Луцидариус

Книга именуемая Лусидариос сиречь златы бисер⁶²⁷

Любезны читателю! Читаючи сию книгу внимай прилежно; в сей бо книге прилежат нам разумети откровены от века предивная дела божия, яже Он всесилны Творец премудростию своею за едину благость от небытия в бытие приведе. Сего ради достоит нам Его Творца своего благодарити, яко вся, яже зрят очи наши на небеси и на земли, сотвори нас ради, и о сем нам потреба знати. Он всесилны Творец объяви триипостасное свое божество еще в ветхом завете, яко же пишет пророк Давид: Словом Господним небеса утвердишася и Духом уст Его вся сила их. Имеяй разум по сему может познати⁶²⁸ ... сие слово ясно и откровенно показа ... единаго Бога. Прелюбезны читателю! В сей книге дивная нам дела Божия показаны. Сего ради подобает нам писания прочитати со вниманием, прося всемогущаго Бога о помощи, да нам по своей благости дарствует не токмо читати, но и разумевати глаголемая.

Глава 1. О безначальном божестве.

Глава 2. О сотворении небеси и земли.

Глава 3. О свержении диавола с небеси.

Глава 4. О сотворении ада.

Глава 5. О сотворении верхнего ада.

Глава 6. Како небо сотворено.

Глава 7. О светлом облаке, прежде солнца сотворенном.

Глава 8. На коем месте Адам сотворен; в ней же и о Еве.

Глава 9. Где есть ад?

Глава 10. Како Адам был в раи?

Глава 11. Како бы человеком родитися до преступления Адамля, в сей главе, сколько было лет Адамовых?

Глава 12. О убиении и о летех Авеля.

Глава 13. О Енохе, обретшем писаниа.

Глава 14. Кто первы царь по потопе?

Глава 15. О устроении сего мира вселенныя.

Глава 16. Како земля стоит?

Глава 17. О источнице водном.

Глава 18. О разделении мира на три части и о родех.

Глава 19. О зверех и о змиех.

Глава 20. О единороге.

Глава 21. О земли Индийской и Персии.

Глава 22. О земли Месопотамии и о Аравии.

Глава 23. О другой части сего мира.

Глава 24. О третие части сего мира.

Глава 25. О островех и о морях и что в них.

Глава 26. О разделении мира.

Глава 27. Кое естество имать вода?

Глава 28. О мори.

Глава 29. Отчего бывает земли трясение?

Глава 30. Како земля зевает?

Глава 31. О западнем крае вселенныя.

Глава 32. Еже слышатися в мори, аки собаки лают.

Глава 33. Откуду приходит студеность.

Глава 34. Како солнце в зиме высоко течет, а в лете нижайше?

Глава 35. О людех, иже нарицаются антипедес, которыи под нами.

Глава 36. Како солнце течет?

Глава 37. О звезде утренней и о вечерней.

Глава 38. О утренней звезде.

Глава 39. Колко суть планет?

Глава 40. Какова есть естества звезды небесныя?

Глава 41. О луне.

Глава 42. О луне, еже полна бывает.

Глава 43. Еже како солнце за луною течет.

Глава 44. Еже видим черность в луне.

Глава 45. Како луна пременяется?

Глава 46. О звезде комите.

Глава 47. Како видится, еже звезды падают с небес?

Глава 48. Како гром бывает?

Глава 49. О градном камени.

Глава 50. Откуду приходит снег?

Глава 51. О дожде крававом.

Глава 52. Еже дождь черви от воздуха дождит.

Глава 53. Отчего суть на облацех дуга четверовидная?

Глава 54. О источниках, еже в лете студены, а в зиме теплы.

Глава 55. Чесо ради море солоно?

Глава 56. Откуду приходит роса и иней.

Глава 57. О людех кроткиих нравом.

Глава 58. О зверех и скотех.

Глава 59. Во много ли дней детище во утробе женстей воображается в совершенство?

Глава 60. Како младенец во утробе матерней питается?

Глава 61. Где желание мужское сотворено?

Глава 62. Откуду власы растут?

Глава 63. Откуда растут нохти?

Глава 64. Како люди в старости власами седы бывают?

Глава 65. О дивных вещех.

Глава 66. О душах праведных, како имут конец.

Глава 67. Колику благодать имети будут святии ангели?

Глава 1. Како жити христианом и хранити заповеди?

Глава 2. О убиении Каинове.

Глава 3. О священстве.

Глава 4. О уставе в божественной церкви.

Глава 5. О первом часе и о третьем и о девятом.

Глава 6. Еже прежде грешную душу в раи введе.

Глава 7. О вечерне.

Глава 8. О утрене.

Глава 9. Чего ради Отче наш глаголем?

Глава 10. Чего ради колокола?

Глава 11. О литоргии.

Глава 12. Которы люди без страха стоят во время святыя литоргии.

Глава 13. О страдании Христове.

Глава 14. О литоргии, еже не поем в пяток.

Глава 15. О кресте.

Глава 16. Како Христос на кресте пити просил.

Глава 17. О великой субботе.

Глава 18. О крещении.

Глава 19. О апостолех, в кое время крещены.

Глава 20. О приношении в церковь.

Глава 21. О милостыни, еже нищим давати.

Глава 22. О Христове воскресении.

Глава 23. О празднестве Воскресении Христови.

Глава 24. О уготованных местех.

Глава 25. О помяновении умерших.

Глава 26. О аде и где место его.

Глава 27. О адских муках.

Глава 28. О диавольских людех.

Глава 29.

Глава 3О⁶²⁹ ...

Глава 31. Могут ли святии видети грешных в муки?

Глава 32. Молятлися души святых за живых человек?

Глава 33. О святых душах.

Глава 34. Могут ли души являтися спящим.

Глава 35. О сонии.

Глава 36. О антихристе, где родится.

Глава 37. О младенцах, иже мертви рождени.

Глава 38. О Иудеох.

Глава 39. Какова будет тварь по судном дни?

Глава 40. О будущей радосте (святых).

Любезны читателю! Зри в сей книге многие откровения и велия показанная нам дела всесилнаго Бога, всеусердно Его Творца выхваляя.

* * *

Книга глаголемая Лусидариос, в ней же предлежат различная нам учителства: иже бо во иных книгах что обрящем сокровенно, в сей же книге положено откровенно; иже кто хощет охотно читати, сия книга всякую предлежащую себе мудрость ему покажет; и что внимания в повестех, где положено сокровенно, зде же в кратких словесех зело лепо объявися.

Глава 1. Бог искони и всегда без конца, иже есть начало сея книги, аминь.

Учитель и ученик глаголют вкупе. Ученик той есть всяки человек, кто премудрости хощет, призывая всесилнаго Бога, безтрудно обрящет; а Святы Дух есть учитель, той нас утвердит, да сохраним правую истинную веру и всякия доброполучныя вещи уразумеем, яже есть во многих речах сокровенны и неудобно рассудительны словеса суть, покажет нам предвечная премудрость вся сия познати, иже без труда мир сотвори и нас вечней мудрости научи.

Ученик вопроси: Которы мудрости научи?

Учитель рече: Яже в Бозе три имена суть: Отец и Сын и Святы Дух, и яже три имена истинный Бог есть. То бо есть мудрость высшая нам над всякою мудростию, еже мы Содетеля своего познахом в Троицы единого Бога и Троицу во единице.

Ученик. Како может едино божество на три разделитися?

Учитель. В солнце есть светлость луча и теплота; и есть убо едино солнце: во триех купно едино суть и нераздельно. Такоже сия имена три едино истинно суть, и где убо есть Сын, тамо есть и Отец и Святы Дух.

Ученик. Сице сие три имена николиже могут разделитися? Егда Сын человечество восприят, не восприят же ли убо Отец и Святы Дух?

Учитель рече: Егда мы солнце зрим, по сему можем то разумети, како то освящения ради положено есть нам. И якоже солнце никтоже может разделити, сушимся бо мы от теплоты его, такоже имеем свет от луча и зачатие от светлости, и сия убо три суть едино вещь солнце, такоже есть и сие ради сих трех имен. Во святем божестве Отец посла Сына и Сын восприял человечество, от Святаго Духа бе зачат. Тако суть сия три имена своих ради делех разделении один от другого.

Ученик рече: Что есть в писании слышим сие, еже Бог на всяком месте есть и убо (ни) от единого места не умалится?

Учитель глаголет: По сем разумей: еже аще аз глаголю, то есть слышитца во всякого человека ушасех; но то отчасти разделяется равне; тако есть и божество на всяком месте.

Глава 2. Ученик. Поведал ми еси о Творце, да слышу от тебе еще, повеждь ми о сотворении небеси и земли и о делех всесилнаго Бога, яже в них сотворил.

Учитель глаголет: О Бозе не дерзнем дале глаголати, да не у Него вложитися имамы (в) великое сумнение, егда сугубая словеса слышати и не разумевати, яже Бог искони и всегда без конца сы и прежде сый.

Ученик вопрошает: Бог един ли бе прежде, неже сей мир сотворил?

Учитель отвещает: Не един, но сотворение мира бе с Ним.

Ученик. Чего ради сотвори Бог сей мир?

Учитель. В Бозе суть три естества: область, мудрость и велия благость; сего ради сотвори Бог сей мир, да те три естества вкупе привлечет: своею областию сотворил, своею мудростию украсил, своею благостию утвердил.

Ученик. Где стояше сам Бог, прежде неже мир сей сотворил?

Учитель. Тогда не бе ино, кроме тмы, яже именуемо хаос, слияние, зане тогда быша четыре составы вкупе слияни. Хаос убо толкуется глубина, или яма, или слияние, или мрак, или слияние вещей, сиречь, или в немже вся быша слияна и смешена. И от того вся, по глаголанию Хугонову, Папия убо глаголеть: хаос грецы глаголют естество небеси и земли слияно, или протолкуется есть дубрава; и глаголено есть сице первочинное естество сущ... еже нецы зовут дубраву, нецыи возможение, нецы промеж нечто и ничто, нецыи промеж некоих и никоих существом, нецы приятелище всем образом, нецыи тело бестелесное и иными имены философи пишут, аще взыскуеши; или есть нечто, сего не попущаем, но есть промеж нечто и ничто, глаголет⁶³⁰... яко, ничто видяще, видим тму, и ничто слышавше, слышим молчание, сице нечто разумевающе разумеваем; или отнюдуже Иустин рече: егда нечто безобразно восприемлем, прежде ничтоже разумеваю.

Ученик вопрошает: Кои беша те четыре составы?

Учитель. Сии быша: огнь, вода, воздух, земля.

Ученик вопрошает: Что сотворил всесилны Бог всего прежде?

Учитель. Небо и землю, по сем тварь всего мира и после всех человеков. И предаде ему во область вся видимая мира сего и постави его владыку и обладателя и раи даде ему и вся покори под нозе его и ничтоже остави ему не покорено.

Глава 3. Ученик. Како именовася первы ангел?

Учитель. Сотоноила, егоже столь благолепно сотвори всемогущий Творец, еже он прельстился от своего великаго мнения и бе свержен за гордость с небеси в преисподний ад со всеми единомышленники своими.

Ученик вопрошает: Коль долго диавол был на небеси?

Учитель. Не бе более, токмо полчаса.

Ученик вопрошает: Почто сотворил его Бог, егда известно быша, яже он пастися имать?

Учитель. Того ради, да избраннии ангели тем утвердятся, понеже егда диавол свержен, тогда друзии ангели быша толь тверди в любви Божии, еже не можаху уклонитися. Сего ради, егда Денница и его воинство отпадоша, тогда еще не ведаша ангели о аде, а егда познаша, в какову нужду диавол прииде от силы Божия, тогда убояшася Бога и познаша от того, еже благодатию они быша, и тако Бога воспомянуша; сего ради сохраниша на месте, велию область хваляще.

Глава 4. Ученик. Когда бе ад сотворен, понеже и о сем потребно знати?

