[Глава 7] Слу́жба о́бща проро́ку еди́ному
Ве́чер, на Го́споди воззва́х, стихи́ры, гла́с 4.
Подо́бен: Зва́нный свы́ше:
И́же зарю́ Богонача́льнейшаго сия́ния ꙳ прии́м, ума́ чистото́ю, ꙳ Боже́ственных слове́с, провозве́стник и прозна́менатель, ꙳ и проро́к Боже́ственный бы́в, ꙳ уста́ Богодви́жимая ꙳ яви́лся еси́ Ду́ха, ꙳ я́же от Него́ тебе́ показу́емая, пропове́дуя ꙳ и сказу́я все́м язы́ком ꙳ дае́мое спасе́ние, ꙳ и Ца́рствие Христо́во, ꙳ всече́стне и́мярек, ꙳ Его́же моли́, спасти́ и просвети́ти ду́шы на́ша.
И́же Боговиде́нием сия́я досто́йно, ꙳ и проро́ческим пропове́данием, ꙳ и благода́тию почествова́н, Богодохнове́нне и́мярек, ꙳ и Боже́ственнаго сподо́блен блаже́нства, ꙳ к преблаго́му ны́не дерзнове́нием твои́м, ꙳ и ми́лованием одержи́мь, ꙳ моля́ся не преста́й, ꙳ о и́же ве́рою тя́ ꙳ восхваля́ющих и чту́щих ꙳ я́ко Богоглаго́лива, и че́стна и Богоприя́тна, ꙳ от бе́д изба́вити, и спасти́ ду́шы на́ша.
Твоего́ проро́ка и́мярек, ꙳ я́ко одушевле́нна о́блака, ꙳ показа́л еси́, Безсме́ртне, ꙳ во́ду точа́ща в жи́знь вои́стинну ве́чную, ꙳ посла́в сего́ бога́тно, ꙳ и дарова́в Ду́ха Всесвята́го, единосу́щнаго Тебе́ Отцу́ Вседержи́телю, ꙳ и Сы́ну Твоему́, ꙳ из Твоего́ существа́ возсия́вшему: ꙳ и́мже прорече́ спаси́тельное прише́ствие, ꙳ Христа́ Бо́га на́шего, ꙳ и язы́ком все́м спасе́ние провозвести́.
Сла́ва, и ны́не, Богоро́дичен:
Я́ко во глубину́ мно́гих согреше́ний впадо́х, от ле́ности моея́, и уны́ния окая́нный и неве́дения, и отча́янием ны́не одержи́мь е́смь, бу́ди ми́ по́мощь и очище́ние, и спасе́ние, Пречи́стая, и утеше́ние благопреме́нно подаю́щи ми́. Тя́ молю́, и Тебе́ ми́л ся де́ю, и припа́даю, и ве́рою зову́ Ти, да не явлю́ся до конца́ льсти́вому обра́дование.
Крестобогоро́дичен: Не рыда́й мене́, Ма́ти, ꙳ зря́щи на Кресте́ пове́шена ꙳ Твоего́ Сы́на и Бо́га, ꙳ на вода́х пове́сившаго зе́млю неодержи́мо, ꙳ и всю́ тва́рь созда́вшаго: ꙳ воста́ну бо и просла́влюся, ꙳ и а́дова ца́рства сокрушу́ кре́постию, ꙳ и погублю́ того́ си́лу ꙳ и свя́занныя изба́влю ꙳ от злоде́йства его́, ꙳ я́ко благоутро́бен, ꙳ и Отцу́ Моему́ приведу́, ꙳ я́ко Человеколю́бец.
А́ще и́мать самогла́сен, Сла́ва, гла́с 6:
Проро́че, пропове́дниче Христо́в, Престо́ла вели́чествия никогда́же отступа́еши, и коему́ждо боля́щу при́сно предстои́ши в вы́шних служя́, вселе́нную благословля́еши, всю́ду прославля́емь, проси́ очище́ния душа́м на́шым.
И ны́не, Богоро́дичен:
Арха́нгельски воспои́м, ве́рнии, небе́сный черто́г, и две́рь запеча́тану вои́стинну. Ра́дуйся, ея́же ра́ди отрасте́ на́м спа́с все́х Христо́с, жизнода́вец и Бо́г: низложи́, Влады́чице, мучи́тели, безбо́жныя враги́ на́ша, руко́ю Твое́ю, Пречи́стая, упова́ние христиа́н.
