[Глава 22] Слу́жба о́бща преподо́бней жене́ еди́ней

Ве́чера,

на Го́споди воззва́х, стихи́ры, гла́с 8.

Подо́бен: Му́ченицы Твои́ Го́споди:

В боле́знех по́стнических терпя́щи, прия́ла еси́ благода́ть, душе́вныя и теле́сныя боле́зни очища́ти, ма́ти честна́я, и́мярек, и нечи́стыя ду́хи прогоня́ти ду́хом, и все́м скорбя́щым предста́тельствовати, те́мже твои́ми моли́твами, проси́ исцеле́ния все́м, и ве́лия ми́лости.

Ра́ка моще́й твои́х слепы́м прозре́ние источа́ет, и все́м боля́щым исцеле́ние, приходя́щым ве́рою, и прося́щым посеще́ния твоего́ ма́ти преподо́бная и досточу́дная, и́мярек: те́мже твои́ми моли́твами испроси́ на́м ве́лию ми́лость.

Ми́лование стяжа́ла еси́ ко и́скреннему, ве́ру же правосла́вную, и любо́вь я́же к Бо́гу, Богоблаже́нная честна́я, и́мярек: сего́ ра́ди Бо́жия благода́ть духо́вная, в тебе́ ма́ти преподо́бная, препочи́ла е́сть. Те́мже твои́ми моли́твами сохрани́ ве́рою блажа́щыя тя́.

Сла́ва, и ны́не, Богоро́дичен:

Тя́ мо́лим Пречи́стая, предста́тельницу на́шу, одержи́мии в печа́лех, не пре́зри до конца́ поги́бнути рабо́м Твои́м: но ускори́ изъя́ти на́с от настоя́щаго гне́ва и ско́рби, о Боговмести́мая пресвята́я чи́стая! Ты́ бо еси́ на́м стена́ и по́мощь непобори́ма.

Крестобогоро́дичен: Тя́ ви́дящи пригвожда́ема на Кресте́, Иису́се, и стра́сти прие́млюща во́лею, Де́ва и Ма́ти Твоя́ Влады́ко, увы́ Мне́, вопия́ше, Ча́до сла́дкое: я́звы непра́ведно ка́ко терпи́ши Врачу́ исцели́вый челове́ческое неможе́ние, и от тли́ вся́ изба́вивый благоутро́бием Твои́м.

А́ще и́мать самогла́сен. Сла́ва, гла́с 2.

Душе́вная ловле́ния, и стра́сти плотски́я, мече́м воздержа́ния посе́кла еси́, и мы́сленная согреше́ния молча́нием поста́ удави́ла еси́, и струя́ми сле́з твои́х пусты́ню всю́ напои́ла еси́, и прозябла́ еси́ на́м покая́ния плоды́: те́мже твою́ па́мять преподо́бная, пра́зднуем.

И ны́не, Богоро́дичен:

Спаси́ от бе́д рабы́ Твоя́ Богоро́дице, я́ко вси́ по Бо́зе к Тебе́ прибега́ем, я́ко неруши́мей стене́ и предста́тельству.

Крестобогоро́дичен.

Подо́бен: Егда́ от дре́ва:

Егда́ нескве́рная А́гница ви́де своего́ А́гнца, на заколе́ние я́ко челове́ка во́лею влеко́ма, рыда́ющи глаго́лаше: безча́дствовати Мя́ ны́не тщи́шися Христе́, Тебе́ ро́ждшую, что́ сие́ сотвори́л еси́, Изба́вителю вся́ческих, оба́че воспева́ю и сла́влю Твою́, ю́же па́че ума́ и сло́ва бла́гость, Человеколю́бче.

[зри́] А́ще пра́зднуеши с полиеле́ем, глаго́ли Богоро́дичен воскре́сный: Пре́йде се́нь:

Вхо́д. Проки́мен дне́.

Чте́ния 3 преподо́бническая, [пи́саны в конце́ кни́ги сея́.]

На стихо́вне стихи́ры, гла́с 1.

