Текст акафиста одобрен для употребления за богослужением и в домашней молитве на заседании Священного Синода 27 декабря 2024 года (журнал № 150).
Кондак 1
Избра́нный чудотво́рче, преди́вный уго́дниче Христо́в, ско́рый помо́щниче и те́плый моли́твенниче о всех, с ве́рою и любо́вию к тебе́ прибега́ющих, Арка́дие богоблаже́нне, я́ко име́яй дерзнове́ние ко Го́споду, моли́ о спасе́нии нас, пою́щих ти: ра́дуйся, преподо́бне Арка́дие, Новото́ржский чудотво́рче.
Икос 1
А́нгелов подража́тель яви́лся еси́, преподо́бне и богоно́сне о́тче наш Арка́дие, а́нгельски пожи́в на земли́ и нам оста́вив о́браз соверше́нства духо́внаго. Сего́ ра́ди просла́ви тя нетле́нием и чудесы́ Христо́с Бог, Ему́же предстои́ши ны́не во сла́ве невече́рней Небе́снаго Ца́рствия, от нас же, чту́щих тя, слы́шиши пе́ние таково́е:
Ра́дуйся, любве́ ра́ди Го́спода вся́кое наслажде́ние земно́е оста́вивый;
ра́дуйся, вся су́етная ми́ра сего́ Христа́ ра́ди презре́вый.
Ра́дуйся, и́го Христо́во благо́е и ле́гкое возлюби́вый;
ра́дуйся, бога́тство нетле́нное обреты́й.
Ра́дуйся, я́ко ко Христу́ прилепи́лся еси́;
ра́дуйся, я́ко у́мныма очи́ма Бо́га зре́ти научи́лся еси́.
Ра́дуйся, во пло́ти я́ко безпло́тен пожи́вый;
ра́дуйся, честну́ю и боголюбе́зную чистоту́ сохрани́вый.
Ра́дуйся, я́ко у́зкими враты́ в простра́нство Ца́рствия Небе́снаго возшел еси́;
ра́дуйся, я́ко равноа́нгельную честь досто́йно прия́л еси́.
Ра́дуйся, венце́м неувяда́емым от Го́спода венча́нный;
ра́дуйся, на Небеси́ и на земли́ чудесы́ твои́ми просла́вленный.
Ра́дуйся, преподо́бне Арка́дие, Новото́ржский чудотво́рче.
Кондак 2
Ви́дя непостоя́нство и суету́ мирску́ю, земну́ю же красоту́ и сла́ву нивочто́же вмени́в, по́двиг по́стнический измла́да на себе́ подъя́л еси́ и в безмо́лвии мно́зе, слеза́х и пла́че непреста́ннем о гресе́х свои́х подвиза́лся еси́, поя́ Бо́гови: Аллилу́иа.
Икос 2
Ра́зум от ю́ности несумне́нный име́л еси́, Арка́дие блаже́нне, су́етную сла́ву ми́ра сего́ презре́в, не престая́ помышля́ти о го́рнем, те́мже оста́вил еси́ дом о́тчий ра́ди оте́чествия Небе́снаго. Сего́ ра́ди приими́ от нас похвалы́ сия́:
Ра́дуйся, земли́ новопросвеще́нныя ча́до богоизбра́нное;
ра́дуйся, жела́нием оте́чества Небе́снаго преиспо́лненный.
Ра́дуйся, по́стническое житие́ от ю́ности возлюби́вый;
ра́дуйся, го́рдаго зми́я смире́нием свои́м препобеди́вый.
Ра́дуйся, на и́ноческия по́двиги до́бре себе́ угото́вивый;
ра́дуйся, любве́ Госпо́дни ра́ди дом оте́ческий оста́вивый.
Ра́дуйся, на земли́, а́ки А́нгел пожи́вый;
ра́дуйся, Ду́ха Всесвята́го прия́телище и жили́ще бы́вый.
Ра́дуйся, благоче́стия утвержде́ние;
ра́дуйся, правосла́вия пропове́дание.
Ра́дуйся, усе́рдный и богоприя́тный подви́жниче;
ра́дуйся, те́плый о нас моли́твенниче.
Ра́дуйся, преподо́бне Арка́дие, Новото́ржский чудотво́рче.