Крестобогоро́дичен: Ви́дящи Тя́ распина́ема, Христе́, Тебе́ ро́ждшая, вопия́ше: что́ стра́нное е́же ви́жу та́инство, Сы́не Мо́й, ка́ко на дре́ве умира́еши пло́тию пове́шен, жи́зни пода́телю?
А́ще пра́зднуеши с полиеле́ем, глаго́ли Богоро́дичен воскре́сный, гла́с 6:
Кто́ Тебе́ не ублажи́т: [пи́сан в конце́ кни́ги сея́.]
Вхо́д. Проки́мен дне́.
И паремии́, [пи́саны в конце́ кни́ги сея́.]
На стихо́вне стихи́ры, гла́с 2.
Подо́бен: Егда́ от дре́ва:
Обре́те духо́вная заря́, твоего́ ума́, проро́че и́мярек, чистоту́ сия́ющую, я́коже зерца́ло, я́вственно, и ми́р озари́ Богоразу́мия сия́нием, блиста́ющую и прообразу́ющую Боже́ственных та́ин о́бразы: благода́ть же все́м челове́ком хотя́щую пода́тися, пречу́дне.
Сти́х: Ты́ иере́й во ве́к, по чи́ну Мелхиседе́кову.
Уста́ бы́в Бо́жия, нече́стия де́латели я́ве обличи́л еси́, судо́м неизбе́жным ты́я осуди́в, пребога́те и́мярек, пра́ведным уче́нием после́дуя, и Боже́ственным судьба́м. Те́мже прему́дрым твои́м глаго́лом ви́дяще возведе́ние, блаже́нне, пе́сньми досто́йно восхваля́ем тя́.
Сти́х: Моисе́й и Ааро́н во иере́ех Его́.
Престо́лы Влады́чню предстоя́, и неизрече́нныя и Боже́ственныя сла́вы насыща́емь, добро́ты же зря́ преми́рныя, и све́та наполня́емь, проро́че и́мярек Богоглаго́ливе, вся́ чту́щыя тя́ ве́рою помина́й, си́м душе́вное спасе́ние, разреше́ние же согреше́ний все́м прося́, Богоприя́тне.
Сла́ва, гла́с 1:
И́миже вообража́ется Бо́г, пе́рвыми сво́йствы, и суще́ственными указа́нии, си́х сла́внии и честни́и проро́цы причаще́нием и благода́тию, второ́е по да́ру причаща́ются, просвеща́ющу Го́споду уго́дники Своя́ Свое́ю све́тлостию.
И ны́не, Богоро́дичен воскре́сный: Се́ испо́лнися Иса́иино: [пи́сан в конце́ кни́ги сея́.]
А́ще ли не пра́здник, глаго́ли се́й Богоро́дичен:
Небе́сных чино́в ра́дование, на земли́ челове́ков кре́пкое предста́тельство, Пречи́стая Де́во, спаси́ ны к Тебе́ прибега́ющыя: я́ко на Тя́ упова́ние по Бо́зе, Богоро́дице, возложи́хом.
Крестобогоро́дичен: Ору́жие про́йде, о Сы́не, Де́ва глаго́лаше, на дре́ве я́ко ви́де Тебе́ обе́шена, Мое́ се́рдце растерза́ется, Влады́ко, я́коже дре́вле прорече́ Симео́н: но воскресни́ и просла́ви, безсме́ртне, Ма́терь и рабу́ Твою́, молю́ся.
Тропа́рь во уста́ве.
А́ще ли не́сть уста́ва, глаго́ли се́й тропа́рь, гла́с 2:
Проро́ка Твоего́ и́мярек па́мять, Го́споди, пра́зднующе, те́м Тя́ мо́лим, спаси́ ду́шы на́ша.
Сла́ва, и ны́не, Богоро́дичен, по гла́су тропаря́.
На у́трени,
на Бо́г Го́споди, тропа́рь то́йже.
По 1-м стихосло́вии седа́лен, гла́с 3.
Подо́бен: Красоте́ де́вства:
Сло́ва воплоще́ние предъуясни́л еси́ Боже́ственным Ду́хом озаря́емь, вели́кий в Боже́ственных проро́цех и́мярек Богодухнове́нне. Те́мже я́ко проро́ка тя́ свяще́нно ублажа́ем, и торжеству́ем па́мять твою́ дне́сь, согла́сно вопию́ще ти́, му́дре: моли́ся Христу́ спасти́ ду́шы на́ша. [Два́жды.]
