Октябрь

На Господи, воззвах; стихиры апостола, глас 4.

Подобен: Званный свыше:

Иже зарю Божественную прием,/ егда мановением лучшим ослеплен,/ прежде мраком держим, прииде к тебе Савл,/ Божественнаго прося очищения,/ тогда, всеблаженне, яко иерарх мудр/ сынотвориши его Крещением,/ потом хотящаго вселенную всю осынотворити./ Тем с ним блажим тя, Христова апостола, Анание Богомудре,/ молитеся спастися нам.

Научився Божественным преславно,/ грома крепльше, блаженне,/ вострубил еси Слово Божие спасительное/ и спящия во гробех суеты возбудил еси,/ умерщвление отвергшия, мертвым сообитающее/ и во аде держимыя возобращающее,/ яже соделал еси Умертвившаго мертвость сосуды честны/ Иисуса Владыки и Спаса душ наших.

Яко светоносец, яко Божественный проповедник,/ яко свидетель Богоизбранный Страстей Христовых/ и будущия явитися неизреченныя славы/ снаследник же и спричастник, сый со Владыкою,/ и наслаждаяся истекающаго всегда светолития,/ от незаходимаго Света, Богоглаголиве,/ светлый совершающия твой ныне праздник,/ молитвами твоими от мрачных бед, Анание, избави.

Ины стихиры Романа, глас 1.

Подобен: Небесных чинов:

Краснопеснивая цевница Божественнаго Духа,/ славий и щур Божественных песней,/ свирель церковная/ всем нам своя предлагает сладкопесненная учреждения/ и теми веселит Богомудрыя.

Светлейший светильник и прозарнейший,/ сладковещанная гусль,/ струна благознаменитых Духа словес/ поет ясно, научая концы/ немолчными песньми славословити Божества едину зарю.

Ты, Владыце всех яко предстоя/ и дерзновение, отче, к Нему стяжав,/ нам, совершающим память твою и светлое твое торжество,/ моли избавитися бед и напастей,/ Романе Богоблаженне.

Слава, апостола, глас тойже. Византиево:

Сосуд избранный, великое приятелище Духа,/ Павла апостола просветил еси, преподобне,/ Богом по откровению навык,/ яко самовидец Слова и таинник чудес Его,/ апостол же прежде учеников/ и верный строитель Новаго Завета,/ тем подражая Учителя Христа,/ твою кровь пролиял еси,/ мученическою страстию исповедник быв, Анание,/ священноначальниче Христов,/ и течение совершив, веру же некрадому соблюд,/ с Вышними служители в Высочайших водворяяся,/ моли спастися душам нашим.

И ныне, Богородичен или Крестобогородичен.

Подобен: Прехвальнии мученицы:

При Кресте предстоящи Сына Твоего и Бога/ и долготерпение Его смотряющи,/ глаголала еси, рыдающи, Мати Чистая:/ увы Мне, Чадо Сладчайшее,/ что сия страждеши неправедно, Слове Божий,/ да спасеши человечество.

Стиховна Октоиха: и апостола стих, глас 4, с припевом: Во всю землю изыде вещание их,/ и в концы вселенныя глаголы их.

Страстотерпческое приятелище, явился еси, Анание апостоле,/ камением, яко цветы, учащаемь,/ за Пострадавшаго плотию нас ради распятие вольне/ кровь твою пролиял еси./ Тем и Дамаск хвалится священным твоим торжеством днесь./ Не точию же той, но и вся подсолнечная,/ чудес твоих знамения яве проповедающи, вопиет:/ молися к Богу даровати нам согрешений прощение.

Слава, преподобнаго, глас 6:

Первое добрых начало/ явился еси спасения вина, Романе, отче наш;/ Ангельское бо составив песнопение,/ Боголепно показал еси житие твое;/ Христа Бога моли/ напастей и бед избавити поющия тя.

И ныне, Богородичен или Крестобогородичен.

Подобен: Тридневен:

Видящи Тя распинаема, Христе,/ Тебе Рождшая вопияше:/ что странное еже вижу таинство, Сыне Мой?/ како на Древе умираеши,/ плотию повешен,/ жизни Подателю?

Тропарь апостола, глас 3:

Апостоле святый Анание,/ моли Милостиваго Бога/ да прегрешений оставление/ подаст душам нашим.

Слава, преподобнаго, глас 8:

В тебе, отче, известно спасеся еже по образу:/ приим бо крест, последовал еси Христу/ и, действуяй, учил еси презирати убо плоть, преходит бо,/ прилежати же о души вещи безсмертней./ Темже и со Ангелы срадуется, преподобне Романе, дух твой.

И ныне, Богородичен или Крестобогородичен.

На утрени

Канон апостола, на 4, егоже краегранесие: Анании слава да прославится. Творение Иоанна монаха. Глас 8.

Песнь 1.

Ирмос: Воду прошед, яко сушу,/ и египетскаго зла избежав,/ Израильтянин вопияше:/ Избавителю и Богу нашему поим.

Отверзем уста похвальная,/ уясним язык в памяти, вси вернии, началопастыря Анании/ и с ним Богу нашему воспоим.

Жениху Пречистому/ невестоводит нескверную Невесту Анания преславный,/ Христу сущую зде Церковь,/ с неюже ясно Богу нашему воспоим.

Первый был еси ученик,/ новому даеши прозрение ученику, древле гонителю, Анание, и песнопоеши:/ воспоим Богу нашему.

Богородичен: Чини Тя Ангельстии и земных роди, Безневестная Мати, непрестанно хвалят:/ Зиждителя бо их, якоже Младенца, на объятиих Твоих носила еси.

Ин канон преподобнаго Романа, глас 6 (правится в иный день или на повечерии).

Песнь 1.

Ирмос: Яко по суху пешешествовав Израиль,/ по бездне стопами,/ гонителя фараона/ видя потопляема,/ Богу победную песнь/ поим, вопияше.

Светосиянныя лучи от Небес нам низпосли/ молитвами твоими, мудре Романе Божественне,/ твою похвалити священную память песньми.

От юности весь ты Христу тя самаго предложив,/ последовал еси Ему,/ светозарными сияньми ум с Небесе,Романе, облиставая.

Украшен добротою Вседетельнаго и Святаго Духа,/ яко звезда светосиянная,/ добродетелей светлостию, мудре, явился еси, Романе, мира концем.

Богородичен: Из Тебе пройде неизреченно Божие Слово Собезначальное в последняя времена,/ и перваго человека Адама, во тлю падшаго, Богородице, возспасе.

Песнь 3.

Ирмос: Ты еси утверждение/ притекающих к Тебе, Господи,/ Ты еси свет омраченных,/ и поет Тя дух мой.

Повелению последуя Учителя твоего,/ был еси архиерей, страстотерпческое же приношение, апостоле.

Милостива молитвами твоими Богоуветливыми соделай Избавителя/ тебе поющим, Анание апостоле.

Все тебе связа зверя стремление, Господь явився,/ светом неизреченным омрачив лице.

Богородичен: Тя вси стяжахом, прибежище и стену нашу, христиане,/ и Тя славословим немолчно, Безневестная.

Ин

Ирмос: Несть свят,/ якоже Ты, Господи Боже мой,/ вознесый рог верных Твоих, Блаже,/ и утвердивый нас на камени/ исповедания Твоего.

Ум твой, Романе мудре, бысть обителище Троицы Святыя,/ исполняемь благочестно знания истиннаго, источая Божественная проповедания.

Струи искипе течений честный твой язык, поя Божественная/ и уясняя мудростно Христово к нам от Девы Рождество неизреченное.

Се питаеши обильно мудрыми ученьми и красными песнопении помыслы наша/ и исполняеши сладости Божественнейшия, Романе Богогласе.

Богородичен: Всех еси воинств вышши, Дево,/ тех бо Содетеля, Сына Божия, зачала еси во утробе/ и, рождши, пребываеши Приснодева.

Кондак преподобнаго, глас 8:

Божественными добродетельми духа/ измлада украсився, Романе премудре,/ Церкви Христове пречестное украшение был еси:/ пением бо прекрасным украсив ю, блаженне./ Тем молим тя: подаждь желающим Божественнаго дарования твоего,/ яко да вопием ти:/ радуйся, отче преблаженне, красото церковная.

Седален, апостола, глас тойже.

Подобен: Премудрости:

Просвещен познанием Божественным священник же, и мученик Иисусов, и Божественный апостол, Анание, был еси./ И иногда гонителя Савла нарицаема, ослеплена мановением вышним, славне,/ в воде погрузив, Богосодетельным научением лучша его показал еси, просветителя душам нашим./ Сего ради вопием ти:/ моли Христа Бога грехов оставление даровати чествующим любовию святую память твою.

Слава, преподобнаго, глас 5.

Подобен: Собезначальное Слово:

Насажден, якоже древо, отче блаженне, при исходищих вод постнических,/ Божественным содейством плоды болезней твоих во время явственно Садоделателю и Творцу отдал еси./ Сего ради святую твою поем память, чествующе тя, Романе преподобне.

И ныне, Богородичен:

В Тебе таинство трепетное совершается, Девице,/ Сущаго Бога Слова от Отца в ложеснах зачала еси,/ и раждаеши паче естества Человека совершенна.

Крестобогородичен:

На Кресте зрящи Тя, Христе, Мати Твоя вольно посреде разбойников висяща,/ растерзающися утробою, матерски глаголаше:/ Безгрешный Сыне, како неправедно на Кресте, якоже злодей, пригвожден еси,/ человеческий род хотя оживити, яко Благоутробен?

Песнь 4.

Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество.

Тобою, Христе, наказуем, страдальчески побеждает смерть Анания приснопамятный,/ от Тебе почести восприимая.

Ученик был еси гонимаго Слова, приснопамятне Анание,/ и учитель Богочестия гонящему.

Яви тя Господь Савлу безочесну крыющася,/ и показа тя ходатая, Анание, того исцеления.

Богородичен: Бога, егоже родила еси, Пречистая Дево,/ Того моли от всякаго обстояния избавити вся поющия Тя.

Ин

Ирмос: Христос моя сила,/ Бог и Господь,/ честная Церковь/ Боголепно поет, взывающи,/ от смысла чиста о Господе празднующи.

Приятелище был еси Божественнаго Духа и огнедохновенная уста,/ возглашающая Божественная песнопения и наслаждающая души, Романе, притекающих ти.

Яко цевница ты был еси Небесная и гусль,/ всякую к себе влекущи мысль повестьми твоими и красными твоими песнопении.

Благодать дхне и вселися в светоносную твою душу,/ Вседетельнаго и Пресвятаго Духа, прехвальне,/ и тяприятелище и мудра Боговещателя содела.

Богородичен: Яд излия в праматерния убо слухи змий,/ но Ты, Чистая, сего истрясла еси, Архангеловым гласом заченши и рождши Христа.

Песнь 5.

Ирмос: Вскую мя отринул еси/ от лица Твоего, Свете незаходимый,/ и покрыла мя есть чуждая тьма, окаяннаго;/ но обрати мя и к свету заповедей Твоих/ пути моя направи, молюся.

В бури сущим пристанище Божественное приснотекущий Источник показа тя;/ во тьме же сущим зарю неприступный Свет содела тя, Анание блаженне,/ и яко ученика достоявленна, милостивно в тебе Воспочиваяй.

Видяй сокровенная и прежде бытия Ведый всяческая,/ тебе, таящемуся, таящагося солнца яви, иногда гонителя,/ не по мнозе времени, разоряемыя от него Истины, апостола.

Постижения конец неизследимый Твоего строения:/ тем бо, Спасе, страшная изничтожися смерть./ Сего ради Анания яко победитель и иерарх за Тя, радуяся, закалается.

Богородичен: Матернее дерзновение еже к Сыну Твоему имущи, Пречистая,/ сроднаго промышления еже о нас не презри, молимся:/ яко Тебе и Едину христиане ко Владыце очищение милостивно предлагаем.

Ин

Ирмос: Божиим светом Твоим, Блаже,/ утренюющих Ти души любовию озари, молюся,/ Тя ведети, Слове Божий,/ Истиннаго Бога,/ от мрака греховнаго взывающа.

Яко благолепнейшо святилище,/ сосуд яко чистейший, Утешителева благодать обретши тя, Романе Богомудре,/ храм содела, светом украшен, и вселися.

Воплощеннаго Сына Божия Рождшая истинно твою душу просвети/ и ум Божественнаго знания исполни, в нощи представши тебе, Приснодева.

Списаньми твоих священных словес, приснопамятне, явився всем воистинну сладчайший,/ вся увеселяеши, всех просвещая ум и вся научая знанию спасительному.

Богородичен: Свет рождшая, Отчее Слово Присносущное, Чистая,/ свещательными молитвами Твоими просвети ум мой/ и отжени тьму души моея, Пречистая Владычице.

Песнь 6.

Ирмос: Очисти мя, Спасе,/ многа бо беззакония моя,/ и из глубины зол возведи, молюся:/ к Тебе бо возопих, и услыши мя,/ Боже спасения моего.

Служити навык Богу Живу священнейше,/ разрушил еси многочастное безумных злонравие,/ Единому научая,Анание, покланятися Триипостасному Божеству.

Прием в руце твои церковная кормила,/ к Кормчию Христу пришел еси, апостоле,/ и сию Духом, яко корабль Божественный, Анание, управил еси.

Создавый правый путь,/ правошествующему посылаему быти славному Твоему ученику повелел еси, Владыко,/ праведнейшаго Твоего избрания сосуд открывая, молящася.

Богородичен: Да избавимся от лютых прегрешений мольбами Твоими, Богородительнице Чистая,/ и да улучим, Пречистая, Божественное сияние из Тебе неизреченно Воплощеннаго Сына Божия.

Ин

Ирмос: Житейское море,/ воздвизаемое зря напастей бурею,/ к тихому пристанищу Твоему притек, вопию Ти:/ возведи от тли живот мой,/ Многомилостиве.

Просвещения исполняемь и к высоте добродетелей Божественно возводимь,/ небрегл еси о всех земных:/ и столп Небесный, и светильник благочестия был еси.

Плоти увядил еси желания/ и душу твою украсил еси светлейшими чистоты озареньми,/ и доброту рачительную добродетелей благолепием обложил еси.

Возненавидев привременное и суетное, и гнилое, и течное наслаждение,/ к храму Богородицы прилежа, ум освятил еси, и душу, и тело, достославне.

Богородичен: Вси предзряще пророцы светло будущее послежди от Девы, Христе мой,/ Твое на земли пренепорочное Рождество,/ явственно Боговидцы провещаша.

Кондак апостола, глас 2.

Подобен: В молитвах:

В молитвах теплейший заступниче/ и просящим скорейший послушателю,/ приими моление, Анание, наше/ и Христа моли помиловати ны,/ Единаго во святых Почивающаго.

Икос:

Просвещением сияния Твоего просветив, Христе мой, мрак моего сердца и слепоту,/ даждь ми слово похвалити чистым смыслом апостола Богозарныя добродетели и страсти блаженнаго:/ Источник бо Ты еси мудрости и Податель благих, Многоблагоутробне./ Тем, уяснив язык мой, песненное приими похваление, Едино во святых почиваяй.

Песнь 7.

Ирмос: От Иудеи дошедше, отроцы/ в Вавилоне иногда/ верою Тройческою пламень пещный попраша, поюще:/ отцев Боже, благословен еси.

Да вострубит мудренно Богоизбранное стадо благогласною трубою страдания пастыря Анании,/ вопия своему Началопастырю Христу:/ отцев наших Боже, благословен еси.

Да славит тя, ученика Божия, Анание, и иерарха верна,/ и свидетеля Божественных страдании,/ возглашающи, честная Церковь Христова:/ отцев наших Боже, благословен еси.

Не смерти боязнию, но любовию паствы скрываяся,/ волка, якоже агнца, зря укротившася, Анания зовяше:/ отцев наших Боже, благословен еси.

Богородичен: От девственных ложесн воплощся, явился еси, Христе, на спасение наше./ Темже Твою Матерь ведяще Богородицу, православно зовем:/ отцев наших Боже, благословен еси.

Ин

Ирмос: Отроцы в Вавилоне/ пещнаго пламене не убояшася,/ но посреде пламене ввержени, орошаеми, пояху:/ благословен еси, Господи, Боже отец наших.

Богородицу Марию Богомудра имел еси Учителя,/ вразумляющую тя, и научающую, и пети повелевающую:/ благословен еси, Господи, Боже отец наших.

Возсиял еси в мире, яко светлейшее солнце, Романе Богомудре,/ и светло просвещая верою зовущия:/ благословен еси, Господи, Боже отец наших.

Твоих глагол вещание вселенную исполни/ и красно песнопети Христу человеки научи:/ благословен еси, Господи, Боже отец наших.

Богородичен: Ныне блажат Тя вси роди человечестии, Богородице Чистая,/ якоже прорекла еси,/ и верою славят:/ благословен, Пречистая, Плод чрева Твоего.

Песнь 8.

Ирмос: Седмерицею пещь/ халдейский мучитель,/ Богочестивым неистовно разжже,/ силою же лучшею спасены сия видев,/ Творцу и Избавителю вопияше:/ отроцы, благословите,/ священницы, воспойте,/ людие, превозносите во вся веки.

Странно слышати, мняше Анания славный,/ от восхитительныя губителя стада Твоего силы, Владыко,/ паче слова пременение к пастырскому чину./ Тем играя, вопияше:/ отроцы, благословите, священницы, воспойте,людие, превозносите во вся веки.

Да радуется днесь и да играет духом всеславный и блаженный град твой,/ твоего благополучив заступления, славне,/ и, благодаря Спаса, да вопиет:/ отроцы, благословите, священницы, воспойте, людие, превозносите во вся веки.

Животворящим повелением, Анание пречестне,/ светотворивую Виденнаго силу Савлу проповедал еси/ и отразил еси ослепление, врачевственныя твоя возложив длани,/ стрелы змииныя исторгл еси, яко чешуи, вопия:/ превозносите Христа во веки.

Троичен: Трисветлое Божество, Единственную сияющую Зарю,/ от Единаго Триипостаснаго Естества, Родителя Безначальна,/ Единоестественно же Слово Отчее и сцарствующаго Единосущнаго Духа,/ отроцы,благословите, священницы, воспойте,/ людие, превозносите во вся веки.

Богородичен: В нуждах спасающая и тепле предстательствующая/ всем сущим в печали, Всесвятая Владычице,/ умилосердися, спаси мя и люте падша воздвигни,/ руку помощи прежде конца подающи, да не нощь мя смертная обымет спяща;/ да Тя по долгу славлю во веки.

Ин

Ирмос: За законы отеческия/ блаженнии в Вавилоне юноши, предбедствующе,/ царюющаго оплеваша повеление безумное,/ и, совокуплени, имже не сваришася огнем,/ Державствующему достойную воспеваху песнь:/ Господа пойте дела/ и превозносите во вся веки.

Всю мира красоту, и сладость, и славу оттряс,/ душу твою вперил еси к Вышним ликом, к тамошним славам и светлостям, мудре,/ к добротам неизреченным, к пребыванием тамошним, к свету Богоначалия, зовя:/ Тя превозносим, Христе, во веки.

Божественным желанием распаляемь,/ восхождения положил еси в сердцы твоем и безплотное во плоти житие стяжал еси./ Ангельским чином подобяся, мудре,/ тамо сущая возлюбил еси в мире песнопения, верою, Романе, взывая:/ Тя превозносим, Христе, во веки.

Высоковещанием Божественных твоих и сладчайших словес, блаженнейше Романе,/ всяк помысл веселиши человеков и услаждаеши, якоже некий питатель богатотворный,/ и просвещаеши светло и научаеши вопити:/Господа пойте дела и превозносите во вся веки.

Богородичен: Равнобожием прельстив мя, человекоубийца, змий лукавнейший,/ яко пленника, исхити сладости райския,/ но Владыка, естеством Сын Божий, воплощся, прииде от Девы Марии, и взят мя на высоту, обожив:/ егоже превозносим во вся веки.

Песнь 9.

Ирмос: Тя, Неискусобрачную Матерь Бога Вышняго,/ Тя, паче ума рождшую словом воистину Бога,/ вышшую Пречистых сил,/ немолчными славословлении величаем.

Разрушил еси, всехвальне, тьму неведения;/ Свет же истинный возсиял еси Дамаску Триипостасный:/ но яко чадолюбивый отец и любовный пастыреначальник в Православней вере того сохрани.

Сие летное совершающе торжество,/ приидите светозарно сияюще душевным достоинством:/ Троицы служителя же и проповедника Анании трисиянную добродетель воспоим.

О паче человеча достоинства твоего, блаженне Анание,/ яко ученик бо возлюблен был еси, яко пастырь почил еси,/ и яко страдалец Христу спрославился еси, венцы мученически украшаем.

Богородичен: Пречистая, Всенепорочная, сосуде благовония,/ испроси у Христа, егоже родила еси,/ даровати воинству нашему на враги победу и от работнаго ига дати ослабу людем Твоим:/ Тя бо непрестанно величаем.

Ин

Ирмос: Безсеменнаго зачатия/ рождество несказанное,/ Матере Безмужныя нетленен Плод:/ Божие бо рождение обновляет естества./ Темже Тя вси роди,/ яко Богоневестную Матерь,/ православно величаем.

Горнейшим, славне, ликом совокупился еси безплотным,/ идеже неизреченная пребывает радость и всегдашнее наслаждение,/ идеже оный Богоначалия свет есть и веселие,/ идеже неизглаголанная слава, блаженнейше.

С праведными внутрь Божественныя славы вселився, зриши красоту неизреченную оную,/ зриши сладость некончаемую, зриши доброты Небесныя, истинно желанныя, мудре,/ видиши патриархов лики, Романе славне.

Твою светоносную память верно совершающия/ от бед избави молитвами твоими, Богомудре,/ и от всякаго вреда, Романе, и скорби чуждаго/ и Небесныя славы получити сподоби и Царствия Горняго, блаженнейше.

Богородичен: От древняго падения человеческий род первозданнаго бысть тленен, Дево Богородице,/ и порабощен страстьми греховными,/ но из Тебе рождейся Преблагий Бог Своим благоутробием того воззва.

Светилен Октоиха. Слава, апостола.

Подобен: Жены, услышите:

Дамаск, апостоле, ныне о тебе хвалится,/ емуже упространил еси крепость мучением, Анание,/ учитель быв Христа гонящему, яко ученик нарочит Христа гонимаго,/ к Немуже о нас молися.

И ныне, Богородичен:

О таинств Твоих, о чудес Твоих!/ Како по рождестве Дева пребыла еси, якоже прежде рождества;/ како Бога вместила еси, нигдеже Вместимаго;/ но воистину несказанна Твоя суть вся, Благословенная Дево Мати, Марие.

На стиховне Октоиха.

Слава, апостола, глас 8. Анатолиево:

Учениче Спасов, иерарше славне,/ славо мучеников, Анание,/ светильниче светлейший, наш же градодержче,/ прилежно молися избавити стадо твое от бед/ и спасти души наша.

И ныне, Богородичен или Крестобогородичен.

Подобен: О преславнаго чудесе:

Тя видящи пригвождаема на Кресте, Иисусе, и страсти приемлюща волею,/ Дева и Мати Твоя, Владыко,/ увы Мне, вопияше, Чадо Сладкое,/ раны неправедно како терпиши,/ Врачу, исцеливый человеческое неможение/ и от тли всех избавивый милосердием Твоим.

На Литургии

Блаженны гласа на 4 и апостола Песнь 3., на 4. Прокимен апостола, глас 8: Во всю землю изыде вещание их: Стих: Небеса поведают славу Божию: Апостол Деяний, зачало 21, от полу. Аллилуия, глас 1. Исповедят Небеса чудеса Твоя, Господи. Стих: Бог прославляем в совете святых. Евангелие от Луки, зачало 51. Слушаяй вас: Причастен: Во всю землю:

Источник: Осанна

На велицей вечерне

Стихиры на Господи воззвах, глас 4:

Егда Божественное звание, прииде на тя, / богомудре отче Варсонофие,/ тогда вся мирская мудрования оставив,/ Вышних взыскуя,/ невозвратно Христу последовал еси,/ крест священничества на рамо взем,/ вкупе со иными священномучениками,/ яко верный пастырь стада Христова,/ в служении и окормлении паствы ревностно подвизался еси./ Темже ныне достойно со святыми наставники твоими/ Троицу воспеваеши присно,/ Юже моли даровати спасение верою чтущим тя.

Егда Божественное рачение найде на тя,/ блаженне отче Варсонофие,/ тогда Святым Духом движимь,/ Христа пред отступники исповедал еси,/ заточение, изгнание и болезни многия претерпел еси,/ бодрость духа и сострадание к ближним во всяких обстояниях сохраняя,/ к полку новомучеников и исповедников волею сопричислился еси,/ с нимиже ныне вкупе пред Лицем Божиим предстоиши во славе / и молиши даровати Православныя веры утверждение/ и душам нашим спасение.

Егда Божественное желание достиже тя,/ преславне отче Варсонофие,/ тогда вся мирская оставив,/ неведущим Бога проповедал еси,/ от тьмы тех к свету богоразумия наставляя,/ клевету и иныя козни вражеския поправше,/ молитвами и поучении храмы душевныя неустанно созидаше./ Темже и венцем небесным / Христос, Емуже неленостно поработал еси, венча тя;/ егоже моли спасти и просветити души наша.

Слава, глас 6:

Днесь созывает нас преподобнаго отца и исповедника торжество,/ приидите убо, празднолюбцы,/ светло празднуем память его, глаголюще:/ радуйся, светильниче многосветлый,/ возводя ко Христу множества просвещенных тобою;/ радуйся, града Херсона и всея земли нашея похвало и удобрение,/ и всех верных благоутишное пристанище и крепосте;/ радуйся за Христа претерпети узы и раны сподобивыйся,/ с Нимже ныне присно пребываеши в радости,/ егоже моли, отче благомудре Варсонофие,/ избавити ны от видимых и невидимых враг / и спасти души наша.

И ныне, глас 6:

Кто Тебе не ублажит, Пресвятая Дево,/ кто ли не воспоет Твоего пречистаго Рождества?/ Безлетно бо от Отца возсиявый Сын Единородный,/ Той же от Тебе, Чистая, пройде,/ неизреченно воплощься:/ естеством Бог Сый,/ и естеством быв Человек нас ради;/ не во двою лицу разделяемый,/ но во двою естеству/ неслитно познаваемый./ Того моли, Чистая Всеблаженная,/ помиловатися душам нашим.

Стихиры на литии: Глас 1:

Силе благодати от уст твоих исходящей,/ вси внимающии словесем твоим дивляхуся,/ и тобою проповедуемому Христу от души вероваша,/ егоже моли, премудре отче Варсонофие,/ спастися всем нам, священное твое торжество совершающим.

Божие величие богодухновенно воспев,/ к познанию во Святей Троице Единаго Бога многих богоотступных сынов привел еси,/ потрудитися над преображением своея души понуждая:/ аще вся силы направити ко очищению сердца потщитеся, – рече,/ – чада Божия возлюбленнии наречетеся./ Темже и мы, духовныя чада твоя/ яко наставника благочестия, любовию воспевающе,/ со умилением молим тя:/ научи ны выну пред лицем Божиим ходити.

Слава, глас 6:

Наста, исповедниче Варсонофие,/ всечестное и преславное торжество / в прославлении твоем со всеми святыми Русские земли./ И ныне вкупе с ними молися ко Господу,/ спастися душам нашим.

И ныне, глас тойже:

Предвозвествует Гедеон зачатие,/ и сказует Давид рождество Твое, Богородице:/ сниде бо, яко дождь на руно,/ Слово во чрево Твое,/ и прозябла еси безсеменне,/ Земле святая,/ мира спасение Христа Бога нашего, Благодатная.

Стихиры на стиховне, глас 8:

Даждь ми светозарную благодать,/ от Божественнаго свыше промышления,/ избежати страстей омрачения/ и пети усердно твоего, преподобне отче и исповедниче,/ жития красная исправления.

Стих: Честна пред Господем/ смерть преподобных Его.

Апостольских деянияй ревнителю,/ землю Херсонскую яко жребий приемши,/ святым крещением людие многия/ из тьмы и бездны безбожия/ к свету спасительному извел еси.

Стих: Блажен муж, бояйся Господа,/ в заповедех Его восхощет зело.

Послушания усердный подвижник,/ выю свою подконив окормлению наставников своих,/ духовне тя породивших,/ и восприят в помощь на супротивника глубочайшее смирение,/ имже разруши козни вражия:/ ничтоже бо может враг на смиренныя.

Слава, глас 4:

Взыскующих Христа окормитель и кормчий,/ столп Православия и веры поборник,/ ты, старче богомудре Варсонофие,/ апостольски взывал еси:/ ничтоже ны разлучит от любве Божия;/ худшее, братие, покорим лучшему/ и плоть поработим духу./ Темже явися светильник Церкви,/ не под спудом, но на свещнице поставлен,/ да прославят Бога вси видящии дела твоя.

И ныне, глас тойже:

Ни слово, ни разум,/ ни всякая мудрость человеческая/ Твое не возмогут рождество разумети/ и воспети достойно,/ но страхом приклоншеся/ ужасаемся величию Твоему, Непорочная.

Тропарь, глас 8:

Православия ревнителю, / ересей и расколов богомудрый обличителю, / Церкви Святыя изящное украшение, / притекающим к тебе верный предстателю и заступниче,/ преподобне отче наш, Варсонофие, / молися ко Господу Спасу нашему / землю Херсонскую и всю страну нашу от всяких бед и зол избавити, / умирити мир и спасти душы наша.

Ин тропарь, глас 2:

В молитвах теплый заступниче / и просящим скорый послушателю,/ отче исповедниче Варсонофие,/ приими моление наше, / и Христа Бога моли помиловати нас,/ тя во святых прославляющих.

На утрени

По 1 стихословии седален:

В духе Евангельских заповедей воспитав свою душу, явился еси делателем неленостным на ниве Христовой, избранниче Божий, преподобне отче Варсонофие, все упование на Единаго Бога возложив, благодатию тебе данною преуспел еси во учении и доброделании.

Слава и ныне, Богородичен:

Обновила еси, Чистая, божественным рождеством Твоим истлевшее страстьми земнородных мертвенное естество: и воздвигла еси вся от смерти к жизни нетления. Темже Тя по долгу блажим вси, Дево Препрославленная, якоже прорекла еси.

По 2 стихословии седален:

Мужественное показал еси души твоея мудрование, человеческое разумение оставль, Высшей Премудрости ум, волю и чувство покорил еси; темже вшедше в Небесная, просвети, отче, благодарным сердцем тя восхваляющия.

Слава и ныне, Богородичен:

Ужасно чудо зачатия, и несказанен образ рождества в Тебе познася Приснодево Чистая, ужасает мой ум, и удивляет помышления; слава Твоя, Богородице, во всех простреся, ко спасению душ наших.

По полиелеи седален:

Евангельское учение о Царствии Божии, иже внутрь души человечестей должно утвердитися, неразумеющим ясно изъяснил еси, стрелами глагол твоих поражая ленивыя и теплохладныя; воздвигни и ны подвизатися во брани невидимой.

Слава и ныне, Богородичен:

Настави ны на путь покаяния, уклоняющияся присно к злым беспутием, и преблагаго прогневляющия Господа, неискусобрачная Благословенная Марие, прибежище отчаянных человеков, Божие обиталище.

Прокимен: Честна пред Господем/ смерть преподобных его.

Стих: Что воздам Господеви о всех, яже воздаде ми.

Евангелие: от Матфея. зач. 43

По 50 псалме стихира, глас 6:

Преподобне отче,/ во всю землю изыде вещание исправлений твоих:/ темже на небесех обрел еси мзду трудов твоих,/ демонская разорил еси полчища,/ и ангельския достигл еси чины,/ ихже житию непорочно поревновал еси./ Дерзновение имея ко Христу Богу,/ мир испроси душам нашим.

Канон, глас 8.

Песнь 1.

Ирмос: Воду прошед яко сушу,/ и египетскаго зла избежав,/ израильтянин вопияше:/ Избавителю и Богу нашему поим.

Вразуми мя от Божественнаго свыше промышления воспети тя достойно, преподобне отче Варсонофие, исповедниче.

Приклоншеся Христовым Божественным законом, сладостей стремления от млада отвратившеся, всякую добродетель всеблагоговейно, яко едину, исправил еси.

Всем сердцем притекл еси Христу, изначала спасительный узкий путь избравше, и пустынных отец житию поревновавше, чисте совершающе Единаго Учителя Божественныя заповеди.

Богородичен: Светлый Тя и святый храм Владыки всех, Богоотроковице, с лики безплотных воспеваю радостно, без истления Бога Слово Рождшую.

Песнь 3.

Ирмос: Ты еси утверждение притекающих к Тебе, Господи,/ Ты еси свет омраченных,/ и поет Тя дух мой.

Сияние святости преподобных отец, яко свет фаворский пронзи сердце твое огнем Божественным, егоже потщався не угасити, но на свещнице возвыси, даже и дальния страны изгнания свет той достигл еси.

Вслед Христа последовал еси радующеся, носящи крест свой на раме, исповедниче прехвальне; мучителей бо не убоявся, силою Креста укрепляемь.

Землю Херсонскую яко апостольский жребий приемши, Христа проповеданием, неустанною молитвою и подвиги исповедническими собор новомучеников и исповедников Русских светолепно украсил еси.

Богородичен: Надеждо и Предстательство Тебе поющих, яко Владычица Чистая, Пречистая Богородице Дево, едина Всепетая, моли во еже спастися нам.

Седален, глас 8:

Молитвами твоими, отче преподобноисповедниче Варсонофие, возстави ум и волю, помраченнии страстьми, да в разум приидем и завет со Христом нелицемерным покаянием обновим.

Богородичен: Непостижимаго Бога, Сына и Слово, несказанно паче ума Рождшая, моли, Заступнице наша, Богородице, согрешений дати нам прежде конца прощение и Царствия Небеснаго достигнути.

Песнь 4.

Ирмос: Услышах, Господи,/ смотрения Твоего таинство,/ разумех дела Твоя,/ и прославих Твое Божество.

Яко соние, яко цвет, время жития течет, что всуе мятемся? – вопрошаеши отче, ко обновлению души силою покаяния призывающе.

Востаните, трезвитеся, близ при дверех Судия есть, – взывал еси, старче богомудрый, ко отвращающимся от благочестия, – да не изыдите осуждени в муку вечную.

Последующе наставлению твоему, отче, смирением потщимся изменити душу, – истинное бо смирение сетей свободно лукаваго.

Богородичен: Ни слово, ни разум, ни мудрость человеческая не возмогут Твое рождество разумети, Непорочная, но спасаемии Тобою радостно вопием: слава Воплощшемуся от Тебе.

Песнь 5.

Ирмос: Утренююще вопием Ти/, Господи, спаси ны:/ Ты бо еси Бог наш,/ разве Тебе иного не вемы.

Рассеяннаго жития моего губительное течение исправи, отче богомудре Варсонофие, покаяния бо и трезвения ты еси таинник и делатель на ниве Христове преизрядный.

Имея тя помощника, отче, неленностно потрудимся, братие, приуготовим ся вечности, законы Царствия Небеснаго: Богообщения, любви и чистоты – молитвою, незлобием и целомудрием, в сердце утвердим.

Преподобне Варсонофие, отеческая похвало, не престай моляся, предстоя Троице Пребожественней, даровати разум, и силу зрети, и побеждати страсти душевныя, предстателя тя божественнаго призывающим.

Богородичен: Неизмерна глубина любве и милосердия Твоего, Мати Божия и человеческаго рода Заступнице верная, не остави до конца в бездне прельщений погибающих, ко пристанищу спасительному таинств церковных направи.

Песнь 6.

Ирмос: Молитву пролию ко Господу,/ и Тому возвещу печали моя,/ яко зол душа моя исполнися,/ и живот мой аду приближися,/ и молюся, яко Иона:/ от тли, Боже, возведи мя.

Содержим аз есмь бурею и треволнением согрешений, но сам мя, наставниче, якоже и паству твою в бедственныя времена упасл еси, силою молитв твоих ко пристанищу Божественнаго покаяния возведи.

Обратися, покайся, открый сокровенная, глаголи Богу, вся ведущему, тайная твоя, да подаст ти силу победити плотския страсти, – тако заповеда творити старец богомудрый.

Егоже возлюбил еси, егоже возжелел еси, егоже ради гонения претерпел еси, исповедниче отче Варсонофие, моли ныне Христа от незаходимых глубин греха и отчаяния нас избавити.

Богородичен: Пречистая Владычице, Богородительнице, Надеждо к Тебе притекающих и Пристанище сущих в бури, Милостиваго Создателя и Сына Твоего умилостиви молитвами Твоими.

Кондак, глас 4:

Яко пресветлая звезда/ в земли Херсонстей возсиял еси, преподобне, / и Богом укрепляемь,/ узы и страдания за веру Православную претерпел еси. / Темже усердно молимся тебе: / научи нас, отче, твоему богоразумию / и уврачуй недуги наша душевныя и телесныя, / да во умилении зовем ти: / радуйся, исповедниче Христов, преподобне отче наш Варсонофие.

Икос:

Возлюбив, преподобне, Христовы Божественныя заповеди, и возненавидев мира сего наслаждение, пришел еси усердно к Тому, и был еси светильник, просвещая концы блистанием духовным; тем, припадая, молим тя: просвети наши очи душевныя, воспети твоя подвиги, пощение, и бдение, и слезы, болезни и измождение тела, блаженныя ради будущия жизни, еяже ныне наслаждаешися, преподобне отче наш Варсонофие.

Ин кондак, глас 8:

Огнь святости отцев преподобных преобрази душу твою,/ образ жизни духовныя от них восприял еси,/ и потрудился еси, возводя вся к Божественней высоте./ Яко злато в горниле страданий очищен,/ земли Херсонския украшение явился еси;/ темже молим тя:/ молитвами твоими от всяких ны бед спасай, да зовем ти:/ радуйся, преподобне отче Варсонофие богомудре.

Песнь 7.

Ирмос: От Иудеи дошедше отроцы/, в Вавилоне иногда,/ верою Троическою пламень пещный попраша, поюще:/ отцев Боже, благословен еси.

Яко дерзновение имый ко Господу, исповедниче и преподобне, разрешение от уз лицемерия, тщеславия, самомнения помози обрести молитвами твоими, да сокрушенным сердцем воспоим: благословен еси, Господи, Боже отец наших.

Яже в мире мужественно поправше временная вся, бодрствовал еси в молитве, богоносне отче, ныне же ликуеши с воинствы Ангельскими, воспевающе: благословен еси, Господи, Боже отец наших.

Добродетельною твоею силою, верою крепкою, терпением многим, светоносне отче, приятелище был еси Святаго Духа, вопиюще сице: благословен еси, Господи, Боже отец наших.

Богородичен: Яко роса найде на Тя Дух Свят, и не опали чрева Твоего, Пречистая, огнь Божества, и роди Сына – всех Бога, Емуже поем: благословен еси, Господи, Боже отец наших.

Песнь 8.

Ирмос: Богоглаголивии отроцы в пещи,/ со огнем пламень попирающе пояху:/ благословите дела Господня Господа.

Сиянием добродетелей озаривше ум, Варсонофие славне, благоугодну жертву Богови – словесное служение принесл еси, благодарно поя: благословите вся дела Господня Господа.

Скорбною и тесною шествовав стезею, Небесныя достигл еси жизни нескончаемыя, идеже Свет безконечный есть Христос, со Ангелы поеши: благословите вся дела Господня Господа.

Буди, отче честный, заступник непобедим, избави от отчаяния и малодушия, укрепи в преданности воле Божией мольбами твоими ко Господу, поющих: благословите вся дела Господня Господа.

Богородичен: Поем Тя, величаем Тя, покланяемся Ти, Пречистая, яко Безначальныя Троицы породила еси Единаго Христа Бога, темже отверзла еси нам, сущим на земли, Небесная.

Песнь 9.

Ирмос: Устрашися всяк слух/ неизреченна Божия снисхождения,/ яко Вышний волею сниде даже и до плоти,/ от Девическаго чрева быв человек:/ темже Пречистую Богородицу, вернии, величаем.

Виждь скорби душевныя, милосердый пастырю, совесть оскверненну и стенание сердца, виждь самомнением лукавым утесненную душу и воздвигни ю ко исправлению ходатайствы твоими ко Господу.

Славы текущия и тленныя возгнушався, богомудре, славу и жизнь наследовал еси блаженную; Христа моли сохранити верность Ему и нам, совершающим ныне всесвятую память твою.

Радости исполни сердца наша, богоблаженне отче, во еже пети и славити прославльшаго тя Христа Жизнодавца, егоже непрестанно величаем.

Богородичен: Радуйся, Богоприятная утробо, радуйся, Престоле Господень, радуйся, Мати жизни нашея, Тя непрестанно величаем.

Светилен:

Благодатию, дарованною тебе, многия ко Христу привел еси, новомучеников всесветлому лику ревнующи, Христов избраниче Варсонофие, землю Херсонскую Божественным словом возделавше, семена веры насадив, приносиши плоды Ему и до ныне.

Богородичен: Радуйся, Престоле огнезрачный, радуйся, светильниче свещеносный, радуйся, горо освященная, ковчеже Жизни, Святая Святых превысшая.

На хвалитех, глас 5:

Во всяком обстоянии, болезни и печали/ предавати себе в руце Господни заповедал еси,/ и призывати Заступницу усердную со угодники Божии;/ ныне же тя прославляюще в лице святых,/ отче преподобне Варсонофие, молим:/ простри руку помощи всем просящим ю.

Укрепляйте души ваша,/ за скорби благодаряще Златоустаго гласом,/ – и действенно познаете силу в немощи совершающуюся,/ – глаголы сими и молитвою твоею крепкою/ изнемогающих в терпении возставлял еси,/ любовию движимь, старче.

Неизбежный путь скорбей пройдем с верою несумненною/ и преданностию Спасителю нашему,/ молитвенника тя имея, светоносне отче, Варсонофие, исповедниче,/ ведуще, яко претерпевши Голгофу,/ достигнем и светлыя некончаемыя радости Воскресения.

Слава: глас 8:

Приидите вси вернии,/ восхвалим единаго от собора новоисповедников Русския земли, / сквозе огнь гонений пронесшаго любовь Христову,/ силою духа превозмогшаго немощи плоти,/ пастыря мудраго и старца прозорливаго,/ проповедника, молитвенника и чудотворца,/ благодаряще Всесильнаго Бога,/ даровавшаго нам, якоже и в древняя времена,/ сего несокрушимаго ревнителя Православия,/ надежнаго защитника, и крепкаго предстателя, и помощника: / святаго Варсонофия преподобноисповедника.

И ныне, глас тойже:

Владычице, приими молитвы раб Твоих,/ и избави нас/ от всякия нужды и печали.

На Литургии

Прокимен: Восхвалятся преподобнии во славе/ и возрадуются на ложах своих.

Стих: Воспойте Господеви песнь нову, хваление Его в церкви преподобных.

Аллилуиа, гл.6: Блажен муж бояйся Господа, в заповедех Его восхощет зело.

Стих: Сильно на земли будет семя его.

Апостол: Еф. зач.233

Евангелие: Лк. зач.64

Причастен:

Радуйтеся, праведнии, о Господе,/ правым подобает похвала./ Аллилуиа

Источник: Православная Херсонщина

Месяца октября в 4-й день

Всех святых, в земли Казанстей просиявших

На малей вечерни

Поем службу святым Гурию и Варсонофию ради обретения их честных мощей.

На Господи, воззвах: стихиры святых, глас 1.

Подобен: Небесных чинов:

Взясте на рамо крест Христов/ и распястеся миру, преподобнии,/ и последовасте стопам создавшаго от не сущих вся, Божия Слова./ егоже молите, да приимем грехов прощение/ и наследницы будем жизни вечныя.

Явистеся сокровище добродетелей/ и презресте вся, яже в житии красная,/ Христовою любовию распалаеми,/ ищуще яже Богу угодная./ И Того ради бысте жителие Царства Небеснаго,/ темже о нас молите,/ да будем и мы тому сопричастницы.

Безстрастия бывше краснии сосуди, отцы преблаженнии/ и чудес источницы,/ монашествующих столпи крепцыи, демонов прогонителие / и страстей целителие./ Да почтутся песньми/ наставницы наши премудрии/ и молят Христа, да спасет души наша.

Слава, глас 6:

Кто доволен похвалити таковыя святители,/ возсиявшия напоследок лет,/ благодатию бо Святаго Духа/ чудес исцелений дар приемше от Бога/ и своих телес нетление,/ нам же у Христа просят грехов прощения/ и велия милости.

И ныне, Богородичен, глас тойже:

Мати Божия Пречистая,/ образ Свой, яко дар пресвят земли Казанстей давшая/ и тем многия исповедники Сына и Бога Твоего укрепившая,/ Заступнице Усердная, люди Твоя не остави.

На стиховне стихиры, глас 2.

Подобен: Доме Евфрафов:

Земле Русская,/ граде святый,/ украшай твой дом,/ в немже Божественный/ велий сонм святых прослави.

Стих: Господи, Господь наш,/ яко чудно Имя Твое по всей земли.

Земле Русская,/ красуйся и ликуй,/ се бо чада твоя/ Престолу Владычню/ во славе предстоят, радующеся.

Стих: Святым, иже суть на земли Его,/ удиви Господь вся хотения Своя в них.

Соборе святых русских,/ полче Божественный,/ молитеся ко Господу/ о земнем отечестве вашем/ и о почитающих вас любовию.

Слава, глас и подобен тойже:

Новый доме Евфрафов,/ уделе избранный,/ Русь Святая,/ храни веру Православную,/ в нейже тебе утверждение.

И ныне, Богородичен, глас тойже:

Аще и горение велие града Казани/ яви нам зрак лика Твоего, Дево Пречистая,/ обаче Заступница Усердная земли нашея явилася еси,/ Мати Божия, христиан похвало.

Тропарь святых, глас 4: Днесь, яко солнце пресветлое: писан на велицей вечерни

На велицей вечерни

Блажен муж: 1-й антифон. На Господи, воззвах: стихиры святых на 8, глас 1:

Подобен: О, дивное чудо:

О, дивное чудо!/ Велие торжество явися земли нашей:/ собор святых прославляется/ и предстателие ко Христу сии бывают./ Веселися, граде Казань,/ имея в себе лучи сияющия, святыя твоя./ Возопиим, вернии:/ радуйтеся, заступницы наши,/ вы бо молите спастися верою вас почитающим.

Твое славим торжество, святителю Гурие,/ свещами бо златозарными град твой украшается/ и песньми духовными днесь исполняется./ Радуются людие земли Казанския,/ воспевающе днесь собор святых своих/ и, светолепно праздник совершающе,/ со архангелы и ангелы ликовствуют:/ радуйтеся, заступницы наши,/ похвало и утверждение,/ молитеся за ны, спастися душам нашим.

Дивны Твоя тайны, Богородице,/ явилася eси, Владычице, во граде нашем/ и образом Твоим радость возсия нам./ Припадают Тебе ныне наши сродницы:/ святителие, преподобнии и праведнии,/ исповедницы и мученицы./ Возвеселимся, вернии, днесь и воспоим:/ радуйся, Заступнице наша, христианом Похвало и Утверждение,/ молися за ны, спастися душам нашим.

Ины стихиры, глас 2.

Подобен: Киими похвальными:

Киими похвальными венцы/ восхвалим земли Казанския первыя просветители/ предивныя Гурия, Варсонофия и Германа,/ предстатели и заступники наша,/ семен спасительнаго учения сеятели равноапостольныя/ Христова Евангелиа путевожди истинныя?/ ихже ради прежде темный град озарися светом богопознания/ и Христос прославися,/ имеяй велию милость.

Киими песненными словесы/ прославим святители и мученики земли нашея,/ Ермогена, Патриарха земли Русския,/ Кирилла, Анатолия, Иоасафа и Амвросия,/ исповедники веры Православныя,/ архиерейства жезлы добрыя преизящныя,/ мучеников крепкия поборники,/ яко житием своим Христу угодиша,/ имеющему велию милость?

Киими похвальными венцы/ увязем мученики наша,/ Авраамия, Иоанна, Стефана и Петра,/ прежде просвещения града Казани первыя лучи,/ четверица мученическая преславная,/ Небеснаго Царствия доблия гражданы,/ ихже в Своя обители Христос прият,/ имеяй велию милость?

Киими песненными добротами/ воспоим новомученики и исповедники наша,/ Димитрия, Филарета, Михаила и Павла,/ во священницех Христу потрудившияся,/ таже преподобномученики преславныя/ во обителех подвизавшияся?/ Благоуханнии суть цвети вертограда Небеснаго,/ ихже насади Христос Бог наш,/ имеяй велию милость.

Киими духовными песньми/ похвалим Гавриила и Александра,/ служители Господни изрядныя,/ монахом наставники и ангелом собеседники,/ во бранех духовных человеком поборники,/ града Казани светлая удобрения,/ Пастыреначальника Христа подражатели,/ подающаго нам велию милость?

Слава, глас 8:

Да прославится днесь собор святых,/ в земли Казанстей Богу угодивших:/ славнии святителие и просветителие,/ такожде священномученицы и исповедницы,/ кровь свою за Христа излившии,/ еще же преподобнии и праведнии,/ именованнии и неименованнии,/ покровом Матере Божия, Заступницы Усердныя/ в земли сей утвержденнии.

И ныне, Богородичен, глас 8: Царь Небесный:

Вход. Прокимен дне. И чтения три:

1. Пророчества Исаиина чтение (Гл. 43, ст. 9–14): Тако глаголет Господь: вси язы́цы собрашася вкупе:

2. Премудрости Соломоновы чтение (Гл. 3, ст. 1–9): Праведных души в руце Божией, и не прикоснется их мука:

3. Премудрости Соломоновы чтение (Гл. 5 ст.15 – гл. 6, ст. 3): Праведницы во веки живут:

На литии стихиры, глас 2:

Припадем с любовию к преславным святителем Господним,/ Гурию, Варсонофию и Герману,/ первым просветителем земли Казанския,/ с нимиже воспоим пречуднаго Ермогена,/ святителя, исповедника и Патриарха Церкве Русския.

Помолимся усердно страстотерпцем Казанским,/ святым мучеником Авраамию, Иоанну, Стефану и Петру,/ Имя Христово дерзновенно исповедавшим,/ таже воспоим собор новомученик и исповедник,/ кровию своею землю оросивших / и заступники наши усердныя явльшихся.

Воспоим и почудимся подвигом же, слезам и молитвам,/ яже Гавриил и Александр преславнии,/ с преподобными отцы Зилантовыя и Раифския обители Богу принесоша,/ иже плод духовный в земли сей возрастиша.

Слава, глас 6:

Собор святых земли Казанския усердно взывает ко Господу,/ да сохранит Спас мира Христос народ православный,/ во всех концех вселенныя/ молитву о спасении приносящий.

И ныне, Богородичен, глас тойже:

Прославим, вернии, Обрадованную Богородицу,/ се бо во устех наших имамы всегда святое и благословенное имя Ея,/ непрестанно прибегающе к пречистей Ея и цельбоносней иконе:/ Тою бо обретаем, яже на земли вся благая и полезная,/ и от запинаний сущих на воздусе демонов избавляемся,/ яко Мати, рождшая всех Творца,/ спасает от бед души наша.

Молитвы на литии:

Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя: молитвами Всепречистыя Владычицы нашея Богородицы и Приснодевы Марии; силою Честнаго и Животворящаго Креста; предстательствы честных Небесных Сил безплотных; честнаго славнаго Пророка, Предтечи и Крестителя Иоанна; святых славных и всехвальных апостол; иже во святых отец наших и вселенских великих учителей и святителей, Василия Великаго, Григория Богослова и Иоанна Златоустаго; иже во святых отца нашего Николая, архиепископа Мир Ликийских, Чудотворца; святых равноапостольных Мефодия и Кирилла, учителей Словенских, святых равноапостольных великаго князя Владимира и великия княгини Ольги; иже во святых отец наших, святителя Михаила, перваго митрополита Киевскаго, первосвятителей Московских и всея Руси, Петра, Алексия, Ионы, Макария, Филиппа, Иова и Тихона; святых, в земли Казанстей просиявших:

Святителей Гурия, Варсонофия и Германа Казанских чудотворцев, Филарета, митрополита Киевскаго, святых священномучеников: Ермогена, Патриарха Московскаго и всея Руси чудотворца, Кирилла, митрополита Казанскаго, Анатолия, митрополита Одесскаго, Иоасафа, епископа Чистопольскаго, Амвросия, епископа Свияжскаго, Алексия, архиепископа Омскаго, Никиты, епископа Орехово-Зуевскаго; Димитрия и Филарета, пресвитеров Казанских, Михаила, пресвитера Чистопольскаго, Павла, пресвитера Елабужскаго и чад его: Бориса, Григория и Симеона; преподобных и богоносных отец наших: Макария Желтоводскаго, Свияжскаго чудотворца и Гавриила, старца Седмиезернаго, святых преподобномучеников Зилантовых: Сергия, Лаврентия, Серафима, Феодосия, Леонтия, Стефана, Георгия, Сергия, Илариона и Иоанна, преподобномучеников Раифских: Иосифа, Сергия, Антония, Варлаама, Иова и Петра, святыя преподобномученицы Маргариты, игумении Мензелинския, преподобноисповедника Александра Седмиезернаго, святых славных и добропобедных мучеников Авраамия Болгарскаго, Иоанна, Стефана и Петра Казанских; святых благоверных князей Феодора, Давида и Константина Ярославских чудотворцев, и всех прочих святых, в земли Казанстей просиявших, ихже и память ныне совершаем, святых праведных Богоотец Иоакима и Анны и всех святых, молим Тя, Многомилостиве Господи, услыши нас, грешных, молящихся Тебе, и помилуй нас.

Владыко Многомилостиве, Господи, Иисусе Христе, Боже наш, молитвами Всепречистыя Владычицы нашея Богородицы и Приснодевы Марии, силою Честнаго и Животворящаго Креста, предстательствы честных Небесных Сил безплотных, честнаго славнаго Пророка, Предтечи и Крестителя Иоанна, святых славных и всехвальных апостол, святых славных и добропобедных мучеников, преподобных и богоносных отец наших и всех святых, в земли Казанстей просиявших, ихже и память ныне совершаем, святых праведных Богоотец Иоакима и Анны и всех святых Твоих, благоприятну сотвори молитву нашу, даруй нам оставление прегрешений наших, покрый нас кровом крилу Твоею, отжени от нас всякаго врага и супостата, умири нашу жизнь, Господи, помилуй нас и мир Твой, и спаси души наша, яко Благ и Человеколюбец.

На стиховне стихиры, глас 5.

Подобен: Радуйся:

Радуйтеся, древнии святителие,/ святии сродницы наши,/ цвети духовнии земли Казанския,/ похвало наша и утверждение,/ тихое пристанище,/ сокровище церковное,/ стопы и словеса апостольская,/ жития бо ваша и многая чудеса/ прославляют прославльшаго вас Господа,/ егоже прилежно молите/ даровати душам нашим велию милость.

Стих: Честна пред Господем/ смерть преподобных Его.

Радуйтеся, светильницы многосветлии,/ священномученицы архипастыри и пастыри наша,/ врачеве духовнии,/ недугующим отрада и скорбящим утешение,/ обуреваемым пристанище немятежное,/ столпи церковнии, верных утверждение,/ за ны Христа Бога молите,/ даровати нам велию милость.

Стих: Блажен муж, бояйся Господа,/ в заповедех Его восхощет зело.

Радуйтеся, отцы преподобнии,/ заступницы наши и хранителие,/ Духа Святаго сосуди избраннии,/ земли Казанския утверждение,/ благочестия столпи непоколебимии,/ правило веры и образ благочестия./ Радуйтеся, новии исповедницы и мученицы,/ кровьми своими землю нашу озарившии/ и подвиги велиими обители освятившии./ Темже священную вашу память совершающим/ Христа Бога молите/ даровати велию милость.

Слава, глас 6:

Иже прежде темный,/ ныне же просвещенный град Казань радуется,/ имея в себе святыя заступники своя,/ лучезарныя молнии Господни,/ имиже агарянская лесть разрушися,/ сей край земли Русския просветися/ и мнози святии Господни явишася,/ славу Церкве Христовы возвещающе.

И ныне, Богородичен, глас тойже:

Да радуется обитель Твоя, Богородице,/ водное естество седми езер да ликовствует днесь,/ яко Твоего, Чистая, честнаго образа пришествием град наш спасается,/ раби Твои болезней исцеление приемлют/ и к Тебе, Чистая, взывают:/ радуйся, врачевство наше неоскудное,/ горьких недуг избавляющее;/ радуйся, скорбящим Божественное веселие,/ и Живоносный Источниче святыни;/ радуйся, многосветлая Звездо,/ иконою Твоею нас озаряющая;/ радуйся, основание Кизическия обители,/ Тобою бо, Всечистая, хвалимся и к Тебе в нуждах прибегаем.

На благословении хлебов тропарь святых, глас 4:

Днесь светло красуется земля Казанская,/ в ней бо память собора святых ея совершается/ и Церковь псалмы и песньми духовными украшается,/ прославляющи святители и благовестники своя,/ мученики, исповедники и чудотворцы,/ преподобныя мужи и жены,/ праведныя и вся святыя,/ иже купно с Богородицею Престолу Божию предстоят/ и молятся спастися людем страны нашея.

Вместо Богородице Дево: поем тропарь сей единожды:

Заступнице усердная,/ Мати Господа Вышняго,/ за всех молиши Сына Твоего, Христа Бога нашего,/ и всем твориши спастися/ в державный Твой покров прибегающим./ Всех нас заступи, о Госпоже Царице и Владычице,/ иже в напастех и в скорбех, и в болезнех, обремененных грехи многими,/ предстоящих и молящихся Тебе умиленною душею и сокрушенным сердцем,/ пред пречистым Твоим образом со слезами/ и невозвратно надежду имущих на Тя,/ избавления всех зол,/ всем полезная даруй/ и вся спаси, Богородице Дево:/ Ты бо еси Божественный Покров рабом Твоим.

На утрени

На Бог Господь: тропарь святых, глас 4: Днесь яко солнце пресветлое: дважды. Слава и ныне: Заступнице усердная:

По 1-м стихословии седален, глас 3:

Днесь Церкве Русския торжество и града нашего веселие, се бо паства Казанская святыми своими, яко златом нетленным, хвалится и памятию их благоухает. Тии бо, во славе Царствия Небеснаго пребывающе, молят Всемилостиваго Бога, да подаст мирови велию милость.

Слава, глас 5:

Яко солнце светозарное, возсия днесь память твоя, святителю и исповедниче Кирилле, лучами озаряющи верных сердца, к прославлению дивнаго во святых Своих Бога, даровавшаго тебе крепость во исповедании и терпение в скорбех. Не премолчи о нас, угодниче Христов, и избави нас от всякаго зла, Церковь Русскую от раскола и нестроения сохрани, мир мирови испроси и душам нашим велию милость.

И ныне, Богородичен, глас 4:

Днесь светло красуется Раифская пустынь, яко зарю солнечную, от востока возсиявшую, восприимши, Владычице, чудотворную Твою икону, еюже разгоняеши мглу искушений и бед от вопиющих верно: избави обитель нашу и вся страны христианския от всех навет вражиих и спаси души наша, яко Милосердная Заступница рода христианскаго.

По 2-м стихословии седален, глас 1:

Приидите, вси вернии, святителя Ермогена восхвалим, звезду, от града нашего возсиявшую, всю землю Русскую озарившую и ныне в помощь Церкви и Отечеству во утверждение веры отцев наших явленную: Господи, молитвами святителя, мир Твой подаждь нам и велию милость.

Слава, глас 5:

Иоасафе, священномучениче Христов, твердый и мужественный исповедниче, святителя Кирилла сподвижниче, земли Казанския похвало, пастырю добрый, положивый душу за паству твою, моли Христа Бога, яко да милостив нам будет в День Судный.

И ныне, Богородичен, глас тойже:

Кий дар принесем Ти, Пречистая? Кия достодолжныя песни воспоим пред святыми Твоими иконами, Заступнице наша и Мати Всеблаженная? Аще и град Твой не оставляеши, егда нечестивии людие, образ Твой не почетше, расхитиша обитель Твою и лика Твоего цела не оставиша, тогда не токмо люди града нашего, но вся христианы восплакаша и возрыдаша. Ты же чрез святителя Константиня града утешение дарова нам, новое торжество нам являющи, мы же, любовию чтуще честную икону Твою, Тебе песнословим вси поюще: радуйся, Дево Честная, Всеблаженная.

Величание:

Величаем вас,/ вси святии, в земли нашей просиявшии,/ и чтим святую память вашу,/ вы бо молите за нас/ Христа Бога нашего.

Псалом избранный:

Вси язы́цы восплещите руками, воскликните Богу гласом радования.

Князи людстии собрашася с Богом Авраамлим, яко Божии державнии земли зело вознесошася.

Велий Господь, и хвален зело, во граде Бога нашего, в горе святей Его.

Речная устремления веселят град Божий, освятил есть селение Свое Вышний.

По полиелее седален, глас 5:

Красуйся, светися, земле Казанская, яко имаши в себе святыя твоя, иже основание твердое веры Православныя, камень краеугольный и луч светлый Евангелиа Божественнаго быша, ихже любовию почитаем.

Слава, глас 6:

Иже прeжде лжеверием помрачeнный, ныне же верою во Христа просвещeнный, преславный грaд Казaнь вaми хвaлится, имея в себе мощи ваша нетленныя, Гурие, Германе и Варсонофие, отцы наши преподобнии, вы бо с верою приходящим источaете чудеса и подаeте неоскyдно исцелeния, любовию святyю вaшу пaмять почитaющим.

И ныне, Богородичен, глас 8:

Приидите, возрадуемся Державней Заступнице рода нашего, Царице Богородице. Приидите, к тихому Ея и чудному, почитаемому ангелы, честному поклонимся образу, дарует бо верным обильныя дары целебныя, от неистощимаго источника святыя иконы неоскудную благодать источающи; тьмы избавляет нас искушений и бед, и всякаго греха, благочестно и богоприятно прославляющих и чтущих светлую и чудную Богоматере святую икону. Тем, воспевающе, воззовем Первообразней: радуйся, любезная миру помоще, во спасение душ наших.

Степенна, 1-й антифон 4-го гласа. Прокимен, глас 4: Радуйтеся, праведнии, о Господе,/ правым подобает похвала. Стих: Буди, Господи, милость Твоя на нас, якоже уповахом на Тя. Всякое дыхание: Евангелие от Матфеа, зачало 10.

По 50-м псалме стихира, глас 6:

Соберемся, людие,/ милостивое смотрение Божие возславити,/ изволи бо Господь наш землю Казанскую просветити;/ темже подвижники Христовы прославим:/ святители чудныя,/ мученики древняя,/ таже новомученики и исповедники преславныя,/ преподобныя, и праведныя, и вся святыя,/ край сей благодатною силою освятившия/ и помощь Господа и Спасителя нам стяжавшия.

Канон, глас 5.

Песнь 1.

Ирмос: Величаваго фараона в мори потопивша/ со оружием и всадники,/ Израиля же преславно спасша и по суху проведша,/ поем Христа, яко прославися.

Припев: Вси святии земли нашея, молите Бога о нас.

Песньми благовосхвалити хотящих пaмять вашу, блажeннии сродницы наши, светоносную нам зарю, святии, с Небесе низпослите.

Святии вси, иже землю Казанскую прежде ея просвещения именем Христовым освятившии, святителие Христовы и исповедницы, ихже достойно исчислити не можем, молитву вашу сотворите о братиях ваших, молим вы.

Величие наше и похвала ты еси, Гурие первый архипастырю наш: тобою бо многия неверныя ко Христу обратишася. Ныне молися за люди, ихже привел еси Богу, да воспоим Его, яко прославися.

