Текст акафиста утвержден для употребления за богослужением и в домашней молитве на заседании Священного Синода 24 августа 2023 года (журнал № 68).
Кондак 1
Избра́ннии от Бо́га святи́и сро́дницы на́ши, в ми́ре пожи́вшии, оба́че от ми́ра не су́щии, я́ко в предста́тельствах ва́ших наде́жду иму́ще спасе́ния, благода́рственная прино́сим пе́ния и хвале́ния, недосто́йнии сооте́чественницы ва́ши, вы́ же я́ко стяжа́вшии оте́чество ве́чное, от вся́ких на́с бе́д свободи́те, зову́щих: Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Икос 1
А́нгелом соревни́телие и челове́ком наста́вницы в ми́ре яви́стеся, святи́и сро́дницы на́ши, от дре́вних родо́в до ны́не многоразли́чными по́двиги Бо́га просла́вльшии. Мы́ же пресве́тлый собо́р ва́ш ку́пно и коего́ждо по и́мени хва́ляще, си́це зове́м:
Ра́дуйтеся, святи́телие, преподо́бнии и блаже́ннии, издре́вле зе́млю сию́ облагоуха́вшии;
ра́дуйтеся, новомученицы, но́вый гра́д Ива́ново-Вознесе́нск и преде́лы его́ освяти́вшии.
Ра́дуйтеся, благоче́стия оте́ческаго насле́дницы;
ра́дуйтеся, в после́дняя ле́та Христу́ сострада́льцы.
Ра́дуйтеся, Преда́ние непоро́чно сохра́ньшии;
ра́дуйтеся, до дне́сь свиде́тельство ве́ры просте́ршии.
Ра́дуйтеся, о́бразы спасе́ния коему́ждо показу́ющии;
ра́дуйтеся, о спасе́нии все́х Еди́наго Бо́га моля́щии.
Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Кондак 2
Ви́дя сердцеве́дец Госпо́дь зало́г смире́ния ва́шего, и ве́ру со упова́нием, и тру́д любве́, и ре́вность о сла́ве Его́, благода́тию Ду́ха Свята́го неизрече́нно обогати́ ва́с; в то́м же Ду́се и на́с земноро́дных моли́твы прие́млете, любо́вию пою́щих о ва́с: Аллилу́иа.
Икос 2
Ра́зум кичли́вый и мудрова́ние пло́ти отве́ргше, святи́телие Бо́гому́дрии, Ду́ха еле́й в сосу́дех се́рдца стяжа́ли есте́, я́ко да просвети́тся све́т ва́ш пред челове́ки. Те́мже и мы́, недосто́йная ча́да ва́ша, с весе́лием вопие́м:
Ра́дуйся, Митрофа́не, святи́телю Воро́нежский, земли́ на́шея благо́е прозябе́ние;
ра́дуйся, па́стырю трудолю́бный, ста́ду слове́сному огра́до и утеше́ние.
Ра́дуйся, нача́ток и́ноческаго жития́ в Золотнико́вской пу́стыни положи́вый;
ра́дуйся, Це́ркви и оте́честву вседу́шно до конца́ послужи́вый.
Ра́дуйся, Августи́не, пе́рвый архипа́стырю гра́да Ива́нова;
ра́дуйся, крестоно́сче, путеводя́й на́с ко Гра́ду Небе́сному.
Ра́дуйся, от наро́да Бо́жия возлю́бленный и избра́нный;
ра́дуйся, святы́м Патриа́рхом Ти́хоном поста́вленный.
Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Кондак 3
Си́лою свы́ше облеко́стеся све́тло, святи́и, о́вому бо да́р проро́чества, о́вому же исцеле́ния, ино́му сло́во му́дрости, ино́му же дерзнове́ние му́ченическое Те́м же Ду́хом даде́ся, да во все́х прославля́ется Бо́г Еди́н, в Тро́ице воспева́емый: Аллилу́иа.
