию́. И изъе́мши главу́ из мешца́, показа́ и рече́ им: се глава́ Олофе́рна, вождонача́льника си́лы Ассу́рския, и се заве́са, за не́юже лежа́ше во пия́нствах свои́х, и порази́ его́ Госпо́дь руко́ю же́нскою. И жив есть Госпо́дь, и́же сохрани́ мя в пути́ мое́м, и́мже ходи́х, я́ко прельсти́ его́ лице́ мое́ в па́губу его́, и не сотвори́ греха́ со мно́ю во оскверне́ние и срамоту́. И ужасо́шася вси лю́дие зело́, и па́дше, поклони́шася Бо́гу, и ре́ша единоду́шно: благослове́н еси́, Бо́же наш, уничто́живый в день сей враги́ люди́й Твои́х. И рече́ ей Ози́я: благослове́на ты еси́, дщи, Бо́гом Вы́шним па́че всех жен, я́же на земли́, и благослове́н Госпо́дь Бог, И́же созда́ небеса́ и зе́млю, И́же упра́ви тя на сокруше́ние главы́ кня́зя враго́в на́ших. Я́ко не оста́нет наде́жда твоя́ от се́рдца челове́к, помина́ющих кре́пость Бо́жию, да́же до ве́ка, и да сотвори́т тебе́ сия́ Бог в возноше́ние ве́чное, е́же посеща́ти тя во благи́х, за е́же не пощаде́ла еси́ души́ твоея́ смире́ния ра́ди ро́да на́шего, но посо́бствовала еси́ паде́нию на́шему, в правоте́ ходи́вши пред Бо́гом на́шим. И ре́ша вси лю́дие: бу́ди, бу́ди.

Диакон: Прему́дрость.

Чтец: При́тчей чте́ние.

Диакон: Во́нмем.

Жену́ до́блю кто обря́щет, дража́йши есть ка́мения многоце́ннаго такова́я. Дерза́ет на ню се́рдце му́жа ея́, такова́я до́брых коры́стей не лиши́тся, де́лает бо му́жу своему́ блага́я во все житие́, обре́тши во́лну и лен, сотвори́ благопотре́бное рука́ма свои́ма.

Сугубая ектения

Диакон: Рцем вси́ от всея́ души́, и от всего́ помышле́ния на́шего рцем.

Лик: Го́споди, поми́луй.

Диакон: Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.

Лик: Го́споди, поми́луй.

Диакон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй (трижды, на каждое прошение)

Священник: Яко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Молитва при наступлении вечера

Лик: Сподо́би, Го́споди, в ве́чер сей без греха́ сохрани́тися нам./ Благослове́н еси́, Го́споди Бо́же оте́ц на́ших,/ и хва́льно и просла́влено и́мя Твое́ во ве́ки, ами́нь./

Бу́ди, Го́споди, ми́лость Твоя́ на нас, я́коже упова́хом на Тя./ Благослове́н еси́, Го́споди, научи́ мя оправда́нием Твои́м./ Благослове́н еси́, Влады́ко, вразуми́ мя оправда́нием Твои́м./ Благослове́н еси́, Святы́й, просвети́ мя оправда́нии Твои́ми./

Го́споди, ми́лость Твоя́ во век, дел руку́ Твое́ю не пре́зри./ Тебе́ подоба́ет хвала́. Тебе́ подоба́ет пе́ние,/ Тебе́ сла́ва подоба́ет, Отцу́ и Сы́ну и Свято́му Ду́ху,// ны́не и при́сно и во ве́ки веко́в. Ами́нь.

Ектения просительная

Диакон: Испо́лним вече́рнюю моли́тву на́шу Го́сподеви.

Лик: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Ве́чера всего́ соверше́нна, свя́та, ми́рна и безгре́шна у Го́спода про́сим.

Лик: Пода́й, Го́споди. (на каждое прошение)

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: Я́ко благ и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Священник: Ми́р всем.

Лик: И ду́хови твоему́.

Диакон: Главы́ на́ша Го́сподеви прикло́ним.

Лик: Тебе́, Го́споди.

Священник: Бу́ди держа́ва Ца́рствия Твоего́ благослове́на и препросла́влена, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Лик: Ами́нь.

Стихиры на стиховне

равноап. кнг. Ольги на 3

Канонарх: Глас 8, О, пресла́внаго чудесе́.

О, пресла́внаго чудесе́!/ жено́ю па́дший род челове́ческий/ Жено́ю возставля́ет пречу́дно Человеколю́бец Госпо́дь/ и в после́дняя ле́та жену́ посыла́ет/ на обраще́ние ро́да росси́йскаго,/ О́льгу пресла́вную,/ ея́же Креще́нием/ нача́ло полага́ет просвеще́нию страны́ Росси́йския// во спасе́ние душ на́ших.

Стих: Близ Госпо́дь всем, призыва́ющим Его́./

Лик: всем, призыва́ющим Его́ во и́стине.

Ра́дуйся, гра́де богоспаса́емый Ки́еве,/ всем конце́м земли́ на́шея/ свет Христо́в источи́вый/ и пе́рвую уго́дницу в ней показа́вый,/ О́льгу пречестну́ю,/ ра́дуйся, Вышегра́де, насле́дие ея́ честно́е,/ ра́дуйся, жен росси́йских сосло́вие,/ похвалу́ на́шу да́вшее// во спасе́ние душ на́ших.

Стих: Во́лю боя́щихся Его́ сотвори́т./

Лик: и моли́тву их услы́шит, и спасе́т я́.

Возвесели́ся, непло́дная Росси́йская земле́,/ лику́й, нечревоболе́вшая:/ ны́не ражда́еши ча́до твое́ –/ Еле́ну блаже́нную,/ та же призове́т ко Го́споду отца́ на́шего Васи́лия/ и подража́ти себе́ приведе́т ли́ки уго́дников Его́,/ по́двиги свои́ми просла́вити иму́щих/ гра́ды и де́бри твоя́,// во спасе́ние душ на́ших.

Сла́ва, глас 8:

Слава Отцу́, и Сы́ну, и Свято́му Ду́ху.

Ве́лия сла́ва твоя́, и па́мять твоя́ с похвала́ми,/ О́льго прему́драя,/ тщету́ и́долов презре́вши/ и и́стину Ева́нгельскую уразуме́вши,/ в седи́нах ум твой Христу́/ в послуша́ние плени́ла еси́/ и всем родо́м росси́йским/ путь и́стинный живота́ показа́ла еси́,// моли́ о нас Еди́наго Человеколю́бца.

И ныне, глас 8:

и ны́не, и при́сно, и во ве́ки веко́в. Ами́нь.

Безневе́стная Де́во,/ я́же Бо́га неизрече́нно заче́нши пло́тию,/ Ма́ти Бо́га Вы́шняго,/ Твои́х рабо́в мольбы́ приими́, Всенепоро́чная,/ всем подаю́щи очище́ние прегреше́ний,/ ны́не на́ша моле́ния прие́млющи,// моли́ спасти́ся всем нам.

Молитва святаго Симеона Богоприимца

Лик: Ны́не отпуща́еши раба́ Твоего́, Влады́ко,/ по глаго́лу Твоему́ с ми́ром:/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Чтец: Святы́й Бо́же, Святы́й Кре́пкий, Святы́й Безсме́ртный, поми́луй нас (трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй (трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́, и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Священник: Я́ко Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Лик: Ами́нь.

Тропари

Тропарь равноап. кнг. Ольги

Глас 1: Крила́ми богоразу́мия впери́вши твой ум,/ возлете́ла еси́ превы́ше ви́димыя тва́ри,/ взыска́вши Бо́га и Творца́ вся́ческих,/ и, То́го обре́тши, па́ки рожде́ние Креще́нием прия́ла еси́,/ дре́ва живо́тнаго наслажда́ющися, нетле́нна во ве́ки пребыва́еши,// О́льго присносла́вная.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Глас 1: Гаврии́лу веща́вшу Тебе́, Де́во, ра́дуйся,/ со гла́сом воплоща́шеся всех Влады́ка/ в Тебе́, святе́м киво́те,/ я́коже рече́ пра́ведный Дави́д,/ яви́лася еси́ ши́ршая Небе́с,/ поноси́вши Зижди́теля Твоего́:/ сла́ва Все́льшемуся в Тя;/ сла́ва Проше́дшему из Тебе́;// сла́ва Свободи́вшему нас Рождество́м Твои́м.

Диакон: Прему́дрость.

Лик: Благослови́.

Священник: Сый благослове́н Христо́с Бог наш, всегда́, ны́не и при́сно и во ве́ки веко́в.

Лик: Ами́нь. Утверди́, Бо́же,/ святу́ю правосла́вную ве́ру, правосла́вных христиа́н/ во век ве́ка.

Священник: Пресвята́я Богоро́дице, спаси́ нас.

Лик: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Священник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Го́споди, поми́луй (трижды). Благослови́.

Священник глаголет Отпуст

Христо́с И́стинный Бог наш, моли́твами Пречи́стыя Своея́ Ма́тере, равноап. кнг. Ольги, и всех святы́х, поми́лует и спасе́т нас, я́ко Благ и Человеколю́бец.

Многолетие

Лик: Вели́каго господи́на и отца́ на́шего Кири́лла, Святе́йшаго Патриа́рха Моско́вскаго и всея́ Руси́,/ и господи́на на́шего высокопреосвяще́ннейшаго [или́ преосвяще́ннейшаго] и́мярек, митрополи́та [или́ архиепи́скопа, или́ епи́скопа] его́ же есть о́бласть,/ богохрани́мую страну́ на́шу Росси́йскую, вла́сти и во́инство ея́,/ настоя́теля, бра́тию, прихо́жан свята́го хра́ма сего́, и вся правосла́вныя христиа́ны,// Го́споди, сохрани́ их на мно́гая ле́та.

Полиелейная Утреня (приходская)

Священник, начиная каждение у престола:

Благослове́н Бог наш, всегда́, ны́не и при́сно и во ве́ки веко́в.

Чтец: Ами́нь. Сла́ва Тебе́, Бо́же на́ш, сла́ва Тебе́.

Царю́ небе́сный, Уте́шителю, Ду́ше и́стины, И́же везде́ сы́й и вся́ исполня́яй, Сокро́вище благи́х и жи́зни Пода́телю: прииди́ и всели́ся в ны́, и очи́сти ны́ от вся́кия скве́рны, и спаси́, Бла́же, ду́шы на́шя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (Трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Священник: Я́ко Твое́ есть Ца́рство и сила и Слава Отца и Сына и Святого Духа, ныне и присно и во веки веков.

Чтец: Ами́нь.

Го́споди, поми́луй, (12 раз)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Чтец читает двупсалмие; в это время священник совершает полное каждение храма.

Псалом 19

Услы́шит тя Госпо́дь в день печа́ли, защи́тит тя и́мя Бо́га Иа́ковля. По́слет ти по́мощь от Свята́го и от Сио́на засту́пит тя. Помяне́т вся́ку же́ртву твою́, и всесожже́ние твое́ ту́чно бу́ди. Даст ти Госпо́дь по се́рдцу твоему́ и весь сове́т твой испо́лнит. Возра́дуемся о спасе́нии твое́м и во и́мя Го́спода Бо́га на́шего возвели́чимся. Испо́лнит Госпо́дь вся проше́ния твоя́. Ны́не позна́х, я́ко спасе́ Госпо́дь христа́ Своего́, услы́шит его с Небесе́ Свята́го Своего́, в си́лах спасе́ние десни́цы Его́. Си́и на колесни́цах и си́и на ко́нех, мы же во и́мя Го́спода Бо́га на́шего призове́м. Ти́и спя́ти бы́ша и падо́ша, мы же воста́хом и испра́вихомся. Го́споди, спаси́ царя́ и услы́ши ны, во́ньже а́ще день призове́м Тя.

Псалом 20

Го́споди, си́лою Твое́ю возвесели́тся царь и о спасе́нии Твое́м возра́дуется зело́. Жела́ние се́рдца его́ дал еси́ ему́, и хоте́ния устну́ его́ не́си лиши́л его́. Яко предвари́л еси́ его́ благослове́нием благосты́нным, положи́л еси́ на главе́ его́ вене́ц от ка́мене че́стна. Живота́ проси́л есть у Тебе́, и дал еси́ ему́ долготу́ дний во век ве́ка. Ве́лия сла́ва его́ спасе́нием Твои́м, сла́ву и велеле́пие возложи́ши на него́. Яко да́си ему́ благослове́ние во век ве́ка, возвесели́ши его́ ра́достию с лице́м Твои́м. Яко царь упова́ет на Го́спода, и ми́лостию Вы́шняго не подви́жится. Да обря́щется рука́ Твоя́ всем враго́м Твои́м, десни́ца Твоя́ да обря́щет вся ненави́дящия Тебе́. Яко положи́ши их, я́ко пещь о́гненную во вре́мя лица́ Твоего́; Госпо́дь гне́вом Свои́м смяте́т я, и снест их огнь. Плод их от земли́ погуби́ши, и се́мя их от сыно́в челове́ческих. Яко уклони́ша на Тя зла́я, помы́слиша сове́ты, и́хже не возмо́гут соста́вити. Яко положи́ши я хребе́т, во избы́тцех Твои́х угото́виши лице́ их. Вознеси́ся, Го́споди, си́лою Твое́ю, воспое́м и пое́м си́лы Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Святы́й Бо́же, Святы́й Кре́пкий, Святы́й Безсме́ртный, поми́луй нас (трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй (трижды).

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Отче наш, Иже еси́ на Небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́, и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Священник: Я́ко Твое́ есть Ца́рство и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Чтец: Ами́нь.

Чтец: Спаси́, Го́споди, лю́ди Твоя́ и благослови́ достоя́ние Твое́: побе́ды на сопроти́вныя да́руя, и Твое́ сохраня́я Кресто́м Твои́м жи́тельство.

Сла́ва Отцу́ и Сы́ну и Свято́му Ду́ху.

Вознесы́йся на Крест во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же; возвесели́ нас си́лою Твое́ю, побе́ды дая́ нам на сопоста́ты, посо́бие иму́щим Твое́ ору́жие ми́ра – непобеди́мую побе́ду.

И ны́не и при́сно и во ве́ки веко́в. Ами́нь.

Предста́тельство стра́шное и непосты́дное, не пре́зри, Блага́я, моли́тв на́ших, Всепе́тая Богоро́дице; утверди́ правосла́вных жи́тельство, спаси́ ве́рныя лю́ди Твоя́ и пода́ждь им с Небесе́ побе́ду; зане́ родила́ еси́ Бо́га, еди́на Благослове́нная.

Ектения сугубая

Священник: Поми́луй нас, Бо́же, по вели́цей ми́лости Твое́й, молим Ти ся, услыши и помилуй.

Лик: Го́споди, поми́луй (трижды).

Священник: Еще́ мо́лимся о Вели́ком Господи́не и отце́ на́шем, Святе́йшем Патриа́рхе Кири́лле, и о всей во Христе́ бра́тии на́шей.

Лик: Го́споди, поми́луй (трижды).

Священник: Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Лик: Го́споди, поми́луй (трижды).

Священник: Еще́ мо́лимся за всю бра́тию и за вся христиа́ны.

Лик: Го́споди, поми́луй (трижды).

Священник: Яко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь. Именем Госпо́дним благослови́, о́тче.

Священник: Сла́ва Святе́й, и Единосу́щней, и Животворя́щей, и Неразде́льней Тро́ице всегда́, ны́не и при́сно и во ве́ки веко́в.

Лик: Ами́нь.

Шестопсалмие

Чтец: Слава в вы́шних Бо́гу, и на земли́ мир, в челове́цех благоволе́ние. (Трижды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Дважды)

Псалом 3

Го́споди, что ся умно́жиша стужа́ющии ми? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х и спах; воста́х, яко Госпо́дь засту́пит мя.

Псалом 37

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от мене́. Вонми́ в помо́щь мою́, Го́споди спасе́ния моего́.

Псалом 62

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя, я́ко был еси́ Помо́щник мой, и в кро́ве крилу́ Твое́ю возра́дуюся.

Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Аллилу́ия, аллилу́ия, аллилу́ия, сла́ва Тебе́, Бо́же. (Трижды, без поклонов)

Господи помилуй (трижды).

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Псалом 87

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х и в нощи́ пред Тобо́ю. Да вни́дет пред Тя моли́тва моя́, приклони́ у́хо Твое́ к моле́нию моему́.

Псалом 102

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: щедр и ми́лостив Госпо́дь, долготерпели́в и многоми́лостив. Не до конца́ прогне́вается, ниже́ во век вражду́ет, не по беззако́нием на́шим сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на небеси́ угото́ва престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чествия Его́, благослови́, душе́ моя́, Го́спода.

Псалом 142

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й, и не вни́ди в суд с рабо́м Твои́м.

Услы́ши мя, Го́споди, в пра́вде Твое́й, и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Аллилу́ия, аллилу́ия, аллилу́ия, сла́ва Тебе́, Бо́же. (Трижды)

Ектения великая

Диакон: Ми́ром Го́споду помо́лимся.

Лик: Го́споди, поми́луй (на каждое прошение).

Диакон: О свы́шнем ми́ре и спасе́нии душ на́ших, Го́споду помо́лимся.

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

«Бог Господь»

Диакон: Бог Госпо́дь, и яви́ся нам, благослове́н Гряды́й во имя Госпо́дне.

Стих 1: Испове́дайтеся Го́сподеви, я́ко Благ, я́ко в век ми́лость Его.

Глас 1: Бог Госпо́дь, и яви́ся нам, благослове́н Гряды́й во и́мя Госпо́дне.

Стих 2: Обыше́дше обыдо́ша мя, и и́менем Госпо́дним противля́хся им.

Лик: Бог Госпо́дь, и яви́ся нам, благослове́н Гряды́й во и́мя Госпо́дне.

