Кондак 1
Избранниче Христов, патриарше Афанасие, скорбное житие и подвиги твоя воспоминающе, любовию Тя, яко пастыря добраго и заступника нашего, песньми почтим. Ты же, имеяй дерзновение ко Господу, от всяких нас бед свободи, да зовем ти:
Радуйся, святителю Афанасие, великий чудотворче.
Икос 1
Ангелов Творец и Господь сил благоплодную доброту души твоея провидя, святителю отче наш Афанасие, ум твой высоким благомыслием просвети, и стопы твоя от юности направи единаго на потребу взыскати. Ты же, уразумев мира сего непостоянство, возжелел единому Богу во иноческом чине служити. Тем же приими от нас сицевые похвалы:
Радуйся, верный рабе Христов, от юных лет Царю Небесному послуживший.
Радуйся, человече Божий, непорочным житием своим Ангелом подобный.
Радуйся, благодарственного юга благодатное прозябение.
Радуйся, острова Крита рождение и возрастание.
Радуйся, иноческое пострижение в тихой обители приявший.
Радуйся, от подвижников благочестию наученный.
Радуйся, млеком истиннаго Евангельскаго учения напоенный.
Радуйся, догматы православнаго богословия добре уразумевый.
Радуйся, заповеди Христовы изучивый и совершивый.
Радуйся, непрестанною молитвою на высоту богомыслия возносимый.
Радуйся, постом и воздержанием душепагубныя страсти умиривый.
Радуйся, святителю Афанасие, великий чудотворче.
Кондак 2
Видя, яко отчизна твоя тяжкому пленению от нечестивых агарян подпала, ты, отче Афанасие, утеснения и гонения от слуг Магомета претерпевая, помыслы своя к небесной отчизне возносил, во Едином Христе утешение имея, и Ему среди скорбных искушений радостные песни, яко Царю и Богу, воспеваше взывал: Аллилуиа.
Икос 2
Разум твой, Богом просвещенный, не утаися от Патриарха Цареградскаго, иже из уединения Критскаго тя призва и митрополитом града Солуни постави, да неуклонно возвестиши слово истины стаду словесных овец Христовых, душеспасительною пищею учения Евангельскаго их научая, темже тя, яко пастыря добраго, сице прославляем:
Радуйся, светильниче немеркнущий света невечерняго.
Радуйся, неутомимый проповедниче правды Евангельския.
Радуйся, апостолов преемниче и подражателю.
Радуйся, солунян равноапостольный архипастырю и учителю.
Радуйся, яко Богом врученное тебе стадо среди трудов и злых напастей добре пасый.
Радуйся, яко овцы своя словесныя от душегубных волков охранявый.
Радуйся, и на кафедре святительстей иноческих подвигов не оставивый.
Радуйся, в посте и молитве непрестанно пребывавый.
Радуйся, святителю Афанасие, великий чудотворче.
Кондак 3
Сила Божия почивала на тебе, святителю Афанасие, и невидимо в борьбе с еретиками и от православный веры отступниками, укрепляла. Темже ни хитросплетения еретическая, ни острые стрелы лукаваго учения не поколебаша тебе. Яко твердый адамант стоял еси на камени веры святоотеческия и Единому главе Церкве Христовы, Пастыреначальнику Христу воспевал: Аллилуиа.
Икос 3
Первосвятитель Цареграда всеблаженный Кирилл возлюбив тебе, яко отец любит чадо свое, имеюще тебе в трудех своих помощника, и в гонении от неверных сострадальца, темже и мы тебе. Богом и людьми возлюбленному, взываем:
Радуйся, звездо, на тверди Церкви Христовой сияющая.
Радуйся, веры православныя столпе непоколебимый.
Радуйся, лицемернаго учения латинскаго непобедимый обличителю.
Радуйся, православия истиннаго всемощный защитителю.
Радуйся, в винограднике Христове добре потрудивыйся.
Радуйся, овец заблудших ко Христу приведый.
Радуйся, богослове златословесный.
Радуйся, благодати Божией тайновидче.
Радуйся, святителю Афанасие, великий чудотворче.
Кондак 4
Буря гонений, юже подъяша на Церковь Христову латиняне со агаряны, сняла с кафедры вселенскаго патриарха, блаженнаго Кирилла, иже лютую смерть в муках претерпе, от врагов удавление приемый. Ты же, святителю Афанасие, жребий его понести сподобися и, приявши в свои богоноснии руце кормило корабля церковнаго, песнь серафимскую Христу, Церкви Основоположнику, воспел: Аллилуиа.
Икос 4
Слышаша, яко ты, святителю Афанасие, подобно великому Афанасию из Александрии, зело посрамлял своим учением врагов веры православныя, и за сие с кафедры своея изгнан был еси еретиками. Темже, яко исповедника Христова, сицевыми похвалы ублажаем:
Радуйся, апостолов наследниче.
