Минея, 8 Апреля.
Глас 4
Песнь 1
Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.
Припев: Святи́телю о́тче Ни́фонте, моли́ Бо́га о на́с.
Скве́рну прегреше́ний мои́х очи́сти Твое́ю ми́лостию, Христе́,/ мглу омраче́ния страсте́й отжени́/ моли́твами святи́теля Твоего́ Ни́фонта.
Припев: Святи́телю о́тче Ни́фонте, моли́ Бо́га о на́с.
Бога́тыя и светоно́сныя благода́ти испо́лнен,/ в честне́м ме́сте Пече́рския оби́тели и́ночествовал еси́/ и та́мо, я́ко безпло́тен, к доброде́телей приведе́ ум свой,/ о́тче чу́дне Ни́фонте.
Сла́ва Отцу́ и Сы́ну и Свято́му Ду́ху.
Кре́постию наста́влен быв от Ду́ха Свята́го измла́да,/ в огра́де преподо́бных оте́ц Анто́ния и Феодо́сия пребы́л еси́ во вся́цем воздержа́нии/ и отто́ле на архиере́йский престо́л возведе́н бысть Вели́кому Нову́гра́ду,/ о́тче святи́телю Ни́фонте.
И ны́не и при́сно и во ве́ки веко́в. Ами́нь.
Богородичен: От Тебе́, Обра́дованная Всечестна́я,/ нам яви́ся Пра́ведное Со́лнце – Христо́с/ и све́том просвети́ седя́щия пе́рвее в тве́рдех.
Песнь 3
Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Припев: Святи́телю о́тче Ни́фонте, моли́ Бо́га о на́с.
Умертви́в плотско́е мудрова́ние воздержа́нием зе́льным,/ и всено́щным стоя́нием, и моли́твами, о́тче свяще́нне Ни́фонте,/ Животворя́щему Ду́ху прибли́зился еси́.
Припев: Святи́телю о́тче Ни́фонте, моли́ Бо́га о на́с.
Боже́ственнаго Ду́ха благода́тию, вше́дшаго в тя,/ мно́ги огра́ды и хра́мы во и́мя святы́х воздви́гл еси́, и́ноческому чи́ну во спасе́ние,/ и с ни́ми, о́тче свяще́нне Ни́фонте,/ в ра́йских селе́ниих препочи́л еси́, веселя́ся.
Припев: Святи́телю о́тче Ни́фонте, моли́ Бо́га о на́с.
На высоту́ доброде́телей вшел еси́, Ни́фонте святи́телю,/ и, прия́в свяще́нное пома́зание,/ высото́ю своего́ жития́ на седа́лище высо́це/ послужи́л еси́ своему́ Влады́це Христу́, я́ко архиере́й вели́кий.
Сла́ва Отцу́ и Сы́ну и Свято́му Ду́ху.
Це́рковь Христо́ва свети́льника тя стяжа́вши, святи́телю Ни́фонте,/ доброде́тельными твои́ми уче́нии, прему́дре, просвеща́ется, глаго́лющи:/ Ты, Го́споди, ми кре́пость и утвержде́ние.
И ны́не и при́сно и во ве́ки веко́в. Ами́нь.
Богородичен: Ты еси́ еди́на су́щим на земли́ челове́ком блага́я Хода́таица,/ Ма́ти Бо́жия па́че естества́,/ те́мже Тебе́, Госпоже́ Влады́чице, лю́дие Твои́, ра́дуяся, зове́м:/ поми́луй нас.
