Минея, 7 Мая.
Глас 4
Песнь 1
Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, То́я чудеса́.
Припев: Пресвята́я Богоро́дице, спаси́ на́с.
В Тя, одушевле́нный Черто́же, Бог всели́ся/ и, чрез Тебе́ проше́д, яви́ся Спас ми́ра Госпо́дь,/ темже Тя, Богоро́дице, вои́стинну велича́ем.
Припев: Пресвята́я Богоро́дице, спаси́ на́с.
Ты еси́, Ма́ти Бо́жия, ми́ру Предста́тельница, мо́лим Тя, Де́во:/ простри́ ру́це Свои́ богоно́снии к Сы́ну Твоему́ Боже́ственному, о нас умоля́ющи,/ да поми́лует лю́ди Своя́ погиба́ющия.
Сла́ва Отцу́ и Сы́ну и Свято́му Ду́ху.
Госпоже́ Пречи́стая, Ма́ти Бо́жия, Помо́щнице на́ша всеси́льная,/ Ты бо к Тебе́ прибега́ющим ми́лость чрез ико́ны цельбоно́сныя да́руеши,/ и ны́не Тя мо́лим, Пречи́стая:/ освяти́ нас ико́ною Твое́ю чудотво́рною,/ ю́же в оби́тели Жиро́вицкой просла́вила еси́.
И ны́не и при́сно и во ве́ки веко́в. Ами́нь.
Кто Тебе́ не ублажи́т, Пресвята́я Де́во?/ А́нгельский собо́р и челове́ческий род по до́лгу Тя прославля́ет:/ Тебе́ бо ра́ди Христо́с в мир яви́ся,/ Его́же прославля́юще, Тя велича́ем.
Песнь 3
Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́/ в Боже́ственней Твое́й сла́ве/ венце́в сла́вы сподо́би.
Припев: Пресвята́я Богоро́дице, спаси́ на́с.
Ты еси́ Одиги́трия, Деви́це, Путеводи́тельница на́ша,/ не оста́ви лю́ди, Тя возлюби́вшия,/ но при́сно руководи́,/ чрез мо́ре жите́йское препровожда́ющи в Ца́рство Преве́чное Сы́на Твоего́.
Припев: Пресвята́я Богоро́дице, спаси́ на́с.
Ма́ти ро́ду челове́ческому изво́лила еси́ бы́ти, Пречи́стая,/ те́мже мы, я́ко ча́да неуте́шная, к Тебе́, Засту́пнице ро́да христиа́нскаго, усе́рдно прибега́ем:/ не оста́ви нас, си́рых, Влады́чице,/ но ско́ро простри́ ру́ку Свою́ благоде́ющую,/ изыма́ющую ны от ти́ны грехо́вныя,/ утвержда́ющи на пути́ покая́ния.
Сла́ва Отцу́ и Сы́ну и Свято́му Ду́ху.
Звездо́ пресве́тлая, Богоро́дице,/ ико́нами чудотво́рными мир озари́вшая,/ просвети́ наш ра́зум, грехми́ помраче́нный,/ и да́руй нам сла́вити Тя во ве́ки.
И ны́не и при́сно и во ве́ки веко́в. Ами́нь.
Днесь, ве́рнии, любо́вию совокупи́вшиися, Ма́терь Бо́жию просла́вим,/ пропове́дующе чудеса́ Ея́, от ико́ны Жиро́вицкия явле́нныя, и Спа́су вопие́м:/ приими́ моли́твы ро́ждшия Тя Богоро́дицы/ и спаси́ ду́ши на́ша.
Седален, глас 8
Днесь торжеству́ет све́тло оби́тель Жиро́вицкая,/ прославля́ющи Ма́терь Бо́жию, ме́сто сие́ освяти́вшую/ и о́браз Свой, я́ко дар многоце́нный, лю́дем оста́вившую./ Тем у́бо припа́даем, ве́рнии, к честне́й ико́не Влады́чицы,/ да́рует бо ве́рным освяще́ние/ и укрепля́ет сердца́ малоду́шная,/ в жизнь ве́чную приводя́щи.
Песнь 4
Ирмос: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Припев: Пресвята́я Богоро́дице, спаси́ на́с.
Ны́не сла́вит правосла́вных люде́й мно́жество чудеса́ Твоя́, Богоро́дице,/ зе́млю бо Ру́сскую нам озари́вшая/ и свет Правосла́вия утверди́вшая.
