[Глава 9] Слу́жба о́бща апо́столом двема́ и мно́гим

Ве́чера,

на Го́споди воззва́х, стихи́ры, гла́с 4.

Подо́бен: Я́ко до́бля:

Я́ко самови́дцы и свиде́телие ꙳ Сло́ва воплоще́ния ꙳ ученицы́ пребога́тии ублажа́етеся: ꙳ я́ко мо́лния бо сия́ющии ꙳ ми́ру яви́стеся, ꙳ и я́ко го́ры мы́сленныя сла́дости иска́паете, ꙳ я́ко приснотеку́щыя ре́ки ра́йския раздели́вшеся, ꙳ язы́ческия це́ркви ꙳ Боже́ственными напоя́ете вода́ми.

Я́ко лучы́ блиста́ющии заря́ми духо́вными, ꙳ в ми́р ве́сь по́слани бы́сте, ꙳ чуде́с де́йство незави́стно подаю́ще, ꙳ служи́телие Христо́вых та́ин бы́вше ꙳ и Богопи́санныя скрижа́ли ꙳ Бо́жия благода́ти, ꙳ напи́санныя Богонауче́ннаго зако́на, ꙳ священнотаи́нницы пребога́тии.

Ры́барская тро́сть ꙳ любому́дрых шата́ния, ꙳ и вити́йския струи́ пречерта́, ꙳ Богому́драя уче́ния ꙳ изъображе́ний догма́ты? ꙳ И та́ин благи́х я́сно изложи́вше Ева́нглие, ꙳ и пи́щи присносу́щныя прича́стие, ꙳ и а́нгельское наслажде́ние, и пребыва́ющую сла́ву.

Сла́ва, и ны́не, Богоро́дичен:

Ра́дуйся, Со́лнце светоза́рное, Со́лнца незаходи́маго носи́ло, я́же Со́лнце возсия́вшая недомы́сленное. Ра́дуйся, у́ме, облиста́я Боже́ственными сия́нии: луча́ облиста́ния, озаря́ющая земли́ концы́, я́же вои́стинну златоза́рная, вся́ до́брая и пренепоро́чная, я́же све́т невече́рний ве́рным облиста́вшая.

Крестобогоро́дичен: Распина́ема ви́дящи, ꙳ и в ре́бра пробода́ема копие́м, ꙳ Пречи́стая, Христа́ Человеколю́бца, ꙳ пла́каше вопию́щи: ꙳ что́ сие́, Сы́не Мо́й? ꙳ Что́ Тебе́ неблагода́рнии лю́дие возда́ша, ꙳ вме́сто я́же сотвори́л еси́ до́брая и́м? ꙳ И тщи́шися безча́дствовати Мя́, Вселюбе́знейше. ꙳ Дивлю́ся, Благоутро́бне, Твоему́ во́льному распя́тию.

А́ще и́мут, самогла́сен. Сла́ва, гла́с 8:

Ю́же проидо́сте тва́рь просве́щше, Спа́совы ученицы́, ле́сть и́дольскую я́ко хвра́стие попали́вше уче́нии ва́шими, язы́ки от неразу́мия глубины́, к Боже́ственному ра́зуму улови́вше спасо́сте: и ны́не моли́теся Христу́, я́ко да ми́лостив на́м бу́дет в де́нь су́дный.

И ны́не, Богоро́дичен:

Приими́ гла́с моле́бник Твои́х, Пречи́стая Де́во Богоро́дице, и моли́ Го́спода непреста́нно, прегреше́ний оставле́ние дарова́ти на́м.

Крестобогоро́дичен: Го́споди, егда́ Тя Со́лнца пра́веднаго, ви́де со́лнце на дре́ве пове́шена, лучы́ скры́, и луна́ све́т во тму́ преложи́: Всенепоро́чная же Твоя́ Ма́ти утро́бою уязвля́шеся.

А́ще пра́зднуеши с полиеле́ем, глаго́ли Богоро́дичен: воскре́сный: Ца́рь Небе́сный: [Пи́сан в конце́ кни́ги сея́.]

Вхо́д. Проки́мен дне́.

Чте́ния апо́стольская. [Пи́саны в конце́ кни́ги сея́.]

