[Глава 23] Слу́жба о́бща преподо́бным жена́м двема́ и мно́гим

Ве́чера,

на Го́споди воззва́х, стихи́ры, гла́с 1.

Подо́бен: Небе́сных чино́в:

Я́ко Богозра́чныя лучи́ свы́ше сия́юще, ꙳ мы́сленными луча́ми просвеща́ете ми́р, ꙳ тьму́ прогоня́ете, ꙳ бесо́вския лука́выя полки́: ꙳ те́м светоно́сное и Боже́ственное ꙳ ва́ше пра́зднество пра́зднуем.

Ра́йския добро́ты узре́вше, ꙳ и бога́тно напита́вшеся всечестны́я, ꙳ нетле́нныя цве́ты прозябо́сте ми́рови, ꙳ ра́зума Боже́ственнаго. ꙳ Его́же причаща́ющеся дне́сь духо́вною любо́вию, ꙳ душе́вное вся́ко благопло́дие содева́ем.

Мона́шеским житие́м украси́сте ꙳ по́стническая мно́жества, ꙳ возсия́вше я́ко со́лнце все́м. ꙳ Те́мже с ни́ми прославля́етеся пречестны́я, ꙳ наслажда́ющеся сла́вы Боже́ственныя, ꙳ и моля́щеся спасти́ся на́м.

Сла́ва, и ны́не, Богоро́дичен:

Прегреше́ний пучи́ною обурева́емь, к ти́хому приста́нищу Пречи́стыя Твоея́ моли́твы прибе́г, Богороди́тельнице, взыва́ю Ти́: спаси́ мя, держа́вную Твою́ просте́рши десни́цу рабу́ Твоему́ Всенепоро́чная.

Крестобогоро́дичен: Се́ у́бо ви́дех копие́м пробо́дшее се́рдце Мое́ Ча́до: я́коже прореко́ша ми́ дре́вле, егда́ Тя узре́х все́х сыно́в земны́х красне́йша: на Кресте́ бо во́лею с разбо́йники, я́ко злоде́й, обе́шен бы́л еси́ Христе́.

А́ще и́мать самогла́сен, Сла́ва, гла́с 8:

Вы́ сле́зными излия́нии плотски́х сласте́й разжже́ния угаси́сте, и Боже́ственнаго раче́ния возгне́щше жела́ние, возлюби́сте Царя́ Христа́, безстра́стно тому́ сочта́стеся: те́м ны́не разу́мно в черто́г внидо́сте, рачи́телю за чту́щих ва́с помоли́теся.

И ны́не, Богоро́дичен:

Влады́чице, приими́ моли́твы ра́б Твои́х, и изба́ви на́с от вся́кия ну́жды и печа́ли.

А́ще пра́зднуеши с полиеле́ем, глаго́ли Богоро́дичен воскре́сный: Ца́рь Небе́сный за человеколю́бие:

Вхо́д. Проки́мен дне́.

Чте́ния три́, му́ченическая, [пи́саны в конце́ кни́ги сея́].

На стихо́вне стихи́ры, гла́с 4.

Подо́бен: Я́ко до́бля:

Те́сным ше́ствовавше путе́м, ꙳ нево́лненным ду́хом, ꙳ к животу́ веду́щим препла́вающе, ꙳ по́стниц бо вы́ бы́сте ꙳ похвала́ преподо́бнии, ꙳ кре́пко низложи́сте бесо́вская ловле́ния. ꙳ Те́м получи́вше ꙳ небе́снаго Ца́рствия насле́дницы бы́ти, ꙳ и непрестаю́щия наслажда́етеся красоты́.

Сти́х: Ди́вен Бо́г во святы́х Свои́х, Бо́г Изра́илев.

Пресве́тлое житие́ ва́ше ꙳ а́нгелы удиви́, ꙳ и бесо́вская шата́ния я́ве устраши́: ꙳ ве́рных же собра́ния све́тло украси́, ꙳ к небе́сному Христо́ву жили́щу повелева́я ше́ствовати всегда́. ꙳ Его́же моли́те, от тли́ и бе́д изба́витися ве́рою творя́щым всечестну́ю па́мять ва́шу.

Сти́х: Честна́ пред Го́сподем сме́рть преподо́бных Его́.

