Источник

1-й день

Предпра́зднство Сре́тения Го́спода Бо́га и Спа́са на́шего Иису́са Христа́. И свята́го му́ченика Три́фона

На Го́споди, воззва́х: стихи́ры предпразднства 3, глас 4.

Подо́бен: Я́ко до́бля:

Честна́я гото́вится Це́рковь/ восприя́ти в себе́ Го́спода,/ я́ко Младе́нца приходя́ща/ и благода́тию мы́сленно уясня́юща/ ве́рнейший свой и Боголюбе́зный собо́р./ Сего́ ра́ди вопие́т:/ Ты еси́ сла́ва, и похвала́,/ и украше́ние исполне́ния моего́, Сло́ве,/ младе́нствовавый пло́тию мене́ ра́ди.

Черто́г многосве́тлый,/ и Сень пречестна́я,/ и Храм святы́й и простра́нный,/ внутрь черто́гов вводя́щий Це́ркве Го́спода,/ предобруча́ет Себе́ честне́й Це́ркви Его́/ и мо́лится при́сно/ от тли и бед изба́витися/ и́же вои́стинну Богоро́дицу/ Сию́ непреста́нно сла́вящим.

Предпра́зднственную хвалу́/ Христу́ ны́не принесе́м,/ Того́ сла́вяще соше́ствие:/ я́ко Деви́ческими рука́ми: я́ко Младе́нец прино́сим,/ на ру́ки Симео́на возлещи́ гряде́т,/ воззва́ние содева́я всем челове́ком/ и обожи́ти существо́,/ я́ко Благоде́тель и Госпо́дь.

И́ны стихи́ры свята́го, глас 1.

Подо́бен: Всехва́льнии:

Трифоне всехва́льне,/ сла́дости нетле́нныя/ прича́стник на Небесе́х был еси́ светле́йший,/ до́блественными по́двиги/ постра́дал еси́, сла́вне,/ и, свиде́тель и́стины быв,/ Христа́ моли́/ дарова́ти душа́м на́шим/ мир и ве́лию ми́лость.

Трифоне пресла́вне,/ Све́та присносу́щнаго сия́ньми/ светови́ден весь был еси́,/ испрове́рг всю мра́чную пре́лесть/ и мироде́ржца тьмы низложи́в/ Боже́ственною благода́тию./ Те́мже моли́/ дарова́ти душа́м на́шим/ мир и ве́лию ми́лость.

Трифоне всеблаже́нне,/ ра́дости и весе́лия А́нгельскаго сподо́бился еси́,/ отве́ргся кра́сных жития́,/ и, душе́вною кре́постию вся в ничтоже вмени́в,/ терпели́внейше соверши́л еси́ муче́ние,/ и мо́лишися о душа́х на́ших.

Сла́ва, глас 2.

Киприаново: Преоби́дел еси́ су́щая на земли́,/ всеблаже́нне Три́фоне че́стный,/ к суди́щу му́жески потща́ся/ и, боре́ния кро́вию ты худо́жне, му́чениче, го́рдаго низложи́в,/ прия́л еси́ побе́ды вене́ц;/ Христа́ Бо́га на́шего моля́ о нас, не оскуде́й, страстоте́рпче,/ спасти́ся душа́м на́шим.

И ны́не, глас то́йже.

Германово: Днесь Симео́н на ру́ки Го́спода сла́вы прие́млет,/ Его́же под мра́ком пе́рвее Моисе́й ви́де,/ на горе́ Сина́йстей скрижа́ли даю́ща ему́./ Сей есть, И́же во проро́цех глаго́ляй/ и зако́на Творе́ц;/ Сей есть, Его́же Дави́д возвеща́ет,/ И́же всем стра́шный,/ име́яй ве́лию и бога́тую ми́лость.

На стихо́вне стихи́ры, глас 2.

Подо́бен: До́ме Евфра́фов:

Восприими́, о Симео́не,/ Го́спода сла́вы,/ я́коже извести́лся еси́/ от Ду́ха Свята́го:/ се бо прии́де.

Стих: Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром.

Нося́щи Чи́стая/ и Пречи́стая Де́ва/ Соде́теля и Влады́ку/ я́ко Младе́нца на рука́х,/ в це́рковь вхо́дит.

Стих: Свет во открове́ние язы́ков/ и сла́ву люде́й Твои́х Изра́иля.

Ве́лие и стра́шное та́инство/ и стра́нное смотре́ния:/ И́же вся объе́мляй/ и младе́нцы созида́яй,/ я́ко Младе́нец на рука́х но́сится.

Сла́ва, и ны́не, глас то́йже: Самогла́сен:

Свяще́ннаго Свяще́нная Де́ва/ принесе́ во святи́лище святи́телю,/ просте́р же ру́це, Симео́н прия́т Сего́, ра́дуяся, и возопи́:/ ны́не отпуща́еши раба́ Твоего́, Влады́ко,/ по глаго́лу Твоему́, с ми́ром, Го́споди.

Тропа́рь, глас 4:

Му́ченик Твой, Го́споди, Три́фон,/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я дерзости./ Того́ моли́твами/ спаси́ ду́ши на́ша.

Ин тропа́рь свята́го му́ченика Три́фона, глас 4:

Пи́щи Боже́ственныя, треблаже́нне,/ наслажда́яся на Небесе́х неоску́дно,/ сла́вящих пе́сньми па́мять твою́ покры́й/ и сохрани́ от вся́кия ну́жды,/ отжени́ вредя́щих ни́вам живо́тных,/ да тебе́ от любве́ вопие́м всегда́:/ ра́дуйся, Три́фоне, му́чеников укрепле́ние.

Сла́ва, и ны́не.

Тропа́рь предпразднства, глас 1.

Подо́бен: Лик А́нгельский:

Небе́сный лик Небе́сных А́нгел,/ прини́к на зе́млю, прише́дше зрит я́ко Младе́нца,/ носи́ма к хра́му, Перворожде́нна всея́ тва́ри от Ма́тере Неискусому́жныя,/ предпра́зднственную у́бо с на́ми пою́т песнь, ра́дующеся.

