Конда́к 1
О, треблаже́нный Кре́сте и всечестны́й, тебе́ покланя́емся, ве́рнии, и велича́ем, ра́дующеся о боже́ственном возвыше́нии твое́м. Но я́ко победи́тельное, и ору́жие непобеди́мое, огради́ и покры́й твое́ю благода́тию зову́щия ти́:
Ра́дуйся, Дре́во треблаже́нное.
Икос 1
Ангели от небе́с неви́димо окружа́ют Кре́ст живоно́сный со стра́хом, и светопода́тельную благода́ть све́тло подаю́щий ны́не ве́рным зря́ще, ужаса́ются и стоя́т, зову́ще к нему́ такова́я:
Ра́дуйся, Кре́сте, вселе́нныя храни́телю; ра́дуйся, сла́во Це́ркве.
Ра́дуйся, источа́яй незави́стно исцеле́ния; ра́дуйся, просвеща́яй мирски́я концы́.
Ра́дуйся, живото́чное Дре́во и чуде́с сокро́вище; ра́дуйся, требога́тое сложе́ние и благода́тей пода́телю.
Ра́дуйся, я́ко подно́жие еси́ Бо́жие; ра́дуйся, я́ко предлежи́ши в поклоне́ние все́м.
Ра́дуйся, ча́ше испо́лнь сла́дости; ра́дуйся, све́щниче вы́шния све́тлости.
Ра́дуйся, и́м же благослови́тся тва́рь; ра́дуйся, и́м же покланя́емся Творцу́.
Ра́дуйся, Дре́во треблаже́нное.
Конда́к 2
Ви́дящи Еле́на себе́ посыла́ему, глаго́лет царю́ великоду́шно: «всежела́тельство души́ твоея́ благоприя́тнее тща́тельству моему́ явля́ется». «Ищущи у́бо, — отвеща́ о́н, — держа́внейшия тебе́ побе́ды, я́коже глаго́леши, зови́: Аллилу́ия».
Икос 2
Ра́зум, пре́жде недоразумева́емый, цари́ца позна́вши, возопи́ к служа́щим: «потщи́теся вско́ре от не́др земны́х обрести́ и да́ти мне́ Кре́стъ». На́нь же взира́я, рече́ со стра́хом, оба́че зову́щи си́це:
Ра́дуйся, ра́дости и́стинныя изображе́ние; ра́дуйся пе́рвыя кля́твы разреше́ние.
Ра́дуйся, сокро́вище в земли́ за́вистию сокрове́нное; ра́дуйся, зна́мение на небесе́х я́вльшееся.
Ра́дуйся, четверолу́чный и огнезра́чный Кре́сте; ра́дуйся, ле́ствице высокоутвержде́нная предзре́нная иногда́.
Ра́дуйся, а́нгелов радостотво́рное чу́до, ра́дуйся, бесо́в многоплаче́вный стру́пе.
Ра́дуйся, сла́дкое Сло́ва прия́телище; ра́дуйся, огня́ пре́лести гаси́лище.
Ра́дуйся, Кре́сте, блужда́ющим предста́телю; ра́дуйся, благопутеше́ствующим вожде́.
Ра́дуйся, Дре́во треблаже́нное.
Конда́к 3
Си́ла Дре́ва яви́ся тогда́ к увере́нию и́стинному все́х, когда́ безгла́сну же и ме́ртву к животу́ возста́ви. Ужа́сно виде́ние хотя́щим получи́ти спасе́ние, внегда́ пе́ти си́це: Аллилу́ия.
Икос 3
Иму́щи Еле́на непреодоле́нное ору́жие, тече́ к сы́ну своему́. То́й же зело́ увеселе́н, а́бие позна́в велича́йший Кре́ст, веселя́шеся, и игра́ньми, я́коже пе́сньми, возопи́ к нему́ такова́я:
Ра́дуйся, Кре́сте, све́та прия́телище; ра́дуйся, Кре́сте, жи́зни сокро́вище.
Ра́дуйся, пода́телю даро́в Ду́ха; ра́дуйся, приста́нище по мо́рю пла́вающих небу́рное.