Пе́ние и похвалу́ Христу́ принося́ще ꙳ на вся́к де́нь преподо́бнии, ꙳ в пусты́ни жи́тельствующе, ꙳ еди́ному Бо́гу возложи́вше ду́шы и помышле́ния, ꙳ я́ко вели́кий Моисе́й, ꙳ в незаходи́мая внидо́сте: ꙳ те́м победи́сте неви́димаго врага́, ꙳ и бы́сте чи́стое прия́телище ꙳ Боже́ственнаго Ду́ха.

Сла́ва, гла́с 4:

Отрокови́цы возлюби́ша неве́стника Го́спода, и Того́ уче́нию покаря́ющеся, и плотску́ю сла́бость презре́вше о ду́се, усе́рдием благоче́стным стра́сти удержа́ша, и введо́шася с ва́ми преподо́бнии в черто́г небе́сный, веселя́щеся.

И ны́не, Богоро́дичен:

Свеще́ неугаси́мая, Престо́ле пра́ведный, пречи́стая Влады́чице, моли́ спасти́ся душа́м на́шым.

Крестобогоро́дичен: Не рыда́й мене́ Ма́ти, зря́щи на дре́ве ви́сяща Твоего́ Сы́на и Бо́га, над вода́ми пове́сившаго зе́млю неде́ржно, и всю́ тва́рь созда́вшаго: воста́ну бо и просла́влюся, и а́дова ца́рства сокрушу́ кре́постию и погублю́ того́ си́лу, и у́зники изба́влю от того́ злоде́йства, я́ко Благоутро́бен, и Отцу́ моему́ приведу́ я́ко Человеколю́бец.

Тропа́рь преподо́бным жена́м. Гла́с 2:

И́стинному жела́нию уневе́стившеся хХристосла́внии, и вре́меннаго обру́чника отве́ргшеся совокупле́ния, и доброде́тельными по́двиги возра́стше, на высоту́ востеко́сте нетле́ния, красноду́шнии и многобога́тнии, столпи́ мона́шествующих же́н и пра́вило: те́мже о на́с моли́те непреста́нно, любо́вию ва́шу па́мять пра́зднующих.

Сла́ва, и ны́не, Богоро́дичен, или́ Крестобогоро́дичен.

На у́трени,

на Бо́г Госпо́дь, тропа́рь то́йже.

По 1-й кафи́сме, седа́лен, гла́с 3.

Подо́бен: Красоте́ де́вства:

Мирску́ю красоту́ преподо́бнии оста́висте, премени́вше бога́тством тле́ющим непреходи́мое я́ве и пребыва́ющее святи́и: те́мже со все́ми святы́ми сла́вим, и торжеству́ем свяще́нную па́мять ва́шу, прося́ще обрести́ моли́твами ва́шими блаже́ннии, ве́лию ми́лость. [Два́жды.]

Сла́ва, и ны́не, Богоро́дичен:

Недомы́сленно и непостижи́мо е́сть, Влады́чице Богора́дованная, е́же соде́ланное о Тебе́ стра́шное Бо́жие та́инство: и́бо Необыме́ннаго заче́нши родила́ еси́, пло́тию обложе́на от пречи́стых крове́й Твои́х: Его́же всегда́ Чи́стая, я́ко Сы́на Твоего́, моли́ спасти́ся душа́м на́шым.

По 2-й кафи́сме седа́лен, гла́с 5.

Подо́бен: Собезнача́льное:

Воздержа́нием житие́ свое́ украси́вше, и у́ды умертви́вше, победи́сте вра́жия прило́ги преподо́бнии, и пусты́ни насе́льницы, свети́льницы же ми́ру разу́мнии яви́стеся блаже́ннии: те́м моли́теся Го́сподеви поми́ловати ду́шы на́ша. [Два́жды.]

Сла́ва, и ны́не, Богоро́дичен:

Тя́ приста́нище и сте́ну, и прибе́жище и наде́жду, и покро́в, и предста́тельницу те́плу, обре́тше ве́рнии, к Тебе́ прибега́ем, и вопие́м приле́жно, и взыва́ем ве́рно: поми́луй Богоро́дице, на Тя́ упова́ющыя, и от прегреше́ний изба́ви.

По Хвали́те и́мя Госпо́дне:

Припе́в:

Ублажа́ем ва́с преподо́бнии ма́тери, и чте́м святу́ю па́мять ва́шу: вы́ бо мо́лите за на́с Христа́ Бо́га на́шего.