НА У́ТРЕНИ

На Бог Госпо́дь: тропа́рь предпразднства, два́жды. Сла́ва, свята́го. И ны́не, предпра́зднства.

По 1-й кафи́зме седа́лен, глас 1.

Подо́бен: Красоте́ де́вства:

От Де́вы Тя воплоще́нна, Христе́, ра́дуяся, подъя́т свяще́нный Симео́н, –/ны́не отпуща́еши, вопия́, раба́ Твоего́, Влады́ко./ А́нна же непоро́чная, проро́чица и сла́вная,/ ны́не испове́дание и пе́ние прино́сит Тебе́./ Мы же, Жизнода́вче, вопие́м Ти:/ сла́ва та́ко благоволи́вшему.

Сла́ва, и ны́не, то́йже.

По 2-й кафи́зме седа́лен, глас 8:

Подо́бен: Свире́лей па́стырских:

Роди́лся еси́ на земли́, Собезнача́льный Отцу́,/ прине́слся еси́ в це́рковь, Непостижи́мый;/ ра́дуяся же, ста́рец на ру́ки Тя восприя́т, зовы́й:/ ны́не отпуща́еши, его́же посети́л еси́ по глаго́лу Твоему́,/ благоизво́ливый спасти́, я́ко Бог, род челове́ческий.

Сла́ва, и ны́не, то́йже.

Кано́н предпра́зднства со ирмосо́м на 8 и свята́го на 4. Кано́н предпра́зднства. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Сердца́ я́коже ру́це вси предугото́вльше,/ приходя́ща днесь Христа́ чи́сте прии́мем/ и Того́ Ду́хом Боже́ственных дарова́ний наслади́мся.

Две́ри предъотве́рзши днесь, и́же в зако́не храм,/ Законода́вцу и Соде́телю устроя́ет вхо́ды све́тлы/ и гото́вит честны́я да́ры Ему́ Боже́ственное хвале́ние.

Воспою́ Тебе́, Го́споди Бо́же мой,/ младе́нствовавшему пло́тию, и зако́ну повину́вшемуся,/ и спа́сшему челове́ка, его́же ра́ди был еси́ Челове́к.

Богоро́дичен: Разуме́в ве́тхий, Пречи́стая, храм Тя, Влады́чице,/ Влады́це всех и Бо́гу жили́ще чи́сто/ лик пропове́даше, велича́я сла́ву Твою́.

Ин кано́н му́ченика, его́же краегране́сие: Сла́дости причасти́тися сподо́би мя, Три́фоне. Глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Вои́стинну Боже́ственныя на Небесе́х сла́дости наслажда́яся,/ я́ко непобеди́м страда́лец,/ твои́ми моли́твами ду́шу мою́ изба́ви от страсте́й смуще́ния.

Глаго́лы Боже́ственными огласи́вся,/ соверши́л еси́ сия́ пресла́вне де́ятельно,/ святы́ню возлюби́в и целому́дрие облобыза́в.

Был еси́ и́стинно па́стырь,/ пасы́й души́ твоея́ в му́дрости помышле́ния,/ ду́ши обраща́я заблужда́ющия/ и Бо́гу приводя́, сла́вне.

Богоро́дичен: Просвеща́еши мя сия́нием мы́сленным,/ осия́ние сла́вы ро́ждшая О́тчее,/ Всенепоро́чная Отрокови́це,/ и мрак грехо́вный разори́.

А́ще есть неде́ля,

Катава́сия: Су́шу глубороди́тельную зе́млю:

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Взыгра́шася мы́сленно,/ я́же в дому́ Бо́жии ше́ствия,/ Царя́ Христа́ хотя́ща пло́тию прия́ти.

Я́ко честны́я/ Христу́ предъугото́вльше днесь, ве́рнии, да́ры прия́тны, хвалу́,/ Сего́ с ра́достию усря́щем.

Ны́не пре́йде сень и преды́де и́стина, благода́ти прише́дши,/ ны́не подыми́ Христа́, Симео́не.

Богоро́дичен: Преста́ е́же в се́нех и обра́зных начерта́ниих веща́ние:/ И́стина бо, Чи́стая, Тобо́ю яви́ся конце́м.

Ин

Ирмо́с: Ты еси́ утвержде́ние притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Притупи́л еси́ си́лу го́рдаго,/ сла́вный му́чениче Христо́в,/ свы́ше оде́явся си́лою.

Пло́тию обложе́н,/ шата́ния безпло́тнаго угаси́л еси́ врага́/ и воплоще́ннаго Бо́га Сло́ва пропове́дал еси́.

Еди́ным то́кмо прише́ствием твои́м/ ду́хи лука́вствия отгоня́ются,/ Ду́ха Свята́го гони́ми благода́тию.

Богоро́дичен: Име́я Тя по́мощь, не постыжду́ся,/ Пречи́стая Ма́ти Бо́жия,/ име́я Тя предста́тельницу Жи́зни моея́, спасу́ся.

Конда́к му́ченика, глас 8.

Подо́бен: Я́ко нача́тки:

Тро́йческою тве́рдостию/ многобо́жие разруши́л еси́ от коне́ц, всесла́вне,/ че́стен во Христе́ быв, и, победи́в мучи́тели во Христе́ Спаси́теле,/ вене́ц прия́л еси́ му́ченичества твоего́/ и дарова́ния Боже́ственных исцеле́ний,/ я́ко непобеди́мь.

И седа́лен, глас 4.

Подо́бен: Ско́ро предвари́:

Боле́зньми, блаже́нне, наслажда́яся плотски́ми,/ Боже́ственную и неболе́зненную пи́щу досто́йно восприя́л еси́,/ вене́ц безсме́ртия от Бо́га прие́м./ Те́мже и исцеле́ний ре́ки источа́еши/ любо́вию прибега́ющим, му́чениче, в кров твой.

Сла́ва, и ны́не, предпра́зднства, глас 1.

