Азбука веры » Библия » Заха́рїа » гл.1

Заха́рїа, Глава 1

Толкования главы

1:1

см.: Агг.1:1; 1Езд.4:24; 1Езд.5:1;

1:2

1:3

см.: Ис.31:6; Ис.45:22; Иер.3:12; Иез.18:30; Иез.33:11; Ос.14:2; Иоил.2:12; Мал.3:7;

1:4

см.: 2Пар.36:16; Зах.7:11;

1:5

см.: 1Кор.10:5;

1:6

1:7

1:8

см.: Откр.19:11; Зах.6:2-3;

1:9

см.: Зах.4:1;

1:10

1:11

1:12

см.: Иер.25:11-12;

1:13

1:14

см.: Зах.8:2;

1:15

1:16

см.: Иер.30:10; Зах.4:9-10;

1:17

см.: Зах.2:12;

1:18

1:19

1:20

1:21

Церковнославянский (рус)

Языки

Во осмы́й ме́сяцъ, втора́го лѣ́та, при да́рiи, бы́сть сло́во Госпо́дне ко заха́рiи Варахі́ину, сы́ну Аддо́ву, проро́ку, глаго́ля:

прогнѣ́вася Госпо́дь на отцы́ ва́шя гнѣ́вомъ ве́лiимъ,

и рече́ши къ ни́мъ: си́це глаго́летъ Госпо́дь Вседержи́тель: обрати́теся ко мнѣ́, глаго́летъ Госпо́дь си́лъ, и обращу́ся къ ва́мъ, глаго́летъ Госпо́дь си́лъ.

И не бу́дите, я́коже отцы́ ва́ши, и́хже облича́ху проро́цы пре́жнiи, глаго́люще: си́це глаго́летъ Госпо́дь Вседержи́тель: отврати́теся от путі́й ва́шихъ лука́выхъ и от начина́нiй ва́шихъ злы́хъ: и не послу́шаша и не вня́ша послу́шати мене́, глаго́летъ Госпо́дь [Вседержи́тель].

Отцы́ ва́ши гдѣ́ су́ть и проро́цы? еда́ во вѣ́къ поживу́тъ?

Оба́че словеса́ моя́ и зако́ны моя́ прiе́млете, ели́ка а́зъ заповѣ́даю въ Ду́сѣ мое́мъ рабо́мъ мои́мъ проро́комъ, и́же пости́гнуша отце́въ ва́шихъ. И отвѣща́ша и рѣ́ша: я́коже уста́ви Госпо́дь Вседержи́тель сотвори́ти на́мъ по путе́мъ на́шымъ и по начина́ниемъ на́шымъ, та́ко сотвори́ на́мъ.

Въ два́десять четве́ртый первагона́десять ме́сяца, се́й е́сть ме́сяцъ Сава́тъ, во второ́е лѣ́то, при да́рiи, бы́сть сло́во Госпо́дне ко заха́рiи Варахі́ину, сы́ну Аддо́ву, проро́ку, глаго́ля:

ви́дѣхъ но́щiю, и се́, му́жъ всѣ́дъ на коня́ ры́жа, и се́й стоя́ше между́ гора́ми осѣня́ющими, и за ни́мъ ко́ни ры́жы и сѣ́ри, и пе́стри и бѣ́ли,

и рѣ́хъ: что́ сі́и, го́споди? И рече́ ко мнѣ́ а́нгелъ глаго́ляй во мнѣ́: а́зъ покажу́ ти, что́ су́ть сiя́.

И отвѣща́ му́жъ стоя́й между́ гора́ми и рече́ ко мнѣ́: сі́и су́ть, и́хже посла́ Госпо́дь объити́ зе́млю.

И отвѣща́ша а́нгелу Госпо́дню стоя́щему между́ гора́ми и рѣ́ша: обыдо́хомъ всю́ зе́млю, и се́, вся́ земля́ населе́на е́сть и молчи́тъ.

И отвѣща́ а́нгелъ Госпо́день и рече́: Го́споди Вседержи́телю, доко́лѣ не и́маши поми́ловати Иерусали́ма и гра́ды Иу́довы, я́же презрѣ́лъ еси́, сiе́ седмьдеся́тое лѣ́то?

И отвѣща́ Госпо́дь Вседержи́тель а́нгелу глаго́лющему во мнѣ́ глаго́лы добры́ и словеса́ утѣ́шна.

И рече́ ко мнѣ́ а́нгелъ глаго́ляй во мнѣ́: возопі́й глаго́ля: си́це глаго́летъ Госпо́дь Вседержи́тель: ревнова́хъ по Иерусали́му и Сiо́ну рве́нiемъ вели́кимъ,

и гнѣ́вомъ ве́лiимъ а́зъ гнѣ́ваюся на язы́ки напа́дающыя: зане́ а́зъ у́бо прогнѣ́вахся ма́ло, они́ же налего́ша во зла́я.

Сего́ ра́ди си́це глаго́летъ Госпо́дь: обращу́ся ко Иерусали́му щедро́тами, и хра́мъ мо́й сози́ждется въ не́мъ, глаго́летъ Госпо́дь Вседержи́тель, и мѣ́ра протя́гнется во Иерусали́мѣ еще́.

И рече́ ко мнѣ́ а́нгелъ глаго́ляй во мнѣ́: еще́ возопі́й глаго́ля: си́це глаго́летъ Госпо́дь Вседержи́тель: еще́ прелiя́тися и́мутъ гра́ди благи́ми, и поми́луетъ Госпо́дь еще́ Сiо́на и избере́тъ еще́ Иерусали́ма.

И возведо́хъ о́чи мои́ и ви́дѣхъ, и се́, четы́ри ро́зи,

и рѣ́хъ ко а́нгелу глаго́лющему во мнѣ́: что́ су́ть сiя́, го́споди? И рече́ ко мнѣ́: сі́и ро́зи расточи́вшiи Иу́ду и Изра́иля и Иерусали́ма.

И показа́ ми Госпо́дь четы́ри древодѣ́ля.

И рѣ́хъ: что́ сі́и гряду́тъ сотвори́ти, [го́споди]? И рече́: сі́и ро́зи расточи́вшiи Иу́ду, и Изра́иля сокруши́ша, и никто́же от ни́хъ воздви́же главы́: и изыдо́ша сі́и поостри́ти я́ въ рука́хъ свои́хъ четы́ри ро́зи, язы́цы вознося́щiи ро́гъ на зе́млю Госпо́дню, е́же расточи́ти ю́.

Глава: