В 15-й день

Святи́теля Стефа́на испове́дника, архиепи́скопа Суро́жскаго

ВЕ́ЧЕР

Блаже́н муж:

На

Го́споди, воззва́х

: поста́вим стихов 6 и пое́м стихи́ры, глас 4.

Подо́бен: Дал еси́ зна́мение:

Житие́ непоро́чно/ яви́л еси́, Стефа́не,/ к Престо́лу Госпо́дню, прехва́льне, доше́л еси́,/ архиере́йским ми́ром пома́зався,/ на смерть преда́йся по Соде́телю созда́ние/ и ны́не, на Небесе́х всели́вся/ в же́ртвенник Госпо́день, сла́вне,/ моли́ о пою́щих тя.

Зна́мении и чудесы́/ тебе́ Влады́ка просла́ви,/ треблаже́нне Стефа́не:/ прого́ниши бо ду́хи и врачу́еши стра́сти,/ ду́ши просвеща́еши ве́рных,/ приходя́щих ко свято́му твоему́ гро́бу,/ А́нгелов равностоя́телю, архиере́ев сопресто́льне,/ апо́столов еди́нонравне, благове́рия побо́рниче.

Пога́ных преще́ния не устраши́вся, блаже́нне,/ бла́гобоязненным умо́м,/ Христо́ве благоле́пно честне́й ико́не/ научи́л еси́ всех непосрамле́нно покланя́тися/ и те́плою ве́рою целова́ти;/ и о ней претерпе́л еси́/ бие́ния, о́тче Стефа́не, и темни́цы,/ прови́дя бу́дущия ра́дости восприя́тие.

Све́тло же возсия́ со́лнце, му́дре, всепра́зднественная па́мять твоя́,/ заря́ми облиста́ющи доброде́тельных твои́х дея́ний, всеблаже́нне,/ просвеща́еши ве́рных сердца́ сия́нии чуде́с твои́х,/ тебе́ пра́зднуем ра́достно,/ тя чтим, Росси́и похвало́ и нам, ве́рным,спасе́ние,/ прему́дре о́тче Стефа́не/ и пресла́вне архиере́ю Христо́в, преподо́бне,/ утеше́ние стра́нным и врач неду́жным,/ не отходи́ от нас, моли́ся за пою́щих тя,/ тем ти благоусе́рдное и человеколю́би́вое смотре́ние сла́вим,/ святи́телю, всеблаже́нне Стефа́не, спаси́ ду́ши на́ша.

О́браз соблю́л еси́ Тро́ицы све́тло, преподо́бне о́тче,/ по Христо́ве иконе подвиза́вся му́жески,/ и не устраши́ся гноете́знаго преще́ния,/ но душе́вным мече́м умертви́л еси́,/ тем дерзнове́ние и́маши ко Го́споду,/ сохрани́ па́ству твою́ от е́реси вся́кия,/ Стефа́не многострада́льне.

И́ны стихи́ры, глас 2.

Подо́бен: Ки́ими похва́льными:

Ки́ими похва́льными венцы́/ увязе́м святи́теля?/ свяще́нству венца́, благочести́я управле́ние,/ Це́ркви све́тлое украше́ние,/ исто́чника Боже́ственных исцеле́ний неисчерпа́емаго,/ проли́тие дарова́ний духо́вных,/ реку́ мно́гих чуде́с,/ о́трасли Суро́жския веселя́ща тече́ньми, Стефа́на,/ те́плаго предста́теля на́шего и храни́теля.

Ки́ими смире́нными устна́ми/ воспои́м святи́теля?/ Ди́внаго в чудесе́х и Безпло́тных сожи́теля,/ освяще́ннаго от пеле́н, столпа́ Це́ркве недви́жима,/ весе́лие земли́ Суро́жской,/ царю́ нечести́вому обличи́теля и Правосла́вию испове́дника,/ и, Христа́ ра́ди от беззако́нных зауша́ема,/ иму́ща ве́лию ми́лость.

Прииди́те, Суро́жстии собо́ри,/ псало́мски воспле́щем рука́ми,/ печа́льным уте́ху и отча́янным засту́пника,/ блаже́ннаго Стефа́на воспева́юще,/ Боже́ственнаго Христо́ва смире́ния ревни́теля,/ похвалу́ земли́ Суро́жской/ и всей той стране́ украше́ние,/ ро́ду же на́шему везде́ промы́сленника,/ подаю́щаго ми́ру ве́лию ми́лость.

Сла́ва, глас 4:

Подоба́ет Суро́жскому ро́ду/ Стефа́на везде́ име́ти архиере́я,/ я́ко не́кую у́тварь ца́рскую/ и сокро́вище некрадо́мо,/ всем даю́що бога́тство, спаси́тельное пропове́дание,/ и вся собира́юща к соедине́нию пе́сней Боголе́пных./ К нему́же возопие́м:/ иера́рше и испове́дниче Стефа́не,/ Христа́ Бо́га моли́ о душа́х на́ших.

И ны́не, Богоро́дичен: И́же Тебе́ ра́ди:

Вход. Проки́мен дне. И чте́ния 3

(зри день 6-й).

На литии́ стихи́ры, глас 8.

Подо́бен: О, пресла́внаго чудесе́:

О, пресла́вное чу́до,/ я́ко усе́рдно себе́ Бо́гу возложи́л еси́,/ по́стными боле́зньми, по́стническими слеза́ми/ и Боже́ственною любо́вию исполня́ет,/ плотски́я стра́сти преоби́дел еси́,/ и попра́л еси́ воздержа́нием де́моны,/ и святи́тель Боже́ственный быв Вседержи́теля.

О, пресла́вное чу́до,/ я́ко усе́рдно ты, Стефа́не,/ Суро́жу быв просвети́тель/ и ча́дам его́ везде́ засту́пник,/ пасту́х Це́ркви Суро́жской,/ обурева́емым же ти́хое приста́нище,/ врач душе́вным страсте́м, вку́пе же и теле́сным,/ отоню́ду же все вку́пе веща́ют и призыва́ют твое и́мя.

Боже́ственным Огне́м разжига́ем Уте́шителевым, му́дре,/ и Тро́ицею осия́ем,/ вра́жия победи́л еси́ сове́ты и ла́яния,/ очи́стив себе́, Стефа́не, воздержа́нием и чистото́ю,/ дом быв Христо́в, блаже́нне,/ и чистото́ю сему́ послужи́л еси́,/ святи́тель бы́вши, свя́те.

Мла́ты17

желе́зными побива́еми че́люсти твоя́,/ не преста́л еси́ от любве́ Христо́вы,/ но неве́рнаго царя́ обличи́л еси́/ испове́дания ра́ди честны́я ико́ны и всю тварь ту уясни́л еси́./ О, му́жеству твоему́,/ я́ко не утерпну́л еси́ запреще́ния,/ но и́стину я́сно пропове́дал еси́.

До́блестей твои́х безчи́сленных, о́тче преподо́бне,/ кто бо не послуша́,/ твоему́ смире́нию и терпе́нию кто не удиви́тся?/ и́же к ни́щим ти́хость, скорбя́щим утеше́ние/ вся благоле́пно учи́л еси́, Стефа́не святи́телю,/ и ны́не неувяда́емым венце́м увязе́ся,/ и моли́ спасти́ся душа́м на́шим.

Сла́ва, и ны́не, глас 6:

Кров Твой, Пречи́стая,/ не отыми́ от раб Твои́х,/ мо́лит Тя учи́тельская седми́ца:/ Васи́лие Вели́кий, Григо́рие Боже́ственный/ и Нико́лае Мирлики́йский,/ Пе́тре, чудотво́рче русский,/ Лео́нтие Ростовский, Стефа́не Суро́жский и Росси́йский,/ и Иоа́нне Зла́тоусты́й,/ и вси чудотво́рцы Российстии, моли́теся спасти́ся душа́м на́шим.

На стихо́вне стихи́ры, глас 5.

Подо́бен: Ра́дуйся:

Ра́дуйся, свяще́нная главо́,/ от пеле́н очи́стившаяся Ду́хом,/ и, сему́ соумно́жившися/ и воспита́вшися до́бре в ме́ру Боже́ственнаго наставле́ния,/ от него́же вся́ко движе́ние, вся́ко дея́ние,/ всяк ра́зум и вся́ко сло́во/ возвеща́я до́бльственне,/ кра́йняго жела́ния дости́гл еси́,/ иде́же сра́дуешися, всеблаже́нне Стефа́не,/ ликостоя́нию А́нгельскому и архиере́йскому собо́ру,/ со все́ми святы́ми умоля́й Спа́са/ поми́ловати нас.

Стих: Свяще́нницы Твои́ облеку́тся пра́вдою,/ и преподо́бнии Твои́ возра́дуются.

Ра́дуйся, от среды́ тьмы мно́гия возсия́вый,/ я́ко звезда́ всесве́тлая,/ всю вселе́нную просвеща́еши све́тло/ заря́ми, о́тче, дел твои́х;/ тем вся влече́ши к непосты́дному раче́нию/ и Боже́ственною любо́вию взерца́тися всегда́/ лица́ твоего́ неразсу́днаго зрака./ И́мже и по сме́рти взя́тися, свя́те,/ прие́мшая тя сла́ва, я́вственно плодонося́щи:/ ея́же ны́не восприе́мля, умоля́й Спа́са/ поми́ловати нас.

Стих: Восхва́лятся преподо́бнии во сла́ве/ и возра́дуются на ло́жах свои́х.

Ра́дуйся, честны́й у́ме,/ Тро́ице чи́стый сосу́де,/ сто́лпе Церко́вный, ве́рным утвержде́ние,/ побежда́емым по́мощь,/ звездо́, и́же сия́нии Богоприя́тных твои́х моли́тв/ разоря́я напа́стей же и скорбе́й тьму всегда́, Стефа́не,/ приста́нище ти́хое, в не́же притека́юще,/ и́же треволне́ньми жития́ одержи́ мии спаса́ются./ Христа́ моли́/ душа́м на́шим да́ти ве́лию ми́лость.

Сла́ва, глас то́йже:

Воструби́м трубо́ю пе́сней,/ стеце́мся, правосла́внии,/ и у́зрим победи́тельства пастыренача́льника Суро́жскаго/ и учи́теля на́шего./ Ца́рие и кня́зи посрами́шася/ от Стефа́нова стра́шнаго явле́ния,/ царя́ бо обличи́,/ о́бразу Христа́ Бо́га на́шего не восхоте́вшаго покланя́тися./ Па́стырие и учи́телие Правосла́вныя па́ствы,/ Христо́ва пастыренача́льника, прииди́те, восхва́лим,/ А́нгелов сожи́тельника и му́чеников похвалу́,/ архиере́ев сла́ву, и по ве́ре побо́рника,/ и на́шего те́плаго засту́пника,/ путьше́ствующим спутеше́ственника/ и пла́вающим окорми́теля,/ везде́ те́плаго предста́теля;/ первопресто́льника Суро́жскаго восхваля́юще, та́ко рцем:/ всесвя́те Стефа́не,/ предвари́, и изба́ви нас искуше́ния вся́каго,/ и спаси́ па́ству сию́ моли́твами твои́ми.

И ны́не, Богоро́дичен, глас то́йже:

Воструби́м трубо́ю пе́сней:/ прекло́ньшися бо свы́ше, Всецари́ца Ма́ти Де́ва/ благослове́ньми венча́вает воспева́ющих Ю./ Лю́дие да стеку́тся/ и Цари́це да воспле́щут в пе́снех, Царя́ ро́ждшей,/ и́же сме́ртию одержи́мыя пе́рвее/ разреши́ти человеколю́бно благоизво́лившаго;/ па́стырие и учи́телие,/ До́браго Па́стыря Пречи́стую Ма́терь, соше́дшеся, восхва́лим, све́щник златоза́рный,/ светоно́сный о́блак, Небе́с простра́ннейшу,/ одушевле́нный же киво́т,/ огнезра́чный Влады́чень престо́л,/ манноприе́мную злату́ю ста́мну,/ заключе́нную Сло́ва дверь,/ всех христиа́н прибе́жище/ пе́сньми Богогла́сными похваля́юще, си́це рцем:/ пала́то Сло́ва,/ сподо́би смире́нных нас Небе́снаго Ца́рствия,/ ничто́же бо невозмо́жно хода́тайству Твоему́.

Тропа́рь, глас 4:

Я́ко святи́тель со Безпло́тными еди́ножи́тель быв,/ священному́чениче Стефа́не,/ восприе́м бо Крест я́ко ору́жие,/ и став кре́пко сопроти́в иконоукори́теля и духобо́рцев,/ не покланя́ющихся Пречи́стому о́бразу Христа́ Бо́га на́шего,/ и отсе́кл еси́ вся́ку е́ресь лука́вых./ того́ ра́ди прие́м муче́ния вене́ц,/ изба́вил еси́ град твой Суро́ж от вся́кия неприя́зни./ И ны́не мо́лим тя, свя́те,/ да изба́виши нас от вся́ких злых искуше́ний, и бед,/ и ве́чныя му́ки.

Сла́ва, и ны́не, Богоро́дичен: Е́же от ве́ка:

НА У́ТРЕНИ

На Бог Госпо́дь:

тропа́рь свята́го, два́жды. Сла́ва, и ны́не, Богоро́дичен.

По 1-й кафи́зме, седа́лен, глас 3.

Подо́бен: Боже́ственныя ве́ры:

Боже́ственным Ду́хом просвеще́н,/ пропове́дал еси́ со дерзнове́нием Правосла́вия преда́ние, всеблаже́нне Стефа́не,/ и мучи́теля беззако́нна посрами́л еси́,/ в заточе́ние непра́ведно отсыла́емы/ О́тче преподо́бне, Христа́ Бо́га моли́/ грехо́в оставле́ние пода́ти/ чту́щим любо́вию святу́ю па́мять твою́.

Сла́ва, глас 1.

Подо́бен: Лик а́нгельский:

Кровь твоя́, му́дре, та́йно вопие́т от земли́, я́ко А́велева, блаже́нне,/ ве́льми научи́л еси́ Христо́во вочелове́чение чести́,/ я́ко посрами́л еси́ иконобо́рца е́ресь,/ сего́ ра́ди ко Го́споду взы́де, в Небе́сный черто́г Христа́ Бо́га на́шего.

И ны́не, Богоро́дичен:

Небе́сная любо́вию веселя́хуся и земна́я тре́петом ужаса́хуся,/ егда́ Пречи́стый глас на́йде на Тя, Богоро́дице:/ еди́но бо торжество́ обои́м возсия́,/ егда́ Безпло́тный ра́дость Тебе́ принесе́./ Те́мже со А́нгелом Тебе́ вопие́м:/ ра́дуйся, Чи́стая, Бо́жие жили́ще.

По 2-й кафи́зме, седа́лен, глас и подо́бен то́йже:

Боже́ственная повеле́ния умно́жив,/ ве́ру соблю́л еси́ Правосла́вия,/ беды́ прие́м за ню, Стефа́не,/ в заточе́нии пострада́в ра́нами,/ в темни́цах претерпе́в озлобле́ния, о́тче преподо́бне,/ Христа́ Бо́га моли́ дарова́ти нам ве́лию ми́лость.

Сла́ва, глас 4.

Подо́бен: Ско́ро предвари́:

Правове́рно, преподо́бне, Це́рковь Христо́ву пасл еси́,/ ерети́ческая иконобо́рства, поплева́в, отгна́л еси́,/ и царя́ посрами́л, и ны́не в Вы́шния водворя́ешися,/ святи́телю блаже́нне Стефа́не.

И ны́не, Богоро́дичен:

Боже́ственная ски́ния была́ еси́ Сло́ва,/ еди́на Пречи́стая Ма́ти Де́во,/ чистото́ю А́нгелы превозше́дшая,/ па́че всех мене́, персть бы́вша,/ оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

По полиеле́и седа́лен, глас 4.

