Текст акафиста утвержден для употребления за богослужением и в домашней молитве на заседании Священного Синода 24 июля 2025 года (журнал № 70).
Кондак 1
Избра́нный Бо́гом на княже́ние в зе́мли Че́шския, страстоте́рпче кня́же Вячесла́ве, пра́ведным житие́м твои́м Бо́гови угоди́л еси́, и сла́ва страда́ния твоего́ пронесе́ся по всей вселе́нней, сего́ ра́ди пра́вило ве́ры и о́браз благоче́стия яви́лся еси́ нам, те́мже взыва́ем ти: Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Икос 1
А́нгели поспе́шествоваша блаже́нней Людми́ле в наставле́нии тя на и́стиннем пути́, благове́рне кня́же Вячесла́ве, и измла́да уразуме́л еси́ ве́лие благоче́стия та́инство, тле́ния же око́вы ду́хом растерза́л еси́, и ри́зу кня́жескую, страстоте́рпче, му́ченическими кровьми́ обагри́л еси́, те́мже нетле́нную сла́ву приобре́т, со святы́ми ра́дуешися, мы же досто́йно тя хва́лим:
Ра́дуйся, благода́тию изде́тска просвеще́нный;
ра́дуйся, достоя́ние блаже́нныя Людми́лы обогати́вый.
Ра́дуйся, в доспе́хи благоче́стия одея́нный;
ра́дуйся, в се́че духо́вней закале́нный.
Ра́дуйся, Тро́ицы Пресвяты́я пропове́дниче;
ра́дуйся, ко Пресвяте́й Богоро́дице моли́твенниче.
Ра́дуйся, челове́ком му́дрый благоде́телю;
ра́дуйся, А́нгелом тща́тельный ревни́телю.
Ра́дуйся, мече́м усече́нный, оба́че непобежде́нный;
ра́дуйся, княже́ния и жи́зни лише́нный, оба́че ве́чною сла́вою облече́нный.
Ра́дуйся, кровьми́ твои́ми Це́рковь украси́вый;
ра́дуйся, чудесы́ твои́ми вси зе́мли слове́нстии озари́вый.
Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Кондак 2
Ви́дя оте́ц твой от младе́нства тя во о́трочество преходя́ща, приведе́ тя в це́рковь и позва́ епи́скопа благослови́ти тя, ты же, прии́м благода́ть, сохрани́ и приумно́жи ю́ в се́рдце твое́м и положи́ ве́ру Христо́ву основа́ние и сте́ну кре́пку житию́ твоему́, те́мже просла́вися в служе́нии твое́м Всеси́льный Бог, Ему́же пое́м: Аллилу́ия.
Икос 2
Ра́зум богопросвеще́н обре́л еси́, свя́те Вячесла́ве, сего́ ра́ди чи́стому се́рдцу твоему́ в то́нцем виде́нии откры́ Бог, ко́ю сме́ртию у́мрет блаже́нная прама́ти твоя́ Людми́ла и ка́ко пресви́теров правосла́вных изго́нят из страны́ Че́шския. Ты же, печа́луяся о сем, сохраня́ше ве́ру Христо́ву и та́ко бя́ше покрови́тель слове́нских земе́ль, те́мже сла́ву муче́ния твоего́ проне́сл есть Бог чрез стремни́ны вре́мени доны́не, сего́ ра́ди хва́лим тя:
Ра́дуйся, се́рдце сокруше́нно стяжа́вый;
ра́дуйся, мысль чи́сту Бо́гови сохрани́вый.
Ра́дуйся, ве́ры правосла́вныя побо́рниче;
ра́дуйся, лю́дем к тебе́ прибега́ющим защи́тниче.
Ра́дуйся, ум от суеты́ очи́стивый;
ра́дуйся, посто́м ду́шу укрепи́вый.
Ра́дуйся, я́ко в се́рдцы твое́м Христо́с всели́ся;
ра́дуйся, я́ко Ца́рствие Бо́жие внутрь тя прии́де.
