[Глава 3] Слу́жба о́бща Честно́му и Животворя́щему Кресту́

На Го́споди воззва́х, стихи́ры, гла́с 4.

Подо́бен: Зва́нный свы́ше:

Дне́сь ра́дуется ве́рных мно́жество безчи́сленное: ꙳ явля́ется бо небе́сный Кре́ст конце́м, ꙳ осиява́ет тве́рдь све́том непристу́пным, ꙳ возду́х озаря́ет, ꙳ и земли́ лице́ украша́ет, ꙳ пое́т Боже́ственными пе́сньми це́рковь Христо́ва и слу́жит, ꙳ почита́ющи Кре́ст Боже́ственный и пречу́дный. ꙳ Его́же си́лою укрепля́еми, ꙳ Влады́це присту́пим зову́ще: ꙳ умири́ ми́р, ꙳ и просвети́ ду́шы на́ша.

Да ра́дуется тва́рь и игра́ет: ꙳ дне́сь бо облиста́ Кре́ст в конце́х с Небесе́, ꙳ земна́я просвеща́я, и совоку́плены показа́ расточе́нныя. ꙳ дне́сь лику́ет с ли́ки а́нгельскими челове́цы: ꙳ и́бо браня́щее средогра́дие, ꙳ Кресто́м разоре́но, ꙳ во еди́но вся́ я́ве совокупи́. ꙳ те́м предсия́я па́че со́лнца, ꙳ всю́ тва́рь просвеща́ет благода́тию, ꙳ и уясня́ет, и спаса́ет ве́рно ꙳ того́ чту́щыя.

Па́че со́лнечныя зари́, ꙳ хотя́й ми́рови я́коже че́стен, ꙳ Царя́ Христа́ ски́петр, ꙳ кончи́ну показа́ти, ꙳ Кре́ст Боже́ственный: ꙳ се́й предсия́ет я́сно в конце́х. ꙳ Се́й возведе́ из а́да ро́д челове́чь: ꙳ а́да вельми́ плени́в, ꙳ врага́ низложи́в, ꙳ де́монов горды́ню до конца́ погуби́, ꙳ ны́не же проявля́ет воскресе́ние Спа́сово, ꙳ и спаса́ет зову́щыя: ꙳ умири́ ми́р, и просвети́ ду́шы на́ша.

Сла́ва, и ны́не, гла́с 8:

Его́же дре́вле Моисе́й прообразова́в собо́ю, Амали́ка низложи́в победи́: и Дави́д песнопе́вец подно́жию твоему́, вопия́, кла́нятися повелева́ше. Честно́му Кресту́ Твоему́, Христе́ Бо́же, дне́сь гре́шнии кла́няемся, устна́ми недосто́йными, Тя́ изво́лившаго пригвозди́тися на не́м, воспева́юще мо́лимся: Го́споди, с разбо́йником Ца́рствия Твоего́ сподо́би на́с.

Вхо́д. Проки́мен дне́. Чте́ния 3.

Исхо́да чте́ние. [Главы́ 15 и 16.]

Поя́т Моисе́й сы́ны Изра́илевы от мо́ря Чермна́го, и веде́ ты́я в пусты́ню Су́р: и идя́ху три́ дни́ в пусты́ни, и не обрета́ху воды́, да бы́ша пи́ли. Приидо́ша же в Ме́рру, и не можа́ху пи́ти воды́ из Ме́рры, горька́ бо бе́: сего́ ра́ди нарече́ся и́мя ме́сту тому́ Го́ресть. И ропта́ху лю́дие на Моисе́а, глаго́люще: что́ пие́м? Возопи́ же Моисе́й ко Го́споду, и показа́ ему́ Госпо́дь дре́во: и вложи́ то́е в во́ду, и сладка́ бы́сть вода́. Та́мо положи́ ему́ Бо́г оправда́ния и суды́, и та́мо искуша́ше его́, и рече́: А́ще слу́хом услы́шиши гла́с Го́спода Бо́га Твоего́, и уго́дная пред Ни́м сотвори́ши: и внуши́ши за́поведи Его́, и сохрани́ши вся́ оправда́ния Его́: вся́ку боле́знь, ю́же наведо́х еги́птяном, не наведу́ на тя́: Аз бо е́смь Госпо́дь исцеля́яй тя́. И приидо́ша во Ели́м, и бя́ху та́мо двана́десять исто́чников во́д, и се́дмьдесят сте́блий фи́никовых: и ополчи́шася та́мо при вода́х. И воздвиго́шася от Ели́ма, и прии́де ве́сь со́нм сыно́в изра́илевых в пусты́ню Си́н, я́же е́сть между́ Ели́мом и между́ Си́ною.

