[Глава 24] Слу́жба о́бща преподо́бному́ченице еди́ной

Ве́чера,

на Го́споди воззва́х, стихи́ры, гла́с 8.

Подо́бен: Что́ вы́ нарече́м святи́и:

Му́ченице страстоте́рпице всехва́льная, и́мярек, ꙳ воздержа́нием стра́сти низложи́вши плотски́я, ꙳ страда́нием зми́я умертви́ла еси́ врага́, ꙳ а́нгелы удиви́вши боле́зньми твои́ми, ꙳ челове́ки обвесели́вши страда́нии твои́ми: ꙳ и́нокиням удобре́ние ꙳ и де́вства сосу́д, ꙳ моли́ спасти́ и просвети́ти ду́шы на́ша.

Что́ тя́ возъимену́ем сла́вная? ꙳ де́вства добро́тами неве́сту просия́вшу Христо́ву, ꙳ дще́рь избра́нну, вы́шняго Иерусали́ма жи́тельницу, ꙳ а́нгелом собесе́дницу, ꙳ черто́га мы́сленнаго наслажда́ющуся. ꙳ и́мярек, многострада́льная, ꙳ моли́ спасти́ и просвети́ти ду́шы на́ша.

Терпе́ла еси́ зубо́в искорене́ние, ꙳ ру́к отсече́ние, и но́г и сосце́в, ꙳ ссека́ема на у́ды от беззако́нных мучи́телей, ꙳ к добро́те Жениха́ взира́ющи, ꙳ и боле́зни па́че естества́ терпя́щи, ꙳ и́мярек, многострада́льная, ꙳ неве́сто Христо́ва нетле́нная. ꙳ Моли́ спасти́ и просвети́ти ду́шы на́ша.

Сла́ва, и ны́не, Богоро́дичен:

Что́ Твои́х добро́т чу́днее Пречи́стая? ꙳ исцеля́еши неду́гующыя, ꙳ и избавля́еши от страсте́й, ꙳ и отго́ниши борю́щих безбо́жныя прило́ги: ꙳ от бе́д избавля́еши пою́щыя Тя́, ꙳ ско́рби утоля́еши моли́твою Твое́ю. ꙳ Ра́дости лу́чшия Де́во, хода́тай бу́ди рабо́в Твои́х, ꙳ моля́щихся спасти́ ду́шы на́ша.

Крестобогоро́дичен: А́гница А́гнца я́ко ви́де ꙳ на дре́ве просте́рта во́лею кре́стнем, ꙳ вопия́ше ма́терски, ꙳ боле́знующи с пла́чем: ꙳ Сы́не Мо́й, что́ стра́нное сие́ виде́ние? ꙳ Все́м жи́знь дая́й я́ко Бо́г, ꙳ ка́ко умерщвля́ешися Долготерпели́ве, ꙳ земны́м подая́ воскресе́ние? ꙳ Сла́влю Твое́ Бо́же Мо́й, вели́кое снисхожде́ние.

А́ще и́мать самогла́сен, Сла́ва, гла́с 2:

Во гла́се ра́дования, и во псалме́х восклица́ния, воспои́м преподо́бному́ченицу, и́мярек, я́ко низложи́ на зе́млю и́дольскую пре́лесть, и сопроти́внаго врага́ му́жески под но́зе свои́ подложи́. Те́мже и сконча́вшися на небеса́ возлете́, на главе́ вене́ц нося́щи, и взыва́ющи: к тебе́ Женише́ мо́й, жела́ю, и жела́ния любо́вь иму́щи, но Тебе́ пло́ть мою́ на му́ки преда́х. Да вселю́ся у́бо в честна́я селе́ния, иде́же е́сть веселя́щихся жили́ще.

И ны́не, Богоро́дичен:

На Тя́ упова́ние Богоро́дице, возложи́хом, ча́яния да не отпаде́м: спаси́ на́с от бе́д, помо́щнице недоуме́емым, и сопроти́вных сове́ты разори́: Ты́ бо на́ше спасе́ние Благослове́нная.