Первый сеятель добродетелей духовных и первый пастырь, и Церкви начальник, первый архиерей и учитель закону Божию в новопросвещеннем граде Казани явился еси, Гурие равноапостольне.

Храм первопрестолен Богородичен явися во граде нашем труды твоими, Гурие, Благовещению Пречистыя посвящен, идеже мощи твоя положены суть и доныне чудеса источают.

Песньми и пении духовными восхвалим святителя Гурия и, припадающе к честней и многоцелебней раце его, с любовию облобызаем ю и сице воспоим: радуйся, молитвенниче о граде твоем неусыпный.

Богородичен: Во храм Благовещения сошедшеся, егоже божественный Гурий устрои нам иногда, безсеменное Рождество от Девы Чистыя со Архангелом воспоим: радуйся Благодатная, Господь с Тобою.

Песнь 3.

Ирмос: Державною рукою и сильным словом/ Небо и землю сотворил еси,/ юже Твоею Кровию искупил еси, Церковь Твою,/ яже о Тебе утверждается, зовущи:/ яко несть свят, разве Тебе, Господи.

Державною рукою и мудрыми словесы учил еси, преславный Варсонофие, первый просветителю града Казани, якоже монах предивный по избытии плена агарянскаго явился еси, таже отец иноков соделался еси, моли спастися душам нашим.

Из плена агарянскаго изшедый, державною рукою и мудрыми словесы управил еси стадо твое, преславный Варсонофие, первый просветителю града Казани.

Святителю Варсонофие, ты первоначальник жития монашескаго во граде Казани явился еси и, красну обитель Спасова Преображения воздвигнув, подвиги твоими чадом духовным образ благочестия подал еси.

Край Казанский солию учения Христова осолил еси, святителю Германе, таже, во граде Свияжсце обитель Богоматери создав, добр учитель явился еси.

Престол Казанский по святем Гурии наследовав, добр пастырь людем новым явился еси, Германе премудре, таже, храмы Божия в земли Казанстей умножив, на высшее служение восхищен был еси.

Радуйся, святителю Филарете, ты бо не токмо в Киеве граде, но и зде мног плод принесл еси, просветителю языков, устроителю храмов, алчущих питателю, первосвятителей Казанских ревностный почитателю и к Богу за люди молитвенниче.

О, троице равноапостольная всечестная, древнии наши учителие и первии архипастырие, Гурие, Варсонофие и Германе со святителем Филаретом и всеми святыми земли нашея, молите, во еже спастися душам нашим.

Богородичен: Пречистая Твоя икона, Богородице Дево, врачевство всему миру духовное, к нейже прибегающе, Тебе покланяемся и, исцелений благодать почерпающе от нея, недуг телесных и душевных страстей Твоими молитвами свобождаемся.

Седален, глас 8:

Приидите, казанстии людие, принесите ныне пение и моление своему первосвятителю и воспойте ему красное от души хваление: той бо начаток бысть проповеди божественныя агаряном, просветитель во тьме седящим, заблуждшим наставник и руководитель ко спасению, многия привед ко Христу Богу, Емуже аще и выну на Небесех предстоит, обаче и земная посещает, и на праздник свой от Горних низходит, и возвеселяет собранныя люди своя, зрит покланяющияся святому образу Его и слышит молитвы молящихся и приносит я ко Владыце. Единогласно убо воззовем к нему: о великий отче наш, святителю Гурие, никогдаже остави нас, чад твоих, но посещай всегда милостию твоею и молитвами твоими соблюдай.

Слава, глас 6:

Ни святитель быв, ни мученик земли нашея, ни пророк, ниже апостол, обаче храмы наша именем твоим хвалятся, святе праведне Иоанне, пастырю Кронштадтский. Ты бо стопы своими, освящая волжский путь и словесных овец научая, до града нашего достигл еси, цевнице духовная, проповедниче покаяния, служителю Божественных Таин благоговейный.

И ныне, Богородичен, глас тойже:

Людие благочестивии, правовернии собори христоименитии, приступите верно вси, божественному припадающе Божия Матере образу: Та бо исцеление болящим радостно подает, уязвляет же злославныя, яко стрела от лука, нас всех веселит световидно и покрывает молитвами Своими.

Песнь 4.

Ирмос: Духом Божиим очищся пророк,/ дыхающим в нем,/ Аввакум Божественный, бояся, глаголаше:/ внегда приближатся лета, познан будеши, Боже,/ на спасение человеков.

Дух Божий, яко на пророцех древле, почи на тебе, святителю Ермогене досточудне, первоиерарше Церкве Русския, ты бо первый положил еси теплыя молитвы и слезы, яко залог спасения ея и всего Отечества, егда брань тяжкая постиже землю нашу.

Икону Пресвятыя Богородицы, Заступницы Усердныя, на длани твоя приял еси, святителю Ермогене преславне, и первое пение молебное пред нею сотворил еси, темже тя ублажаем.

Сигор ли гору наречем тя, святе Ермогене? Тобою бо земля Русская от неправд и беззаконий и многих нестроений спасеся, темже и ныне буди о нас теплый молитвенник пред Богом, достойный возглавителю собора святых Казанских.

Патриарха Тихона споспешник, Петра крепчайшаго сострадатель и звезда путеводная Церкви Русстей явился еси, Кирилле святителю, с ними ныне Небесныя славы наслаждаешися, Христов мучениче добропобедный.

Страдания многая претерпел еси, отче Кирилле, клеветы, суды, заточения, предательства лжебратий и угрозы смертныя, такожде насильства и нападения врагов Церкве Христовы, новомучениче земли Русския.

Твое крестоносное в вере стояние от смуты и раскола Церковь Русскую сохранило есть, преславне Кирилле, имя твое бысть образ победы духовныя, юже соверши единство святых мученик. Темже хвалится тобою земля Казанская, священномучениче досточудне.

Богородичен: С чинми ангел, со пророки, апостолы и со всеми святыми за ны, грешныя, Богу помолися, Владычице, Твоего Покрова праздник в Церкви Русстей почитающия.

Песнь 5.

Ирмос: Слово Божие Всесильное,/ мир всему миру посли/ и светом истинным освещая и просвещая вся,/ из нощи Тя славящия.

Добрый учитель вертограда духовнаго града Казани, верный возвеститель пути спасительнаго, истинный хранитель апостольских преданий, столп непоколебимый и страдалец за Христа явился еси, священномучениче Анатолие предивне.

Никтоже возможе разлучити тя от любве Божия, славный Иоасафе, егда же Господь в годину лютую гонений на Церковь Русскую призва тя к служению святительскому, мужественный защититель паствы твоея был еси.

Иоасафе предивный, Чистопольская похвало и адаманте Церкве Русския, преемниче Анатолия славнаго и споспешниче Кирилла богомудраго, ты ныне с ними в чертозех Небесных Богу предстоиши и молитвенник о пастве твоей являешися.

Возславим обитель Свияжскую, идеже подвигом добрым святитель Амвросий подвизася, и, честную его икону обстояще, воззовем: радуйся, страдальче неодоленный; радуйся, обители твоей щит и ограждение; радуйся, небесный сродниче наш.

Кто воспоет подвиги твоя, Амвросие отче наш? Наставник бо добрый явлься, апостол и учитель в земли Корейстей был еси, и земля Казанская тобою хвалится, светильниче Елабужский и Сарапульская славо, юже и ныне молитвенным покровом ограждаеши.

Многия святыя израсти земля наша и теплыя предстатели ко Христу дарова, с сими прославим святителей и мучеников единокровных Алексия и Никиту, Бугульминских архипастырей славных.

Богородичен: Во обителех древних земли нашея монаси пения Тебе приносят, Пренепорочная Мати, во Успении бо Твоем чтущия Тя и Сына Твоего не оставляеши.

Песнь 6.

Ирмос: В Церковь Небесную Святую Твою да приидет молитва моя,/ вопию Ти, яко Иона, из глубины сердца морскаго пучины морския:/ от грех моих возведи мя,/ молюся Тебе, Господи.

Кия песни принесем священномучеником нашим во пресвитерстем чине Богу послужившим, иже страдания мужественне претерпеша и венцы Небесныя стяжаша? Темже любовию память их светло празднуем.

Небоязненно веру Православную исповедал еси, священне Димитрие, и, не устрашився сильных мира сего, за правду Божию даже до крове пострадал еси.

Служитель неленостный и пастырь добрый явился еси, отче Филарете, в вертограде духовнем служа и овцы словесныя окормляя, темже и тяжкая темничная страдания Христа ради претерпети изволил еси.

Пастырское служение в Чистопольских пределех добре совершая и ревностию о Бозе распалаяся, чада твоя духовная небоязненно исповедати веру во Святую Троицу призывал еси, таже и смерть мужественне сретил еси, отче Михаиле.

Душегубцы безбожнии кровь твою пролиша, Павле, отче наш, ты же, древним мучеником подобяся, за Христа достойно смерть приял еси и со чады твоими мученическаго венца удостоился еси, Елабужская красото.

В пределех Марийских новомученицы явистеся, пастырие и усерднии к Богу молитвенницы, Адриане и Михаиле честнии, сего ради и за веру Христову убиение прияли есте.

Богородичен: Сын убо Твой, Всечистая, нерукотворенное изображение Божественнаго лика Своего верным дарова, Ты же, Дево Всеблаженная, мирови честную Твою икону оставила еси.

Кондак, глас 3:

Подобен: Дева днесь:

Днесь лик святых земли нашея предстоит Престолу Божию/ и усердно молит Спаса нашего Бога и Заступницу Усердную:/ святителие и преподобнии покланяются,/ мученицы со исповедники ликовствуют,/ нас бо ради молят сродницы наши,/ еже спастися нам.

Икос:

Приидите, вернии, почудимся подвигом святых земли нашея; приидите, воспоим сущия сродники, иже во граде нашем, яко светлыя лучи, житием своим паче луч солнечных сияюще, явишася и лик святых многих и Богу угодивших подвижник составиша, в нем бо святителие древнии и многопетии, священномученицы во святительстве и пресвитерстем чине послужившии, преподобнии отцы, нам мудрии наставницы показавшиися, мученицы древнии и новии, венцев Небесных сподобившиися. Нас бо ради молят сродницы наши, еже спастися нам.

Песнь 7.

Ирмос: Пламень пещный поработиша благочестивии отроцы,/ тем свыше ороси я, готовы палимы по естеству,/ но паче естества мужески пояху:/ благословен еси, Господи,/ на Престоле Славы Царствия Твоего.

Отцы преподобныя земли нашея восхвалим днесь, яко угодники Божия и теплыя наша молитвенники, иже, тесным путем шествовавше, духовнаго велиара победиша и многия иноки возрастиша.

Пророчески прорекл еси, преподобне Макарие: свету евангельскому подобает приити на землю нашу и во многих святых возсияти. Темже и ныне благословением твоим пустынь Свияжская хвалится.

От юности любовию Христовою просветився, суетный и многомятежный мир оставил еси, богомудре Гаврииле, и, предстательству Пречистыя Богородицы житие твое вверяя, пред пречистым Ея образом слез потоки изливал еси и теченьми их седмь езер освятил еси, старче наш.

Измлада Духом Святым наставляемь, в Седмиезерную пустынь вселился еси, преподобне отче Гаврииле, отонудуже многия наставляя, мудрый наставник монахов и чадолюбивый отец всем явился еси.

Чадо Господне возлюбленное, чудная Елисавето преподобномученице, собеседника мудра, старца Гавриила, имущи и ревностне советам того внимающи, духовною добротою украсилася еси.

Христу последовав и славу земную презрев, преподобне отче Александре, во обитель Седмиезерную вселился еси, идеже премудростию Божиею напитався, исповедник земли нашея явился еси.

Богородичен: Не имамы языка, во еже изрещи вся благодеяния Твоя, Богородительнице, от всяких бо скорбей, бед и болезней свобождаемся, иконою Твоею укрепляеми, еюже и обитель Седмиезерная украшается.

Песнь 8.

Ирмос: Крепцыи отроцы трие суще,/ силою оболкшеся Святыя Троицы,/ уловиша и победиша халдеи,/ и дивно изменися естество:/ како огнь в росу прелагашеся?/ Без туги я сохрани, яко пеленами,/ о пролиявый мудрость на всех делех Твоих, Боже,/ Тя превозносим во веки.

Преподобномученицы Зилантовы, Пастыреначальнику Христу последующе, веру истинную, яко щит, сохранили есте и, усердно ближним послуживше, даже до крове пострадали есте.

Вашу память достодолжно почитаем, Сергие, Лаврентие, Серафиме, Феодосие и Леонтие, Стефане, Георгие, Сергие, Иларионе и Иоанне, преподобномученицы святии, монаси Успенския обители славныя.

Адаманти избраннии Богом от земли Казанския явистеся, преподобномученицы Иосифе, Антоние и Сергие, Варлааме, Иове и Петре Раифстии, яко воини Христови добропобеднии.

Молитвами вашими обители земныя не оставляете, преподобномученицы наши, мученичества кровьми и постничества трудами венчаеми. Темже и показастеся мучеников и преподобных единовсельницы.

Яко цветник духовный обитель Богородицкую соделали есте, отцы Раифстии, ныне же, предстояще Престолу Божию, не престайте о нас молитися.

Христа, яко Небеснаго Жениха, возлюбивши, вся красная мира сего оставила еси и ангельскому житию поревновала еси, Маргарито всехвальная, и, обитель твою земную украшающи, о горней помышляла еси, Мензелинская свеще возженная.

Троичен: О, Троице Честная, прими, яко фимиам избранный, подвиги и страдания всех святых, в земли Казанстей просиявших и Тебе усердно послуживших, ведомых и неведомых, и молитвами их Церковь Русскую и Отечество наше от всякаго вреда сохрани.

Богородичен: Тебе, Избранней от всех родов, Божией Матери, благодарственная пения приносим и, пришествием честныя Твоея иконы озаряеми, с любовию зовем: радуйся, Невесто Неневестная.

Песнь 9.

Ирмос: Из Едема изыде род наш прабабы ради Евы,/ призван же Тобою, рождшею нам новаго Адама – Христа,/ во двою естеству, Дево Чистая./ Взыграся Адам прадед,/ яко избыв первыя клятвы,/ мы же, Тобою хвалящеся,/ яко Тебе ради Бога познахом,/ и Тебе величаем.

Приидите, мучениколюбцы вси, духовно возвеселимся и торжествуим! Днесь бо предлагают трапезу тайную мученицы земли нашея, веселящую нас, празднолюбцев, еже вопити к ним: радуйтеся страстотерпцы непобедимии.

Днесь, благовернии людие, сошедшеся, восхвалим добляго мученика и страдальца Авраамия, той бо, силою Божиею укрепляемь, душу свою за Христа положи и от булгар зловерных много пострада. Сего ради, от Господа венец приим, молитвенник теплый о душах наших явился еси.

Страстотерпче святый Иоанне, блаженна земля Казанская, напитавшаяся кровию твоею, ты бо, Христа со дерзновением проповедав, многия муки от неверных агарян приял еси и, страданьми твоими противных дерзости низложив, Святыя Троицы поборник явился еси.

Отца и Сына и Святаго Духа исповедал еси, святе Петре, агарянское нечестивое учение отметая твердо, темже и смерть приял еси, и во обители Небесныя вселился еси.

Агарянская отрасль был еси, Стефане, но, неверие тех отринув, Христу прилепился еси. Таже молитвами пресвитера Тимофеа исцеление получил еси и, святое крещение вскоре приим, доблий страстотерпец земли нашея явился еси.

О, велицыи сродницы наши, Небеснаго Сиона достигшии и велию славу от Бога приимшии! Испросите нам, в скорби сущим, утешение, страну нашу во благочестии утвердите и люди расточенныя соберите, песнь благодарения, яко дар, приемлюще.

Богородичен: Юже поют вси земнороднии и славословят вся силы Небесныя, от всех верно поклоняемую, Заступницу Усердную рода христианскаго, и мы, благодаряще, прославим.

Светилен:

Новомученицы и исповедницы земли Казанския, молите о нас Владычицу Богородицу, да и мы, скорби и искушения побеждающе, веру Православную, вся концы просвещающую, сохраним, во вся дни живота нашего.

Слава:

Вкупе со святыми земли нашея хвалу вам воздаем, святии Феодоре, Давиде и Константине Ярославстии чудотворцы, вы бо страну Казанскую попечением при жизни не оставили есте, тако и ныне, молим вас, к свету Христову руководите нас.

И ныне, Богородичен:

Светоносная Слова Палато, Ковчеже, позлащенный Духом, явилася еси, Пресвятая Дево, великия чистоты ради. Темже вкупе со святыми сродники нашими взываем к Тебе: молися, Владычице, о нас, грешных, да от страстей очистимся и просветимся светом Сына Твоего.

На хвалитех стихиры 4, глас 8.

Подобен: О, преславнаго чудесе:

О, преславнаго чудесе!/ Днесь ликует земля Казанская,/ память святых своих празднующи,/ иже духовная дарования источают обильно./ Темже с любовию к ним возопиим:/ о, теплии молитвенницы наши ко Господу,/ испросите нам прощение согрешений/ и, яко звезды пресветлыя,/ путеводите ны к Царствию Небесному.

О, преславнаго чудесе!/ Днесь ликует земля Казанская,/ прославляющи святители и священномученики,/ иже в житии израстиша красный плод благочестия/ и, яко ваиа благоуханная процветше,/ любовь евангельскую нам явиша./ Тех молитвами, Христе Боже,/ не отвержи нас от лица Твоего/ и даруй нам мир и велию милость.

О, преславнаго чудесе!/ По тридесяти и двою летех нетленныя мощи обретошася/ перваго просветителя Казанскаго,/ святителя Гурия богомудраго,/ благоуханием вся исполняюще./ О, каково дарование новому чудотворцу дадеся!/ Той бо и ныне со всеми святыми земли нашея,/ во обителех Небесных пребывая,/ молит Христа Бога спастися душам нашим.

О, преславнаго чудесе!/ Днесь ликует земля Казанская,/ благодатию новомученик и исповедник своих красующися,/ иже души и телеса многонедужныя врачуют./ Темже и мы, духовно радующеся,/ Господа, Дивнаго во святых Своих, прославляем/ и, на предстательство всех святых земли нашея надеющеся,/ с любовию и упованием к ним взываем:/ Христа Бога молите, даровати нам велию милость.

Слава, глас тойже:

Приидите, вси духовне возвеселимся/ в памяти святых земли нашея/ и во гласе радования возопиим, глаголюще:/ радуйтеся, святителие богомудрии,/ Евангелие Христово граду нашему проповедавшии./ Радуйтеся, мученицы добропобеднии,/ веру даже до смерти исповедавшии,/ мук томления претерпевшии/ и в годину лютую совершенне страдания венец приемшии./ Радуйтеся, преподобномученицы достохвальнии,/ телеса своя пощением истаявшии/ и, страсти плотския умертвивше,/ страданьми и муками Бога прославившии./ Но о, святителие, мученицы вкупе с постницы и праведницы,/ вас Венчавшаго прилежно молите,/ избавитися нам от враг видимых и невидимых,/ верою и любвию совершающим честную память вашу.

И ныне, Богородичен, глас тойже:

О, преславнаго чудесе!/ Небесе и земли Царица,/ от святых сродников наших умоляемая,/ до ныне землю Русскую покрывает/ и лика Своего изображении милостивно обогащает./ О, Владычице Державная!/ Не престани и на будущее время/ во утверждение на Руси Православия/ милости и чудеса изливати до века. Аминь.

Славословие великое. Ектении и отпуст.

На Литургии

Блаженна от канона песни 3-я и 6-я. Прокимен, глас 7: Восхвалятся преподобнии во славе/ и возрадуются на ложах своих. Стих: Воспойте Господеви песнь нову, хваление Его в Церкви преподобных. Апостол ко Евреем, зачало 334. Аллилуиа, глас 2: Священницы Твои облекутся в правду, и преподобнии Твои возрадуются. Стих: Бог прославляемь в совете святых. Евангелие от Иоанна, зачало 51. Причастен: Радуйтеся, праведнии, о Господе, правым подобает похвала.

Молитва

О, святии вси в земли Казанстей просиявшии! К вам ныне прибегаем и, Всемилостиваго Спаса благодаряще, прославляем подвиги и страдания ваша, вы бо, щедре сеявше слово Евангельское в крае нашем, люди светом благодати Божия просветисте, днесь же радостне ликуете на Небесех, яко угобзися нива Христова, плод красный спасительнаго сеяния израстившая и дивныя угодники и теплыя молитвенники Господу принесшая, имиже земля наша славно красуется.

О, святителие равноапостольнии, преподобнии и богоноснии отцы наши, мученицы крепцыи и непобедимии! Молите, благосердии, Христа Бога, да дарует нам, грешным, непорочное веры соблюдение, градов и весей наших благое утверждение, от нашествия иноплеменных сохранение, мира умирение, от глада и пагубы избавление, изобилие плодов земных, и вся, ко спасению и благочестному житию потребная, да и мы вкупе с вами, изрядно же со Усердною Заступницею рода христианскаго, Пречистою Девою Богородицею, непрестанно славим Пречестное и Великолепое Имя, Отца и Сына и Святаго Духа, ныне и присно и во веки веков. Аминь.

Источник: Текст службы утвержден на заседании Священного Синода 23–24 сентября 2021 года (журнал № 67).

Месяца октября в 18-й день

преподобноисповедника Гавриила, архимандрита Мелекесскаго

На велицей вечерни

Блажен муж: 1-й антифон. На Господи, воззвах: стихиры на 8, глас 6:

Духа Святаго благодать/ в тебе излияся, отче Гаврииле,/ темже пастырь добрый/ Церкве Христовы явился еси / и, за истину пострадав,/ душу твою за овцы своя положил еси.

Добродетелей деланием/ новое зерцало благодати быв,/ светом Солнца мысленнаго возсиял еси/ и мглу человеческих согрешений разсеял еси,/ сего ради отче Гаврииле, молитвами твоими/ и нас света невечерняго сподоби.

Яко светильник веры неугасимый,/ истину Христову свидетельствовал еси,/ отче Гаврииле,/ и, вся доблестне претерпев,/ благодать Святаго Духа стяжал еси;/ испроси и нам от Христа мир и велию милость.

Исповедниче твердый/ и подвижниче изрядный,/ преподобне отче Гаврииле,/ житием твоим Христу последуя,/ во дворех Бога Вышняго вселился еси,/ и ныне, предстоя Престолу Царя Небеснаго,/ моли спастися душам нашим.

Слава, глас тойже:

Восхвалим, вернии, по долгу/ преподобноисповедника Гавриила,/ той бо, многая страдания мужественне претерпевая,/ советы безбожных разорил еси/ и, от славы постническия в славу исповедническую восходя,/ блаженства вечнаго достигл еси,/ идеже с новомученики и исповедники Церкве Русския/ прославляет Отца и Сына и Святаго Духа,/ Троицу Единосущную и Нераздельную.

И ныне, Богородичен: Кто Тебе не ублажит, Пресвятая Дево:

Вход. Прокимен дне. И чтения три.

Премудрости Соломоновы (гл. 3, ст. 1–9): Праведных души в руце Божией:

Премудрости Соломоновы (гл. 5, ст. 15–24): Праведницы во веки живут:

Премудрости Соломоновы (гл. 4, ст. 7–15): Праведник, аще постигнет скончатися:

На литии стихира храма и святаго стихиры, глас 1.

Подобен: Небесных чинов радование:

Владыки Христа стопам последуя,/ светом Божественным просветился еси/ и, видении премирными возвышаяся,/ нощь житейскую без преткновения прешел еси./ Темже Господь наследника тя Царствия показа/ и сожителя со всеми святыми,/ еже улучити и нам, отче, молися,/ совершающим любовию память твою.

Духа Святаго благодать стяжав,/ отче богоносне Гаврииле,/ огнем ревности и духом кротости/ паству твою ко Христу путеводил еси,/ гонителей же безбожных не убоявся,/ нечестивая уста словесы евангельскими дерзновенно заграждал еси./ Темже и прослави тя Господь,/ егоже моли о спасении душ наших.

Слава, глас 6:

Верен Богу и Церкви был еси/ от юности твоея, отче Гаврииле,/ верных добрый предстателю/ и теплый молитвенниче,/ испроси нам, тя почитающим,/ мир и велию милость.

И ныне, глас тойже:

Под кров Твой ныне прибегаем,/ Пресвятая Богородице,/ и молим Тя, земнороднии,/ прибежище наше, Владычице,/ спаси нас от безмерных прегрешений.

На стиховне стихиры, глас 5.

Подобен: Радуйся, Живоносный Кресте:

Радуйтеся, людие,/ се бо новый чудотворец нам явися,/ верный путевождь ко спасению,/ врач и помощник во всякой скорби,/ заступник и врагов невидимых прогонитель,/ молитвенник неусыпный ко Господу/ о всех верою к нему притекающих.

Стих: Честна пред Господем/ смерть преподобных Его.

Радуйся, священная главо,/ верный Христа служителю,/ отче преподобне Гаврииле,/ добродетелей вместилище,/ болящих целителю и страждущих утешение,/ непостыдная надеждо/ всех, с верою тя призывающих.

Стих: Блажен муж, бояйся Господа,/ в заповедех Его восхощет зело.

Радуйся, твердый исповедниче,/ преподобне отче Гаврииле,/ ты бо, незлобием и смирением украсився,/ многая страдания претерпел еси/ и верным путь ко Христу указал еси,/ по отшествии же твоем нас не оставляеши,/ моляся о спасении душ наших.

Слава, глас 1:

Исповедниче доблий и служителю верный Таин Божиих,/ Христов угодниче Гаврииле,/ ныне, празднующе твою память,/ из глубины души со умилением вопием:/ слава Давшему ти крепость,/ слава Хранившему тя,/ слава Спасающему нас твоими молитвами.

И ныне, Богородичен, глас тойже:

От всех бед рабы Твоя сохраняй,/ Благословенная Богородице,/ да Тя вси славим,/ яко надежду душ наших.

На благословении хлебов, тропарь святаго, дважды, и Богородице Дево: единожды.

Тропарь, глас 3:

Вельми светел явися нам подвиг жития твоего,/ исповедниче Христов Гаврииле,/ любве ради ко Господу радостию на скорбь и лишения изшел еси,/ крест же свой носяй и образ терпения показуяй,/ верныя в годину озлобления пастырски в вере соблюл еси/ и обитель Духа Святаго явился еси./ Темже убо вопием ти:/ молитвами твоими спаси души наша.

На утрени

На Бог Господь: тропарь святаго, дважды. Слава, и ныне, Богородичен.

По 1-м стихословии седален, глас 1:

Излияся благодать Святаго Духа в житии твоем, отче преподобне Гаврииле, и явился еси добрый пастырь Христова стада, поучая чада твоя ближнему, якоже себе, угождати, Бога же всем сердцем и крепостию своею любити и верными быти Ему даже до смерти.

Слава, и ныне, Богородичен:

Предстательнице Всеблагая христианом, предстоящи у Креста Сына Твоего и Бога нашего, скорбь велию претерпела еси и благодать сущия в скорбех утешати прияла еси. И ныне матерними Твоими молитвами всяких бед избави нас и моли Христа Бога согрешений оставление нам даровати.

По 2-м стихословии седален, глас 3:

Попечений мирскаго жития отвергся, ангельское житие восприял еси и, пламенною любовию ко Христу распалився, дарование чудес от Него богатно приял еси, Гаврииле боголюбче. Темже молися о нас, благочестно восхваляющих тя.

Слава, и ныне, Богородичен:

Явилася еси паче всех Ангел Славнейшая и всея твари Честнейшая, Пречистая Владычице, Заступнице обидимым и ненадеянным Надеждо! Подаждь и нам, в скорби сущим, утешение и, молящися, простри пречистыя Твоя руце к Сыну Твоему, помиловатися душам нашим.

По полиелеи седален, глас 3:

Серафимскою любовию пламенея, отче Гаврииле, яко бесплотен на земли пожил еси и равноангельнаго стояния на Небеси сподобился еси. Темже тя, яко человека Божия, ублажающе, память твою радостне совершаем, чающе молитвами твоими улучити мир и велию милость.

Слава, и ныне, Богородичен:

Пресвятая Дево, паче разума Христа Бога рождшая, всем христианом Мати преблагая! Заступи и спаси нас, грехми многими обремененныя, изведи из бездны страстей и сохрани под кровом Твоим, Всенепорочная.

Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Луки, зачало 24.

По 50-м псалме стихира, глас 6:

Днесь, вернии, память преподобнаго Гавриила совершающе,/ в радости сердец восхвалим Христа Бога нашего,/ прославльшаго дивнаго угодника Своего,/ исповедника твердаго и пастыря добраго,/ емуже со усердием тако возопиим:/ о, всеблаженне отче,/ яко имеяй дерзновение ко Господу,/ мир отечеству нашему испроси/ и душам нашим велию милость.

Канон, глас 2.

Песнь 1.

Ирмос: Грядите, людие,/ поим песнь Христу Богу,/ раздельшему море и наставльшему люди,/ яже изведе из работы египетския,/ яко прославися.

Отверзи уста моя, Господи, и просвети ум, омраченный суетою, и разреши косный мой язык, да светло и радостно воспою исповедника Твоего и добраго пастыря нашего, преподобнаго Гавриила пречуднаго.

Душевную чистоту стяжав, без неяже никтоже когда узрит Господа, Гаврииле преподобне, страсти окаянныя души моея исцели молитвами твоими.

Разум от Бога восприим, уста нечестивых отступников и гонителей заграждал еси, дерзновенно Христа исповедуя.

Богородичен: Радости сердце мое исполни, Богородице, приимшая от Архангела радости весть, и душу любовию к Сыну Твоему уязви, печаль греховную потребляющи.

Песнь 3.

Ирмос: На камени мя веры утвердив,/ разширил еси уста моя на враги моя,/ возвесели бо ся дух мой, внегда пети:/ несть свят, якоже Бог наш,/ и несть праведен, паче Тебе, Господи.

Яко крин райский, процвел еси ко украшению Церкве Русския, удобренный непорочностию жития твоего, помози и нам, отче преподобне, украситися благоплодием духовным.

Любовию Христовою исполнен, источник благодати явился еси, отче Гаврииле, напаяяй нас словесы учений твоих. Темже любовию память твою совершаем.

Теплотою веры согрей души наша, неизчетными грехи оляденевшия, дух же благочестия вкорени в сердца нас, память твою чтущих.

Богородичен: Святейшая сил безплотных, Честнейшая всея земныя твари, Дево Пречистая, молися ко Господу со святым Гавриилом, от бед нам избавитися.

Седален, глас 5:

Исповедниче честный, отче Гаврииле, Церковь Русскую украшаяй, талант, от Бога тебе данный, богатно преумножил еси и в радость Господа твоего внити сподобился еси. Емуже ныне предстоя, моли спастися душам нашим.

Слава, и ныне, Богородичен:

Помощь Твою призывающих не презри, Богородительнице, упование бо еси рода христианскаго, но предвари и спаси нас, грехи многими поглощенныя, Царице Всеблагая.

Песнь 4.

Ирмос: Услышах, Господи, глас Твой, егоже рекл еси,/ глас вопиющаго в пустыни,/ яко возгремел еси над водами многими,/ Твоему свидетельствуяй Сыну,/ весь быв сошедшаго Духа, возопи:/ Ты еси Христос, Божия мудрость и сила.

Святче Божий, ныне предстоя Престолу Святыя Троицы, молися о людех, в заблуждении ума сущих, и направи нас на путь покаяния.

Светильник пресветел чадом твоим явился еси, преподобне Гаврииле, иже, видевше добрая дела твоя, прославляху Отца Небеснаго, давшаго им таковаго предстателя.

Узы и страдания Христа ради претерпев, сосуд благодати Духа Святаго явился еси, отче Гаврииле, и, многими дарами обогатився, людем добре послужил еси.

Богородичен: Уповаем на помощь Твою, Богородице, верующе в толикое Твое милосердие к людем согрешшим, и просим Тя прилежно: исправи пути жития нашего, Мати Пречистая.

Песнь 5.

Ирмос: Света Подателю и веков Творче, Господи,/ во свете Твоих повелений настави нас:/ разве бо Тебе, иного бога не знаем.

Отче Гаврииле, первых христиан страданий подобник быв, узы и гонения за Христа мужественне претерпел еси, егоже моли о душах наших.

Силою Господнею укрепляемь, преподобне Гаврииле, льстивыя наветы гонителей отвергл еси и злобу их смирением низложил еси, зовый: разве Христа, иного бога не знаю.

Непреложное терпение показуя, яко адамант твердый явился еси и, многия скорби и узы со смирением приемля, богоборцем глаголал еси: разве Христа, иного бога не знаю.

Богородичен: Оставление многих согрешений молитвами Твоими, Дево, уповаем получити, Ты бо еси Надежда рода христианскаго.

Песнь 6.

Ирмос: В бездне греховней валяяся,/ неизследную милосердия Твоего призываю бездну:/ от тли, Боже, мя возведи.

Явися благодать велия людем православным в прославлении твоем, отче Гаврииле, теплаго бо тя молитвенника пред Богом обретоша.

Пастыря тя добраго вемы, блаженне отче, мудре стадо твое во дни скорбныя упасшаго, темже и нас в вере и единомыслии сохрани.

Алчущия правды во дни глада духовнаго пищею Небесною питал еси, свобождая тех тьмы греховныя и ко Христу приводя.

Богородичен: От скорби душевныя вопием Ти, Владычице: приими недостойныя наша молитвы, Ты бо еси надежда и упование душ наших.

Кондак, глас 2:

Крепости Божия соименник/ и причастник Божия благодати явился еси,/ отче Гаврииле,/ преподобием и исповедничеством/ истину Православныя веры утверждая,/ иго Христово до конца восприял еси,/ темже и прославлен еси со святыми,/ моли Христа Бога спастися душам нашим.

Икос:

От юности твоея вся благая земли ни во чтоже вменив, блаженне, Единому Господу, егоже издетска возлюби, всем сердцем послужити возжелел еси и, чин ангельский в годину тяжкую восприим, яко доблий воин Церкве Христовы, в броню веры и правды оболченный, на духовную брань изшел еси, многия же скорби и гонения за истину претерпев, Царствия Небеснаго сонаследник явился еси. Ныне же, Престолу Божию со всеми святыми предстоя, моли Христа Бога спастися душам нашим.

Песнь 7.

Ирмос: Богопротивное веление беззаконнующаго мучителя/ высок пламень вознесло есть./ Христос же простре Богочестивым отроком росу духовную,/ Сый благословен и препрославлен.

Днесь радостно ликуют людие пределов Симбирских, сошедшеся прославления твоего ради, отче Гаврииле, и единым сердцем прославляют прославльшаго тя Господа, Иже благословен и препрославлен.

Отче честный, предстояй на Небесех, не забуди нас, долу сущих, от всяких находящих бед сохрани, раздоры и брани умири молитвами твоими ко Христу Богу, Иже благословен и препрославлен.

Духа Святаго благодать на тебе почи, святе Гаврииле, светильник бо веры и благочестия показался еси и целитель душ и телес к тебе притекающих, Христа же величающих, Иже благословен и препрославлен.

Богородичен: Владычице, угаси милосердием Твоим пещь страстей наших, да воспоим Тя со всеми избранными Твоими, яко благословенна еси и препрославленна.

Песнь 8.

Ирмос: Пещь иногда огненная в Вавилоне действа разделяше,/ Божиим велением халдеи опаляющая,/ верныя же орошающая, поющия:/ благословите, вся дела Господня, Господа.

Яко луча Света Христова во тьме греховней возсиял еси, блаженне Гаврииле, помози и нам Света Невечерняго достигнути, да не уклонимся пути спасительнаго, но вкупе с тобою возопиим: благословите, вся дела Господня, Господа.

Во дни скорби ничто возможе разлучити тя от любве Божия, отче Гаврииле, темже в любви евангельстей помози пребыти и нам, молитвенно чтущим тя и поющим: благословите, вся дела Господня, Господа.

Непреоборим воин духовный явился еси, отче Гаврииле, во всем покоривый себе воли Господни, и, нимало взирая на узы и гонения, силою Христовой вся побеждал еси, вопия: благословите, вся дела Господня, Господа.

Богородичен: Свят день, воньже собра нас Мати Божия прославити угодника Своего Гавриила, чудесы своими пети нас научающаго: благословите, вся дела Господня, Господа.

Песнь 9.

Ирмос: Безначальна Родителя Сын, Бог и Господь,/ воплощься от Девы, нам явися,/ омраченная просветити, собрати расточенная./ Тем Всепетую Богородицу величаем.

Веру соблюл еси и течение жизни добре скончал еси, темже дадеся тебе в Царствии Небеснем неувядаемый славы венец; утверди и нас, маловерием колеблемых, веру Православную сохранити и спасение улучити.

Всяк с верою моляйся по прошению приемлет, темже молим тя, угодниче Божий Гаврииле: не остави нас, во скорбех сущих, молитвами твоими.

Сердцем твоим в Горняя устремился еси и вся, яже на земли, отринул еси. Помози и нам, отче Гаврииле, от пути праваго не уклонятися.

Богородичен: Матерь Божию, утешение наше, приидите, вси восхвалим: Та бо неложно обещася быти нам Помощница до скончания века.

Светилен:

Благодать Духа Святаго богатно вселися в тя, отче Гаврииле, и, предуготовавши чистотою душу твою, сотвори тя наследника Небеснаго Царствия и молитвенника тепла о душах наших.

Слава, и ныне, Богородичен:

Пети Тебе похвальная сподоби, Дево Всесвятая, Свет бо Невечерний от чрева Твоего мирови возсия, и мрак души моея озари и мглу страстей прогони, едина Всепетая.

На хвалитех стихиры на 4, глас 4:

Воздержанием добре воспитався,/ на высоту добродетелей возшел еси,/ исповедничества же одеждею украсився/ и жития преподобием просветився,/ дарами Духа Святаго обогатился еси./ егоже благодать и нам стяжати помолися,/ чтущим святую память твою,/ Гаврииле отче наш.

Отче Гаврииле преподобноисповедниче,/ Церкви Христовой добре послужил еси/ и, дарованный тебе от Бога талант умножив,/ в радость Господа твоего вшел еси,/ Емуже предстоя со Ангелы,/ молися о душах наших.

Якоже злато, огнем искушаемо, чисто является,/ тако и ты, отче Гаврииле,/ узами заточения искушен быв,/ гонения мужественно претерпел еси,/ и ныне житие твое озаряет души наша,/ маловерия облаком омраченныя,/ во еже славити Христа Бога нашего/ и Того велию милость.

Слава, глас 8:

Отче преподобне Гаврииле,/ благий рабе Господень/ и верный учениче Христов,/ ты, паству твою водою живою напояя,/ семенами веры и благочестия напитал еси./ Ныне же, Богу предстоя со всеми святыми,/ молися о спасении душ наших.

И ныне, Богородичен:

Владычице, приими молитвы раб Твоих/ и избави нас/ от всякия нужды и печали.

Славословие великое и отпуст.

На Литургии

Блаженны от канона, Песнь 3.-я и 6-я. Прокимен, глас 7: Восхвалятся преподобнии во славе/ и возрадуются на ложах своих. Стих: Воспойте Господеви песнь нову, воспойте Господеви вся земля. Апостол к Ефесеем, зачало 233 (6, 10–17). Аллилуиа, глас 6: Блажен муж, бояйся Господа,/ в заповедех Его восхощет зело. Стих: Сильно на земли будет семя его. Евангелие от Луки, зачало 64 (12, 8–12). Причастен: В память вечную будет праведник:

Молитва

О, пастырю добрый и доблий воине Христов, скорый помощниче и теплый заступниче, богоблаженный угодниче Божий и Православия твердый исповедниче Гаврииле! Не остави нас молитвами твоими, с любовию к тебе притекающих, велие бо дерзновение ко Господу стяжал еси. Ты бо, от юности жизнь всецело Богу посвятив, огнь любве Божественныя в сердце твоем возжегл еси, наипаче же нищету духовную стяжав, яко раб благий, дела богоугодная кротко и смиренно творил еси. Темже молитвами твоими, всечестный отче, уврачуй души наша, грехом изъязвленныя, недугующия исцели, младенцы воспитай, юность настави, старость поддержи, малодушныя утеши, вдовицам предстани, сирых защити, супружество в мире и единомыслии соблюди, расточеныя собери, прельщеныя обрати и соедини Святей Церкви.

Ей, святче Божий! Молитвами твоими умягчи сердца наша, помози нам милостивыми быти и ближним с любовию послужити, по отшествии же нашем от земных глас от Владыки Христа, Бога нашего, услышати: приидите, благословеннии Отца Моего, наследуйте уготованное вам Царствие от сложения мира. Аминь.

Источник: Текст службы утвержден к общецерковному богослужебному употреблению на заседании Священного Синода 29 декабря 2022 года (журнал № 130).

На малой вечерни

Стихиры поем на 4 глас 6-й:

От юности Господеви последовав, / родителей и любовь мирскую оставив, / в Оптиной пустыне с духоносными старцы вселился еси, / постных житие дeржа во смирении, / новомучеником Российским споследуя, / гонение от безбожных, радуяся, терпел еси, / хладных пределов Караганды дocтигл ecи, / идеже чистое житие, горя духом, скончал еси, / Христа Воскресша, яко бисер чудный, стяжав, / сия благодати причаститися / и нас сподоби отче Севастиане досточтиме.

Терпел еси кротко, / от злочестивых богоборцев, / бием, укоряем, и ураняем за Господа, / егоже желал еси, досточтиме,/ мира сего красная в ничтоже вменив, / странничество многотрудное со страстотерпцы Христовы возлюбил еси, / равноангельный монашеский образ смиренно нося, / но являет тя Подвигоположник Христос, / в Церкви Своей светильника веры/ и изрядна испoведника.

В светозарные дни Пасхального торжества, / равноангельное житие твое, скончав, священное, / чудеса совершаеши еси изрядна и преславна. / Предстоя Богу, тебе подавшему залог Божественен/ и венец нетленен и славу вечнующую. / Того убо моли, Севастиане, досточтиме, / егда яко Судия приидет / избавитися всякого озлобления / почитающим священную память твою.

Слава, глас тойже:

Сый со Отцем на престоле святем, / пришед на землю, от Девы родися, / плотию распныйся и погребыйся и воскресый, / на небеса паки восшедый, Духа Утешетеля верующим дарова, вопия: / аще кто хощет в след Мене идти, / да отвержется себе и крест свой понесет, / сему усердно последуя, / высоту приял еси небесную, / Севастиане, досточтиме, исповедниче Христов.

И ныне, Богородичен гласа.

На стиховне стихиры, глас 4-й:

Плотию перстною обложен, / дух молитвою воскрилял еси,/ и к Богу умом восходя, / горния доброты зрел еси славу, / сего ради на тленную мира сего красоту / и безумный мятеж богоотступных человек / скорбно взирал еси / и, воздыхая, слезы проливал еси, / в небесное отечество преселитися желая,/ досточтиме Севастиане.

Стих: Священницы Твои облекутся в правду, / и преподобнии Твои возрадуются.

Великую твою благодати святыню / всем концем Церкви Русския возвещают чудеса твоя. / Како бо человек грешник / возможет такова знамения творити? / Воистину, свят еси, Севастиане преподобне, / прославляет тя Господь, яко прославльшаго Его / пред человеки на земли / и на небеси пред Отцем Своим.

Стих: Блажен муж, бояйся Господа, / в заповедех Его восхощет зело.

Демоном страшная твоя молитва, / кротости и смирения исполненная, / величия твоего виновна бысть, / тоя бо светом выну озаряем, / Христов ум стяжал еси, блаженне, / неизглаголанная таинства познавая, / будущая, яко настоящая зрел еси,/ на путь истины и спасения / всех приходящих к тебе, наставляя.

Слава, глас 1-й:

Досточтиме отче Севастиане, / чистоты сокровище, / погибающих помощниче, / даждь нам твердую руку помощи твоея/ и грехми присно погружаемых, / от смертоносных глубин изведи / и прочее жития время / в покaянии истеннем скончати нам помози/ и от вечнаго гнева спастися сподоби.

И ныне, Богородичен гласа.

Тропарь писан на великой вечерни.

На велицей вечерни

Блажен муж: 1-й антифон. На Господи воззвах стихиры на 8, глас 5-й:

Ра́дуйся, богоно́се о́тче Севастиа́не, / от мла́да Христа́ Бо́га возлюби́вый / и чистото́ю Тому́ прилепи́выйся / де́тскою ве́рою после́дствовавый, / в простоте́ се́рдца Тому́ послужи́вый / и ра́зум духо́вный от Него́ прие́мый, / в светоза́рную О́птину пу́стынь к ста́рцам духоно́сным прише́л еси́, / и́хже благода́ти по прeе́мству унасле́довав, / испроси́ нам мир и ве́лию ми́лость.

Ра́дуйся, преблаже́нне о́тче Севастиа́не, / плач неуте́шный де́моном наведы́й: / лю́дие бо, им ве́рно служи́вшия и рабо́тавшия, / тобо́ю апо́стольски науче́ннии и духо́вно просвеще́ннии, / попра́ша богопроти́вную горды́ню их, / и Бо́га просла́виша в душа́х и телесе́х свои́х / подаю́щаго ве́рным мир и ве́лию ми́лость.

Ра́дуйся, преподо́бне Севастиа́не, / во́лею Христу́ сораспны́йся,/ душе́вных страсте́й умерщвле́нием пострада́вый, / всеконе́чно греху́ уме́рый, / нетле́нию же и безсме́ртию воскресы́й / и а́нгельски во пло́ти поживы́й, / вели́кое мно́жество челове́ков ко Христу́ приве́л еси́, / при́сно Тому́ моля́ся, / дарова́ти ми́рови мир/ и душа́м на́шим ве́лию ми́лость.

Ра́дуйся, досточти́ме Севастиа́не, / от Бо́га свяще́нствовати положе́н был еси́ вои́стинну, / умо́м чи́стым, се се́рдцем смире́нным и душе́ю кро́ткою слу́жбу Тому́ принося́, / беды́ претерпе́л еси́ и гоне́ния, и боле́зни, / пропове́дания ра́ди Боже́ственныя и́стины,/ ю́же житие́м и словесы́ твои́ми заключе́нным в лагеря́х яви́л еси́,/ немощны́я укрепля́я и ве́рныя утвержда́я несомне́нною наде́ждою на Христа́ / те́мже и ны́не нас к приле́жной моли́тве сподви́гни: / испроси́ти ми́рови мир и душа́м на́шим ве́лию ми́лость.

Ра́дуйся, прозорли́ве ста́рче Севастиа́не, / помава́я жезло́м слове́с твои́х / и расточе́нное в гоне́ниих ста́до Христо́вых слове́сных ове́ц, / в бескра́йних Казахста́нских степя́х разсе́янных/ и мно́гия лише́ния и боле́зни от губя́щих я волко́в терпя́щих/ вокру́г себе́ под благода́тный кров Цари́цы Небе́сныя собра́л еси́, / приле́жно Засту́пнице ми́ра моли́тися / дарова́ти ми́рови мир / и душа́м на́шим ве́лию ми́лость.

Ра́дуйся, богому́дре Севастиа́не, / отцу́ ве́рных Авраа́му подо́бник нело́жен, / Боже́ственному бо Промышле́нию себе́ коне́чне вручи́вый, / гоне́ния от безбо́жных кро́тко терпя́, / оте́чества произгна́н был еси́ / и в хла́дныя Караганди́нския сте́пи на страда́ния и смерть ве́рную со́сланный, / И́овлеву стяжа́л еси́ в боле́знех кре́пость / и Дави́дово смире́ние, терпе́нием прояви́в, / житие́ равноа́нгельное на земли́ пожи́л еси́, / и жела́ние получи́л еси́ коне́чное, / престо́лу Пресвяты́я Тро́ицы в ра́дости святы́х предстои́ши днесь, / усе́рдно за па́ству свою́ моля́ся: / дарова́ти ми́рови мир / и душа́м на́шим ве́лию ми́лость.

Ра́дуйся, преподо́бных сожи́телю Севастиа́не, / вели́каго ста́рцев О́птинских духоно́снаго со́нма соприча́стниче, / целому́дрия о́браз и воздержа́ния пра́вило, / благоче́стия провозве́стниче и умиле́ния исто́чниче, / правосла́вия утвержде́ние непоколеби́мо, / уста́вов О́птинских тве́рдый храни́телю, / Пресвяты́я Богоро́дицы и Иоа́нна Предте́чи ве́рный служи́телю, / исцеле́ний струя́ присноте́чная / мона́шествующих яви́лся еси́ удобре́ние, / и всему́ ста́ду твоему́ па́стырю и учи́телю.

Ра́дуйся, богоно́се Севастиа́не, / тече́ние воздержа́ния непрело́жно соверши́вый, / и ве́ру святу́ю непоро́чно соблюды́й,/ венце́м пра́вды украше́нный, / его́же угото́ва ти Христо́с Госпо́дь,/ по достоя́нию подава́я воздая́ния: / я́ко священнотаи́ннику чи́сту и па́стырю предо́брому, / я́ко зе́мну во пло́ти а́нгелу и страда́льцу терпели́ву. / Тому́ усе́рдно, о́тче, моли́ся / дарова́ти нам мир и ве́лию ми́лость.

Слава, глас 8-й:

Ему́же всего́ себе́ от младе́нства возложи́л еси́, / Eго́же во уме́ твое́м при́сно моли́твою обноси́л еси́, / Его́же чистото́ю се́рдца твоего́ стяжа́л еси́, / Его́же ра́ди вся сла́дкая ми́ра отри́нул еси́, / Его́же ра́ди гоне́ния, лише́ния, бие́ния, уничиже́ния, благода́рне претерпе́л еси́, / святы́х Святе́йшему Иису́су Сладча́йшему, / И́же слуги́ Своя́ огнь паля́щий творя́й, / преподо́бне Севастиа́не, все́ю кре́постию твое́ю приве́рженный / пла́менем Ду́ха Свята́го тебе́ оби́льно испо́лнившаго, / во е́же те́рние страсте́й и грехо́в на́ших пожига́ти, / тьму же неразу́мия просвеща́ти, / и всем ве́рным путь в Ца́рство Небе́сное отверза́ти.

Таже вход. Прокимен дне. Чтения три преподобническия:

Премудрости Соломони чтение (глава 3):

Пра́ведных ду́ши в руце́ Бо́жией, / и не прико́снется их му́ка./ Непщева́ни бы́ша во очесе́х безу́мных умре́ти, / и вмени́ся озлобле́ние исхо́д их, / и е́же от нас ше́ствие – сокруше́ние; / они́ же суть в ми́ре. / И́бо пред лице́м челове́ческим, а́ще и му́ку прии́мут, / упова́ние их безсме́ртия испо́лнено. / И вма́ле нака́зани бы́вше, / вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́. / Я́ко зла́то в горни́ле, искуси́ их / и я́ко всепло́дие же́ртвенное, прия́т я. / И во вре́мя посеще́ния их возсия́ют/ и, я́ко и́скры по сте́блию, потеку́т. / Су́дят язы́ком и облада́ют людьми́, / и воцари́тся Госпо́дь в них во ве́ки./ Наде́ющиися Нань разуме́ют и́стину / и ве́рнии в любви́ пребу́дут Ему́, / я́ко благода́ть и ми́лость в преподо́бных Его́ / и посеще́ние во избра́нных Его́.

Премудрости Соломони чтение (глава 4):

Пра́ведник, а́ще и пости́гнет сконча́тися, в поко́и бу́дет. / Ста́рость бо честна́ не многоле́тна, / ниже́ в числе́ лет исчита́ется./ Седи́на же есть му́дрость челове́ком, / и во́зраст ста́рости – житие́ нескве́рное. / Благоуго́ден Бо́гови быв, возлю́блен бысть,/ и живы́й посреде́ гре́шник, преста́влен бысть. / Восхище́н бысть, да не зло́ба измени́т ра́зума его́ / или́ лесть прельсти́т ду́шу его́./ Раче́ние бо зло́бы помрача́ет до́брая / и паре́ние похо́ти пременя́ет ум незло́бив. / Сконча́вся вма́ле, испо́лни ле́та до́лга, / уго́дна бо бе Го́сподеви душа́ его́, / сего́ ра́ди потща́ся от среды́ лука́вствия./ Лю́дие же ви́девше, и неразуме́вше, / ниже́ поло́жше в помышле́нии таково́е, / я́ко благода́ть и ми́лость в преподо́бных Его́ / и посеще́ние во избра́нных Его́.

Премудрости Соломони чтение (глава 5 и 6):

Пра́ведницы во ве́ки живу́т, / и в Го́споде мзда их, и попече́ние их у Вы́шняго. / Сего́ ра́ди прии́мут Ца́рствие благоле́пия / и вене́ц добро́ты от руки́ Госпо́дни, / зане́ десни́цею покры́ет я и мы́шцею защи́тит их. / Прии́мет всеору́жие рве́ние свое́ / и вооружи́т тварь в месть враго́м. / Облече́тся в броня́ пра́вды / и возложи́т шлем – суд нелицеме́рен. / Прии́мет щит непобеди́мый – преподо́бие, / поостри́т же напра́сный гнев во ору́жие, / спобо́рет же с ним мир на безу́мныя. / Пойду́т праволу́чныя стре́лы мо́лниины / и, я́ко от благокру́гла лу́ка облако́в, на наме́рение полетя́т. / И, от каменоме́тныя я́рости испо́лнь, паду́т гра́ды. / Вознегоду́ет на них вода́ морска́я, / ре́ки же потопя́т я на́гло. / Сопроти́в ста́нет им дух си́лы, / и, я́ко ви́хор, развее́т их, / и опустоши́т всю зе́млю си́льных. Слы́шите у́бо, ца́рие, и разуме́йте, / навы́кните, судии́ конце́в зе́мли. / Внуши́те, держа́щии мно́жества и гордя́щиися о наро́дех язы́к. / я́ко дана́ есть от Го́спода держа́ва вам / и си́ла от Вы́шняго.

На литии стихиры, глас 6-й:

Днесь, правосла́внии, свяще́нное соверша́ем торжество́, / па́мять чту́ще приснопа́мятнаго отца́ и ста́рца и засту́пника на́шего преподо́бнаго Севастиа́на, / а́нгела бы́вша невеще́ственным житие́м, / свяще́нника Бо́га Вы́шняго и пропове́дника благода́ти, / проро́ка же, я́ко бу́дущая прозира́ше, / до́браго испове́дника, я́ко за Христа́ пострада́вша от безбо́жных гони́телей. / Те́мже и со дерзнове́нием мо́лится / дарова́ти ми́рови мир / и душа́м на́шим ве́лию ми́лость.

Прииди́те христоимени́тии лю́дие, / от коне́ц Казахста́нския земли́ совокупи́вшеся, / прииди́те воспои́м преподо́бнаго ста́рца Севастиа́на Караганди́нскаго, / и́же, я́ко о́блак све́тел и росоно́сен, нам яви́ся, / пла́мень пра́ведно дви́жимаго на ны за грехи́ на́ша гне́ва небе́снаго утиша́ющий, / и страсте́й душе́вных и теле́сных зной охлажда́ющий / излия́нием умиле́нныя моли́твы своея́, / и изсо́хшия на́ша сердца́ оживля́ющий, / плоды́ же доброде́лания приноси́ти помога́ющий / всем с ве́рою и любо́вию притека́ющим к нему́.

Чистото́ю со́вести твоея́ сия́я, / сме́рти теле́сныя не страши́лся еси́, / сего́ ра́ди и свои́х си всеконе́чне отре́клся, / с равноа́нгельными О́птинскими ста́рцами пожи́л еси́, / гоне́ния же и многотру́дныя страда́ния от богопроти́вных прии́м, / апо́стольски в заключе́ниих благовеству́я, / просвети́л еси́ помраче́нныя челове́ки / и Христу́ приве́л еси́ пре́жде диа́вольскую лови́тву, / храм Пресвяте́й Богоро́дице во гра́де Караганде́ воздви́гл еси́, / не я́ко госпо́дствуяй, но я́ко служа́й, во обраще́нных тобо́ю пожи́л еси́, / смире́нием и кро́тостию украша́ем, / те́мже и Бог тебе́ превознесе́ / и дарова́ тебе́ благода́ть проси́ти ми́рови мир, / и душа́м на́шим ве́лию ми́лость.

Слава, глас 5-й:

Ра́дуйся днесь Казахста́нская страна́, / красу́йся и лику́й, Богоспаса́емый град Караганда́, / прие́мшии земле́ю свое́ю то́ки крове́й новому́чеников Росси́йских / и бесчи́сленная страда́льческая тех телеса́. / Многоле́тне в не́дрех свои́х поко́ившии / и святы́я мо́щи преподо́бнаго Севастиа́на испове́дника, / воздая́ние от Христа́ неизглаго́ланное восприи́мшаго, / его́же еди́но и́мя бесо́м губи́тельно есть, / а́нгелом равностоя́теля, песнь трисвяту́ю воспева́юща // и моля́щася о душа́х на́ших.

На стиховне стихиры, глас 2-й:

Честны́й и светоно́сный, преподо́бне Севастиа́не испове́дниче, твой пра́здник, / ра́дости све́тлыя испо́лнен и весе́лия духо́внaго. / Те́мже мона́хов и христоимени́тых люде́й мно́жество соше́дшеся, / псалмы́ и пе́сньми восхваля́ем просла́вльшаго тя, сла́вы Го́спода / и блажи́м христоподража́тельная дея́ния твоя́,/ я́ко бо крин благоуха́нный в пусты́ни Караганди́нской процве́л еси́, / дара́ми духо́вными облагoуха́я душе́вныя на́ша чу́вства / и трисвяту́ю песнь пе́ти Бо́гови подвиза́я: / Аллилу́иа, аллилу́иа, аллилу́иа, сла́ва Тебе́, Бо́же.

Стих: Честна́ пред Го́сподем / смерть преподо́бных Его́.

Небе́сныя пресве́тлыя оби́тели / восприя́ша тя, но́ваго граждани́на, / преподо́бне Севастиа́не прозорли́ве, / в ни́хже, ра́дуяся, со а́нгелы и преподо́бных оте́ц собо́ры водворя́яся, / со апо́столы и проро́ки и святи́тели лику́я, / с му́ченики и пра́ведники торжеству́я, / с весе́лием Присносу́щней Тро́ице предстои́ши, / трисвяту́ю песнь воспева́я: / Аллилу́иа, аллилу́иа, аллилу́иа, сла́ва Тебе́, Бо́жe.

Стих: Блаже́н муж, боя́йся Го́спода, / в за́поведех Его́ восхо́щет зело́.

Я́же боже́ственный язы́ков апо́стол Па́вел, ви́дев, написа́: / о́ко не ви́де, и у́хо не слы́ша, / и на се́рдце челове́ку пло́тяну не взыдо́ша, / я́же угото́ва Бог лю́бящим Его́. / Сих по преставле́нии твое́м, блаже́нне Севастиа́не, дости́г, / непреста́нно Триипоста́сному Божеству́ херуви́мскую песнь взыва́еши: / Аллилу́иа, аллилу́иа, аллилу́иа, / сла́ва Тебе́ Бо́же.

Слава, глас 5:

Пе́сни богогла́сныя прино́сим Ти, Христе́, / Сы́не Единоро́дный и Преве́чнаго Отца́ Сло́ве Соприсносу́щный, / в после́дния дни от Присноде́вы Пречи́стыя и Ду́ха Свята́го воплоти́выйся, / Крест и смерть и погребе́ние пло́тию за грехи́ на́ша претерпе́л еси́ во́лею, / и воскре́сл еси́ сла́вно, я́ко Бог, / челове́ка возводя́ в первообра́зное блаже́нство, / е́гоже до́брый па́стырь, прему́дрый учи́тель и прозорли́вый ста́рец наш Севастиа́н / равноа́нгельное на земли́ житие́ и терпе́ние гоне́ний соверши́в, дости́же. / Его́же моли́твами Иису́се, Царю́ всех, / правосла́вие и мир утверди́ во оте́честве на́шем / и небе́снаго Ца́рствия Твоего́ сподо́би нас.

Тропарь, глас 3-й:

Тро́ицы Святы́я служи́телю, / земны́й а́нгеле и небе́сный челове́че, / духо́внаго О́птинскаго ста́рчества прее́мниче, / Христо́в священнотаи́нниче и испове́дниче, / Ду́ха Свята́го оби́тель всечестна́я, / преподо́бне о́тче Севастиа́не, досточти́ме, / испроси́ ми́рови мир / и душа́м на́шим ве́лию ми ми́лость.

На утрени

По 1-й стихологии седален, глас 4-й:

А́ще и посреде́ молвы́ жите́йския / в заточе́ниих ла́герных пребыва́л еси́ пло́тию, / но от Бо́га мы́слию, моли́тву Иису́сову творя́, не отступа́л еси́ / и Той от ю́ности твоея́ от Тебе́ николи́же отступи́, / преподо́бне Севастиа́не испове́дниче. / Те́мже и мы, гре́шнии, мо́лимся тебе́: / не оста́ви нас немощны́х, / но благода́ть Свята́го Ду́ха привлецы́ на нас / и просвети́ на́ша смы́слы, / прило́ги вра́жиими помраче́нныя.

И ныне, Богородичен, глас тойже:

Услы́ши, Влады́чице, / от боле́зненныя души́ вопию́ща раба́ Твоего́, / и мно́гих лю́тых мои́х зол пода́ждь оставле́ние, / изба́ви негаси́маго огня́ гее́нскаго / и поста́ви мя одесну́ю Сы́на Твоего́, / день бо и нощь предста́тельствуеши о нас, Всесвята́я.

По 2-й стихологии седален, глас 1:

Погуби́х тала́нт мой, его́же во святе́м креще́нии прия́х, / увы́ мне, что сотворю́?/ Где обря́щу други́й? / Ка́ко явлю́ся к нелицеприя́тному Судии́? / Что ли отвеща́ю Ему́? / К тебе́ у́бо притека́ю, преподо́бне Севастиа́не богоно́се, / да бу́деши те́плый засту́пник мой / с Пречи́стою Богоро́дицею, Го́сподеви моля́ся / дарова́ти ми оставле́ние грехо́в / и ми́лость в день су́дный.

Слава, и ныне, Богородичен, глас тойже:

Упра́ви, Влады́чице Чи́стая, / окая́нную мою́ ду́шу и уще́дри ю́, / от мно́жества прегреше́ний во глубину́ поги́бели погрузи́вшуюся и в час мя стра́шный сме́ртный / де́монов оглаго́лющих и вся́кия му́ки исхити́, / покрыва́ющи пречи́стым омофо́ром ми́лости Твоея́.

По полиелеи седален, глас 6-й:

Прииди́те христоимени́тых люде́й мно́жество / в па́мять досточти́маго отца́ и ста́рца на́шего собери́теся, / обстоя́ще всеблагогове́йно честну́ю его́ и многоце́нную ра́ку, / ра́достно лик псало́мский соста́вим днесь / и моле́бно возопии́м ему́: / преподо́бне о́тче наш Севастиа́не, / на небеси́ предстоя́ Христу́ Бо́гу на́шему / и Пречи́стей Де́ве и Ма́тери Его́ / моли́ся о ста́де, тобо́ю собра́нном / изба́витися нам наве́тов вра́жиих, / умири́ти мир и спасти́ ду́ши на́ша.

Слава, и ныне, Богородичен, глас тойже:

Пресвята́я Богоро́дице, / во вре́мя живота́ моего́ не оста́ви мене́, / челове́ческому предста́тельству не вве́ри мя, / но Сама́ заступи́ и поми́луй мя.

Степенна, 1-й антифон 4-го гласа: От юности моея.

Прокимен: Честна́ пред Го́сподем / смерть преподо́бных Его́.