Сла́ва, и ны́не, Богоро́дичен:
Недомы́сленно и непости́жно е́сть, Влады́чице Богора́дованная, е́же соде́ланное в Тебе́ стра́шное Бо́жие та́инство: и́бо необыме́ннаго заче́нши родила́ еси́, пло́тию обложе́на от пречи́стых крове́й Твои́х: его́же всегда́, Чи́стая, я́ко Сы́на Твоего́ моли́, спасти́ся душа́м на́шым.
По 2-й кафи́сме седа́лен, гла́с 3.
Подо́бен: Боже́ственныя ве́ры:
Боже́ственный орга́н уте́шителев подглаша́емь сего́, блаже́нне, благода́тию всегда́ я́сно, проро́к бы́л еси́. Возглаша́еши бо безве́стных явле́ние, и озаря́еши ве́рою притека́ющыя, и́мярек сла́вя: Христа́ Бо́га моли́ дарова́ти на́м ве́лию ми́лость, [Два́жды.]
Сла́ва, и ны́не, Богоро́дичен:
Проро́цы пропове́даша, апо́столи научи́ша, му́ченицы испове́даша, и мы́ ве́ровахом Богоро́дицу Тя́ вои́стинну су́щую: те́м и велича́ем рождество́ Твое́ неизрече́нное.
По: Хвали́те и́мя Госпо́дне:
Припе́в:
Велича́ем тя́, проро́че Бо́жий и́мярек, и чте́м святу́ю па́мять твою́: ты́ бо мо́лиши за на́с Христа́ Бо́га на́шего.
Псало́м избра́нный: Блаже́н му́ж боя́йся Го́спода:
По полиеле́и седа́лен, гла́с 6.
Подо́бен: Милосе́рдия две́ри:
Очи́стив от скве́рн у́м, всему́дре, зерца́ло Боже́ственное соде́лал еси́ лу́чь прия́тно Боже́ственнаго ду́ха: и ны́не ко исто́чнику ра́дуяся отше́л еси́ сия́ний, проро́че и́мярек. [Два́жды.]
Сла́ва, и ны́не, Богоро́дичен:
Пре́жде ве́к от Отца́ без ма́тере рожде́нна, Сы́на и Сло́ва Бо́жия, в после́дняя ле́та родила́ еси́, воплоти́вшагося от чи́стых крове́й Твои́х, Богороди́тельнице, без му́жа: его́же моли́ дарова́тися на́м грехо́в оставле́нию пре́жде конца́.
Степе́нна, 1-й антифо́н 4-го гла́са.
Проки́мен: Ты́ иере́й во ве́к по чи́ну Мелхиседе́кову.
Сти́х: Рече́ Госпо́дь Го́сподеви моему́, седи́ одесну́ю мене́.
Вся́кое дыха́ние:
Та́же Ева́нгелие [пи́сано в конце́ кни́ги сея́.]
По 50 псалме́. Сла́ва: Моли́твами проро́ка Твоего́ и́мярек, ми́лостиве, очи́сти мно́жества согреше́ний на́ших.
И ны́не: Моли́твами Богоро́дицы:
Та́же, Поми́луй мя́, Бо́же:
Стихи́ра, гла́с 6:
Проро́че пропове́дниче Христо́в: [пи́сана на Го́споди воззва́х, Сла́ва.]
Кано́н. Гла́с 6.
Пе́снь 1.
Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на, ви́дя потопля́ема, Бо́гу побе́дную пе́снь пои́м, вопия́ше.
Тя́ мо́лим, проро́че, Бо́жию Престо́лу предстоя́ща, моли́ти приле́жно, просвеще́ние дарова́ти на́м, ве́рою честну́ю пою́щым па́мять твою́.
Орга́н Боже́ственный яви́лся еси́, вмеща́ющ Боже́ственнаго ду́ха просвеще́ний и даро́в, и́мярек всему́дре: те́м ра́дующеся ве́рнии тя́ ублажа́ем.
Спаси́теля Бо́гу проро́чески предстоя́, ны́не со дерзнове́нием моли́ся, свеща́тельными луча́ми просвеща́ти ве́рою, Богодохнове́нне, тя́ блажа́щыя.
Богоро́дичен: Светле́йшими заря́ми всю́ зе́млю, возсия́вшее со́лнце из свята́го чре́ва Твоего́, озаря́ет, Влады́чице: и́миже просве́щшеся, Тя́ Бо́жию Ма́терь почита́ем.
