56. 1427 г. сентября 23. Его же послание в Псков, о мерах против стригольников и о небытии в церковных старостах ротникам, двоеженцам и троеженцам

Из рукописи Румянц. Музея № 204, л. 416–420; сверено со списком, находящимся в сборнике синодальной библиотеки, № 562, л. 327 об.–331. Издано было в I-м томе Актов Исторических под № 34.

Благословенье Фотия, митрополита киевского и всея Руси, в Псков, собору Святой Троицы, и собору Святой Софии, и собору Святого Николы, игуменам и попам и священническому всему и иноческому чину, и посаднику Федосью Фефиловичу, и старым посадникам, и всему Пскову, христоименитым Господним людям, живущим всем под законом Божьим, и держащим и имеющим, по преданию божественных Апостолов и богоносных Отцов, чин великого Божьего священства, и живущим всем и держащим тое от божественных и священных правил и от Божьей церкви проданное православие истинное, и чисто и непреложно тем божественным и священным преданием покаряющеся и верующее.

Что есмь, сынове, преже слышах ²³⁸⁵ от ваших послов, что деи некоторые суть в вас от супостата врага диавола, еже от многих того сетей, пропинаемых от искони народ человеческий, а паче на христианский, и того же запятием и злоухищрением, слышах, некоторых в вас помраченных, зовомых стригольников ²³⁸⁶ , и от христианства отпадающих и в ров погибели ниспадающих: и о тех падении и омрачении духовных очей, Богу ведущу, с коликим рыданием преже писах вашей любви, ради тех стригольников ²³⁸⁷ уверения и познания и обращения к Богу, в православие истинное. И пишете ми, сынове, со своим послом с посадником Феодором, что есте, по моей грамоте, тех стригольников обыскали и показнили: и о том о вашем крепком благостоянии, еже о благочестии Божьего закона, великое ваше православие благодарю, и благословляю непреложно и крепко тако о том и стоять, и тех помраченных к свету и к истине богоразумия возводяще, якоже и божественные мученики о вере и о истине свои крови прольяша, и неверных царей и мучителей ко Христу приведоша. А что пишете, что иные ти стригольники побегали; а которые остались, а про тех пишете, что те деи диавольским запятием, яко диаволу в нихъ вогнездившуся, и тe деи к своему христианству истинному и к вере православной таки не дерзают чисто зреть, и смотреть, и веровать, ни к отцам духовным на покаяние приходить, а еще и ²³⁸⁸ хулу глаголюще на чин великого Божьего священства: и преже убо пространне о сим писах вашей любви, еже того общего врага дьявола поущение ²³⁸⁹ бысть, еже како нашего праотца Адама из рая изгнана показа, и того же запятием Иуду ученика предателя Сыну Божьему введе, и того же паки запятием Израильские óни люди той враг диавол на своего Творца вскую восшататься сотвори. А как ми пишете о тех помраченных ²³⁹⁰ , что како тe стригольники, отпадающие от Бога и на небо взирающе беху, тамо Отца себе нарицают ²³⁹¹ : а понеже ²³⁹² бо самых того ²³⁹³ истинных евангельских благовестий и преданий апостольских и отеческих не верующе, но како смеют, от земли к воздуху зряще, Бога Отца себе нарицающе, и како убо могут Отца себе нарицать? А убо ослепи их помрачение их. А весте, еже не ангелов ²³⁹⁴ Бог сведе роду человеческому на исправление, но человеков достоверных, святителей и apxиереев постави, и иереев, и свою власть от Апостолов тем дарова; и се паки и по божественному писанию весте от Апостолов, еже Бог наш на небеси и на земли. И которые тe стригольники, от своего заблуждения, не имут ²³⁹⁵ чисто веровать православия истинного, ни к Божьим церквам, к небу ²³⁹⁶ земному, не имут быть прибегающе, и на покаяние к своим отцам духовным не имут приходить: и якоже убо преже к вам писах, и ныне пишу, удаляйте себя от тех в ястьи и питьи, и казнями (толико не смертными, но внешними казнями и заточениями) приводяще тех, да будут в познание и обращение к Богу, и никако да будут тe попущены в вас, яко плевелы посреди пшеницы.

А что ми пишете, что суть у вас и таковые люди, ротники, и крест целуют накриве: ино крест дан от Христа христианам, верой тому покланяться, и истиной и чистотой того честного креста целовать; и целуяй тако крест, освящевает себя, и от болезни и от недугов всяческих исцелевает; а не верой и не истинно целуяй крест, и той убо лжеобщник неисцельно врезает себя, а по писанию, яко богоубийца вменяется таковый поругатель честному кресту. И пишете ми, что и у церквах у вас таковые люди старостят, и на властях сидят и судят: ино таковые ротники и лжеобщники, по писанию, никако могут дел церковных заведать, ни судов судить; и вы от таковых блюдете ²³⁹⁷ и никако власти в церковных делах вдавайте им, ни суда судить. Но вы, священники, учите таковых, о том с покаянием к Богу обратиться и плакать себе, зане христианину православну не дан честной крест в роту, ти именей ища, целовать того; а и на истине ²³⁹⁸ целуяй кто крест до трижды на имениях, на злате и сребре, – и по сем несть тому целования крестного, ни соприобщения с верными.

Да и еще что ми пишете, что деи таковые у церквей старостят, с женами законными расступився, а поняв вторую жену или третью, яко прелюбодейцы: и о том таковые треженцы oтселе никако дабы старшинствовали в церквах Божьих; зане преже от божественного писания писах вам, како пишут божественные Отцы: «первый брак, пишет, закон, второй прощение, третий законопреступление, и той нужды ради последнего времени человеком введеся, с многим о том рассуждением и смотрением о себe имеющим; како единородную, бессмертную душу от того сладострастия очистить»; и егда же убо пишется «третий брак законопреступление», того ради таковые треженцы никако могут старшинствовать у церквах Божьих, но должны суть о cебе попечение и смотрение иметь. Господь же Бог да оградит и соблюдет о всем ваше православие в всяком благоверии и чистоте, с победой о всем на все видимых врагов и невидимых; и с сем ²³⁹⁹ всем Божья благодать и милость ²⁴⁰⁰ , и молитва моя и благословенье да есть с вами. А дана грамота на Москве, месяца сентября в 23 день, в лето 6936, индикта 6.