Канон преподобномученикам Феодору и Василию Печерским


Минея, 11 Августа, Кано́н преподо́бным

Глас 2

Песнь 1

Ирмос: Нетре́ну, необы́чну,/ немо́кренно морску́ю ше́ствовав стезю́,/ избра́нный вопия́ше Изра́иль:/ Го́сподеви пои́м, я́ко просла́вися. 

Припев: Святи́и преподобному́ченицы, моли́те Бо́га о на́с.

Нетре́н хотя́й по́стничества путь ше́ствовати,/ Феодо́р сла́вный, ева́нгельски ми́ра сего́ суе́тий отре́кся и бога́тство разда́в ни́щим,/ еди́н би́сер, Христа́, стяжа́, Ему́же и пое́т:/ я́ко просла́вися. 

Припев: Святи́и преподобному́ченицы, моли́те Бо́га о на́с.

Ви́дя, блаже́нне, я́ко мир во зле лежи́т,/ не восхоте́л еси́ на тле́ние сего́ взира́ти,/ тем всели́лся еси́ в пеще́ру,/ мно́га ле́та пребы́в, воздержа́нию прилежа́ и трудо́м, на Еди́наго взира́я Бо́га. 

Припев: Святи́и преподобному́ченицы, моли́те Бо́га о на́с.

Зави́дя, враг вселука́вый раска́янием разда́нных име́ний/ вве́рже тя, преподо́бне, во отча́яние, на мно́ги дни помрача́я,/ но ты испове́данием па́ки испра́вился еси́/ и посрами́л еси́ хотя́щаго тя посрами́ти. 

Сла́ва Отцу́ и Сы́ну и Свято́му Ду́ху.

Я́ко соверше́н и́нок, соверше́нное нестяжа́ние имы́й,/ увеща́л еси́ Феодо́ра, преподо́бне Васи́лие,/ не раскаева́тися, я́ко прехо́дит ми́ра сего́ о́браз,/ но на Небе́сная взира́ти, я́ко та пребыва́ют во ве́ки. 

И ны́не и при́сно и во ве́ки веко́в. Ами́нь.

Богородичен: От влеку́щаго мя к тле́нию руки́ исхи́ти, Влады́чице,/ к нетле́нным же взира́ти устро́й/ и напра́ви живо́т наш, я́ко Ско́рая Помо́щница и исправле́ние челове́ком. 

Песнь 3

Ирмос: Лук сокруши́ся си́льных/ держа́вою Твое́ю, Христе́,/ и си́лою немощству́ющии препоя́сашася. 

Припев: Святи́и преподобному́ченицы, моли́те Бо́га о на́с.

Лук сокруши́ся велиа́ра, напряже́нный на тя, о́тче,/ ты бо, прие́мь я́ко меч, глаго́лал еси́ Иису́совы моли́твы, пресе́кл еси́ того́;/ и и́же пе́рвее неду́говав, сребролю́бием омра́чаемь,/ последи́, препоя́сався Боже́ственною си́лою, был еси́ врагу́ в я́зву. 

Припев: Святи́и преподобному́ченицы, моли́те Бо́га о на́с.

Услы́шал еси́, преподо́бне, я́ко погуби́ зла́то и живо́т,/ раска́явыйся иногда́ о разда́нней ми́лостыне,/ пла́кал еси́ го́рько и, тем от сребролю́бнаго неду́га избы́в, возопи́л еси:/ прославля́ю, Бла́же, непостижи́мую Твою́ ми́лость. 

Припев: Святи́и преподобному́ченицы, моли́те Бо́га о на́с.

А́ки единоутро́бнии, возлю́бльшеся с собо́ю, Васи́лие и Фео́доре,/ ненави́дящаго добра́ преуспе́янием в за́поведех Госпо́дних посрами́ли есте́ велиа́ра./ И мене́ ко преуспева́нию тех утверди́те,/ да вку́пе прославля́ю с ва́ми непостижи́мую Бо́жию ми́лость. 

Припев: Святи́и преподобному́ченицы, моли́те Бо́га о на́с.

Отше́дшу Тебе́ на послуша́ние, преподо́бне Васи́лие,/ обре́т враг вре́мя и преобрази́вся в твой о́браз,/ вообрази́ Феодо́ру па́ки любле́ние разда́нных и́мений,/ я́ко не помяну́ Иису́совы моли́твы в бесе́де неполе́зней. 