Седален, глас 4
Све́тло житие́ твое́ всем яви́ся, святи́телю Христо́в Ни́фонте,/ всепра́зднственная же па́мять твоя́, чудесы́ блиста́ющи,/ удивля́ет сто́льнаго гра́да Ки́ева наро́ды,/ иде́же честны́я твоя́ мо́щи положе́ны бы́ша,/ и и́нок мно́жества ревну́ющих по Бо́зе доброде́тельному твоему́ житию́,/ те́мже тя мо́лим:/ моли́ спасти́ся душа́м на́шим.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Пое́м Тя, Богоневе́сто, Ма́ти Христа́ Бо́га,/ сла́вяще рождество́ Твое́ непостижи́мое,/ и́мже изба́вихомся от ле́сти диа́воли и вся́кия беды́, Влады́чице Богоро́дице,/ и ве́рно вопие́м Тебе́, Госпоже́, раби́ Твои́:/ поми́луй ста́до Твое́, Еди́на Пренепоро́чная.
Песнь 4
Ирмос: Любве́ ра́ди, Ще́дре, Твоего́ о́браза,/ на Кресте́ Твое́м стал еси́,/ и раста́яшася язы́цы,/ Ты бо еси́, Человеколю́бче,/ кре́пость моя́ и хвале́ние.
Припев: Святи́телю о́тче Ни́фонте, моли́ Бо́га о на́с.
Всечестны́я твоя́ мо́щи, святи́телю Ни́фонте,/ дом Пресвята́го Ду́ха бысть,/ во гро́бе бо лежа́ со отцы́ Ки́евския пеще́ры,/ ду́хи лука́выя от челове́к прогоня́еши/ си́лою И́же в тебе́ живу́щаго Ду́ха Свята́го.
Припев: Святи́телю о́тче Ни́фонте, моли́ Бо́га о на́с.
Отверзо́шася тебе́, о́тче, святи́телю Христо́в Ни́фонте, Еде́мския две́ри/ ра́ди доброде́тельнаго жития́ твоего́ к Бо́гу и чистоты́,/ и к святи́телем приложи́ся, святи́телю,/ перворо́дных Це́ркви сочета́ся, достосла́вне.
Сла́ва Отцу́ и Сы́ну и Свято́му Ду́ху.
Просвеща́ется красото́ю и зва́нием Небе́сных сия́ний престо́л,/ и́же на земли́ Вели́каго Нова́гра́да оста́вил еси́, святи́телю Ни́фонте,/ и насле́дие нетле́нно в земли́ кро́тких,/ я́ко кро́ток, восприя́л еси́ со святы́ми.
И ны́не и при́сно и во ве́ки веко́в. Ами́нь.
Богородичен: И́же во Твою́ утро́бу, Де́во, Богоприя́тную/ па́че естества́ всели́выйся Христо́с Бог наш,/ Сей по рождестве́ Боже́ственною си́лою Свое́ю/ Тя, Де́ву, соблюде́ Пречи́сту.
Песнь 5
Ирмос: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.
Припев: Святи́телю о́тче Ни́фонте, моли́ Бо́га о на́с.
Я́ко вели́ко облиста́л еси́ со́лнце, от сла́внаго вели́каго Нова́гра́да/ заре́ю слове́с твои́х и чуде́с, сия́ние испуща́я во всю Ру́сскую зе́млю,/ Ни́фонте о́тче, святи́телю Бо́жий,/ и вся озаря́я, благоче́стно тя ублажа́ющия.
Припев: Святи́телю о́тче Ни́фонте, моли́ Бо́га о на́с.
Па́че ме́да услажда́ющее, Вели́каго Нова́гра́да наро́дом/ позна́ся уче́ние медото́чнаго и чи́стаго твоего́ язы́ка,/ сим наслажда́ющее ду́ши свяще́нными испове́дании/ и грехо́вную сим показу́ющее го́ресть,/ досточу́дне о́тче, свяще́нне Ни́фонте.
Сла́ва Отцу́ и Сы́ну и Свято́му Ду́ху.
Сла́ва святи́телем и ве́рным лю́дем засту́пник вои́стинну ты еси́,/ стране́ на́шей на враги́ испроси́ побе́ды и одоле́ние/ и во благоче́стии утверди́ ны непоколеби́мы,/ о́тче досточу́дне Ни́фонте.