Подо́бен: Ско́ро предвари́:

Христу́ после́довав, ми́р оста́вил еси́,/ и плоть покори́в воздержа́нием я́ве, преблаже́нне Стефа́не./ Отню́дуже свяще́ния пома́зание име́л еси́,/ ны́не же к невеще́ственным преста́вился еси́ лико́м,/ моля́ о всех нас, восхваля́ющих тя.

Сла́ва, глас 5.

Подо́бен: Собезнача́льное:

Правосла́вными сия́нии посрами́л еси́ мра́чная иконобо́рец уче́ния,/ и вся е́реси их отгна́л еси́,/ и чудесе́м самоде́телен яви́лся, о́тче, сла́вим бысть про́мыслом Боже́ственным,/ те́мже тя ве́рою почита́ем, святи́телю Стефа́не, А́нгелом равноче́стне.

И ны́не, Богоро́дичен:

Еди́на, ро́ждшая Творца́ всему́,/ еди́на, украси́вшая челове́чество Рождество́м Твои́м, Богоневе́сто,/ изба́ви мя от се́ти льсти́ваго стрельца́/ и поста́ви мя на ка́мени Христо́вых хоте́ний,/ того́, моля́щи приле́жно, его́же воплоти́ла еси́.

Таже степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных его́.

Стих:

Что возда́м Го́сподеви о всех,/ я́же воздаде́ ми? Вся́кое дыха́ние:

Ева́нгелие от Иоа́нна, зача́ло 35, от полу.

По 50-м псалме́ стихи́ра, глас 6:

Преподо́бне, треблаже́нне, святе́йший о́тче,/ па́стырю до́брый, Нача́льнаго Па́стыря Христа́ учениче́,/ положи́вый ду́шу свою́ за Росси́ю,/ сам и ны́не, о́тче наш Стефа́не блаже́нне,/ моли́ся ко Го́споду/ дарова́ти нам ве́лию ми́лость.

Кано́н Богоро́дицы на 6 и свята́го два кано́на на 8. Кано́н, глас 6.

Песнь 1

Ирмо́с:

Волно́ю морско́ю/ Скры́вшаго дре́вле/ гони́теля мучи́теля –/ под земле́ю скрыша спасе́нных о́троцы;/ но мы, я́ко отрокови́цы,/ Го́сподеви пои́м,/ сла́вно бо просла́вися.

Прииди́те, соше́дшеся, воспои́м вси свяще́ннаго на́шего Стефа́на/ и почти́м Суро́жу утвержде́ние,/ засту́пника душа́м на́шим/ и гра́ду на́шему храни́теля необори́ма.

Преклони́ се́рдца́ на́ша, Богоно́сче, во спаси́тельныя Христо́вы за́поведи/ не помышля́ти жите́йских, но да, душе́вных дости́гше добро́т,/ све́тло вни́дем в черто́г Христо́в.

Стефа́не Богому́дре, верховный о́тче,/ А́нгелом равне, Суро́жу утвержде́ние,/ не отве́ржи, но пе́сненно приими́, я́ко кади́ло, от убо́жества моего́,/ е́же ти принесо́х, недосто́йный.

Богоро́дичен: Возопи́й, недосто́йная душе́, пре́жде сме́рти к Богома́тери,/ в по́мыслех те́пле со слеза́ми вопию́щи:/ Пречи́стая Госпоже́, Сы́на Твоего́ моли́твами Твои́ми/ ми́лостива мне сотвори́.

Други́й кано́н, глас 1.

Песнь 1

Ирмо́с:

Христо́с ражда́ется – сла́вите!/ Христо́с с Небе́с – сря́щите!/ Христо́с на земли́ – возноси́теся!/ По́йте Го́сподеви, вся земля́,/ и весе́лием

воспо́йте, лю́дие,/ я́ко просла́вися.

Благода́ть ду́ха прие́м, о́тче,/ в се́рдцы твое́м, Христо́в святи́телю,/ очи́сти язы́к же и се́рдце твои́х певе́ц,/ я́ко да твою́ па́мять воспева́ем све́тло, Стефа́не испове́дниче.

Вели́кий ны́не Стефа́н, па́стырь Це́ркве Суро́жския,/ па́стыря, вку́пе и ста́до, и весь Суро́ж све́тло призыва́ет:/ прииди́те, собра́вшеся, я́ко о́бщему отцу́ све́тло торжеству́ем.

Побежда́ют твоя́ исправле́ния, и словеса́, и ве́щи, Стефа́не,/ его́же ра́ди душе́вное предложе́ние прие́мли со благоуве́тием, достоди́вный,/ е́же бо по досто́инству песнь тебе́ плести́ всем невозмо́жно.

Богоро́дичен: Безме́рна бе́здна Твоего́ непостижи́маго рождества́, Всечи́стая,/ сего́ ра́ди, ве́рнии, несомне́нно у́бо чи́сте припа́даем Ти, глаго́люще:/ ра́дуйся, Богоро́дице Де́во, Ма́ти Неневе́стная.

Катава́сия:

Христо́с ражда́ется:

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Блаже,/ и утверди́вый нас на ка́мени/ испове́дания Твоего́.

Кто тебе́ не блажи́т, преблаже́нне Стефа́не Богоно́сче,/ той мертв есть душе́ю и те́лом пре́жде сме́рти/ и пре́жде Суда́ во осужде́ние низпаде́.

Сокруши́ супоста́ты, преподо́бне, и си́лу их вооруже́нную;/ покори́ нам под но́ги вско́ре ви́димую рать,/ рабы́ твоя́ утверди́ и держа́ву да́руй твое́й па́стве,/ блаже́нне и свяще́нне.

Покры́й град твой, о́тче наш Стефа́не Богоно́сче, от сыно́в ага́рян./ Се бо скреже́щут зубы́ свои́ми на ны,/ пожре́ти ны разже́гшеся, я́ко зве́рие ди́вии,/ но сокруши́ зубы их.

Богоро́дичен: Ле́ствицу Тя прови́де, препе́тая Ма́ти, Иа́ков во сне,/ Небесе́ досяза́ющу,/ в Ню́же Сло́во всели́ся и челове́ки возведе́,/ от человекогуби́тельнаго зми́я избавля́яй.

Ин ирмо́с:

Пре́жде век от Отца́ рожде́нному нетле́нно Сы́ну/ и в после́дняя от Де́вы/ воплоще́нному безсе́менно,/ Христу́ Бо́гу возопии́м:/ вознесы́й рог наш,/ Свят еси́, Го́споди.

Позна́ тебе́ от чре́ва, Богоно́се, всеве́дый Бог,/ пре́жде возвеща́ет тебе́ А́нгелом,/ освяща́ет тебе́ путеводи́теля душа́м и па́стыря вели́каго,/ я́коже Петру́, и тебе́ вверя́ет свое́ ста́до.

Жезло́м воздержа́ния страсте́й мо́ре раздели́л еси́, блаже́нне, я́коже Моисе́й,/ и на безстра́стия го́ру вшел еси́, прие́м разу́мныя скрижа́ли,/ Це́рковь научи́л еси́ Христо́ву зако́ну духо́вному.

Смире́н яви́лся еси́, кро́ток же и тих, Стефа́не,/ отню́дуже духо́вная благода́ть, дово́льне излия́вшися в тебе́,/ вели́ка показа́ тя,/ чуде́с луча́ми зе́млю Суро́жеку́ю осиява́юща.

Богоро́дичен: Тя, запечатанную и́стинно,/ лик проро́ческий, и заключе́нную исто́чника дверь, нарече́,/ де́вства Твоего́, Всепе́тая, издале́ча о́бразы нам пи́шущь Тя,/ ю́же соблю́де́ и по рождестве́.

Седа́лен, глас 1.

Подо́бен: Гроб Твой, Спа́се:

Вели́кий святи́тель Христо́в да воспое́тся,/ столп све́тлый, просвеща́яй нас чуде́с све́тлостьми,/ и о́блак ро́сный, пла́мень страсте́й погаша́ющь/ и ороша́ющь ве́рных мы́сли, Боже́ственный Стефа́н.

Сла́ва, и ны́не, Богоро́дичен:

Све́тлый свети́льниче, Боже́ственная трапе́зо, кади́льнице зла́тая,/ ста́мно, ма́нну нося́щая живоно́сную,/ ве́рных мы́сли услажда́ющи,/ я́коже проро́цы Тебе́, Де́во, провозвести́ша.

Песнь 4

Ирмо́с:

На Кресте́ Твое́ Боже́ственное истоща́ние прови́дя,/ Авваку́м, у́жасся, вопия́ше:/ Ты си́льных пресе́кл еси́ держа́ву, Бла́же,/ приобща́яся су́щим во а́де,/ я́ко Всеси́лен.

Отлучи́хся от Бо́га, гре́шный, и удали́хся аз, блу́дный,/ иногда́ во страну́ всели́хся дале́че, о́тче,/ обнажи́хся, послуша́в лестца́, неисправле́нный.

Ты пра́ведне озари́лся еси́ Трисо́лнечным Све́том Несозда́нныя Тро́ицы,/ того́ нам посли́, пою́щим его́,/ и на Небеси́ того́ сподо́би нас в Тро́ице воспева́ти,/ блаже́нный о́тче, Богоно́сный Стефа́не.

О́тче отце́в Богоно́сный Стефа́не,/ Суро́жу утвержде́ние, сын правове́рия,/ рабы́ своя́ соблюди́ от вся́каго прегреше́ния/ и от безбо́жных ва́рвар, ви́димых же враг и неви́димых.

Богоро́дичен: Го́рестных слез мои́х не забу́ди/ и стена́ния души́ моея́ не пре́зри, Де́во Чи́стая и Непоро́чная,/ яви́ на мне ми́лость и Человеколю́бие Сы́на и Бо́га Твоего́.

Ин ирмо́с:

Жезл из ко́рене Иессе́ова/ и цвет от него́, Христе́,/ от Де́вы прозя́бл еси́,/ из горы́, Хва́льный, приосене́нныя ча́щи/ прише́л еси́, вопло́щся от Неискусому́жныя,/ Невеще́ственный и Бо́же./ Сла́ва си́ле Твое́й, Го́споди.

Зако́ном от сосе́ц ма́терних подклони́вся духо́вным,/ зако́н плотски́х превше́л еси́, преподо́бне,/ я́же пре́жде вре́мене умертви́л еси́ тя́жких грехо́вных;/ сего́ ра́ди неве́рнаго царя́ обличи́л еси́,/ испове́дник вели́кий я́влься, Стефа́не.

Сна очесе́м твои́м и дрема́ния ве́ждом не дал еси́,/ до́ндеже обре́л еси́ ме́сто досто́йно всех блаже́нных, о́тче,/ се́рдце твое́ очи́стив досто́йне./ Те́мже показа́ тебе́ жили́ще свое́ Царь Сла́вы и Бог Ве́чный.

Умертви́ мудрова́ние, му́дре, пло́ти на́шея неисце́льное/ и к Боже́ственным наста́ви ны стезям, я́ко кре́пок и си́лен,/ и зако́ном благи́м повини́, блаже́нне,/ и рабы́ покажи́ Христо́вы, порабоще́нныя страстьми́ лю́тыми.

Богоро́дичен: Пое́м вели́кое и стра́шное Твое́ та́инство,/ е́же преми́рных у́бо утаи́вся, возвести́ Тебе́ чинонача́льник,/ на Тя Сый сни́де, я́ко дождь на руно́, Всепе́тая,/ на спасе́ние на́ше и обновле́ние.

Песнь 5

Ирмо́с:

Сою́зом любве́/ связу́еми, апо́столи,/ влады́чествующему все́ми себе́ Христу́ возло́жше,/ кра́сны но́ги очища́ху,/ благовеству́юще всем мир.

Ду́шу мою́ очерни́х неподо́бными де́лы аз, ни́щий,/ к тебе́ вопию́,засту́пнику моему́ те́плому:/ не оста́ви мене́, прече́стне Стефа́не,/ но моли́тву сотвори́ ко Спа́су.

Мольбы́ твоего́ раба́ не забу́ди, о́тче люби́мый,/ но приими́ сия́ и ко Го́споду те́пле принеси́,/ да избу́дем ну́жды и огня́ негаси́маго.

Отягче́ну во гресе́х и на земли́ лежа́щу,/ по́мощь твою́, о́тче, посли́ мне, рабу́ твоему́,/ и возста́ви мя, да стою́ пра́ве и хожду́ в путе́х Бо́жиих.

Богоро́дичен: Ра́дуйся, еди́на Богоро́дице, ра́дость ро́ждшая,/ А́нгельская красото́ и челове́ков вели́кое прибе́жище,/ гре́шных просты́не, волну́ющихся приста́нище, Де́во.

Ин ирмо́с:

Бог Сый ми́ра, Оте́ц щедро́т,/ Вели́каго Сове́та Твоего́ А́нгела,/ ми́р подава́юща, посла́л еси́ нам;/ тем, Богоразу́мия к све́ту наста́вльшеся,/ от но́щи у́тренююще,/ славосло́вим Тя, Человеколю́бче.

Я́ко вели́кое бога́тство твои́х щедро́т яви́ся Суро́жскому ро́ду/ безчи́сленно проли́тие ми́лости твоея́, слуго́ Христо́в:/ ты бо, прося́щим су́щая подава́я,/ и тех насы́тити тща́лся еси́ твои́м предложе́нием, блаже́нне.

Кро́ток яви́вся и смире́н вку́пе,/ де́лом же, и сло́вом, и мы́слию,/ сим вся к себе́ привле́кл еси́, любо́вию и до́брыми де́лы./ Царя́ же злосла́внаго обличи́в,/ се́дца́ ве́рных возвесели́л еси́, укрепля́емых твои́м испове́данием.

Вели́кий Па́стырь всех – Христо́с,/ ове́ц тя, блаже́нне, показа́ Свои́х па́стыря и учи́теля слове́сных./ Те́мже заблужда́емых нас на гора́х поги́бельных,/ я́ко па́стырь человеколюби́в, ны́не твои́х ове́ц взыщи́.

Богоро́дичен: Святы́х свята́я Де́во Чи́стая,/ святы́х Свята́го родила́ еси́, вся́ческая освящаю́щаго, Христа́ Изба́вителя./ Те́мже Тя, Цари́цу и Влады́чицу всех,/ я́ко Ма́терь Зижди́теля тва́рей, велича́ем.

Песнь 6

Ирмо́с:

Бе́здна после́дняя грехо́в обы́де мя,/ и, волне́ния не ктому́ терпя́,/ я́ко Ио́на Влады́це, вопию́ Ти:/ от тли мя возведи́.

Иму́ще тя твои́ раби́ засту́пника те́пла,/ не убои́мся супоста́тных сил, но побежда́ем ты́я,/ Кресто́м Христо́вым укрепля́еми.

Сохрани́ град твой, о́тче преподо́бне Стефа́не,/ и от безбо́жных инове́рных нахо́да, и от усо́бныя ра́ти/ и вся́каго стра́ха и му́ки изба́ви.

Даде́ нам Христо́с честна́го Стефа́на/ посека́ти проти́вная вся ви́димая во́инства/ и исправля́ти благове́рное Свое́ ста́до.

Богоро́дичен: Свят еси́ Еди́н, во святы́х почива́яй,/ Све́том Свои́м мя осия́в, освяти́ ду́шу мою́ покая́нием,/ моли́твами Ма́тере Твоея́.

Ин ирмо́с:

Из утро́бы Ио́ну младе́нца изблева́ морски́ий зверь,/ якова́ прия́т;/ в Де́ву же все́льшееся Сло́во/ и плоть прие́мшее про́йде, сохра́ншее нетле́нну:/ Его́же бо не пострада́ истле́ния,/ Ро́ждшую сохрани́ невре́жде́нну.