Учитель. Ад сотворен от Божия области в той час самы, егда диавол помыслил противу Бога сести.

Ученик. Где есть ад?

Учитель. егоже мы именуем преисподний ад, то есть на конце земли, на некоем месте, идеже мрак и тма, и никтоже живых человек тамо итти может.

Ученик. Каков есть ад?

Учитель. Есть вверсе узок, а доле широк и глубок; никтоже весть меры, токмо Бог един, яко книзи поведают нам, яко некия души, от века тамо впадше, и не обретоша еще дна.

Ученик. Коль имать многа ад имена, и что именуют?

Учитель. Ад именуется во святом писании ров смертны, еже знаменует озеро смертное, занеже души, которыи тамо внидут, никако могут изыти. Еще именуется озеро огненное, зане яко камень на дне морской бездны никакоже осушится, сице непрохладятся никии же души, тамо влазше. Именуется еще земля тмы зане путь, иже ко аду идет, той есть полн всегда дыма и смрада. Еще именуется земля забвенная, яже знаменуется земля забытная, зане души, тамо входящия, погибоша и пред Богом никогда не будут поминовени. Именуется еще тартар, еже знаменует мучение, зане тамо есть на всяко время плач и скрежет зубом. От студени именуется еще геенна огненная, еже здешний огнь стень знаменуется противу тому геенскому огню. Еще знаменуется кребус, еже знаменует змий дракон, понеже ад полн есть огненных драконов и червей, котории никогда же умирают. Еще знаменуется варатрум, еже знаменуется черное зинутие ... понеже он зину, яко да от юных дней како бы души человеческия пожрети могл желает. Именуется еще блато или стикс, еже знаменует без веселия, зане тамо есть вечное безвеселие. И именуется еще Ахеронта, еже знаменует огненную пещь, понеже тамо диавол летает вон и внутрь, яко удица из пещи. Еще именуется Флагетон от некия реки, иже подле тамо течет и смердит от смолы и от серы горючие и толь есть студена, иже всю адскую горячесть пременяет.

Глава 5. Ученик вопрошает: Где есть верхни ад?

Учитель. На некоем месте земли яко на высоких горах и на островех при мори, идеже горит сера и смола; и тамо сущие души мучутся, кои тамо спасени имут быти⁶³¹.

Ученик. Како небо сотворено?

Учитель. Святое писание именует небо твердь. Небо есть, отнележе сотворено, на всяко время течет от востока на запад, емуже сопротиво текут солнце и луна и звезды.

Глава 6. Ученик. Откуду сие есть, яже мы зрим убо солнце и луну от востока противу запада текущих?

Учитель. Но сие бывает от небес, понеже небо есть толь сильно, яже солнца и луну и звезды с нощию назад влечет, а понеже те по правде идеже идет на камень противу колеса⁶³².

Ученик. Чего ради сотвори Бог тако?

Учитель. Того ради, да небесное творение не сокрушится, яко да не сокрушаются солнце и луна и звезды супротиво с небом; сице бо течет оно велми, еже сокрушити то.

Ученик. Како то есть, еже небо беспрестанно течет?

Учитель. Под небесем есть не едино сотворение идеже оно на версе стоит понеже оно есть кругло и велми всемощно, яко Бог сам тако сотворил даже беспрестанно тещи имать и не может стояти.

Ученик. Каково есть небо?

Учитель. Небо, еже мы именуем твердь, то есть сотворенно от четырех составов, есть подобно видом воде.

Ученик. Колико суть небес?

Учитель. Небеса суть трои. Едино есть от земли даже до луны; второе есть от луны даже до звезд; третие, именуемое огненное, на том Сам всесилны Бог со всеми небесными силами.

Ученик. Что же меж земли и небом?

Учитель. От земли даже до луны суть лукави дуси; те нам пакости деют, приемлюще тело от воздуха. От луны даже до звезд есть воздух велми огнен; тамо поставлени святи ангели хранители человеков от диаволскаго ухищрения.

Глава 7. Ученик. Солнце в четвертый день сотворено; кой свет был тогда, прежде неже солнце сияло?

Учитель. Нецыи учителие глаголют, яже Бог зело светел облак сотворил бе, от негоже просветлен бе.

Глава 8. Ученик вопрошает: Где бяше Адам сотворен?

Учитель отвещает: На месте, нарицаемом Ефрон⁶³³; по изгнании же из рая на том умре и погребен бысть, и наполнися та яма, от негоже он создан. Егда же сотворен бе Адам, тогда введен бысть Богом в рай, и даде Адам всем вещем божиим имена, яже суть сотворени.

Ученик. Где суть Евва сотворена?

Учитель. В раи от ребра Адамова.

Глава 9. Ученик вопрошает: Где есть рай?

Учитель. Рай на востоце в мире и прилежит близ небеси, яже есть выше всея земли.

Ученик. Может ли кто тамо дойти?

Учитель. Невозможно, понеже тамо облежат великия горы и чащи лесныи и мраки и мглы.

Глава 1О. Ученик вопрошает: Коль долго был Адам в раю?

Учитель. Несть боле, токмо два часа.

Глава 11. Ученик вопрошает: Како бы человецы раждалися, аще бы в раи были пребывати?

Учитель. Яко руце вкупе лежат без похоти и греха.

Ученик. Коль долго жил Адам?

Учитель отвещает: Девятьсот и тридесять лет; тогда умре во Иерусалиме и погребен бысть в Ефроне⁶³⁴.

Глава 12. Ученик. Коль был стар Авель, убиенный от Каина?

Учитель. 30 лет убиен от брата своего Каина в Дамасце.

Глава 13. Ученик. Кто первы на земли человек, иже писания обрете?

Учитель. Писания обрете той есть Енох.

Ученик. Кто прежде всех числа в писме?

Учитель. Той бе Иовил или Иогел, сын Ламехов и Адды, жены ево. Той имеяше брата, иже нарицашеся Иовал или Юбал; той обрете прежде всех хитрость пения и гуслей. Третий брат бе Тувал от второй жены Ламеховы Селны, иже нарицашеся Фовел; той прежде обрете хитрость ковати медь и железа. У сиех триех братов бе сестра именем Неания или Ноема; сия обрете хитрость точива.

Глава 14. Ученик. Кто первы царь по потопе?

Учитель. То бе Мелхиседек, егоже латыни глаголют быти Сима, сына Ноева; но бытейская книга о сем цари явственно пишет, яко Мелхиседек царь бе, а чей сын, о сем не писано; а церковь божия о сем Мелхиседеце тако мудрствует, яко сей от кого рожден, никтоже весть.

Ученик. В кое время люди разделишася с частию их?

Учитель. При цари Мелхиседеце разделишася на три части: от Сима изыдоша свободни, от Афета воини, от Хама хлапии.

Глава 15. Ученик вопросил: Повеждь ми о устроении сего мира вселенныя.

Учитель. Мир сей около облиян водами, сиречь морем вокруг, а земля в водах морских силою божиею устроена посреде и плавает на воде, яко желток в яице, но не может двинутися, понеже ни на чем же стоит и никто ее, кроме силы божия, не держит, якоже пишет рождение Дамасково Иоанн: утвержеи Бог ни на чем же землю и повесивы неодержимую тяготу на водах.

Глава 16. Ученик. Како земля ни на чем же, а не может поколебатися, сие мя ужасает слово?

Учитель. По сему разумей: Богу вся суть возможна, и по мысли дела Его: како Он исперва словом своим от небытия в бытие вся, яже зрят очи твои, приведе. Тако разумей и о земли: како стоит ни на чем же и никто ее не держит, кроме силы божия; под землею же из моря в жилы идут многи воды, и от того бывает волгла; сие же сотвори вся всесилны Бог силою своею.

Глава 17. Ученик. Како сие зрим, откуду исходит источник водны?

Учитель. Егда воды из моря текут под землею в жилы земные, да егда жилы конец возмут, тогда проразится вода вон наверх земли и течет беспрестани паки до моря, отнюдуже прииде.

Глава 18. Ученик. Како мир сей разделися?

Учитель. Сей мир разделен на три части. Едина часть идет посреди вселенныя и столь горяча от солнца, яко невозможно тамо человеком пребывати; и по второй части обитания и жития человеком несть же, понеже тамо никогда сияет солнце, и тамо мраз, студь зелная; в третией же части вселенныя житие человеческое.

Ученик. Како есть сия третия часть разделена, на нейже мы обитаем?

Учитель. На три же части, иже нарицаются первая Азия, вторая Европа, третия Африка.

Ученик. Что есть в сей первой части мира?

Учитель. Азия, в нейже восходит солнце⁶³⁵, а от рая же исходит источник един, из того источника текут четыре реки: едина нарицается Фисон, егда же изыдет из рая, тогда зовется Гангия ...; вторая река Геон, егда же изыдет из рая, нарицается Нил; третия Тигр; четвертая Евфрат.

Ученик. Идет ли вода та по раю?

Учитель. Те воды зело велики идут из рая; те воды испорьтили велику часть мира во вселенней, якоже поведают нам книги. Та вода в раю течет под землею, и егда из рая истекут, прошибутся наверх земли.

Ученик вопрошает: Повеждь ми, где те реки истекают?

Учитель. Река Гангия истекает в Индии из горы, нарицаемой Артабар, и течет к востоку в индейское море. Вторая река Нил или Геон истекает из горы, нарицаемой Атлас, зело быстро исходит и течет в два источника по морской земли и по египетской даже до Александрии; и впала сия река в великое море. А Тигр и Ефрат вытекли в Армении из горы, именумой Пархарата, и текут обе в великое море.

Ученик. Которая земля прилежит раю всех ближе?

Учитель. Якоже святыя книги поведают, еже до рая человеку, сущу во плоти сей, доити невозможно того ради, понеже облежат великия горы и чащи лесные; подле сих лесов великое поле широты и долготы презелной; на том поле много превеликих драконов и иных лютых зверей; по том начнется ближе всех к тем местом края земли Индии: в той земли великая река Индус, еже изыде из горы Кауказовы⁶³⁶ и течет в Чермное море; в тое землю зело трудно доити человеком, понеже на единой половине великое море, а на другой река превеликая Индус; и прилежит ко границе великое поле, яко невозможно преити по нему в четыре лета; в той же земли есть остров Капрофанес⁶³⁷ на море в пучине, и той остров во весь год однак зелен.

Ученик. Удивления достойно, чесо остров тако всегда зелен.

Учитель. Сего ради, (яко) понеже воздух рая блаженного зело благ и велми благоуханен; той воздух осенением ветреным те древеса тако дивно устрояет⁶³⁸... И той остров первы к раю близок. – Еще в той Индийской земли два острова: един нарицается златы, а другии сребреный; тамо на всяки год бывает два лета и две зимы. Подле тех островов златая гора, взяти же того злата человеком (нельзя) понеже жируют близ драконы и фригалы⁶³⁹ лютии. В той же земли Индиской превысочайшая гора Каспинус; по ней зовется море Испанское; промеж того моря и горы той велики царь Александр заморовал два племени людей злых, нарицаемых Гог и Магог, ибо зело погании: ядят бо сырое всякое животное и зверие полъзующие змии и гады. В той же земли Индиской три великия горы: Гаралинус, Кроартра, Острас⁶⁴⁰ и древеса на них толь высоцы, еже сожигаемы воздухом. В той же земли Индии человецы есть высотою дву лакот; бьются с жюровлями; жены же их раждают детей токмо три лета и не живут боле осми лет. Те люди садят перец; и егда растет, тогда бел, и та земля полна змиев малых; и егда приидет время той перец збирати, и те люди зело хитро сотворяют некий дым и тем прогоняют от себе змиев; и от того дыма очернеет перец.

В другой Индии есть люди, зовомые макрови⁶⁴¹, высотою 12 лактей, и борются с нагуи или рещи со фригалы; тот зверь подобием, аки лев, имеет крыле и нохти, яко орли. Близ той страны страна, в нейже люди, нарицаемыи Рахманы и Агроти⁶⁴², те люди имеют неки огнь и что хощут, им истребляют.