Подо́бен: Ка́мени запеча́тану:

Сокро́вище ве́чное Жи́зни вся́ческих,/ мене́ ра́ди под зако́ном младе́нствовавый,/ дре́вле начерта́вый на скрижа́лех зако́н на горе́ Сина́йстей,/ да вся измени́ши от зако́нныя дре́вния рабо́ты,/ сла́ва благоутро́бию Твоему́, Спа́се,/ сла́ва соше́ствию Твоему́,/ сла́ва смотре́нию Твоему́, Еди́не Человеколю́бче.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

На о́блаце носи́м светоно́снем пло́тски, я́ко Со́лнце Пра́вды,/ Боже́ственныя зари́ Своя́ предлага́ет днесь/ и предозаря́ет храм Свой.

Предпра́зднственную хвалу́ Влады́це Це́рковь днесь привноша́ет,/ и Сего́, я́ко Жениха́, прия́ти све́тло гото́вится,/ и с Симео́ном ра́дуется;/ чи́ни А́нгельстии ужасо́шася,/ зря́ще на рука́х ста́рческих/ со Отце́м и Ду́хом хвали́маго, я́ко Сы́на и Бо́га на́шего.

Богоро́дичен: Я́ко ски́нию,/ Тя, Пресла́вная Богоро́дице,/ хотя́щи прия́ти зако́нная сень,/ зако́ну Го́спода на рука́х нося́щую,/ Твое́ю осия́шеся благода́тию.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́,/ и просла́вих Твое́ Божество́.

Зря́щих удиви́л еси́ терпе́ния, блаже́нне, тве́рдостию:/ му́ки бо претерпе́л еси́,/ я́ко в чужде́м стражда́ телеси́,/ му́дре Три́фоне.

Пита́лся еси́, блаже́нне, ра́нами боле́зней, бие́мь,/ ны́не же наслажда́ешися чи́стее,/ присносу́щныя сла́вы насыща́яся.

Стру́жему телеси́ твоему́/ желе́зных ногте́й острото́ю,/ вжиля́шеся, чу́дне, твоея́ души́ кре́пость Боже́ственною благода́тию.

Богоро́дичен: На Тя упова́ние мое́ все возлага́ю,/ Ма́ти Де́во:/ ду́шу мою́ сохрани́, я́же Бо́га ро́ждшая, Спа́са моего́.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святый, обраща́яй из мра́чна неве́дения/ ве́рою воспева́ющия Тя.

Тя, Го́споди, пло́тию це́рковь хотя́щи прия́ти,/ Боже́ственною Твое́ю и неизрече́нною Божества́ заре́ю/ сла́вно просвеща́шеся.

Тя, Го́споди, рука́ми душе́вными сподо́би прия́ти хва́лящия Твое́ смотре́ние,/ и нас, ве́рою пою́щих Тя, приими́,/ я́ко Человеколю́бец.

Тя, Го́споди, ра́достною душе́ю прие́млющия,/ пло́тию нас ра́ди хотя́ща приити́,/ сподо́би с Симео́ном благодари́ти Тя.

Богоро́дичен: Изба́вльшеся Тебе́ ра́ди сено́вныя слу́жбы, Чи́стая,/ ра́зумом и́стинным и ве́рою тве́рдою/ досто́йно Тя сла́вим.

Ин

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Куми́ры преле́стныя упраздни́л еси́, страстоте́рпче,/ то́кмо бо возлюби́л еси́/ Христо́ву о́бразу покланя́тися.

Разуме́в пресве́тлую, сла́вне страстоте́рпче,/ благода́ть Бо́га на́шего,/ тоя́ ра́ди пострада́л еси́.

Боже́ственною озари́вся благода́тию,/ усе́рдно, страда́льче,/ Христа́ ра́ди пострада́л еси́.

Богоро́дичен: Неизрече́нно бысть зача́тие Твое́,/ и Рождество́ несказа́нно:/ пребыла́ бо еси́ Чи́стая Присноде́ва.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею кро́вию.

Пе́сни, я́коже цве́ты, испле́тше днесь,/ предъугото́вим ве́рою благодаре́ния вене́ц Боже́ствен Влады́це,/ мы́сленно приити́ хотя́щему.

Ру́ки душе́вныя Бо́гу угото́вим, я́коже Симео́н ста́рец,/ и в храм Боже́ственныя сла́вы Его́ приходя́ща,/ Того́ с весе́лием восприи́мем.

Творца́ веко́в ста́рец я́ко Младе́нца прие́м,/ Бо́га Преве́чнаго разуме́ и Све́та язы́ков/ во сла́ву Изра́иля, Христа́.

Богоро́дичен:Пи́шуще Богови́дно тро́стию духо́вною Тя, проро́цы, Де́во,/ храм, и сень, и Боже́ственный дом Влады́це всех,/ о Тебе́ украша́хуся.

Ин

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Изсуши́в ме́рзкия же́ртвы,/ и приноше́ния скве́рная, и неи́стовства и́дольская,/ твои́ми кровьми́, сла́вне, напои́л еси́/ вся церко́вная благоро́дная, Три́фоне, прозябе́ния.

Стру́пи му́ченичестии, я́ко ми́ро, благоуха́ют,/ кровь страда́лец источа́ет исцеле́ния,/ оста́нцы же те́ла ду́ши освяща́ют/ ве́рою каса́ющихся им.

Богоро́дичен: Я́ко одушевле́н киво́т,/ прия́ла еси́ Сло́во Безнача́льное,/ я́ко Свято́е Святи́лище, Зижди́теля вмести́ла еси́,/ я́ко Престо́л огнезра́чен, но́сиши Влады́ку, Богома́ти, всея тва́ри.

Конда́к, глас 6:

Со Отце́м Сло́во Сый неви́димо,/ ны́не у́бо ви́дим есть пло́тию:/ неизрече́нно от Де́вы роди́ся/ и на ру́ку ста́рчу дае́тся святи́телю./ Поклони́мся Тому́/ и́стинному Бо́гу на́шему.