Подо́бен: Небе́сных чино́в:

Сла́вы отце́в вои́стинну возжела́вши, ꙳ сла́ву нетле́нную возлюби́ла еси́, ꙳ те́мже отсту́пльши сла́дких, ꙳ те́ло твое́ боле́знем все́м отдала́ еси́, и́мярек, и ны́не боле́зней прие́млеши возме́здие, со Христо́м ца́рствующи.

Сти́х: Ди́вен Бо́г во святы́х Свои́х, Бо́г Изра́илев.

Жениха́ кра́сную добро́ту ꙳ возжела́вши, и́мярек, ꙳ Христу́ уневе́ститися ты́ восхоте́вши ꙳ все́ми ви́ды благи́х, ꙳ боле́зньми и воздержа́нии тебе́ украси́ла еси́: ꙳ те́мже ны́не со Христо́м Ца́рствуеши в черто́зе его́.

Сти́х: Честна́ пред Го́сподем сме́рть преподо́бных Его́.

В приста́нище Боже́ственное устреми́вшися, ꙳ ти́хо прешла́ еси́ во́лны мирски́х мяте́жей: ꙳ и души́ своея́ кора́бль всечестна́я, ꙳ непогрузи́мь везу́щи, ꙳ от сласте́й го́рести, ꙳ та́йных име́ний испо́лнь су́щий.

Сла́ва, гла́с 6:

Возсия́ дне́сь свяще́нное твое́ торжество́, со́лнца светле́йши, су́щыя во тме́ ду́шы озаря́ющее, мра́к бесо́вский всегда́ отгоня́ющее, досточу́дная.

И ны́не, Богоро́дичен: Богоро́дице, Ты́ еси́ лоза́ и́стинная:

Крестобогоро́дичен: Ви́дящи Тя́ распина́ема, Христе́, Тебе́ ро́ждшая вопия́ше: что́ стра́нное е́же ви́жу та́инство, Сы́не Мо́й, ка́ко на дре́ве умира́еши пло́тию пове́шен, Жи́зни пода́телю?

Тропа́рь во уста́ве.

А́ще ли не́сть уста́ва, глаго́ли се́й тропа́рь, гла́с 8:

В тебе́ ма́ти, изве́стно спасе́ся е́же по о́бразу, прии́мши бо кре́ст, после́довала еси́ Христу́, и де́ющи учи́ла еси́ презира́ти у́бо пло́ть, прехо́дит бо: прилежа́ти же о души́ ве́щи безсме́ртней, те́мже и со а́нгелы сра́дуется преподо́бная, и́мярек, ду́х тво́й.

Сла́ва, и ны́не, Богоро́дичен, или́ Крестобогоро́дичен.

На у́трени,

на Бо́г Госпо́дь, тропа́рь то́йже.

По 1-й кафи́сме седа́лен, гла́с 5.

Подо́бен: Собезнача́льное:

Му́жески по́двиги воздержа́нием претерпе́вши, низложи́ла еси́ многоко́зненнаго, и в терпе́нии жи́знь пожи́вши благоче́стно преподо́бная, и́мярек, ны́не прешла́ еси́ к Бо́гу моля́щися о все́х, свяще́нно свято́е твое́ соверша́ющих пра́зднество. [Два́жды.]

Сла́ва, и ны́не, Богоро́дичен:

Всенепоро́чная Ма́ти, возсия́й ми́ покая́ния лучу́, и разори́ мра́к безме́рных мои́х зо́л, лука́выя отжени́, Де́во, по́мыслы се́рдца моего́.

По 2-й кафи́сме, седа́лен, гла́с 4.

Подо́бен: Ско́ро предвари́:

Пло́ть распя́ла еси́ со страстьми́, и все́ любле́ние ко Христу́ име́ла еси́, и́мярек, Жениху́ твоему́ нетле́нному. Сего́ ра́ди прия́ла еси́ вене́ц, и а́нгельским лико́м сочи́слилася еси́ преподо́бная, моля́щися Тому́ приле́жно о чту́щих тя́. [Два́жды.]

Сла́ва, и ны́не, Богоро́дичен:

Тружда́ет мя́ бу́ря грехо́вная, и возмуще́ние безме́стных помышле́ний: умилосе́рдися Всенепоро́чная, и ру́ку ми́ по́мощи, я́ко ми́лостива простри́, да спа́сся велича́ю Тя́.