Тамо есть люди, сами убивают сродников своих состаревшихся; и егда своих отцов и матерей ядят, тогда зело радостный пир сотворяют, а кто званы не приидет, того имеют за злаго человека.

Тамо есть люди, иже ядят сырую рыбу и пьют солоное море.

Тамо есть люди, или рещи, звери, понеже токмо имеют глас и зрак человеческий, но и то злообразно: развращеннии бо суть в разные злообразные прирождения; и аще едина с нами естества, не мню, понеже дивно и ужаса исполнено видети есть; понеже в них противо нашему целомудрию отнюдь ничтоже видится, и буде по истиние нашего прирождения, то како в толики различныя и злообразныя виды и в породу откуду отлучися им тако быти, понеже созда Бог человека перваго Адама и от того вси подобие его в роды произыдоша, о сих же не ветхая Бытия книга что нам возвести, и инии святи божественные книги.

1) Род тех людей, имже пяты превращени, и ходят тылом впредь, имеют по 18 перстов у рук и у ног, тоже и главы у них песьи и нохти, и ноги кривы и велицы, имиже бьются со зверми и лают, яко пси.

2) Род тамо: близ их есть некия жены; егда раждают еще детей, тогда сивы, а егда состареются, тогда будут черны и будут велми стары.

3) Род тамо есть близ жен, еже раждают во едино время 15 детей.

4) Род тамо есть люди зовомые аркамисии и монокули, имеющии едино око.

5) Род тамо есть люди, именуеми сиклопеси⁶⁴³ имеют токмо по единой нозе и рыщут борзее птичия летания; егда же сядет или ляжет, тою ногою от зноя и от дождя закрываются.

6) Род тамо же есть люди безглавнии, имже очи на плечах, и место уст и носа имеют на персех две диры.

7) Род таможе есть люди в велицей реце Гангии, иже из рая течет; те люди имеют овощия, иже из рая пловут, и из тех овощей питаются живыми ядрами, а иныя пищи не требуют; и те овощи велми осторожно у себе блюдут того ради, понеже они зело боятся злосмрадного всякого обоняния, и теми благоуханными райскими овощми от всякого смрадного обоняния защищают живот свой; аще ли которы из них обоняет какую злосмрадную вонь, а тех помянутых овощей при себе неимея будет, то вскоре и жив быти не может, яко рыба на суши.

Ученик. Удивления зело великаго достойны сии прежде писанные люди, или рещи, некая животна, понеже они толь злообразны и люти мне мнятся во слышание, како иным людем сея вселенныя зла не чинят.

Учитель. Сие всесилныи Бог силою своею и мудростию тако устроил, еще не могут те люди видети нас, разделил от нас водами и горами, даже вкупе снитися не могут.

Глава 19. Ученик. Котории зверие в тех (?) посреде тех людей есть ли?

Учитель. Тамо есть велицы змиеве, зовомии слонги и линтыворь и суть толь велицыи преди воспомянутых людей пожирают и зело быстры плавати по морю.

В той же земли есть зверь люты сентотроха, глава и тело аки конь и имать копыта елени, голени аки волове; такоже и роги; уста имут великии даже до ушей, и во устах токмо един зуб велий; глас человець имуть.

В той же земли есть зверь, именуемы всякал⁶⁴⁴ бе; видом, яко меска, и коеждо ухо его длина сажени и бьется ими со зверми, и егда бьется однем ухом, а другое положит на хребет; потом другим бьется, а прежнее изложит на хребет.

В той же жизненно индиской земли есть животно, именуемо лантикус видом яко лев, глава же стоит подобна человеку и борзо без умаления противу птицы. Туже близ волы имеют толко по три ноги.

Глава 2О . Таможе зверь единорог; главу имать, яко елень, и един имать рог длиною шести пядей человеческих и светел, аки стекло, и остр, аки меч; и то зверь зело грозен: всякого противящагося ему истневает рогом своим.

В той же земли некотории есть воднии черви длиною четырех сажен; имеют по две руки, аки человеки, и толь сильны, еже поймав мечку или иного зверя увлачит в воду и истневает.

В той же земли, близ к мерзлому морю, снег никогда не тает и толь толст де был и крепок, еже ту сущие люди сотворяют из них себе великия храмины и живут в них. Из той земли вывозят камень магнит, которы железо к себе привлачит; отнележе и камень честны адамант, или просто рещи адамас.

Глава 21. Ученик. Поведал ми о земли Индиской. Еще повеждь ми о земли Персии.

Учитель. Земля Персия вся лежит подле реки Индус, имеет определение границе своей великую реку Тигр. В той земли град Персида. Оттуду начася первое волхвование. Тамо есть камень родится песис аще кто прикоснется к нему, зжет, аки кропива; другий камень тамо силеус, иже возрастает в меру свою и отрастает вместе с луною во вси полности и ущербы.

Глава 22. Ученик. Повеждь ми о земли Месопотамли.

Учитель. В земли Месопотамли велики был град Ниневия, иже широта его и долгота едина, мера же яко мочно преити его в три дни человеку.

Тамо же град Вавилон, егоже созда исполин древни Неврот, или рещи гигант; стена же града того в толстоту 8 лакот, а в высоту 200 лактей, и врата медны; последе же от гнева всесилнаго Бога град той в вечное запустение осужден, и дано бысть ту пребывати зверем и великим змием. Прежде сих времен той град владея вселенною, но за великую гордость како всемогущи Бог суди ему быти якоже выше речеся. О гордость мертвая! Древле ты архангельских чинов денницу в демона превратила; и ныне превращаешь престолы сильных. Всему же злу виновен диавол. В той же земли именуемыя, Аравия и Сава; оттоле идет ливан, сиречь, фимиан.

В той земли гора святая Хоривь; на ней Моисей закон прия от Господа.

Тамо близ земля, нарицаемая Сирия, в той земли град Дамаск, в том самом месте жил Авраам.

В той же земли гора Ливан; из нея истече река Иордан.

В той же земли гради Осколон и Иерусалим. Иерусалим бо создан от Сима, сына Ноева; той бо по писанному разумел; первы град создася по всенародном по потопе. От сего града начинается земля Палестинская. Тамо Чермное море, и такова в нем вода светла, еже рыба, ходящая на дне, видети мощно. На другой стороне того море стоит град Египет; тамо и град Тфивеи, в нем жил святый Тирон Маврики; тамо есть гора, зовомая Кауказус; на ней живут жены, нарицаемые амазоняны толь храбры, яко против своих неприятелей храбрствуют оружием, яко воини, и свои украины защищают сами; тамо близко гора, нарицаемая Сарез⁶⁴⁵, тамо родится пренарочитый шолк; близ той горы великое поле, именуемое Иросия⁶⁴⁶, на том поле дивныи птицы, украшены пречудным перием, иже бо в нощи блистают, яко свещи.

Тамо же есть стоит превысочайшая и чюдная гора Арарат, на ней же бе ноев ковчег из такова дерева сотворен, иже не может гнити ни горети.

Тамо же прилежит страна каппадокийская, в нейже древнии кони, иже подобни быстростию летанию птицам.

Тамо же прилежит Малая Азия, в нейже град Ефес. Тамо святый Иоанн Евангелист гроб себе повеле ископати; по погребении его приидоша ученицы его и не обретоша тела ту, понеже судьбами божиими преставлен бысть, и место, идеже един всесилны весть; глаголют же о сем, яко вкупе приидет пред пришествием Христовым с Енохом и Илиею, на обличение противника божия; приимут тогда от него муку за проповедь истины и вскоре воскреснут и взыдут, яко скорошественнии орли на небо.

Тамо страна есть Фригия. Тамож превеликое Троское царство, зломерского же ради волхвования разорися попущением божиим чюдодейства и в конечную погибель осужденно, яко отнюдь тамо несть жилища человеком, но дивии зверие и змиеве тамо жируют.

Тамо же близ страна Ликеонская⁶⁴⁷ по нейже течет река великая Гермус, в нейже обретается злато и жемчуг.

Тамо же прилежит Понтиское море, в немже есть остров, зовомый Понт; таможе были послани святи Овидий и Клемент. Зде имать свою границу и конец первая часть мира, нарицаемая Азия.

Глава 23. Ученик. Повеждь ми о другой части мира.

Учитель. Вторая часть мира сего зоветця Европа, иже простреся по горам. Тамо язык Германский, Готфы; тамо величайшая гора Дунай; а от моря язык благоизбранный людие храбри Словенстии Русь; тамо же Бенряне, Чехи, Ляхи, Поляки, Боринчаны, Фриги, Микиане⁶⁴⁸, Датцы и Керентяне, Фриландия и иные многая земли. На другой земли тое ж Европы земли: Остерландия, Унгария, Боемия, Чехове, Греки; та сторона даже

до моря; и земля Домасия⁶⁴⁹, в нейже есть источник дивный, иже от него зажигаются свещи; тамо великая гора Алимба⁶⁵⁰, егоже высоты превыше облак. От тое же горы начинается Италия; тамо украины именуем: Рим, Тускан⁶⁵¹, ... Вритания и Лампартия⁶⁵², тамо Венедицыя, юже созда царь Енутус; оттоле вышла великая река Рын⁶⁵³ и течет по французской земли. Подле той реки прележат мнози велицы украины: Василиа колония, Ментисия, Страсть Борсь, Спирей. Потом нарицается Испания, к нейже прилежат широкия страны: Картаген град; иныя многия; сие Испанское государство лежит все подле море. К тому государству близ страны, еже есть Вритания, Иоплия, Иберия, Канотос; из сих стран вывозят злато.

Тамо же на западе краи мира страна, нарицаемаа Схотия⁶⁵⁴.

Тамо пришед солнце от востока скрывается; то есть место, глаголемое запад.

Тамо же близ в море остров, на немже древеса, котории растут, отнюдь не повалятся.

Тамо есть мерзлое море; в том месте толика студеность, еже тамо невозможно ни мало быти человеку.

Глава 24. Ученик. Повеждь ми о третией части сего мира, Африке.

Учитель. Африка начинается от реки великое Индус и простреся на запад даже до великого моря; в нейже великия земли, еже есть Понтопосис Керефтия и иныя земли, тамож украина Засения⁶⁵⁵.

Таможе град велики Сизантия, тамо земля Зепсус и велики град Картаген, тамо земля Гекулия⁶⁵⁶ ... тамо язык ин Гуртагерете, люди скверни, ядят лошеди и иныи звери скверныи.

Тамо есть Мурманская земля; в той земли была царица Сава, которая приходила к царю Соломону.

Тамо некий источник в день велми горяче и в нощи студен, иже в день горячести ради великой, а в нощи студености ради прикоснутися его ради или взяти от него воды никако возможно.

Тамо есть страна Ефиопская; близ тое земли есть пустыня некая полна змиев; близ тоя пустыни Велденское⁶⁵⁷ море и толь горяче, еже кипит, яко вода в котле.

Таможе превысочайшая гора Атлас, иже бо простреся над аером зело превысоко; и тамо поистинне конец мира.

Глава 25. Ученик. Повеждь ми о островех, яже в море, и что в них всесилны Бог сотворил, радостно сего слышати желаю.

Учитель. Первый остров Тиверис; близ того Крит; подле его Колхос, иже есть полн злата; потом Делос, той есть первы остров по облиянию; к нему же прилежит паран; оттуду вывозят нарочаты мраморный камень и лутчи сардис, оттуду родися сивилла; тамо же остров Силия⁶⁵⁸; на нем гора из тое горы каплет жупел, или рещи горячая сера; глаголют же, яко тамо под землею души мучимы суть.

В том же самом месте бездна морская: к тем местом аще корабль приидет, изгибнет⁶⁵⁹.

Тамо же в том месте есть Остров полн огня, и в нем стоят ковачи посреде огня, и нарицают тех кузнецов языческие книги именем сиклопес⁶⁶⁰ и те сиклопеси куют громовые стрелы; наши же християнские книги учат нас, еже те сиклопеси самые диаволы, иже хранят путь ко аду и стоят близ адских врат и мучат осужденные души человеческия.