Икос 3
Иму́ще дерзнове́ние мно́го, я́ко утвержде́ни на ка́мени ве́ры, му́ченицы крепкоду́шнии, некре́пкаго врага́ победи́ли есте́ си́лою Кре́стною; приими́те у́бо от на́с похвалы́ сицевы́я:
Ра́дуйся, о́тче Влади́мире, Ле́жнева до́брый па́стырю;
ра́дуйся, ю́ным и отроко́м му́дрый учи́телю.
Ра́дуйся, изгна́ние и го́рькия рабо́ты за Христа́ понесы́й;
ра́дуйся, на о́строве А́нзере Голго́фу свою́ обреты́й.
Ра́дуйся, о́тче Евфи́мие, Це́ркви гони́мей служи́ти изво́ливый;
ра́дуйся, во хра́ме пу́сте же́ртву о людски́х гресе́х приноси́вый.
Ра́дуйся, я́ко да́нный ти́ зало́г до конца́ непоро́чно соблю́л еси́;
ра́дуйся, я́ко Христа́ пору́гана и ра́спята страда́в не отве́рглся еси́.
Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Кондак 4
Бу́рею зло́бы богобо́рцы смуща́еми бы́вше, тща́хуся па́ки распя́ти Христа́, па́стырей Це́ркве и ве́рных в темни́цы влеку́ще и убива́юще; вы́ же, страда́льцы святи́и, свиде́тельство ми́ру яви́сте, я́ко воскре́се Христо́с, пою́ще Ему́: Аллилу́иа.
Икос 4
Слы́шавше жи́телие гра́да Шу́и о разоре́нии хра́мов Бо́жиих, предста́ша зау́тра о́крест це́ркве собо́рныя, во е́же не преда́ти святы́ни на поруга́ние, а́ще и увеща́еми бы́ша от па́стыря злу́ не проти́витися. Мы́ же си́х страда́льцев безви́нных похвала́ми венча́ем, глаго́люще:
Ра́дуйся, о́тче Па́вле, от ю́ности Христу́ послужи́вый;
ра́дуйся, Ему́ еди́ному сиро́т твои́х поручи́вый.
Ра́дуйся, о́тче Иоа́нне, Па́леха избра́нное украше́ние;
ра́дуйся, па́стве твое́й и ве́рным все́м утвержде́ние.
Ра́дуйся, Пе́тре, за ре́вность о хра́ме Бо́жии пострада́вый;
ра́дуйся, судо́м непра́ведным осужде́нный, ду́шу же твою́ оправда́вый.
Ра́дуйтеся, Нико́лае и Авксе́нтие, Се́ргие и Анастаси́е, от безбо́жных избие́ннии;
ра́дуйтеся, первому́ченицы земли́ на́шея, ли́ку святы́х сопричте́ннии.
Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Кондак 5
Боготе́чныя зве́зды во тьме́ безбо́жия су́щим яви́стеся, священнострада́льцы святи́и, о́браз бо ве́рным бы́сте сло́вом и житие́м, любо́вию, ду́хом, ве́рою и чистото́ю, к мы́сленному со́лнцу пра́вды Христу́ приводя́ще зову́щих Ему́: Аллилу́иа.
Икос 5
Ви́девше па́стырие Це́ркве Христо́вы ста́до свое́ расхища́емо от во́лка душегуби́теля, потща́шася ду́ши своя́ положи́ти за о́вцы, глаго́лом Бо́жиим и моли́твою на зве́ря льсти́ваго устреми́шася, и того́ до конца́ попра́вше, кро́вию свое́ю в черто́г небе́сный внидо́ша; оба́че не оста́вите си́рых и на́с, вопию́щих:
Ра́дуйся, о́тче Пе́тре, гра́да Родники́ живоно́сный исто́чниче;
ра́дуйся, нестяжа́телю, апо́стольских трудо́в соприча́стниче.
Ра́дуйся, уста́ совопро́сников безбо́жных загради́вый;
ра́дуйся, ве́рность Христу́ да́же до сме́рти яви́вый.
Ра́дуйся, Иоа́нне, ве́си Дорки́ свяще́нниче ре́вностный;
ра́дуйся, шко́лы и пе́ния церко́внаго устрои́телю усе́рдный.