И ны́не и при́сно и во ве́ки веко́в. Ами́нь.
Богородичен: Вси ро́ди челове́честии благоче́стно блажа́т Тя, Госпоже́ Пречи́стая Богоро́дице,/ вои́стинну ро́ждшую па́че естества́ и сло́ва/ Блаже́ннаго нам Го́спода, Сы́на Бо́жия.
Песнь 6
Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Припев: Святи́телю о́тче Ни́фонте, моли́ Бо́га о на́с.
Прему́дрости рачи́тель быв Боже́ственный,/ Богодухнове́нне о́тче свяще́нне Ни́фонте,/ и благоче́стия венце́м венча́ся, и все́ми о́бразы и де́лы/ учени́к быв светоно́сным отце́м Анто́нию и Феодо́сию.
Припев: Святи́телю о́тче Ни́фонте, моли́ Бо́га о на́с.
Жела́ние твое́ к Бо́гу испо́лнися,/ пресла́вне святи́телю Христо́в о́тче Ни́фонте,/ преста́ви бо ся к Нему́, Боже́ственно ра́дуяся,/ в немерца́ющий свет и в непреходи́мую ра́дость,/ и ны́не све́тлости святы́х, о́тче, зри́ши и красоты́.
Припев: Святи́телю о́тче Ни́фонте, моли́ Бо́га о на́с.
Благоле́пия венце́м укра́шен, сия́еши ны́не, святи́телю Ни́фонте,/ я́ко и́стинный архиере́й, пра́вдою вои́стинну оде́явся,/ и преда́ние Спа́сово возлюби́л еси́,/ те́мже и зва́нию 7 Боже́ственному после́довал еси́, вопию́щу ти:/ вни́ди в ра́дость Го́спода своего́.
Сла́ва Отцу́ и Сы́ну и Свято́му Ду́ху.
Кро́ток, и незло́бив, и ми́лостив во всей жи́зни свое́й, о́тче Ни́фонте, был еси́,/ Влады́ки своего́ Христа́ стопа́м после́дуя,/ зе́млю кро́тких со святы́ми дости́гл еси́,/ сего́ ра́ди тя собо́ры благочести́вых воспева́ют Боже́ственными пе́сньми.
И ны́не и при́сно и во ве́ки веко́в. Ами́нь.
Богородичен: Кля́твы пе́рвыя прама́тери Е́вы/ рождество́м Твои́м, Госпоже́, Деви́це Чи́стая, свободи́хомся,/ Ты бо, Христа́ ро́ждши, Де́во,/ благослове́ние всем источи́ла еси́.
Кондак, глас 8
Возложи́в себе́ от ю́ности Бо́гу, преподо́бне,/ мир тле́нных нивочто́же вмени́в/ и па́че всех Христа́ возлюби́в,/ Тому́ от всея́ души́ любо́вию после́довал еси́/ и, я́ко светоза́рное со́лнце,/ от Ки́ева просия́ во вся концы́ Ру́сския земли́ доброде́телию,/ и бысть па́стырь вели́кому Нову́гра́ду,/ и, до́бре упа́с ста́до Христо́во слове́сных ове́ц на па́житех духо́вных,/ к Бо́гу отше́л еси́,/ и ны́не со А́нгелы Влады́чню Престо́лу предстоя́,/ нас помина́й, раб свои́х, да зове́м ти:/ ра́дуйся, о́тче Ни́фонте,/ святи́телем изря́дная похвало́.