Стих: Что возда́м Го́сподеви о всех, я́же воздаде́ ми?.

Евангелие преподобномученику, от Матфея, зачало 38 (10,32–33; преступка 37–38; преступка 19, 27–30).

По 50-м псалме стихира, глас 6-й:

Ева́нгельски Бо́га возлюби́л еси́, / ми́ра красоту́ и су́етную сла́ву оста́вив, / спаси́тельныя О́птинскаго ста́рчества дости́гл еси́ при́стани, / взем крест свой, после́довал еси́ Христу́, ра́дуяся, / иде́же темни́цею многовре́менною, / неяде́нием лю́тым и долго́тною жа́ждею утомля́емь, / Христа́, посо́бствующа тебе́, обре́л еси́, / преподо́бне Севастиа́не испове́дниче, / те́мже и всели́ся в тя Пресвяты́й Дух, / и́же изведе́ тя от уз темни́чных, / па́стыря и учи́теля заблу́ждшим дарова́, / от диа́вольския лови́твы тех изыма́юща / и к еди́ней, святе́й, собо́рней, апосто́льстей Це́ркви приводя́ща. / Помози́ у́бо и нам, преподо́бне, / от се́тей лука́ваго исхити́ ны, / и доведи́ до Ца́рства Небе́снаго.

Канон Богородице со ирмосом на 6 и преподобному Севастиану на 8, глас 3-й:

Песнь 1.

Ирмос: Су́шу глубороди́тельную зе́млю / со́лнце наше́ствова иногда́: / я́ко стена́ бо, огусте́ обапо́лы вода́ / лю́дем пешемореходя́щим / и богоуго́дно пою́щим: / пои́м Го́сподеви, сла́вно бо просла́вися.

Моле́бное тебе́ пе́ние предначина́я, смуща́юся, о́тче преподо́бне. Ка́ко досто́йно есть воспева́ти тя? Оба́че же от любве́ приноше́ние мое́ приими́ и устне́ мои́ отве́рзи, я́ко да возвещу́ хвалу́ твою́, Севастиа́не, досточти́ме.

Мо́ре страсте́й ты немо́кренно мину́л еси́, преподо́бне, от враг невреди́вся: бесо́в ополче́ния кро́тостию и смире́нием во глубины́ преиспо́дния низве́ргл еси́, безбо́жных же челове́к хуле́ния моли́твою усмири́л еси́, поя́ Го́сподеви, сла́вно бо просла́вися.

Погуби́ огне́м моли́тв твои́х, чудоно́сче, супоста́ты, гоня́щия мя. Се бо злы́я по́мыслы и грехо́вныя дея́ния настиза́ют уже́ и несть мне избавле́ния, а́ще не ты, преподо́бне, защити́ши мя и а́бие истрeби́ши я́, я́коже дре́вле погруже́нныя еги́птянов колесни́цы и триста́ты.

Богородичен: Мои́х прегреше́ний, Влады́чице, плени́цы расто́ргни и томя́щий мя грех, Присноде́во, низложи́, я́ко да благода́рне воспева́ю Тя всегда́, Всенепоро́чная, Тобо́ю спаса́ем.

Песнь 3.

Ирмос: Непло́дная душе́ и безча́дная, / стяжи́ плод благосла́вный, / веселя́щися, возопи́й: / утверди́хся Тобо́ю, Бо́же,/ несть свят, несть пра́веден, / па́че Тебе́, Го́споди.

Де́латель быв, блаже́нне, за́поведем Госпо́дним, непреста́нно в них поуча́яся, любо́вию же Христо́вою воспламеня́ем, в гоне́нии твое́м му́ки претерпе́л еси́ многообра́зныя. Сего́ ра́ди, ра́дуяся, вшел еси в ра́дость Го́спода своего́, вопия́: несть Свят и несть Пра́веден, па́че Тебе́, Го́споди.

Всего́ себе́ возложи́в, преподо́бне, Бо́гови, жили́ще яви́лся еси́ Пресвята́го Ду́ха и а́нгелом и преподо́бных лико́м единонра́вен. Те́мже в небе́сных кро́вех с преждеотше́дшими О́птинскими ста́рцами водворя́яся, единогла́сно воспе́л еси́: несть Свят, несть Пра́веден, па́че Тебе́, Го́споди.

О́браз и́ноческаго жития́ и священства правило был еси, досточти́ме, столп терпе́ния, приме́р му́жества, ве́ры утвержде́ние, наде́жды окрыле́ние, любве́ умноже́ние, бесо́в и лука́вых челове́к посрамле́ние, не ве́дущих пе́ти: несть Свят и несть Пра́веден, па́че Тебе́, Го́споди.

Богородичен: Благоутро́бием Твои́м, Богороди́тельнице, вся́каго мя изба́ви осужде́ния, к Тебе́ прибега́юща, и Тебе́ припа́дающа, и призыва́юща Твою́ благомо́щную по́мощь.

Седален, глас 4-й:

Ми́ра красоту́ и я́же в нем тле́нная нивочто́же вменя́я, / пусты́нное пребыва́ние со О́птинскими ста́рцы па́че возлюби́в, / рукополага́емь же от Христа́ Бо́га, / чистото́ю жития́ свяще́нства оде́жду убели́в, / поноше́ния за Христа́ и гоне́ния, ра́дуяся, прии́м,/ беспло́дную пусты́ню и град Караганду́ облагауха́л еси́, / преподо́бне о́тче Севастиа́не досточти́ме. / Те́мже ны́не гра́да Небе́снаго показа́лся еси́ жи́тель, / в не́мже со а́нгелы и собо́ром святы́х ликовству́я, / помяни́ и нас недосто́йных, / ве́рою и любо́вию почита́ющих тя.

Слава, и ныне, Богородичен:

Мно́жества скве́рных помышле́ний смуща́ют мой ум / и вожделе́ния стра́стная востаю́т на ду́шу мою́. / Кто исцели́ти возмо́жет мя, Пречи́стая? / Воста́ния же и озлобле́ния неви́димых враго́в мои́х кто испове́сть возмо́жет? / Но Твои́ми всеси́льными моли́твами, Блага́я, / от всех сих заступи́ мя, / и избавле́ние соверше́нное да́руй.

Песнь 4.

Ирмос: Положи́л еси́ к нам тве́рдую любо́вь, Го́споди: / Единоро́днаго бо Твоего́ Сы́на / за ны на смерть дал еси́. / Те́мже Ти зове́м, благодаря́ще: / сла́ва си́ле Твое́й, Го́споди.

Со О́птинскими ста́рцы и чудотво́рцы преди́вными, ны́не предстоя́ престо́лу Тро́ицы Живонача́льныя, умоля́еши Бо́га о гра́де твое́м и святе́м хра́ме, утвержде́нном рука́ми твои́ми, зри́ши же и предска́занный тобо́ю вели́чественный но́вый собо́рный храм, гра́ду Караганде́ священноле́пное украше́ние. Не отступа́й от нас ду́хом свои́м, но при́сно огражда́й моли́твами твои́ми, да благода́рне вопие́м: сла́ва си́ле Твое́й, Го́споди.

Зи́му лю́тую и пусты́ни зной ле́тний терпе́нием твои́м победи́л еси́, Христо́в испове́дниче, теплоту́ духо́вную от ве́ры и любве́ стяжа́в. За́поведь же Госпо́дню, е́же зло́му не проти́витися, до конца́ испо́лнил еси́, за гоня́щих и му́чащих тя моля́ся к благи́х Вино́внику вопия́: сла́ва си́ле Твое́й, Го́споди.

Богородичен: Поми́луй, Еди́на Богома́ти, спаси́ и сохрани́ ду́шу мою́ окая́нную, потопля́емую от бесо́в лука́вых де́лы и страстьми́. И пре́жде исхо́да моего́ сию́ покая́нием и исправле́нием очи́стити помози́.

Песнь 5.

Ирмос: К Тебе́ у́тренюю, всeх Творцу́, / преиму́щему всяк ум ми́рови, / зане́ свет – пoвeле́ния Твoя́, / в ни́хжe нacта́ви мя.

Лу́ки злых coкруши́л ecи кро́тким тeрпе́ниeм твoи́м и брaнь их cмире́ниeм дo кoнца́ рaзoри́л ecи́, бoгoму́дрe. Грaд Кaрaгaнду́, я́кo Це́ркви Ру́ccкия гoлго́фу, cе́рдцeм твoи́м вoзлюби́л ecи́, иде́жe в мoли́твe, cвяще́нcтвe, душeпoпeче́нии и cта́рчecтвe пoдвиза́вcя, вeне́ц нeтле́ния cтяжа́л ecи́.

Не устраши́ тебе́, преподо́бне, долгота́ жесто́каго пути́, в о́ньже, Христу́ Бо́гу подража́я, поше́л еси́, от богопроти́вных гони́телей ссыла́емь. И николи́же уклони́лся еси́ от те́снаго пути́, вводя́щаго в ве́чный живо́т, его́же в дни Светоза́рныя Па́схи дости́гл еси́, да богоявле́н свяще́нным твои́м испове́дничеством яви́шися всем.

Тако́в нам подоба́ше архиере́й; преподо́бен, ве́рен, нескве́рнен, незло́бив, язы́ков апо́стол Па́вел, восклица́я, преднаписа́ свяще́нный о́браз богоподража́тельных твои́х нра́вов, досточти́ме. Принеси́ о нас моли́твы твоея́ кади́ло благово́нное, да спасе́т Госпо́дь от ве́чныя ги́бели ду́ши на́ша.

Богородичен: Упова́ние мое́ Ты еси́, Пречи́стая, спасе́ние и похвала́, те́мже прибега́ю к покро́ву Твоему́, не гнуша́йся мене́, грехи́ мно́гими ны́не поглоще́нна, но, предвари́в, спаси́ мя.

Песнь 6.

Ирмос: Бе́здна после́дняя грехо́в обы́де мя, / и исчеза́ет дух мой; / но простры́й, Влады́ко, высо́кую Твою́ мы́шцу, / я́ко Петра́, мя, Упра́вителю, спаси́.

Пое́м мона́шеския по́двиги твоя́, честву́ем у́зы кажде́нием и псалмы́, моще́м твои́м покланя́емся, я́ко арома́ты страда́льчества и терпе́ния миропома́занныя. И ди́вному во святы́х Свои́х Триеди́ному Бо́гу покланя́яся, ублажа́ем тя, досточти́ме.

Но́щию, я́ко днем, бдел еси́ и в житии́ свое́м не дал еси́ сна дово́льна очи́ма твои́ма, ни ве́ждам дрема́ния, до́ндеже сподо́бился еси́ ви́дети пра́ведных селе́ния, пою́щих Па́сху Бо́жию спаси́тельную. Сея́ ра́дости и нас прича́стники сподо́би бы́ти моли́твами твои́ми.

Призва́н быв, преподо́бне, Боже́ственною благода́тию послужи́ти в Казахста́нской стране́ во гра́де Караганде́ Всепречи́стей Ма́тери Бо́жии и равноа́нгельное и́ноческое житие́ лю́дем, та́мо живу́щим, показа́ти. Ты же, я́ко па́стырь и́стинен, разсе́янных от лука́вых гони́телей собира́я, за ста́до свое́ и за мно́гих, хотя́щих спасти́ся, ду́шу свою́ положи́л еси́.

Богородичен: Красоту́ ми ве́дети спод1оби сла́вы Твоея́, егда́ от пло́ти моея́ и́мам разлучи́тися, я́ко утеше́ние мое́ еси́, Влады́чице, ра́дование и умиле́ние.

Кондак глас 3:

В ра́дость Го́спода Воскре́сшаго вше́дшаго, / преподо́бным О́птинским ста́рцем слико́вника, / му́чеников и испове́дников соприча́стника, / священнотаи́нником Бо́жиим сослужи́теля, / зе́мна а́нгела и небе́сна челове́ка, / гра́да Караганды́ боголе́пное украше́ние, / Казахста́нския страны́ богомо́льца изря́дна, / Це́ркви Ру́сския похвалу́ / ублажи́м, ве́рнии, / с весе́лием ему́ вопия́: / ра́дуйся, Севастиа́не, преподо́бне о́тче наш.

Икос:

Ева́нгельскому словеси́ ра́достною душе́ю от мла́да внима́л еси́, преподо́бне, / душе́вный ра́зум впери́в к и́стинному Све́ту, / душетле́нныя стра́сти до конца́ потреби́л еси́, / смире́нным и безмо́лвным житие́м преди́вен бы́вый, / сего́ ра́ди те́плый к Бо́гу о нас хода́тай показа́лся еси́. / Его́же моли́ дарова́ти нам досто́йно, / тебе́ подо́бно, послужи́ти Ему́, / испове́дниче ве́ры благочести́выя и о́бразе кро́тости духо́вныя.

Песнь 7.

Ирмос: Трие́ о́троцы в пещи́, Тро́ицу прообрази́вше, / преще́ние о́гненное попра́ша / и, пою́ще, вопия́ху: / благослове́н еси́, Бо́же оте́ц на́ших.

Нищ ду́хом, по словеси́ Госпо́дню, бога́тство долготерпе́ния и доброде́телей стяжа́л еси́, и́миже угоди́л еси́ Влады́це Небе́сному, и Ца́рство ве́чное унасле́довал еси́, вопия́: благослове́н еси́ Бо́же оте́ц на́ших.

Огнь лю́тый гоне́ний и долготерпе́ние трудо́в боле́зненных, роса́ бысть тебе́, блаже́нне. Фарао́на бо мы́сленнaго мо́рем слез и то́ком моли́тв твои́х потопи́л еси́, в ра́дости душе́вней вопия́: благослове́н еси́, Бо́же оте́ц на́ших.

В седмери́цею разже́нной пещи́ злохуле́ний, гоне́ний и искуше́ний неврежде́н сохрани́выйся, досточти́ме, преподо́бне страда́льче, и мене́ из пла́мене грехо́внаго неопа́льно изми́, да я́коже в житии́ твое́м, та́ко и в чудесе́х твои́х просла́вится благослове́нный Бог оте́ц на́ших.

Богородичен: Я́ко разбо́йник, взыва́ю Ти: помяни́ мя, Человеколю́бче, пла́чу, я́ко блу́дный, и вопию́: ка́ющася приими́, согреши́вша спаси́, Богоро́дицы ра́ди, Многоми́лостиве.

Песнь 8.

Ирмос: Веще́ственнаго огня́ пла́мень / невеще́ственным увяди́ша богозри́мии о́троцы и поя́ху: / благослови́те вся дела́ Госпо́дня, Го́спода.

Тече́ние ве́ры, я́ко со́лнце зе́млю от коне́ц небесе́, прете́кл еси́ до́блественне, я́ко страда́лец – мона́х и Боже́ственный иере́й, сугу́бо от Це́ркви Зижди́теля венча́ем и ра́дуяся, пое́ши: Благослови́те, вся дела́ Госпо́дня, Го́спода.

Путь жития́ простра́нный, сла́достию прельща́ющий нас, облича́й, богому́дре, я́ко лжи́вый, и скорбь вели́кую душа́м нося́й, я́ко да ра́достно в долготерпе́нии сотвори́м у́зкаго пути́ терно́вное ше́ствие, поя́: Благослови́те, вся дела́ Госпо́дня, Го́спода.

Правосла́вным христиа́ном испроси́, преподо́бне, мир, здра́вие и спасе́ние, и на враги́ одоле́ние, да в ра́дости душе́вной возопии́м: Благослови́те, вся дела́ Госпо́дня, Го́спода.

Богородичен: Наляцы́ и ца́рствуй, Иису́се, Царю́ ца́рствующих, правосла́вным спобо́рствуя, и всех окормля́я к Ца́рству бесконе́чныя Твоея́ сла́вы, моли́твами неизрече́нно Ро́ждшия Тя.

Песнь 9.

Ирмос: На Сина́йстей горе́ ви́де Тя в купине́ Моисе́й, / неопа́льно огнь Божества́ заче́ншую во чре́ве, / Дании́л же Тя ви́де го́ру несеко́мую, / жезл прозя́бший, Иса́ия взыва́ше, от ко́рене Дави́дова.

И́ноческая ти́хая и безмо́лвная О́птина пу́стынь от богопроти́вных разоре́нная, и мно́гая ле́та в пла́чи и се́товании бы́вшая, ны́не у́бо ра́достию весели́тся, поне́же не то́кмо первообра́зная красота́ ея́ па́ки возврати́ся, но и цельбоно́сныя мо́щи духоно́сных ста́рец яви́ в ней Бог. С не́ю же и град Караганда́ свесели́тся, еди́наго от ди́внаго преподо́бных оте́ц собо́ра мо́щи досточти́маго Севастиа́на О́птинскаго в себе́ иму́ще, и́же вели́кий Дарода́тель Це́ркви Свое́й дарова́л еси́.

Све́тлостию подвиго́в богоприя́тных просия́л еси́, о́тче, и восприя́л еси́ благода́ть моли́тися о нас, вспомоществу́я ве́рным в по́двизех спасе́ния, я́ко сосу́д Благода́ти Бо́жия изря́дный.

Непристу́пным све́том Боже́ственным осиява́ем, и в вы́шних оби́телех со святы́х ли́ки водворя́яся, Зижди́телю вся́ческих и Спаси́телю челове́ков о ста́де, тобо́ю собра́нном, моля́ся неоску́дно не прeста́й, приле́жно про́сим тя, досточти́ме.

Богородичен: Пощади́ мя, Го́споди, егда́ прии́деши суди́ти ми́ру всему́, и не осуди́ мене́ по достоя́нию дел мои́х, но ми́лостию Твое́ю спаси́ мя, моли́твами Пречи́стыя Богоро́дицы, предста́тельством преподо́бнаго Севастиа́на, досточти́маго испове́дника, и всех святы́х, от ве́ка Тебе́ благоугоди́вших.

Светилен, глас 6:

Возлю́бленное и вожделе́нное тебе́ от млада́го во́зраста / светоно́сное и́мя Иису́сово, / его́же всегда́ во уме́ и се́рдце моли́твою держа́л еси́, / но́ваго тя, Моисе́ю подо́бнаго, богови́дца соде́ла, / во мрак та́инственный священнота́йне входя́щаго. / Те́мже, небоявле́нне Севастиа́не досточти́ме, / и мою́ ду́шу, мра́ком грехо́вным покрове́нную, / просвeти́ любве́ Иису́совы заре́ю, / и на безстра́стия го́ру смире́нием возведи́.

Слава, и ныне, Богородичен, глас тойже:

Светоза́рная Бо́жия пала́то / и недоуме́нный Светода́вца Престо́ле, / Ма́ти Безневе́стная, / просвeти́ нас све́том Сы́на Твоего́, / да о́браз Бо́жий, помраче́нный страстьми́, / па́ки сла́вою первозда́нною просия́eт в нас, / вои́стинну Богоро́дицу Тя испове́дающих.

На хвалитех стихиры, глас 2-й:

Богому́дре о́тче Севастиа́не, / ду́шу твою́ и те́ло от страсте́й очи́стив, / Свято́му Ду́ху оби́тель прекра́сная яви́лся еси́, / и́же тя сла́вна прозорли́вца конце́м Росси́йским показа́ / и в чудесе́х вели́ка свети́льника соде́ла, / просвеща́ющаго во тьме грехо́в су́щих, / те́мже, я́ко наста́вника тя всем ве́рным, / соше́дшеся, досточе́стне, ублажа́ем.

Я́ко му́дрый строи́тель, / не на песце́ самонаде́яния, / но на ка́мене Христо́вы ве́ры / дом доброде́тели твоея́ смире́нием созида́л еси́, / те́мже ника́я скорбь и теснота́, / ниже́ ко́е искуше́ние и беда́, / ни гоне́ние, ни муче́ние / не возмого́ша от любве́ Бо́жия разлучи́ти тебе́, / досточти́ме богому́дре о́тче Севастиа́не,/ моли́твами твои́ми спаси́ ду́ши на́ша.

Вся пристра́стия мирска́я оста́вил еси́: / ни име́ния когда́, блаже́нне Севастиа́не, стяжа́в, / ни сла́достей и прохлажде́ния жития́ вожделе́в, / ни сла́вы су́етныя возлюби́в. / Те́мже, егда́ Воскре́сший Госпо́дь возгласи́ тебе́, / ра́достно душе́ю твое́ю к Нему́ прише́л еси́ / и, я́ко испове́дник, в черто́зе А́гнчем водвори́лся еси́, / я́ко еди́н от страда́льцев Казахста́нския земли́ / и блаже́нный сонасле́дник Христо́в. / Ему́же не преста́й моля́ся, / спасти́ и просвети́ти ду́ши на́ша.

Слава, глас тойже:

Ве́лие вои́стинну чу́до зрим: / ка́ко ты, богоно́се Севастиа́не, в ми́ре живы́й / и собла́зны отвсю́ду окруже́н, / равноа́нгельныя доброде́тели испо́лнил еси́ / и, проти́ву духо́в зло́бы поднебе́сных / во пло́ти подвиза́вся, / тех кре́пость низложи́л еси́, / проти́ву же богоотсту́пных и богоху́льных челове́к неи́стовства / кро́тость, смире́ние и моли́тву безмо́лвную яви́л еси́. / Безсме́ртия сла́вою от Подвигополо́жника Христа́ увенча́нный, / не преста́й моля́ся Тому́ / дарова́ти оте́честву на́шему мир // и душа́м на́шим ве́лию ми́лость.

И ныне, Богородичен гласа.

Славословие великое и отпуст.

На Литургии

Блаженны от канона, песни 3-я и 6-я.

Прокимен: Честна́ пред Го́сподем / смерть преподо́бных Его́.

Стих: Что возда́м Го́сподеви о всех, я́же воздаде́ ми.

Апостол Ефес. зачало 233 (6, 10–17).

Аллилуарий: Свяще́нницы Твои́ облеку́тся в пра́вду/ и преподо́бнии Твои́ возра́дуются.

Блаже́н муж боя́йся Го́спода, в за́поведех Его́ восхо́щет зело́.

Евангелие от Луки, зачало 64 (12, 8–12).

Причастен: В па́мять ве́чную бу́дет пра́ведник:

Источник: Митрополия.кз

Месяца октября в 10-й день

Святителя Иннокентия, епископа Пензенскаго и Саратовскаго

На велицей вечерни

На Господи, воззвах: стихиры, глас 1.

Подобен: Начало ныне положим:

Ныне время наста, о празднолюбцы,/ во псалмех и пениих прославити/ Бога, дивнаго во святых Своих,/ воздвигшаго нам днесь Иннокентия преславнаго,/ молящагося тепле о душах наших.

Песненными добротами/ украшается днесь Церковь первородных,/ воспевающи невинности тезоименитаго,/ святителя Пензенскаго и Саратовскаго,/ яко предивна своего ходатая/ и молитвенника о душах наших.

Троицы Пребезначальныя служителя предобра/ и лжемудрствований посрамителя изрядна/ память ныне нам наста./ Темже убо стецемся, людие,/ похвалити сего тщащеся,/ яко велика земли нашея светильника/ и молитвенника о душах наших.

Ины стихиры, глас 4:

Сияет, яко солнце, светлостию/ память святителя Твоего, Господи, Иннокентия,/ обличившаго нечестие златословесными глаголы,/ человекоугодие и высоковыйных превозношение посрамившаго,/ кротких землю достигшаго,/ егоже молитвами даруй нам грехов очищение,/ яко Благ и Человеколюбец.

Врачуеши страсти и души просвещаеши верных,/ притекающих ко святей раце мощей твоих,/ ангелов собеседниче, архиереев сопрестольниче,/ апостолов единонравне, исповедников равностоятелю,/ преподобных сожителю, благоверия поборниче,/ предстателю наш, славне Иннокентие.

Многим воздержанием, святителю, жизнь твою украсив,/ путь, ведущий в жизнь вечную, указал еси/ и евангельским учением шествовал еси,/ жестоким же житием плоть твою изнуряя,/ гордаго змия воздержанием победил еси./ Темже, на Небесех водворяяся,/ Богови предстоиши, святе Иннокентие,/ егоже моли согрешений оставление даровати/ чтущим любовию святую память твою.

Слава, глас тойже:

Радуйся и веселися о Господе/ богоизбранная паство святителя,/ ныне песньми венчаемаго,/ яко, таковаго светильника и отца себе имущи,/ духовная чада нарекостеся,/ егоже прослави Бог знаменьми и чудесы преславными,/ обильно исцеления приходящим к нему дарующа./ Темже, припадающе, ему возопиим:/ о, всеблаженне Иннокентие, отче наш,/ непрестанно моли Всесвятую Троицу,/ да Небеснаго Царствия улучити сподобимся.

И ныне, Богородичен: Иже Тебе ради:

Вход. Прокимен дне. И чтения три святительская.

На литии стихира, глас 4:

Суетная мудрования отложше, блаженне,/ Православия держатися неотступно научал еси/ и, стеснения скорбная претерпевая,/ восприятие будущия радости провидел еси,/ да многотрудным житием и ученьми/ источник приснотекущий небесныя сладости/ нам, недостойным, покажеши.

Слава, глас тойже:

Вся убо могий о укрепляющем тя Христе,/ болезни и немощи смиренно претерпевая,/ на Бога все упование возложил еси,/ мирскаго же пристрастия гнушаяся/ и сущая мира, яко не сущая, вменяя,/ чистым умом и немятежным сердцем выну Богу послужил еси,/ темже, сосуд Святаго Духа явився,/ моли, святителю Иннокентие, помиловатися душам нашим.

И ныне, Богородичен:

Несть душам нашим ослабы, ниже избавления,/ токмо молитвами Твоими, Мати Дево,/ и милостию от Тебе Воплощшагося Спаса Христа,/ к Нему же взываем,/ на ходатайство Твое надежду крепку имуще,/ да спасет и сохранит всех нас,/ песньми Тя, яко Богородицу, величающих.

На стиховне стихиры, глас 1:

О, блаженне святителю Иннокентие,/ егда суемудреннии восташа на Церковь Божию,/ мечем обоюдоострым учения истиннаго сих посекл еси,/ верныя же щитом правоверия оградил еси,/ сего ради поношения претерпел еси,/ да земли Русской явишися/ новое и преславное украшение.

Стих: Нога моя ста на правоте,/ в церквах благословлю Тя, Господи.

О, пречудне отче Иннокентие,/ ныне Церковь Русская ублажает тя,/ яко тверда исповедника веры,/ чудес обильных реку источающаго,/ и святителя всечестна,/ паству твою добре упасшаго,/ мы же, земнороднии,/ яко чада ко отцу, тебе вопием,/ еже помиловатися нам в День судный.

Стих: Суди ми, Господи,/ яко аз незлобою моею ходих.

О, славне Иннокентие,/ егда скорбныя нахождения во смирении претерпел еси,/ тогда глас Господень пресладкий на тебе исполнися,/ яко изгнаннии правды ради блажени суть,/ сего ради, венцем нетленным украсився,/ дерзновение велие от Владыки приял еси,/ еже молитися о душах наших.

Слава, глас 8:

Земля Русская, духовно процветши,/ яко крин прекрасный износит днесь/ святителя пречудна Иннокентия,/ иже молитвами своими облагоухавый ю,/ явися нам великий заступник/ и ходатай о душах наших.

И ныне, Богородичен, глас тойже: Безневестная Дево:

Тропарь, глас 5:

От юности смиренным нареченный,/ во иночестве же чистоте тезоименный,/ духовныя мудрости любитель явился еси,/ златовещанный благочестия учителю/ и лживых пагубных учений обличителю,/ за Истину нечестивыми гонимый,/ незлобие и кротость проповедавый/ и паству Пензенскую ревностне пасый,/ святителю всечестне Иннокентие,/ моли Христа Бога умудрити нас во спасение.

На утрени

На Бог Господь: тропарь святаго дважды. Слава, и ныне, Богородичен.

По 1-м стихословии седален, глас 3:

Человецы ликовствуют духовно, обретоша бо молитвенника и предстателя и, похвальными венцы Иннокентия украшающе, яко угодника Христова прославляют егоже молитвами, Господи, от страстей и бед избави нас.

Слава, и ныне, Богородичен:

Избави нас молитвами Твоими, Владычице, согрешений бездны, демонскаго озлобления, языческаго пленения и злонравных лукавнейшаго вреда, да Тя, яко Избавительницу нашу, величаем.

По 2-м стихословии седален, глас 4:

Страдания за истину подъем, святителю, теми душу твою очистил еси, ныне же Христа Бога моли, да в доброделании нас укрепит, грехов очищение подаст и спасет души наша.

Слава, и ныне, Богородичен:

Настави ны на путь покаяния, уклоняющияся присно в безпутие зол и Преблагаго прогневавшия Господа, Неискусобрачная Благословенная Марие, Заступнице Усердная рода христианскаго.

По полиелеи седален, глас 2:

Отребие миру, погружаему в пучине лжеучения, вменился еси, святе Иннокентие, но обаче не возможе тя разлучити от любве Божия, яже о Христе Иисусе, Господе нашем, ни скорбь, ни теснота, ни самая смерть.

Слава, и ныне, Богородичен:

Востани, Пречистая Мати, и воздежи руце Твои молебне к Сыну Твоему и Богу купно со святителем Иннокентием, да избудем многих бед и зол, присно по грехом нашим обуреваемии.

Степенна, 1-й антифон 4-го гласа. Прокимен, глас 4: Священницы Твои облекутся в правду/ и преподобнии Твои возрадуются. Стих: Блажен муж, бояйся Господа, в заповедех Его восхощет зело. Всякое дыхание: Евангелие от Луки, зачало 64.

По 50-м псалме стихира, глас 6:

Святителю отче Иннокентие,/ тобою мнози грады и обители хвалятся,/ Московския бо земли славное прозябение явился еси,/ град же святаго Петра и Новаграда честная обитель Юрьевская/ постническими подвиги твоими украшаются,/ земля Пензенская и пределы Саратовския/ процветоша, словесы твоими напаяеми,/ ныне же, во Граде Небеснем вселяяся,/ поминай нас, чтущих память твою.

Канон, глас 2, егоже краегранесие: Нищету духовную стяжати сподоби, отче.

Песнь 1.

Ирмос: Грядите, людие,/ поим песнь Христу Богу,/ раздельшему море и наставльшему люди,/ яже изведе из работы египетския,/ яко прославися.

Небесный Царю, смиренную душу мою от скверн очисти и слова благодать низпосли, да возмогу достойно воспети угодника Твоего, преславнаго Иннокентия.

Имуще тя предстателя добра к щедрому Богу, нас, напастьми и обстоянии скорбными одержимых, укрепи, подая руку спасения, святителю милостиве Иннокентие.

Щедр и незлобив пастве своей явился еси, отче Иннокентие, темже, Духа Божия исполненный, ума моего омрачение отжени, страстей бурю утиши, к безстрастия пристанищу управи и от злых устен защити твоих молитв покровом.

Богородичен: Егда Божиим повелением от временныя жизни отъити хощу, Пречистая, бесовския руки мя свободи, Ангелы в спутники подаждь и рая вкусити сподоби, идеже Иннокентий святитель с безплотными лики сладости божественныя наслаждается.

Песнь 3.

Ирмос: На камени мя веры утвердив,/ разширил еси уста моя на враги моя,/ возвесели бо ся дух мой, внегда пети:/ несть свят, якоже Бог наш,/ и несть праведен, паче Тебе, Господи.

Припев: Святителю отче Иннокентие, моли Бога о нас.

Тя, смиренне Иннокентие, всесветла светильника, не под спудом, но на высоте свещника Церкве Христовы поставлена, усердно молим: светоносными лучами глубокую тьму греха отжени, неверных к познанию Истины настави, шатания умов низложи, нас же во Православии укрепи.

Уставил еси, премудре Иннокентие, струями твоего богоглаголиваго языка ложныя токи суемудренных, иже, яко безсильнии, не возмогоша мутными водами лжеучения потопити ны. Темже вопием ти: токи страстей наших изсуши и ко благочестию настави.

Духа Божия исполнився, зловония века сего низложил еси, кадильнице благовонная, Иннокентие блаженне, и паству твою учением Православныя Церкве облагоухал еси. Темже тя, яко наставника предобра, верно восхваляем.

Богородичен: Упование и стена и тихое пристанище еси людем Твоим, Пресвятая Дево, Всесвятаго Сына Твоего умоли спасение нам улучити, да непрестанно в невечернем свете славу Триединому Богу воспеваем.

Ин кондак, глас 3.

Подобен: Дева днесь:

Днесь святитель Христов Иннокентий/ предстоит Престолу Божию/ и с лики святых за ны молится Богу,/ емуже ныне со умилением покланяемся/ и во псалмех и пениих величаем,/ обретохом бо молитвенника ко Превечному Богу.

Седален, глас 3:

О, неизреченныя благости Божия! О, неизглаголаннаго Его смотрения! Честныя мощи святителя Иннокентия ныне обретошася, души верных утешающе и на брань противу козней лукаваго укрепляюще. К нимже припадающе, усердно вопием: ущедри нас молитвами твоими, святителю Бога Всещедраго.

Слава, и ныне, Богородичен:

Иже Отцу Сопрестольный Сын на земли воплощся, яко человек, из утробы Твоея, Чистая, пройде, порфирою кровей Твоих в наше оболкийся естество, да падшия ны человеки возставит и Небеснаго Сиона гражданы явит.

Песнь 4.

Ирмос: Услышах, Господи,/ славное Твое смотрение/ и прославих, Человеколюбче,/ непостижимую Твою силу.

Храм Всесвятаго Духа, добродетельми сияяй, мирови явился еси, святителю честный, научение книжное прилежно стяжав, тайны неизреченныя судеб Божиих постигл еси, и списанием дел времен минувших верныя премудро во благочестии даже доныне наставляеши, да зовем благодарне: слава силе Твоей, Господи.

Оружием мудрости божественныя препрел еси нечестивых, исповедниче честный. Поношения и гонения за истину благодушне претерпевая, земную мудрость нивочтоже вменяя, непрестанно взывал еси: слава силе Твоей, Господи.

В Небесныя чертоги Ангели Божии вознесоша чистую душу твою, блаженне, идеже со святители и исповедники Престолу Всевышняго предстоиши, укрепльшему тя на подвиги велия, непрестанно взывая: слава силе Твоей, Господи.

Богородичен: Недвижимое утверждение веры и яко многоценный дар душам нашим, Богородицу во псалмех и пениих духовных восхвалим, вернии, да избавит от мук вопиющих к Рождшемуся из Нея: слава силе Твоей, Господи.

Песнь 5.

Ирмос: Света Подателю и веков Творче, Господи,/ во свете Твоих повелений настави нас:/ разве бо Тебе, иного бога не знаем.

Укрепляемь силою Троическою, преблаженне, проповедник велегласный пастве Саратовской явился еси, вопия: возвеличите Господа со мною, и вознесем Имя Его вкупе. Темже и мы Владыку Небесе и земли величаем: инаго бо разве Тебе бога не знаем.

Юность свою постом и молитвою благоукрасил еси, мудре, и священства благодать непорочно стяжати сподобился еси. И ныне, Престолу Вседержителя предстоя, молися, славне Иннокентие, да от языка лукаваго и озлобления свободимся и огня вечнаго избавимся.

Святителей удобрение и исповедников похвало, чудес источниче, умоли Зиждителя, егоже пришествие при дверех есть, обрести нам грехов оставление.

Твоих словес наставления, еже Православие в чистоте всем содержати, чужеземным же лжеучением никакоже прилеплятися, объяша всю землю Русскую, ты бо Вышнему выну взывал еси: инаго бо разве Тебе бога не знаем.

Богородичен: Яже мирови мир подавшая и Начальника тишины рождшая, укроти волнение страстей моих, Чистая, и на камени безстрастия мя утверди, Сыну Твоему взывающа: инаго бо разве Тебе бога не знаем.

Песнь 6.

Ирмос: Ко Господу от кита Иона возопи:/ Ты мя возведи из глубины ада, молюся,/ да, яко Избавителю, во гласе хваления/ истины же Духом пожру Тебе.

Житием твоим, а не токмо ликом, святителю Димитрию Ростовскому подобяся, душу твою, блаженне, яко рай богонасажденный, сотворил еси; безумнии же, яко сор, отринуша тя, не терпяще силы словес твоих. Темже, отче, и нас темных падений греховных избави.

Архиерей чуден и нравов исправитель и душ устроитель показался еси, ревностне о людех твоих пекийся, мирским же начальником противустал еси, злоковарство и лихоимство тех обличая, святе Иннокентие.

Туне есть тщание наше достойное пение тебе сотворити, Иннокентие предивне, но, яко Христос прият вдовицы две лепте, тако и ты не возгнушайся похвальных словес наших и малый сей труд приими, в похвалу тебе приносимый.

Богородичен: Избавльшеся Тобою от бед и скорбей, Мати Безневестная, и Тебе ради радость получивше, Тя, яко Подательницу благую и Заступницу верную, вси величаем.

Кондак, глас 8:

Священнаго и боговещаннаго проповедника/ и дивнаго премудрости учителя/ вчинил еси, Господи, в наслаждение благих Твоих и покой,/ труды бо онаго и блаженную кончину/ паче всякаго всеплодия прием,/ едине Прославляяй святыя Своя.

Икос:

Житие непорочное явил еси, святителю Иннокентие, невинности тезоименный, и, веры ради скорбных нахождения претерпев, чистою душею к Престолу Господню притекл еси, прехвальне. Ныне же, райския пищи наслаждаяся, о иже на земли поющих тя Владыку Христа умоли, знаменьми и чудесы Прославляющаго святыя Своя.

Песнь 7.

Ирмос: Образу златому, на поли Деире служиму,/ трие Твои отроцы небрегоша безбожнаго веления,/ посреде же огня ввержени, орошаеми, пояху:/ благословен еси, Боже отец наших.

Скорбная искушения и лютая обстояния смирением попрал еси, тех и нас молитвами твоими избави, блаженне, вопиющих: благословен еси, Боже отец наших.

Пение псаломское воспеша людие, и при словесех: аз же, Господи, уповаю на Тя, душа твоя святая от тела разлучися. Нас же, на всемощныя молитвы твоя надеющихся, утверди непрестанно взывати: благословен еси, Боже отец наших.

О нас милостивныя твоя длани ко Владыце молебне простирай, святе Иннокентие, и, соблазнов избавляя, неотлучно с нами духом пребывай, отче преподобне, наставляя в молитве звати Творцу: благословен еси, Боже отец наших.

Богородичен: Да человеки падшия обожит, явися Сын Твой, Владычице, совершен Человек. Сего убо моли причастники Божества сотворити поющия: благословен еси, Боже отец наших.

Песнь 8.

Ирмос: В пещь огненную ко отроком еврейским снизшедшаго/ и пламень в росу преложшаго Бога/ пойте, дела, яко Господа,/ и превозносите во вся веки.

О всеславнем прославлении твоем, святителю, людие Русстии возвеселишася, явился бо еси чудотворец изящный и ходатай пред Богом предивный, Того умоляя о вопиющих: пойте, дела, яко Господа, и превозносите во вся веки.

Божиим Промыслом сохранены быша от поругания святыя мощи твоя, святителю Иннокентие, аще и храм, идеже погребено бысть тело твое, от безбожных разорися. Ныне же целы явишася и, яко звезда пресветлая, просвещают всех притекающих к ним и Богу зовущих: пойте, дела, яко Господа, и превозносите во вся веки.

Избави нас, святителю Христов, сетей вражиих молитвами твоими и окорми живот наш силою Всещедраго Бога, Емуже с тобою покланяемся, велегласно вопиюще: да благословит тварь вся Господа и превозносит во вся веки.

Богородичен: Отеческия славы не отступль, волею к нашей худости снизшел еси, Сладчайший Иисусе, и от Девы плоть приял еси. Еяже молитвами избави рабы Твоя от бед и скорбей.

Песнь 9.

Ирмос: Безначальна Родителя Сын, Бог и Господь,/ воплощся от Девы, нам явися,/ омраченная просветити, собрати расточенная./ Тем Всепетую Богородицу величаем.

Тело твое честное, священне Иннокентие, с верою приступающим исцеления источает, страстей различных тьму отгоняет и светом невечерним просвещает всех, хвалящих тя.

Чистоту ума стяжав, Духа Святаго жилище был еси, богоблаженне, благодать же святительства прием, проповедник изящный и учитель искусный показался еси, научая люди православно исповедати в Троице Единаго Бога.

Едине Блаже, Христе Многомилостиве, в молитву Тебе ныне приводим угодника Твоего Иннокентия. Не презри ходатайства его грех наших ради, но помилуй нас, верою взывающих: заступничеством святителя нашего, Господи, помилуй нас.

Троичен: Тебе неприступному Богу и Славы Царю Трисолнечному, Строителю и Промыслителю всяческих, Единому Благому и Сущему, Божества державу имущему, песнь Трисвятую воспевающе, покланяемся присно и непрестанно величаем.

Богородичен: Отроковице Всенепорочная, Мати, Дево Пречистая, Сына и Бога Твоего милостива сотвори нам и страстей лютых избави.

Светилен:

Веселится ныне земля Саратовская, людие же Пензенстии тебе покланяются и Христа величают, обретоша бо великое сокровище.

Слава, и ныне, Богородичен:

Владычице Всемилостивая, просвещение помраченных душ наших, Свет истинный миру рождшая, со святителем пречудным Иннокентием Сына Твоего и Бога умоли о всех нас.

На хвалитех стихиры, глас 4:

Жительство наше есть на Небесех,/ сице божественный Павел рече,/ ты же, святе Иннокентие,/ весь ум твой к Горним возвысив,/ прекраснаго онаго рая, еще в телеси сый, вкусити сподобился еси./ Темже ныне, с Горними лики водворяяся,/ нас, еще долу сущих,/ молитвами твоими присно ограждай.

Сила Божия в немощи совершается,/ тако глаголет Господь,/ ныне зрим слов сих на тебе преславное сбытие,/ яко немощен плотию,/ Духа усердный ратоборец показался еси,/ лжеименных учений усердный обличитель и доблестный отгнатель./ Испроси и нам, отче Иннокентие,/ от Подвигоположника Христа мужества дар,/ во еже противостати духу мира сего,/ и молитвами твоими нас присно ограждай.

Ины стихиры, глас 2.

Подобен: Егда от Древа:

Егда душа твоя разлучашеся/ от тленнаго сего жития,/ тогда псалмопевца слышати сладчайший глас,/ еже упование твое на Господа есть,/ сподобился еси, предивне Иннокентие./ Ныне же, в раи сладости вчиняяся,/ уже не в сениих и гаданиих,/ но лицем к лицу зриши Господа/ и прославляеши Святую Троицу.

Егда страдания за истину претерпевал еси,/ тогда во отребие и уметы себе самаго вменил еси,/ святителю смиренне, отче Иннокентие,/ Бог же, зряй вся тайная,/ на свещнице святительства тебе устави/ и венец нетленный тебе подаде./ Днесь же, небесными и земными гласы ублажаемь,/ Господеви помолися, исповедниче,/ от всяких лютых нам избавитися.

Слава, глас 5:

Единому токмо Богу нашему/ всякую славу, честь и поклонение/ в дусе и истине приносити верно подобает,/ тако от Церкве Божия научены есмы,/ но, яко подобие Его в себе возрастившия,/ да почтутся от нас святии Его,/ яко приснии Божии друзи и доблии венечницы,/ в ихже сонме, яко пресветлая звезда,/ Иннокентий святитель нам возсия./ Мы же к нему днесь тепле вопием:/ яко дерзновение стяжавый ко Спасу нашему,/ от всяких лютых молитвами твоими нас ограждай.

И ныне, Богородичен:

Земля Русская,/ дом Пречистыя Богородицы от лет древних нареченная,/ многия милости Ея улучи,/ темже и мы с верою и упованием сице вопием:/ не престай заступати нас, Царице и Владычице,/ пучины греховныя избавляющи/ и спасение душам нашим подающи.

Славословие великое, ектении и отпуст.

На Литургии

Блаженна от канона, песни 3-я и 6-я. Прокимен, глас 1: Уста моя возглаголют премудрость,/ и поучение сердца моего разум. Стих: Услышите сия, вси язы́цы,/ внушите, вси живущии по вселенней. Апостол ко Ефесеем, зачало 233. Аллилуиа, глас 4: Уста праведнаго поучатся премудрости. Стих: Язык его возглаголет суд. Евангелие от Иоанна, зачало 36. Причастен: В память вечную будет праведник:

Молитва

О, угодниче Божий, святителю Христов Иннокентие! Призри от славы твоея Горния и приими молитвы нас, грешных и недостойных рабов твоих, зде пред образом твоим честным [или святыми мощьми твоими] припадающих и тепле молящихся, и принеси я ко Престолу вся содержащаго в руце Своей Бога, Емуже ты во вся дни жизни твоея усердно послужил еси. Моли, угодниче Божий, Всемилостиваго Спаса Христа за богоданную паству твою, отжени от земнаго Отечества твоего вся соблазны, раздоры и нестроения, Церковь Христову и град наш святыми твоими молитвами от расколов, прельщения иноверием и наветов злых человек огради. Всех же нас в единомыслии и любви друг ко другу соедини, да едиными усты и единем сердцем воспоем всесвятое и единодержавное Имя Отца и Сына и Святаго Духа во веки веков. Аминь.

Источник: Текст утвержден Священным Синодом Русской Православной Церкви 9 июля 2019 года (журнал № 82)

Месяца октября в 11-й день

Служба собору преподобных отцев Оптинских

На вечерни

На Господи, воззвах: стихиры, глас 8.

Подобен: О, преславнаго чудесе:

О, преславнаго чудесе! / Днесь ликует обитель Оптинская, / память преподобных отцев празднующи, / иже духовная дарования источают обильно. / Темже, с любовию к ним возопиим: / о, теплии молитвенницы наши ко Господу, / испросите нам прощение согрешений / и, яко звезды непрелестнии, / путеводите ны к Царствию Небесному.

О, преславнаго чудесе! / Днесь ликует обитель Оптинская / прославляющи честныя мощи преподобных отцев, / иже в житии израстиша прекрасный плод благочестия / и, яко ваия благоуханныя процветше, / любовь евангельскую нам явиша. / Тех молитвами, Христе Боже, / не отвержи нас от лица Твоего / и даруй нам мир и велию милость.

О, преславнаго чудесе! / Днесь ликует обитель Оптинская / благодатию святых своих красующися, / иже души и телеса многонедужная врачуют. / Темже и мы, духовно радующеся, / Господа дивнаго во святых Своих прославляем / и, на их предстательство надеющеся, / Христа Бога нашего умоляем / даровати нам велию милость.

Слава, глас 6:

Днесь благодать Святаго Духа нас собра, / песньми священными прославити / собор преподобных отцев Оптинских, / иже вернии служителие Святыя Троицы явишася. / Сего ради, вернии, к Богу с любовию возопиим: / святый Боже, святый Крепкий, / святый Безсмертный, помилуй нас.

И ныне, Богородичен: Кто Тебе не ублажит:

Вход. Прокимен дне и чтения преподобническая.

Премудрости Соломоновы чтение (главы 5 и 6):

Праведницы во веки живут, и в Господе мзда их, / и попечение их у Вышняго…

Премудрости Соломоновы чтение (глава 3):

Праведных души в руце Божией, / и не прикоснется им мука. / Непщевани быша во очесех безумных умрети, / и вменися озлобление исход их…

Премудрости Соломоновы чтение (глава 4):

Праведник, аще постигнет скончатися, в покои будет. / Старость бо честна не многолетна, / ниже в числе лет исчитается. / Седина же есть мудрость человеком…

На литии стихиры храма.

На стиховне стихиры, глас 5.

Подобен: Радуйся:

Радуйтеся, отцы достоблаженнии, / Духа Святаго сосуди избраннии, / монахов утверждение и священников благолепие, / благочестия столпи непоколебимии. / Вы бо, дар разсуждения в подвизе стяжавше, / тьму прелести присно отгоняете / и приходящия к вам с верою и упованием / на спасения стези наставляете. / Молите спастися душам нашим.

Стих: Честна пред Господем / смерть преподобных Его.

Радуйтеся, веры стражи неусыпнии, / служителие Господни изряднии, / монахом наставницы и ангелом собеседницы, / во бранех духовных человеком поборницы. / Вы бо молитвою непрестанною / миру присно свет подаваете / и притекающия к вам с любовию / душетленных страстей избавляете. / Молите спастися душам нашим.

Стих: Восхвалятся преподобнии во славе / и возрадуются на ложах своих.

Радуйтеся светильницы многосветлии, / врачеве безмезднии, / недугующим отрадо и скорбящим утешение, / обуреваемым пристанище немятежное. / Вы бо, именем Христовым всяку язю исцеливше, / болящим здравие душ и телес подаваете / и молящихся к вам усердно / верою и надеждою исполняете. / Молите спастися душам нашим.

Слава, глас 8:

Приидите, празднолюбцы, / воспоим преподобных отцев Оптинских собор, / иже, вертоград возделавше духовный, / добродетели божественныя в нем насадиша. / Темже и, райския сады унаследовавше, / вечныя славы причастницы явишася, / но яко дерзновеннии ходатаи ко Господу, / молитеся неусыпно о чадех ваших: / да всежеланный плод покаяния принесем Владыце Христу / и вкусим от древа жизни в Царствии Небеснем.

И ныне, Богородичен, глас тойже.

Тропарь, глас 5:

Православныя веры светильницы, / монашества неколебимии столпи, / земли Российския утешителие, / преподобнии старцы Оптинстии, / любовь Христову стяжавшии / и души своя за чада полагавшии, / молитеся ко Господу, / да утвердит земное отечество наше / в православии и благочестии / и спасет души наша.

На утрени

По 1-м стихословии седален, глас 4:

Приидите, вернии, в песнех духовных преподобных отцев почтим: / тии бо, во славе Царствия Небеснаго пребывающе, / за ны молят Всемилостиваго Бога, / да поставит нас одесную Себе / в день славнаго и страшнаго пришествия Своего.

Слава, и ныне, Богородичен, глас тойже:

Храм Славы была еси и дверь Света, Пречистая Дево: / темже обитель Твою, юже славит имя Твое непрестанно, / от всех бед огради, / молитвами угодник Твоих, Всецарице.

По 2-м стихословии седален, глас 1:

Днесь церкве русския торжество и отечества нашего веселие, / се бо обитель Оптинская мощами преподобных, яко златом нетленным, красуется / и памятию святых своих благоухает. / Темже приступите к ним всяк возраст и всяко сословие, в радости вопиюще: / слава Прославльшему вас, / слава Давшему вам благодать, / слава Подающему вами всем исцеления.

Слава, и ныне, Богородичен, глас тойже:

Пречистый Твой покров простираеши, / Владычице Боголюбивая, над отечеством нашим / и со преподобными отцы непрестанно молиши Рождшагося от Тебе, / сыновом Российским спастися.

По полиелеи седален, глас 6:

Божественный полк всечестных отцев / песненными венцы украсим, боголюбцы; / тии бо, демонов полчища победивше, / веру православную в человецех утверждают. / Их предстательством, Господи, приими моления наша / и даруй нам велию милость.

Слава, и ныне, Богородичен, глас тойже:

Владычицу мира в песнех почтим, / Та бо Спаса и Благодетеля душ наших родила есть. / Темже зовем Пречистей, якоже иногда Гавриил Архистратиг: / радуйся, Благодатная, / радуйся, Благословенная, / радуйся, Обрадованная, Господь с Тобою.

Степенна, 1-й антифон 4-го гласа.

Прокимен, глас 4: Честна пред Господем / смерть преподобных Его. Стих: Что воздам Господеви о всех, яже воздаде ми?

Всякое дыхание: Евангелие от Матфея, зачало 43.

По 50-м псалме стихира, глас 6:

Иже на земли ангели / и на небеси человецы Божии, / мира благое украшение / и отечества нашего утверждение, / монахов и преподобных похвалу, / собор преподобных отцев Оптинских почтим: / насаждени бо в дому Господни / и процветше праведно, / многия заблудшия на путь спасения наставили есте / в преподобии и правде.

Канон преподобным отцем, глас 8.

Песнь 1.

Ирмос: Колесницегонителя фараоня погрузи, / чудотворяй иногда / Моисейский жезл, крестообразно поразив / и разделив море, / Израиля же беглеца, пешеходца спасе, / песнь Богови воспевающа.

Припев: Преподобнии отцы Оптинстии, молите Бога о нас.

Како восхвалим вас, преподобнии, добре подвиги совершившыя, / веру спасительную соблюдшия и Церковь богоугодным житием возвеселившия? / Темже молим, подайте нам разум, достойно воспети вас.

Кто исповесть болезни и труды многоскорбнаго жития вашего, отцы преподобнии, / имиже соделали есте души ваша сосуды благодати Божия? / Темже прославляем святую память вашу.

Вземше на рамена своя благое иго Христово, / усердно подвизалися есте, отцы преблаженнии, / и, тесным путем шествующе, / достигли есте Царствия Небеснаго.

Богородичен: О, Пресвятая Дево, Мати Бога Вышняго, / приими моления рабов Твоих, с верою к Тебе прибегающих, / Ты бо еси Пристанище необуреваемое православных христиан.

Песнь 3.

Ирмос: Утверждей в начале Небеса разумом / и землю на водах основавый, / на камени мя, Христе, заповедей Твоих утверди, / яко несть свят, паче Тебе, Едине Человеколюбче.

Радуйся, отче Паисие, Молдовлахийская похвало, / умнаго делания наставниче и духовнаго окормления возродителю, / твои бо ученицы по всей земли Российстей / монашеское благочестие преумножили есте.

Слезами многими и скорбным житием / Феодор, инок Свирский, на высоту добродетелей возшед, / преподобнаго Льва любовию духовне породи, / имже в Оптине пустыни старчество утвердися.

Основание твердое подвигом положив Христа, яко камень краеугольный, / был еси первоначальник сонму старцев, преподобне отче Льве, / и приял еси благодать духовно окормляти монахи и люди страждущия.

Богородичен: Бога зряще воплощаема из Тебе, Дево, / удивишася горнии силы. / Мы же Тя, яко сущую Богородицу, непрестанно величаем.

Седален, глас 4:

Житейское море воздержанием непоколеблемо преплывше, / ко пристанищу безстрастия и совершеннаго образа благочестия пристали есте, / богоноснии подвижницы Оптины пустыни, / и покой душам вашим обрели есте, / егоже обеща Христос Бог учеником Своим.

Слава, и ныне, Богородичен:

Тя, Мати Божия, роди родов поют, славят и Тебе поклоняются, / избави нас от всяких злых наветов вражиих, / Твои бо есмы раби, да не постыдимся.

Песнь 4.

Ирмос: Ты моя Крепость, Господи, / Ты моя и Сила, / Ты мой Бог, Ты мое Радование, / не оставль недра Отча / и нашу нищету посетив. / Тем с пророком Аввакумом зову Ти: / силе Твоей слава, Человеколюбче.

Блажен еси воистину, преподобне отче Макарие, / яко насытил еси благодатным словом и писаньми алчущих души / и напоил еси жаждущия правды.

Вся земля Российская позна имя твое, святый отче Амвросие, / ты бо, помощь духовную людем щедро подавая, / всем вся был еси и любовию души омраченныя просвещал еси.

Духом Святым наставляемь, / в Рославльскую пустынь вселился еси, преподобне отче Моисее, / отонюдуже во обитель Оптинскую призван быв, / чадолюбивый отец и мудрый наставник монахом явился еси.

Богородичен: Един от Святыя Троицы воплотися от Тебе, Пречистая, / да спасет весь род человеческий от работы вражия / и вечнаго осуждения.

Песнь 5.

Ирмос: Вскую мя отринул еси / от лица Твоего, Свете Незаходимый, / и покрыла мя есть чуждая тьма, окаяннаго, / но обрати мя и к свету заповедей Твоих / пути моя направи, молюся.

Благий единоревнитель брату твоему по плоти явился еси, преподобне отче Антоние, / ему же в послушании пребывая, / терпением болезней, скорбей и лютых искушений / Царствия Небеснаго достигл еси.

Уклонився от мира и вся, яже в мире оставль, отче Иларионе, / благий ярем послушания преподобным Льву и Макарию понесл еси. / Сего ради, многими дарами обогатився, / искусный наставник явился еси.

Умом в горняя устремляяся, / усердный делатель молитвы Иисусовой был еси, преподобне отче Анатолие, / тяжкую же болезнь на земли безропотно претерпев, / ныне на Небеси в лице Оптинских святых радуешися.

Богородичен: Все наше упование на Тя возлагаем, Мати Дево, / призри на ны, люди согрешившия, / с верою чающия от Тебе заступления и спасения.

Песнь 6.

Ирмос: Очисти мя, Спасе, / многа бо беззакония моя, / и из глубины зол возведи, молюся, / к Тебе бо возопих, и услыши мя, / Боже спасения моего.

Сотаинник святаго Амвросия быв, преподобне отче Иосифе, / и благодать старчества от него восприем, / многия люди, паче же сестры обители Шамординския, окормлял еси. / Не остави молитвами твоими и нас, чтущих святую память твою.

Славу земную презрев, преподобне отче Варсонофие, / во обитель Оптину по слову Господню стопы твоя направил еси, / идеже, премудростию Божиею напитався, / мудрыя века сего управил еси.

Нектар духовный на лугу Оптинстем, яко пчела многотрудная, собрав, / верным разумно раздавал еси, блаженне Нектарие. / Напоследок же свидетель истинный разорения обители быв, / о страждущих людех сугубо молился еси.

Богородичен: Владычице Богородице, / отверзи нам двери милосердия Твоего, / Ты бо еси спасение рода христианскаго.

Кондак, глас 6:

Печальницы теплии народа Божия, / преподобнии отцы Оптинстии, / грешныя в покаянии утвердивше, / нищия духом обогативше, / плачущия утешивше, / алчущия и жаждущия правды насытивше, / изгнанным за правду Божию душею спострадавше, / вся ко спасению наставили есте. / Ныне же, во славе небесней пребывающе, / молитеся непрестанно о душах наших.

Икос:

Днесь светло торжествует пустынь Оптина, / прославляющи всечестный собор богомудрых отцев, / иже, древним отцем поревновавше, / благочестие возлюбиша и многия люди светом евангельским просветиша. / Темже и мы воспеваем им сице: / радуйтеся, душевных болезней врачеве; / радуйтеся, недугов телесных целителие. / Радуйтеся, непрестанныя молитвы делателие; / радуйтеся, о грешницех к Богу ходатаи. / Радуйтеся, старцы богомудрии, / вы бо во славе небесней пребываете, молящеся непрестанно о душах наших.

Песнь 7.

Ирмос: Божия снисхождения / огнь устыдеся в Вавилоне иногда. / Сего ради отроцы в пещи, радованною ногою, / яко во цветнице, ликующе, пояху: / благословен еси, Боже отец наших.

Яко строитель мудрый, / благолепием обитель украсил еси, преподобне отче Исаакие, / и словесы простыми кротце братию наставляя, поучал еси пети: / благословен еси, Боже отец наших.

В годину скорбную утешитель людем страждущим явился еси, преподобне отче Анатолие, / елеем милости сердца ожесточенная умягчая и научая взывати: / благословен еси, Боже отец наших.

Исполнение пророчеств старца Варсонофия / о грядущих бедах России узрел еси, преподобне отче Никоне, / и, со смирением гонения и болезни претерпев, с упованием взывал еси: / благословен еси, Боже отец наших.

Богородичен: Простри руце Твоя, Преблагословенная Дево, / к Сыну Твоему, Христу Богу нашему, молящи усердно, / да помилует нас, грешных, по велицей Своей милости.

Песнь 8.

Ирмос: Седмерицею пещь / халдейский мучитель / богочестивым неистовно разжже, / силою же лучшею спасены сия видев, / Творцу и Избавителю вопияше: / отроцы, благословите, / священницы, воспойте, / людие, превозносите во вся веки.

В смирении претерпел еси вся злострадания, отче преподобномучениче Исаакие, / и, крест взем на рамо, добропобедно житие твое скончал еси / и тако вшел еси в радость Господа твоего, воспевая: / благословите, вся дела Господня, Господа.

В изгнании и скорбех житие ваше скончавше, / венцы нетленныя прияли есте, богоноснии отцы Оптинстии, ведомии и неведомии, / и ныне в горних обителех прославляете Отца нашего Небеснаго, взывающе: / благословите, вся дела Господня, Господа.

Прославляюще днесь собор старцев Оптинских, / иже многосветлыми добродетельми просияша / и многия люди на путь истины наставиша, / воспоим, вернии, Богу благодарственную песнь, взывающе: / благословите, вся дела Господня, Господа.

Богородичен: Неусыпаемую в молитвах Заступницу обрете Тя, Непорочная Дево, человеческий род. Темже радующеся, поем: благословите, вся дела Господня, Господа.

Песнь 9.

Ирмос: Ужасеся о сем Небо / и земли удивишася концы, / яко Бог явися человеком плотски / и чрево Твое бысть пространнейшее Небес. / Тем Тя, Богородицу, / Ангелов и человек чиноначалия величают.

Вознесите молитвы ваша горе, преподобнии отцы, / о всех чтущих святую память вашу, / да возможем и в скорбных обстояниих благоугодити Богу / и наследовати жизнь вечную.

Монахов множества ныне торжествуют, / ублажающе собор богоносных отцев, Богом дивно прославленных, / тех бо молитвами обитель Оптинская созидается / и Церковь Русская во благочестии утверждается.

Се отверзошася вам врата небесная, отцы святии, / скончавшим добре житие на земли, / и ныне вкупе со ангельским воинством зрите славу Божию, / непрестанно славословяще Триипостасное Божество.

Богородичен: Родила еси безлетнаго Сына, Пречистая, / плоть нашу приемшаго и Кровию Своею на Кресте грехи людския омывшаго, / Сего убо моли избавити нас от вечныя смерти.

Светилен:

Светильник ногам вашим закон Божий положивше, отцы преподобнии, / обители Духа Пресвятаго явистеся и заступницы земли Российския показастеся. / О нас непрестанно молите, почитающих верою пречестную память вашу, / добродетелей мудрии учителие и истиннии наставницы веры.

Слава, и ныне, Богородичен:

Сладосте ангелов, скорбящих Радосте, / христиан Предстательнице, Дево Мати Господня, / заступи нас и избави от вечныя муки.

На хвалитех стихиры, глас 6.

Подобен: Все отложше:

Все отложивше о земных попечение / и страстей мучительство отринувше, / преподобнии отцы богомудрии, / просветистеся благодатию, / и, яко светила возсиявше, / просвещаете всю подсолнечную / и молитеся о чтущих святую память вашу.

Духовная светила земли нашея, / на тверди церковней светло возсиявше, / к тихому пристанищу нас наставляете / и, от житейских страстей избавляюще, / кроткими словесы и любовию / радости духовныя исполняете / и со дерзновением молитеся о душах наших.

Преподобнии отцы Оптинстии, / вы истинне лицем к лицу, / ныне зрите славу Господню / и райския жизни наслаждаетеся, / юже уготова Бог всем любящим Его. / И нас сию улучити сподобите, / совершающих святую память вашу.

Слава, глас 8:

Приидите, благочестия ревнителие, / отцы наша духовныя похвалим: / Леонида, Моисея и Антония, / Исаакия, Макария и Анатолия, / с нимиже Илариона и Варсонофия, / со Иосифом славнаго Амвросия, / инаго Анатолия и Нектария, / и преподобномученики Никона и Исаакия. / Старцы великия песньми почтим, / сице взывающе: / преподобнии отцы богомудрии, / не престайте о нас молитися, / вы бо есте заступницы наши.

И ныне, Богородичен, глас тойже:

Владычице, прими молитвы раб Твоих / и избави нас / от всякия нужды и печали.