На стихо́вне стихи́ры, гла́с 6:

Подо́бен: Тридне́вен:

Вели́ких та́ин Бо́жиих ꙳ служи́телие бы́сте Богосло́вцы, ꙳ и Богови́дцы ученицы́, ꙳ и благода́ть исцеле́ний прии́мше, ꙳ все́х челове́к боле́зни исцеля́ете.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Вели́кое прибе́жище, ꙳ и покро́в ду́ш на́ших,  ꙳ духо́в лю́тых прогна́ние, ꙳ вы́ есте́ Богови́дцы апо́столи Госпо́дни: ꙳ те́мже ва́с при́сно почита́ем.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

От вся́каго обстоя́ния, ꙳ и врежде́ния бесо́вскаго, ꙳ и прегреше́ния, и зла́го плене́ния изба́вите, ꙳ ве́рою ва́с восхваля́ющих, ꙳ Боже́ственнии апо́столи блаже́ннии.

Сла́ва, гла́с 4:

Орга́ны до́бре соста́влени, Боже́ственным окормле́нием апо́столи, язы́ков зва́нию вы́ уве́ристеся, к позна́нию Христо́ву наставля́юще, словесы́ и дея́нии: и вся́ просвети́ли есте́ испове́дати и́стинное Иису́са Божество́, Спа́са ду́ш на́ших.

А́ще пра́зднуеши, глаго́ли Богоро́дичен: воскре́сный: При́зри на моле́ния Твои́х ра́б:

А́ще ли не пра́зднуеши, глаго́ли се́й Богоро́дичен:

Иму́ще Тя́, Богоро́дице, упова́ние и предста́тельство, вра́жиих наве́т не убои́мся, я́ко спаса́еши ду́шы на́ша.

Крестобогоро́дичен: Ору́жие, [я́коже рече́ Симео́н,] се́рдце Твое́ про́йде, Всесвята́я Влады́чице, егда́ узре́ла еси́ из Тебе́ возсия́вшаго неизрече́ннаго Сло́ва, от беззако́нных я́ко осужде́на, на Кресте́ возноси́ма, о́цта и же́лчи вкуша́юща, ре́бра же ископова́ема, рука́ми же и нога́ми пригвожда́ема: рыдаю́щи восклица́ше, вопию́щи ма́терски: что́ сие́, Ча́до сла́дкое, но́вое та́инство?

Тропа́рь, гла́с 3:

Апо́столи святи́и, моли́те ми́лостиваго Бо́га, да прегреше́ний оставле́ние пода́ст душа́м на́шым.

Сла́ва, и ны́не, Богоро́дичен: по гла́су тропаря́.

На у́трени,

на Бо́г Госпо́дь, тропа́рь то́йже.

По 1-й кафи́сме седа́лен, гла́с 1.

Подо́бен: Гро́б Тво́й, Спа́се:

Ли́к духо́вный апо́стольский, ми́ру посла́ся та́йно, от Бо́га вы́шняго, и нево́лею стра́ждущих вра́чеве яви́шася, Триипоста́снаго еди́нственне призыва́юще, Боже́ственное воплоще́ние Емману́ила Го́спода, му́дре написа́ша. [Два́жды.]

Сла́ва, и ны́не, Богоро́дичен:

Купину́ ю́же Моисе́й неопали́му ви́де, го́ру Бо́жию, святы́й о́блак, се́нь нескве́рную, Богоприя́тную трапе́зу, пала́ту высо́каго Царя́, всесве́тлую и непроходи́мую две́рь, Де́во, пое́м тя́.

По 2-й кафи́сме седа́лен, гла́с 4.

Подо́бен: Яви́лся еси́ дне́сь:

Светолу́чными сия́нии, я́коже зве́зды земны́я концы́ просвеща́ете, уче́нии святы́я про́поведи, небе́снии таи́нницы Госпо́дни апо́столи. [Два́жды.]

Сла́ва, и ны́не, Богоро́дичен:

Те́плое заступле́ние су́щих в ну́ждах, на́шу по́мощь, и к Бо́гу премене́ние, Ея́же ра́ди тли́ изба́вихомся, Бо́гу ве́рнии ублажа́ем.

По Хвали́те и́мя Госпо́дне:

Припе́в: Велича́ем ва́с, святи́и апо́столи, ве́сь ми́р уче́ньми свои́ми просвети́вшыя, и вся́ концы́ ко Христу́ приве́дшыя.