Кондак 3
Си́лою Бо́жиею просвеще́н, уразуме́л еси, я́ко век, и́же на земли́, преходя́щ есть, век же бу́дущий, я́ко непреходя́щий, возлюби́л еси́; сего́ ра́ди еще́ юн сый те́лом и млад ле́ты, оба́че вели́к и си́лен пред Бо́гом и челове́ки был еси́. О сем у́бо диви́мся и Бо́гови о тебе́ вопие́м: Аллилу́иа.
Икос 3
Иму́ще тя, о́тче Арка́дие, ско́раго в беда́х помо́щника, благове́рнии лю́дие в напа́стех и ско́рбех тя на по́мощь моли́твенно призыва́ют, и да́ры бла́гости Бо́жия моли́твами твои́ми от Щедрода́вца оби́льно прие́млют, тебе́ же от любве́ те́плыя хвале́бно вопию́т:
Ра́дуйся, ско́рый послу́шателю ве́рно тебе́ моля́щихся;
ра́дуйся, бо́дрый споспе́шниче чистосерде́чне ка́ющихся.
Ра́дуйся, боля́щих врачу́ благоиску́сный и безме́здный;
ра́дуйся, уныва́ющих уте́шителю благода́тный.
Ра́дуйся, душетле́нных страсте́й прогони́телю;
ра́дуйся, бе́сных от наси́лия де́монскаго свободи́телю.
Ра́дуйся, беспомо́щных скоропредста́тельный помо́щниче;
ра́дуйся, соверше́ннаго послуша́ния иску́сный наста́вниче.
Ра́дуйся, ду́хови плоть свою́ покори́вый;
ра́дуйся, ду́шу свою́ от страсте́й очи́стивый.
Ра́дуйся, проше́ния на́ша исполне́нием предваря́яй;
ра́дуйся, ум в се́рдце моли́твенно утвержда́яй.
Ра́дуйся, преподо́бне Арка́дие, Новото́ржский чудотво́рче.
Кондак 4
Бу́рю многомяте́жнаго су́етнаго ми́ра зря, в ти́хое приста́нище спасе́ния, оби́тель Борисогле́бскую гра́да Торжка́, напра́вил еси́ путь твой, о́тче преподо́бне, вся бо блага́я и кра́сная ми́ра презре́в и стра́нника в ми́ре себе́ помышля́я, и́ночество возлюби́л еси́ и в послуша́нии преподо́бному Ефре́му после́довал еси́, поя́ Бо́гу: Аллилу́иа.
Икос 4
Слы́шаще и ви́дяще свято́е житие́ твое́, преподо́бне о́тче Арка́дие, вся бра́тия удивля́хуся и поуча́хуся в ди́внем житии́ твое́м и по́двизех, сла́вяще Го́спода, ди́внаго во святы́х Свои́х. Мы же вси с ве́рою и любо́вию восхваля́ем тя, преподо́бне, и вопие́м ти си́це:
Ра́дуйся, на высоту́ безстра́стия возше́дый;
ра́дуйся, всего́ себе́ в же́ртву Го́сподеви принесы́й.
Ра́дуйся, во́ине Христо́в добропобе́дный;
ра́дуйся, служи́телю А́гнца и Па́стыря ве́рный.
Ра́дуйся, предста́телю о нас пред Го́сподем непосты́дный;
ра́дуйся, сле́знаго умиле́ния в моли́тве преиспо́лненный.
Ра́дуйся, де́нно и но́щно в моли́тве пребы́вый;
ра́дуйся, челове́че Бо́жий, в ми́ре сем а́нгельски пожи́вый.
Ра́дуйся, и́стиннаго смире́ния наста́вниче;
ра́дуйся, соверше́ннаго терпе́ния подви́жниче.
Ра́дуйся, даро́в Свята́го Ду́ха честно́е вмести́лище;
ра́дуйся, Пресвяты́я Тро́ицы избра́нное жили́ще.
Ра́дуйся, преподо́бне Арка́дие, Новото́ржский чудотво́рче.
Кондак 5
Боготе́чней звезде́ подо́бен был еси́, блаже́нне Арка́дие, егда́ прише́л еси́ во град Торжо́к ко избра́нному уго́днику Бо́жию преподо́бному Ефре́му, уче́нием и житие́м све́тло сия́ющему, с ним же во озаре́нии све́тлем непресту́пнаго Све́та дости́гл еси́, ку́пно поя́ Бо́гу: Аллилу́иа.