На Литургии

Блаженны от канона песни 3-я и 6-я. Прокимен, глас 7: Честна пред Господем / смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуия, глас 6: Блажен муж, бояйся Господа, / в заповедех Его восхощет зело. Стих: Сильно на земли будет семя его. Евангелие от Луки, зачало 24. Причастен: Радуйтеся, праведнии, о Господе, / правым подобает похвала.

Молитва

О, божественный сонме, преподобнии отцы, богоноснии старцы и новомученицы Оптинстии, ангельским житием на земли просиявшии и в небеснем граде прославленнии! Вемы, яко во дни земнаго служения вашего никтоже тощь и неутешен от вас отыде, вы бо всем вся бысте: сомнящимся утверждение, скорбящим утешение, печальным радование, кающимся прощение, грешником вразумление, болящим исцеление.

Ныне же, пред Престолом Божиим предстояще, воззрите от горния славы и посетите благосердием вашим нас, немощных и безпомощных: заблуждшия взыщите, расточенныя соберите, прельщенныя обратите и совокупите Святей, Соборней и Апостольстей Церкви; иже во иночестем житии подвизающияся оградите от всех навет вражиих, юность вразумите, старость поддержите, супружества в мире и единомыслии соблюдите.

Услышите нас, божественнии врачеве, наставите на путь покаяния и научите в заповедех Господних присно ходити, да сподобимся ходатайством вашим Царствия Небеснаго, идеже вкупе с вами прославим Бога, дивнаго во святых Своих, Отца и Сына и Святаго Духа, во веки веков. Аминь.

Источник: Текст службы утвержден на заседании Священного Синода 25 декабря 2009 года (журнал №131)

Ме́сяца октября́ в 11-й день

Преподо́бнаго Льва О́птинскаго

На вели́цей вече́рни

На Го́споди, воззва́х: стихи́ры, глас 8.

Подо́бен: Что вы нарече́м:

Что тя нарече́м, о́тче Льве?/ А́нгела ли? Я́ко во пло́ти безпло́тным поревнова́л еси́./ Серафи́ма ли? Я́ко непреста́нными бде́ньми Христа́ просла́вил еси́./ Херуви́ма ли? Я́ко на тебе́ опочи́ Дух Святы́й?/ Архистрати́га ли собо́ра О́птинских отце́в?/ Я́ко низложи́л еси́ бесо́в шата́ния/ и воево́да всеиску́сен яви́лся еси́ Царя́ Христа́,/ Его́же моли́ спасти́ся душа́м на́шим.

Что тя нарече́м, о́тче Льве?/ Пусты́нных ли Боже́ственное украше́ние,/ или́ по́стников сла́вное удобре́ние,/ преподо́бных досто́йную похвалу́,/ или́ мона́шествующих ди́вное весе́лие?/ Ты бо ума́стил еси́ сердца́ ве́рных еле́ем Ду́ха/ и наста́вил еси́ нас на стези́ спаси́тельныя./ Моли́ Христа́ Бо́га спасти́ся душа́м на́шим.

Преподо́бне о́тче Льве,/ па́стырю до́брый и стра́же неусы́пный,/ в простоте́ и незло́бии пребыва́я,/ мона́хов мно́жество упа́сл еси́/ и, пу́ты пре́лести растерза́в,/ мы́сленныя во́лки отгна́л еси́./ Те́мже и ублажи́ тя Небе́сный Па́стырь Христо́с,/ Его́же моли́ спасти́ся душа́м на́шим.

Преподо́бне о́тче Льве,/ сосу́де Бо́жия прему́дрости,/ ре́ки бо наставле́ний и поуче́ний пото́ки/ от се́рдца твоего́ источи́л еси́/ и жа́ждущия ми́лости Небе́сныя напои́л еси́./ Те́мже и мы, к тебе́ усе́рдно прибега́юще, те́пле вопие́м:/ сердца́ на́ша изсо́хшая/ благода́тию Христо́вою напита́й.

Сла́ва, глас 6:

Днесь благода́ть Свята́го Ду́ха нас собра́,/ пе́сньми свяще́нными просла́вити/ собо́р отце́в преподо́бных О́птинских,/ и́же ве́рнии служи́телие Святы́я Тро́ицы яви́шася./ Сего́ ра́ди, ве́рнии, к Бо́гу с любо́вию возопии́м:/ святы́й Бо́же, святы́й Кре́пкий,/ святы́й Безсме́ртный, поми́луй нас.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния преподо́бническая.

На лити́и стихи́ры хра́ма.

На стихо́вне стихи́ры собо́ра ста́рцев О́птинских, глас 5.

Подо́бен: Ра́дуйся:

Ра́дуйтеся, отцы́ достоблаже́ннии,/ Ду́ха Свята́го сосу́ди избра́ннии,/ мона́хов утвержде́ние и свяще́нников благоле́пие,/ благоче́стия столпи́ непоколеби́мии./ Вы бо, дар разсужде́ния в по́двизе стяжа́вше,/ тьму пре́лести при́сно отгоня́ете,/ и приходя́щия к вам с ве́рою и упова́нием/ на спасе́ния стези́ наставля́ете./ Моли́те спасти́ся душа́м на́шим.

Стих: Честна́ пред Го́сподем/ смерть преподо́бных Его́.

Ра́дуйтеся, ве́ры стра́жи неусы́пнии,/ служи́телие Госпо́дни изря́днии,/ мона́хом наста́вницы и А́нгелом собесе́дницы,/ во бра́нех духо́вных челове́ком побо́рницы./ Вы бо моли́твою непреста́нною/ ми́ру при́сно свет подава́ете,/ и притека́ющия к вам с любо́вию/ душетле́нных страсте́й избавля́ете./ Моли́те спасти́ся душа́м на́шим.

Стих: Восхва́лятся преподо́бнии во сла́ве/ и возра́дуются на ло́жах свои́х.

Ра́дуйтеся, свети́льницы многосве́тлии,/ вра́чеве безме́зднии,/ неду́гующим отра́до и скорбя́щим утеше́ние,/ обурева́емым приста́нище немяте́жное./ Вы бо, и́менем Христо́вым вся́ку я́зю исцели́вше,/ боля́щим здра́вие душ и теле́с подава́ете,/ и моля́щихся к вам усе́рдно/ ве́рою и наде́ждою исполня́ете./ Моли́те спасти́ся душа́м на́шим.

Сла́ва, преподо́бнаго, глас 6:

Наста́вниче ди́вный, о́тче Льве,/ первонача́льниче ста́рцев О́птинских,/ учи́телю ве́ры и благоче́стия,/ духо́вными да́ры обогати́вся,/ всем подае́ши потре́бная:/ скорбя́щим утеше́ние,/ изнемога́ющим от страсте́й исцеле́ние,/ неду́жным врачева́ние,/ гре́шником вразумле́ние./ Сего́ ра́ди просла́вим Христа́ Бо́га на́шего,/ дарова́вшаго нам уго́дника ди́внаго/ и моли́твенника о душа́х на́ших.

И ны́не, Богоро́дичен, глас то́йже.

Тропа́рь собо́ру ста́рцев О́птинских, глас 6:

Правосла́вныя ве́ры свети́льницы,/ мона́шества неколеби́мии столпи́,/ земли́ Росси́йския уте́шителие,/ преподо́бнии ста́рцы О́птинстии,/ любо́вь Христо́ву стяжа́вшии/ и ду́ши своя́ за ча́да полага́вшии,/ моли́теся ко Го́споду,/ да утверди́т земно́е оте́чество на́ше/ в правосла́вии и благоче́стии/ и спасе́т ду́ши на́ша.

Тропа́рь преподо́бному, глас 3:

По́стническими труды́ украси́вся,/ со ученики́ преподо́бнаго Паи́сия подвиза́лся еси́,/ от ни́хже ста́рчества благода́ть прии́м,/ сие́ во оби́тели О́птинстей насади́л еси́./ Те́мже, богоблаже́нне о́тче Льве,/ я́ко име́яй дерзнове́ние ко Го́споду,/ моли́ от страсте́й нас изба́вити/ и спасти́ ду́ши на́ша.

На у́трени

По 1-м стихосло́вии седа́лен собо́ру ста́рцев О́птинских, глас 4:

Прииди́те, ве́рнии, в пе́снех духо́вных преподо́бных отце́в почти́м:/ ти́и бо, во сла́ве Ца́рствия Небе́снаго пребыва́юще,/ за ны мо́лят Всеми́лостиваго Бо́га,/ да поста́вит нас одесну́ю Себе́/ в день сла́внаго и стра́шнаго прише́ствия Своего́.

Сла́ва, седа́лен преподо́бнаго, глас то́йже:

Плотски́я стра́сти уздо́ю воздержа́ния укроти́в,/ ра́зум духо́вный пребога́тно стяжа́л еси́, Льве присносла́вне,/ его́же моли́ и нам получи́ти у Христа́ Бо́га,/ да насле́дники Ца́рствия Его́ яви́мся.

И ны́не, Богоро́дичен, глас то́йже:

Бу́рею напа́стей и треволне́ний грехо́вных потопля́емь/ и лука́выми по́мыслы в бе́здну отча́яния влеко́мь,/ усе́рдно вопию́ Ти:/ Влады́чице Пречи́стая,/ спаси́ мя, раба́ Твоего́.

По 2-м стихосло́вии седа́лен собо́ру ста́рцев О́птинских, глас 1.

Днесь Це́ркве Ру́сския торжество́ и оте́чества на́шего весе́лие,/ се бо оби́тель О́птинская моща́ми преподо́бных, я́ко зла́том нетле́нным, красу́ется/ и па́мятию святы́х свои́х благоуха́ет./ Те́мже приступи́те к ним всяк во́зраст и вся́ко сосло́вие, в ра́дости вопию́ще:/ сла́ва Просла́вльшему вас,/ сла́ва Да́вшему вам благода́ть,/ сла́ва Подаю́щему ва́ми всем исцеле́ния.

Сла́ва, седа́лен преподо́бнаго, глас 4:

Я́ко ди́вная прозябе́ния виногра́да Боже́ственнаго/ возрасти́ Христо́с ча́да твоя́, преподо́бных Мака́рия и Амвро́сия,/ и́мже наста́вник яви́лся еси́, Льве прему́дре./ Ны́не же с ни́ми во Ца́рствии Небе́снем пребыва́еши/ и прославля́еши Тро́ицу Единосу́щную и Неразде́льную.

И ны́не, Богоро́дичен, глас то́йже:

Я́ко Храм и Престо́л Царе́в, Пречи́стая,/ се́рдце мое́, страстьми́ безме́стными оскверни́вшееся, очи́сти,/ и, целому́дрием украси́вши, де́лы благи́ми обогати́, Богоблагода́тная.

Велича́ние:

Ублажа́ем тя,/ преподо́бне о́тче Льве,/ и чтим святу́ю па́мять твою́,/ наста́вниче мона́хов/ и собесе́дниче А́нгелов.

Псало́м избра́нный преподо́бным.

По полиеле́и седа́лен собо́ру ста́рцев О́птинских, глас 6:

Боже́ственный полк всечестны́х отце́в/ пе́сненными венцы́ украси́м, боголю́бцы;/ ти́и бо, де́монов по́лчища победи́вше,/ ве́ру правосла́вную в челове́цех утвержда́ют./ Их предста́тельством, Го́споди, приими́ моле́ния на́ша/ и да́руй нам ве́лию ми́лость.

Сла́ва, седа́лен преподо́бнаго, глас то́йже:

Моли́твами твои́ми укрепля́еми, Льве досточу́дне,/ дерза́ем к Бо́гу взыва́ти:/ пода́ждь нам, Го́споди, сокруше́ние серде́чное и чистоту́ помысло́в,/ па́мять сме́ртную и кончи́ну непосты́дную,/ да, изба́вльшеся зло́бы духо́в поднебе́сных,/ безбе́дне про́йдем мыта́рства и Ца́рствия Небе́снаго дости́гнем.

И ны́не, Богоро́дичен, глас то́йже:

Тя, Ма́ти Де́во Чи́стая, Предста́тельницу тве́рду ве́мы/ и Богороди́тельницу испове́дуем и́стинно,/ Бо́га бо Сло́ва неизрече́нно родила́ еси́./ Сего́ ра́ди Тя вси́ досто́йно пе́сньми велича́ем.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра собо́ру ста́рцев О́птинских, глас 6:

И́же на земли́ А́нгели/ и на небеси́ челове́цы Бо́жии,/ ми́ра благо́е украше́ние/ и оте́чества на́шего утвержде́ние,/ мона́хов и преподо́бных похвалу́,/ собо́р преподо́бных отце́в О́птинских почти́м:/ насажде́ни бо в дому́ Госпо́дни/ и процве́тше пра́ведно,/ мно́гия заблу́дшия на путь спасе́ния наста́виша/ в преподо́бии и пра́вде.

Кано́н собо́ру ста́рцев О́птинских, глас 8.

И преподо́бному кано́н, глас 2,

его́же краегране́сие: Ра́дуйся, Льве, ста́рчества О́птинскаго глави́зно.

Песнь 1.

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь,/ сла́вно бо просла́вися.

Припе́в: Преподо́бне о́тче наш Льве, моли́ Бо́га о нас.

Ра́зум даждь нам, Всеси́льне Го́споди,/ досто́йно воспе́ти уго́дника Твоего́,/ Льва прему́драго, ста́рца О́птинскаго,/ чистоты́ и милосе́рдия ева́нгельскаго испо́лненнаго/ и ду́хом прему́дрости све́тло укра́шеннаго.

А́нгельски на земли́ пожи́в, преподо́бне,/ и, служе́ние ста́рческое, я́ко крест, благопослу́шне от Го́спода прии́м,/ му́дрый наста́вник мно́гим и́ноком и миря́ном яви́лся еси́.

Ду́хом Бо́жиим наставля́емь,/ та́йну челове́ческаго се́рдца проразумева́л еси́,/ смиренному́дрый уго́дниче о́тче Льве,/ те́мже и мно́гия лю́ди к Небе́сному Ца́рствию приве́л еси́.

Богоро́дичен: Упова́ние на́ше и похвало́, Де́во Чи́стая,/ Христа́ Спа́са моли́,/ оставле́ние прегреше́ний нам пода́ти,/ ве́рою и любо́вию Тя почита́ющим.

Песнь 3.

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая це́рковь,/ прише́ствием Твои́м,/ в не́йже утверди́ся мое́ се́рдце.

И́стину ева́нгельскую возлюби́в и ку́плю жите́йскую оста́вив,/ к мона́шескому житию́ устреми́лся еси́, преподо́бне,/ нищету́ духо́вную стяжа́в и му́жественне греху́ противоста́в,/ горды́ню злоко́зненнаго врага́ посрами́л еси́.

Свою́ во́лю нивочто́же вменя́я, о́тче преподо́бне,/ пустыннолю́бцу Фео́дору после́довал еси́/ и, сла́дость послуша́ния и поко́й безмо́лвия вкуси́в,/ страсте́й треволне́ние, богоблаже́нне, укроти́л еси́.

Я́ко сын послуша́ния и учени́к добронра́вный, богому́дре Льве,/ преда́ние оте́ческое насле́довал еси́,/ его́же преподо́бный Паи́сий, я́ко боже́ственныя кла́сы собра́.

Богоро́дичен: Ли́цы А́нгельстии пою́т Тя, Богора́дованная Влады́чице,/ Херуви́ми же и Серафи́ми досто́йно славосло́вят,/ не пре́зри и хвалы́ земноро́дных, воспева́ющих Тя.

Седа́лен, глас 4:

Я́ко страж Бо́жий, вои́стину яви́лся еси́, о́тче Льве,/ ста́до твое́ неусы́пно и бо́дренне сохраня́я,/ и ны́не огради́ нас моли́твами твои́ми,/ ве́рою и любо́вию па́мять твою́ соверша́ющих.

Сла́ва, и ны́не, Богоро́дичен:

Я́ко Боже́ственный Мир, Спа́са Христа́, поро́ждши, Де́во Чи́стая,/ мир ми́рови и спасе́ние всем подала́ еси́,/ те́мже и жизнь на́шу умири́ и ду́ши спаси́, я́ко Блага́я.

Песнь 4.

Ирмо́с: Огне́м очи́щся та́йнаго зре́ния,/ поя́ проро́к челове́ков новоде́йство,/ возглаша́ет глас, Ду́хом пле́щущ,/ воплоще́ние неизрече́нна Сло́ва,/ И́мже си́льных держа́вы сотро́шася.

Всем приходя́щим к тебе́ наста́вник му́дрый яви́лся еси́, о́тче Льве,/ и просла́вися житие́ твое́,/ умертви́в бо мудрова́ния плотска́я,/ глуби́ны ве́дения, широты́ любве́ и высоты́ смире́ния дости́гл еси́.

Егда́ к Бо́гу любо́вию возгоре́лся еси́ и усе́рдно Тому́ послужи́ти восхоте́л еси́,/ тогда́, я́ко зе́млю и пе́пел себе́ вменя́я,/ в пусты́ню безмо́лвия удали́лся еси́, о́тче преподо́бне.

Свети́льник све́тел в пусты́ни яви́вся,/ мрак бесо́вский дале́че прогна́л еси́,/ моли́тву же непреста́нную в се́рдце, я́ко меч в руце́, име́я,/ де́монов зло́бу посрами́л еси́.

Богоро́дичен: Тя Предста́тельницу тве́рду ве́мы/ и Богороди́тельницу и́стинную испове́дуем,/ я́ко Бо́га Сло́ва неизрече́нно родила́ еси́, Мари́е Де́во,/ те́мже спаса́й Тя призыва́ющия.

Песнь 5.

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику Отцу́ Твоему́,/ от но́щи неве́дения,/ приведе́ние и́мамы.

А́нгельскаго жития́ взыску́я,/ на стезю́ и́ночества невозвра́тным по́мыслом ступи́л еси́/ и, му́дрость отце́в преподо́бных стяжа́в,/ наста́вник и уте́шитель мно́гим яви́лся еси́, богоблаже́нне.

Ра́достно днесь сла́вит оби́тель Валаа́мская по́стническия труды́ твоя́, о́тче Льве,/ зде бо и́ноческия по́двиги со преподо́бным Фео́дором подъя́л еси́,/ и ны́не с ним на Небеси́ ку́пно ра́дуешися.

Чистоту́ се́рдца и ум све́тел стяжа́л еси́, о́тче,/ де́лы благи́ми и чудесы́, я́ко свети́льник многосве́тлый, сия́я,/ и пре́лести тьму богодарова́нным ти разсужде́нием изобличи́л еси́.

Ели́цы ку́пли ра́ди духо́вныя к тебе́ прихожда́ху,/ зла́том смиренному́дрия обогаща́хуся,/ те́мже и на́шу нищету́ уще́дри, о́тче Льве,/ ева́нгельских доброде́телей вели́кое сокро́вище стяжа́вый.

Богоро́дичен: Све́тлый О́блаче, Со́лнце ми́ра, Го́спода Иису́са, носи́вши,/ покры́й мир от собла́знов,/ и зе́ницы оче́с духо́вных просвети́,/ во е́же сла́ву Твою́ мы́сленно зре́ти/ и любо́вию пе́ти Тя, Всеблаже́нная.

Песнь 6.

Ирмо́с: Во глубине́ грехо́вней содержи́мь есмь, Спа́се,/ и в пучи́не жите́йстей обурева́емь:/ но я́коже Ио́ну от зве́ря,/ и мене́ от страсте́й возведи́, и спаси́ мя.

Те́сным путе́м ше́ствуя,/ житие́ богоуго́дне испра́вил еси́, преподо́бне,/ в О́птину же пу́стынь всели́вся,/ духо́вный вертогра́д устро́ил еси́.

Ве́лиих искуше́ний пучи́ну преплы́в,/ би́сер у́мныя моли́твы, я́ко добр купе́ц, обре́л еси́/ и пу́стынь О́птинскую, я́ко духо́вную сокро́вищницу,/ зла́том оте́ческаго преда́ния обогати́л еси́, о́тче Льве.

Адама́нт тверд в терпе́нии искуше́ний де́монских, на тя воздвиза́емых, яви́лся еси́, преподо́бне,/ те́мже боле́зни и труды́, ско́рби и гоне́ния,/ я́ко И́ов, кро́тко претерпе́л еси́, на Бо́га упова́я.

Оте́ческою любо́вию в боле́знех и ско́рбех су́щих покрыва́л еси́/ и му́чимых от духо́в нечи́стых исцеля́л еси́/ си́лою на тебе́ почи́вшаго Всесвята́го Ду́ха.

Послушли́в и рачи́телен, я́ко пчела́ боже́ственная, быв,/ некта́р духо́вный собра́л еси́, богому́дре Льве,/ и́мже ча́да церко́вная и мона́шествующих собо́ры препита́л еси́.

Богоро́дичен: Тве́рду ве́ру даждь ми, Влады́чице,/ я́ко мно́гими прило́ги смяте́ся се́рдце мое́,/ ве́тром бесо́вских искуше́ний обурева́емо,/ но упра́ви ше́ствие мое́, Богоневе́сто,/ Ты бо при́стань оти́шная рабо́м Твои́м.

Конда́к преподо́бному, глас 6:

Те́сным путе́м в житии́ твое́м ше́ствуя,/ на высоту́ доброде́телей возше́л еси́/ и, благода́ть па́стырства от Бо́га прии́м,/ слове́сныя о́вцы до́бре упа́сл еси́/ и ста́рчеству тве́рдое основа́ние/ во оби́тели О́птинстей положи́л еси́./ Те́мже ны́не, преподо́бне о́тче Льве,/ предстоя́ Пресвяте́й Тро́ице,/ моли́ спасти́ся благоче́стно тя почита́ющим.

И́кос:

И́стиннаго смире́ния и послуша́ния де́латель быв,/ дар благода́ти Бо́жия стяжа́л еси́/ и, жезл ста́рчества от Благода́теля вся́ческих прии́м,/ Христо́во ста́до слове́сных ове́ц на па́житех благоче́стия упа́сл еси́/ и мона́шествующих до́бре наста́вил еси́./ Те́мже по блаже́ннем преставле́нии твое́м,/ Престо́лу Святы́я Тро́ицы во сла́ве ны́не предстоя́,/ моли́ спасти́ся благоче́стно тя почита́ющим.

Песнь 7.

Ирмо́с: О́бразу злато́му на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния:/ посреде́ же огня́ вве́ржени, ороша́еми поя́ху:/ благослове́н еси́, Бо́же оте́ц на́ших.

Иску́с подъя́л еси́, богому́дре Льве, жития́ по́стническаго/ и взыску́ющим о́наго и́стинный путево́ждь яви́лся еси́,/ наставля́я их взыва́ти:/ благослове́н еси́, Бо́же оте́ц на́ших.

Неду́зи врачу́ются и де́мони отбега́ют моли́твами твои́ми, о́тче Льве,/ те́мже мно́зии с ве́рою к ра́це моще́й твои́х притека́ют и благода́рне вопию́т:/ благослове́н еси́, Бо́же оте́ц на́ших.

Собо́р О́птинский тобо́ю хва́лится, преподо́бне,/ ты бо, я́ко ка́мень непоколеби́м во искуше́ниих пребыва́я,/ на Ка́мени ве́ры утвержда́тися науча́л еси́, взыва́я:/ благослове́н еси́, Бо́же оте́ц на́ших.

К тебе́, преподо́бне, притека́ют ве́рнии,/ я́ко любве́ Христо́вы испо́лнен быв,/ оте́ц сиро́т и вдова́м засту́пник,/ ни́щим пита́тель и наста́вник заблу́ждшим яви́лся еси́, пою́щим:/ благослове́н еси́, Бо́же оте́ц на́ших.

А́ще и мно́гия ско́рби терпе́л еси́,/ оба́че не оста́вил еси́ прибега́ющих к тебе́, глаго́ля:/ а́ще и в изгна́ние пойду́, или́ во огнь, аз бу́ду то́йже, взыва́яй:/ благослове́н еси́, Бо́же оте́ц на́ших.

Богоро́дичен: Госпоже́ и Цари́це А́нгелов,/ ца́рствующи при́сно на Небесе́х,/ гра́ды и ве́си земли́ Ру́сския покрыва́й, Богороди́тельнице,/ и рог правосла́вных возвы́си, вопию́щих:/ благослове́нна еси́, Де́во Пренепоро́чная.

Песнь 8.

Ирмо́с: В купине́ Моисе́ю Де́вы чу́до,/ на Сина́йстей горе́, прообрази́вшаго иногда́,/ по́йте, благослови́те,/ и превозноси́те во вся веки.

О́птинский скит, я́коже ра́йский сад, возде́лал еси́,/ в не́мже ученики́ твоя́ взрасти́л еси́,/ и́же благода́тне процвето́ша/ и зе́млю Ру́сскую арома́ты моли́твенными облагоуха́ша.

Гоне́ния благоду́шне претерпе́л еси́,/ я́же лука́вый за́вистию воздви́же на тя оглаго́ланием от челове́к,/ за оби́дящих и претя́щих ти кро́тко моли́лся еси́, о́тче Льве преподо́бне,/ в незло́бии Христу́ подража́я.

Лесть обличи́л еси́, богому́дре,/ и, пре́лести тьму потреби́в, ду́ши от пле́на бесо́вскаго изба́вил еси́,/ те́мже и исцеле́ния пода́ждь к ра́це моще́й твои́х притека́ющим/ и превознося́щим Христа́ во вся ве́ки.

Богоро́дичен: Ада́мово воззва́ние и Е́вино избавле́ние, Мари́е Де́во,/ потщи́ся спасти́ ве́рныя лю́ди Твоя́,/ пою́щия и превознося́щия Тя во вся ве́ки.

Песнь 9.

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

В зе́млю кро́тких всели́лся еси́, незло́бив сы́й,/ и, доброде́тельми преукра́шен, с Вы́шними лику́еши,/ те́мже спаса́й нас предста́тельством твои́м, о́тче богохва́льне.

Источа́ет благово́ния, я́ко крин, ра́ка честны́х моще́й твои́х,/ вразумля́ющи ве́рныя/ благоуха́ние ра́йскаго селе́ния взыска́ти,/ о́тче Льве достосла́вне.

Заре́ю Ду́ха облиста́емь,/ в пусты́ни О́птинстей све́тло просия́л еси́, о́тче преподо́бне,/ те́мже и доны́не сия́еши/ во тьме грехо́вней пребыва́ющим.

Небе́сная дарова́ния прии́м,/ прозрева́л еси́ бу́дущая, я́ко настоя́щая,/ те́мже, мно́гия в ве́ре утверди́в,/ ко спасе́нию приве́л еси́./ Моли́, преподо́бне, с про́чими отцы́/ в ми́ре соблюсти́ оби́тель на́шу,/ пе́сньми собо́р ста́рцев О́птинских ны́не прославля́ющих.

Богоро́дичен: Оте́чество на́ше заступи́, Влады́чице,/ и по́мощь пода́й стра́ждущим,/ си́рыя приими́ под кров Твой честны́й/ и ду́ши озло́бленныя умири́, Богоблагода́тная./ Ты бо еси́ спасе́ние ве́рою Тя велича́ющих.

Свети́лен:

Боже́ственным Све́том просвеще́н,/ све́том доброде́телей све́тло просия́л еси́, о́тче Льве, / и на све́щнице о́птинстей поста́влен,/ ны́не просвеща́еши всех ве́рно к тебе́ прибега́ющих.

Сла́ва, и ны́не, Богоро́дичен:

Моли́твами Пречи́стыя Ма́тере Твоея́/ и всех проро́ков, и му́чеников,/ и свяще́нных учени́к, Сло́ве Бо́жий,/ пода́ждь нам мир и очище́ние прегреше́ний.

На хвали́тех стихи́ры преподо́бному, глас 8.

Подо́бен: O, пресла́внаго чудесе́:

О, пресла́внаго чудесе́!/ Преподо́бный Лев О́птинский,/ блаже́ннаго Фео́дора учени́к неле́ностен,/ и до́брый рачи́тель послуша́ния/ храм че́стен Святы́я Тро́ицы показа́ся/ и му́дрый наста́вник ве́рным яви́ся./ Сего́ ра́ди лечьбы́ благода́тныя предлага́ет/ и бра́шны духо́вными оби́льно всех насыща́ет/ с ве́рою к нему́ притека́ющих.

О, пресла́внаго чудесе́!/ О, Боже́ственнаго произволе́ния!/ Я́ко дарова́ нам Госпо́дь наста́вника нело́жнаго,/ о́птинскаго ста́рчества основа́ние,/ преподо́бнаго Льва и прему́драго/ и моли́твы у́мныя де́лателя неусы́пнаго./ Сей бо ско́рый помо́щник и засту́пник усе́рдный/ и па́стырь до́брый на ни́ве Христо́вой яви́ся/ с ве́рою к нему́ притека́ющим.

О, пресла́внаго чудесе́!/ Я́ко сосу́д Ду́ха Свята́го испо́лненный,/ Лев богому́дрый ублажа́ется/ и на́ми благогове́йне прославля́ется,/ и́же прост и незло́бив сый,/ мно́гия лю́ди на путь спасе́ния наста́ви./ Ны́не же, собо́р о́птинских преподо́бных украша́я,/ Бо́жию Престо́лу предстои́т/ и мо́лится о душа́х на́ших.

Сла́ва, глас то́йже:

О́тче Льве приснопа́мятне,/ ты дар врачева́ния свои́ми боле́зньми стяжа́в,/ здра́вие приходя́щим к тебе́ подае́ши,/ и я́коже дре́вле чад свои́х, возлюби́в, наста́вил еси́,/ врачу́я боле́зни и труды́ облегча́я,/ си́це и нас не забу́ди посеща́ти/ и моли́ся Христу́ Бо́гу о душа́х на́ших.

И ны́не, Богоро́дичен, глас то́йже.

На Литурги́и

Слу́жба преподо́бническая.

Источник: Текст утвержден Священным Синодом Русской Православной Церкви 27 декабря 2016 года (журнал № 127)

На малой вечерни

На Господи, воззвах: стихиры поем на 4, глас 8-й

Прежде век Сый, Боже,/ времена и веки сотворивый/ и вся в мудрости Твоей устроивый,/ Церковь на земли противу зла воинствующую/ многоразличною благодатию Твоею облагодетельствовал еси,/ даровав в последния сия времена Казахстанской митрополии,/ дивнаго иерарха и исповедника,/ Николая, новаго чудотворца,/его же память днесь благочестно совершающе,/ всесвятое Имя Твое поем и славим.

От века и до века Ты еси, Царю и Господи,/ Пресущественное Естество, в Троице певаемое Ипостасей,/ преестественно Себе даровавший присно тя вожделевшему,/ исповеднику Твоему Николаю,/ Казахстанския митрополии священноначальнику,/ их же и паству свою Тя, Присносущнаго, знати научи,/ его же молитвами,/ неизреченнаго зрения Твоего сподоби ны, Человеколюбче.

Триипостастный, Владыко,/ Отче, Сыне, и Душе Святый,/ Едино Божество и Царство,/ от небесных чинов ангельских воспеваемый,/ приими и наше из глубины сердца приносимое Тебе благохваление/ и мольбами святителя и исповедника Твоего Николая,/ подаждь и нам в сонме ликующих угодников и ангелов Твоих/ воспевати Тя во веки.

Слава, глас 2-й

Возсия днесь память,/ Казахстанскаго чудотворца/ святителя Николая,/ просвещающа и вразумляюща благочестивых собрание,/ иже во всем житии бысть непоколебимый столп благочестия,/ нищих защититель и болящих немздоприемный врач,/ к свету богопознания всех приводяй,/ да из глубины души в радости вопиют:/ Боже наш Триипостастный,/спаси души наша благоволением Твоим,/ да величаем Тя во веки.

И ныне. Богородичен глас тойже.

На стиховне стихиры, глас 5-й

Приидите, христоименитии людие,/ восхвалим христоподражательнаго отца и пастыря нашего,/ небесное добродетелей богатство на земли стяжавша/ и горняго Отечества о Христе Духом Святым достигша,/ иже молит Всесвятую Божественную Троицу,/ спастися душам нашим.

Стих: Священницы Твои облекутся в правду,/ и преподобнии Твои возрадуются.

Святаго Православия проповедниче,/ Христа Бога, во плоти пришедша грешныя спасти,/ во вся концы Казахстанския митрополии вествовал еси/ и в скорбех и печалех чад церковных пребывающих,/ благодатию Божиею, в тебе сущею, исцелял еси./ Тем же молим Тя, святителю Николае, исповедниче Христов,/ молися Господеви,/ паству твою неодоленну в злоключениях сотворити/ и небеснаго блаженства сподобити.

Стих: Блажен муж, бояйся Господа,/ в заповедех Его восхощет зело.

Любви Божественней всем сердцем и душею соединился еси,/ временная и тленная вся презрел еси./ Безбожие и обновленческое злочестие искореняя,/ утверждал еси народы во истиннем благочестии пребывати,/ да в скоротечнем земнем житии евангельскою правдою поживше,/ Отечества Горняго унаследят./ Тем же непрестай о нас Небеснаго Домовладыку молити,/ да предстательством Пречистыя Матери Своея,/ подаст нам в скорбех утешение и исправление жития,/ и всерадостнаго века наследие.

Слава и ныне, Богородичен глас тойже

Тропарь, глас 7-й

Яко светозарное светило,/ лучами Божественных дарований сияющее,/ яви тя Солнце Правды Христос Бог наш,/ тьму безбожия и злонравия далече отгоняюща,/ и зарями богопознания осияюща вопиющих верно:/ Радуйся, святе Николае,/ Христов исповедниче и Казахстанский чудотворче.

Слава и ныне, Богородичен: глас тойже:

На велицей вечерни

Блажен муж: 1-й антифон.

На Господи, воззвах: стихиры на 8, Глас 4-й

Семя благодати Божия,/ благонравием родительским всеянное в сердце твоем,/ соблюл еси боголюбиве/ и от юности всею душею и крепостию твоею Христу прилепился еси,/ злостраданием и темничным томлением,/терпением и кротостию,/ и молитвами непрестанными Тому угодил еси,/ и ныне усердно Господу помолися,/ спастися душам нашим.

Отрясл еси, яко ленностный сон, мирская треволнения/ и Божию указанию последуя,/ иноческих ради доблестей/ в преславную Нилову пустынь пришел еси./ В ней же, иго Христово на рамо восприим,/ желательно Тому сораспялся еси,/ Помошницу имея Того Рождшую Приснодеву Всемирную Заступницу,/ Николая чудотворца имя, яко миро, свыше излиянное, прияв,/ в житии твоем сему уподобился еси/ и ныне с ним молися о нас Господеви,/ спастися душам нашим.

Во благочестии угодникам Божиим ревностно подражая,/ в мале был еси верен/ и великия чести архиерейския благодати удостои тя Господь,/ о спасении душ людских вручая тебе попечение,/ еже благоплодно в самоотверженном житии совершив, вшел еси в радость Господа Своего,/ идеже предстоя Ему с соборы святых/ моли, спастися душам нашим.

На тебе, святе, утвердися истина Господня,/ усты пророка предреченная:/ праведник, яко финикс процветет/ и яко кедр, иже в Ливане, умножится./ Тем же, яко древо благосеннолиственное и многоплодное/ в Церкви явился еси,/ источая притекающим к тебе благодати Божия струю животочную/ и моляся о спасении душ наших.

Божественною благодатию Святаго Духа просветився,/ святителю Николае преславне,/ в гонениях от безбожных венец чистаго исповедничества за Христа доблественне стяжав,/ сликовен новомученником Российским явился еси,/ с ними же, по отшествиии престолу Владычню предстоя,/ несозданным Светом Трисолнечным озаряем,/ молися Господеви спастися душам нашим.

От земных на небесная,/ яко небопарный орел, пречудне, востекл еси,/ но и паству твою благодатными дарами не оставил еси,/ в Царстве неизреченныя славы Божия/ со дерзновением сию воспоминаеши/ и молишися спастися душам нашим.

Просветися житие твое/ христоподражательными светлостьми,/ лжеименнаго разума тьму отгоняя./ Тем же, яко светозарное светило Казахстанския митрополии явился еси,/ святителю и исповедниче Христов Николае,/ верныя ко обретению Царства Божия право путеводя,/ вселился еси, идеже сияет Свет Единосущныя Троицы./ Темже светозарную твою память совершающе, приснопамятне,/ ходатая и заступника тя почитаем.

По достоянию о тебе радуется/ мучеников и исповедников светоявленное собрание,/ небесных чинов лики,/ апостолов и святителей огнезрачное сословие,/ преподобных богоносцев полче/ и священныя митрополии твоея паства/ восхваляюще Триединаго Бога, дивнаго во святых Своих/ и вопиюще тебе таковая:/ Радуйся, святе Николае,/ Христов исповедниче и Казахстанский чудотворче.

Слава, глас 8-й:

Весь исполнен быв любве Божественнныя,/ явился еси Святаго Духа нерукотворенный храм,/ дарами благодати преукрашенный:/ душу бо твою за врученное ти стадо, полагая/ и всем духовне во всем угождая,/ не своея, но ближняго пользы искал еси,/ да всяко некия спасеши./ Не забуди ныне и нас, в добродетели убогих/ и твоего наставления ищущих, да зовем ти:/ Радуйся, святе Николае, Христов исповедниче/ и Казахстанский чудотворче

И ныне, Богородичен, глас тойже:

Царь Небесный за человеколюбие на земли явися/ и с человеки поживе,/ от Девы бо Чистыя плоть приемый/ и из Нея прошедый с восприятием,/ Един есть Сын, сугуб естеством,/ но не Ипостасию./ Темже, совершенна Того Бога/ и совершенна Человека воистинну проповедающе,/ исповедуем Христа Бога нашего:/ егоже моли, Мати Безневестная,/ помиловатися душам нашим.

Вход. Прокимен дне. И чтения.

Притчей чтение (главы 10, 3 и 8):

Память праведнаго с похвалами,/ и благословение Господне на главе его. / Блажен человек, иже обрете премудрость, / и смертен, иже уведе разум. / Лучше бо сию куповати,/ нежели злата и сребра сокровища. / Честнейшая же есть камений многоценных,/ все же честное недостойно ея есть./ Долгота бо дней и лета живота в деснице ея,/ в шуйце же ея богатство и слава. / От уст ея исходит/ правда,/ закон же и милость на языце носит./ Послушайте убо мене, о чада, / честная бо реку, / и блажен человек, иже пути моя сохранит: / исходи бо Мои – исходи живота,/ и уготовляется хотение от Господа. / Сего ради молю вас / и предлагаю мой глас сыновом человеческим, / яко аз, премудрость, устроих совет / и разум, и смысл аз призвах. / Мой совет и утверждение,/ мой разум, моя же крепость. / Аз мене любящия люблю, / ищущии же мене обрящут благодать./ Разумейте убо, незлобивии, коварство,/ ненаказаннии же, прилагайте сердца./ Послушайте мене и паки, честная бо реку,/ и отверзу от устен правая,/ яко истине поучится гортань мой,/ мерзки же предо мною устны лживыя. / С правдою вси глаголы уст моих: /ничтоже в них стропотно, ниже развращенно. / Вся права суть разумевающим / и проста обретающим разум./ Научаю бо вас истине,/ да будет о Господе надежда ваша, /и исполнитеся Духа.

Премудрости Соломоновы чтение (глава 10):

Уста праведнаго каплют премудрость, / устне же мужей мудрых ведят благодать./ Уста мудрых поучатся премудрости,/ правда же избавляет от смерти. / Скончавшуся мужу праведну не погибнет надежда, / сын бо праведен рождается в живот / и во благих своих плод правды обымет./ Свет праведным всегда/ и от Господа обрящут благодать и славу./ Язык мудрых добрая свесть,/ и в сердце их почиет мудрость./ Любит Господь преподобная сердца,/ приятни же ему вси непорочнии в пути./ Мудрость Господня просвещает лице разумнаго./ Постигает бо желающия ю,/ прежде даже, разумети ю, / и удобь узрится от любящих ю./ Утреневавый к ней не утрудится,/ и бдяй ея ради вскоре без печали будет./ Яко достойных ея сама обходит ищущи, / и во стезях ея является им благоприемне. / Мудрости никогдаже одолеет злоба. / Сих ради и рачитель бых доброты ея/ и возлюбих ю, и поисках от юности моея./ И взысках невесту привести себе, / яко всех Владыка возлюби ю./ Таинница бо есть Божия хитрости / и обретательница дел его. / Труды ея суть добродетели,/ целомудрию же и разуму та учит, правде и мужеству, / ихже потребнее ничтоже есть в житии человеком./ Аще же и многаго искусства желает кто, / весть древняя и быти хотящая разсмотрит. / Свесть извития словес и разрешения гаданий,/ знамения и чудеса проразумеет и сбытия времен и лет,/ и всем советник есть благ,/ яко безсмертие есть в ней и благославие во общении словес ея./ Сего ради беседовах ко Господу и помолихся Ему, / и рех от всего сердца моего: / Боже отцев и Господи милости, / сотворивый вся словом Твоим / и мудростию Твоею устроивый человека,/ да владеет бывшими от Тебе тварми,/ и да управит мир в преподобии и правде. / Даждь ми Твоему престолу приседящую премудрость/ и не отлучи мене от отрок Твоих,/ яко аз раб Твой и сын Рабыни Твоея./ Посли ю с Небес от святаго жилища Твоего/ и от Престола славы Твоея,/ да сущи со мною научит мя,/ что благоугодно есть пред Тобою./ И наставит мя в разум и сохранит мя в славе своей./ Помышления бо смертных вся боязлива/ и погрешительна умышления их.

Премудрости Соломоновы чтение (глава 4):

Похваляему праведнику возвеселятся людие,/ безсмертие бо есть память его,/ яко от Господа познавается и от человек,/ и угодна Господеви душа его./ Возлюбите убо, о, мужие, мудрость и поживете,/ восхощите ея и наказами будете,/ начало бо ея любы и соблюдение закона. / Почтите премудрость, да во веки царствуете. / Возвещу вам и не скрыю от вас тайн Божиих: / яко Той мудрости Наставник есть и мудрых Исправитель, / и всякому смыслу и делу Хитрец./ И всем смыслом научит мудрость,/ есть бо в ней дух разумен и свят и сияние света присносущнаго / и образ благости Божия./ Та други Божия и пророки устрояет,/ благолёпнейши же есть солнца и паче всякаго сотворения звезд,/ свету сосуждаема, обретается первейши. / Та угождающих ей от болезней избави и настави на стези правыя,/ даде им разум имети свят и сохрани я от ловящих и подвиг крепок подаде им. / Да разумеют вси, яко сильнейши всего есть благочестие/ и никогдаже преможет злоба мудрости,/ ниже прейдет злыя обличающи суд./ Рекоша же в себе, помысливше неправедно:/ насильствуем праведному и не пощадим преподобства его, / ни усрамимся седин старости многолетны./ Будет бо нам крепость закон и уловим праведнаго, / яко неугоден нам есть и противится делом нашим / и поносит нам отпадение закона / и обличает нам согрешения наказания нашего./ Возвещает нам разум имети Божий/ и отрока Господня себе именует. / Бысть нам на обличение помышлением нашим, / и тяжек нам есть и видим, / яко неподобно иным житие его и изменены стези его, / в поругание вменихомся ему / и удаляется от путей наших, яко от нечистот, / и блажит последняя праведных./ Увидим убо, аще словеса его истинна суть,/ искусим яже сбываются ему./ Руганием и мукою истяжем его,/ да разумеем кротость его / и искусим беззлобство его, / смертию безобразною осудим его,/ будет бо посещение от словес его./ Сия помыслиша и прельстишася, / ослепи бо я злоба их / и не разумеша таин Божиих, / и не разсудиша, яко Ты еси Бог Един,/ живота имеяй и смерти власть, / и спасаяй во время скорби, и избавляяй от всякаго зла. / Щедр и Милостив и дая преподобным Своим благодать,/ и Своею мышцею гордым противляяся.

На литии стихиры, глас 1-й:

Радостно днесь ликовствует богоспасаемый град Алма-Ата/ и с ним вси концы священныя Казахстанския митрополии соторжествуют,/ память совершающе Боголюбезнаго святителя и исповедника Николая,/ узы и темницы за Христа мужественне претерпевшаго,/ и соборища нечестивых себе отлучившаго,/ на небеси днесь со Христом, Царем вечным, царствующа,/ и на земли благодатию Христовою чудодействующа./ Темже, к честней раце его верно притекающе,/ исцеление душам и телесам нашим улучаем/ и, светом богопознания просвещаеми, глаголем:/ сподоби нас даров небесных, святе,/ и христоименитое православных стадо твое сохрани,/ спасение подавая душам нашим.

Приидите восхвалим всечестнаго архипастыря/ и богоноснаго отца нашего,/ венцем чистаго исповедничества преукрашеннаго/ и Христу Подвигоположнику нашему во славе незаходимей предстояща,/ в сонме светозарных избранников присно радующася./ Тем же, на земли память его восхваляюще, во умилении воспоим:/ Радуйся, служителю Божий, гонения правды ради смиренно претерпевый;/ Радуйся, розго винограда Христова, мног плод в пособие православным творящая;/ Радуйся, града Алматы славо и ограждение;/ Радуйся, всех градов и весей Казахстанский неусыпный страже и теплый хранителю;/ Радуйся, святе Николае,/ Христов исповедниче и Казахстанский чудотворче.

Днесь вернии, всепразднственно ликовствуем,/ во псалмех и песнех Господеви поюще/ и чтуще Того служителя благоприятна,/ добродетельми сияюща и сердца наша небесными зарями просвещающа,/ и единомудренно воспевающе того, песнь тако рцем:/ Радуйся, архипастырю благосердый,/ любовию и кротостию вся покрываяй;/ Радуйся, Владыко прелюбимый, бедствующия защищаяй;/ Радуйся, милостивый скорбящим помощниче./ Радуйся, ищущим спасения готовый споспешниче;/ Радуйся, святе Николае, Христов исповедниче и Казахстанский чудотворче.

Слава, глас 6-й:

Имуще сердце твое, яко добрую почву,/ к восприятию семене Слова Божия всегда отверстым,/ неуклонно шел еси по стопам Христа, зовуща:/ аще, кто хощет в след Мене идти,/ да отвержется себе и возмет крест свой,/ и в след Мене да идет./ И венцем добропобедным чистаго исповедничества от Него украшенный,/ Того, яко Подвигоположника и Судию,/ яко Мздовоздаятеля и яко Милостива,/ моли спастися душам нашим.

И ныне, Богородичен или Крестобогородичен, глас той же:

Что зримое видение,/ еже Моима очима видится, о, Владыко?/ Содержай всю тварь, на древо воздвижен быв,/ и умираеши, всем подавая жизнь,/ Богородица, плачущися, глаголаше,/ егда узре на Кресте возносима/ из Нея неизреченно возсиявшаго/ Бога и Человека.

На стиховне стихиры, глас 2-й.

Яко, Богом данный,/ от родителей Феодосием нареченный,/ тезоименитому мученику в истом исповедании Христа Бога подражал еси,/ и премногая дарования Божественная стяжав,/ у престола огнезрачнаго Святыя Троицы предстоиши,/ моляся о спасении нашем.

Стих: Праведник, яко финикс процветет, яко кедр иже в Ливане умножится.

Яко миро, свыше излиянное,/ имя новое во иночестве восприял еси,/ пророчески на служение твое указующее, святе Николае исповедниче Христов,/ и народа множества/ христоподражательною кротостию и любовию в послушание Богу преобрел еси,/ со апостолы и Николаем Угодником/ в невечернем дни Царствия Божия, радуяся, водворяешися,/ моляся о спасении нашем.

Стих: Насаждени в дому Господни/ во дворех Бога нашего процветут.

Видяще, в немногих храмех,/ подобно оазисам в бескрайней безбожия пустыне стоящих,/ паству твою у источников истиннаго богопочитания пиющую воду живу,/ усердно сию посещал еси,/ апостолом Христовым соревнуя,/ назидая в вере, укрепляя в надежде и утверждая в любви./ И по отшествии твоем в небеснем всевеселом воздаянии пребывая,/ наследие твое не оставил еси,/ моляся о спасении душ наших.

Слава, глас 3-й:

Церкви Христовы столпе непоколебимый,/ отеческих преданий истинный хранителю,/ веры православныя исповедниче благочестивый,/ Казахстанския митрополии похвало и утверждение, святе Николае,/ всех нас, память твою светоявленную совершающих,/ поминай богоприятными твоими молитвами,/ да прославим Спаса, тя прославившаго,/ дивнаго во святых Своих, Бога нашего.

И ныне, глас той же, Богородичен:

Призри на моления Твоих раб, Всенепорочная,/ утоляющи лютая на ны возстания, всякия скорби нас изменяющи: / Тя бо Едино твердое и известное утверждение имамы/ и Твое предстательство стяжахом,/ да не постыдимся, Владычице, тя призывающии,/ потщися на умоление Тебе верно вопиющих:/ Радуйся, Владычице, всех Помоще, Радосте и Покрове/ и Спасение душ наших.

Или Крестобогородичен, глас той же:

Видящи Тя распинаема Христе,/ Тебе рождшая, вопияше:/ что странное еже вижу таинство, Сыне Мой?/ Како на древе умираеши, плотию повешен,/ Жизни Подателю?

Тропарь, глас 7-й

Яко светозарное светило,/ лучами Божественных дарований сияющее,/ яви тя Солнце Правды Христос Бог наш,/ тьму безбожия и злонравия далече отгоняюща,/ и зарями богопознания осияюща вопиющих верно:/ Радуйся, святе Николае,/ Христов исповедниче и Казахстанский чудотворче.

На Бог Господь, тропарь глас – 7-й:

По 1-м стихословии, седален глас 1:

Адаманта веры благоразумнаго, страдальца Христова и исповедника доблественнаго, днесь вернии благоговейно любовию почтим, великаго во смирении иерарха, кроткаго во архиереях святителя, неумолкаемаго Евангельския благодати провозвестника, призывающа нас внити в радость Господа Своего и пети Тому научающа: прославляяй святых Своих, Господи, слава Тебе.

Слава, и ныне, Богородичен, глас 1-й:

Из Тебе, Пречистая Богородице, возсия нам Жизнодавец и Господь всех, не оставль Отеческих недр, сниде на землю и спасение роду человеческому дарова и от тли на нетление возведе зовущия: Радуйся, Всенепорочная Дево Богородице, Надеждо и Предстательство Тебе поющих.

По 2-м стихословии седален, глас 5-й:

Обновленческаго суесловия возгнушався, истинным последовал еси Евангельским заповедем, преблаженне святителю Николае, богомудре, и митрополию Казахстанскую во отеческом древнем благочестии утвердил еси, да христоименитых людей множество во единодушии православно славят Троицу Единосущную, Юже моли спастися душам нашим.

Слава, и ныне, Богородичен:

Имамы Тя к Богу истинную Предстательницу, раби твои, Всенепорочная, дерзновение бо к Нему, яко к Сыну Своему, имаши. Темже со архангелом вопием Ти верно: Благословен, Пречистая , Плод чрева Твоего.

Величание:

Величаем тя, Христов исповедниче, святителю Николае, и чтим болезни и труды твоя, имиже трудился еси во благовестии Христове.

Псалом избранный:

По полиелее седален; глас 4-й:

Весь еси, блаженне отче, в вышних присно во обителех райских, в селениях праведников водворяешися, но и нас, паству твою, со страстьми и похотьми и духами злобы поднебесными непрестанно брань ведущую, не оставляеши, и, тебе тепле почитающия, наставляеши к разуму Божественному и деланию усердному заповедей Христовых, и всякая благополезная прошения наша исполняеши, подвизая пети тебе: Радуйся, святе Николае, Христов исповедниче и Казахстанский Чудотворче.

Слава, и ныне, Богородичен:

Едина верным заступление явилася еси, Всенепорочная, от Твоих бо Приснодевственных кровей воплотися Слово Божие, советом Отчим и, земная с небесными совокупив, в древнее отечество земнородным вход устрои.Сего ради молим Тя, Всеблагая, не лишенны нас сотвори Сына Твоего и Бога нашего царствия, яко да поем Твое величие.

По 50-м псалме стихира глас 6-й.

Веселися и красуйся град Алма-Ата/ торжествуй и радуйся Казахстанская митрополия / светло совершая благолепную память архипастыря своего,/ Христова исповедника блаженнаго Николая, / скорбящим сострадательнаго утешителя, / обидимых теплаго заступника,/ болящих безмездна врача, веры и благочестия образа чиста,/ молящегося о спасении душ наших.

Канон.

Припев: Святителю и исповедниче Христов Николае, моли Бога о нас.

Песнь 1.

Ирмос: Поим Господеви,/ проведшему люди Своя сквозе Чермное море,/ яко Един славно прославися.

Песньми прехвальными восхвалим, вернии, всеславную память исповедника Христова и архипастыря нашего Богоноснаго святителя Николая, Подвигоположника Сладчайшаго Господа Иисуса, величающе.

Любовию христоподражательною во изгнании, правды ради, победил еси беззаконнующих неистовство и напасть, и явился еси добропобедный исповедниче Христов, приснопамятне Николае, отче наш блаженне.

Великая сила благодати Божия в великих лишениях, прещениях же и глумлениях от безбожных тобою, страдальче, наследована бысть, ею же в земном служении твоем и по отшествии в небесные кровы верным токи целебныя источаеши, святе Николае, Казахстанския митрополии Похвало и Украшение.

Богородичен: Милостива мне, Всемилостивая Мати, Сына Твоего и Бога нашего сотвори, Пренепорочная, в судный день страшнаго мя осуждения избавляющи.

Песнь 3.

Ирмос: Ты еси утверждение/ притекающих к Тебе, Господи,/ Ты еси Свет омраченных,/ и поет Тя дух мой.

Вседержителя силою духовною укрепляемь, мудре, в кротости и смирении вся злоключения терпя, крепость злобы древняго злоначальника низложил еси, Христа поя во веки.

Исповедничества чистаго и доблестнаго венцем преукрашенный во страданиях твоих, апостольских учений и отечественных догмат хранитель верный в Церкви явился еси, рассеянныя чада церковныя во едино стадо собирая, да в скорбех и радостех Христа поют во веки.

Яко же солнце незаходимое, лучами любве Божия сияющее, явился еси страждущим чадам церковным, яростию бури безбожнаго злочестия по обширным просторам Казахстанским рассеянным. Их же сердца и души духовно возгревая подвизал еси, хвалебно пети Христа во веки.

Богородичен: Изми мя, Всенепорочная, грехов лютых бури и вихря помыслов нещадно уму моему находящих избави мя, Пречистая.

Седален, глас 8-й.

Чистотою душевною и телесною сияя, терпением в гонениях и лишениях мужествовав, прегордаго Велиара главу сокрушил еси, ни ласками, ни ложными прещении, ни благовидными предлогами богоборцев ни себе, ни паству твою обманути не попустил еси, Богомудре, святую веру непорочно храня, и Богу до конца угодил еси. Сего ради от Него чудесы при жизни и нетлением по смерти почтен еси, яко причастник Божия Благодати.

Слава, глас той же:

Во святительстве исповеднически благочестно пожил еси, словесныя Христова стада овцы словом увещавая и делом назидая, и во изгнании неправедном, благодаряще Бога и огнем любве неугасимыя к Нему пламенея победоносным венцем от Христа Подвигоположника достойне увенчан, молися паствы твоея спасти люди, любовию память твою почитающия.

И ныне, Богородичен:

Человек враждующих озлобления и демонская злоухищренная стреляния угосила еси, Всенепорочная, ходатайством твоим благомощным к Сыну Твоему и Богу нашему, тако и нам, во обстояниях невидимыя брани сущим, душам спасение и телесное здравие подаждь, присно блажащим Тя и добротолюбием воинствующим во славу Рождшагося от Тебе.

Песнь 4.

Ирмос: Услышах, Господи,/ смотрения Твоего таинство,/ разумех дела Твоя, и прославих Твое Божество.

Жизнь твоя, вся духу Божию всецело открытая, разруши лукавых духов и безбожных хулителей хитросплетения тщетныя и путь прав многим, ищущим спасения яви.

Благаго Бога во всем житии твоем подражатель явился еси, священноначальниче и исповедниче Христов Николае, милость и любовь нелицемерныя и ко всем равныя Духом Святым стяжал еси, поминая и творя реченное: возлюбиши искренняго своего, яко сам себе.

Изволением Божиим и избранием святейшего Патриарха Алексия архипастырем Казахстанския митрополии, поставляешися досточудне и наставник, иже ко спасению, пастве твоей многострадальней во утешение даруешися, непрелестным путем верности Святей Невесте Божией церкви Христовой, вводя стадо твое во ограду Небесную.

Богородичен: Яко же престол огнезрачен, носиши Солнце Правды, Богоблагодатная Владычице, Его же моли спасти мя, греховною тьмою о блаженнаго.

Песнь 5.

Ирмос: От нощи неведения/ Боговедением просветивый концы,/ просвети мя утром человеколюбия Твоего, Господи.

Обновленцев, одержимых лестию всеведения и гордынею усовершенствования церкви, яко волки, во облике овец пришедшия, прозрел еси, к свету отцепреданныя православныя веры паству твою наставлял еси Богомудре, за еже и страдания претерпел еси, и от Бога, яко исповедник истинен, прославлен еси, святе Николае.

Благочестия рвением распалаемь, поругания и досады, заточения и изгнания претерпел еси, поминая Господа и Спаса неповинныя страсти, нашего ради спасения претерпевшаго. Сего ради того помощию победил еси враги видимыя и невидимыя на тя вооружившиеся, ухищрения тех сокрушил еси и паству твою во правоверии утвердил еси, собою образ показуя, и путь ко спасению возвещая и от злых пременение подавая.

Непрестанно врученное ти наследие церковное в Духе Святом о Христе поучая, на живоносных закона Божия и любве пажитях словесное стадо твое упасл еси и богоприятным молитв твоих кадилом вся пределы Казахстанския облагоухал еси, да явится во стране сей благоприятен плод спасительнаго сеяния Христова и пшеница добрая усокровиществуется во хранилища Небеснаго Домовладыки.

Богородичен: Предстательницу непостыдну и Заступницу тверду имуще Тя, Пречистая, неудобства всякого избавляемся и печали, и огорчения.

Песнь 6.

Ирмос: Молитву пролию ко Господу/ и тому возвещу печали моя,/ яко зол душа моя исполнися/ и живот мой аду приближися,/ и молюся, яко Иона:/ от тли, Боже, возведи мя.

Кротких глагол твоих вещании и образом добродетельнаго жития твоего, святе, обширная паства твоя поучашася в Духе Божественном тобою мертвой убо быти греху, живой же Господеви, да и на небеси в блаженней вечности с тобою в радости Божественней водворится, священнотаинниче.

По стопам апостолов Христовых непорочно ходяща, зряху тя духовныя чада твоя, священноначальниче Николае, отче наш, и пророчества дар в тебе видяще и сокровище исцелений недугов душевных и телесных, тя знающе с верою и любовию притекаху к тебе, яко врачу скоромилостиву.

В преддверии испытания Церкви своея устрояет тя Господь архиереем быти, святителям древним земли русския добрыми и благими нравы подобна, да, егда буря безбожия, попущением Его, сокрушати будет видимые и незримые храмы, на песце самомнения и превозношения сооруженныя, утвердиши в терпении иже на недвижемем камени веры тверды и смирения духовное свое строение возвигоша.

Богородичен: Буря безмерных согрешений смущает помраченный ум мой, Богоневестная Дево, и во глубину отчаяния погрузити тщится. Но ты, Всеблагая и Многомилостивая яко благих виновная, даждь ми тихия покаяния пристани благоуспешно достигнути.

Кондак, глас 8.

Избранный от Предвечнаго Архиерея и Церкви Зиждителя, данный Казахстану ходатаю изрядный и заступниче пречудный, святителю Николае, ублажая подвиги и труды твоя, любве ради Господа тобою подъятыя, восхваляем дивнаго во святых Своих Бога нашего, давшаго тебе благодать величия Своего и научившаго нас любовию пети тебе: Радуйся, святе Николае, Христов исповедниче и Казахстанский чудотворче.

Икос:

Пение благодарственное Пресвятей Троице вси православные, на обширных Казахстанских просторах живущия, взывают, яко благоволи даровати нам тебе, святе, пастыря добра и молитвенника благомощна, и притекающе к раце святей твоей, усердно просят: моли о нас Всеблагаго Бога, да, яко Судия и Мздовоздаятель праведнейший, не отвратит лица Своего от нас недостойных, присно согрешающих и преогорчевающих благоуторобие Его, но, яко Отец чадолюбивый накажет ны зде, во временнем житии нашем, да, отвергше тленная и временная, обрящем нетленная и вечная, благодарне вопиюще тебе таковая:

Радуйся, яко адамант точилом язв и болезней испытанный.

Радуйся, яко злато в горниле огненных искушений очищенный.

Радуйся, прещений лютых не убоявыйся.

Радуйся, и самыя смерти не устрашивыйся.

Радуйся, странствия Владычня и безсмертныя трапезы Его приобщивыйся.

Радуйся, яко звездо лучезарная, над Казахстанскою страною возсиявый.

Радуйся, во вся концы ея свет благодати Божия пролиявый.

Радуйся, благий вертоградарю, сад веры благочестивыя во стране сей насадивый.

Радуйся, поточе сладости, водою благочестия паству твою напоивый.

Радуйся, миром Христовым и богоприятных молитв твоих кадилом просторы Казахстанския облагоухавый.

Радуйся, яко Божию изволению последуя, инославныя мусульмане тебе со усердием служаху.

Радуйся, яко и ты онем любовию теплою всегда благодеял еси.

Радуйся, святе Николае, Христов исповедниче и Казахстанский чудотворче

Песнь 7.

Ирмос: От Иудеи дошедше, отроцы/ в Вавилоне иногда/ верою Троическою в пламень пещный попраша, поюще:/ отец Боже, благословен еси.

В гонениях лютых искушен быв, по слову апостольскому, искушаемым Богодарованный помощник явился еси, многострадальне. Иереям, в темнице смертною мукою томящимся, в сонном видении представ, утешение и ободрение духовное и телесное подал еси, наставляя их со упованием пети: отец наших Боже, благословен еси.

Фарисейскаго обновленческаго нечестия отвергшися, Христово смирение всегда во уме и сердце твоем имел еси и единство церковное нерушимо хранил еси, священноначалию истинному всегда сыновнее послушание воздавая, тем же и нас в кротости и смирении утверди, да до скончания жития своего сынами и дщерьми Единыя, Святыя, Соборныя, Апостольския Церкви Христовы будем и блажества вечнаго с тобою, пастырю наш, наследницы явимся, поюще: отец наших Боже, благословен еси.

Человеколюбцу Богу прилежно молитвы вознося Заступницу Усердную рода христианского Матерь Божию всегда помощницей имея, ищущим избавления от телесных недугов прежде духовную пищу предлагал еси, наставляя из глубины души радостно пети: отец наших Боже, благословен еси.

Богородичен: Пресвятая Дево и Пренепорочная Мати, Бога плотоносна на спасение мира рождшая, от грехов всяческих и скорбных обстояний, яко Скоропослушница чтущия Тя спасая, о Тебе вопиющия: отец наших Боже, благословен еси.

Песнь 8.

Ирмос: Седмерицею пещь/ халдейский мучитель/ Богочестивым неистовно разжже,/ силою же лучшею спасены, сия видев,/ Творцу и Избавителю вопияше:/ отроцы благословите,/ священницы, воспойте,/ людие, превозносите во вся веки.

С ревностью равноапостольною разсеянную по казахстанским просторам боголюбивую паству твою посещая, непрестанно во благочестии сию наставлял еси и в терпении утверждая, научал едиными усты и единым сердцем воспевати: отроцы благословите, священницы воспойте, людие, превозносите Христа во веки.

Щедраго и всемилостиваго Господа рабе благий и верный и служителю благоприятный был еси, присноблаженне святителю и исповедниче Христов Николае. Научи и нас, в добродетели убогих, течение жития своего в трезвении, послушании и благочестии проходити, в чистоте сердца принося хвалебную песнь: отроцы благословите, священницы воспойте, людие, превозносите Христа во веки.