Крестобогоро́дичен: Егда́ нескве́рная А́гница, ви́де Своего́ А́гнца на заколе́ние я́ко челове́ка во́лею влеко́ма, рыда́ющи глаго́лаше: безча́дствовати Мя́ ны́не тщи́шися Христе́, Тебе́ ро́ждшую, что́ сие́ сотвори́л еси́, Изба́вителю вся́ческих? Оба́че воспева́ю и сла́влю Твою́, ю́же па́че ума́ и сло́ва, кра́йнюю бла́гость Человеколю́бче.

А́ще пра́зднуеши с полиеле́ем, глаго́ли Богоро́дичен воскре́сный: Пре́йде се́нь:

Вхо́д. Проки́мен дне́.

Чте́ния 3, му́ченическая, [пи́сана в конце́ кни́ги сея́.]

На стихо́вне стихи́ры, гла́с 4:

Подо́бен: Да́л еси́ зна́мение:

Страда́ние претерпе́ла еси́, ꙳ твои́м боре́нием, ꙳ сугу́бо, и́мярек, всехва́льная, ꙳ по́том воздержа́ния, муче́ния кро́вь смеси́вши преподо́бная: ꙳ те́мже и вене́ц сугу́б Благода́тель тебе́ дарова́, ꙳ к нему́же возшла́ еси́ испещре́на све́тло, ꙳ я́ко де́ва всенепоро́чная, ꙳ и я́ко му́ченица непобеди́мая.

Сти́х: Ди́вен Бо́г во святы́х Свои́х, Бо́г Изра́илев.

Добро́та телесе́, ꙳ и красота́ Боже́ственная души́ твоея́ стеко́шася, ꙳ я́ко кри́н просия́ла еси́ ꙳ во оби́телех преподо́бных убеле́на, ꙳ и кро́вными то́ки обагре́на, ꙳ неве́сто всенепоро́чная, и́мярек, ꙳ те́мже тя́ и небе́сный кра́сный прия́т неве́стник ꙳ в черто́г неразори́мый, ꙳ я́ко де́ву и му́ченицу.

Сти́х: В це́рквах благослови́те Бо́га, Го́спода от исто́чник Изра́илевых.

О́крест тебе́ прии́де, ꙳ и́мярек, всехва́льная, ꙳ избавля́яй тя́ а́нгел: ꙳ от младе́нства бо яви́лася еси́ Го́спода боя́щися, ꙳ и возложена́ я́ко возложе́ние честно́е, ꙳ соблюде́ное Вседержи́телю. ꙳ Те́мже попра́ла еси́ мучи́телево безу́мие кре́пко, ꙳ и востекла́ еси́ ко Христу́ Жениху́ твоему́.

Сла́ва, гла́с 6:

Одесну́ю Спа́са предста́ла еси́ де́во, страстоте́рпице и му́ченице, и́мярек, оде́яна доброде́тельми непобежде́на, и преукра́шена еле́ем чистоты́, и кро́вию страда́ния, и вопию́щи к нему́ ра́достно: свещу́ держа́щи, в воню́ ми́ра Твоего́ теко́х Христе́ Бо́же: я́ко уязви́хся Твое́ю любо́вию а́з, не отлучи́ мене́ Женише́ небе́сный. Тоя́ моли́твами низпосли́ на́м Всеси́льне Спа́се, ми́лости Твоя́.

И ны́не, Богоро́дичен:

О́ко се́рдца моего́ воспуща́ю к Тебе́ Влады́чице, не пре́зри ма́лаго моего́ воздыха́ния в ча́с, егда́ су́дит Сы́н Тво́й ми́ру: бу́ди ми́ покро́в и помо́щница.

Крестобогоро́дичен: Ви́дящи Тя́ распина́ема Христе́, Тебе́ ро́ждшая вопия́ше: что́ стра́нное е́же ви́жу та́инство, Сы́не Мо́й, ка́ко на дре́ве умира́еши пло́тию пове́шен, Жи́зни пода́телю?