Ты Суро́жу быв просвети́тель и живу́щих в нем везде́ засту́пник,/ обурева́емых же в ско́рбех ти́хое приста́нище,/ врач душе́вных страсте́й вку́пе и теле́сных,/ отню́дуже вси вку́пе веща́ют и призыва́ют твое́ и́мя.

Архиере́и и свяще́нницы сра́дуются нам днесь,/ Суро́жскому отцу́ пра́зднующе,/ согласу́ют же и воспева́ют вку́пе о́бщии и́стиннии безмо́лвницы/ и прости́и вси на́шему тебе́ воспева́ют предста́телю вку́пе и учи́телю.

Ча́до поро́чное, аз еди́н бых, о́тче, страстьми́ скве́рными,/ вои́стинну недосто́ин до́браго твоего́, сла́вне, и кра́снаго пра́зднования;/ но ты, очи́стив мою́ скве́рну, преподо́бне, душе́вную,/ покажи́ мя ве́чери твое́й досто́йна.

Богоро́дичен: Недр не отступль Безнача́льна Роди́теля,/ в не́дрех Чи́стыя Отрокови́цы водворя́ется/ и быва́ет безма́терен пре́жде, ны́не без отца́ воплоща́ется,/ и́же при́сно ца́рствуяй Христо́с;/ Се́го неисче́тен, и стра́шен род, и неизрече́нен.

Конда́к, глас 3:

Вы́шняго си́лою, свяще́нне, укрепи́вся,/ царе́ва низложи́л еси́ иконобо́рная шата́ния;/ днесь Суро́жу и нам ве́рным предлежа́т/ сла́ва и бога́тство – святы́я твоя́ мо́щи,/ и́хже свы́ше дароно́сят А́нгельстии чи́нове,/ пе́сньми и пе́нием славосло́вят тя,/ вели́кий свяще́нный Стефа́не.

И́кос:

Твоего́ чи́стаго и непоро́чнаго жития́/ ки́й язы́к челове́ческий/ восхва́ли́ти когда́ и воспе́ти, преподо́бне Стефа́не, возмо́жет,/ ве́рою, и ра́зумом, и и́стиною?/ и́бо во всех по́двизех до́блествен показа́лся еси́./ Ты бо, всеблаже́нне, лю́таго царя́ посрами́л еси́,/ честь же ико́ны восходи́ти на первообра́зие научи́л еси́, свя́те,/ и отце́в догма́ты, всему́дре, испове́дал еси́;/ сего́ ра́ди тя ублажа́ем, вели́кий свяще́нный Стефа́не.

Песнь 7

Ирмо́с:

Неизрече́нное чудо:/ в пещи́ Изба́вивый преподо́бный о́троки из пла́мене/ во Гро́бе мертв, бездыха́нен полага́ется/ во спасе́ние нас, пою́щих:/ Изба́вителю Бо́же,/ благослове́н еси́.

Отве́рзи ми две́ри покая́ния, преподо́бне Стефа́не,/ и всяк мрак отжени́ от моея́ души́/ и те́ла моего́ вся скве́рны очи́сти, да приношу́ ти песнь и зову́:/ Изба́вителю Бо́же, благослове́н еси́.

Предста́ни души́ моея́ во исхо́де, Стефа́не прече́стне,/ и от лука́вствия сатанина́ изба́ви мя,/ я́ко да сла́влю тя ве́рно, иера́рха вели́каго, поя́ Бо́гу:/ Изба́вителю Бо́же, благослове́н еси́.

Иера́рше, твоя́ лю́ди упа́стви, сохраня́я нас, Стефа́не му́дре,/ и на Небесе́х сподо́би с тобо́ю Тро́ице безпреста́нно воспева́ти:/ Изба́вителю Бо́же, благослове́н еси́.

Богоро́дичен: Дождь пода́ждь ми слез, Влады́чице,/ стру́пы душе́вныя и пло́тную че́рность, омыва́ющими, очи́сти,/ и приведи́ к Соде́телю, и муче́ния вся́каго изба́ви мя.

Ин ирмо́с:

О́троцы, благочести́ю совоспита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреди́ пла́мене стоя́ще, поя́ху:/ отце́в Бо́же, благослове́н еси́.

Земля́ Суро́жская и страны́, о́тче, чудеса́ твоя́ возвеща́ют у́бо/ и воспева́ют всю́ду, уча́щеся пе́ти ра́достно:/ отце́в Бо́же, благослове́н еси́.

Жени́х, кра́сный па́че всех сыно́в челове́ческих,/ я́коже есть пи́сано, неве́сте, блаже́нне, Свое́й Це́ркви,/ красне́йша тя показа́ жениха́,/ того́ нося́ща о́бразы подо́бия, отце́в Бо́га и препросла́вленна.

Украси́в твое́ житие́ ми́лостынею, и кро́тостию, и любо́вию,/ светлоподо́бник показа́лся еси́ изря́дный Па́стыря до́браго,/ избра́в того́ доброде́тели до́бре, ему́же пое́м:/ отце́в Бо́же, благослове́н еси́.

Богоро́дичен: Тя Иа́ков, Богоро́дице, ле́ствицу проро́чески разумева́ет,/ Тебе́ бо ра́ди превозноси́мый на земли́ яви́ся/ и с челове́ки поживе́, я́коже благоволи́,/ воспе́тый отце́в Бог и препросла́влен.

Песнь 8

Ирмо́с:

За зако́ны оте́ческия/ блаже́ннии в Вавило́не ю́ноши, предбе́дствующе,/ царю́ющаго оплева́ша повеле́ние безу́мное/ и, совоку́плени, и́мже не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́,/ и превозноси́те во вся ве́ки.

Согреши́х весь гре́шный па́че всех челове́к,/ и несть греха́, его́же не сотвори́х,/ ни зла, ниже́ клеветы, и́хже не соде́ях;/ но ве́рою прихожду́ к Тебе́, Христе́,/ я́коже Манасси́ю о́наго, поми́луй мя.

О́тче отце́в, святы́й Стефа́не,/ правове́рия столп, сын ве́ры,/ рабы́ твоя́ спаса́й от вся́кия беды,/ возмуще́нныя от человекоуби́йцы диа́вола,/ не пре́зри моля́щихся тебе́ и́стинным се́рдцем и пою́щих:/ Го́спода воспева́йте, дела́, и превозноси́те его́ во ве́ки.

Сы́нове ага́ряни вооружа́ются на смире́нныя лю́ди твоя́, Стефа́не прече́стне,/ но сокруши́ их неви́димо,/ лук и стре́лы их и мечи́ вонзи́ в сердца́ их,/ да ра́достию воспое́м песнь многогла́сную:/ Го́спода по́йте, дела́, и превозноси́те его́ во ве́ки.

Богоро́дичен: Одержи́ма прегреше́нии и в по́хотех жите́йских погруже́на,/ свободи́ и спаси́ мя, свята́я Богоро́дице, и стена́ния серде́чная услы́ши,/ я́коже блудни́цы сле́зы, и мене́, пока́явшася, Деви́це,/ и со слеза́ми припа́дающа, приими́.

Ин

Ирмо́с:

Чу́да преесте́ственнаго/ росода́тельная изобрази́ пещь образ:/ не бо, я́же прия́т, пали́т ю́ныя,/ я́ко ниже́ огнь Божества́ – Де́вы,/ в Ню́же вни́де утро́бу./ Тем, воспева́юще, воспое́м:/ да благослови́т тварь вся Го́спода/ и превозно́си́т во вся ве́ки.

Окорми́ моли́твою твое́ю Це́рковь твою́ многочелове́чную/ и бу́ри ветр проти́вных чу́вственных и мы́сленных/ уста́ви твои́ми моли́твами,/ и запрети́, и изба́ви вся́ких искуше́ний и смуще́ний,/ и да́же до конца́ неврежде́нную соблюди́.

Падо́ша воста́ющии на ны, о́тче,/ твои́ми моли́твами побежда́еми, ага́ряни вну́цы,/ хотя́щии достоя́ние твое́ озло́бити,/ и смех у́бо бы́ша, и руга́ние, паде́ния своего́ пла́чуще;/ мы же воспева́ем ра́достно твою́ свяще́нную па́мять.

Неизрече́нно твое́ чадолюби́е, о́тче, превосходя́ще оте́ческую любо́вь:/ всегда́ у́бо прираде́еши,/ неви́димо нас посеща́я бо́дренными твои́ми моли́твами,/ спасе́ние нам всегда́ содева́я/ и подава́я нам с ти́хостию, Стефа́не, ра́достная.

Богоро́дичен: Всего́ мя, отпа́дша, Богоро́дице Де́во,/ и сокруши́вша, е́же по о́бразу, Чи́стая,/ Бог Своего́ созда́ния не презре́,/ но Тобо́ю всего́ мя обнови́./ Сего́ ра́ди Тя, вину́ спасе́ния на́шего, вся тварь воспева́ет, зову́щи:/ благослове́на Ты в жена́х еси́, Всенепоро́чная.

Песнь 9

Ирмо́с:

Не рыда́й Мене́, Ма́ти,/ зря́щи во Гро́бе,/ его́же во чре́ве без се́мене зачала́ еси́, Сы́на:/ воста́ну бо, и просла́влюся,/ и вознесу́ со сла́вою непреста́нно я́ко Бог/ ве́рою и любо́вию Тя величающия.

Вельми́ ра́дуется при́сно град твой твои́ми чудесы́,/ и мы во вся́ка вре́мена насыща́емся во ве́ки от свяще́нных моще́й твои́х./ И ны́не не отходи́ от нас, моли́тву творя́ ко Го́споду,/ я́ко да от безбо́жных ва́рвар нас изба́вит.

Суро́жстии наро́ди, прииди́те,/ собери́теся вси к Боже́ственней ра́це отца́ на́шего, Стефа́на преподо́бнаго,/ и со слеза́ми воззови́те:/ изба́ви лю́ди своя́,/ не даждь достоя́ния твоего́ ро́ду Исма́ильтескому,/ да достодо́лжно воспое́м ми́лость твою́, святи́телю.

Богоро́дичен: Я́ко разбо́йник, я́ко блудни́ца, вопию́ Ти от се́рдца:/ согреши́вша, оживи́ мя, свята́я Богоро́дице,/ не разгне́вайся на мя, не отве́ржи мене́ от лица́ Твоего́,/ неразу́мна су́ща и отча́янна.

Ин ирмо́с:

Та́инство стра́нное ви́жу и пресла́вное:/ Не́бо – верте́п, престо́л Херуви́мский – Де́ву,/ я́сли – вмести́лище,/ в ни́хже возлеже́ Невмести́мый – Христо́с Бог,/ Его́же, воспева́юще, велича́ем.

Сла́ву твою́ воспе́ти по досто́инству невозмо́жно:/ чудеса́ бо твоя́ мно́га/ и исцеле́ния безчи́сленна незави́стно подае́ши/ с те́плою ве́рою приходя́щим, Стефа́не святи́телю,/ похвало́ ро́да Суро́жскаго.

Поста́ви тебе́ Це́ркви Свое́й основа́ние Христо́с,/ столпа́ кре́пка и неподви́жна во ве́ки,/ соблюда́юща и назира́юща град свой незы́блен/ и во ве́ки ве́ка ненаве́туемь и от вся́ких избавля́юща напа́даний/ ве́рою соверша́ющих свяще́нную твою́ па́мять.

Архиере́и у́бо, свяще́нницы же и мона́си,/ и вси лю́дие, му́жие, и жены́, и отрокови́цы,/ ста́рцы со младе́нцы, и всяк во́зраст, и вся́ко достоя́ние/ святи́телю Стефа́ну Суро́жскому све́тло пра́зднуем.

Богоро́дичен: Неизрече́нно Де́вы та́инство:/ Та бо престо́л Херуви́мский/ и светоно́сный черто́г показа́ся Вседержи́теля Христа́ Бо́га./ ю́же благоче́стно я́ко Богоро́дицу велича́ем.

Свети́лен:

Дави́дски процве́л еси́ в до́му́ Госпо́дни, я́ко фи́никс, о́тче преподо́бне,/ плод твои́х трудо́в стокра́тно ны́не умно́жил еси́./ Те́мже о́блак де́монов ту́чами слез твои́х, блаже́нне, погрузи́в,/ от Христа́ по́честь и вене́ц побе́ды прия́л еси́/ и чуде́с, прему́дре,незави́стно бога́тую ми́лость.

Богоро́дичен.

Подо́бен: Со ученики́ взы́дем:

Христо́ву ны́не Престо́лу предстоя́, святи́телю,/ с Богома́терию и Пречи́стою Де́вою моля́ся не преста́й/ побе́ды на ва́рвары стране́ на́шей дарова́ти/ и ми́р ми́ру и душа́м спасе́ние, прему́дре,/ соверша́ющим, о Стефа́не, па́мять твою́, святи́телем красото́.

На хвали́тех стихи́ры на 4, глас 4:

Стефа́не, пресла́вне о́тче,/ архиере́ю Христо́в,/ утеше́ние стра́нных,/ врач неду́жных,/ не отхо́дй от нас,/ моля́ за пою́щия тя.

О́браз соблю́л еси́, преподо́бне о́тче,/ по Христо́ве иконе стал еси́ му́жески,/ не устраши́вся гноете́знаго преще́ния,/ но духо́вным мече́м того́ умертви́л еси́./ Тем дерзнове́ние и́маши ко Го́споду,/ спаси́ па́ству твою́ от е́реси вся́кия, Стефа́не многострада́льне.

Глас 8:

До́блестей твои́х, преподо́бне о́тче,/ плод уясни́ ве́рных сердца́:/ кто бо слы́ша безме́рное твое́ смире́ние/ и терпе́нию не удиви́тся,/ е́же к ни́щим ти́хость, к скорбя́щим ми́лование?/ вся боголе́пно научи́л еси́, святи́телю Стефа́не./ И ны́не неувяда́емым венце́м увя́злся еси́,/ моли́ спасти́ся душа́м на́шим.

Сла́ва, глас 6:

Преподо́бне треблаже́нне,/ свяще́нный о́тче,/ па́стырю до́брый,/ Первопа́стыря Христа́ учениче́,/ положи́вый ду́шу твою́ за Суро́ж;/ ты и ны́не, Стефа́не святи́телю,/ проси́ моли́твами твои́ми/ дарова́ти нам ве́лию ми́лость.

И ны́не, Богоро́дичен: Богоро́дице, Ты еси́ лоза́:

Славосло́вие вели́кое и отпу́ст.

НА ЛИТУРГИ́И

Блаже́нны, пе́рваго кано́на песнь 3-я, на 4 и 2-го песнь 6-я, на 4. Проки́мен, глас 1: Уста́ моя́:

Стих:

Услы́шите сия:

Апо́стол ко Евре́ем, зача́ло 318.

Аллилу́ия,

глас 2:

Уста́ пра́веднаго:

Стих:

Зако́н Бо́га:

Ева́нгелие от Матфе́я, зача́ло 11. Прича́стен:

В па́мять ве́чную:

Святитель Стефан исповедник, архиепископ Сурожский, претерпел гонения от иконоборцев в VIII веке. Он родился в Каппадокии (Малая Азия) в благочестивой семье. Святой Стефан получил блестящее философское образование в Константинополе. Все удивлялись усердию, выдающимся способностям и смирению юноши. Благонравие Стефана было замечено святым Патриархом Константинопольским Германом I (715–730;†740, память 12 мая). Несколько лет святой Стефан жил со святителем и служил в Константинопольской церкви, а затем тайно ушел в один из монастырей и там принял монашеский постриг. Вскоре он, стремясь к безмолвию, поселился в пустынном месте, где провел несколько лет в подвигах поста и молитвы.