И́кос:

Свяще́нная трапе́за предлага́ется,/ празднолю́бных собо́р днесь, предпра́зднственная нося́щи зна́мения,/ Го́спода четыредесятодне́вна, из Де́вы стра́шное рождество́,/ и ста́рца честна́го объя́тие,/ и че́стна страда́льца па́мять,/ предпра́зднственныя хвалы́ припева́юще/ и́стинному Бо́гу на́шему.

Песнь 7

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Це́рковь, предъукра́шшися заре́ю мы́сленною,/ любо́вию Влады́ки всех и Творца́,/ восприя́ти Его́ гото́вится и ра́достная Сему́ плете́т восхожде́ния.

И́же в не́дрех неопи́санно су́ща Оте́ческих Сло́во,/ Сы́на Своего́ Единоро́днаго, Ма́тернии ру́це нося́щии в це́рковь пло́тию/ по зако́ну я́ко Младе́нца вно́сят.

Всели́выйся Бог во чре́во Де́вы/ на рука́х Симео́на,/ я́ко на престо́ле о́гненнем, днесь седи́т.

Богоро́дичен: Ви́деша сла́ву Твою́ язы́цы вси, Еди́на Чи́стая,/ те́мже тва́рей всех Тя благоче́стно Цари́цу ублажа́ют/ и Богома́терь па́че естества́ непреста́нно сла́вят.

Ин

Ирмо́с: От Иуде́и доше́дше, о́троцы,/ в Вавило́не иногда́/ ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Венцено́сец, лику́еши с ли́ки му́ченик, веселя́ся,/ пре́лесть бо победи́в сло́вом и́стинным,/ воспева́еши, ра́дуяся:/ оте́ц на́ших Бо́же, благослове́н еси́.

Влады́ка вся́ческих Свои́ми страда́ньми венча́ет му́ченика/ и сего́ водворя́ет в се́лех Небе́сных,/ зову́ща и глаго́люща:/ оте́ц на́ших Бо́же, благослове́н еси́.

Богоро́дичен: Мла́да нося́щи Младе́нца,/ пре́жде всех век Бо́га, Всенепоро́чная, из Тебе́ воплоще́нна,/ на преста́й моля́щи спасти́ пою́щия:/ оте́ц на́ших Бо́же, благослове́н еси́.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́:/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Руце распросте́р Симео́н/ и предъочи́щ ду́шу Боже́ственными дея́ньми,/ младе́нствовавшаго Го́спода то́кмо за бла́гость прия́т,/ вопия́ с весе́лием Ему́:/ благослови́те, вся дела́ Госпо́дня, Го́спода.

Свет благода́ти Христо́вы просия́ нам,/ хотя́ ввести́ в храм Свой,/ всесено́вная начерта́ния претворя́я я́ко Обнови́тель/ вои́стинну вопию́щим:/ благослови́те, вся дела́ Госпо́дня, Го́спода.

Предве́чнаго Бо́га, благоволи́вшаго нас ра́ди младе́нствовати/ и на рука́х прие́млема бы́ти ста́рца Симео́на,/ благослови́те, вся дела́ Госпо́дня, Го́спода.

Богоро́дичен: И́же за благосты́ню мно́гую вочелове́чься Христо́с/ из Тебе́, Пречи́стая, нас ра́ди,/ прия́тна днесь Отцу́ приноша́ет очище́ния,/ Еди́н Сый Пречи́ст и Пренепоро́чен/ и Тя Еди́ну Чисте́йшую соблюда́я Пресвяту́ю.

Ин

Ирмо́с: Седмери́цею пещь/ халде́йский мучи́тель,/ Богочести́вым неи́стовно разжже́;/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Да́же до усекнове́ния и опале́ния,/ да́же до кровепроли́тия,/ да́же и до сме́ртныя кончи́ны пострада́л еси́,/ сопротивля́яся проти́ву греху́, му́чениче Христо́в,/ ны́не же, жизнь во Христе́ сокрове́нную прие́м, взыва́еши:/ свяще́нницы, благослови́те,/ лю́дие, превозноси́те во вся ве́ки.

На земли́ подвиза́лся еси́, с нечести́выми боря́ся,/ проти́ву ле́стней и богобо́рней ле́сти го́рце ну́дящим;/ на Небесе́х же, Три́фоне, наслажда́ешися, вене́ц нося́,/ и со А́нгелы лику́еши, поя́:/ о́троцы, благослови́те,/ свяще́нницы, воспо́йте,/ лю́дие, превозноси́те Го́спода во ве́ки.

Мучи́тельское изобли́чил еси́ безбо́жие, всему́дре,/ и де́монское богобо́рство угаси́л еси́ струя́ми крове́й твои́х;/ в Тро́ице Еди́наго Бо́га достоле́пне и чи́сте возвеща́я/ и честву́я, взыва́л еси́:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Богоро́дичен: Глаго́лом Твои́м после́дующе,/ ублажа́ем, Пречи́стая, Тя, Блаже́нную,/ пло́тию ро́ждшую вои́стинну Блаже́ннаго,/ Све́та живу́щаго незаходи́маго,/ и Светонаста́вника, и Светода́вца Влады́ку./ Его́же о́троцы благословя́т,/ свяще́нницы воспева́ют/ и превозно́сят во вся ве́ки.

Песнь 9

Ирмо́с: Ка́мень нерукосе́чный/ от несеко́мыя горы́ Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́;/ тем, веселя́щеся, Тя, Богоро́дице, велича́ем.

Душе́вными Тя рука́ми сподо́би мя, Благоде́телю,/ восприя́ти, я́коже дре́вле Симео́н,/ и наслади́тися Твоея́ бла́гости:/ Ты бо еси́ Еди́н жела́ние/ и сла́дость, Превозжеле́нный.

Мы́сленно вже́гше вси доброде́телей свещи́,/ любо́вию с Симео́ном и А́нною свещено́сцы предусря́щем,/ Христу́ хотя́щу приити́ освяти́ти пою́щия Его́.

Днесь в хра́ме Симео́н ста́рец рука́ми прия́т Христа́, Бо́га на́шего,/ и возопи́, глаго́ля:/ ны́не отпуща́еши раба́ Твоего́, Влады́ко.