Псало́м избра́нный: Небеса́ пове́дают сла́ву Бо́жию:

По полиеле́и седа́лен, гла́с 3.

Подо́бен: Боже́ственныя:

Боже́ственнии трубы́ уте́шителя, возглаша́юще дыха́ние слове́с спасе́ния, ми́ру возгласи́те, и и́же во мра́це пре́лести спя́щыя, к све́ту Богоразу́мия возста́вивше приведи́те, Боже́ственнаго све́та апо́столи, моля́ще Христа́ Бо́га, спасти́ся душа́м на́шым.[Два́жды.]

Сла́ва, и ны́не, Богоро́дичен:

Боже́ственнаго естества́ не отлу́чься, пло́ть бы́в во чре́ве Твое́м: но Бо́г вочелове́чься пребы́сть, и́же по рождестве́ Ма́терь Тя́ Де́ву, я́ко пре́жде рождества́ сохрани́в всенепоро́чну, еди́н Госпо́дь: того́ приле́жно моли́, дарова́ти на́м ве́лию ми́лость.

Степе́нна, 1-й антифо́н 4-го гла́са.

Проки́мен: Во всю́ зе́млю изы́де веща́ние и́х:

Сти́х: Небеса́ пове́дают сла́ву Бо́жию:

Вся́кое дыха́ние:

Та́же Ева́нглие апо́столу еди́ному. [Пи́сано в конце́ кни́ги сея́.]

По 50-м псалме́ стихи́ра, гла́с 6:

Всечестны́й апо́столов пра́здник приспе́ це́ркви Христо́ве, хода́тайствующий спасе́ние все́м на́м. Та́йно у́бо восплеска́вше к си́м рце́м: ра́дуйтеся, свети́льницы су́щым во тме́, мы́сленнаго со́лнца зари́ облиста́ющии, ра́дуйтеся, апо́столи, уче́ний Боже́ственных основа́ния незы́блема, дру́зи Христо́вы, сосу́ди честни́и: прииди́те посреде́ на́с неви́димо, сподобля́юще даро́в невеще́ственных, ва́ш пра́здник восхваля́ющих пе́сньми.

Кано́н, гла́с 4.

Пе́снь 1.

Ирмо́с: Мо́ря Чермну́ю пучи́ну, невла́жными стопа́ми, дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Ли́к апо́стольский пе́ти ми́ жела́ющу, Христе́, моли́твами и́х, я́ко Бо́г зарю́ Пресвята́го Ду́ха да́руй мне́, и све́т прему́дрости Твоея́.

Укре́пльшеся си́лою Твое́ю и благода́тию, Христе́, си́лу проти́вных вра́г разруши́ша честни́и твои́ апо́столи, Богови́дцы бы́вше, неоску́дным к Тебе́ манове́нием.

Исцеле́ния творя́ще, Влады́ко, твои́м и́менем, язы́ческая совокупле́ния Твои́м позна́нием улови́ша сла́внии апо́столи, и све́том Твои́м просвети́ша.

Прему́дрости небе́сныя научи́вшеся, пресла́внии Христо́вы апо́столи, я́вственно прему́дрии обуи́сте многосло́вия нечести́вых, поспеше́нием пропове́дания.

Богоро́дичен: От Тро́ицы Пребоже́ственныя Еди́наго, Пречи́стая, родила́ еси́, из Тебе́ пло́тию я́вльшагося по на́м, благоволе́нием ро́ждшаго и́, и де́йством Ду́ха Пресвята́го, Де́во ма́ти.

Пе́снь 3.

Ирмо́с: Весели́тся о Тебе́ це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Небе́сная и честна́я Боговеща́юще на земли́ уче́ния, язы́ки о́гненными известву́юще, пропове́дницы Христо́вы пре́дали есте́.

Показа́л еси́ небеса́ слове́сная, ученики́ Твоя́, Влады́ко, сла́ву Твою́ пове́дающыя все́м конце́м.

Напи́сани бы́вше на небесе́х, и я́вльшеся Христу́ ссе́льницы, чту́щих ва́с любо́вию ны́не, прему́дрии, сохрани́те.

Богоро́дичен: Всели́выйся в на́с, и́же в вы́шних живы́й, Пречи́стая, пло́ть бо прии́м от Тебе́ без се́мене, яви́ся.

Седа́лен, гла́с 8.

Подо́бен: Прему́дрости:

Мре́жею слове́с Боже́ственных, ры́бы улови́вше слове́сныя, сия́ принесли́ есте́ нача́ток Бо́гу на́шему, и в Христо́вы я́звы жела́юще облещи́ся, подо́бницы страсте́й Его́ яви́лися есте́. Те́м соше́дшеся по до́лгу чти́м, апо́столи сла́внии, всепра́зднственную па́мять ва́шу, и согла́сно вопие́м ва́м: моли́те Христа́ Бо́га, грехо́в оставле́ние дарова́ти чту́щым любо́вию святу́ю па́мять ва́шу.

Сла́ва, и ны́не, Богоро́дичен:

Я́ко Де́ву и еди́ну в жена́х Тя́ без се́мене ро́ждшую Бо́га пло́тию, вси́ ублажа́ем ро́ди челове́честии: о́гнь бо всели́ся в Тя́ Божества́, и я́ко Младе́нца дои́ши Зижди́теля и Го́спода. Те́м а́нгельский и челове́ческий ро́д досто́йно сла́вим пресвято́е рождество́ Твое́, и согла́сно вопие́м Ти́: моли́ Христа́ Бо́га, согреше́ний оставле́ние дарова́ти покланя́ющымся ве́рою пресвято́му рождеству́ Твоему́.

Крестобогоро́дичен: А́гнца и Па́стыря и изба́вителя, А́гница зря́щи на Кресте́, восклица́ше пла́чущи, и го́рько рыда́ющи вопия́ше: ми́р у́бо ра́дуется, прие́мляй Тобо́ю избавле́ние: утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости: долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй прегреше́ний оставле́ние ве́рою пою́щым Боже́ственныя стра́сти Твоя́.

Пе́снь 4.

Ирмо́с: Вознесе́на Тя́ ви́девши це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Глаго́лов Боже́ственных апо́стол веща́ние огнеобра́зно про́йде вселе́нную всю́: ле́сти у́бо ве́щь попаля́ющее, и просвеща́ющее благода́тию благочести́вых совокупле́ния.

Почерне́вший мра́ком безбо́жия ми́р, Богозра́чная свети́ла просвети́ша заря́ми благода́ти, ученицы́ Госпо́дни я́вльшеся сия́нием пропове́дания.

Свяще́нными заря́ми просвеще́ни мы́сленнаго Со́лнца, я́ко со́лнце в ми́ре сия́ете прехва́льнии, све́том Боже́ственным пре́лести мглу́ отгоня́юще.

Же́зл си́лы иму́ще Кре́ст Тво́й, сла́ное жития́ самови́дцы Твои́, Сло́ве, мо́ре пресеко́ша, я́ко ко́ни смуща́юще многобо́жия во́ды.

Богоро́дичен: Укра́шено разли́чным светоли́тием не́бо одушевле́нное, Тебе́ Царя́ ца́рствующих, Христе́, Деви́ца Пречи́стая ны́не я́ко Богоро́дица сла́вима е́сть.

Пе́снь 5.

Ирмо́с: Ты́, Го́споди мо́й, све́т в ми́р прише́л еси́, све́т святы́й, обраща́яй из мра́чна неве́дения, ве́рою воспева́ющыя Тя́.

Боже́ственныя Твоя́ и прему́дрыя служи́тели све́т показа́л еси́ в ми́ре, Тебе́ незаходи́маго све́та все́м возвеща́ющыя.

И́же вся́ку доброде́тель я́вственно проше́дше, апо́столи, разли́чныя бесо́вския зло́бы сплете́ния разруши́сте.

Яви́ша на́м Тро́ическое сия́ние, во еди́нстве Божества́, о́гненными язы́ки веща́юще, апо́столи.

Богоро́дичен: Тя́ ору́жие непобеди́мое на враги́ предлага́ем, Тя́ утвержде́ние, и наде́жду на́шего спасе́ния, Богоневе́сто, стяжа́хом.

Пе́снь 6.

Ирмо́с: Пожру́ Ти со гла́сом хвале́ния, Го́споди, це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Утверди́в ученики́ Твоя́, Спа́се, прему́дростию и чудесы́, си́льнейшыя соде́лал еси́ е́ллинскаго буесло́вия, и си́х преле́стная разруши́ша веле́ния.