Около 730 года в Городе Суроже (ныне г. Судак в Крыму) умер епископ. В этом большом торговом городе жили люди разных вероисповеданий, среди них было много язычников и магометан. Христиане Сурожа просили Патриарха Германа прислать епископа, который бы упрочил Православие. Во время молитвы Патриарху явился Ангел и сказал, что епископом должен быть святой пустынник Стефан. Воля Господня была открыта так же и Стефану. Вскоре он был рукоположен во епископа и отплыл в свою епархию.

Пять лет святитель Стефан провел в неустанных пастырских трудах, просвещая народ словом истины. В результате многие иноверцы Сурожской епархии были присоединены к Церкви Христовой.

В то время византийский император Лев III Исавр (717–741) приказал хулить и бесчестить иконы. Он сместил Патриарха Германа, отказавшегося присоединиться к иконоборцам, и поставил на его место сирианина Анастасия, который пробыл на патриаршей кафедре с 730 по 753 год. Святитель Стефан прибыл в Константинополь и обличил императора в иконоборстве. Лев Исавр пытался уговорами и угрозами склонить святителя к иконоборческой ереси, но безуспешно. Святой Стефан отвечал императору: «Хотя бы ты меня сжег или рассек на части, за иконы и Крест Господень все готов претерпеть». За свою ревность он был жестоко избит, а затем на многие годы заключен в темницу.

В 741 году умер император Лев III и на престол вступил его сын Константин V Копроним (741–775). Он также был иконоборцем. Но по ходатайству жены императора Ирины, святитель Стефан был освобожден и возвращен на свою кафедру.

Святителю Стефану, уже глубокому старцу, было открыто время его кончины. Он назначил себе преемником клирика Филарета и мирно преставился ко Господу.

Рака с мощами святого Стефана Сурожского прославлена чудесными исцелениями. У гроба святителя чудесно прозрел слепорожденный по имени Ефрем, которому святой Стефан ранее много помогал. Сохранилось свидетельство, что в начале IX века русский князь Бравлин, во время похода в Крым, принял Крещение, обратившись к истинной вере под влиянием чудес у раки святителя.

Свята́го священному́ченика Елевфе́рия и преподо́бнаго отца́ на́шего Па́вла, и́же в Латре.

А́ще изво́лиши́, пой аллилу́ия

На Го́споди, воззва́х:

стихи́ры священному́ченика 3 и преподо́бнаго 3.

Стихи́ры священному́ченика, глас 4.

Подо́бен: Дал еси́ зна́мение:

Сосу́д свяще́ннейший/ ду́ха Боже́ственнаго был еси́,/ ду́шу очи́стив от страсте́й, свяще́ннейше./ Отсю́ду Боже́ственное пома́зание свято́е прия́л еси́,/ архиере́й быв, и наста́вник люде́й Богому́дрый,/ и му́ченик непобеди́мь/ нас ра́ди стра́сти Претерпе́вшаго/ и безстра́стие Источи́вшаго,/ страда́льче Елевфе́рие.

До́бре по́двиг тя ви́девши сконча́вша,/ я́же до́бре тя ро́ждшая,/ ра́вное жела́ющи тебе́/ проити́ тече́ние,/ тебе́ объе́мши посреде́ три́знища, му́дре,/ я́коже ю́ница, закала́ется./ С не́юже мо́лим тя:/ о нас, Елевфе́рие, Спа́са и Го́спода умоли́, преблаже́нне.

Те́ло преоби́дел еси́,/ ураня́емо бие́ньми и огню́ приближа́ющееся./ Ум бо впери́л еси́ непобеди́мым жела́нием,/ красне́йшею добро́тою Боже́ственнаго рачи́теля,/ его́же сла́дким уязви́лся еси́ жела́нием,/ му́чеников удобре́ние, архиере́ев украше́ние,/ страда́льче Елевфе́рие, А́нгелов собесе́дниче.

Стихи́ры преподо́бнаго, глас 2.

Подо́бен: Егда́ от Дре́ва:

Па́вле, мона́шествующих добро́та,/ прозябе́ние кра́сное пусты́ни,/ преподо́бных хвала́, Ла́тра честно́словие,/ ве́рных твердь,/ любо́вию соверша́ющия твою́ всечестну́ю па́мять/ и моще́й твои́х облобыза́ющия ра́ку/ изба́ви обстоя́ния вся́каго и о́гненнаго осужде́ния/ ко Влады́це твои́ми моли́твами.

Храм Тро́ицы тебе́ сама́го соде́лав,/ о́тче Богоблаже́нне,/ храм бо И́мени сея́ воздви́гл еси́,/ в пусты́ни же непрохо́дныя Ла́трския вшед,/ я́ко Моисе́й в Сина́йскую гору, всели́лся еси́,/ иде́же, прие́м Боже́ственный зако́н,/ мона́шествующих мно́жества и́стинно науча́еши изря́днейшим, всечу́дне.

Име́я дерзнове́ние к Бо́гу,/ па́стве, ю́же соста́вил еси́ мно́гими по́ты, преподо́бне,/ моли́ сохрани́тися от искуше́ний врага́/ и язы́ческих нахожде́ний, огня́ же и меча́/ и вся́каго прило́га наве́та лука́ваго:/ тебе́ бо градоде́ржца и покро́в иму́ще,/ на тя наде́жду с Бо́гом стяжа́хом, блаже́нне.

Сла́ва, и ны́не, Богоро́дичен.

Подо́бен то́йже:

Еди́на невмести́маго Бо́га/ нетесноме́стно во чре́ве носи́ла еси́,/ Челове́ка бы́вша за бла́гость, Пресвята́я Богоневе́сто./ Те́мже молю́ Тя:/ утесня́ющих мя страсте́й измени́,/ я́ко да те́сную и правую стезю́, ше́ствовав, дости́гну,/ ю́же к жи́зни, Де́во, водя́щую.

Крестобогоро́дичен:

Егда́ нескве́рная А́гница/ ви́де Своего́ А́гнца/ на заколе́ние, я́ко Челове́ка, во́лею влеко́ма,/ пла́чущи, глаго́лаше:/ безча́дствовати Мя ны́не тщи́шися, Христе́, ро́ждшую Тя,/ что сие́ сотвори́л еси́, Изба́вителю вся́ческих,/ оба́че воспева́ю и сла́влю/ твою́, ю́же па́че ума́ и сло́ва,/ крайнюю бла́гость, Человеколю́бче.

Тропа́рь, глас 4:

И нра́вом прича́стник,/ и престо́лом наме́стник, апо́столом быв,/ дея́ние обре́л еси́, Богодохнове́нне,/ в виде́ния восхо́д,/ сего́ ра́ди, сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Елевфе́рие,/ моли́ Христа́ Бо́га/ спасти́ся душа́м на́шим.

Сла́ва, преподо́бнаго, глас то́йже:

Я́ко Безпло́тных единовсе́льника/ и всем преподо́бным соо́бщника,/ всесла́вне Па́вле, пое́м тя и мо́лим тя:/ моли́ся всегда́ о нас,/ я́ко да обря́щем ми́лость.

И ны́не, Богоро́дичен.

НА У́ТРЕНИ

Еди́н кано́н Окто́иха. И святы́х два кано́на. Кано́н священному́ченика, глас 1, его́же краегране́сие: Страсте́й свобо́дна мя покажи́, всеблаже́нне.

Ио́сиф.

Песнь 1

Ирмо́с:

Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Страсте́й омраче́нием порабоще́ннаго/ све́тлыми моли́твами твои́ми, му́чениче Елевфе́рие, ны́не свободи́,/ да я́ко раба́ тя Христо́ва Боже́ственными воспою́ пе́сньми.

Страда́ния возсия́л еси́ чисте́йшими заря́ми, свяще́ннейше,/ обагри́л еси́ кро́вию свяще́нную твою́ оде́жду/ и был еси́ светови́ден ду́хом.

Бо́гу прилепля́лся чисте́йшим умо́м от ю́ности,/ плотска́го мудрова́ния ду́шу удали́л еси́/ и чуде́с оби́льною благода́тию обогати́лся еси́.

Богоро́дичен: Я́ко престо́л огнезра́чен, но́сиши Зижди́теля,/ я́ко одушевле́н черто́г и кра́сна пала́та, Царя́ вмеща́вши,/ бы́вшаго, е́же есмы́, кроме́ преложе́ния и смеше́ния.

Ин кано́н преподо́бнаго, глас то́йже.

Песнь 1

Ирмо́с:

Христо́с ражда́ется – сла́вите!/ Христо́с с Небе́с – сря́щите!/ Христо́с на земли́ – возно́ситеся!/ По́йте Го́сподеви, вся земля́,/ и весе́лием воспо́йте, лю́дие,/ я́ко просла́вися.

Но́вое тебе́ пе́ние похва́льное привнести́/ во отверзе́ние уст, Па́вле Богоно́се, тща́щуся,/ подаждь ми глаго́лати твои́ми моли́твами, преподо́бне, благода́ть,/ я́ко да по́двиги твоя́ честны́я пропове́м.

От ю́ности, преподо́бне, яре́м Госпо́день восприе́м,/ и, в бразда́х твоего́ се́рдца пшени́цу се́яв духо́вную,/ клас пожал еси́, утвержда́ют ду́ши, Богоблаже́нне.

По́ты мно́жайшими восприя́л еси́ Вы́шнее Ца́рство,/ я́ко безпло́тен на земли́ жив/ и те́лом пожи́в а́нгельское житие́./ И ны́не у́бо, в Высоча́йших Тро́ице предстоя́, нас помина́й.

Богоро́дичен: Тле́нную мою́ плоть, Богоневе́сто, прие́м от Твои́х крове́й Безпло́тный/ и, в я́слех возлеги́й во́лею,/ сию́, ю́же прия́т, обожа́ет плоть, Богома́ти,/ от соедине́ния ея́ Преблаги́й.

Песнь 3

Ирмо́с:

Да утверди́тся се́рдце мое́ в во́ли Твое́й, Христе́ Бо́же,/ и́же над вода́ми не́бо утвержде́й второ́е/ и основа́вши на вода́х зе́млю, Всеси́льне.

За Христа́ страда́ти изво́ливый, я́звы терпи́ши теле́сныя,/ услажда́лся, му́дре, боле́зньми и скорбьми́;/ сего́ ра́ди неболе́зненну жи́знь ны́не восприя́л еси́.

Те́плым жела́нием сотво́ршаго, страда́льче Богому́дре, держи́мь,/ разжже́нней тебе́ сама́го поверга́вши хи́трости,/ ороша́емь ду́ха огне́м, Елевфе́рие.

Во свяще́нницех свяще́ннейший и в му́ченицех му́ченик тверде́йший я́влься,/ вене́ц сугу́б прия́л еси́, блаже́нне,/ лице́ Бо́жие вы́ну ви́дя.

Богоро́дичен: Жезл кре́пости прозя́бла еси́ – Христа́, И́мже утвержда́емся:/ Тя бо вообража́ше Ааро́нов жезл, иногда́ прозя́бший,/ неде́ланная земле́, Чи́стая Голуби́це Присноде́во.

Ин ирмо́с:

Пре́жде век от Отца́ рожде́нному нетле́нно Сы́ну/ и в после́дняя от Де́вы/ воплоще́нному безсе́менно,/ Христу́ Бо́гу возопии́м:/ вознесы́й рог наш,/ Свят еси́, Го́споди.

О, твоего́ му́жества!/ О, душе́вныя до́блести, сла́вне!/ Ты бо, члено́вныя львов сокруши́ти неви́димых жела́я,/ два ка́меня носи́л еси́ превели́ка во время но́щи,/ тя́готу на ра́менах.

Кто твоя́ по́двиги изрещи́ по достоя́нию возмо́жет?/ Ты бо, пути́ жесто́кия в пусты́ни ше́ствуя,/ суро́выя же́луди ел еси́,/ вкуш́ение навыца́я твое́ услажда́ти боле́зньми воздержа́ния.

Богови́дец дре́вле Моисе́й/ в купине́ сподо́бися та́инственнаго виде́ния,/ всечестны́й же Па́вел, огню́ я́вльшуся свы́ше,/ сам позна́ я́ве себе́ сама́го, неопа́льно распаля́ема.

Богоро́дичен: Безнача́лен Сый естество́м я́ко Бог/ и Отцу́ Сло́во равноче́стное,/ е́же под ле́том прия́л еси́, ро́ждся от Де́вы, нача́ло,/ естество́м я́влься Челове́к, и, младе́нствовав, я́ко Отроча́,/ Ты, Христе́, яви́лся еси́, пелена́ми пови́т.

Конда́к преподо́бнаго, глас 8.

Подо́бен: Взбра́нной:

От ю́ности, му́дре, я́же па́че смы́сла вожделе́л еси́ му́жески,/ мирски́й мятеж оста́вил еси́,/ и был еси́ Боже́ственнаго ра́ди жи́тельства Тро́ицы жили́ще,/ и просвети́л еси́ ве́рою приступа́ющим тебе́./ Тем зове́м: ра́дуйся, Па́вле пребога́те.

Седа́лен священному́ченика, глас 1.

Подо́бен: Гроб Твой, Спа́се:

Свобо́ден ум от страсте́й стяжа́в,/ был еси́ Бо́жий и́скреннейший раб/ и от ле́сти свободи́л еси́ до́бре послу́шавшия тебе́:/ пострада́в же я́ко иере́й и му́ченик, Елевфе́рие,/ сугу́б прия́л еси́ венец:/ моли́ спасти́ся нам.

Сла́ва, преподо́бнаго, глас 8.

Подо́бен: Прему́дрости:

Окормля́емь си́лою вседе́тельною/ и ве́трилом вкриля́емь Кре́стным,/ легко́ преплы́л еси́ жите́йскую бу́рю/ и к Боже́ственным и́стинно приста́нищем дости́гл еси́,/ доброде́телей ку́плю мно́гу стяжа́в,/ ю́же Влады́це всех прине́сл еси́/ и е́же, благи́й ра́бе, слы́шал еси́ и сим после́дующая./ Те́мже, Па́вле блаже́нне, моли́ Христа́ Бо́га/ грехо́в оставле́ние пода́ти/ чту́щим любо́вию святу́ю па́мять твою́.

И ны́не, Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́мь безчи́сленных согреше́ний мои́х,/ и я́ко к те́плому заступле́нию и покро́ву моему́, Чи́стая,/ ко приста́нищу притека́ю Твоея́ бла́гости./ Те́мже, Пречи́стая, из Тебе́ Воплоще́нному безсе́менно моли́ся приле́жно/ о всех рабе́х Твои́х, непреста́нно моля́щих Ти ся, Богоро́дице Пречи́стая,/ моля́щи его́ при́сно согреше́ний оставле́ние дарова́ти/ воспева́ющим досто́йно сла́ву твою́.

Крестобогоро́дичен:

Де́ва и Ма́ти Изба́вителя, Кресту́ предстоя́ще,/ боле́зненно со слеза́ми рыда́ющи, ма́терски вопия́ше:/ что стра́нное сие́ и пресла́вное, Сы́не?/ Источа́яй всем челове́ком безстра́стие,/ посреде́ осужде́нною на Кресте́ распя́тся,/ в ре́бра пробода́емь и же́лчию напоя́емь от рук, я́же созда́л еси́./ Но воста́ни и да́руй прегреше́ний оставле́ние/ ве́рою пою́щим Боже́ственная Твоя́ страда́ния.

Песнь 4

Ирмо́с:

Ду́хом прови́дя, проро́че Авваку́ме, Словесе́ вопло́щение,/ пропове́дал еси́, вопия́:/ внегда́ прибли́жится ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

Ни зия́ния львов, ни вре́ния огня́, ни лю́тых преще́ния/ кре́пости твоего́, священнотаи́нниче, разсла́биша терпе́ния,/ но, я́ко адама́нт, му́ками услажда́лся еси́,/ ре́вностию Боже́ственною распаля́емь.