Припев: Пресвята́я Богоро́дице, спаси́ на́с.
Купино́ неопали́мая,/ о́браз Свой во огни́ неврежде́нно сохра́ншая,/ попали́ скве́рну душ на́ших,/ к святе́й ико́не Твое́й с ве́рою прибега́ющих.
Сла́ва Отцу́ и Сы́ну и Свято́му Ду́ху.
Ты, Влады́чице, ико́ну Свою́ па́ки дарова́ла еси́/ на ка́мени вели́цем во оби́тели Жиро́вицкой,/ назна́менуя нам путь спасе́ния на ка́мени ве́ры – Христе́.
И ны́не и при́сно и во ве́ки веко́в. Ами́нь.
Днесь А́нгели и челове́цы песнь Го́сподеви воспева́ют,/ сла́вяще Пречи́стую Де́ву Богоро́дицу.
Песнь 5
Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Припев: Пресвята́я Богоро́дице, спаси́ на́с.
Прииди́те, ве́рнии, ко кла́дезю ми́лостей Бо́жия Ма́тере,/ всех нас покро́вом Свои́м покрыва́ющей/ и о спасе́нии на́шем Христа́ умоля́ющей.
Припев: Пресвята́я Богоро́дице, спаси́ на́с.
Кто испове́сть чудеса́ Твоя́, Богороди́тельнице?/ Да́руеши бо ве́рным ми́лости бога́тыя/ и исцеля́еши неду́ги душе́вныя и теле́сныя.
Сла́ва Отцу́ и Сы́ну и Свято́му Ду́ху.
Вси, притека́ющии с ве́рою к цельбоно́сному о́бразу Твоему́, Де́во,/ прие́млют освяще́ние и по́мощь в напа́стех, на ны находя́щих.
И ны́не и при́сно и во ве́ки веко́в. Ами́нь.
Ра́дуйся, оби́тель Жиро́вицкая, сокро́вище вели́кое зде храня́щая,/ покро́в неви́димый, свет неме́ркнущий–/ о́браз Чи́стыя Богоро́дицы.
Песнь 6
Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Припев: Пресвята́я Богоро́дице, спаси́ на́с.
Лику́йте, и́ноцы,/ днесь бо Небе́сная Игу́мения оби́тели Жиро́вицкия прославля́ется,/ днесь бо бога́тно ми́лости излива́ются от ико́ны Пресла́вныя Богоро́дицы.
Припев: Пресвята́я Богоро́дице, спаси́ на́с.
Ты еси́ Наста́вница целому́дрия,/ Ты еси́ учи́лище благоче́стия,/ Ты еси́ любве́ неистощи́мый Исто́чник,/ святы́й о́браз нам яви́вшая.
Сла́ва Отцу́ и Сы́ну и Свято́му Ду́ху.
Облагодати́ наш ум,/ ни́зу прекло́ншийся, Де́во Пречи́стая Богоро́дице,/ Тя ны́не ра́достно сла́вящих.
И ны́не и при́сно и во ве́ки веко́в. Ами́нь.
Воспо́йте, ве́рнии, песнь Боже́ственную,/ сла́вяще Ма́терь Бо́жию,/ Христа́ всему ми́ру роди́вшую.
Кондак, глас 4
Вели́чия Твоя́ кто испове́сть,/ Пресвята́я Де́во,/ Творца́ всех Христа́ Бо́га ро́ждшая?/ Еди́на бо еси́ Ма́ти и Де́ва/ Преблагослове́нная и Препросла́вленная,/ упова́ние на́ше, исто́чник благосты́ни,/ ве́рным прибе́жище и ми́ру спасе́ние.
Икос
От лет дре́вних ико́ною чудотво́рною оби́тель Жиро́вицкая сла́вится,/ зде бо неду́гом исцеле́ние, телесе́м здра́вие и душа́м спасе́ние соверша́ется./ Те́мже припа́дающе, ве́рнии, к святе́й ико́не Влады́чицы, вопие́м:/ Де́во Пречи́стая,/ испроси́ у Христа́ Бо́га ве́лию ми́лость/ всем, с ве́рою к Тебе́ притека́ющим,/ Ты бо ве́рным прибе́жище и ми́ру спасе́ние.
Песнь 7
Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Припев: Пресвята́я Богоро́дице, спаси́ на́с.