Тропа́рь, гла́с 4:

А́гница твоя́ Иису́се, и́мярек, зове́т ве́лиим гла́сом: Тебе́ женише́ мо́й люблю́, и Тебе́ и́щущи страда́льчествую, и сраспина́юся, и спогреба́юся креще́нию Твоему́, и стражду́ тебе́ ра́ди, я́ко да ца́рствую в Тебе́, и умира́ю за Тя́, да и живу́ с Тобо́ю: но я́ко же́ртву непоро́чную, приими́ мя с любо́вию поже́ршуюся Тебе́. Тоя́ моли́твами я́ко ми́лостив, спаси́ ду́шы на́ша.

Сла́ва, и ны́не, Богоро́дичен или́ Крестобогоро́дичен.

На у́трени,

на Бо́г Госпо́дь, тропа́рь то́йже.

По 1-й кафи́сме седа́лен, гла́с 8.

Подо́бен: Прему́дрости:

Воздержа́ния росо́ю погаси́ла еси́ пла́мень страсте́й ю́ношески, огне́м же крове́й твои́х всю́ пре́лесть попали́ла еси́, и Жениху́ Сло́ву я́ко да́р принесла́ еси́ честно́е де́вство и до́блественное страда́ние. Те́мже в черто́г введе́ тя сла́вы све́тле до́бльствовавшую, и зми́я попра́вшую, и́мярек, многострада́льная. Моли́ Христа́ Бо́га, грехо́в оставле́ние пода́ти, чту́щым любо́вию святу́ю па́мять твою́. [Два́жды.]

Сла́ва, и ны́не, Богоро́дичен:

Я́ко Де́ву и еди́ну в жена́х, Тя́ безсе́менно ро́ждшую Бо́га пло́тию, вси́ ублажа́ем ро́ди челове́честии: о́гнь бо всели́ся в Тебе́ Божества́, и я́ко Младе́нца дои́ши Зижди́теля и Го́спода. Те́мже а́нгельский собо́р и челове́ческий ро́д досто́йно сла́вим всесвято́е рождество́ Твое́, и согла́сно вопие́м Ти́: моли́ Христа́ Бо́га, прегреше́ний оставле́ние дарова́ти, досто́йно пою́щым сла́ву Твою́.

По 2-й кафи́сме седа́лен, гла́с 1.

Подо́бен: Гро́б тво́й:

Пе́рвее поще́ние, второ́е же кро́вь муче́ния, я́ко алава́стр ми́ра, за любо́вь принесла́ еси́ Христу́ Жениху́ твоему́: мзду́ же прия́ла еси́ от Него́ досточу́дная му́ченице, и́мярек, вене́ц Боже́ственный и нетле́нный, и исцеле́ний благода́ть си́лою духо́вною. [Два́жды.]

Сла́ва, и ны́не, Богоро́дичен:

Безневе́стная чи́стая Де́во Богоро́дице, еди́на ве́рных предста́тельнице и покро́ве, бе́д и скорбе́й, лю́тых обстоя́ний вся́ изба́ви, на Тя́ наде́жду Отрокови́це иму́щыя, и ду́шы на́ша спаси́ Боже́ственными мольба́ми Твои́ми.

По Хвали́те и́мя Госпо́дне:

Припе́в:

Велича́ем тя́ страстоте́рпице свята́я, и́мярек, и чте́м святу́ю па́мять твою́: ты́ бо мо́лиши за на́с Христа́ Бо́га на́шего.

Псало́м избра́нный: Бо́г на́м прибе́жище и си́ла:

По полиеле́и седа́лен, гла́с 8.

Подо́бен: Прему́дрости:

Ду́шу связа́вши любо́вию Христо́вою, тле́нная же и вре́менная му́ченице му́драя забве́нием премину́ла еси́, я́ко Сло́ва учени́ца сла́вная: по́стнически пе́рвее стра́сти умертви́вши, страда́льчески второ́е льсти́ваго посрами́ла еси́. Те́мже и Зижди́теля сугу́баго дерзнове́ния сподо́билася еси́ преподо́бная, я́ко Того́ послу́шавши, и́мярек, пребога́тая. Моли́ Христа́ Бо́га согреше́ний оставле́ние дарова́ти, чту́щым любо́вию святу́ю па́мять твою́. [Два́жды.]