Радуйся, мучеников сострадальниче.
Радуйся, твердый Христов исповедниче.
Радуйся, в гонениях терпение явивый.
Радуйся, злобу врагов любовию Христовою победивый
Радуйся, яко двоекратно с кафедры святительския был изгоняем.
Радуйся, яко великими скорбями был искушаем.
Радуйся, единое утешение в молитве к Богу имевый.
Радуйся, святителю Афанасие, великий чудотворче.
Кондак 5
Подобно звезде боготечней пришел еси, святителю отче Афанасие, из Цареграда на гору Афонскую в удел Пресвятыя Богородицы, и тамо уединенную келию создав, добрым трудом в безмолвии, посте и молитве потрудися, день и нощь Пресвятей Троице, воспевая песнь хвалебную: Аллилуиа.
Икос 5
Видевше, святителю отче Афанасие, яко келия твоя многи иноки к себе собра и во благоустроенный скит расширися, где и до ныне имя Христово иноками прославляется; и память о тебе сицевыми похвалы утверждается:
Радуйся, иноческого уединения устроителю.
Радуйся, благовонный фимиаме молитвы к Богу.
Радуйся, яко тихое и благоприятное для спасения пристанище на Афоне обретший.
Радуйся, под покровом Богоматери в покое богоугодно поживший.
Радуйся, лукавые хитросплетения диавола победивый.
Радуйся, яко изгнание и жестокия муки мужемудренно претерпевый.
Радуйся, яко подобно Христу и ты не имел где главу подклонити.
Радуйся, все добродетели усовершивый.
Радуйся, святителю Афанасие, великий чудотворче.
Кондак 6
Проповедником православнаго вероучения был ты в земли молдавстей и тамо в монастыре святителя и чудотворца Николая временный покой от трудов, гонений и злобы обрел еси, и на спасение верных чад Церкви тамо потрудися, безпрестанно наставляя их богоприятно воспевати Триединому Богу: Аллилуиа.
Икос 6
Немеркнущий свет Богопознания, возсия в боголюбивой душе твоей, святителю Божий, вознесе тя на высоту духовнаго совершенства, яко на некий таемный Фавор, отонюдуже и наша затемненным души твоим молитвенным пред Господем предстательством просвети, во еже глаголати тебе сия похвалы:
Радуйся, пресветлая заре, верным душам путь к Солнцу Правды показующая.
Радуйся, бисере честный, боголюбивая сердца просвещающий.
Радуйся, Божественныя благодати непорочное жилище.
Радуйся, Духа Святаго избранный сосуде.
Радуйся, главе, десницею Вышняго освященная.
Радуйся, реко, водами богомудрия напоенная.
Радуйся, граде, верху горы стояй.
Радуйся, чаше, Божественнаго мира исполненная.
Радуйся, святителю Афанасие, великий чудотворче.
Кондак 7
Человеколюбец Господь, возжелав содеяти тя, святителю Афанасие, близким стране нашей, вложи тебе мысль шествовати в землю нашу, да обрящеши зде духовное утешение и молитвами твоими освятиши страну нашу, в ней же с древних лет Пресвятой Троице песнь хвалебная воспевается: Аллилуиа.
Икос 7
Видя в тебе нового поборника благочестия царь Алексий, с любовию прият тя, святителю, и богатыми дары тя одари. Мы же смиренно приносим тебе, яко дары, сии словесныя похвалы:
Радуйся, яко землю нашу стопами ног твоих освятивый.
Радуйся, яко в старости маститей душевную юность явивый.
Радуйся, яко сердца людей наших молитвами твоими утешивый.
Радуйся, яко боголюбивый народ наш своим пришествием возвеселивый.
Радуйся, церковнаго благочестия поборниче.
Радуйся, ересей и расколов обличителю.
Радуйся, верных мудрый наказателю.
Радуйся, чистоты веры православныя охранителю.
Радуйся, святителю Афанасие, великий чудотворче.
Кондак 8
Странник чуждый был еси святителю Афанасие в земли нашей, но токмо по языку, по вере же и благочестию близок был еси народу нашему, и по воле Божией скоро и второе отечество в стране нашей обрел, и сном смерти зде почил, да содеешися заступником и молитвенником пред Богом за народ наш, иже всечасно воспевает Богу хвалебную песнь: Аллилуиа.
Икос 8
Сердцем всем предавшись Богу и Богом наставляемый, пришел еси ты, святителю Афанасие, в монастырь Лубенский, и в болезни пребывая, благоволил остатися тамо. Но и в немощи сущий, молитвенных подвигов не оставил и, уединенное место избрав, молитвы ко Господу непрестанно возносил. Темже и мы с любовию тебе зовем:
Радуйся, святителю Божий, своим пришествием тихую обитель Лубенскую прославивший.