Тамо дале от того остров неки Сардиния; в том острове бе краль Сардиниус, созда град крепок; в том острове великие волки и змиеве; в том же острове есть змия, еже пред нею никоторою хитростию человек уцелети может.

Тамо же есть трава и кто ее яст, той будет долго спати толь крепко, егоже невозможно возбудити, дóндеже сам востанет.

Тамо же источник воды, и аще больный испиет, здрав будет, аще ли так испиет, той тамо вскоре обрящется, идеже крал и сам на себя вся исповесть; тамо есть остров Багарис⁶⁶¹; тамо первы змии обретени суть; тамо предивны овцы, волна их бела дражаиши шолку, и из тое волны делают драгия царския порфиры.

Тамо же древеса именем венус, еже не гниет⁶⁶² ни горит. Тамо есть гора Авенеда, в нейже ископаша философи кладесь шестидесяти сажень глубиною, и толь мудро ископаша, еже солнце сияет на дно его.

Тамо же Венедейское море, остров пардинос чюдны и всегда зелен и благовоние имать таково, яко раи; тамо некии святи единою по божиею благоволению внидоша, ихже ризы благоухание имеяху 15 лет и вящши.

Глава 26. Учитель рече: Уже бо поведах ти, яко всемогущий Бог неизглаголанными судьбами мир разделил и вся дивная в нем сотвори.

Ученик. Превосходит ума человеческого божия чюдотворения, яже сотвори в сем мире благости своея ради. Еще повеждь ми о преждереченном, еже ты поведал ми еси, что от луны даже до звезд воздух огнен и над тем воздухом превыше вода; скажи ми, како сие устрои всесилны Бог.

Учитель. Аще и зело хощеши постигнути недоведомыи глубины судеб божиих, но не можеши болши разумети. Токмо то познавай и веруй, еже поволи нам разумети видимая сотворения своя всемогущий Бог: святое писание поведает, еже огнь никоея вещи от себе сам имать, донележе волготу обымет; тогда будет первое горяч, да имаши разумети о солнце, якоже то глубочае сияет, сице хладнее есть; и но сему познавай, еже снег на высоких горах долго лежит, а в долах глубоких скоро гибнет.

Глава 27. Ученик. Кое естество имать вода?

Учитель. Вода имать три естество: первое есть вода сама; второе, еже по ней путь плавания; третие, еже мы пием.

Глава 28. Ученик. Повеждь ми о мори.

Учитель. Море изменяет свое естество по месяцу: егда убо море растет, сице идет вон седмь дней, толико же и убывает.

Ученик. То како сие, отчего, ему бывает?

Учитель. В мори суть мнози и великии горы, в нихже есть мнози великие скважни; сими скважнями от божия области ветрами вода от дна погоняется, далече чрез стадию сопротивно идет седмь дней от бездны.

Учитель. Есть четыре ветри вышереченнии высоко ... на воздусе сразятся вместе, от того бывает в мори волнение.

Глава 29. Ученик. Отчего бывает земли трясение?

Учитель. Егда ветри внидуть в скважни под землею и паки оттуду исходити хощут, и не могут проразити вод, сице от них трясется земля.

Ученик. Како бывает земли трясение, идеже нет скважней?

Учитель. Идеже земля жестока, тамо есть на всяко время вода под тою землею высподи ... сице бывает егда та бездна водная двизается от ветров, выразитися вода жестокости ради земныя не может, тогда раздирает землю великою силою, и сице ту страну двизает.

Глава 30. Ученик. Како сие бывает, еже земля зевает?

Учитель. Слыши и разумевай! Земля есть сотворена от божия области подобна телу человеческому, понеже камени имеет вместо костей, корение древес ... вместо жил, древеса и траву вместо влас; и егда внидут ветви в подземная скважня и выразитися паки оттуду не могут, тогда терзают землю и колеблют, еже от великия силы преисподних ветров земля отверзается.

Глава 31. Ученик. Повеждь ми о западнем крае сея вселенныя, еже есть глаголется земля Силисийская⁶⁶³.

Учитель. В той украине и под землею по правде зело премноги скважни; и тамо родится жупел, сиречь, сера горячая, и та земля исполнена огня и той серы горячей. И то разумевай, яко в том самом месте на западе, под тою землею смердивою, Велиаров дом, еже есть ров смертны и ад. И то есть правда, понеже в том крае ничтоже видено благо, но токмо зловоние серы смердит.

Глава 32. Ученик. Поведают морсти корабленицы, еже слышатся близ земли той Силинской в море, яко собаки лают.

Учитель. То место нарицается Силла⁶⁶⁴ ... в том месте той вышереченны ад, в немже велики шум и смущение и страх и ужас и крик презелный. И еже слышат корабленицы и поведают, аки бы псов лаяние под водою, по правде в том самом месте ти, сиречь, бесове сквернии и злии.

Глава 33. Откуду приходит к нам студеность?

Учитель. По сему разумеется, яко теплота приходит от солнца, а студеность приходит от воды. Когда от нас удаляется в презелную далекость солнце и не могут лучи его толь сильно на нас сияти, тогда мраз и студеность; и то все творится судьбами всемогущаго Бога; и разделяется год на две части, яко в зиму и лето.

Глава 34. Ученик. Книги учат нас тако: еже солнце в зиме высоко течет, а в лете нижайше; и для чего дни зимние кратки, а в лете долги?

Учитель. Разумей, яко вселенная и сей мир вправду судьбами всемогущаго Бога сотворен кругл, аки бы рещи, подобно яблоку. Егда убо видится нам солнце вельми высоко,тогда оно течет посреди вселенныя над тою частию, идеже люди обитают, близко и вельми низко земли, да тако оно человеческому роду в лете на потребу в возращение плодов земных; и того ради и долг день тогда бывает нам. А в зиме течет солнце велми высоко на небеси во внешних частех во вселенней, идеже несть тамо жития человеческаго и от той части вселенныя, на которой люди обитают в презелной и несказанной далекости; того ради видится нам, солнце течет низко и скрывается за округлость земли, егоже мы видети ктому не можем, понеже часть сея вселенныя, на которой люди обитают, на единой стране земные округлости.

Глава 35. Ученик. Что поведаеши о людех, иже нарицаются антипедес, которые под нами и имеют ноги свои простерти супротив наших?

Учитель. Земля есть вправду, якоже сказах ти, кругла, и те люди под нами, и ноги их простерты супротив нашим.

Ученик. Како же люди ходят, а не повалятся?

Учитель. Держит их сила божия тако, якоже держит землю, да не падает, от всесилнаго бо елико хощет (?).

Ученик вопрошает: Откуду приходит нощь?

Учитель. Егда бо солнце течет над землею, тогда есть день; а егда течет под землею округлостию, тогда на нас сияти не может, тогда бо закрывает его земная толстота, и то есть нощь. Но то разумей, яко солнце безпрестанно течет и не может нимало стояти.

Глава 36. Ученик. Како солнце течет?

Учитель. Небо есть кругло, по немуже текут солнце и звезды беспрестанно, но не по единой стези, или рещи, улице; сразилибыся промеж себе, еже сокрушитися.

Ученик. Чесо ради сотвори Вседержитель тако?

Учитель. Толь далеко есть от солнца до звезд; того ради имеют звезды преболшую мощь, зане им небо велми ближайше; а еже солнце мощь имать, то последует по звездам. И то солнце имать 12 улиц на небеси, по нимже солнце преходит во един год; те же улицы именуют святи ангели 12 знамений, иже суть 12 месяцов; на всяк бо месяц проходит солнце, еже по улице течет; сие Бог всесилны областию своею нас ради тако устроил, яко текий солнце в коемждо знамени (?) сице не пременяется год никакожде.

Ученик. Аще бо солнце никакоже из двенадесятыми знамени не сходит (?), что убо мцы не все равны?

Учитель. 12 знамения стоят некия высоко, а овии ниско, таможе суть планиты выше, по тех луна, еяже урождение звезды есть, еже зело ближайше знамени течет, посему приходит месяц.

Ученик. Колико суть планит и како именуются?

Учитель. Елико есть днев недели толико есть и планит; две же служат нам наипачеже, яко солнце и месяц; прочи же пять планит текут; звезда же суть едина, нарицается Сатурнус, по гречески же Кронос, та бо течет толь высоко на небеси, еже едва в 30 лет течение свое исполнит; вторая планета Венус, по гречески же Афродита, еяже мы именуем вечернюю звезду, иже в два года свое течение совершит.

Глава 37. Ученик. Како сие случится, еже та вечерняя звезда бывает одна же утренняя?

Учитель. Некия глаголют книги, еже та планета едино лето пред солнцем, а другое после солнца течет; тот же год, егда пред солнцем течет, тогда она зовется утренняя, а егда после солнца, тогда зовется вечерняя.

Глава 38. Ученик. Которая звезда утренняя,тогда бывает вместо той, егда Афродитос бывает вечернею?

Учитель. Есть пятая планета, именуемая Марс, по гречески же Арсис⁶⁶⁵. Та есть Афродиту толь подобна, еже никто никогда познати может; некия книги тако пишут, еже та звезда (на) той невмерной высоте на тверди, еже мы ея зрим утре пред солнцем, в вечере ж после солнца.

Ученик. Повеждь ми о прочих планитах.

Учитель. Шестая планита есть Меркуриус, по гречески же Ермис, и течет 7 лет пред солнцем. Писание глаголет, еже та планита мудрость содержит; о томже последи исповесться. Седмая планита, именуемая Юпитер, по гречески же Зевес, та течет 12 лет пред солнцем и идет по планитом прочим велми превыше всех.

Глава 39. Ученик. Коль суть планиты велики?

Учитель. Луна толь широка есть, еже всю землю, кроме моря и облак покрывает. Солнце же величеством паче луны сугубо; а якоже колико солнце велико, толь велики суть прочи планиты.

Ученик. Како видится нам звезды зело малы?

Учитель. Сие тако видится от земныя высоты: да сице бы стояло и солнце столь высоко, якоже и звезды, таково же бы виделось нам мало, якоже звезды.

Глава 40. Ученик. Какого есть естества звезды небесные?

Учитель. Сие есть ведомо от писания, еже душа приходит от Бога, прежде человеком влияна бывает; сице есть Бог надо всеми звездами, яко убо душу блюдет подтверди, кая убо планета ея ближе есть, от тое убо приемлет свое рождение.

Ученик. Откуду приидет сие тако?

Учитель. Посему, понеже неки планеты или звезды суть студены естеством, некии сухи естеством а неки волглы естеством, и те самые естества приемлет человек от звезд. Который человек студеного и сухого естества есть, той молчати любит и не скоро верит, что слышит, дóндеже испытно уразумеет; которы человек студеного и волглаго естества, той, еже слышит, то скоро высказывает и многоглаголив; а которы горячего и сухого естества, той есть дерз руками и храбр и имать пожелание на многие жены и зело непостоянен в любви; сего ради писание поведает, еже планета Марс, или рещи, Арсис, горячего и сухого естества та действует брани и нестроения и истязует паче всех нечистоту, занеже коя есть жена горячего и волглого естества, та есть проста и милосерда и знатлива и зело похотолюбна.

Глава 41. Ученик. Повеждь ми о луне.

Учитель. Луна есть меншая планета и течет нижае всех планет, земля того ради разсуждается по ней мир весь.

Ученик. Повеждь ми, чего ради тако есть?

Учитель. Небесное естество есть толь крепко, еже землю одолевает; луна же толстотою есть такова, какова есть земля сице приемлет луна мощь от солнца и то разумей, еже весь мир судится по луне, понеже луна сотворена от четырех составов.

Глава 42. Ученик. Како сие бывает, еже луна скоро полна бывает и скоро ущербляется?