Вод живо́точных уста́ твоя́ испо́лнена,/ ре́ки источи́ша Боже́ственных уче́ний, священному́чениче,/ потопля́ющие беззако́ннующих руга́ния/ и напая́ющия се́рдца́ позна́вших Христа́ Бо́га.

Вельми́ тя прославля́я твой Соде́тель,/ за него́же усе́рдствовал еси́ страда́ти, страстоте́рпче,/ го́лубя тебе́ посыла́ет, приноша́юща пи́щу а́нгельскую,/ равноа́нгельну бы́вшу страда́ний светле́йшими сия́ньми.

Богоро́дичен: Ужасо́шася зря́ще А́нгельская во́инства,/ ка́ко Неви́димый зра́ком/ су́щим по нам из Тебе́ ви́ден бысть, Де́во Богороди́тельнице:/ его́же моли́ спасе́ния сподо́бити вся,/ ве́рно Тя сла́вящия.

Ин ирмо́с:

Жезл из ко́рене Иессе́ова/ и цвет от него́, Христе́,/ от Де́вы прозя́бл еси́,/ из горы, Хва́льный, приосене́нныя ча́щи/ прише́л еси́,

вопло́щся от Неискусому́жныя,/ Невеще́ственный и Бо́же./ Сла́ва си́ле Твое́й, Го́споди.

Сном победи́вшуся тебе́ иногда́ во вре́мя ю́ности/ и ко всено́щному осла́бившуся стоя́нию,/ твой, ви́дев, честны́й учи́тель Петр по лицу́, о́тче, ударя́ет/ и, тебе́ зауше́ние дав, дае́т а́бие исцеле́ние.

Бо́гу осо́бь бесе́дуя/ и сему́ прибли́жився несре́дственне, Па́вел, оте́ц наш,/ никогда́же победи́вся, от сна пребы́сть по я́зве учи́телеве,/ но, я́коже безпло́тен сый, бодр при́сно бысть.

Сосу́д свяще́ннейший я́влься,/ ми́ро Небе́сное – Христа́ прия́л еси́ се́рдцем твои́м/ и, свещу́ твоего́ терпели́внаго воздержа́ния жи́тельством доброде́тельным вжег све́тло,/ к Неве́стнику Боже́ственному восте́кл еси́.

Богоро́дичен: Име́я, Сло́ве, престо́л Не́бо, зе́млю же подножие,/ в ложесна́ Де́вы, воплоща́яся, вшел еси́/ и во у́бог верте́п всели́лся еси́;/ от волхво́в же, царе́й перси́дских,/ я́ко Царь да́ры и Богочелове́к прия́л еси́.

Песнь 5

Ирмо́с:

Твой ми́р даждь нам,/ Сы́не Бо́жий:/ ино́го бо, ра́зве Тебе́, Бо́га не зна́ем,/ и́мя Твое́ имену́ем,/ я́ко Бог живы́х и ме́ртвых еси́.

Ле́стными ухшцря́яй укра́сти тя словесы́, му́чениче, враг вселука́вый/ смех зри́тся,/ му́дростию твое́ю му́дрец зло́бы прехищря́емь.

На колесни́це взима́емь Боже́ственных доброде́телей, сла́вне,/ высоту́ дости́гл еси́ муче́ния/ и низложи́л еси́ лука́вых бесо́в превознесе́нную горды́ню.

Ви́дети красоту́ жела́я Иису́сову, преподо́бне,/ тебе́ сама́го украси́л еси́ муче́ния красото́ю/ и к Нему́ прише́л еси́, венча́вся све́тлым венце́м.

Богоро́дичен: Удивля́ет всяк ум чу́до Твое́, Чи́стая:/ ражда́еши бо Бо́га пло́тию и Пита́теля пита́вши млеко́м,/ искуше́ния му́жеска не позна́вши, Сам я́ко весть Еди́н.

Ин ирмо́с:

Бог Сый ми́ра, Оте́ц щедро́т,/ Вели́каго Сове́та Твоего́ А́нгела,/ ми́р подава́юща, посла́л еси́ нам;/ тем, Богоразу́мия к све́ту наста́вльшеся,/ от но́щи у́тренююще,/ славосло́вим Тя, Человеколю́бче.

От ка́ла страсте́й очи́стив ум,/ нескве́рно зерца́ло был еси́, осия́ния ду́ха прие́м при́сно./ Те́мже тебе́ искуси́тель посрами́ся, прирази́вся,/ и́же сада́ зло́бы не́мощь изучи́вый.

Му́дрость су́що – Христа́ Бо́га во твое́м се́рдцы стяжа́в обита́ющую,/ нему́драго низложи́л еси́ зло́бы му́дреца нога́ми твои́ми кра́сными,/ мудростьми́ разли́чными прельсти́ти тя, Па́вле Богому́дре, покуша́ющася.

Све́та сый прия́телище, дне сын,/ тьмы прельсти́л еси́ нача́льника,/ я́коже льва, на тя наве́тующа, земны́ми тру́сы и колеба́нии ка́мений,/ безсту́дием устраша́юща, Па́вле, и мечта́нии свире́пствующа.

Богоро́дичен: Изве́рженна пе́рваго Ада́ма из Еде́ма, Присноде́во Отрокови́це Богоневе́сто,/ Сло́во Пребезнача́льное, из Тебе́ вопло́щся/ и в я́сли безслове́сных восклони́вся я́ко Младе́нец,/ наш род от безслове́сия изба́ви.

Песнь 6

Ирмо́с:

Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Наро́читый овен паств Христо́вых, па́стырь слове́снейший,/ по́двигов стезя прославля́ется,/ Бо́га просла́вив свои́ми удесы́.

Вжили́вся к Бо́гу воззре́нии, му́дре,/ обезжи́лил еси́ врага́ многоко́зненнаго тве́рдо, приснопа́мятне,/ му́чеников сла́во, свяще́нства пра́вило.

К ра́нам терпя́, ко огню́ самоидя́,/ успи́л еси́ звере́й свире́пых стремле́ния,/ неусы́пну к Зижди́телю име́я любо́вь.

Богоро́дичен: Свяще́ния сень я́вльшися, Мари́е,/ оскверне́нную сластьми́ окая́нную мою́ ду́шу освяти́/ и Боже́ственныя сла́вы прича́стницу сотвори́.

Ин ирмо́с:

Из утро́бы Ио́ну младе́нца изблева́ морски́й зверь,/ якова́ прия́т;/ в Де́ву же все́льшееся Сло́во/ и плоть прие́мшее про́йде, сохра́ншее нетле́нну:/ его́же бо не пострада́ истле́ния,/ Ро́ждшую сохрани́ невре́жде́нну.

Я́коже Спас, Христо́с Бог наш, ма́лыми хле́бы наро́д насы́ти многочи́слен,/ та́кожде и Па́вел, таи́нник Христо́в,/ скуде́ла мале́йшаго ма́лою водо́ю мно́жества до сы́тости возвесели́,/ и сы́тость явля́ет оби́лие.

Уставля́еши зной моли́твами твои́ми, чу́дне,/ и реши́ши глад прети́мый:/ вода́ми же, свы́ше пролия́вшимися, упая́еши зе́млю/ и напая́еши сухи́я сея́ бразды,/ прозяба́я и богатя́ дарова́нии/ и умножа́яй сея́ де́лание.

Неболе́зненную жи́знь в боле́знех восприя́л еси́/ и боле́зней лю́тых уставля́еши озлобле́ние/ ве́рою прося́щим прия́ти врачева́ния от Тебе́, всече́стне, отце́в добро́то./ Те́мже разреши́ боле́зни моя́ душе́вныя и теле́сныя, молю́ся.

Богоро́дичен: Сло́во О́тчее, Сы́не Бо́жий безле́тне/ и Порожде́ние Ма́тере Чи́стыя Богоотрокови́цы Преве́чное,/ я́ко Бог и я́ко Челове́к Младе́нец Сый/ в верте́пе вмести́ся Невмести́мый./ Те́мже вси, дивя́щеся, покланя́емся вели́кому та́инству.

Конда́к священному́ченику, глас 2.

Подо́бен: Тве́рдыя:

Я́ко удобре́ние свяще́нников, преподо́бне,/ и предувеща́ние страстоте́рпцев вси восхваля́ем/ и про́сим тя, священному́чениче Елевфе́рие:/ любо́вию па́мять твою́ пра́зднующия/ бед многообра́зных свободи́,/ моля́ непреста́нно о всех нас.

И́кос:

Пре́зри, Благоутрбо́не Жизнода́вче,/ я́ко Человеколю́бец Еди́н и ще́дрый Бог,/ души́ моея́ омрачение/ и всемо́щною десни́цею Твое́ю, Сло́ве, страсте́й свободи́ стуже́ния,/ я́ко да Твоего́ иера́рха воспою́ Елевфе́рия,/ той бо и́стинно из утро́бы позна́ся Тебе́, и освяти́ся,/ и возложе́н бысть, я́ко Самуи́л,/ от ма́тере свяще́нныя Тебе́, Зижди́телю,/ моля́ непреста́нно о всех нас.

Песнь 7

Ирмо́с:

Су́щим в пещи́ отроко́м Твои́м, Спа́се,/ не прикосну́ся, ниже́ стужи́, огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.

Да велича́ется, – взыва́л еси́, му́дре, раздробля́емь, –/ ны́не во пло́ти мое́й Христо́с,/ не ужаса́юся распале́ний коно́бов, не бою́ся сме́рти, ни звере́й стремле́ний/ су́щия ра́ди жи́зни.

Еди́наго Бо́га добро́ты иски́й,/ еди́ну того́ сла́ву получи́ти жела́ю,/ да раздробля́ется и опаля́ется все те́ло мое́, – взыва́л еси́, сла́вне, –/ свобожде́ния ищу́, порабоща́ющаго Христу́.

Смотря́я бу́дущую жи́знь, блаже́нне,/ ми́ру умертви́лся еси́ и́стинно,/ и, я́ко зла́то, я́звенными искуше́нии разже́гся, просия́л еси́,/ и положи́лся еси́ в сокро́вищах Небе́сных оби́телей.

Богоро́дичен: Чисте́йшу Тя Еди́ну обре́т, Всенепоро́чная,/ Сло́во Чисте́йшее Бо́жие, из чре́ва Твоего́ роди́вся,/ ве́рныя очища́ет оскверне́ния, Богоневе́сто,/ прибы́вшая нам от неуде́ржа́ния страсте́й.

Ин

Ирмо́с:

О́троцы, благоче́стию совоспита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреде́ пла́мене стоя́ще, поя́ху:/ отце́в Бо́же, благослове́н еси́.

Я́ко со́лнце возсия́в, восто́к а́бие просвети́л еси́,/ на столп же возше́д, я́ко посреде́ небесе́ стоя́,/ вселе́нную всю уче́нии возвесели́л еси́,/ отце́в, – вопия́, – Бо́же, благослове́н еси́.

Удали́лся еси́, бе́гая мирски́х волн,/ и, в пусты́ни псало́мски водвори́вся, Богоблаже́нне,/ прия́л еси́ Бо́га в се́рдцы твое́м,/ А́нгельским хране́нием тебе́ соблюда́юща.

Зрел еси́ муче́ния та́мошняя мы́сленными очесы́/ и, человеколю́бною твое́ю душе́ю се́рдцем боле́знуя,/ слеза́ми себе́ при́сно омака́л еси́,/ не я́ко Дави́д во время но́щи посте́лю.

Богоро́дичен: Безпло́тный воплоща́ется, и Безлетный в ле́то быва́ет,/ и пелена́ми повива́ется нас ра́ди,/ и́же зе́млю повива́яй Госпо́дь мглою,/ плоть Сам па́че пости́же́ния неизме́нно яви́вся от Неискусому́жныя.

Песнь 8

Ирмо́с:

Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Процве́т, прозя́бл еси́ сад кра́сен/ муче́ний светлостьми́, му́чеников добро́то,/ и ны́не ра́я цве́ти яви́стеся,/ Боже́ственно благово́ние испуща́юще Боже́ственне.

Кропле́ньми крове́й твои́х, рожде́ннаго из ней,/ кровь свою́ ма́ти приобща́ет:/ твоему́ бо телеси́ объе́мшися, му́дре,/ мече́м скончава́ется и живе́т во ве́ки.

Исцеле́ний во́ды, чуде́с ре́ки/ излива́ет тре́бующим ра́ка твоя́, му́дре,/ отмывающе скве́рны душетле́нных страсте́й,/ му́чениче иера́рше, во вся ве́ки.

Богоро́дичен: я́ко дождь, во утро́бу твою́ сни́де Христо́с/ и всю напои́ тварь вои́стинну,/ изсуши́в, Де́во, му́тныя реки идолонеи́стовства,/ Еди́н Благоде́тель.

Ин ирмо́с:

Чу́да преесте́ственнаго/ росода́тельная изобрази́ пещь о́браз:/ не бо, я́же прия́т, пали́т ю́ныя,/ я́ко ниже́ огнь Божества́ – Де́вы,/ в Ню́же вни́де утро́бу./ Тем, воспева́юще, воспое́м:/ да благослови́т тварь вся Го́спода/ и превозно́си́т во вся ве́ки.

Спротяже́ну с Дави́дом Благогла́сну песнь/ всестро́йну пел еси́, глаго́ля:/ я́ко утеше́ния Твоя́ ду́шу мою́ боголе́пно человеколю́бным манове́нием, Всецарю́, возвесели́ша./ Те́мже, ра́дуяся, взыва́л еси́:/ да благослови́т тварь вся Го́спода/ и превозно́си́т его́ во ве́ки.

Подава́яй тебе́ я́же проти́ву любви́ Зижди́тель,/ от ю́ности соблюда́я тя десни́цею,/ и треми́ пита́ет тя сала́тами боголе́пно,/ я́ко от младе́нства вся́ко по́хоте́ние попра́вша,/ руко́ю же А́нгела сия́ дае́т, я́ко А́нгельскому житию́ ревну́ющу,/ препросла́вленному тебе́, Па́вле Богоно́се.

Возмого́ша убежа́ти осужде́ния трие́ осужде́ннии свя́зани му́жие,/ я́ко укло́ншеся служе́ния о́бщаго:/ уз бо неви́димо и́менем разре́шшеся твои́м, о́тче всесла́вне,/ свя́занных от бед изба́ви, и еди́ною носи́мы руко́ю Содержа́щего.

Богоро́дичен: Со́лнце Пра́вды ро́ждшая/ звездо́ю созыва́ет волхвы́ со зла́том, и сми́рною же, и лива́ном,/ новоле́пно покланя́ющеся невра́щно Младе́нствовавшему,/ его́же па́стырие возвели́чиша, и А́нгел мно́жества воспе́ша, сла́вяще,/ я́ко и по существу́ Бо́га и Челове́ка естество́м.

Песнь 9

Ирмо́с:

Живоприе́мный исто́чник приснотеку́щий,/ светоно́сный свети́льник благода́ти,/ храм одушевле́нный, сень Пречи́стую,/ Небесе́ и земли́ простра́ннейшую,/ Богоро́дицу, ве́рнии, велича́ем.

Уста Бо́жия быв,/ от уст чужда́го лю́ди суему́дренныя восхи́тив,/ показа́л еси́ насле́дники благода́ти/ и, пострада́в кре́пко, со иере́и и страда́льцы живе́ши, Елевфе́рие.

Чи́стая мирополо́жница ду́ха,/ доброде́телей кра́сное жили́ще,/ а́гнец незло́бивый, свети́льник незаходи́мый,/ иера́рхов степе́нь и му́чеников,/ да восхвали́тся ве́рно Елевфе́рий.