Радуйся, своими дивными чудесы ту возвеличивший.
Радуйся, яко и наш храм нетлением своих мощей обогативый.
Радуйся, яко благодатию цельбоносных мощей его освятивый.
Радуйся, среди непрестанных псалмопений мирную кончину приявый.
Радуйся, в коленопреклоненней молитве ангела смерти сретивый.
Радуйся, к сонму святых сопричтенный.
Радуйся, нетлением от Бога награжденный.
Радуйся, святителю Афанасие, великий чудотворче.
Кондак 9
Вси ангели Божии с радостным пением сретили праведную душу твою, святителю Афанасие, егда из темницы телесныя до небесных обителей она возношашеся и Творцем ангелов в райския селения прията была и купно с сонмом ангелов немолчно песнь Богу воспела: Аллилуиа.
Икос 9
Буесловцы витийствующие, иже онеправдовали тя, посрамлены быша. Ты же, святителю Афанасие, нетлением и чудесы от Господа по смерти прославлен был еси. Ибо святыя мощи твоя по восьмилетнем в могиле пребывании обретены были целы и невредимы и даже святительских риз твоих не коснуся тление. Радуяся сему явному свидетельству твоея святости, приносим ти сия похвалы:
Радуйся, смерть приявый, но тления не познавый.
Радуйся, благодатными цельбами своя мощи прославивый.
Радуйся, яко раку мощей целебницей недугов являеши.
Радуйся, яко от нея ежечасно людям великия милости подаеши.
Радуйся, яко и по смерти на кафедре святительстей возседаеши.
Радуйся, яко десницею твоею, для лобзания положенною, невидимо нас благословляеши.
Радуйся, яко от бед и скорбей, молитвами твоими нас избавляеши.
Радуйся, целебниче безмездный.
Радуйся, святителю Афанасие, великий чудотворче.
Кондак 10
Спасение вечное наследовал еси, незабвенный Святителю. Нам же, волнами житейскаго моря обуреваемым, верным кормчим и заступником себе являеши даже до сего дне. Онем тя призывающим в сониих и видениих помощь подаеши; инех же верных к тихому пристанищу направляеши, да купно с тобою дивному во святых Богу воспоют: Аллилуиа.
Икос 10
Царя Небеснаго Христа верный служителю, святителю отче Афанасие, нас рабов Его ленивых и непотребных – подвигни данною тебе с небесе благодатию на совершение добродетелей и призови к исполнению заповедей Христовых, да подражатели тебе будем; в час смерти нашея, благую надежду на спасение имамы, взывая к тебе сими похвалы:
Радуйся, Афанасие, Богом прославленный.
Радуйся, архиерею, от Превечнаго Архиерея Христа благодатными дарами исполненный.
Радуйся, рода христианскаго благодатный покровителю.
Радуйся, почитающих тя неусыпный молитвенниче.
Радуйся, вдов и сирот неумытный заступниче.
Радуйся, тяжких страдальцев скорый помощниче.
Радуйся, недугующих врачу.
Радуйся, разслабленных целителю.
Радуйся, святителю Афанасие, великий чудотворче.
Кондак 11
Хвалебных пений наших не отрини, святителю Божий, но милостивно приими их и вознеси за нас своя теплыя молитвы ко Господу Богу, да милостив будет к неправдам нашим. Мы же не дерзаем ко Господу взывати о благодати, имея же тебе великаго угодника Божия за нас пред Ним ходатая, взываем к Нему тя прославившему: Аллилуиа.
Икос 11
Яко светлосияннаго светильника почитаем тя, святителю отче Афанасие, ибо свет добрых твоих дел, имиже Отец Небесный славится, во веки не померкнет. И ныне пред Его Престолом святым во славе предстоя, от нас сии похвалы приими:
Радуйся, яко во славе святых пребываеши.
Радуйся, яко о душах наших усердныя молитвы возносиши.
Радуйся, святости и чистоты крине ароматный.
Радуйся, всех добродетелей цвете прекрасный.
Радуйся, всех окраденных и обездоленных милостивый защитниче.
Радуйся, пастырю добрый и по смерти овец словесных назидающий.
Радуйся, всем к твоей честней раце притекающим, добрыя дары подающий.
Радуйся, и наш град неусыпно охраняющий.
Радуйся, святителю Афанасие, великий чудотворче.
