Минея, 5 Июля.
Глас 8
Песнь 1
Ирмос: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко еди́н сла́вно просла́вися.
Припев: Свята́я преподобному́ченице Елисаве́то, моли́ Бо́га о на́с.
Пода́ждь, Го́споди, души́ мое́й просвеще́ние и уста́ моя́ недосто́йная отве́рзи, я́ко да воспою́ уго́дницу Твою́, преподобному́ченицу Елисаве́ту, в не́йже и́мя Твое́ свято́е сла́вно просла́вися.
Припев: Свята́я преподобному́ченице Елисаве́то, моли́ Бо́га о на́с.
О, свята́я преподобному́ченице Елисаве́то, кня́жеским досто́инством и сла́вою на земли́ украше́нная, ты, да́нный тебе́ от Бо́га тала́нт приумно́живши, небе́сною сла́вою возсия́ла еси́ и себе́, я́ко дар многоце́нный, Христу́ принесла́ еси́.
Припев: Свята́я преподобному́ченице Варва́ро, моли́ Бо́га о на́с.
Христа́ Подвигополо́жника при́сно в души́ твое́й иму́щи, му́ченице Варва́ро, Тому́ невозвра́тным по́мыслом после́довала еси́ и в послуша́нии во́ли Бо́жией да́же до сме́рти пребыла́ еси́.
И ны́не и при́сно и во ве́ки веко́в. Ами́нь.
Богородичен: Воспои́м сла́ву Пресвяте́й Де́ве Богоро́дице, приведо́шася бо Царю́ Христу́ вслед Ея де́вы и жены́, с ни́миже и святы́я преподобному́ченицы Елисаве́та и Варва́ра, Небе́снаго черто́га насле́дницы и ве́чери Го́сподни прича́стницы.
Песнь 3
Ирмос: Ты еси́ Утвержде́ние,/ притека́ющих к Тебе́, Го́споди,/ Ты еси́ Свет омраче́нных/ и пое́т Тя дух мой.
Припев: Свята́я преподобному́ченице Елисаве́то, моли́ Бо́га о на́с.
Оте́чество твое́ оста́вивши, в земли́ Ру́сской све́том Правосла́вныя ве́ры просвети́лася еси́, иде́же, лю́дем любо́вию и милосе́рдием послужи́вши, муче́ние и смерть Христа́ ра́ди претерпе́ла еси́. Сего́ ра́ди Госпо́дь Небе́снаго Оте́чества насле́дницу тя показа́.
Припев: Свята́я преподобному́ченице Елисаве́то, моли́ Бо́га о на́с.
Егда́ честны́я оста́нки му́жа рука́ма твои́ма во гроб полага́ла еси́, Елисаве́то многострада́льная, не ожесточи́ла еси́ се́рдца твоего́, ниже́ отча́янию предала́ся еси́, но, те́плую моли́тву Го́сподеви вознося́щи, безбо́жнаго уби́йцу Ева́нгельски прости́ла еси́.
Припев: Свята́я преподобному́ченице Варва́ро, моли́ Бо́га о на́с.
За́поведь о любви́ к бли́жним испо́лнити возжеле́вши, красоту́ ми́ра сего́ и сла́дость вре́менную презре́ла еси́, Варва́ро богому́драя. Сего́ ра́ди, во оби́тель милосе́рдия прише́дши и в послуша́ние настоя́тельнице себе́ преда́вши, стра́ждущим до́бре послужи́ла еси́.
И ны́не и при́сно и во ве́ки веко́в. Ами́нь.
Богородичен: О, Пресвята́я Ма́ти Де́во! Ду́шу мою́ омраче́нную грехми́ све́том Сы́на Твоего́ ми́лостивно просвети́, да, Тобо́ю направля́емь, Черто́га Небе́снаго дости́гну.
Седален, глас 5
От ю́ности Го́спода возлюби́вши, Тому́ после́довала еси́, благове́рная княги́не Елисаве́то, и яви́лася еси́, я́ко земля́ благопло́дная, в не́йже до́брое се́мя Правосла́вия стори́чный плод принесе́. Те́мже, име́ющи де́рзновение ко Го́споду, моли́ безпло́дие серде́ц на́ших разреши́ти, да принесе́м Ему́ плоды́ покая́ния, любве́ и смире́ния, и Ца́рствия Небе́снаго сподо́бимся.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Пресвята́я Богоро́дице Де́во, принеси́ моли́тву о нас к Сы́ну и Бо́гу Твоему́, погиба́ем бо от мно́жества прегреше́ний и вопие́м: Ты еси́ Хода́таица и Спору́чница всех, на Тя упова́ние возложи́вших.