Ра́дуйся, о жи́зни пра́ведней раде́телю;
ра́дуйся, у́мнаго трезве́ния рачи́телю.
Ра́дуйся, ве́ры Христо́вы испове́дниче;
ра́дуйся, сме́рти му́ченическия прича́стниче.
Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Кондак 3
Имы́й основа́ние до́брое ве́ры незы́блемыя прама́тере твоея́ Людми́лы, изучи́л еси́ во кре́пости Бу́деч нау́ку вся́кую, изостри́в ум свой и просвети́в ду́шу, те́мже утверди́ся Христо́с во главе́ у́гла се́рдца твоего́. Сего́ ра́ди сла́вя твое́ богоразу́мие, Бо́гови пое́м: Аллилу́иа.
Икос 3
Си́ла Вы́шняго просвети́ ра́зум твой, святы́й му́чениче Вячесла́ве, до́бре внима́ти уче́нию кни́жному, да ра́вно со пресви́теры разуме́я зако́н Христо́в и ве́дая Писа́ние, возмо́жеши пра́вити лю́ди че́шския ко благоче́стию христиа́нскому. Те́мже лю́дие слове́нстии ре́ша ти:
Ра́дуйся, наставле́ний блаже́нныя Людми́лы послу́шавый;
ра́дуйся, мысль и се́рдце свои́ Христу́ покори́вый.
Ра́дуйся, во́ине Христо́в, в Небе́снии полцы́ вступи́вый;
ра́дуйся, благоче́стию наро́да че́шскаго послужи́вый.
Ра́дуйся, кимва́ле церко́вный, сердца́ лю́дстии к моли́тве обраща́ющий;
ра́дуйся, ма́сте благово́нная, бра́ни междоусо́бныя умиря́ющая.
Ра́дуйся, в зе́млех слове́нских богогла́сный пропове́дниче;
ра́дуйся, кли́ру правосла́вному тверды́не.
Ра́дуйся, благоче́стия благоуха́нный цве́те;
ра́дуйся, в держа́ве кня́жестей духоно́сче.
Ра́дуйся, дре́вним и́ноцем в по́двизех подо́бниче;
ра́дуйся, на престо́ле седя́, се́рдцем отше́льниче.
Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Кондак 4
Бу́рю внутрь име́я помышле́ний печа́льных, скорбе́л еси́ се́рдцем, кня́же Вячесла́ве, ви́дя ма́терь твою́ Драгоми́ру страстьми́ обурева́ему, умо́м ослепле́ну, во тьме неве́рия косне́ющу и лю́тою не́навистию томи́му. Ты же, име́я ору́жие необори́мое ве́ры Христо́вы и броню́ долготерпе́ния, печа́ль свою́ возложи́л еси́ на Го́спода Иису́са, Его́же сла́вяще, пое́м: Аллилу́иа.
Икос 4
Слы́шавше лю́дие глас твой я́ко цевни́цу громогла́сную, и ви́девше пра́ведность твою́ я́ко пра́ведность А́велеву, восхвали́ша Бога, И́же даде́ ти прему́дрость Соломо́ню и ре́вность Моисе́ову, я́коже зве́зды посреде́ тьмы сия́ющии, ты же, благове́рне кня́же Вячесла́ве, небе́сная жела́я и ве́чная блага́я получи́ти ча́я, был еси́ кли́ра и мона́шествующих почита́тель, убо́гих засту́пник, ни́щих пита́тель, вдови́ц и си́рых уте́шитель, сего́ ра́ди сла́вим тя:
Ра́дуйся, богому́дрия стяжа́телю;
ра́дуйся, в кня́жестве равноа́нгельне пожи́вый.
Ра́дуйся, гу́сли, Христу́ хвалу́ воздаю́щии;
ра́дуйся, сре́брянная струно́, Бо́гови пою́щая.
Ра́дуйся, тьмы язы́ческия противобо́рче;
ра́дуйся, све́та Правосла́вия благоволе́ние.