Кондак 12
Благодати Божией исполненная рака святых мощей твоих, святителю отче Афанасие, взоры наша радует и сердца умиляет, ибо мы зрим тя на кафедре святительстей возседающим и жезл архиерейский в руце держащим. Темже поклоняяся нетленным и многоцелебным мощем твоим, прославляем Бога, даровавшаго их нам на утешение и исцеление, немолчно Ему вопием: Аллилуиа.
Икос 12
Воспевая многая и предивная чудеса твоя, чудотворче святителю Афанасие, величаем и восхваляем тя, таковую благодать от Бога приемшаго и усердно молим тя: в час смерти, егда убогая душа наша к своему исходу приблизится и ужасы демонския ю окружат, яви нам твое заступление и молитвами твоими избави нас от власти велиара, да благодарственно воззовем к тебе сице:
Радуйся, яко велие дерзновение пред Господем имаши.
Радуйся, апостольскаго престола наследниче.
Радуйся, яко на небеси со апостолы во славе возседаеши.
Радуйся, яко и на земли на кафедре святительстей нетленными мощами пребываеши.
Радуйся, страны нашея славо и похвало.
Радуйся, града нашего ежечасная радосте.
Радуйся, телес наших врачу благодатный.
Радуйся, душ наших предстателю спасающий.
Радуйся, святителю Афанасие, великий чудотворче.
Кондак 13
О, великий чудотворче, святителю Христов отче наш Афанасие, многая моления оставльше о едином тя молим и просим: вознеси твоя святыя молитвы ко Господу Богу и избави нас от осуждения вечнаго и мучений адских, да твоим заступлением сподобимся купно с тобою блаженство рая наследовати и со всеми святыми пети Творцу нашему: Аллилуиа.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
Ангелов Творец и Господь сил благоплодную доброту души твоея провидя, святителю отче наш Афанасие, ум твой высоким благомыслием просвети, и стопы твоя от юности направи единаго на потребу взыскати. Ты же, уразумев мира сего непостоянство, возжелел единому Богу во иноческом чине служити. Тем же приими от нас сицевые похвалы:
Радуйся, верный рабе Христов, от юных лет Царю Небесному послуживший.
Радуйся, человече Божий, непорочным житием своим Ангелом подобный.
Радуйся, благодарственного юга благодатное прозябение.
Радуйся, острова Крита рождение и возрастание.
Радуйся, иноческое пострижение в тихой обители приявший.
Радуйся, от подвижников благочестию наученный.
Радуйся, млеком истиннаго Евангельскаго учения напоенный.
Радуйся, догматы православнаго богословия добре уразумевый.
Радуйся, заповеди Христовы изучивый и совершивый.
Радуйся, непрестанною молитвою на высоту богомыслия возносимый.
Радуйся, постом и воздержанием душепагубныя страсти умиривый.
Радуйся, святителю Афанасие, великий чудотворче.
Кондак 1
Избранниче Христов, патриарше Афанасие, скорбное житие и подвиги твоя воспоминающе, любовию Тя, яко пастыря добраго и заступника нашего, песньми почтим. Ты же, имеяй дерзновение ко Господу, от всяких нас бед свободи, да зовем ти:
Радуйся, святителю Афанасие, великий чудотворче.
Молитва
О, святителю Христов, угодниче Божий Афанасие! Велением Божиим жребий служения святительскаго восприим и крест Христов на рамена своя возложив, был еси пастырь добрый, светильник всесветлый, столп непоколебимый, Церкве служитель верный, иерархов начальник, Православия защитник, нечестия искоренитель, сего ради и водворился еси в дому Господа твоего. Тебе убо просим: молися о нас, с верою и любовию притекающих к честным и многоцелебным мощем твоим, не отрини просящих у тебе помощи в скорбех и болезнех. Молитвою твоею предстани ко Всевышнему Владыце, исходатайствуй яже на пользу душ и телес наших и отверзи нам двери милосердия Божия. Ходатайством твоим сохрани Церковь Святую тверду и непоколебиму от навет вражиих. Моли Господа и Владыку, да тихое и безмолвное житие поживем во всяком благочестии и чистоте. Соблюди храм сей, в немже вселился еси, от всяких бед и напастей и от всех враг видимых и невидимых, и, якоже в жизни критския люди от неправеднаго агарянскаго убиения избавил еси, тако и ныне на Небесех непрестанно молися ко Господу избавитися нам от всякаго злаго обстояния. Подаждь руку помощи и всем православным христианам, притекающим к честным и нетленным мощем твоим и в молитвах своих тя призывающим. Ускори на молитву и потщися на помощь, имиже веси судьбами, да вси, бесприкладное Божие милосердие видяще и чаемую помощь получивше, славят подавшаго тебе силу и славу Отца и Сына и Святаго Духа, во Единем Существе славимаго Бога, ныне, и присно, и во веки веков. Аминь.
Комментировать