Боже́ственныя ре́ки прему́дрости, напо́лниша спаси́тельных во́д удо́лия вся́ церко́вная, от исто́чник спаси́тельных струя́ми обога́щше.

Я́вльшеся живо́тныя зве́зды, прехва́льнии, разори́сте всю́ мра́чную пре́лесть светоза́рными сия́нии, и Богоразу́мия све́т возсия́вше.

Богоро́дичен: Всю́ Тя́ голуби́цу соверше́нну и предо́бру, све́тлый обре́т кри́н, и удо́льный цве́т, о Богома́ти, Жени́х мы́сленный в Тя́ всели́ся.

Конда́к во уста́ве.

А́ще ли не́сть уста́ва, глаго́ли се́й конда́к, гла́с 4:

Ло́зие яви́стеся Христо́ва виногра́да, му́дрии, гро́здие принося́ще в доброде́телех, вино́ на́м спасе́ния источа́юще: его́же прие́млем: весе́лия исполня́ющеся. Пра́зднуем честну́ю ва́шу па́мять, в ню́же моли́те дарова́тися на́м вели́цей ми́лости и отпуще́нию грехо́в, Госпо́дни апо́столи.

И́кос: Я́ко ученицы́ все́х Влады́ки, мре́жею Богови́дцы ва́ших моли́тв из глубины́ прегреше́ний извлецы́те смире́нную ду́шу мою́, уловле́нную сетьми́ бесо́вских ко́зней: да до́бре преше́д про́чее вре́мя живота́ моего́, пою́ ва́с любо́вию, и просла́влю житие́ ва́ше непоро́чное, е́же на земли́ соверши́сте, лю́те помраче́нныя просвети́вше, Тро́ицу Боже́ственне чести́ науча́юще, Го́споди апо́столи.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди.

Сы́ны сотвори́в ученики́ Твоя́, и́же пре́жде естество́м Бо́г, любо́вию насле́дники показа́л еси́ оте́ческаго насле́дия, преблаги́й, и ходи́ти с тобо́ю я́ко с Бо́гом и Влады́кою изво́лил еси́.

Прему́дрости изли́тие, серде́чную широту́, язы́к доброглаго́лив, сло́ве, пода́в Боже́ственным ученико́м Твои́м, посла́л еси́ пропове́дати Ева́нглие Ца́рствия все́м конце́м.

Я́вльшеся я́ко о́блацы Бо́жия све́та, апо́столи, все́м одождева́ют во́ду животворя́щую, зову́ще: благослове́н еси́ в хра́ме сла́вы Твоея́, Го́споди.

Богоро́дичен: Преукраше́нна Бо́жиею сла́вою яви́лася еси́, Пречи́стая, еди́на от ве́ка сло́во Бо́жие заче́ншая, ма́ти Де́во, благослове́нна Ты́ в жена́х, всенепоро́чная Влады́чице.

Пе́снь 8.

Ирмо́с: Ру́це распросте́р Дании́л, льво́в зия́ния в ро́ве затче́: о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.

Боже́ственный прему́дрый ли́к апо́стол Христо́вых, огне́м ду́ха, я́коже пле́велы попали́ша многоразли́чная бесо́вская чти́лища, и ве́рных сердца́ просвети́ша, вопию́ще: благослови́те, вся́ дела́ Госпо́дня, Го́спода.

Согла́сно Боже́ственныя ученики́ Христо́вы апо́столы, я́же возгреме́вшыя на́м Боже́ственная веле́ния, приста́нища ве́рных, благода́тели о́бщыя челове́честву, Спа́су служи́тели почти́м.

Всечестны́я и вмести́тельныя сосу́ды доброде́телей, челове́ческия нача́тки, пропове́дания трубы́, пото́ки нетле́нныя жи́зни, Богоно́сныя мо́лнии, исцеле́ний исто́чники, кра́сныя но́ги Ева́нглиа почти́м.

Богоро́дичен: По́лный сы́й смиря́ется на́с ра́ди, да исполне́ния его́ причасти́мся: в пречи́стое бо чре́во Твое́ вше́д необыме́нный, от Оте́ческих не́др не отсту́пль воплоти́ся. Те́м Тя́ вси́ благослови́м, Мари́е Богоневе́стная.

Пе́снь 9.

