[Глава 8] Слу́жба о́бща апо́столу еди́ному

Ве́чера,

на Го́споди воззва́х, стихи́ры, гла́с 8.

Подо́бен: Что́ вы́ нарече́м:

Что́ тя имену́ем, апо́столе? ꙳ не́бо ли? я́ко сла́ву испове́дал еси́ Бо́жию. ꙳ реку́ ли? я́ко тва́рь напая́еши та́йно. ꙳ звезду́? озаря́ющую це́рковь. ꙳ ча́шу? пи́во свято́е излива́ющую. ꙳ дру́га Христо́ва бли́жнейшаго? ꙳ безпло́тных равносе́льника? ꙳ моли́ о спасе́нии ду́ш на́ших.

Сла́вне Богови́дче апо́столе, ꙳ украси́стеся но́зе твои́, ꙳ путе́м про́поведи ше́ствующии до́бре, ꙳ и пути́ вся́ вра́жия стесня́ющии ꙳ широто́ю Боже́ственнаго ра́зума, ꙳ Сло́ва я́вльшагося дебельство́м пло́ти, ꙳ и ученика́ тя́ пресла́вна ꙳ избра́вшаго, блаже́нне. ꙳ Его́же моли́ спасти́ся душа́м на́шым.

Вои́стинну, Богоглаго́ливе апо́столе, ꙳ по́слан бы́л еси́ от Христа́, ꙳ я́ко стрела́ светови́дная, уязвля́юща враги́, ꙳ уя́звленным же душа́м ꙳ я́вственно подаю́ща исцеле́ние. ꙳ Те́мже тя́ по до́лгу ублажа́ем, ꙳ и свято́е твое́ дне́сь соверша́ем торжество́: ꙳ моли́ спасти́ся душа́м на́шым.

Сла́ва, и ны́не, Богоро́дичен:

Тьма́ми, Пречи́стая, обеща́хся покая́ние сотвори́ти о мои́х согреше́ниих, но не оставля́ет мя́ люби́мый зо́л мои́х обы́чай. Сего́ ра́ди Тебе́ вопию́, и припа́даю моля́ся: ты́ мя́, Влады́чице, изми́ такова́го мучи́тельства, наставля́ющи мя́ к лу́чшым, и спасе́ния бли́з су́щым.

Крестобогоро́дичен: А́гнца и Па́стыря Тя́, на дре́ве я́ко ви́де, ꙳ А́гница ро́ждшая рыда́ше, ꙳ и ма́терски тебе́ веща́ше: ꙳ Сы́не вожделе́ннейше, ка́ко на дре́ве кре́стнем ꙳ пове́шен еси́, Долготерпели́ве? ꙳ Ка́ко ру́це Твои́ и но́зе Твои́, Сло́ве, ꙳ пригвозди́шася от беззако́нных, ꙳ и кро́вь Твою́ излия́л еси́, Влады́ко?

А́ще и́мать, самогла́сен:

Сла́ва, гла́с 6:

Излия́ся благода́ть во устна́х твои́х, сла́вне апо́столе и́мярек, и бы́л еси́ свети́льник це́ркве Христо́вы, учя́ слове́сныя овцы́, ве́ровати в Тро́ицу единосу́щную, во еди́но Божество́.

И ны́не, Богоро́дичен.

Никто́же притека́яй к Тебе́, посра́млен от Тебе́ исхо́дит, Пречи́стая Богоро́дице Де́во, но про́сит благода́ти, и прие́млет дарова́ние к поле́зному проше́нию.

Крестобогоро́дичен: Всечи́стая, я́ко ви́де Тебе́ на Кресте́ пове́шена, пла́чущи вопия́ше ма́терски: Сы́не Мо́й и Бо́же Мо́й, Сладча́йшее Мое́ Ча́до, ка́ко терпи́ши стра́сть поно́сную?

[зри́] А́ще ли пра́зднуеши с полиеле́ем, глаго́ли Богоро́дичен воскре́сный: Кто́ тебе́ не ублажи́т: [Пи́сан в конце́ кни́ги сея́.]

Вхо́д. Проки́мен дне́.

Та́же паремии́ 3, апо́стольския, [пи́саны в конце́ кни́ги сея́.]

На стихо́вне стихи́ры, гла́с 4.