Учитель. Егда планеты сотвори всесилны Бог, тогда восприят луна воды много от земли; того ради не имать света по себе сама, но от солнца восприемлет; егда она близ солнца, тогда она бывает темна и отростает дотоле, донележе солнцу паки начнет последовати, тогда растет паки донеже полна будет.

Глава 43. Ученик. Како случается, еже солнце за луною по той стези, или просто рещи дороге последовати не может?

Учитель. Солнце течет не прямо, а луна прямо, занеже знамение, по немуже солнце течет един год, а луна течет во едином коемуждо месяце и в знамении, в нем же солнце, пребывает луна един день.

Глава 44. Ученик. Что есть черность, еже мы видим в луне?

Учитель. Якоже луна светление от солнца имать, тако же и теплоту от солнца имать. Егда сотворена бе, тогда восприят воды много от земли того ради, да имаши ведати поскольку ж луна восприемлет свет от солнца, сице пребывает студена едина часть в свете, и то есть черность.

Глава 45. Ученик. Поведай мне о том, како луна пременяется?

Учитель. Сие случается часто, еже солнце на некоей половине земли, а луна на другой половине, якоже луна 14 дней старостию сице станет един противу другому, яко или едину черту шествия по земли от солнца даже до луны и толь есть солнце мощно еже убо луна восприемлет его светление даже оно все кругло будет, егда оно себе пременит, тогда оно высоко на небеси стоит; сие прилучается судьбами всесилнаго Бога.

Глава 46. Ученик. Скажи ми о звезде комите.

Учитель. Комита не светь, или рещи не облистает никако; но егда царство котораго монарха великого пременитца судьбами божиими имать, тогда комита являет свое блистание; таже звезда комита не промеж тех прочих звезд, якоже писание поведает, но всемогущий Бог своею областию возжигает на воздусе, являя праведнаго своего гнева на ны пришествие, яко человеколюбец, показуя и претя нам престати нам от злом наших, да не погибнем зле, но видяще такое знамение, поведающе нам гибель, покаяния, яко ниневитяне от проповеди Ионины, и получим от Бога милость.

Глава 47. Ученик. Повеждь ми о сем, яко видится нам, еже звезды падают с небесе.

Учитель. Всемогущи Бог неизреченною мудростию своею сотвори солнце и месяц и звезды ради возлюбленнаго своего создания человека и всегда повеле им светити день и нощь и не может поколебатися солнце и месяц и звезды ниже пременити повеленнаго им шествия, но исполняют, якоже зрим по всяк год, дни и нощи и часы во всяком предивном разделени, а еже видим аки звезды в нощи с небес падают, то разумей, еже с воздуха падает искра огненная в то время, егда в презелной высоте на аере бывает великая буря и смесится воздушный огнь с бурею и сице стреляет воздушны огнь с высоты долу, растерзая силою воздух.

Глава 48. Ученик. Повеждь ми, како бывает на воздусе во время дождя блистание и гром?

Учитель. Егда четыре велики ветры по изволению всесилного Бога приидут от моря и на высоте аерскои вкупе сразятся, и от них бывает на высоте буря толь велика, еже воздух растерзается; и егда убо воздух и огнь вкупо смесится, тогда бывает на воздусе стук столь велик, еже мы слышим и на земли, и то есть гром; и егда убо воздух растерзается от огня, сице стреляет той огнь долу, еже то есть громовые стрелы; и егда те стрелы приидут на землю, обретаются видом серы, приемлюще от воздуха дебелость свою.

Глава 49. Ученик. Откуду приходит к нам градное камение?

Учитель. Егда на земли бывает великая теплота, тогда на воздусе студеность сице вземлет теплоту пару и росу с собою на воздухи и падает воздух на ... тогда ветр смесит вкупе пар с воздухом и от хладу великаго ветренного вода, еже меж ними смерзнется, и егда на воздусе ветр утишится, тогда смершаяся вода не может тамо быти нимало на воздухе, но вскоре имать зело от облак на землю падати; и то есть град. Сие же все чюдодеется судьбами всесилнаго Бога.

Ученик. Како бывает в лете град и гром, а в зиме сего несть?

Учитель. В лете есть солнце толь мощно, еже мглу и мокроту с собою на высоту вземлет на воздух, егда нам близ есть, сице имать град бысть; в зиме же солнце есть далече к нам, и земля не имать росы, такоже убо солнце толь мощно несть, ежебы волготу на высоту к себе взимати; того ради в зиме не гремит, ни град не падает.

Глава 5О. Ученик. Откуду приходит снег?

Учитель. Егда убо пара восходит на воздух и пребывает на воздусе и ветр далече проженет, и та пара отолстеет, обаче не может в камень смерзнутися, понеже тамо есть мгла посреде. Все же строится судьбами всесилнаго Бога: идет дождь и снег и град и роса и иней мраз и зной воздухом и солнцем, како же токмо едины Он всесильны Творец весть.

Глава 51. Ученик. Откуду прииде тако, еже дождь бывает кровавый?

Учитель. Егда бо солнце облистает в Чермное море или лучь пустит, и тогда море от солнечной теплоты червленую росу на воздух вознесет; и егда убо на землю падет, сице бывает дождь червлены, аки кровь.

Глава 52. Ученик. Како то бывает, еже дождь черви от воздуха дождит?

Учитель. Сице по истинне тако, еже убо воды стоящия яко во озерах великих и в областех, разумно в сем видим многие гады и черви. И егда то случается, еже солнце в те воды облистает, зело парно и толь крепко вземлет парою своею мокроту, еже малыя червячки влечет на воздух; и понеже не любит того гада на высоте содержати, и тогда скоро падает.

Глава 53. Ученик. Отчего суть на облацех дуга четверовидная?

Учитель. Егда теплота солнечная росу вземлет на воздух, сице смесится толь долго, дóндеже во облак будет; и пременяется облак по четырем составом: зеленой вид от воды, синей от воздуха, червленой от огня, бледный от земли.

Глава 54. Ученик. Чесо ради источники в лете студены, а в зиме теплы?

Учитель. Сего ради, понеже водная жилы лежат под землею, от тех жил вода истекает, и сице источники в лете и в зиме; и изменяются в лете во студеность, да нам будут от зноя на прохлаждение, в зиме же теплы. Сие все нам строя человеколюбец Бог, пекийся всегда о потребных нам; вся бо возможна ему.

Глава 55. Ученик. Чесо ради море солоно?

Учитель. Блистание с высот близ впрям от солнца в море и толь мощно, еже песок от того блистания превращается в соль.

Глава 56. Ученик. Откуду приходит роса и иней?

Учитель. Егда теплота в день на воздусе пребывает, сице вземлет студень в нощи из земли; и поженет воздух велми на землю, яко смерзнется роса и будет иней.

Глава 57. Ученик. Откуду люди кротцы нравом?

Учитель. Сие бывает от рождения женска, сиречь от существа матерня. Тучные жены раждают немощныя дети, понеже тучность стесняет существо; подобно тому которая земля наводнится, плод мал приносит; тоже прилучается, которые люди доброго существа, а ядию преизлишнею и питием (вредят) существо чад. О сем книгу Судей израилевых читай: рече бо ангел Господень к Маною в зачатии сильного Сампсона, даже ни вина и сикера не пиет и ничтоже нечисто да яст; по правде же кротцы людие бывают от существа матерня, инии же от своего воздержания множайших учения.

Глава 58. Ученик. Чесо ради животна и зверие и скот от земли от единого существа создани, такоже и птицы от воды, а ни едино подобни видом и нравом?

Учитель. Судбами всесилнаго Владыки утвердися. Животна бо от четырех стихии, или рещи составов сотворены, но убо зачинают существа неподобны другия иным; птицы начинают изомнога воздухом, и те любят летати по воздуху; иные зачинают боле водою, те паче любят на воде плавати, яко лебеди; и прочии неции зачинают воздухом множае иных, и те суть клеванию велми быстры, якоже сокол и ястреб и прочи. В животных же, яко серна и елень, нецы зачинают от огня и воды и земли, и те суть крепцы от земли и сердити от огня, якоже львы и медведи; неци зачинают боле от воздуха и от огня, и те суть быстри и гневливы, яко алебари⁶⁶⁶, и прочии некии зачинают землею и водою, и те суть тихи и лениви, якоже волове и ослы. По тем же самем стихиам или рещи составом пременяется всякий киждо человек, яко стихии восприем, и посем имать сыритися и пременяется по⁶⁶⁷ ... потом требует принимати во старости своей целбу и ищет помощи многотрудно плоти своей, юже в юности своей чем оскорбил.

Глава 59. Ученик. Во много ли дней детище во утробе женстей воображается в совершенство?

Учитель. То есть пречюднаго строителя утвердися в созданном от персти первобытном Адаме, от негоже Творца той Адам одушевленный не яко прочи зверие, создан бо разумен, имея ум, слово и чювства. Отроча же бывает зачинаемо от семени мужескаго и от существа смешшагося от всего телеси; жена же каяждо имать едину камору и в нем отроча покоитца; в той же камори те существа содержими имут быти, от нихже отроча в 7 дней соберется вкупе, седмью денми вообразится и 7-ю денми будут ему жилы и кости, в 5 дней возрастут ему власы и кожа, и тако до 40 дней приидет в совершенство.

Глава 6О. Ученик. Отроча во утробе до дне рождения чем живится?

Учитель. От женские печени исходят две малыя жилицы в тое камору, идеже лежит отроча, и из них же течет некая кровь ко устом младенца; он же ссет, и та пища толь есть мала, яко роса, исходящая от солнца.

Глава 61. Ученик. Где желание мужеское сотворено?

Учитель. В трех коморах разделено имать в себе мудрость, второе разсмотрение, третие безсрамие.

Глава 62. Ученик. Откуду растут власы?

Учитель. От брадовки, иже от стомаха идет; того ради человек студеного прирождения того власи растут велми долги.

Глава 63. Ученик. Откуду растут нохти?

Учитель. От брадовки, иже идет от сердца; того ради старейшины людсти носят на перстех златыя перстни, понеже мудрости наследие от сердца есть.

Глава 64. Ученик. Како людие во старости власами седы бывают?

Учитель. Яко младенцы родимии беловласы или русы и чермнии, тако и в совершенном возрасте и, донележе пребывают в силе и крепости, тогда имеют кровь горячю и власы неизменны, еже на вся дни юностные, донележе имать юноша в крепость; а егда же начнет человек старетися и крепость сила его малитися и теплота утробная уступати, тогда от студени начнет седети; егда же стар имать быти, тогда едва и теплыми шубами согретися имать.

Глава 65. Ученик. Поведал ми еси дивныя дела Божия, иже то сотвори; повеждь ми, како имут конец прияти?

Учитель. Человецы суть сотворени от четырех составов и никакоже конец приимут, но токмо пременяются; душа бо отъидет к Богу, сотворшему ю, плоть будет земля и идет ко своему существу, отнюдуже бе от юных дней создано.

Ученик. Повеждь ми о кончине человека.

Учитель. Писание глаголет: человек блюдом от Бога и киждо имать ангела святаго, пасуща и храняща его, такоже и злый ангел, наблюдая вся согрешения его. И егда приидет человек к концу, тогда святи ангели поимут душу его и не оставят, дóндеже поставлена будет в вечной радости повелением божиим; аще ли которы человек умрет во гресех своих, тое душу поимут злые беси и сведут в преисподний ад, и тамо будет во веки веков.

Глава 66. Ученик. Како те души мучат, иже последи которые спасени имут быти?

Учитель. Их мучат бесове, но обаче святи ангели блюдут их; егда же приглашени будут, тогда в раи будут.

Глава 67. Ученик. Колику благодать имут будут святи ангели?

Учитель. Обрящут убо души своя телеса паки, и тогда Бог подаст им красоту, седмь крат солнца светлейши, и будут силни, яко помыслят весь мир сокрушити, и толь хитры, еже нихто хитро удержати во мгновении ока имут быти, толь любовни друг ко другу, еже кто что от Бога почесть имеет, желает, чтобы всякий получил тоже, и толь имени будут велию почесть, еже их сам всемогущий Творец почтет, и вси святи ангели его имеют толику радость, еже не убоятися смерти. Такую же радость сподоби нас Боже милостивый всем получити.