Ра́дуйся, трапе́зо, нося́щая я́коже же́ртву Христа́; ра́дуйся розго́, гро́зд согре́явшая, нося́щь вино́ та́инственное.
Ра́дуйся, я́ко ски́петры ца́рския храни́ши; ра́дуйся, я́ко главы́ зми́ев сокруша́еши.
Ра́дуйся, све́тлое ве́ры позна́ние; ра́дуйся, всего́ ми́ра спасе́ние.
Ра́дуйся, Бо́жие к сме́ртным благослове́ние; ра́дуйся, сме́ртных к Бо́гу посре́дствие.
Ра́дуйся, Дре́во треблаже́нное.
Конда́к 4
Ре́вность вну́трь Боже́ственную Еле́на прие́мши, взыска́ и обре́те то́щно в земли́ кры́емый Кре́ст, и явля́емый на небеси́ царе́ви. Его́ же воздви́же, и смотря́ на лю́ди ве́рою рече́: Аллилу́ия.
Икос 4
Солнцезра́чный яви́ся Кре́ст в ми́ре, и вси́ све́та испо́лншеся, и те́кше я́коже к заре́, зря́т его́, я́ко благи́х вино́вна, в рука́х боже́ственных воздви́женна, его́же пою́ще ре́ша:
Ра́дуйся, луче́ мы́сленнаго со́лнца; ра́дуйся, исто́чниче неистощи́маго мо́ря.
Ра́дуйся, Ада́ма и Евы воззва́ние; ра́дуйся, князе́й а́дских умерщвле́ние.
Ра́дуйся, я́ко возноси́мый, на́с ны́не совозно́сиши; ра́дуйся, я́ко покланя́емый, освяща́еши ду́ши.
Ра́дуйся, апо́столов мировеща́нная сла́во; ра́дуйся, страстоно́сцев благоприя́тная си́ло.
Ра́дуйся, Кре́сте, евре́ев обличе́ние; ра́дуйся, ве́рных челове́ков похвало́.
Ра́дуйся, и́м же низложи́ся а́д; ра́дуйся, и́м же возсия́ благода́ть.
Ра́дуйся, Дре́во треблаже́нное.
Конда́к 5
Боже́ственное и победоно́сное Дре́во ви́дяще, под кро́в его́ вси́ ны́не присту́пим, я́ко ору́жие то́ держа́ще, победи́м враго́в ополче́ния, и, прикаса́ющеся некаса́емому Христу́, усты́ Тому́ воззове́м: Аллилу́ия.
Икос 5
Ви́де Константи́н Вели́кий с небесе́ све́т, указу́ющий ему́ зна́мение Креста́ звезда́ми, и те́м побежда́ти мно́жество враго́в, Дре́во яви́ти, и зва́ти потща́ся к нему́ такова́я:
Ра́дуйся, сове́та неизрече́ннаго сы́й коне́ц; ра́дуйся люде́й благоче́ствующих сы́й ро́г.
Ра́дуйся, враго́в отвраща́яй полки́; ра́дуйся, я́коже пла́мень попаля́яй бе́сы.
Ра́дуйся, ски́петро небе́сный во́иства ца́рскаго; ра́дуйся, непобеди́мая побе́до во́инства христолюби́ваго.
Ра́дуйся, ва́рварскую го́рдость низверга́яй; ра́дуйся, челове́ческия ду́ши соблюда́яй.
Ра́дуйся, мно́гих зо́л прогони́телю; ра́дуйся, мно́гих бла́г пособи́телю.
Ра́дуйся, о не́м же христоно́снии лю́дие игра́ют; ра́дуйся, его́ же ра́ди иуде́е рыда́ют.
Ра́дуйся, Дре́во треблаже́нное.
Конда́к 6
Ле́ствица, небесе́ каса́ющаяся, бы́сть Кре́ст Госпо́день, все́х от земли́ возводя́й к высоте́ небе́сной, во е́же спребыва́ти лико́м а́нгельским всегда́, оста́вльших я́же ны́не су́щая, я́ко же несу́щая, и ве́дущих пе́ти: Аллилу́ия.
