святитель Кирилл II, митрополит Ростовский

Слово о первозданном

Созда Бог преже Адама от земля. и от его же ребра жену ему созда. душу има из себе вдохну. и введе и́ в рай пищный. заповеди има преда. сатана же взавиде Адаму. дабы его соблазнил. да быста заповедь Божию преступили. якоже и сам. и не можаше Адама диявол прельстити. но Евву прельсти и соблазни ю. а Евва Адама прельсти. и быста из рая изгнана. и во смерть осужена. в скорби и печали быста велице. землю осужена делати. и в печали дети родиста. и от сих мир сей наполнися. устави же Бог рок человеком житию на земли 7000 лет. и что ся. их в ту 7000 лет изберет во святыя по закону Божию живших. теми ангельский чин спадший исполняет. и аще кто согрешит что. покаяние положил. и аще кто истине покается. приимет пакы его Бог. ащели согрешив кто злоб ся не останет и не кается. таковии будут с бесы осужени в вечную муку. сего бо деля диявол вельми завидит роду человечю. и не останет прельщая. овы прельсти в тварь веровати и в солнце же и в огонь. и во источникы же и в древа. и во ины различны вещи. ихъже рещи не возможно. да яко сам отпаде от Бога. тако и нас льстит. дабы ему не единому в негасимом огни быти. и завистию многы человекы от Бога отлучил. первый мир водою за грехи Бог потопи. единаго токмо Ноя праведнаго соблюде, с женою и с тремя сыны и с женами их. а Содома и Гомора и околняя грады камением огненным и пламенем погуби я. а праведнаго Лота от смерти избави. и две его дщери. израильтяны же от работы фараоня Моисеом изведе и многа сотвори в них чюдеса. манною и крастели кормя. и воду им из камени в пустыни изведе. морем их проведе яко посуху. а фараона в нем погрузи. и за 40 лет ни сапози ни ризы не издрашеся. и потом всея забыша благодати Божия и чюдесе Его. и ставше играти и начаша плясаниемь. и в том часе раступлься земля и пожре их 2 тмы и 3000. се образ муки согрешающимь яве. иже не каются. посем виде Творець Господь род человечь от диявола мучим. и посла первие пророки проповедати вочеловечение Господне. по сем благовестити посла архангела Гавриила в град Назарет к Деве Марии зачатие и рожество от Святаго Духа без семени на спасение человеком. и прием плоть от Девы Господь бысть человек и Бог. и вся претерпе нашего ради спасения. и на земли поживе. и страсти мнози прият от твари Своея и за ланиту ударен и поруган и заплеван и тростию по главе биен. и от терния венец возложиша нань. мняше бо диявол человека его а не Бога. того ради нань жиды научи. они же ведуще Господа завистию распяша и́. желчи и о́цта напоиша. и копием ребра Ему прободоша. смерть прия яко человек. но воскрес яко Бог. и вознесеся на небо. Тойже паки приидет судити живым и мертвым, живыя мнит праведники. а мертвыя грешники наричет.


Источник: Приводится по изданию: Памятники Древле-Русской духовной письменности: Поучения Кирилла, епископа Ростовскаго (XIII века). / Журнал «Православный собеседник", Казань. - 1859 г. - Книга I. - с. 256-258.

Вам может быть интересно:

1. Слово о страхе Божием святитель Кирилл II, митрополит Ростовский

2. Слово и поучение к попам Кирилл II, митрополит Киевский

3. Слово на святых отец 318, от Святых книг, указание о Христе, Сыне Божием, и похвала отцем святого Никейского Собора святитель Кирилл Ту́ровский

4. Похвальное слово в день святаго первомученика Стефана святитель Астерий Амасийский

5. О бедствиях в Кипрской стране преподобный Неофит, затворник Кипрский

6. Отрывок из похвального слова святому великомученику Димитрию Геннадий II Схоларий, патриарх Константинопольский

7. Слово обличительное, отчасти, против латинского зловерия; здесь же и против "Альманаха", который возвелеречил, что будет всемирный потоп более гибельный, чем упоминаемый когда-либо преподобный Максим Грек

8. Толкование на книгу пророка Софонии святитель Кирилл Александрийский

9. Похвальное слово Алвиану преподобный Нил Синайский

10. Слово о Симеоне и Анне священномученик Мефодий Олимпийский, епископ Патарский

Комментарии для сайта Cackle