Ра́дуйся, уго́дников Христо́вых почита́телю;
ра́дуйся, служи́телей церко́вных покрови́телю.
Ра́дуйся, ни́щих и си́рых благоде́телю до́брый;
ра́дуйся, всем убо́гим помо́щниче ско́рый.
Ра́дуйся, всех обездо́ленных ще́дро ми́луяй;
ра́дуйся, житие́ целому́дренное вельми́ возлюби́вый.
Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Кондак 5
Боготе́чная звезда́ ве́ры и хра́брый во́ин яви́лся еси, кня́же Вячесла́ве, лю́дем твои́м. Восхоте́вшу Радисла́ву, кня́зю Зли́цкому, ра́товати на тя и владе́ти земле́ю Че́шскою, ты вступи́ во злато́е свое́ стре́мя, взя меч и собра́ рать вели́ку, оба́че помоли́вся Бо́гу и Пречи́стей Его́ Ма́тери, не восхоте́ проли́ти кровь дружи́ны своея́, и предложи́ супоста́ту самобо́рство; мы же, дивя́щеся богому́дрию твоему́, Бо́гови пое́м: Аллилу́иа.
Икос 5
Ви́дя твое́ богому́дрое изволе́ние и любо́вь к лю́дем, осия́ тя Бог в ратобо́рстове благода́тию. Егда́ ста проти́ву тя Радисла́в, я́коже Голиа́ф супроти́в Дави́да, узре́ он чу́дно, ка́ко позади́ тя, святы́й му́чениче и хра́брый кня́же Вячесла́ве, А́нгели светоно́снии стоя́т, да Крест Христо́в све́тится, и та́ко устраши́ся и уступи́ ти Че́хию без бра́ни, разуме́в, я́ко Бог с тобо́ю спобора́ет, Его́же сла́вяще, пое́м ти си́це:
Ра́дуйся, хра́брый стра́же ве́ры правосла́вныя;
ра́дуйся, му́жеством кро́тость стяжа́вый.
Ра́дуйся, ратобо́рче миротворя́й;
ра́дуйся, правосла́вных слове́н похвало́.
Ра́дуйся, червле́ный щи́те, лю́ди своя́ от напа́стей огражда́яй;
ра́дуйся, копие́ позлаще́нное, вы́ну на побе́ды над ду́хами зла преугото́ванное.
Ра́дуйся, броне́ крепка́я, ве́ру Христо́ву тве́рдо храня́щая;
ра́дуйся, стя́же велеле́пне, о́браз Госпо́день до́бре прославля́яй.
Ра́дуйся, ра́товище безупре́чное, и́мже держи́тся благоче́стие несляка́емое;
ра́дуйся, мечу́ була́тный, враги́ Христо́вы устраша́яй.
Ра́дуйся, кольчу́же хитросплете́нная, прему́дрость явля́ющая;
ра́дуйся, дама́сче ди́вный, кре́пость и ле́поту духо́вную сочета́вый.
Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Кондак 6
Пропове́дницы ве́ры и служи́тели Христо́вы почте́ни бы́ша тобо́ю, христолюби́ве кня́же Вячесла́ве, егда́ ты принесе́ мо́щи блаже́нныя Людми́лы во Пра́жский град, и воздви́же це́рковь му́ченика Ви́та, и ине́ми церковьми́ украси́ зе́мли Че́шстии, и запове́да в це́рквах па́мяти святы́х твори́ти пе́нии и моли́твами, и пра́здники пра́здновати во сла́ву и на хвалу́ Бо́гу, Ему́же пое́м: Аллилу́иа.