Богородичен: Тя, красную Палату и всечестный Сосуд всех Царя, Пресвятая Владычице, воспеваем, спасеннии Тобою, Дева Чистая, да и нас храмы быти нерукотворенны и с Тебе Рождшемуся и очистившему всякую скверну и злобу сопротивную явиши поющия: отроцы благословите, священницы воспойте, людие, превозносите Христа во веки.

Песнь 9.

Ирмос: Устрашися всяк слух/ неизреченна Божия снизхождение,/ яко Вышний волею сниди даже и до плоти,/ от девическаго чрева быв Человек,/ Темже Пречистую Богородицу, вернии, величаем.

Постничества и воздержания правило нерушимо храня, непрестанно молитвою и чистотою сердца Христа Распята и Воскресша в себе живуща со Отцем и Духом Святым имел еси и во ограду избранников Пречистыя Матери Его себе вчинил еси, блаженне Николае. Темже по отшествии твоем Всеблагая Вратарница, двери райския верным отверзающая, во Иерусалим новый и вечный вход отверзла ти, да со всеми святыми Единосущныя Троицы державу поеши радостно во веки.

Легко, яко орел, крылома веры чистыя и благочестия непорочнаго небесную высоту достигл еси, Богоносе отче Николае, почесть горния славы прияв от Судии Праведнейшаго и Мздовоздаятеля. Но, любве ради несокрушимыя к пастве твоея, показа нам Господь цельбоносныя мощи твоя, источаюшия исцеления с верою к ним приходящим. Тем же молим, помяни нас, верою и любовию чтущих тя, да выну всесветлую и всечестную пямять твою достойно ублажаем.

Аще и малое от убогаго усердия приносимое тебе ныне, святе, благохваление приими, яко же две лепты оныя вдовицы прият Христос Господь, и нелишенны нас сотвори твоих благодеяний и даров и прегрешениям нашим прощение у Господа испроси, да тя прославим, милостиве, во веки.

Богородичен: Пощади и помилуй падшее создание Твое, Спасе, Рождшую Тя Матерь сохранив неврежденну, и благомощными ея молитвами, егда сядиши судити всяческим, вечнаго осуждения избави мя, яко Безгрешен и яко Милостивый Бог и Человеколюбец.

Светилен, глас 7-й:

Боготочною кровию, на Кресте излиянною, и тою искупившаго падшее создание Свое от греха, проклятия и вечныя смерти, верою зря волею распеншагося за ны Владыку и Подвигоположника нашего и усердне к Нему любовию горя, всем житием твоим провещал еси: мне, еже жити – Христос, а смерть – приобретение Христа, Ему же на небесех во славе вечней предстоя, моли спастися благочестно ти воспевающим: Радуйся, святе Николае, Христов исповедниче и Казахстанский чудотворче.

Слава, и ныне, Богородичен.

По Бозе упование имуще на Тя, Пречистая Богородице, молимся Ти прилежно, ко иже из Тебе Рождшемуся мольбами, невредимы сохрани нас и спаси души наша.

На хвалитех стихиры, глас 2-й

Киими похвалами/ воспоем в добродетелях преславна иерарха,/ венцем чистаго исповедничества украшеннаго,/ болезнующих телом и душею покаянием врачующа,/ милостями и человеколюбием дарованными от Бога,/ Его же непрестанно подражая,/ молит подати нам велию милость.

Киими песненными добротами/ восхвалим архипастырских исправлений красоту./ Столпа Церкви непоколебима,/ Православия исповедника истиннаго,/ богоподражательным своим житием Казахстанския митрополии просветившаго концы,/ его же, яко вернаго служителя прослави Христос Бог,/подающий нам велию милость.

Киими благогласными словесы/ ублажим богоноснаго святителя и отца нашего Николая,/ за Христа мужественна страдальца,/ за паству свою дерзновенна ходатая,/ безбожия и злонравия обличителя,/ чудеса преславна силою Божиею совершающа/ и подающа от Христа Бога велию милость

Слава, глас 4-й:

Евангельских учений рачителя/ и страстем невинным Христа, Агнца Божия, подражателя,/ днесь обстояще священную раку,/ токи благодати приемлем независтно/ и, верою торжествующе, благодарне к нему взываем, глаголюще:/ Радуйся, Христов исповедниче, святе Николае,/ яко во тленнем сем житии/ нетленная благодати Божия/ в делании заповедей Христовых приобщивыйся/ и со апостолы, пророки, мученики и иерархи/ в Небеснем Царстве сликовствующим явивыйся,/ молися Господеви непрестанно/ благословение и мир Отечеству нашему даровати/ и душам нашим велию милость.

И ныне, Богородичен, глас тойже:

Богородице, всех Царице,/ православных христиан Похвало и непостыдное Упование еретичествующих раскольническая шатания разори,/ и благодатию Сына Твоего озари сердца,/ под вседержавный покров Твой притекающих.

Славословие великое. Тропарь.

Слава и ныне, Богородичен , глас 7:

Яко нашего воскресения сокровище,/ на Тя надеющиеся, Всепетая,/ от рова и глубины прегрешений возведи,/ Ты бо повинныя греху спасла еси,/ рождшая Спасение наше,/ Яже прежде рождества Дева, и в рождестве Дева,/ и по рождестве паки пребываеши Дева.

Отпуст.

Источник: Митрополия.кз

Месяца октября в 12-й день

Преподобномученика Лаврентия Оптинскаго

На велицей вечерни

На Господи, воззвах: стихиры, глас 8.

Подобен: О, преславнаго чудесе:

О, преславнаго чудесе!/ В земли Калужстей возсия светильник,/ веры Православныя поборник,/ старцев Оптинских усердный послушник,/ верный сын Церкве нашея,/ Лаврентий преподобномученик,/ монашествующих богомудрый наставник,/ исповедник преславный/ и воин Христов непобедимый.

О, преславнаго твоего глаголания,/ Лаврентие премудре,/ ты бо, от души любве исполненныя,/ и веры твоея крепкия,/ изнемогшим крепость подавал еси/ и словом животным утверждал еси,/ глад безверия утоляя/ и мрак греха прогоняя/ светом учения Христова.

О, боголюбия присных сродник твоих,/ родителие бо и сестры твоя,/ яко жертвы чистыя, Богу себе приносят/ и, постриг иноческий приемлюще,/ елеем веры светильницы душ своих питают;/ темже и тебе путь узкий показуют,/ да, от силы в силу восходя,/ последи яко агнец незлобивый заклан будеши/ и пира Агнца Божия насладишися.

Слава, глас тоже:

Блажен еси, отче Лаврентие,/ яко усердно Господеви поработал еси,/ темже и тело твое, укрепившеся в постех и бдениих/ и трудех многоразличных, тобою подъятых,/ ранами, яко цветы райскими, последи украсися/ и, яко всесожжение богоприятное, Христу принесеся./ Сего ради, мужеству и вере твоей дивящеся,/ с любовию вопием ти:/ молися за стадо твое, отче треблаженне,/ еже помиловатися душам нашим.

И ныне, Богородичен, глас тойже: Царь Небесный:

Вход. Прокимен дне. И чтения три преподобническая.

На стиховне стихиры, глас 8:

Како воспоим монашеское житие твое,/ Лаврентие преподобне,/ ты бо, отцем оптинским во всем подражая,/ бдении молитвенными плоть духу покорил еси,/ темже и Христа ради со дерзновением пострадал еси/ и с лики всех святых молиши ныне о душах наших.

Стих: Честна пред Господем/ смерть преподобных Его.

Како исчислим обилие трудов твоих,/ Лаврентие богохвальне,/ ты бо, миру странен быв,/ неленостно миру послужил еси/ и немощи немощных любовию носил еси,/ темже монаси и мирстии днесь память твою почитают/ и к милостивному предстательству твоему прибегают.

Стих: Блажен муж, бояйся Господа,/ в заповедех Его восхощет зело.

Како не подивимся твоему мужеству,/ Лаврентие многострадальне,/ ты бо страха безбожных не убоялся еси/ и со дерзновением Христа исповедал еси,/ темже ангелы и человецы венцем песненным тя увязуют днесь/ и Бога, давшаго ти крепость Свою,/ достодолжно прославляют.

Слава, глас 4:

Благочестием, трудолюбием и ревностию по Бозе,/ добрую славу себе стяжал еси,/ преподобномучениче Лаврентие,/ сего ради власти безбожнии/ в темницу мрачную тя затвориша,/ ты же, светло страданием украшен,/ со многим дерзновением Богу предстал еси,/ показуя раны твоего сораспятия./ Помози и нам, отче приснославне,/ верными Христу даже до смерти пребыти/ и милость в День судный улучити.

И ныне, Богородичен, глас тойже: Призри на моление:

Тропарь, глас 4:

Славою богоугодных подвигов твоих/ днесь страна Калужская хвалится/ и Оптина Пустынь память твою светло празднует,/ преподобномучениче Лаврентие блаженне,/явился бо еси веры крепкий адамант/ и освятил еси землю нашу кровию твоею,/ темже моли Христа Бога спастися душам нашим.

Слава, и ныне, глас тойже:

Заступнице от враг иноплеменных Необоримая Калужския земли/ и Избавительнице от смертоносныя язвы Милостивая!/ Избави рабы Твоя от всяких бед и болезней,/ с верою и любовию прибегающия к чудотворней иконе Твоей,/ и спаси души наша.

На утрени

На Бог Господь: тропарь преподобномученику Лаврентию дважды. Слава, и ныне: Богородице.

По 1-м стихословии седален, глас 5.

Подобен: Собезначальное Слово:

Во обитель Оптинскую водворився, богомудре Лаврентие, ветхую ризу греха отринул еси и, во иноческия одежды облекся, на страсти мужественне вооружился еси и воин Христов добропобедный показался еси. Тем вси зовем: обнищавшия ны грехом путеводствуй на стези добродетелей твоими к Богу молитвами.

Слава, и ныне, Богородичен, глас 4:

Всех святых святейшая, Благая Богородице Дево, Ты еси по Бозе упование наше и на Тя надежду спасения возложихом, темже молимся и неустанно вопием: подаждь нам, грешным рабом Твоим, великия Твоя милости.

По 2-м стихословии седален, глас 8.

Подобен: Премудрости:

Добродетельным житием, крепким пощением и непрестанною молитвою на безплотныя враги ополчился еси, преподобномучениче Лаврентие, и немощная враждования тех посрамил еси, иже, не могуще тя побороти, в руце беззаконных предаша. Обаче ты, и по смерти жив сый, Христу предстоиши и молишися о душах наших.

Слава, и ныне, Богородичен:

Богородицу Пренепорочную в песнех возвеличим и, взирающе на честный Ея образ, со умилением и любовию возопиим: радуйся, Благая Вратарнице, двери райския верным отверзающая.

Величание:

Величаем тя,/ преподобномучениче Лаврентие,/ и чтим подвиги и страдания твоя,/ яже за Христа/ претерпел еси.

Псалом избранный:

Весть Господь путь праведных и путь нечестивых погибнет.

Работайте Господеви со страхом и радуйтеся Ему с трепетом.

Ты же, Господи, Заступник мой еси, Слава моя и возносяй главу мою.

Помилуй мя, Господи, яко немощен есмь, исцели мя, Господи, яко смятошася кости моя.

Отступите от Мене вси делающии беззаконие, яко услыша Господь глас плача моего.

Господи, Боже мой, на Тя уповах, спаси мя от всех гонящих мя и избави мя.

Помощь моя от Бога, спасающаго правыя сердцем.

Да уповают на Тя знающии имя Твое, яко не оставил еси взыскающих Тя, Господи.

Ты, Господи, сохраниши ны и соблюдеши ны от рода сего и вовек.

По полиелеи седален, глас 4:

Монашество, яко мученичество вольное, и мученичество, яко послушание монашеское, воприял еси от Христа, отче Лаврентие, темже человецы и ангели днесь хвалу тебе приносят и подвиги твоя славят.

Слава, и ныне, Богородичен:

Предстательнице теплая и Заступнице усердная, в годину безбожия от конечныя погибели землю Русскую всемощным ходатайством к Сыну Твоему избавльшая. И ныне не остави нас молитвами Твоими, Владычице Богородице.

Степенна 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех,/ яже воздаде ми? Всякое дыхание: Евангелие от Марка, зачало 37.

По 50-м псалме стихира, глас 6:

Егда в жертву живую/ Господу себе самаго принесл еси,/ преподобномучениче Лаврентие,/ отверзошася ти врата правды/ и ныне, вшед в Царство Небесное,/ престолу Бога Живаго предстоиши,/ хвалу Ему с лики новомучеников Русских возсылая.

Канон, глас 4

Песнь 1.

Ирмос: Моря чермную пучину/ невлажными стопами/ древний пешешествовав Израиль,/ крестообразныма Моисеовыма рукама/ Амаликову силу в пустыни победил есть.

Любовию ко Вседержителю распалився, отче, мою озимевшую душу дыханием молитв твоих согрей, да воспою приснославную и священную твою память.

Ангельскому житию приснии твои, отче Лаврентие, поревноваша, темже един по единому Богу присвоишася и, обручения Ангельскаго сподобившеся, на земли вкупе ангельски пожиша.

Ввоинився в полк иноческий, богомудре Лаврентие, оптинским воеводам в послушание вдался еси и на страсти мужественне ополчился еси, ихже и низложил еси.

Богородичен: Любити Божий закон наставляющи нас, икону Свою, Богородице, явила еси в земли Калужстей, к ней же припадающе взываем: настави ны на стези правыя, Закононаставнице.

Песнь 3.

Ирмос: Не мудростию, и силою, и богатством хвалимся,/ но Тобою, Отчею Ипостасною Мудростию, Христе:/ несть бо свят, паче Тебе, Человеколюбче.

Евангельское слово, отче, послушав и всю мирскую молву оставив, богомудрым отцем оптинским прилепился еси, иже в меру мужа духовнаго тя возрастиша.

Не по мудрости мирстей богоугодное житие твое устроися, отче Лаврентие, но по послушанию отцем богопросвещенным и по благодати Христовой, всельшейся в тя.

Трудолюбне послушание монашеское исполнял еси и рукоделию от юности твоея прилежал еси, отче, сего ради Дародатель Христос ущедри тя, во еже врагом и ближним во благое содейстовати.

Богородичен: Лицы празднующих песненно да торжествуют, и веси вся и гради Калужстии в кампаны ударяют и благословят Деву, едину в женах Бога во плоти рождшую.

Седален, глас 8:

Преподобнически на земли пожил еси, отче, плоть твою трудами неленостно распиная и добродетельми душу украшая, последи же и кровь твою за Христа излиял еси, сего ради молися Ему прилежно о чтущих святую память твою.

Слава, и ныне, глас тойже:

Силою невидимою Твоя икона, Богородице, одеяна, неисчетную пучину чудес источает яве и устрашает иноплеменных полки и еретичествующих разоряет соборища, здравие же независтно с верою притекающим дарует, и любовь умножает. Темже град Калуга непрестанно Тобою хвалится, Ты бо еси Заступница земли Русския необоримая.

Песнь 4.

Ирмос: Вознесена Тя видевши Церковь на Кресте,/ Солнце Праведное,/ ста в чине своем,/ достойно взывающи:/ слава силе Твоей, Господи.

Юность твоя, отче, ветвие добродетелей израсти, яже в монашестем жительстве цветы благочестия украсишася, темже во страдании твоем плод Богу красен принесл еси, достойно взывая: слава силе Твоей, Господи.

Паству твою, яко добрый виноградарь, к лозе Христовой привил еси, научая за вся благодарение Богу приносити и достойно взывати: слава силе Твоей, Господи.

Лук безбожия сокрушися о камень твоего, отче, исповедания и уста, оболгающая тя, затворишася, достойно правду тебе вещающу.

Богородичен: Яко честнейшую Херувим и преимущую сил Небесных почти́ Тя Сын Твой, Богоневесто, темже образу Твоему покланяемся, яко Царица еси Небесе и земли, имже украшается земля Калужская.

Песнь 5.

Ирмос: Ты, Господи, мой Свет,/ в мир пришел еси,/ Свет Святый, обращаяй из мрачна неведения,/ верою воспевающия Тя.

Ты, Господи, Свет мой, в темнице немолчно взывал еси, Лаврентие крепкодушне, светом веры область тмы побеждая.

Укрепляяй любящия Его, Господь во страданиих силу Свою ти даде, да ведают безбожнии, что есть вера Христова на земли.

Похвалу тебе исплетает днесь пустынь Оптина, в нейже у ног отцев преподобных воспитался еси, темже молитися не престай, Лаврентие, о всех твою память зде празднующих.

Богородичен: Стена крепкая и благочестия ограда чудотворная икона Твоя, Богородице, сущи: сего ради еретическая посрамляются собрания и немощствуют, на Твой взирающе благий и светлый лик.

Песнь 6.

Ирмос: Пожру Ти со гласом хваления, Господи,/ Церковь вопиет Ти,/ от бесовския крове очищшися/ ради милости от ребр Твоих/ истекшею Кровию.

Хлебом разумным гибнущия от глада слова Божия напитал еси, Лаврентие, и гласу твоему внимающия на брань духовную укрепил еси.

Веры крепкий адамант явился еси и безбожную беззаконную власть посрамил еси, словесы истиными уста льстивая заграждаяй.

Аще и заточиша тя беззаконницы в темницу и гладом изнуряху тя, питателя сирот и вдов, но души твоея не возмогоша отлучити от любве Христовы.

Богородичен: Исцелений богатый источник, в скорбех и нуждах всесильный покров, в печалех утешение и девственниц лепотное веселие Твоя, Дево, икона Калужская явилася есть.

Кондак, глас 8.

Подобен: Взбранной:

Землю калужскую обтекл еси,/ богомудре Лаврентие,/ благоуханием Христовым сию облагоухая/ и словом Божиим чада твоя питая;/ темже и ныне не презри зовущия ти:/ радуйся, мучениче преславне.

Икос:

Ангельски на земли пожив и с Небесе росу благодати Христовы восприим, во обители Оптинстей преславно добродетельми просиял еси и пред мучители веру твердо исповедал еси, святе Лаврентие, сего ради похваляем тя словесы сицевыми:

Радуйся, православных веселие;

радуйся, безбожных посрамление.

Радуйся, любве Христовы сияние;

радуйся, надежды непостыдныя источниче.

Радуйся, преподобных оптинских живоносная ветве;

радуйся, паствы твоея заступниче крепкий.

Радуйся, Лаврентие, мучениче преславный.

Песнь 7.

Ирмос: Образу златому не поклонившеся, отроцы авраамстии/ искушахуся, яко злато в горниле,/ в пещи огненней, яко в чертозе светлем,/ ликоваху, поюще:/ благословен еси, Боже отец наших.

Евангельскою любовию возгоревся, Христу всем сердцем работати возжелал еси; темже, семена слова Божия сея, ниву плодоносну сотворил еси, поя: благословен еси, Боже отец наших.

На камене предания церковнаго стопы твоя утвердив, отеческое учение делы исполнил еси и за други живот свой положил еси, в радости поя: благословен еси, Боже отец наших.

Истину Христову житием утверждая, путем многоскорбным и узким шествовал еси, Лаврентие, темже, ложь мучителей дерзновенне обличив и муки от них прием, ныне на Небесех ликуеши, поя: благословен еси, Боже отец наших.

Богородичен: Ангелосветлый Твой лик и целомудреннаго образа Твоего великая воистину сила, нечестивых развращенный попаляет нрав, и наставляет к лучшим изменитися добротам и взывати: Благословен еси, Боже отец наших.

Песнь 8.

Ирмос: Избавителю всех, Всесильне,/ посреде пламене благочествовавшия,/ снизшед, оросил еси/ и научил еси пети:/ вся дела, благословите, пойте Господа.

Пастырския мудрости дар от Пастыреначальника восприим, овцы Христовы словесною пищею питал еси и во благочестии наставлял еси, взывая: вся дела, благословите, пойте Господа.

Оптина пустынь память твою благочестно совершает, отче Лаврентие, и мученическою порфирою твоею украшается, в радости поющи: вся дела, благословите, пойте Господа.

Даже до конец земли Калужския достиже слава твоя, святе Лаврентие, темже грады и веси ея, память твою светло празднующе, с веселием взывают: вся дела, благословите, пойте Господа.

Богородичен: Одеяние светоносное и просвещение душам низпосылаеши, Дево, всем к чудотворному Твоему верою притекающим образу, обнаженным Божественныя благодати и омраченным грехми.

Песнь 9.

Ирмос: Ева убо недугом преслушания клятву вселила есть,/ Ты же, Дево Богородице,/ прозябением чревоношения/ мирови благословение процвела еси./ Тем Тя вси величаем.

Богатство некрадомое на Небеси стяжал еси, Лаврентие, труды рук твоих нищия богатотворя, темже и нас, память твою почитающих, в Бога богатети настави.

Аще и смерть нуждную подъял еси и сокровище мощей твоих до дне суднаго сокрыто есть от нас, но вемы тя на Небеси со Христом живуща и тепле о нас молящася.

Единомыслен преподобным учителем твоим быв, в гонениих от обители Оптинския духом не отлучился еси и в страданиих верен Христу пребыл еси. Темже днесь тя величаем.

Богородичен: На Твой благообразный взирающе лик, недоумеем достойную Ти похвалу принести, Отроковице, но якоже древле Архистратиг научи: радуйся, Благословенная в женах, вопием Ти, Едина Пречистая.

Светилен.

Подобен: Посетил ны есть:

Светом жития твоего мрак безбожия озарил еси и верных сердца просветил еси, подвизая небоязненно славити незаходимое Солнце Христа.

Слава, и ныне, Богородичен:

Девства светильник, чистоты сокровище, евангельскаго любомудрия светлость являет нам, Марие Богородительнице, образ Твой, имже страну Калужскую озарила еси.

На хвалитех стихиры, глас 1.

Подобен: Небесных чинов:

Небесным чином сопричелся еси,/ земное мудрование оставив,/ молитвою же и трудолюбием известнейшим/ страсти плотския умертвил еси/ и добродетелей богатство неиждиваемое стяжал еси,/ Лаврентие преподобне,/ моли о душах наших.

Хлебом разумным чад твоих препитал еси,/ богомудре отче Лаврентие,/ и, любовию ко Христу распалаемь,/ в темнице свободен пребыл еси,/ темже твою светоносную память совершающих/ спаси от бед твоими молитвами.

Исповеданием Христа твой язык освятив,/ уста безбожная заградил еси,/ и, на враги безплотныя доблестне ополчився,/ в ризу светлую облеклся еси,/ очервленив ю кровьми страдания твоего,/ темже и венцем безсмертия увенчался еси,/ Лаврентие преподобне.

Слава, глас 2:

Добрая слава твоя/ протече по всей земли Калужстей/ и слава Небесная тя увенча,/ темже молися Христу, преподобномучениче Лаврентие,/ рукописание грех наших изгладити/ твоим дерзновенным предстательством/ и стране нашей даровати в Православии утверждение/ и душам нашим велию милость.

И ныне, Богородичен, глас тойже:

Глаголы Гаврииловы сохраньши,/ Слово Божие, Пречистая, вместила еси,/ свиток Богоначерта́н явилася еси, Девице,/ темже в книзе животней написатися молися/ чтущим Твой образ,/ града Калуги украшение.

Славословие великое. И отпуст.

Блаженна от канона, песни 3-я и 6-я. Прокимен, глас 7: Восхвалятся преподобнии во славе/ и возрадуются на ложах своих. Стих: Воспойте Господеви песнь нову,/ хваление Его в церкви преподобных. Апостол к Тимофею, зачало 291. Аллилуия, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его. Евангелие от Матфеа, зачало 36. Причастен: В память вечную будет праведник:

Источник: Текст службы утвержден к общецерковному богослужебному употреблению на заседании Священного Синода 24 августа 2023 года (журнал № 68).

Ме́сяца октября́ в 13-й дeнь

Святы́х священному́чеников Никола́я и Инноке́нтия, пресви́теров Новосиби́рских

На вели́цей вече́рни

Блаже́н муж: 1-й антифо́н. На Го́споди, воззва́х: стихи́ры на 8, глас 8:

Прииди́те, восхва́лим Новосиби́рския новому́ченики:/ си́и бо непови́нно от беззако́нных пострада́ша/ и побе́ду от Бо́га на безбо́жие улучи́ша,/ ны́не же кро́вию свое́ю спасе́ние нам при́сно хода́тайствуют.// Тех моли́твами, Христе́ Бо́же, поми́луй нас.

Мир Лики́йских преди́вному чудотво́рцу тезоимени́те,/ новому́чениче Нико́лае,/ победоно́сец во страда́ниих показа́лся еси́,/ па́ству свою́ в ве́ре сохрани́в,// пра́вило ве́ры и о́браз кро́тости яви́л еси́.

Непоро́чно служе́ние Бо́гу соверши́л еси́,/ непоро́чности соиме́нниче,/ новому́чениче Инноке́нтие,/ моля́щихся тебе́ в ве́ре непоро́чне утверди́,// да прии́мем от Бо́га нетле́нныя венцы́.

Му́ченик лет дре́вних подража́телие/ и но́вых лю́тых страда́ний прича́стницы,/ земли́ Сиби́рския украше́ние/ и гра́да Новосиби́рска сла́ва церко́вная,/ моли́теся о воспева́ющих страда́ния ва́ша,// я́же за Христа́ претерпе́ли есте́.

Егда́ Бо́жиим попуще́нием/ Русь Свята́я претерпева́ше страда́ния ве́лия,/ тогда́ Госпо́дь Помо́щник и Покрови́тель бысть во спасе́ние избра́нным Свои́м,// воздвиза́я на по́двиги новому́ченики и испове́дники Своя́.

Па́стырь до́брый ду́шу свою́ полага́ет за о́вцы своя́,/ рече́ Пастыренача́льник Христо́с,/ па́стыри до́брыя Никола́я и Инноке́нтия/ приводя́, я́ко свиде́тели кре́стных страда́ний Свои́х,/ ти́и бо соприча́стницы страсте́й Христо́вых бы́ша/ и в кре́пости свое́й си́лу Воскресе́ния Его́ яви́ша,// путь указу́юще нам в Ца́рствие Небе́сное.

Христу́, на́шего ра́ди спасе́ния пострада́вшему/ и воскре́сшему в тре́тий день по Писа́нием,/ святи́и Нико́лае и Инноке́нтие, да́же до сме́рти после́довали есте́,/ да и мы, взира́юще на страда́ния ва́ша,/ не отри́нем креста́ своего́,// показу́ющаго путь к Воскресе́нию.

А́гнец Бо́жий,/ взе́мляй грех ми́ра,/ гряде́т со сла́вою/ суди́ти мир и возда́ти коему́ждо по дело́м его́,/ да сподо́бимся и мы предста́тельством новому́чеников и испове́дников Це́ркве Ру́сския// улучи́ти от Судии́ Пра́веднаго ве́лию ми́лость.

Сла́ва, глас 6:

Прииди́те, благоче́стия рачи́телие,/ от коне́ц земли́ Сиби́рския хла́дныя/ те́пле восхва́лим священному́ченики Никола́я и Инноке́нтия,/ ти́и бо, огне́м любве́ ко Христу́ распаля́еми,/ ве́рою Тро́ическою мучи́телей победи́ша,/ те́мже ны́не, со упова́нием предстоя́ще Бо́гу,// мо́лятся о душа́х на́ших.

И ны́не, Богоро́дичен, глaс то́йже: Кто Тебе́ не ублажи́т:

Вход. Проки́мен дне. И чте́ния му́ченическая.

На лити́и стихи́ры хра́ма. И священному́чеников, глас 2:

Апо́столов подража́телие/ и му́чеников ревни́телие,/ новому́ченицы Нико́лае и Инноке́нтие,/ безбо́жнаго преще́ния не убоя́вшеся,/ ве́ру Христо́ву да́же до сме́рти соблюдо́сте./ Ны́не же, ве́лие дерзнове́ние ко Спа́су иму́ще,/ Того́ моли́те спасти́ся всем нам,// па́мять ва́шу че́стно пра́зднующим.

Сла́ва, глас 8:

Прииди́те, ве́рных собо́ри,/ новому́ченики на́ша све́тло почти́м,/ вку́пе со святи́тели Инноке́нтием, Софро́нием и Иоа́нном их прославля́юще,/ и с му́чеником Васи́лием Мангазе́йским ублажа́юще,/ и со все́ми святы́ми в земли́ Сиби́рстей просия́вшими// па́мять их при́сно воспева́юще.

И ны́не, глас то́йже:

Влады́чице, приими́ моли́твы раб Твои́х/ и изба́ви нас// от вся́кия ну́жды и печа́ли.

На стихо́вне, глас 2:

Земля́ Сиби́рская/ освяти́ся кро́вию мно́жества новому́чеников/ и Це́рковь Ру́сская обогати́ся благода́тию испове́дников,/ те́мже ны́не многострада́льцы/ ра́дуются в ли́це всех святы́х, в земли́ Ру́сской просия́вших.// И́хже моли́твами, Христе́ Бо́же, спаси́ ду́ши на́ша.

Стих: Воззва́ша пра́веднии,// и Госпо́дь услы́ша их.

Воззва́ша ко Го́споду новому́ченицы,/ зря́ще хра́мы Бо́жия поруга́емыя,/ и Госпо́дь услы́ша их,/ ны́не бо це́ркви святы́я воздвиза́ются/ и церко́вное благоле́пие умножа́ется./ Го́споди сил, с на́ми бу́ди// и сохрани́ достоя́ние Твое́ до сконча́ния ве́ка.

Стих: Мно́ги ско́рби пра́ведным,// и от все́х их изба́вит я́ Госпо́дь.

Мно́ги ско́рби пра́ведным,/ егда́ за беззако́ния нечести́вых оскудева́ют ве́ра и благоче́стие,/ тогда́ Христо́с, А́гнец Бо́жий,/ И́же всем хо́щет спасти́ся/ и в позна́ние и́стины приити́,/ призыва́ет к подвиго́м кре́стным избра́нныя а́гнцы Своя́,/ да, после́дующе стопа́м Его́,// с ра́достию теку́т в жизнь ве́чную.

Сла́ва, глас то́йже:

Се град Новосиби́рск, иде́же просла́ви Госпо́дь святу́ю па́мять ва́шу,/ дво́ице присносла́вная,/ новострада́льцы Нико́лае и Инноке́нтие,/ мо́лит вас ны́не:/ охрани́те град наш и всю зе́млю Сиби́рскую/ от нахожде́ния иноплеме́нных и междоусо́бныя бра́ни,/ да ти́хое и благода́тное житие́ поживе́м// во вся́ком благоче́стии и чистоте́.

И ны́не, глас то́йже:

Непроходи́мая врата́,/ та́йно запеча́тствованная,/ Благослове́нная Богоро́дице Де́во,/ приими́ моле́ния на́ша/ и принеси́ Твоему́ Сы́ну и Бо́гу,// да спасе́т Тобо́ю ду́ши на́ша.

Тропа́рь священному́чеником, глас 2:

Ве́лия правосла́вныя ве́ры исправле́ния:/ в лю́тых гоне́ниих на Це́рковь Бо́жию,/ я́ко в черто́зех упокое́ния,/ в ра́нах и у́зах ра́довастеся,/ Крест бо Христо́в на ра́мена взе́мше,/ ве́рою и любо́вию Тому́ после́довали есте́/ в наде́жди живота́ ве́чнаго,/ новому́ченицы Нико́лае и Инноке́нтие,// моли́те Пострада́вшаго нас ра́ди спасти́ ду́ши на́ша.

Ин тропа́рь, глас 4:

Днесь, благове́рнии лю́дие, соше́дшеся восхва́лим/ священному́ченик Новосиби́рских дво́ицу Никола́я и Инноке́нтия:/ ти́и бо в годи́ну лю́тых гоне́ний от безбо́жных пострада́ша/ и венцы́ нетле́нными от Христа́ Бо́га венча́шася,/ и ны́не, предстоя́ще Престо́лу Вседержи́теля,/ Того́ я́ко Бла́га мо́лят/ утверди́ти ве́ру правосла́вную,/ сохрани́ти Оте́чество на́ше в благоде́нствии,// дарова́ти мир и спасти́ ду́ши на́ша.

На у́трени

На Бог Госпо́дь: тропáрь священному́чеником, двáжды. Слáва, и ны́не, Богоро́дичен, глaс 2: Вся па́че смы́сла:

По 1-м стихосло́вии седа́лен, глас 4:

Ны́не све́тло пра́зднует Новоникола́евск град,/ иде́же соверши́ся прославле́ние ва́ше, священному́ченицы Нико́лае и Инноке́нтие,/ ны́не па́ства сиби́рская духо́вно торжеству́ет/ и хра́мы Бо́жии ико́нами ва́шими украша́ются,/ веселя́тся гра́ды и ве́си, иде́же Бо́гу усе́рдно послужи́ли есте́./ Того́ моли́те о почита́ющих вас,/ да да́рует нам ве́лию ми́лость.

Сла́ва, и ны́не, Богоро́дичен, глас то́йже:

Богоро́дицу пе́сньми немо́лчными благоче́стно воспои́м вопию́ще:/ ра́дуйся, Горо́ Свята́я;/ ра́дуйся, Престо́ле огнено́сный всех Царя́;/ ра́дуйся, А́нгелов Ра́досте и му́чеников Сла́во.

По 2-м стихосло́вии седа́лен, глас 4:

Попече́ние име́вше о служе́нии Бо́гу и па́стве,/ за ве́ру правосла́вную пострада́ли есте́/ и вои́стину оби́тели Пресвяты́я Тро́ицы яви́лися есте́, священному́ченицы Нико́лае и Инноке́нтие,/ та́же и, о су́етных небре́гше,/ Сокро́вище благи́х и жи́зни Пода́теля стяжа́ли есте́.

Сла́ва, и ны́не, Богоро́дичен, глас то́йже:

Ма́ти Бо́жия Пречи́стая,/ исцели́ ны от вся́каго греха́/ и очи́сти от вся́кия скве́рны душе́вныя и теле́сныя,/ и ку́пно с новому́ченики земли́ Сиби́рския/ умоли́ Христа́ Спа́са на́шего спасти́ ду́ши на́ша.

Велича́ние:

Велича́ем вас,/ святи́и новому́ченицы Нико́лае и Инноке́нтие,/ и чтим честна́я страда́ния ва́ша,/ я́же за Христа́// претерпе́ли есте́.

Псало́м избра́нный: Бог нам прибе́жище и си́ла:

По полиеле́и седа́лен, глас 6:

Бо́дрствуйте, мужа́йтеся и в ве́ре укрепля́йтеся, глаго́лет апо́стол Па́вел;/ новому́ченицы же, глас его́ послу́шавше,/ ве́ру Христо́ву соблюдо́ша,/ и, ны́не дерзнове́ние иму́ще ко Спа́су,/ мо́лят спасти́ся нам.

Сла́ва, и ны́не, Богоро́дичен, глас то́йже:

Приими́, Богоро́дице, пе́сни хвале́бныя, от недосто́йных уст Тебе́ возноси́мыя./ Мы бо, на Твой покро́в наде́ющеся,/ со святы́ми новому́ченики Твое́ ми́лостивое предста́тельство прославля́ем.

Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л ны еси́ в поко́й. Стих: Разже́гл ны еси́, я́коже разжиза́ется сребро́. Ева́нгелие от Матфе́я, зача́ло 36.

По 50-м псалме́ стихи́ра, глас 6:

Поми́луй нас, Бо́же,/ по вели́цей ми́лости Твое́й/ и моли́твами Пречи́стыя Твоея́ Ма́тере/ и всех новому́чеников Це́ркве Ру́сския// беззако́ния на́ша очи́сти.

Кано́н священному́чеников Никола́я и Инноке́нтия, глас 8.

Песнь 1.

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Мно́гими содержи́ми напа́стьми,/ к вам прибега́ем, спасе́ния взыску́юще, о святи́и новому́ченицы и испове́дницы,/ от тя́жких и лю́тых обстоя́ний моли́те спасти́ся нам.

Страсте́й и поро́ков безсту́дных смуща́ют наше́ствия,/ я́же мно́гими печа́льми сокруша́ют сердца́ на́ша;/ вы же, ве́рнии во́ини Христо́ви Нико́лае и Инноке́нтие,/ испроси́те нам душе́вную чистоту́ и кре́пость,/ свяще́нную па́мять ва́шу соверша́ющим.

Лю́тая муче́ния за Христа́ претерпе́ли есте́, сла́внии новому́ченицы,/ к вам простира́ем смире́нная моле́ния,/ страда́ньми ва́шими в ве́ре укрепля́еми,/ испроси́те Оте́честву на́шему мир/ и душа́м на́шим ве́лию ми́лость.

Богоро́дичен: Пречи́стая Де́во Богоро́дице,/ с новому́ченики и все́ми святы́ми земли́ Сиби́рския/ умоли́ Всеблага́го Бо́га,/ да промышле́нием Боже́ственным поми́лует и спасе́т всех нас.

Песнь 3.

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.

Ве́рных утвержде́ние су́ще, святи́и новому́ченицы,/ в ве́ре Христо́ве пребы́ли есте́,/ ко приста́нищу церко́вному окормля́юще всех хотя́щих спасти́ся/ и от ересе́й и собла́знов обновле́нческих па́ству свою́ заступа́юще.

Мо́лим вас, дво́ице свяще́нная,/ разори́ти бу́рю но́вых собла́знов/ и сете́й многови́дных нас изба́вити,/ благоче́стно па́мять ва́шу воспева́ющих.

Сокро́вище доброде́телей духо́вных испроси́те нам, святи́и новому́ченицы,/ земна́я бога́тства и уте́хи привре́менныя/ Ца́рства ра́ди Христо́ва презира́ти науча́юще.

Богоро́дичен: Исцеле́ний неду́гов душе́вных и теле́сных/ про́сим от Тебе́, Пренепоро́чная Де́во,/ исцеле́ний бо неоску́дное сокро́вище Тя ве́мы, неиждива́емое.

Седа́лен, глас 3:

Кто ны разлучи́т от любве́ Бо́жия,/ Па́вел возгласи́ небоше́ственный,/ ни скорбь, ни теснота́, ни гоне́ния, ни смерть./ Та́кожде и вы, святи́и новому́ченицы,/ любо́вию, я́же ко Христу́ Бо́гу, укрепля́еми,/ Небе́снаго Ца́рствия дости́гли есте́,/ иде́же, со апо́столы веселя́щеся,/ ве́ру, любо́вию споспешеству́емую, и спасе́ние ве́чное/ испроси́те всем нам.

Сла́ва, и ны́не, Богоро́дичен, глас то́йже:

Богоро́дице Де́во,/ упова́ние христиа́ном,/ покры́й, соблюди́ и спаси́ на Тя упова́ющих.

Песнь 4.

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Бу́рею прегреше́ний обурева́еми,/ благода́тнаго утеше́ния про́сим от Христа́, тишины́ Пода́теля,/ ва́шими моли́твами, новому́ченицы земли́ Сиби́рския.

Наслажда́ющеся духо́вною ра́достию в па́мяти ва́шей,/ святи́и Нико́лае и Инноке́нтие,/ сла́ву возсыла́ем Бо́гу, просла́вльшему вас.

Одр боле́зни ко благоче́стию призыва́ет/ и не́мощи теле́сныя проси́ти от Бо́га исцеле́ния науча́ют./ Вы же, святи́и новому́ченицы, боле́зни мно́гия за Христа́ претерпе́вше,/ здра́вие душе́вное и теле́сное испроси́те вас почита́ющим.

Богоро́дичен: Наде́жду на ми́лость Всецари́цы Богоро́дицы иму́ще,/ скорбе́й и боле́зней мно́гих избавля́емся,/ благода́рно за явле́нная и неявле́нная к нам благодея́ния,/ я́ко всемо́щную Цели́тельницу, воспева́юще.

Песнь 5.

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколю́бче.

Нетле́нную ра́дость во све́те лица́ Бо́жия улучи́вше, сла́внии новому́ченицы,/ испо́лните сердца́ на́ша неизрече́нною ра́достию/ о Бо́зе, Спаси́теле на́шем.

Изба́вите нас от бед и поги́бели ве́чныя, страда́льцы Христо́вы,/ и благода́ть, вся́кое земно́е мудрова́ние превосходя́щую,/ испроси́те те́плыми ва́шими к Бо́гу моли́твами.

Просвеще́ния благода́тнаго сподо́би нас, Христе́, Све́те и́стинный,/ просвеща́яй и освяща́яй вся́каго челове́ка, гряду́щаго к Тебе́, Со́лнцу пра́вды,/ моли́твами новому́чеников, Тебе́ ра́ди пострада́вших.

Богоро́дичен: Исцели́ боле́зни многостра́стных душ на́ших, Пренепоро́чная Богороди́тельнице,/ бла́гостию от Тебе́ Ро́ждшагося,/ и просвеще́ние душе́вное ско́ро пода́ждь нам.

Песнь 6.

Ирмо́с: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.

Ны́не смерть вам прибли́жися, вопия́ху гони́тели ва́ши,/ егда́ мно́зи лжесвиде́телие клевету́ на вы воздвиза́ху, святи́и Нико́лае и Инноке́нтие,/ вы же Христа́ не отреко́стеся,/ но враго́в злоде́йства му́жески попра́ли есте́,/ Па́сху хва́ляще ве́чную.

Ио́на проро́к возопи́ ко Го́споду, во чре́ве ки́тове моля́ся,/ прообразу́я погребе́ние и воста́ние Спа́сово тридне́вное,/ новому́ченицы же Це́ркве Ру́сския посреде́ вели́ких страда́ний моля́хуся,/ Па́сху сла́вяще ве́чную.

Бу́дите нам кре́пкое прибе́жище,/ сла́внии страда́льцы Христо́вы Нико́лае и Инноке́нтие,/ от пото́па страсте́й и бед спаса́юще нас.

Богоро́дичен: Спа́са ми́ру ро́ждшая,/ мо́лимся Тебе́, Скоропослу́шнице на́шей,/ спаси́ от бед рабы́ Твоя́, Богоро́дице,/ многопопече́нием су́етным потопля́емыя.

Конда́к, глас 8:

Ве́ру Христо́ву, я́ко щит,/ в се́рдце прие́мше, святи́и новому́ченицы,/ клеветы́ челове́ческия и лю́тых страда́ний не убоя́стеся,/ но посреде́ муче́ний Бо́га призва́сте,/ и ны́не ускори́те на по́мощь на́шу,// я́ко присносла́внии.

И́кос:

А́нгелов подража́телие, новому́ченицы Нико́лае и Инноке́нтие,/ со А́нгелы ны́не на Небесе́х ра́дующеся,/ пе́ние хвале́бное приими́те от нас, па́мять ва́шу соверша́ющих,/ да ва́шими моли́твами прича́стницы жи́зни ве́чныя бу́дем./ Те́мже, ны́не восхваля́юще вас, глаго́лем вам сицева́я:/ Ра́дуйтеся, я́ко ве́ру Христо́ву во у́зах и страда́ниих соблюдо́сте;/ ра́дуйтеся, я́ко смире́нием свои́м горды́ню гони́телей посрами́сте./ Ра́дуйтеся, любо́вь ко Христу́, за ны пострада́вшему, ми́ру яви́вшии;/ ра́дуйтеся, се́ятели ненави́стныя ро́зни ми́ра сего́ обличи́вшии./ Ра́дуйтеся, я́ко наде́жду на Христа́ непоколеби́му сохрани́ли есте́;/ ра́дуйтеся, я́ко иска́вшия погуби́ти ду́ши ва́ша и наде́ющияся на си́лу свою́ не́мощны яви́ли есте́./ Ра́дуйтеся, я́ко во уничиже́нии ва́шем то́кмо о Кресте́ Христо́вом похвалу́ прия́сте;/ ра́дуйтеся, я́ко сораспе́ншеся Христу́, с Ним спросла́вистеся./ Ра́дуйтеся, я́ко всяк зол глаго́л Христа́ ра́ди претерпе́сте на земли́;/ ра́дуйтеся и весели́теся, я́ко мзда ва́ша мно́га на Небеси́./ Ра́дуйтеся, Нико́лае и Инноке́нтие, сла́внии новому́ченицы.

Синакса́рий

В сей день па́мять соверша́ем Новосиби́рских новому́чеников Никола́я и Инноке́нтия, в годи́ну лю́тых гоне́ний на ве́ру правосла́вную неви́нно от богобо́рцев пострада́вших. Гони́телие тща́хуся возвести́ на них лжесвиде́тельства, во е́же пови́нны их сотвори́ти в противле́нии власте́м, в уготовле́нии мяте́жей и междоусо́бныя бра́ни. В сих наме́рениих несмы́сленнии гони́телие новому́чеников уподо́бишася враго́м Христо́вым на суди́лищи у Пила́та, и́же иска́ху лжесвиде́тельства и не обрета́ху, я́ко пи́сано во Святе́м Ева́нгелии (Мф.26:59). Но я́коже о́ных лжесвиде́тельства си́лы не име́яху, та́кожде и клеветы́ мучи́телей, возводи́мыя на священному́чеников Никола́я и Инноке́нтия, пребы́ша тще́тны. Святи́и яви́ша непоколеби́мость ве́ры, необори́мость наде́жды и кре́пость любве́ ко Христу́. Пострада́вшии за ве́ру отце́в свои́х, ны́не прославля́ются в ли́це всех новому́чеников и испове́дников Це́ркве Ру́сския и мо́лятся Бо́гу о спасе́нии на́шем. Ами́нь.

Песнь 7.

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Вавило́н, си́речь грехо́вное смеше́ние,/ спасе́нию ми́ра противобо́рствует,/ вы же, новому́ченицы,/ ве́рою Тро́ическою безбо́жие попра́вше, Бо́га призва́сте:/ потщи́ся на по́мощь на́шу,/ вся бо мо́жеши хотя́й.

За зако́ны оте́ческия в Вавило́не благочести́вии ю́ноши бе́дствия прия́ша,/ вы же, новому́ченицы земли́ Сиби́рския,/ за ве́ру святу́ю правосла́вную ве́лия страда́ния претерпе́ли есте́;/ ку́пно со все́ми святы́ми моли́те Изба́вителя Бо́га о воспева́ющих вас:/ оте́ц на́ших Бо́же, благослове́н еси́.

За сокро́вища мирска́я и жизнь привре́менную/ не премени́ли есте́ сокро́вища духо́вная,/ святи́и новому́ченицы Нико́лае и Инноке́нтие,/ но, враго́в ухищре́ния попра́вше, непреста́нно воспева́ли есте́:/ оте́ц на́ших Бо́же, благослове́н еси́.

Богоро́дичен: Богоро́дице Всепе́тая,/ теле́сныя не́мощи и душе́вныя неду́ги исцели́,/ Спа́са и Изба́вителя неду́гов ро́ждшая.

Песнь 8.

Ирмо́с: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся ве́ки.

Егда́ испо́лнися ча́ша страда́ний новому́чеников земли́ на́шея,/ тогда́ призре́ Госпо́дь на Це́рковь Ру́сскую./ И ны́не па́ки зрим земно́е oте́чество на́ше/ хра́мы Бо́жиими и святы́ми оби́тельми украша́емо во спасе́ние нас пою́щих:/ Изба́вителю Бо́же, благослове́н еси́.

Страда́ния ва́ша честна́я прославля́юще,/ святи́и Нико́лае и Инноке́нтие,/ благода́рственная пе́ния воспева́ем/ ди́вному во святы́х Свои́х Бо́гу на́шему.

Тро́ичен: О Тро́ице Свята́я, Единосу́щная и Неразде́льная,/ спаси́ всех нас,/ па́мять новому́чеников Новосиби́рских све́тло пра́зднующих.

Богоро́дичен: Зря́щи поруга́ние свята́го уде́ла Твоего́, Богоро́дице Де́во,/ умоли́ Сы́на Своего́ суд об Оте́честве на́шем преложи́ти на ми́лость./ Те́мже и ны́не сохрани́ гра́ды на́ша, Засту́пнице усе́рдная,/ Твои́ бо есмы́ раби́,/ да не постыди́мся.

Песнь 9.

Ирмо́с: Вои́стину Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безпло́тными ли́ки Тя велича́юще.

То́ка моле́ний нас, гре́шных, не отврати́теся,/ новому́ченицы сла́внии Нико́лае и Инноке́нтие,/ ва́ша по́двиги воспева́ющих/ и Бо́га непреста́нно прославля́ющих.

Ра́дости духо́вныя сердца́ на́ша испо́лните, святи́и новому́ченицы,/ грехо́вныя обы́чаи отгоня́юще/ и во благоче́стии наставля́юще.

Све́та Твоего́ заря́ми пресве́тлыми просвети́ нас, Спа́се,/ ублажа́ющих новому́чеников Твои́х Никола́я и Инноке́нтия,/ со все́ми святы́ми, в земли́ Сиби́рстей просия́вшими,/ в ни́хже препросла́влен еси́.

Богоро́дичен: Ра́дуйся, Богоро́дице Де́во,/ ра́дуйся, земли́ Ру́сския Покро́ве,/ ра́дуйся, Сиби́рския страны́ Засту́пнице,/ ра́дуйся, градо́м и ве́сем на́шим огражде́ние.

Свети́лен:

Свет Христо́в просвети́л есть страну́ Сиби́рскую,/ Христо́вых благове́стников пропове́данием./ По́двигами же новому́чеников свет Христо́в па́ки зе́млю на́шу осиява́ет/ и благода́ть Боже́ственная ве́рным подае́тся.

Сла́ва, и ны́не, Богоро́дичен:

Ма́ти Бо́жия,/ сохрани́ под кро́вом Твои́м град наш/ и вся гра́ды и ве́си Сиби́рския/ и всю зе́млю Ру́сскую,/ благода́рно заступле́ние Твое́ воспева́ющую.

На хвали́тех стихи́ры, глас 4:

Днесь све́тло лику́ют гра́ди,/ иму́ще предста́тельство ва́ше,/ новому́ченицы Нико́лае и Инноке́нтие,/ прославля́юще страда́ния ва́ша,// я́же за Христа́ претерпе́ли есте́.

Днесь воспева́ют па́мять священному́чеников/ празднолю́бцы церко́внии,/ днесь страна́ Сиби́рская/ по́двигами страда́льцев Христо́вых обогаща́ется,/ ве́рныя на похвале́ние их созыва́юще// и воспева́юще вели́чие Бо́га на́шего.

Днесь новому́ченицы Инноке́нтий и Никола́й/ предстоя́т Престо́лу Влады́чню,/ сра́дующеся сиби́рским согра́жданом,/ ве́ру правосла́вную храня́щим// и святу́ю па́мять их соверша́ющим.

Днесь, ве́рнии лю́дие,/ прииди́те, поклони́мся и припаде́м ко Христу́,/ подаю́щему нам неоску́дную ми́лость/ предста́тельством пресла́вных новому́чеников,/ озари́вших луча́ми добро́т свои́х страну́ Сиби́рскую// и моля́щихся при́сно о душа́х на́ших.

Сла́ва, глас 6:

А́гнче Бо́жий,/ взе́мляй грехи́ ми́ра,/ приими́ моли́тву на́шу/ и да́руй оставле́ние мно́жества грехо́в/ моли́твами новому́чеников Никола́я и Инноке́нтия,// благоче́стно па́мять их соверша́ющим.

И ны́не, Богоро́дичен, глас то́йже:

Богоро́дице Влады́чице,/ всех скорбя́щих Ра́досте/ и Засту́пнице всех христиа́н,/ ненаде́ющихся Наде́ждо,/ моле́ния на́ша благоутро́бно приими́/ и Сы́ну Твоему́ и Бо́гу принеси́// о спасе́нии душ на́ших.

Славосло́вие вели́кое. И отпу́ст.

На Литурги́и

Блаже́нны от кано́на, пе́сни 3-я и 6-я. Проки́мен, глас 4: Святы́м, и́же суть на земли́ Его́,// удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Апо́стол к Ри́мляном, зача́ло 99. Аллилу́ия, глас 6: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам прибе́жище и си́ла, Помо́щник в ско́рбех, обре́тших ны зело́. Ева́нгелие от Иоа́нна, зача́ло 52. Прича́стен: В па́мять ве́чную бу́дет пра́ведник:

Моли́тва

О, святи́и священному́ченицы Нико́лае и Инноке́нтие! Ны́не усе́рдно притека́ем к вам и со умиле́нием мо́лимся: моли́твами ва́шими утверди́те ве́ру правосла́вную, укрепи́те наде́жду на́шу на по́мощь Бо́жию, да любо́вию же́ртвенною соедине́ни бу́дем в служе́нии Бо́гу и бли́жним во спасе́ние душ на́ших. Градо́м и ве́сем на́шим испроси́те от Бо́га благослове́ние, земли́ Сиби́рстей от наше́ствия иноплеме́нных огражде́ние, отпа́дшим от ве́ры правосла́вныя све́том Христо́вым просвеще́ние, служи́телем Це́ркве о спасе́нии пасо́мых ре́вность и попече́ние, ча́дом в за́поведех Бо́жиих науче́ние и всем чту́щим вас в де́лех ве́ры и любве́ благо́е поспеше́ние, да, ва́шими моли́твами укрепля́еми, просла́вим Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Источник: Текст утвержден Священным Синодом Русской Православной Церкви 28 декабря 2017 года (журнал № 131)

Ме́сяца окто́вриа в 15-й день

Священноиспове́дника Афана́сия, епи́скопа Ковро́вскаго, песнопи́сца

На вели́цей вече́рни

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

Святи́телю Афана́сие досточу́дне,/ печа́льнику земли́ Ру́сския,/ преподо́бному Се́ргию ревну́я,/ я́ко еди́н от учени́к о́наго яви́лся еси́,/ и любве́ ра́ди Христо́вы/ ду́шу за Це́рковь Правосла́вную положи́л еси́,/ я́ко сла́вий добропе́снивый,/ святы́х сро́дников на́ших прославля́я,// с ни́миже ны́не воспева́еши Тро́ицу Единосу́щную.

Святи́телю Афана́сие богому́дре,/ страда́нием за Христа́ очи́стив се́рдце твое́,/ стяжа́л еси́ дерзнове́ние необори́мое,/ во е́же обличи́ти отсту́пники,/ преда́ния церко́вная отверга́ющия/ и нововведе́ния льсти́вая вводя́щия,/ те́мже Не́бо благода́рственно прия́т тя,/ иде́же ны́не дре́ва жи́зни наслажда́ешися,// Христу́ моля́ся, дарова́ти нам мир и ве́лию ми́лость.

Святи́телю Афана́сие блаже́нне,/ благоуха́ние Христо́во яви́лся еси́ в Це́ркви на́шей,/ я́ко сладкопе́вец но́вый,/ святы́я, в земли́ Росси́йстей просия́вшия, пе́сньми велича́я,/ и я́ко па́стырь до́брый,/ ду́шу твою́ за о́вцы полага́я,/ у́зы и го́рькия рабо́ты Христа́ ра́ди претерпе́л еси́,/ те́мже, вене́ц пра́вды стяжа́в,// моли́ся дарова́ти нам мир и ве́лию ми́лость.

Сла́ва, глас 6:

По вся дни Бо́га ра́ди умерщвля́емь был еси́,/ Це́ркве Ру́сския сла́во, святи́телю Афана́сие,/ вмени́лся еси́ я́ко овча́ заколе́ния,/ ско́рби и тесноты́, гоне́ния и глад претерпева́я,/ и испове́дал еси́, я́ко ничто́же тя возмо́же разлучи́ти от любве́ Бо́жия,// я́же о Христе́ Иису́се, Го́споде на́шем.

И ны́не, Богоро́дичен.

Вход. Проки́мен дне. И чте́ния.

Прему́дрости Соломо́новы чте́ние (главы́ 4, 6, 7 и 2):

Похваля́ему пра́веднику, возвеселя́тся лю́дие./ Безсме́ртие бо есть па́мять его́,/ я́ко от Го́спода познава́ется и от челове́к/ и уго́дна Го́сподеви душа́ его́./ Возлюби́те у́бо, о му́жие, му́дрость и поживете́,/ восхощи́те ея́ и нака́зани бу́дете./ Нача́ло бо ея́ любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих:/ я́ко Той му́дрости Наста́вник есть,/ и му́дрых Испра́витель, и вся́кому смы́слу и де́лу Хитре́ц,/ и всем смы́слом научи́т му́дрость./ Есть бо в ней Дух разу́мен и Свят,/ и сия́ние Све́та Присносу́щнаго,/ и о́браз бла́гости Бо́жия./ Та дру́ги Бо́жия и проро́ки устроя́ет./ Благоле́пнейши же есть со́лнца и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та угожда́ющих ей от боле́зней изба́ви/ и наста́ви на стези́ пра́выя./ Даде́ им ра́зум име́ти свят, и сохрани́ я́ от ловя́щих,/ и по́двиг кре́пок подаде́ им./ Да разуме́ют вси, я́ко си́льнейши всего́ есть благоче́стие./ И никогда́же премо́жет зло́ба му́дрости,/ ниже́ пре́йдет злы́я, облича́ющи суд./ Реко́ша же в себе́, помы́сливше непра́ведно:/ наси́льствуем пра́ведному, и не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н,/ и улови́м пра́веднаго, я́ко неуго́ден нам есть,/ и проти́вится дело́м на́шим,/ и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бысть нам на обличе́ние помышле́нием на́шим,/ и тя́жек нам есть,/ и ви́димь, я́ко неподо́бно ины́м житие́ Его́/ и изменены́ стези́ Его́:/ в поруга́ние вмени́хомся Ему́,/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Уви́дим у́бо, а́ще словеса́ Его́ и́стинна суть:/ искуси́м, я́же сбыва́ются Ему́./ Руга́нием и му́кою истя́жем Его́,/ да разуме́ем кро́тость Его́, и искуси́м беззло́бство Его́:/ сме́ртию безобра́зною осу́дим Его́, бу́дет бо посеще́ние от слове́с Его́./ Сия́ помы́слиша и прельсти́шася:/ ослепи́ бо я́ зло́ба их, и не разуме́ша тайн Бо́жиих,/ и не разсуди́ша, я́ко Ты еси́ Бог Еди́н, живота́ име́яй и сме́рти власть,/ и спаса́яй во вре́мя ско́рби, и избавля́яй от вся́каго зла,/ Щедр и Ми́лостив, и дая́ преподо́бным Свои́м благода́ть,/ и Свое́ю мы́шцею го́рдым противля́яся.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем, суд нелицеме́рен./ Прии́мет щит непобеди́мый, преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им Дух Си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества,/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется им му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 2.

Подо́бен: Егда́ от Дре́ва:

Измла́да правосла́вному благоче́стию прилепи́вся,/ Афана́сие, о́тче свяще́нный,/ от си́лы в си́лу ше́ствовал еси́,/ орга́н быв Свята́го Ду́ха,/ Его́же де́йствием све́тло укра́шен/ и песнопе́нии Це́рковь Ру́сскую обогати́в,// па́стырь до́брый яви́лся еси́.

Сла́ва, глас 8:

Святи́телю и испове́дниче Христо́в Афана́сие,/ поне́же не от ми́ра сего́ был еси́,/ сего́ ра́ди возненави́де тя мир,/ но, дерза́я на премно́гую бла́гость Победи́вшаго мир,/ испове́довал еси́ Его́, я́ко и́стиннаго Бо́га, Го́спода Иису́са,/ Ему́же даде́ся вся́кая власть на Небеси́ и на земли́.// Те́мже сонасле́дник Ца́рствия Небе́снаго яви́лся еси́.

И ны́не, Богоро́дичен, глас то́йже, самогла́сен:

Сра́дуются с на́ми у́мная вся чинонача́лия,/ духо́вный совоку́пльше лик,/ ви́дяще Цари́цу и Влады́чицу всех,/ многоиме́нне ве́рными сла́виму:/ ра́дуются же и ду́си пра́ведных,/ су́щии зри́телие виде́ния, – / на возду́се моле́бно простира́ющу всечестне́и Свои́ ру́це,/ прося́щи умире́ния ми́ру,/ и земли́ Ру́сской утвержде́ния// и спасе́ния душ на́ших.

На стихо́вне стихи́ры, глас 2.

Подо́бен: До́ме Евфра́фов:

Земле́ Ру́сская,/ гра́де святы́й,/ велича́й святи́теля твоего́,/ и́же пе́сньми боже́ственными // ве́лий сонм святы́х просла́ви.

Стих: Бог мой еси́ Ты,// и испове́мся Тебе́.

Це́рковь Ру́сская,/ красу́йся и лику́й,/ се бо Афана́сий святи́тель/ Престо́лу Влады́чню// во сла́ве предстои́т, ра́дуяся.

Стих: Отве́рзите мне врата́ пра́вды,// вшед в ня, испове́мся Го́сподеви.

Святи́телю о́тче Афана́сие,/ архиере́ю честне́йший,/ моли́ся ко Го́споду/ о земно́м оте́честве твое́м// и о почита́ющих тя любо́вию.

Сла́ва, глас и подо́бен то́йже:

Но́вый до́ме Евфра́фов,/ уде́ле избра́нный,/ Русь Свята́я,/ храни́ ве́ру Правосла́вную,// в не́йже тебе́ утвержде́ние.

И ны́не, Богоро́дичен, глас 8.

Подо́бен: О, пресла́внаго чудесе́:

О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ доны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О, Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.

Тропа́рь, глас 4:

Сла́вы Бо́жия ревни́теля/ и благоле́пия церко́внаго блюсти́теля,/ те́сным житие́м и мно́гими по́двиги/ вели́кому иера́рху Александри́йскому подо́бника,/ святи́теля Афана́сия, испове́дника Росси́йскаго,/ усе́рдно восхва́лим, ве́рнии./ Сей бо при́сно мо́лится/ о спасе́нии земна́го Оте́чества своего́/ и о всех, живу́щих в нем,/ велегла́сно с любо́вию взыва́я:/ Русь свята́я,/ храни́ ве́ру Правосла́вную,// в не́йже тебе́ утвержде́ние.

На у́трени

На Бог Госпо́дь: тропа́рь то́йже. Сла́ва, и ны́не, Богоро́дичен.

По 1-м стихосло́вии седа́лен, глас 5:

Се́рдце ми́лующее име́л еси́, святи́телю о́тче Афана́сие,/ расточа́я и дая́ убо́гим ску́дная име́ния твоя́,/ ни еди́ному же гоня́щему тя зла за зло воздая́,/ сего́ ра́ди ми́лости от Бо́га сподо́бился еси́/ и пра́вда твоя́ пребыва́ет в век ве́ка.

Сла́ва, и ны́не, Богоро́дичен, глас 4:

Я́ко многоце́нное сокро́вище храни́т град Шу́я,/ чуде́сне напи́санную ико́ну Твою́,/ Пресвята́я Влады́чице Де́во Богоро́дице,/ во исцеле́ние лю́тыя я́звы и во утеше́ние правосла́вным Тобо́ю дарова́нную,/ от нея́же исто́чники благода́тныя ми́лости и утеше́ния и доны́не оби́льно излива́ются./ Проба́ви, Пречи́стая, и на бу́дущее вре́мя ми́лости Твоя́ ве́дущим Тя,/ храни́ град Твой и всю зе́млю Ру́сскую/ и спаса́й лю́ди, к Тебе́ с ве́рою и любо́вию притека́ющия. (Тропарь Шуйской-Смоленской иконе Богоматери, написанный cвятителем Афанасием)

По 2-м стихосло́вии седа́лен, глас 7:

Прии́м вся ору́жия Бо́жия и обле́кся в броню́ пра́вды,/ не пло́тию, но ду́хом вои́нствовал еси́, святи́телю о́тче Афана́сие,/ и благода́тию Бо́жиею испове́дал еси́ Иису́са Христа́, я́ко Го́спода и Спаси́теля./ Его́же моли́ поми́ловати нас в день лют.