Икос
Челове́к бо сый естество́м, о́тче,/ но па́че челове́ка подвиза́ся посто́м и бде́нием, в моли́твах и труде́х/ о́браз мно́гим бысть,/ сего́ ра́ди тя Бог архиере́я це́ркви Своея́ Прему́дрости Бо́жия устроя́ет/ и вели́каго Нова́гра́да лю́дем неле́ностна учи́теля,/ те́мже тя мо́лим:/ моли́ся, архиере́ю, Благоде́телю всех Бо́гу/ дарова́ти побе́ды на враги́/ и нам обрести́ ми́лость в День Су́дный,/ да велегла́сно тебе́ вопие́м:/ ра́дуйся, о́тче преподо́бне, и́же измла́да Госпо́день яре́м взем,/ де́монов победи́л еси́ полки́ моли́твами свои́ми;/ ра́дуйся, в Богохрани́мом гра́де Пско́ве оби́тель превели́ку и чу́дну устро́ивый над Ми́рожею реко́ю/ во сла́ву Боголе́пнаго Преображе́ния Христо́ва/ и и́нок мно́жество собра́вый сла́вити Бо́га./ Ра́дуйся, и́же сподо́бился еси́ в виде́нии ви́дети в Боже́ственном алтари́ Анто́ния и Феодо́сия Пече́рских,/ возвеща́ющих твое́ отше́ствие к Бо́гу;/ ра́дуйся, сподо́бивыйся со блаже́нными отцы́ Пече́рскими честны́м твои́м моще́м положе́нным бы́ти,/ иде́же и́го Госпо́дне прия́т./ Ра́дуйся, о́тче Ни́фонте, святи́телем изря́дная похвало́.
Песнь 7
Ирмос: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Припев: Святи́телю о́тче Ни́фонте, моли́ Бо́га о на́с.
Боже́ственная и пресве́тлая па́мять твоя́, святи́телю Ни́фонте,/ я́ко светоза́рное яви́ся со́лнце,/ светоно́сно просвеща́ющее ве́рныя лю́ди вели́каго Нова́гра́да,/ и́же без сумне́ния Христо́ви вопию́щия:/ оте́ц на́ших Бо́же, благослове́н еси́.
Припев: Святи́телю о́тче Ни́фонте, моли́ Бо́га о на́с.
Уста́вы оте́ческия утверди́л еси́, му́дре о́тче Ни́фонте,/ це́рковь Прему́дрости Бо́жия свяще́нства ле́потами преукра́сил еси́/ и сохрани́л еси́ ю уче́нии свои́ми невоева́нну 8,/ наказу́я взыва́ти:/ оте́ц на́ших Бо́же, благослове́н еси́.
Сла́ва Отцу́ и Сы́ну и Свято́му Ду́ху.
Ки́евска ме́ста я́ко досто́ин еси́,/ и та́мо положе́но бысть в пеще́ре честно́е те́ло твое́, святи́телю Ни́фонте, со отцы́,/ дух же твой возлете́ на Небеса́,/ со А́нгелы и апо́столы и со святи́тели ликовству́я,/ Святе́й Тро́ице предстоя́, моли́ся приле́жно за град и лю́ди твоя́, свя́те, Христу́ вопию́щия:/ оте́ц на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́нна Ты еси́ в жена́х, Всенепоро́чная Влады́чице.
Песнь 8
Ирмос: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телню препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Припев: Святи́телю о́тче Ни́фонте, моли́ Бо́га о на́с.
На Небесе́х чи́нове А́нгельстии лику́ют,/ и на земли́ ве́рных собо́ры све́тло пра́зднуют/ па́мять твою́, святи́телю Христо́в Ни́фонте, веселя́щеся и глаго́люще:/ честна́ пред Го́сподем смерть преподо́бных Его́, и пе́сньми сла́вяще Христа́:/ благослови́те, вся дела́ Госпо́дня, Го́спода.
Припев: Святи́телю о́тче Ни́фонте, моли́ Бо́га о на́с.
Ки́евстии свяще́ннии, и и́ночестии собо́ры, и про́стии лю́дие,/ пресла́вне святи́телю Христо́в Ни́фонте, воспева́ют тя/ на ме́сте, иде́же лежи́т те́ло твое́,/ источа́ющее исцеле́ния струи́, и стра́сти потопля́ющее,/ и ве́рных сердца́ ороша́ющее Боже́ственною благода́тию:/ благослови́те, вся дела́ Госпо́дня, Го́спода.