Подо́бен: Да́л еси́ зна́мение:

Прия́л еси́, апо́столе, над де́моны ꙳ непобеди́мую вла́сть и си́лу, ꙳ о и́мени Христо́ве, ꙳ нача́ла тьмы́ си́х отгони́ти, ꙳ и проше́л еси́ зе́млю, ꙳ просвеща́я я́коже со́лнце, ꙳ и вся́ страны́ научи́, ꙳ пе́рвое, сла́вне, Христо́во пропове́дал еси́ спаси́тельное прише́ствие.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Пе́рвей бла́гости, ꙳ и есте́ственному и пребоже́ственному ꙳ житию́ подо́бяся, ꙳ му́ж бы́л еси́ бла́г, и́мярек, по существу́, ꙳ и благода́ти Боже́ственныя Сы́н имену́емь, ꙳ нра́вов твои́х бла́гостию, ꙳ и ума́ чистото́ю, ꙳ Христо́в показа́лся еси́ ꙳ ученик и́скренний.

Сти́х: Небеса́ пове́дают сла́ву Бо́жию, творе́ние же руку́ его́ возвеща́ет тве́рдь.

Орга́н до́бре соста́влен, ꙳ Боже́ственным окормле́нием, апо́столе и́мярек, ꙳ язы́ков зва́нию ты́ уве́рился еси́, ꙳ к позна́нию Христо́ву наставля́я, ꙳ словесы́ и дея́нии, ꙳ и вся́ просвети́л еси́ ꙳ испове́дати и́стинное Иису́са Божество́, ꙳ Спа́са ду́ш на́ших.

Сла́ва, гла́с 2:

Оста́вив земна́я, после́довал еси́ Христу́, и зна́менався дохнове́нием Свята́го Ду́ха, по́слан бы́в от него́ в язы́ки поги́бшыя, обраща́ти челове́ки в све́т Богозна́ния, апо́столе и́мярек, и сконча́в по́двиги Боже́ственныя твоея́ стра́сти, и му́к разли́чных, ду́шу твою́ Христу́ пре́дал еси́. Того́ моли́, всеблаже́нне, дарова́ти на́м ве́лию ми́лость.

А́ще ли пра́зднуеши, глаго́ли Богоро́дичен воскре́сный:

О чудесе́, но́ваго, все́х дре́вних чуде́с!

А́ще ли не пра́зднуеши, глаго́ли Богоро́дичен се́й:

Я́ко плодови́та ма́слина Де́ва, израсти́ Тебе́ плода́ живо́тнаго плодоноси́ти ми́рови ве́лию и бога́тую ми́лость.

Крестобогоро́дичен: Дре́ву кре́стному Тя́, Иису́се, пригвожде́на, ꙳ зря́щи Неискусобра́чная, ꙳ пла́чущи глаго́лаше: ꙳ Ча́до сладча́йшее, ꙳ почто́ оста́вил еси́ Мене́ ро́ждшую Тя́ еди́ну, ꙳ Све́те непристу́пный пребезнача́льнаго Отца́? ꙳ потщи́ся и просла́вися, ꙳ я́ко да сла́ву полу́чат Боже́ственную, ꙳ Боже́ственныя стра́сти Твоя́ сла́вящии.

Тропа́рь во уста́ве.

А́ще ли не́сть уста́ва, глаго́ли се́й тропа́рь, гла́с 3:

Апо́столе святы́й и́мярек, моли́ ми́лостиваго Бо́га, да прегреше́ний оставле́ние пода́ст душа́м на́шым.

Сла́ва, и ны́не, Богоро́дичен, по гла́с тропаря́.

На у́трени

на Бо́г Госпо́дь: тропа́рь то́йже.

По 1-й кафи́сме, седа́лен, гла́с 2:

Улови́в язы́ки апо́стол сла́вный, и научи́в концы́ земны́я, Тебе́ кла́нятися со Отце́м и Ду́хом, Христе́ Бо́же: того́ ра́ди утверди́ це́рковь Твою́, и ве́рным низпосли́ благослове́ние Твое́, еди́не ми́лостиве и Человеколю́бче. [Два́жды.]

Сла́ва, и ны́не, Богоро́дичен:

Боже́ственнаго естества́ о́бщницы бы́хом тобо́ю, Богоро́дице Присноде́во: Бо́га бо на́м воплоти́вшагося родила́ еси́. Те́мже по до́лгу Тя́ вси́ благоче́стно велича́ем.