Песнь 4
Ирмос: Услы́шах, Го́споди,/ смотре́ния Твоего́ та́инство,/ разуме́х де́ла Твоя́/ и просла́вих Твое́ Божество́.
Припев: Свята́я преподобному́ченице Елисаве́то, моли́ Бо́га о на́с.
Но́вая Ма́рфа яви́лася еси́, преподобному́ченице Елисаве́то, убо́гим и неду́жным, я́ко Самому́ Го́споду, усе́рдно послужи́вши. Научи́ и нас в бли́жних на́ших о́браз Влады́ки Христа́ всегда́ зре́ти и Тому́ с любо́вию служи́ти.
Припев: Свята́я преподобному́ченице Елисаве́то, моли́ Бо́га о на́с.
Благу́ю ча́сть избра́вши, Мари́и уподо́билася еси́, свята́я Елисаве́то, и, все помышле́ние твое́ ко Го́споду иму́щи, непреста́нно словесе́м Его́ поуча́лася еси́.
Припев: Святи́и преподобному́ченицы Елисаве́то и Варва́ро, моли́те Бо́га о на́с.
Помоли́теся Го́сподеви о нас, преподобному́ченицы Елисаве́то и Варва́ро, вы бо, Ева́нгельский путь служе́ния бли́жним избра́вше, Христу́ да́же до сме́рти ве́рны пребы́ли есте́ и зе́млю кро́тких насле́довали есте́.
И ны́не и при́сно и во ве́ки веко́в. Ами́нь.
Богородичен: Блаже́на Ты в жена́х еси́, Пренепоро́чная Влады́чице, Тобо́ю бо к нам Зижди́тель всех сни́де, е́же возста́вити па́дший Ада́мов о́браз и возвести́ нас к пе́рвому блаже́нству.
Песнь 5
Ирмос: У́тренююще, вопие́м Ти,/ Го́споди, спаси́ ны,/ Ты бо еси́ Бог наш,/ ра́зве Тебе́ ино́го не ве́мы.
Припев: Свята́я преподобному́ченице Елисаве́то, моли́ Бо́га о на́с.
Неизрече́нным смотре́нием страда́ний причасти́вшися, свята́я Елисаве́то, Дух Боже́ственный в се́рдце твое́м стяжа́ла еси́, И́мже просвеща́ема, лю́дем моли́твою и милосе́рдием послужи́ла еси́.
Припев: Свята́я преподобному́ченице Елисаве́то, моли́ Бо́га о на́с.
Моли́твами твои́ми, преподобному́ченице, ду́ши неду́гующих и немощству́ющих врачева́ла еси́ и сестры́ оби́тели о́бразом жития́ твоего́ му́дре наставля́ла еси́.
Припев: Свята́я преподобному́ченице Варва́ро, моли́ Бо́га о на́с.
От ю́ности Го́сподеви себе́ преда́вши и про́мыслу Бо́жию повину́ющися, вся в житии́ твое́м с благодаре́нием прия́ла еси́, преподобному́ченице Варва́ро, и по сме́рти венце́м му́ченическим венча́лася еси́.
И ны́не и при́сно и во ве́ки веко́в. Ами́нь.
Богородичен: Не и́мамы ины́я по́мощи, ни ины́я наде́жды, ра́зве Тебе́, Влады́чице, сего́ ра́ди к Тебе́ припа́даем: приими́ моле́ния на́ша, и принеси́ я́ к престо́лу Сы́на Твоего́, Всенепоро́чная.
Песнь 6
Ирмос: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве, Христе́, Бо́же наш.
Припев: Свята́я преподобному́ченице Елисаве́то, моли́ Бо́га о на́с.
Ве́мы милосе́рдие твое́, преподобному́ченице Елисаве́то, я́ко не отвраща́лася еси́ скорбя́щих и нужда́ющихся, та́ко и нас, недосто́йных, не оста́ви твои́м заступле́нием и моли́ся Го́споду о исправле́нии на́шего жития́.
Припев: Свята́я преподобному́ченице Елисаве́то, моли́ Бо́га о на́с.
С любо́вию приима́ющи больны́я, си́рыя и кре́постию оскуде́вшия, благове́рная княги́не Елисаве́то, духо́вный глад и жа́жду тех утоля́ла еси́, та́ко и нас, воспева́ющих святу́ю па́мять твою́, не оста́ви моли́твами твои́ми.
