Конда́к 1.
Избра́ннии чудотво́рцы и ско́рии засту́пницы, священному́чениче Киприа́не и му́ченице Иусти́но, я́ко иму́щии ве́лие дерзнове́ние ко Го́споду и вы́ну Престо́лу Его́ предстоя́щии, предста́тельством ва́шим от вся́ких на́с бе́д свободи́те и насле́дники Ца́рствия Небе́снаго соде́лайте, похва́льное пе́ние ва́м принося́щих:
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
И́кос 1.
А́нгельския си́лы удиви́шася, ка́ко вы́, Киприа́не и Иусти́но, от безду́шных бого́в отврати́вшеся и в Бо́га Жи́ва уве́ровавше, позна́нием и́стины Боже́ственныя обрели́ есте́ а́нгельское безстра́стное житие́. Мы́ же, сему́ дивя́щеся, вопие́м ва́м такова́я:
Ра́дуйтеся, тве́рдостию ва́шея ве́ры во Христа́ А́нгелы удиви́вшии;
ра́дуйтеся, вхожде́нием на бра́к А́гнчий ли́к святы́х возвесели́вшии.
Ра́дуйтеся, я́ко за Христа́ му́жественно пострада́ли есте́;
ра́дуйтеся, я́ко за испове́дание Его́ венцы́ нетле́ннии прия́ли есте́.
Ра́дуйтеся, на небесе́х ны́не пред Престо́лом Бо́жиим предстоя́щии;
ра́дуйтеся, о спасе́нии ду́ш на́ших Го́спода умоля́ющии.
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
Конда́к 2.
Ви́дя суету́ и́дольскаго нече́стия, к позна́нию Боже́ственному от худо́жества волше́бнаго отврати́лся еси́, Киприа́не, ду́шу свою́ от поги́бели ве́чныя исхища́я. Ны́не же, у Престо́ла Бо́жия во сла́ве небе́сней предстоя́, моли́ся Человеколю́бцу Влады́це спасти́ ду́ши на́ша, пою́щих Ему́: Аллилу́иа.
И́кос 2.
Ра́зумом и́стиннаго богопозна́ния свы́ше наставля́емый, чароде́йства и волхвова́ния отврати́лся еси́, Киприа́не, и сле́зным покая́нием стра́сти своя́ угаси́л еси́; уве́дев же, я́ко и́мене Христо́ва и Креста́ Животворя́щаго бе́сы трепе́щут и ко́зни вра́жия разруша́ются, в хра́м Бо́жий на служе́ние Ему́ прите́кл еси́. Те́мже, усе́рдие твое́ похваля́юще, взыва́ем си́це:
Ра́дуйся, хи́трости де́монския му́жественно отве́ргнувый;
ра́дуйся, ко́зни и́х па́губныя я́ко паучи́ну растерза́вый.
Ра́дуйся, пре́лести служе́ния его́ небоя́зненно обличи́вый;
ра́дуйся, зми́я лука́ваго пред все́ми посрами́вый.
Ра́дуйся, я́ко тобо́ю бе́сы отгоня́ются;
ра́дуйся, я́ко тобо́ю боле́зни теле́сныя и душе́вныя исцеля́ются.
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
Конда́к 3.
Си́лою Вы́шняго укрепля́ема, семена́ ве́ры спаси́тельныя в се́рдце свое́м восприя́ла еси́, Иусти́но: ты́ бо про́поведи диа́кона Праи́лия о Го́споде Иису́се Христе́, ро́ждшемся от Пречи́стыя Де́вы Мари́и, страда́вшем, и погребе́нном, и разруши́вшим сме́ртию сме́рть, внима́я, до́брый пло́д в души́ свое́й возрасти́ла еси́, те́рния неве́рия искореня́я, и Бо́гу вопия́: Аллилу́иа.
И́кос 3.
Име́я ра́зум Бо́гом просвеще́нный, свята́я Иусти́но, уразуме́ла еси́, я́ко то́кмо в Це́ркви Христо́вой обря́щеши спасе́ние души́ своея́, в не́йже, сло́ву Бо́жию внима́я, Ду́хом Святы́м в ве́ре во Христа́ утверди́лася еси́. Таково́му Бо́жию благоволе́нию о тебе́ ра́дуяся, воспева́ем ти́ си́це:
Ра́дуйся, звездо́, во тьме́ язы́ческаго нече́стия возсия́вшая;
ра́дуйся, све́том благочести́выя ве́ры просвети́вшаяся.
Ра́дуйся, благода́тию Ду́ха Свята́го ду́шу твою́ испо́лнившая;
ра́дуйся, Жениху́ Небе́сному де́вство свое́ обручи́вшая.
Ра́дуйся, Сладча́йшаго Иису́са неве́сто прекра́сная;
ра́дуйся, вели́кою во Ца́рствии Небе́снем нарече́нная.
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
Конда́к 4.
Бу́ри грехо́вныя избега́я, ко Христу́ прише́л еси́ и всего́ себе́, я́ко же́ртву благово́нную, Спаси́телю на́шему прине́сл еси́, богому́дре Киприа́не, тве́рдое бо наме́рение в се́рдце свое́м прия́л еси́: Креще́нием святы́м ду́шу свою́ убели́ти, ве́рным после́дователем Го́споду бы́ти и во вся́ дни́ живота́ своего́ воспева́ти Ему́: Аллилу́иа.
И́кос 4.
Слы́шаще отрече́ние твое́ от служе́ния врагу́ ро́да челове́ческаго и ви́дяще благо́е наме́рение твое́ во Христа́ облещи́ся и соверше́нным христиа́нином бы́ти, епи́скоп Анфи́м а́бие крести́ тя́, Киприа́не, и чтецо́м во хра́ме Бо́жием поста́ви. Мы́ же, ра́дующеся таково́му твоему́ обраще́нию ко Христу́, пое́м ти́ такова́я:
Ра́дуйся, я́ко Го́спода все́ю душе́ю возлюби́л еси́;
ра́дуйся, я́ко христиа́нином и́стинным бы́ти возжеле́л еси́.
Ра́дуйся, свято́е Креще́ние с благогове́нием прия́вый;
ра́дуйся, Ду́ха Свята́го жили́ще себе́ сотвори́вый.
Ра́дуйся, Го́сподом свы́ше просвеще́нный;
ра́дуйся, епи́скопом в ве́ре Христо́вой наста́вленный.
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
Конда́к 5.
Боготе́чною стезе́ю устреми́лася еси́ и ти́хаго приста́нища дости́гла еси́, свята́я му́ченице Иусти́но: ты́ бо све́том и́стины Боже́ственныя роди́тели твоя́ Еде́сия и Клеодо́нию просвети́вши, ку́пно с ни́ми свято́е Креще́ние от епи́скопа Онта́та прия́ла еси́, да Христу́ уго́дна бу́деши и возмо́жеши невозбра́нно пе́ти Ему́: Аллилу́иа.
И́кос 5.
Ви́дяще премно́гую доброде́тель отца́ твоего́ Еде́сия, поста́ви его́ святи́тель Бо́жий во пресви́тера, да доброде́тельным житие́м и ины́х ко Христу́ приведе́т; тебе́ же, достоблаже́нная Иусти́но, досто́йную дще́рь его́, па́че всего́ Христа́ возлюби́вшую и в соблюде́нии за́поведей Его́ до́бре подвиза́вшуюся, почита́ем зва́нии си́ми:
Ра́дуйся, красото́ю душе́вною просия́вшая;
ра́дуйся, де́вство непоро́чное в да́р Бо́гу прине́сшая.
Ра́дуйся, благове́стнице Ева́нгелия богому́драя;
ра́дуйся, за́поведей Госпо́дних пропове́днице усе́рдная.
Ра́дуйся, подви́жнице Бо́жия, посто́м и моли́твою воспита́нная;
ра́дуйся, голуби́ца непоро́чная, кро́тости и незло́бия преиспо́лненная.
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
Конда́к 6.
Пропове́дник и́стины Христо́вы яви́лся еси́, священному́чениче Киприа́не, те́мже Человеколю́бец Госпо́дь, И́же хотя́й все́м спасти́ся, дарова́ на́м тебе́ ди́внаго моли́твенника, цели́теля и защи́тника от духо́в зло́бы поднебе́сных: ты́ бо де́лы и словесы́ твои́ми приво́диши мно́гия к покая́нию и грехо́вныя жи́зни исправле́нию, науча́я все́х пе́ти Бо́гу: Аллилу́иа.