Икос 6
Возсия́ша доброде́тели твоя́ пред Бо́гом, свя́те Вячесла́ве, я́ко каме́ние драго́е и зла́то чисте́йшее: моли́тва твоя́ сладка́ Бо́гови я́ко фимиа́м благово́нный, ве́ра твоя́ крепка́ я́ко меч була́тный, богому́дрие твое́ остро́ я́ко копие́ ме́ткое, целому́дрие твое́ чи́сто и тве́рдо я́ко адама́нт многоце́нный. Мзда твоя́ мно́га пред Бо́гом, и по́двиг твой страстьми́ увенча́н, те́мже сла́вя благоче́стие твое́, вопие́м:
Ра́дуйся, сла́дость страда́ния позна́вый;
ра́дуйся, ратобо́рче духо́вный, во обличе́ние язы́цем яви́выйся.
Ра́дуйся, руно́ ди́вное, Правосла́вием ороше́нное;
ра́дуйся, ве́рвице, лю́дие слове́нстии связу́ющая.
Ра́дуйся, целому́дрия ревни́телю;
ра́дуйся, моли́твы стяжа́телю.
Ра́дуйся, ми́ро благоуха́нное, Го́сподеви принесе́нное;
ра́дуйся, ри́знице, доброде́телей испо́лненная.
Ра́дуйся, рипи́до злата́я, ве́ру Христо́ву защища́ющая;
ра́дуйся, рове́нниче, вода́ми богому́дрия нас напоя́яй.
Ра́дуйся, сви́тче дре́вний, о́браз благоче́стия нам показу́яй;
ра́дуйся, глави́зно слове́нскаго Правосла́вия.
Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Кондак 7
Хотя́й князь тьмы погуби́ти тя, му́чениче Христо́в, вложи́ злоумышле́ние в се́рдце бра́та твоего́, я́коже Ка́ину зави́стнику, и та́ко Болесла́в возненави́де тя, ты же, о́браз нося́ смиреному́дрия, прия́ вене́ц червле́н на главу́ свою́, да́ но́вый А́вель яви́шися нам, мы же Го́сподеви пое́м: Аллилу́иа.
Икос 7
Но́ваго му́ченика избра́ тя Госпо́дь от слове́н, я́ко же́ртву чи́сту, ве́дый твое́ помышле́ние осо́бне Ему́ послужи́ти во о́бразе и́ночесте, оба́че ин крест угото́ва ти Бог, страстоте́рпче, его́же прие́м, воспо́лнил еси́ жи́тницу Небе́сную, те́мже и́мут тя лю́дие слове́нстии моли́твенника и побо́рника во вся дни ве́ка сего́. Мы же, сла́вяще стра́сти твоя́, благода́рственно вопие́м ти:
Ра́дуйся, открове́ния та́ин Бо́жиих о́бщниче;
ра́дуйся, маргари́ту драго́му подо́бниче.
Ра́дуйся, кня́жеским усо́бицам досажде́ние;
ра́дуйся, избра́нное Бо́гу в же́ртву приноше́ние.
Ра́дуйся, грозд спе́лый, Виногра́даря услажда́яй;
ра́дуйся, кри́не ди́вный, арома́ты пра́ведности благоуха́яй.
Ра́дуйся, до́брая жа́тво се́яния Людми́лы богому́дрыя;
ра́дуйся, златокова́нная гри́вно, в небе́снии ларцы́ вложе́нная.
Ра́дуйся, блеща́нием благоче́стия Бо́жие благоволе́ние сниска́вый;
ра́дуйся, призва́ние от Го́спода ве́рно оправда́вый.
Ра́дуйся, за Возлю́бльшаго ны вся препобеди́вый;
ра́дуйся, излия́нием кро́ве за Христа́ прославле́ние улучи́вый.
Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Кондак 8
Стра́нное зва́ние прия́л еси́, срастоте́рпче, от бра́та твоего́ на освяще́ние це́ркви в Болесла́вле гра́де, и́же, ве́дый твое́ боголю́бие, умышля́яй умерщвле́ние. О, злоко́знство Болесла́вле! Ты же, я́ко а́гнец, на закла́ние гряды́й, приве́лся еси́ ко лжебра́ту и та́ко испо́лнил еси́ смотре́ние Христа́ Бо́га на́шего, Его́же сла́вяще, пое́м: Аллилу́иа.