Икос 6
Возсия́в све́т всю́ду, Спа́се, просвети́л еси́ до́лу в а́де спя́щия: вра́тницы же а́довы не терпя́ще зре́ти блиста́ния Твоего́, падо́ша, а́ки ме́ртви, си́х же изба́вльшиися, ны́не Кре́ст зря́ще, зову́т:
Ра́дуйся, воста́ние усо́пших; ра́дуйся, утеше́ние ско́рбных.
Ра́дуйся, а́довых сокро́вищь испраздне́ние; ра́дуйся ра́йских сла́достей наслажде́ние.
Ра́дуйся, же́зле, потопи́вший еги́петское во́инство; ра́дуйся, па́ки погрузи́вый евре́йския лю́ди.
Ра́дуйся, одушевле́нное дре́во, разбо́йнику спасе́ние; ра́дуйся, благово́нная ро́жо [ро́за], благочести́вых благоуха́ние.
Ра́дуйся, пи́ще а́лчущих ду́хом; ра́дуйся, печа́те, ю́же прия́ша челове́цы.
Ра́дуйся, Кре́сте, та́ин две́ре; ра́дуйся, от него́ же пролива́ются Боже́ственнии пото́цы.
Ра́дуйся, Дре́во треблаже́нное.
Конда́к 7
Хотя́щу Моисе́ю многоутружде́нный наро́д свободи́ти от рабо́ты, вда́лся еси́ е́му, а́ки же́зл, но позна́лся еси́ ему́ и Бо́жие бы́ти та́инство. Те́мже удиви́ся твое́й, Кре́сте, си́ле, зовы́й: Аллилу́ия.
Икос 7
Зако́н, Иже да́вый иногда́ на Сина́йстей горе́ богови́дцу, на Кресте́ во́лею пригвожда́ется за беззако́нныя лю́ди, и кля́тву дре́внюю разруши́л е́сть, да, ви́дяще Креста́ си́лу, вси́ ны́не зове́м:
Ра́дуйся, па́дших исправле́ние; ра́дуйся, мирослужи́телей низпаде́ние.
Ра́дуйся, Воскресе́ния Христо́ва обновле́ние; ра́дуйся, мона́шествующих боже́ственное услажде́ние.
Ра́дуйся, дре́во благосенноли́ственное, и́м же покрыва́ются ве́рнии; ра́дуйся, дре́во, проро́ки предвозвеще́нное, насажде́нное на земли́.
Ра́дуйся, ца́рствия на враги́ побо́рствие; ра́дуйся, гражда́нства держа́вное предста́тельство.
Ра́дуйся, Судии́ Пра́веднаго явле́ние; ра́дуйся, па́дших челове́ков осужде́ние.
Ра́дуйся, Кре́сте, си́рых защи́тниче; ра́дуйся, Кре́сте, ни́щих обогати́телю.
Ра́дуйся, Дре́во треблаже́нное.
Конда́к 8
Стра́нное чу́до ви́дяще, стра́нное житие́ поживе́м, у́м к небеси́ вознося́ще: того́ бо ра́ди Христо́с на Кресте́ пригвозди́ся, и пло́тию пострада́, хотя́ привлещи́ к Себе́ зову́щия: Аллилу́ия.
Икос 8
Ве́сь прии́де с высоты́, нося́ Божество́ еди́но Преве́чное Сло́во, ро́ждься же от Де́вы Ма́тере, и я́влься ми́ру смире́нный Челове́к, Кре́ст восприе́мый оживи́ вопию́щия такова́я:
Ра́дуйся, Кре́сте, ми́рное ору́жие; ра́дуйся, путеше́ствующих нача́ло.
Ра́дуйся, спаса́емых прему́дросте и утвержде́ние; ра́дуйся, вредя́щих обуя́ние и сокруше́ние.
Ра́дуйся, благопло́дная безсме́ртная и живоно́сная ле́торасле; ра́дуйся, цве́те, процве́тший на́м спасе́ние.
Ра́дуйся, я́ко земна́я с го́рними совокупля́еши; ра́дуйся, я́ко сердца́ до́льних просвеща́еши.