Икос 5
Ви́дим тя, преподо́бне о́тче Арка́дие, я́ко А́нгела Бо́жия, облече́ннаго в преподо́бие и святы́ню от ю́ности и в доброде́тели соверше́нна, с преподо́бным Ефре́мом в по́двизех духо́вных просия́вшаго, с ним же и ны́не предстои́ши Престо́лу Вседержи́теля во сла́ве ве́чней. Те́мже моли́ся ко Го́споду о спасе́нии нас гре́шных, пою́щих тебе́:
Ра́дуйся, я́ко возлю́бленному твоему́ учи́телю после́довал еси́;
ра́дуйся, я́ко с ним сла́ву небе́сную унасле́довал еси́.
Ра́дуйся, в послуша́нии наста́внику твоему́ до́бре пребы́вый;
ра́дуйся, житие́м твои́м Отца́ Не́беснаго просла́вивый.
Ра́дуйся, оби́тели Борисоглебския сла́во и строе́ние;
ра́дуйся, моли́твы богоуго́дныя приноше́ние.
Ра́дуйся, по́стническаго ли́ка украше́ние;
ра́дуйся, звездо́ сия́ющая утеше́ния.
Ра́дуйся, я́ко те́сный путь па́че простра́ннаго возлюби́л еси́;
ра́дуйся, я́ко о́браз целому́дрия и воздержа́ния яви́л еси́.
Ра́дуйся, в смире́нии Христу́ подража́ние;
ра́дуйся, Святы́я Це́ркве похвало́ и ра́дование.
Ра́дуйся, преподо́бне Арка́дие, Новото́ржский чудотво́рче.
Кондак 6
Посто́м и сле́зною моли́твою плоть твою́ ду́хови порабо́тил еси́, и доброде́телей вене́ц себе́ испле́л еси́. Сего́ ра́ди ны́не предстои́ши Престо́лу Пресвяты́я Тро́ицы, воспева́я песнь побе́дную: Аллилу́иа.
Икос 6
Возсия́ нам, я́ко звезда́ путево́дная, возде́ржное по́стническое житие́ твое́, препо́добне о́тче Арка́дие: не скорбе́л бо еси́ о бра́шне, ве́дый, я́ко сие́ не поста́вит нас пред Бо́гом, не раде́л еси́ о добро́те ри́зной, но ду́шу свою́ доброде́тельми украша́ти предпоче́л еси́. Сего́ ра́ди нетле́нием и чудесы́ прославле́н еси́ от Подвигополо́жника Христа́, от нас же приими́ сия́ пе́сненныя хвалы́:
Ра́дуйся, Ева́нгелия Христо́ва и́стинный после́дователю;
ра́дуйся, за́поведей Бо́жиих усе́рдный исполни́телю.
Радуйся, хле́бом жи́зни насыще́нный;
ра́дуйся, питие́м бессме́ртия напое́нный.
Ра́дуйся, в ри́зу спасе́ния облече́нный;
ра́дуйся, пото́ком слез спаси́тельных ороше́нный.
Ра́дуйся, вся стра́сти воздержа́нием умертви́вый;
ра́дуйся, пре́жде уме́ртвия твоего́ греху́ уме́рый.
Ра́дуйся, де́монов прогони́телю;
ра́дуйся, А́нгелом соревни́телю.
Ра́дуйся, тле́нная вся, я́же на земли́, оста́вивый;
ра́дуйся, пре́жде о́бщаго воскресе́ния нетле́нием от Го́спода просла́вленный.
Ра́дуйся, преподо́бне Арка́дие, Новото́ржский чудотво́рче.
Кондак 7
Хотя́ после́довати и подража́ти А́гнцу Бо́жию, взе́мшему грехи́ ми́ра, кро́тость и смире́ние Его́ себе́ усво́ил еси́, о́тче наш Арка́дие, вся́кия ско́рби и оби́ды безро́потно претерпева́я, ве́дый, я́ко скорбьми́ вре́менными обрета́ется ве́чное спасе́ние, и та́ко соверше́ннаго безстра́стия дости́гл еси́, а́нгельскую песнь воспева́я Вседержи́телю: Аллилу́иа.
Икос 7
Но́вый вои́стину победоно́сец показа́лся еси́ на стра́сти плотски́я, преподо́бне о́тче Арка́дие, вся разже́нныя стре́лы врага́ спасе́ния челове́ческаго посто́м и сле́зною моли́твою угаси́л еси́ и во пло́ти а́нгельское житие́ без преткнове́ния проходи́л еси́, Бо́жией благода́тию укрепля́емый. Те́мже вопие́м ти:
Ра́дуйся, бде́нии всено́щными проти́ву искуше́ний вра́жиих ополчи́выйся;
ра́дуйся, моли́твами непреста́нными от вся́кия скве́рны очи́стивыйся.