Стих 3: Не умру́, но жив бу́ду, и пове́м дела́ Госпо́дня.

Лик: Бог Госпо́дь, и яви́ся нам, благослове́н Гряды́й во и́мя Госпо́дне.

Стих 4: Ка́мень, Его́же небрего́ша зи́ждущии, Сей бысть во главу́ у́гла, от Го́спода бысть Сей, и есть ди́вен во очесе́х на́ших.

Лик: Бог Госпо́дь, и яви́ся нам, благослове́н Гряды́й во и́мя Госпо́дне.

Тропари

Тропарь равноап. кнг. Ольги

Глас 1: Крила́ми богоразу́мия впери́вши твой ум,/ возлете́ла еси́ превы́ше ви́димыя тва́ри,/ взыска́вши Бо́га и Творца́ вся́ческих,/ и, То́го обре́тши, па́ки рожде́ние Креще́нием прия́ла еси́,/ дре́ва живо́тнаго наслажда́ющися, нетле́нна во ве́ки пребыва́еши,/| О́льго присносла́вная. (Дважды)

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Глас 1: Гаврии́лу веща́вшу Тебе́, Де́во, ра́дуйся,/ со гла́сом воплоща́шеся всех Влады́ка/ в Тебе́, святе́м киво́те,/ я́коже рече́ пра́ведный Дави́д,/ яви́лася еси́ ши́ршая Небе́с,/ поноси́вши Зижди́теля Твоего́:/ сла́ва Все́льшемуся в Тя;/ сла́ва Проше́дшему из Тебе́;// сла́ва Свободи́вшему нас Рождество́м Твои́м.

Лик: Го́споди, поми́луй. (Трижды) Сла́ва Отцу́ и Сы́ну и Свято́му Ду́ху.

Чтец: И ны́не и при́сно, и во ве́ки веко́в. Ами́нь.

Кафизма 19

Псалом 136

На река́х Вавило́нских, та́мо седо́хом и пла́кахом, внегда́ помяну́ти нам Сио́на. На ве́рбиих посреде́ eго́ обе́сихом орга́ны на́ша. Я́ко та́мо вопроси́ша ны пле́ншии нас о словесе́х пе́сней и ве́дшии нас о пе́нии: воспо́йте нам от пе́сней Сио́нских. Ка́ко воспое́м песнь Госпо́дню на земли́ чужде́й? А́ще забу́ду тебе́, Иерусали́ме, забве́на бу́ди десни́ца моя́. Прильпни́ язы́к мой горта́ни моему́, а́ще не помяну́ тебе́, а́ще не предложу́ Иерусали́ма, я́ко в нача́ле весе́лия моего́. Помяни́, Го́споди, сы́ны Едо́мския, в день Иерусали́мль глаго́лющыя: истоща́йте, истоща́йте до основа́ний eго́. Дщи Вавило́ня окая́нная, блаже́н и́же возда́ст тебе́ воздая́ние твое́, е́же воздала́ еси́ нам. Блаже́н и́же име́т и разбие́т младе́нцы твоя́ о ка́мень.

Чтец: Сла́ва Отцу́ и Сы́ну и Свято́му Ду́ху.

Лик: И ны́не и при́сно, и во ве́ки веко́в. Ами́нь. Аллилу́иа, аллилу́иа, аллилу́иа, сла́ва Тебе́ Бо́же. (Трижды) Го́споди, поми́луй. (Трижды) Сла́ва Отцу́ и Сы́ну и Свято́му Ду́ху.

Чтец: И ны́не и при́сно, и во ве́ки веко́в. Ами́нь.

Псалом 137

Испове́мся Тебе́, Го́споди, всем се́рдцем мои́м, и пред А́нгелы воспою́ Тебе́, я́ко услы́шал еси́ вся глаго́лы уст мои́х. Поклоню́ся ко хра́му свято́му Твоему́ и испове́мся и́мени Твоему́ о ми́лости Твое́й и и́стине Твое́й, я́ко возвели́чил еси́ над всем и́мя Твое́ свято́е. Во́ньже а́ще день призову́ Тя, ско́ро услы́ши мя: умно́жиши мя в души́ мое́й си́лою Твое́ю. Да испове́дятся Тебе́, Го́споди, вси ца́рие зе́мстии, я́ко услы́шаша вся глаго́лы уст Твои́х, и да воспою́т в путе́х Госпо́дних, я́ко ве́лия сла́ва Госпо́дня, я́ко высо́к Госпо́дь, и смире́нныя призира́ет, и высо́кая издале́ча весть. А́ще пойду́ посреде́ ско́рби, живи́ши мя, на гнев враг мои́х просте́рл еси́ руку́ Твою́, и спасе́ мя десни́ца Твоя́. Госпо́дь возда́ст за мя. Го́споди, ми́лость Твоя́ во век, дел руку́ Твое́ю не пре́зри.

Чтец: Сла́ва Отцу́ и Сы́ну и Свято́му Ду́ху.

Лик: И ны́не и при́сно, и во ве́ки веко́в. Ами́нь. Аллилу́иа, аллилу́иа, аллилу́иа, сла́ва Тебе́ Бо́же. (Трижды) Го́споди, поми́луй. (Трижды) Сла́ва Отцу́ и Сы́ну и Свято́му Ду́ху.

Чтец: И ны́не и при́сно, и во ве́ки веко́в. Ами́нь.

Псалом 139

Изми́ мя, Го́споди, от челове́ка лука́ва, от му́жа непра́ведна изба́ви мя, и́же помы́слиша непра́вду в се́рдце, весь день ополча́ху бра́ни, изостри́ша язы́к свой, я́ко змии́н, яд а́спидов под устна́ми их. Сохрани́ мя, Го́споди, из руки́ гре́шничи, от челове́к непра́ведных изми́ мя, и́же помы́слиша запя́ти стопы́ моя́. Скры́ша го́рдии сеть мне, и у́жы препя́ша сеть нога́ма мои́ма. При стези́ собла́зны положи́ша ми. Рех Го́сподеви: Бог мой еси́ Ты, внуши́, Го́споди, глас моле́ния моего́. Го́споди, Го́споди, си́ло спасе́ния моего́, осени́л еси́ над главо́ю мое́ю в день бра́ни. Не преда́ждь мене́, Го́споди, от жела́ния моего́ гре́шнику: помы́слиша на мя, не оста́ви мене́, да не когда́ вознесу́тся. Глава́ окруже́ния их, труд усте́н их покры́ет я́. Паду́т на них у́глия о́гненная, низложи́ши я́ в страсте́х, и не постоя́т. Муж язы́чен не испра́вится на земли́: му́жа непра́ведна зла́я уловя́т во истле́ние. Позна́х, я́ко сотвори́т Госпо́дь суд ни́щым и месть убо́гим. Оба́че пра́веднии испове́дятся и́мени Твоему́, и вселя́тся пра́вии с лице́м Твои́м.

Чтец: Сла́ва Отцу́ и Сы́ну и Свято́му Ду́ху, и ны́не и при́сно, и во ве́ки веко́в. Ами́нь. Аллилу́иа, аллилу́иа, аллилу́иа, сла́ва Тебе́ Бо́же. (Трижды)

Ектения малая

Диакон: Па́ки и па́ки, ми́ром Го́споду помо́лимся.

Лик: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: Я́ко Твоя́ держа́ва, и Твое́ есть ца́рство, и си́ла, и сла́ва, Отца́ и Сы́на и Свята́го Ду́ха, ныне, и при́сно, и во ве́ки веко́в.

Лик: Ами́нь.

Седален по 1-ом стихословии

Вои́стинну в жена́х мудре́йшею показа́лася еси́, О́льго сла́вная,/ лесть язы́ческую отве́ргши, и во Христа́ ве́ровавши,/ и Влади́мира к тому́ подви́гши;/ не забу́ди у́бо, я́ко прама́ти, нас, недосто́йных чад твои́х,/ и утверди́ в правове́рии и благоче́стии/ богоуго́дными твои́ми моли́твами.

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Зло́бою ожесте́вшая сердца́ на́ша умягчи́, Де́во Пречи́стая,/ печа́ли на́ша утоли́,/ я́ко мно́ги ско́рби у Креста́ Сы́на Твоего́ претерпе́вшая,/ и проше́ния на́ша услы́ши, я́ко Блага́я Скоропослу́шница.

Лик: Го́споди, поми́луй. (Трижды) Сла́ва Отцу́ и Сы́ну и Свято́му Ду́ху.

Чтец: И ны́не и при́сно, и во ве́ки веко́в. Ами́нь.

Кафизма 20

Псалом 143

Благослове́н Госпо́дь Бог мой, науча́яй ру́це мои́ на ополче́ние, пе́рсты моя́ на брань. Ми́лость моя́ и прибе́жище мое́, Засту́пник мой и Изба́витель мой, Защи́титель мой, и на Него́ упова́х: повину́яй лю́ди моя́ под мя. Го́споди, что есть челове́к, я́ко позна́лся еси́ eму́? Или́ сын челове́чь, я́ко вменя́еши eгó? Челове́к суете́ уподо́бися: дни́е eго́ я́ко сень прехо́дят. Го́споди, приклони́ небеса́, и сни́ди, косни́ся гора́м, и воздымя́тся. Блесни́ мо́лнию, и разжене́ши я́, посли́ стре́лы Твоя́, и смяте́ши я́. Посли́ ру́ку Твою́ с высоты́, изми́ мя и изба́ви мя от вод мно́гих, из руки́ сыно́в чужди́х, и́хже уста́ глаго́лаша суету́, и десни́ца их – десни́ца непра́вды. Бо́же, песнь но́ву воспою́ Тебе́, во псалти́ри десятостру́ннем пою́ Тебе́, даю́щему спасе́ние царе́м, избавля́юшему Дави́да, раба́ Своего́, от меча́ лю́та. Изба́ви мя, и изми́ мя из ру́ки сыно́в чужди́х, и́хже уста́ глаго́лаша суету́, и десни́ца их – десни́ца непра́вды. И́хже сы́нове их я́ко новосажде́ния водруже́нная в ю́ности свое́й. Дще́ри их удо́брены, преукра́шены, я́ко подо́бие хра́ма. Храни́лища их испо́лнена, отрыга́ющая от сего́ в сие́, о́вцы их многопло́дны, мно́жащыяся во исхо́дищах свои́х, воло́ве их то́лсти. Несть паде́ния опло́ту, ниже́ прохо́да, ниже́ во́пля в сто́гнах их. Ублажи́ша лю́ди, и́мже сия́ суть. Блаже́ни лю́дие, и́мже Госпо́дь Бог их.

Чтец: Сла́ва Отцу́ и Сы́ну и Свято́му Ду́ху.

Лик: И ны́не и при́сно, и во ве́ки веко́в. Ами́нь. Аллилу́иа, аллилу́иа, аллилу́иа, сла́ва Тебе́ Бо́же. (Трижды) Го́споди, поми́луй. (Трижды) Сла́ва Отцу́ и Сы́ну и Свято́му Ду́ху.

Чтец: И ны́не и при́сно, и во ве́ки веко́в. Ами́нь.

Псалом 146

Хвали́те Го́спода, я́ко благ псало́м. Бо́гови на́шему да услади́тся хвале́ние. Зи́ждай Иерусали́ма Госпо́дь, разсе́яния Изра́илева собере́т. Исцеля́яй сокруше́нныя се́рдцем и обязу́яй сокруше́ния их. Исчита́яй мно́жество звезд и всем им имена́ нарица́яй. Ве́лий Госпо́дь наш, и ве́лия кре́пость Его́, и ра́зума Его́ несть числа́, Прие́мляй кро́ткия Госпо́дь, смиря́яй же гре́шники до земли́. Начни́те Го́сподеви во испове́дании, по́йте Бо́гови на́шему в гу́слех. Одева́ющему не́бо о́блаки, уготовля́ющему земли́ дождь, прозяба́ющему на гора́х траву́ и злак на слу́жбу челове́ком, даю́щему ското́м пи́щу их, и птенце́м вра́новым призыва́ющым Его́. Не в си́ле ко́нстей восхо́щет, ниже́ в лы́стех му́жеских благоволи́т. Благоволи́т Госпо́дь в боя́щихся Его́ и во упова́ющих на ми́лость Его́.

Чтец: Сла́ва Отцу́ и Сы́ну и Свято́му Ду́ху.

Лик: И ны́не и при́сно, и во ве́ки веко́в. Ами́нь. Аллилу́иа, аллилу́иа, аллилу́иа, сла́ва Тебе́ Бо́же. (Трижды) Го́споди, поми́луй. (Трижды) Сла́ва Отцу́ и Сы́ну и Свято́му Ду́ху.

Чтец: И ны́не и при́сно, и во ве́ки веко́в. Ами́нь.

Псалом 147

Похвали́, Иерусали́ме, Го́спода, хвали́ Бо́га Твоего́, Сио́не, я́ко укрепи́ вереи́ врат Твои́х, благослови́ сы́ны твоя́ в тебе́. Полага́яй преде́лы Твоя́ мир, и ту́ка пшени́чна насыща́яй тя. Посыла́яй сло́во Свое́ земли́, до ско́рости тече́т сло́во Его́, даю́щаго снег Свой, я́ко во́лну, мглу, я́ко пе́пел, посыпа́ющаго, мета́ющаго го́лоть Свой, я́ко хле́бы. Проти́ву лица́ мра́за Его́ кто постои́т? По́слет Сло́во Свое́, и иста́ет я́, дхнет Дух Его́, и потеку́т во́ды. Возвеща́яй сло́во Свое́ Иа́кову, оправда́ния и судьбы́ Своя́ Изра́илеви. Не сотвори́ та́ко вся́кому язы́ку, и судьбы́ Своя́ не яви́ им.

Чтец: Сла́ва Отцу́ и Сы́ну и Свято́му Ду́ху, и ны́не и при́сно, и во ве́ки веко́в. Ами́нь. Аллилу́иа, аллилу́иа, аллилу́иа, сла́ва Тебе́ Бо́же. (Трижды)

Ектения малая

Диакон: Па́ки и па́ки, ми́ром Го́споду помо́лимся.

Лик: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: Я́ко Твоя́ держа́ва, и Твое́ есть ца́рство, и си́ла, и сла́ва, Отца́ и Сы́на и Свята́го Ду́ха, ныне, и при́сно, и во ве́ки веко́в.

Лик: Ами́нь.

Седален по 2-ом стихословии

От Го́спода стопы́ челове́ку исправля́ются;/ тем и тебе́, свята́я О́льго, напра́ви/ сердца́ Испыту́яй и утро́бы к Ца́рствию Небе́сному,/ его́же да не лиши́т и нас моли́твами твои́ми.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Упова́ние христиа́н непосты́дное/ и стено́ необори́мая, Влады́чице Богоро́дице,/ не отри́ни моле́ний к Тебе́ прибега́ющих,/ но, я́ко Блага́я, заступи́ и поми́луй нас.

Полиелей

Лик: Хвали́те и́мя Госпо́дне, хвали́те, раби́ Го́спода.

Припев: Аллилу́ия (трижды).

Благослове́н Госпо́дь от Сио́на, живы́й во Иерусали́ме.

Припев: Аллилу́ия (трижды).

Испове́дайтеся Го́сподеви, я́ко благ, я́ко в век ми́лость Его́.

Припев: Аллилу́ия (трижды).

Испове́дайтеся Бо́гу Небе́сному, я́ко в век ми́лость Его́.

Припев: Аллилу́ия (трижды).

Величание

Велича́ем тя,/ блаже́нная и равноапо́стольная княги́не О́льго,/ и чтим святу́ю па́мять твою́,/ и́долы попра́вшую// и мно́гия лю́ди росси́йския святы́м Креще́нием просвети́вшую.

Стих: Блаже́н муж, боя́йся Го́спода, Величание.

Стих: в за́поведех Его́ восхо́щет зело́. Величание.

Стих: Сла́ва и бога́тство в дому́ Его́. Величание.

Стих: И пра́вда Его́ пребыва́ет в век ве́ка. Величание.

Лик: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в, ами́нь. Аллилу́ия, аллилу́ия, аллилу́ия, сла́ва Тебе́, Бо́же. (Дважды)

Ектения малая

Диакон: Па́ки и па́ки, ми́ром Го́споду помо́лимся.

Лик: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: Я́ко благ и Человеколю́бец Бог еси́, и Тебе́ сла́ву возсылае́м, Отцу́ и Сы́ну и Свято́му Ду́ху, ны́не и при́сно, и во ве́ки веко́в.

Лик: Ами́нь.

Седальны по полиелее:

Досто́йно равноапо́стольныя цари́цы и́менем нарече́на еси́, блаже́нная,/ о́ной бо, Крест Христо́в приле́жно взыска́вшей, подража́ла еси́,/ Христа́ Бо́га и́стиннаго взыска́вши и Крест Того́ на себе́ возло́жши,/ Его́же моли́ и́го благо́е Креста́ понести́ и нам, грехи́ обремене́нным,/ и упова́ние Небе́сное улучи́ти.

Сла́ва Отцу́, и Сы́ну, и Свято́му Ду́ху и ны́не и при́сно, и во ве́ки веко́в. Ами́нь.

Отны́не ублажа́т Мя вси ро́ди,– рекла́ еси́, Пречи́стая Де́во,/ от пра́ведныя Елисаве́т целова́ние прие́мши;/ тем у́бо и мы от оте́ц на́ших,/ я́ко Богоро́дицу и Ма́терь Све́та,/ Тя пе́ти научи́хомся.

Антифон 1, глас 4

Лик: От ю́ности моея́/ мно́зи бо́рют мя стра́сти,/ но Сам мя заступи́,/ и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м / бу́дете изсо́хше.

Сла́ва Отцу́ и Сы́ну и Свято́му Ду́ху.