Ра́дуйся, и́м же тля́ отгна́ся; ра́дуйся, и́м же боле́знь потреби́ся.
Ра́дуйся, благи́х тмочи́сленное сокро́вище; ра́дуйся, ве́рных многоимени́тая сла́во.
Ра́дуйся, Дре́во треблаже́нное.
Конда́к 9
Паде́ де́монов многоме́рзкий по́лк и ро́д евре́йский посра́млен бы́сть, зря́ Кре́ст от все́х жела́тельно покланя́емый, при́сно же источа́ющий цельбы́ вопию́щим: Аллилу́ия.
Икос 9
То́ки злосла́вных мудрова́ний преста́ша, пригво́ждшуся Тебе́, Христе́, на Кресте́: недоуме́ют бо вои́стинну, ка́ко и Кре́ст подъя́л еси́, и тле́ния избе́гл еси́. Мы́ же, воста́ние Твое́ сла́вяще, взыва́ем:
Ра́дуйся, прему́дрости Бо́жия высото́; ра́дуйся, про́мысла Его́ глубино́.
Ра́дуйся, я́ко тобо́ю буесло́вцев безслове́сных неразу́мие явля́ется; ра́дуйся, я́ко тобо́ю гада́телей неразу́мных па́губа сбыва́ется.
Ра́дуйся, я́ко Воскресе́ние Христо́во явля́еши; ра́дуйся, я́ко Стра́сти Его́ на́м возобновля́еши.
Ра́дуйся, первозда́нных преступле́ние разреши́вый; ра́дуйся, вхо́ды ра́йския отве́рзый.
Ра́дуйся, Кре́сте, ве́рным честны́й; ра́дуйся, неве́рных язы́ков сопротивобо́рче.
Ра́дуйся, Кре́сте, неду́гующих врачу́; ра́дуйся, при́сный помо́щниче зову́щим.
Ра́дуйся, Дре́во треблаже́нное.
Конда́к 10
Спасти́ хотя́ ми́р, Иже ми́ра Украси́тель, прии́де в о́нь неизрече́нно, и Кре́ст подъя́т, Бо́г сы́й, на́с же ра́ди вся́ по на́м подъе́млет. Те́мже и Изба́вивый на́с слы́шит от все́х: Аллилу́ия.
Икос 10
Сте́ну тебе́ вселе́нныя, о Кре́сте жизноно́сный, необори́мую и боже́ственную разуме́ем: и́бо небесе́ и земли́ Творе́ц устро́ив тя́, распростира́ет на тебе́ ру́це, — стра́нное слы́шание, — и вся́ научи́ вопи́ти:
Ра́дуйся, сто́лпе благоче́стия; ра́дуйся, ве́чносте насле́дия.
Ра́дуйся, мы́сленнаго Амали́ка побежда́яй; ра́дуйся, Иа́ковлеми рука́ма прообразу́емый.
Ра́дуйся, ты́ бо ветхозако́нную се́нь преобрази́л еси́; ра́дуйся, ты́ бо пророковеща́нныя глаго́лы испо́лнил еси́.
Ра́дуйся, Спа́са все́х носи́вый; ра́дуйся, тли́теля ду́ш упраздни́вый.
Ра́дуйся, его́ же ра́ди соедини́хомся а́нгелом; ра́дуйся, его́ же ра́ди озари́хомся све́том.
Ра́дуйся, тебе́ бо покланя́емся, почита́юще; ра́дуйся, тебе́ бо приглаша́ем, зову́ще:
Ра́дуйся, Дре́во треблаже́нное.
Конда́к 11
Пе́ние вся́кое изнемога́ет, спростре́тися хотя́щее мно́жеству мно́гих твои́х чуде́с, похва́л бо мно́жество а́ще и принесе́м тебе́, Кре́сте честны́й, ничто́же соверша́ем досто́йно, я́же возда́л еси́ на́м, оба́че зове́м: Аллилу́ия.