Во Све́те живе́ши и́стинно невече́рнем,/ свет быв со́лнца светле́йший./ Тем па́мять твою́ светоно́сную днесь соверша́ющия/ страсте́й мглы изба́ви к Бо́гу твои́ми моли́твами, Елевфе́рие.

Богоро́дичен: Пощади́ нас, пою́щих Твое́, Го́споди, е́же из Де́вы, неизре́ченное Рождество́,/ от напа́стей избавля́я, и страсте́й, и скорбе́й/ мольба́ми ея́ Твоя́ рабы́, я́ко Благоде́тель/ и Еди́н Человеколю́бец.

Ин ирмо́с:

Та́инство стра́нное ви́жу и пресла́вное:/ Не́бо – верте́п, престо́л Херуви́мский – Де́ву,/ я́сли – вмести́лище,/ в ни́хже возлеже́ Невмести́мый – Христо́с Бог,/ его́же, воспева́юще, велича́ем.

Пове́дует е́же к Бо́гу дерзнове́ние твое́/ и я́же соверши́л еси́, по е́же к Нему́ отше́ствии, чу́дная дела́:/ мно́гих бо еле́ем твоего́ световожде́ния/ от неду́г разли́чных свободи́л еси́.

Всесве́тлу твою́ ду́шу име́я, преподо́бне,/ я́ко ми́ром благода́ти весь напои́вся, еле́ем де́моны отгони́ши,/ прокаже́нныя очища́я и угрызе́нныя главы́/ и краст18/ лю́тых уставля́я боле́зни.

Распа́дся, па́дает сатана́ вселука́вый о́бразом всесвире́па зве́ря,/ зря просте́рша тебе́ еле́й канди́ла твоего́,/ я́ко ми́ро, на исцеле́ние разли́чных неду́гов,/ и, стра́хом одержи́мь, исчезе́.

Богоро́дичен: Зачала́ еси́ в после́дняя ле́та в ложесна́х Твои́х,/ его́же Оте́ц роди́, Сы́на,пре́жде век нетле́нно, Неискусому́жная Ма́ти./ Сего́ звездо́ю небеса ́ показу́ют/ и земля́ пеще́рою земно́ю.

Свети́лен Окто́иха. Сла́ва, преподо́бнаго.

Подо́бен: Со ученики́ взы́дем:

Дави́дски процве́л еси́ в до́му́ Госпо́дни, я́ко фи́никс, о́тче преподо́бне,/ плоды́ твои́х трудо́в во сто ны́не умно́жив./ Те́мже полк де́монов ту́чами слез твои́х, Па́вле блаже́нне, погру́жь,/ от Христа́ по́честь и вене́ц побе́ды прия́л еси́/ и чуде́с, прему́дре, независтнобога́туто благода́ть.

И ны́не, Богоро́дичен:

И́же горе́ сла́вимый Бо́жески от А́нгел,/ недр Оте́ческих не отступи́в, Чи́стая,/ неизрече́нно с до́льними поживе́;/ Ты же сего́ была́ еси́ спасе́ния вино́вна,/ от чи́стых Твои́х крове́й сему́, Чи́стая, па́че сло́ва плоть заимода́вши./ его́же моли́ рабо́м Твои́м избавле́ние да́ти прегреше́ний.

На стихо́вне Окто́иха.

Священномученик Елевферий, мученица Анфия и мученик Корив, епарх, пострадали около 120 года. Святой Елевферий, сын знатного римского гражданина, был воспитан в христианском благочестии своей матерью Анфией, принявшей святое Крещение от апостола Павла. Святая Анфия отдала отрока Елевферия на воспитание римскому архиепископу Анаклету (70–91). Добродетели юного подвижника были столь велики, что в возрасте 15 лет он был рукоположен в сан диакона, через три года – во пресвитера, а в 20 лет был поставлен епископом Иллирийским.

Когда император Адриан начал преследование христиан, в Иллирию был послан воевода по имени Филикс. Ворвавшись в храм во время Богослужения, он хотел схватить святого Елевферия, произносившего проповедь. Однако вслушавшись в слова Евангельской истины и содействием благодати Божией из гонителя стал кротким учеником Христовым. Филикс решил не возвращаться к императору, но святитель, желая пострадать за Христа, уговорил его вместе идти в Рим.

Святой Елевферий мужественно стал перед судом, призывая мучителей отречься от ложных богов и познать Единого Истинного Бога, сотворившего небо и землю. «Из того, что Он создал, – поучал святой, – мы самое лучшее и благороднейшее творение. Между тем мы заблуждаемся в неведении, ходя как бы в ночи, и, не зная, что угодно или неугодно Господу, поднимаем брань против него... Я прилепился Господу и все почести или бесчестия и муки считаю детской угрозой. Для меня умереть за Христа – наслаждение и блаженство».

Эти слова привели императора в ярость, и он подверг кроткого пастыря жестоким мукам, но он неизменно оставался невредимым. Видевший это народ прославил Бога, и многие уверовали во Христа. Городской епарх Корив, пытавший святого, был поражен словами его молитвы: Елевферий молился об обращении к святой вере своих мучителей. Просвещенный Божией благодатью Корив обвинил императора в бесчеловечном обращении с невинным страдальцем. За исповедание Истинного Бога святой Корив был усечен мечом. Священномученика Елевферия бросили в темницу и томили там голодом, но к святому прилетали голуби и приносили ему пищу.

Во время очередной пытки Господь восхитил святого из рук мучителей и возвел его на гору, где он стал подвизаться в неустанной молитве. Через некоторое время император узнал о его убежище и повелел схватить святого. Однако дикие звери, пребывавшие в той местности, не допускали воинов к горе, где находился архипастырь. Тогда святой, запретив им, пошел с воинами и по дороге беседовал с ними о Царствии Небесном и вечных мучениях. Многие из них уверовали во Христа. По прибытии в Рим святой был осужден на съедение зверями, но звери не прикоснулись к нему. Тогда Адриан приказал отсечь ему голову. Мать священномученика, с радостью и сердечной мукой взиравшая на подвиг сына, стала лобызать его мертвое тело и была усечена мечом рядом с ним.

Римская Церковь издревле чтит память священномученика Елевферия 18 апреля, а Восточная – 15 декабря́: в этот день в Царьграде, при императоре Аркадии (395–408) был освящен храм в его честь.

Преподо́бнаго Три́фона, Пече́нгскаго

НА МА́ЛОЙ ВЕЧЕ́РНИ

На Го́споди, воззва́х:

стихи́ры, глас 8.

Подо́бен: О, пресла́внаго чудесе́:

Блаже́нне Три́фоне,/ уго́дниче Христа́ Бо́га на́шего,/ смире́нныя на́ша ду́ши ко Го́споду любо́вию возвраща́й всегда́,/ преподо́бническими твои́ми моли́твами/ сласте́й на́ших огнь угаси́,/ приводя́ нас ко исполне́нию Боже́ственных повеле́ний,/ сердца́ на́ша очища́й и́стинным покая́нием,/ я́ко бо отца́, в по́мощь призыва́ем тя.

Преподо́бне Три́фоне Богому́дре,/ чи́стая твоя́ душа́, Богопросвеще́нным смы́слом сия́ющи,/ облиста́ющи доброде́телей светлостьми́,/ озаря́ет ве́рных исполне́ние,/ бесо́вску́ю тьму отгоня́ющи,/ того́ ра́ди ублажа́ем тя.

Име́я ду́шу ми́лостивну,/ и чист по́мысл, и се́рдце бо́дро,/ ве́ру небла́зненну/ и любо́вь, вои́стинну нелицеме́рну,/ от земли́ преста́вился еси́ к Небе́сным,/ преподо́бне о́тче наш Три́фоне,/ и с ли́ки пропове́дников и пустынножи́телей водворя́ешися;/ те́мже тя почита́ем свяще́нными пе́сньми/ и благоче́стно сла́вим.

Сла́ва, глас 1:

Преподо́бне о́тче наш Три́фоне,/ удивля́емся житию́ твоему́ непоро́чному/ и хва́лим тя, равноа́нгельне,/ почита́ем по́мысла твоего́ целому́дрие,/ воспева́ем кре́пости твоея́ смире́нное и молчали́вое,/ блажи́м тя, в ми́лости неоску́днаго/ и все́ми доброде́тельми чу́днаго./ Сих бо ра́ди свяще́нных по́двигов твои́х/ наслажда́ешися у Христа́ Бо́га/ неизрече́нныя его́ ра́дости в Небе́снем Ца́рствии.

И ны́не, Богоро́дичен:

Гре́шных моли́твы прие́млющи/ и скорбя́щих воздыха́ния не презира́ющи,/ Ма́ти Милосе́рдая,/ и́же из Тебе́ ро́ждшагося Сы́на, Христа́ Бо́га на́шего,/ моли́ спасти́ся душа́м на́шим.

Проки́мен дне. На стихо́вне стихи́ры, глас 2.

Подо́бен: До́ме Евфра́фов:

Дом и жили́ще Ду́ху Свято́му,/ прему́дре о́тче наш Три́фоне, был еси́,/ те́мже вопие́м:/ Ца́рствию Бо́жию рабы́ твоя́ прича́стники сотвори́,/ святу́ю твою́ па́мять любо́вию почита́ющия.

Стих: Честна́ пред Го́сподем/ сме́рть преподо́бных Его́.

Житие́ твое́, преподо́бне,/ я́ко со́лнце, во страна́х се́верных возсия́,/ чудеса́ испуща́я;/ те́мже и нас све́том невече́рним озари́,/ па́мять твою́ воспева́ющих при́сно.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Преподо́бне о́тче,/ не преста́й моля́ся о оби́тели твое́й/ и о при́сных твои́х рабе́х,/ и́хже духо́вным благове́стием твои́м породи́л еси́,/ да вси честно́е твое́ пра́зднество, веселя́щеся, почита́ем.

Сла́ва, глас 4:

Земна́го А́нгела/ и Небе́снаго челове́ка,/ преподо́бнаго отца́ на́шего Три́фона,/ бра́тие, вси почти́м,/ исто́чника умиле́ния, ми́лости тече́ние,/ струю́ исцеле́ний, масли́ну Бо́жию, в пусты́ни плодови́ту,/ и припаде́м ему́, глаго́люще:/ преподо́бне о́тче,/ еле́ем пусты́нных твои́х трудо́в просвеща́й нас,/ ве́рно хваля́щих и любо́вию чту́щих святу́ю па́мять твою́.

И ны́не, Богоро́дичен:

Изба́ви нас от бед,/ Богоро́дице Де́во, Ма́ти Христа́ Бо́га,/ да вси вопие́м Ти:/ ра́дуйся, Еди́на Вино́вная спасе́нию душ на́ших.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Стихи́ры, глас 6:

Виде́ний и дея́ний Богомы́слием возве́дся,/ Богоподража́телен показа́лся еси́, преподо́бне Три́фоне,/ посреде́ непрохо́дных пусты́нь процве́тый, я́ко фи́никс,/ оби́тель Всесвяты́я Тро́ицы и ины́я хра́мы возгради́л еси́,/ и́нок мно́жество собра́в;/ сего́ ра́ди, ве́рная ча́да твоя́,/ любе́зно почита́ем па́мять твою́.

Прему́дре Три́фоне,/ проразуме́в мимотеку́щих пре́лесть,/ ученико́м твои́м, я́ко злогуби́тельна го́рькаго мо́ря,/ бе́гати ми́ра повеле́л еси́/ и ны́не, к Вы́шним оби́телем преста́влься,/ не преста́й уча́ нас и моли́ся о душа́х на́ших.

В настоя́щем ве́це жи́зни сея́/ ничто́же сла́дко и кра́сно проразсуди́вый,/ о́тче наш Три́фоне,/ в пусты́нях, в гора́х и в де́брех безмо́лвно стра́нствуя,/ ко еди́ному Бо́гу при́сно взира́л еси́,/ се́рдце твое́ Святе́й Тро́ице дом чист соблюды́й,/ ду́шу же твою́ вся́кия стра́сти свобо́дну соде́лал еси́./ Святу́ю Тро́ицу моли́ о душа́х на́ших.

И́ны стихи́ры, глас 8:

Преподо́бне о́тче Три́фоне,/ у́ды твои́ рабы́ пра́вды сотвори́л еси́/ и во обы́чаи твое́м восприя́л еси́ сла́дце,/ е́же о ско́ротеку́щих не смуща́тися, ниже́ боле́зновати мы́слию,/ ду́шу же твою́,сле́зными моли́твами цвету́щу, всегда́ име́л еси́,/ того́ ра́ди разу́мное в Бо́зе гряду́щее блаже́нство получи́л еси́./ Моли́ся Го́сподеви о душа́х на́ших.

Преподо́бне о́тче наш, испове́дниче Христо́в Три́фоне,/ ты просвети́л еси́ язы́ческий наро́д благове́стием,/ и, во оби́тели Святы́я Трои́цы ча́да твоя́ во́зрасти́в,/ изоби́льно сло́вом Бо́жиим па́че ме́да напита́л еси́,/ и пре́жде всех Ца́рствия Бо́жия и пра́вды его́ иска́ти повеле́л еси́./ того́ ра́ди ве́лий дар целе́ния от Бо́га восприя́вый,/ моли́ся о душа́х на́ших.

Преподо́бне о́тче Три́фоне,/ ты, в пусты́ни на диа́вола хра́бро во́инствовав,/ в зна́мение побе́ды ку́щу свою́,/ я́ко на Небеси́, в непрохо́дных водрузи́л еси́,/ сего́ ра́ди Христа́ Бо́га до́брый во́ин был еси́/ и ны́не, со А́нгелы водворя́яся во све́те непристу́пнем,/ моли́ся о душа́х на́ших.

Сла́ва, глас 8:

Мона́хов мно́жество,/ равноапо́стольне и пусты́нный жи́телю Три́фоне,/ наста́вника тя почита́ем:/ ты апо́стольское сло́во показа́л еси́,/ дела́ Христа́ Бо́га неве́дущему язы́ку пропове́дал еси́,/ и, духо́вным мече́м себе́ закла́в,/ ве́лиим смиренному́дрием высо́к показа́лся еси́,/ и всем служи́тель и послу́шник был еси́./ Сего́ ра́ди Иису́с, Свет Ти́хий,/ вознесе́ тя и воспросла́ви, обогати́в чудесы́./ его́же моли́ о душа́х на́ших.

И ны́не, Богоро́дичен: Царь Небе́сный:

Проки́мен дне. И чте́ния преподо́бническая

(зри день 5-й).

На литии́ стихи́ры, глас 5:

Преподо́бне о́тче наш Три́фоне,/ почита́ем в убо́жестве бога́тство твое́/ и в преселе́нии одержа́ние,/ в безче́стии сла́ву, в не́мощи си́лу,/ в безбра́чии по Бо́зе рожде́нное доброча́дство./ Тем, я́ко люби́мый, Святе́й Тро́ице пря́мо прибли́жился еси́,/ моли́ о душа́х на́ших.

Преподо́бне о́тче, испове́дниче Христо́в Три́фоне,/ тя всего́ себе́ по вся́кому совокупле́нию устрои́вый в Ду́се:/ за ра́дость плач, за весе́лие вре́тище,/ за пра́зднство осе́льских ка́меней ноше́ние соизво́лив,/ и па́че зла́та и ка́мений многоце́нных оте́чество Го́рнее возлюби́л еси́./ моли́ о душа́х на́ших.

Преподо́бне о́тче,/ ты в пусты́ни де́тельныя прему́дрости от Вы́шняго ча́ши поче́рпл еси́,/ жи́знь кра́ткую отри́нул еси́:/ наставля́́й нас, я́ко и́скренних чад твои́х,/ единоу́мием пра́выя ве́ры в до́брое твое́ о́тческое насле́дие/ и моли́ Святу́ю Тро́ицу спасти́ся душа́м на́шим.