По 2-й кафи́сме седа́лен, гла́с 4:

Лучу́ я́ко со́лнце пра́вды испусти́ тя Христо́с, просвети́ти всю́ зе́млю, апо́столе сла́вный и́мярек, Боже́ственными твои́ми моли́твами озаря́еши, и Боже́ственным све́том невече́рним все́х просвеща́еши, ве́рою соверша́ющих святу́ю па́мять твою́. [Два́жды.]

Сла́ва, и ны́не, Богоро́дичен:

Наде́жда непосты́дная наде́ющихся на Тя́, еди́на ро́ждшая па́че естества́ пло́тию Христа́ Бо́га на́шего, того́ со святы́ми апо́столы моли́, пода́ти вселе́нней очище́ние прегреше́ний, и все́м на́м пре́жде конца́ жития́ исправле́ние.

Припе́в:

Велича́ем тя́, апо́столе святы́й и́мярек, и чте́м боле́зни и труды́ твоя́, и́миже труди́лся еси́ во благове́стии Христо́ве.

Псало́м избра́нный: Небеса́ пове́дают сла́ву Бо́жию:

По полиеле́и седа́лен, гла́с 8.

Подо́бен: Прему́дрости:

Мре́жею слове́с Боже́ственных, ры́бы улови́в слове́сныя, сия́ прине́сл еси́ нача́ток Бо́гу на́шему и в Христо́вы я́звы жела́я облещи́ся, подо́бник стра́сти Его́ яви́лся еси́. Те́м соше́дшеся по до́лгу чти́м, апо́столе сла́вне, всепра́зднственную па́мять твою́, и согла́сно вопие́м ти́: моли́ Христа́ Бо́га, грехо́в оставле́ние дарова́ти, чту́щым любо́вию святу́ю па́мять твою́. [Два́жды.]

Сла́ва, и ны́не, Богоро́дичен:

Небе́сную две́рь и киво́т, пресвяту́ю го́ру, све́тлый о́блак воспои́м, неопали́мую купину́, слове́сный ра́й, Е́вы воззва́ние, вселе́нныя всея́ вели́кое сокро́вище: я́ко спасе́ние в Не́й соде́лася ми́ра, и оставле́ние дре́вних согреше́ний. Сего́ ра́ди вопие́м Ей: моли́ся Сы́ну Твоему́, прегреше́ний оставле́ние дарова́ти, благоче́стно покланя́ющымся всесвято́му рождеству́ Твоему́.

Степе́нна, 1-й антифо́н 4-го гла́са.

Проки́мен: Во всю́ зе́млю изы́де веща́ние и́х:

Сти́х: Небеса́ пове́дают сла́ву Бо́жию:

Вся́кое дыха́ние:

Та́же Ева́нглие, [пи́сано в конце́ кни́ги сея́.]

По 50-м псалме́ стихи́ра, гла́с 6:

И́же Боже́ственнаго Ду́ха я́сно благода́ть прие́м, свяще́ннаго ли́ка апо́стольскаго соприча́стник бы́в, и́мярек: те́м носи́мое с небесе́ иногда́ дыха́ние о́гненное о́гненным язы́ком вдохну́в, и язы́ческое терно́вное попали́л еси́ безбо́жие, Христа́ Бо́га пропове́дниче, моли́ спасти́ся душа́м на́шым.

Кано́н, гла́с 8.

Пе́снь 1.

Ирмо́с: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще, пои́м Тебе́ еди́ному Влады́це.

В вы́шних Влады́це предстоя́ и́мярек, апо́столе чу́дне, тя́ просла́вльшему, и ученика́ себе́ све́тло показа́вшему, просвети́ ду́шу мою́, да воспою́ Боже́ственную твою́ па́мять.

Вся́ко изъоби́лие благи́х тебе́ Христо́с дарова́в, ве́рх Боже́ственных дарова́ний, апо́столе, показа́ тя, судо́м пра́ведным, Богоявле́нне, пра́ведный еди́н.

Вседухо́вную зарю́ прии́м, апо́столе, соше́дшую на тя́ с небесе́, огнедухнове́н бы́л еси́, всю́ попаля́я пре́лесть многобо́жия.

Богоро́дичен: Ты́ мое́ ме́ртвенное и тле́нное, безсме́ртное и нетле́нное, Спа́се, показа́в, во утро́бу всели́лся еси́ святы́я Де́вы Пречи́стыя неискусобра́чно, вообрази́вся же в челове́ческое естество́.

Пе́снь 3.

