Минея, 5 Января.
Глас 2
Песнь 1
Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди, я́же изведе́ из рабо́ты еги́петския,/ я́ко просла́вися.
Припев: Преподо́бная ма́ти Синклитики́е, моли́ Бо́га о на́с.
Венча́ти твою́ пе́сньми па́мять прихожду́,/ тебе́ наде́явся, несмы́сленный и весь нечи́стый,/ но даждь ми сло́во му́дрости и ра́зума твои́ми мольба́ми.
Припев: Преподо́бная ма́ти Синклитики́е, моли́ Бо́га о на́с.
Весь ум к Боже́ственней высоте́ взе́мши/ и благи́х бе́здну и наслажде́ний позна́вши бла́гость,/ вся претерпе́ла еси́, приклю́чшаяся тебе́.
Сла́ва Отцу́ и Сы́ну и Свято́му Ду́ху.
Ум к Бо́гу впери́вши Вы́шнему,/ те́ло твое́, влеку́щее к до́льним, воздержа́нием и болезньми облегчи́ла еси́,/ жела́ющи вели́кия сла́вы.
И ны́не и при́сно и во ве́ки веко́в. Ами́нь.
Богородичен: Пребы́в, е́же бе, и воплоти́вся из утро́бы Твоея́,/ е́же бехом дарова́ нам пе́рвое, от пе́рсти бы́вшим,/ изба́вив прегреше́ний, Богороди́тельнице.
Песнь 3
Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.
Припев: Преподо́бная ма́ти Синклитики́е, моли́ Бо́га о на́с.
Не пощаде́ла еси́ пло́ти мно́гими я́звами,/ ниже́ весьма́ неоде́ржно друча́емыя, к боле́знем воздержа́ния,/ искуси́тель в ни́хже отрева́шеся.
Припев: Преподо́бная ма́ти Синклитики́е, моли́ Бо́га о на́с.
Ше́ствие те́сное жи́зни хода́тайственно нетле́нный и Боже́ственныя ты изво́лила еси́,/ широ́кое оплева́вши,/ его́же ничто́же го́рше вои́стинну ум иму́щему.
Сла́ва Отцу́ и Сы́ну и Свято́му Ду́ху.
Горя́щу ю́ностному цве́ту отбеже́ тесното́ю и боле́зньми воздержа́ния/ и пале́ние очес твои́х сле́зными тече́нии угаси́л еси́.
И ны́не и при́сно и во ве́ки веко́в. Ами́нь.
Богородичен: Сло́во, вопло́щшееся из Тебе́, Всечи́стая,/ пло́ти скве́рну хотя́ омы́ти о́бразом очище́ния,/ тече́ние водно́е диви́тся.
Седален, глас 5
По́стных превзошла́ еси́ ты терпе́ния боле́знь,/ на Небесе́х наслажда́ешися бо́льшия оби́тели/ и лу́чшия зари́ испо́лнилася еси́,/ зане́ му́жески жесто́кий ше́ствовала еси́ путь, победи́вши настоя́щая,/ и А́нгелом уподо́билася еси́,/ и ны́не сла́вы причаща́ешися тех.
Песнь 4
Ирмос: Прише́л еси́ от Де́вы,/ не хода́тай, ни А́нгел, но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.
Припев: Преподо́бная ма́ти Синклитики́е, моли́ Бо́га о на́с.
Ты, телесе́ преизря́дствующи добро́тами,/ была́ еси́ мно́гим отречена́, не полу́чшим раче́ния./ Те́мже, изнури́вши себе́, причасти́лася еси́ Боже́ственныя красоты́.
Припев: Преподо́бная ма́ти Синклитики́е, моли́ Бо́га о на́с.
Претерпе́ла еси́, я́ко И́ов, теле́сное озлобле́ние,/ не изрекла́ еси́ сло́ва, кончи́ну привлача́щаго,/ ле́том и естество́м же преше́дши, Боже́ственное прия́ла еси́ жи́лище.
Сла́ва Отцу́ и Сы́ну и Свято́му Ду́ху.