По Хвали́те и́мя Госпо́дне:

Припе́в:

Ублажа́ем тя́ преподо́бная ма́ти, и́мярек, и чте́м святу́ю па́мять твою́: ты́ бо мо́лиши за на́с Христа́ Бо́га на́шего.

Псало́м избра́нный: Терпя́ потерпе́х Го́спода:

По полиеле́и седа́лен, гла́с 8.

Подо́бен: Повеле́нное та́йно:

Предъизбра́нная от Бо́га преподо́бная ма́ти, ко приста́нищу жи́зни наставля́ема, без волне́ния жития́ бу́рю претекла́ еси́, со а́нгелы песносло́вящи Изба́вителя, и моля́щися непреста́нно о на́с, я́ко да благода́ть и ми́лость Христо́с да́рует на́м, сохраня́ющи па́ству, ю́же боле́знию соста́вила еси́. [Два́жды.]

Сла́ва, и ны́не, Богоро́дичен:

Ра́дуйся, а́нгелом ра́дость ми́ра прие́мшая. Ра́дуйся, ро́ждшая Творца́ Твоего́ и Го́спода. Ра́дуйся, сподо́бльшаяся бы́ти Ма́ти Бо́жия.

Степе́нна, 1-й антифо́н 4-го гла́са.

Проки́мен: Ди́вен Бо́г во святы́х Свои́х, Бо́г Изра́илев.

Сти́х: В це́рквах благослови́те Бо́га, Го́спода от исто́чник Изра́илевых.

Вся́кое дыха́ние:

Ева́нглие преподо́бней, [пи́сано в конце́ кни́ги сея́.]

По 50-м псалме́ стихи́ра, гла́с 2:

Душе́вная ловле́ния: [Пи́сана Сла́ва, на Го́споди воззва́х:]

Кано́н, гла́с 8.

Пе́снь 1.

Ирмо́с: Колесницегони́теля фарао́ня погрузи́, чудотворя́й иногда́ Моисе́йский же́зл, крестообра́зно порази́в, и раздели́в мо́ре: Изра́иля же беглеца́, пешехо́дца спасе́, пе́снь Бо́гови воспева́юща.

Страстны́ми мя́ бу́рями всю́ду погружа́ема, и помышле́ний молво́ю ду́шу мою́ коле́блему, ко приста́нищу ти́хому Христо́вы во́ли, моли́твами твои́ми преподо́бная и́мярек, напра́ви, я́ко да досто́йно тя́ воспою́.

Де́вственными добро́тами просвеще́на, Богоблаже́нная, и́мярек, чи́стому Сло́ву уневе́стилася еси́, пожи́вши поще́нием Боже́ственне: и Того́ живоно́сным стопа́м после́довала еси́, умерщвле́ние страсте́й претерпе́вши.

Боже́ственных оте́ц наказа́нию после́довала еси́ сла́вная, и́мярек, и си́х нра́ву чи́сте поревнова́ла еси́, воздержа́нием я́ко безпло́тна, и чистото́ю и де́вством пожи́вши преподо́бная, и и́стинным смире́нием.

Богоро́дичен: Боже́ственную ру́чку и трапе́зу, хле́б живо́тный поне́сшую, неде́ланную ни́ву, го́ру святу́ю, Бо́гу Де́ву пе́сньми сла́вим.

Пе́снь 3.

Ирмо́с: Небе́снаго кру́га верхотво́рче Го́споди, и це́ркве зижди́телю, ты́ мене́ утверди́ в любви́ Твое́й жела́ний кра́ю, ве́рных утвержде́ние, еди́не Человеколю́бче.

В небе́сныя черто́ги светоза́рныя всели́лася еси́, неве́ста избра́нна бы́вши Вседержи́телю, исцеле́ния ре́ки источа́еши, и́мярек, страстна́я на́м тече́ния изсуша́ющи.

Украси́лася еси́ жела́нием кра́йним жела́ющи Христа́, премно́жеством благосе́рдия, пло́тию обнища́вшаго, и после́довала еси́ живо́тным его́ словесе́м, жите́йская вся́ кра́сная возненави́девши.

Позлаще́нне криле́ доброде́тели стяжа́вши, на высоту́ небе́сную возлете́ла еси́ блаже́нная, и́мярек, я́ко голуби́ца нетле́нная.