Сла́ва, и ны́не, Богоро́дичен, глас 4:

Днесь све́тло красу́ется богохрани́мый град Ковро́в,/ я́ко свяще́нный дар восприи́м, Влады́чице, святу́ю Твою́ ико́ну Смоле́нскую,/ к не́йже мы притека́ем и вопие́м:/ прибе́жище и си́ла на́ша, Богоро́дице,/ держа́вная по́мощь рабо́м Твои́м!/ Покры́й град Твой и окре́стныя ве́си от вся́каго зла,/ зе́млю Ру́сскую в ми́ре сохрани́,/ люде́й Твои́х в Правосла́вии утверди́,/ и к Сы́ну Твоему́ моли́тву вознеси́ о спасе́нии душ на́ших. (Тропарь Ковровской-Смоленской иконе Богоматери, написанный святителем Афанасием)

Велича́ние:

Велича́ем тя,/ священноиспове́дниче Афана́сие,/ и чтим святу́ю па́мять твою́,/ ты бо мо́лиши за нас// Христа́, Бо́га на́шего.

И́но велича́ние (пое́м пременя́юще):

Велича́ем тя,/ святи́телю и испове́дниче Христо́в Афана́сие,/ богодохнове́нными пе́сньми Це́рковь Ру́сскую украси́вшаго/ и святы́х сро́дников на́ших// любо́вию воспе́вшаго.

Псало́м избра́нный:

Испове́мся Тебе́, Го́споди, всем се́рдцем мои́м о ми́лости Твое́й и и́стине Твое́й.

Госпо́дь Помо́щник мой, на Него́ упова́ се́рдце мое́, и испове́мся Ему́.

Глаго́лах о свиде́ниих Твои́х пред цари́, и не стыдя́хся.

Испове́мся и́мени Твоему́, Го́споди, я́ко бла́го, я́ко от вся́кия печа́ли изба́вил мя еси́.

На Бо́га упова́х, не убою́ся, что сотвори́т мне челове́к.

Изведи́ из темни́цы ду́шу мою́, испове́датися и́мени Твоему́.

Поноше́ния понося́щих Ти нападо́ша на мя.

От бездн земли́ па́ки возве́л мя еси́, и́бо аз испове́мся Тебе́ в лю́дех, Го́споди.

Весели́теся, пра́веднии, о Го́споде, и испове́дайте па́мять святы́ни Его́.

Да испове́дятся Тебе́, Го́споди, вся дела́ Твоя́.

По полиеле́и седа́лен, глас 4:

Прииди́те, празднолю́бцы и по́стницы,/ воспои́м благоче́стия ревни́теля, Афана́сия богоглаго́ливаго,/ и́же, я́ко труба́ та́инственная, к духо́вному пе́нию вся воздви́же,/ святы́х земли́ Ру́сския восхваля́я/ и пе́нии моле́бных слове́с Це́рковь Ру́сскую напая́я.

Сла́ва, и ны́не, Богоро́дичен:

К Засту́пнице страны́ на́шея/ Присноде́ве Богоро́дице притеце́м,/ и к первопи́санней ико́не Ея́ ны́не припаде́м,/ с ве́рою зову́ще из глубины́ души́:/ О, Ма́ти Бо́жия, спаси́ зе́млю Ру́сскую,/ исцели́ сокруше́ние ея́ и ве́рныя лю́ди уте́ши. (Тропарь Владимирской иконе Богоматери из Службы Собору святых, в земли Российстей просиявших)

Степе́нна 1-й антифо́н 4-го гла́са.

Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми. Вся́кое дыха́ние: Ева́нгелие от Луки́, зача́ло 64.

По 50-м псалме́ стихи́ра, глас 6:

Прие́м си́лу, наше́дшу Свято́му Ду́ху на тя,/ святи́телю о́тче Афана́сие,/ свиде́тель Христо́в во вре́мя безбо́жных гоне́ний/ в земли́ Росси́йстей был еси́,/ о́браз покая́ния и испове́дания явля́я/ и богодохнове́нными песнопе́нии ве́рныя укрепля́я./ Моли́ Христа́ Бо́га, па́стырю наш до́брый,// поми́ловати ду́ши на́ша.

Кано́н, его́же краегране́сие: Претерпе́вый до конца́, той спасе́н бу́дет.

Глас 8.

Песнь 1.

Ирмо́с: Колесницегони́теля фарао́ня погрузи́,/ чудотворя́й иногда́/ Моисе́йский жезл, крестообра́зно порази́в,/ и раздели́в мо́ре,/ Изра́иля же беглеца́, пешехо́дца спасе́,// песнь Бо́гови воспева́юща.

Приими́ пе́ние и хвале́ние на́ше, святи́телю Афана́сие,/ ты бо, поноше́ния и ра́ны, заточе́ние и изгна́ние, и го́рькия рабо́ты Христа́ ра́ди претерпе́в,/ в Ца́рствие Небе́сное вшел еси́,/ иде́же о нас мо́лиши и взыва́еши:/ Русь Свята́я, храни́ ве́ру правосла́вную,/ в не́йже тебе́ утвержде́ние.

Ре́вностию по Бо́зе распала́емь, святи́телю Афана́сие,/ мо́ре неве́рия и злоче́стия проше́л еси́/ и земли́ обетова́нныя, рая́ сла́дости, дости́гл еси́,/ иде́же со все́ми святы́ми земли́ Росси́йския взыва́еши:/ Русь Свята́я, храни́ ве́ру правосла́вную,/ в не́йже тебе́ утвержде́ние.

Егда́ даде́ся ти, святи́телю, благода́ть,/ не то́чию во Христа́ правосла́вно ве́ровати, но и по Нем страда́ти и Его́ испове́дати,/ о́браз ве́рным сыново́м Росси́йским яви́л еси́, взыва́я:/ Русь Свята́я, храни́ ве́ру правосла́вную,/ в не́йже тебе́ утвержде́ние.

Богоро́дичен: Тебе́, Пречи́стая Де́во, возопи́ Арха́нгел:/ благослове́н Плод чре́ва Твоего́, Богоневе́сто,/ те́мже и мы, раби́ Твои́, я́ко и́стинную Богома́терь, правосла́вно Тя велича́ем.

Песнь 3.

Ирмо́с: Утвержде́й на ка́мени ве́ры,/ на сем сози́жду Мою́ Це́рковь, реки́й, Го́споди,/ спаси́ мя, вопию́ща:/ Ты еси́, Христе́, Сын Бо́га Жива́го,// и в Тебе́ утверди́ся дух мой.

Егда́ отсту́пницы нечести́вии воста́ша на Го́спода и на святы́х Его́,/ тогда́ ты, богому́дре Афана́сие, нело́жно уча́ше,/ ка́ко подоба́ет в дому́ Бо́жии жи́ти,/ я́же есть Це́рковь Бо́га Жи́ва, столп и утвержде́ние и́стины.

Реко́ша отсту́пницы в безу́мии свое́м:/ несть Бог, прииди́те и отста́вим вся пра́здники Бо́жия от земли́ Ру́сския./ Ты же, святи́телю Афана́сие, лю́дем поколеба́вшимся вопия́л еси́:/ Русь Свята́я, храни́ ве́ру правосла́вную, в не́йже тебе́ утвержде́ние.

Повелева́л еси́ апо́стольски ве́рным, Афана́сие богодухнове́нне,/ отлуча́тися вся́каго бра́та, безчи́нно ходя́ща, а не по преда́нию,/ и благода́тию утвержда́ти сердца́.

Богоро́дичен: Еди́на пло́тию Бо́га ро́ждшая, мо́лимся Ти, Чи́стая:/ изба́ви сете́й вра́жиих ду́ши на́ша/ и утверди́ на ка́мени Боже́ственных за́поведей,/ я́ко на Тя упова́ние возложи́хом.

Седа́лен, глас 4:

Взира́я на Нача́льника ве́ры и Соверши́теля Иису́са, святи́телю о́тче Афана́сие,/ благода́тию не́мощь естества́ челове́ческаго превозмо́гл еси́:/ в го́рьких рабо́тах мно́жае,/ в ра́нах пребо́ле,/ в темни́цах и́злиха, близ сме́рти мно́гащи,/ во изгна́нии надо́лзе пребыва́я,/ беды́ от гони́телей, беды́ от лжебра́тии безро́потно терпе́л еси́/ и пра́вду яви́л еси́./ Те́мже жи́зни ве́чныя ны́не наслажда́ешися.

Сла́ва, и ны́не, Богоро́дичен:

Днесь све́тло красу́ется сла́внейший град Влади́мир,/ ра́достно соверша́я, Влады́чице,/ пра́здник явле́ния Твоего́ святи́телю Макси́му,/ его́же ны́не воспомина́юще и моля́щеся Тебе́, взыва́ем си́це:/ о, Пречу́дная Влады́чице Богоро́дице,/ моли́ся Преве́чному Архиере́ю – Сы́ну Твоему́,/ да Це́рковь Правосла́вную непоколеби́му утверди́т,/ град сто́льный Влади́мир и всю зе́млю Ру́сскую в ми́ре сохрани́т/ и спасе́т в правове́рии ду́ши на́ша. (Тропарь Максимовской иконе Богоматери, написанный святителем Афанасием)

Песнь 4.

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й Сла́ва, Человеколю́бче.

Вся́кая печа́ль упраздня́ется моле́бными пе́нии твои́ми, святи́телю Афана́сие,/ сло́во бо твое́, благода́тию испо́лненное,/ воздвиза́ет вся сла́вити Еди́наго Человеколю́бца.

Испове́дал еси́ Го́спода пред отсту́пники и гони́тели, со проро́ком взыва́я:/ с на́ми Бог, разуме́йте и покаря́йтеся,/ стра́ха же ва́шего не убои́мся, ниже́ смути́мся,/ Го́спода же Бо́га на́шего Того́ святи́м, Еди́наго Человеколю́бца.

И да́же до ста́рости не оста́ви тя Госпо́дь, святи́телю Афана́сие,/ до́ндеже мы́шцу Его́ ро́ду гряду́щему возвести́л еси́, наставля́я:/ я́ко а́ще не Госпо́дь помо́гл бы нам, не помяну́лося бы и́мя Руси́ Святы́я ктому́,/ ны́не же прославля́ем Еди́наго Человеколю́бца.

Богоро́дичен: Добро́ту Иа́ковлю, Ю́же возлюби́, Пребезнача́льное Сло́во от ве́ка избра́/ и, всели́вся в Ню, обнови́ челове́ческое естество́./ Те́мже прославля́ем Его́, Еди́наго Человеколю́бца.

Песнь 5.

Ирмо́с: Я́ко Бо́га ино́го, Бла́же,/ па́че Тебе́, не зна́ем,/ к Тебе́, Све́ту Незаходи́мому, от но́щи у́тренююще,// воспева́ем Тя, Человеколю́бче.

От па́ствы разлуче́н быв, святи́телю,/ Христа́ испове́дал еси́ во изгна́нии,/ те́мже пра́вило ве́ры и о́браз благоче́стия бли́жним и да́льним показа́л еси́,/ прославля́я Го́спода Человеколю́бца.

Круг богослуже́бный по вся дни исполня́я, святи́телю Афана́сие,/ устав церко́вный ве́рным изъясни́л еси́,/ науча́я лю́ди воспева́ти Го́спода Человеколю́бца.

От лю́тыя сме́рти изба́ви тя Бог,/ да возмо́жеши утеша́ти су́щия в ско́рбех и печа́лех,/ науча́я ты́я прославля́ти Помо́щника и Покрови́теля,/ Го́спода Человеколю́бца.

Богоро́дичен: Напра́ви мя к покая́нию, Не́бо У́мное, Со́лнце пра́вды нам возсия́вшее,/ я́ко да узрю́ свет спасе́ния, Влады́чице Чи́стая,/ и просла́влю Го́спода Человеколю́бца.

Песнь 6.

Ирмо́с: Ио́ну в ки́те, Го́споди,/ еди́наго всели́л еси́,/ мене́ же, свя́заннаго мре́жами вра́жиями,// я́ко от тли о́наго спаси́.

Це́рковь Росси́йская воспева́ет по́двиги твоя́, святи́телю Афана́сие,/ ты бо, забы́в жите́йская и небре́г теле́сная жи́зни ра́ди бу́дущия,/ тоя́ насле́дник яви́лся еси́ и ны́не мо́лишися о душа́х на́ших.

А́ще и обурева́еми гоне́нии безбо́жными бы́ша лю́дие ве́рнии,/ оба́че словесы́ твои́ми на спасе́ния стези́ упра́вил еси́ ты́я,/ о́тче Афана́сие богоглаго́ливе.

Текл еси́ те́сным путе́м, ра́дуяся, Афана́сие великоимени́те,/ пе́сни твоя́ со слеза́ми покая́ния и испове́дания,/ я́ко же́ртву благоприя́тную, Бо́гу принося́.

Богоро́дичен: Освяти́ ум мой и просвети́ се́рдце мое́, Пресвята́я Ма́ти Бо́жия,/ и обдержа́щих мя зол изба́ви, христиа́н Засту́пнице.

Конда́к, глас 3:

Днесь Афана́сий святи́тель,/ Христо́в испове́дник и пра́ведник,/ в невече́рнем Ца́рстве Сла́вы/ све́тло лику́ет/ и в со́нме всех Ру́сских святы́х,/ всесоста́вным гла́сом побе́дную песнь воспева́я,/ приле́жно мо́лит о нас// Преве́чнаго Триеди́наго Бо́га.

И́кос:

Днесь, ве́рнии, соше́дшеся, восхва́лим святи́теля Афана́сия,/ безсме́ртия тезоимени́таго, ревни́теля Правосла́вия,/ блюсти́теля благоче́стия, обличи́теля отсту́пников,/ пропове́дника покая́ния,/ песнопе́нии досточу́дными святы́х,/ в земли́ Росси́йстей просия́вших, просла́вльшаго,/ той бо приле́жно мо́лит о нас Преве́чнаго Триеди́наго Бо́га.

Песнь 7.

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:// благослове́н еси́, Бо́же оте́ц на́ших.

Име́я щит ве́ры правосла́вныя,/ стре́лы разжже́нныя мучи́телей отража́л еси́, со проро́ком вопия́:/ а́ще бо па́ки возмо́жете, и па́ки побежде́ни бу́дете,/ аз же воспою́:/ благослове́н Бог оте́ц на́ших.

Со беззако́нными вмени́вся, кротча́йший о́тче,/ путе́м нечести́вых никогда́же ходи́л еси́ и ненави́димь Го́спода ра́ди был еси́,/ оба́че малоду́шие и ро́пот не поколеба́ се́рдце твое́./ Те́мже любо́вию воспева́л еси́ Бо́га оте́ц на́ших.

Поко́я не име́л еси́, мно́гими содержи́мь напа́стьми и во узи́лищи пребыва́я, я́ко во рву льви́ном,/ но, наде́яся на Бо́га, возставля́ющаго ме́ртвыя, взыва́л еси́:/ благослове́н Бог оте́ц на́ших.

Богоро́дичен: А́гнца зря́щи воздвиза́ема на Дре́ве непра́ведне,/ Непоро́чная А́гница, ма́терски слезя́щи,/ долготерпе́ние воспева́ше Сы́на Своего́ и Бо́га оте́ц на́ших.

Песнь 8.

Ирмо́с: Нече́стия орга́ны ину́ю песнь,/ благоче́стия же благовеща́ннии поя́ху гу́сли:// благослови́те, дела́ Госпо́дня, Христа́ во ве́ки.

Си́лою благода́тною Ца́рствие Бо́жие бли́жним и да́льним благовествова́л еси́, святи́телю Афана́сие,/ да испове́дают лю́дие ру́сстии Го́спода во ве́ки.

Еде́мом све́тлым узи́лище мра́чное соде́лав,/ ре́ку боже́ственных песнопе́ний источи́л еси́, иера́рше богоглаго́ливый,/ да почерпа́ют лю́дие ру́сстии весе́лие духо́вное и благословя́т Го́спода во ве́ки.

Но́вый испове́дник Це́ркве Правосла́вныя, святи́телю Афана́сие,/ и оби́тель Ду́ха Свята́го яви́лся еси́,/ Его́же со Отце́м и Сы́ном воспева́еши во ве́ки.

Богоро́дичен: Безсме́ртнаго Бо́га ро́ждшая,/ тече́ние сме́ртное укроти́ла еси́,/ те́мже умертви́, Чи́стая, стра́сти телесе́ моего́,/ да Тя сла́влю во ве́ки.

Песнь 9.

Ирмо́с: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́// и напра́вил ны есть на путь ми́ра.

Умо́м твои́м Го́рняя созерца́я, терпеливоду́шне Афана́сие,/ в страда́ниих Бо́га, я́ко Помо́щника и Покрови́теля, призыва́л еси́:/ Твой есмь аз, спаси́ мя, и напра́ви на путь ми́рен.

Де́нно и но́щно тепле́йшия моли́твы твори́л еси́, святи́телю Афана́сие,/ егда́ иноплеме́нницы го́рдии грех ра́ди на́ших на Русь ополчи́шася,/ ты же, свя́тче, вопия́л еси́:/ пощади́, пощади́, Го́споди, Оте́чество на́ше/ и напра́ви мир весь на путь ми́рен.

Ели́ко суди́ Госпо́дь ме́ру дний жития́ твоего́,/ благоче́стно испо́лнил еси́, святи́телю Афана́сие./ Ны́не же, предстоя́ Престо́лу Вседержи́теля, мо́лиши Его́,/ да напра́вит лю́ди Своя́ на путь ми́ра.

Богоро́дичен: Тя ве́рою и любо́вию воспева́ющия/ просвети́, Всенепоро́чная Влады́чице,/ и тьмы кроме́шныя изми́ моли́твенным предста́тельством к Сы́ну Твоему́ и Бо́гу на́шему.

Свети́лен:

Предста́вил еси́ себе́ же́ртву жи́ву Бо́гови,/ свя́ту, благоуго́дну и непоро́чну в слове́снем служе́нии и испове́дании,/ святи́телю Христо́в Афана́сие,/ и та́ко просвети́ся свет твой пред челове́ки,/ я́ко сла́вят вы́ну о тебе́ Отца́ Небе́снаго.

Сла́ва, ин свети́лен:

Печа́льнику земли́ Ру́сския преподо́бному Се́ргию тезоимени́т сый,/ от ю́ности того́ возлюби́л еси́, свя́те Афана́сие,/ и той, я́ко второ́е со́лнце, житие́ твое́ озаря́ше,/ с ни́мже ку́пно моли́ Триеди́наго Бо́га о спасе́нии душ на́ших.

И ны́не, Богоро́дичен:

Свет Незаходи́мый ми́ру ро́ждшая,/ све́тлости святы́х сподо́би лю́ди земли́ Ру́сския, Тебе́ почита́ющия,/ и благодаре́ние от души́ принося́щия и вопию́щия:/ не забу́ди рабы́ Твоя́, Еди́на Благослове́нная.

На хвали́тех стихи́ры, глас 4:

Святи́телю о́тче Афана́сие всехва́льне,/ ты в годи́ну лю́тых гоне́ний на ве́ру Христо́ву,/ у́зами и ра́нами искуси́вся,/ в лише́ниих, изгна́ниих и го́рьких рабо́тах многоле́тне пребыва́я,/ Це́рковь Ру́сскую песнопе́нии украси́л еси́/ и столп Правосла́вия яви́лся еси́./ Сего́ ра́ди в час кончи́ны твоея́/ вси святи́и земли́ Росси́йския яви́шася тебе́,/ с ни́миже, ны́не Престо́лу Бо́жию предстоя́,// моли́ спасти́ и просвети́ти ду́ши на́ша.

Святи́телю о́тче Афана́сие богоно́сне,/ ты, я́ко свети́льник пресве́тлый, яви́лся еси́,/ егда́ бо нече́стие омрачи́ зе́млю на́шу,/ пра́вду Бо́жию со дерзнове́нием пропове́дал еси́/ и, оскорбля́емь, гони́мь и низлага́емь,/ Бо́гу ве́рен оста́лся еси́./ Сего́ ра́ди свиде́тель и́стинен быв,/ страда́ния новому́чеников Росси́йских запечатле́л еси́,/ с ни́миже, ны́не Престо́лу Бо́жию предстоя́,// моли́ спасти́ и просвети́ти ду́ши на́ша.

Святи́телю Афана́сие богоблаже́нне,/ ты, по сло́ву Госпо́дню любо́вь ко враго́м явля́я,/ клену́щия тя благословля́ше,/ ненави́дящим тя добро́ творя́ше/ и за зло де́ющих ти моля́шеся,/ те́мже и́стинным сы́ном Отца́ Небе́снаго наре́клся еси́./ Сего́ ра́ди, дерзнове́ние ве́лие име́яй,/ в собо́ре святы́х земли́ Росси́йския лику́еши/ и с ни́ми Престо́лу Бо́жию предстои́ши,// моля́ спасти́ и просвети́ти ду́ши на́ша.

Иерусали́ма Вы́шняго гра́жданы,/ от земли́ Ру́сския возсия́вшия/ и вся́кое ме́сто ея́ освяти́вшия,/ во дни же обстоя́ний сугу́бо за ню предста́тельствующия,/ и́хже чрез все житие́ воспева́л еси́,/ яви́шася с Го́сподем пред кончи́ною твое́ю уте́шити ду́шу твою́,/ я́ко не ве́дети ти, в те́ле или́ кроме́ те́ла,/ на земли́ или́ на Небеси́ был еси́, святи́телю Афана́сие,// Бо́га ди́внаго во святы́х восхваля́я.

Сла́ва, глас 8:

Прииди́те, правосла́внии лю́дие,/ просла́вим святи́теля Афана́сия,/ той бо со все́ми святы́ми, в земли́ Росси́йстей просия́вшими,/ предстои́т Триипоста́сному Бо́гу/ и со дерзнове́нием мо́лится:/ Русь Свята́я,/ храни́ ве́ру Правосла́вную,// в не́йже тебе́ утвержде́ние.

И ны́не, Богоро́дичен, глас то́йже.

Подо́бен: О, пресла́внаго чудесе́:

О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О, Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.

На Литурги́и

Блаже́нны от кано́на, пе́сни 3-я и 6-я. Проки́мен, глас 7: Испове́мся Тебе́, Го́споди,// всем се́рдцем мои́м. Стих: А́ще пойду́ посреде́ ско́рби, живи́ши мя. Апо́стол ко Ефесе́ем, зача́ло 233. Аллилу́ия, глас 2: Пра́веднии испове́дятся и́мени Твоему́, и вселя́тся пра́вии с лице́м Твои́м. Стих: Го́споди, Го́споди, Си́ло спасе́ния моего́, осени́л еси́ над главо́ю мое́ю в день бра́ни. Ева́нгелие Луки́, зача́ло 64. Прича́стен: В па́мять ве́чную бу́дет пра́ведник:

Моли́тва

О, многострада́льне и благоглаго́ливе святи́телю и испове́дниче Христо́в Афана́сие, па́стырю до́брый Це́ркве Ру́сския, Правосла́вия ревни́телю, покая́ния пропове́дниче, моли́твы сто́лпе, любве́ неизсяка́емый исто́чниче, цевни́це богодохнове́нная!

Ты во дни гоне́ний на Це́рковь Христо́ву лю́тая неи́стовства неве́рных претерпе́л еси́ и, я́ко пле́нник наги́й, от ме́ста на ме́сто нево́лею преходи́л еси́, не име́яй зде пребыва́ющаго гра́да, но Небе́снаго взыску́яй. Сего́ ра́ди благода́тию Свята́го Ду́ха просвеще́н, па́ству твою́ де́лы па́че слов поуча́я, испове́дник Святы́я Це́ркве яви́лся еси́.

Те́мже, блаже́нства изгна́нных пра́вды ра́ди сподо́бився и Престо́лу Пренебе́сному предстоя́, моли́ Всеблага́го Бо́га на́шего, да возроди́тся Ру́сская земля́ святы́м покая́нием, да утвержда́ется Свята́я Це́рковь непозы́блемо от ересе́й, раско́лов и гоне́ний, да пребу́дут па́стыри и ча́да Ея́ тве́рды во испове́дании свята́го Правосла́вия и еди́ным се́рдцем и еди́ными усты́ прославля́ют ди́внаго во святы́х Свои́х Бо́га, Отца́, и Сы́на, и Свята́го Ду́ха, во ве́ки веко́в. Ами́нь.

Источник: Текст утвержден Священным Синодом Русской Православной Церкви 4 октября 2012 года (журнал № 97)

Месяца октября в 15-день

Служба собора новомучеников и исповедников земли Белорусския

На велицей вечерни

На Господи, воззвах: стихиры, глас 4:

Священномученицы земли Белорусския,/ яко пастырие добрии,/ мудре словесныя овцы окормляли есте,/ веру Православную утверждающе,/ нищия одевающе и алчущия питающе,/ страждущия врачующе и закон любве Божия соблюдающе./ Сего ради молим вы:/ молите Христа Бога,/ да спасет души наша.

Священномученицы земли Белорусския,/ Пастыреначальнику Христу последующе,/ веру истинную, яко щит, сохранили есте/ и, с любовию ближним послуживше,/ даже да крове пострадали есте./ Темже и неувядаемый венец безсмертия обрели есте/ и ныне молите Господа/ о спасении душ наших.

Новомученицы и исповедницы земли Белорусския,/ предстояще престолу Святыя Троицы,/ присно молитеся за нас, на земли сущих,/ да ревностно храним заповеди Божия,/ и явим терпение во всех обстояниих,/ и любовь нелицемерную обрящем,/ и спасем души наша.

Слава, глас 5:

Всевышний Владыко,/ в Троице славимый и покланяемый,/ ущедри ны благоприятными мольбами/ священномученик Твоих,/ пред мучители дерзновенно исповедавших Тя,/ Единаго истиннаго Бога,/ и Твое, Сыне Божий,/ неизреченное от Матере Девы/ спасительное воплощение.

И ныне, Богородичен, глас тойже.

Таже прокимен дне. И чтения 3 мученическая.

На литии стихира храма и святых, глас 6:

Исповедницы веры и священномученицы страны нашея,/ кровьми вашими землю обагрили есте,/ ныне же, предстояще Престолу Божию,/ присно молите Господа спастися душам нашим.

Слава, и ныне, Богородичен.

На стиховне стихиры, глас 5:

Страстотерпцы славнии,/ веру Православную добре сохранивше,/ в мучениих, бедах и напастех,/ яко столпи незыблемии, пребысте/ и образ благочестия верным преподасте./ Темже и нам помозите/ веру непоколебиму соблюсти/ и спасти души наша.

Стих: Священницы Твои облекутся в правду/ и преподобнии Твои возрадуются.

Имуще вас, новомученицы доблии,/ теплыя ходатаи ко Господу/ и твердыя поборники веры Православныя,/ молим вас мы, недостойнии,/ жизнь нашу умирити,/ терпение и любовь к ближним даровати/ и спастися душам нашим.

Стих: Воспойте Господеви песнь нову/ воспойте Господеви вся земля.

Новомученицы Белорусстии,/ кровию вашею веру Христову запечатлевшии,/ Владыку всех молите/ Церковь Русскую в Православии утвердити,/ землю нашу от скверн очистити,/ люди во благочестии сохранити/ и спастися душам нашим.

Слава и ныне, Богородичен.

Тропарь, глас 4:

Святии новомученицы земли Белорусския,/ благочестия светильницы и жития евангельскаго образи,/ заточения, изгнания и горькия работы мужественне претерпевшии/ и Христа ради даже до крове пострадавшии,/ егоже, яко Начальника мира и спасения Совершителя,/ усердно ныне молите/ помиловати души наша.

На утрени

На Бог Господь: тропарь тойже, дважды. Слава, и ныне, Богородичен воскресный.

По 1-м стихословии седален, глас 4:

Возсияли есте светло, яко звезды небесныя,/ деянии и учении вашими, светоноснии новомученицы,/ и облистали есте землю Белорусскую.

Слава, и ныне, Богородичен:

Пречистеи руце Твои, Дево Мати, простерши,/ покрый уповающия на Тя и Сыну Твоему зовущия:/ всем подаждь, Христе, велию милость.

По 2-м стихословии седален, глас 5:

Апостольским вещанием огласивше ваш ум,/ жертву чисту принесосте Царю и Творцу,/ воплощшемуся нас ради от Девы Богородицы и воскресшему со славою,/ егоже пред мучители исповедасте, священномученицы.

Слава, и ныне, Богородичен:

Имуще Тя Заступницу, Пречистая,/ николиже убоимся враг на ны возстания,/ но, яко Бога рождши Милостиваго, покрый ны милостию Твоею,/ к Твоему бо заступлению присно прибегаем.

Величание:

Величаем вас,/ святии новомученицы и исповедницы земли нашея,/ и чтим честная страдания ваша,/ яже за Христа во утверждение веры Православныя/ претерпели есте.

Псалом избранный: Услышите сия, вси язы́цы,/ внушите, вси живущии по вселенней.

По полиелеи седален, глас 1:

Церковь Православную, яко стражи неусыпнии, охраняете присно/ и верныя ограждаете, новомученицы божественнии, Христови воини.

Слава, и ныне, Богородичен:

Воистину Богородицу Тя вемы,/ яко Заступницу земли Белорусския и Молитвенницу присную о священницех ея,/ Ты бо сущих в бедах, гонениих и узах покровом божественным всемощно хранила еси.

Степенна, 1-й антифон 4-го гласа. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми. Всякое дыхание: Евангелие от Луки, зачало 67.

По 50-м псалме стихира, глас 6: Исповедницы веры: писана на литии.

Канон Богородицы молебный, глас 8 и новомучеником, глас 4:

Песнь 1.

Ирмос: Моря чермную пучину/ невлажными стопами/ древний пешешествовав Израиль,/ крестообразныма Моисеовыма рукама/ Амаликову силу в пустыни победил есть.

Закон Божий зело возлюбив, отче Владимире,/ добре слепым детем его преподал еси,/ укрепляя в них дух смирения и бодрости./ Помози и нам претерпети вся напасти мира сего.

Истины веры Православныя возвещаяй учеником вертограда духовнаго,/ сам, яко знамя победное, пронесл еси я чрез житие твое, священномучениче Василие.

Прием священный сан в годину тяжких испытаний,/ последи же, крепость во искушении явив,/ смерть от гонителей претерпел еси, отче Петре, священномучениче.

Богородичен: Богомати Пречистая,/ милостива сотвори нам Сына Твоего,/ из Тебе неизреченно воплотившагося на спасение наше,/ Тя бо Предстательницу и Спасение стяжахом.

Песнь 3.

Ирмос: Веселится о Тебе Церковь Твоя, Христе, зовущи:/ Ты моя крепость, Господи,/ и прибежище, и утверждение.

В вере укрепляя паству твою, отче Валериане,/ заповеди Христовы соблюл еси даже до смерти.

Небоязненно стал еси на защиту веры Православныя, священне Владимире,/ и, не устрашився сильных мира сего,/ исповедал еси истину Божию даже до крове.

Искренне служа Богу, священномучениче Иоанне,/ веру истинную соблюл еси,/ неповинно прием смерть от нечестивых.

Богородичен: Песньми похвальными воспоим, вернии, Пресвятую Владычицу,/ Марию Богоневестную, Покров Божественный,/ тихое Пристанище, всех верных Предстательницу.

Седален, глас 3:

Божественную благодать, немощная врачующи и оскудевающая восполняющи, приемше,/ яко агнцы чистии, Христу Пастыреначальнику последовали есте, мученицы всехвальнии,/ и, страдания мужественне претерпевше, венцы Небесныя стяжали есте./ Темже любовию святую память вашу светло торжествуем.

Слава, и ныне, Богородичен:

Не имамы инаго прибежища, разве Тебе, Богородице,/ страны нашея Заступнице усердная,/ всяк бо, почитаяй Тя, надежду обретает.

Песнь 4.

Ирмос: Вознесена Тя видевши Церковь на Кресте,/ Солнце Праведное,/ ста в чине своем,/ достойно взывающи:/ слава силе Твоей, Господи.

Неленостно Господеви служа,/ ревностно окормлял еси паству твою, отче Сергие,/ темже мученически за Христа пострадал еси.

Видя врага злохитростнаго, на Церковь Христову ополчившагося,/ ревностне призывал еси паству твою хранити благочестие и веру Православную, отче Владимире./ Сего ради в Небесных чертозех ныне упокоеваешися.

В субботу преблагословенную Христу спострадал еси, священномучениче Михаиле,/ избиение от иудея беззаконнаго невинно претерпев./ Ныне же в Царствии Небеснем с воскресшим Господом присно субботствуеши.

Богородичен: Умерщвлена древле Адама, Пречистая,/ паки возвела еси к жизни,/ Ипостасную Жизнь рождши, Христа,/ Емуже приразившися, расторжеся яве враждебнейшая смерть.

Песнь 5.

Ирмос: Ты, Господи, мой Свет,/ в мир пришел ecи,/ Свет Святый, обращаяй из мрачна неведения/ верою воспевающия Тя.

Пастырю Доброму последуя,/ положил еси душу твою за овцы словесныя, отче Порфирие./ Темже моли о нас Господа славы,/ да твердо сохраним веру Православную во вся дни жизни нашея.

Диаконскаго чина удостоився, отче Николае,/ первомученику архидиакону Стефану уподобился еси, власти безбожныя обличая,/ и, якоже той, смерть за Христа приял еси.

Богу и ближним неленостно послужил еси, отче Михаиле,/ сего ради беззаконными убиваемь,/ с молитвою на устех дух твой Христу предал еси./ Ныне с праведными на лоне Авраамли почиваеши.

Богородичен: Яко утро, Богомати, возсияла еси,/ Истинное Солнце Правды, Христа Бога нашего, на руку носящи,/ тем Тя вси прославляем.

Песнь 6.

Ирмос: Пожру Ти со гласом хваления, Господи,/ Церковь вопиет Ти,/ от бесовския крове очищшися/ ради милости от ребр Твоих/ истекшею Кровию.

Дерзновенно пред мучители веру во Христа Иисуса, яко истиннаго Бога, исповедав,/ Того ради даже до смерти пострадал еси, священномучениче Николае.

Пастырское служение в Слуцких пределех добре совершая/ и ревностию по Бозе распаляяся,/ верныя небоязненно исповедати веру во Спасителя призывал еси/ и смерть мужественне сретил еси, отче Иоанне.

Залог веры, якоже обещався, сохранил еси/ и мученическою смертию запечатлел еси, священне Димитрие./ Сего ради земли Белорусская и Тверская достойно тя величают.

Богородичен: Душ наших очищение/ и спасения Ходатаица явилася еси, Пресвятая Дево,/ темже Тя верою и любовию православно величаем.

Кондак, глас 8:

Новомученицы и исповедницы земли нашея,/ в тяжких испытаниих даже до смерти любовь к Богу сохранивше,/ правило веры и образ благочестия нам явили есте./ Сего ради, ныне в Небесных обителех ликующе,/ молите Христа Бога, да спасет души наша.

Песнь 7.

Ирмос: В пещи авраамстии отроцы персидстей,/ любовию благочестия паче,/ нежели пламенем, опаляеми, взываху:/ благословен еси в храме славы Твоея, Господи.

В годину гонений окормлял еси люди отчаянныя,/ словом Божиим тыя укрепляя, отче Иоанне./ Темже, яко пастырь истинный Церкве Христовы,/ мученически пострадал еси.

Терпя страдания,/ не отреклся еси от веры Христовой, отче Леониде,/ обаче даже до смерти верен Господеви пребыл еси.

Милостив пастырь и усерден молитвенник явился еси, отче Александре,/ сего ради и за веру Христову убиение приял еси.

Богородичен: Моли присно Сына Твоего и Бога нашего, Неискусобрачная Марие Чистая,/ низпослати нам велию милость.

Песнь 8.

Ирмос: Руце распростер, Даниил/ львов зияния в рове затче;/ огненную же силу угасиша,/ добродетелию препоясавшеся,/ благочестия рачители отроцы, взывающе:/ благословите, вся дела Господня, Господа.

Доблемудренне паству твою окормляя, священномучениче Владимире,/ совесть чисту и неврежденну соблюл еси/ и смерть от безбожных, Бога прославляя, приял еси.

От житий святых житию богоугодному научаяйся, отче Димитрие,/ якоже оныя, и смерть за Христа претерпел еси.

Егда гонения на Церковь святую умножишася,/ сан священный со дерзновением приял еси, отче Петре,/ темже и в жертву благоприятну Богови принеслся еси.

Богородичен: Безсеменно зачала еси, Богоневесто, Спаса и Господа,/ избавляющаго от тли воистинну песнословящия Тя.

Песнь 9.

Ирмос: Камень нерукосечный/ от несекомыя горы, Тебе, Дево,/ краеугольный отсечеся, Христос,/ совокупивый разстоящаяся естества./ Тем, веселящеся, Тя, Богородице, величаем.

Первый списатель житий пастырей земли Белорусския,/ в годину гонения пострадавших, явился еси, отче Серафиме,/ и послежде сам живот твой за веру и други твоя положил еси.

Издетстка нищету и лишения претерпевая, отче Матфее,/ милосердию и состраданию навыкл еси./ Темже, на высоту священства восшед,/ ревностно послужил еси приходящим к тебе/ и мученическаго венца сподобился еси.

Новомученицы и исповедницы земли Белорусския,/ молите о нас Святую Троицу,/ да и мы посреде искушений и бед/ сохраним веру Православную во вся дни живота нашего.

Богородичен: Бога, егоже родила еси, Чистая Дево,/ Сего умоли рабом Твоим даровати покаяние/ и согрешений прощение.

Светилен:

Яко священномученицы и исповедницы вернии,/ явистеся в земли Белорусстей, пастырие добрии,/ и, испивше чашу страданий, благоугодисте Христу./ Темже, во Свете ныне водворяющеся,/ молитеся с небесными силами о всех нас.

Слава, и ныне, Богородичен:

О Тебе хвалимся, Богородительнице,/ и к Богу имамы Тя теплую Предстательницу,/ простри Покров Твой святый/ и защити люди Твоя.

На хвалитех стихиры, глас 8:

Благодатию священства свыше облекшеся,/ пастырие добрии показастеся,/ и, кротость и терпение стяжавше,/ любовь ко Христу во страданиих сохранили есте;/ темже молим вас, священномученицы земли нашея,/ испросите у Господа,/ да, тихое и безмолвное житие поживше/ во всяком благочестии и чистоте,/ спасем души наша. (Дважды).

Имуще вы пастыри неусыпныя в молитвах,/ просим вас, страдальцы Христовы,/ утвердите единство Церкве нашея,/ угасите шатания языческая,/ испросите у Господа Вседержителя/ даровати земли нашей благоденствие,/ да, тихое и безмолвное житие поживше/ во всяком благочестии и чистоте,/ обрящем велию милость.

Чтуще вы, яко новомученицы земли Белорусския,/ усердно просим,/ испросите у Господа нам, в скорбех и печалех пребывающим,/ терпение добропобедное и любовь нелицемерную,/ да, тихое и безмолвное житие поживше/ во всяком благочестии и чистоте,/ спасем души наша.

Слава и ныне, глас тойже:

Владычице, приими молитвы раб Твоих/ и избави нас/ от всякия нужды и печали.

На Литургии

Блаженны от канона песни 3 и 6. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Филипписием, зачало 246. Евангелие от Луки, зачало 77. Причастен: Радуйтеся, праведнии о Господе:

Молитва

О, избранницы и угодницы Христовы, новомученицы Церкве нашея, столпи непоколебимии, земли Белорусския благое прозябение и краснии плоды, сродников ваших предстателие и наставницы!

Вы во время гонения безбожнаго от сокровищниц душ ваших спасительное исповедание Православныя веры изнесли есте и людем верным пастырие добрии явилися есте, души ваша за Христа и Его овцы полагающе и лютыя волки далече отгоняюще.

Ныне убо призрите на нас, недостойных чад ваших, умиленною душею и сокрушенным сердцем вас призывающих. Умолите Господа Бога, да простит согрешения наша и избавит от адовых уз и вечнаго мучения. Утвердите нас в вере святей, научите нас присно творити волю Божию и хранити заповеди церковныя. Будите пастырем нашим – правило веры, воином – вожди духовнии, болящим – врачи изряднии, печальным – утешителие, гонимым – заступницы, юным – наставницы, всем же благосердии отцы и теплии молитвенницы, яко да молитвами вашими соблюдется в Православии страна наша и непрестанно славится в ней имя Пресвятыя Троицы, Отца и Сына и Святаго Духа во веки веков. Аминь.

Источник: Текст утвержден Священным Синодом Русской Православной Церкви 5–6 октября 2011 года (журнал №122)

Месяца октября в 20-й день

преподобнаго Гавриила Самтаврийскаго

На велицей вечерни

Блажен муж: 1-й антифон. На Господи, воззвах: стихиры на 8, глас 6:

Преподобне отче Гаврииле!/ Яко столп веры явился еси/ и, неколеблемь ветрами вражиими,/ венцем же добродетелей паче снега блистаяй,/ духовная очи людей земли Иверския/ от земных к Небесным возводил еси,/ идеже ныне водворяяся,/ поминай нас, чтущих святую память твою.

Преподобне отче Гаврииле!/ От юности течение жизни к Богу направив,/ потоки хвалы Ему излил еси/ и водами благодати землю Иверскую напоил еси./ Ныне же, в Горних селениих пребывая,/ яко река из рая текущая,/ и нам утешения струи источи/ и моли спастися душам нашим.

Преподобне отче Гаврииле!/ Крест Господень возлюбил еси,/ сего ради, спелому грозду подобяся,/ всего себе в точило скорбей и мучений вдал еси/ и, вино благоуханное любве к Богу и людем искапав,/ Древа Живота достигл еси,/ идеже ныне водворяяся,/ моли о душах наших.

Ины стихиры, глас 1:

Днесь, вернии, духовно торжествующе/ в нарочитем празднице преподобнаго отца/ и благочестно радующеся, тому тепле возопиим:/ радуйся, святый исповедниче и Христа ради юродиве,/ преподобне отче наш Гаврииле;/ радуйся, Небесный человече и земный Ангеле;/ радуйся, многих на путь спасения наставивый;/ радуйся, верным похвало и утешение;/ радуйся, земли Грузинстей и Русской утверждение/ и молитвенниче о душах наших.

Преподобне отче Гаврииле,/ избранный служителю Святыя Троицы,/ радосте собратий и Православия утверждение,/ Ангелов друже и красный цвете райский,/ молитвенниче теплый о душах наших,/ от земныя обители в Небесную возшедый/ и во Царствие Небесное водворивыйся,/ умоли Господа и Пречистую Его Матерь,/ росою благодати окропити нас/ и спастися душам нашим.

Кия похвалы принесем ти, преподобне Гаврииле?/ Ты бо, Царский образ на драхме сердца твоего запечатлевая,/ постом, бдением и воздержанием тое очищал еси/ и от скверны греховныя слезами омывал еси,/ темже и просия в тебе образ Владыки Христа,/ Емуже во всем подражал еси:/ укоряемь, сопротив не вещаше,/ гонимь, кротце претерпеваше,/ нощь в молитве пребывая, днем люди утешаше./ Моли спастися душам нашим.

Слава, глас 5:

Составльше лик духовный,/ взыграим на свирели мысленней/ и восхвалим дивнаго во святых Своих Бога нашего,/ Иже яви нам сицеваго ходатая,/ егоже не имехом до днесь среди отец наших,/ радость иноков и величие Картли,/ чудес источника и великаго помощника/ и молитвенника о душах наших.

И ныне, Богородичен, глас тойже: В Чермнем мори:

Вход. Прокимен дне. И чтения три преподобническая.

На литии стихира храма и святаго, глас 4:

В милосердие и терпение облекся,/ Иоанну Крестителю подобяся,/ покаяние во гресех людем проповедал еси/ и, яко Давид, всенощно руце в молитве простирал еси,/ добродетелей искусный делателю, старче Гаврииле,/ темже и Спасу нашему Христу угодил еси/ и радости непреходящия сподобился еси;/ моли о душах наших.

Слава, глас 2:

Воспевают присно православнии людие/ добродетели твоя, богоносне Гаврииле,/ святость, смирение и милосердие;/ и мы, ведуще тя молитвенника тепла,/ усердно просим твоего ходатайства/ пред Престолом Святыя Троицы,/ да спасемся от находящих бед/ и улучим спасение душам нашим.

И ныне, Богородичен воскресен.

На стиховне стихиры, глас 2.

Подобен: Доме Евфрафов:

Днесь Церковь Картлийская/ веселится о чаде своем,/ се бо Гавриил преподобный/ обрете благодать пред Богом/ и ходатай велий о нас явися.

Стих: Восхвалятся преподобнии во славе/ и возрадуются на ложах своих.

Церковь Богу воздвигнув,/ сам себе Владыце храм устроил еси,/ утверди и наша мысли, святе Гаврииле,/ во еже быти нам обительми/ Троицы Единосущныя.

Стих: Возношения Божия в гортани их/ и мечи обоюду остры в руках их.

Монах истинен быв,/ многая чада духовная воспитал еси,/ беден и ничтоже имеяй,/ многия обогатил еси,/ моли о нас, святе Гаврииле!

Слава, глас и подобен тойже:

Боже Безсмертне/ и Содетелю всяческих,/ утверди в мире Церковь Твою/ и спаси верныя люди/ молитвами преподобнаго Гавриила.

И ныне, Богородичен, глас 2: О, чудесе новаго, всех древних чудес:

На благословении хлебов тропарь святаго, дважды и Богородице, Дево: единожды.

Тропарь святаго, глас 1:

Владыце Христу, Богу нашему,/ Иже славу Свою рабиим зраком скры,/ в смирении и кротости подражая,/ юродства вретищем благодать, ти данную, покрыл еси/ и духовный наставник многим явился еси,/ отче преподобне Гаврииле./ Темже и нас во благочестии укрепи/ и моли спастися душам нашим.

На утрени

На Бог Господь: тропарь святаго, дважды. Слава, и ныне, Богородичен.

По 1-м стихословии седален, глас 1:

От восток солнца до запад хвально имя Господне – сице рцем вси, людие, творяще светло ныне память Божия угодника, Гавриила преподобнаго, и, видевше добрая дела его, прославим Отца нашего, Иже есть на Небесех.

Слава:

Молитвою и знамением крестным вражия искушения победив, постом и воздержанием Господеви благоугодил еси, Гаврииле преподобне, и дар чудес от Него приял еси исцеления подавати верою притекающим к раце мощей твоих. Темже моли Христа Бога грехов оставление и нам даровати, чтущим любовию святую память твою.

И ныне, Богородичен:

Милостива буди нам, Владычице, враг бо стрежет нас ужалити, егда в уныние и отчаяние впадаем, но сокруши его немощную главу.

По 2-м стихословии седален, глас 2:

Надеяся на Господа, яко гора Сион, был еси, преподобне Гаврииле; помышленьми живый в Горнем Иерусалиме, не подвиглся еси стопами и вопиял еси унывающим: Господь окрест людей Своих отныне и до века.

Слава:

Благослови тя Господь, преподобне Гаврииле, на дела велия и дарова богатую милость в жизни сей временней, по святей же кончине ущедри тя даром, еже ходатайствовати о душах грешных. Приими и ныне малое сие моление, с любовию тебе приносимое, и теплым предстательством твоим умоли Владыку Христа Бога избавити нас от грехов и нечестия.

И ныне, Богородичен:

О, Владычице Пречистая, Древо дивноплодное, Плод Живота вечнаго прозябшее! Приосени ны благодатию Твоею, да согласно поем: радуйся, Покрове миру, ширший облака.

Величание:

Ублажаем тя,/ преподобне отче наш Гаврииле,/ и чтим святую память твою,/ наставниче монахов/ и собеседниче Ангелов.

Псалом избранный: Терпя, потерпех Господа:

По полиелеи седален, глас 4:

Егда наидоша на Церковь Христову воды безбожия, ты, святе Гаврииле, сопротив им стал еси и огнем молитвы иссушал еси. Ныне же ина испытания тщатся потопити ны: междоусобия и расколы, лицемерие и беззаконие. Буди ходатай о нас пред Кормчим ковчега Церкве, да, в нем от потопа избавльшеся, воспоим помощь твою, преподобне.

Слава, и ныне, Богородичен:

Под кров Твой, Пречистая Дево, прибегающих не презри, и мольбу принеси о нас Человеколюбцу Богу, еже спастися рабом Твоим.

Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Матфеа, зачало 43.

По 50-м псалме стихира, глас 6:

Возсия нам от земли сокровище,/ мощи твоя, преподобне Гаврииле,/ яже радостию лобызающе, молим:/ осияй ны, отче, любовию твоею/ и озаритися сердцам нашим моли/ любовию к Богу и человеком.

Канон, глас 7, егоже краегранесие: Иверския земли винограде, напой верных.

Песнь 1.

Ирмос: Манием Твоим на земный образ преложися/ прежде удоборазливаемое водное естество, Господи./ Темже, немокренно пешешествовав, Израиль/ поет Тебе песнь победную.

Иверския земли винограде, преподобне Гаврииле, напой божественным веселием верных, на похвалу тебе сошедшихся, от пианства уныния истрезвляя, печалей изымая и радости о Бозе исполняя нас.

Воинство фараоново в воде древле Моисей потопи, ты же, отче Гаврииле, молитвою к Законодавцу духи злобы поднебесныя низринул еси, сего ради людем путевождь ко спасению показался еси.

Егда пройде Израиль море Чермное, песнь победную Богу воспе, и ты, отче, научаеши ны не человеком, но Единому Богу славу воздавати, славно бо прославися.

Богородичен: Рожденнаго от Тебе поем, Дево, и Господа нарицаем, но греси наши на ны вопиют. Моли, Мати Божия, да не услышим глас оный: отыдите от Мене, не вем вас.

Ин канон, глас 6.

Ирмос: Яко по суху, пешешествовав Израиль/ по бездне стопами,/ гонителя фараона видя потопляема,/ Богу победную песнь поим, вопияше.

Рачение пламенное к вере правей имея и любовию ю преумножая, святый старче Гаврииле, укажи и нам путь правый, вводяй в живот вечный.

Избранный сосуд Святаго Духа яви тя Господь, отче Гаврииле, темже и благоухание твоих молитв, яко фимиам благовонный, присно восходит к Богу.

Яко имеяй от Бога дерзновение ходатай быти грешников, моли, преподобне, спасти души наша от плена греховнаго.

Божия силы преисполненный, невечерним светом блистаеши, отче наш, всеблаженне чудотворче Гаврииле, темже моления наша приими и мир даруй верою и любовию чтущим тя.

Богородичен: Всеблагая Владычице, Яже Преблагаго Бога плотию рождши, озлобленная страстьми наша сердца очисти, да верою и любовию величаем Тя.

Песнь 3.

Ирмос: В начале Небеса всесильным Словом Твоим/ утверждей, Господи Спасе,/ и Вседетельным и Божиим Духом всю силу их,/ на недвижимем мя камени исповедания Твоего утверди.

Самтавро возвеличися во обретении мощей твоих, от нихже, яко от неистощимаго источника, многая исцеления и чудеса проистекают, Гаврииле славне.

Кто не подивится дару исцелений, яже в тебе яви Бог, наипаче же смирению, имже, яко солию, вся гнилость гордыни в приходящих к тебе отъемлется.

Исполнитися моли, преподобне, во благих прошением нашим, яко Господь слышит всякое прошение твое, наипаче же моли, да утвердятся во Господе сердца наша.

Богородичен: Явися чрево Твое, Всенепорочная, стог честнаго гумна, миру нося Пшеницу живота, питающу всяческая. Темже Тя, яко виновну всех добрых, вернии, по достоянию ублажаем.

Ин

Ирмос: Несть свят,/ якоже Ты, Господи Боже мой,/ вознесый рог верных Твоих, Блаже,/ и утвердивый нас на камени/ исповедания Твоего.

От младенчества смирением украшен был еси, в возраст же пришед, всем сердцем Богу послужити восхотел еси. Темже, плотская попечения отринув, иноческий тесный путь избрал еси.

Еще во отрочестве ти сущу, льстивный зверь восхоте погубити тя и в видении боря; ты же, преподобне, свирепства его не устрашився, помощию Христовою возмогл еси того победити. Темже и ныне избави нас от напастей льстиваго.

Христа ради о сродницех твоих небрегл еси, блаженне, и был еси им, яко нищ и чуждь. Обаче любовию Господней уязвляемь, усердно Богу и людем послужил еси.

Егда страна твоя богоборчеством объята бысть, ты, преподобне, Горним желанием распалився и наветов безбожник не убоявся, храм Божий воздвигл еси, да вера Христова утверждается.

Богородичен: Услыша Ева праматерь: в печалех родиши чада. Ты же, Чистая Дево, радованным гласом, яко Господь с Тобою, печаль праматере потребила еси.

Седален, глас 5:

Преподобне отче Гаврииле! Ты, плотския страсти умертвив и девство возлюбив, чистотою Ангелом уподобился еси, смирением же разум Христу подчинив, духовную мудрость стяжал еси и, любовию нелицемерною всех, приходящих к тебе, усладив, на правый путь наставил еси. Темже вопием ти: радуйся, Гаврииле, Небесный человече и земный Ангеле!

Слава, и ныне, Богородичен:

Напоитися богатно слезами даждь браздам страстныя моея души, и плод принести ми сторичный, Владычице, сподоби, и сердце мое всякаго веселия исполни, да славлю Тя .

Песнь 4.

Ирмос: Отча недра не оставль/ и сошед на землю, Христе Боже,/ тайну услышах смотрения Твоего/ и прославих Тя, Едине Человеколюбче.

Злии и безбожнии людие тя безумным нарекоша, не ведуще псаломскаго словесе, яко безумен есть той, иже в сердце глаголет, яко несть Бога. Ты же, отче, сие безумие обличив, в земли Иверстей разум Божий утверждал еси.

Егда Евангелие, яко бисер безценный, обрел еси, преподобне, тогда вся красная мира сего отдал еси, да его приобрящеши. Темже моли Господа, да сокровищ Царства Небеснаго нас сподобит.

Многосветлый лик Христов, на дске написанный, благоговейно почитал еси, преподобне, таже и в коемждо приходящем к тебе образ Божий помраченный грехами зрел еси и молитвою твоею просвещал еси.

Богородичен: Любве исполнен быв ко Пречистей Богоматери и Сыну Ея, образы Их рукотворныя во храме твоем от богоборцев укрывал еси. Темже и ныне зриши их выну во Царствии Небеснем.

Ин

Ирмос: Христос моя сила,/ Бог и Господь,/ честная Церковь/ боголепно поет, взывающи,/ от смысла чиста о Господе празднующи.

Егда богоборцы нечестивии святыя храмы разориша и люди на мучения обрекоша, тогда мнози от веры истинныя отступиша и обеты иноческия попраша. Ты же, отче, узким и тесным путем шествуя, веру правую исповедати не устрашился еси.

Егда беззаконие умножися и оскудение любве приспе, тогда вся веледушно претерпевал еси, преподобне, и аще юн леты был еси, муж премудр разумом обрелся еси, смирением враги побеждая.

Священства саном облекся, блаженне Гаврииле, народу твоему, в суеверии коснеющу, веру Христову проповедал еси, научая чисто ю содержати и заповеди божественныя строго исполняти.

Благий рабе и верный, и искусный делателю винограда Христова! Ты, бодренне тяготу дне претерпев и талант свой умножив, юродом Христа ради на земли пожил еси и к лику блаженных причтен еси.

Богородичен: Ты еси Прибежище наше и Утверждение, Пречистая Богородице, моли Сына Твоего и Бога нашего подати нам спасение и грехов оставление.

Песнь 5.

Ирмос: Нощь не светла неверным, Христе,/ верным же просвещение в сладости словес Твоих./ Сего ради к Тебе утренюю/ и воспеваю Твое Божество.

Илии Фесвитянину подобник быв, ревнуя поревновал еси о Бозе Вседержителе и верен Ему во искушениих и напастех пребыл еси.

Возсия нам от земли сокровище, преподобне, мощи твоя, яже радостию облобызающе, молим: осияй ны, отче, любовию твоею и моли, во еже озаритися сердцам нашим любовию к ближним.

Ищущим Света, яко звезда, среди нощи неведения явился еси, отче Гаврииле, руководствуя к Свету Невечернему и подвизая елеем милостыни освещати сердца.

Богородичен: Ныне время благоприятно, ныне день спасения: возжзи в нас, Пречистая, огнь решимости, еже творити заповеди Сына Твоего.

Ин

Ирмос: Божиим светом Твоим, Блаже,/ утренюющих Ти души любовию озари, молюся,/ Тя ведети, Слове Божий, истиннаго Бога,/ от мрака греховнаго взывающа.

Христа всем сердцем возлюбив и по Имени Его поборая, на богоборцев небоязненно возстал еси, достохвальне, и, яко един от древних, образ идольский богоненавистника сожегл еси.

Ни мучения, ни страх смертный возможе тя разлучити от любве Божия, преподобне, темже, изъязвление плоти претерпев, яко злато в горниле, душу твою очистил еси.

Светом Христовым в житии твоем просиял еси, блаженне отче Гаврииле, и словесы богомудрыми многия к Солнцу Правды обратил еси, дела тьмы началозлобнаго врага разрушая.

Богородичен: Бога, егоже родила еси, Пречистая Марие, моли, рабом Твоим подати прегрешений оставление.

Песнь 6.

Ирмос: Плавающаго в молве житейских попечений,/ с кораблем потопляема грехи/ и душетленному зверю приметаема,/ яко Иона, Христе, вопию Ти:/ из смертоносныя глубины возведи мя.

Овцы заблуждшия Христу приводя, сам яко агнец кроток среди волков безбожия показался еси, обаче Пастырь Добрый от злогубительства тех сохрани тя.

Гавриилу Иверскому Святогорцу подобяся, ступил еси с верою на воды многоопасныя иноческаго жития и, за образом Пресвятыя Девы устремився, силою Божиею образ Ея смирения в сердце твоем обрел еси.

Рукама твоима храм Богу воздвигл еси, отче, егоже безбожнии разорити не возмогоша; и сам показался еси, яко столп несокрушимый Церкве Христовы, яже адовыми враты вовек неодолима пребывает.

Богородичен: Афонскаго жребия не оставляеши, Богомати, паки же Иверия имать Тя Помощницу, но и нашу нищету посети, иной удел Твой, люди чтущия Тя тепле.

Ин

Ирмос: Житейское море,/ воздвизаемое зря напастей бурею,/ к тихому пристанищу Твоему притек, вопию Ти:/ возведи от тли живот мой, Многомилостиве.

Иже тя безумно хотяху погубити, ничесоже успеша, Господь бо стена любящим Его и побораше за тя. Темже и поругания безбожных, отче Гаврииле, ни во что вменил еси и паче во Христе утвердился еси.

Киими словесы восхвалим подвиги твоя, отче Гаврииле, егда, от служения Богу волею властителей безбожных отторжен, без пристанища многая лета пребыл еси, зной дневный и мраз нощный претерпевая.

Прославим верою и любовию преподобнаго Гавриила, заступника теплаго народа Иверскаго, и с кротостию припадем к нему, моляще даровати нам покаяние и исправление.

Богородичен: Ныне к Тебе прибегаем, Пречистая, спаси нас молитвами Твоими и соблюди: елика бо хощеши, можеши, яко Мати Бога Всемогущаго.

Кондак, глас 4:

Непостижима есть милость Господа,/ егоже благодатию естество наше обожено бысть,/ ты же, блаженне отче, во смирении глубоце жительствуя,/ правду Божию проповедал еси/ и, лирою мудрости звяцая,/ любовию к ближним пламенел еси/ и тако, образ Творца в себе нося,/ добродетельми подобие Божие в себе уяснил еси./ Мы же, прославляюще тя похвалы достойными,/ яко ходатаю Божия благодати, сице вопием:/ радуйся, преподобне Гаврииле, Иверии похвало и радование.

Икос:

Кия песни принесем ти от недостойных устен, преподобне Гаврииле? Како воспоим жестокое твое житие, имже, яко злато в горниле, просиял еси и многим людем путевождь ко спасению явился еси? Сего ради, прославляюще подвиги твоя, сице тебе вопием:

радуйся, душ немощных целителю;

радуйся, молитвы непрестанныя учителю.

Радуйся, мучеником за Христа подобниче;

радуйся, юродивым Христа ради сликовниче.

Радуйся, преподобне Гаврииле, Иверии похвало и радование.

Песнь 7.

Ирмос: Пещь отроцы огнепальну,/ древле росоточащу, показаша,/ Единаго Бога воспевающе и глаголюще:/ превозносимый отцев Бог и препрославлен.

Душею сокрушенною и духом смиренным пред Господем ходив, благодать богатно обрел еси, отче Гаврииле, и ныне молися Владыце Христу, да посрамятся вси хотящии рабом Его злая.

Единое на потребу от юности взыскуя, яко пчела люботрудная, словесныя цветники обителей Иверских претекл еси, преподобне, и, сладкий мед добродетели собрав, в сердечныя соты вложил еси.

На стогнах града, идеже живяше, Христа благовествовал еси, преподобне, и окрест живущим людем проповедовал еси, вопия: возвратитеся ко Отцу Небесному и возопийте: благословен Бог отец наших.

Богородичен: Ангел сохрани три отроки в пещи халдейстей, Ты же, Богомати, певцы Твоя сохрани невреждены в горниле искушений, да поем: благословен Бог отец наших.

Ин

Ирмос: Росодательну убо пещь/ содела Ангел/ преподобным отроком,/ халдеи же опаляющее веление Божие/ мучителя увеща вопити:/ благословен еси, Боже отец наших.

Видя Господь твою святую ревность и любовь, во обитель Самтавро посла тя, идеже ты в малей келии водворився, со страхом и трепетом Безкровную Жертву приносил еси и Евангелие Христово благовествовал еси.

В столп царя Мириана вселився и той кресты со образы святых благоукрасив, чудесы многими инокини и приходящия к тебе вразумлял еси и непрестанней молитве научал еси.

Подвиг юродства Христа ради на рамо взем, Гаврииле премудре, яко безумен пред людьми явился еси и от них поругания, скорби и беды многия мужественно претерпевал еси. Ныне же прославляешися всеми, яко друг Божий.

Богородичен: Богородице Дево, рождшая Слово паче слова, Зиждителя Твоего, Того моли с преподобным Гавриилом помиловати души наша.

Песнь 8.

Ирмос: Неопальная огню в Синаи/ причащшаяся купина Бога яви/ медленноязычному и гугнивому Моисеови,/ и отроки ревность Божия три непреборимыя во огни певцы показа:/ вся дела Господня, Господа пойте/ и превозносите во вся веки.

Пламень сластей слезами покаяния угасил еси и в пещь скорбей небоязненно восшел еси, сего ради в сердце твоем, преподобне Гаврииле, огнь божественныя любве неугасаемо возгореся.

Орлине криле быша ти пост и молитва, преподобне, имиже над пропастию страстей воспарил еси и на высоте богомыслия гнездо ума твоего свил еси. И нас ныне настави Горняя мудрствовати, а не земная.

Источник милости подаеши, Спасе, чрез угодника Твоего, преподобнаго Гавриила, и мы благодарно Тебе вопием: благословен еси, Боже, Утешителю Благий.

Богородичен: Воистину ангелоподобен явился еси, отче преподобне, утешение и помощь в нуждах сущим обильно подавая, да вси согласно вопиют: благословен еси, Боже, Богородицею помилуй нас.

Ин

Ирмос: Из пламене преподобным росу источил еси/ и праведнаго жертву водою попалил еси:/ вся бо твориши, Христе, токмо еже хотети./ Тя превозносим во вся веки.