Ра́дуйся, поще́нием неосла́бным вся́кое плотско́е жела́ние обузда́вый;
ра́дуйся, трезве́нием неусы́пным соверше́нство духо́вное стяжа́вый.
Ра́дуйся, всего́ себе́ Бо́гу посвяти́вый;
ра́дуйся, за словеса́ Госпо́дни пути́ же́стоки сохрани́вый.
Ра́дуйся, я́ко се́явый слеза́ми, ра́дость пожина́еши присноживо́тную;
ра́дуйся, я́ко ча́дом твои́м источа́еши благода́ть, тебе́ дарова́нную.
Ра́дуйся, я́ко свет уче́ния Христо́ва в се́рдцы свое́м носи́л еси́;
ра́дуйся, я́ко тем просвеща́ем, тьму страсте́й всегуби́тельных разгна́л еси́.
Ра́дуйся, я́ко неле́ностно вся́кую доброде́тель испра́вил еси́;
ра́дуйся, я́ко побе́дныя по́чести от Христа́ Бо́га свы́ше прия́л еси́.
Ра́дуйся, преподо́бне Арка́дие, Новото́ржский чудотво́рче.
Кондак 8
Стра́нника и прише́льца себе́ бы́ти в ми́ре сем непостоя́ннем помышля́л еси́, преподо́бне о́тче, и гряду́щаго града Иерусали́ма Небе́снаго взыску́я, вся помышле́ния твоя́ к Богу возноси́л еси́, и распина́л еси́ плоть твою́ со страстьми́ и похотьми́, сла́дце воспева́я, я́ко в тимпа́не, во умерщвле́ннии телесе́ побе́дную песнь Христу́: Аллилу́иа.
Икос 8
Весь обле́клся еси́ во вся ору́жия Бо́жия, я́ко во́ин Христо́в, препоя́сав чресла́ твоя́ и́стиною, обо́лкся в броня́ правды́ и обу́в но́зи твоя́ во угото́вание благовествова́ния ми́ра, восприя́л еси́ щит ве́ры и шлем спасе́ния и меч духо́вный, и́же есть глаго́л Бо́жий. И́мже и возмо́гл еси́ вся наве́ты лука́ваго победи́ти. Те́мже помози́ и нам, о́тче преподо́бне Аркадие, подража́ти тебе́ в побежде́нии страсте́й на́ших, да зове́м ти:
Ра́дуйся, смире́нием святы́м горды́ню душепа́губную попра́вый;
ра́дуйся, кро́тостию соверше́нною я́рости пла́мень погаси́вый.
Ра́дуйся, я́ко озлобля́емым был еси́ уте́шитель;
ра́дуйся, за и́стину гоне́ние терпя́щим подкрепи́телю.
Ра́дуйся, неду́гующим исцеле́ние подава́яй;
ра́дуйся, в беда́х су́щим заступле́ние явля́яй.
Ра́дуйся, свеще́ неугаси́мая, моли́твою в оби́тели пламенеющая;
ра́дуйся, лампа́до богосве́тлая, ду́ши просвеща́ющая.
Ра́дуйся, вся́кия досажде́ния и оби́ды без гне́ва претерпе́вый;
ра́дуйся, бо́дренным трудолю́бием уны́ние прогна́вый.
Ра́дуйся, от десни́цы Вседержи́телевы увенча́нный;
ра́дуйся, и от нас гре́шных на земли́ просла́вленный.
Ра́дуйся, преподо́бне Арка́дие, Новото́ржский чудотво́рче.
Кондак 9
Вся́кое наслажде́ние плотско́е возненави́дел еси́, Арка́дие преблаже́нне, и Еди́наго Бо́га всем се́рдцем возлюби́л еси́ и чудесы́ Того́ прославил еси́. Те́мже смире́нно мо́лим тя: егда́ и́мамы предста́ти пред Судие́ю Пра́ведным, умоли́ Его́ за нас, да не помяне́т беззако́ний на́ших, но сподо́бит нас блаже́нныя ча́сти одесну́ю стоя́щих и вопию́щих Ему́: Аллилу́иа.