Святы́м Ду́хом/ вся́ка душа́ живи́тся,/ и чистото́ю возвыша́ется,/ светле́ется Тро́ическим Еди́нством священнота́йне.

И ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,/ светле́ется Тро́ическим Еди́нством священнота́йне.

Чтение Евангелия

Диакон: Во́нмем. Прему́дрость. Во́нмем.

Прокимен равноап. кнг. Ольги

Диакон: Прокимен, глас 4: Во всю зе́млю изы́де веща́ние их,/ и в концы́ вселе́нныя глаго́лы их.

Лик: Глас 4: Во всю зе́млю изы́де веща́ние их,/ и в концы́ вселе́нныя глаго́лы их.

Диакон: Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь.

Лик: Во всю зе́млю изы́де веща́ние их,/ и в концы́ вселе́нныя глаго́лы их.

Диакон: Во всю зе́млю изы́де веща́ние их,

Лик: и в концы́ вселе́нныя глаго́лы их.

Диакон: Го́споду помо́лимся.

Лик: Го́споди, поми́луй.

Молитва перед чтением Евангелия

Священник: Я́ко свят еси́, Бо́же наш, и во святы́х почива́еши, и Тебе́ сла́ву возсыла́ем. Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Диакон: Вся́кое дыха́ние/ да хва́лит Го́спода.

Лик: Вся́кое дыха́ние/ да хва́лит Го́спода.

Диакон: Хвали́те Бо́га во святы́х Его́, хвали́те Его́ в утверже́нии си́лы Его́.

Лик: Вся́кое дыха́ние/ да хва́лит Го́спода.

Диакон: Вся́кое дыха́ние

Лик: да хва́лит Го́спода.

Диакон: И о сподо́битися нам слы́шанию свята́го Ева́нгелия Го́спода Бо́га мо́лим.

Лик: Го́споди, поми́луй (трижды).

Диакон: Прему́дрость, про́сти! Услы́шим свята́го Ева́нгелия.

Священник: Мир всем.

Лик: И ду́хови твоему́.

Диакон: От Матфе́я свята́го Ева́нгелия чте́ние.

Лик: Сла́ва Тебе́, Го́споди, сла́ва Тебе́.

Священник: Во́нмем.

Евангелие от Матфея, зачало 104. (Мф.25:1-13)

Рече́ Госпо́дь при́тчу сию́: уподо́бися Ца́рствие Небе́сное десяти́м де́вам, я́же прия́ша свети́льники своя́ и изыдо́ша в сре́тение жениху́, пять же бе от них мудры́ и пять юро́дивы. Юро́дивыя же, прие́мше свети́льники своя́, не взя́ша с собо́ю еле́я, му́дрыя же прия́ша еле́й в сосу́дех со свети́льники свои́ми, косня́щу же жениху́, воздрема́шася вся и спа́ху. Полу́нощи же вопль бысть: се жени́х гряде́т, исходи́те в сре́тение его́. Тогда́ воста́вше вся де́вы ты́я и украси́ша свети́льники своя́. Юро́дивыя же му́дрым ре́ша: дади́те нам от еле́я ва́шего, я́ко свети́льницы на́ши угаса́ют. Отвеща́ша же му́дрыя, глаго́люще: еда́ ка́ко не доста́нет нам и вам, иди́те же па́че к продаю́щим и купи́те себе́. Иду́щим же им купи́ти, прии́де жени́х, и гото́выя внидо́ша с ним на бра́ки, и затворе́ны бы́ша две́ри. Последи́ же приидо́ша и про́чия де́вы, глаго́люще: Го́споди, Го́споди, отве́рзи нам. Он же отвеща́в рече́ им: ами́нь глаго́лю вам, не вем вас. Бди́те у́бо, я́ко не ве́сте дне ни часа́, во́ньже Сын Челове́ческий прии́дет.

Лик: Сла́ва Тебе́, Го́споди, сла́ва Тебе́.

Псалом 50

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Стихиры по 50 псалме

Лик: Глас 6: Сла́ва Отцу́, и Сы́ну, и Свято́му Ду́ху.

Моли́твами равноапостольной княгини Ольги,/ Ми́лостиве, очи́сти// мно́жества согреше́ний на́ших.

Лик: И ны́не, и при́сно, и во ве́ки веко́в. Ами́нь.

Моли́твами Богоро́дицы,/ Ми́лостиве, очи́сти// мно́жества согреше́ний на́ших.

Таже, глас 6: Поми́луй мя, Бо́же,/ по вели́цей ми́лости Твое́й/ и по мно́жеству щедро́т Твои́х// очи́сти беззако́ние мое́.

Глас 6: Провозве́стницу ве́ры/ и ко спасе́нию путеводи́тельницу Богоизбра́нную,/ О́льгу прему́друю восхва́лим/ и пе́сньми почти́м святу́ю па́мять ея́,/ мо́лится бо со все́ми святы́ми земли́ на́шея// о спасе́нии душ на́ших.

Диакон: Спаси́, Бо́же, лю́ди Твоя́….

Лик: Го́споди, поми́луй (12 раз).

Священник: Ми́лостию и щедро́тами и человеколю́бием Единоро́днаго Твоего́ Сы́на, с Ни́мже благослове́н еси́, со Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Канон

Песнь 1

Кано́н моле́бный Пресвяте́й Богоро́дице. Глас 8.

Ирмос, глас 8: Во́ду проше́д я́ко су́шу,/ и еги́петскаго зла́ избежа́в,/ изра́ильтянин вопия́ше:// Изба́вителю и Бо́гу на́шему пои́м.

Припев: Пресвята́я Богоро́дице, спаси́ на́с.

Мно́гими содержи́мь напа́стьми, к Тебе́ прибега́ю спасе́ния иски́й, о Ма́ти Сло́ва и Де́во, от тя́жких и лю́тых мя́ спаси́.

Припев: Пресвята́я Богоро́дице, спаси́ на́с.

Страсте́й мя́ смуща́ют прило́зи, мно́гаго уны́ния испо́лнити мою́ ду́шу: умири́, Отрокови́це, тишино́ю Сы́на и Бо́га Твоего́, Всенепоро́чная.

Кано́н равноапо́стольныя княги́ни О́льги. Глас 5.

Припев: Свята́я равноапо́стольная княги́не О́льго, моли́ Бо́га о на́с.

Вели́чие на́ше и похвала́ ты еси́, О́льго Богому́драя:/ тобо́ю бо от и́дольския ле́сти свободи́хомся./ Ны́не моли́ся за род и ро́ды, и́хже Бо́гу привела́ еси́,/ пою́щи Христа́, я́ко просла́вися.

Припев: Свята́я равноапо́стольная княги́не О́льго, моли́ Бо́га о на́с.

Велича́ваго диа́вола из Росси́и прогна́ла еси́,/ нечести́выя куми́ры отню́д сокруши́вши,/ вся лю́ди от беззако́ния свободи́ла еси́,/ му́дростию науча́ющи пе́ти Христа́, я́ко просла́вися.

Припев: Свята́я равноапо́стольная княги́не О́льго, моли́ Бо́га о на́с.

Че́рность грехо́вную ба́нею Креще́ния отню́д отмы́ла еси́,/ Христа́ возлюби́ла еси́,/ Ему́же предстоя́щи, моли́ся за рабы́ твоя́,/ ве́рно сла́вящия тя.

Припев: Пресвята́я Богоро́дице, спаси́ нас.

Богородичен: Иса́ия Тя жезл нарица́ет, Пречи́стая,/ Дави́д же Тя – престо́л Госпо́день,/ Авваку́м – приосене́нную го́ру, купину́ же Тя – Моисе́й,/ мы же Тя Ма́терь Бо́жию нарица́ем.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Катавасия

Глас 4: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́, ра́дуяся, Тоя́ чудеса́.

Песнь 3

Кано́н моле́бный Пресвяте́й Богоро́дице. Глас 8.

Ирмос, глас 8: Небе́снаго кру́га Верхотво́рче Го́споди,/ и Це́ркве Зижди́телю,/ Ты́ мене́ утверди́ в любви́ Твое́й,/жела́ний кра́ю, ве́рных утвержде́ние,// Еди́не Человеколю́бче.

Припев: Пресвята́я Богоро́дице, спаси́ на́с.

Предста́тельство и покро́в жи́зни моея́, полага́ю Тя́, Богороди́тельнице Де́во, Ты́ мя окорми́ ко приста́нищу Твоему́, благи́х вино́вна, ве́рных утвержде́ние, Еди́на Всепе́тая.

Припев: Пресвята́я Богоро́дице, спаси́ на́с.

Молю́, Де́во, душе́вное смуще́ние, и печа́ли моея́ бу́рю разори́ти: Ты́ бо, Богоневе́стная, Нача́льника тишины́ Христа́ родила́ еси́, Еди́на Пречи́стая.

Кано́н равноапо́стольныя княги́ни О́льги. Глас 5.

Припев: Свята́я равноапо́стольная княги́не О́льго, моли́ Бо́га о на́с.

Держа́вною руко́ю, и му́дрыми словесы́, и си́льным сло́вом/ учи́ла еси́ твоего́ сы́на зако́ну Христо́ву/ и лю́дем возбрани́ла еси́ жре́ти и́долом, О́льго пресла́вная,/ в па́мять твою́ ны́не соше́дшеся, тебе́ прославля́ем.

Припев: Свята́я равноапо́стольная княги́не О́льго, моли́ Бо́га о на́с.

Ты, я́ко пчела́, добру́ ра́зуму дале́че цвету́щия Христо́вы ве́ры взыска́ла еси́/ и, я́ко поро́дный мед, Креще́ние в Ца́рствующем гра́де обре́тши,/ твоему́ гра́ду и лю́дем дарова́ла еси́,/ его́же вси насыще́ни го́рести греха́ отбега́ют.

Припев: Свята́я равноапо́стольная княги́не О́льго, моли́ Бо́га о на́с.

Весь похва́льный глас и мольбу́ ти, Ольго, прино́сим,/ тобо́ю бо Бо́га позна́хом, Ему́же ны́не предстои́ши,/ проси́ ми́ра оте́честву, и на пога́ныя побе́ды, и душа́м на́шим оставле́ния грехо́в,/ пою́щим тя, присноблаже́нная.

Припев: Пресвята́я Богоро́дице, спаси́ нас.

Богородичен: Прия́телище яви́лася еси́, Де́во, Непристу́пнаго Бо́га,/ тем Тя пою́т непреста́нно а́нгельстии чи́ни, повину́ющеся Влады́це,/ Ты бо родила́ еси́ Сло́во Отчее, Собезнача́льное, без отца́:/ о, чу́до! Святы́й бо Дух осени́ Тя.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Катавасия

Глас 4: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе совоку́пльшия, духо́вно утверди́/ в Боже́ственней Твое́й сла́ве// венце́в сла́вы сподо́би.

Ектения малая

Диакон: Па́ки и па́ки, ми́ром Го́споду помо́лимся.

Лик: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: Я́ко Твоя́ держа́ва, и Твое́ есть ца́рство, и си́ла, и сла́ва, Отца́ и Сы́на и Свята́го Ду́ха, ныне, и при́сно, и во ве́ки веко́в.

Лик: Ами́нь.

Седален

По́двиг твой чтим, блаже́нная,/ ди́вна бо кре́пость ду́ха твоего́, в не́мощи телесе́ я́вльшаяся;/ язы́ческую лесть презре́вши,/ дерзнове́нно ве́ру пропове́дала еси́ Христо́ву,/ о́браз нам подаю́щи ре́вности о Го́споде.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

И́же неизрече́нно от чи́стых крове́й Твои́х Воплоти́выйся/ престо́л угото́ва во чре́ве Твое́м, Пречи́стая Отрокови́це,/ Юже вси ро́ди, я́ко Богоро́дицу, досто́йно сла́вят.

Песнь 4

Кано́н моле́бный Пресвяте́й Богоро́дице. Глас 8.

Ирмос, глас 8: Услы́шах, Го́споди,/ смотре́ния Твоего́ та́инство:/ разуме́х дела́ Твоя́,// и просла́вих Твое́ Божество́.

Припев: Пресвята́я Богоро́дице, спаси́ на́с.

Страсте́й мои́х смуще́ние, Ко́рмчию ро́ждшая Го́спода, и бу́рю утиши́ мои́х прегреше́ний, Богоневе́стная.

Припев: Пресвята́я Богоро́дице, спаси́ на́с.

Милосе́рдия Твоего́ бе́здну призыва́ющу пода́ждь ми́, Я́же Благосе́рдаго ро́ждшая, и Спа́са все́х пою́щих Тя́.

Кано́н равноапо́стольныя княги́ни О́льги. Глас 5.

Припев: Свята́я равноапо́стольная княги́не О́льго, моли́ Бо́га о на́с.

Дух Бо́жий почи́ на тебе́, я́ко на Девво́ре проро́чице дре́вле,/ И́мже просвети́вшися, укрепля́ющи Влади́мира разу́мнаго,/ Сиса́ру диа́вола низложи́ла еси́ в се́ти его́ Креще́нием,/ я́ко и Вара́ком в пото́це Ки́ссове пре́жде.

Припев: Свята́я равноапо́стольная княги́не О́льго, моли́ Бо́га о на́с.

Быстрине́ подо́бящися, О́льго Богому́драя,/ сокруше́нным се́рдцем ста, моля́щися к Бо́гу,/ изба́вила еси́ род твои́х люде́й от оскорбле́ния куми́рскаго/ и от плене́ния вра́жия свободи́ла еси́,/ Христа́ призыва́ющи на по́мощь на́шу.

Припев: Свята́я равноапо́стольная княги́не О́льго, моли́ Бо́га о на́с.

В наро́читый день свята́го твоего́ преставле́ния ра́достно пра́зднуем,/ песнь моле́бную Христу́ возсыла́юще,/ нетле́нным венце́м венча́вшему тя, О́льго Богому́драя:/ проси́ нам оставле́ние грехо́в, сла́вящим тя ве́рно.

Припев: Пресвята́я Богоро́дице, спаси́ нас.

Богородичен: Тя, от ко́рене Иессе́ева процве́тшую,/ Иса́ия я́коже прорече́, Христа́ – Цвет прозя́бшую,/ и Первонача́льнаго пло́тию носи́вшую, и Жезл Бо́жия Духа,/ хва́лим Тя, я́ко Бо́жию Ма́терь и Чи́стую Де́ву.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Катавасия

Глас 4: Седя́й в Сла́ве/ на Престо́ле Божества́,/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:// сла́ва, Христе́, си́ле Твое́й.

Песнь 5

Кано́н моле́бный Пресвяте́й Богоро́дице. Глас 8.

Ирмос, глас 8: Просвети́ на́с повеле́нии Твои́ми, Го́споди,/ и мы́шцею Твое́ю высо́кою/ Тво́й ми́р пода́ждь на́м,// Человеколю́бче.

Припев: Пресвята́я Богоро́дице, спаси́ на́с.

Испо́лни, Чи́стая, весе́лия се́рдце мое́, Твою́ нетле́нную даю́щи ра́дость, весе́лия ро́ждшая Вино́внаго.

Припев: Пресвята́я Богоро́дице, спаси́ на́с.

Изба́ви на́с от бе́д, Богоро́дице Чи́стая, ве́чное ро́ждши Избавле́ние, и Ми́р вся́к у́м преиму́щий.

Кано́н равноапо́стольныя княги́ни О́льги. Глас 5.

Припев: Свята́я равноапо́стольная княги́не О́льго, моли́ Бо́га о на́с.

Я́ко голуби́ца целому́дренная, на фи́никс доброде́телей возшла́ еси́,/ криле́ свяще́нне посре́бренне иму́щи,/ и́миже возлете́вши, в ра́йстей пи́щи возгнезди́лася еси́, сла́вная О́льго.

Припев: Свята́я равноапо́стольная княги́не О́льго, моли́ Бо́га о на́с.

О тебе́ поя́ше Соломо́н пре́жде:/ вне виногра́да ца́рская ма́слина процвете́;/ ты бо святы́й грезн Креще́нием в Росси́и насади́ла еси́,/ творя́щи плод покая́ния, о не́мже Сам Христо́с весели́тся.

Припев: Свята́я равноапо́стольная княги́не О́льго, моли́ Бо́га о на́с.

Умилосе́рдися, Влады́ко, на новопросвеще́нныя лю́ди Твоя́,/ не преда́ждь нас в ру́ки пога́ных за мно́жество беззако́ний на́ших,/ но моли́твами наста́вницы на́шея О́льги изба́ви ны от вся́кия напа́сти.

Припев: Пресвята́я Богоро́дице, спаси́ нас.

Богородичен: Кропи́те вси, я́коже пи́шется, о́блацы весе́лия, земны́м:/ Бо́жий бо Де́тищ Христо́с, очища́яй мир от грехо́в,/ воплоти́ся от Де́вы и дан бысть нам.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Катавасия

Глас 4: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя// мир подава́ющая.

Песнь 6

Кано́н моле́бный Пресвяте́й Богоро́дице. Глас 8.

Ирмос, глас 8: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зо́л душа́ моя́ испо́лнися,/ и живо́т мо́й а́ду прибли́жися,/ и молю́ся я́ко Ио́на:// от тли́, Бо́же, возведи́ мя.

Припев: Пресвята́я Богоро́дице, спаси́ на́с.

Сме́рти и тли́ я́ко спа́сл е́сть, Са́м Ся́ изда́в сме́рти, тле́нием и сме́ртию мое́ естество́ я́то бы́вшее, Де́во, моли́ Го́спода и Сы́на Твоего́, враго́в злоде́йствия мя́ изба́вити.

Припев: Пресвята́я Богоро́дице, спаси́ на́с.

Предста́тельницу Тя́ живота́ ве́м, и Храни́тельницу тве́рду, Де́во, и напа́стей реша́щу молвы́, и нало́ги бесо́в отгоня́ющу: и молю́ся всегда́, от тли́ страсте́й мои́х изба́вити мя́.