Сла́ва Отцу́ и Сы́ну и Свято́му Ду́ху.

Мня́йся стоя́ти, да не паде́шися, всяк блюди́ся,/ я́коже сбы́стся на Фео́доре блаже́ннем:/ той бо, мня́йся прогна́вый супоста́та, прия́ его́ па́ки,/ и бы́ли бы́ша ему́ после́дняя го́рша пе́рвых,/ а́ще не бы от сих спасла́ его́ непостижи́мая Бо́жия бла́гость. 

И ны́не и при́сно и во ве́ки веко́в. Ами́нь.

Богородичен: Нечу́вствен сый, возмни́хся в доброде́телех стоя́ти, неве́дый, я́ко падо́хся,/ но Ты, Ско́рая Помо́щнице, возведи́ мя, Чи́стая Де́во,/ и научи́ мя усе́рдно Бо́жия за́поведи твори́ти,/ да прославля́ю Твою́, Ма́ти Бо́жия, несказанную ми́лость. 

Седален, глас 8

От зло́бы нача́льника врага́ уязви́лся еси́, о́тче,/ изли́шнее с тем бесе́довав о непо́лезных,/ не помина́я сего́, я́ко тлят бесе́ды злы обы́чаи благи́я,/ но сие́ все бысть Бо́гом попуща́емо,/ да искуше́ние твое́ яви́тся чисте́е зла́та и бо́льший вене́ц Тебе́ исхода́тайствует,/ его́же и прие́м последи́, моли́ся Христу́ Бо́гу и нам того́жде не лиши́тися,/ чту́щим любо́вию святу́ю па́мять твою́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Стре́лы лука́ваго, плотски́м раздеже́нием15 напое́нны, уязви́ша мое́ се́рдце,/ и лежу мертв, живота́ отча́явся,/ пла́стырь цельбы́ Твое́й приложи́ ми, Чи́стая Де́во,/ я́ко Целе́бница всего́ христиа́нскаго рода.

Песнь 4

Ирмос: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,/ непости́жимую Твою́ си́лу. 

Припев: Святи́и преподобному́ченицы, моли́те Бо́га о на́с.

Услы́шав всегуби́тель, я́ко в бесе́де не помина́еши И́мене Го́спода Иису́са, Фео́доре,/ прия́т де́рзость и сове́тует проси́ти у Бо́га,/ е́же пода́тися Тебе́ мно́жеству зла́та и сребра́,/ разда́ннаго ра́ди твоего́ бога́тства,/ ты же не помяну́л еси́, я́ко хотя́щии богати́тися впада́ют в напа́сть и в зло неисцели́мо. 

Припев: Святи́и преподобному́ченицы, моли́те Бо́га о на́с.

Вся бе́сом сове́туемая прие́мь, преподо́бне,/ ви́дел еси́ бе́са во сне, а́ки а́нгела во све́тлости вели́цей,/ показу́ющаго Тебе́ в пеще́ре сокро́вище,/ е́же, прокопа́в мало, обре́т, вма́ле не погуби́л еси́ многоце́ннаго би́сера, Христа́,/ Его́же благода́тию, пады́й, па́ки испра́вился еси́. 

Припев: Святи́и преподобному́ченицы, моли́те Бо́га о на́с.

Ко́рень сребролю́бия в Тебе́ хоти́ прорасти́ти в ве́тви,/ диа́вол вта́йне наноси́мыми помышле́нии и я́ве явле́нием во о́бразе Васи́лия/ сове́тует со обре́тенным зла́том в чу́ждую страну́ бежа́ти/ и притяжа́ти себе́ се́ла на потре́бу,/ да та́ко, удали́вся, преподо́бне, ме́ста сего́ свята́го,/ отпаде́ши и Бо́жия благода́ти. 

Сла́ва Отцу́ и Сы́ну и Свято́му Ду́ху.

Живота́ продолже́нием и ста́рости на́шествием враг устраша́я,/ к любоиме́нию привлека́ет тя, Фео́доре,/ хотя́ отъя́ти тебе́ па́мять, да не помина́еши Ре́кшаго:/ не пецы́теся о у́трии, Бог бо пече́тся о вас. 