Сла́ва, и ны́не, Богоро́дичен:

Я́ко Всенепоро́чная Неве́сто Творца́, я́ко Неискусому́жная Ма́ти Изба́вителя, Прия́телище я́ко су́щи Уте́шителя Всепе́тая, беззако́ния мя́ су́ща скве́рно жили́ще, и де́монов игра́лище в ра́зуме бы́вша, потщи́ся и си́х злоде́йствия мя́ изба́вити, све́тло жили́ще доброде́тельми соде́лавши. Светода́тельная и нетле́нная, разжени́ о́блак страсте́й и вы́шняго прича́стия сподо́би, и све́та невече́рняго моли́твами Твои́ми.

Степе́нна, 1-й антифо́н 4-го гла́са.

Проки́мен: Ди́вен Бо́г во святы́х Свои́х, Бо́г Изра́илев.

Сти́х: В це́рквах благослови́те Бо́га, Го́спода от исто́чник Изра́илевых.

Вся́кое дыха́ние:

Ева́нглие, [пи́сано в конце́ кни́ги сея́.]

По 50-м псалме́ стихи́ра:

Одесну́ю Спа́са: [пи́сана ве́чера на стихо́вне.]

Кано́н, гла́с 8.

Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Сию́ светоно́сную па́мять твою́ почита́ющему, Богому́драя, просвеще́ние ми́ пода́ждь, души́ моея́ тьму́ отгоня́ющи.

Всю́ от пеле́н тебе́ саму́ю возложи́ла еси́ Зижди́телю твоему́, и́мярек, и огне́м воздержа́ния теле́сныя стра́сти попали́ла еси́.

К высоте́ муче́ния, му́ченице, возшла́ еси́, не пощаде́вши пло́ти, и черто́гов мы́сленных я́ко де́ва сподо́билася еси́.

Богоро́дичен: Тя́ небоме́рную ле́ствицу, на Не́йже Бо́г утверди́ся, челове́ки небе́сны соде́ловав, Отрокови́це почита́ем.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Стоя́ла еси́ пред суди́щем мучи́теля, сла́вная, и́мярек, Христа́ Творца́ все́х и Влады́ку, Бо́га Сло́ва пропове́дающи.

Добро́та серде́чная ви́димым зра́ком сла́вная, и́мярек, изда́вшися, тя́ красне́йшую зря́щым яви́ла е́сть.

Бога́тство неистощи́мо исцеле́ний тебе́ подаде́ отрокови́це Христо́с, Его́же нищету́ во́льно возлюби́ла еси́.

Богоро́дичен: Ве́щь грехо́в мои́х, Твои́х моли́тв огне́м попали́ Ма́ти Све́та, ро́су ми́ Боже́ственную оставле́ния нося́щи.

Седа́лен, гла́с 1.

А́гница слове́сная А́гнцу и Па́стырю принесла́ся еси́ поще́нием, муче́нием же тече́ние сконча́вши, и ве́ру соблю́дши, и́мярек: те́мже дне́сь ра́достию соверша́ем досточу́дная, свяще́нную твою́ па́мять, Христа́ сла́вяще.

Сла́ва, и ны́не, Богоро́дичен:

Моли́твы Твои́х ра́б приими́, Богоро́дице, и изба́ви на́с от вся́кия беды́, я́ко ро́ждшая Христа́ Спа́са, изба́вителя ду́ш на́ших.

Крестобогоро́дичен: Твое́ предста́тельство иму́ще Пречи́стая, и Твои́ми моли́твами лю́тых избавля́еми, Кресто́м Сы́на Твоего́ везде́ соблюда́еми, по до́лгу Тя́ вси́ благоче́стно велича́ем.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Тя́ и́го легча́йшее Христо́во му́ченице поне́сшую от ю́ности, тя́жкое бре́мя носи́ти, пребеззако́ннующии осуди́ша.