Икос 8
Вси веселя́хуся пра́зднующе, оба́че тоскова́ душа́ твоя́ чи́стая, прозрева́ющи наме́рение ги́бельное бра́та твоего́. Друг твой изве́сти тя о злоумышле́нии Болесла́вле, я́ко уби́ти тя хо́щет, ты же, остени́в се́рдце свое́ му́жеством, любве́ ра́ди не оста́вил еси́ до́ма бра́тняго, и та́ко яви́лся еси́ же́ртва чи́стая Бо́гови, мы же пое́м ти си́це:
Ра́дуйся, я́ко за́поведь любве́ испо́лнил еси́;
ра́дуйся, я́ко красе́н плод богоуго́дныя страды́ яви́лся еси́.
Ра́дуйся, я́ко за́висть братолю́бием низложи́л еси́;
ра́дуйся, я́ко стра́стию нетле́ннаго блаже́нства сподо́бился еси́.
Ра́дуйся, я́ко пра́вило святы́м Бори́су и Гле́бу положи́лся еси́;
ра́дуйся, я́ко в сонм первому́ченик слове́нских вшел еси́.
Ра́дуйся, я́ко долготерпе́ние стяжа́л еси́;
ра́дуйся, я́ко всепроще́ния испо́лнился еси́.
Ра́дуйся, ве́тве плодоно́сная, е́юже че́шстии наро́ди хва́лятся;
ра́дуйся, канди́ло многоеле́йное, его́же ра́ди люде́й слове́нских ми́лует Бог.
Ра́дуйся, приноше́ние миросве́тлое Влады́це Христу́;
ра́дуйся, многоце́нная десяти́но Бо́гови от слове́нския земли́.
Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Кондак 9
Вси пе́рстнии удиви́шася, уве́девше, я́ко христолюби́вое се́рдце твое́ чу́ждо бе усо́биц кня́жеских и мудрова́ния плотска́го, и ка́ко вознесе́ тя Бог на Небеса́ стезе́ю му́ченическою. По ра́нней бо зари́ вше́дшу ти во врата́ церко́внии, сре́те тя та́мо денни́ца пе́рстный, брат твой, и усе́кну тя мече́м со ско́вники свои́ми, изли́в пред олтаре́м кровь твою́ непови́нную, страстоте́рпче Христо́в Вячесла́ве, те́мже прия́т тя Бог в Черто́г Небе́сный, иде́же пое́тся непреста́нная песнь: Аллилу́иа.
Икос 9
Вети́и цветослове́снии ка́ко возмо́гут изъясни́ти стра́сти твоя́ и окая́нство Болесла́вле? Умолко́ша в печа́ли пти́цы пе́вчии, потеко́ша а́ки ручьи́ сле́зы лю́дстии, убие́нну бы́вшу таково́му кня́зю и предста́телю до́брому! Воспе́ша же А́нгели песнь сла́вы ве́чныя, страстоте́рпче Вячесла́ве, и срето́ша тя со́нмы му́ченичестии, собра́та но́ваго, ри́зами све́тлыми блиста́ющаго, с ни́миже и мы пое́м ти:
Ра́дуйся, страда́нием освяти́выйся;
ра́дуйся, в княже́нии твое́м Бо́гови вельми́ угоди́вый.
Ра́дуйся, созве́здие му́ченическое воспо́лнивый;
ра́дуйся, би́сера многоце́ннаго взыска́вый.
Ра́дуйся, я́ко тле́нныя сла́вы отре́клся еси́;
ра́дуйся, я́ко ве́чныя ра́дости удосто́ился еси́.
Ра́дуйся, я́ко кро́вными страда́нии злоко́зние диа́воле потопи́л еси́;
ра́дуйся, я́ко мироуха́нным смире́нием неувяда́емаго венца́ сподо́бился еси́.