И́кос 6
Возсия́л еси́, я́ко свети́ло светоза́рное, просвеща́ющее све́том богопозна́ния все́х, во тьме́ неве́рия су́щих, святи́телю Киприа́не, поне́же моли́тве твое́й ники́яже чародея́ния, от лука́вых бесо́в и злы́х челове́к исходя́щия, противоста́ти не мо́гут: оба́че си́лою Бо́жиею разруша́ются и прогоня́ются. Сего́ ра́ди вопие́м си́це:
Ра́дуйся, вра́жиих ко́зней разруши́телю;
ра́дуйся, злы́х бесо́в прогони́телю.
Ра́дуйся, от вра́г ви́димых и неви́димых стено́ и огражде́ние;
ра́дуйся, оста́вленных врача́ми преди́вное поможе́ние.
Ра́дуйся, от бе́д и скорбе́й ско́ро избавля́яй;
ра́дуйся, страда́ния в ра́дость претворя́яй.
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
Конда́к 7.
Хотя́щи му́дрым ева́нгельским де́вам поревнова́ти, еле́ем до́брых де́л испо́лнилася еси́, сла́вная му́ченице Иусти́но, и, возже́гши свети́льник души́ своея́, просвеща́ла еси́ лю́ди Христо́вым уче́нием, да позна́вше Го́спода Иису́са пою́т Ему́: Аллилу́иа.
И́кос 7.
Но́вую показа́ на тебе́ ми́лость Свою́ Всемогу́щий Госпо́дь: Боже́ственною бо благода́тию Свое́ю вознесе́ тя́, пресла́вная Иусти́но, на высоту́ духо́внаго соверше́нства, я́ко и немощны́я от неду́гов душе́вных и теле́сных исцеля́ти, и от духо́в нечи́стых стра́ждущия от ко́зней и́х лука́вых свобожда́ти возмо́жеши. Сего́ ра́ди вопие́м ти́:
Ра́дуйся, го́рняя, па́че до́льних, возлюби́вшая;
ра́дуйся, Бо́гу всю́ себе́ преда́вшая.
Ра́дуйся, серафи́мскою любо́вию к Нему́ горя́щая;
ра́дуйся, и на́с люби́ти Его́ все́ю душе́ю науча́ющая.
Ра́дуйся, люде́й правосла́вных в ве́ре утвержде́ние;
ра́дуйся, де́вственнаго со́нма украше́ние.
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
Конда́к 8.
Стра́нно бе́ нечести́вому иге́мону ви́дети тебе́, священному́чениче Киприа́не, егда́ суду́ непра́ведному тебе́ предаде́: ты́ бо, я́ко непоколеби́м во́ин Царя́ Небе́снаго, со дерзнове́нием Христа́ испове́дал еси́, во страда́ниих воспева́я: Аллилу́иа.
И́кос 8.
Всего́ себе́ Бо́гу преда́л еси́, священному́чениче Киприа́не: не убоя́лся бо еси́ преще́ний лю́тых и сами́х страда́ний, оба́че лице́м све́тлым, благода́тию Бо́жиею сия́ющим, предста́л еси́ суди́лищу нечести́вому, подвиза́я все́х ве́рных воспева́ти ти́ си́це:
Ра́дуйся, ве́ры Христо́вы непоколеби́мый испове́дниче;
ра́дуйся, Пречи́стыя Тро́ицы дерзнове́нный пропове́дниче.
Ра́дуйся, си́лою Бо́жиею духо́в зло́бы победи́вый;
ра́дуйся, огне́м моли́твы стре́лы вра́жия попали́вый.
Ра́дуйся, я́ко муче́ния лю́тая ни во что́же вмени́л еси́;
ра́дуйся, я́ко в страда́ниих твои́х Бо́га просла́вил еси́.
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
Конда́к 9.
Вся́кое благо́е проше́ние на́ше, притека́ющих к тебе́ с ве́рою, не отри́ни, му́ченице свята́я Иусти́но, и́бо да́нною тебе́ от Бо́га благода́тию изгоня́ти ду́хи нечи́стыя, му́чащия челове́ка, бе́сы прогоня́ются и неду́жным здра́вие подае́тся, вопию́щим Бо́гу: Аллилу́иа.
И́кос 9.