Икос 9
Вети́и многовеща́ннии не возмо́гут изглаго́лати вся по́двиги твоя́ и чудеса́, богому́дре о́тче Арка́дие, я́ко добро́та жития́ твоего́ вои́стину превосхо́дит вся́кую похвалу́ челове́ческую. Оба́че мы, любо́вию к тебе побежда́еми, дерза́ем смиреному́дренно благохвали́ти тя пе́нием таковы́м:
Радуйся, Це́ркве Правосла́вныя свети́льниче немерца́яй;
ра́дуйся, пропове́дниче, Бо́га прославля́яй.
Ра́дуйся, гра́да Вя́зьмы огражде́ние несокруши́мое;
ра́дуйся, гра́да Торжка́ забра́ло необори́мое.
Ра́дуйся, святы́я оби́тели утвержде́ние и похвало́;
ра́дуйся, мона́шествующих лико́в пречу́дная красото́.
Ра́дуйся, христиа́нскому ро́ду при́сное утеше́ние;
ра́дуйся, лю́бящим и чту́щим тя хода́таю спасе́ния.
Ра́дуйся, приводя́й гре́шныя к покая́нию;
ра́дуйся, Ца́ря Небе́снаго умилостивле́ние.
Ра́дуйся, небе́сных черто́гов обита́телю;
ра́дуйся, ра́йских селе́ний граждани́не.
Ра́дуйся, преподо́бне Арка́дие, Новото́ржский чудотво́рче.
Кондак 10
Спасти́ся нам от поги́бели ве́чныя умоли́ Всевы́шняго Творца́, уго́дниче Бо́жий Арка́дие, и не лиши́ нас по́мощи твоея́ святы́я в час кончи́ны, егда́ ско́рби лю́тыя обы́мут и ду́хи нечи́стыя устраша́т нас; тогда́ яви́ся нам засту́пник усе́рден, моли́твами твои́ми избавля́я нас от наве́тов их и сподобля́я лицезре́ния А́нгелов и пе́ния с ни́ми Бо́гу: Аллилу́иа.
Икос 10
Сте́ну заступле́ния и моли́твенника благоприя́тна к Бо́гу обре́тше тя, о́тче Арка́дие, благодаре́ние Отцу́ Небе́сному усе́рдно возсыла́ем за вся благодея́ния Его́, тобо́ю нам оби́льно явля́емыя, тебе́ же, предста́телю на́шему, прино́сим пе́ние таково́е:
Ра́дуйся, уго́дниче Госпо́день, преди́вный в чудесе́х;
ра́дуйся, избра́нниче Христо́в, неутоми́мый в по́двизех.
Ра́дуйся, Всевы́шняго домовлады́ки слуго́ добропослушли́вый;
ра́дуйся, Царя́ царе́й ра́бе благи́й и ве́рный.
Ра́дуйся, си́льный оби́димых засту́пниче;
ра́дуйся, си́рых и убо́гих приста́нище.
Ра́дуйся, душе́вных и теле́сных неду́гов цели́телю;
ра́дуйся, ра́дости нам ве́чныя хода́таю.
Ра́дуйся, еле́ем ра́дования духо́внаго нас умаща́яй;
ра́дуйся, блиста́нием чуде́с твои́х нас озаря́яй.
Ра́дуйся, гре́шников ка́ющихся с Бо́гом примири́телю;
ра́дуйся, Небе́сный наш покрови́телю.
Ра́дуйся, преподо́бне Арка́дие, Новото́ржский чудотво́рче.
Кондак 11
Пе́ние хвале́бное воспева́ем тебе́, преподо́бне о́тче Арка́дие, и с любо́вию припа́даем ко ико́не твое́й, прославля́юще терпели́вное житие́ твое́, воздержа́ние соверше́нное и чистоту́ боголюбе́зную души́ и те́ла; ты же, всеблаже́нне, помози́ нам подража́ти твои́м доброде́телем, да возмо́жем богоуго́дно пе́ти Созда́телю на́шему: Аллилу́иа.
Икос 11
Свети́льник до́брых дел был еси́ в житии́ твое́м, о́тче преподо́бне, те́мже и по сме́рти просия́л еси́ чудесы́ и исцеле́ния источа́л еси́ от нетле́нных моще́й твои́х, и́же я́ко сокро́вище драгоце́нное от недр земны́х це́лы и благоуха́нны обре́тены бы́ша. Тебе́ у́бо, си́це просла́вленному от Го́спода, да́ры пе́сней духо́вных принося́ще, умиле́нно зове́м:
Ра́дуйся, нетле́ния цве́те благоуха́нный;
ра́дуйся, рая́ Иису́сова кри́не прекра́сный.