Осуши́ сле́зы ско́рбных, Ра́досте на́ша Богоро́дице,/ к Тебе́ с ве́рою приходя́щих,/ и да́руй нам по́мощь вели́кую.
Припев: Пресвята́я Богоро́дице, спаси́ на́с.
Не оста́ви, Пречи́стая, ту́не рабо́в Твои́х,/ к честне́й ико́не Твое́й со стра́хом припа́дающих,/ и умоли́ о нас Всеси́льнаго Бо́га на́шаго,/ да да́рует ми́лость в День су́дный.
Сла́ва Отцу́ и Сы́ну и Свято́му Ду́ху.
О́браз Твой святы́й прославля́юще, ра́дуемся, Влады́чице,/ по́моще на́ша и стено́ неруши́мая/ всех, с ве́рою к Тебе́ прибега́ющих.
И ны́не и при́сно и во ве́ки веко́в. Ами́нь.
О Тебе́ ра́дуемся и Тя прославля́ем, Де́во Пречи́стая,/ я́ко Невмести́маго вмести́ла еси́,/ Его́же при́сно моли́ о спасе́нии на́шем.
Песнь 8
Ирмос: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Припев: Пресвята́я Богоро́дице, спаси́ на́с.
Ки́ими пе́сньми просла́вим Богоро́дицу,/ да́ры нам вели́кия подаю́щую,/ чудоде́йственным бо о́бразом Свои́м подвиза́ет нас к пе́нию:/ Го́спода по́йте, дела́,/ и превозноси́те во вся ве́ки.
Припев: Пресвята́я Богоро́дице, спаси́ на́с.
О, безчи́сленное чуде́с мно́жество ро́ду христиа́нскому яви́вшая/ и ми́лости Своя́ неоску́дно источа́ющая,/ тем Тя пое́м во вся ве́ки.
Благослови́м Отца́ и Сы́на и Свята́го Ду́ха, Го́спода.
Я́коже о́троцы неопали́мии в пещи́ яви́шася,/ та́ко де́вство в рождестве́ сохрани́ла еси́, Пречи́стая Де́во Богоро́дице,/ тем Тя пое́м во вся ве́ки.
И ны́не и при́сно и во ве́ки веко́в. Ами́нь.
Христа́ славосло́вим, ми́ра Спаси́теля,/ и Де́ву Пречи́стую сла́вим,/ я́ко вои́стинну Богоро́дицу.
Песнь 9
Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Припев: Пресвята́я Богоро́дице, спаси́ на́с.
Премилосе́рдная Влады́чице,/ приими́ моли́твы всех, Тя ны́не сла́вящих и о́браз Твой честву́ющих,/ да́руй всем оставле́ние прегреше́ний мно́гих.
Припев: Пресвята́я Богоро́дице, спаси́ на́с.
Приими́ нас, пою́щих Тебе́, Де́во,/ и к о́бразу Твоему́, я́ко к зна́мению ми́лости Твоея́, притека́ющих,/ и да́руй рабо́м Твои́м ми́лости превели́кия.
Сла́ва Отцу́ и Сы́ну и Свято́му Ду́ху.
Облагоуха́й нас, многогре́шных, Влады́чице, смра́ду грехо́вному прича́стных,/ изми́ нас из про́пасти поги́бельныя,/ утверди́вши во благоче́стии.
И ны́не и при́сно и во ве́ки веко́в. Ами́нь.
Спа́се ми́ра и Го́споди,/ приими́ песнь ра́достную,/ дал бо еси́ лю́дем Засту́пницу,/ Ю́же велича́юще, Тя при́сно сла́вим.
Светилен
Спаси́ от бед рабы́ Твоя́, Премилосе́рдная Влады́чице,/ я́ко мы усе́рдно к Тебе́ во оби́тели Жиро́вицкой прибега́ем,/ я́ко к неруши́мой стене́ и предста́тельству,/ ско́рой Помо́щнице и Хода́таице жи́зни ве́чныя.