Ра́дуйся, я́ко отрече́нием свобо́ду купи́ти не восхоте́л еси́;
ра́дуйся, я́ко: слу́жу Бо́гу моему́, до́ндеже е́смь, мучи́телем отвеща́л еси́.
Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Кондак 6
Пропове́дует Це́рковь Ру́сская у́зы и ско́рби ва́ша, святи́и, вы́ бо от бли́жних и ча́д разлуча́еми, в темни́цах мно́гажды затворя́еми, оклевета́еми и гони́ми, рабо́тами тя́жкими изнуря́еми, многообра́зне умерщвля́еми ве́ры ра́ди, любве́ Христо́вы ника́коже разлучи́стеся, при́сно пою́ще Ему́: Аллилу́иа.
Икос 6
Возсия́сте в земли́ Ру́сской, я́ко заря́ невече́рняго дне́, страда́льцы честни́и, ва́ми бо тьма́ безбо́жныя зло́бы отгна́ся, и гре́х богоотступле́ния в ро́де на́шем потребля́ется, мы́ же, ко све́ту Богоразу́мия ва́ми наста́влени, си́це глаго́лем:
Ра́дуйся, Константи́не, Кинеше́мския оби́тели Успе́ния духо́вный наста́вниче;
ра́дуйся, в оби́тель сию́ разоре́нную заключе́нный за Христа́ испове́дниче.
Ра́дуйся, преще́ний мучи́тельских не убоя́выйся;
ра́дуйся, мучениическую кончи́ну во изгна́нии восприе́мый.
Ра́дуйся, Иоа́нне, в Ре́шемском монастыри́ Бо́гу послужи́вый;
ра́дуйся, я́ко зла́то в горни́ле страда́ний искуше́нно яви́выйся.
Ра́дуйтеся, Елисаве́то и А́нно, на изгна́ние непра́ведно осужде́нныя;
ра́дуйтеся, му́ченицы терпеливоду́шныя и достосла́вныя.
Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Кондак 7
Хотя́ Человеколю́бец Госпо́дь поми́ловати лю́ди согре́шшия, яви́ в земли́ Ру́сской со́нм испове́дников но́вых, да те́х призыва́юще в по́мощь, и в покая́ния ри́зу обле́кшеся, благонаде́жне зове́м: Аллилу́иа.
Икос 7
Ди́вное чу́до явля́ется все́м, любо́вию ва́с призыва́ющим, новомученицы святи́и, вы́ бо неду́зи от ду́ш и теле́с отгоня́ете, ско́рбь и печа́ль потребля́ете, ве́ру в малове́рных сердца́х утвержда́ете. Мы́ же, по Бо́зе на ва́с упова́юще, си́це взыва́ем:
Ра́дуйся, о́тче Фео́доре, шу́йских церкве́й благочи́нне и па́стырю добронра́вный;
ра́дуйся, за ве́рность Христу́ от мучи́телей зверонра́вных неми́лостивно убие́нный.
Ра́дуйся, я́ко три дни и три но́щи непра́ведно испыту́емый, не поколеба́лся еси́;
ра́дуйся, я́ко со́весть лжесвиде́тельством оскверни́ти не преклони́лся еси́.
Ра́дуйся, о́тче Алекса́ндре, хра́ма Бо́жия изде́тска ревни́телю;
ра́дуйся, дома́шния це́ркве те́плый храни́телю.
Ра́дуйся, па́ству и ча́да твоя́ моли́твою объемляй;
ра́дуйся, го́рькия рабо́ты и сме́рть за Христа́ прие́мый.
Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Кондак 8
Стра́нное слы́шание и виде́ние неудобопости́жное! Ка́ко кро́вию ва́шею, сла́внии, освяти́сте зе́млю Ру́сскую? Ка́ко же мо́щи ва́ша, в земли́ сокрове́нныя, бы́ша я́ко пшени́ца чи́стая в се́ятву, ту́чный кла́с приплоди́вшая все́м хотя́щим жа́ти спасе́ние, пою́щим о ва́с: Аллилу́иа.