Пе́снь 3.
Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Вся́ ви́дяй я́ко Бо́г, бу́дущих зна́ние, и хотя́щих бы́ти ве́дение, тебе́ явле́нно проявля́ет Боголе́пно и показу́ет, блаже́нне досточу́дне.
Вжили́в, блаже́нне, тво́й у́м благоче́стным дерзнове́нием, Ду́ху Боже́ственному подклони́л еси́ тебе́, и бы́л еси́ прия́тен та́мо су́щих Боже́ственных дохнове́ний.
Во́д та́инственных река́, из пучи́ны происходя́, даро́в ду́ха, Боговеща́телю, бы́л еси́.
Богоро́дичен: Се́ Тя́ вси́ ро́ди блажа́т ве́рою, Безле́тное Сло́во пло́тию в ле́то ро́ждшую преесте́ственно, и Де́ву па́ки пребы́вшу.
Седа́лен, гла́с 6.
Подо́бен: Милосе́рдия две́ри:
Очи́стив от скве́рн у́м, всему́дре, зерца́ло Боже́ственное соде́лал еси́, лу́чь прия́тно Боже́ственнаго ду́ха: и ны́не ко исто́чнику ра́дуяся отше́л еси́ сия́ний, проро́че и́мярек.
Сла́ва, и ны́не, Богоро́дичен:
Пресла́вную Бо́жию Ма́терь, и святы́х а́нгел святе́йшую, немо́лчно воспое́м се́рдцем и усты́, Богоро́дицу сию́ испове́дающе, я́ко вои́стинну ро́ждшую Бо́га воплоще́нна, и моля́щуюся непреста́нно о душа́х на́ших.
Крестобогоро́дичен: На́с ра́ди Распя́таго, прииди́те вси́ воспои́м, Того́ бо ви́де Мари́а на дре́ве, и глаго́лаше: а́ще и распя́тие терпи́ши, Ты́ еси́ Сы́н и Бо́г мо́й.
Пе́снь 4.
Ирмо́с: Христо́с моя́ си́ла, Бо́г и Госпо́дь, честна́я це́рковь Боголе́пно пое́т взыва́ющи, от смы́сла чи́ста, о Го́споде пра́зднующи.
Все́х Госпо́дь на́м яви́ся, по проро́честву, блаже́нне, твоему́, вся́ призыва́я к позна́нию Своему́, и рабо́ты свободи́.
Благода́тию озаря́емь, провозгласи́л еси́ глаго́ля: под и́го еди́но подклоня́ющымся рабо́тати, после́дующым ве́ре и Го́споду служа́щым.
Проро́к сы́й, при́сно заря́ми светода́тельнаго блиста́ния просвеща́емь, просвети́ ны, блаже́нне, любо́вию пою́щыя тя́.
Богоро́дичен: Мари́е Всечи́стая, страсте́й смуще́ние моего́ по́мысла, и напа́стей бу́рю разори́, безстра́стия исто́чник ро́ждши, Ма́ти Де́во.
Пе́снь 5.
Ирмо́с: Бо́жиим све́том твои́м, бла́же, у́тренюющих ти́ ду́шы любо́вию озари́ молю́ся, тя́ ве́дети, сло́ве Бо́жий, и́стиннаго Бо́га, от мра́ка грехо́внаго взыва́юща.
От непра́вды к доброде́тели, и от страсте́й плене́ния мя́, блаже́нне, обрати́, твои́ми мольба́ми, проро́че сла́вне, и к све́ту благоче́стия де́л упра́ви.
Просвети́в твою́ ду́шу доброде́телей благообра́зиями, уго́дну показа́л еси́ к сия́нием Боже́ственнаго Ду́ха: от Него́ же и проро́чества благода́тию обогати́лся еси́.
Проро́к Боже́ственный бы́в, чи́сто житие́ име́я, и прия́телище бы́л еси́ Свята́го Ду́ха: те́м зре́ти сподо́бился еси́ неви́димо разумева́емаго.
Богоро́дичен: Возглаша́ют проро́ческая рече́ния, Пречи́стая, мно́гими о́бразы рождество́ Твое́: и́хже мы́ ны́не сбытие́ зря́ще и́стинно Богоро́дицу Тя́ возвеща́ем.
Пе́снь 6.
Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве.