Ка́пли крове́й твои́х многобо́жия погаси́ша у́глие, лучи́ же чуде́с твои́х, и́мярек, страсте́й ве́щь попали́ша.

Вы́ше земли́ взе́мся тво́й о́гнь, к пе́рсем му́ченице возгнети́ся, возгнеща́я твое́ раче́ние, е́же ко Влады́це Де́во.

Богоро́дичен: По рождестве́ пребыла́ еси́ нетле́нна Де́во, я́коже пре́жде рождества́: ю́на бо Младе́нца родила́ еси́, пре́жде ве́к познава́ема.

Пе́снь 5.

Ирмо́с: У́тренююще вопие́м Ти́, Го́споди, спаси́ ны: Ты́ бо еси́ Бо́г на́ш, ра́зве Тебе́ ино́го не ве́мы.

Неизнуре́нна огне́м веще́ственным яви́лася еси́ му́ченице, и́мярек, о́гнь бо тя́ серде́чный Боже́ственныя любве́ ороша́ше.

Ударе́ньми лица́ му́ченице, и́мярек, украси́вшися, враго́в отрази́ла еси́ ме́рзкое неразу́мие.

Протяже́на на дре́ве Богому́драя, и́мярек, любо́вию Жениха́ твоего́ Боже́ственную стра́сть образова́ла еси́.

Богоро́дичен: Пое́м тя́ всепе́тая Влады́чице Богоро́дице: Бо́га бо препе́таго пло́тию родила́ еси́ Пречи́стая.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том я́ко ри́зою, многоми́лостиве Христе́ Бо́же на́ш.

Сокруша́емо те́ло ра́нами, явля́ше пра́вость твоея́ со́вести страстоте́рпице и́мярек, ко Христу́ Бо́гу на́шему.

Ви́сящи высоко́, ра́ны му́ченице терпя́щи, и неуя́звенно храня́щи души́ благоро́дие, и́мярек, достохва́льная.

Терпя́ше сосце́в отре́зание преподо́бная, ве́рныя млеко́м Боже́ственнаго раче́ния пита́ющи, сла́вная.

Богоро́дичен: Человеколю́бца ро́ждши Бо́га, Боголюби́вая Влады́чице, Того́ моли́, гее́нны огня́ изба́витися на́м.

Конда́к, гла́с 4.

Подо́бен: Ско́ро предвари́:

Боже́ственная па́мять твоя́, и́мярек, дне́сь возсия́вши яви́ся ми́рови я́ко со́лнце, сказу́ющи житие́ твое́: ты́ бо воздержа́нием плотска́я двиза́ния разо́рши, и страда́ния кро́вию уневе́стилася еси́ Христо́ви. Те́мже хва́лящыя тя́ изба́ви от вся́ких зо́л, да зове́м ти́: ра́дуйся, ма́ти преподо́бная.

И́кос: Отве́рзи ми́ устне́ преблаже́нная, Богоприя́тными твои́ми моли́твами, предстоя́щи Бо́гу всесла́вная преподо́бному́ченице, да воспою́ Боже́ственное твое́ житие́, и возглаго́лю досто́йно страда́ния твоя́, я́же на земли́ те́плою любо́вию соверши́ла еси́, и му́ченица была́ еси́ непобеди́ма: воздержа́ния ве́рою испра́вила еси́ бде́ние, и чистоту́ возлюби́ла еси́. Те́мже хва́лящыя тя́ изба́ви от все́х зо́л, да зове́м ти́: ра́дуйся, ма́ти преподо́бная.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́ Го́споди Бо́же во ве́ки.

Шу́м гла́са пра́зднующих иде́же е́сть, лику́еши страстоте́рпице, и́мярек, с Де́вами Бо́гу зижди́телю песнопою́щи: благослове́н еси́ Го́споди Бо́же во ве́ки.