Кано́н равноапо́стольныя княги́ни О́льги. Глас 5.

Припев: Свята́я равноапо́стольная княги́не О́льго, моли́ Бо́га о на́с.

Ре́вность Свята́го Ду́ха в се́рдцы прие́мши,/ оте́ческое злове́рие возненави́дела еси́,/ и, Христа́ и́стиннаго Бо́га взыска́вши, ча́до све́та яви́лася еси́,/ и с пе́рвенцы святы́х на Небесе́х лику́еши.

Припев: Свята́я равноапо́стольная княги́не О́льго, моли́ Бо́га о на́с.

Но́вая учени́ца Христо́ва в Росси́и яви́лася еси́, обходя́щи гра́ды и се́ла,/ куми́ры сокруша́ющи и лю́ди уча́щи еди́ному Бо́гу покланя́тися,/ Его́же моли́ за пою́щия тя.

Припев: Свята́я равноапо́стольная княги́не О́льго, моли́ Бо́га о на́с.

О Богоблаже́нная О́льго, помоли́ся за твоя́ ча́да к Бо́гу:/ мир неподви́жимый оте́честву на́шему испроси́/ и нам отпуще́ние грехо́в, при́сно тя прославля́ющим.

Припев: Пресвята́я Богоро́дице, спаси́ нас.

Богородичен: Позна́вше Тобо́ю неопи́санное Сло́во Бо́жие,/ Сы́на Единоро́днаго Вседержи́телева, вопие́м Ти, земни́и:/ ра́дуйся, благослове́нная Богоро́дице, упова́ние душ на́ших.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Катавасия

Глас 4: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,// от Нея́ ро́ждшагося Бо́га сла́вим.

Ектения малая

Диакон: Па́ки и па́ки, ми́ром Го́споду помо́лимся.

Лик: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: Я́ко Твоя́ держа́ва, и Твое́ есть ца́рство, и си́ла, и сла́ва, Отца́ и Сы́на и Свята́го Ду́ха, ныне, и при́сно, и во ве́ки веко́в.

Лик: Ами́нь.

Кондак

Кондак равноап. кнг. Ольги

Глас 4: Воспое́м днесь Благоде́теля всех Бо́га,/ просла́вльшаго в Росси́и О́льгу Богому́друю,/ да моли́твами ея́/ пода́ст душа́м на́шим/ грехо́в оставле́ние.

Икос: Христиа́н житие́ ви́дящи и непотре́бство язы́ческое уразумева́ющи,/ си́це в себе́ рекла́ еси́, О́льго Богому́драя:/ о, бе́здна прему́дрости и бла́гости всех Творца́!/ Ка́ко утаи́лся еси́ от мене́ досе́ле?/ Ка́ко возмогу́ и́долы отны́не чти́ти?/ Никто́же бо, сла́дкаго вкуси́в, восхо́щет го́рькаго,/ сего́ ра́ди, а́ще и в ста́рости, призови́ мя, Свята́я Тро́ице,/ и пода́ждь ми грехо́в оставле́ние.

Песнь 7

Кано́н моле́бный Пресвяте́й Богоро́дице. Глас 8.

Ирмос, глас 8: От Иуде́и доше́дше о́троцы/ в Вавило́не иногда́,/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Припев: Пресвята́я Богоро́дице, спаси́ на́с.

На́ше спасе́ние я́коже восхоте́л еси́, Спа́се, устро́ити, во утро́бу Де́выя всели́лся еси́, Ю́же ми́ру Предста́тельницу показа́л еси́: оте́ц на́ших Бо́же, благослове́н еси́.

Припев: Пресвята́я Богоро́дице, спаси́ на́с.

Воли́теля ми́лости, Его́же родила́ еси́, Ма́ти Чи́стая, умоли́, изба́витися от прегреше́ний, и душе́вных скве́рн, ве́рою зову́щим: оте́ц на́ших Бо́же, благослове́н еси́.

Кано́н равноапо́стольныя княги́ни О́льги. Глас 5.

Припев: Свята́я равноапо́стольная княги́не О́льго, моли́ Бо́га о на́с.

Подо́бно Иуди́фи сотвори́ла еси́, посреде́ куми́рских тели́щ вше́дши,/ тех нача́льника сокруши́ла еси́ и демоноче́тцы посрами́ла еси́,/ вся же лю́ди научи́ла еси́ в чистоте́ вопи́ти Христу́:/ благослове́н еси́, Го́споди, на Престо́ле Сла́вы Ца́рствия Твоего́.

Припев: Свята́я равноапо́стольная княги́не О́льго, моли́ Бо́га о на́с.

Похва́льными цве́ты, а́ки ца́рский вене́ц, богому́дрей твое́й главе́/ в па́мять твою́ прино́сим, ю́же Христо́с нетле́нием венча́, О́льго досточу́дная,/ моли́ся за твое́ ста́до, изба́витися от вся́каго зла вопию́щим:/ благослове́н еси́, Го́споди, на Престо́ле Сла́вы Ца́рствия Твоего́.

Припев: Свята́я равноапо́стольная княги́не О́льго, моли́ Бо́га о на́с.

Лива́нскую ли го́ру нарече́м тя?/ На тя бо роса́ Небе́сная сни́де./ Или́ Фисо́н реку́, добре́йший сапфи́р, ка́мень честны́й, Влади́мира иму́щую,/ и́мже просвети́ся Росси́йская земля́?/ Но моли́теся за ны, взыва́юще:/ благослове́н еси́, Го́споди, на Престо́ле Сла́вы Ца́рствия Твоего́.

Припев: Пресвята́я Богоро́дице, спаси́ нас.

Богородичен: Киво́т позлаще́н Тя Ду́хом имену́ем,/ спа́сшую мир от пото́па разу́мнаго, Де́во,/ спаси́ нас, на Тя бо наде́емся и к Тебе́ прибега́ем,/ отча́янныя в пучи́не от грех и напа́стей изба́ви, вопию́щия:/ благослове́н еси́, Го́споди, на Престо́ле Сла́вы Ца́рствия Твоего́.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Катавасия

Глас 4: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бо́г, благослове́н еси́.

Песнь 8

Кано́н моле́бный Пресвяте́й Богоро́дице. Глас 8.

Ирмос, глас 8: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся́ ве́ки.

Припев: Пресвята́я Богоро́дице, спаси́ на́с.

По́мощи я́же от Тебе́ тре́бующия не пре́зри, Де́во, пою́щия и превознося́щия Тя́ во ве́ки.

Припев: Пресвята́я Богоро́дице, спаси́ на́с.

Неможе́ние души́ моея́ исцеля́еши, и теле́сныя боле́зни, Де́во, да Тя́ просла́влю, Чи́стая, во ве́ки.

Кано́н равноапо́стольныя княги́ни О́льги. Глас 5.

Припев: Свята́я равноапо́стольная княги́не О́льго, моли́ Бо́га о на́с.

Крепка́, я́ко льви́ца, си́лою Свята́го Ду́ха оболче́на,/ еди́на устреми́ся всю́ду истерза́ти куми́ры, и ди́вно на Небеси́ и на земли́:/ ка́ко жена́ пре́жде Бо́га познава́ет,/ е́юже испе́рва всему́ ро́ду паде́ние бысть?/ То́ю же ны́не спасе́ни, пое́м:/ о пролия́вый му́дрость на всех де́лех Твои́х Бо́же,/ Тя превозно́сим во ве́ки.

Припев: Свята́я равноапо́стольная княги́не О́льго, моли́ Бо́га о на́с.

Прему́дрость Бо́жия пре́жде о тебе́ написа́ла есть:/ се еси́ до́брая моя́ и прекра́сная, и поро́ка несть в тебе́./ Блеск лица́ твоего́, я́ко ми́ра обоня́ние, назна́меноваше твое́, О́льго, креще́ние,/ е́же посреде́ куми́рския ле́сти на тебе́ обоня́ Христо́с/ и всех нас от смра́да де́монскаго к покая́нию ми́лостию Свое́ю, приве́л есть.

Припев: Свята́я равноапо́стольная княги́не О́льго, моли́ Бо́га о на́с.

Помяни́ мене́, госпоже́ О́льго, убо́гаго твоего́ раба́,/ окра́деннаго от врага́ и согреши́вшаго па́че челове́к,/ и помоли́ся Христу́ пода́ти ми проще́ние о всех согреше́ниих,/ я́же нечу́вственно соде́ях, окая́нный, да покая́нием вопию́:/ о пролия́вый му́дрость на всех де́лех Твои́х Бо́же,/ Тя превозно́сим во ве́ки.

Припев: Пресвята́я Богоро́дице, спаси́ нас.

Богородичен: Не пре́зри, Де́во, Твои́х раб мольбы́,/ о Тебе́ бо хва́лимся, Твое́ ма́лое ста́до мы есмы́,/ потщи́ся в заступле́ние на́ше и изми́ ны от враг на́ших,/ уще́дри зна́ющия Тя Ма́терь Бо́жию и Сы́ну Твоему́ вопию́щия:/ о пролия́вый му́дрость на всех де́лех Твои́х Бо́же,/ Тя превозно́сим во ве́ки.

Благослови́м Отца́ и Сы́на и Свята́го Ду́ха, Го́спода, и ны́не, и при́сно, и во ве́ки веко́в. Ами́нь.

Припев: Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия

Глас 4: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.

Диакон: Богоро́дицу и Мате́рь Све́та в пе́снех возвели́чим.

Песнь Пресвятыя Богородицы

Лик: Вели́чит душа́ Моя́ Го́спода, и возра́довася дух Мой о Бо́зе Спа́се Мое́м.

Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Я́ко призре́ на смире́ние Рабы́ Своея́, се бо от ны́не ублажа́т Мя вси ро́ди.

Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Низложи́ си́льныя со престо́л, и вознесе́ смире́нныя; а́лчущия испо́лни благ, и богатя́щияся отпусти́ тщи.

Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Припев: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Песнь 9

Кано́н моле́бный Пресвяте́й Богоро́дице. Глас 8.

Ирмос, глас 8: Вои́стинну Богоро́дицу/ Тя́ испове́дуем/ спасе́ннии Тобо́ю, Де́во Чи́стая,// с безпло́тными ли́ки Тя́ велича́юще.

Припев: Пресвята́я Богоро́дице, спаси́ на́с.

То́ка сле́з мои́х не отврати́ся, Я́же от вся́каго лица́ вся́ку сле́зу отъе́мшаго, Де́во, Христа́ ро́ждшая.

Припев: Пресвята́я Богоро́дице, спаси́ на́с.

Ра́дости мое́ се́рдце испо́лни, Де́во: Я́же ра́дости прие́мшая исполне́ние, грехо́вную печа́ль потребля́ющи.

Кано́н равноапо́стольныя княги́ни О́льги. Глас 5.

Припев: Свята́я равноапо́стольная княги́не О́льго, моли́ Бо́га о на́с.

Весели́ся, Е́во прароди́тельнице, и́же бо, тя прельсти́в, из Еде́ма изведе́,/ ны́не же попра́н есть твои́м исча́дием./ Се бо О́льга живо́тное дре́во, Крест Христо́в, в Росси́и водрузи́,/ и́мже всем ве́рным рай отве́рзеся,/ мы же хва́лящеся, я́ко тоя́ ра́ди Бо́га позна́хом,/ со Влади́миром сию́ велича́ем.

Припев: Свята́я равноапо́стольная княги́не О́льго, моли́ Бо́га о на́с.

Жену́ по естеству́ нарица́ем тя, но па́че си́лы же́нския подви́глася еси́./ Тьмы твоего́ зла́та истощи́ла еси́,/ да Христо́в зако́н и учи́теля приобря́щеши,/ и́мже просвети́ла еси́ зе́млю Росси́йскую,/ мы же тобо́ю хва́лящеся, я́ко тебе́ ра́ди Бо́га позна́хом,/ с му́ченики тя велича́ем.

Припев: Свята́я равноапо́стольная княги́не О́льго, моли́ Бо́га о на́с.

Зако́на наста́внице чи́стая и учи́тельнице ве́ры Христо́вы,/ приими́ похвалу́ от раб недосто́йных и моли́тву о нас сотвори́ к Бо́гу,/ че́стно творя́щих твою́ па́мять,/ да от напа́стей, и бед, и печа́лей, и лю́тых грехо́в свободи́мся,/ еще́ же и мук, жду́щих нас, изба́ви, мо́лимся ти,/ тебе́ непреста́нно велича́ющии.

Припев: Пресвята́я Богоро́дице, спаси́ нас.

Богородичен: Се Це́рковь, се дверь, се Бо́жия гора́ свята́я,/ се жезл и сосу́д злат, се исто́чник печа́тан,/ се рай святы́й но́ваго Ада́ма, се престо́л стра́шный,/ се Ма́ти Бо́жия Пречи́стая,/ Засту́пница всех нас, пою́щих Ю.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Катавасия

Глас 4: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,// Чи́стая Присноде́во.

Малая ектения

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Пресвяту́ю, Пречи́стую, Преблагослове́нную, Сла́вную Влады́чицу нашу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: Я́ко Тя хва́лят вся Си́лы Небе́сныя, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Cветильны

Све́том благода́ти Бо́жией просвеще́нная,/ свети́льник ве́ры и́стинныя во оте́чествии свое́м возжгла́ еси́, О́льго Богому́драя,/ и о́браз подала́ еси́ отцу́ на́шему Влади́миру,/ и́мже и мы от тьмы неве́дения к Све́ту Христо́ву приведо́хомся.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Во тьме беззако́ний су́щии и нечистото́ю грехо́вною оскверне́ннии,/ Тя Путеводи́тельницу к Све́ту невече́рнему и́мамы;/ тем и мою́ окая́нную ду́шу к Небе́сней чистоте́ возведи́/ всеси́льным предста́тельством Твои́м, Де́во Пречи́стая.

Стихиры на хвалитех

Канонарх: Глас 3, Вся́кое дыха́ние да хва́лит Го́спода.

Вся́кое дыха́ние да хва́лит Го́спода./ Хвали́те Го́спода с Небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́, вси Ангели Его́,/ хвали́те Его́, вся Си́лы Его́.// Тебе́ подоба́ет песнь Бо́гу.

равноап. кнг. Ольги на 4

Стих: На 4: Хвали́те Его́ на силах Его,/

хвали́те Его́ по мно́жеству вели́чествия Его́.

Восхва́лим, о бра́тие,/ Спа́са на́шего и Го́спода/ за превели́кая благодея́ния Его́:/ Той бо, Человеколю́бец сый,/ в се́рдце прама́тере на́шея О́льги/ вложи́ огнь любве́ Боже́ственныя/ и по ней в земли́ на́шей яви́ се́яния Своего́ плоды́ пребога́тыя:/ в князе́х на́ших – к Ца́рствию Го́рнему вожди́ неле́стныя,/ во архиере́ех – наста́вники му́дрыя ко спасе́нию/ и во вся́ком ли́це преподо́бных – столпы́ ве́ры и благоче́стия,// и́хже моли́твами спаса́ет от сме́рти ду́ши на́ша.

Стих: Хвали́те Его́ во гла́се тру́бнем,/

хвали́те Его́ во псалти́ри и гу́слех.

Восхва́лим, о бра́тие,/ Спа́са на́шего и Го́спода/ за превели́кая благодея́ния Его́:/ Той бо, Человеколю́бец сый,/ в се́рдце прама́тере на́шея О́льги/ вложи́ огнь любве́ Боже́ственныя/ и по ней в земли́ на́шей яви́ се́яния Своего́ плоды́ пребога́тыя:/ в князе́х на́ших – к Ца́рствию Го́рнему вожди́ неле́стныя,/ во архиере́ех – наста́вники му́дрыя ко спасе́нию/ и во вся́ком ли́це преподо́бных – столпы́ ве́ры и благоче́стия,// и́хже моли́твами спаса́ет от сме́рти ду́ши на́ша.

Стих: Хвали́те Его́ в тимпа́не и ли́це,/

хвали́те Его́ во стру́нах и орга́не.

Воспо́йте Го́сподеви песнь но́ву,/ дубра́вы и до́ли земли́ Росси́йския,/ в па́мять наста́вницы на́шея,/ и воскли́кните Бо́гу гла́сом ра́дования,/ го́ры и хо́лми, и́дольскими же́ртвами дре́вле оскверни́вшиися/ и поги́бели оте́ц на́ших служи́вшии,/ ны́не же росо́ю благода́ти Творца́ Своего́ окропи́вшиися,/ и Кресто́м Сы́на Его́ осене́ннии,// и спокло́ншиися с на́ми Спаса́ющему ду́ши на́ша.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./

Вся́кое дыха́ние да хва́лит Го́спода.

По грехо́м на́шим умно́жишася в нас безу́мнии,/ и́же не то́кмо глаго́лют в сердце́х свои́х – несть Бог,/ но и пропове́дуют нам уче́ния поги́бельная и развраще́нная,/ малоду́шныя от Святы́я Це́ркве отторга́ющая,/ оба́че от сих, моли́твами блаже́нныя О́льги,// да спасе́т Госпо́дь ду́ши на́ша.

Сла́ва, глас 8:

Сла́ва Отцу́, и Сы́ну, и Свято́му Ду́ху.

О ма́ти на́ша возлю́бленная,/ рцы нам, ка́ко благода́тию Вы́шняго/ вся ко́зни вра́жия препобеди́ла еси́,/ да и мы, тобо́ю науче́ннии,// иску́сни яви́мся спаса́ти ду́ши на́ша.

И ны́не, глас 8:

И ны́не, и при́сно, и во ве́ки веко́в. Ами́нь.

Богоро́дице, Ма́ти Безневе́стная,/ Ты нам прибе́жище и си́ла,/ Ты еси́ упова́ние на́ше и стена́ неруши́мая,/ не отве́рзи нас от Твоего́ лица́,/ но моли́ Сы́на Твоего́ и Бо́га на́шего,// да спасе́т Тобо́ю ду́ши на́ша.