Богоро́дичен: Па́че су́щих восприя́т из Тебе́ плоть Сло́во Вы́шняго,/ Чист Сый приноша́ет Безнача́льному Отцу́ очище́ние/ и очища́ет любо́вию Тя, Бо́жию Ма́терь, велича́ющия.

Ин

Ирмо́с: Тя, неискусобра́чную Ма́терь Бо́га Вы́шняго,/ Тя, па́че ума́ ро́ждшую сло́вом вои́стинну Бо́га,/ вы́шшую Пречи́стых сил,/ немо́лчными славословле́нии велича́ем.

Па́че ви́димых му́ченическое ча́яние по́лно безсме́ртнаго наслажде́ния:/ ви́дится сих наде́жда, полна́ благоуха́ния,/ и ра́дости, и све́тлости неизрече́нныя./ Те́мже досто́йно ублажа́ются.

Свет был еси́ вторы́й, к Све́ту пе́рвому прибли́жився,/ заре́ю Его́ просвеща́емь и вообража́емь, Три́фоне му́дре,/ и Того́ пода́тельными светлостьми́ сия́я;/ тем тя вси ублажа́ем.

Яви́лся еси́ неужа́сен в по́двизех, страстоте́рпче,/ яви́лся еси́ и́стинно тезоимени́т Боже́ственней и святе́й пи́щи,/ ея́же ны́не восприе́мля и я́сно наслажда́яся,/ спасе́ние чту́щим тя нам испроси́.

Богоро́дичен: Умертви́ мудрова́ние, Богороди́тельнице, пло́ти моея́/ и оживи́ душе́вное умерщвле́ние де́йством И́стинныя Жи́зни,/ из Тебе́ ро́ждшияся пло́тию за неизрече́нное благоутро́бие/ и спасе́ние пою́щих Тя.

Свети́лен.

Подо́бен: Ду́хом во святи́лищи:

Пи́щи наслажда́яся пресла́вныя и Боже́ственныя,/ А́нгелом единожи́тель был еси́, блаже́нне:/ гу́си пасы́й в лузе́х, от Бо́га прия́л еси́ благода́ть исцеле́ний,/ Три́фоне великому́чениче,/ исцеля́ти челове́ческия не́мощи и неду́ги.

Сла́ва, и ны́не, предпра́зднства:

Отроча́ прине́сши Всенепоро́чная Отрокови́ца во святи́лище/ соверши́ти я́же по зако́ну,/ и Сие́ на ру́ки я́ко прия́т Симео́н пра́ведный,/ проти́ву изрече́ Деви́це:/ Сей лежи́т на паде́ние и на воста́ние мно́гим/ и во зна́мение в ми́ре.

На стихо́вне стихи́ры предпра́зднства, глас 2.

Подо́бен: До́ме Евфра́фов:

Скве́рны кроме́,/ Христо́с ражда́ется от Де́вы,/ я́ко от Отца́ нетле́нно/ Сын пре́жде денни́цы,/ Ада́ма избавля́яй.

Стих: Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром.

Две́ри Небе́сныя, отве́рзитеся,/ Христо́с бо в це́рковь/ я́ко Младе́нец/ Ма́терию Де́вою/ Бо́гу и Отцу́ прино́сится.

Стих: Свет во открове́ние язы́ков/ и сла́ву люде́й Твои́х Изра́иля.

Восприими́, о Симео́не,/ Го́спода сла́вы,/ я́коже ти извести́ся/ от Ду́ха Свята́го:/ се бо прии́де.

Сла́ва, и ны́не, глас то́йже:

Самогла́сен: Зижди́тель Небесе́ и земли́/ на рука́х ноша́шеся святы́м Симео́ном ста́рцем днесь./ Той бо Ду́хом Святы́м глаго́лаше:/ ны́не свободи́хся,/ ви́дех бо Спа́са моего́.

НА ЛИТУРГИ́И:

Блаже́нны от кано́нов, предпразднства песнь 3-я, и свята́го песнь 6-я. Проки́мен, глас 7: Возвесели́тся пра́ведник о Го́споде: Стих: Услы́ши, Бо́же, глас мой: Апо́стол к Римляном, зача́ло 99. Аллилуия, глас 4: Пра́ведник, я́ко фи́никс, процвете́т: Ева́нгелие от Луки́, зача́ло 51, от полу́: Прича́стен: В па́мять ве́чную:

ЗРИ: Аще случится предпразднство Сретения Господня в субботу.

В пяток вечера, по стихирах, Сла́ва, свята́го: И ны́не, Богородичен первый, настоящаго гласа.

Аще ли прилучится предпразднство Сретения Господня в неделю, прежде недели мытаря и фарисея.

В субботу на малей вечерни стихиры воскресны и Богородице, по обычаю: тропарь воскресен: Сла́ва, и ны́не, Богородичен его.

На велицей вечерни, на Господи, воззва́х: стихиры воскресны 3, и восточен, Анатолиев, един, и предпразднства 3, и мученика 3. Сла́ва, свята́го; И ны́не, Богородичен настоящаго гласа. На литии стихиры храма, таже стихиры стиховныя предпразднства вечерния. Сла́ва, предпразднства, иже писан на Господи, воззва́х: И ны́не, иже писан на утрени на стиховне. На стиховне стихиры воскресны: Сла́ва, и ны́не, предпразднства. На благослове́нии хлебов, тропарь, Богородице Де́во, дважды: и предпразднства, единожды: и чтение.