Икось 11
Светопода́тельную зарю́, во тме́ су́щим, подае́т жизнопода́тельный Кре́ст: невеще́ственный бо прия́т све́т, и к ра́зуму Боже́ственному наставля́ет все́х, возвыша́ет же ны́не возвыша́емый у́м на́ш, во е́же пе́ти сицева́я:
Ра́дуйся, свети́ло, су́щия в тме́ просвеща́ющее; ра́дуйся, звездо́, ми́р озаря́ющая.
Ра́дуйся, звездо́, христоуби́йцев помрача́ющая; ра́дуйся, гро́ме, неве́рныя устраша́ющий.
Ра́дуйся, я́ко просвети́л еси́ правосла́вных собо́ры; ра́дуйся, я́ко опрове́ргл еси́ и́дольския же́ртвища.
Ра́дуйся, его́ же о́браз с небесе́ яви́ся; ра́дуйся, его́ же благода́ть лука́вствия прогоня́ет.
Ра́дуйся, и́же пло́ти зна́менаеши умерщвле́ние; ра́дуйся, и́же страсте́й утоля́еши воста́ние.
Ра́дуйся, на не́м же Христо́с распя́ся; ра́дуйся и́м же ве́сь ми́р спасе́ся.
Ра́дуйся, Дре́во треблаже́нное.
Конда́к 12
Благода́ть да́ти восхоте́в Христо́с челове́ком, ру́це на Кресте́ распростира́ет, созыва́ет же язы́ки вся́, и да́рует Ца́рство все́м небе́сное, пою́щим пе́снь досто́йно и ве́рно зову́щим: Аллилу́ия.
Икос 12
Пою́ще твою́ пе́снь, хва́лим тя́ усе́рдно, я́ко одушевле́нное Дре́во Госпо́дне: на тебе́ бо пригво́ждся пло́тию, Влады́чествуяй го́рними си́лами, освяти́, просла́ви и научи́ пе́ти тебе́ такова́я:
Ра́дуйся, Кре́сте, мы́сленный мечу́; ра́дуйся, святы́х свято́е зре́ние.
Ра́дуйся, проро́ков и пра́ведных предвеща́ние; ра́дуйся, всесве́тлая Христо́ва побе́до.
Ра́дуйся, держа́во и огражде́ние царе́й благочести́вых; ра́дуйся, украше́ние и ве́нче иере́ев благогове́йных.
Ра́дуйся, и́стины пресве́тлое удобре́ние; ра́дуйся, спасе́ния благополу́чнейшее утвержде́ние.
Ра́дуйся, све́тлое все́х весе́лие; ра́дуйся, сыно́в ага́рянских прогна́ние.
Ра́дуйся, нетле́ннаго Све́та све́щниче; ра́дуйся, души́ моея́ ра́дование.
Ра́дуйся, Дре́во треблаже́нное.
Конда́к 13
О, всепе́тое Дре́во, носи́вшее все́х святы́х святе́йшее Сло́во! Прие́мши на́ша поклоне́ния, от вся́каго изба́ви злоключе́ния все́х, и ве́чныя изми́ му́ки, тебе́ вопию́щих: Аллилу́ия.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
Ангели от небе́с неви́димо окружа́ют Кре́ст живоно́сный со стра́хом, и светопода́тельную благода́ть све́тло подаю́щий ны́не ве́рным зря́ще, ужаса́ются и стоя́т, зову́ще к нему́ такова́я:
Ра́дуйся, Кре́сте, вселе́нныя храни́телю; ра́дуйся, сла́во Це́ркве.
Ра́дуйся, источа́яй незави́стно исцеле́ния; ра́дуйся, просвеща́яй мирски́я концы́.
Ра́дуйся, живото́чное Дре́во и чуде́с сокро́вище; ра́дуйся, требога́тое сложе́ние и благода́тей пода́телю.
Ра́дуйся, я́ко подно́жие еси́ Бо́жие; ра́дуйся, я́ко предлежи́ши в поклоне́ние все́м.
Ра́дуйся, ча́ше испо́лнь сла́дости; ра́дуйся, све́щниче вы́шния све́тлости.
Ра́дуйся, и́м же благослови́тся тва́рь; ра́дуйся, и́м же покланя́емся Творцу́.