Священник: Сла́ва Тебе́, Показа́вшему нам свет.

Славословие великое

Лик: Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя вели́кия ра́ди сла́вы Твоея́. Го́споди, Царю́ Небе́сный, Боже, О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас. Взе́мляй грехи́ ми́ра, приими́ моли́тву на́шу. Седя́й одесну́ю Отца́, поми́луй нас. Я́ко Ты еси́ Еди́н Свят; Ты еси́ Еди́н Госпо́дь, Иису́с Христо́с, в сла́ву Бо́га Отца́, ами́нь.

На всяк день благословлю́ Тя и восхвалю́ и́мя Твое́ во ве́ки, и в век ве́ка. Сподо́би, Го́споди, в день сей без греха́ сохрани́тися нам. Благослове́н еси́, Го́споди Бо́же оте́ц на́ших, и хва́льно и просла́влено и́мя Твое́ во ве́ки, ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м (Трижды).

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́.

Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой, я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас (Трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.

Святы́й Безсме́ртный, поми́луй нас.

Таже высочайшим гласом: Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропари в конец Утрени

Тропарь равноап. кнг. Ольги

Глас 1: Крила́ми богоразу́мия впери́вши твой ум,/ возлете́ла еси́ превы́ше ви́димыя тва́ри,/ взыска́вши Бо́га и Творца́ вся́ческих,/ и, То́го обре́тши, па́ки рожде́ние Креще́нием прия́ла еси́,/ дре́ва живо́тнаго наслажда́ющися, нетле́нна во ве́ки пребыва́еши,// О́льго присносла́вная.

Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь.

Глас 1: Гаврии́лу веща́вшу Тебе́, Де́во, ра́дуйся,/ со гла́сом воплоща́шеся всех Влады́ка/ в Тебе́, святе́м киво́те,/ я́коже рече́ пра́ведный Дави́д,/ яви́лася еси́ ши́ршая Небе́с,/ поноси́вши Зижди́теля Твоего́:/ сла́ва Все́льшемуся в Тя;/ сла́ва Проше́дшему из Тебе́;// сла́ва Свободи́вшему нас Рождество́м Твои́м.

Сугубая ектения

Диакон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй (трижды). ( на каждое прошение)

Священник: Яко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Ектения просительная

Диакон: Испо́лним у́треннюю моли́тву на́шу Го́сподеви.

Лик: Го́споди, поми́луй. ( на каждое прошение)

Диакон: Дне всего́ соверше́нна, свя́та, ми́рна и безгре́шна у Го́спода про́сим.

Лик: Пода́й, Го́споди. ( на каждое прошение)

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: Я́ко Бог ми́лости и щедро́т и человеколю́бия еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Священник: Мир всем.

Лик: И ду́хови твоему́.

Диакон: Главы́ на́ша Го́сподеви прикло́ним.

Лик: Тебе́, Го́споди.

Священник: Твое́ бо есть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Диакон: Прему́дрость.

Лик: Благослови́.

Священник: Сый благослове́н Христо́с, Бог наш, всегда́, ны́не и при́сно, и во ве́ки веко́в.

Лик: Ами́нь. Утверди́, Бо́же, святу́ю правосла́вную ве́ру, правосла́вных христиа́н во ве́к ве́ка.

Священник: Пресвята́я Богоро́дице, спаси́ нас.

Лик: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Священник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Го́споди, поми́луй (трижды). Благослови́.

Отпуст

Христо́с И́стинный Бог наш, моли́твами Пречи́стыя Своея́ Ма́тере, равноап. кнг. Ольги, и всех святы́х, поми́лует и спасе́т нас, я́ко Благ и Человеколю́бец.

Многолетие

Лик: Вели́каго господи́на и отца́ на́шего Кири́лла, Святе́йшаго Патриа́рха Моско́вскаго и всея́ Руси́,/ и господи́на на́шего высокопреосвяще́ннейшаго [или́ преосвяще́ннейшаго] и́мярек, митрополи́та [или́ архиепи́скопа, или́ епи́скопа] его́ же есть о́бласть,/ богохрани́мую страну́ на́шу Росси́йскую, вла́сти и во́инство ея́,/ настоя́теля, бра́тию, прихо́жан свята́го хра́ма сего́, и вся правосла́вныя христиа́ны,// Го́споди, сохрани́ их на мно́гая ле́та.

1-й час

Чтец: Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 5

Глаго́лы моя́ внуши́, Го́споди, разуме́й зва́ние мое́. Вонми́ гла́су моле́ния моего́, Царю́ мой и Бо́же мой, я́ко к Тебе́ помолю́ся, Го́споди. Зау́тра услы́ши глас мой, зау́тра предста́ну Ти, и у́зриши мя. Я́ко Бог не хотя́й беззако́ния, Ты еси́: не присели́тся к Тебе́ лука́внуяй, ниже́ пребу́дут беззако́нницы пред очи́ма Твои́ма: возненави́дел еси́ вся де́лающыя беззако́ние. Погуби́ши вся глаго́лющыя лжу: му́жа крове́й и льсти́ва гнуша́ется Госпо́дь. Аз же мно́жеством ми́лости Твоея́, вни́ду в дом Твой, поклоню́ся ко хра́му свято́му Твоему́, в стра́се Твое́м. Го́споди, наста́ви мя пра́вдою Твое́ю, враг мои́х ра́ди испра́ви пред Тобо́ю путь мой. Я́ко несть во усте́х их и́стины, се́рдце их су́етно, гроб отве́рст горта́нь их: язы́ки свои́ми льща́ху. Суди́ им, Бо́же, да отпаду́т от мы́слей свои́х, по мно́жеству нече́стия их изри́ни я́, я́ко преогорчи́ша Тя, Го́споди. И да возвеселя́тся вси упова́ющии на Тя, во век возра́дуются, и всели́шися в них, и похва́лятся о Тебе́ лю́бящии и́мя Твое́. Я́ко Ты благослови́ши пра́ведника, Го́споди: я́ко ору́жием благоволе́ния венча́л еси́ нас.

Псалом 89

Го́споди, прибе́жище был еси́ нам в род и род. Пре́жде да́же гора́м не бы́ти и созда́тися земли́ и вселе́нней, и от ве́ка и до ве́ка Ты еси́. Не отврати́ челове́ка во смире́ние, и рекл еси́: обрати́теся, сы́нове челове́честии. Я́ко ты́сяща лет пред очи́ма Твои́ма, Го́споди, я́ко день вчера́шний, и́же мимои́де, и стра́жа нощна́я. Уничиже́ния их ле́та бу́дут. Утро я́ко трава́ мимои́дет, у́тро процвете́т и пре́йдет: на ве́чер отпаде́т ожесте́ет и и́зсхнет. Я́ко исче́зохом гне́вом Твои́м, и я́ростию Твое́ю смути́хомся. Положи́л еси́ беззако́ния на́ша пред Тобо́ю: век наш в просвеще́ние лица́ Твоего́. Я́ко вси дни́е на́ши оскуде́ша, и гне́вом Твои́м исчезо́хом, ле́та на́ша я́ко паучи́на поуча́хуся. Дни́е лет на́ших, в ни́хже се́дмьдесят лет, а́ще же в си́лах, о́смьдесят лет, и мно́жае их труд и боле́знь: я́ко прии́де кро́тость на ны, и нака́жемся. Кто весть держа́ву гне́ва Твоего́, и от стра́ха Твоего́, я́рость Твою́ исчести́? Десни́цу Твою́ та́ко скажи́ ми, и окова́нныя се́рдцем в му́дрости. Обрати́ся, Го́споди, доко́ле? И умоле́н бу́ди на рабы́ Твоя́. Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны их. И бу́ди све́тлость Го́спода Бо́га на́шего на нас, и дела́ рук на́ших испра́ви на нас, и де́ло рук на́ших испра́ви.

Псалом 100

Ми́лость и суд воспою́ Тебе́, Го́споди. Пою́ и разуме́ю в пути́ непоро́чне, когда́ прии́деши ко мне? Прехожда́х в незло́бии се́рдца моего́ посреде́ до́му моего́. Не предлага́х пред очи́ма мои́ма вещь законопресту́пную: творя́щыя преступле́ние возненави́дех. Не прильпе́ мне се́рдце стропти́во, уклоня́ющагося от мене́ лука́ваго не позна́х. Оклевета́ющаго тай и́скренняго своего́, сего́ изгоня́х: го́рдым о́ком, и несы́тым се́рдцем, с сим не ядя́х. О́чи мои́ на ве́рныя земли́, посажда́ти я́ со мно́ю: ходя́й по пути́ непоро́чну, сей ми служа́ше. Не живя́ше посреде́ до́му моего́ творя́й горды́ню, глаго́ляй непра́ведная, не исправля́ше пред очи́ма мои́ма. Во у́трия избива́х вся гре́шныя земли́, е́же потреби́ти от гра́да Госпо́дня вся де́лающыя беззако́ние.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Аллилу́иа, аллилу́иа, аллилу́иа, сла́ва Тебе́ Бо́же. (Трижды)

Го́споди, поми́луй. (Трижды)

Сла́ва Отцу́, и Сы́ну, и Свято́му Ду́ху.

Тропарь равноап. кнг. Ольги, глас 1

Крила́ми богоразу́мия впери́вши твой ум,/ возлете́ла еси́ превы́ше ви́димыя тва́ри,/ взыска́вши Бо́га и Творца́ вся́ческих,/ и, То́го обре́тши, па́ки рожде́ние Креще́нием прия́ла еси́,/ дре́ва живо́тнаго наслажда́ющися, нетле́нна во ве́ки пребыва́еши,/ О́льго присносла́вная.

Чтец: И ны́не, и при́сно, и во ве́ки веко́в. Ами́нь.

Богородичен: Что Тя нарече́м, о Благода́тная?/ Не́бо, я́ко возсия́ла еси́ Со́лнце Пра́вды./ Рай, я́ко прозябла́ еси́ цвет нетле́ния./ Де́ву, я́ко пребыла́ еси́ нетле́нна./ Чи́стую Ма́терь, я́ко име́ла еси́ на святы́х Твои́х объя́тиях Сы́на, всех Бо́га./ Того́ моли́ спасти́ся душа́м на́шим.

Стопы́ моя́ напра́ви по словеси́ Твоему́ / и да не облада́ет мно́ю вся́кое беззако́ние.

Изба́ви мя от клеветы́ челове́ческия, / и сохраню́ за́поведи Твоя́.

Лице́ Твое́ просвети́ на раба́ Твоего́ / и нау́чи мя оправда́нием Твои́м.

Да испо́лнятся уста́ моя́ хвале́ния Твоего́, Го́споди, / я́ко да воспою́ сла́ву Твою́, / весь день великоле́пие Твое́.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды, с крестным знамением и поясным поклоном)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Священник: Я́ко Твое́ есть Ца́рство и сила, и сла́ва Отца́ и Сы́на и Свята́го Ду́ха, и ны́не и при́сно и во ве́ки веко́в.

Чтец: Ами́нь.

Кондак равноап. кнг. Ольги, глас 4

Воспое́м днесь Благоде́теля всех Бо́га,/ просла́вльшаго в Росси́и О́льгу Богому́друю,/ да моли́твами ея́/ пода́ст душа́м на́шим/ грехо́в оставле́ние.

Го́споди, поми́луй (40 раз).

И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди, поми́луй, (Трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Честне́йшую Херуви́м/ и сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.

И́менем Госпо́дним благослови́, о́тче.

Священник: Бо́же, уще́дри ны и благослови́ ны, просвети́ лице́ Твое́ на ны и поми́луй ны.

Чтец: Аминь.

Священник: Христе́, Све́те И́стинный, просвеща́яй и освяща́яй вся́каго челове́ка, гряду́щаго в мир, да зна́менается на нас свет лица́ Твоего́, да в нем у́зрим Свет Непристу́пный: и испра́ви стопы́ на́ша к де́ланию за́поведей Твои́х, моли́твами Пречи́стыя Твоея́ Ма́тере, и всех Твои́х святы́х, ами́нь.

Лик: Глас 8: Взбра́нной Воево́де победи́тельная,/ я́ко изба́вльшеся от злых,/ благода́рственная воспису́ем Ти раби́ Твои́, Богоро́дице,/ но я́ко иму́щая держа́ву непобеди́мую,/ от вся́ких нас бед свободи́, да зове́м Ти;// ра́дуйся, Неве́сто Неневе́стная.

Священник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Го́споди, поми́луй, (Трижды). Благослови́.

Отпуст

Христо́с И́стинный Бог наш, моли́твами Пречи́стыя Своея́ Ма́тере, преподо́бных и богоно́сных оте́ц на́ших и всех святы́х, поми́лует и спасе́т нас, я́ко Благ и Человеколю́бец.

Лик: Господи, помилуй, (Трижды).

3-й час

Священник: Благослове́н Бог наш всегда́, ны́не и при́сно, и во ве́ки веко́в.

Чтец: Ами́нь.

Сла́ва Тебе́, Бо́же на́ш, сла́ва Тебе́.

Царю́ небе́сный, Уте́шителю, Ду́ше и́стины, И́же везде́ сы́й и вся́ исполня́яй, Сокро́вище благи́х и жи́зни Пода́телю: прииди́ и всели́ся в ны́, и очи́сти ны́ от вся́кия скве́рны, и спаси́, Бла́же, ду́шы на́шя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (Трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Священник: Я́ко Твое́ есть Ца́рство и сила и Слава Отца и Сына и Святого Духа, ныне и присно и во веки веков.

Чтец: Ами́нь.

Го́споди, поми́луй, (12 раз)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалмы

Псалом 16

Услы́ши, Го́споди, пра́вду мою́, вонми́ моле́нию моему́, внуши́ моли́тву мою́ не во устна́х льсти́вых. От лица́ Твоего́ судьба́ моя́ изы́дет, óчи мои́ да ви́дита правоты́. Искуси́л eси́ се́рдце мое́, посети́л eси́ но́щию, искуси́л мя eси́, и не обре́теся во мне непра́вда. Я́ко да не возглаго́лют уста́ моя́ дел челове́ческих, за словеса́ усте́н Твои́х аз сохрани́х пути́ же́стоки. Соверши́ стопы́ моя́ во стезя́х Твои́х, да не подви́жутся стопы́ моя́. Аз воззва́х, я́ко услы́шал мя eси́, Бо́же, приклони́ у́хо Твое́ мне и услы́ши глаго́лы моя́. Удиви́ ми́лости Твоя́, спаса́яй упова́ющыя на Тя от проти́вящихся десни́це Твое́й. Сохрани́ мя, Го́споди, я́ко зе́ницу óка, в кро́ве крилу́ Твоéю покры́еши мя. От лица́ нечести́вых остра́стших мя, врази́ мои́ ду́шу мою́ одержа́ша. Тук свой затвори́ша, уста́ их глаго́лаша горды́ню. Изгоня́щии мя ны́не обыдо́ша мя, óчи свои́ возложи́ша уклони́ти на зе́млю. Объя́ша мя я́ко лев гото́в на лов и я́ко ски́мен обита́яй в та́йных. Воскресни́, Го́споди, предвари́ я́ и запни́ им, изба́ви ду́шу мою́ от нечести́ваго, oру́жие Твое́ от враг руки́ Твоея́, Го́споди, от ма́лых от земли́, раздели́ я́ в животе́ их, и сокрове́нных Твои́х испо́лнися чре́во их, насы́тишася сыно́в, и оста́виша оста́нки младе́нцeм свои́м. Аз же пра́вдою явлю́ся лицу́ Твоему́, насы́щуся, внегда́ яви́ти ми ся сла́ве Твое́й.

Псалом 24

К Тебе́, Го́споди, воздвиго́х ду́шу мою́, Бо́же мой, на Тя упова́х, да не постыжу́ся во век, ниже́ да посмею́т ми ся врази́ мои́, и́бо вси терпя́щии Тя не постыдя́тся. Да постыдя́тся беззако́ннующии вотще́. Пути́ Твоя́, Го́споди, скажи́ ми, и стезя́м Твои́м научи́ мя. Наста́ви мя на и́стину Твою́, и научи́ мя, я́ко Ты еси́ Бог Спас мой, и Тебе́ терпе́х весь день. Помяни́ щедро́ты Твоя́, Го́споди, и ми́лости Твоя́, я́ко от ве́ка суть. Грех ю́ности моея́, и неве́дения моего́ не помяни́, по ми́лости Твое́й помяни́ мя Ты, ра́ди бла́гости Твоея́, Го́споди. Благ и прав Госпо́дь, сего́ ра́ди законоположи́т согреша́ющым на пути́. Наста́вит кро́ткия на суд, научи́т кро́ткия путе́м Свои́м. Вси путие́ Госпо́дни ми́лость и и́стина, взыска́ющым заве́та Его́, и свиде́ния Его́. Ра́ди и́мене Твоего́, Го́споди, и очи́сти грех мой, мног бо есть. Кто есть челове́к боя́йся Го́спода? Законоположи́т eму́ на пути́, eго́же изво́ли. Душа́ eго́ во благи́х водвори́тся, и се́мя eго́ насле́дит зе́млю. Держа́ва Госпо́дь боя́щихся Его́, и заве́т Его́ яви́т им. О́чи мои́ вы́ну ко Го́споду, я́ко Той исто́ргнет от се́ти но́зе мои́. При́зри на мя и поми́луй мя, я́ко единоро́д и нищ есмь аз. Ско́рби се́рдца моего́ умно́жишася, от нужд мои́х изведи́ мя. Виждь смире́ние мое́, и труд мой, и оста́ви вся грехи́ моя́. Виждь враги́ моя́, я́ко умно́жишася, и ненавиде́нием непра́ведным возненави́деша мя. Сохрани́ ду́шу мою́, и изба́ви мя, да не постыжу́ся, я́ко упова́х на Тя. Незло́бивии и пра́вии прилепля́хуся мне, я́ко потерпе́х Тя, Го́споди. Изба́ви, Бо́же, Изра́иля от всех скорбе́й eго́.