В непрестанней памяти Суднаго дне и кончины временнаго живота выну пребывая, слезами омывался еси, преподобне, и, древним отцем подобяся, еще в жизни сей себе самаго оплакал еси.

Венцем хваления увязем старца Гавриила, вретищем юродства себе облекшаго и сим свет благодати сокрывшаго, ходатая всех и поборника, и скорбящим скорое утешение.

Яко солнце, тучи греховныя разсеявающее, бысть слово твое, отче Гаврииле, к людем страны твоея обращенное. Темже ныне и от нас мглу страстей отжени, преподобне, молитвами твоими.

Богородичен: Спасения Ходатаица нам явилася еси, Богородице, рождшая Спаса и Владыку всех. Темже молим Тя: спаси всех нас.

Песнь 9.

Ирмос: Нетления искушением рождшая/ и всехитрецу Слову плоть взаимодавшая,/ Мати Неискусомужная, Дево Богородице,/ Приятелище Нестерпимаго,/ Село Невместимаго Зиждителя Твоего,/ Тя величаем.

Единый хитон нешвенный Церкве Христовы, свыше из многих язык истканный, раздрати волцы хищницы тщатся, но ты, отче, ходатайством твоим тщетны труды их соделай, во единомыслии всех сохраняя.

Российстей земли ходатай буди, отче Гаврииле, моли Всеблагаго Бога сохранитися ей от враг ненаветованней и древо веры укрепити, да под сению его вси вернии укрываются.

Нам, чтущим тя и любовию хвалящим, помогай, преподобне, да и в жизни сей, благодаряще Бога, пребудем, и жизнь оную безпечальную обрящем.

Изыдите, вернии, от домов и келий ваших, да собранием церковным почтим во уединении среди людий подвизавшагося, истиннаго инока и всем нам теплаго молитвенника, Гавриила досточуднаго.

Богородичен: Христе Всецарю, предстательством Твоея Матере и преподобнаго Гавриила, милостив буди нам, песнь сию чрез них Тебе принесших.

Ин

Ирмос: Бога человеком невозможно видети,/ на Негоже не смеют чини ангельстии взирати;/ Тобою бо, Всечистая, явися человеком/ Слово воплощенно,/ егоже величающе,/ с Небесными вои Тя ублажаем.

Недугом тяжким объят, нестерпимую муку претерпел еси, преподобне, прозрев же в Дусе час кончины твоея, о мире народа и Отечества твоего молитву вознесл еси и неболезненно мир сей оставил еси.

Восхвалим днесь, вернии, столпа добродетели и Христа ради юродиваго, преподобнаго Гавриила, егоже в пещи скорбей невредима от козней вражиих Христос сохрани, имеяй велию милость.

Приидите, людие, воспразднуим память преподобнаго Гавриила, молитвенника дерзновеннаго, заступника обидимым и помощника в бедах сущим, егоже молитвами, Боже, помилуй нас.

Богородичен: Единаго от Святыя Троицы, Слова и Сына родила еси, Дево Пречистая, егоже с преподобными и праведными моли о рабех Твоих, верою просящих грехов прощения.

Светилен:

Прославим, вернии, новаго светильника Церкве Грузинския, Гавриила преподобнаго, от огня любве Христовы нам возжженнаго, да, во тьме мира сего ходяще, не поткнемся, но прославим Отца светов Безначальнаго.

Слава, и ныне, Богородичен:

Великому Гавриилу Архангелу подражая, приносил еси, отче Гаврииле, ангелокрасную песнь Богоматери: радуйся, Обрадованная! И мы ныне, сликовствующе, поем: радуйся, Благословенная, Господь с Тобою!

На хвалитех стихиры, глас 4:

Цвет дивный земли Иверския,/ Гавриил Самтаврийский,/ безумен миру и мудр Богу явися,/ нищ тленными и богат вечными показася,/ прост инок и советник патриархом назвася./ Мы же, духовная чада, сице ему вопием:/ молися выну, отче, за ны ко Господу.

Надеяся на Господа/ и помышленьми живый в Горнем Иерусалиме/ яко гора Сион, явился еси,/ преподобне старче Гаврииле,/ темже и унывающим взывал еси:/ Господь окрест людей Своих/ отныне и до века.

Милостыни сосуде неистощаемый,/ твердый веры исповедниче,/ свеще, любовию Христовою сияющая,/ смирения и незлобия учителю,/ отче Гаврииле Самтаврийский,/ приими молитвы чтущих тя/ и не премолчи за ны ко Господу.

Слава, глас 8:

Днесь радостный день приспе,/ память Гавриила преподобнаго,/ исповедника тверда и веры поборника,/ плодов добродетели исполнена/ и Господеви усердно поработавшаго,/ егоже молитвами, Христе Боже,/ Отечество наше в Православии утверди,/ братолюбия и мира сердца наша исполни/ и спаси души наша.

И ныне, Богородичен, глас тойже:

Владычице, приими молитвы раб Твоих/ и избави нас/ от всякия нужды и печали.

На Литургии

Блаженна от перваго канона, Песнь 3.-я и 6-я. Прокимен, глас 7: Честна пред Господем смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Алиллуиа, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его. Евангелие от Луки, зачало 24. Причастен: В память вечную будет праведник:

Молитва

О, блаженне отче Гаврииле, древним отцем преподобным подобниче и твердый веры исповедниче! Ты, от юности евангельскому учению навык, всем сердцем Христа возлюбил еси, егоже же ради и мира отреклся еси и подвиг юродства восприял еси, да миру безумен явишися. Мы же, аще и лениви суще, но ведуще тя дары Духа Святаго исполнена, на помощь твою надеющеся, со смирением молим: укрепи нас в вере и благочестии, испроси от Господа дух братолюбия и любве, имиже в житии твоем просиял еси, исцели наша недуги душевныя и телесныя, монашествующим подвигом добрым подвизатися помози, пастырей в ревности благовестия Христова утверди, Церковь от разделения сохрани, Отечество наше в мире соблюди и сподоби нам спасение душ улучити и Царствие Небесное наследовати, идеже вкупе с тобою и всеми святыми возможем прославляти Отца и Сына и Святаго Духа, Троицу Единосущную и Нераздельную во веки веков. Аминь.

Источник: Текст службы утвержден к общецерковному богослужебному употреблению на заседании Священного Синода 29 декабря 2022 года (журнал № 130).

Месяца октября в 21-й день

Священномученика Павлина, архиепископа Могилевскаго

На малей вечерни

На Го́споди, воззва́х: стихи́ры на 4, глас 1.

Подо́бен: Небе́сных чино́в:

Смире́н, незло́бив, кро́ток и прост быв,/ священному́чениче Павли́не,/ я́ко а́нгел, на земли́ пожи́л еси/ и, муче́нием путь сконча́в,/ зе́млю кро́тких насле́довал еси́./ Моли́ о душа́х наших.

Ве́рою и благоче́стием/ от ма́терних пеле́н обогати́лся еси́/ и, Христа́ всем сердцем возлюби́в,/ в Саро́вскую пу́стынь всели́лся еси́,/ идеже, усердно подвизаяся,/ сама́го себе́ со вся́ким смире́нием ста́рцем подклони́л еси./ Сего́ ра́ди тя, святе Павли́не, ублажа́ем.

Во времена́ гоне́ний лю́тых в земли нашей/ яви́ тя Госпо́дь, преди́вне Павли́не,/ свети́льника пресветлаго,/ благоче́стием сия́юща/ и любо́вию ча́да церко́вная согрева́юща./ Сего́ ра́ди тя прославля́ем.

Твоему́ добродетельному житию,/ Павли́не досточудне,/ а́нгели удиви́шася,/ в телеси́ бо сый,/ безпло́тным подража́ти потща́лся еси́/ и, ум твой ко Христу возвы́сив,/ прему́дрость боже́ственную измлада возлюбил еси́./ Сего́ ра́ди тя почита́ем.

Слава, глас 5.

Подо́бен: Ра́дуйся:

Уподо́бился еси́, Павли́не священному́чениче,/ преподо́бным и богоносным отце́м/ Серафи́му в Диве́еве ди́вному/ и Феодо́сию в Киеве достохва́льному,/ от ю́ности бо твоея́ и́го благое на ра́мена взем,/ любо́вию Христо́вою распали́лся еси́/ и, я́ко звезда́, на тве́рди церко́вней во дни гоне́ния безбо́жнаго просия́л еси́,/ ве́рныя на путь спасе́ния наста́вляя/ и во благочестии утверждая./ Последи же, от беззако́нник приим непра́ведное убие́ние,/ себе́ сама́го в жертву живую принесл еси́./ Ны́не же, предстоя́ престо́лу Царя́ Небе́снаго,/ моли́ спасти́ся душа́м наши́м.

И ны́не, Богоро́дичен, глас то́йже:

Обра́дованная, хода́тайствуй Твои́ми моли́твами/ и испроси́ душа́м на́шим мно́жество щедро́т/ и очище́ние многих прегреше́ний, мо́лимся.

На стихо́вне стихи́ры, глас 6.

Подо́бен: Тридне́вен:

О́браз Христо́ва милосе́рдия па́стве твоей яви́л еси́,/ Павли́не досточудне,/ си́рых и вдови́ц быв заступник,/ ны́не же во све́тлостех святы́х и нас помяни,/ чту́щих с любовию па́мять твою́.

Стих: Свяще́нницы Твои́ облеку́тся в правду/ и преподобнии Твои возрадуются.

Образ злострада́ния и терпе́ния показал еси,/ Павли́не терпеливодушне,/ и, яко твердый свидетель истины,/ поруга́ния, изгна́ния и ну́ждную смерть претерпе́л еси́./ Моли́ о душа́х на́ших.

Стих: Честна́ пред Го́сподем/ сме́рть преподо́бных Его́.

О́бразом Креста́ Животворя́щаго/ се́рдце твое́ утверди́в,/ богому́дре Павлине,/ к страда́нием му́жески вда́лся еси́,/ темже дерзновение улучив ко Господу,/ моли́ спасти́ся душам нашим.

Сла́ва, глас и подо́бен то́йже:

О́браз был еси́ твоему́ ста́ду,/ священномучениче Павли́не,/ сло́вом, житие́м, любо́вию, ду́хом, ве́рою, чистото́ю,/ сего́ ра́ди, имя добраго пастыря стяжав,/ Христа́ Пастыренача́льника моли́ о нас,/ па́мять твою́ верно соверша́ющих.

И ны́не, Богоро́дичен, глас и подо́бен то́йже:

О́браз Твой святы́й почита́ем,/ Богоро́дице Де́во Пречи́стая,/ и Боже́ственному Младе́нцу,/ во объятиих Твоих сущу, покланя́емся,/ моля́ще о спасе́нии душ на́ших.

Тропа́рь писан на велицей вечерни

На велицей вечерни

Блаже́н муж: 1-й антифо́н. На Го́споди, воззва́х: стихи́ры, глас 6.

Подо́бен: Все отло́жше:

И́же хо́щет по Мне ити́, глаго́лет Христо́с,/ да во́змет Крест и Мне да после́дствует,/ ты же, священному́чениче Павли́не,/ от ю́ности и́го благо́е на ра́мена взем,/ ми́ра отве́рглся еси́,/ те́мже, по достоя́нию святи́тельства са́ном почте́н быв,/ Це́ркви Русской во времена́ гоне́ния безбо́жнаго послужи́л еси́/ и венце́м муче́ния украси́лся еси́./ Сего́ ра́ди тя прославля́ем.

Твои́х доброде́телей, отче Павли́не,/ па́мять ны́не ве́рных сердца весели́т,/ ты бо, в безме́рнем смире́нии нището́ю обогати́вся,/ многими подвиги просиял еси/ и, Христа́ всем се́рдцем возлюби́в,/ и́стинный пастырь Бо́га Вы́шняго яви́лся еси,/ те́мже, святи́тельства оде́ждею по достоя́нию украшен,/ кро́вию му́чения сию́ обагри́л еси́./ Моли́ о душа́х на́ших.

Егда́ боже́ственное рачение на́йде на тя, богому́дре,/ тогда́ плотско́е мудрова́ние духу покори́л еси́/ и, во оби́тель Саро́вскую всели́вся,/ мно́гия труды́ поне́сл еси́,/ дарами же духовными украсився,/ яко свети́льник пресветлый на све́щнице церко́внем поста́влен был еси/ и, во святи́тельстве досточе́стно пожи́в,/ муче́нием путь сконча́л еси./ Моли́ спасти́ся душам нашим.

Люты́ ско́рби, но сла́док рай,/ боле́зненны труды́, но блаже́нно восприя́тие,/ си́це глаго́лал еси́, терпеливодушне Павлине,/ егда́ от ме́ста на место́ от беззако́нных гони́мь быва́ше/ и па́ствы твоея́ разлучашеся,/ темже, и в хла́дней земли Сиби́рстей путь твой сконча́в,/ убие́ние от непра́ведных прия́л еси́,/ обаче теплоту́ блаже́нства ве́чнаго обрел еси./ Моли́ и нам черто́га Христо́ва сподобитися.

Сла́ва, глас 8:

Ра́дуйся, пу́стынь Саро́вская благознамени́тая,/ ра́дуйтеся, преде́лы Костромски́я и Яросла́вския,/ ра́дуйся, Москво́ первопресто́льная и честна́я оби́тель Новоспа́сская,/ я́ко воспита́ли есте́ граждани́на Ца́рства Небе́снаго,/ но́ваго священному́ченика, блаже́ннаго Павли́на,/ му́жа избранна и соверше́нна,/ и́же, любо́вию, прему́дростию и благоче́стием просия́в,/ подвиги своими Церковь Русскую украсил есть./ Темже, вернии, с любовию тому возопиим:/ о́тче всеблаже́нне, моли́ся о нас,/ всечестну́ю твою па́мять соверша́ющих.

И ны́не, Богоро́дичен, глас то́йже: Царь Небе́сный:

Вход. Проки́мен дне. И чте́ния.

Дея́ний святы́х апо́стол чте́ние (глава́ 4; 1–12):

Во дни о́ны, глаго́лющим же апо́столом к лю́дем,/ наидо́ша на ни́х свяще́нницы и воево́да церко́вный, и саддуке́и,/ жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых;/ и возложи́ша на них ру́ки и положи́ша их в соблюде́ние до у́трия:/ бе бо ве́чер уже́./ Мно́зи же от слы́шавших сло́во ве́роваша:/ и бысть число́ муже́й я́ко ты́сящ пя́ть./ Бысть же нау́трие собра́тися князе́м их, и ста́рцем, и кни́жником во Иерусали́м:/ и А́нне архиере́ю, и Каиа́фе, и Иоа́нну, и Алекса́ндру,/ и ели́цы бе́ша от ро́да архиере́йска./ И, поста́вльше их посреде́, вопроша́ху:/ ко́ею си́лою, или́ ко́им и́менем сотвори́сте сие́ вы?/ Тогда́ Петр, испо́лнився Ду́ха Свя́та, рече́ к ним:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть Ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния;/ несть бо ино́го Имене под небесе́м, да́ннаго в челове́цех,/ о не́мже подоба́ет спасти́ся нам.

Дея́ний святы́х апо́стол чте́ние (глава́ 4; 13–22):

Во дни о́ны, ви́дяще иуде́и Петро́во дерзнове́ние и Иоа́нново и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся ко друг дру́гу, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о Имени сем ни еди́ному от челове́к./ И призва́вше их,/ запове́даша и́ма отню́дь не провещава́ти, ниже́ учи́ти о Имени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га?/ Суди́те: не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ изцеле́ния.

Дея́ний святы́х апо́стол чте́ние (глава́ 4, 23–31):

Во дни о́ны, отпуще́на бы́вша апо́стола приидо́ста ко свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре и вся, я́же в них,/ И́же усты́ Дави́да, о́трока Твоего́, рече́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во изцеле́ния,/ и зна́мением и чудесе́м быва́ти Именем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.

На лити́и стихи́ра хра́ма и свята́го, глас 2.

Подобен: Ки́ими похва́льными венцы́:

Ки́ими похва́льными венцы́/ увязе́м Павлина священному́ченика,/ мона́хов похвалу́,/ святи́телей добро́ту,/ ве́ры столпа́ непреобори́маго,/ от ю́ности прему́дрость возлюби́вшаго/ и во благоче́стии неле́ностно потруди́вшагося?/ Сего́ бо вои́стину досто́йно/ безсме́ртныя сла́вы венце́м/ венча́ет Христо́с Бог наш,/ име́яй ве́лию мило́сть.

Ки́ими духо́вными пе́сньми/ ублажи́м достосла́внаго Павли́на/ страда́льца твердейшаго,/ Правосла́вия побо́рника,/ в после́дняя ле́та нам дарова́ннаго,/ благоче́стия учи́теля,/ покая́ния пропове́дника,/ на путь спасе́ния наставля́ющаго?/ Его́же моли́твами/ враго́в шата́ния, Христе́, низложи́,/ име́яй ве́лию ми́лость.

Ки́ими пе́сненными добро́тами/ воспои́м Христо́ва уго́дника,/ сиро́т питателя,/ ю́ных наста́вника,/ в милосе́рдии Небе́сному Отцу́ подража́вшаго,/ кла́дязь любве неисчерпа́емый,/ ми́лостыни ре́ку незави́стну,/ Це́рковь Ру́сскую веселя́щую тече́ньми словес своих?/ Его́же молитвами и предста́тельством/ спаси́ отечество наше, Христе́ Бо́же,/ имеяй велию милость.

Сла́ва, глас 6:

Мно́ги ско́рби претерпе́л еси́,/ достоблаже́нне Павли́не священному́чениче,/ те́мже по достоя́нию вшел еси́ в Ца́рство Небе́сное,/ иде́же в ли́це новому́ченик Це́ркве Ру́сския,/ славою Горнею озаряемь,/ по́честь побе́ды твоего́ страда́ния прие́млеши./ Моли́ спасти́ся душам нашим.

И ны́не, Богоро́дичен, глас тойже: Богородице, Ты еси Лоза истинная:

На стихо́вне стихи́ры, глас 2.

Подо́бен: Егда́ от Дре́ва:

Святи́тельства престо́л украша́я доброде́тельми,/ во времена́ лю́тая в земли́ нашей,/ богохрани́мому гра́ду Ку́рску посыла́ешися,/ я́ко ми́рный а́нгел, Павли́не всече́стне,/ еже кро́тостию и любо́вию людем послужити,/ ча́да церко́вная сло́вом Бо́жиим наставити/ и еле́ем милосе́рдия духо́вныя я́звы их исцелити./ Уврачуй и на́ша стру́пы греховныя, цели́телю изря́дный.

Стих: Свяще́нницы Твои́ облеку́тся в пра́вду/ и преподо́бнии Твои́ возрадуются.

Щито́м ве́ры, Павли́не многострада́льне,/ разли́чная ухищре́ния богобо́рцев отрази́л еси́/ и, темни́чныя у́зы претерпе́в,/ Пе́рмския земли́ архипа́стырь наре́клся еси́,/ насле́дник священнострада́льца Андрони́ка быв./ Темже, па́ству расточе́нную/ ти́хим гла́сом любве́ собра́в,/ по достоя́нию нарече́ние до́браго па́стыря прие́млеши,/ и нас во еди́но ста́до Христо́во собери,/ молитвами твоими, священному́чениче преславне.

Стих: Честна́ пред Го́сподем/ сме́рть преподо́бных Его́.

Спасения души взыскуя,/ вослед Христу смиренно последовал еси,/ Иже и постави тя архипастыря гра́да Калу́ги,/ священномучениче Павли́не преславне,/ моли́твы чи́стое зерца́ло,/ ми́лостыни усе́рдный пода́телю/ и пе́ний церко́вных изря́дный люби́телю!/ Ты же, Боже́ственныя Та́йны всеблагогове́йне совершая,/ ве́рныя люди со Христо́м соединя́л еси/ и заблуждшия на путь истинный наставлял еси./ Те́мже, лико́м небе́сным совокупи́вся,/ моли́ спастися душа́м на́шим.

Сла́ва, глас 8:

Нището́ю духо́вною обога́тився,/ себе́ сама́го Бо́гу соверше́нно пре́дал еси́,/ доброхва́льне святи́телю Павли́не,/ и, я́ко звезда́ пресве́тлая,/ от восто́ка земли́ на́шея к за́паду дости́гл еси́./ Обаче, на престо́ле Могиле́встем доброде́тельми просия́в,/ па́ки сове́том безбо́жных на восто́к гони́мь быва́ше,/ иде́же в преде́лех Сиби́рских луче́й твои́х сия́ние за́йде./ Освяти́ и на́ша ду́ши/ све́том страда́ний твои́х, достосла́вне.

И ны́не, Богоро́дичен, глас то́йже: Безневе́стная Де́во:

Тропа́рь, глас 4:

От ю́ности желание к Богу возложив,/ на пажитех мона́шеских упа́слся еси́/ и, многия добродетели стяжав,/ архипа́стырь слове́сных овец явился еси,/ ихже до́бре упа́с,/ мно́гия ско́рби от богобо́рцев претерпе́л еси́/ и, муче́нием путь сконча́в,/ Царствие Небесное наследовал еси,/ священному́чениче Павли́не,/ моли́ Христа Бога/ спасти́ся душа́м на́шим.

Ин тропа́рь, глас 2:

Ве́ры Правосла́вныя непоро́чный блюсти́телю/ и за́поведей Христо́вых усе́рдный исполни́телю,/ священномучениче Павлине,/ па́ству твою́ до́бре упа́сл еси́/ и в хладней Сиби́ри му́ченическую сме́рть прия́л еси́./ Ны́не же, в ве́чней сла́ве пребыва́я,/ моли́ спасти́ся душа́м на́шим.

На утрени

На Бог Госпо́дь: тропа́рь священному́ченика два́жды. Сла́ва, и ны́не, Богородичен.

По 1-м стихосло́вии седа́лен, глас 7:

Гоне́ния лютая претерпева́я, си́це безбо́жным глаго́лал еси́, священному́чениче Павли́не: путь наш кре́стный есть, оба́че стра́ха ва́шего и са́мыя сме́рти не убои́мся, я́ко Кресто́м упова́ем дости́гнути Небе́снаго Ца́рствия, его́же обеща́ Христо́с всем лю́бящим Его́. Два́жды.

Сла́ва, и ны́не, Богородичен, глас то́йже:

Ны́не ли́цы новому́ченик со а́нгелы славосло́вят Тя, Влады́чице, све́тлостей со́лнечных превы́шшую, Похвалу́ всея́ вселе́нныя, Сло́во Бо́жие во чре́ве прии́мшую и Ра́дость ми́ру ро́дившую. С нимиже и мы вопием: ра́дуйся, спасе́ния на́шего Хода́таице.

По 2-м стихосло́вии седа́лен, глас 5:

Изгна́ния, узи́лища и безве́стную кончи́ну прови́дев, блаже́нне Павли́не, ко Подвигополо́жнику Христу́ со упованием крепким взыва́л еси́, да в терпе́нии путь твой испра́вит, сове́ты нечести́вых разори́т, Це́рковь же святу́ю во благоче́стии сохрани́т. Темже моли́ спасти́ся душа́м на́шим. Два́жды.

Сла́ва, и ны́не, Богородичен, глас то́йже:

Милосе́рдия твоего́ пучи́ну кто испове́сть, Де́во Пренепоро́чная, Засту́пнице на́ша и Упова́ние, непосты́дная Наде́ждо христиа́н, скорбя́щих Ра́досте и всех, су́щих на земли́, пресве́тлая Добрόто? Покры́й нас боже́ственным предста́тельством Твои́м, Пречи́стая Богоро́дице, Влады́чице.

Велича́ние:

Велича́ем тя,/ священному́чениче Павли́не,/ и чтим честна́я страда́ния твоя́,/ я́же за Христа́/ претерпе́л еси́.

Ино велича́ние:

Величаем тя,/ священномучениче Павлине,/ и чтим честная страдания твоя,/ яже за Христа во утверждение на Руси Православия/ претерпел еси.

Псалом избранный:

Бог нам Прибежище и Сила.

Господи, воздвигни силу Твою и прииди, во еже спасти ны.

Глаголах о свидениих Твоих пред цари и не стыдяхся.

Вси язы́цы обыдоша мя и именем Господним противляхся им.

Тебе ради умерщвляемся весь день, вменихомся, яко овцы заколения.

Крепость моя и пение мое Господь и бысть мне во спасение.

По полиеле́и седа́лен, глас 8:

Егда́ богобо́рцы, я́ко во́лцы лютии, на Це́рковь Христо́ву в Ру́сстей земли́ восста́ша, тогда, священному́чениче Павли́не, я́ко пастырь до́брый, ду́шу твою́ за о́вцы слове́сныя пололожи́л еси́. И ныне моли́ Христа́ Пастыренача́льника, да спасе́т ста́до Свое́ от волко́в, губя́щих е́. Два́жды.

Сла́ва, и ны́не, Богородичен, глас то́йже:

Безневе́стная Ма́ти, Пречи́стая Госпоже́, Де́во Богоро́дице! Моли́ся Сы́ну Твоему́ и Бо́гу на́шему, да не отврати́т от нас Ли́ка Своего́, но да просвети́т сердца́ на́ша, омраче́нная страстьми́, и поми́лует нас по велицей Своей милости.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же воздаде́ ми. Вся́кое дыха́ние: Ева́нгелие от Луки́, зача́ло 67.

По 50-м псалме́ стихи́ра, глас 6:

Прииди́те, мучениколю́бцы,/ дне́сь духо́вне возвесели́мся,/ па́мять соверша́юще сла́внаго Павли́на,/ но́ваго священнострада́льца,/ сей бо, зе́млю Русскую доброде́тельми просвети́в,/ я́ко благово́нное приноше́ние Го́сподеви возложи́лся есть:/ ве́ру Христо́ву пред нечести́выми власти́тели испове́да/ и ду́шу свою́ за па́ству положи́,/ ны́не же престо́лу Святы́я Тро́ицы предстои́т/ и мо́лится о душа́х на́ших.

Кано́н Пресвяты́я Богоро́дицы, со ирмосо́м на 6 и священому́ченика на 8, глас 3.

Пе́снь 1

Ирмо́с: Фарао́ни колесни́цы глубино́ю покры́в, Го́споди,/ мо́ре разве́ргл еси́/ и спасл еси́ пе́сньми пою́щия Тя/ лю́ди изра́ильтеския.

Сло́ва служи́теля и свиде́теля, Павли́на славнаго, жити́я кра́сная исправле́ния и честна́я страда́ния пода́ждь ми, Сло́ве, в пе́снех досто́йно восхвали́ти.

Твои́ми моли́твами, священному́чениче, напра́ви ум мой, мно́гими по́мыслы расточе́нный, да просла́влю тя, мно́гими скорбьми́ во Ца́рствие Небе́сное вше́дша.

Роди́телей благоче́стивых до́брый и избра́нный плод яви́вся, блаже́нне Павли́не, от ю́ности всем се́рдцем твои́м и помышле́нием Бо́га возлюби́л еси.

Богоро́дичен: А́нгелов Влады́чице, Пресве́тлая Похвало́ и де́вственная Сла́во! На Тя наде́ющеся, при́сно зове́м: радуйся, Невесто Неневестная!

Пе́снь 3

Ирмо́с: Непло́дная душе́ и безча́дная,/ стяжи́ плод благосла́вный,/ веселя́щися, возопи́й:/ утверди́хся Тобо́ю, Бо́же,/ не́сть свят, не́сть пра́веден,/ па́че Тебе́, Го́споди.

Жела́нием кра́йним влеко́мь, дом роди́тельский остави́ти потща́лся еси́, боголю́бче, сего́ ра́ди, о́трок сый, в дому́ Бо́жии водвори́лся еси́, при́сно поя́: не́сть свят, не́сть пра́веден, па́че Тебе́, Го́споди.

А́нгел земны́й и небе́сный челове́к яви́лся еси́, богому́дре, те́мже, оби́тели Саро́вския дости́г, в служе́ние бра́тии сам себе́ пре́дал еси́, ра́дуяся и воспева́я: не́сть свят, не́сть пра́веден, па́че Тебе́, Го́споди.

Лука́ваго ко́зни постиго́ша тя, до́бре послу́шниче, ты же, на гро́бе преподо́бнаго Серафи́ма сле́зы пролия́в, во смире́нии Бо́гу возопи́л еси́: не́сть свят, не́сть пра́веден, па́че Тебе́, Го́споди.

Богоро́дичен: Честне́йшую Херуви́м и сла́внейшую су́щи Серафи́м, Де́ву Пречи́стую воспои́м и Ро́ждшемуся из Нея́ возопии́м: не́сть свят, не́сть пра́веден, па́че Тебе́, Го́споди.

Седа́лен, глас 8:

Мно́гими доброде́тельми обогати́лся еси́, свя́те Павли́не: кро́тостию, смире́нием и любо́вию, нищелю́бием и долготерпе́нием, си́ми же, да́нный тебе́ тала́нт стори́цею умножи́в, Боже́ственных Та́ин непоро́чный служи́тель яви́лся еси́, те́мже врата́ Небе́сная отверзо́шася тебе́, и в ра́дость вшел еси́ Го́спода Твоего́. Его́же моли́ и нас Ца́рствия Небе́снаго сподо́бити. Два́жды.

Сла́ва, и ны́не, Богородичен, глас то́йже:

Во гла́сех пе́ний вопие́м Ти, Влады́чице А́нгелов: непреста́нно моли́ся о нас, стихи́ями ми́ра се́го одержи́мых и грехо́м порабо́тившихся; да восста́нем от паде́ния и в покая́нии к Сы́ну Твоему́ припаде́м, вопию́ще: помяни́ нас, Го́споди, во Ца́рствии Твое́м.

Пе́снь 4

Ирмо́с: Положи́л еси́ к нам тве́рдую любо́вь, Го́споди:/ Единоро́днаго бо Твоего́ Сы́на/ за ны на сме́рть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди.

Па́жити мона́шеския, я́ко пчела́ трудолю́бная облете́л еси́, отче Павли́не, иде́же мед духо́вный собра́в, со́ты души́ твоея́ ра́зумом просвещенным, я́ко некта́ром, испо́лнил еси́, по́я: сла́ва си́ле Твое́й, Го́споди.

Влады́це Христу́ сам себе́ пре́дал еси́, Павли́не блаженне, и, да́нный ти тала́нт трудолю́бно умно́жив, во оби́телех Костромски́х и Яросла́вских до́бре пожи́л еси́, благода́рственно воспева́я: сла́ва си́ле Твое́й, Го́споди.

И́ноческаго жития́ ревни́телю, святе Павли́не! Ты, мал нарече́н быв, ве́рен Богови пребы́л еси́, темже, и над мно́гими поста́влен, во смире́нии вели́чие явил еси, глаго́ля: сла́ва си́ле Твое́й, Го́споди.

Богоро́дичен: Е́дина Чи́стая и Пречи́стая Ма́ти Де́во! Моли́твы на́ша приими́ и Сы́на Твоего́ умоли́ пода́ти нам прегреше́ний проще́ние, непреста́нно вопию́щим: сла́ва си́ле Твое́й, Го́споди.

Пе́снь 5

Ирмо́с: К Тебе́ у́тренюю, всех Творцу́,/ преиму́щему всяк ум ми́рови,/ зане́ свет повеле́ния Твоя́,/ в нихже наста́ви мя.

Новоспа́сская оби́тель вельми́ тобо́ю хва́лится, Павли́не всече́стне, ты бо в той, я́ко свети́льник на све́щнице, посреде́ сто́льнаго гра́да доброде́тельми просия́л еси́.

Му́дростию украше́н, я́ко седи́ною, во младости твоей кро́ток и смире́н пребы́л еси́, достохва́льне Павли́не. Те́мже, богосло́вия уче́нию навы́к, Прему́дрости Ипоста́сней служи́тель изря́ден яви́лся еси.

Че́стен и чист в житии́ твое́м был еси́, святе Павли́не, сего́ ра́ди, свяще́нства са́ном по достоя́нию украси́вся, па́стве моско́встей па́стырь до́брый яви́лся еси́ и наста́вник ю́ношам преизяще́н.

Богоро́дичен: Никто́же притека́яй к Тебе́, посра́млен от Тебе́, Де́во, исхо́дит, но про́сит заступле́ния и благода́ть прие́млет незави́стно.

Пе́снь 6

Ирмо́с: Возведи́ от тли мя, Го́споди Бо́же мой,/ Ио́на вопия́ше,/ и аз вопию́ Ти:/ из глубины́ изба́ви мя, Спа́се, мно́гих мои́х зол/ и к Све́ту Твоему́, молю́ся, наста́ви.

Челове́че Бо́жий и служи́телю ве́рный, святе Павли́не! Ты, яко преподо́бен, незло́бив и безскве́рнен, во́лею Бо́жиею гра́ду Ку́рску архипа́стырь посыла́ешися, да упасе́ши о́вцы слове́сныя па́жити Христо́вы.

Вменя́я вся уме́ты бы́ти, да Христа́ приобря́щеши, наипа́че же па́ству твою́ усво́иши Христу́, трудолю́бен де́латель, отче Павли́не, яви́лся еси́, Боже́ственная соверша́я, и пропове́дуя, и моля́ся на всяк час Бо́гу.

Жа́ждати пра́вды Бо́жия не преста́л еси́, блаже́нне Павли́не, те́мже, а́ки еле́нь на исто́чники водны́я, во святы́я оби́тели гра́да Пути́вля прите́кл еси, и́ноческаго жития́ и́стинный люби́телю.

Богоро́дичен: О, Ма́ти Преблага́я, сла́вныя оби́тели Гли́нския Похвало́! Моли́твами Твои́ми не преста́й покрыва́ти вся ве́рныя от вра́жия наве́та и озлобле́ния.

Конда́к, глас 3:

Апо́столов насле́дниче/ и святителей украшение,/ Павли́не досточудне,/ ны́не Це́рковь Ру́сская тя досто́йно воспева́ет,/ ты бо глаголы жизни вечныя небоя́зненно возвеща́л еси́/ и, Христа́ пред отсту́пники че́стне испове́дав,/ кро́вию твое́ю во Свята́я Святы́х вшел еси́./ Моли спастися душа́м на́шим.

И́кос:

Многообра́зны по́двизи и приско́рбно житие́ твое́ бысть, священному́чениче: от ю́ности бо крест на ра́мена взем, Христу́ после́довал еси́, Иже, ви́дев твое́ благо́е изволе́ние, па́стыря слове́сным овца́м тя поста́ви. Егда́ же прии́де о́гненнаго испыта́ния час и во́лцы лютии ста́до Христо́во обступи́ша, ты, преще́ний мучи́телей не убоя́вся, я́ко па́стырь до́брый, ду́шу за па́ству поло́жил еси́. Сего́ ра́ди воспева́ем тя си́це:

Ра́дуйся, от ю́ности всего себе Го́сподеви всеце́ло возложи́вый;

ра́дуйся, благослове́ние ма́тере твоея́ восприе́мый.

Ра́дуйся, мона́шества русскаго розго́ добропло́дная;

ра́дуйся, послуша́ния цве́те неувяда́емый.

Ра́дуйся, прему́дрости боже́ственныя стяжа́телю;

ра́дуйся, просвеще́ния духо́внаго насади́телю.

Ра́дуйся, ста́да Христо́ва па́стырю до́брый;

ра́дуйся, архие́рею всечестны́й.

Ра́дуйся, Це́ркви Ру́сстей в гоне́ниих послужи́вый;

ра́дуйся, за ве́ру Христо́ву да́же до кро́ве пострада́вый.

Ра́дуйся, вдов и сиро́т пита́телю;

ра́дуйся, благоче́стия ревни́телю.

Ра́дуйся, Павли́не, па́стырю до́брый и му́чениче преславный.

Пе́снь 7

Ирмо́с: Тебе́, во огни́ ороси́вшаго о́троки богосло́вившия/ и в Де́ву нетле́нну все́льшагося,/ Бо́га Сло́ва пои́м,/ благоче́стно пою́ще:/ благослове́н Бог оте́ц на́ших.

Преще́ний богобо́рцев не убоя́вся, непрекло́нен пребы́л еси́, отче Павли́не, те́мже во узи́лище непра́ведно влеко́мь и заключа́емь, сердцем умиленным вопия́л еси: благослове́н Бог оте́ц на́ших.

Утверди́л еси́ но́зе твои́, терпеливоду́шне Павлине, на ка́мени за́поведей Христо́вых, сего ради не убоялся еси́, егда́ власти́телие нечести́вии ополчишася на тя, обаче глаголал еси: благослове́н Бог оте́ц на́ших.

Моли́твою, покая́нием и посто́м укрепля́емь, в темни́це, а́ки в затво́ре, пребы́л еси́ и, сию́ духовную наставницу наре́кл еси; Крест же из хле́ба себе сотвори́в, со упованием на Него взирал еси, вопия: благослове́н Бог оте́ц на́ших.

Богоро́дичен: Де́ву Пренепоро́чную, Всечестны́й Крест слеза́ми омочи́вшую, во страда́ниих твои́х за Христа призва́в, святе Павли́не, взывал еси: благослове́нна Ты жена́х, Всенепоро́чная Влады́чице.

Пе́снь 8

Ирмо́с: На престо́ле Херуви́мсте Носи́маго,/ свяще́нницы, по́йте,/ лю́дие, превозноси́те во вся ве́ки.

Любве́ твоея́, я́же ко Христу́, ни ско́рбь, ни теснота́, ни гоне́ние, ни глад, ни са́мая сме́рть, святе Павли́не, угаси́ша. Сего́ ра́ди возглаша́л еси́: свяще́нницы, по́йте Го́сподеви, лю́дие, превозноси́те Его во вся ве́ки.

Испове́данием и́стинным, отче Павли́не, украси́л еси́ престо́л святи́тельский Пе́рмския земли́, иде́же безбо́жною руко́ю убие́н бысть пламенноре́вностный святи́тель Андрони́к, небоя́зненно глаго́лавый: свяще́нницы, по́йте Го́сподеви, лю́дие, превозноси́те Его во вся ве́ки.

Вся подаде́ тебе́ Дух Святы́й, Его́же де́йствие бога́тно во свяще́нней хирото́нии прия́л еси́, отче Павли́не, те́мже гра́ду Калу́зе, я́ко ми́рный а́нгел, в лю́тая времена́ явился еси, ве́рных воздвиза́я пе́ти: превозноси́те Го́спода во вся ве́ки.

Богоро́дичен: Вели́чия Твоя́, Де́во, кто испове́сть? Кий язы́к изочте́т мно́жество щедро́т Твои́х? Оба́че, дерза́юще, во смире́нии глаго́лем: Богоро́дицу по́йте, и превозноси́те во вся ве́ки.

Пе́снь 9

Ирмо́с: Тя, Неискусобра́чную Богоро́дицу,/ в па́мяти святы́х велича́ем,/ я́ко ро́ждшую Спасе́ние душ на́ших.

Па́влу апо́столу подо́бяся, кова́рствия беззако́ннующих претерпе́л еси, свя́те Павли́не, и от Ура́льских гор даже до Бе́лыя Руси проше́л еси́, иде́же нечести́вых сове́том па́ки во у́зы заключе́н бы́сть, за е́же зва́ти тебе́: Христе́, Ты еси́ Спасе́ние душ на́ших.

Безве́стную свою кончи́ну прови́дел еси́, священномучениче Павли́не, и гроб твой неве́домь досе́ле пребы́сть. Оба́че Бо́гу пути́ твоя́ и сконча́ние ве́домы, Ему́же Единому от ю́ности твоея́ служи́л еси́, взыва́я: Христе́, Ты еси́ Спасе́ние душ на́ших.

Стра́нен быв на земли́ и в хла́дней земли́ Сиби́рстей путь сконча́в, Небе́снаго Оте́чества дости́гл еси́, блаженне Павлине, идеже ве́чную сла́ву восприим, при́сно глаго́леши: Христе́, Ты еси́ спасе́ние душ на́ших.

Богоро́дичен: Тьму́ разори́ страсте́й мои́х, Преблага́я Влады́чице, к Тебе́ бо, прибега́я, молю́ся и велича́ю, я́ко ро́ждшую Христа, спасе́ние душ на́ших.

Свети́лен:

Егда́ над оте́чеством на́шим тьма огусте́ и о́блацы безбо́жия скры́ша Со́лнце Пра́вды, ты, святи́телю Павли́не, лю́ди русския небоя́зненно сло́вом истины просвеща́л еси и, страда́ния подъем, Све́та Невечерняго достигл еси. Низпосли́ лучи́ благода́ти твоея́ и нам, во тьме страсте́й седя́щим.

Сла́ва, и ны́не, Богородичен:

Све́тлая и пресве́тлая Присноде́во Влады́чице! Осия́й нам Свет от светле́йшаго ли́ка Твоего́, да исцели́мся от неду́гов на́ших и страсте́й, и сла́вим Тя, яко всея́ тва́ри Превы́шшую.

На хвали́тех стихи́ры, глас 8.

Подо́бен: Что вас нарече́м:

Что тя нарече́м, Павли́не?/ А́нгела ли, зане́ от ю́ности избра́л еси́ чи́стое житие́?/ Христолюбца ли, я́ко крест подъя́л еси́ на ра́мена своя?/ Во́ина ли, я́ко на мир сей и диа́вола вооружился еси́?/ Страда́льца ли, я́ко кро́вь за Христа излия́л еси́?/ Мно́гая твоя́ имена́ и бо́льшая дарова́ния./ Моли́ спасти́ся душа́м на́шим.

Что тя, Павли́не, возъименуем?/ Отца́ ли преподо́бнаго, я́ко до́бре подвиза́лся еси́?/ Сокро́вище ли Ду́ха, я́ко стяжа́л еси́ Прему́дрость?/ Свети́льника ли, я́ко просвети́л еси́ лю́ди русския?/ Свиде́теля ли И́стины, я́ко пред безбо́жными Христа́ испове́дал еси́?/ Ны́не с новому́ченики Це́ркве нашея Престо́лу Бо́жию предстои́ши./ Моли́ спасти́ся душа́м на́шим.

Ка́ко тя, Павли́не, просла́вим?/ Па́стыря ли до́браго, я́ко положи́л еси́ ду́шу за о́вцы своя?/ Апостола ли, яко благоверию паству учил еси?/ Служи́теля ли Та́ин Боже́ственных, я́ко да́нный тебе́ Зало́г сохрани́л еси́?/ Испове́дника ли тве́рда, я́ко поноше́ния и изгна́ния подъя́л еси?/ Сего ради блаже́нство ве́чное восприе́млеши./ Мо́ли спасти́ся душа́м на́шим.

Ка́ко тя, Павли́не, воспоим?/ Челове́ка ли Бо́жия, зане́ я́ко стра́нник пожи́л еси́?/ Нищелю́бца ли, я́ко вдов и сирот препита́л еси́?/ Благове́стника ли, я́ко Христа́ пропове́дал еси́?/ Миротво́рца ли, я́ко па́ству братолю́бию поучал еси́?/ Ны́не на Небесе́х в ли́це сыно́в Бо́жиих ра́дуешися./ Помина́й нас, ве́рою чту́щих всечестну́ю па́мять твою́.

Сла́ва, глас 2:

Егда́ в земли́ нашей безу́мнии гони́телие,/ братоуби́йством и зло́бою ды́шуще,/ на Це́рковь Христо́ву восста́ша,/ ты, священному́чениче Павли́не,/ кро́ткими словесы́ па́ству увеща́л еси́/ Бо́га всем се́рдцем возлюби́ти/ и бли́жним любо́вию послужи́ти,/ нечести́вых же сове́тов отбега́ти/ и всяко злым не прилепля́тися./ Те́мже, во изгна́ние и узи́лища по́слан бы́в,/ страда́ния и ну́ждную сме́рть претерпе́л еси́,/ ны́не же, Престо́лу Бо́жию предстоя,/ моли́ спасти́ся душам нашим.

И ны́не, Богородичен, глас то́йже:

Все упова́ние на́ше на Тя возлага́ем,/ Де́во Богороди́тельнице,/ с новому́ченики и испове́дники Церкве Русския/ моли́, во еже спасти́ся нам.

Славосло́вие вели́кое. И отпуст.

На Литургии

Блаже́нна от кано́на, пе́сни 3-я и 6-я. Проки́мен глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евреем, зача́ло 334. Аллилу́иа, глас 2: Свяще́нницы Твои́ облеку́тся в пра́вду/ и преподо́бнии Твои́ возра́дуются. Стих: Блаже́н муж, боя́йся Го́спода, в за́поведех Его́ восхо́щет зело́. Ева́нгелие от Иоанна, зача́ло 36. Прича́стен: В па́мять ве́чную бу́дет пра́ведник:

Моли́тва

О, священному́чениче Христо́в Павли́не! Услы́ши сле́зныя моли́твы и воздыха́ния наша, в сокруше́нии се́рдца и смире́нии ду́ха тебе́ приноси́мыя. Се бо беззако́нии омрачи́хомся, и сего́ ра́ди беда́ми, я́ко ту́чами обложи́хомся. Ты же, я́ко си́льный, понеси́ не́мощи на́ша, не отлуча́йся от нас ду́хом, да не разлучи́мся и мы от любве́ Бо́жия, я́же при́сно в се́рдце твое́м живя́ше. При́зри ми́лостиво на люди, предстоя́щия и моля́щияся пред свято́ю ико́ною твое́ю, и проше́ния коего́ждо, я́же ко спасе́нию, испо́лни. Ве́руем бо, я́ко ты, за Це́рковь Христо́ву во оте́честве на́шем пострада́вый, ве́лие дерзнове́ние и́маши ко Го́споду. Умоли́ бла́гость Его́, да укрепи́т ны в единомы́слии, наипа́че же в непоколеби́мом испове́дании Христа́ Иису́са, Сы́на Бо́жия, во пло́ти прише́дшаго, распя́тие и сме́рть претерпе́вшаго, погребе́ннаго и воскре́сшаго, ко Отцу́ возшедшаго и паки гряду́щаго со сла́вою суди́ти живы́м и ме́ртвым. Мо́лим тя, свя́те: предста́тельствуй пред Бо́гом за ны и за вся правосла́вныя христиа́ны, да соблюде́т Госпо́дь землю Русскую в ми́ре и благоде́нствии, архипа́стырем и па́стырем пода́ст духо́вное трезве́ние и ре́вность о спасе́нии вруче́нныя им па́ствы, прави́телем – суд и пра́вду, и всем нам – братолю́бие и любо́вь.

О, ми́лостиве страдальче! Испроси́ у Бо́га Ми́лостиваго боля́щим исцеле́ние, скорбя́щим утеше́ние, оби́димым заступле́ние, оби́дящим ми́рное устрое́ние. Да, твое́ю по́мощию спаса́еми, восхва́лим вси Подвигополо́жника Христа́, Ему́же подоба́ет вся́кая сла́ва, честь и поклоне́ние со Безнача́льным Его́ Отце́м и Всесвяты́м, Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Источник: Текст службы утвержден на заседании Священного Синода 25 августа 2022 года (журнал № 78).

Ме́сяца октября́ в 23-й день

Священному́ченика Влади́мира, пресви́тера Моско́вскаго

На вели́цей вече́рни

На Го́споди, воззва́х: стихи́ры, глас 2.

Подо́бен: Егда́ от Дре́ва:

Егда́ Боже́ственныя ре́вности/ се́рдце твое́ испо́лни Госпо́дь,/ священному́чениче пресла́вне,/ тогда́ всем житие́м твои́м/ ева́нгельстей про́поведи послужи́ти потща́лся еси́,/ и ничто́же возмо́же тя от Христа́ отврати́ти,/ ни скорбь, ни теснота́, ни гоне́ния,// богоблаже́нне Влади́мире.

Егда́ све́том ве́ры и́стинныя/ озари́ тя Госпо́дь,/ му́чениче всече́стне,/ тогда́, вся жите́йская во уме́ты вмени́в,/ свяще́нства дар прия́л еси́/ и, в тесноте́ и гла́де пребыва́я,/ пра́вило благоче́стия ча́дом твои́м яви́,// богому́дре Влади́мире.

Егда́ любо́вь соверше́нную/ в души́ твое́й уве́де Госпо́дь,/ свяще́нниче достохва́льне,/ тогда́ к испове́данию ве́ры правосла́вныя/ и по́двигу му́ченическому тя призва́,/ и́бо и смерть не возмо́же разлучи́ти тя/ от любве́ Бо́жия, я́же о Христе́ Иису́се./ Те́мже ны́не прославля́ем тя,// богоизбра́нне Влади́мире.

Сла́ва, глас 4:

Прииди́те, ве́рнии, лик соста́вим/ и воспои́м но́ваго священному́ченика,/ всем се́рдцем Бо́га возлюби́вшаго/ и за́поведи ева́нгельския до́бре испо́лнившаго./ Что бо обря́щем в заве́те его́?/ Или́ что насле́дим от име́ния его́?/ Не мя́гки ри́зы, но броню́ пра́вды,/ меч глаго́ла Бо́жия и щит ве́ры правосла́вныя./ Сия́ вся ору́жия и нам пода́ждь,/ священному́чениче Влади́мире,/ и моли́твами твои́ми сонасле́дницы Христу́ соде́лай,// подаю́щему тобо́ю нам ве́лию ми́лость.

И ны́не, Богоро́дичен: И́же Тебе́ ра́ди Богооте́ц проро́к Дави́д:

Вход. Проки́мен дне.

И чте́ния 3 священному́ченику.

На лити́и стихи́ры, глас 4:

О сла́вный Правосла́вия побо́рниче,/ священному́чениче Влади́мире,/ с любо́вию припа́дающе к тебе́,/ прославля́ем твоя́ по́двиги и мо́лимся:/ моли́ приле́жно за нас Го́спода,// во е́же спасти́ся душа́м на́шим.

Просвети́ся житие́ твое́ доброде́тельными светлостьми́,/ и́миже, ве́рныя просвети́в,/ тьму нече́стия разгна́л еси́./ Те́мже, сын све́та благода́тию Ду́ха Свята́го быв,/ всели́лся еси́, иде́же Свет невече́рний сия́ет,/ священному́чениче Влади́мире./ Мы же, светоно́сное твое́ прославле́ние соверша́юще,// любо́вию тя почита́ем.

Сла́ва, глас 6:

Помяни́, Го́споди, и́же о Тебе́ пострада́вшаго,/ но́ваго страстоте́рпца Влади́мира,/ му́жественно Тя испове́давшаго/ и му́ки многоразли́чныя претерпе́вшаго,// и приими́ его́ моле́ния о спасе́нии на́шем.

И ны́не, глас то́йже:

О Благода́тная и Пречи́стая Де́во Мари́е,/ Хода́таице и Засту́пнице всех ве́рных,/ предста́тельством те́плаго моли́твенника,/ священному́ченика Влади́мира,// сохрани́ и защити́ зе́млю Ру́сскую.

На стихо́вне стихи́ры, глас 5.

Подо́бен: Ра́дуйся, Живоно́сный Кре́сте:

Ра́дуйся, священному́чениче Влади́мире,/ крести́телю Руси́ тезоиме́нне,/ ра́дуйся, кра́сный благове́стниче,/ и́мже мно́зи глаго́лы ве́чныя услы́шаша/ и наде́жду спасе́ния улучи́ша,/ ра́дуйся, па́стырю, житие́м и сме́ртию/ доны́не ве́ре науча́яй нас.// Моли́ спасти́ся душа́м на́шим.

Ра́дуйся, священному́чениче Влади́мире,/ ве́рою патриа́рхом дре́вним подо́бный!/ Ра́дуйся, проро́че неве́дущим Бо́га,/ ра́дуйся, Ду́ха Свята́го оби́теле!/ Ты бо в пусты́ни безбо́жия/ вся́кий во́зраст ко Христу́ приводи́л еси́/ и, я́ко друг Женихо́в,/ Тому́ страда́ньми после́довал еси́,// моли́ спасти́ся душа́м на́шим.

Ра́дуйся, священному́чениче Влади́мире,/ о́браз Христо́в нам явля́яй,/ ра́дуйся, кимва́ле доброгла́сный любве́ Боже́ственныя,/ ея́же ра́ди креще́нием Христо́вым крести́лся еси́/ и ча́шу Того́ испи́ти сподо́бился еси́./ Ра́дуйся, трапе́зы Небе́сныя о́бщниче/ и соприча́стниче новому́чеников и испове́дников земли́ на́шея,/ Престо́лу Христо́ву предстоя́щих,// моли́ спасти́ся душа́м на́шим.

Сла́ва, глас 8:

Ве́ра твоя́ вмени́ся в пра́вду, избра́нниче Бо́жий,/ и упова́ние па́че упова́ния во страда́ниях обре́л еси́,/ любо́вию Христо́вою созида́емь./ Те́мже и ны́не, у престо́ла Пресвяты́я Тро́ицы предстоя́,// моли́ спасти́ся душа́м на́шим.

И ны́не, Богоро́дичен: Безневе́стная Де́во:

Тропа́рь, глас 3:

От ю́ности Бо́га усе́рдно взыска́вый,/ и́стину в Це́ркви Правосла́вней обре́л еси́/ и, крест па́стырскаго служе́ния ре́вностно подъе́мый,/ ве́рныя во дни гоне́ний до́бре окормля́л еси́./ Те́мже и преще́ний безбо́жных не убоя́вся,/ да́же до кро́ве пострада́л еси́,/ о́тче священному́чениче Влади́мире,// моли́ Ми́лостиваго Бо́га спасти́ся душа́м на́шим.

На у́трени

По 1-м стихосло́вии седа́лен, глас 1:

Ду́хом Ева́нгелия просвети́лся еси́/ и любо́вию Боже́ственною,/ е́юже позна́ются Христо́ви ученицы́,/ ча́дом свои́м и бли́жним послужи́л еси́,/ со Христо́м взыва́я:/ а́ще кто хо́щет бы́ти пе́рвым, да бу́дет всем слуга́.

Сла́ва, и ны́не, Богоро́дичен:

Благове́стия гла́сом,/ Безневе́стная Де́во, Ма́ти Христа́ Бо́га позна́лася еси́./ Тому́ послужи́вши чи́стым житие́м Твои́м, Пресвята́я,/ от всех родо́в прославля́ешися досто́йно.

По 2-м стихосло́вии седа́лен, глас 5:

Дея́ний муже́й апо́стольских после́дователь яви́лся еси́,/ Христа́ ре́вностно пропове́дуя,/ и ду́хом на вся́цем ме́сте моля́ся,/ рука́ма свои́ма рабо́тая,/ скита́яся и беды́ терпя́,/ ны́не на Небесе́х воздая́ние пра́ведных/ прие́млеши досто́йно.

Сла́ва, и ны́не, Богоро́дичен:

Велича́ет весь мир Тя, Ма́ти Бо́жия,/ А́нгельския си́лы славосло́вят,/ проро́цы ра́достне лику́ют,/ апо́столи благогове́йне покланя́ются,/ му́ченицы и пра́ведницы воспева́ют Тя дерзнове́нно.

По полиеле́и седа́лен, глас 1:

Му́чениче свя́те Влади́мире,/ от ю́ности Христа́ возлюби́в,/ житие́м нескве́рным во́зраст ста́рости и му́дрость приобре́л еси́,/ и ча́да твоя́, зло́бою младе́нствовати науча́я,/ я́ко де́ти ко Христу́ приве́л еси́.

Сла́ва, и ны́не, Богоро́дичен:

Де́во Богоизбра́нная Отрокови́це,/ ве́дуще Тя я́ко Ма́терь Бо́жию/ и Засту́пницу ро́да на́шего,/ со умиле́нием непреста́нно взыва́ем Ти:/ Влады́чице Преми́лостивая, не оста́ви ча́да Твоя́.

Та́же, степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́.

Стих: Что возда́м Го́сподеви о всех, я́же воздаде́ ми? Вся́кое дыха́ние:

Ева́нгелие от Луки́, зача́ло 67.

По 50-м псалме́ стихи́ра, глас 6:

Ве́рою жив, пра́ведниче, был еси́,/ де́лы любве́ и милосе́рдия сию́ укрепля́я,/ священному́чениче Влади́мире,/ а́лчущим бо и кро́ва лише́нным потре́бная подава́л еси́/ и в гоне́нии непрекло́нен пребы́л еси́./ Сего́ ра́ди бесо́в полки́ победи́л еси́/ и уста́ безбо́жных загради́л еси́, я́коже не́когда Дании́л уста́ льво́в:// моли́ спасти́ся душа́м на́шим.

Кано́н Богоро́дице со ирмосо́м на 6 и священному́ченику на 8, глас 2.

Песнь 1.

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,// я́ко просла́вися.

Гряди́те, лю́дие,/ пои́м песнь Христу́ Бо́гу,/ разде́льшему неве́дения на́шего мо́ре/ и наста́вльшему ны пе́ти свята́го му́ченика Своего́ Влади́мира,/ в не́мже просла́вися.

Ре́вности Моисе́овы/ испо́лнен быв, о́тче Влади́мире,/ в пусты́ни безбо́жия ве́ру умно́жил еси́/ и дости́гл еси́ обетова́нныя земли́,/ Правосла́вныя Це́ркве.

Тя, священному́чениче Влади́мире, за́поведи Госпо́дни при́сно храня́ща,/ по́лчища супоста́т не устраши́ша,/ те́мже во огра́ду Це́ркве Правосла́вныя вшед,/ дости́гл еси́ Земли́ Обетова́нныя.

Богоро́дичен: Ковче́же святы́й и Ски́ние Боже́ственная,/ путево́ждствуй и нас ны́не в Го́рний Иерусали́м,/ при́сно от Бо́га отпа́дающия,/ да насле́дницы бу́дем Земли́ Обетова́нныя.

Песнь 3.

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́./ Возвесели́ бо ся дух мой, внегда́ пе́ти:/ несть свят, я́коже Бог наш// и несть пра́веден па́че Тебе́, Го́споди.

Ве́рою укрепля́емь, пра́ведне,/ не затвори́л еси́ уста́ твоя́, прише́дшей годи́не безбо́жия,/ но па́че разшири́л еси́ я, пропове́дуя Христ́а,/ и, я́коже Ной пра́ведный, ве́рою обличи́л еси́ нечести́выя.

Темни́цы и враче́бницы посеща́я,/ Христа́ Авраа́млим страннолю́бием прия́л еси́,/ и я́коже о́наго, изведе́ тя Госпо́дь в Зе́млю Обетова́нную, во е́же пе́ти:/ несть пра́веден па́че Тебе́, Го́споди.

Про́поведь твоя́ возсия́ во оте́честве на́шем,/ егда́ мно́зи зако́ннии Це́ркве сы́нове впадо́ша в нече́стие,/ ты же благослове́ние Иа́ковле ве́ры ра́ди насле́довал еси́,/ те́мже с новому́ченики взыва́еши:/ несть свят, па́че Тебе́, Го́споди.

Богоро́дичен: При́зри на ны, окамене́нныя се́рдцем и умо́м, Пресвята́я Де́во,/ и моли́ Сы́на Твоего́,/ да и мы ча́да Авраа́мля бу́дем/ и в ве́ре утверди́мся предста́тельством Твои́м, взыва́юще:/ несть пра́веден па́че Тебе́, Го́споди.

Седа́лен, глас 1:

Не доста́нет нам вре́мене, повеству́ющим о ве́ре твое́й,/ ю́же яви́л еси́ кроме́ Це́ркве, о́тче Влади́мире,/ но послу́шествован се́ю быв,/ дости́гл еси́ Небе́снаго Иерусали́ма,/ на Нача́льника ве́ры Иису́са взира́я,/ и кре́стным по́двигом, я́коже ле́ствицею,/ возше́л еси́ к Це́ркви напи́санных на Небесе́х,/ иде́же мо́лишися,/ да и мы с тобо́ю соверше́нство прии́мем.

Сла́ва, и ны́не, Богоро́дичен:

Не доста́нет нам вре́мене воспе́ти чудеса́ Твоя́, Влады́чице,/ не доста́нет слове́с просла́вити та́инства, бы́вшая на Тебе́,/ па́че же дерзнове́ния не и́мамы, во гресе́х су́ще/ и во осужде́ние уста́ своя́ отверза́юще,/ но Ты сия́ очи́сти, Чисте́йшая А́нгел.

Песнь 4.

Ирмо́с: Услы́шах, Го́споди, слух Твой, и убоя́хся,/ разуме́х дела́ Твоя́, и диви́хся, и возопи́х:// сла́ва си́ле Твое́й, Го́споди.

Услы́шав Го́спода, призыва́ющаго тя,/ по сло́ву Его́ вся су́щая в ми́ре оста́вив,/ на крест возше́л еси́.

Но́зе во благовествова́ние ве́ры обу́в/ и от си́лы в си́лу восходя́,/ свяще́нства благода́тию обле́клся еси́,/ та́же и му́ченическим венце́м увенча́лся еси́.

Моли́твы де́лание возлюби́вшаго,/ слу́жбы святы́я соверши́теля тя поста́ви Госпо́дь,/ Ему́же, и в темни́цу вве́ржен, при́сно воспева́л еси́:/ сла́ва си́ле Твое́й, Го́споди.

Богоро́дичен: Слух Госпо́день услы́шавшия/ и дела́ Госпо́дня уразуме́вшия укрепи́, Пресвята́я Де́во,/ и сподо́би си́лою Сы́на Твоего́/ дела́ Бо́жия твори́ти.

Песнь 5.

Ирмо́с: Све́та Пода́телю, и веко́в Тво́рче, Го́споди,/ во све́те Твои́х повеле́ний наста́ви нас,// ра́зве бо Тебе́ ино́го Бо́га не зна́ем.

Све́та испо́лнено бысть/ свяще́нное служе́ние твое́,/ те́мже во све́те за́поведей Христо́вых/ ве́рныя лю́ди ходи́ти поуча́л еси́,/ му́дрыми словесы́ вразумля́я.

Любо́вию о́трока сиро́тствующа всынови́в, свя́те,/ и духо́вная ча́да, я́коже родна́я прие́м,/ ны́не му́ченическим дерзнове́нием/ и нас духо́вныя сро́дники своя́ соде́лай.

Повеле́нием Госпо́дним усе́рдно после́дуя,/ ча́дом твои́м ми́лостивый оте́ц яви́лся еси́/ и, я́ко до́брый па́стырь, тех, любо́вию назида́я,/ Христу́ приве́л еси́.

Богоро́дичен: Угаси́ раздо́ры церко́вныя, Христе́,/ моли́твами Ма́тере Твоея́/ и наста́ви ны, не челове́ком угожда́ти, но Тебе́, Влады́ко,/ ра́зве бо Тебе́ ина́го Бо́га не зна́ем.

Песнь 6.

Ирмо́с: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю во гла́се хвале́ния,// и́стины же ду́хом пожру́ Тебе́.

Благоче́стное погребе́ние жены́ твоея́/ челове́ка не́коего к ве́ре приве́де,/ му́ченическая же смерть твоя́/ мно́гия из глубины́ ме́ртвых дел возставля́ет.

Во единонадеся́том часе́ при́зван,/ труды́ ре́вностныя и кончи́ну му́ченическую Христу́ прине́сл еси́,/ те́мже полу́ченный дина́рий пода́ждь нам, мо́лимся,/ я́коже всегда́ тре́бующим твори́л еси́.

Прови́дящи жена́ твоя́ гоне́ния, возвести́ тебе́ смерть за Христа́, священному́чениче,/ ты же, словесы́ си́ми укрепле́н,/ му́ченический вене́ц му́жественне восприя́л еси́.

Богоро́дичен: Ду́хом и и́стиною Бо́гу покланя́ющеся,/ воспева́ем Тя, Ма́ти Бо́жия,/ я́ко и́стинно Сло́во О́тчее ро́ждшую/ и моля́щуюся о спасе́нии ро́да христиа́нскаго.