Вети́и многовеща́ннии по достоя́нию не возмо́гут воспе́ти вся́ труды́ твоя́, свята́я Иусти́но, ты́ бо все́м се́рдцем и все́ю душе́ю Бо́га возлюби́вши, все́ твое́ тща́ние и жела́ние направля́ла еси́, во е́же святу́ю во́лю Его́ исполня́ти. Те́мже и ны́не на́с, беда́ми и скорбьми́ отягче́нных, не оставля́еши, но предста́тельствуеши за ны́ пред Го́сподем, исцеле́ние и утеше́ние на́м да́руя. Сего́ ра́ди, восхваля́я тя́, взыва́ем си́це:
Ра́дуйся, во благи́х проше́ния на́ша ско́ро исполня́ющая;
ра́дуйся, в неду́зех стра́ждущия благода́тно посеща́ющая.
Ра́дуйся, в моли́твах на́ших те́плое прибе́жище;
ра́дуйся, оби́димым благо́е утеше́ние.
Ра́дуйся, ве́рных ко спасе́нию до́брая наста́внице;
ра́дуйся, в боре́ниих су́щим помо́щнице.
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
Конда́к 10.
Спасе́ние все́х устроя́ющи Человеколю́бец Госпо́дь, по сконча́нии испове́дническаго по́двига твоего́, увенча́ тя́, святи́телю Киприа́не, венце́м му́ченическим: испове́дуя бо пред мучи́тели Бо́га И́стинна, в Тро́ице Святе́й покланя́емаго, небоя́зненно подклони́л еси́ под ме́ч главу́ свою́, воспева́я: Аллилу́иа.
И́кос 10.
Стена́ еси́ и щи́т, богому́дре Киприа́не, все́м усе́рдно к тебе́ прибега́ющим и пред ико́ною твое́ю те́пле моля́щимся: тебе́ бо дарова́ на́м Всеблаги́й Госпо́дь в по́мощь и врачевство́ боле́зней душе́вных и теле́сных. Сего́ ра́ди взыва́ем ти́:
Ра́дуйся, я́ко Го́споду за на́с моли́твы своя́ возно́сиши;
ра́дуйся, я́ко пред Престо́лом Бо́жиим о на́с хода́тайствуеши.
Ра́дуйся, я́ко све́том богове́дения пра́ведныя просвеща́еши;
ра́дуйся, я́ко заблу́ждших на пу́ть спаси́тельный наставля́еши.
Ра́дуйся, да́ры целе́бныя прося́щим у тебе́ ско́ро подава́яй;
ра́дуйся, лю́бящим и чту́щим тя́ любо́вию сугу́бою воздава́яй.
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
Конда́к 11.
Пе́ние всеумиле́нное ко Го́споду возноси́ла еси́, страстоте́рпице свята́я Иусти́но, егда́ муче́ния тя́жкия му́жественно за Него́ терпе́ла еси́; тече́ние же твое́ испове́дническое сконча́вши, ра́достно главу́ свою́ на ме́чное усече́ние преклони́ла еси́, воспева́я Бо́гу: Аллилу́иа.
И́кос 11.
Светоза́рною свеще́ю на све́щнице церко́вней сия́еши, свята́я Иусти́но, све́том благода́тным отгоня́ющи от на́с враго́в ви́димых и неви́димых. Мы́ же, с те́плою ве́рою и любо́вию к тебе́ прибега́ющи, восхваля́ем му́ченическую кончи́ну твою́, взыва́я си́це:
Ра́дуйся, Бо́га И́стиннаго дерзнове́нно пропове́давшая;
ра́дуйся, о укрепля́ющем тя́ Го́споде вся́ возмо́гшая.
Ра́дуйся, я́ко я́звы Го́спода Иису́са на те́ле твое́м носи́ла еси́;
ра́дуйся, я́ко терпе́нием твои́м мучи́телей победи́ла еси́.
Ра́дуйся, му́ченическое тече́ние твое́ ме́чною кончи́ною увенча́вшая;
ра́дуйся, Го́спода твоего́ страда́ньми и чудесы́ просла́вившая.
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
Конда́к 12.
Благода́ть дана́ ва́м от Бо́га, святи́и Киприа́не и Иусти́но, попира́ти си́лу вра́жию и вся́кое бесо́вское нахожде́ние: вы́ бо страда́ния ве́лия претерпе́вши, му́ченическою кончи́ною свое́ю блаже́нства ве́чнаго дости́гли есте́; ны́не же предстоя́ Престо́лу Царя́ сла́вы, моли́теся о на́с, во е́же изба́витися на́м от плене́ния диа́вольскаго, да возмо́жем непреткнове́нно пе́ти Бо́гу: Аллилу́иа.
И́кос 12.