И ны́не и при́сно и во ве́ки веко́в. Ами́нь.

Богородичен: Отъя́т лука́вый мне па́мять, да не помина́ю Ре́кшаго:/ не пецы́теся душе́ю вашею;/ и та́ко в душегу́бную веде́т мя страну́,/ да та́мо, Бо́жия благода́ти обнища́в, сконча́юся./ Но, Чи́стая Де́во, не попусти́ ми в коне́чную сию́ па́сти поги́бель. 

Песнь 5

Ирмос: Угль Иса́ии проявле́йся,/ Со́лнце из де́вственныя утро́бы/ возсия́ во тьме заблу́ждшим,/ Богора́зумия просвеще́ние да́руя. 

Припев: Святи́и преподобному́ченицы, моли́те Бо́га о на́с.

Угль еще́ име́яй, блаже́нне, опаля́ющий со́весть твою́ студо́м, отвеща́л еси́ бе́су:/ обеща́хся зде в пеще́ре живо́т мой сконча́ти,/ ка́ко у́бо ны́не бегле́ц бу́ду?/ Но зде поживу́ и вся сотворю́ повеле́нная тобо́ю. 

Припев: Святи́и преподобному́ченицы, моли́те Бо́га о на́с.

Па́ки супоста́т предлага́ет,/ я́ко уве́дано бу́дет обре́тенное сокро́вище, и прети́т отъя́тием о́наго,/ с ни́мже сове́тует от ме́ста сего́ бежа́ти,/ его́же послу́шав сове́та, приуготовля́лся еси́ к бежа́нию,/ а́ще не бы́ша удержа́ли тя, Фео́доре, преподо́бных оте́ц моли́твы,/ па́че же Са́мыя Богома́тере десни́ца. 

Припев: Святи́и преподобному́ченицы, моли́те Бо́га о на́с.

И́стиннаго послу́шателя и име́ний нестяжа́теля,/ блаже́ннаго Васи́лия, отгна́л еси́, Фео́доре,/ я́ко облича́вша тя, пре́лестию бесо́вскою ослепле́нна,/ той же, отгоня́емь, не пререка́ше, па́че же моля́ше Бо́га,/ да тя изба́вит от сатани́нских ловле́ний. 

Сла́ва Отцу́ и Сы́ну и Свято́му Ду́ху.

При мно́гих свиде́телех да оправди́шися, Васи́лие,/ прише́л еси́ с бра́тиею ко прельще́нному, того́ уверя́я,/ я́ко не с тобо́ю, но с бе́сом, во о́бразе твое́м вчера́ и пре́жде того́ бы́вшим/ и ко́зни своя́ распростира́ющим, он бесе́дова. 

И ны́не и при́сно и во ве́ки веко́в. Ами́нь.

Богородичен: Враг многоко́зненный, хотя мя запя́ти,/ во многоли́чныя претворя́ется о́бразы и де́йствует в мы́сли мое́й,/ да удалю́ся Твоего́, Ма́ти Пречи́стая, покро́ва;/ но Ты, Влады́чице, не попусти́ на мя такова́го искуше́ния. 

Песнь 6

Ирмос: Глас глаго́л моле́бных/ от боле́зненныя, Влады́ко, души́ услы́шав,/ от лю́тых мя изба́ви:/ еди́н бо еси́ на́шего спасе́ния вино́вен. 

Припев: Святи́и преподобному́ченицы, моли́те Бо́га о на́с.

Глас глаго́лов Иису́совы моли́твы я́ко услы́ша льсти́вый,/ не дерзну́ к Тебе́, Фео́доре, приступи́ти,/ но, пораже́н, бе́гаше от твое́я пеще́ры,/ ты же, о си́ле тоя́ моли́твы укрепи́вся,/ и вся́кому, к Тебе́ приходя́щему, не отверза́л еси́ двере́й,/ донде́же испове́сть, я́ко Госпо́дь Иису́с Христо́с на́шему спасе́нию вино́вен. 

Припев: Святи́и преподобному́ченицы, моли́те Бо́га о на́с.