Сла́ва, глас 6:

Преподо́бне о́тче Три́фоне,/ ты, узре́в Бо́жий жре́бий/ ра́ди их безбо́жнаго и те́мнаго неве́дения,/ в гора́х и в де́брех диа́вольскою ле́стию растерза́нный,/ ничто́же себе́ того́ печа́льнее и плаче́внее суди́л еси́/ и, ко еди́ному Бо́гу в моли́твах во́пльствовав,/ приле́жно прося́ от обдержа́щих их зол реше́ния,/ не дал еси́ сна очеса́м,/ ниже́ дрема́ния ве́ждома твои́ма,/ до́ндеже ди́виим поврежде́нных ко све́ту Богоразу́мия обрати́л еси́./ моли́ Святу́ю Тро́ицу за вся лю́ди,/ поми́ловатися душа́м на́шим.

И ны́не, Богоро́дичен.

На стихо́вне стихи́ры, глас 8:

Ра́дуйся, преподо́бне о́тче наш Три́фоне,/ всесла́дкими уче́ний твои́х вода́ми напои́вый страну́ се́верную,/ сего́ ра́ди Госпо́дь Бог/ возда́рова́ тя венце́м Небе́сным.

Стих: Честна́ пред Го́сподем/ смерть преподо́бных Его́.

Ра́дуйся, равноапо́стольне Три́фоне,/ я́ко пре́лесть бесо́вску́ю соверше́нною не́навистию возненави́дев,/ в пусты́ни протяже́нныя се́ти зло́бы до конца́ истреби́л еси́,/ того́ ра́ди и Христо́с Бог пома́за тя прича́стием Небе́сныя своея́ ра́дости./ моли́ спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, Три́фоне преподо́бне,/ испове́дниче ве́ры,/ просвети́вый страну́ коне́чную/ и пусты́ню непрохо́дную,/ безмо́лвием и в моли́твах сле́зыми пото́ки Бо́гови угоди́вый./ моли́ за нас Святу́ю Тро́ицу,/ любочестно́ па́мять твою́ пра́зднующих.

Сла́ва, глас 2:

Преподо́бне о́тче Три́фоне,/ па́мять твоего́ успе́ния днесь возсия́, я́ко со́лнце,/ и, я́ко ми́ро, излия́ся в се́рдца́х на́ших,/ благоуха́я обоня́нием ду́ши на́ша./ Ты бо по успе́нии твое́м чудесы́ твои́ми цари́ и лю́ди удиви́л еси́./ Святу́ю Тро́ицу моли́ спасти́ся душа́м на́шим.

И ны́не, Богоро́дичен.

Тропа́рь, глас 8:

Пути́, вводя́щаго в жи́знь, наста́вник и учи́тель был еси́:/ пе́рвее бо, преподо́бне о́тче наш Три́фоне,/ прише́л еси́ в часть Норве́гския земли́/ и в после́дних конце́х севе́рныя страны́ язы́ки просвети́л еси́,/ породи́в водо́ю и Ду́хом Святы́м,/ и свяще́нная твоя́ ча́да в безпло́дней пусты́ни,/ я́ко дре́ва ма́сличная, насади́л еси́,/ ве́лию оби́тель Святы́я и Живонача́льныя, Единосу́щныя и Неразде́льныя Тро́ицы созда́л еси́/ и мона́хов мно́жество собра́в./ Тем, я́ко апо́столом и пустынножи́телем равноче́стна чту́ще тя,/ приле́жно припа́дающе, вопие́м:/ моли́ всех Бо́га за Ру́сскую зе́млю, за область твою́ и за вся лю́ди,/ почита́ющия па́мять твою́.

НА У́ТРЕНИ

По 1-м стихосло́вии Седа́лен, глас 5.

Подо́бен: Собезнача́льное Сло́во:

Тве́рдаго адама́нта и столпа́, непоколеби́ма вра́жиими прило́ги,/ преподо́бнаго и Богоно́снаго отца́ на́шего Три́фона пе́сньми почти́м:/ терпе́нием бо свои́м в непроходи́мых пусты́нях порази́л есть сопроти́внаго врага́, и безве́стна того́ сотвори́,/ и ны́не у Престо́ла Бо́жия мо́лится о душа́х на́ших.

Сла́ва, и ны́не, Богоро́дичен:

Ужа́сно чу́до зача́тия, и несказа́нен о́браз рождества́ в Тебе́ позна́ся, Чи́стая Присноде́во,/ ужаса́ет мой ум и удивля́ет по́мысл,/ сла́ва бо Твоя́, Богоро́дице, всем простре́ся во спасе́ние душ на́ших.

По 2-м стихосло́вии седа́лен, глас 4:

По пусты́ни стра́нным тече́нием, и посто́м, и воздержа́нием,/ и на о́стром ка́мении лега́нием увяди́л еси́ плоть свою́,/ ду́ши же мно́гих во Христа́ ве́рою обогати́в и тем Бо́гу угоди́в,/ от него́ мног дар исцеле́ний прия́л еси́, преподо́бне Три́фоне./ того́ моли́ о чту́щих любо́вию святу́ю и досточу́дную па́мять твою́.

Сла́ва, и ны́не, Богоро́дичен:

Обнови́ла еси́, Пречи́стая, Боже́ственным Рождество́м Твои́м/ истле́вшее страстьми́ земноро́дных ме́ртвенное существо́/ и возста́вила еси́ вся от сме́рти к жи́зни нетле́нней,/ те́мже Тя по до́лгу велича́ем вси, Де́во Препросла́вленная,/ я́коже прорекла́ еси́.

По полиеле́и седа́лен, глас 4.

Подо́бен: Ско́ро предвари́:

Яви́лся еси́ чу́ден в терпе́нии твое́м, преподо́бне Три́фоне,/ про́поведию, и́ночеством и все́ми благи́ми ви́ды Христо́ви угоди́вый./ Избра́в бо до́брая, е́же Бо́га ра́ди в пусты́нех скита́тися/ и лю́ди на спасе́нныя стези́ наставля́ти,/ му́жески разсужда́я, глаго́лал еси́:/ а́ще и яр неве́рный язы́к, но пропове́ди ра́ди сла́док рай;/ боле́зненно по пусты́нем скита́ние и стра́нство,/ но блаже́нно безсме́ртное восприя́тие./ Те́мже, о́тче наш, мо́лим тя:/ Христу́ моли́ся за всех нас, да сподо́бимся Небе́снаго Ца́рствия.

Сла́ва, и ны́не, Богоро́дичен:

Тебе́ велича́ем, Богоро́дице, вопи́юще:/ Ты еди́на Благослове́нная,/ из Тебе́ бо неизрече́нно роди́ся Христо́с Бог наш./ Ра́дуйся, Живота́ на́шего Ма́ти Препросла́вленная.

Степе́нна, 1-й антифо́н, 4-го гла́са. Проки́мен: Честна́ пред Го́сподем смерть преподо́бных его́.

Стих:

Что возда́м Го́сподеви о всех: Вся́кое дыха́ние:

Ева́нгелие от Матфе́я, зача́ло 10.

По 50-м псалме́ стихи́ра, глас 6:

Боже́ственным Ду́хом свы́ше, обле́кся,/ со дерзнове́нием пропове́дал еси́ и́мя Христа́ Бо́га на́шего беззако́нным,/ преподо́бне о́тче Три́фоне,/ бесо́вския ссекл еси́ полки́/ и а́нгельскии дости́гл еси́ чи́ны,/ того́ ра́ди в Небе́сных селе́ниих обре́л еси́ мзду́ трудо́в твои́х./ И ны́не, име́я дерзнове́ние ко Святе́й Тро́ице,/ ми́р испроси́ душа́м на́шим.

Кано́н преподо́бному, глас 1.

Песнь 1

Ирмо́с:

Пои́м, вси лю́дие,/ от го́рькия рабо́ты фарао́ни Изра́иля Изме́ншему/ и во глубине́ морсте́й нога́ми немо́крыми Наста́вльшему/ песнь побе́дную,/ я́ко просла́вися.

Пои́м, вси лю́дие, вели́каго в чудесе́х преподо́бнаго отца́ на́шего Три́фона,/ от го́рькия диа́вольския рабо́ты лю́ди избавльшаго/ и во свято́е Креще́ние приве́дшаго,/ и воздади́м сла́ву Христу́ Бо́гу:/ сла́вно бо просла́вися.

Пои́м, вси лю́дие, я́ко втораго Па́вла, вели́каго отца́ на́шего Три́фона,/ зва́нию Го́спода своего́ после́довавша,/ его́же, я́ко драго́е сокро́вище, обре́те на селе́ пусты́ннем и тем обогати́ свое́ се́рдце./ Сего́ ра́ди, преподо́бне, мо́лим тя:/ моли́ Святу́ю Тро́ицу, да пода́ст нам ми́р и бога́тую ми́лость.

Пои́м, вси бра́тие, равноа́нгельнаго Три́фона,/ огне́м Боже́ственныя любве́ распали́вшагося,/ любо́вь роди́телей свои́х и дом оста́вльшаго./ Сего́ ра́ди име́яй дерзнове́ние ко Го́споду/ мо́лится о душа́х на́ших.

Богоро́дичен: Пои́м, вси лю́дие, Спа́са Ро́ждшую и Бо́га,/ я́же, мно́гое на́ше уны́ние и печа́ль отгоня́ющи, душа́м на́шим подае́т ве́лию ми́лость./ Сего́ ра́ди возопии́м к Ней:/ Богоро́дице, Пречи́стая Де́во,/ моли́твою к Сы́ну Твоему́ и Бо́гу на́шему от тя́жких и лю́тых нас спаси́.

Песнь 3

Ирмо́с:

Утверди́ мене, Христе́, на недви́жимом ка́мени за́поведей Твои́х/ и просвети́ мя све́том лица́ Твоего́:/ несть бо свят, па́че Тебе́, Человеколю́бче.

Утверди́вся ве́рою во Святу́ю Тро́ицу,/ я́ко щитом кре́пким, преподо́бне, вся ми́ра сего́ бога́тая и кра́сная презре́л еси́,/ с Па́влом суди́вый ничто́же и́но, то́кмо Христа́ Иису́са ве́дети и того́ ра́спята,/ его́же моли́, да изба́вит нас от вся́ких лю́тых.

Утверди́в Христа́ Бо́га зва́нием мысль твою́,/ от стра́ны твоея́, я́ко пра́ведный Авраа́м, избе́гл еси́./ Сего́ ра́ди зове́м ти:/ ра́дуйся, пра́отцем еди́нонравный о́тче наш.

Утверди́вый Госпо́дь Бог наш, Иису́с Христо́с,/ пе́рвых Свои́х учени́ков на ка́мени Своего́ повеле́ния,/ Той же Всемогу́щий утверди́ тя в после́днем ве́це, во страну́ конце́в посла́в,/ да та́мо лю́ди све́том ве́ры просвети́ши./ моли́ за всех, почита́ющих па́мять твою́.

Богоро́дичен: Утвержде́ние на́ше в бу́ри/ и благоути́шное приста́нище во свире́пом волне́нии,/ Тя, Пресвяту́ю Де́ву, еди́наго от Тро́ицы, Христа́, ро́ждшую,/ мо́лим, я́ко благолюби́ву, помощи́ нам/ и изба́вити нас от язы́ка льсти́ва.

Седа́лен, глас 8:

Тро́ицы рачи́теля, вели́каго отца́ Три́фона,/ науча́юща се́верныя стра́ны я́сно ве́ре Боже́ственней/ и оби́тель во сла́ву Святы́я Тро́ицы созда́вшаго,/ в пе́снех досто́йно, ве́рнии, почти́м, взыва́юще:/ ра́дуйся, пропове́дниче ве́ры.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ я́ко от Тро́ицы еди́наго родила́ еси́, Богоро́дице,/ и но́сиши на блаже́нную ру́ку Пребога́тое Сло́во, непреме́нно и неизме́нно.

Песнь 4

Ирмо́с: Ве́лия тайна/ Твоего́, Христе́, смотре́ния:/ сию́ бо свы́ше прови́дя богозри́тельно, Авваку́м,/ изше́л еси́, вопия́ше Тебе́,/ во спасе́ние люде́й Твои́х, Человеколю́бче.

Ве́лию та́йну Твоего́, Христе́, явле́ния/ преподо́бный оте́ц наш Три́фон близ до́му́ своего́ в пусты́ни ви́дев,/ потече́ в да́льныя стра́ны и та́мо наро́ды спасе́ною стезе́ю введе́ в Небе́сное Ца́рствие./ Мо́лим Тя, Бо́же наш,/ упра́ви и нас браздою покая́ния во оное блаже́нное гражда́нство.

Ве́лию та́йну Бо́жия повеле́ния, преподо́бне Три́фоне, показа́вый де́лом,/ во и́мя Святы́я и Живонача́льныя Тро́ицы храм созда́в,/ оби́тель возгради́в и мно́жество учени́к собра́в,/ моли́ Святу́ю Тро́ицу поми́ловатися душа́м на́шим.

Ве́лию та́йну, преподо́бне о́тче, твои́х пусты́нных трудо́в,/ алка́ние, жа́жду, во благове́стии от язы́ческаго наро́да бие́ние,/ о зе́млю ударе́ние и разли́чных муче́ний преще́ние кто испове́сть?/ То́кмо еди́ному ве́дущу Бо́гу./ Сего́ ра́ди вопие́м ти:/ ра́дуйся, Христа́ ра́ди Бо́га на́шего многострада́льный о́тче наш Три́фоне.

Богоро́дичен: Вели́кими и многоразли́чными тайнами, Богоро́дице Де́во, рождество́ Твое́ дре́вле прообразова́ся,/ мы же, сбытие́ зря́ще, я́ко к Ма́тери Бо́жией притека́ем и сле́зно мо́лим:/ скрый нас в та́йне кро́ва Твоего́.

Песнь 5

Ирмо́с:

Озари́ наш ум, Бо́же,/ све́том за́поведей Твои́х/ и све́тлостию благода́ти Твоея́,/ да́руя нам, Бла́же, Твоя́ ми́лости,/ зане́ свет и ми́р повеле́ния Твоя́.

Озари́в ум твой, преподо́бне о́тче Три́фоне, Бо́жиим зако́ном,/ измла́да моли́твами сле́зными Святу́ю Тро́ицу уми́лостивил еси́,/ сего́ ра́ди, просия́в вели́кими чудесы́, моли́ о душа́х на́ших.

Озари́л еси́ све́том Ева́нгельския про́поведи лю́ди ослепле́нныя,/ и мы, раби́ твои́, ве́дяще тобо́ю пропове́даннаго Сы́на Бо́жия, Све́та Невече́рняго,/ ему́же ны́не предстои́ши, мо́лимся:/ моли́ спасти́ся душа́м на́шим.

Озари́ нас, о́тче Три́фоне, послуша́нием за́поведей Бо́жиих,/ и наста́ви на стезю́ покая́ния,/ и сподо́би нас, гре́шных, по исхо́де душ получи́ти страну́ десну́ю,/ почита́ющих святу́ю па́мять твою́.

Богоро́дичен: Озаре́ние на́ше, Свята́я Де́во Ма́ти, Ты денни́ца у́тренняя,/ Вели́кое Со́лнце, Христа́ Бо́га на́шего, к нам вводя́щая,/ его́же моли́ спасти́ся душа́м на́шим.

Песнь 6

Ирмо́с:

Проро́ка спасл еси́ от ки́та, Человеколю́бче,/ и мене́ из глубины́ прегреше́ний/ возведи́, молю́ся.

Проро́ческое прозре́ние, преподо́бне о́тче наш Три́фоне, са́мою и́стиною изобрази́в,/ а́лчущих хле́бом живо́тным сла́дце насы́тив,/ и о нас блага́го Бо́га моли́,/ да сподо́бит предража́йшия Свое́я Трапе́зы причасти́тися невозбра́нно.