Припев: Свята́я преподобному́ченице Елисаве́то, моли́ Бо́га о на́с.
Свята́я преподобному́ченице Варва́ро, моли́ Бо́га о на́с.
Сла́ва Отцу́ и Сы́ну и Свято́му Ду́ху.
Ве́рна бы́вши нача́льнице твое́й в служе́нии бли́жним, Варва́ро преподобному́ченице, пребыла́ еси́ ве́рна ей и во страда́нии да́же до сме́рти, по сло́ву Подвигополо́жника Христа́: претерпе́вый до конца́, той спасе́н буде́т.
И ны́не и при́сно и во ве́ки веко́в. Ами́нь.
Богородичен: Богоро́дице Де́во, умоли́ Сы́на Твоего́, Христа́ Бо́га на́шего, да омы́ет скве́рну души́ моея́ и облече́т в оде́жду све́тлую, в не́йже предста́в пред Ним, не лише́н буду Черто́га бра́чнаго.
Кондак, глас 2
Вели́чие по́двига ве́ры кто пове́сть?/ Во про́пасти земне́й све́том небе́сным осия́нная,/ страстоте́рпица вели́кая княги́ня Елисаве́та/ со А́нгелы во псалме́х и пе́ниих ра́довашеся/ и, убие́ние претерпева́ющи,/ о безбо́жных мучи́телех взыва́ше:/ Го́споди, прости́ им грех сей,/ не ве́дят бо, что творя́т./ Тоя́ моли́твами, Христе́ Бо́же,/ поми́луй и спаси́ ду́ши на́ша.
Икос
Ору́жие про́йде се́рдце твое́, благове́рная княги́не Елисаве́то, егда́ узре́ла еси́ убие́ннаго супру́га твоего́; те́мже, кра́сная ми́ра сего́ оста́вивши, всю жизнь свою́ Бо́гу предала́ еси́ и, благочести́вых жен и дев во оби́тель Ма́рфы и Мари́и собра́вши, стра́ждущим лю́дем усе́рдно послужи́ла еси́. Егда́ же к страда́нию призва́ тя Госпо́дь, о безбо́жных мучи́телех взыва́ла еси́: Го́споди, прости́ им грех сей, не ве́дят бо, что творя́т. Тоя́ моли́твами, Христе́ Бо́же, поми́луй и спаси́ ду́ши на́ша.
Песнь 7
Ирмос: О́троцы евре́йстии в пещи́/ попра́ша пла́мень дерзнове́нно,/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.
Припев: Свята́я преподобному́ченице Елисаве́то, моли́ Бо́га о на́с.
Согреши́хом, беззако́нновахом, непра́вдовахом пред Бо́гом и сего́ ра́ди, лю́тыми скорбьми́ обурева́еми, в во́ли на́шей ходи́ти оста́влени бы́хом. Но моли́твами святы́я преподобному́ченицы Елисаве́ты и всех новому́ченик, умилосе́рдися, пощади́ и вразуми́ нас, Го́споди, да пое́м Ти: благослове́н еси́, Го́споди Бо́же, во ве́ки.
Припев: Свята́я преподобному́ченице Елисаве́то, моли́ Бо́га о на́с.
Злочести́вии лю́дие мно́гажды досажда́ху ти, свята́я преподобному́ченице Елисаве́то, ты же ве́рою бла́го за зло сим воздава́ла еси́. Сего́ ра́ди мы, ча́да твоя́, я́ко наста́вницу в житии́ христиа́нстем тя иму́ще, с тобо́ю воспева́ем: благослове́н еси́, Го́споди Бо́же, во ве́ки.
Припев: Свята́я преподобному́ченице Варва́ро, моли́ Бо́га о на́с.
Сохрани́, Го́споди, моли́твами достохва́льныя преподобному́ченицы Варва́ры всех, почита́ющих па́мять ея святу́ю и благоче́стно взыва́ющих: благослове́н еси́, Го́споди Бо́же, во ве́ки.
И ны́не и при́сно и во ве́ки веко́в. Ами́нь.
Богородичен: Восхва́лим, ве́рнии, Пресвяту́ю Богоро́дицу: Та бо, покро́в Свой святы́й над ми́ром распросте́рши, сугу́бую моли́тву о земли́ Ру́сской возсыла́ет, во е́же помощи́ лю́дем стра́ждущим и ве́рою зову́щим: благослове́н еси́, Го́споди Бо́же, во ве́ки.
Песнь 8
Ирмос: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ виде́в,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Припев: Свята́я преподобному́ченице Елисаве́то, моли́ Бо́га о на́с.