При́тчей чте́ние. [Глава́ 3.]

Сы́не, не пренебрега́й наказа́ния Госпо́дня, ниже́ ослабева́й от Него́ облича́емый: его́же бо лю́бит Госпо́дь, наказу́ет: бие́т же вся́каго сы́на, его́же прие́млет. Блаже́н челове́к, и́же обре́те Прему́дрость: и сме́ртен, и́же уве́де ра́зум. Лу́чше бо Сию́ купова́ти, не́жели зла́та и сребра́ сокро́вища. Честне́йшая же е́сть ка́мений многоце́нных, не сопротивля́ется Ей ничто́же лука́вое, благоразу́мна е́сть все́м лю́бящым Ю: вся́кое же честно́е недосто́йно Ея́ е́сть. Долгота́ бо жития́, и ле́та жи́зни в десни́це Ея́: в шу́йце же Ея́ бога́тство и сла́ва: из у́ст Ея́ исхо́дит пра́вда, зако́н же и ми́лость на язы́це но́сит. Путие́ Ея́, путие́ добры́, и вся́ стези́ Ея́ с ми́ром. Дре́во живота́ е́сть все́м держа́щымся Ея́, и восклоня́ющымся на Ню́, я́ко на Го́спода, тверда́.

Проро́чества Иса́иина чте́ние. [Глава́ 60.]

Сия́ глаго́лет Госпо́дь: отве́рзутся врата́ твоя́, Иерусали́ме, вы́ну де́нь и но́щь, и не затворя́тся, е́же ввести́ к тебе́ си́лу язы́ков, и цари́ и́х ведо́мыя. Язы́цы бо и ца́рие, и́же тебе́ не порабо́тают, поги́бнут: и язы́цы запусте́нием запусте́ют. И сла́ва Лива́нова к тебе́ прии́дет, в кипари́се, и пе́вке, и ке́дре вку́пе, просла́вити ме́сто свято́е Мое́, и ме́сто но́г Мои́х просла́влю. И по́йдут к тебе́ боя́щеся сы́нове смири́вших тя́, и прогне́вавших тя́, и покло́нятся следо́м но́г твои́х вси́ прогне́вавшии тя́, и нарече́шися гра́д Госпо́день, Сио́н Свята́го Изра́илева. За е́же бы́ти тебе́ оста́влену и возненави́дену, и не бе́ помога́яй тебе́, и положу́ тя в ра́дость ве́чную, весе́лие родо́м родо́в. И изссе́ши млеко́ язы́ков, и бога́тство царе́й сне́си, и разуме́еши, я́ко Аз Госпо́дь спаса́яй тя́, и избавля́яй тя́ Бо́г Изра́илев.

На стихо́вне стихи́ры, гла́с 2.

Подо́бен: До́ме Евфра́фов:

Водо́ю Боготво́рною, ꙳ и Кро́вию Твое́ю, Сло́ве, ꙳ све́тло Це́рковь украша́ется, ꙳ я́ко неве́ста, ꙳ Креста́ сла́ву пою́щи.

Сти́х. Возноси́те Го́спода Бо́га на́шего, и покланя́йтеся подно́жию но́гу его́, я́ко свя́то е́сть.

Копие́ со Кресто́м, ꙳ гво́здие и ина́я, ꙳ и́миже живоно́сное ꙳ Христо́во пригвозди́ся Те́ло, ꙳ вознося́ще поклони́мся.

Сти́х. Бо́г же Ца́рь на́ш пре́жде ве́ка, соде́ла спасе́ние посреде́ земли́.

Егда́ Амали́ка ꙳ Моисе́й побежда́ше: ꙳ на высоту́ ру́це име́я ꙳ крестоявле́нно, ꙳ образова́ше Христо́ву стра́сть пречи́стую.

Сла́ва, и ны́не, гла́с 1:

Прообразу́я Кре́ст Тво́й, Христе́, патриа́рх Иа́ков, вну́ком благослове́ние да́руя, на глава́х премене́ны ру́ки сотвори́. Его́же, Спа́се, мы́ дне́сь вознося́ще, взыва́ем: да́руй правосла́вным Христиа́ном побе́ды, я́ко Константи́ну одоле́ние.