Конда́к, глас 7:

Ору́жием пра́вды облече́нный,/ страда́ния за ве́ру му́жески прия́л еси́/ и, я́ко и́стинный во́ин Христо́в,/ мучи́телем противоста́л еси́, глаго́ля:/ привре́менно есть госпо́дство ва́ше./ Мы же вопие́м ти:/ ра́дуйся, священному́чениче Влади́мире,// во Ца́рствии Небе́снем венце́м нетле́нным от Бо́га увенча́нный. И́кос:

Ве́рою стра́нствия на земли́ прия́л еси́,/ Оте́чествия и́стиннаго взыску́я,/ те́мже Бог угото́ва ти Небе́сный град;/ ве́рою поноше́ние Христо́во в бога́тство вмени́в,/ еги́пет мы́сленный оста́вил еси́,/ те́мже Бог на го́ру Богови́дения тя возведе́;/ ве́рою кровь свою́ пролия́л еси́,/ на мздовоздая́ние взира́я,/ те́мже па́льмовыя ве́тви в ру́це прие́м./ Мы же ны́не вопие́м ти:/ ра́дуйся, священному́чениче Влади́мире,/ во Ца́рствии Небе́снем венце́м нетле́нным от Бо́га увенча́нный.

Песнь 7.

Ирмо́с: О́бразу злато́му на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния:/ посреде́ же огня́ вве́ржени, ороша́еми поя́ху:// благослове́н еси́, Бо́же оте́ц на́ших.

Безве́стно, я́ко а́гня незло́бивое пострада́в, священному́чениче Влади́мире,/ ны́не, в бе́лых оде́ждах на Небесе́х А́гнцу предстоя́, пое́ши:/ благослове́ние и честь и сла́ва Тебе́ во ве́ки.

Небре́гл еси́ безбо́жных веле́ния, я́ко о́троцы в Вавило́не,/ те́мже по сме́рти А́нгел вознесе́ ду́шу твою́ в Небе́сныя оби́тели,/ иде́же со ста́рцы и А́нгелы покланя́ешися Престо́лу Влады́чню.

В ро́ве земне́м скры́ти беззако́ние свое́ мня́ху уби́йцы,/ а́нгели же ду́шу твою́ к же́ртвеннику Бо́жию вознесо́ша,/ отону́дуже тщету́ мучи́телей свиде́тельствуеши, вопия́:/ благослове́н еси́, Бо́же оте́ц на́ших.

Богоро́дичен: О́бразу злато́му не покланя́ющихся/ ороси́ ми́лостию Твое́ю, Богоро́дице,/ Ни́ва бо Ты еси́ неора́нная,/ ороше́нная же Ду́хом Святы́м/ и прозя́бшая Еди́наго от Тро́ицы, Бо́га оте́ц на́ших.

Песнь 8.

Ирмо́с: В пещь о́гненную ко отроко́м евре́йским снизше́дшаго,/ и пла́мень в ро́су прело́жшаго Бо́га,/ по́йте, дела́, я́ко Го́спода,// и превозноси́те во вся ве́ки.

Власть мучи́телеву, я́ко вре́менную обличи́в,/ в темни́цу вве́ржен был еси́,/ ю́же ти Госпо́дь росо́ю Ду́ха в храм претвори́./ Ны́не же пред Престо́лом Бо́жиим слу́жиши Ему́ во ве́ки.

Доброму́др быв, егда́ разделе́ния церко́вная прилучи́шася,/ Христу́ Еди́ному ве́рно послужи́л еси́/ и ча́да своя́ в послуша́нии Тому́ сохрани́л еси́./ Те́мже Седя́щий на Престо́ле обита́ет в тебе́ во ве́ки.

Бо́жие промышле́ние безро́потно прия́л еси́/ и, скита́яся и лише́ния терпя́,/ бли́жним служе́ния не оста́вил еси́, о́тче Влади́мире./ Те́мже по сло́ву Госпо́дню ра́дости неизрече́нныя насыща́ешися.

Богоро́дичен: О́гненныя пе́щи и тьмы гее́нския изба́ви нас, Влады́чице,/ но ми́лостива к нам бу́ди,/ да Тя, я́ко Богоро́дицу и Ма́терь Све́та, в пе́снех возвели́чим.

Песнь 9.

Ирмо́с: Безнача́льна Роди́теля Сын, Бог и Госпо́дь,/ вопло́щься от Де́вы нам яви́ся,/ омраче́нная просвети́ти, собра́ти расточе́нная,// Тем Всепе́тую Богоро́дицу велича́ем.

Земны́м отце́м Свяще́нному Писа́нию науче́н,/ от Отца́ Небе́снаго печа́ть Ду́ха Свята́го прия́л еси́/ и, Сы́ну Бо́жию после́довав,/ да́ры Небе́сныя по́двигом му́ченическим оправда́л еси́.

Гоне́ния, предрече́нная ти, прия́л еси́ от безбо́жных/ и, сло́ву ева́нгельскому после́дуя,/ мно́гия ско́рби и муче́ния претерпе́л еси́,/ сего́ ра́ди ны́не лику́еши во оби́телех О́тчих.

Бо́гу ны́не предстоя́,/ просвети́ ны, грехми́ мно́гими омраче́нныя,/ воздви́гни от сна грехо́внаго/ и научи́ ны воспева́ти Тро́ицу Единосу́щную и Неразде́льную.

Богоро́дичен: И́мамы в бе́здне му́читися, омраче́ннии страстьми́,/ а́ще не Ты, Де́во, умо́лиши Сы́на Твоего́,/ да поми́лует нас,/ тем Всепе́тую Богоро́дицу, Тя велича́ем.

Свети́лен:

Днесь све́тлый о́блак свиде́телей Бо́жиих призва́вше,/ вся новому́ченики Це́ркве Ру́сския просла́вим,/ да облиста́ет нас Со́лнце Пра́вды, Христо́с Бог наш,/ моли́твами священному́ченика Влади́мира,/ и́же ку́пно с ни́ми Престо́лу Бо́жию предстои́т/ и Све́та Невече́рняго наслажда́ется.

Сла́ва, и ны́не, Богоро́дичен:

Днесь, Богома́ти,/ сия́нием Твои́х образо́в огражда́еши и осеня́еши нас./ Мы же благода́рне вопие́м Ти:/ ра́дуйся, Засту́пнице усе́рдная,/ гре́шных Спору́чнице и всех скорбя́щих Ра́досте.

На хвали́тех стихи́ры на 4, глас 1.

Подо́бен: Всехва́льнии му́ченицы:

О всехва́льне священному́чениче!/ Ты мучи́тельми в зе́млю лю́те вве́ржен был еси́,/ но А́нгели на Не́бо ду́шу твою́ прия́ша,/ отону́дуже всем лю́бящим тя,/ я́ко звезда́ пресве́тлая сия́еши,/ и па́мять твою́ днесь све́тло соверша́ющих// в Небе́сныя оби́тели путево́дствуеши.

О всехва́льне священному́чениче!/ Ты, сла́вы земны́я бе́гая,/ кра́сная ми́ра сего́ отве́ргл еси́/ и на путь скорбе́й и страда́ний/ му́жественне возше́л еси́./ Сего́ ра́ди му́ченик Госпо́день наре́клся еси́/ и, в лице́ святы́х ны́не водворя́яся,// мо́лишися о спасе́нии душ на́ших.

О всехва́льне священному́чениче!/ Тебе́ чи́стыми се́рдцем и усты́/ похвале́ние приноси́ти подоба́ет,/ ты же, не́мощь душе́вную на́шу/ и ску́дость слове́сную ве́дая,/ приими́ с любо́вию днесь пе́ние сие́/ и, Престо́лу Бо́жию предстоя́,// моли́ спасти́ся душа́м на́шим.

Сла́ва, глас 2:

Со́тника ве́ру, и во Изра́или неве́домую, показа́в,/ от лю́теровы ве́ры в Правосла́вие преше́л еси́/ и, стори́чный плод Христу́ прине́с,/ во Ца́рствии Небе́снем со Авраа́мом возле́гл еси́./ Те́мже с ним Го́спода моли́,/ да изба́вит нас тьмы кроме́шния// и спасе́т ду́ши на́ша.

И ны́не, глас то́йже:

Все упова́ние мое́ на Тя возлага́ю,/ Ма́ти Бо́жия,// сохрани́ мя под кро́вом Твои́м.

На Литурги́и

Слу́жба вся священному́ченику

Моли́тва

О священному́чениче Влади́мире, избра́нный учениче́ и после́дователю Христо́в! От ю́ности твоея́ Бо́га усе́рдно взыска́в, ве́ру и́стинную обре́л еси́ и, сло́вом ева́нгельским, я́ко свети́льником, весь путь жития́ твоего́ озари́в, в те́мную годи́ну гоне́ний крест па́стырский небоя́зненно подъя́л еси́ и, ве́рным наста́вник, окорми́тель и уте́шитель быв, смерть за ве́ру претерпе́л еси́. Те́мже моли́ся и ны́не Влады́це Христу́, правосла́вныя христиа́ны от разделе́ний соблюсти́, свяще́нники и мона́шествующия в по́двизе укрепи́ти, о́троки от па́губных и бесо́вских наве́тов сохрани́ти и вся ве́рныя в Правосла́вии утверди́ти и сию́ ве́ру святу́ю непрело́жну нам соблюсти́, да просла́вим ку́пно с тобо́ю на Небесе́х Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Источник: Текст утвержден Священным Синодом Русской Православной Церкви 21 октября 2016 года (журнал № 96)

24 октября (6 ноября)

На малой вечерни

На Господи, воззвах: стихиры на 4, глас 8:

Житие твое явися благочестно, преподобне Зосимо, / добродетельми украшено, / простотою и смирением венчаемо, / и ныне ликуеши на Небесех со Ангелы, / о всех присно моляся, // творящих память твою.

Нося в руках священное, отче Зосимо, Евангелие, / сего исполнитель был еси: / имения родителей отвергся, / и слезами и теснотою все совершил еси твое житие, преподобне; / темже утешения Божественнаго и непрестаннаго веселия // ныне наслаждаешися, преблаженне.

Путешествие изрядное и велетрудное по пустыням сибирским / приведе тя ко пристанищу утишному у града Кузнецка, / идеже себе отвергл еси / и в Божественный одеялся еси образ отбежением всех сластей, / темже во псалмех и песнех прославим тя, // пустынниче блаженне Зосимо.

Преподобне отче наш Зосимо, / воистину сна твоима очима не дал еси, / ниже плоти твоея упокоения, / Божиею силою укрепляемь, / мысль свою горе возвышая, / над страстьми воцарился еси; / темже попечение о пастве твоей приял еси / и обители святыя основал еси. / Моли Христа Бога о нас, // твою память верою и любовию благочестно совершающих.

Слава, глас 8:

Монахов множества / наставника тя почитаем, отче наш Зосимо, / твоею бо стезею воистину право ходити познахом. / Блажен еси, Христу работав, / и вражию обличил еси силу, / Ангелов собеседниче, преподобных сопричастниче и праведных, / с нимиже молися Господеви // помиловатися душам нашим.

И ныне, Богородичен, глас тойже:

Царь Небесный за человеколюбие на земли явися / и с человеки поживе, / от Девы бо Чистыя плоть приемый / и из нея прошедый с восприятием, / Един есть Сын, сугуб естеством, / но не Ипостасию. / Темже, совершенна Того Бога / и совершенна Человека воистину проповедающе, / исповедуем Христа Бога нашего: / егоже моли, Мати Безневестная, / помиловатися душам нашим.

На стиховне стихиры, глас 2.

Подобен: Доме Евфрафов:

Зосимо Богомудре, / твоя рабы приими / торжествующия любовию, / преподобне отче наш, // всесвященную память твою.

Стих: Честна пред Господем / смерть преподобных Его.

Обрет себе пристанище в сибирских дебрех, / пустынножителем древним уподобився, / в притекших к тебе возжегл еси свет Христов. / О, пречудный отче Зосимо, // моли спастися душам нашим.

Стих: Блажен муж бояйся Господа, / в заповедех Его восхощет зело.

Приими ныне пение / твоих чад, преподобне, / радостно торжествующих / в честней твоей памяти, / Зосимо богомудре, отче наш.

Слава, глас и подобен тойже:

О, Господи, / увы нам погибаем, / потопляеми грехми. / Молитвами преподобнаго Зосимы, // Избавителю, и нас спаси.

И ныне, Богородичен, глас тойже:

О, чудесе новаго, всех древних чудес! / Кто бо позна Матерь, без мужа рождшую / и на руку носящую всю тварь Содержащаго? / Божие есть изволение Рождшееся. / егоже яко Младенца, Пречистая, / Твоима рукама носившая / и матерне дерзновение к Нему имущая, / не престай молящи о чтущих Тя, / ущедрити и спасти души наша.

Тропарь, глас 8:

Любовию Христовою уязвился еси, преподобне, / вся красная мира сего отринув; / подвигом безмолвия подвизаяся, добродетели божественныя стяжал еси; / премудрости Божия причастниче, отче наш Зосимо, // моли Христа Бога и Пречистую Богородицу спастися душам нашим.

Слава, и ныне, Богородичен, глас тойже:

Иже нас ради рождейся от Девы / и распятие претерпев, Благий, / испровергий смертию смерть / и Воскресение явлей яко Бог, / не презри, яже создал еси рукою Твоею, / яви человеколюбие Твое, Милостиве, / приими рождшую тя Богородицу, молящуюся за ны, // и спаси, Спасе наш, люди отчаянныя.

На велицей вечерни

На Господи, воззвах: стихиры на 8, глас 8:

Отче преподобне Зосимо, / сердце умиленно и ум кроток от юности стяжал еси, / вперив ум к Богу и крест твой восприемь, / во обитель спасающихся устремился еси, / тело твое подвиги воздержания Духу Божию покорил еси, // моли спастися душам нашим.

Отче преподобне Зосимо, / в пустыни Рославльской старца Василиска обрет / тому всецело любовию предался еси, / и стопам преподобнаго последуя, / яко бесплотен на земли пожил еси, // темже тя верою вси ублажаем.

Отче преподобне Зосимо, / обитель пустынную Коневскую возлюбив / и тамо труды твоя со усердием и любовию полагая, / слезами теплыми душу твою очистил еси, / темже молися Господеви // помиловатися душам нашим.

Отче преподобне Зосимо, / будущия ради жизни при Томи реце вселился еси, / никакоже бояся невидимыя враги, / многажды скорби творящия тебе, / смирением же и терпением вооружился еси. // Темже тя верою вси чтим и ублажаем.

Отче преподобне Зосимо, / все житие препровождаше в безмолвии мнозе и плаче, / инок быв истинен верою, / нестяжанием украшен и воздержанием удобрен. / Яко странен и пришлец на земли был еси. // Темже Небесных благих наслаждение обрел еси досточудне.

Постнических воистину подвигов благовонный сосуде: / плоти попрал еси долу влекущее мудрование, / добродетельми же душу просветил еси / и к Божественному вперился еси желанию. / Темже прехвальне Зосимо, // Христу Богу молися // даровати душам нашим мир и велию милость.

Узким и тесным путем от земли в славу Небесную шествовав / многим подвигом и скорбем, любве ради Божия, предавался еси, / тем ныне Владычню Престолу предстоя, / наслаждаешися Того светлостей, / и нам убо, светло твою память чтущим, / молитвами твоими подаждь Божественных причастие // и вечныя радости приятие, Зосимо преподобне.

Явился еси, преподобне отче, / лествица высокая добродетели духовныя, / благодати восход, / по ней же восшед, святе, / зриши славу Божию, и святых Ангел Небесных ликостояния светлости, / и, гласов боголепных пений наслаждаяся, / с ними поеши, веселяся радостно, / Богоносе Зосимо, / Христу Богу молися // даровати душам нашим велию милость.

Слава, глас 4:

Сердце умиленно стяжав, / житию и подвигом пустынным прилепился еси. / Постом, бдением, злостраданием и еже на земли леганием / чистоту имея душевную и телесную, и память смертную, / был еси чадо Христово смиренно и разумно // в духовном житии твоем. / Преподобне отче наш Зосимо, // моли спастися душам нашим.

И ныне, Богородичен, глас тойже:

Иже Тебе ради богоотец пророк Давид, / песненно о Тебе провозгласи, / величая Тебе Сотворшему: / предста Царица одесную Тебе. / Тя бо Матерь, Ходатаицу Живота показа, / без отца из Тебе вочеловечитися благоволивый Бог, / да Свой паки обновит образ, истлевший страстьми, / и, заблуждшее горохищное обрет овча, / на рамо восприим, ко Отцу принесет и Своему хотению, / с Небесными совокупит Силами, / и спасет, Богородице, мир // Христос, имеяй велию и богатую милость.

Вход. Прокимен дне. И чтения.

Премудрости Соломоновы чтение (главы 5 и 6):

Праведницы во веки живут, и в Господе мзда их, и попечение их у Вышняго. Сего ради приимут Царствие благолепия и венец доброты от руки Господни, зане десницею покрыет я и мышцею защитит их. Приимет всеоружие рвение свое и вооружит тварь в месть врагом. Облечется в броня правды и возложит шлем – суд нелицемерен. Приимет щит непобедимый – преподобие, поострит же напрасный гнев во оружие, споборет же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И от каменометныя ярости исполнь падут грады. Вознегодует на них вода морская, реки же потопят я нагло. Сопротив станет им дух силы, и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащий множества и гордящийся о народех язык. Яко дана есть от Господа держава вам и сила от Вышняго.

Премудрости Соломоновы чтение (глава 3):

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их, и еже от нас шествие – сокрушение, они же суть в мире. Ибо, пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию, потекут. Судят языком и обладают людьми, и воцарится Господь в них во веки. Надеющийся Нань разумеют истину и вернии в любви пребудут Ему, яко благодать и милость в преподобных Его и посещение во избранных Его.

Премудрости Соломоновы чтение (глава 4):

Праведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости – житие нескверное. Благоугоден Богови быв, возлюблен бысть, и живый посреде грешник преставлен бысть. Восхищен бысть, да не злоба изменит разума его или лесть прельстит душу его. Рачение бо злобы помрачает добрая и парение похоти пременяет ум незлобив. Скончався вмале, исполни лета долга, угодна бо бе Господеви душа его, сего ради потщася от среды лукавствия. Людие же видевше и не разумевше, ниже положше в помышлении таковое, яко благодать и милость в преподобных Его и посещение во избранных Его.

На литии стихиры, глас 3:

О, велия славы жития твоего, отче наш Зосимо: / вся бо земная оставив, единаго Христа возлюбил еси / и, Тому служа чистою совестию, / на земли ангельски пожил еси. / Бесовская же коварства разорив, / возшел еси на высоту добродетелей. / Блажен еси, тако Христу работав, / темже и мы, в зерцале жития твоего путь к Животу зряще, // тя непрестанно ублажаем.

Глас 8:

Явился еси раб Богу угоден в шествии твоем духовном, / во смирении многом и послушании. / Сего ради устрои Господь душу твою смиренномудрую // во стезях Его.

Глас 6:

Молися прилежно за ны, преподобне отче Зосимо, / избавление подати от всех бед, находящих на ны. / Ускори, святе, на помощь нашу / и, ныне в Вышних Богови предстоя, // поминай чтущих память твою.

Слава, глас 8:

Приидите, стецытеся, иночестии собори боголюбивии, / к божественной памяти отца нашего Зосимы. / Поучився во дни и в нощи в заповедех Господних, / сподобился еси обрести лествицу Небесную, / по нейже возшед, достиже горняго Иерусалима / и, от болезней и трудов достойну почесть приемля, / со Ангельскими лики ныне радуется, / и божественнаго зрения наслаждается Единосущныя Троицы. / Темже и нас поминай, отче Зосимо, // предстоя у Престола всех Царя Христа и Бога нашего.

И ныне, Богородичен:

Владычице, приими / молитвы раб Твоих / и избави нас // от всякия нужды и печали.

На стиховне стихиры, глас 2:

От юности святоотеческому житию поревновав во всем, / преподобне отче Зосимо, / оставил еси вся, яже в мире, житейская мудрования, // моли о нас Человеколюбца Господа.

Стих: Честна пред Господем / смерть преподобных Его.

Отчий пример пред собою имея, / в добродетелех иноческих путь свой устроял еси, / яко злато в горниле искушено явивыйся, // приятелище Духа Пресвятаго был еси.

Стих: Блажен муж бояйся Господа, / в заповедех Его восхощет зело.

Послушание совершая, / на остров Коневец пришел еси, / слезами путь свой омочив. / И тамо во обители от наставник добре поучаяся, / монашества обеты Богу дал еси, / всякия добродетели исправляя, // тем же тя вси почитаем.

Слава, глас 8:

Инокинь множества / наставника тя почитаем, отче наш Зосимо, / Ангелов собеседниче и преподобных сопричастниче, / с ними же молися Господеви // помиловатися душам нашим.

И ныне, Богородичен, глас тойже:

Безневестная Дево, / яже Бога неизреченно заченши плотию, / Мати Бога Вышняго, / Твоих рабов мольбы приими, Всенепорочная, / всем подающи очищение прегрешений, / ныне наша моления приемлющи, // моли спастися всем нам.

На благословение хлебов тропарь преподобному дважды, и Богородице Дево: единожды.

Тропарь, глас 8:

Любовию Христовою уязвился еси, преподобне, / вся красная мира сего отринув; / подвигом безмолвия подвизаяся, добродетели божественныя стяжал еси; / премудрости Божия причастниче, отче наш Зосимо, // моли Христа Бога и Пречистую Богородицу спастися душам нашим.

На утрени

На Бог Господь: тропарь преподобнаго дважды.

Слава, и ныне: Богородичен: Иже нас ради:

По 1-й кафизме седален, глас 4:

Послушание учителю своему воздавая, / к Богу приблизился еси. / Ни зной, ниже мраз, ниже страхования демонская, / ничтоже возможе уклонити тя, преподобне, от Любве Божия. / Темже о всех нас Христа Бога моли, / в песнех, преподобне Зосимо, // твою память почитающих.

Слава, и ныне, Богородичен, глас тойже:

Дево Всенепорочная, / яже Пресущнаго Бога рождшая, / со преподобным Зосимою Того непрестанно моли, / оставление прегрешений и исправление жития дати нам, // прежде конца верою и любовию поющим Тя по долгу, Едина Всепетая.

По 2-й кафизме седален, глас 8:

От младенчества яко светильник воссиял еси, преподобне Зосимо. / Воздержанием плотския страсти умертвив, / на высоту Богоразумия восшел еси. / Сего ради вопием ти: // моли о чтущих память твою.

Слава, и ныне, Богородичен, глас тойже:

Се Тебе роди родов славят, / якоже прорекла еси Отроковице: / Создателя бо всех была еси Палата и Божественный Храм, / в Немже вселися Вышний, // и плотию обложися, да спасет нас.

Величание:

Ублажаем Тя, / преподобне отче наш, Зосимо, / и чтим святую память твою, / наставниче монахов / и собеседниче ангелов.

Псалом избранный: Терпя потерпех Господа:

По полиелеи седален, глас 8:

Премудрости Божественней измлада навык, / вся в мире суетная возненавидев, преподобне Зосимо, / Христа же единаго возлюбил еси. / Духовному же отцу всеконечне в послушание вдався, / многих добродетелей сокровищем от того обогатился еси. / С ним же молися Господеви, Зосимо преподобне, / грехов прощение даровати // чтущим любовию святую память твою.

Слава, и ныне, Богородичен, глас тойже:

Яко Всенепорочная Невесто Творца, / яко Неискусомужная Мати Избавителя, / Приятелище яко сущи Утешителя, Всепетая, / беззаконию мя суща скверное обиталище / и демоном игралище в разуме бывша, / потщися от тех злодействия мя избавити / и светло жилище добродетелей соверши, Светоносная, Нетленная, / отжени облак страстей и Вышняго причастия сподоби / и Света невечерняго молитвами Твоими.

Степенна, 1-й антифон 4-го гласа. Прокимен, глас 4: Честна пред Господем смерть преподобных Его. Стих: Что воздам Господеви о всех, яже воздаде ми? Евангелие от Матфея, зачало 43.

По 50-м псалме стихира, глас 6:

Егда прииде с Коневца преподобный Зосима / с сотаинником Василиском в пустыню Сибирскую, / тогда на Твою помощь, Богородице, упование свое возложи. / Егда же прииде в землю Московскую, / тамо обитель во имя Живоначальныя Троицы и иконы Твоея Одигитрии возгради, / сию подвигами дев Христовых прославив. / Мы же, его любви к Тебе подражающе, / Тя немолчными пении ублажаем / и, чудотворному образу Твоему поклоняющеся, зовем: / О, Пресвятая, // прииди и сохрани достояние Твое от всякаго зла.

Канон Богородице на 6; и преподобному Зосиме, на 8.

Канон преподобному Зосиме, глас 4.

Песнь 1.

Ирмос: Тристаты крепким, / Рождейся от Девы, / безстрастия во глубине / души тричастное потопи, молюся, / да Тебе, яко в тимпане, / во умершвлении телесе // победное воспою пение.

Слове Божий, молю Ти ся: / даждь ми слово и отверзи ми устне, недостойному рабу, / да восхвалю угодника Твоего, преподобнаго отца Зосиму, // яко в Тебе и Тобою прославися.

Отче преподобне Зосимо, / приими от нас недостойных песнь сию, юже воспоим с любовию, / и моли за ны, грешныя рабы твоя, / от усердия дерзнувших восхвалити житие твое, // тя бо Христос прослави.

Днесь сошедшеся в пречестный храм сей / восхвалим Божия угодника память, // яко славно о Имени Христа Господа своего прославися.

Приими, преблаженне, отче досточудный Зосимо, / пение сие похвальное / и твое отеческое покажи о нас милование. / Превыше бо сил наших по достоинству похвалити тя, // но елико мощно, от усердия дерзаем.

Инок множества / наставника тя чтим, отче наш Зосимо, / тобою бо путь сущий правый шествовати познахом, / блажен еси, Христови работав, / и вражию обличил еси силу, / Ангелов собеседниче и преподобным сопричастниче и праведным, / с нимиже молися Господеви // помиловатися душам нашим.

Богородичен: Аще много может молитва праведнаго поспешествуема, / Ты, святейши сущи всея твари, яко Мати Богу, несравненно большая можеши. / Призри на ны с преподобным Зосимою // и испроси нам вся благая от Бога.

Катавасия: Отверзу уста моя:

Песнь 3.

Ирмос: С высоты снизшел еси волею на землю / превышше всякого начала / и смиренное вознесл еси / из ада преисподняго / естество человеческое, // несть бо свят, паче Тебе, Человеколюбче.

Стягнув тело твое воздержанием и чистотою, / уединение в дебрех Коневских обретая, / душу к Богу возводити тщался еси, преподобне, / и в Вышняя селения, отче Зосимо, достигл еси. / Ныне же на Небесех со Ангелы ликуя, / о нас Христу Богу молися // даровати нам велию милость.

Послушание старцу твоему являя, / от силы в силу восходил еси, / заповеди и учения наставника преподобнаго Василиска восприемля, Зосимо преподобне. / Ныне же с ним предстоя у Престола Вседержителя, / о нас Христу Богу молися // даровати нам велию милость.

Вся заповеданная тебе исполняя, / путем спасительным шествовал еси, отче наш Зосимо, / всегда любовь велию ко старцу своему сохраняя, / жизнь иноческую совершал еси, / удручая тело свое постом, и бдением и труды, // в молитвах же ум свой возводил еси к Небесному Царствию.

Двоицу отец, Зосиму и Василиска, приводим Тебе в молитву Христе Боже, / ихже моление приемь и от вражия нас коварства сохраняя, // Духом Твоим Святым настави нас во веки Тя величати.

Радуйся, преподобне Зосимо, / радость бо Небесную вечную / от Бога приял еси за труды твоя, / молися с Богородицею // о мире и людех согрешающих.

Богородичен: Крепость и силу обретающе в помощи Богоматере, / преподобнии отцы Зосима и Василиск путь свой совершаху. / Ты же Мати Божия Всемилостивая кров крепок во испытаниих уготовала еси // преподобным рабом Твоим.

Седален, глас 8:

От юности, блаженне, вся оставль житейская, красная же и лепотная, / усердно последовал еси Христу, призвавшему тя, преподобне, / духовному наставнику покорився. / Темже тя Господь добре устрояет пастыря Своим овцам словесным, отче Зосимо. / Моли Христа Бога грехов оставление подати // чтущим любовию святую память твою.

Слава, и ныне, Богородичен:

Просвети, Чистая, сетующая сердца наша, / присно преступленьми и житейскими многими молвами оскверняемая, / и не остави нас погибающих, // яко да прославим и любовию воспоим Тя, Всепетая.

Песнь 4.

Ирмос: Услышах слух Твой и убояхся, / разумех дела Твоя // и ужасохся, Господи.

Шествие в страну сибирскую с трудом велиим совершили есте, / о, многотруднии старцы Зосимо и Василисче, / послушание воле Божией исполняюще. / Множество страданий претерпевше / и жизни сохранение милостию Божиею улучивше, // бысте чада Богу возлюбленная.

О, двоице присноблаженная, преподобнии Зосимо и Василисче, / яко едино блаженство имущий от Бога, / теплым предстательством вашим // от всех лютых спасайте призывающих вас.

Уединение в дебрех сибирских обретая, / вся содеянная с плачем духовному отцу исповедая, / раб верный Богу и монах явился еси, отче Зосимо, / труды и подвиги твоими всех удивляя // и ко спасению наставляя.

Потщався тленными нетленная стяжати, преподобне Зосимо, / Христа единаго приобрел еси. / Душу к Богу возводити тщася, / радости вечныя сподобился еси. / Христа моли спастися всем, // любовию священную память твою почитающим.

Иже Свет миру, Христе, / святыя Твоя просветивый солнца светлейше, / молитвами преподобнаго Зосимы и наши сердца освети // светом благодати Твоея.

Богородичен: Мати Божия Благословенная, / помощь и руководство рабом Твоим. / Окормление душам тихим, / Богу присвоенным и в подвизе иночестем житие провождающим, // даровала еси, Пренепорочная.

Песнь 5.

Ирмос: Ныне востану, пророчески рече Бог, / ныне прославлюся, ныне вознесуся, / падшаго прием от Девы // и к свету умному возносяй Моего Божества.

Вещь дивная явися преподобному Василиску молитва Иисусова, / о нейже послушнику своему Зосиме поведал есть. / Тогда позна преподобный Зосима тайный подвиг старца своего, // молитвы Иисусовой делание.

Даде Господь помощь Свою Зосиме преподобному, / еже уразумети силу молитвы старца своего, / и записал преподобный Зосима откровения путей и степеней / славнаго дара, старцу Василиску дарованнаго, // на утешение и осмысление всем дерзающим рабом Господним.

Ни лютость врагов духовных, ниже скудость пустыни / расслабиша терпения вашего, преподобнии Зосимо и Василисче. Многия дни и часы в молитве Иисусовой подвизающеся, / яко адаманты тверды, пребыли есте, // ревностию Божественною распаляеми.

Уведано бысть православными житие старцев духовное, / и спасающиися под кров сих прибегаху, / подражающе им в молитвах, пощениих и бдениих, // ко Христу Человеколюбцу.

Собрал еси, отче Зосимо, в души твоей Божественныя плоды Духа: / непрестанну молитву, чистоту душевную же и телесную / и бдение твердо, смирение нелицемерно, // имиже храм показался еси Бога Вседержителя.

Богородичен: Богородице Пречистая, / Твоего Сына и Бога видети желая, / Зосима, угодник Твой, / Сего живоносным и Божественным стопам // невозвратно последова.

Песнь 6.

Ирмос: Приидох во глубины морския, / и потопила мя есть буря многих грехов, / но яко Бог из глубины возведи живот мой, // Многомилостиве.

Житейскаго, блаженне Зосимо, убежав волнения, / в тишину дошед Божия покоя, / молися подати и нам // о Христе того наслаждения.

Душу очистив, преподобне, страстей омрачения / сугубым постом и молитвою непрестанною, / зерцало, отче, был еси Божественного Духа, // светильниче монахов, Зосимо Богоносе.

Ты убо, преподобне отче, хотел еси утаитися от человек и един Единому Богу безмолвствовати. / Он же не остави тебе неведома быти, / но всем, требующим спасения, / яве показа тя, житие твое добродетельное, // на пользу хотящим стопам твоим последовати.

Святыя Троицы дом, Зосимо, показался еси, / Еяже силою священныя создал еси обители, преподобне, / на устроение спасительное монашествующих, / чествующих память твою святую, // приснопамятне.

Земная и мимотекущая, яко уметы, вменив, / Христа единаго вожделел еси, / к Нему же союзом любве приблизив душу свою, // Того обрести потщался еси ненасыщаемыя доброты.

Богородичен: Мати Божия Пречистая, / присных рабов Твоих скорби утоляеши и наставляеши // воли Божией следовати.

Кондак преподобнаго, глас 6:

Избранниче Божий и старче премудрый, / наставниче наш Зосимо, / от юности постническою стезею шедый, / во одежду кротости и терпения облеклся еси; / тем же дар Святаго Духа улучив, / многия души Христу уневестил еси, / и обители святыя утвердил еси. / Ныне же в сонме преподобных на небесех ликуеши, // моляся непрестанно о чтущих святую память твою.

Икос:

Услышав Христов Евангельский глас, / оставив плотская мудрования, / богатство и славу мира сего, яко прах, вменив, / последовал еси наставнику своему / и от того всякия добродетели навык, / и бысть ему ученик добрым послушанием, / Бесплотных ликостоянию сочетався. / Подаждь разум и мне, недостойному рабу своему. / Дерзаю на твое милосердие и вопию сице: / радуйся, преподобных всех похвало; / радуйся, постников подражателю и пустыни устроителю; / радуйся, яко в ней тобою Бог славится; / радуйся, добре пасый стадо твое; / радуйся, яко смирил еси злоначальнаго врага; / радуйся, яко посрамил еси бесов полки; / радуйся, монашествующих светильниче пресветлый и столпе терпения; / радуйся, яко собрал еси инокинь множество во спасение; / радуйся, яко тобою хвалимся вси; / радуйся, яко тебе ради избавляемся от бед; // радуйся, отче Зосимо преподобне.

Песнь 7.

Ирмос: Юноши три в Вавилоне, / веление мучителево на буйство преложше, / посреде пламене вопияху: / благословен еси, Господи, // Боже отец наших.

Истиннаго и кроткаго Пастыреначальника Христа / незлобивое овча, отче Зосимо, был еси, / смирением и терпением победив бесы лукавыя. / Темже хотящим тебе озлобити кроток явился еси, / Христу вопия: // Благословен Бог отец наших.

Глаголы разумев гонителей злочестивых, / Христа Бога силою / мучители немощны сотворил еси. / Тако и страсти побеждая, / пребыл еси, поя: // Благословен Бог отец наших.

Многи скорби душевныя и гонения прияв, отче Зосимо, / сибирскую землю покинул еси, / и во град Москву со ученицами верными устремился еси, присно молитву творя: // Благословен Бог отец наших.

Лукавых духов тьму разгнал еси / и, собрав монашествующих множества, / пастырь их был еси и светильник светлейший, преподобне Зосимо. / И ныне поем с тобою: // Благословен Бог отец наших.

Поношение врагов, велеречие ненавидящих, / озлобление же и клятва их и сим подобная злая воздвигахуся на тя. / Но от всех сих избави тя Господь, / яко непорочен был еси в пути, ходив в законе Его. / Тем, ублажив тя, Праведный Судия // о нас молитвенника содела, преподобне Зосимо.

Богородичен: Милостива ми Судию, Сына Твоего, / Богородице Дево, Твоими молитвами быти в день Суда, / Мати, умоли: // на Тя бо едину надежду мою возлагаю.

Песнь 8.

Ирмос: Избавителю всех, Всесильне, / посреде пламене благочествовавшия, / снизшед, оросил еси / и научил еси пети: // вся дела благословите, пойте Господа.

Всем сердцем, Зосимо, Троице усердно служив / и, от Нея луча благодать приемь, / световиден соделался еси. Ныне же со Ангелы ликуеши, // поя и превознося Христа во вся веки.

Храм Троице Пребожественней душу и тело совершив, / Божественныя создал еси обители, достославный Зосимо, / в нихже лики девствствующих и монашествующих чины собрал еси, // поющия согласно и превозносящия Христа во вся веки.

Заступник и покровитель граду Москве, / Святитель Божий Филарет, / молитву и милосердия бездну простре и на твоих сирот, / преблаженне Зосимо, // поющих и превозносящих Христа во вся веки.

Вся потребная к строению обители будущия уготовляя, / келлии соградив и кладезь ископав, начало монастырю положил еси. / Вся яже к монашескому житию полезная написуя, / укрепил еси учениц твоих, // превозносящих Христа во веки.

В пристанище тихое вшед, богомудре Зосимо, / житейских плаваний отбегл еси. / Темже волнуемым в бури страшней // спасительное окормление был еси.

Богородичен: Богородительнице Пречистая, рабов Твоих сирых прияла еси, / кров новый тем в пределех Московских указующи, / покров и утверждение обители Твоея, Одигитрие, устрояющи, // к жизни вечной монашествующих путеводствуеши.

Песнь 9.

Ирмос: Ева убо недугом преслушания / клятву вселила есть; / Ты же, Дево Богородице, / прозябением чревоношения мирови Благословение процвела еси. // Тем Тя вси величаем.

Священно и красно жилище для сирых девиц и вдовиц / создал еси, преподобне отче Зосимо, / наставляя их послушанию и смирению; / темже к ревности ангельскаго жития подвигл еси // множество иночествующих.

Вперяяся умом вослед Господу, / чин схимы великия от пустынных отцев приял еси, богоблаженне отче. / Аще и зашел еси от нас во гроб, / уснув сном смерти, / обаче в воскрешение праведных просветишися, яко солнце, // в Царствии Отца Небеснаго.

Аще земное отечество, преподобне Зосимо, оставил еси, / но в Отечество Небесное возшед, / во обители Одигитрии множество монашествующих собрал еси. // Темже со дерзновением, отче, молися Христу Богу за ны, рабы твоя.

Днесь воссия нам честная память твоя, / преблаженне отче наш Зосимо. / И красуется обитель, в нейже подвиги своя и труды скончал еси, // и победы венцы восприял еси.

Преподобне отче наш Зосимо, / потщися нас, чад своих, чисты представити Господеви, / егоже со Пресвятою Богородицею вкупе и со всеми святыми прилежно моли, всеблаженне, / православному народу нашему подати здравие и всем верным спасение, // очищение грехов и велию милость.

Богородичен: Воистину сей есть святый день, / в оньже собра нас Мати Божия / прославити подвиги преподобнаго отца Зосимы, зде просиявшаго, // егоже память пребывает во веки.

Светилен преподобнаго Зосимы:

Мирское пристрастие оставль и богатство мимотекущее, / душу Христу предав, Зосимо преблаженне, / учитель многих душ явился еси / и, к Богу отходя, // путь жития и спасения сим указал еси.

Слава и ныне, Богородичен:

Тя песньми немолчными ублажаем, Дево, / яко от Троицы Единаго родила еси, Богородице, / и носиши на Божественную руку Пребогатое Слово / непременно и неизменно.

На хвалитех стихиры преподобнаго, глас 2:

Все упование ко Господу возложь, / всем сердечным желанием горя к Богу, преподобне Зосимо, / яко звезда светлая на востоце, / всем возсиял еси, святе. / Возрадуйтеся и возвеселитеся, монахов сонми, / торжествующе в памяти его. / Ты же, преподобне, Христу Богу // со дерзновением молися о душах наших.

Дарова тебе, отче Зосимо, / Господь наставника духовнаго, / и от того премирному житию научаемь, / жизнь Богови посвятити возжелал еси. / Сего ради стезею безмолвническою в Небесное Царство шествовав, / Господа Спаса славословил еси; // Емуже со дерзновением молися о душах наших.

Смирен, кроток и молчалив быв отче Зосимо, / чист сердцем показался еси, / храм Божий явился еси по достоянию, / яже от Него прибывшая тебе дарования // милостиво подавая нам.

На Небесех ныне со Ангелы водворяяся / во свете Присносущныя Троицы, / отче Зосимо, / о нас молися Человеколюбцу Богу, // сохранитися нам от сети лукаваго.

Слава, глас тойже:

Чистый сосуд Святаго Духа показался еси, / озаряемь Божественною светлостию, / и ныне на Небесех Христа зриши лицем к лицу, / моли Его, отче Зосимо, // о совершающих память твою верно.

И ныне, Богородичен, глас тойже:

Все упование мое / на Тя возлагаю, Мати Божия, // сохрани мя под кровом Твоим.

Славословие великое и отпуст.

На Литургии

Блаженны от канона песни 3-я и 6-я.

Прокимен, глас 7: Честна пред Господем / смерть преподобных Его. Стих: Что воздам Господеви о всех, яже воздаде ми.

Апостол к Галатам, зачало 213.

Аллилуия, глас 6: Блажен муж, бояйся Господа, / в заповедех Его восхощет зело. Стих: Сильно на земли будет семя его.

Евангелие от Луки, зачало 24.

Причастен: В память вечную будет праведник, от слуха зла не убоится.

Молитва

О, святый угодниче Христов, преподобне отче наш Зосимо!

Кто изглаголет подвиги твоя: безмолвие, бдение, молитву непрестанную, скорбей терпение, слезы покаяния и всех прощение, воли Божией всецелое предание?

Ты от юности жизнь свою Христу посвятил еси. Имение раздав, во обитель пустынную вселился еси. Многим девам, Богу уневестившимся, паче отца ты был еси, духовно их окормляя и ко спасению наставляя.

И ныне молим тя мы недостойнии: буди нам помощник и заступник, обители же нашей утверждение и покров; научи нас волю Божию творити, обиды прощати, скорби и болезни благодушно терпети.

Да сподобимся и мы молитвами твоими в мире, любви и покаянии путь наш тесный совершити и Царствия Небеснаго достигнути, идеже ты со всеми святыми славиши непрестанно Бога во Святей Троице славимаго, Отца и Сына и Святаго Духа. Аминь.

Источник: Служба одобрена московской епархиальной Богослужебной комиссией

Месяца октября в 3-й день

Святителя Агафангела, исповедника, митрополита Ярославскаго

На велицей вечерни

На Господи, воззвах: стихиры, глас 8.

Подобен: О, преславнаго чудесе:

Святителю Христов Агафангеле,/ исповедниче твердый Церкве Русския,/ ты, от утробы матере Богом избран быв,/ в день Воздвижения Креста Господня родился еси/ и, крест свой мужественне взем,/ усердно Христу последовал еси,/ души же своея отвергнувся,/ тесным житием и многими подвиги/ соблюл еси ю в живот вечный.

Богомудре отче Агафангеле,/ ты, яко звезда пресветлая,/ от востока даже до запада/ землю Русскую озарил еси,/ молитвами бо слезными и смирением,/ слова Божия проповеданием/ многия люди ко Христу привел еси/ и отец чадолюбивый им явился еси./ Темже и велий в Царствии Небеснем нареклся еси.

Святителю отче Агафангеле,/ благовестниче неустрашимый,/ ты, мужество и мудрость сочетая,/ на всяк день душу свою за овцы полагал еси/ и, яко добрый воин Христов,/ изгнания и темничная заточения,/ поношения и болезни лютыя/ мужественне претерпел еси/ и венца Небеснаго сподобился еси.

Святителю отче Агафангеле,/ ты, яко злато в горниле, огнем искусився страдания,/ со дерзновением отверзл еси уста,/ во еже обличити отступники/ предания церковная попирающия/ и нововведения льстивая вводящия,/ темже небо благодарственно прият тя,/ идеже ныне древа жизни наслаждаешися/ и прославляеши Христа, Бога нашего.

Слава, глас тойже:

Егда Церковь Русская/ богоборческими гонении люте обуревашеся,/ тогда святитель Агафангел страж неусыпный тоя явися,/ по вся дни произволением за Христа умирая,/ темже, жизнь вечную наследовав,/ ныне в сонме новомученик Российских на Небеси ликует,/ прославляя Отца и Сына и Святаго Духа,/ Троицу Единосущную и Нераздельную.

И ныне, Богородичен: Царь Небесный:

Вход. Прокимен дне. И чтения 3 исповедническая:

1. Похваляему праведнику: (главы 4, 6, 7 и 2)

2. Праведницы во веки живут: (главы 5 и 6)

3. Праведник, аще постигнет скончатися: (глава 4)

На литии стихира храма и святаго стихиры, глас 1:

Преподобен и незлобив,/ домоправитель верный и мудрый,/ пастырь добрый, душу свою за овцы Христовы полагаяй,/ исповедник твердый и истинный хранитель церковных преданий/ явился еси, святителю Агафангеле,/ себе самаго во образ верным чадом Церкве Русския подавая.

Супружницы и сына во единочасие лишився,/ Божие посещение уразумел еси,/ святителю Христов Агафангеле,/ и, призвание на путь иноческий,/ такожде и дар слова от Господа восприем,/ проповеданием и учением сторицею той преумножил еси/ и, светильник целомудрия елеем милости исполнив,/ с мудрыми девами в Чертог Небесный вшел еси.

Слава, глас 6.

Подобен: Все отложше:

Стойте и держите предания церковная,/ неленостно поучал еси паству,/ святителю отче Агафангеле,/ егда же в место обители Спасовы/ безбожными заключен был еси,/ тогда вернии людие на дворе церковнем собирахуся,/ да поне издалеча видением лика твоего утешатся./ Темже и ныне предстани в помощь нам,/ празднующим любовию святую память твою.

И ныне, Богородичен, глас и подобен тойже:

Величаем Тя вси, Пренепорочную/ Матерь Бога нашего,/ Юже освяти Дух Пресвятый./ Ты бо еси, Богородице,/ Оружие наше и Стена,/ и Святей Руси Заступница,/ к Тебе ныне прибегаем,/ Тя на молитву призываем,/ да избавиши нас/ от врагов наших.

На стиховне стихиры, глас 2:

Приидите, празднолюбцы,/ воспоим святителя Агафангела достоблаженнаго,/ учителей печать и страдальцев единонравна,/ Христа ради вся во уметы вменившаго,/ велелепием исповедания Церковь Русскую украсившаго,/ ныне же в Царствии Небеснем Бога воспевающаго.

Стих: Ты иерей во век/ по чину Мелхиседекову.

Приидите, архиереи и священницы,/ святителя Господня песньми почтим,/ той бо, подвиг страдания и исповедничества подъем/ и последи благочестно пожив,/ жертву безкровную благоговейне приношаше,/ паству свою Хлебом Жизни питая/ и Христа Бога усердно умоляя,/ да простится грех богоборчества народа нашего.

Стих: Исповемся Тебе, Господи,/ всем сердцем моим.

Приидите, любострадальцы,/ прославим Агафангела освященнаго,/ той бо, яко раб благий и верный,/ данный ему талант благочестия/ исповеданием Христа преумножи,/ темже в радость Господа вниде/ и, велие дерзновение от Него восприем,/ молится о земли нашей/ и о верою чтущих память его.

Слава, глас 6:

Возлюбил еси Бога паче живота/ и ближняго своего, яко себе,/ во главу угла благо Церкве Святыя поставляя/ и предания святых отец неизменно хранити повелевая,/ сквозе огнь и воду страданий по Христе прошел еси/ и ныне вечнаго покоя наслаждаешися,/ святителю Агафангеле, отче наш.

И ныне, Богородичен: Творец и Избавитель мой, Пречистая:

На благословении хлебов тропарь, глас 2:

По вся дни Бога ради умервщляемь,/ святителю и исповедниче Христов Агафангеле,/ во время безбожных гонений лютых/ попечение о Церкви Русской от святителя Тихона приял еси/ и, наветы диавольския разорив,/ корабль церковный мудре/ силою возлюбившаго тя Господа управил еси./ егоже моли даровати нам мир и велию милость.

На утрени

На Бог Господь: тропарь святителя дважды. Слава, и ныне, Богородичен.

По 1-м стихословии седален, глас 7:

Во плоти ходяй, не по плоти воинствовал еси, святителю Христов Агафангеле, и благодатию Божиею вся до конца претерпел еси, покры бо тя в тайне Лица Своего Господь, егоже моли помиловати нас в День Судный.

Слава, и ныне, Богородичен:

Ты Предстательница теплая и Заступница христиан еси, Богородице Дево, Всепетая Владычице, темже со всеми святыми земли Русския, моли Сына Твоего и Бога в День Судный обрести нам велию милость.

По 2-м стихословии седален, глас 2:

Во дни брани и нестроений народных, святителю отче Агафангеле, ты именем Христовым воины русския увещал еси, еже Отечеству верно служити, веру Православную незыблему хранити и живот свой за други своя полагати, да в житии сем плод вечный обрящут.

Слава, и ныне, Богородичен:

Воистину Богородицу Тя исповедуем, Владычице, Ты бо Бога неизреченно родила еси, Крестом смерть разоршаго и к Себе святых соборы привлекшаго, с нимиже моли спасти землю Русскую, яко та есть удел Твой.

Величание:

Величаем тя,/ священноисповедниче Агафангеле,/ и чтим святую память твою,/ ты бо молиши за нас/ Христа, Бога нашего.

Псалом избранный:

1. Священницы Твои облекутся правдою, и преподобнии Твои возрадуются.

2. Повем имя Твое братии моей, посреде Церкве воспою Тя.

1. Приидите, чада, послушайте мене, страху Господню научу вас.

2. Возненавидех церковь лукавнующих, и с нечестивыми не сяду.

1. Яко ревность дому Твоего снеде мя, и поношения поносящих Тя нападоша на мя.

2. За словеса устен Твоих аз сохраних пути жестоки.

1. Искусил мя еси, и не обретеся во мне неправда.

2. Правдою Твоею избави мя и изми мя.

1. Погна враг душу мою, посадил мя есть в темных.

2. Изведи из темницы душу мою, исповедатися имени Твоему.

1. Бог мой еси Ты, и исповемся Тебе всем сердцем моим.

2. Глаголах о свидениих Твоих пред цари, и не стыдяхся.

1. Благо есть исповедатися Господеви и пети имени Твоему, Вышний.

2. Пойте Господеви, преподобнии Его, и исповедайте память святыни Его, во всех людех чудеса Его.

По полиелеи седален, глас 2:

Отверзошася ти врата правды, святителю Агафангеле всехвальне, и ныне, вшед в ня, Господеви исповедуешися, хвалу Ему в церкви преподобных возсылая, и кадило молитв священных Престолу Его вознося. Темже помяни чада Церкве Русския, любовию чтущия Тя.

Слава, и ныне, Богородичен:

Ко образу Толгския иконы Пресвятыя Богородицы с верою припадая, Агафангеле премудре, о спасении земли нашея Пречистую усердно умолял еси и тако верныя поучал еси: не имамы иныя надежды во обстояниих, разве предстательства Богоматере.

Степенна: 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми? Евангелие от Луки, зачало 64.

По 50-м псалме стихира, глас 6:

Нашедшу на тя Духу Святому,/ святителю отче Агафангеле,/ во дни гонений лютых в земли Русской/, старец сый, телом немощный и притрудный,/ духом неколеблен явился еси,/ заточения, изгнания и болезни,/ глад и мраз претерпевая,/ яко истинный свидетель Христов./ Темже ныне, Престолу Божию предстоя,/ моли помиловатися душам нашим.

Канон, глас 8, егоже краегранесие: Претерпевый до конца, той спасен будет.

Песнь 1.

Ирмос: Колесницегонителя фараоня погрузи,/ чудотворяй иногда/ Моисейский жезл, крестообразно поразив/ и разделив море,/ Израиля же беглеца, пешеходца спасе,/ песнь Богови воспевающа.

Положивый в сокровищницу Церкве Русския плод устен, исповедающих имя Божие, святителю отче Агафангеле, приими днесь, яко лепту, пение от души, благих вдовствующия.

Ревностию по Бозе бездну гонений немокренно прешел еси, святе Агафангеле, и ныне молитвами твоими на неуклонное исповедание веры нас утверди, воспевающих и поющих в сердцах наших Господеви.

Егда дадеся ти благодать не точию во Христа веровати, но и по Нем пострадати, святителю славне, ты путем скорбным безбоязненно пешешествовал еси, верным образ быв. Темже и вниде во врата Небесная.

Богородичен: Твоего чрева Плод, Богоневесто, земныя вся от клятвы избавляет, темже благословенна Ты в родех, Пречистая Владычице.

Песнь 3.

Ирмос: Утверждей на камени веры,/ на сем созижду Мою Церковь, рекий, Господи,/ спаси мя, вопиюща:/ Ты еси, Христе, Сын Бога Живаго,/ и в Тебе утвердися дух мой.

Егда восташа врази и отступницы на святыни земли Русския,/ тогда ты учаше неложно, богомудре Агафангеле,/ како подобает в Дому Божии жити,/ яже есть Церковь Бога Жива,/ столп и утверждение истины.

Речи безумныя слышав, яко несть Бог, приидите, и отставим вся праздники Божия, прещения гордых не убоялся еси, отче Агафангеле, чада церковная к единению веры призывая.

Паству твою апостольски поучал еси, святителю Агафангеле, повелевая отлучатися всякаго брата, безчинно ходяща, в научения странна и различна не прилагатися, но благодатию сердца утверждати.

Богородичен: Едина словом Слово плотию рождшая, Чистая, избави сетей вражиих души наша и утверди на камени Божественных хотений, яко на Тя упование возложихом.

Седален, глас 4:

Взирая на Начальника и Совершителя веры Иисуса, верою немощи превозмогл еси, святителю Агафангеле, в темницах и изгнании терпеливодушно пребывая, беды от гонителей, беды от лжебратии терпя. Темже и жизнь вечную восприял еси.

Слава, и ныне, Богородичен:

К Заступнице земли нашея, Приснодеве Богородице, ныне притецем и к первописанней иконе Ея припадем, с верою зовуще из глубины души: о, Мати Божия, спаси землю Русскую, исцели болезни ея и верныя люди утеши.

Песнь 4.

Ирмос: Ты моя Крепость, Господи,/ Ты моя и Сила,/ Ты мой Бог, Ты мое Радование,/ не оставль недра Отча/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче.

Виждь враги моя, яко умножишася и туне возненавидеша мя, вопиял еси псаломски, Агафангеле крепкодушне, сохрани душу мою и избави мя, яко Тебе ради претерпех поношение, и прославлю силу Твою, Человеколюбче.

Исповедал еси, отче Агафангеле, Христа пред отступники и гонители, мужественне воспевая: страха вашего не убоимся, ниже смутимся, яко с нами Бог, Господа же Бога нашего, Того освятим, и Той будет нам в страх.

Имене Своего ради в скорбех сохрани тя Христос Бог мышцею Своею высокою, тебе взывающу: яко аще не Господь бы был в нас, внегда востати человеком на ны, убо живых пожерли быша нас. Ныне же силу Его воспеваем.

Богородичен: Доброту Иаковлю, красную Тя, Всечистая, Едину обрет от века Пребезначальное Слово, и вселився в Тя, обнови человеческое естество, егоже моли от всякия мне избавитися скорби.

Песнь 5.

Ирмос: Яко Бога иного, Блаже,/ паче Тебе, не знаем,/ к Тебе, Свету Незаходимому, от нощи утренююще,/ воспеваем Тя, Человеколюбче.

Отлучен быв телом, но не душею, от паствы твоея, исповедниче Христов, по вся дни тую в сердце своем носил еси, последуя Господу Человеколюбцу.

Кую измену даст человек за душу свою? Сие слово Господне в сердце храня, житие непорочное и исповедание чистое Спасителю в дар принесл еси.

О всяцей скорби Бог не остави тебе, да возможеши сущия в скорбех утешати, и гонящия благословляти, словом, житием, любовию образ верным подавая.

Богородичен: Направи стопы моя к покаянию, Путеводительнице христианом, Богородице Чистая, яко да из тьмы греховныя исход обрящу.

Песнь 6.

Ирмос: Иону в ките, Господи,/ единаго вселил еси,/ мене же, связаннаго мрежами вражиями,/ яко от тли онаго спаси.

Целомудрием Христовым, святителю Агафангеле, во узах сый, лжемудрие гонителей обличил еси, яко слово Божие не вяжется.

Аще благая прияхом от руки Господни, злая ли не стерпим, взывал еси, святителю, да сынове Божии обретемся.

Ты, Господи, нам Прибежище и Сила, в тесноте темничней вопиял еси, богомудре, егда бо немощствуем, тогда о Господе сильни есмы.

Богородичен: Освяти ум мой и просвети сердце мое, Пресвятая Мати Божия, и одержащих мя зол измени, христиан Заступнице.

Кондак, глас 4:

Исполняя во плоти твоей лишение скорбей/ за Тело Христово, еже есть Церковь,/ страждующим чадом Ея милостию и смирением,/ преподанием мира и мудростию послужил еси,/ сего ради на свещнице архиерейстем,/ яко светильник горяй и светяй, возсиял еси/ и мощи твоя граду Ярославлю/ во утверждение даровал еси,/ святителю Агафангеле, отче наш.

Икос:

К Церкви и земли Русской любовию распалаяся, неверие и зловерие со дерзновением обличал еси, чада церковная повиноватися и покарятися законным пастырем поучая. Темже, страдания по Христе волею на рамо взем, силу мучительскую силою Христовою препобедил еси. И ныне, во Царствии Божии веселие вкушая за лета, в няже видяше злая, поминай любовию чтущих тя, святителю Агафангеле, отче наш.

Песнь 7.

Ирмос: Божия снисхождения/ огнь устыдеся в Вавилоне иногда./ Сего ради отроцы в пещи, радованною ногою,/ яко во цветнице, ликующе, пояху:/ благословен еси, Боже отец наших.

Имея щит веры Христовы, стрелы разжженныя мучителей отразил еси, святителю, вопия: аще бо паки возможете и паки побеждени будете, аз же благословлю Бога отец наших.

Со беззаконными вменився, на путь нечестивых не ступил еси и, ненавидимь Господа ради быв, любовию сердце утвердил еси, воспевая Богу отец наших.

Паче силы гонительми отягощаемь, легкое иго Христово подъял еси, мудре, и посреде мятежа и браней земных покой обрел еси, воспевая Богу отец наших.

Богородичен: Агнца зрящи неправедне на Древе воздвизаема, Многопетая Агница плачущи восклицаше, матерски слезящи и долготерпение Того пояше.

Песнь 8.

Ирмос: Нечестия органы иную песнь,/ благочестия же благовещаннии пояху гусли:/ благословите, дела Господня, Христа во веки.

Силою многою глаголы вечныя благовествовал еси, святителю: се, Господи, удаляющии себе от Тебе погибнут, людие же вернии исповедятся Тебе во веки.

Едем мысленный в узилище обрет, исповедниче славный, реку учений Божественных из него извел еси, да омоется лице земли Русския от нечестия во веки.

Написуя верным благочестивно разум Божественный, Святаго Духа трость явился еси, Емуже со Отцем и Сыном исповедаешися во веки.

Богородичен: Безсмертнаго Бога рождшая, течение смертное укротила еси, темже умертви, Чистая, страсти телесе моего, да Тя славлю во веки.

Песнь 9.

Ирмос: Благословен Господь, Бог Израилев,/ воздвигнувый рог спасения нам/ в дому Давидове, отрока Своего,/ в нихже посети нас Восток с высоты/ и направил ны есть на путь мира.

Узы твоя поминающия и любовию чтущия память твою, вечных и нерешимых уз избавити молися Христу, святителю Агафангеле, яко ходатай еси теплый о чадех Церкве Русския.

Дар молитвы терпением в скорбех стяжав, о умирении Церкве Русския по вся дни Бога умолял еси, отче Агафангеле. И ныне благословящия о тебе Господа помяни.

Единаго Бога возлюбив, священное служение исповеданием запечатлел еси и, яко клас зрелый земли Русския, в Небесных житницех упокоился еси, славне Агафангеле.

Богородичен: Тя верою поющия просвети, Всенепорочная, просвещением Сына Божия, из Твоея прошедшаго утробы, и тьмы нас несветимыя изми Твоим предстательством.

Светилен:

Представил еси себе жертву живу Богови, святу, благоугодну, в словеснем служении и исповедании, святителю Агафангеле, и тако просветися свет твой на Святей Руси, яко да славит выну о тебе Отца Небеснаго.

Слава, и ныне, Богородичен:

Свет от Света миру рождшая, Пречистая, светлости святых сподоби люди земли Русския, Тебе почитающия и молебное пение Тебе приносящия: не забуди нас, рабов Твоих, Едина Благословенная.

На хвалитех стихиры, глас 4:

Досточудне святителю Агафангеле,/ ты в годину гонений на Церковь Русскую/ столп Православия исповеданием Христа явился еси,/ узами и изгнанием, яко злато в горниле, искушаемь,/ в мире благочестне скончался еси/ и благоуханием святых мощей верныя возвеселил еси./ Ныне же с лики ангельскими Бога величаеши. (Дважды).

Егда безбожие плени землю Русскую,/ премножество силы Божия проповедал еси, Агафангеле всехвальне,/ гонимь, но не оставляемь,/ низлагаемь, но не погибаяй,/ в терпении мнозе, бдениих и пощениих,/ во благости, любви нелицемерной и словеси истины/ спасение Руси на камени веры Православныя возвещая.

По слову Господню врази твоя возлюбил еси,/ образ страждущим людем Русским являя,/ святителю Агафангеле,/ кленущия тя благословляше,/ ненавидящим тя добро творяше/ и о гонящих тя моляшеся,/ яко да всыновления сподобишися Отцу Небесному,/ егоже ныне во славе восхваляеши.

Слава, глас 8:

Святителю и исповедниче Христов Агафангеле,/ ты первее паству Ярославскую/ от омофора святителя Тихона приял еси/ и добре сию упасл еси./ Последи же, волю Первосвятителя исполняя,/ попечение о всей Церкви Русской подъял еси/ и тому во дни гонений безбожных спострадал еси./ Темже ныне купно с ним Престолу Божию предстоиши,/ моляся о душах наших.

И ныне, Богородичен:

Владычице, приими молитвы раб Твоих/ и избави нас/ от всякия нужды и печали.

Славословие великое и отпуст.

На Литургии

Блаженны от канона, песни 3-я и 6-я. Прокимен, глас 7: Изведи из темницы душу мою/ исповедатися имени Твоему. Стих: Гласом моим ко Господу воззвах. Апостол ко Евреем, зачало 334. Аллилуиа, глас 2: Праведнии исповедятся имени Твоему/ и вселятся правии с лицем Твоим. Стих: Господи, Господи, сило спасения моего, осенил еси над главою моею в день брани. Евангелие от Матфеа, зачало 38. Причастен: Пойте Господеви преподобнии Его и исповедайте память святыни Его.

Молитва

О, Богомудре святителю и исповедниче Христов Агафангеле, измлада возжелевый служити олтарю Господню! Ты, первее люди Сибирския и Прибалтийския в стране нашей архипастырским служением добре управив, последи Ярославстей пастве дарован был еси, во время же богоборческих гонений заветом первосвятителя Тихона попечение о Русской Церкви приял еси. Тогда, священное исповедание, яко забрало, восприим, уста богохульная дерзновенно заградил еси и безплотныя враги посрамил еси, чада церковная поучая предания святых отец соблюдати, единство святыя веры в союзе братскаго мира хранити и пастырем законным повиноватися. Темже, заточения, изгнание и многая лишения за имя Христово претерпев, блаженства изгнанных правды ради сподобился еси и ныне с ликом новомученик и исповедник Российских Престолу Пренебесному предстоиши. Темже моли Всеблагаго Бога, да сохранит Церковь Русскую от ересей, расколов, нестроений и гонений, да возродится земля наша святым покаянием и да прославят вернии людие ея единым сердцем и едиными усты Дивнаго во святых Своих Бога, Отца и Сына и Святаго Духа во веки веков. Аминь.

Источник: Текст службы утвержден на заседании Священного Синода 25 августа 2022 года (журнал № 78).