У́ды сокруша́емы зря́щи, и́мярек, и ногте́й истерза́ние терпя́щи, принесла́ся еси́ Бо́гу же́ртва, песнопою́щи: благослове́н еси́ Го́споди Бо́же во ве́ки.

Яви́лася еси́ я́ко лоза́ Богому́драя, и́мярек, ру́це и но́зе я́ко ве́тви ре́жемы, и на́м мы́сленно вино́ источа́ющи, сердца́ утеша́ющее, и страсте́й отрева́ющее пия́нство.

Богоро́дичен: Во всего́ челове́ка обле́кся Нескве́рный, кроме́ греха́, из утро́бы Твоея́, Чи́стая, про́йде плотоно́сец: Его́же умоли́, ве́рою Тя́ че́ствующыя спасти́.

Пе́снь 8.

Ирмо́с: Седмери́цею пе́щь халде́йский мучи́тель, Богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Ю́ношески до́бльствовавши страстоно́сице всехва́льная, на пре́лесть воздви́гла еси́ побе́ды: ру́к бо лише́ния и но́г терпе́ла еси́, сосце́в же и зубо́в твои́х искорене́ние, му́ченице претерпе́ла еси́, в ра́дости песнопою́щи: лю́дие превозноси́те Христа́ во ве́ки.

Всесветла́ я́ко со́лнце де́вства светлостьми́, и муче́ния добро́тами облиста́ла еси́, и ми́р просвети́ла еси́ светолу́чными сия́нии твоего́ терпе́ния, страстоте́рпице, вопию́щи: о́троцы благослови́те, свяще́нницы воспо́йте, лю́дие превозноси́те Христа́ во ве́ки.

Оскверне́нную страстьми́ ду́шу мою́, Богоневе́сто, и очерне́ную прило́ги зми́а, твои́ми мольба́ми от лю́тых очи́сти и све́тлым осене́нием твои́м му́ченице, и́мярек, озари́ вопи́ти: свяще́нницы по́йте, лю́дие превозноси́те Христа́ во ве́ки.

Богоро́дичен: Тя́ чи́стую и непоро́чную, Де́ва жела́ющи, непоро́чно и те́ло и ду́шу соблюде́, страсте́й подпале́ния терпе́нием испепели́вши, искуше́ния же мно́гих претерпе́вши му́к: и ны́не в небе́сных черто́зех лику́ет с тобо́ю, веселя́щися во вся́ ве́ки.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейше небе́с: те́м Тя́ Богоро́дицу а́нгелов и челове́к чинонача́лия велича́ют.

На дре́ве пове́шена была́ еси́, Сло́ва Бо́жия образу́ющи стра́сть блаже́нную, и отсече́ние терпе́ла еси́ ру́к твои́х и но́г, зубо́в искорене́ние, язы́ка же отре́зание и сосце́в, чи́стая, и́мярек, мона́шествующих сла́во и му́чеников украше́ние.

Я́ко неве́ста украси́лася еси́ добро́тою, обручи́вшися Жениху́ страда́ньми добротво́рными: вну́трь же черто́гов светови́дных я́ко избра́нная всели́лася еси́, нося́щи свещу́ де́вственную. И ны́не ца́рствуеши с живу́щими во ве́ки, и́мярек, сия́ющи.

Иска́пают боле́зни твоя́ сла́дость, греха́ го́ресть оте́млющу: ра́ка же то́чит исцеле́ний ре́ки, и потопля́ет вся́ стра́сти и неду́ги лю́тыя, в сла́ву Спа́сову, честна́я, и́мярек, и́же по достоя́нию тя́ сла́вят.

Богоро́дичен: Поне́сшаго Тя́ пло́ть от Жены́, я́ко позна́ му́ченица Твоя́ Го́споди, де́вственными укра́шена луча́ми, и муче́ния кро́вию обагрена́ тебе́ Бо́гу, в сле́д Ма́тере твоея́ сла́вно приведе́ся, я́ко Ца́рствующему тва́рию.