Богоро́дичен: Ро́д спасе́ся, Де́во, челове́ческий благода́тию обнища́вшаго пло́тию, из чре́ва Твоего́ неизрече́нно: те́мже чти́м Тя́, и благоче́стно ублажа́ем, пречи́стая Де́во Богора́дованная.

Седа́лен, гла́с 4.

Подо́бен: Вознесы́йся на кре́ст:

Красота́ми яви́лася еси́ де́вственно преукраша́ема, по́стнических свяще́нных по́двиг, я́ко неве́ста непоро́чная Де́ва Христо́ва: и с ни́м в нетле́нный вошла́ еси́ черто́г и красо́т его́ наслажда́ешися, но моли́ спасти́ся на́м от вся́кия беды́, любо́вию пою́щым тя́.

Сла́ва, и ны́не, Богоро́дичен:

Чи́стая всенепоро́чная, и неискусобра́чная, еди́на безле́тнаго Сы́на и Сло́во Бо́жие в ле́те ро́ждшая: Того́ со святы́ми и честны́ми апо́столы, му́ченики и проро́ки, и преподо́бными моли́, дарова́ти на́м очище́ние, и ве́лию ми́лость.

Крестобогоро́дичен: Де́во пренепоро́чная Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею Сы́на и Бо́га Твоего́: Его́же благослове́нная моля́щи не преста́й, проще́ние прегреше́ний на́м дарова́ти.

Пе́снь 4.

Ирмо́с: Услы́шах Го́споди, смотре́ния Твоего́ та́инство, разуме́х дела́ Твоя́, и просла́вих твое́ Божество́.

Све́тлое твое́ торжество́, све́том сия́ющее Бо́жия Ду́ха, озаря́ет ду́шы на́шя ве́рою пою́щих тя́, и́мярек, преподо́бная.

Чудесы́ Боже́ственными уве́рила еси́ неве́дущих Влады́ку, и к позна́нию Его́ возврати́ла еси́, пре́лести тьму́ оста́вльших.

Да́ры Христу́ принесла́ еси́, чи́стое умерщвле́ние удо́в, и труды́ воздержа́ния: и проти́ву прия́ла еси́ небе́сное Ца́рство, и́мярек, и ве́чнующее наслажде́ние.

Богоро́дичен: Смири́вши спаси́ мя, высокому́дрием живу́щаго, ро́ждшая возне́сшаго смири́вшееся естество́ на́ше Пречи́стая.

Пе́снь 5.

Ирмо́с: У́тренююще вопие́м Ти́, Го́споди, спаси́ ны: Ты́ бо еси́ Бо́г на́ш, ра́зве бо Тебе́ ино́го не ве́мы.

Ру́це твои́ преподо́бно воздвиза́еми к зижди́телю, ма́ти, и́мярек, низложи́ша вра́жия шата́ния.

Удержа́в ру́ку твою́ десну́ю Вы́шний, наста́вил тя́ е́сть ма́ти, к небе́сному Своему́ наслажде́нию.

Стезю́ те́сную проше́дши в поще́нии, к широте́ приспе́ла еси́ ра́йстей, и́мярек, всечестна́я.

Богоро́дичен: И́же Богоро́дицу Тя́ неве́дущии Богома́ти, Све́та не и́мут ви́дети, ро́ждшагося из Тебе́ Пречи́стая.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том я́ко ри́зою, многоми́лостиве Христе́ Бо́же на́ш.

Умертви́вши двиза́ния плотска́я, над страстьми́ вельми́ воцари́лася еси́, и ны́не всечестна́я, и́мярек, в безстра́стных живе́ши све́тлостех.

О́бразу Спа́сову навы́кла еси́ покланя́тися сла́вная, де́лы и словесы́ твои́ми спаси́тельная его́ соблюда́ющи уче́ния.

О́блак тя́ Христо́с показа́ ма́ти, и́мярек, до́ждь источа́ющий живо́тный, ве́рою прося́щым у тебе́ пресла́вная.

Красе́н па́че все́х челове́к, Сы́н Тво́й Пречи́стая, добро́тою Божества́, а́ще и пло́ть бы́сть на́с ра́ди.