Псало́м избра́нный: Терпя́ потерпе́х Го́спода:

По полиеле́и седа́лен, гла́с 8.

Подо́бен: Повеле́нное:

В моли́твах та́йных бдя́ще, и насла́ждшеся писа́нии Богодохнове́нными блаже́ннии, на ра́му взя́ша Госпо́день кре́ст, и сему́ после́дующе воздержа́тельно, всю́ ле́сть зми́еву низложи́ша, зову́ще Христу́: Женише́ небе́сный, Ты́ бу́ди на́м утвержде́ние. [Два́жды.]

Сла́ва, и ны́не, Богоро́дичен:

И́же на́с ра́ди рожде́йся от Де́вы, и распя́тие претерпе́в благи́й, испрове́ргий сме́ртию сме́рть, и воскресе́ние явле́й Бо́г, не пре́зри я́же созда́л еси́ руко́ю Твое́ю: яви́ человеколю́бие Твое́ Ми́лостиве: приими́ ро́ждшую Тя́ Богоро́дицу моля́щуюся за ны́, и спаси́ Спа́се на́ш лю́ди отча́янныя.

Степе́нна, 1-й антифо́н 4-го гла́са.

Проки́мен: Ди́вен Бо́г во святы́х Свои́х, Бо́г Изра́илев.

Сти́х: В це́рквах благослови́те Бо́га, Го́спода от исто́чник Изра́илевых.

Вся́кое дыха́ние:

Ева́нглие, [пи́сано в конце́ кни́ги сея́].

По 50-м псалме́ стихи́ра, гла́с 8:

Вы́ сле́зными излия́нии: пи́сана Сла́ва, на Го́споди воззва́х.

Кано́н, гла́с 8.

Пе́снь 1.

Ирмо́с: Колесницегони́теля фарао́ня погрузи́, чудотворя́й иногда́ Моисе́йский же́зл, крестообра́зно порази́в, и раздели́в мо́ре: Изра́иля же беглеца́, пешехо́дца спасе́, пе́снь Бо́гови воспева́юща.

Плотско́ю не́мощию си́льнаго врага́ низложи́сте и присво́истеся к Бо́гу преподо́бныя жены́, моля́щеся, си́лу все́м на́м пода́ти спаси́тельную.

Уязви́стеся добро́тою Женихо́вою, и во сле́д его́ прилепи́стеся псало́мски, после́дующе живоно́сным стопа́м Его́: и сего́ ра́ди низложи́сте врага́ зми́я.

Увяди́вше труды́ по́стническими теле́сныя добро́ты, украси́сте ва́шя ду́шы: и со Христо́м Женихо́м в черто́ги све́тлыя внидо́сте преподо́бныя.

Богоро́дичен: Неве́стник показа́ся светови́ден утро́ба Твоя́ Де́во, ми́лости ра́ди теле́сно из Тебе́ воплоти́вшагося Го́спода, и вся́ческая Богоразу́мия луча́ми просве́щшаго.

Пе́снь 3.

Ирмо́с: Небе́снаго кру́га верхотво́рче Го́споди, и це́ркве зижди́телю, ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Презре́сте добро́ты теле́сныя пречестны́я, и мимогряду́щую сла́ву я́ко со́н вмени́сте: во смире́нии же и поще́нии Бо́га взыска́сте, Богоблаже́нныя.

Сия́ют преподо́бных же́н свяще́нныя мо́щи, подаю́ще исцеле́ние ве́рою к си́м притека́ющым, благода́ть поче́рпше от исто́чник спаси́тельных, сего́ во́льным страсте́м поревнова́вше.

Отверго́стеся ми́ра, и пло́ти мудрова́ния, воздержа́нием же и труды́ стяжа́вше Христа́ Жениха́ пречи́стаго, черто́г небе́сный подаю́щаго ва́м Боже́ственнаго наслажде́ния.

Богоро́дичен: Свяще́нных проро́к свяще́нныя трубы́ дре́вле Тя́ провозвести́ша, две́рь све́та ро́ждшую, и сви́ток одушевле́нный, на не́мже не рука́ми Сло́во написа́ся, па́че сло́ва пречи́стая Де́во.

Седа́лен, гла́с 4:

На ра́мо взе́мше кре́ст Христо́в, после́довасте ему́ де́лы по́стническими благове́рно, всесве́тлыя и преподо́бныя, и все́м жена́м по́стничествующым че́стно яви́стеся пра́вило всечестны́я: но Боже́ственными труды́ вы́шнее Ца́рствие насле́довасте. Непреста́нно моли́те, спасти́ся душа́м на́шым.

