Минея, 14 Августа.
Глас 8
Песнь 1
Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Припев: Святы́й проро́че Михéе, моли́ Бо́га о на́с.
Я́ко зерца́ло вои́стинну чи́сто Бо́жие и Боже́ственных сый,/ Зижди́телю предстои́ши, блаже́нне,/ Его́же моли́ от бед спасти́ ве́рою пою́щия тя.
Припев: Святы́й проро́че Михéе, моли́ Бо́га о на́с.
Ра́зума испо́лнен духо́внаго сый, Михе́е, и прему́дрости от Бо́га,/ бу́дущих научи́лся еси́, я́ко чист ум, преизря́дне.
Сла́ва Отцу́ и Сы́ну и Свято́му Ду́ху.
Проро́чество пропове́дая благоче́стно,/ Го́спода рекл еси́ с Небесе́ на земли́ яви́тися, блаже́нне,/ пиша́ е́же к нам Того́ явлени́е.
И ны́не и при́сно и во ве́ки веко́в. Ами́нь.
Богородичен: Избавля́я яви́ся на земли́ пе́рвее плене́нный,/ напосле́док дней пло́ти прия́тием, Богома́ти,/ пре́жде век познава́емый.
Песнь 3
Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Припев: Святы́й проро́че Михéе, моли́ Бо́га о на́с.
Язы́к твой трость Боже́ственнаго Ду́ха бысть,/ и́мже нам бу́дущих яви́л еси́ сбытие́.
Припев: Святы́й проро́че Михéе, моли́ Бо́га о на́с.
Ты Преве́чнаго, плоть бы́вша, показа́л еси́ в Вифлее́ме,/ Кня́зя всех, и Спа́са, и Наста́вника.
Сла́ва Отцу́ и Сы́ну и Свято́му Ду́ху.
Таи́нник изве́стен су́щим па́че ума́ нам был еси́,/ проро́ческими, сла́вне проро́че, просвеще́ньми озаря́емь.
И ны́не и при́сно и во ве́ки веко́в. Ами́нь.
Богородичен: Гора́ явле́ннейша Ты была́ еси́, Пречи́стая,/ на ню́же возше́д, Госпо́дь яви́ся,/ к Не́йже ны́не прибега́ем.
Седален, глас 1
Ду́хом, му́дре, просве́щся Святы́м,/ проре́кл еси́ я́ве бу́дущих ра́зум,/ уясни́в неудобопости́жная, о Михе́е пребога́те:/ изы́дет бо от Вифлее́ма Князь и Вождь,/ И́же упасе́т лю́ди Своя́, Христо́с,/ ты проре́кл еси́.
Песнь 4
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Припев: Святы́й проро́че Михéе, моли́ Бо́га о на́с.
Сия́ньми свы́ше Боже́ственнаго дохнове́ния озаря́емь,/ бу́дущая возвести́л еси́, я́ко настоя́щая зря, достосла́вне.
Припев: Святы́й проро́че Михéе, моли́ Бо́га о на́с.
От Сио́на изы́де зако́н, я́коже проре́кл еси́, Богоблаже́нне,/ и протече́ концы́, Госпо́дне сло́во пропове́дуя.
Сла́ва Отцу́ и Сы́ну и Свято́му Ду́ху.
Госпо́дствовати яви́ся в дому́ Иа́ковли всех Госпо́дь/ и в сла́ве и́мене я́ко Па́стырь упаса́ет, всеблаже́нне, лю́ди Своя́.
И ны́не и при́сно и во ве́ки веко́в. Ами́нь.
Богородичен: Дави́дово отро́дие, Ма́ти Бо́жия и Зижди́теля ве́руема бысть:/ плоть у́бо Сего́, бы́вша от Нея́, несказа́нно породи́.
Песнь 5
Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.
Припев: Святы́й проро́че Михéе, моли́ Бо́га о на́с.
Возлюби́л еси́ в след Го́спода ходи́ти,/ гото́в быв в путе́х Его, прему́дре.
Припев: Святы́й проро́че Михéе, моли́ Бо́га о на́с.
Разуме́л еси́ хотя́щее бы́ти спасе́ние/ всем язы́ком от иуде́й, чу́дне.
Сла́ва Отцу́ и Сы́ну и Свято́му Ду́ху.
Благода́ть зря, пропове́дал еси́, Богоявле́нне:/ к не́йже прибега́ют язы́к стада́ и спаса́ются.