Ны́не отпуща́еши: Трисвято́е, И по О́тче на́ш. Тропа́рь: Спаси́, Го́споди, лю́ди твоя́:

И отпу́ст.

На у́трени,

на Бо́г Госпо́дь, тропа́рь то́йже, три́жды.

По 1-й кафи́сме седа́лен, гла́с 6:

То́кмо водрузи́ся Дре́во, Христе́, Креста́ Твоего́, основа́ния поколеба́шася сме́рти, Го́споди: его́же бо пожре́ жела́нием а́д, отпусти́ тре́петом. Яви́л еси́ на́м спасе́ние Твое́, Святы́й, и славосло́вим Тя́, Сы́не Бо́жий: поми́луй на́с.

Сла́ва, и ны́не, то́йже.

По 2-й кафи́сме седа́лен, гла́с 6:

Дне́сь проро́ческое испо́лнися сло́во: се́ бо покланя́емся на ме́сто, иде́же стоя́сте но́зе Твои́ Го́споди: и Дре́во спасе́ния прие́мше, грехо́вных страсте́й свобо́ду получи́хом, моли́твами Богоро́дицы, еди́не Человеколю́бче.

Сла́ва, и ны́не, то́йже.

По Хвали́те и́мя Госпо́дне:

Припе́в: Велича́ем тя́, живода́вче Христе́, и чте́м Кре́ст Тво́й святы́й, и́мже на́с спа́сл еси́ от рабо́ты вра́жия.

Псало́м избра́нный. Суди́, Го́споди, оби́дящыя мя́, побори́ борю́щыя мя́.

По полиеле́и Седа́лен, гла́с 8.

Подо́бен: Повеле́нное та́йно:

В раи́ мя пре́жде дре́во обнажи́, о вкуше́нии вра́г принося́ умерщвле́ние: Креста́ же дре́во живота́ одея́ние челове́ком нося́, водрузи́ся на земли́, и ми́р ве́сь испо́лнися вся́кия ра́дости, то́же зря́ще возвыша́ема, Бо́гу ве́рою лю́дие согла́сно возопии́м: испо́лнь сла́вы до́м Тво́й.

Сла́ва, и ны́не, то́йже.

Степе́нна, 1-й антифо́н 4-го гла́са.

Проки́мен, гла́с 4:

Ви́деша вси́ концы́ земли́ спасе́ние Бо́га на́шего.

Сти́х: Воспо́йте Го́сподеви пе́снь но́ву.

Вся́кое дыха́ние: Ева́нглие пи́сано в конце́ кни́ги сея́.

По 50-м псалме́ стихи́ра, гла́с 6:

Кре́сте Христо́в, Христиа́н упова́ние, заблу́ждших наста́вниче, обурева́емых приста́нище, в бране́х побе́да, вселе́нныя утвержде́ние, неду́жных врачу́, ме́ртвых воскресе́ние, поми́луй на́с.

Кано́н Честно́му и Животворя́щему Кресту́.

[Творе́ние Григо́риа Синаи́та.]

Ирмосы́ по два́жды: тропари́ на 12. Гла́с 4.

Пе́снь 1.

Ирмо́с: Отве́рзу уста́ моя́:

Кре́сте всеси́льне, апо́столов похвала́, преподо́бных утвержде́ние, и ве́рных зна́мение, и иера́рхов и му́чеников сла́ва, побе́да и утвержде́ние все́х хва́лящих Тя́.

Кре́сте всечестны́й, четвероконе́чная си́ла, апо́столов благоле́пие, и му́чеников кре́пость, немощны́х здра́вие показа́лся еси́, ме́ртвых воскресе́ние, па́дающих воздви́жение.

Кре́сте, Ты́ ми́ си́ла бу́ди, кре́пость и держа́ва, изба́витель и предра́тник на борю́щыя мя́, щи́т и храни́тель, побе́да и утвержде́ние мое́, при́сно соблюда́я мя́ и покрыва́я.

Богоро́дичен: На Кресте́, Всенепоро́чная, Твоего́ Сы́на я́ко узре́ла еси́, ору́жие ско́рбное утро́бу Твою́ растерза́: и восклица́ла еси́ рыда́ющи в боле́зни: но а́бие просла́вила еси́ Креста́ си́лу.