Сла́ва, и ны́не, Богоро́дичен:

Сло́во О́тчее Христа́ Бо́га на́шего от Тебе́ воплоти́вшагося позна́хом Богоро́дице Де́во, еди́на чи́стая, еди́на благослове́нная. Те́м непреста́нно Тя́ воспева́юще велича́ем.

Крестобогоро́дичен: Из безнача́льнаго Отца́ рожде́ннаго, в после́дняя времена́ пло́тию ро́ждшая, на Кресте́ Тя ви́сяща зря́щи Христе́, увы́ мне́ любе́знейший Иису́се, вопия́ше: ка́ко сла́вимый я́ко Бо́г от а́нгел, от беззако́нных ны́не челове́к, Сы́не хотя́ распина́ешися! пою́ Тя Долготерпели́ве.

Пе́снь 4.

Ирмо́с: Услы́шах Го́споди, смотре́ния Твоего́ та́инство, разуме́х дела́ Твоя́, и просла́вих твое́ Божество́.

Добро́ту пречи́стую люби́маго Жениха́ своего́ ви́дят преподо́бныя жены́, увяди́вше плотску́ю добро́ту воздержа́нием.

Дрема́ние отри́нувше от душе́вных ве́ждей свяще́нныя жены́, успи́сте двиза́ния теле́сная воздержа́нием.

Све́тлое ва́ше пра́зднество, све́том Бо́жия Ду́ха сия́ющее, озаря́ет ду́шы на́ша, ве́рою чту́щих ва́с преподо́бныя.

Богоро́дичен: Воплоти́вшагося Тебе́ Го́споди, от пречи́стыя Де́вы, преподо́бныя возлюби́вше, в воню́ ми́ра Твоего́ потеко́ша, Твое́ю уязви́вшеся Боже́ственною любо́вию.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тьма́ окая́ннаго? но обрати́ мя, и к све́ту за́поведей Твои́х пути́ моя́ напра́ви, молю́ся.

Неду́ги реша́ще вся́ си́лою Свята́го Ду́ха, отго́ните боле́зненный мра́к заря́ми пресла́вными чуде́с ва́ших, и к вели́кому све́ту небе́снаго Ца́рствия ве́рных наставля́ете, всечестны́я.

Умертви́вшеся ми́рови, насле́довасте жи́знь безсме́ртную: и черто́га Боже́ственнаго сподо́бистеся Богоблаже́нныя, свещы́ ва́шя по́стническим еле́ем неугаси́мы соблю́дше, всечестны́я.

О маловре́менней и тле́ющей небре́гше жи́зни, су́щым на земли́ оста́вльше сию́, связа́стеся любо́вию духо́вною блаже́нныя. Те́мже ны́не водворя́етеся, иде́же пра́ведных селе́ния.

Богоро́дичен: Бо́жие Бо́г Сло́во во утро́бу неискусобра́чную во́лею всели́ся, и челове́к узре́н бы́сть, и́же Де́вою соблюды́й Тя́ Пречи́стая: Его́же жела́юще отрокови́цы, по́стнически сему́ после́доваша житие́м све́тлым.

Пе́снь 6.

Ирмо́с: Моли́тву пролию́ ко Го́споду, и Тому́ возвещу́ печа́ли моя́, я́ко зо́л душа́ моя́ испо́лнися, и живо́т мо́й а́ду прибли́жися, и молю́ся я́ко Ио́на: от тли́ Бо́же возведи́ мя.

Воздержа́ние и смире́нное се́рдце, бде́ние с ми́лостынею, ра́зум и ве́ру, и соверше́нну любо́вь стяжа́вше свяще́нныя жены́, бы́сте хра́м Бо́жий, и чуде́с исто́чник неоску́дный.

Устрани́вше себе́ жите́йских сласте́й, терпе́нием боле́зней по́стнических, на зе́млю соше́дшаго на́с ра́ди, и во́лею стра́нствовавша вы́ честны́я, сего́ ра́ди стяжа́сте на небесе́х, странноприи́мствовавша ва́с досточу́дныя.

Успи́сте стра́сти душетле́нныя мно́гими бде́нии, всечестны́я: и пра́ведных досто́йно усну́сте сно́м, за ми́р моля́щеся.