На утрени, на Бог Госпо́дь, тропарь воскресен дважды: Сла́ва, свята́го: И ны́не, предпразднства. По кафизмах седальны воскресны и Богородичны их и чтение во Евангелии. Посем поем непорочны, и ипакои, и чтение. Степенна гласа. Таже проки́мен и Вся́кое дыхание: и Евангелие воскресно. Таже Воскресение Христово: и псалом 50, и стихира воскресна. Канон воскресен со ирмосом на 4 и Богородице на два: и предпразднства на 4, и мученика на 4. Катавасия праздника: Сушу глу́бородительную землю: По 3-й песни кондак и икос предпразднства и седа́лен свята́го: Сла́ва, и ны́не, предпразднства. По 6-й песни кондак и икос воскресен. На 9-й песни поем Честнейшую: Светилен воскресен: Сла́ва, мученика: И ны́не, предпразднства. На хвалитех стихиры воскресны 4, восточен, Анатолиев, един: и предпразднства 3 стиховныя, с припевы их. Сла́ва, стихира евангельская: И ны́не, Преблагослове́нна еси́: Славословие великое. Тропарь воскресен, и ектении, и отпуст, и оглашение, и обычное исхождение в притвор, и час 1-й. На 1-м часе тропарь воскресен. Сла́ва, предпразднства: И ны́не, Богородичен часов. По О́тче наш, кондак предпразднства, и конечный отпуст. На 3-м часе тропарь воскресен, Сла́ва, мученика: И ны́не, Богородичен часов. По О́тче наш, кондак воскресен. Такожде и на прочих часех глаголем прежде тропарь воскресен, а предпразднства, и мученика, пременяюще, глаголем тропари. Кондак же глаголем воскресен и предпразднства, пременяюще.

На Литургии: Блаженны Октоиха на 4: и предпразднства песнь 3-я на 4: и свята́го песнь 6-я на 4. По входе тропарь воскресен, и предпразднства: таже храма свята́го и мученика: Кондак воскресен и храма свята́го: Сла́ва: мученика: И ны́не: предпразднства. Проки́мен, Апостол, аллилуия и Евангелие, прежде недели, потом свята́го.

Подобает ведати: аще случится предпразднство Сретения Господня в неделю фарисеову, или блуднаго, или мясопустную.

В субботу на малой вечерни стихиры воскресны и Богоро́дицы, по обычаю.

ЗРИ: На велицей вечерни, стихиры воскресны 3: и восточен, Анатолиев, един: и Триоди 3: и предпразднства 3. Аще ли неделя мясопустная, стихиры воскресны 3: и Триоди 4: и предпразднства 3: Сла́ва, Триоди. И ны́не, Богородичен 1-й гласа. На литии стихира храма: и предпразднства, стиховна вечерняя. Сла́ва, Триоди: И ны́не, предпразднства, стиховны утренния. На стиховне стихиры воскресны: Сла́ва, Триоди: И ны́не, предпразднства. На благослове́нии хлебов: тропарь, Богородице Де́во, дважды: и предпразднства единожды: и Буди имя Господне, трижды: и чтение. А идеже несть всено́щнаго бдения, по Ны́не отпущаеши: тропарь воскресен: Сла́ва, и ны́не, предпразднства. На повечерии, по Достойне и по О́тче наш, кондак предпразднства. Сла́ва, и ны́не, кондак Триоди.

На утрени: На Бог Госпо́дь: тропарь воскресен дважды: Сла́ва, и ны́не, предпразднства и прочее и до канона воскресно. Канон воскресен со ирмосом на 4: и Богородице на два: и предпразднства на 4: и Триоди на 4. Катавасия праздника.

ЗРИ: Аще ли неделя мясопустная: Канон воскресен на 4: и предпразднства на 4: и Триоди на 6. Катавасия Триоди. По 3-й песни кондак и икос предпразднства и седа́лен Триоди дважды. Сла́ва, и ны́не, предпразднства. По 6-й песни кондак и икос Триоди. На 9-й песни поем Честнейшую: Светилен воскресен: Сла́ва, Триоди: И ны́не, предпразднства. На хвалитех стихиры воскресны 5, и Триоди 3, с припевы их.

ЗРИ: Аще ли неделя мясопустная: И поем стихиры воскресны 4: и Триоди с припевы их 4. Сла́ва, Триоди: И ны́не, Преблагослове́нна еси́: Славословие великое. Тропарь воскресен, и ектении́, и отпу́ст. Таже, Сла́ва, и ны́не, стихира евангельская: и час 1-й, в притворе.

На часе́х тропарь воскресен: Сла́ва, предпразднства: И ны́не, Богородичен, часов. По трисвятом кондак предпразднства и Триоди, пременяюще, глаголем.

На Литургии: Блаженны гласа на 4: и Триоди песнь 3-я, на 4: и предпразднства песнь 6-я на 4. По входе тропарь воскресен и предпразднства: Сла́ва, кондак Триоди: И ны́не, предпразднства. Проки́мен гласа. Апостол, Евангелие и причастен дне.

Свята́го же Трифона служба поется, егда́ настоятель разсу́дит.

ЗРИ: Аще случится предпразднство Сретения Господня в субботу мясопустную.

Тогда поем службу предпразднства Сретения Господня прежде в пяток тоя недели со святым Киром, и Иоанном, и Трифоном вкупе. На Господи, воззва́х: стихиры предпразднства 3: и безмездников 3. Слава, безмездников: И ны́не, предпразднства. На стиховне стихиры предпразднства: Слава, безмездников: И ныне, предпразднства.

На утрени по кафизмах седальны предпразднства. Канон предпразднства со ирмосом на 6: и святых два канона на 8. Трифона же стихиры на хвалитех поем на 4: Сла́ва, емуже, писана на Господи, воззва́х: И ны́не, предпразднства. На стиховне предпразднства и прочее, по обычаю.

ЗРИ: Службу же умерших поем на ряду, по обычаю, в субботу мясопустную, якоже и всегда.

Аще случится предпразднство Сретения Господня в понедельник, или во вторник, или в четверток сырныя недели.

На Господи, воззва́х: стихиры предпразднства 3, и свята́го 3: Сла́ва, свята́го: И ны́не, предпразднства. На стиховне Триоди самогласен дважды и мученичен: Сла́ва, и ны́не, предпразднства. По трисвятом тропарь святаго: Слава, и ныне, предпразднства. На повечерии по Достойне кондак предпразднства.