Благослови́м Отца́ и Сы́на и Свята́го Ду́ха, Го́спода.
Чи́сто житие́ свое́ сконча́л еси́,/ Чи́стыя Де́вы Богоро́дицы вои́стинну служи́тель бысть/ и святи́тель Бо́гови и́стинен,/ ревни́тель Правосла́вия и свяще́ние ве́ре,/ и стена́ лю́дем избра́нным, Богоблаже́нне.
И ны́не и при́сно и во ве́ки веко́в. Ами́нь.
Богородичен: Стряса́ем прах ме́ртвенный, нетле́нии бы́вше,/ Боже́ственным рождество́м Твои́м, Пречи́стая,/ есте́ственную бо и́стинную Жизнь и присносу́щную, Чи́стая Влады́чице, родила́ еси́,/ те́мже Тя благослови́м, Мари́е Богоневе́стная:/ благослови́те, вся дела́ Госпо́дня, Го́спода.
Песнь 9
Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.
Припев: Святи́телю о́тче Ни́фонте, моли́ Бо́га о на́с.
Днесь день пра́здничный,/ па́мять твоего́ преставле́ния, Христо́в святи́телю Ни́фонте,/ созыва́ет святи́телей собо́ры, и́ноков стада́/ на весе́лие духо́вное и трапе́зу неги́бнующия сне́ди,/ пи́щу нетле́нныя жи́зни предлага́я нам.
Припев: Святи́телю о́тче Ни́фонте, моли́ Бо́га о на́с.
Чи́стым се́рдцем и Боже́ственным восхожде́нием/ ум свой впери́в, Еди́наго Бо́га зре́ти добро́ту сподо́бился еси́/ и отту́ду светоли́тием просвеща́еши ве́рныя,/ Богому́дре святи́телю Христо́в, Ни́фонте свяще́нне.
Припев: Святи́телю о́тче Ни́фонте, моли́ Бо́га о на́с.
Оби́тели, в не́йже сподо́бился еси́ яре́м Христо́в прия́ти,/ вся дни свои́ ве́рою и ду́хом, кроме́ телесе́, неразлу́чен, о́тче, пребы́л еси́,/ те́мже и по преставле́нии свое́м та́мо сподо́бился еси́ положи́тися,/ иде́же чудесе́м дарова́ния от Го́спода прия́л еси́,/ святи́телю Христо́в Ни́фонте.
Сла́ва Отцу́ и Сы́ну и Свято́му Ду́ху.
Днесь пресве́тлая па́мять твоя́, святи́телю Ни́фонте, возсия́вши,/ всех ве́рных сердца́ просвеща́ет,/ те́мже и о пе́ние произве́дшему ти моли́ Христа́ Бо́га,/ сохрани́тися ему́ от лука́ваго ловле́ния/ и получи́ти ми́лость в День Су́дный.
И ны́не и при́сно и во ве́ки веко́в. Ами́нь.
Богородичен: Исто́чник безсме́ртия нам источи́ла еси́, Де́во, и оставле́ния во́ду,/ Христа́ ро́ждши, И́мже очища́емся от вся́кия скве́рны грехо́вныя,/ Богоневе́сто, Ма́ти Христо́ва.
Светилен
Благода́ть Свята́го Ду́ха, все́льшаяся в тя,/ святи́теля тя показа́ и́стинна,/ Христо́с тебе́ вручи́ ста́до Свое́ па́ствити на па́житех духо́вных,/ сего́ же ра́ди потща́лся еси́ наставля́ти лю́ди/ и ны́не на Небесе́х живе́ши, ра́дуяся.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: По Бо́зе упова́ние иму́ще на Тя,/ Пречи́стая Богоро́дице, мо́лим Ти ся:/ ко из Тебе́ Ро́ждшемуся мольба́ми/ невреди́мы нас до конца́ сохрани́.
Комментировать