Прие́мь, сла́вне, ду́ха зари́, явле́нием я́ко зерца́ло проро́чествия Боже́ственнаго сия́ния, ми́ру облиста́л еси́, я́ко су́щая проро́чествуя бу́дущая.
Тво́й прии́де Ца́рь, ра́дуйся, Сио́не, и красу́йся ви́дя, и ми́р просвети́ блиста́ньми своего́ Божества́, и де́монскую ле́сть посрами́.
Си́лою ду́ха Боже́ственнаго зре́л еси́, проро́че, бу́дущая, о́бразы прие́мля Боже́ственных явле́ний, я́ко в зерца́ле души́ све́тлостию.
Богоро́дичен: Пло́ти бре́нней соедини́ся, и́же из Отца́ Единоро́дный, в ложесна́х Твои́х еди́н из дву́х про́йде без тле́ния, соблю́д неврежде́нно чи́стое де́вство Твое́, Всепе́тая.
Конда́к во уста́ве.
А́ще ли не́сть уста́ва глаго́ли се́й конда́к, гла́с 4.
Подо́бен: Яви́лся еси́ дне́сь:
Просвети́вшееся Ду́хом чи́стое твое́ се́рдце, проро́чества бы́сть светле́йшаго прия́телище: зри́ши бо я́ко настоя́щая дале́че су́щая: сего́ ра́ди тя́ почита́ем, проро́че блаже́нне, и́мярек сла́вне.
И́кос: Проро́чествия благода́тию обога́щься, бу́дущих ра́зуму Боголе́пно научи́лся еси́ Ду́хом, и́мярек Богодохнове́нне, и предглаго́леши все́м Христо́во прише́ствие, и язы́ков пребога́те Боже́ственное призва́ние. Те́мже честну́ю твою́ па́мять пра́зднуем, и любо́вию пое́м тя́, и ве́рно ублажа́ем взыва́юще ти́, сла́вне: моли́ Христа́ Бо́га непреста́нно о все́х на́с.
Пе́снь 7.
Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Возсия́ па́мять твоя́, проро́че, ми́ру я́коже со́лнце, озаря́ющи проро́чества благода́тию твое́ю, согла́сно пою́щыя ве́рно: благослове́н еси́, Бо́же оте́ц на́ших.
Тучне́йший о́блак ты́ яви́вся, ту́чу Богоразу́мия на́м возсия́л еси́, от спаси́тельных, блаже́нне, исто́чников, и́миже просвеща́емся вопи́ти: благослове́н еси́, Бо́же оте́ц на́ших.
От Го́спода просвеще́ни проро́цы, прорица́ют бу́дущих ра́зум, Богому́дренно взыва́ют сло́во, е́же искони́ бы́ти, ему́же пое́м: благослове́н Бо́г оте́ц на́ших.
Богоро́дичен: Сло́во, дре́вле е́же бы́ти подаю́щее все́м, Боже́ственным хоте́нием, воззва́ти восхоте́в челове́ка чи́стая, в Твою́ всели́ся утро́бу, Благослове́нная, я́же Бо́га пло́тию ро́ждшая.
Пе́снь 8.
Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти, Тя́ превозно́сим во вся́ ве́ки.
Возложе́н ве́сь Вседержи́телю, промышле́ния образо́м та́йно научи́лся еси́, строи́тельно язы́ки наказу́я: те́м тя́ пое́м, проро́че Богоглаго́ливе.
Моле́бное пе́ние Бо́гу принеси́ о пою́щих тя́, Богоблаже́нне, и напа́стей разори́ смуще́ние, да тя́ пое́м, проро́че Богоглаго́ливе.
Я́ко о́гнь во тме́ седя́щым все́м яви́лся еси́, Боже́ственным све́том Богому́дренно озаря́я пою́щыя ве́рно Го́спода во ве́ки.
Богоро́дичен: Жизнода́вца ро́ждши Бо́га и Го́спода, сме́ртное губи́тельство неуде́ржное, уста́вила еси́, Пречи́стая, сие́ умертви́вши: те́м Тя́ пое́м во вся́ ве́ки.
Пе́снь 9.
Ирмо́с: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти: Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и тя́ ублажа́ем.
На земли́ кро́тких ты́ всели́лся еси́, иде́же по кончи́не а́нгельския зри́ши све́тлости, и́мярек всему́дре, проро́че Бо́жий, кро́ток бы́в сия́я благода́тию. Те́мже ра́дующеся ве́рнии тя́ ублажа́ем.