И ны́не и при́сно и во ве́ки веко́в. Ами́нь.
Богородичен: Ме́сто Госпо́дне Ты была́ еси́, Богома́ти:/ от Нея́же изы́де мир от ле́сти избавля́яй.
Песнь 6
Ирмос: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.
Припев: Святы́й проро́че Михéе, моли́ Бо́га о на́с.
Зако́ном повину́яся Бо́жиим,/ обличи́л еси́ вся преступа́ющия,/ храня́ зако́н, пресла́вне.
Сла́ва Отцу́ и Сы́ну и Свято́му Ду́ху.
Михе́е боже́ственный и честны́й Ду́ха орга́н,/ мольба́ми твои́ми от бед ве́рныя сохрани́.
И ны́не и при́сно и во ве́ки веко́в. Ами́нь.
Богородичен: Иу́дов Ты дом све́тел, Де́во, сотвори́ла еси́,/ Возсия́вшаго от свята́го Твоего́ чре́ва я́вльши.
Песнь 7
Ирмос: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.
Припев: Святы́й проро́че Михéе, моли́ Бо́га о на́с.
Потре́бен яви́лся еси́ Влады́це всех и до́блейший,/ суровство́ владу́щих облича́я и уча́, и вопия́, достосла́вне:/ оте́ц на́ших Бо́же, благослове́н еси́.
Сла́ва Отцу́ и Сы́ну и Свято́му Ду́ху.
Блиста́я луча́ми жития́ боже́ственнаго,/ и чисте́йший проро́к показа́лся еси́ боже́ственнаго явле́ния, воспева́я, блаже́нне:/ оте́ц на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Равноде́телен Ро́ждшему, равноси́льное Сло́во, Соприсносу́щное,/ во утро́бе Де́вы О́тчим благоволе́нием зи́ждется я́ко Челове́к,/ отце́в Бог благослове́нный.
Песнь 8
Ирмос: Мусики́йским орга́ном согласу́ющим/ и лю́дем безчи́сленным, покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху/ и славосло́вяху во вся ве́ки.
Припев: Святы́й проро́че Михéе, моли́ Бо́га о на́с.
От нача́ла сый ве́ка, Бо́жие Сло́во яви́ся,/ избавля́я су́щия от Ада́ма, я́коже Михе́й прорече́:/ Го́спода по́йте и превозноси́те Его́ во ве́ки.
Припев: Святы́й проро́че Михéе, моли́ Бо́га о на́с.
Мы́сленно науча́емь, вопия́л еси́:/ Воли́тель ми́лости Влады́ка, я́ко Ми́лостив, ка́яся о непра́вдах/ ве́рою пою́щих и превознося́щих Его́ во ве́ки.
Сла́ва Отцу́ и Сы́ну и Свято́му Ду́ху.
Я́коже светла́ мо́лния, яви́лся еси́, Бо́жию зарю́ прие́м,/ и я́ко зерца́ло чи́сто быв, Михе́е,/ Го́спода по́йте, вопия́, и превозноси́те Его́ во ве́ки.
И ны́не и при́сно и во ве́ки веко́в. Ами́нь.
Богородичен: Кре́пко утеше́ние, Де́во, е́же от Тебе́ Рожде́ннаго иму́ще,/ держи́м апо́стольски честно́е испове́дание,/ Го́спода пою́ще и превознося́ще Его́ во ве́ки.
Песнь 9
Ирмос: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Припев: Святы́й проро́че Михéе, моли́ Бо́га о на́с.
Уму́ нетле́нному и чисте́йшему, луча́ми благоче́стия сия́я,/ о ми́ре моля́ся, при́сно предстои́ши.
Припев: Святы́й проро́че Михéе, моли́ Бо́га о на́с.
Наста́ светоно́сная па́мять твоя́, проро́че,/ проро́ческими дарова́нии испо́лнена/ и ре́ки покая́ния источа́ющи.
Сла́ва Отцу́ и Сы́ну и Свято́му Ду́ху.
Спа́са, ми́рови прише́дша по твоему́ прорече́нию,/ обожа́емь па́че ума́,/ весе́лия, блаже́нне, наслажда́ешися.
И ны́не и при́сно и во ве́ки веко́в. Ами́нь.
Богородичен: Я́ко всех превы́шши и чисте́йши,/ скве́рны души́ моея́ очи́сти,/ я́ко Бо́га заче́нши Преблага́го.