Ра́дуйся, я́ко ра́достей ве́чных ра́ди страда́ния богому́дро предпоче́л еси́;
ра́дуйся, я́ко черто́ги кня́жеския на Небе́сныя премени́л еси́.
Ра́дуйся, я́ко посече́ния теле́снаго не устраши́лся еси́;
ра́дуйся, я́ко се́ю жа́твою червле́ною Небе́сную ни́ву украси́л еси́.
Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Кондак 10
Спасти́ хотя́ Пресвята́я Тро́ица пле́мена слове́нстии, яви́ зна́мение благоволе́ния на тебе́, свя́те Вячесла́ве: жесто́кия ра́ны твоя́ истека́ху кро́вию, три дни не могу́щи исся́кнути, уби́йцы твои́ окая́ннии смыва́ху кровь твою́, три дни не могу́ще смы́ти ю́. И та́ко освяти́шася зе́мли Че́шстии кровьми́ страда́ния твоего́, мы же сла́вяще Триеди́наго Бога, пое́м Ему́: Аллилу́иа.
Икос 10
Стено́ю благоче́стия огражда́я житие́ свое́ во Христе́ Иису́се Го́споде на́шем, страстоте́рпче Вячесла́ве, гони́м бя́ше, по глаго́лу апо́стола, с при́сными твои́ми: та́ко врази́ Христо́вы восста́ша на тя, я́ко и дру́ги твоя́ не пощаде́ша, испо́лньше кровьми́ их брега́ и во́ды Влта́вы реки́. Хотя́й диа́вол зло́бою помрачи́ти ве́ру твою́, ничто́же преуспе́, но ярча́е со́лнца возсия́ свет свя́тости твоея́, те́мже хва́лим и почита́ем тя доны́не, вопию́ще ти та́ко:
Ра́дуйся, первому́чеником подража́телю;
ра́дуйся, духо́вный стратила́те.
Ра́дуйся, тетиво́ туга́я, тугу́ и скорбь разсека́ющая;
ра́дуйся, стрело́ бы́страя, смире́нием вражду́ пробо́дшая.
Ра́дуйся, лу́че кре́пкий, лука́вство кро́тостию поража́яй;
ра́дуйся, праще́ духо́вная, проще́нием за зло воздаю́щая.
Ра́дуйся, копие́ о́строе, безче́стие уязвля́ющее;
ра́дуйся, тверды́не испове́дания, наде́жду в нас вселя́ющая.
Ра́дуйся, но́вый А́велю, же́ртвенности ны науча́яй;
ра́дуйся, че́шский Ио́сифе, к му́жеству ны наставля́яй.
Ра́дуйся, воздержа́нием и посто́м напита́нный;
ра́дуйся, сме́ртию же́стокою живота́ ве́чнаго достиги́й.
Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Кондак 11
Пе́ние хвале́бное прино́сим ти, страстоте́рпче, почита́юще стра́сти и чудотворе́ния твоя́. Егда́ восхоте́ Болесла́в тай пренести́ мо́щи твоя́ в це́рковь му́ченика Ви́та, не возмо́же сокры́ти свети́льник под спу́дом, и возсия́л еси́, свя́те Вячесла́ве, по сме́рти свое́й, сла́вою нетле́ния и чудесы́. Мы же, почита́юще па́мять му́ченик дре́вних и но́вых, Христа́ Бо́га на́шего хва́лим: Аллилу́иа.
Икос 11
Светоприе́мная свеща́ яви́лся еси́, страстоте́рпче Христо́в Вячесла́ве, и свет твоего́ сия́ния просвеща́ет нас, гре́шных, и мо́щи твоя́ сла́вят Пра́жский град, подаю́ще цельбы́ лю́дем правосла́вным. Ве́ра твоя́ пра́вило и о́браз нам есть, страда́ния твоя́ суть Це́ркви похвала́, чудеса́ же мно́гая, вселе́нную исполня́ющая, подвиза́ют ны похва́льная приноси́ти ти:
Ра́дуйся, зво́ннице благозву́чная, зе́мли слове́нстии во еди́но собира́ющая;
ра́дуйся, бла́говесте зы́чный, осма́го дне провозве́стниче.
