Минея, 10 Января.
Глас 1
Песнь 1
Ирмос: Твоя́ победи́тельная десни́ца/ боголе́пно в кре́пости просла́вися:/ та́ бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая.
Припев: Преподо́бне о́тче Дометиа́не, моли́ Бо́га о на́с.
Воста́ния пло́ти, и страсте́й наше́ствия, Богоприя́тне,/ и востаю́щую в души́ мое́й укроти́ бра́нь,/ в ми́рне, о́тче, устрое́нии соблюди́.
Припев: Преподо́бне о́тче Дометиа́не, моли́ Бо́га о на́с.
Жела́нием и любо́вию неукло́нною Вы́шней прему́дрости прикосну́вся,/ плоть покори́л еси́ и су́щая земна́я оттря́сл еси́, преподо́бне,/ и Бог и́стинно в прича́стии бы́л еси́.
Сла́ва Отцу́ и Сы́ну и Свято́му Ду́ху.
Дометиа́н чу́дный, пома́лу от земли́ возвыша́емь,/ прии́де от си́лы худы́я к соверше́нней си́ле/ и восхожде́ния в се́рдцы положи́.
И ны́не и при́сно и во ве́ки веко́в. Ами́нь.
Богородичен: Вода́ми омочи́в пло́ти, е́же прия́т Госпо́дь смеше́ние,/ от Твои́х соде́ла де́вственных крове́й челове́чество,/ ко ополче́нием проти́вным непобо́рно.
Песнь 3
Ирмос: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й:/ одушевле́нный хра́ме/ неизрече́нныя сла́вы Твоея́, Человеколю́бче.
Припев: Преподо́бне о́тче Дометиа́не, моли́ Бо́га о на́с.
В кре́пости свое́й враг преве́тхий, твоея́ души́ не моги́й кре́пости поколеба́ти,/ ухищря́ет во вре́мя твоего́ разреше́ния, та́йнами пти́ц худы́х низложи́ти.
Сла́ва Отцу́ и Сы́ну и Свято́му Ду́ху.
Велехвале́нием свои́м пра́ведно изничто́жествуется приуязвле́нием зми́й окая́нный,/ и в вид пе́сиих му́х преврати́ся не́мощию множа́йшею,/ и под нога́ми лежи́т пра́ведных кра́сными, попира́емь.
И ны́не и при́сно и во ве́ки веко́в. Ами́нь.
Богородичен: Из Тебе́ рожде́йся без се́мене Сын Преве́чный, Де́во Ма́ти, мир обнови́,/ сокрове́ннаго зми́я вода́ми в Креще́нии Свое́м умертви́в Госпо́дь/ и тле́ния челове́ки изба́вив.
Седален, глас 1
Свяще́нства украша́емь, о́тче, пома́занием Богода́нным,/ уясни́л еси́ сие́ Боже́ственными добро́тами доброде́телей,/ и Боже́ственным ко Христу́ повинове́нием/ и, сконча́в твое́ тече́ние, на Небесе́х вопие́ши со А́нгелы:/ сла́ва благоутро́бию Твоему́, Спа́се,/ сла́ва Ца́рствию Твоему́,/ сла́ва смотре́нию Твоему́, Еди́не Человеколю́бче.
Песнь 4
Ирмос: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.
Припев: Преподо́бне о́тче Дометиа́не, моли́ Бо́га о на́с.
Зако́н благода́ти показа́л еси́ бы́ти сень,/ су́щим в зако́не Бо́жии евре́ем чту́щим, му́дре,/ и Ева́нгелие и́стиннаго Богоявле́ния та́инство,/ Христу́ взыва́я:/ сла́ва си́ле Твое́й, Го́споди.
Припев: Преподо́бне о́тче Дометиа́не, моли́ Бо́га о на́с.
Облиста́в я́ко звезда́ от восто́ка многосве́тлая, Це́рковь просвеща́еши,/ пропове́дая Христа́, му́дрыми показа́ньми всеблагоче́стно пра́вды Со́лнца, Тому́ взыва́я:/ сла́ва си́ле Твое́й, Го́споди.
Сла́ва Отцу́ и Сы́ну и Свято́му Ду́ху.