От толи́каго ро́ва поги́бели изба́влен сый, Фео́доре,/ ископа́л еси́ ров глубо́к и поги́бельное сокро́вище в он вве́ргл еси́,/ присыпа́я и любоиме́ния па́мять, глаго́ля в себе́:/ несть и́но что та́ко и́ноком, я́ко любоиме́ние, душевре́дно. 

Припев: Святи́и преподобному́ченицы, моли́те Бо́га о на́с.

Мно́гими труды́ томя́ себе́, Фео́доре,/ да не, пра́зден сый, впаде́ши в безстра́шие и ле́ность,/ поста́вил еси́ же́рновы,/ и, меля́ на бра́тию жи́то, во усте́х име́л еси́ непреста́нно Иису́сову моли́тву,/ и та́ко на неви́димаго врага́ укрепи́лся еси́. 

Сла́ва Отцу́ и Сы́ну и Свято́му Ду́ху.

Хотя́ супоста́т устраши́ти тя, блаже́нне,/ сотвори́ глас, а́ки гро́ма, и ме́ляше в же́рновы,/ но ты, разуме́в того́ де́йство, запрети́л еси́ тому́,/ и бысть, а́ки пле́нник, повину́яся и меля́,/ донде́же пять возо́в изме́ле жи́та в нощь еди́ну. 

И ны́не и при́сно и во ве́ки веко́в. Ами́нь.

Богородичен: В ле́ности мя су́ща всегда́ враг пленя́ет/ и поуча́ет мя на непотре́бная дела́,/ но Ты, Мари́е, Ма́ти Бо́га моего́, прожени́ того́,/ мене́ же научи́ порабо́тити плоть ду́ху/ и послужи́ти Бо́гу моему́ в преподо́бии и правде. 

Кондак, глас 2

Добр сове́тник я́влься блаже́нному Феодо́ру, Богому́дре Васи́лие,/ изба́вил еси́ того́ сове́том свои́м от пре́лести диа́воли/ и ко све́ту богора́зумия наста́вль./ С те́мже по́слежде блаже́нную прия́л еси́ кончи́ну,/ устреле́н непра́ведно быв во утро́бу от сребролюби́ваго князя./ И ны́не, предстоя́ Го́сподеви,/ моли́ся непреста́нно о всех нас.

Икос

Премно́жеством доброде́телей ва́ших, преподо́бнии,/ я́ко сад кра́сный, испо́лнь су́ще/ и, я́ко от ра́я, процвели́ есте́ поще́нием и моли́твами,/ всех благоуха́юще от вони́ мно́гих ва́ших трудо́в, и по́двигов, и пото́в преподо́бнических,/ в ни́хже преидо́сте благоиску́сно к безско́рбному животу́/ и венце́м побе́дным увязо́стеся;/ моли́те непреста́нно о всех нас.

Песнь 7

Ирмос: Вети́и яви́шася о́троцы любому́дрейшии дре́вле,/ от богоприя́тныя бо души́, богосло́вяще устна́ми, поя́ху:/ Пребоже́ственный отце́в и наш Бо́же,/ благослове́н еси́. 

Припев: Святи́и преподобному́ченицы, моли́те Бо́га о на́с.

Вети́йствовати, блаже́ннии отцы́, хотя́ще,/ о мы́слех открыва́ху друг дру́гу и разсужда́ху о́ба, а́ще богоуго́дны мы́сли их бы́ша./ Сих, бра́тие, подража́юще,/ разсужде́нием бра́тним мы́сли своя́ искуша́йте, ки́я суть от Бо́га. 

Припев: Святи́и преподобному́ченицы, моли́те Бо́га о на́с.

По́двигом и трудо́м преподо́бнаго Феодо́ра ревную́ще,/ не дади́м труда́ на́шего и́ным,/ но я́коже той сам на ке́ллию свою дрова́ ноша́ше,/ та́ко и мы потруди́мся на нас,/ а́ще хо́щем, да враг нам празднолю́бием не стужа́ет. 

Припев: Святи́и преподобному́ченицы, моли́те Бо́га о на́с.

Ненави́дяще, бе́си блаже́нному па́кости творя́ху,/ ели́ко бо той со мно́гим трудо́м древа́ на го́ру ноша́ше,/ толи́ко они́ па́ки с горы низверга́ху,/ но, труд заде́юще ста́рцу, са́ми подъя́ша труды́ и томле́ние. 