Богоро́дичен: Предста́тельницу Тя́ живота́ ве́м, и храни́тельницу тве́рду Де́во, и напа́стей реша́щу молвы́, и нало́ги бесо́в отгоня́ющу: и молю́ся всегда́, от тли́ страсте́й мои́х изба́вити мя́.

Конда́к во уста́ве.

А́ще ли не́сть уста́ва, глаго́ли се́й конда́к, гла́с 2:

Телеса́ своя́ посто́м изнури́вше, и неусы́пными моли́твами моля́ще Зижди́теля о гресе́х свои́х, я́ко да прии́мете соверше́нное проще́ние, и прия́сте Боже́ственное оставле́ние, и Ца́рствие Небе́сное: моли́те Христа́ Бо́га о все́х на́с.

И́кос: Затворя́яй бе́здну и отверза́яй ю́, вознося́й во́ду во о́блацех и дава́яй до́ждь на лице́ земли́, ты́ Бо́же, да́руй и непло́дней мое́й души́, во отверзе́ние у́ст сло́во благосочета́нное, и гугни́вому язы́ку я́сное глаго́лание, да возмогу́ досто́йно воспе́ти Твоя́ преподо́бныя, и́хже Ты́ са́м просла́вил еси́. Ти́и бо Тебе́ ра́ди кра́сная ми́ра сего́ презре́ша, и пло́ти своя́ изнури́ша, и Твое́ю кре́постию диа́вола победи́ша, и от Тебе́ прия́ша терпе́ния венцы́. И ны́не предстоя́ще на небесе́х со все́ми святы́ми, мо́лятся непреста́нно о все́х на́с.

Пе́снь 7.

Ирмо́с: От Иуде́и доше́дше о́троцы в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же благослове́н еси́.

Сла́ву тле́ющую на нетле́нную премени́ша любо́вию преподо́бныя, ея́же наслажда́ющеся при́сно ра́дующеся и веселя́щеся пою́т: благослове́н Бо́г оте́ц на́ших.

Зве́зды многосве́тлыя я́вльшеся, све́том трудо́в ва́ших просвеща́юще ду́шы ве́рных, науча́ете пе́ти: благослове́н Бо́г оте́ц на́ших.

Река́ яви́стеся исцеле́ния, страстна́го мо́ря потопля́юще, спаси́те пою́щих: благослове́н Бо́г оте́ц на́ших.

Богоро́дичен: Изба́ви от у́з грехо́вных окая́нную мою́ ду́шу Богороди́тельнице, и любви́ Бо́жией соверше́нней припрязи́: я́ко да ве́рою сла́влю Тя́, и пою́ во ве́ки.

Пе́снь 8.

Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те вся́ дела́ Госпо́дня Го́спода.

Помысло́м повину́сте де́вы, стра́сти безслове́сныя, и к Жениху́ Сло́ву мы́сленно причта́стеся, пою́ще: благослови́те вся́ дела́ Го́спода, и превозноси́те Его́ во ве́ки.

Распе́ншеся ми́ру, и Бо́жиею любо́вию уязви́вшеся свяще́нныя де́вы, вкуше́нием сла́дким Е́ву уязви́вшаго, воздержа́ния стрела́ми уязви́сте, воспева́юще Христа́ во ве́ки.

Мы́слию преподо́бныя, по́хоти несмы́сленныя покори́сте, и Жениху́ Сло́ву уневе́стистеся без поро́ка честны́я, пою́ще: благослови́те вся́ дела́ Го́спода, и превозноси́те Его́ во ве́ки.

Богоро́дичен: Иису́са ро́ждшая от чи́стых крове́й Твои́х воплоще́нна, де́вы вся́ собрала́ еси́, пречи́стая Де́во Ма́ти, и с ни́ми вопию́щи: благослови́те вся́ дела́ Го́спода, и превозноси́те Его́ во ве́ки.

Пе́снь 9.

Ирмо́с: Вои́стинну Богоро́дицу Тя́ испове́дуем, спасе́ннии Тобо́ю Де́во чи́стая, с безпло́тными ли́ки Тя́ велича́юще.

Кра́сныя Влады́це, и Богоглаго́ливыя го́рлицы, и ла́стовицы све́тлыя и чистолюби́выя, в добро́ты небе́сныя приведе́ни бы́сте.