Глава 1. В нейже о вещах, преданных христианом, и како комуждо от нас хранити себе, дабы от милости божия не отпасти. В сей части премудрыя вещи пре(д)лежат, сего ради потребно нам прочитати книгу сию разсмотрително.

Ученик. Поведал ми еси, како мир сей сотворен и разделен и како и конец приять имать; еще повеждь ми, от указания Святаго Духа, како святое христианство прославлено будет, и что каяждо вещь назнаменует, еже мы во вся дни видим начинаемы во святом христианстве, и како ся кончати имут, и како един кииждо человек блюстися имать, да не отлучится вечныя жизни?

Учитель. Святый Дух верных человеков научил, еже что ни начнется во святом христианстве, то имать все быти от Святаго Духа.

Ученик. Потребно ль человеку, дабы он добрая дела разумел?

Учитель. Что человек не разумеет, того и в любви не имать, сего ради да имать един кождо человек знаменование божественных дел ведати; откуду обрящет плод спасения и любовь ко всем делом божиим добрым.

Ученик. Добро-ли се мы творим, егда мы трех имен единецию призываем особы без других?

Учитель. Писано бо есть, еже Авраам святую Троицу видех триех ангел во образе, а моляще, яко единаго Бога, того ради не можем божества разделити; но егда молим святую Троицу, сице молим мы Отца и Сына и Духа Святаго.

Ученик. Аще Отец и Сын толь же святии суть, яко Дух Святый, почто Духу лишше глаголем: Святый Дух?

Учитель. Аз рекох ти, еже те три имена един истинный Бог, то сам есть Дух, якоже писано есть: Бог есть Дух; сие глаголет Бог сам, един Дух, в том знаменует нам, еже те три имена един истинный Бог.

Ученик. Аще Бог по человеке глашатися хощет, почто восприят Сын на ся человечество излише, неже Отец или Святый Дух?

Учитель. Сии три имена вкупе и то бе истинно, еже Отец Сына посла, и Сын полушлив бе Ему, а Святый Дух не восприя человечества; аще ли бы то было, были бы два Сына: един от божества, а другий от человечества.

Ученик. Егда сице Бог о человеке зело умилосердися, еже Он его изволи своею мудростию свободити, почто не свободил диавола, якоже человека?

Учитель. Того ради, понеже три вещи к тому: первая, яко беяше диавольская вина боле, неже человеческа, зане диавол сведе человека оболщением и лжею, еже он божию заповедь преступил: вторая вина, еже диавол Денница бе восхоте к Богу оклеветати человека, прежде неже человечество восприял, еже Он к чести и славе сотворил бе; третия вина диаволская, еже диавол паде от своего гордения и мудрости, а человек от неведения, понеже он того совета не разуме, еже ему диавол рече.

Ученик. Чесо ради благоизволи тако всесилный Бог, еже неизволил ничем иным человека от диаволския неволи свободити, но своею смертию, а Ему вся мощно сотворити, елико хощет; и аще бы от святых некоего человека или от ангельского (чина) послал, да той бы пострадал, избавления ради человеческаго.

Учитель. В сей вещи дивная мудрость. И потреба нам знати милость всесилнаго Бога по сему, аще некто что купит, то Он своим называет. Егда убо человек непокорения ради своего был в работе диаволской и егоже аще бы человек посланный от Бога или ангел от диаволской работы свободил, сиречь то своим бы его по правде нарек; того ради всесилный Бог не восхоте своего рукотворения ни в чьей области быти, но своей судити области, сего ради никтоже от человек может избавити, ниже от ангел. Сия бе вещь ужаса исполнена, еже Бог за человека умерщвлен бе. Такую любовь всемогущи Творец к человеку имать и смертию своею смерть умертви и диавола за человека ушкоти, еже диавол человека ушкотил или рещи оклеветал пред Богом, и человека в первенство устроив, выше ангел быти.

Глава 2. Ученик. Который первый грех по преступлении Адамли?

Учитель. Убивство, еже Каин брата уби Авеля; а в новой благодати, при святых апостолех первый грех лжа, когда Анания и Сапфира сокровища утаиша, того ради умроша; вторый грех бе симония, или рещи погибель, когда в Самарии Симон волхв восхоте за сребро у святых апостолов дар божий купити, того ради прокля его святый Петр, и ныне в том прокляти, которыи божий дар за сребро купят или продают.

Ученик. Коликими пути людие в погибель входят?

Учитель. Треми: деянием, такоже повелением, или вещеи послужением.

Ученик. Который грех болши – лихва или симония?

Учитель. Лихва есть убивство души, понеже тем человек разбойничествует, или грабит своего брата христианина; такоже бе лихва за много время заповедана прежде пришествия плотского единородного Сына божия и несть того греха лютеишии, аще человек истину умолчит и со изволением предложит неправду, той человек предав истинну за лжу, той самого Бога отверже и преда себе диаволу, понеже всякая духовная дела, яже во христианстве суть, то суть дарование Святаго Духа.

Глава 3. Ученик. Потребно ль человеку восходити или входити во священство?

Учитель. Что мы входим во христианство, то есть все духовное, и мы входим в не того ради, да умилосердимся от духовных и от нищих, и за то восприяти имамы вечную радость; ктому потреба входити впредь священства который человек божественныя чреды в сем мире разумеет.

Ученик. Нецы человецы во святые чреды входят без рассуждения и вещи вхождения того не весть.

Учитель. Поверзе некто драгий камень пред свиньею, свинья же честность камени не разумевает, но в тину порывает. Тако и во святой чреде не умолится, егда человек в нее входит, а мало разумеет; егда же кто вправду входит, такови мало обретаются, и такови мзды не лишатся, егда кто добре разумеет.

Ученик. Како сие есть подобно лжи, еже кто добраго знати не может?

Учитель. Посему, чего который человек не весть, и ведати не хощет; второе, еже человек отложит вспять себе просто чего не весть, тогда потреба ему вопрошати знающих, аще же самохотне отречется и знати доброго учения не хощет, то согрешает пред Богом и аки во тме шатается, положил бо он счастие свое в щетная дела мира сего, всесилный бо Бог даде всякому человеку разум, да познает Его сотворшаго, а не всуе нас сотворил, но на хвалу и во славу себе, и то есть злое дело человека, который может знати доброе, а самохотне уклоняется и знати не хощет, то разумей уподоблен такии свинии, иже драгии камень ногами попирает и чести его не знает.

Ученик. Аз любезно хощу слышати понеже и разумех, яко дражайшия и честнеиши сего не обретаю, еже нам доброму учитися и дела божия знати.

Глава 4. Повеждь ми чин нашего христианского жития, или рещи устав, еже действуем во святей церкви, чего ради уставлена 7-ми дневная пения, еже суть утреня, час первы и трети и шесты и девятый, вечерня с повечерием и полунощница?

Учитель. Те седмь честнейшие повседневныя пения еще в ветхом законе уставил святый царь Давыд в честь седми дарований Святаго Духа, еже седмерицею хвалих ти о судьбах правды твоея; того ради и мы хвалим Содетеля всех Бога, зряще великия дарования Его и премудрость и велию и непостижимую Его к нам благость; те бо вседневные пения в новой благодати освяти делы своими единородны Сын, Слово Божие и те 7 пения начашася устроением в Троице славимого. И кто те 7-ми дневные пения творит, то приимет воздаяние часть со избранными; а кто сего не деет, той не мнится христианин быти.

Глава 5. Ученик. Чесо ради поем первы час и прочая?

Учитель. В первый час стоял Господь наш Иисус Христос пред Пилатом и поругание и биение и плевание нашего ради спасения претерпе; в первый час явися Христос учеником своим на море в ловитве рыбной, егда воста из мертвых. И того ради поем первый час похваляем Его великую любовь и милосердие, еже к нам имея.

Ученик. Чесо ради символ, рекше исповедание веры глаголем паче иных псалмов?

Учитель. Кроме того силнаго оружия на лукавые духи несть, того ради глаголет святый Афонаси, патриарх Александрийский, иже кто хощет спасен быти, потреба ему прежде всего, да держит православную веру, сиречь, исповедание, святый символ, егоже потреба всякому верному, и целомудрием, и тем вооружитися в той день на диавола, да нас лукавы дух в той день не может лестию греховною уловити.

Ученик. Чесо ради поем трети час?

Учитель. В той час Господь наш Исус Христос, терновным венцем венчанный и бием по пресвятей главе прескверными руками; в той же самы час, якоже писано, ниспосла Духа Святаго на святые апостолы.

Ученик. Повеждь ми о шестом часе?

Учитель. В шестый час Господь наш Исус Христос нашего ради спасения на кресте распяся, да нас свободит и мучителства диаволскаго.

Ученик. Чесо ради к девятому часу звоним, а к иным не звоним?

Учитель. Великия ради святости, понеже Господь нас Иисус Христос рече ко Отцу своему: Отче, в руце Твои предаю дух мои; в той самы час копием в ребра прободен, от него истече кровь и вода, тою животворящею Его кровию свобождены мы от истления, тою водою прощение нам дадеся; той самый час пламенное оружие, хранящее врата Едема, уступи, в той час вход в рай нам отворися; в той час вниде душа разбойнича прежде иных.

Ученик. Чесо ради разбойнича душа вниде прежде иных душ святых?

Учитель. Писание глаголет: разбойнича душа в раи бысть прежде, неже сокруши Господь ада: яко, когда бе разбойник на кресте, похвали Христа, нарече Его праведником, в той самы час по неложному Христовому слову сподобися с Ним в раи быти. В тое же самую нощь Господь сокруши ада, воста от мертвых.

Глава 6. Ученик. Чесо ради всесилный Бог сотвори тако, еже грешную душу прежде тех введе в рай?

Учитель. Посему разумей неизреченную любовь Его и милость к нам, еже Он за грешные умре, да никтоже грешный великих ради согрешений отчается благодати Его, писано бо есть: уклонися от зла и сотвори благо.

Глава 7. Ученик. Чесо ради вечерню поем?

Учитель. Промеж всех дневных словословений славословим вечерню с великим тщанием ради великих пресвятых дел, еже Господь наш Иисус Христос в то самое время освящал нам свое благословение: тело и честную и животворящую кровь и умыл святым своим учеником нозе; и в то же вечернее время со креста снят и погребен; в то же самое время явился дву учеником, Луце и Клеопе, и познаша Его в преломлении хлеба.

Ученик. Чесо ради мефимон поем без времени уреченного?

Учитель. Мефимон мы совершаем, еже в день к Божии службе, и мы тем себе к Богу препоручити, дабы нас сохранил в нощи от всякого зла и смущения злолютого диаволскаго. В то самое время, егда день и нощь разлучаются, молился Спаситель толь крепко, еже капаше пот святыя плоти Его, яко пот крове, то самое время зело свято, понеже в самое то время сокруши Господь ада и изведе из него пленники; в то самое время отпусти Христос святому апостолу Петру. После утрени поем хвалы, еже знаменует наше востание.

Ученик. Чесо ради поем повечерие и на утрени два псалма: Величит душа моя Господа и Благословен Господь Бог Израилев?

Учитель. Многия иныя в церкви Божи дневные похвалы суть разделяеми на 7 частей, еже есть в начала, во антифоны, во псалмы, во главы, во отвещание, во стихи, в собрания; те седмь частей знаменуют труды наши, еже в мире сем страждем, да того ради получим милость божию.

Глава 8. Ученик. Чесо ради утреню поем на святую пасху в нощи?