Уедини́ся от сро́дников, и роди́телей, и стяжа́ния,/ Христа́ еди́наго и́шущи некрадо́мо бога́тство и неиждива́емое,/ с Ни́мже Вы́шняя сла́вы яви́лася еси́ прича́стница.
И ны́не и при́сно и во ве́ки веко́в. Ами́нь.
Богородичен: Рождество́ Твое́ Ада́ма от тли изба́ви, кроме́ тле́ния человекоде́льнаго,/ и́бо па́че челове́ка бысть зача́тие./ Те́мже тле́ния и зол мя, Отрокови́це, изба́ви.
Песнь 5
Ирмос: Све́та Пода́телю/ и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.
Припев: Преподо́бная ма́ти Синклитики́е, моли́ Бо́га о на́с.
Храм была́ еси́ обита́ющаго в чи́стых ду́сех Сло́ва, му́драя,/ осия́ла бо еси́ ты воздержа́ния мно́гими боле́зньми души́ твоея́ добро́ту, пресла́вная.
Припев: Преподо́бная ма́ти Синклитики́е, моли́ Бо́га о на́с.
Плоть умертви́ла еси́, обагре́нную есте́ственною благода́тию боле́зньми мно́гими,/ уясня́ющи па́че све́том доброде́телей душе́вный о́браз,/ све́тло сия́ющий.
Сла́ва Отцу́ и Сы́ну и Свято́му Ду́ху.
Вещь телесе́ души́ твоея́ ко Христу́ жела́нием распали́вши,/ ты ны́не,с невеще́ственными невеще́ственно вои́стинну А́нгелы сра́дуешися,/ Бо́га смотря́ющи.
И ны́не и при́сно и во ве́ки веко́в. Ами́нь.
Богородичен: Главы́ сокруши́ Глава́ благочести́вых, Всечи́стая,/ стру́ями ны́не гнездя́щихся змие́в,/ Рожде́йся из Твоея́ утро́бы без се́мене вои́стинну.
Песнь 6
Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Припев: Преподо́бная ма́ти Синклитики́е, моли́ Бо́га о на́с.
Просвети́вшися заре́ю духо́вною,/ вся́кое наслажде́ние отри́нула еси́ плотско́е, я́ко но́щно,/ до́брых бо уязви́лася еси́ жела́нием.
Припев: Преподо́бная ма́ти Синклитики́е, моли́ Бо́га о на́с.
Облиста твоя́ светоно́сная днесь па́мять,/ издале́ча просвеща́ющи душ омраче́ние,/ мона́хов подвиза́ющихся удобре́ние.
Сла́ва Отцу́ и Сы́ну и Свято́му Ду́ху.
Чистоту́ де́вства соблюла́ еси́, почита́ющи черто́г нетле́нный:/ Христа́ бо жела́нием разжегла́ся еси́,/ стра́ннаго Жениха́ твоего́.
И ны́не и при́сно и во ве́ки веко́в. Ами́нь.
Богородичен: Да сла́вы испо́лнимся,/ прии́де в безсла́вное челове́чество сла́вы Госпо́дь./ Я́коже челове́к, мы́емь,/ Твой Сын челове́ки просла́ви.
Песнь 7
Ирмос: Богопроти́вное веле́ние/ беззако́ннующаго мучи́теля высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.
Припев: Преподо́бная ма́ти Синклитики́е, моли́ Бо́га о на́с.
Зле умышля́я, сопроти́вный души́ твоея кре́пость умягчи́ти неду́гами покуша́шеся,/ и И́ова прирази́выйся терпе́нию, му́дре боле́зньми отража́шеся,/ твои́м терпе́нием, му́драя, уязвля́яся.
Припев: Преподо́бная ма́ти Синклитики́е, моли́ Бо́га о на́с.
Твоя́ ны́не уклони́ся от треволне́ний жития́ к благоути́шному душа́ приста́нищу,/ бога́та су́щи добро́тами в Боже́ственных пребыва́ниях, му́драя,/ иде́же проугото́вися твои́м терпеливострада́нием мно́гим поко́ище.