Егда́ в про́пасть земну́ю вве́ржена была́ еси́, свята́я Елисаве́то, не поколеба́ся ве́ра твоя́ и милосе́рдие не оскуде́, не оста́вила бо еси́ да́же до сме́рти служе́ния стра́ждущим, к Бо́гу вопию́щи: благослови́те, лю́дие, Го́спода и превозноси́те Его́ во ве́ки.
Припев: Свята́я преподобному́ченице Елисаве́то, моли́ Бо́га о на́с.
Научи́ нас досто́йно Го́споду служи́ти и в послуша́нии во́ли Его́ пребыва́ти, преподобному́ченице Елисаве́то, да не буде́т нам и́го Его́ благо́е в скорбь и бре́мя Его́ ле́гкое в тяготу́, но с ра́достию возопие́м: благослови́те, лю́дие, Го́спода и превозноси́те Его́ во ве́ки.
Припев: Святи́и преподобному́ченицы Елисаве́то и Варва́ро, моли́те Бо́га о на́с.
Я́коже дре́вле му́ченицы свиде́телие Христо́вы в ми́ре безбо́жнем бы́ша, та́ко и вы, святы́я Елисаве́то и Варва́ро, ве́ру во Христа́ яви́ли есте́ и сме́ртию запечатле́ли есте́, вопию́ще: благослови́те, лю́дие, Го́спода и превозноси́те Его́ во ве́ки.
И ны́не и при́сно и во ве́ки веко́в. Ами́нь.
Богородичен: Всеблага́я Богоро́дице, на спасе́ния стези́ наста́ви мя, оскудева́ют бо дни моя́ в суете́ и попече́нии о де́лех мирски́х, но покры́й милосе́рдием Твои́м не́мощь мою́ и спаси́ мя.
Песнь 9
Ирмос: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с,/ тем Тя, Богоро́дицу,/ а́нгелов и челове́к чинонача́лия велича́ют.
Припев: Свята́я преподобному́ченице Елисаве́то, моли́ Бо́га о на́с.
Ди́вны де́ла Твоя́, Го́споди! Преподобному́ченица Елисаве́та в земли́ Алапа́евстей беззако́нно убие́нная ны́не во святе́м гра́де Иерусали́ме я́ве мощми́ почи́вает и в первопресто́льнем гра́де Москве́ с че́стию просла́вляется. Ю́же моли́твенно почита́юще, с благодаре́нием взыва́ем: сла́ва Бо́гу, просла́вляющему святы́я Своя́.
Припев: Свята́я преподобному́ченице Елисаве́то, моли́ Бо́га о на́с.
Ди́вны де́ла Твоя́, Го́споди! Преподобному́ченица Елисаве́та во глубину́ про́пасти вве́рженная, на высоте́ горы́ Елео́нския во святе́м хра́ме упокое́ние мощми́ свои́ми прие́млет. Ю́же лю́дие моли́твенно почита́юще, с благодаре́нием взыва́ют: сла́ва Бо́гу, просла́вляющему святы́я Своя́.
Припев: Святи́и преподобному́ченицы Елисаве́то и Варва́ро, моли́те Бо́га о на́с.
Ди́вны де́ла Твоя́, Го́споди! Преподобному́ченицы Елисаве́та и Варва́ра, в земно́м житии́ сою́зом любве́ связу́емыя, неразлу́чны во страда́нии бы́ша и по сме́рти не разлучи́шася. И́хже лю́дие моли́твенно почита́юще, с благодаре́нием взыва́ют: сла́ва Бо́гу, просла́вляющему святы́я Своя́.
И ны́не и при́сно и во ве́ки веко́в. Ами́нь.
Богородичен: Отжени́ от душ на́ших собла́зны и стра́сти грехо́вныя, Пресвята́я Де́во, да не поги́бнем в беззако́нниих, но да спасе́мся моли́твами Твои́ми и святы́х преподобному́чениц Елисаве́ты и Варва́ры.
Светилен
В Гефсимани́йстей ве́си восхоте́ла еси́ погребена́ бы́ти, преподобному́ченице Елисаве́то, красоты́ ра́ди и свя́тости ме́ста сего́. Бог же благо́е жела́ние твое́ испо́лни, да просвети́тся свет твой пред челове́ки по сло́ву Го́сподню.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Прему́дрость Ипоста́сную, Сло́во Пресу́щное и Врача́ душ и телес ро́ждшая, Де́во, исцели́ души́ моея́ боле́знь и к жи́зни ве́чней наста́ви.
Комментировать