По благословению Его Преосвященства, Преосвященнейшего Никодима, епископа Единецкого и Бричанского
Рекомендовано к публикации Издательским Советом Православной Церкви Молдовы
Кондак 1
Избранный от Небеснаго Царя во архиереи паствы Карфагенския, и во ограждение и утверждение Церкве христианския, раздоров и нестроений Ея искоренителю и единства церковнаго благий рачителю, похвальная восписуем ти, отче Киприане, пения, ты же яко имея ко Господу Сил дерзновение, от злобы и напастей избавляй с любовию тебе поющих: Радуйся, священномучениче Киприане, Церкве Христовы славо и украшение.
Икос 1
Ангельски просиял еси добродетельным житием по крещении и скором во пресвитера рукоположении твоем, отче Киприане, и не минувшу году всем народом во епископы единогласно избран был еси. Дивяся таковому скорому прехождению от званнаго до избраннаго, и мы приносим ти звания таковая:
Радуйся, вся красная мира сего оставивый, крещением омовенный; радуйся, сердцем смиренный, воине Христов, грозный и мужественный.
Радуйся, возлюбленное чадо Божие, на служение Святым Духом поставленное; радуйся, архипастырю святый, народом Божиим возлюбленный.
Радуйся, яко источник, реки живой воды нуждницем исторгаеши; радуйся, неудобоисцельныя язвы душевныя кающимся исцеляеши.
Радуйся, усердием твоим Церковь Карфагенская умиротворяется; радуйся, и доныне писаньми твоими Церковь Христова утверждается.
Радуйся, священномучениче Киприане, Церкве Христовы славо и украшение.
Кондак 2
Видит Господь, яко усиливается отступление от Христа в надолзе мирствующей Церкви, егда мнози христиане озаботилися не об умножении добродетелей и хранении истин веры, а об умножении вещей мира сего, егда во иереях не стало ожидаемаго по их обету благочестия, в клирицех чистыя веры, в делех – милосердия, во нравах – благоустройства, и поставляет посему великаго светильника веры, благочестна и благообразна, да на него взирающе, обрящут путь спасения овцы заблуждшия и яко истинная чада святыя Церкве чистым сердцем воззовут: Аллилуиа.
Икос 2
Разум незаблудный, святость и силу над воинством противника обрет по животворном Крещении твоем, Богопросвещенне Киприане: последи добродетельным житием твоим явил еси всем пример нестяжания и в молитве и богомыслии преуспеяние. Темже прославляюще просветившаго тя Господа, во умилении взываем ти сице:
Радуйся, от множеств своих имений многих нищих обогативый; радуйся, роскошь и славу прежняго жития на нищету Христову преме́нивый.
Радуйся, образе кротости и смирения; радуйся, вещавый истину с дерзновением.
Радуйся, благочестия неутомимый насадителю; радуйся, истинный народа Божия святителю.
Радуйся, от сна греховнаго и пристрастий житейских чад церковных пробуждаяй; радуйся, дела Божии в чадех Церкве прославляяй.
Радуйся, священномучениче Киприане, Церкве Христовы славо и украшение.
Кондак 3
Силою истинныя нелицемерныя веры стяжал еси могущество благодати и богатство премудрости Божия ко исправлению христиан: и колико святости и благодати изливашеся из уст твоих, велицый иерарше, приводяще в изумление всех видевших тя и творящих хвалу Богу: Аллилуиа.
Икос 3
Имея велие милосердие и сострадание ко всем обиженным и бедствующим и разсуждение и мудрость в архипастырских распоряжениих, святителю Киприане, и наружним видом своим был еси благообразен, ибо таившаяся внутри души святыня отображашеся и на лице твое, и предстоятеле других Церквей искаше совета твоего, и людие в сладость окормляшеся от тебе, сердечно возвеселяяся пети тако:
Радуйся, по вере велицей и велицею благодатию осиянный; радуйся, непритворною добродетелию украшенный.
Радуйся, каменю драгий, чистотою блистательный; радуйся, сосуде избранный, непорочною мыслию и чистым словом от скверн мира сего огражденный.
Радуйся, верным просвещай разум и совесть; радуйся, лукавых обличай советы разумно.
Радуйся, ревнителю славы Христовы; радуйся, гасителю церковных раздоров.
Радуйся, священномучениче Киприане, Церкве Христовы славо и украшение.
Кондак 4
Буре подобно разразилося еси на христиан гонение Декия, ты же, Карфагенския Церкве священнопредстоятелю отче Киприане, в видении извещенный о сем бедствии, яко о очищении Церкве, яко о испытании христиан и явлении во всей силе и блистании их добродетелей, воззва Господеви: Аллилуиа.