Сла́ва Отцу́ и Сы́ну и Свято́му Ду́ху.
Му́дре наста́вила еси́ во о́бщем житии́, ме́сто, глаго́лющи, измени́ти никогда́же,/ вели́ких бо хода́тайственно воздая́ний терпе́ние,/ словесы́ же и делесы́ по́льзовати мона́шествующия вои́стинну не облени́лася еси́.
И ны́не и при́сно и во ве́ки веко́в. Ами́нь.
Богородичен: Водно́е естество́ от греха́ мя измыва́ет/ Рождества́ Твоего́ па́че естества́ му́дростию,/ Бо́га бо очище́ние, Творца́ све́та, очища́ет, Богоневе́сто,/ мно́гими оскверни́вшагося, Де́во, согреше́ньми.
Песнь 8
Ирмос: В пещь о́гненную ко о́троком евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода,/ и превозноси́те во вся ве́ки.
Припев: Преподо́бная ма́ти Синклитики́е, моли́ Бо́га о на́с.
На земли́ живу́щи, к земли́ блаже́нных вои́стинну дости́гнути вожделе́ла еси́,/ иде́же чи́ни А́нгельстии, преподо́бных и по́стников, дев, живу́ще,/ ве́чно песносло́вят Христа́ во ве́ки вся.
Припев: Преподо́бная ма́ти Синклитики́е, моли́ Бо́га о на́с.
Добро́тою естества́ лу́чши мно́гих су́щи, о души́ попекла́ся еси́,/ я́ко вид добро́ты душе́вныя му́дре сохрани́вши,/ те́мже добро́ту теле́сную угаси́вши,/ распали́лася еси́ воздержа́нием души́ твоея́.
Сла́ва Отцу́ и Сы́ну и Свято́му Ду́ху.
Бодр ум к Бо́гу преусе́рдием душе́вным ты стяжа́вши,/ ко́зни льсти́ваго мудреца́ злых до конца́ успи́ла еси́, сла́вная,/ и ны́не, у́спши, живе́ши во ве́ки.
И ны́не и при́сно и во ве́ки веко́в. Ами́нь.
Богородичен: Обнови́ти земны́я Сын Твой восхоте́в,/ ко Иорда́ну я́ко Челове́к тщи́тся, Чи́стая, кра́йния ра́ди любве́:/ та́мо бо всех сокру́шшаго сотре́, обновля́ет моли́твами Твои́ми мир.
Песнь 9
Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.
Припев: Преподо́бная ма́ти Синклитики́е, моли́ Бо́га о на́с.
Уясни́вшися добро́тами де́вства, сла́вная,/ тебе́ саму́ю украси́ла еси́ венце́м воздержа́тельнаго жития́,/ те́мже сугу́бым венце́м венча́ тя стра́нный Жени́х твой,/ Его́же уязви́лася еси́ ты любовию.
Припев: Преподо́бная ма́ти Синклитики́е, моли́ Бо́га о на́с.
Наде́жда не посрами́, Синклитики́е, тя, всечестна́я, бу́дущих,/ ю́же име́ла еси́ в се́рдце твое́м:/ ны́не бо прия́ла еси́ боле́зней воздая́ния от Спа́са,/ за я́же воздержа́ния всяк вид прешла́ еси́.
Сла́ва Отцу́ и Сы́ну и Свято́му Ду́ху.
В кре́пость и утвержде́ние, честна́я, Христа́ оде́ялася еси́/ и в зе́млю ты киче́ние пони́зила еси́ глаго́лавшаго на Высоту́ непра́вду./ Те́мже тя венце́м побе́ды украси́ побе́ды Пода́тель Иису́с.
И ны́не и при́сно и во ве́ки веко́в. Ами́нь.
Богородичен: О Тебе́ пра́отца паде́ние кре́пость прия́т,/ поити́ да́льше кре́пости не иму́щее:/ Креще́нием бо Сы́на Твоего́ вся́ка зло́ба ны́не погрузи́ся./ Те́мже вино́вну Тя очище́ния пропове́даем.