Ра́дуйся, све́тлостию чуде́с твои́х мрак душ на́ших озаря́яй;
ра́дуйся, от боле́зней многоразли́чных телеса́ на́ша исцеля́яй.
Ра́дуйся, грехо́вных ран врачу́ благоиску́сный;
ра́дуйся, скорбя́щих серде́ц уте́шителю радостотво́рный.
Ра́дуйся, гро́зный наказа́телю оби́дящих;
ра́дуйся, утеше́ние всем тре́бующим твоея́ по́мощи.
Ра́дуйся, оби́тели твоея́ стра́же неусы́пный;
ра́дуйся, любве́ Христо́вы после́дователю ве́рный.
Ра́дуйся, моли́тв на́ших благоприя́тное кади́ло;
ра́дуйся, благоче́стно жи́тельствующих многосве́тлое со́лнце.
Ра́дуйся, преподо́бне Арка́дие, Новото́ржский чудотво́рче.
Кондак 12
Благода́ть вели́ких чудес от Го́спода прия́л еси́, преподо́бне Арка́дие, и по достоя́нию чудотво́рец был еси́: ибо не то́кмо в житии́, но и по сме́рти вели́чием чуде́с твои́х всех удивля́еши, и ко славосло́вию всемогу́щества Христо́ва подвиза́еши, во е́же пе́ти верхо́вному чуде́с Творцу́ и святы́х Святе́йшему Сло́ву: Аллилу́иа.
Икос 12
Пое́м до́блественныя по́двиги твоя́, добропобе́дный во́ине Христо́в, о́тче наш Арка́дие, ублажа́ем честну́ю кончи́ну твою́ и моли́твенно торжеству́ем святу́ю па́мять твою́, тебе́ усе́рдно воспева́юще:
Ра́дуйся, я́ко свя́то и пра́ведно на земли́ пожи́л еси́;
ра́дуйся, яко вои́стину А́нгел земны́й и челове́к небе́сный был еси́.
Ра́дуйся, я́ко благода́тию Бо́жиею благоуха́еши;
ра́дуйся, я́ко то́ю мрак грехо́вный разгоня́еши.
Ра́дуйся, я́ко па́мять твоя́ с похвала́ми и успе́ние со святы́ми;
ра́дуйся, я́ко в ра́дость Го́спода твоего́ вшел еси́.
Ра́дуйся, я́ко ду́шу твою́ Христо́с в Небе́сная селе́ния прия́т;
ра́дуйся, я́ко и те́ло твое́ на земли́ чудесы́ и нетле́нием просла́ви.
Ра́дуйся, я́ко со безпло́тными си́лами горе́ Трисвяту́ю песнь Бо́гови немо́лчно пое́ши;
ра́дуйся, я́ко со проро́ки и апо́столы све́тло торжеству́еши.
Ра́дуйся, со святи́тели и му́ченики просла́вленный;
ра́дуйся, с преподо́бными и пра́ведными безсме́ртия венце́м увенча́нный.
Ра́дуйся, преподо́бне Арка́дие, Новото́ржский чудотво́рче.
Кондак 13
О преподо́бне и богоно́сне о́тче наш Арка́дие, тебе́ мо́лимся и тебе́ про́сим: вонми́ похва́льному пе́нию на́шему, тебе́ от усе́рдия приноси́мому, моли́ Го́спода Бо́га, всея́ тва́ри Соде́теля, да прости́т нам согреше́ния на́ша во́льная и нево́льная и сподо́бит Ца́рствия Своего́ Небе́снаго вопию́щих Ему́: Аллилу́иа.
[Се́й конда́к глаго́лется три́жды.][Далее повторяем 1‑е икос и кондак:]
Икос 1
А́нгелов подража́тель яви́лся еси́, преподо́бне и богоно́сне о́тче наш Арка́дие, а́нгельски пожи́в на земли́ и нам оста́вив о́браз соверше́нства духо́внаго. Сего́ ра́ди просла́ви тя нетле́нием и чудесы́ Христо́с Бог, Ему́же предстои́ши ны́не во сла́ве невече́рней Небе́снаго Ца́рствия, от нас же, чту́щих тя, слы́шиши пе́ние таково́е:
Ра́дуйся, любве́ ра́ди Го́спода вся́кое наслажде́ние земно́е оста́вивый;
ра́дуйся, вся су́етная ми́ра сего́ Христа́ ра́ди презре́вый.
