святитель Филарет Московский (Дроздов)

212. Молитва пред окончанием молебнаго пения, в новый 1847 г., и в воспоминание седмисотлетия царствующаго града Москвы

(Напечатана в Твор. Св. От. 1847 г. и в собрании 1848 г.)

1847 год

Господи Боже Вседержителю, Словом Твоим утвердивый небеса и Духом уст Твоих всю силу их, положивый светила на тверди небесней в знамения, и во времена, и во дни, и в лета, и бытие видимых созданий Твоих в круги времен заключивый, благословивый начатки времен, и числа исполнения их освятивый! Ты, Господи, усты Пророка Твоего Моисея, первым в месяцех лета нарекл ecи месяц, в оньже агнцем избавительныя пасхи спасительное таинство Агнца закланнаго прежде сложения мира, Господа нашего Иисуса Христа, предобразил еси людем Твоим Израилю. Ты, в древнем законе Твоем, в предел седмицы дней и седмицы седмиц, праздники Твоя, в память благодеяний Твоих, поставил еси; и исполнение седмицы лет и седмицы седмилетий, во обновление памяти судеб Твоих, летом оставления венчал ecи, со благословением безтруднаго изобилия. Се ныне Твой новый Израиль, от древняго образа к новоявленней истине прешед, первый в месяцех, и новое лето начинает от явления во яслех, вифлеемских Агнца, вземлющаго грехи мира, Господа нашего Иисуса Христа, и от начатия Его всеспасительныя крестныя жертвы, в страдательном пролиянии крове Обрезания. Царствующий же град сей не месяца токмо и лета начало пред собою ныне зрит, и не седмицы дней токмо и лет исчисляет, но, седмь протекших над ним веков помянув, судьбам Твоим чудится, и в помышлении о судьбах осьмаго своего века, пред лицем Твоим, Царю веков, благоговеет. Исповедуем милости Твоя древния, и о настоящих благодарим, и о будущих молим. Славим Твое благодатное избрание, и богатый о нас Промысл, яко малую некогда весь во град велий возрастил еси; и, прежде сбытия, еже славну быти граду сему во всех градех российских, и взыти рукам его на плещи враг его, и прославитися Тебе в нем, угодником Твоим святителем Петром предвозвестил еси; таже и приносимый престол Православия зде утвердил еси, и корень Единодержавия всероссийскаго зде насадил еси, и престол Царства возвысил еси, и угасшему светильнику царскаго рода отселе с вящшею светлостию возсияти даровал ecи, и святым Твоим зде пожити и во благоухании святыни почити благоволил еси, ихже молитвами овогда убо, аки адамантовою стеною, от напастей ограждал еси град сей, овогда же и бедствующий вскоре избавлял еси, и во дни наши, мневшийся погибнути, от пепела и разрушения еси возставил, и новым благолепием украсил, и обилием исполнил. Отче щедрот и Господи милости! Призри благосердием на сие благодарственное исповедание наше, и не отстави милости Твоея от нас. Благослови венец новаго лета благостию Твоею: и венец седми веков, иже на версе царствующаго сего града, и во осмем да не увядает. Обнови и умножи благословения Твои на превознесенном Тобою рабе Твоем Благочестивейшем Самодержавнейшем Великом Государе Нашем Императоре Николае Павловиче, и на державном Его роде. Долгоденствие и благоденствие, и в делах царствия и во всех добродетелех преуспеяние Им даруй. Сохрани Церковь Твою святую неколеблему на основании Твоего Божественнаго слова, на камени Апостольския веры, и никоеже дерзновенное своемудрие человеческое да не прикоснется кивоту Божию. Реки, Господи, мир на люди Твоя, и на обращающия сердца к Тебе. Да будет близ боящихся Тебе спасение Твое, вселити славу в землю нашу. Милость и истина в ней да сретаются, и правда и мир да лобызаются. Не предаждь нас, призрети в суеты и неистовления ложная, но да призрим на вся заповеди Твоя, и не постыдимся. Даруй нам благодать и благую ревность, да Твоего вечнаго царствия и правды его, прежде и паче всего, ищем, яко да и благая временному житию потребная вся приложатся нам, предстательствующими и покровительствующими молитвами Преблагословенныя Приснодевы Богородицы и Святителей Петра, Алексия, Ионы и Филиппа, с нимиже во общении веры Тебе Единому Триипостасному Богу, Безначальному Отцу и Собезначальному Сыну и Соприсносущному Святому Духу, приносим подобающее благодарение, и поклонение, и славу, во веки веков.



Источник: «Сочинения Филарета, митрополита Московского и Коломенского» в пяти томах (1873, 1874, 1877, 1882, 1885) – М., типография А. И. Мамонтова и К° (М., Леонтьевский переулок, № 5). Раздел «Библиотека» сайта Троице-Сергиевой Лавры

Вам может быть интересно:

1. Слова и речи – 149. Слово о молитве, преимущественно церковной, в день памяти Преподобнаго Сергия святитель Филарет Московский (Дроздов) 388,8K 

2. Слова и речи – 173. Слово в день обретения мощей Преподобнаго Сергия святитель Филарет Московский (Дроздов) 388,8K 

3. "И увидел я новое небо и новую землю". Комментарий к Апокалипсису – IV. Окончание Книги Откровения (22:6–21) архимандрит Ианнуарий (Ивлиев) 1,8K 

4. О стологадании святитель Филарет Московский (Дроздов) 1,4K 

5. Собрание мнений и отзывов по делам Православной Церкви на Востоке святитель Филарет Московский (Дроздов) 317 

6. Толкование на Послание Святого Апостола Павла к Галатам – Глава II профессор Александр Павлович Лопухин 60,1K 

7. "И увидел я новое небо и новую землю". Комментарий к Апокалипсису – III. Основная часть книги Апокалипсис. Видения на небе и с неба (4:1–22:5) архимандрит Ианнуарий (Ивлиев) 1,8K 

8. Толкование на Послание Святого Апостола Павла к Галатам – Глава I. профессор Александр Павлович Лопухин 60,1K 

9. Толкование на книгу пророка Исаии – Глава 1 профессор Александр Павлович Лопухин 367,7K 

10. Бог не хочет страдания людей профессор Жан-Клод Ларше 11K 

11. История религий – Глава 5. Синтоизм митрополит Иларион (Алфеев) 82,1K 

12. О граде Божьем – Книга первая блаженный Аврелий Августин 331,8K 

13. Изложение монашеского опыта – Часть 1. Письма к монашествующим и мирянам преподобный Иосиф Исихаст 100,1K 

14. Изложение монашеского опыта преподобный Иосиф Исихаст 100,1K 

15. Экзамен без права на пересдачу или как пройти мытарства протоиерей Олег Стеняев 10,7K 

16. О граде Божьем блаженный Аврелий Августин 331,8K 

17. Наставления в духовной жизни – Выпуск 1 святитель Феофан Затворник 565K 

Комментарии для сайта Cackle