ЗРИ:На утрени, на Бог Госпо́дь, тропарь предпразднства дважды: Сла́ва, свята́го: И ны́не, предпразднства. По 1-й кафизме ектения, и седален предпразднства. По 2-й кафизме седален Триоди без ектений. Канон предпразднства со ирмосом на 8: и свята́го на 4. А идеже приспеет трипеснец, и поем канон предпразднства со ирмосом на 4, и святаго 3 стиха на два, и Триоди на 8. Катавасия Триоди. По 3-й песни кондак, и икос, и седа́лен свята́го: Сла́ва, и ны́не, предпразднства. По 6-й песни кондак и икос предпразднства. По 9-й песни светилен святаго: Слава, и ныне, предпразднства. На стиховне Триоди самогласен дважды и мученичен, Слава, и ныне, предпразднства. По Благо есть и по трисвятом тропарь свята́го: Сла́ва, и ны́не, предпразднства. На часех тропарь предпразднства: Слава, святаго: И ныне, Богородичен часов. По трисвятом кондак глаголем предпразднства, непременно.

На Литургии: Блаженны от канона предпразднства, песнь 3-я: и святаго 6-я. По входе тропарь предпразднства, и храма святаго, и святаго, таже кондак храма свята́го: Слава, святаго: И ныне, предпразднства. Прокимен, Апостол, Евангелие и причастен дне, и святаго.

Подобает ведати: аще случится предпразднство Сретения Господня в среду или в пяток сыропустныя недели.

Во вторник вечера, на Господи, воззва́х: стихиры предпразднства 3, и свята́го 3: Сла́ва, свята́го: И ны́не, предпразднства. На стиховне самогласен Триоди дважды и мученичен с припевы обычными: Сла́ва, и ны́не, предпразднства. По трисвятом тропарь святаго: Слава, и ны́не, предпразднства. Ектения, и поклоны 3 великий, и отпуст. Повечерие же поем великое от Внегда́ призвати ми; на немже поем трипеснец утренний Триоди первый по Достойне, и по трисвятом кондак предпразднства, и 3 поклоны великия, и молитва, и обычный отпу́ст.

ЗРИ:На утрени, на Бог Госпо́дь:тропарь предпразднства дважды: Сла́ва, свята́го: И ны́не, предпразднства. По 1-й кафизме седа́лен предпразднства. По 2-й кафизме седа́лен Триоди дважды: Сла́ва, и ны́не, Крестобогородичен, без ектении. Канон предпразднства со ирмосо́м на 6: и свята́го на 4: и Триоди на 4. Егда́ же приидет трипеснец, и поем канон предпразднства со ирмосо́м на 4: и свята́го 3 стиха на два: и Триоди на 8, настоящего канона рядовая песнь на 4: и втораго трипеснца на 4. Первый же трипеснец предпет на повечерии. По 3-й песни, кондак свята́го и седа́лен его. Сла́ва, и ны́не, предпразднства. По 6-й песни, кондак предпразднства и икос. По 9-й песни светилен свята́го. Сла́ва, и ны́не, предпразднства. На стиховне Триоди самогласен дважды и мученичен. Сла́ва, и ны́не, предпразднства: ектения, и поклоны 3 великия без отпуста, и час 1-й. На 1-м часе тропарь предпразднства. Сла́ва, свята́го: И ны́не, Богородичен часов и прочее все, по обычаю, и по коемждо часе творим 3 поклоны великия. На 6-м часе тропарь обычный и чтение дне. Вечерня же праздника бывает во свое время. Сице поем службу предпразднства, аще случится и в пяток: вечер и утро неизменно. На повечерии трипеснец утренний первый гласа 6-го.

ЗРИ: Аще случится предпразднство Сретения Господня в субботу сыропустную.

Вечер кафизма рядовая. На Господи, воззвах: стихиры на 6: предпразднства 3: и отцев Триоди 3. Сла́ва, отцев: И ны́не, Богородичен 1-й, гласа. Вход, проки́мен дне, и чтение Триоди, и проки́мен: Да уповает Израиль на Господа. На стиховне Триоди самогласен дважды и мученичен. Сла́ва, отцев. И ны́не, предпразднства. По Ны́не отпущаеши и по трисвятом тропарь отцев. Сла́ва, и ны́не, предпразднства, ектения и отпу́ст. На повечерии по Достойне и по трисвятом, кондак отцев: Сла́ва, и ны́не, предпразднства.

На утрени, на Бог Госпо́дь, тропарь предпразднства, дважды: Сла́ва, отцев: И ны́не, предпразднства. По кафизмах седальны оба отцев: И ны́не, предпразднства. Канон предпразднства со ирмосо́м на 6, ирмо́с по дважды, и отцев на 8. Катавасия, ирмо́с Триоди: вторыя же песни ирмо́с Триоди поем единожды, последи́ же покрываем те́мже ирмосом. По 3-й песни кондак и икос предпразднства и седа́лен отцев. Сла́ва, и ны́не, предпразднства. По 6-й песни кондак и икос отцев. Светилен отцев: Сла́ва, и ны́не, предпразднства. На хвалитех стихиры отцев, на 4. Сла́ва, отцев: И ны́не, предпразднства. Славословие великое и прочее утрени. На часе́х тропарь предпразднства: Сла́ва, отцев: И ны́не, Богородичен часов. Кондаки же предпразднства, и отцев глаголем, пременяюще.

На Литургии: Блаженны предпразднства, песнь 3-я, на 4: и отцев, песнь 6-я, на 4. По входе тропарь предпразднства и отцев. Сла́ва, кондак отцев: И ньше, предпразднства: и прочая вся служба дне и отцев. Мученика же Трифона служба поется на повечерии, или егда́ настоятель разсудит.

Святой мученик Трифон (†250)

Родился в одной из областей Малой Азии – Фригии, неподалеку от города Апамеи, в селении Кампсада. Его родители были простые и благочестивые крестьяне. В детстве он пас гусей и образования не получил. Но святой Трифон еще ребенком сподобился от Господа дара чудотворения: он изгонял бесов, исцелял недуги и своей молитвой творил многие иные благодеяния.