Ра́дуйся, Дре́во треблаже́нное.
Конда́к 1
О, треблаже́нный Кре́сте и всечестны́й, тебе́ покланя́емся, ве́рнии, и велича́ем, ра́дующеся о боже́ственном возвыше́нии твое́м. Но я́ко победи́тельное, и ору́жие непобеди́мое, огради́ и покры́й твое́ю благода́тию зову́щия ти́:
Ра́дуйся, Дре́во треблаже́нное.
Моли́тва ко Го́споду на́шему Иису́су Христу́
Го́споди Иису́се Христе́, Сы́не Бо́га Жива́го, Тво́рче не́ба и земли́, Спаси́телю ми́ра, се́ а́з недосто́йный и па́че все́х гре́шнейший, смире́нно коле́не се́рдца моего́ пред сла́вою вели́чества Твоего́ приклоня́я, воспева́ю и велича́ю безме́рное страда́ние Твое́, и благодаре́ние Тебе́, Царю́ все́х и Бо́гу, приношу́, я́ко благоизво́лил еси́ сни́ти с небе́снаго престо́ла Твоего́ и воплоти́тися от Пречи́стыя Де́вы Мари́и, спасе́ния ра́ди челове́ческаго: безпло́тен сы́й, плотско́е естество́ Божеству́ совокупля́я; бога́т сы́й, во́лею обнища́в, да челове́ка в Ца́рствии Твое́м обогати́ши; труды́ и вся́кия челове́ческия беды́, я́ко челове́к, поне́сл еси́, да все́м во вся́ких печа́лех и ну́ждах посо́бствуеши; четы́редесят дне́й пости́выйся, все́м к воздержа́нию пу́ть показа́л еси́; от лука́вых искуше́н бы́в, все́х от искуше́ний вся́ких избавля́еши. Ве́м, всели́льне Влады́ко, я́ко сия́ Тебе́ непотре́бна бы́ша, но челове́ческаго ра́ди спасе́ния, вся́ претерпе́л еси́. Пре́дан бы́л еси́ за три́десят сре́бреник, да челове́ка иску́пиши от лю́тыя рабо́ты вра́жия. От неми́лостивых иуде́й, [я́ко] незло́бивый Агнец похи́щен бы́л еси́, ро́д челове́ческий от поглоще́ния во́лка мы́сленнаго исторга́яй. На суди́щи предста́л еси́, все́х от осужде́ния огня́ ве́чнаго отводя́й. Свя́зан, пору́ган, оплева́н, от ло́жных свиде́телей оклевета́н, и на поно́сную сме́рть осужде́н, челове́ка от вся́кия напа́сти, муче́ния и от ве́чныя сме́рти свобожда́яй. Пила́ту, нико́его зла́ соде́явый, пре́дан бы́л еси́, и ко Ироду по́слан, и па́ки пору́ган, челове́ка от зла́го обстоя́ния и от поруга́ний вра́жиих избавля́яй. Что́ у́бо возда́м Тебе́, Влады́ко Человеколю́бче, о все́х, я́же претерпе́л еси́, мене́ ра́ди гре́шнаго? Не ве́м. Душа́ бо и те́ло, и вся́ блага́я, от Тебе́ су́ть, и вся́ моя́ Твоя́ су́ть, и а́з Тво́й е́смь. То́чию на безчи́сленное Твое́ милосе́рдие, благоутро́бне Го́споди, наде́яся, пою́ Твое́ неизрече́нное долготерпе́ние, велича́ю неисповеди́мое смотре́ние Твое́, сла́влю Твою́ безме́рную ми́лость, е́юже приклони́лся еси́, мене́ ра́ди осужде́ннаго, да опра́вдан бу́ду. К столпу́, Спа́се, привя́зан и без ми́лости бие́н, ми́лостив сы́й, разреши́ мя, молю́ся, от грехо́в мои́х! Те́рнием венча́н, души́ моея́ грехо́вное те́рние искорени́; тро́стию бие́н по главе́, сокруши́ главу́ зми́я, уязвля́ющаго