Псалом 50

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Трижды)

Го́споди, поми́луй. (Трижды)

Сла́ва Отцу́, и Сы́ну, и Свято́му Ду́ху.

Тропарь равноап. кнг. Ольги, глас 1

Крила́ми богоразу́мия впери́вши твой ум,/ возлете́ла еси́ превы́ше ви́димыя тва́ри,/ взыска́вши Бо́га и Творца́ вся́ческих,/ и, То́го обре́тши, па́ки рожде́ние Креще́нием прия́ла еси́,/ дре́ва живо́тнаго наслажда́ющися, нетле́нна во ве́ки пребыва́еши,/ О́льго присносла́вная.

Чтец: И ны́не, и при́сно, и во ве́ки веко́в. Ами́нь.

Богородичен: Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы/ поми́ловати ду́ши на́ша.

Госпо́дь Бог благослове́н,/ благослове́н Госпо́дь день дне,/ поспеши́т нам Бог спасе́ний на́ших,/ Бог наш, Бог спаса́ти.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Священник: Я́ко Твое́ есть Ца́рство и сила и слава Отца и Сына и Святого Духа, ныне и присно и во веки веков.

Чтец: Ами́нь.

Кондак равноап. кнг. Ольги, глас 4

Воспое́м днесь Благоде́теля всех Бо́га,/ просла́вльшаго в Росси́и О́льгу Богому́друю,/ да моли́твами ея́/ пода́ст душа́м на́шим/ грехо́в оставле́ние.

Го́споди, поми́луй (40 раз).

И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди, поми́луй (Трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

И́менем Госпо́дним благослови́, о́тче.

Священник: Моли́твами святы́х оте́ц на́ших, Го́споди, Иису́се Христе́, Бо́же наш, поми́луй нас.

Чтец: Ами́нь.

Молитва святаго Мардария

Влады́ко Бо́же О́тче Вседержи́телю, Го́споди Сы́не Единоро́дный Иису́се Христе́, и Святы́й Ду́ше, Еди́но Божество́, Еди́на Си́ла, поми́луй мя, гре́шнаго, и и́миже ве́си судьба́ми, спаси́ мя, недосто́йнаго раба́ Твоего́, я́ко благослове́н еси́ во ве́ки веко́в, ами́нь.

6‑й час

Чтец: Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалмы

Псалом 53

Бо́же, во и́мя Твое́ спаси́ мя, и в си́ле Твое́й суди́ ми. Бо́же, услы́ши моли́тву мою́, внуши́ глаго́лы уст мои́х. Я́ко чу́ждии воста́ша на мя и кре́пцыи взыска́ша ду́шу мою́, и не предложи́ша Бо́га пред собо́ю. Се бо Бог помога́ет ми, и Госпо́дь засту́пник души́ мое́й. Отврати́т зла́я враго́м мои́м, и́стиною Твое́ю потреби́ их. Во́лею пожру́ Тебе́, испове́мся и́мени Твоему́, Го́споди, я́ко бла́го, я́ко от вся́кия печа́ли изба́вил мя еси́, и на враги́ моя́ воззре́ о́ко мое́.

Псалом 54

Внуши́, Бо́же, моли́тву мою́ и не пре́зри моле́ния моего́. Вонми́ ми и услы́ши мя: возскорбе́х печа́лию мое́ю и смято́хся. От гла́са вра́жия и от стуже́ния гре́шнича, я́ко уклони́ша на мя беззако́ние и во гне́ве враждова́ху ми. Се́рдце мое́ смяте́ся во мне и боя́знь сме́рти нападе́ на мя. Страх и тре́пет прии́де на мя и покры́ мя тьма. И рех: кто даст ми криле́, я́ко голуби́не? И полещу́, и почи́ю? Се удали́хся бе́гая и водвори́хся в пусты́ни. Ча́ях Бо́га, спаса́ющаго мя от малоду́шия и от бу́ри. Потопи́, Го́споди, и раздели́ язы́ки их: я́ко ви́дех беззако́ние и пререка́ние во гра́де. Днем и но́щию обы́дет и́ по стена́м eго́. Беззако́ние и труд посреде́ eго́ и непра́вда. И не оскуде́ от стогн eго́ ли́хва и лесть. Я́ко а́ще бы враг поноси́л ми, претерпе́л бых у́бо, и а́ще бы ненави́дяй мя на мя́ велере́чевал, укры́л бых ся от него́. Ты же, челове́че равноду́шне, влады́ко мой и зна́емый мой, и́же ку́пно наслажда́лся еси́ со мно́ю бра́шен, в дому́ Бо́жии ходи́хом единомышле́нием. Да прии́дет же смерть на ня, и да сни́дут во ад жи́ви, я́ко лука́вство в жили́щах их, посреде́ их. Аз к Бо́гу воззва́х, и Госпо́дь услы́ша мя. Ве́чер и зау́тра, и полу́дне пове́м, и возвещу́, и услы́шит глас мой. Изба́вит ми́ром ду́шу мою́ от приближа́ющихся мне, я́ко во мно́зе бя́ху со мно́ю. Услы́шит Бог и смири́т я́, Сый пре́жде век. Несть бо им измене́ния, я́ко не убоя́шася Бо́га. Простре́ ру́ку свою́ на воздая́ние, оскверни́ша заве́т Его́. Раздели́шася от гне́ва лица́ Его́, и прибли́жишася сердца́ их, умя́кнуша словеса́ их па́че еле́а, и та суть стре́лы. Возве́рзи на Го́спода печа́ль твою́, и Той тя препита́ет, не даст в век молвы́ пра́веднику. Ты же, Бо́же, низведе́ши их во студене́ц истле́ния, му́жие крове́й и льсти не преполовя́т дней свои́х. Аз же, Го́споди, упова́ю на Тя.

Псалом 90

Живы́й в по́мощи Вы́шняго, в кро́ве Бо́га небе́снаго водвори́тся. Рече́т Го́сподеви: Засту́пник мой еси́ и прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи и от словесе́ мяте́жна, плещма́ Свои́ма осени́т тя, и под криле́ Его́ наде́ешися: ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тьме преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тьма одесну́ю тебе́, к тебе́ же не прибли́жится, оба́че очи́ма твои́ма смо́триши и воздая́ние гре́шников у́зриши. Я́ко Ты, Го́споди, упова́ние мое́, Вы́шняго положи́л еси́ прибе́жище твое́. Не прии́дет к тебе́ зло, и ра́на не прибли́жится телеси́ твоему́, я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́, на а́спида и васили́ска насту́пиши, и попере́ши льва и зми́я. Я́ко на Мя упова́, и изба́влю и́, покры́ю и́, я́ко позна́ и́мя Мое́. Воззове́т ко Мне, и услы́шу eго́, с ним есмь в ско́рби, изму́ eго́ и просла́влю eго́, долгото́ю дний испо́лню eго́ и явлю́ eму́ спасе́ние Мое́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Аллилу́иа, аллилу́иа, аллилу́иа, сла́ва Тебе́ Бо́же. (Трижды)

Го́споди, поми́луй. (Трижды)

Сла́ва Отцу́, и Сы́ну, и Свято́му Ду́ху.

Тропарь равноап. кнг. Ольги, глас 1

Крила́ми богоразу́мия впери́вши твой ум,/ возлете́ла еси́ превы́ше ви́димыя тва́ри,/ взыска́вши Бо́га и Творца́ вся́ческих,/ и, То́го обре́тши, па́ки рожде́ние Креще́нием прия́ла еси́,/ дре́ва живо́тнаго наслажда́ющися, нетле́нна во ве́ки пребыва́еши,/ О́льго присносла́вная.

Чтец: И ны́не, и при́сно, и во ве́ки веко́в. Ами́нь.

Богородичен: Я́ко не и́мамы дерзнове́ния за премно́гия грехи́ на́ша,/ Ты и́же от Тебе́ Ро́ждшагося моли́, Богоро́дице Де́во,/ мно́го бо мо́жет моле́ние Ма́тернее ко благосе́рдию Влады́ки./ Не пре́зри гре́шных мольбы́, Всечи́стая,/ я́ко ми́лостив есть и спасти́ моги́й,/ И́же и страда́ти о нас изво́ливый.

Ско́ро да предваря́т ны щедро́ты Твоя́, Го́споди,/ я́ко обнища́хом зело́;/ помози́ нам, Бо́же, Спа́се наш,/ сла́вы ра́ди И́мене Твоего́, Го́споди, изба́ви нас/ и очи́сти грехи́ на́ша, И́мене ра́ди Твоего́.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Священник: Я́ко Твое́ есть Ца́рство и сила и слава Отца и Сына и Святого Духа, ныне и присно и во веки веков.

Чтец: Ами́нь.

Кондак равноап. кнг. Ольги, глас 4

Воспое́м днесь Благоде́теля всех Бо́га,/ просла́вльшаго в Росси́и О́льгу Богому́друю,/ да моли́твами ея́/ пода́ст душа́м на́шим/ грехо́в оставле́ние.

Го́споди, поми́луй (40 раз).

И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди поми́луй (Трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

И́менем Госпо́дним благослови́, о́тче.

Священник: Моли́твами святы́х оте́ц на́ших, Го́споди, Иису́се Христе́, Бо́же наш, поми́луй нас.

Чтец: Ами́нь.

Молитва свт. Василия Великаго

Бо́же и Го́споди сил и всея́ тва́ри Соде́телю, И́же за милосе́рдие безприкла́дныя ми́лости Твоея́ Единоро́днаго Сы́на Твоего́, Го́спода на́шего Иису́са Христа́, низпосла́вый на спасе́ние ро́да на́шего, и честны́м Его́ Кресто́м рукописа́ние грех на́ших растерза́вый, и победи́вый тем нача́ла и вла́сти тьмы. Сам, Влады́ко Человеколю́бче, приими́ и нас, гре́шных, благода́рственныя сия́ и моле́бныя моли́твы и изба́ви нас от вся́каго всегуби́тельнаго и мра́чнаго прегреше́ния и всех озло́бити нас и́щущих ви́димых и неви́димых враг. Пригвозди́ стра́ху Твоему́ пло́ти на́ша и не уклони́ серде́ц на́ших в словеса́ или́ помышле́ния лука́вствия, но любо́вию Твое́ю уязви́ ду́ши на́ша, да, к Тебе́ всегда́ взира́юще и е́же от Тебе́ све́том наставля́еми, Тебе́, непристу́пнаго и присносу́щнаго зря́ще Све́та, непреста́нное Тебе́ испове́дание и благодаре́ние возсыла́ем, Безнача́льному Отцу́ со Единоро́дным Твои́м Сы́ном и Всесвяты́м, и Благи́м, и Животворя́щим Твои́м Ду́хом ны́не, и при́сно, и во ве́ки веко́в, ами́нь.

Божественная Литургия свт. Иоанна Златоуста

Литургия оглашенных

Диакон: Благослови́, влады́ко.

Священник: Благослове́но Ца́рство Отца́ и Сы́на, и Свята́го Ду́ха, ны́не и при́сно, и во ве́ки веко́в.

Лик: Ами́нь.

Ектения великая

Диакон: Ми́ром Го́споду помо́лимся.

Лик: Го́споди, поми́луй.

Диакон: О свы́шнем ми́ре и спасе́нии душ на́ших, Го́споду помо́лимся.

Лик: Го́споди, поми́луй.

Диакон: О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.

Лик: Го́споди, поми́луй.

Диакон: О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.

Лик: Го́споди, поми́луй.

Диакон: О Вели́ком Господи́не и отце́ на́шем, Святе́йшем Патриа́рхе Кири́лле, честне́м пресви́терстве, во Христе́ диа́констве и о всем при́чте и лю́дех, Го́споду помо́лимся.

Лик: Го́споди, поми́луй.

Диакон: О Богохрани́мей стране́ на́шей, власте́х и во́инстве ея́, Го́споду помо́лимся.

Лик: Го́споди, поми́луй.

Диакон: О гра́де сем, вся́ком гра́де, стране́ и ве́рою живу́щих в ни́х, Го́споду помо́лимся.

Лик: Го́споди, поми́луй.

Диакон: О бла́горастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.

Лик: Го́споди, поми́луй.

Диакон: О пла́вающих, путеше́ствующих, неду́гующих, стра́ждущих, плене́нных и о спасе́нии их, Го́споду помо́лимся.

Лик: Го́споди, поми́луй.

Диакон: О изба́витися нам от вся́кия ско́рби, гне́ва и ну́жды, Го́споду помо́лимся.

Лик: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

И священник возглашает: Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Диакон же, поклонившись, отходит от своего места и стоит перед иконой Спасителя, держа орарь тремя перстами правой руки.

Первый изобразительный антифон

1 Лик: Благослови́, душе́ моя́, Го́спода./ Благослове́н еси́, Го́споди./ Благослови́, душе́ моя́, Го́спода,/ и вся вну́тренняя моя́ И́мя святое́ Его́.

2 Лик: Благослови́, душе́ моя́, Го́спода,/ и не забыва́й всех воздая́ний Его́.

1 Лик: Очища́ющаго вся беззако́ния твоя́,/ исцеля́ющаго вся неду́ги твоя́.

2 Лик: Избавля́ющаго от истле́ния живо́т твой,/ венча́ющаго тя ми́лостию и щедро́тами.

1 Лик: Исполня́ющаго во благи́х жела́ние твое́:/ обнови́тся, я́ко о́рля, ю́ность твоя́.

2 Лик: Щедр и ми́лостив Госпо́дь,/ долготерпели́в и многоми́лостив.

1 Лик: Благослови́, душе́ моя́, Го́спода,/ и вся вну́тренняя моя́ И́мя святое́ Его́./ Благослове́н еси́, Го́споди.

По окончании антифона, став на обычном месте и поклонившись, диакон возглашает:

Малая ектения

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Пресвяту́ю, Пречи́стую, Преблагослове́нную, Сла́вную Влады́чицу нашу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

И священник возглашает: Я́ко Твоя́ держа́ва, и Твое́ есть Ца́рство и си́ла и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.

Лик: Ами́нь.

Второй изобразительный антифон

1 Лик: Хвали́, душе́ моя́, Го́спода./ Восхвалю́ Го́спода в животе́ мое́м,/ пою́ Бо́гу моему́, до́ндеже есмь.

2 Лик: Не наде́йтеся на кня́зи, на сы́ны челове́ческия,/ в ни́хже несть спасе́ния.

1 Лик: Изы́дет дух его́,/ и возврати́тся в зе́млю свою́:/ в той день поги́бнут вся помышле́ния его́.

2 Лик: Блаже́н, ему́же Бог Иа́ковль помо́щник его́,/ упова́ние его́ на Го́спода Бо́га своего́.

1 Лик: Сотво́ршаго не́бо и зе́млю,/ мо́ре и вся, я́же в них.

2 Лик: Храня́щаго и́стину в век,/ творя́щаго суд оби́димым,/ даю́щаго пи́щу а́лчущим.

1 Лик: Госпо́дь реши́т окова́нныя,/ Госпо́дь умудря́ет слепцы́.

2 Лик: Госпо́дь возво́дит низве́рженныя,/ Госпо́дь лю́бит пра́ведники.

1 Лик: Госпо́дь храни́т прише́льцы,/ си́ра и вдову́ прии́мет,/ и путь гре́шных погуби́т.

2 Лик: Воцари́тся Госпо́дь во век,/ Бог твой, Сио́не, в род и род.

Лик: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Песнь Господу Иисусу Христу

Лик: Единоро́дный Сы́не и Сло́ве Бо́жий, Безсме́ртен Сый / и изво́ливый спасе́ния на́шего ра́ди / воплоти́тися от Святы́я Богоро́дицы и Присноде́вы Мари́и, / непрело́жно вочелове́чивыйся, / распны́йся же, Христе́ Бо́же, сме́ртию смерть попра́вый, / Еди́н Сый Святы́я Тро́ицы, / спрославля́емый Отцу́ и Свято́му Ду́ху, спаси́ нас.

По окончании антифона, став на обычном месте и поклонившись, диакон возглашает:

Малая ектения

Диакон: Па́ки и па́ки ми́ром Го́споду помо́лимся.

Лик: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Пресвяту́ю, Пречи́стую, Преблагослове́нную, Сла́вную Влады́чицу нашу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: И́же о́бщия сия́ и согла́сныя дарова́вый нам моли́твы, и́же и двема́ или́ трем согласу́ющимся о и́мени Твое́м проше́ния пода́ти обеща́вый, Сам и ны́не раб Твои́х проше́ния к поле́зному испо́лни, подая́ нам и в настоя́щем ве́це позна́ние Твоея́ и́стины, и в бу́дущем живо́т ве́чный да́руя.

И священник возглашает: Я́ко благ и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Здесь открываются Царские врата на малый вход.

Блаженны, третий изобразительный антифон

1 Лик: Во Ца́рствии Твое́м помяни́ нас, Го́споди, / егда́ прии́деши, во Ца́рствии Твое́м.

На 12
1 Лик: Блаже́ни ни́щии ду́хом, / я́ко тех есть Ца́рство Небе́сное.

2 Лик: Блаже́ни пла́чущии, / я́ко ти́и уте́шатся.

на 10:
1 Лик: Блаже́ни кро́тции, / я́ко ти́и насле́дят зе́млю.

2 Лик: Блаже́ни а́лчущии и жа́ждущии пра́вды, / я́ко ти́и насы́тятся.

на 8:
1 Лик: Блаже́ни ми́лостивии, / я́ко ти́и поми́ловани бу́дут.

2 Лик: Блаже́ни чи́стии се́рдцем, / я́ко ти́и Бо́га у́зрят.

на 6:
1 Лик: Блаже́ни миротво́рцы, / я́ко ти́и сы́нове Бо́жии нареку́тся.

2 Лик: Блаже́ни изгна́ни пра́вды ра́ди, / я́ко тех есть Ца́рство Небе́сное.

на 4:
1 Лик: Блаже́ни есте́, егда́ поно́сят вам, / и изжену́т, и реку́т всяк зол глаго́л на вы, лжу́ще Мене́ ра́ди.

2 Лик: Ра́дуйтеся и весели́теся, / я́ко мзда ва́ша мно́га на Небесе́х.

Малый вход с Евангелием

Диакон: Го́споду помо́лимся.

Лик: Го́споди, поми́луй.

Диакон: Благослови́, влады́ко, святы́й вход.

Священник, благословляя, произносит: Благослове́н вход святы́х Твои́х, всегда́, ны́не и при́сно, и во ве́ки веко́в.

Затем диакон подает священнику для целования св. Евангелие.

По окончании последнего тропаря, диакон, став впереди священника в Царских вратах, возвышает св. Евангелие и, показывая его народу возглашает громогласно:

Прему́дрость, про́сти.

И, сотворив поклон, входит в св. алтарь, а за ним и священник. Диакон кладет св. Евангелие на св. престол.

Входное

В будни: Прииди́те, поклони́мся и припаде́м ко Христу́./ Спаси́ ны, Сы́не Бо́жий,/ во святы́х Ди́вен сый, пою́щия Ти,/ Аллилу́иа. Единожды.

Затем лик поет тропари и кондаки по уставу.

В храме Господском и Богородицы

Тропарь храма.

Тропарь равноап. кнг. Ольги, глас 1

Крила́ми богоразу́мия впери́вши твой ум,/ возлете́ла еси́ превы́ше ви́димыя тва́ри,/ взыска́вши Бо́га и Творца́ вся́ческих,/ и, То́го обре́тши, па́ки рожде́ние Креще́нием прия́ла еси́,/ дре́ва живо́тнаго наслажда́ющися, нетле́нна во ве́ки пребыва́еши,// О́льго присносла́вная.

Сла́ва Отцу́, и Сы́ну, и Свято́му Ду́ху.

Кондак равноап. кнг. Ольги, глас 4

Воспое́м днесь Благоде́теля всех Бо́га,/ просла́вльшаго в Росси́и О́льгу Богому́друю,/ да моли́твами ея́/ пода́ст душа́м на́шим// грехо́в оставле́ние.

И ны́не, и при́сно, и во ве́ки веко́в. Ами́нь.

Кондак храма.

В храме святого

Тропарь храма святого

Тропарь равноап. кнг. Ольги, глас 1

Крила́ми богоразу́мия впери́вши твой ум,/ возлете́ла еси́ превы́ше ви́димыя тва́ри,/ взыска́вши Бо́га и Творца́ вся́ческих,/ и, То́го обре́тши, па́ки рожде́ние Креще́нием прия́ла еси́,/ дре́ва живо́тнаго наслажда́ющися, нетле́нна во ве́ки пребыва́еши,// О́льго присносла́вная.

Кондак храма святого

Сла́ва Отцу́, и Сы́ну, и Свято́му Ду́ху.

Кондак равноап. кнг. Ольги, глас 4

Воспое́м днесь Благоде́теля всех Бо́га,/ просла́вльшаго в Росси́и О́льгу Богому́друю,/ да моли́твами ея́/ пода́ст душа́м на́шим// грехо́в оставле́ние.

И ны́не, и при́сно, и во ве́ки веко́в. Ами́нь.

Кондaк Пресвятой Богородице, глас 6

Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти:/ ускори́ на моли́тву и потщи́ся на умоле́ние,// предста́тельствующи при́сно, Богоро́дице, чту́щих Тя.

По окончании последнего кондака диакон выходит из Царских врат и, сперва показывая орарем на икону Христа, возглашает: Го́споди, спаси́ благочести́выя.

Лик: Го́споди, спаси́ благочести́выя.

Диакон: И услы́ши ны.

Лик: И услы́ши ны.

Также диакон обводит орарем стоящих во храме, возглашая к ним громогласно:

И во ве́ки веко́в.

Лик: Ами́нь.

Трисвятое

Лик: Святы́й Бо́же,/ Святы́й Кре́пкий,/ Святы́й Безсме́ртный, поми́луй нас. (Трижды).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же,/ Святы́й Кре́пкий,/ Святы́й Безсме́ртный, поми́луй нас.

В алтаре

Во время пения священник и диакон и сами читают Трисвятое, совершая и три поклона перед св. престолом.

Диакон: Повели́, влады́ко.

Священник: Благослове́н гряды́й во и́мя Госпо́дне.

Диакон: Благослови́, влады́ко, Го́рний престо́л.

Священник же, благословляя горнее место: Благослове́н еси́ на престо́ле сла́вы Ца́рствия Твоего́, Седя́й на Херуви́мех, всегда́, ны́не и при́сно, и во ве́ки веко́в.

Чтение Апостола

По окончании Трисвятого диакон, возглашает: Во́нмем.

Священник: Мир всем.

Чтец: И ду́хови твоему́.

Диакон: Прему́дрость.

Пятница. Прокимен дня

Чтец: Прокимен, глас 7: Возноси́те Го́спода Бо́га на́шего,/ и покланя́йтеся подно́жию но́гу Его́, я́ко свя́то есть.

Лик: Возноси́те Го́спода Бо́га на́шего,/ и покланя́йтеся подно́жию но́гу Его́, я́ко свя́то есть.

Чтец: Стих: Госпо́дь воцари́ся, да гне́ваются лю́дие.

Лик: Возноси́те Го́спода Бо́га на́шего,/ и покланя́йтеся подно́жию но́гу Его́, я́ко свя́то есть.

Прокимен равноап. кнг. Ольги

Чтец: Прокимен, глас 8: Во всю зе́млю изы́де веща́ние их,/ и в концы́ вселе́нныя глаго́лы их.

Лик: Во всю зе́млю изы́де веща́ние их,/ и в концы́ вселе́нныя глаго́лы их.

Диакон: Прему́дрость.

Во время пения прокимна и чтения Апостола диакон кадит престол, алтарь, служащих, а также иконостас и весь народ.

И чтец надписание Апостола: К Кори́нфяном посла́ния свята́го Апо́стола Па́вла чте́ние.

И паки диакон: Во́нмем.

Рядовое:

Зачало 148. (1Кор.11:8-22)

Бра́тие, несть муж от жены́, но жена́ от му́жа, и́бо не со́здан бысть муж жены́ ра́ди, но жена́ му́жа ра́ди. Сего́ ра́ди должна́ есть жена́ власть име́ти на главе́ А́нгел ра́ди. Оба́че ни муж без жены́, ни жена́ без му́жа, о Го́споде. Я́коже бо жена́ от му́жа, си́це и муж жено́ю, вся же от Бо́га. В вас саме́х суди́те, ле́по ли есть жене́ открове́нне Бо́гу моли́тися? Или́ и не са́мое естество́ учи́т вы, я́ко муж у́бо а́ще власы́ расти́т, безче́стие ему́ есть, жена́ же а́ще власы́ расти́т, сла́ва ей есть? Зане́ расте́ние власо́в вме́сто одея́ния дано́ бысть ей. А́ще ли кто мни́тся спо́рлив бы́ти, мы такова́го обы́чая не и́мамы, ниже́ це́ркви Бо́жия. Сие́ же завещава́я не хвалю́, я́ко не на лу́чшее, но на ху́дшее сбира́етеся. Пе́рвое у́бо, сходя́щимся вам в це́рковь, слы́шу в вас ра́спри су́ща, и часть не́кую сих ве́рую. Подоба́ет бо и ересе́м в вас бы́ти, да иску́снии явле́ни быва́ют в вас. Сходя́щимся у́бо вам вку́пе, несть Госпо́дскую ве́черю я́сти, ко́ждо бо свою́ ве́черю предваря́ет в снеде́ние, и ов у́бо а́лчет, ов же упива́ется. Еда́ бо домо́в не и́мате, во е́же я́сти и пи́ти? Или́ о це́ркви Бо́жией нерадите́ и срамля́ете не иму́щия? Что вам реку́? Похвалю́ ли вы о сем? Не похвалю́.

равноап. кнг. Ольги:

Зачало 181 Неделя 16. (2Кор.6:1-10)

Бра́тие, поспе́шствующе мо́лим, не вотще́ благода́ть Бо́жию прия́ти вам. Глаго́лет бо: во вре́мя прия́тно послу́шах тебе́, и в день спасе́ния помого́х ти. Се ны́не вре́мя благоприя́тно, се ны́не день спасе́ния. Ни еди́но ни в че́мже даю́ще претыка́ние, да служе́ние безпоро́чно бу́дет, но во всем представля́юще себе́ я́коже Бо́жия слуги́, в терпе́нии мно́зе, в ско́рбех, в беда́х, в теснота́х, в ра́нах, в темни́цах, в нестрое́ниих, в труде́х, во бде́ниих, в поще́ниих, во очище́нии, в ра́зуме, в долготерпе́нии, в бла́гости, в Ду́се Свя́те, в любви́ нелицеме́рне, в словеси́ и́стины, в си́ле Бо́жией, ору́жии пра́вды десны́ми и шу́ими, сла́вою и безче́стием, гажде́нием и благохвале́нием, я́ко лестцы́, и и́стинни, я́ко незна́еми, и познава́еми, я́ко умира́юще, и се жи́ви есмы́, я́ко наказу́еми, а не умерщвля́еми, я́ко скорбя́ще, при́сно же ра́дующеся, я́ко ни́щи, а мно́гих богатя́ще, я́ко ничто́же иму́ще, а вся содержа́ще.

Священник: Мир ти.

Чтец: И ду́хови твоему́.

Диакон: Прему́дрость.

Чтец: Аллилу́иа. Аллилу́иа. Аллилу́иа, глас 1.

Пятница. Аллилуиарий дня

Чтец: Помяни́ сонм Твой, его́же стяжа́л еси́ испе́рва.

Лик: Аллилу́иа. Аллилу́иа. Аллилу́иа.

Чтец: Бог же Царь наш пре́жде ве́ка, соде́ла спасе́ние посреде́ земли́.

Лик: Аллилу́иа. Аллилу́иа. Аллилу́иа.

Аллилуиарий равноап. кнг. Ольги

Чтец: Испове́дят небеса́ чудеса́ Твоя́, Го́споди, и́бо и́стину Твою́ в Це́ркви святы́х.

Лик: Аллилу́иа. Аллилу́иа. Аллилу́иа.

Чтение Евангелия

Диакон: Благослови́, влады́ко, благовести́теля свята́го Апо́стола и Евангели́ста Матфе́я.

Священник, осеняя его крестным знамением, произносит: Бо́г, моли́твами свята́го, сла́внаго, всехва́льнаго Апо́стола и Евангели́ста Матфе́я, да да́ст тебе́ глаго́л благовеству́ющему си́лою мно́гою во исполне́ние Ева́нгелия Возлю́бленнаго Сы́на Своего́, Го́спода на́шего Иису́са Христа́.

И подает ему святое Евангелие.

Диакон: Ами́нь.

Священник: Прему́дрость, про́сти, услы́шим свята́го Ева́нгелия. Таже: Ми́р все́м.

Лик: И ду́хови твоему́.

Диакон: От Матфе́я свята́го Ева́нгелия чте́ние.

Лик: Сла́ва Тебе́, Го́споди, сла́ва Тебе́.

Священник: Во́нмем.

Рядовое:

Евангелие от Матфея, зачало 71. (Мф.17:10-18)

Во вре́мя о́но, вопроси́ша Иису́са ученицы́ Его́, глаго́люще: что у́бо кни́жницы глаго́лют, я́ко Илии́ подоба́ет приити́ пре́жде? Иису́с же отвеща́в рече́ им: Илия́ у́бо прии́дет пре́жде и устро́ит вся. Глаго́лю же вам, я́ко Илия́ уже́ прии́де, и не позна́ша его́, но сотвори́ша о нем, ели́ка восхоте́ша, та́ко и Сын Челове́ческий и́мать пострада́ти от них. Тогда́ разуме́ша ученицы́, я́ко о Иоа́нне Крести́тели рече́ им. И прише́дшим им к наро́ду, приступи́ к Нему́ челове́к, кла́няяся Ему́ и глаго́ля: Го́споди, поми́луй сы́на моего́, я́ко на но́вы ме́сяцы бесну́ется и зле стра́ждет, мно́жицею бо па́дает во огнь и мно́жицею в во́ду. И приведо́х его́ ко ученико́м Твои́м, и не возмого́ша его́ исцели́ти. Отвеща́в же Иису́с рече́: о, ро́де неве́рный и развраще́нный, доко́ле бу́ду с ва́ми? Доко́ле терплю́ вас? Приведи́те Ми его́ се́мо. И запрети́ ему́ Иису́с, и изы́де из него́ бес, и изцеле́ о́трок от часа́ того́.

равноап. кнг. Ольги:

Евангелие от Луки, зачало 33. (Лк.7:36-50)

Во вре́мя о́но, моля́ше Иису́са не́кий от фарисе́й, да бы ял с ним, и вшед в дом фарисе́ов, возлеже́. И се жена́ во гра́де, я́же бе гре́шница, и уве́девши, я́ко возлежи́т во хра́мине фарисе́ове, прине́сши алава́стр ми́ра, и ста́вши при ногу́ Его́ созади́, пла́чущися, нача́т умыва́ти но́зе Его́ слеза́ми, и власы́ главы́ своея́ отира́ше, и облобыза́ше но́зе Его́, и ма́заше ми́ром. Ви́дев же фарисе́й возва́вый Его́, рече́ в себе́, глаго́ля: Сей а́ще бы был проро́к, ве́дел бы, кто и какова́ жена́ прикаса́ется Ему́, я́ко гре́шница есть. И отвеща́в Иису́с рече́ к нему́: Си́моне, и́мам ти не́что рещи́. Он же рече́: Учи́телю, рцы. Иису́с же рече́: два должника́ бе́ста заимода́вцу не́коему, еди́н бе до́лжен пятию́сот дина́рий, други́й же пятию́десят. Не иму́щема же и́ма возда́ти, обе́ма отда́. Кото́рый у́бо ею́, рцы, па́че возлю́бит его́? Отвеща́в же Си́мон рече́: мню, я́ко ему́же вя́щше отда́. Он же рече́ ему́: пра́во суди́л еси́. И обра́щься к жене́, Си́монови рече́: ви́диши ли сию́ жену́? Внидо́х в дом твой, воды́ на но́зе Мои́ не даде́, сия́ же слеза́ми облия́ Ми но́зе и власы́ главы́ своея́ отре́. Лобза́ния Ми не даде́, сия́ же, отне́лиже внидо́х, не преста́ облобыза́ющи Ми но́зе. Ма́слом главы́ Моея́ не пома́за, сия́ же ми́ром пома́за Ми но́зе. Его́же ра́ди, глаго́лю ти, отпуща́ются греси́ ея́ мно́зи, я́ко возлюби́ мно́го, а ему́же ма́ло оставля́ется, ме́ньше лю́бит. Рече́ же ей: отпуща́ются тебе́ греси́. И нача́ша возлежа́щии с Ним глаго́лати в себе́: кто Сей есть, и́же и грехи́ отпуща́ет? Рече́ же к жене́: ве́ра твоя́ спасе́ тя, иди́ в ми́ре.

Священник: Мир ти́, благовеству́ющему.

Лик: Сла́ва Тебе́, Го́споди, сла́ва Тебе́.

Сугубая ектения

Диакон: Рцем вси́ от всея́ души́, и от всего́ помышле́ния на́шего рцем.

Лик: Го́споди, поми́луй.

Диакон: Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.

Лик: Го́споди, поми́луй.

Диакон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй (трижды).

Диакон: Еще́ мо́лимся о Вели́ком Господи́не и Отце́ на́шем Святе́йшем Патриа́рхе Кири́лле, и всей во Христе́ бра́тии на́шей.

Лик: Го́споди, поми́луй (трижды).

Диакон: Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Лик: Го́споди, поми́луй (трижды).

Диакон: Еще́ мо́лимся о блаже́нных и приснопа́мятных созда́телех свята́го хра́ма сего́, и о всех преждепочи́вших отце́х и бра́тиях, зде лежа́щих и повсю́ду, правосла́вных.

Лик: Го́споди, поми́луй (трижды).

Диакон: Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, бра́тии свята́го хра́ма сего́.

Лик: Го́споди, поми́луй (трижды).

Диакон: Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.

Лик: Го́споди, поми́луй (трижды).

И священник возглашает: Яко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Если будет приношение о усопших, диакон или священник произносит следующую ектению:

Заупокойная ектения

Диакон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй (трижды).

Диакон: Еще́ мо́лимся о упокое́нии душ усо́пших рабо́в Бо́жиих (имярек), и о е́же прости́тися им вся́кому прегреше́нию, во́льному же и нево́льному.

Лик: Го́споди, поми́луй (трижды).

Диакон: Я́ко да Госпо́дь Бог учини́т ду́ши их, иде́же пра́веднии упокоя́ются.

Лик: Го́споди, поми́луй (трижды).

Диакон: Ми́лости Бо́жия, Ца́рства Небе́снаго, и оставле́ния грехо́в их, у Христа́ безсме́ртнаго Царя́ и Бо́га на́шего про́сим.

Лик: Пода́й, Го́споди.

Диакон: Го́споду помо́лимся.

Лик: Го́споди, поми́луй.

Священник возглашает: Я́ко Ты еси́ воскресе́ние и живо́т и поко́й усо́пших раб Твои́х, (имярек), Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Ектения об оглашенных

Диакон: Помоли́теся, оглаше́ннии, Го́сподеви.