Зло́бы вся́кия отто́ргнувся и любве́ вре́менныя, о́тче, со тща́нием,/ и просвети́л еси́ све́том оте́чества твоего́ концы́, му́дре,/ и сим бога́тство одожди́л еси́, оби́льнейшим бога́тства коли́чеством.
И ны́не и при́сно и во ве́ки веко́в. Ами́нь.
Богородичен: Сло́во, я́ко Бог Сый Неви́димый,/ прии́м от Жены́ челове́чо естество́ ви́димо,/ соверша́ет и очища́ет в реце́, И́же греха́ чу́ждий,/ па́дшаго очища́я прегреше́ния.
Песнь 5
Ирмос: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.
Припев: Преподо́бне о́тче Дометиа́не, моли́ Бо́га о на́с.
Призре́ на зе́млю Влады́ка тва́ри,/ и сея́ поколеба́шася, Богому́дре, основа́ния и лю́те сотрясо́шася,/ тебе́ же душе́внаго му́жества, о́тче, от моли́твы не уклони́.
Припев: Преподо́бне о́тче Дометиа́не, моли́ Бо́га о на́с.
Не терпе́л еси́ ху́лящих слы́шати, сла́вне, на Высоту́,/ и глаго́лати непра́вду безу́мныя,/ но те́х обрати́л еси́ па́стырским твои́м жезло́м,/ и неду́жное исцели́л еси́.
Сла́ва Отцу́ и Сы́ну и Свято́му Ду́ху.
Еди́но естество́ во Христе́ иму́щим пропове́дати, Богоглаго́ливе, ника́коже попусти́л еси́ сло́жное,/ но те́х улови́л еси́ уче́ний твои́х мре́жею/ и к све́ту возве́л еси́.
И ны́не и при́сно и во ве́ки веко́в. Ами́нь.
Богородичен: Услади́ вод го́ресть со́лию Елиссе́й./ Тво́й же, Богома́ти, Сын и Бог,/ кре́щся в воде́, греха́ го́ресть и боле́знь отъя́т.
Песнь 6
Ирмос: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш:/ ты бо кре́пость немощству́ющих и исправле́ние.
Припев: Преподо́бне о́тче Дометиа́не, моли́ Бо́га о на́с.
Изба́вишася я́ко от се́ти, преподо́бне, сме́ртныя бе́дствующии лю́дие,/ и страсте́й мно́жество дале́че моли́твами твои́ми отгна́ся,/ и́бо са́ми пе́рвии тя име́ша засту́пника.
Сла́ва Отцу́ и Сы́ну и Свято́му Ду́ху.
Потреби́л еси́ моли́твою, всему́дре, стремле́ние неду́га,/ к Де́ве и Ма́тери Изба́вителя ско́ро прите́к,/ не бо́ стерпе́л еси́ я́ко па́стырь сый,/ бе́дствующей па́стве пренебрега́тися.
И ны́не и при́сно и во ве́ки веко́в. Ами́нь.
Богородичен: Ужасо́шася А́нгельстии чи́ни, зря́ще Неви́димаго,/ из Де́вы ро́ждшася пло́тию/ и невеще́ственно сла́вимаго, в реце́ крести́тися приходя́ща.
Песнь 7
Ирмос: Тебе́, у́мную, Богоро́дице, пе́щь/ разсмотря́ем, ве́рнии:/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.
Припев: Преподо́бне о́тче Дометиа́не, моли́ Бо́га о на́с.
Нело́жное ве́рным соверши́ся обетова́ние проявле́нно:/ Боже́ственный бо Дометиа́н благода́ти сподо́бися реши́ти неду́ги и отгоня́ти де́моны,/ хва́льнаго провозвеща́я Бо́га препросла́вленнаго.
Припев: Преподо́бне о́тче Дометиа́не, моли́ Бо́га о на́с.
На земли́ с на́ми быв и пло́тски пожи́в,/ подаде́ после́довавшим Ему́ и возлюби́вшим Его́ чудоде́йствия благода́ти/ хва́льный отце́в Бог и препросла́вленный.
Сла́ва Отцу́ и Сы́ну и Свято́му Ду́ху.