Ра́дуйся, хра́ме Ду́ха Свята́го, благода́ти Бо́жия прие́мниче;
ра́дуйся, кресто́м страда́ния на высоту́ возведе́нный.
Ра́дуйся, кро́тость на кня́жестем тро́не сохрани́вый;
ра́дуйся, скорбьми́ мно́гими в Ца́рствие Небе́сное вше́дый.
Ра́дуйся, муче́нием просия́вый;
ра́дуйся, ве́чное весе́лие унасле́дивый.
Ра́дуйся, за ны к Бо́гу хода́таю;
ра́дуйся, стра́ждущим ско́рый помо́щниче.
Ра́дуйся, ве́рных прави́телей укрепле́ние;
ра́дуйся, сло́вом Бо́жиим просвеще́ние.
Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Кондак 12
Благода́ть снизшла́ есть моли́тв ра́ди твои́х, страстоте́рпче святы́й Вячесла́ве, на зе́мли Боге́мския, страна́ че́шская хва́лится по́двиги твои́ми, лю́дие слове́нстии славосло́вят страда́ния твоя́, ве́ру вели́кую и любо́вь ко Христу́, и та́ко че́ствующе кресто́м просла́вльшаго тя Го́спода, пое́м: Аллилу́иа.
Икос 12
Пое́м ти песнь похва́льную, треблаже́нне Вячесла́ве, благове́рне кня́же, те́пле моли́твенниче и христолюби́ве му́чениче, сла́ва бо твоя возгреме́ по всей земли́ слове́нстей, воструби́ша А́нгели Небе́снии, прии́мше но́ваго му́ченика, звяца́ют кампа́ны церко́внии, возвеща́юще по́двиг твой страда́льческий, мы же рцем ти си́це:
Ра́дуйся, же́ртво благоуха́нная, Христо́ви чи́сте принесе́нная;
ра́дуйся, одея́нный в ри́зу но́ву, из крове́й твои́х истка́нную.
Ра́дуйся, пло́ти твоея́ рассече́нием врата́ жи́зни ве́чныя отвори́вый;
ра́дуйся, от Го́спода диади́му побе́ды прия́вый.
Ра́дуйся, раче́ние ко Христу́ ди́вное яви́вый;
ра́дуйся, на высоту́ богове́дения восше́дый.
Ра́дуйся, в Небе́сное Оте́чество водвори́выйся;
ра́дуйся, мощьми́ твои́ми чудеса́ безчи́сленна источи́вый.
Ра́дуйся, всем христиа́ном неруши́мый покро́ве;
ра́дуйся, лю́дем слове́нским ско́рое вспоможе́ние.
Ра́дуйся, страда́льческими труды́ дре́вняго льстца́ низложи́вый;
ра́дуйся, венце́м нетле́нным от Христа́ Бо́га увязе́нный.
Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Кондак 13
О досточу́дне страстоте́рпче Вячесла́ве, ди́вный кня́же и слуго́ Христо́в, житие́м благове́рным вельми́ Бо́гу угоди́вый и страда́льчеством от тли к нетле́нию прише́дый! Приими́ ма́лое сие́ моле́ние, в похвалу́ ти возноси́мое, при́зри на ны немощству́ющия и умоли́ за ны Го́спода, да обря́щем милосе́рдие Его́ в день су́дный, в ра́дости пою́ще: Аллилу́иа.
[Се́й конда́к глаго́лется три́жды.][Далее повторяем 1‑е икос и кондак:]
Икос 1
А́нгели поспе́шествоваша блаже́нней Людми́ле в наставле́нии тя на и́стиннем пути́, благове́рне кня́же Вячесла́ве, и измла́да уразуме́л еси́ ве́лие благоче́стия та́инство, тле́ния же око́вы ду́хом растерза́л еси́, и ри́зу кня́жескую, страстоте́рпче, му́ченическими кровьми́ обагри́л еси́, те́мже нетле́нную сла́ву приобре́т, со святы́ми ра́дуешися, мы же досто́йно тя хва́лим:
Ра́дуйся, благода́тию изде́тска просвеще́нный;
ра́дуйся, достоя́ние блаже́нныя Людми́лы обогати́вый.