Лик: Го́споди, поми́луй.

Диакон: Ве́рнии, о оглаше́нных помо́лимся, да Госпо́дь поми́лует их.

Лик: Го́споди, поми́луй.

Диакон: Огласи́т их сло́вом и́стины.

Лик: Го́споди, поми́луй.

Диакон: Откры́ет им Ева́нгелие пра́вды.

Лик: Го́споди, поми́луй.

Диакон: Соедини́т их святе́й Свое́й собо́рней и апо́стольстей Це́ркви.

Лик: Го́споди, поми́луй.

Диакон: Спаси́, поми́луй, заступи́ и сохрани́ их, Бо́же, Твое́ю благода́тию.

Лик: Го́споди, поми́луй.

Диакон: Оглаше́ннии, главы ва́ша Го́сподеви приклони́те.

Лик: Тебе́, Го́споди.

Возглас: Да и ти́и с на́ми сла́вят пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Лик: Ами́нь.

Литургия верных

Диакон: Ели́цы оглаше́ннии, изыди́те, оглаше́ннии изыди́те, ели́цы оглаше́ннии изыди́те. Да никто от оглаше́нных, ели́цы ве́рнии, па́ки и па́ки ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Прему́дрость.

Священник возглашает: Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Диакон: Па́ки и па́ки, ми́ром Го́споду помо́лимся.

Лик: Го́споди, поми́луй.

(Когда священник служит без диакона, он следующих [четырех] прошений не произносит)

[О свы́шнем ми́ре и спасе́нии душ на́ших, Го́споду помо́лимся.

О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.

О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.

О изба́витися нам от вся́кия ско́рби, гне́ва и ну́жды, Го́споду помо́лимся.]

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Прему́дрость.

Священник возглашает: Я́ко да под держа́вою Твое́ю всегда́ храни́ми, Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

И открываются Царские врата.

Херувимская песнь

Лик: И́же Херуви́мы та́йно образу́юще и животворя́щей Тро́ице Трисвяту́ю песнь припева́юще, вся́кое ны́не жите́йское отложи́м попече́ние.

Великий вход

Диакон: Вели́каго господи́на и отца́ на́шего Кири́лла, Святе́йшаго Патриа́рха Моско́вскаго и всея́ Ру́си, да помяне́т Госпо́дь Бог во Ца́рствии Свое́м всегда́, ны́не и при́сно, и во ве́ки веко́в.

Священник: Преосвяще́нныя митрополи́ты, архиепи́скопы и епи́скопы, и весь свяще́ннический и мона́шеский чин, при́чет свята́го хра́ма сего́, и всех вас правосла́вных христиа́н, да помяне́т Госпо́дь Бог во Ца́рствии Свое́м, всегда́, ны́не и при́сно, и во ве́ки веко́в.

Лик: Аминь.

И заканчивает Херувимскую песнь: Я́ко да Царя́ всех поды́мем, а́нгельскими неви́димо дориноси́ма чи́нми. Аллилу́иа, аллилу́иа, аллилу́иа.

Ектения просительная

Диакон: Испо́лним моли́тву на́шу Го́сподеви.

Лик: Го́споди, поми́луй.

Диакон: О предложе́нных Честны́х Даре́х, Го́споду помо́лимся.

Лик: Го́споди, поми́луй.

Диакон: О святе́м хра́ме сем, и с ве́рою, благогове́нием и стра́хом Бо́жиим входя́щих в онь, Го́споду помо́лимся.

Лик: Го́споди, поми́луй.

Диакон: О изба́витися нам от вся́кия ско́рби, гне́ва и ну́жды, Го́споду помо́лимся.

Лик: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Дне всего́ соверше́нна, свя́та, ми́рна и безгре́шна у Го́спода про́сим.

Лик: Пода́й, Го́споди.

Диакон: А́нгела ми́рна, ве́рна наста́вника, храни́теля душ и теле́с на́ших у Го́спода про́сим.

Лик: Пода́й, Го́споди.

Диакон: Проще́ния и оставле́ния грехо́в и прегреше́ний на́ших у Го́спода про́сим.

Лик: Пода́й, Го́споди.

Диакон: До́брых и поле́зных душа́м нашим, и ми́ра мiрови у Го́спода про́сим.

Лик: Пода́й, Го́споди.

Диакон: Про́чее вре́мя живота́ на́шего в ми́ре и покая́нии сконча́ти у Го́спода про́сим.

Лик: Пода́й, Го́споди.

Диакон: Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на стра́шнем суди́щи Христо́ве про́сим.

Лик: Пода́й, Го́споди.

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

И священник возглашает: Щедро́тами Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Священник: Мир всем.

Лик: И ду́хови твоему́.

Диакон: Возлю́бим друг дру́га, да единомы́слием испове́мы.

Лик: Отца́, и Сы́на, и Свята́го Ду́ха,/ Тро́ицу Единосу́щную/ и Неразде́льную.

Диакон: Две́ри, две́ри, прему́дростию во́нмем.

Символ веры

Народ: Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Святое Возношение

Диакон: Ста́нем до́бре, ста́нем со стра́хом, во́нмем, свято́е возноше́ние в ми́ре приноси́ти.

Лик: Ми́лость ми́ра,/ же́ртву хвале́ния.

Священник возглашает, благословляя народ: Благода́ть Го́спода на́шего Иису́са Христа́, и любы́ Бо́га и Отца́, и прича́стие Свята́го Ду́ха, бу́ди со все́ми ва́ми.

Лик: И со ду́хом твои́м.

Священник: Горе́ име́им сердца́.

Лик: И́мамы ко Го́споду.

Священник: Благодари́м Го́спода.

Лик: Досто́йно и пра́ведно есть/ покланя́тися Отцу́ и Сы́ну, и Свято́му Ду́ху,/ Тро́ице Единосу́щней и Неразде́льней.

Возвышая голос и делая звездицей знак креста над дискосом: Побе́дную песнь пою́ще, вопию́ще, взыва́юще и глаго́люще.

Лик: Свят, свят, свят Госпо́дь Савао́ф,/ испо́лнь не́бо и земля́ сла́вы Твоея́;/ оса́нна в вы́шних,/ благослове́н Гряды́й во и́мя Госпо́дне,/ оса́нна в вы́шних.

Возвышая голос: Приими́те, яди́те, сие́ есть Те́ло Мое́, е́же за вы ломи́мое во оставле́ние грехо́в.

Лик: Ами́нь.

Священник возвышая голос: Пи́йте от нея́ вси, сия́ есть Кровь Моя́ Но́ваго Заве́та, я́же за вы и за мно́гия излива́емая, во оставле́ние грехо́в.

Лик: Ами́нь.

Священник (возвышая голос): Твоя́ от Твои́х Тебе́ принося́ще, о всех и за вся.

Лик: Тебе́ пое́м,/ Тебе́ благослови́м,/ Тебе́ благодари́м, Го́споди,/ и мо́лим Ти ся, Бо́же наш.

И, взяв кадило, священник возглашает: Изря́дно о Пресвяте́й, Пречи́стей, Преблагослове́нней, Сла́вней Влады́чице на́шей Богоро́дице и Присноде́ве Мари́и.

Досто́йно есть...

Досто́йно есть я́ко вои́стинну/ блажи́ти Тя, Богоро́дицу,/ Присноблаже́нную и Пренепоро́чную/ и Ма́терь Бо́га на́шего./ Честне́йшую Херуви́м/ и сла́внейшую без сравне́ния Серафи́м,/ без истле́ния Бо́га Сло́ва ро́ждшую,// су́щую Богоро́дицу Тя велича́ем.

И по окончании пения Достойно есть: или Задостойника, священник возглашает:

В пе́рвых помяни́, Го́споди, вели́каго господи́на и отца́ на́шего Кири́лла, Святейшаго Патриарха Московскаго и всея Руси, и́хже да́руй святы́м Твои́м це́рквам, в ми́ре, це́лых, честны́х, здра́вых, долгоде́нствующих, пра́во пра́вящих сло́во Твоея́ и́стины.

Лик: И всех, и вся.

Священник возвышая голос: И даждь нам еди́неми усты́ и еди́нем се́рдцем сла́вити и воспева́ти пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.

Лик: Ами́нь.

Священник, обратившись к Царским вратам и благословляя народ возглашает:

И да бу́дут ми́лости вели́каго Бо́га и Спа́са на́шего Иису́са Христа́ со все́ми ва́ми.

Лик: И со ду́хом твои́м.

Ектения просительная

Диакон: Вся святы́я помяну́вше, па́ки и па́ки ми́ром Го́споду помо́лимся.

Лик: Го́споди, поми́луй.

Диакон: О принесе́нных и освяще́нных Честны́х Даре́х, Го́споду помо́лимся.

Лик: Го́споди, поми́луй.

Диакон: Я́ко да человеколю́бец Бог наш, прие́м я́ во святы́й и пренебе́сный и мы́сленный Свой же́ртвенник, в воню́ благоуха́ния духо́внаго, возниспо́слет нам Боже́ственную благода́ть и дар Свята́го Ду́ха, помо́лимся.

Лик: Го́споди, поми́луй.

Диакон: О изба́витися нам от вся́кия ско́рби, гне́ва и ну́жды, Го́споду помо́лимся.

Лик: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Диакон: Дне всего́ соверше́нна, свя́та, ми́рна и безгре́шна, у Го́спода про́сим.

Лик: Пода́й, Го́споди.

Диакон: А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.

Лик: Пода́й, Го́споди.

Диакон: Проще́ния и оставле́ния грехо́в и прегреше́ний на́ших, у Го́спода про́сим.

Лик: Пода́й, Го́споди.

Диакон: До́брых и поле́зных душа́м нашим, и ми́ра мирови, у Го́спода про́сим.

Лик: Пода́й, Го́споди.

Диакон: Про́чее вре́мя живота́ на́шего в ми́ре и покая́нии сконча́ти, у Го́спода про́сим.

Лик: Пода́й, Го́споди.

Диакон: Христиа́нския кончи́ны живота́ на́шего, безболе́знены, непосты́дны, ми́рны, и до́браго отве́та на стра́шнем суди́щи Христо́ве про́сим.

Лик: Пода́й, Го́споди.

Диакон: Соедине́ние ве́ры и прича́стие Свята́го Ду́ха испроси́вше, са́ми себе́, и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник возглашает: И сподо́би нас, Влады́ко, со дерзнове́нием, неосужде́нно сме́ти призыва́ти Тебе́, Небе́снаго Бо́га Отца́, и глаго́лати.

Отче наш

Народ: О́тче наш, И́же еси́ на небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

И священник возглашает: Я́ко Твоя́ держа́ва, и Твое́ есть Ца́рство и си́ла и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.

Лик: Ами́нь.

Священник: Мир всем.

Лик: И ду́хови твоему́.

Диакон: Главы́ ва́ша Го́сподеви приклони́те.

Лик: Тебе́, Го́споди.

Священник возглашает: Благода́тию, и щедро́тами, и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Диакон возглашает: Во́нмем.

Священник же, вознося Святой Хлеб, возглашает: Свята́я святы́м.

Лик: Еди́н свят,/ еди́н Госпо́дь,/ Иису́с Христо́с,/ во сла́вуБо́га Отца́. Ами́нь.

Причастны

В пятницу св. Кресту

Спасе́ние соде́лал еси́ посреде́ земли́, Бо́же.

Причастен равноап. кнг. Ольги

Никто́же мо́жет приити́ ко Мне, а́ще не Оте́ц, посла́вый Мя, привлече́т его́, рече́ Госпо́дь.

Аллилу́иа. Аллилу́иа. Аллилу́иа.

Причащение народа в храме

И открываются Царские врата. Диакон, сотворив поклон, берет св. Потир и, выходя Царскими вратами, возвышает св. Потир, показывая его народу и возглашая: Со страхом Божиим и верою приступите.

Лик: Благослове́н Гряды́й во и́мя Госпо́дне,/ Бог Госпо́дь и яви́ся нам.

Перед причастием верных священник по обычаю читает молитвы: Ве́рую, Го́споди, и испове́дую, я́ко Ты еси́ вои́стинну Христо́с, Сын Бо́га жива́го, прише́дый в мир гре́шныя спасти́, от ни́хже пе́рвый есмь аз. Еще́ ве́рую, я́ко сие́ есть са́мое пречи́стое Те́ло Твое́, и сия́ есть са́мая честна́я Кровь Твоя́. Молю́ся у́бо Тебе́: поми́луй мя и прости́ ми прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя неосужде́нно причастити́ся пречи́стых Твои́х Та́инств, во оставле́ние грехо́в и в жизнь ве́чную. Ами́нь.

И затем: Ве́чери Твоея́ та́йныя днесь, Сы́не Бо́жий, прича́стника мя приими́; не бо враго́м Твои́м та́йну пове́м, ни лобза́ния Ти дам, я́ко Иу́да, но я́ко разбо́йник испове́даю Тя: помяни́ мя, Го́споди, во Ца́рствии Твое́м.

Да не в суд или́ во осужде́ние бу́дет мне причаще́ние Святы́х Твои́х Та́ин, Го́споди, но во исцеле́ние души́ и те́ла.

И приступают желающие причаститься один за другим, поклоняясь со всяким благоговением и страхом, имея руки, сложенными на груди. И принимает каждый Божественные Тайны. Священник же, причащая каждого произносит:

Причаща́ется раб Бо́жий, (имярек), честна́го и свята́го Те́ла и Кро́ве Го́спода и Бо́га и Спа́са на́шего Иису́са Христа́, во оставле́ние грехо́в свои́х и в жизнь ве́чную.

И диакон отирает ему губы платом. Затем причастившийся целует святую Чашу и с поклоном отходит. И так причащаются все.

Во время причащения по обычаю поем: Те́ло Христо́во приими́те,/ Исто́чника безсме́ртнаго вкуси́те.

По причащении

Священник же благословляет народ, возглашая: Спаси́, Бо́же, лю́ди Твоя́, и благослови́ достоя́ние Твое́.

Лик же поет: Ви́дехом свет и́стинный,/ прия́хом Ду́ха Небе́снаго,/ обрето́хом ве́ру и́стинную,/ неразде́льней Тро́ице покланя́емся,// Та бо нас спасла́ есть.

Священник тайно: Благослове́н Бог наш:

Возвышая голос и показывая народу св. Чашу: Всегда́, ны́не и при́сно, и во ве́ки веко́в.

Лик: Ами́нь. Да испо́лнятся уста́ на́ша/ хвале́ния Твоего́ Го́споди,/ я́ко да пое́м сла́ву Твою́,/ я́ко сподо́бил еси́ нас причасти́тися/ Святы́м Твои́м, Боже́ственным, безсме́ртным и животворя́щим Та́йнам,/ соблюди́ нас во Твое́й святы́ни/ весь день поуча́тися пра́вде Твое́й.// Аллилу́иа, аллилу́иа, аллилу́иа.

Диакон же, выйдя северными вратами и став на обычном месте, произносит ектению:

Про́сти прии́мше Боже́ственных, святы́х, пречи́стых, безсме́ртных, небе́сных и животворя́щих, стра́шных Христо́вых Та́ин, досто́йно благодари́м Го́спода.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

День весь соверше́н, свят, ми́рен и безгре́шен испроси́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Возглашение: Я́ко Ты еси́ освяще́ние на́ше, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Священник: С ми́ром изы́дем.

Лик: О и́мени Госпо́дни.

Диакон: Го́споду помо́лимся.

Лик: Го́споди, поми́луй.

Молитва заамвонная, произносимая вслух

Священник: Благословля́яй благословя́щия Тя, Го́споди, и освяща́яй на Тя упова́ющия, спаси́ лю́ди Твоя́ и благослови́ достоя́ние Твое́, исполне́ние Це́ркве Твоея́ сохрани́, освяти́ лю́бящия благоле́пие до́му Твоего́: Ты тех возпросла́ви Боже́ственною Твое́ю си́лою, и не оста́ви нас, упова́ющих на Тя. Мир мiрови Твоему́ да́руй, це́рквам Твои́м, свяще́нником, во́инству и всем лю́дем Твои́м. Я́ко вся́кое дая́ние бла́го, и всяк дар соверше́н свы́ше есть, сходя́й от Тебе́ Отца́ све́тов, и Тебе́ сла́ву, и благодаре́ние, и поклоне́ние возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Таже: Бу́ди и́мя Госпо́дне благослове́но от ны́не и до ве́ка. Трижды.

Священник же по окончании же пения возглашает:

Благослове́ние Госпо́дне на ва́с, Того́ благода́тию и человеколю́бием, всегда́, ны́не и при́сно, и во ве́ки веко́в.

Лик: Ами́нь.

Священник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Го́споди, поми́луй, (трижды). Благослови́.

Отпуст

Христо́с И́стинный Бог наш, моли́твами Пречи́стыя Своея́ Ма́тере, и́же во святы́х отца́ на́шего Иоа́нна, архиепископа Константи́на гра́да, Златоу́стаго, равноап. кнг. Ольги, и всех святы́х, поми́лует и спасе́т нас, я́ко Благ и Человеколю́бец.

Многолетие

Лик: Вели́каго господи́на и отца́ на́шего Кири́лла, Святе́йшаго Патриа́рха Моско́вскаго и всея́ Руси́,/ и господи́на на́шего высокопреосвяще́ннейшаго [или́ преосвяще́ннейшаго] и́мярек, митрополи́та [или́ архиепи́скопа, или́ епи́скопа] его́ же есть о́бласть,/ богохрани́мую страну́ на́шу Росси́йскую, вла́сти и во́инство ея́,/ настоя́теля, бра́тию, прихо́жан свята́го хра́ма сего́, и вся правосла́вныя христиа́ны,// Го́споди, сохрани́ их на мно́гая ле́та.

Комментировать

Пожертвовать