Катава́сиа: Кре́ст начерта́в Моисе́й.

Пе́снь 3.

Ирмо́с: Твоя́ песносло́вцы, Богоро́дице.

Кре́сте, преподо́бных ору́жие, обою́дный ме́чь Христо́в, ве́рных удобре́ние, боля́щих исцеле́ние и заступле́ние, и воздвиже́ние уме́рших, всече́стне.

Кре́сте, основа́ние благоче́стия, бесо́м показа́лся еси́ губи́тель, це́рквам благоле́пие, нечести́вым поги́бель, враго́м посрамле́ние в де́нь су́дный.

Кре́сте живоно́сный, Ты́ ми бу́ди кре́пость, и побе́да, и щи́т, и стена́ нера́туема, бесо́в отгна́ние, и помысло́в погаше́ние, и ума́ моего́ сохране́ние.

Богоро́дичен: Распя́тие поно́сное, Де́во Влады́чице, Тво́й Сы́н претерпе́, и сме́рть неподо́бную: но возне́сся, низве́рже проти́вныя вра́жия си́лы, я́ко безсме́ртен.

Катава́сиа: Же́зл во о́браз:

Седа́лен, гла́с 8.

Подо́бен: Повеле́нное та́йно:

Прообража́ше та́йно дре́вле Иису́с Нави́н Креста́ о́браз, егда́ ру́це простре́ крестови́дно, Спа́се мо́й, и ста́ со́лнце, до́ндеже враги́ низложи́ противостоя́щыя ти́ Бо́гу: ны́не же за́йде, на кресте́ Тя́ зря́, до́ндеже держа́ву сме́ртную разруши́в, ве́сь ми́р совоздви́гл еси́.

Сла́ва, и ны́не, то́йже.

Пе́снь 4.

Ирмо́с: Седя́й в сла́ве, на Престо́ле Божества́:

Четвероконе́чный сы́й ми́р, и я́ко триобою́дный ме́чь, нача́ла тмы́ сече́ши, на́ми вообража́емь, Кре́сте, ору́жие вели́кое Христо́во, и непобеди́мое победи́тельство всеси́льное.

Твоя́ высота́, Живоно́сне Кре́сте, возду́шнаго кня́зя бие́т: и глубина́ всея́ бе́здны закала́ет зми́я, широту́ па́ки вообража́ет, низлага́я мирска́го кня́зя кре́постию твое́ю.

Возне́сся сопривле́кл еси́ па́дшыя, воздви́гл еси́ естество́ земно́е, Престо́лу Бо́жию просла́вился еси́. Кре́сте, высото́ вели́кая, мирски́й мо́сте, ду́шу мою́ от страсте́й глубины́ вознеси́ вско́ре.

Богоро́дичен: Крестообра́зно, Пречи́стая, отрокови́це Богоро́дице, дла́ни твоя́ распросте́рши к воздви́женому на Кресте́, и моли́твы, Де́во, ны́не принеси́, за все́х ве́рно моля́щихся тебе́.

Катава́сиа: Услы́шах, Го́споди, смотре́ния Твоего́ та́инство:

Пе́снь 5.

Ирмо́с: Ужасо́шася вся́ческая о Боже́ственней сла́ве:

Кре́сте, небе́сная ле́ствице святы́ни, степе́нем наста́вниче, Христо́ва высота́ и сла́ва еси́, Бо́жий о́браз назна́менателен ми́ру, неви́димому же и ви́димому, единоче́стне.

Кре́сте, о́бразе неиспи́санный си́лою, освяще́ние вода́м, очище́ние возду́ху освяще́ние и просвеще́ние вся́ком, му́жества зна́мение, и Христо́в ски́петр непрело́жный показа́лся еси́, проти́вныя в зе́млю попира́я.

Кре́сте всеси́льне, злочести́выя низложи́ враги́, ненави́дящыя и ху́лящыя Тя́ безу́мно: язы́ки попали́, и угаси́ шата́ния и́х. О Кре́сте всесвяты́й и Христоно́сный, сохрани́ на́с держа́вою Твое́ю.

Богоро́дичен: Все́х Цари́це Влады́чице, ски́петром рождества́ Твоего́ разруши́, Де́во, воста́ние ху́лящих кре́стную си́лу, да́ждь на́м кре́пость и очище́ние, побе́ду и по́мощь.

Катава́сиа: О треблаже́нное дре́во:

Пе́снь 6.