Проро́ку Ио́не, преподо́бне о́тче, подража́л еси́:/ он бо вели́кий град Ниневи́ю покая́нием от я́звы па́губныя спасе́,/ ты же, расточе́нных во единомы́слие собра́вый,/ во Святу́ю Тро́ицу ве́ровати научи́л еси́./ В моли́твах твои́х не забыва́й нас, чад твои́х.

Проро́ческое Писа́ние о вопло́щении Сы́на Бо́жия я́сно неве́дущему язы́ку показа́л еси́/ и, я́ко драги́м сокро́вищем, о́ный обогати́в,/ Святе́й Тро́ице моли́ся о душа́х на́ших.

Богоро́дичен: Проро́цы святи́и издале́ча прореко́ша, Ма́ти Свята́я, Твое́ рождество́:/ еди́наго бо от Тро́ицы, Сы́на Бо́жия, безму́жно родила́ еси́/ и по рождестве́ Де́ва пребыла́ еси́./ Моли́ его́ поми́ловати ду́ши на́ша.

Конда́к, глас 8.

Подо́бен: Взбра́нной Воево́де:

Все твое́ у́мное жела́ние к Бо́гу впери́в,/ того́ зва́нию невозвра́тно от души́ после́довал еси́,/ в пусты́ню коне́чную всели́вся,/ и, та́мо а́нгельски и равноапо́стольне пожи́в,/ мно́гим путь был еси́ ко спасе́нию./ Сего́ ра́ди и Христо́с тя просла́ви и да́ром чуде́с обогати́./ Те́мже вси вопие́м ти:/ ра́дуйся, испове́дниче Христа́ Бо́га на́шего;/ ра́дуйся, гра́ду твоему́ неколеби́мое утвержде́ние, Три́фоне, о́тче наш.

И́кос:

Лоза́ преподо́бства и стебль первонача́льства,/ цвет пусты́нный и плод Богода́нный, при́сно цвету́щий,/ новопросвеще́нней стране́ дарова́лся еси́./ Сего́ ра́ди, почита́ющим па́мять твою́, вопие́м ти:/ ра́дуйся, преподо́бне, от ю́ности бла́гости научи́выйся;/ ра́дуйся, тре́звый во всех благо́ю со́вестию./ Ра́дуйся, Христо́ва розга́, всехва́льне;/ ра́дуйся, за́поведем Бо́жиим послу́шник до́брый./ Ра́дуйся, от за́пада в се́вер, я́ко со́лнце, возсия́л еси́;/ ра́дуйся, ви́девый наро́д Лопа́рский19

во идолобе́сии,/ о обраще́нии их пред Бо́гом в моли́твах го́рько рыда́л еси́./ Ра́дуйся, приснопа́мятный чудотво́рче Три́фоне, о́тче наш.

Песнь 7

Ирмо́с:

О́бразу служи́ти,/ мусики́йскому согла́сию созыва́ющу лю́ди,/ от пе́сней сио́нских пою́ще оте́чески, о́троцы Дави́довы/ мучи́телево разори́ша злочести́вое веле́ние/ и пла́мень в ро́су преложи́ша,/ песнь воспева́юще:/ превозноси́мый отце́в и наш Бо́же, благослове́н еси́.

О́бразу Святы́я Тро́ицы покланя́тися неве́жды научи́л еси́/ и куми́рницы бесо́вския опрове́ргл еси́, преподо́бне о́тче наш Три́фоне./ Тобо́ю и мы, гре́шнии, наста́вльшеся, Святу́ю Тро́ицу хваля́ще, воспева́ем:/ отце́в и наш Бо́же, благослове́н еси́.

О́бразу смире́ния, и молча́ния, и послуша́ния ученико́в твои́х научи́вый/ и, я́ко зерца́лом, собо́ю вся́каго изря́днаго ви́да о́браз показа́вый,/ помина́й нас, хваля́щих и пою́щих в Тро́ице еди́наго Бо́га,/ благослове́ннаго во ве́ки.

О́бразу Христо́ву и его́ Богома́тере/ и всех святы́х покланя́тися наказа́л еси́ ученико́в твои́х тве́рдо,/ и лю́торскаго и кальви́нскаго нече́стия повеле́л еси́ бе́гати и гнуша́тися;/ моли́твами же твои́ми ученицы́ твои́ и до ны́не те́ми ересьми́ гнуша́ются,/ хваля́ще и пою́ще благослове́ннаго Бо́га во ве́ки.

Богоро́дичен: О́бразу Твое́му, Пресвята́я Де́во Влады́чице, припа́дающе, мо́лимся:/ сохрани́, Ма́ти, ро́ждшая Бо́га, всех нас от наве́та вра́жия/ и от оклевета́ния язы́ка о́стра, вопию́щих к Сы́ну Твое́му:/ отце́в и наш Бо́же, благослове́н еси́.

Песнь 8

Ирмо́с:

В пла́мени о́гненне горя́щия пещи́/ сохра́ньшаго де́ти/ и во зра́це А́нгела снизше́дшаго к ним,/ по́йте Го́спода/ и превозноси́те его́ во ве́ки.

В пла́мени о́гненне Сын, Сло́во Бо́жие, спасе́ о́троки,/ и тебе́, преподо́бне, Той же всемо́щный соблюде́,/ егда́ был еси́ посреде́ идолопокло́нных я́рости, я́ко посреде́ пе́щи,/ и, не обину́яся, взыва́л еси́:/ позна́йте, благослови́те, по́йте Бо́га препе́таго/ и превозноси́те его́ во ве́ки.

Пла́менем пе́щным, я́коже дре́вле халде́и, опаля́хуся,/ та́ко из твои́х уст, я́ко све́тлость огня́, про́поведь исходя́щая/ де́моны прогоня́ше, лю́ди же просвеща́ше./ Сего́ ра́ди ученицы́ твои́, тобо́ю воздвиза́еми, навыко́ша пе́ти:/ благослови́те, вся дела́ Госпо́дня, Го́спода,/ по́йте и превозноси́те его́ во ве́ки.

Во пла́мени злоче́стия неве́дением Бо́га мно́зи сгара́ху;/ ты же, преподо́бне о́тче наш,/ водо́ю слез твои́х и струя́ми благоче́стнаго уче́ния идолобе́сия огнь погаси́л еси́/ и, сгара́ющия ду́ши прохлади́в, пе́ти научи́л еси́:/ отце́в и наш Бо́же, препе́тый и превозноси́мый во ве́ки.

Богоро́дичен: Во пла́мени о́гненне, Богома́ти Свята́я,/ егда́ ви́де Тя вели́кий Моисе́й в купине́, прописа́ нетле́нное рождество́ Твое́./ Де́ва Пречи́стая, изба́ви от зол нас, почита́ющих Тя,/ моля́щих и хваля́щих Сы́на Твоего́ и Бо́га на́шего,/ препе́таго и превозноси́маго во вся ве́ки.

Песнь 9

Ирмо́с:

Тебе́, све́тлую свещу́ и Ма́терь Бо́жию,/ пречу́дную сла́ву и вы́шшую всех тва́рей,/ пе́сньми велича́ем.

Све́тлую свещу́ почита́ем тя, преподо́бне о́тче Три́фоне,/ на высоте́ све́том про́поведи и мно́гими чудесы́ светя́щую./ Сего́ ра́ди зове́м ти:/ моли́ Святу́ю Тро́ицу за о́бласть твою́ и за вся лю́ди, поми́ловатися душа́м на́шим.

Я́ко све́тлую свещу́, вели́кий царь Иоа́нн в ца́рствующем гра́де узре́в тя,/ удиви́ся твоему́ честно́му зра́ку и возлюби́ тя зело́./ Мы же, раби́ твои́, ве́рою и любо́вию мо́лимтися, цели́телю душ и теле́с на́ших:/ моли́ ми́лостиваго Бо́га, да пода́ст нам грехо́в оставле́ние и ве́лию ми́лость.

Тебе́, све́тлую свещу́, Иису́с, пропове́дуемый тобо́ю, Боже́ственным Свои́м манове́нием/ по успе́нии твое́м от конце́в земны́х взя/ и, я́ко свети́льник, поста́ви пред царе́м;/ ты же, преподо́бне о́тче наш, явле́нием твои́м вели́каго царя́ Фео́дора спасл еси́./ Сего́ ра́ди вопие́м ти:/ ра́дуйся, помо́щниче ско́рый, Три́фоне, о́тче наш.

Богоро́дичен: Тебе́, све́тлую свещу́ и Ма́терь Бо́жию,/ Честне́йшую Херуви́м и Сла́внейшую без сравне́ния Серафи́м, мо́лим:/ всех нас, благосе́рдая́ Ма́ти, спаса́й при́сно.

Свети́лен, глас 8.

Подо́бен: Прему́дрости наста́вниче:

Наслади́вся, Богому́дре, воздержа́ния и жела́ния пло́ти обузда́в,/ я́ко многосве́тлая звезда́, зари́ми чуде́с твои́х Лопа́рский язы́к просвети́л еси́,/ и ны́не мо́лимся ти: сохрани́ рабы́ своя́ от наве́та льсти́ва.

Сла́ва, и ны́не, Богоро́дичен:

По Бо́зе на Тя, Пречи́стая, упова́ние возлага́ем,/ и́же из Тебе́ проше́дшему сраспина́еми Христу́:/ Твои́ми же к Нему́ мольба́ми под кро́вом Твои́м невре́дны да́же до конца́ сохрани́.

На хвали́тех стихи́ры, глас 4:

Бога́тство души́ твоей, преподо́бне о́тче,/ ви́дев, многоко́зненный/ окра́сти подуща́ше свои́х служи́телей,/ я́ко и бия́ху тя за сло́во и́стины,/ но не возмо́же наве́тник духо́внаго твоего́ сокро́вища окра́сти,/ обре́те бо вооруже́нну непоро́чную твою́ ду́шу./ Те́мже мо́лимтися:/ и нас иски́й поглоти́ти да не, обнажи́в, плени́т,/ предвари́, преподо́бне,/ и изба́ви льсти́ваго наве́та.

Вели́ким Анто́нием хва́лится Еги́пет,/ свяще́ннаго Са́вву почита́ет Палести́на,/ первонача́льника оби́телей Росси́йских му́драго Анто́ния пое́т вели́кий град Ки́ев,/ мно́готочнаго чудесы́ преподо́бного Се́ргия вели́кая Росси́я че́стно прославля́ет;/ святы́я же оби́тели твоея́ мона́си/ и о́бласти твоей вси лю́дие, о́тче Три́фоне,/ в про́поведи боле́зни и пусты́нныя труды́ твоя́/ любе́зно ублажа́ем и мо́лимтися:/ Христа́ Бо́га на́шего моли́/ о спасе́нии душ на́ших.

Преподо́бне о́тче наш Три́фоне,/ ты се́верную страну́ и град твой моли́твами твои́ми утверди́л еси́/ и Трои́ческим испове́данием многобо́жия лесть разруши́л еси́,/ сего́ ра́ди прия́л Боже́ственную благода́ть/ вся ве́рных стра́сти очища́ти./ Еди́наго в Тро́ице Бо́га, свя́те Три́фоне,/ моли́ о душа́х на́ших.

Преподо́бне о́тче наш,/ ты, очи́стив ум твой безстра́стием,/ к жела́нному и кра́йнему́ Богомы́слию дости́гл еси́,/ и Бог тя просла́ви:/ я́коже бо иногда́ преподо́бнаго Гера́сима при Иорда́не,/ зве́ри тя послуша́ху/ и в запове́данных тобо́ю пусты́нях не дерза́ху де́яти па́костей./ И ны́не мо́лим тя:/ изба́ви нас от ловле́ния душепа́губнаго зве́ря/ и моли́ Святу́ю Тро́ицу о спасе́нии душ на́ших.

Сла́ва, глас 3:

Ко Святе́й Тро́ице ве́рное и и́скреннее упова́ние име́л еси́,/ ду́ху благоповинове́ния всех уму́дрял еси́,/ смире́нномудрия предводи́тель я́влься и́стинный,/ и, я́ко Ио́сиф Еги́пту,/ оби́тели твое́й загладне́вшим прему́дрый промы́сленник показа́лся еси́,/ Три́фоне о́тче наш./ Христа́ Бо́га моли́ о душа́х на́ших.

И ны́не, Богоро́дичен.

на литурги́и:

Слу́жба вся преподо́бническая.

Преподобный Трифон Печенгский, в миру Митрофан, родился в 1495 году в Новгородской губернии в семье священника. С ранних лет святой Трифон был «изряден постник, кроток, милостив». Однажды в лесу во время молитвы он услышал голос: «Я, Милующий вас, вспомнил о тебе: ступай в землю пустынную, жаждущую, где не ходил еще никто и не обитал ни один человек». Трифон решил покинуть родительский дом и идти с проповедью о Христе к язычникам – лопарям, о жизни которых знал из рассказов рыбопромышленников.

Придя на Кольский полуостров, на реку Печенгу, к лопарям, преподобный изучил их язык, обычаи, верования и стал проповедовать им веру Христову. Святой преодолел много трудностей, перенес гонения и побои, но даже под страхом мученической смерти он не отступил от апостольского служения и не перестал проповедовать. Постепенно мудрым и кротким словом святого многие обратились ко Христу. В 1532 году, по благословению Новгородского архиепископа Макария, преподобный Трифон и иеромонах Илия построили для новообращенных храм и основали на реке Печенге монастырь во имя Святой Троицы. Преподобный не хотел быть игуменом и назначил инока Гурия настоятелем новой обители. В 1556 году царь Иоанн Грозный дал монастырю жалованную грамоту и богато одарил его.

Преподобный никогда не разрешал себе послабления в подвигах. Однажды он купил жернова и долго нес их на плечах до самой Печенгской обители. Ученики просили его не изнурять себя, но преподобный сказал: «Братия, тяжелое бремя на потомках Адама от рождения до самой смерти. К чему веселиться? Нет, Трифон легче повесит камень на шею, чем будет подавать братии пример праздности». Несколько лет подряд на Кольском полуострове из-за мороза погибали посевы. Преподобный Трифон с несколькими братиями ходил в Новгородские земли, просил подаяние и отправлял собранное в монастырь.

Около 60 лет прожил преподобный Трифон на Печенге. И хотя он проводил свою жизнь среди людей, душа его стремилась к уединению и безмолвию. Перед кончиной святой завещал: «Егда по воле Божией душа моя разлучится от тела моего, погребите мя у церкви Успения Пресвятыя Богородицы, в пустыни, идеже часто отхождах на Богомыслие и молчание».

Преставился преподобный Трифон Печенгский в 1583 году, 15 декабря, и погребен согласно завещанию. Местное празднование святому установлено вскоре после его кончины. По преданию, просветитель лопарей был небольшого роста, крепок, несколько сгорблен, с длинной седой бородой. Стяжав при жизни великие духовные дарования, он и после кончины помогал всем призывающим его, не раз спасал терпевших бедствие мореплавателей.

В 1589 году шведы разрушили Печенгский монастырь. Позже, по повелению царя Феодора Иоанновича, монастырь перенесли за реку Колу «против острога на острову». На месте разрушенного монастыря воздвигли церковь во имя преподобного Трифона, «страны северныя просветителя, Печенгского чудотворца», а над могилой святого – храм в честь Сретения Господня.

* * *

17

Мла́ты – молотами.

18

Краста – злокачественная чесотка, сыпь на коже.

19

Лопари́ – народ финского племени.


Источник: Минея - М. : Издат. совет Русской Православной Церкви, 2002-. 12 том. / Минея декабрь. - 2002. / Ч. 1. – 600; Ч. 2. - 560 с.

Комментарии для сайта Cackle