Однажды жители родного села святого Трифона были спасены им от голода: силой своей детской молитвы святой заставил уйти вредных насекомых, истреблявших посевы. На основании этого чуда в Церкви установлен особый чин молитвенного обращения к святому Трифону, который совершается при нападении вредителей на посевы или насаждения.

Особенно прославился святой Трифон изгнанием беса из дочери римского императора Гордиана (238–244). В молодую, умную и красивую царевну вселился бес и тяжко мучил ее. Однажды он прокричал, что только Трифон может изгнать его. Император приказал разыскать чудотворца и доставить в Рим. В ту пору святому Трифону было 16 лет. Когда святой приблизился к Риму на расстояние трех дней пути, лукавый дух не смог вынести его приближения и вышел из дочери Гордиана. Святого Трифона привели к императору, окруженному придворной знатью. Он очию, желая убедиться, что юноша действительно исцелил царевну. После уединенной молитвы к Богу и строгого поста в течение шести дней, святой Трифон приказал нечистому духу явиться зримо императору и его приближенным. В Четиих-Минеях Святителя Димитрия Ростовского (†1709) об этом повествуется так: «Святой Трифон исполнен сый Духа Свята, и умными очесы на невидимаго духа смотряяй, рече: тебе глаголю, душе нечистый, во Имя Господа моего Иисуса Христа явись очевидно сущим зде, и покажи им скаредный и безстудный свой образ, и немощь свою исповеждь. И абие явися диавол пред всеми во образе пса черна, имущ очи а́ки огненны, главу влекий по земли...». На вопрос святого Трифона, как он дерзнул вселиться в создание Божие, бес ответил, что над христианами он такой власти не имеет, а может мучить только тех, «кто следует своим похотям и дела, угодные нам, творит». Услышав это, многие из присутствовавших оставили идолопоклонство и уверовали во Христа. Щедро одаренный императором, святой Трифон вернулся на родину. Все полученные дары он раздал по дороге нищим.

Когда на царский престол вступил император Декий (249–251), жестокий гонитель христиан, было донесено его епарху Аквилину, что святой Трифон смело проповедует христианство и многих приводит ко Крещению. Услышав о том, что его ищут царские слуги, святой Трифон не стал укрываться, но сам отдал себя в руки гонителей. Приведенный на суд к Аквилину в г. Никею, он смело исповедовал свою веру во Христа. Аквилин не смог запугать юного Трифона никакими угрозами. Тогда епарх приказал связать святому мученику руки, подвесить его на дереве и бить в течение трех часов. За время избиения не услышал мучитель ни одного стона мученика. После этого святой Трифон был брошен в темницу.

Через некоторое время Аквилин еще раз применил угрозы и уговоры, а затем, видя безуспешность своих усилий, подверг мученика новым истязаниям. Тело святого Трифона терзали железными крючьями, обжигали раны огнем, вбили в ноги железные гвозди и водили по городу. А когда мученика заставили идти вслед за конем, на котором епарх отправился на охоту, святой Трифон пел следующие стихи из псалмов пророка Давида: «Соверши стопы моя во стезях Твоих, да не подвижутся стопы моя... Стопы моя направи, Господи, по словеси Твоему, и да не обладает мною всякое беззаконие» (Пс. 16:5, 118:133). Повторял он часто и слова первомученика святого архидиакона Стефана: «Господи, не вмени им греха сего» (Деян. 7,60).

Господь укреплял Своего избранника, и он мужественно переносил все пытки. Во время мучений перед святым предстал Ангел с драгоценным венцом в руках. Увидев это, мучители испугались, но Аквилин еще более ожесточился. На следующий день он продолжил пытки, после которых приговорил мученика Трифона к усечению мечом. Перед смертью святой благодарил Бога, укреплявшего его в страданиях.

Древнее Житие передает такие слова святого мученика к Богу: «...Приими в мире душу мою, всех же, иже мя, раба Твоего, воспоминати будут, и в память мою Святыя Жертвы принесут Тебе, услыши с высоты Святыни Твоея, и призри на них от Святаго Жилища Твоего, подая им изобильная и нетленная дарования, яко Един еси Благ и Щедрый Податель во веки веков». Святой отошел ко Господу прежде, чем была отсечена его честная глава.

Тело мученика христиане хотели предать земле в городе Никее – месте его страданий. Но святой Трифон в видении велел перенести его тело на родину, в селение Кампсаду. Воля святого мученика была исполнена. Впоследствии мощи святого Трифона были перенесены в Константинополь, а затем – в Рим.

Большим почитанием пользуется святой мученик Трифон в Русской Православной Церкви.

Существует предание что при царе Иоанне Грозном (1533–1584) во время охоты улетел любимый царский кречет. Царь приказал сокольнику Трифону Патрикееву найти улетевшую птицу и пригрозил смертью за неисполнение приказа. Сокольник Трифон объехал окрестные леса, но безуспешно. На третий день, утомленный долгими поисками, он прилег отдохнуть, усердно попросив помощи у своего покровителя – святого мученика Трифона. Во сне он увидел юношу на белом коне, державшего на руке царского кречета. Этот юноша произнес: «Возьми пропавшую птицу, поезжай с Богом к царю и ни о чем не печалься». Проснувшись, сокольник увидел неподалеку на сосне кречета, которого искал. Он тут же отвез его к царю и рассказал о чудесной помощи, полученной им от святого мученика Трифона. Вскоре на том месте, где было явление святого, сокольник Трифон Патрикеев построил часовню, а затем и церковь во имя святого мученика Трифона.

В настоящее время глава святого мученика хранится в городе Которе (Черногория), в кафедральном соборе святого Трифона. Часть мощей в 1803 году была оттуда привезена в Россию. В 1819 году эта святыня была вложена в трех ковчежцах в икону святого мученика Трифона, находившуюся в построенной в его честь церкви. Ныне эта икона находится в храме в честь Знамения Пресвятой Богоро́дицы, у Рижского вокзала в Москве, неподалеку от места явления святого Трифона сокольнику.


Источник: Минея - М. : Издательский Совет Русской Православной Церкви, 2002-. 12 том. / Минея февраль. - 2002. - 812 с.

Комментарии для сайта Cackle