Конда́к во уста́ве.

А́ще ли не́сть уста́ва, глаго́ли се́й конда́к, гла́с 2:

Подо́бен: Благода́ть прие́мше:

За любо́вь Госпо́дню преподо́бная, поко́я жела́ние возненави́дела еси́, поще́нием ду́х тво́й просвети́вши, кре́пко бо зве́ри победи́ла еси́: но моли́твами твои́ми проти́вных шата́ние разори́.

И́кос: Струи́ мне́ сло́ва да́ждь Бо́же мо́й, и исто́чник благочи́ния сотвори́ мо́й у́м, и благослови́ язы́к мо́й, да воспою́ Твою́ а́гницу, ю́же венча́л еси́ Ты́ бла́гостию Твое́ю: а́ще бо Са́м не да́си ми́ сло́ва досто́йнаго, ка́ко принесу́ да́р ни́щий, бога́тней в словесе́х и дея́ниих? те́м пода́ждь ми́ си́лу, испове́дати ея́ натрижне́ния, кре́пко бо зве́ри победи́ла е́сть: по моли́твами ея́ проти́вных шата́ние разори́.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́ Го́споди Бо́же, во ве́ки.

О добро́те тле́ющей, и́мярек, преподо́бная небрегла́ еси́, смотря́ющи та́мо су́щая воздая́ния и све́т, и сла́ву Бо́жию нестаре́ющуюся и красоту́, и Боже́ственное селе́ние.

Ми́р премени́ла еси́ тле́ющий преми́рным живото́м нестаре́ющим, и вре́менную пи́щу пребыва́ющим существо́м, и плотски́м обру́чником, небе́снаго Жениха́.

Ра́зум Боголюби́в стяжа́ла еси́, и́мярек, с пло́тию а́нгелом уподо́билася еси́, бдя́щи те́пле любо́вию, и пою́щи: благослове́н еси́ Го́споди Бо́же во ве́ки.

Богоро́дичен: Ви́ждь ско́рбь мою́ Де́во, ю́же ми́ наведе́ мно́жество зо́л мои́х, и родства́ о́гненнаго исхити́ мя, вопию́щаго: благослове́н еси́ Го́споди Бо́же во ве́ки.

Пе́снь 8.

Ирмо́с: Богоглаго́ливии о́троцы в пещи́, со огне́м пла́мень попира́юще, поя́ху: благослови́те де́ла Госпо́дня Го́спода.

Укра́шена сия́нием чистоты́, и чи́стым житие́м просвеще́на ма́ти, предстои́ши Жениху́ твоему́ Христу́ Бо́гу на́шему.

Боле́зни разли́чныя уврачу́ет челове́ков, и прого́нит бесо́вския па́кости, те́ло твое́ свято́е преподо́бная, во гро́бе пресла́вно сокрыва́емое.

Свяще́нна же́ртва принесла́ся еси́, и приноше́ние све́тлое преподо́бная ма́ти, на́с я́ко кади́ло благоуха́нное, все́х Влады́це Христу́ Бо́гу на́шему.

Богоро́дичен: Без нетле́ния Сло́ва па́че словесе́ родила́ еси́, тле́ния вся́каго на́с избавля́ющаго: сего́ ра́ди Тя́ Де́во, ве́рою велича́ем.

Пе́снь 9.

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в челове́к: те́мже Пречи́стую Богоро́дицу ве́рнии велича́ем.

Возжеле́ла еси́ добро́ту мы́сленную Жениха́, и чи́сто возлюби́ла еси́ его́, где́ почива́еши? где́ ли пасе́ши? те́пле вопия́ла еси́: да почи́ю у тебе́, и в Твои́х све́тлостех наслажду́ся, велича́ющи Твою́ бла́гость.

Ра́зум име́ла еси́ в твое́й души́, и смире́ние, и Боже́ственную кро́тость, ве́ру несумне́нну, и наде́жду и любо́вь, ю́же к Бо́гу: всено́щными моли́твами приближа́ющися Ему́, и та́мо су́щими светлостьми́ блаже́нная, и́мярек, озаря́ема и просвеща́ема.

Собра́шася дне́сь лю́дие, хвала́ми возвели́чити Го́спода, возвели́чившаго твое́ свято́е торжество́ сие́: в не́мже помина́й на́с помина́ющих тя́, предстоя́щи Христу́ Жениху́ твоему́, преподо́бная, и́мярек, и всечестна́я.

Богоро́дичен: Пощади́ мя Бо́же, рожде́йся от Де́вы, и сохрани́в ро́ждшую Тя́ нетле́нну по рождестве́, егда́ ся́деши суди́ти дела́ моя́, беззако́ния и грехи́ моя́ пре́зри, я́ко безгре́шен и ми́лостив Бо́г, и человеколю́бец.

Свети́лен:

Кня́зя утаи́вшися студа́, и сего́ в прему́дростнем о́бразе показа́ безу́мна, де́ва су́щи душе́ю и те́лом, была́ еси́ му́ж ра́зумом и ве́рою, и́мярек, преподо́бная, де́вственников добро́та, чернори́зиц украше́ние.

Богоро́дичен: Де́нь мне́ возсия́й разу́мнаго весе́лия, Ты́ бо еси́ чи́стая све́т, и живо́т су́щих во тьме́: хоте́нию бо мощна́ еси́, и е́же твори́ти и́маши я́ко су́щи все́х Влады́чица, изба́ви все́х от бе́д, и все́х скорбя́щих от собла́зн лука́ваго.

На хвали́тех стихи́ры, гла́с 4.

Подо́бен: Я́ко до́бля:

Пло́ти игра́ния ꙳ по́стными по́двиги, ꙳ души́ любоче́стне покори́ла еси́, ꙳ и Христу́ после́довала еси́, ꙳ и посреде́ по́стниц всели́лася еси́ всегове́йно, и́мярек, ꙳ угаша́ющи распале́ния сластна́я ꙳ Боже́ственными ту́чами сле́з, ꙳ зе́льнейшее жела́ние ꙳ к Зижди́телю возжига́ющи. [Два́жды.]

Свяще́нное жили́ще ꙳ во мно́гих по́льзу Бо́гу воздви́гла еси́, ꙳ бы́вши хра́м Свята́го Ду́ха всему́драя, ꙳ чистото́ю душе́вною, ꙳ и путево́дствила еси́ ду́шы к поле́зным подвиго́м по́стным, ꙳ и принесла́ еси́ сия́ я́коже ве́но Спасе́ны, о и́мярек, Влады́це. ꙳ С Ни́миже ве́рою тя́ почита́ем.

Отрокови́цы возлюби́ша ꙳ неве́стника и Го́спода, ꙳ уче́нию твоему́ покаря́ющыяся: ꙳ и плотску́ю презре́вше сла́бость в ду́се, ꙳ усе́рдием стра́сти ꙳ благоче́стно удержа́ша: ꙳ и введо́шася с тобо́ю, о и́мярек, ꙳ в черто́г небе́сный и Боже́ственный, ꙳ всегда́ веселя́щеся.

Сла́ва, гла́с 8.

О пресла́внаго чудесе́! я́ко усе́рдно себе́ Бо́гу возложи́ла еси́ по́стными боле́зньми, и по́стническими слеза́ми, Боже́ственную любо́вь испо́лнила еси́, и плотски́я стра́сти победи́ла еси́, и попра́ла еси́ воздержа́нием де́моны, и была́ еси́ неве́ста Вседержи́телю.

И ны́не, Богоро́дичен:

Арха́нгела Гаврии́ла гла́с восприи́мше, рце́м: ра́дуйся, Ма́ти Бо́жия, я́же Жизнода́вца Христа́ ми́ру ро́ждши.

Крестобогоро́дичен: Пречи́стая я́ко ви́де Тя́ пло́тию ви́сяща на дре́ве, се́рдцем разседа́шеся, и вопия́ше слезя́щи: Сло́ве, ка́ко заше́л еси́ прелюби́мый Иису́се Сы́не Мо́й и Го́споди? не оста́ви мене́ еди́ну Христе́, Тебе́ ро́ждшую.

А́ще и́мать Сла́ву на стихо́вне, глаго́ли вече́рний:

И ны́не, Богоро́дичен, или́ Крестобогоро́дичен.


Комментарии для сайта Cackle