Припев: Святи́и преподобному́ченицы, моли́те Бо́га о на́с.

Вервь треплете́нна есть непреста́нная моли́тва от чи́ста се́рдца,/ е́юже Феодо́р блаже́нный связа́ зло́бныя ду́хи,/ и бы́ша ему́, а́ки пле́нницы, повину́ющеся/ и нося́ще древа́ на созида́ние ве́тхаго монастыря́, и́же сгоре́ пре́жде. 

Сла́ва Отцу́ и Сы́ну и Свято́му Ду́ху.

Мно́гими труды́ лука́вии ду́си томи́ми и безче́ствуеми,/ вопия́ху на блаже́нных, хваля́щеся и глаго́люще:/ лю́тии нам супоста́ти, Фео́дор и Васи́лий,/ с ни́миже не преста́нем бра́тися, до́ндеже предади́м я сме́рти,/ не ве́дуще, я́ко сим честне́йшему венцу́ вино́вни бу́дут. 

И ны́не и при́сно и во ве́ки веко́в. Ами́нь.

Богородичен: Тобо́ю, Влады́чице, укрепля́ема ви́дяще мя, бе́сове скреже́щут зубы/ и хва́лятся непреста́нно бра́тися со мною, до́ндеже одоле́ют./ Но Ты, Засту́пнице моя́, не преда́ждь мя в их ру́ки,/ но изми́ мя от тех наве́тов. 

Песнь 8

Ирмос: О подо́бии зла́те небре́гше, треблаже́ннии ю́ноши,/ неизме́нный и живы́й Бо́жий о́браз ви́девше,/ среди́ огня́ воспева́ху:/ осуществова́нная да пое́т Го́спода вся тварь/ и превозно́сит во вся ве́ки. 

Припев: Святи́и преподобному́ченицы, моли́те Бо́га о на́с.

Подо́бием вся́каго злохи́трства своего́ нача́ша бе́сове поощря́ти злы́я челове́ки,/ да бы́ша погуби́ли тя, Фео́доре,/ те́мже ная́тии изво́зницы со мно́гою укори́зною к судии́ оклевета́ша тя, свя́те;/ но ты, о сем не радя́, взыва́л еси́:/ да пое́т Го́спода вся тварь и превозно́сит его́ во ве́ки. 

Припев: Святи́и преподобному́ченицы, моли́те Бо́га о на́с.

В подо́бии блаже́ннаго Васи́лия прии́де бес па́ки к не́коему боля́рину безчелове́чну,/ оклевета́я Фео́дора за обре́тенное сокро́вище,/ с ни́мже, рече́, хо́щет на и́ну страну́ бежа́ти;/ злочести́вый же он не ве́дяше,/ я́ко святи́и еди́но сокро́вище и́мут, Христа́,/ Его́же превозно́сят хвала́ми во ве́ки. 

Припев: Святи́и преподобному́ченицы, моли́те Бо́га о на́с.

В подо́бии Васи́лия злочести́вый боля́рин приведе́ ко кня́зю бе́са,/ и́же и тому́ солга́ о сокро́вищи на тя, свя́те,/ и сове́товаше, да и́мут и мно́гими му́ками да истя́жут от Тебе́ зла́то;/ но ты, блаже́нне, ничто́же боя́ся, кре́пко вооружи́лся еси́ на супоста́та,/ удали́вшагося от Го́спода во ве́ки. 

Сла́ва Отцу́ и Сы́ну и Свято́му Ду́ху.

Во у́трие князь, а́ки на лов или́ на не́коего во́ина кре́пкаго сам иды́й,/ улови́ тя, блаже́нне, и, приве́д в дом, пе́рвее ласка́нии истя́зоваше сокро́вища от Тебе́,/ ему́же отвеща́л еси́, свя́те:/ обрето́х сокро́вище и ви́дех мно́жество сосу́дов златы́х,/ я́же па́ки закопа́х, я́ко ми неполе́зно,/ и моли́х Го́спода, да забу́ду о́но во ве́ки. 

И ны́не и при́сно и во ве́ки веко́в. Ами́нь.