мя́ жа́лом греха́! В багря́ну ри́зу оболче́н бы́л еси́, и мучи́телем пре́дан, просвети́ ми, Царю́ Пресвяты́й, одея́ние душе́вное, да вни́ду в черто́г Тво́й всекра́сный. С разбо́йниками вмене́ный, и Кре́ст на ра́му Свою́ понесы́й, разбо́йника врага́, и́щущаго ду́шу мою́ уби́ти, Твои́м Кресто́м прожени́. Ве́м Тя́, Иису́се долготерпели́ве, лю́те уя́звленнаго: от верху́ главы́ Твоея́ святы́я, да́же до стопы́ ножны́я, не бе́ в Тебе́ ме́ста це́ла! Что́ же возглаго́лю о неизрече́нном человеколю́бии Твое́м, Христе́ Спаси́телю? То́чию в сокруше́нии се́рдца моего́, покланя́яся Твои́м пречи́стым Страсте́м, и вселюбе́зно я́ лобыза́я, вопию́: поми́луй мя́ гре́шнаго! На Кресте́ пригвозди́тися изво́ливый, пригвозди́ за́поведем Твои́м се́рдце мое́. Воздви́жен с Кресто́м на горе́ Голго́фе, воздви́гни мы́сли моя́ к небеси́, да всегда́ го́рняя му́дрствую. Же́лчию с о́цтом напое́н, огорче́нное мое́ грехо́м се́рдце, услади́ любо́вию Твое́ю, и жа́ждуща мя́ напо́й пото́ком сла́дости Твоея́. Ру́це Твои́ пречи́стеи распростры́й на прия́тие все́х, приими́ мя гре́шнаго. Но́зе пригвожде́нны име́вый, хотя́ всегда́ с гре́шники бы́ти, бу́ди со мно́ю гре́шным, возбраня́яй нога́м мои́м от вся́каго пути́ лука́ваго. Се́рдце отве́рзтое име́вый, яви́ благода́ть Твою́ мне́ гре́шному. Главу́ пречи́стую на Кресте́ преклони́вый, услы́ши недосто́йныя моли́твы моя́. О, пречу́дная и неизме́римая глубино́ милосе́рдия, Христе́ Бо́же! За враги́, распина́тели Твоя́, Бо́гу Отцу́ моли́выйся, да́ждь и мне́ гре́шному сию́ благода́ть, е́же люби́ти враги́ моя́, и моли́тися за ни́х. Разбо́йнику ка́ющемуся ра́й отве́рзл еси́, воззри́, Све́те мо́й, на мене́ гре́шнаго, пода́ждь покая́ние, и отве́рзи мне́ две́ри ми́лости Твоея́, и помяни́ мя недосто́йнаго во Ца́рствии Твое́м. Наконе́ц, в ру́це ду́х Тво́й пресвяты́й преда́вый Бо́гу Отцу́, приими́, Созда́телю, ду́х мо́й, в вре́мя кончи́ны моея́. С креста́ сня́т и в гро́бе, я́ко ме́ртв, положе́н бы́л еси́, Спа́се, живы́й в све́те непристу́пнем, возьми́ от мене́ тя́жкое бре́мя грехо́вное и не возгнуша́йся, Человеколю́бче, всели́тися в гро́б се́рдца моего́ недосто́йнаго, на умервщле́ние плотска́го моего́ мудрова́ния. Яко да не ктому́ себе́, бре́нное созда́ние Твое́, но Тебе́, Го́сподеви и Бо́гу моему́ живы́й, Твои́м же, о Всеми́лостиве, благоутро́бием, сподо́блюся ви́дети Тебе́, Созда́теля и Спаси́теля моего́, за прия́тие сме́рти кре́стныя, сла́вою и че́стию венча́ннаго, в све́те непрекоснове́нныя Твоея́ сла́вы, иде́же со безнача́льным Твои́м Отце́м, и с Пресвяты́м, благи́м, животворя́щим и единосу́щным Твои́м Ду́хом ца́рствуеши пре́жде ве́к, и ны́не и при́сно, и во ве́ки веко́в. Ами́нь.
Комментировать