Ирмо́с: Не́сть свя́т я́ко Госпо́дь, и не́сть пра́ведн я́ко Бо́г на́ш, его́же пое́т вся́ тва́рь: не́сть пра́ведн па́че Тебе́, Го́споди.

Боже́ственное та́инство воплоще́ния позна́л еси́ вои́стинну, апо́столе и́мярек Богоприя́тне, от сама́го Спа́са зарю́ прии́м преми́рную.

Сло́во безнача́льное и присносу́щное, своего́ служи́теля тя́, апо́столе чу́дне, блиста́нии све́тлыми бога́тно просвети́ Боже́ственныя благода́ти.

Заре́ю разжже́н и де́телию духо́вною, я́ко стрела́ Богови́дная по́слан бы́л еси́ от Христа́, апо́столе пресла́вне, и ми́р просвети́л еси́, блаже́нне, уче́нием твои́м.

Богоро́дичен: Све́щник всезлаты́й Тя́ проро́к прописа́, Богоро́дице, нося́щу све́т невече́рний, просвеща́ющаго ми́р луча́ми Божества́, Христа́ Бо́га на́шего.

Седа́лен, гла́с 3.

Подо́бен: Боже́ственныя:

Боже́ственнаго Ду́ха светозаре́нием, тму́ разруши́л еси́ многобо́жия, и ве́рных сердца́ просвети́л еси́, воспе́в спаси́тельныя повеле́ния апо́столе и́мярек, прему́дре, Христа́ Бо́га моли́, дарова́ти на́м ве́лию ми́лость.

Сла́ва и ны́не, Богоро́дичен:

Ки́йждо иде́же спаса́ется, та́мо пра́ведно и притека́ет: и ко́е ино́е таково́е прибе́жище, я́ко Ты́, Богоро́дице, покрыва́ющее ду́шы на́ша?

Крестобогоро́дичен: Же́зл си́лы стяжа́вшии кре́ст Сы́на Твоего́, Богоро́дице, те́м низлага́ем враго́в шата́ния, любо́вию Тя́ непреста́нно велича́юще.

Пе́снь 4.

Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися, Богови́дно усмотри́, и со стра́хом славосло́вяше си́лу Твою́.

Ве́сь сокро́вище сы́й дарова́ний ева́нгльских, благода́ти испо́лнен, све́т ми́ра, и со́ль вселе́нныя, и́мярек всеблаже́нне, бы́л еси́.

Веще́й сту́днаго явле́ния отврати́лся еси́, невеще́ствен же све́т ви́дети сподо́бился еси́ Божества́, ви́д прии́мшаго ве́щь челове́чества, досточу́дне.

Ты́, я́ко ученик жи́зни нетле́нныя, умертви́ на́ш живу́щий гре́х, живоно́сною си́лою животода́вца, ея́же прия́л еси́ де́йствие.

Богоро́дичен: Ра́вен бы́в Отцу́ Твоему́ по существу́, ра́вен челове́ком бы́л еси́ по естеству́, от Пречи́стыя Де́вы на́шу, Влады́ко, пло́ть прие́мый.

Пе́снь 5.

Ирмо́с: От нощи́ неве́дения, Богове́дением просвети́вый концы́, просвети́ мя у́тром человеколю́бия Твоего́, Го́споди.

Со огне́м духо́вным, Богови́дче, тво́й смеси́ся язы́к, его́же восприя́л еси́ любо́вию, на го́рнице седя́.

Я́ко высо́к сы́й в превы́шних се́лех живы́й, и́мярек, высо́кая и вели́кая уче́ния на́м прине́сл еси́.

Ум чи́ст име́яй к Бо́гу во све́тлости, се́рдце чи́сто стяжа́л еси́, и воплоще́ннаго Бо́га ви́дел еси́, непостижи́маго ра́зумом.

Богоро́дичен: Зако́н пе́рвый, Де́во, рождество́м Твои́м преста́, процвете́ же благода́ть, и пра́вда возсия́.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том я́ко ри́зою, многоми́лостиве Христе́ Бо́же на́ш.

Я́ко ученик и дру́г Христо́в, апо́столе сла́вне, ре́вностию поревнова́л еси́, по Го́споде Бо́зе вседержи́тели.

Тебе́ Боже́ственных чуде́с самоде́лателя Спа́с показа́, да́в вла́сть тебе́ де́йством Своея́ бла́гости.