Твои́х прорече́ний, пресла́вне, све́тло ви́дяще бы́вшее сбытие́, да́нней тебе́ благода́ти чуди́мся, ума́ твоего́ чистоте́, и души́ Богови́дному удивля́емся.
Иде́же а́нгельстии чи́ни, и проро́к ли́цы и патриа́рх, и святы́х све́тлости, проро́че и́мярек, всели́вся: и ны́не с ни́ми лику́я ра́достно, о на́с моли́ся ко Го́споду, спасти́ся ве́рою хва́лящым тя́.
Богоро́дичен: Я́коже ты́, никогда́же и́на дарова́ся от родо́в дре́вних, Богома́ти всенепоро́чная: Ты́ бо еди́на все́х несравне́нную име́ла еси́ святы́ню и чистоту́: те́мже прия́ла еси́ Бо́га, в Тебе́ воплоща́ема.
Свети́лен проро́ку:
Ра́дуются вси́ проро́цы, в ра́достный тво́й де́нь веселя́щеся, Богому́дре, ра́дости твоея́ причаща́ющеся, и Боже́ственныя сла́вы, с ни́миже моли́ся, и пою́щыя тя́ спаса́й.
Богоро́дичен: Кропле́нием, Чи́стая, щедро́т Твои́х, души́ моея́ отмы́й скве́рну, и ка́пли сле́з источа́ти ми́ непреста́нно сотвори́, Отрокови́це, страсте́й мои́х пото́ки изсуша́ющи.
На хвали́тех стихи́ры, гла́с 8:
Подо́бен: О, пресла́внаго чудесе́!
Боже́ственный Ду́х излия́ся, ꙳ я́ко честны́й, и́мярек, ꙳ проро́чествуя сказа́ ꙳ от Него́ дви́жимь, ꙳ на ны́ ве́рующыя, и та́ин Боже́ственных ꙳ явле́ние открыва́ет, и проро́чествуют ꙳ и́же де́йство его́ прие́мшии, ꙳ и Боже́ственною заре́ю просвеща́емии, ꙳ и Боже́ственною благода́тию. [Два́жды.]
Благовеща́ния испо́лнен, ꙳ ди́вный и́мярек, ꙳ я́ко исто́чник исхо́дит ꙳ ду́шы напая́ющий, ꙳ от до́му твоего́, Влады́ко, ꙳ и сла́дость на́м иска́па, ꙳ помышле́ния ослажда́ющую, ꙳ ве́сь высо́к бы́в ду́хом, ꙳ доброде́телию возноси́мь к Боже́ственней высоте́.
Проро́ческим твои́м дерзнове́нием, ꙳ и разу́мным к Бо́гу, и́мярек, ꙳ приближе́нием, ꙳ и́мже небе́сная зри́ши виде́ния, ꙳ о на́с Того́ уми́лостиви, ꙳ соверша́ющих ве́рою па́мять твою́, ꙳ разреше́ния прося́ прегреше́ний, сла́вне, ꙳ и прича́стия Боже́ственных наслажде́ний, ꙳ и ве́лия ми́лости.
Сла́ва, гла́с 4:
В Го́споде ра́дуяся Бо́зе Спа́се твое́м, Богоглаго́ливе сла́вне, веселя́ся, и та́мо су́щаго сия́ния зарю́ прие́мь, и све́том Богоде́льным мы́сленно просвеща́емь, па́мять твою́ всепра́зднственную ве́рою соверша́ющыя, напа́стей же и бе́д твои́ми моли́твами изба́ви.
И ны́не, Богоро́дичен:
Изба́ви на́с от ну́жд на́ших Ма́ти Христа́ Бо́га, ро́ждшая все́х Творца́, да вси́ зове́м Ти́: ра́дуйся, еди́но предста́тельство ду́ш на́ших.
Крестобогоро́дичен.
Подо́бен: Я́ко до́бля:
Умерщвля́ема ви́дящи Христа́, Всечи́стая Влады́чице, ꙳ и умерщвля́юща льсти́ваго, ꙳ я́ко Влады́ку пла́чущи ꙳ поя́ше, из утро́бы Ея́ проше́дша, ꙳ и долготерпе́нию Его́ чудя́щися взыва́ше: ꙳ Ча́до любе́знейшее, ꙳ не забу́ди рабы́ Твоея́, ꙳ не укосни́, Человеколю́бче, ꙳ мое́ утеше́ние.