Икос 4
Слышаще указ императора, язычницы восхотеша подвергнути мучению прежде всех известнаго своим влиянием на христиан епископа Киприана, обаче не возмогоша, яко не прииде время мученическаго подвига его, и не леть бысть еще неокрепших в силе овец лишати пастырскаго наставления, но да и тии улучат спасение, благодарным сердцем взывающе тако:
Радуйся, яко ум твой выну бысть Господа зряй горе́; радуйся, яко не устудеся в любви пребывати сердце твое.
Радуйся, достойный образ злострадания за страждущия овцы твоя являяй; радуйся, любовию со чады страждуще пребываяй.
Радуйся, колеблемых в вере утверждаяй в правоверии; радуйся, вероотступников приводяй к покаянию.
Радуйся, возносящихся над церковною иерархиею посрамление; радуйся, от волков хищных стада Христова ограждение.
Радуйся, священномучениче Киприане, Церкве Христовы славо и украшение.
Кондак 5
Боготечною звездою бысть для тебе, отче святый Киприане, воля Господня, ея твердо исполняти себе уготовавый, небоязненно на враги церковнаго единства устремляшеся, поражая силою оружия Божия Слова и в смирении сердца взывая: Аллилуиа.
Икос 5
Видел еси отпадение от веры пред страхом мучений слабых членов твоея паствы, святителю Киприане, и якоже часть сердца твоего отторгашеся у тебе, ибо с каждым соединено бысть сердце твое, и с каждым ты бысть боля и умирая. Темже пластырь врачества прилагати тщася, посланьми твоими богодухновенными благоустроение Церкве творяще, имиже и ныне благочиние церковное хранитися имать, и благодарне возносятся ти похвальная словеса сия:
Радуйся, делателю на ниве Христовой неукоризненный; радуйся, верно преподаяяй слово истины.
Радуйся, в кротости и в правде преуспеваяй; радуйся, в терпении и любви наставляяй.
Радуйся, в вере и благочестии утверждаяй; радуйся, образ Христова крестоношения являяй.
Радуйся, сопастырю благаго Пастыря, овцы Богоданныя со благоразумием пасый; радуйся, соработниче Божий во служении и совершении святых.
Радуйся, священномучениче Киприане, Церкве Христовы славо и украшение.
Кондак 6
Проповедником истины и хранителем стада Христова был еси, пастырю благий, призывая паству свою не доверятися пагубным речем и лживой молве, не избирати вместо света – тьму, вместо пищи – глад, вместо пития – жажду, вместо лекарства – яд, вместо здравия – смерть, ибо не принесут мира не имущии мира. Темже да соединят вернии свои молитвы с молитвами и молениями богоданнаго архипастыря своего и с чистою совестию и правым сердцем славят Бога: Аллилуиа.
Икос 6
Воссияло в Карфагене на Соборе просвещение истины, егда отцы его едиными усты постановили есте, яко падшим не должно отказывать в общении с Церковию, дабы не отчаялися есте они в милосердии Божием, но такожде и не должно допущати их ко общению прежде их покаяния и исследования их нравственнаго состояния. Тогдаже отлучены быша от Церкве врази единства ея, а людие христианстии насладишася миром и восхотеша тебе, радетельному отцу и освященному предстоятелю церковному, воспети тако:
Радуйся, стада Христова бодренный блюстителю; радуйся, таин Божиих верный домостроителю.
Радуйся, яко низложи ересей богомерзких востание; радуйся, яко отрази распрей церковных взыграние.
Радуйся, спасению человеков служителю благоверный; радуйся, мира церковнаго творителю нелицемерный.
Радуйся, подвижниче, плодов исполненный нетленных; радуйся, молитвенниче о нас дерзновенный.
Радуйся, священномучениче Киприане, Церкве Христовы славо и украшение.
Кондак 7
Хотя Церковь Свою святую очистити и на твердом камени веры утвердити человеколюбец Господь, постави на престоле Ея тя, отче святый Киприане, яко равноапостольна мужа в стране африканской и яко равноангельна, зовуща выну: Аллилуиа.
Икос 7
Новое гонение на христиан воздвигл еси вступивший на престол император Валериан, и приблизися час мученическаго исповедания веры твоея во умножение славы святыя Церкве, о ней же радеюще и мы прилагаем пения таковая:
Радуйся, от крещения выну в Бозе пребываяй; радуйся, образ равноангельнаго жития пасомым являяй.
Радуйся, Христовых велений верный следователю; радуйся, благоволения Христова верным проповедателю.
Радуйся, до конца возлюбивый во Христе паству Христову; радуйся, на свободе и в заточении за Христа умрети выну готовый.
Радуйся, словес благодатию стадо свое напитавый; радуйся, пастыря добраго славу снискавый.
Радуйся, священномучениче Киприане, Церкве Христовы славо и украшение.
Кондак 8
Странна мира сего во все житие твое себе поставляя, святый иерарше Киприане, несмущенно, но смиренно, яко агнец, на усечение мечное ведеся, и яко святитель, палача на сие благослови, пастве образ твердаго исповедания веры яви, сего ради вечнаго радования сподобился еси, и пения ненасыщаемаго: Аллилуиа.
Икос 8
Весь бе в вышних, Богу угождая, и нижних никогдаже не оставляя, пастырю предобрый Киприане, и на мучения смертныя грядый, печалование и заботу, яко любящий отец, творяше о чадех, зовущих таковая:
Радуйся, с безстрашием кончину мученическу приявший; радуйся, пред кончиною наставление клиру и пастве преподавший.
Радуйся, велию любовь и преданность народ тебе явивый; радуйся, последняго благословения чад своих не лишивый.
Радуйся, во славу Христа, Бога нашего приявый страдания; радуйся, и при смерти палачу творяй благодеяния.
Радуйся, яко тобою малодушнии получают веры утверждение; радуйся, яко тобою страстотерпцы обретают дерзновение.
Радуйся, священномучениче Киприане, Церкве Христовы славо и украшение.
Кондак 9
Всякия кончины видя конец, верою и любовию вечности достизая, источник Божиих благословений для верных чад Церкве был еси, и знаменьми и видениями от Пастыреначальника вразумляяся, во дни скорби и благоденствия укрепляшеся выну хвалу воздавати Богу: Аллилуиа.
Икос 9
Ветийства врагов святыя Церкве направляхуся противу тебе, святителю непорочный, богоугодный, дабы низложити тя и делание твое опорочити, но ты, богомудре, наветов злобных не устрашаяся, увещаньми христиан от соблазна расколоучителей предохраняше, наипаче молящеся, да умиритися Церковь, и умиренная Матерь даст мир и чадом своим. Темже вернии благодарным сердцем и усты взывают тако:
Радуйся, миротворче, дух разделения словом Божиим поборавый; радуйся, единения источниче, в дусе единства Церкве паству Христу стяжавый.
Радуйся, зерцало честное, Божию премудрость отражающее; радуйся, мечу обоюдоострый, еретическия главы посекающий.
Радуйся, опора церковная, юже не сокруши человеческая клевета; радуйся, твердыня претвердая, неодоленная напастьми церковнаго врага.
Радуйся, святыне многовещанная, Христу послушныя уста; радуйся, Церкве послушным чадом спасения отверстыя врата.
Радуйся, священномучениче Киприане, Церкве Христовы славо и украшение.
Кондак 10
Спасти хотя мир от вечныя смерти, иже всех Творец и Спаситель, устрои спасительный ковчег – Святую Церковь, Иже посреде бушующаго страстьми житейскаго моря преплавающа, спасает спасения алчущих и пети спасительну песнь навыкающих: Аллилуиа.
Икос 10
Стена еси всем пребывающим в ограде Ея и Матерь – святая Церковь, а вне Церкве нет спасения и кому Церковь не Мать, тому Бог не Отец, – тако проповеда святитель Киприан о Ковчеге нашего спасения, темже и Церковь славит тя пении сицевыми:
Радуйся, Боговедения некрадомаго неукорный стяжателю; радуйся, спасительности истины, Церковию хранимыя, вещателю.
Радуйся, от единаго Источника святости, святости приемниче; радуйся, единыя Церкве о Едином Христе проповедниче.
Радуйся, с верою тя призывающим скорое посещение; радуйся, на молитвы твоя уповающих щедрое утешение.
Радуйся, с любовию тя почитающим спасительное вразумление; радуйся, с радостию тя воспевающих духовное веселие.
Радуйся, священномучениче Киприане, Церкве Христовы славо и украшение.
Кондак 11
Пение хвалебное сие, со усердием и благодарением приносимое тебе, приими, святителю отче наш Киприане, и молитву о нас ко Господу, Емуже благоугодил еси, сотвори, да избавит нас от бесовскаго и плотскаго помрачения и очистит от скверны греховныя имиже весть судьбами и сподобит нас непреткновенно возносити Ему благодарственную песнь: Аллилуиа.
Икос 11
Светом незаходимым возсиял еси в Церкви христианстей, светлый мучениче Христов и святителю дивный, озаряя очи душ наших и возводя к покаянию, без негоже и мы не смеем взирати на небо и на твой благолепный пресветлый лик и воззвати тебе:
Радуйся, в сонме святителей звездо ярко светящая; радуйся, светило незаходимое, греховное безчувствие и слепоту изобличающее.