Ирмо́с: Боже́ственное сие́ и всечестно́е:

Кре́ст все́х воскресе́ние, Кре́ст па́дших исправле́ние, страсте́й умерщвле́ние, и пло́ти пригвожде́ние, Кре́ст душа́м Сла́ва, и све́т ве́чный.

Кре́ст враго́в губи́тель, Кре́ст злочести́вых я́зва и плене́ние, и ве́рных держа́ва, благочести́вых храни́тель и бесо́в отгони́тель.

Кре́ст страсте́й па́губа, Кре́ст помысло́в отгна́ние, Кре́ст сокруше́ние язы́ческое искуси́тельно, и духово́м показа́ся лови́тельство.

Кре́ст воздви́жется, и па́дают духо́в возду́шных чи́нове: Кре́ст снизхо́дит, и нечести́вии вси́ ужаса́ются, я́ко мо́лния ви́дяще кре́стную си́лу.

Катава́сиа: Во́днаго зве́ря:

Конда́к, гла́с 4. Подо́бен:

Вознесы́йся на Кре́ст во́лею, тезоимени́тому твоему́ но́вому жи́тельству, щедро́ты твоя́ да́руй, Христе́ Бо́же. Возвесели́ на́с си́лою твое́ю, побе́ды дая́ на́м на сопоста́ты, посо́бие иму́щым Твое́ ору́жие ми́ра ‑ непобеди́мую побе́ду.

И́кос: И́же до тре́тияго небесе́ восхище́н бы́сть в ра́й, и глаго́лы слы́шав неизрече́нныя и Боже́ственныя, и́хже не ле́ть язы́ки [челове́ческими] глаго́лати, что́ гала́том пи́шет, я́ко рачи́телие писа́ний прочто́сте и позна́сте: мне́, глаго́лет, хвали́тися да не бу́дет, то́кмо во еди́ном Кресте́ Госпо́дни, на не́мже страда́в уби́ стра́сти. Того́ у́бо и мы́ изве́стно держи́м, Кре́ст Госпо́день, хвалу́ вси́: е́сть ко на́м спаси́тельное сие́ дре́во, ору́жие ми́ра, непобеди́мая побе́да.

Пе́снь 7.

Ирмо́с: Не послужи́ша тва́ри Богому́дрии:

Неразде́льную Тро́ицу и неслия́нну, естество́ еди́нством богосло́вим, Отца́ нерожде́нна, и рожде́нна Сы́на, и свята́го исходи́тельнаго Боже́ственнаго Ду́ха пе́сньми пою́ще: благослове́н Бо́г оте́ц на́ших.

Незаходи́тельными мо́лниями Твои́ми, Триипоста́сне, на́ша озари́ у́мныя о́чи, добро́ту твою́, Трисве́тне, пресу́щественную зре́ти, я́же челове́ком неве́домая и непристу́пная а́нгелом.

Луча́ми све́та Твоего́ па́дшую мою́ ду́шу возведи́ от глубины́, благи́й Бо́же, препе́тый и всеси́льный, попо́лзшася от све́та благода́тнаго, и во тму́ воглу́бльшуюся.

Богоро́дичен: Крестообра́зно просте́рши руце́, Чи́стая, к распросте́ршему Свои́ руце́ на дре́ве кре́стнем, и возне́сшему естество́ на́ше, и умертви́вшему вражде́бныя полки́, моля́щи не преста́й.

Катава́сиа: Безу́мное веле́ние мучи́теля:

Пе́снь 8.

Ирмо́с: О́троки благочести́выя в пещи́:

Высота́ Христо́вых страсте́й, и лу́к и ору́жие и ме́чь, ору́жие непосты́дное, и си́ла непобеди́мая, Христо́во подно́жие, и победи́тельство на враги́: зна́мения Ца́рствия, ски́петр ве́рных, показа́лся еси́, Кре́сте победоно́сне.

Воздви́гл еси́ на́ше па́дшее естество́, Христо́м распе́ншимся и совозста́вил: высото́ Боже́ственная, глубино́ низглаго́ланная, Христо́во Ты́ еси́ зна́мение, Кре́сте пребога́те, и широта́ безме́рная, и зна́мение непостижи́мыя Тро́ицы, жизноно́сче.