Преукра́шен Боже́ственною благода́тию уче́ния, благовеству́еши ми́ру о́бщее спасе́ние, су́щаго над все́ми Бо́га, апо́столе Христо́в, и́мярек прехва́льне.

Богоро́дичен: Да заградя́тся уста́ злочести́вых, Богоро́дицу Тя́ нему́дрствующих, Всенепоро́чная, и ли́ца и́х в сту́д да облеку́тся.

Конда́к, во уста́ве.

А́ще ли не́сть уста́ва, глаго́ли се́й конда́к, гла́с 4.

Подо́бен: Яви́лся еси́:

Я́ко звезду́ пресве́тлую це́рковь всегда́ стяжа́ тя, апо́столе и́мярек, чуде́с твои́х многоподава́нием просвеща́ема. Те́мже зове́м Христу́: спаси́ чту́щих ве́рою па́мять Твоего́ апо́стола, Многоми́лостиве.

И́кос: Струю́ сло́ва пода́ждь ми́, Го́споди, водно́е естество́ соде́явый, и се́рдце мое́ укрепи́, Благоутро́бне, и́же зе́млю утверди́вый сло́вом Твои́м: и просвети́ мое́ помышле́ние, све́том я́ко ри́зою одева́яйся, да глаго́ля и пою́ подо́бная, досто́йно почести́ Твоего́ апо́стола, Многоми́лостиве.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Стра́нну ре́вность имы́й, ны́не Престо́лу предстои́ши Влады́чнему и́мярек, я́ко слуга́ Христо́в венча́н бы́л еси́, Богопропове́дниче, вопия́: благослове́н еси́, Го́споди Бо́же, во ве́ки.

Вку́пе Сло́ву сликовству́я и собесе́дник Тому́ бы́в, Ца́рствия та́мо сопричасти́лся еси́ вы́шняго, зовы́й: благослове́н еси́, Го́споди Бо́же, во ве́ки.

Му́дростию обложе́н, благода́тию озаре́н, ми́рною красото́ю украше́н, Богоглаго́ливе апо́столе свя́те, вопие́ши: благослове́н еси́, Го́споди Бо́же, во ве́ки.

Богоро́дичен: Ле́стию дре́вле благожре́бия пра́отцы изгна́ зми́й: ты́ же си́х, Ма́ти Бо́жия, воззвала́ еси́ глаго́лющих: благослове́н, Пречи́стая, Пло́д Твоего́ чре́ва.

Пе́снь 8.

Ирмо́с: Мусики́йским орга́ном согласу́ющым, и лю́дем безчи́сленным покланя́ющымся о́бразу в деи́ре, три́ о́троцы не повину́вшеся, Го́спода воспева́ху, и славосло́вляху во вся́ ве́ки.

Я́ко кра́сне но́зе твои́ яви́стеся, благоле́пен е́сть и язы́к глаго́лющь сла́ву Христо́ву, и научи́ зва́ти: Го́спода по́йте и превозноси́те во вся́ ве́ки.

Добро́тами укра́шен светолу́чными, и чуде́с пуща́я сия́ния, позна́лся еси́ лю́дем се́мя благослове́нное, уверя́я взыва́ти: Го́спода по́йте и превозноси́те во вся́ ве́ки.

Свя́т ученик, небе́сным уче́н та́йнам вои́стинну, проше́л еси́ вселе́нную, учя́ велегла́сно сло́во ве́ры Христо́вы ты́, апо́столе, и неизрече́нную испове́дая благода́ть вопия́: Го́спода по́йте и превозноси́те во вся́ ве́ки.

Богоро́дичен: Ум не мо́жет рождества́ Твоего́, Богороди́тельнице, сказа́ти, и изрещи́ сло́во изнемога́ет: Бо́га бо заче́нши родила́ еси́, Де́во: Его́же превозно́сим во вся́ ве́ки.

Пе́снь 9.

Ирмо́с: Вои́стинну Богоро́дицу Тя́ испове́дуем, спасе́ннии Тобо́ю, Де́во чи́стая, с безпло́тными ли́ки Тя́ велича́юще.

Я́влен бы́л еси́ конце́м, апо́столе, Боже́ственным све́том сия́я, и о́гнь духо́вный прии́м, светоза́рен показа́лся еси́, и́мярек, те́мже тя́ велича́ем.

Ве́сь Бо́гу возложе́н, тому́ сраствори́лся еси́: Его́же ны́не моли́, Богоявле́нне, о на́с, ве́рою и любо́вию восхваля́ющих тя́.