Учитель. Ради сих вещей, понеже егда всесилный Бог изволил люди своя извести из Египта, тогда им повеле, да заколют овча, и всякий человек овчею кровию да помажет вне дверей дому своего на празе; в тою же самую нощь посла тогда ангела с мечем, и у которого дому той крове овчей вне дому несть, избил перворождение человеки и скоты, а идеже явися кровь помазана, той дом ... остави; тако бе в ветхом завете уставлено быти пасхи, праздник избавления ради своего люди божии действовали нам овчатем воспомоминающе неизреченное к ним Божие милосердие. То овча старозаконные пасхи знаменует Господа нашего Иисуса Христа, распеншагося нас ради, и святою своею кровию помазавшаго души наши; в тое же саму нощь пасхи иудеом заповедано было, да не исходят из домов своих; в тое же нощь египетские первенцы побиени быша; то избиение знаменает, еже Господь наш Иисус Христос в ту нощь сокрушил ада и диавола низложи и люди своя из адовы неволи свободил, сего ради тако пишет великий учитель Герасим, да не имамы в тое нощь имети никакие скорби, но похвали Избавителя своего и радостно ликует, вопиюще весело: воистинну воскресе Христос, дарова нам живот и нетление.

Глава 9. Ученик. Чесо ради на утрени пред чтением глаголем: Отче наш?

Учитель. Того ради, да воспоминаем слово, еже рече Господь во Евангели: не нарицайтеся учители, един бо есть учитель ваш Христос; сего ради аще кто во церкви людей учити, тогда без того веления никакоже дерзает.

Глава 10. Ученик. Чесо ради колокола у церкви?

Учитель. В Ветхом завете были трубы кованы, ихже ношаху пред киотом божиим иереи и во время службы божия трубяху, да слышат людие глас и собираются на хвалу божию; теми трубами низложишася стены Иерихона, якоже гласом труб тех одолен Иерихон поганский, то знаменует, еже учение евангельское одоле злочестие идолопоклонения, и поистинне ныне церковь божия имеет вместо тех труб колоколы, ихже гласами спящи в полунощи востают на хвалу Божию; того ради обыкоша глаголати колокольный звон: благовест, сиречь, благая весть.

Глава 11. Ученик. Повеждь ми о литоргии и о ином пении и о одежди ветхого закона и архиереов, что прообразова?

Учитель. Одеяние тех архиереов было устроено по четырем составем или стихиам, украшено многовидными цветы; напреди же ношаху златый плащ, на немже водруженнии 12 драгих камений по числу колен сынов израилевых, и беяше написано имя Божие, то имя знаменует, еже Он творец всея твари видимей и невидимыя. В новей же благодати одеяние архиерейское знаменует Господа нашего Иисуса Христа матерь, еже святы Иоанн виде ангела велика и крепка иже бе оболчен во облак, есть образ пресвятую и приснодеву Марию, в нюже вниде и единородный Сын, Слово Божие, и от ней родися, плоть нося, восприим. Многа же и ина о сей одежди толкования содержит церковь. Обаче пояс иерейский образ есть всегдашнюю чистоту, на нюже служебницы божии понудитися должни; стихарь знаменует послушание, еже Христос содея к своему Отцу, егда Его в мир сей посла; сие зря воспоминаем, еже Христос нашего ради спасения сам крест свой понесе гряды на волную смерть; два же рукава знаменует, еже должни они архиереи разсуждати духовную жизнь и мирскую и имут власть везати и решити.

Глава 12. Ученик. Что тем людем будет мзда, которыи во время святыя литоргии стоят без страха?

Учитель. Святый Герасим пишет: который человек в литургию слушает без страха, той сопричтется ругателем, иже поношаху распеншемуся на кресте Сыну Божию, и еще горши осужден будет, понеже во святой литургии ничто ино тако образуется, якоже страданием муки единородного Сына Божия. Но аще кто хощет милость получити и отнести в дом благословения, а не гнев божи, таковый да стоит, аки бы зря на кресте нашего ради спасения страдавшаго волею; той есть истинный христианин, несть бо то христианин, иже токмо имя носит христианское, но то есть христианин, иже волю Его творит и заповеди помнит.

Глава 13. Ученик. Чесо ради Господь наш Иисус Христос в шестый день изволи пострадати?

Учитель. Человек в шестый день бе сотворен, в той же день и в преступление впаде, того ради по правде в той самый день изволи его премилосердый творец и свободити.

Глава 14. Ученик. Почто не поем литоргии в великий пяток?

Учитель. В том образуем великую скорбь, еже то грех ради наших случися, еже сам Бог в той день умертвися и в той день не благословляет презвитер приношения, того ради в той самый день Господь наш Иисус Христос пожре сам себе; в той день не молимся даже до девятаго часа, сие образует, еже святии апостоли не смеяху ко кресту Христову приити даже до девятаго часа; но егда успе единородный Сын Божий плотию, тогда врази Его от креста прочь отъидоша, ученицы же, Иосиф Аримафеи и Никодим, первее всех приидоша.

Глава 15. Ученик. Что прообразует крест святый?

Учитель. Четыре роги крестныя образует веру, иже нань зряще истинную веру исполним добрыми делы; по иному же, крест святый образует еже два рога верхни небо, а нижнии землею облистают, два же роги образуют, на нихже Спасителевы руце пригвоздишася, еже Он всесилный Бог всю вселенную и яже на ней вся своею областию объемлет.

Глава 16. Ученик. Что знаменует, еже Христос на кресте пити просил?

Учитель. Сие то знаменует, якоже Ему жиды с хотением принесоша пити мемирмисмено⁶⁶⁸ вино, и вкуш не хотяше пити, тогда за неверие их весьма их от себе отверже.

Ученик. Что знаменует, еже мы в той день ко всякой молитве не преклоняем колени?

Учитель. То мы воспоминаем жидовское безверие, еже они ругалися Спасителю, биюще, колени пред ним преклоняюще.

Глава 17. Ученик. Повеждь ми о великой святой субботе.

Учитель. В той день пение творим во образ радости, поминающе неложное слово Иисуса Христа, еже рече, подобает Ему пропятому быти, но в трети день воскреснет. И чтенья бывают тогда от ветхаго завета; сие образует, еже ветхий завет конец прият, прииде истина Иисус Христос.

Ученик. Наш Иисус Христос крещения восприя в пяток; потреба ли нам в той же бы день начинати креститися?

Учитель. Христос не требуя крещение, но нам образ дав, да мы во имя Его крещаемся и приимем оставление грехов.

Глава 18. Ученик. Что ради мы крещаемся в воде?

Учитель. Крещение знаменует Господа нашего Иисуса Христа, того ради погружают человека в крестинницу, да он умрет миру; и паки от воды человека вземлют, да он с Господем нашим Иисусом Христом паки востанет.

Глава 19. Ученик. В кое время апостоли крещени от Господа нашего Иисуса Христа и какоже треба разумети, понеже вси апостоли и ученицы крещени в сие время, егда изыде из пречистых Спасовых ребр кровь и вода; святы же апостол Павел крещен бе от апостола Анании, якоже святый Лука повествует, тогда особь крещение восприят, зане не бе во апостолстве страдании; такоже и неповиннии младенцы от Ирода побиени крестишася в сущей своей крови.

Глава 2О. Ученик. Чесо ради приношение приносим ко церкви на литоргию?

Учитель. Егда мы что приносим от своих трудов сущих свещи, фимиан, вино и прочая, поистиние подобимся святой Марии Магдалине и прочим, иже они с миры пришедше помазати Господа умерша и слезяще горко; но вместо плача радоватися им явився повеле ангел; воздаст же и нам всесилный Бог стократно и от всех скорбных нас избавил и подаст нам радость и велию милость.

Глава 21. Ученик. Нецыи глаголют, еже нищим лутчи даяти, нежели презвитером.

Учитель. Которыи сие глаголют, сии подобни Июде, иже рече сребролюбивый: чего ради гибель сия бысть, лутчи бы то миро, излиянное на главу Господню, продано было на трех стех пеняз и раздано нищим.

Ученик. Кое лутче даяти милостиню, или приношение к церкви?

Учитель. Едино дело коеждо имать себе свое предложение; кто убо милостыню творит, того сподобится: блажени милостиви, яко ти помиловани будут; а кто на обоя дает, той имать воздаяние прияти от всесилнаго Бога сугубо.

Глава 22. Ученик. Чесо ради воскресе Христос в нощи?

Учитель. Тем Он нас известил, да попечение имети будем к судному дню; яко Он воста в нощи, тако никтоже человек может ведати, когда Он приидет на страшный суд.

Ученик. Чесо ради в той час земля потрясеся, егда воскресе Христос?

Учитель. В том Он нам показал, (яко) страшно приити хощет в судный день.

Глава 23. Ученик. Христос воста в субботу, якоже пишут святи евангелисти; почто мы празднуем Его воскресение в неделю?

Учитель. Той день недельный, сиречь, упокоение от всех дел человеком, той зваху в ветхом законе день суботный; в новой же благодати воскресения ради Христа Бога нашего день воскресны. Той день в начало бытия мира сего освятил всесилный Бог, в той бо день почи от всех дел своих, иже мы днесь нарицаем неделею. В неделю израилтеские людие от неволи свободишася. В неделю приидоша цари персидстии ко Христу с дары. В неделю претвори Христос пред ученики своими воду в вино в Кане Галилейской; в неделю в пустыни искушаше Его диавол. В неделю воскреси Христос Лазаря; в неделю Христос вниде во Иерусалим; в неделю воста из мертвых; в неделю прииде на святыя ученики и апостолы Дух Святый. В неделю восхищен бысть Иоанн Богослов на небо и виде дивныя дела всесилнаго Бога; тогда по видении написа Апокалипсис. В неделю приидет единородный Сын, Слово Божие, Господь и Бог наш, на страшны свой суд; тогда мертвии во мгновении ока вси воскреснут и просветятся праведнии яко солнце, а грешнии будут, аки тма.

Ученик. Чесо ради освящают воду по вся недели и празником?

Учитель. Того ради, да тою водою, освященною Святым Духом, избавимся от всякого сквернаго прилога видимых и невидимых врагов наших.

Ученик. Чесо ради праздники святыя пасхи и пентикостия бывают изменно в числех, а не тако, якоже иные праздники разделены во весь год в числа месечныя.

Учитель. То уставиша нам издревле святи апостольсти учителие церковнии, да то мы содержим по уставу пасхали, еже те святыя дни не приходят равно, понеже в пасхали имеет день пасхи с жидами не творити, дабы нам сохранити правую веру.

Глава 24. Ученик. Како святи поидут во уготовленные им обители?

Учитель. Егда неизглаголанными судьбами Бога воскреснут мертви, тогда комуждо праведнику приидет ангел его хранитель со множеством ангел и пением дивным и повелением божиим введет душу праведнаго купно с телом в вечныя обители.

Ученик. Той рай, иже восприимут святи по воскресени обдержит ли свое место и где есть уготован?

Учитель. По воскресени райское место, еже уготованно есть праведным, где яве, яко слышим во святом Евангели реченное самем единородным Сыном Божиим ко апостолом прежде вольныя Его страсти, яко имам уготованы обители многи где же, яве в самом небе; идеже Бог тамо и вси святи купно жити будут со ангели и есть те обители духовныя рай душам уготованным, еже содела превечная мудрость от начала, егда сам своею областию изволи.

Ученик. Будут ли святи души тамо вводими?

Учитель. Кои зело благи и многие добродетели исполниша, те тамо введутся.

Ученик. Святи в совершенство приидут кои?

Учитель. Мученицы, пророцы, апостоли, пустынножители и вси, иже смерть и страдание и чистое житие ради вечных благ восприяти изволиша; те восприимут по неложному обещанию единородного Сына Божия неизглаголанную радость, еже рече: блажени плачущи, яко ти утешатся.

Ученик. Чем могут тех человек души от мук свободитися до судного дне, которы человецы заповеди божия многия исполниша, а некоторые заповеди презреша и того ради удержании не сподобишася с праведники радостно места прияти, дóндеже приидет страшный Судия.

Учитель. Тех человек грехи очищаются до судного дне милостинею и приношением бескровныя жертвы, творимыя о душах усопших.