Свети́лен.

Исцеле́ния источа́еши я́ко река́, ве́рою притека́ющым к твое́й честне́й ра́це, и́мярек, Богови́дная, де́вства сосу́де, и цве́те естества́ кра́сный, дщи́ Царе́ва, вну́трь иму́щая Боже́ственныя сла́вы блаже́нство.

Богоро́дичен: Прему́дрость ипоста́сную, и Сло́во пресу́щное, и Врача́ ду́ш и теле́с ро́ждшая, гное́ния и ра́ны души́ моея́ исцели́ лю́тыя и вре́менныя, и се́рдца моего́ уста́ви боле́знь Де́во.

На хвали́тех стихи́ры, гла́с 8.

Подо́бен: О пресла́внаго чудесе́!

Ми́ра оста́вльши красоту́, ꙳ души́ благоро́дие ꙳ благоро́дия свы́ше ꙳ добро́тами уясни́ла еси́, ꙳ и́мярек, всехва́льная, ꙳ о́браза благода́ть нему́тну житие́м сохра́нши, ꙳ му́ченице непобеди́мая, ꙳ де́вства забра́ло Богови́дно, ꙳ и цве́те естества́ всеблагоро́днейший. [Два́жды.]

Сло́вом и житие́м и благода́тию, ꙳ и терпе́нием души́ украси́вшися, ꙳ привела́ еси́ страда́лец во́инства, ꙳ и де́в собо́р ꙳ от Де́вы возсия́вшему, ꙳ и свиде́тельства я́ве отве́рзшему все́м вхо́д, ꙳ и́мярек, всему́драя. ꙳ С ни́ми же и ны́не Сего́ умоли́, ꙳ спасти́ ста́до Твое́.

Пра́вды строи́тель, ꙳ тя́ я́ко де́ву чи́сту, ꙳ и я́ко сла́вну му́ченицу, ꙳ сугу́быми венцы́ ꙳ Боголе́пно украси́, ꙳ красе́н черто́г тебе́ дарова́в, ꙳ светоявле́ньми просвеще́нный: ꙳ иде́же все́льшися, ве́чнующим неве́сто Христо́ва ꙳ ны́не блаже́нством я́ве обогати́лася еси́.

Сла́ва, гла́с 4, самогла́сен:

Стру́жему телеси́ твоему́, души́ све́тлая добро́та явля́шеся красне́йши, преподо́бная му́ченице му́драя и пребога́тая, по́стниц добро́то, страстоте́рпиц похвало́, чуде́с же приснотеку́щий исто́чниче, и духо́в нечи́стых прогони́тельнице, и моли́твеннице за чту́щих па́мять твою́.

И ны́не, Богоро́дичен:

Тя́ сте́ну стяжа́хом Богоро́дице пречи́стая, и благоути́шное приста́нище, и утвержде́ние: те́мже моли́ся, и́же в житии́ обурева́ема, окорми́, и спаси́ мя.

Крестобогоро́дичен:

Подо́бен: Зва́нный свы́ше:

Не рыда́й мене́ Ма́ти, ꙳ зря́щи на дре́ве ви́сяща Твоего́ Сы́на и Бо́га, ꙳ над вода́ми пове́сившаго зе́млю неде́ржно, ꙳ и всю́ тва́рь созда́вшаго: ꙳ воста́ну бо и просла́влюся, ꙳ и а́дова ца́рства сокрушу́ кре́постию, ꙳ и погублю́ того́ си́лу, ꙳ и у́зники изба́влю от того́ злоде́йства, ꙳ я́ко Благоутро́бен, ꙳ и Отцу́ моему́ приведу́, ꙳ я́ко Человеколю́бец.

А́ще и́мать на стихо́вне Сла́ву, глаго́ли вече́рний:

И ны́не, Богоро́дичен, или́ Крестобогоро́дичен.


Источник: Минея общая – М. : Издательский Совет Русской Православной Церкви, 2002. – 516 с. ISBN 5-94625-045-0

Комментарии для сайта Cackle