Твою́, преблаже́нне, па́мять пра́зднующе, мо́лимся всегда́, треволне́ния избы́ти хода́тайством дерзнове́ния твоего́: его́же я́ко Христо́в апо́стол и́маши, Богови́дче всече́стне.

Богоро́дичен: Спасе́ния все́х Хода́таицу я́вльшуюся челове́ком, и ми́р просве́щшую сия́нии Богови́дныя чистоты́, в пе́снех велича́ем.

Свети́лен.

Подо́бен: Ду́хом предзря́:

Тече́ние кра́сных твои́х но́г, и́мярек апо́столе, возврати́в к ше́ствию небе́сному возше́л еси́ ра́дуяся, и Тро́ице предста́в, во Отце́ ви́диши Сы́на и Ду́ха Боже́ственнаго. Сего́ ра́ди ве́рою пресвяще́нную твою́ и Боже́ственную пра́зднуем па́мять.

Богоро́дичен: Стра́шнаго испыта́ния воспомина́ю ча́с, мно́жество зо́л де́л мои́х ужаса́ет и устраша́ет мя́, но уще́дри, Пречи́стая, те́плою Твое́ю моли́твою, и да́ждь ми́ спасе́ние: ели́ка бо хо́щеши, мо́жеши.

На хвали́тех стихи́ры, гла́с 4.

Подо́бен: Я́ко до́бля:

Тро́стию благода́ти, ꙳ от глубины́ су́етства челове́ки извле́кл еси́, досточу́дне, ꙳ Учи́тля ма́нием повину́вся, и́мярек, ꙳ просве́щшаго по всему́ твое́ разуме́ние, и апо́стола, и че́стна Богоглаго́льника, ꙳ тя́, всеблаже́нне, показа́вша, ꙳ того́ непости́жнаго Божества́. ва́жды.]

Ду́ха сия́ние на тя́ сни́де ꙳ во о́гненне ви́де, и тя́, блаже́нне, Боже́ственное прия́телище соде́ла, ꙳ ско́ро отгоня́ща безбо́жия мглу́, ꙳ и ми́р просвеща́юща ꙳ сия́нием всему́дрых твои́х слове́с, ꙳ тайноглаго́льниче, ꙳ апо́столов украше́ние, ꙳ Христо́в самови́дче блаже́нне.

Мо́лниями пропове́дания, ꙳ во тьме́ седя́щыя неве́дения, ꙳ сла́вне, просвети́в, ꙳ показа́л еси́ сы́ны ꙳ Влады́ки и Бо́га ве́ры ра́ди. ꙳ Его́же страсте́м ревнова́л еси́ и сме́рти, ꙳ и сла́вы бы́л еси́ насле́дник, ꙳ я́ко му́др и Богоглаго́лив, ꙳ я́ко ученик и́стины.

Сла́ва, гла́с 2: Оста́вив земна́я, после́довал еси́ Христу́ и зна́менався дохнове́нием Свята́го Ду́ха, по́слан бы́в от Него́ в язы́ки поги́бшыя, обраща́ти челове́ки во све́т Богозна́ния,  апо́столе и́мярек: и сконча́в по́двиги Боже́ственныя твоея́ стра́сти, и му́к разли́чных, ду́шу твою́ Христу́ пре́дал еси́: Того́ моли́, всеблаже́нне, дарова́ти на́м ве́лию ми́лость.

И ны́не, Богоро́дичен:

Все́ упова́ние мое́ на Тя́ возлага́ю, Ма́ти Бо́жия, сохрани́ мя под кро́вом Твои́м.

Крестобогоро́дичен: Егда́ нескве́рная А́гница, ꙳ ви́де Своего́ А́гнца, на заколе́ние я́ко челове́ка во́лею влеко́ма, ꙳ рыда́ющи глаго́лаше: безча́дствовати Мя́ ны́не тщи́шися, Христе́, Тебе́ ро́ждшую. ꙳ Что́ сие́ сотвори́л еси́, Изба́вителю вся́ческих: ꙳ оба́че воспева́ю и сла́влю Твою́, ꙳ ю́же па́че ума́ и сло́ва, ꙳ кра́йнюю бла́гость, Человеколю́бче.


Источник: Минея общая – М. : Издательский Совет Русской Православной Церкви, 2002. – 516 с. ISBN 5-94625-045-0

Комментарии для сайта Cackle