Икос 8
Ве́сь у́м и жела́ние се́рдца к Бо́гу впери́ша, священному́ченицы смире́ннии, от па́ствы и ча́д разлуче́ни, беззако́нным суди́щам предста́ша, оба́че преще́ний мучи́тельских не убоя́вшеся, ве́рни да́же до сме́рти пребы́ша. И́хже пресве́тлую па́мять досто́йно восхва́лим, глаго́люще:
Ра́дуйся, о́тче Иоа́нне, в селе́нии Введе́нское це́ркви послужи́вый;
ра́дуйся, от у́тра до ве́чера жития́ твоего́ Бо́гу во́лею порабо́тавый.
Ра́дуйся, я́ко в ста́рости твое́й ини́и тя́ связа́ша и ведо́ша;
ра́дуйся, я́ко ду́шу твою́ по убие́нии А́нгели вознесо́ша.
Ра́дуйся, о́тче Константи́не, вои́стинну тве́рдый сло́вом;
ра́дуйся, исти́ны ве́ры изъясни́вый мно́гим ра́зумом.
Ра́дуйся, бо́дрость и му́жество в осно́ву жития́ положи́вый;
ра́дуйся, све́тлый вене́ц наде́жды своея́ улучи́вый.
Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Кондак 9
Вся́кое естество́ А́нгельское удиви́ся по́двигом ва́шим, святи́и, ка́ко во пло́ти су́ще и в ми́ре живу́ще, безпло́тнаго врага́ победи́ли есте́. Мы́ же таковы́я хода́таи и помо́щники в не́мощи на́шей иму́ще, благода́рно Бо́гу пое́м: Аллилу́иа.
Икос 9
Вети́я многовеща́ннии и Бо́гому́дрии мно́гими пе́сньми по достоя́нию святы́х восхвали́ша, мы́ же, а́ще и недосто́йнии и нему́дрии, оба́че любо́вию понужда́емии, дерза́ем си́це ва́с велича́ти:
Ра́дуйся, Ти́хоне преподо́бне, Лу́хскую пусты́ню нището́ю твое́ю обогати́вый;
ра́дуйся, под спу́дом мо́щи твоя́ сокро́вище некра́домо оби́тели твое́й оста́вивый.
Ра́дуйся, в безмо́лвии А́нгелом собесе́дниче;
ра́дуйся, об оте́честве твое́м при́сный моли́твенниче.
Ра́дуйся, о́тче Лео́нтие, измла́да и́ноческое житие́ возлюби́вый;
ра́дуйся, по вся́ дни́ о слу́жбе церко́вней поревнова́вый.
Ра́дуйся, испове́дниче, у́зами и скорбьми́ испыта́нный, я́ко зла́то;
ра́дуйся, ста́рче и моли́твенниче о лю́дех Бо́гоприя́тный.
Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Кондак 10
Спасти́ся хотя́й все́м челове́ком Промысли́тель Госпо́дь, мно́зей грехо́вней тьме́ належа́щей, в ми́р посыла́ет святы́я Своя́, да те́х любо́вию согрева́еми и ве́рою озаря́еми, уны́ния хла́дность отри́нем и к де́ланию устреми́мся, Христо́во И́мя всегда́ призыва́юще, пою́ще Ему́: Аллилу́иа.
Икос 10
Царю́ Христу́ приведо́стеся восле́д Цари́цы Небе́сныя, жены́ преподо́бныя, еди́ный с на́ми иму́щия о́браз и естество́, пото́ки сле́зными пла́мень страсте́й угаси́ли есте́, и вся́ку Христо́ву за́поведь ве́рно сотво́ршия, досто́йно ны́не прие́млете сла́вы венцы́. Услы́шите у́бо и на́с, вопию́щих:
Ра́дуйся, Севастиа́но, Шу́йския оби́тели Воскресе́ния смире́нная подви́жнице;
ра́дуйся, священному́ченика Серафи́ма ве́рная и безмо́лвная послу́шнице.