Ра́дуйся, и́го Христо́во благо́е и ле́гкое возлюби́вый;
ра́дуйся, бога́тство нетле́нное обреты́й.
Ра́дуйся, я́ко ко Христу́ прилепи́лся еси́;
ра́дуйся, я́ко у́мныма очи́ма Бо́га зре́ти научи́лся еси́.
Ра́дуйся, во пло́ти я́ко безпло́тен пожи́вый;
ра́дуйся, честну́ю и боголюбе́зную чистоту́ сохрани́вый.
Ра́дуйся, я́ко у́зкими враты́ в простра́нство Ца́рствия Небе́снаго возшел еси́;
ра́дуйся, я́ко равноа́нгельную честь досто́йно прия́л еси́.
Ра́дуйся, венце́м неувяда́емым от Го́спода венча́нный;
ра́дуйся, на Небеси́ и на земли́ чудесы́ твои́ми просла́вленный.
Ра́дуйся, преподо́бне Арка́дие, Новото́ржский чудотво́рче.
Кондак 1
Избра́нный чудотво́рче, преди́вный уго́дниче Христо́в, ско́рый помо́щниче и те́плый моли́твенниче о всех, с ве́рою и любо́вию к тебе́ прибега́ющих, Арка́дие богоблаже́нне, я́ко име́яй дерзнове́ние ко Го́споду, моли́ о спасе́нии нас, пою́щих ти: ра́дуйся, преподо́бне Арка́дие, Новото́ржский чудотво́рче.
Моли́тва
О блаже́ннейший и преди́вный чудотво́рче, о́тче наш Арка́дие! К тебе́ я́ко ско́рому помо́щнику и усе́рдному о нас моли́твеннику смире́нно прибега́ем и моли́твенно про́сим тя: нас, ско́рбных и обремене́нных грехми́ мно́гими, не оста́ви по́мощию твое́ю свято́ю и заступле́нием благода́тным. Не забу́ди нас, чад твои́х, но помина́й нас при́сно в небе́сных благоприя́тных моли́твах твои́х у Престо́ла Пресвяты́я Тро́ицы, иде́же со А́нгелы и все́ми святы́ми предстои́ши и зри́ши вся на́ша ну́жды и беды́, я́ко обурева́емы есмы́ страстьми́ мно́гими и не и́мамы дерзнове́ния ко Го́споду, проси́ти Его́ о поми́ловании и спасе́нии. К тебе́ прибега́ем и на тя упова́ем ми́лость Бо́жию и проще́ние грехо́в на́ших от Вседержи́теля получи́ти и спасе́ние ве́чное унасле́дити. Да сла́вим и пое́м вели́чие, благода́ть и человеколю́бие Отца́ и Сы́на и Свята́го Ду́ха и твое́ оте́ческое заступле́ние, ны́не и при́сно и во ве́ки веко́в. Ами́нь.
Молитва 2-я
(из сборника «Молитвы, чтомыя на молебнех и иных последованиих» (Пг.: Синодальная типография, 1915) с примечанием (л. 128об.): «Моли́тва, что́мая в Новото́ржском Борисогле́бском монастыре́, Тферски́я епа́рхии»)
О преподо́бне и богоно́сне о́тче на́ш Арка́дие! Услы́ши на́с, моля́щихся тебе́, и бу́ди на́м помо́щник в ско́рбех на́ших, и изба́ви на́с от напа́стей, за мно́жество прегреше́ний находя́щих на ны́; умоли́, уго́дниче Христо́в, всеблага́го Бо́га дарова́ти на́м оставле́ние все́х от ю́ности на́шея до настоя́щаго дне́ и часа́, де́лом, сло́вом, помышле́нием и все́ми чу́вствы соде́янных на́ми согреше́ний, исхода́тайствуй на́м невозбра́нный вхо́д в Небе́сное Ца́рствие, да прославля́ем непреста́нно сла́вимую от А́нгел Всесвяту́ю Тро́ицу, Отца́ и Сы́на и Свята́го Ду́ха, и твое́ ми́лостивное предста́тельство в безконе́чныя ве́ки веко́в. Ами́нь.
Комментировать