Ра́дуйся, в доспе́хи благоче́стия одея́нный;
ра́дуйся, в се́че духо́вней закале́нный.
Ра́дуйся, Тро́ицы Пресвяты́я пропове́дниче;
ра́дуйся, ко Пресвяте́й Богоро́дице моли́твенниче.
Ра́дуйся, челове́ком му́дрый благоде́телю;
ра́дуйся, А́нгелом тща́тельный ревни́телю.
Ра́дуйся, мече́м усече́нный, оба́че непобежде́нный;
ра́дуйся, княже́ния и жи́зни лише́нный, оба́че ве́чною сла́вою облече́нный.
Ра́дуйся, кровьми́ твои́ми Це́рковь украси́вый;
ра́дуйся, чудесы́ твои́ми вси зе́мли слове́нстии озари́вый.
Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Кондак 1
Избра́нный Бо́гом на княже́ние в зе́мли Че́шския, страстоте́рпче кня́же Вячесла́ве, пра́ведным житие́м твои́м Бо́гови угоди́л еси́, и сла́ва страда́ния твоего́ пронесе́ся по всей вселе́нней, сего́ ра́ди пра́вило ве́ры и о́браз благоче́стия яви́лся еси́ нам, те́мже взыва́ем ти: Ра́дуйся, благове́рне кня́же Вячесла́ве, страстоте́рпче и ве́рный слуго́ Христо́в.
Молитва
О святы́й благове́рный кня́же му́чениче Вячесла́ве, избра́нный воево́до земли́ Че́шския и всех христиа́н те́плый пред Бо́гом предста́телю! Днесь, в па́мять твою́ единоду́шно соше́дшеся и умиле́нно моля́щеся, си́це из глубины́ се́рдца к тебе́ взыва́ем: ты в житии́ свое́м ревни́тель и защи́тник Правосла́вныя ве́ры был еси́, и нас в ней те́плыми твои́ми к Бо́гу моли́твами непоколеби́мы утверди́; ты вели́кое возложе́нное на тя служе́ние усе́рдно проходи́л еси́, и нас твое́ю по́мощию пребыва́ти коего́ждо, в не́мже призва́ни есмы́, наста́ви; ты супоста́т полки́ от оте́чества своего́ си́лою ра́тною и му́дростию управи́тельною отгна́л еси́, и на нас ополча́ющихся всех враго́в ви́димых и неви́димых низложи́; ты в преде́лех держа́вы своея́ пра́вду и мир и милосе́рдие насажда́ти потща́лся еси́, и нам от ми́лостиваго Бо́га в сих доброде́телех преспе́яние испроси́; ты кро́тко безви́нную смерть я́ко А́вель от руки́ бра́тни пред враты́ церко́вными прия́л еси́, и нас, я́ко чад еди́ныя ма́тере Це́ркве, братолю́бию и кро́тости научи́. О вели́кий и сла́вный кня́же Вячесла́ве, ра́ди вя́щшыя сла́вы Небе́сныя вене́ц земна́го княже́ния оста́вивый и венце́м му́ченическим пра́ведно увенча́нный! Ны́не с му́дрою наста́вницею, прама́терию твое́ю Людми́лою, и все́ми святы́ми у Престо́ла Бо́жия предстоя́, не забу́ди нас си́рых и убо́гих, я́коже в животе́ твое́м никого́же от таковы́х оста́вил еси́, и предста́тельством твои́м житие́ ти́хое и безгре́шное и к ве́чному Ца́рствию ше́ствие устро́й нам, да просла́вим Бо́га, ди́внаго во святы́х Свои́х, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Комментировать