Ра́дуйся, архипа́стырю в житии́ его́ послужи́вшая;
ра́дуйся, пу́ть мученичества с ни́м раздели́вшая.
Ра́дуйтеся, Маргари́то и Тама́ро, голуби́цы, ми́р Христа́ ра́ди презре́вшия;
ра́дуйтеся, от монасты́ря разоре́ннаго во изгна́ние отлете́вшия.
Ра́дуйтеся, за любо́вь к Жениху́ Небе́сному на сме́рть осужде́нныя;
ра́дуйтеся, в черто́г Его́ А́нгелы сла́вно введе́нныя.
Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Кондак 11
Пе́ние всеумиле́нное приими́те от на́с недосто́йных, Сио́на го́рняго гра́ждане, вы́ бо юро́ди себе́ нареко́сте, прему́дрость, бога́тство и сла́ву ми́ра сего́ нивочто́же вмени́вше, сего́ ра́ди избра́ннии, возлю́бленнии и святи́и от Бо́га наре́кшеся, мно́гу мзду́ восприя́ли есте́, пое́те со А́нгелы ве́чную пе́снь: Аллилу́иа.
Икос 11
Светоявле́ннаго дне́ зарю́ в свое́м се́рдце иму́ще и Бо́госве́тлый ра́зум стяжа́вше, блаже́ннии, прозрева́ете я́сно гряду́щая и та́йная ду́ш облича́ете, к ве́чному све́ту все́х приводя́ще, усе́рдно ва́м воспева́ющих:
Ра́дуйся, Си́моне, на реце́ Е́лнати по́двиг юро́дства преднача́вый;
ра́дуйся, во гра́де Ю́рьевце претру́дное житие́ сконча́вый.
Ра́дуйся, блаже́нне Алекси́е, Си́мону в терпе́нии подража́телю;
ра́дуйся, гря́дущих прови́дче и та́йных сказа́телю.
Ра́дуйся, благоуха́нныя мо́щи твоя́ Введе́нской оби́тели дарова́вый;
ра́дуйся, лю́бящым тя́ прибега́ти в моли́тве к тебе́ завеща́вый.
Ра́дуйся, стра́нниче Макси́ме, ра́зум су́етный блаже́нным безстра́стием премени́вый;
ра́дуйся, за чистоту́ серде́чную проро́чества да́ром укра́шенный.
Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Кондак 12
Благода́ти Свята́го Духа сосу́ди честни́и, мно́гия по́двиги ва́ша ки́й язы́к от земны́х изрече́т? Мы́ же ди́вному во святы́х Свои́х Бо́гу при́сно пое́м: Аллилу́иа.
Икос 12
Пою́ще по́двиги ва́ша, святи́и, диви́мся зело́ доброде́телей све́тлости, устраша́емся о́ных сла́вы блиста́ния, уязвля́емся сла́дце любо́вию ва́шею и ду́хом ре́вности исполня́емся, да ва́м по си́ле после́дующе, и ра́дости ва́шея о́бщницы бу́дем, зову́щии:
Ра́дуйтеся, святи́телие Бо́гому́дрии, сло́вом Бо́жиим зе́млю на́шу озари́вшии;
ра́дуйтеся, священному́ченицы, про́поведь Ева́нгельскую кро́вию запечатле́вшии.
Ра́дуйтеся, мученицы всехва́льнии, я́ко ва́ми Це́рковь Христо́ва утверди́ся;
ра́дуйтеся, испове́дницы кре́пцыи, я́ко ва́ми вся́кая ле́сть низложи́ся.
Ра́дуйтеся, отцы́ преподо́бнии, я́ко и́стину глаго́л Бо́жиих в житии́ свое́м показа́сте;
ра́дуйтеся, жены́ преблаже́нныя, я́ко в не́мощи пло́ти ва́шея Бо́жию си́лу яви́сте.
Ра́дуйтеся, Христа́ ра́ди юро́дивии, чи́стым се́рдцем Бо́га узре́вшии;
ра́дуйтеся, пра́веднии, в ми́ре я́ко свети́льницы просия́вшии.
Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Кондак 13
О святи́и сро́дницы на́ши, многообра́зне угоди́вшии Бо́гу! Недосто́йная моле́ния на́ша прие́мше, ми́лостиваго Бо́га моли́те из глубины́ грехо́вныя воздви́гнути и ве́чных му́к свободи́ти ны́, о ва́с вопию́щия: Аллилу́иа.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
А́нгелом соревни́телие и челове́ком наста́вницы в ми́ре яви́стеся, святи́и сро́дницы на́ши, от дре́вних родо́в до ны́не многоразли́чными по́двиги Бо́га просла́вльшии. Мы́ же пресве́тлый собо́р ва́ш ку́пно и коего́ждо по и́мени хва́ляще, си́це зове́м:
Ра́дуйтеся, святи́телие, преподо́бнии и блаже́ннии, издре́вле зе́млю сию́ облагоуха́вшии;
ра́дуйтеся, новомученицы, но́вый гра́д Ива́ново-Вознесе́нск и преде́лы его́ освяти́вшии.
Ра́дуйтеся, благоче́стия оте́ческаго насле́дницы;
ра́дуйтеся, в после́дняя ле́та Христу́ сострада́льцы.
Ра́дуйтеся, Преда́ние непоро́чно сохра́ньшии;
ра́дуйтеся, до дне́сь свиде́тельство ве́ры просте́ршии.
Ра́дуйтеся, о́бразы спасе́ния коему́ждо показу́ющии;
ра́дуйтеся, о спасе́нии все́х Еди́наго Бо́га моля́щии.
Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Кондак 1
Избра́ннии от Бо́га святи́и сро́дницы на́ши, в ми́ре пожи́вшии, оба́че от ми́ра не су́щии, я́ко в предста́тельствах ва́ших наде́жду иму́ще спасе́ния, благода́рственная прино́сим пе́ния и хвале́ния, недосто́йнии сооте́чественницы ва́ши, вы́ же я́ко стяжа́вшии оте́чество ве́чное, от вся́ких на́с бе́д свободи́те, зову́щих: Ра́дуйтеся, вси́ святи́и земли́ Ива́новския, при́снии о на́с к Бо́гу моли́твенницы.
Молитва
О прехва́льнии уго́дницы Бо́жии, святи́и вси́ в земли́ Ива́новской просия́вшии и я́ко цве́ти Бо́госажде́ннии зе́млю на́шу облагоуха́вшии! Мно́гая ва́ша имена́ и бо́льшая дарова́ния, ва́шим бо непоро́чным житие́м от дре́вних родо́в до ны́не све́т Христо́в просвеща́ется и и́мя Бо́жие прославля́ется. Мы́ же, недосто́йная ча́да ва́ша, исполне́ние ча́емых ва́ми ви́девше: ве́ры правосла́вныя возрожде́ние, хра́мов и оби́телей обновле́ние, святы́х уго́дников прославле́ние, пое́м Отца́, Сы́на и Свята́го Ду́ха Бо́га, и к ва́м, избра́нным Его́, со умиле́нием и ве́рою припа́дающе мо́лим: не оста́вите оте́чества ва́шего земна́го я́ко во благоде́нствии, та́ко и во дни́ испыта́ний тя́жких. Моли́те Всеблага́го Го́спода дарова́ти на́м покая́ние всеце́лое и се́рдце люботру́дное во взыска́ние Его́, в неве́дении и неча́янии су́щия све́том ве́ры и наде́жды озари́ти, ни́щия и сироты́ препита́ти, плене́нныя от у́з свободи́ти, во обстоя́нии и ско́рби су́щия ско́ро изба́вити, все́м на́м му́жество и духо́вную бо́дрость пода́ти, да никогда́же впаде́м во уны́ние лю́тое, да ники́й же собла́зн или́ стра́х отврати́т на́с любве́ Христо́вы, да благода́тию Его́ ве́рность до конца́ сохрани́м, и Ца́рствия Небе́снаго с ва́ми сподо́бимся, и просла́вим в Тро́ице сла́вимаго Бо́га во ве́ки веко́в. Ами́нь.
Комментировать