Злочести́выя низложи́ е́реси Боже́ственный Дометиа́н Севи́рова уче́ния/ и непрело́жную ве́ру и Правосла́вную боголе́пно назна́мена,/ хва́льнаго возвеща́я Бо́га и препросла́вленнаго.
И ны́не и при́сно и во ве́ки веко́в. Ами́нь.
Богородичен: Оте́ческаго не отступи́ естества́ Боже́ственное Сло́во, вопло́щся из Девы:/ Ту́ю бо изве́стно соблюде́, пребы́вшу нескве́рну в рождестве́,/ и прие́млет е́же от Отца́ свиде́тельство Христо́с,/ препросла́вленный во ве́ки.
Песнь 8
Ирмос: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.
Припев: Преподо́бне о́тче Дометиа́не, моли́ Бо́га о на́с.
Превше́л еси́ весь зако́н естества́ челове́ча,/ Бо́гу же прилепи́лся еси́, Богоглаго́ливе, жела́ний Кра́йнейшему, поя́ Ему́:/ благослови́те, вся дела́, Го́спода, и превозноси́те во вся ве́ки.
Припев: Преподо́бне о́тче Дометиа́не, моли́ Бо́га о на́с.
Услы́шав Боже́ственныя за́поведи, расточи́л еси́ оби́льно бога́тство тре́бующим/ благопокоре́ния по́мыслом, вопия́, досточу́дне:/ благослови́те, вся дела́, Го́спода, и превозноси́те во вся ве́ки.
Сла́ва Отцу́ и Сы́ну и Свято́му Ду́ху.
Исцеле́ний, Дометиа́не, неоску́ден бы́л еси́,/ источа́я пи́во, исто́чник, и пото́к сла́дости, и река́ ми́ра, вопию́щим:/ вся дела́, Го́спода по́йте, и превозноси́те во вся ве́ки.
И ны́не и при́сно и во ве́ки веко́в. Ами́нь.
Богородичен: В пещи́ Тя обра́зно прописа́ша о́троцы, Дево,/ и в купине́ прообрази́ Моисе́й,/ и Дави́д зря́ Тя, ро́ждшую Младе́нца безму́жно, Го́спода сла́вы,/ Его́же превозно́сим во вся ве́ки.
Песнь 9
Ирмос: О́браз чи́стаго Рождества́ Твоего́/ огнепали́мая купина́ показа́ неопа́льная./ И ны́не на нас напа́стей свире́пеющую угаси́ти, мо́лимся, пе́щь,/ да Тя, Богоро́дице,/ непреста́нно велича́ем.
Припев: Преподо́бне о́тче Дометиа́не, моли́ Бо́га о на́с.
Уста́вил еси́, о́тче, жела́ния любле́ний, удержа́в соверше́ннейшее,/ и прия́ша тя патриа́рхов селе́ния и пра́ведных и преподо́бных чи́ни,/ с ни́миже мо́лиши о нас Вседержи́теля.
Припев: Преподо́бне о́тче Дометиа́не, моли́ Бо́га о на́с.
Имя́ше, я́коже име́ние че́стно, твое́ оте́чество, те́ло твое́ многострада́льное/ скры́вшее свои́ми не́драми, сла́вне, ма́терскими устреми́вшееся движе́ньми:/ тобо́ю бо наслажда́тися чужди́м не терпя́ше.
Сла́ва Отцу́ и Сы́ну и Свято́му Ду́ху.
Гряди́ по́мощь бы́ти мне в напа́стех жития́ и обстоя́ниих,/ и ути́ши воздвиза́ющуюся бу́рю на мя страсте́й,/ и в ти́хо приведи́ приста́нище ве́тром, о́тче, моли́твы твоея́.
И ны́не и при́сно и во ве́ки веко́в. Ами́нь.
Богородичен: Стоя́ше да́же до Тебе́ смерть,/ е́же по нам бы́ти, за е́же спасти́ ны,/ Пресу́щне Сы́не Бо́жий, благоволи́вшаго из безму́жныя Ма́тере,/ и вода́ми ны очи́стити, и огне́м Боже́ственным Креще́ния.