Сочта́стеся с вы́шними ликостоя́нии, и во избра́нных собо́рех всели́стеся, о на́с моля́щеся, любо́вию ще́дрому Бо́гу.

Па́мять преподо́бных же́н, я́ко со́лнце ми́ру возсия́, ве́рных мы́сли просвеща́ющи, Христа́ велича́ющих при́сно.

Богоро́дичен: Све́та су́щи прия́телище, просвети́ Де́во, омраче́нную страстьми́ ду́шу мою́, и кроме́шния тьмы́ изба́ви мя́ мольба́ми Твои́ми.

Свети́лен.

Соверша́ющих любо́вию моле́бную ва́шу па́мять, преподо́бнии и всечестни́и, к Бо́гу изба́вителю моли́твами ва́шими, от вся́ких бе́д спаси́те: и мне́ душе́вную скве́рну, ма́ло ва́с воспе́вшаго омы́йте.

Богоро́дичен: О на́с моля́щи Сы́на Твоего́ Человеколю́бца Бо́га, не преста́й Де́во: на Тя́ бо наде́жду стяжа́хом, и Твои́м предста́тельством избавля́емся бе́д, и страсте́й, и прегреше́ний, и боле́зней, и́же ве́рою Тя́ сла́вящии.

На хвали́тех стихи́ры, гла́с 4.

Подо́бен: Да́л еси́ зна́мение:

Нетле́нное соблю́дше де́вство свое́ преподо́бныя, ꙳ нескве́рно и чи́сто пожи́вше, ꙳ и бога́тство прии́мше, ꙳ Христо́во испо́лнисте законоположе́ние: ꙳ Ему́же после́довасте, ꙳ зе́млю оста́вльше, и я́же на не́й. ꙳ Те́мже ва́м небе́сная, и не́бо дарова́ Иису́с Человеколю́бец, ꙳ и Спа́с ду́ш на́ших. [Два́жды.]

Любому́дренно душе́вное, ꙳ самодви́жимое и безсме́ртное показа́сте: ꙳ те́мже и потща́стеся нетру́дно, ꙳ скве́рны грехо́вныя и вся́каго ка́ла, ꙳ чи́сти премени́тися сою́з теле́сных, ꙳ ни еди́ныя скве́рны, ꙳ ни вра́ски иму́ще, ꙳ жены́ Богоприя́тныя: ꙳ но чи́сты и нескве́рны Жениху́ своему́ предста́сте.

Заре́ю просвети́шася ꙳ светови́дная ва́ша ли́ца, ꙳ и уме́рше прехва́льнии, ꙳ Христу́ ва́с просла́вльшу, ꙳ я́ко своя́ преподо́бныя Богови́дны ꙳, я́ко ми́лостивны, ꙳ я́ко Боголюби́вы же и благоглаго́ливы. ꙳ Жи́знь бо равноа́нгельну на земли́ пожи́сте, ꙳ и Бо́гу угоди́сте жития́ све́тлостию.

Сла́ва, гла́с 1:

Всю́ теле́сную тя́гость отложи́вше преподо́бныя жены́, воздержа́нием и боле́зньми, к небе́сным оби́телем востеко́сте: в ни́хже люби́мыя ва́ми наслажда́етеся добро́ты неизрече́нныя.

И ны́не, Богоро́дичен:

Ра́дуйся от на́с, свята́я Богоро́дице Де́во, чи́стый сосу́де всея́ вселе́нныя, свеще́ неугаси́мая, вмести́лище невмести́маго, хра́ме необори́мый: ра́дуйся, из Нея́же роди́ся А́гнец Бо́жий, взе́мляй грехи́ всего́ ми́ра.

Крестобогоро́дичен: Воздви́жена Тя́ я́ко ви́де на Кресте́ А́гница непоро́чная Де́ва, пла́чущи вопия́ше: Сла́дкое Мое́ Ча́до, что́ но́вое и пресла́вное виде́ние? ка́ко содержа́й го́рстию вся́ческая, на дре́ве пригвожда́ешися пло́тию?

А́ще и́мать на стихо́вне Сла́ву, глаго́ли вече́рний:

И ны́не, Богоро́дичен, или́ Крестобогоро́дичен.


Источник: Минея общая – М. : Издательский Совет Русской Православной Церкви, 2002. – 516 с. ISBN 5-94625-045-0

Комментарии для сайта Cackle