Глава 25. Ученик. Чесо ради по умершим творим помяновение?

Учитель. Того ради, аще которы человек жил во христианстве благочестиво и ради многия суеты мирския некия заповеди божия презрел и до отшествия мира сего покаянием не очистил, те грехи очищаются милостынями и поминовением; а котори человецы зле жили и в том умроша, те по правде то восприимут зло, еже всегда жиша во злобах и никогда милости божия не узрят.

Ученик. Что есть за огнь, имже зде в мире мучимся и от лютых грехов души наша очищаются?

Учитель. То есть нарицается огнь путний, еже благочестиви человецы гонения, оклеветания и повседневныя труды многоразличные беды за правду в мире сем подъемлют и многи нудят себе пощением и молитвами и всякими многоразличными добродетелми по вся дни, яко во огни мучатся; о таковых праведницех рече царствующий пророк: проидохом сквозь огонь и воду и извел еси ны в покой; и паки писано есть: узки путь вводяй в живот вечный, а широкий в вечную погибель.

Ученик. Коль много святых души взыдут на небо?

Учитель. Толико, елико ангельских сил остало на небесех, егда инии падоша.

Глава 26. Ученик. Что есть ад и где место его?

Учитель. Суть бо два ада: един верхний, а другий преисподний. Но верхний ад сей мир непостоянный, в немже обретаются многим человеком бедным убогим в лете зной, а в зиме мраз, а иногда глад терпят и наготу, и многоразличнии бывают нам беды, скорби, страхования и ужас от видимих врагов наших, паче же и бесов; и есть-ли подробну исписати суетнаго сего мира бываемии напасти человеком многоразличные, мню, яко ни тмочисленными мочно объяти речении; сего жития злаго и бедствующаго возгнушаяся, царствующий пророк умилно ко Господу простре молитву: изведи из темницы душу мою исповедатися имени Твоему. Потреба же нам знати есть другий ад преиснодний в подземных неисповедимых безднах, идеже смрад нестерпимый, жупельный таможе огнь неугасимый, тамо тма, отнюдь непросветимая, тамо мраз и скрежет зубом, якоже сам единородный Сын Божий рече во святом Евангели, ужасая нас, да мы в тое муку не приидем, наипаче же милосердуя о нас зело, яко человеколюбец, понеже не хощет смерти грешнику, но хощет, еже бы обратитися и живу быти ему, но обаче волею тех зовый ко спасению; согрешающих же и умерших окаянно презельне мучит, яко же слышим о оном богатом и убогом Лазаре, еже богаты во аде пламенем мучим, а Лазарь на лоне Авраамли во упокоени вечном. О злоба суетнаго и окаяннаго мира сего, потопляющая человеки многоразличными грехами во вечную злую муку!

Глава 27. Ученик. Какови суть адские муки?

Учитель. Тамо смрад и лютейши муки огнь зияющий таков, егда возгорится, то не может прохлодитися и толь тот огнь горяч, еже бы рещи наприклад, что здешний огнь мирский, аки стень; таможе есть мука студень зело лютая, в нюже бы аще ввергнути превеликую огненную гору, то абие лед имать быти, в той злой муке плачь и скрежет зубом; тамо же есть черви не усыпающие и змии драконы живыи, якоже рыбы во огни плавают; тамо же смрад паче всякого смрада; тамо же от жупелнаго огня искры, якоже от кузнеца, кующа железо; тамо же тма, иже никогда не просветится; тамо же срамота грехов человеческих, понеже злый человек тамо лукавых дел своих закрыти не возможет, или утаити, но пред всеми объявлены будут злые дела злых человек; тамо есть злая мука образища диаволская, у негоже огнь и смрад из уст исходит, тамо есть мука, зельны крик, шум, страх, плачь и воздыхание, болезнь неизглаголанная, уста же и язык и вси уды злых человек связаны будут огненными узами.

Ученик. О горе! лутчи бы не рожден был человек, иже толикия нужды терпети будет.

Учитель. Слыши, яко благочестиви человецы от тех мук избавлени будут, а ту муку диавол и людие его злии терпети будут.

Глава 28. Ученик. Которыи есть диавольские люди?

Учитель. Диаволские люди гордии, скупи, скверни, объясливии, пияницы, лживии, татие, разбойницы, лестницы, законопреступницы, блудницы, прелюбодеи и прочии злодеи, котории обретении будут во гресех, вси ведении будут во ад и никакоже оттуду могут изыти.

Главы 29 и 30 в рукописи пропущены.

Глава 31. Ученик. Могут ли блази тамо злых видети во аде?

Учитель. Блазии узрят в муках злых того ради, да в том их радость боле будет, еже они от тех злых избавишася; такоже и злии узрят благих в радости их, да в том их скорбь будет сугуба, еже они не сподобишася благих восприятия чистот. Молят ли тамо, занеже аще молити за осужденных согрешити ко Господу, понеже святии инако не хотят, токмо еже Бог хощет.

Глава 32. Ученик. Молят ли ся души святыя за живых человек?

Учитель. Моление их желание; еже они чего желают, то вскоре сбывается, понеже они о том желают, что всесилный Бог содеяти хощет, а не иного желают.

Глава 33. Ученик. Ныне святых души имеют ли совершенную радость?

Учитель. Имеют радость совершенную; но егда душа по воскресении совокупится с телом, тогда приимут святи совершенную радость.

Глава 34. Ученик. Могут ли души являтися, егда хотят?

Учитель. Блазии души являются спящим человеком, или молящимся; о душах грешных, никакоже, но ангели божии об них верных возвещают, яко они за злая дела в муках страждут, а егда некогда воистинну грешнаго душа является, то случается изволением божиим и молитвами святых отец, якоже явися святому Мартину разбойнича душа, или являются грешных души по заклинанию святых, якоже явися святому Венедикту грешная душа, имея ослию главу, и плаваше во огни и глаголаше имать быти в муках во веки. Ино еже бывает мечтание и прелесть от бесов.

Глава 35. Ученик. Откуду бывают сония человеком?

Учитель. Некогда бывают сония всесилнаго Бога пречюдными судьбами, еже Иосиф, сын Ияковль, виде еже он братии своей господин имать быти, такоже во сне извещение прием от ангела Иосиф праведный, обручник пресвятыя Девы Марии, да он поем отроча и матерь и бежит во Египет. Некогда же приходят сония от диавола, егда он нечто доброе помешати хощет, якоже жене Пилатове, дабы отпущен был Иисус Христос, еже бы помешати смотрение его таинство, и многия нам паче супостат нам в нощи деет пакости. А иныя сония бывают человеком от того, еже что они во дни обходили и зрели и слышали.

Глава 36. Ученик. Где антихрист родится, и како его дело?

Учитель. В велицем Вавилоне от некия злыя жены; и будет во утробе матерне исполнен диавол сопротивник и телом и душею и волхв злый, и сотворит себе весь мир данники и царствия привлечет к себе, понеже он изобрящет сокровища вся сокровенная убогим, одолеет принуждением патриархов, одолеет злохитростию, мудростию и словесы велеречивыми, понеже он всесквернии весть всяко лщение их; иноков и людей побожных одолети великими лстивыми чюдесными привидении, яже сотворит, огнь с высоты поднебесныя спасти и мертвых воставити, вся же приведением народу видевше возмнят, яко истинно чюдодеет. Тогда ветхи Иеросалим созиждет, и заповедает народом молитися себе, аки Богу; снидет же к нему язык июдейски от всея поднебесныя и восприимут его себе в великой чести за царя; но потом будут вси во христианстве от Еноховы и Илиины и иных святых проповеди; мучимы будут от него вси благочестиви, тогда Енох и Илия от него убиени будут и силою всемогущаго востанут. А царства его будет полчетверта года, и престол свой поставит на горе Елеонстей, и потом убиен будет Словом Божиим; после же того вси прелщении имут каятися. И приидет на суд единородный Сын, Слово Божие, со всеми небесными силами, со славою и со страхом; и вострубят ангели толь грозно, еже судьбами божиими мертвии вси востанут во мгновении ока (те ж трубы учинены от воздуха); приидет же Господь наш Иисус Христос в день той, воньже воскресе от мертвых. И егда святи востанут, в той час возведени будут святыми ангели на воздух пред Бога; такоже людие святи в той час живы во мгновении ока умрут и воскреснут и взяти будут на воздух; грешнии же умрут от страха и такоже воскреснут вскоре. Святии же и грешнии востанут вси во един возраст, яко тритцать лет. И будет небо, и земля, и солнце, и луна, и звезды паче прежни их красоты.

Глава 37. Ученик. Востанут ли младенцы, иже мертвии рождении?

Учитель. Аще есть в том отча вина, востанет от отца, аще ли матерня, от матери. Приидет же Господь наш в полунощи, и пред Ним понесут ангели святии Его крест и вся вещи, ими же при распятии умучиша Его; и сядет на престоле славы своей и даси суд на воздусе и поставит праведных одесную, а грешных ошую и потом приглашением пресладчайшего Его божественнаго гласа праведнии взыдут на небо, а злии от страшнаго Его изречения падут на землю, аки свинец, и сведении будут в преисподний ад.

Глава 38. Ученик. Узрят ли иудеи в судны день Господа?

Учитель. Узрят. Писано бо есть: узрят как егоже прободоша.

Глава 39. Ученик. Какова тварь будет по судном дни?

Учитель. Мраз тогда, зной, дождь, гром, молния скончается; солнце и луна престанут от течения своего, такоже и звезды, и упокоятся; и будет седмькрат нынешнего чистеишии; река Иордан светлеишии кристала; земля, идеже Христос родися и походи своими стопами и пострада нашего ради спасения, будет украшена многоразличными дивными цветы; праведни человецы седмь крат будут солнца светлейши, возрастом и в лета будут, якоже Спаситель поживе на земли плотию с человеки и воста по страдании от мертвых, и почтении от самого единородного Сына Божия будут дивными и неизглаголанными чюдесными почестьми вси святи и прославлени славою неисповедимою, иже никтоже никогда той радостной славы в сем суетном мире видел, ниже слышал, ниже на сердце кому взыде; и преукрашени будут святии многими различными красотами, яко крини предивнии, киждо лик по достоинству, иже уготова им всесилный Бог от сложения мира; дело же их тамо будет токмо еже им славити во Троицы славимаго Бога во веки веков. В телесех же своих святии имети будут быстрость, неудержанную крепость, свободу, прохлаждение, здравие, вечность, мудрость, дружбу, согласие, область известно стояние и твердо.

Глава 40. Ученик. Повеждь ми святых будущую радость.

Учитель. Довольствуя всеми предписанными, яже благоволи всемогущи Владыко Господь известно ведати человеку многая дела своя; паче же, зря многое Его изреченное к роду человеческому человеколюбие и велию Его благость, благодарствуй, да аще ты плотию бы был толь красен, якоже царев сын Авессалом, иже имаше толь хороши власы, еже никоему человеку уподобитися ему, или бы был который человек таков, разве яко Азазел, иже подобен бег его птищеи, или бы был такоже силен, якоже Сампсон, иже единою главою вооруженных воин побил 1000 мужей, и толь велик областию, аки Кесарь Август, иже облада всею вселенною, или яко царь Соломон, все изволение свое себе таково обрете, еже что сердце его пожелало, обрете, или, яко Моисей, здрав, иже не поболе никогда ни единым членом, или яко древний Муфусал, иже поживе в велицей чести девять сот лет и вящши, но сия вы(ну) памятуя (яко) храбрость и красота и сила и мудрость и область и честь и слава сего суетнаго мира противо небесному безмерному и вечно радостному житию, аки пара и сень мимоходящая. Сие же достоит разумети, еже невозможно словом изрещи, каковы дивныя почести уготова всесилный Бог, ихже сподоби и нас милостивы Боже всех получити по многим и неизреченным щедротам своим, емуже подобает всякая слава и поклонение от всей твари купно Богу и Сыну и Святому Духу и ныне и присно и во веки веков. Аминь.