Устна́ми, душе́ю же и се́рдцем Кре́ст Госпо́день лобыза́юще, прииди́те ны́не вознесе́м вси́ и возвели́чим, покланя́ющеся рце́м вку́пе пе́снь пречи́стую, вопию́ще: ра́дуйся, вели́кое бога́тство, Кре́сте, церко́вное украше́ние.

Дре́во жи́зни и спасе́ния, дре́во безсме́ртия, дре́во ра́зума, дре́во трилюбе́зное: нетле́нное и неизнуря́емое, Кре́ст трисоста́вный, Честно́е дре́во: Тро́ицы бо но́сит триипоста́сныя о́браз.

Катава́сиа: Благослови́те, о́троцы:

Пе́снь 9.

Ирмо́с: Вся́к земноро́дный да взыгра́ется ду́хом:

Кто́ слы́шана сотвори́т, я́коже пи́шет, де́йствия Твоя́, миролюбе́зный Кре́сте, си́лы и чудеса́, уме́рших воста́ние, и ми́р ве́сь совозне́сл еси́, вознесы́йся к Бо́гу многожела́емый.

Утвержде́ние ве́рных Кре́ст треблаже́нный, зна́мение и похвала́, дре́во всеси́льное, Кре́ст Христо́в вели́кий и соверше́нный, апо́столов похвала́, преподо́бных утвержде́ние, и му́чеников кре́пость, побе́да и похвала́.

Ра́дуйся, Кре́сте, о́бразе неопи́санный и многоимени́тый, дре́во требога́тное, стра́шное же и всеблаже́нное: ра́дуйся, Кре́сте всесвяты́й и всеси́льный, ра́дуйся, храни́теля жи́зни на́шея, Госпо́день Кре́сте многопе́тый.

Кре́сте Честны́й, храни́тель души́ и те́лу бу́ди ми́, о́бразом Свои́м бе́сы низлага́я, враги́ отгоня́я, стра́сти упражня́я, и благослове́ние да́руя ми́, и жи́знь и си́лу, соде́йствием Свята́го Ду́ха, и честны́ми Пречи́стыя мольба́ми.

Катава́сиа: Та́ин еси́, Богоро́дице, ра́й:

Свети́лен.

Кре́ст, храни́тель всея́ вселе́нныя: Кре́ст, красота́ Це́ркве: Кре́ст, ве́рных утвержде́ние: Кре́ст, а́нгелов сла́ва, и де́монов я́зва. [Три́жды.]

На хвали́тех стихи́ры, гла́с 1:

Подо́бен: Небе́сных чино́в ра́дование:

Небе́сная ше́ствия, ꙳ Кре́ст Честны́й гото́вит все́м, ꙳ Тому́ покланя́ющымся ве́рою несумне́нною: ꙳ и лико́м невеще́ственных си́л, ꙳ и́же на не́м пригвозди́выйся, ꙳ сочета́ет любо́вию пою́щыя Того́.

Кла́няющеся ве́рою Кресту́ Честно́му, ꙳ на не́м распе́ншагося воспое́м Влады́ку: ꙳ Того́ манове́нием, устне́ вку́пе и ду́шу очища́юще, ꙳ и сия́нии сего́ мы́сленными уясни́мся, ꙳ хва́ляще Его́.

Го́ресть дре́вле услажда́я Моисе́й, ꙳ изба́ви Изра́иля, ꙳ о́браз Креста́ напису́я: ꙳ мы́ же сего́, вси́ ве́рнии, ꙳ та́йно и Боже́ственно вообража́юще в сердца́х на́ших, ꙳ всегда́ спаса́емся держа́вою Его́.

Сла́ва, и ны́не, гла́с 4.

Пособи́вый, Го́споди, кро́ткому Дави́ду покори́ти иноплеме́нника, ору́жием Креста́ низложи́ враги́ на́ша, покажи́, Благоутро́бне, на на́с дре́вния ми́лости Твоя́: и да разуме́ют вои́стинну, я́ко Ты́ еси́ Бо́г, и на Тя́ наде́ющиися побежда́ем, моля́щиися обы́чно Пречи́стей Твое́й Ма́тери, дарова́тися на́м ве́лией ми́лости.

Славосло́вие вели́кое. И отпу́ст.

На литурги́и блаже́нна от кано́на, пе́снь 3-я и 6-я.


Источник: Минея общая – М. : Издательский Совет Русской Православной Церкви, 2002. – 516 с. ISBN 5-94625-045-0

Комментарии для сайта Cackle