Богородичен: Закопа́х вве́ренный мне тала́нт, я́ко раб лени́вый,/ и ника́коже па́мятьствую, я́ко и́мам о приобре́тении о́наго отве́т да́ти моему́ Влады́це./ Тем молю́ Тя, Всечи́стая Пресвята́я Де́во,/ помози́ ми тала́нт сотвори́ти сугу́бый,/ я́ко да обря́щу Го́спода моего́ ми́лостива во ве́ки. 

Песнь 9

Ирмос: Весь еси́ жела́ние, весь сла́дость,/ Сло́ве Бо́жий, Де́вы Сы́не,/ Бо́же бого́в, Го́споди, святы́х Пресвяты́й,/ тем Тя вси с Ро́ждшею велича́ем. 

Припев: Святи́и преподобному́ченицы, моли́те Бо́га о на́с.

Жела́я разреши́тися от уз плотски́х и со Христо́м бы́ти,/ свя́зан был еси́ от кня́зя непови́нне;/ и, му́чим кре́пко, му́чащаго врага́ уму́чил еси́, Фео́доре блаже́ннейший. 

Припев: Святи́и преподобному́ченицы, моли́те Бо́га о на́с.

От пло́ти твое́я струя́ми кровь теча́ше и обагри́ власяни́цу,/ в ню́же, а́ки во многоце́нную порфи́ру, оде́ян, в Небе́сный Чертог вшел еси́,/ иде́же с Ро́ждшею Бо́га в Тро́ице велича́еши. 

Припев: Святи́и преподобному́ченицы, моли́те Бо́га о на́с.

Пове́шен и ды́мом удавля́емь,/ та́же огне́м зело́ опаля́емь был еси́, блаже́нне,/ но Бо́жия десни́ца сохрани́ тя це́ла,/ я́ко ниже́ власяни́це твое́й огнь прикосну́ся,/ и, а́ки в прохла́дне ме́сте, во пла́мени стоя́, Христа́ с Ро́ждшею прославля́л еси́. 

Припев: Святи́и преподобному́ченицы, моли́те Бо́га о на́с.

Пре́лести бесо́встей ве́ровав князь,/ дерзну́ я́ти тя, Ца́рствующего над страстьми́, Васи́лие,/ и послу́ха хотя́ име́ти на Фео́дора, вопроша́ше о сокрове́ннем зла́те;/ ты же несумне́нно того́ и предстоя́щих обличи́л еси́,/ я́ко бесо́м прельще́нных. 

Сла́ва Отцу́ и Сы́ну и Свято́му Ду́ху.

Шу́мен сый от вина́, не стерпе́в обличе́ния твоего́,/ князь безу́мный стрело́ю уязви́ тя от лу́ка;/ ты же, блаже́нне, проро́чествовал еси́ ему́, глаго́ля,/ я́ко и сам то́южде стрело́ю я́звен бу́дет,/ и сбы́стся глаго́л твой, блаже́нне, вскоре. 

И ны́не и при́сно и во ве́ки веко́в. Ами́нь.

Богородичен: Возшуме́ша врази́ на́ши, Госпоже́, и обыдо́ша о́крест,/ пуща́юще грехолю́бныя на ны стре́лы./ Но Ты, Влады́чице, град су́щи тве́рд, стена́ необори́ма и щит кре́пкий,/ защити́ и сохрани́ с Сы́ном Тя велича́ющих. 

Светилен

В темни́цу вве́ржени, отцы́ блаже́ннии,/ по мно́гих му́ках изведе́ ду́ши ва́ша Госпо́дь от уз плотски́х/ и введе́ во свет присносу́щный испове́датися И́мени Его́ свято́му,/ иде́же со а́нгельскими ликостоя́нии веселя́щеся,/ помяни́те и нас, ле́тнюю па́мять ва́шу почита́ющих.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Уловле́н сый грехолю́бными сетьми́ от супоста́та/ и в темни́цу со́вестнаго ослепле́ния вве́ржен,/ не ви́жду со́лнца за́поведей Го́спода моего́,/ но к Тебе́, Чи́стая, вопи́ю:/ возсия́й ми покая́ния со́лнце и согре́й луча́ми бла́гости Твоея́ оледене́вшее се́рдце,/ да сла́влю вы́ну Твою́ ско́рую по́мощь.

«Азбука молитвы»
в Telegram.
t.me/azprayer