Молитва Пресвятой Богородице пред иконой Ея «Жировицкой»
О Премилосе́рдная Госпоже́, Де́во Богоро́дице! Ки́има устна́ма прикосну́ся ко святы́ни Твое́й или́ ки́ими словесы́ испове́м щедро́ты Твоя́, лю́дем явля́емыя: никто́же бо, притека́яй к Тебе́, отхо́дит тощ и не услы́шан. От ю́ности моея́ взыска́х по́мощи и заступле́ния Твоего́ и николи́же лише́н бых милосе́рдия Твоего́. Зри́ши, Госпоже́, ско́рби се́рдца моего́ и я́звы души́ моея́ ве́си. И ны́не, коленопреклоне́нно предстоя́ пред пречи́стым Твои́м о́бразом, моле́ния моя́ приношу́ Ти: не лиши́ мя всеси́льнаго хода́тайства Твоего́ в день ско́рби моея́ и в день печа́ли моея́ заступи́ мя. То́ка слез мои́х не отврати́ся, Влады́чице, и ра́дости мое́ се́рдце испо́лни. Прибе́жище и предста́тельство бу́ди мне, Ми́лостивая, и све́та Твоего́ заря́ми ум мой просвети́. И не то́кмо молю́ Тя о себе́, но и о лю́дех, притека́ющих к заступле́нию Твоему́. Це́рковь Сы́на Твоего́ во бла́гости соблюди́ и огради́ ю от злоко́зненных наве́тов враг, возстаю́щих на ню. Архипа́стырем на́шим посли́ по́мощь Твою́ во апо́стольстве и сохрани́ их здра́вы, долгоде́нствующи, пра́во пра́вящи сло́во и́стины Госпо́дни. Па́стырем испроси́ у Бо́га, Сы́на Твоего́, ре́вность и бде́ние о ду́шах вруче́ннаго им ста́да слове́снаго и дух ра́зума и благоче́стия, чисто́ты и пра́вды Боже́ственныя им ниспосли́. Испроси́ та́кожде, Влады́чице, у Го́спода власте́м предержа́щим и градоправи́телем му́дрость и си́лу, судия́м пра́вду и нелицеприя́тие, всем же, притека́ющим к Тебе́, дух целому́дрия, смиреному́дрия, терпе́ния и любве́. Еще́ же молю́ Тя, Премилосе́рдная, осени́ страну́ на́шу кро́вом Твоея́ благосты́ни и изба́ви ю от бе́дствий стихи́йных, наше́ствия иноплеме́нников и междоусо́бных нестрое́ний, да вси, живу́щии в ней, в любви́ и ми́ре пребыва́юще, ти́хое и безмяте́жное житие́ поживу́т и, благ ве́чных моли́твами Твои́ми унасле́дивше, возмо́гут ку́пно с Тобо́ю восхваля́ти Бо́га на Небеси́ во ве́ки. Ами́нь.
И́на моли́тва Пресвятой Богородице пред иконой Ея «Жировицкой»
О, Всепе́тая и Преблагослове́нная Де́во, Ма́ти Христа́ Бо́га на́шего, приими́ моле́ния на́ша Тебе́ прославля́ющих, Тебе́ благодаре́ния принося́щих и почита́ющих честну́ю ико́ну сию́, ю́же от лет дре́вних в оби́тели Жиро́вицкой явле́нную. Не таи́м благодея́ния Твоя́, Богоро́дице, и па́ки испове́дуем, я́ко сия́ и́кона Твое́й благода́тной си́лой всем, с ве́рой приходя́щим к ней, источа́ет неоску́дныя ми́лости: просвеща́ет сердца́ благоче́стием, укрепля́ет си́лы осла́бленныя и исцеля́ет не́мощи духо́вныя и теле́сныя. О, Всепе́тая Цари́ца Небе́сная, приими́ благода́рственное пе́ние и никогда́ не лиши́ нас Твоего́ Небе́снаго покро́ва и заступле́ния – вся бо мо́жет моли́тва Ма́тери к Милосе́рдному Боже́ственному Сы́ну, о сем бо вели́ком заступле́нии возвеща́ет нам сия́ ма́лая ико́на, я́ко бесце́нное сокро́вище, на сем ме́сте обрете́нное. Благода́тная Ма́ти Бо́жия, Ты, и в огни́ о́браз сей сохра́ншая, па́ки да́руеши его́ в зало́г Твое́й бли́зости к нам и всегда́шняго благода́тнаго заступле́ния. О, Пречи́стая Влады́чице, умягчи́ сердца́ на́ша, окамене́нныя грехо́м, да согре́тыя благода́тными Твои́ми моли́твами испо́лним Боже́ственныя за́поведи Сы́на Твоего́ Го́спода на́шего Иису́са Христа́, и та́ко дости́гнем несконча́емаго дне Ца́рствия Бо́жия, в онь же мы при́званы со все́ми святы́ми. Ами́нь.
Комментировать