Ирмо́с: Ка́мень нерукосе́чный, от несеко́мыя горы́ Тебе́, Де́во краеуго́льный отсече́ся, Христо́с совокупи́вый растоя́щаяся естества́: те́м веселя́щеся, Тя́, Богоро́дице, велича́ем.

Реши́ти плени́цы прегреше́ний вла́сть прие́мше от Влады́ки Богови́дцы, воспева́ющих ва́с ми́лостивно грехи́ очи́стите, и спасе́ния сподо́бите.

Вседухо́вную зарю́, суще́ственно ва́м я́вльшуюся, вси́ восприя́сте, апо́столи сла́внии, в го́рнице научи́вшеся высо́ким пропове́данием и уче́нием, и ны́не досто́йно блажи́ми есте́.

Ва́м Христо́с ны́не друго́м свои́м почи́вшым венцы́ подае́т неувяда́емыя, и виде́ния Боже́ственнаго исполня́ет: Ему́же ны́не моли́теся, це́ркви вся́ спасти́.

Богоро́дичен: Пло́тию приити́ восхоте́в, украси́вый сло́вом вся́ческая в Тя́ всели́ся, еди́ну святе́йшую все́х обре́те, и Бо́гу показа́ и́стинную ма́ти Де́во.

Свети́лен.

Апо́столы Христо́вы прииди́те, лю́дие, воспое́м Боже́ственными пе́сньми, пропове́дники ве́ры, я́ко моля́щыяся Христу́ о душа́х на́ших.

Богоро́дичен: Пресвята́я Влады́чице чи́стая, еди́на неискусобра́чная, спасе́ние и упова́ние, Ты́ моли́ из Тебе́ ро́ждшагося Бо́га на́шего, спасти́ ми́р от ле́сти, и бе́д и скорбе́й.

На хвали́тех стихи́ры, гла́с 8.

Подо́бен: Го́споди, а́ще и на суди́щи:

Го́споди, Ты́ уте́шителя заря́ми апо́столы Твоя́ просвети́л еси́, и свети́ла положи́в те́х, ве́ры утвержде́ние, мы́сленным просвеще́нием ра́зума Твоего́, Влады́ко: сего́ ра́ди покланя́емся неизрече́нному человеколю́бию Твоему́. [Два́жды.]

Го́споди, апо́стол моли́твами огради́л еси́ ста́до Твое́ сие́, от враго́в искуше́ния невре́дно сохраня́яй: зане́ честно́ю то́ искупи́л еси́ кро́вию от рабо́ты чужда́го, я́ко ще́др и человеколю́бец.

Яви́стеся ку́пно во основа́нии церко́внем, я́ко честно́е ка́мение, заре́ю све́тлою вселе́нней блиста́юще Богоразу́мие изве́стно, апо́столи Боже́ственнии, Тро́ице предстоя́тели, и моли́твенницы о душа́х на́ших.

Сла́ва, гла́с 4:

Я́ко крила́тии орли́, всю́ зе́млю претеко́сте, честна́я уче́ния разсева́юще, и пле́велы ле́сти истерза́юще благода́тию, и многокла́сен пло́д де́лающе всехва́льнии, его́же держа́т мы́сленныя жи́тницы во ве́ки, де́лателю безсме́ртному бога́тно соблюда́емь.

И ны́не, Богоро́дичен:

Иму́ще Тя́ Богоро́дице, упова́ние и предста́тельство, вра́жиих наве́т не убои́мся, я́ко спаса́еши ду́шы на́ша.

Крестобогоро́дичен.

Подо́бен: Я́ко до́бля:

Распина́ема ви́дящи, ꙳ и в ре́бра пробода́ема копие́м, ꙳ Пречи́стая, ꙳ Христа́ Человеколю́бца, ꙳ пла́чущи вопия́ше: ꙳ что́ сие́, Сы́не мо́й? ꙳ Что́ Тебе́ неблагода́рнии лю́дие возда́ша, ꙳ вме́сто я́же сотвори́л еси́ до́брая и́м, ꙳ и тщи́шися безча́дствовати Мя́ вселюбе́знейший? ꙳ Дивлю́ся благоутро́бне ꙳ Твоему́ во́льному распя́тию.


Источник: Минея общая – М. : Издательский Совет Русской Православной Церкви, 2002. – 516 с. ISBN 5-94625-045-0

Комментарии для сайта Cackle