Пою́ще ре́вность ва́шу по Бо́зе и ди́вная и пресла́вная чудеса́ ва́ша, велича́ем и восхваля́ем ва́с, священному́чениче Киприа́не и му́ченице Иусти́но, такову́ю благода́ть от Бо́га прие́мших; мо́лим же ва́с: егда́ в ча́с сме́рти на́шея де́монския по́лчища обстоя́т ду́ши на́ша, тогда́ яви́те на́м свое́ заступле́ние, да при́сно ва́ми избавля́еми, взыва́ем си́це:
Ра́дуйтеся, от находя́щих ко́зней вра́жиих ско́рое защище́ние;
ра́дуйтеся, от скорбе́й и печа́лей избавле́ние.
Ра́дуйтеся, Христа́ до конца́ возлюби́вшии;
ра́дуйтеся, ду́ши своя́ за Него́ положи́вшии.
Ра́дуйтеся, в Кро́ви А́гнчей омы́вшияся;
ра́дуйтеся, во дво́рех Госпо́дних всели́вшияся.
Ра́дуйтеся, к со́нму святы́х сопричте́ннии;
ра́дуйтеся, Трисия́нным Све́том озаре́ннии.
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
Конда́к 13
О преди́внии и пресла́внии уго́дницы Бо́жии, священному́чениче Киприа́не и му́ченице Иусти́но, ско́рии помо́щницы все́м с ве́рою к ва́м прибега́ющим, приими́те от на́с, недосто́йных, хвале́бное пе́ние сие́, и от неду́гов душе́вных и теле́сных вся́ ны́ исцели́те, от вра́г ви́димых и неви́димых заступи́те и ве́чнаго муче́ния изба́витися на́м Го́спода умоли́те, да ку́пно с ва́ми вопие́м: Аллилу́иа.
[Се́й конда́к глаго́лется три́жды.]
[Далее повторяем 1‑е икос и кондак:]
И́кос 1.
А́нгельския си́лы удиви́шася, ка́ко вы́, Киприа́не и Иусти́но, от безду́шных бого́в отврати́вшеся и в Бо́га Жи́ва уве́ровавше, позна́нием и́стины Боже́ственныя обрели́ есте́ а́нгельское безстра́стное житие́. Мы́ же, сему́ дивя́щеся, вопие́м ва́м такова́я:
Ра́дуйтеся, тве́рдостию ва́шея ве́ры во Христа́ А́нгелы удиви́вшии;
ра́дуйтеся, вхожде́нием на бра́к А́гнчий ли́к святы́х возвесели́вшии.
Ра́дуйтеся, я́ко за Христа́ му́жественно пострада́ли есте́;
ра́дуйтеся, я́ко за испове́дание Его́ венцы́ нетле́ннии прия́ли есте́.
Ра́дуйтеся, на небесе́х ны́не пред Престо́лом Бо́жиим предстоя́щии;
ра́дуйтеся, о спасе́нии ду́ш на́ших Го́спода умоля́ющии.
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
Конда́к 1.
Избра́ннии чудотво́рцы и ско́рии засту́пницы, священному́чениче Киприа́не и му́ченице Иусти́но, я́ко иму́щии ве́лие дерзнове́ние ко Го́споду и вы́ну Престо́лу Его́ предстоя́щии, предста́тельством ва́шим от вся́ких на́с бе́д свободи́те и насле́дники Ца́рствия Небе́снаго соде́лайте, похва́льное пе́ние ва́м принося́щих:
Ра́дуйтеся, Киприа́не и Иусти́но, ско́рии помо́щницы и моли́твенницы о душа́х на́ших.
Моли́тва.
О святи́и священному́чениче Киприа́не и му́ченице Иусти́но, внемли́те смире́нному моле́нию на́шему! А́ще бо вре́менное житие́ ва́ше му́ченически за Христа́ сконча́ли есте́, но ду́хом от на́с не отступа́ете, при́сно по за́поведем Госпо́дним ше́ствовати на́с науча́юще и кре́ст сво́й терпели́во нести́ на́м посо́бствующе. Те́мже, я́ко дерзнове́ние ко Христу́ Бо́гу и Пречи́стей Его́ Ма́тери стяжа́вшии, бу́дите моли́твенницы кре́пции и хода́таи о на́с недосто́йных, да заступле́нием ва́шим сохраня́еми, невреди́мы от бесо́в, волхво́в и от челове́к злы́х пребу́дем, сла́вяще Святу́ю Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Комментировать