Радуйся, волков вселукавых от Церкве отгнателю; радуйся, овец простодушных от лукавых ловителей избавителю.
Радуйся, наставниче дальновидный, в вере и благочестии нас наставляяй; радуйся, молитвенниче непостыдный, полезное ко спасению нам испрошаяй.
Радуйся, яко тобою печальми житейскими угнетенныя ободряются; радуйся, яко тобою безнадежие и безсилие в сердцах с верою к тебе притекающих истребляются.
Радуйся, священномучениче Киприане, Церкве Христовы славо и украшение.
Кондак 12
Благодатию от Бога снабденный пребогате во еже верная чада Церкве спасати, тоя не лиши и нас, духоносный иерарше, отче Киприане преподобне, да и мы спасительное жительство свое содевая, премирным духом и чистыми усты в нынешнем и будущем веце воспоем Богу: Аллилуиа.
Икос 12
Поюще подвиги твоя, святителю Киприане, хвалим Господа нашего Вседержителя, промышляюща многообразне и непостижиме о спасении людей Своих и о Церкви Своей святей и умиленным сердцем возсылаем ти похвальная сия:
Радуйся, преизрядный и славный Христу подражателю; радуйся, добродетельми пребогатый, нищих духом осиятелю.
Радуйся, Христово благоухание Богу во спасаемых; радуйся, светоносное сияние носяй красоты неизглаголанныя.
Радуйся, чистилище благое для нивы Христовы; радуйся, лучу спасительный блуждающему во мраце падения своего.
Радуйся, яко всеяния диавольская из наших душ изымаеши; радуйся, яко тайныя наши грехи изобличаеши и к покаянию воздвигаеши.
Радуйся, священномучениче Киприане, Церкве Христовы славо и украшение.
Кондак 13
О, угодниче Божий преславный, за веру умученный, святителю отче наш Киприане, нынешнее сие благодарение тебе в похвалу приносяще, молим тя, с верою к тебе притекающе: защити ны молитвенным твоим Богу предстательством от врагов видимых и невидимых и вечныя муки избави, да во светлостех святых Бога вечно славим: Аллилуиа.
[Се́й конда́к глаго́лется три́жды.][Далее повторяем 1‑е икос и кондак:]
Икос 1
Ангельски просиял еси добродетельным житием по крещении и скором во пресвитера рукоположении твоем, отче Киприане, и не минувшу году всем народом во епископы единогласно избран был еси. Дивяся таковому скорому прехождению от званнаго до избраннаго, и мы приносим ти звания таковая:
Радуйся, вся красная мира сего оставивый, крещением омовенный; радуйся, сердцем смиренный, воине Христов, грозный и мужественный.
Радуйся, возлюбленное чадо Божие, на служение Святым Духом поставленное; радуйся, архипастырю святый, народом Божиим возлюбленный.
Радуйся, яко источник, реки живой воды нуждницем исторгаеши; радуйся, неудобоисцельныя язвы душевныя кающимся исцеляеши.
Радуйся, усердием твоим Церковь Карфагенская умиротворяется; радуйся, и доныне писаньми твоими Церковь Христова утверждается.
Радуйся, священномучениче Киприане, Церкве Христовы славо и украшение.
Кондак 1
Избранный от Небеснаго Царя во архиереи паствы Карфагенския, и во ограждение и утверждение Церкве христианския, раздоров и нестроений Ея искоренителю и единства церковнаго благий рачителю, похвальная восписуем ти, отче Киприане, пения, ты же яко имея ко Господу Сил дерзновение, от злобы и напастей избавляй с любовию тебе поющих: Радуйся, священномучениче Киприане, Церкве Христовы славо и украшение.
Молитва
О, всечестный святителю Христов, преславный мучениче, богомудре преподобне отче наш Киприане, Карфагенския Церкве пастырю предобрый и всея Церкве кафолическия учителю преславный! Призри с высоты небесныя на ны, долу преклонныя, непотребныя и грешныя, но с упованием к твоему заступлению прибегающия, и твоим молитвенным ходатайством испроси нам милости у Владыки и Господа, Емуже ты со ангелы святыми и небесными человеки со дерзновением предстоиши, да подаст нам оставление грехов, нас отягчающих, и покаяние всеумиленное, страсти и похоти наши сокрушающее, и вся ко спасению нашему и славе святей Церкве подобающая, да твоим усердием и Всеблагаго Бога человеколюбием и милосердием улучим Царства небеснаго присвоение, идеже вечная любовь, вечная правда и святость, вечная жизнь, вечное радование святых и вечная слава Животворящей и Нераздельной Троице. Аминь.
Тропарь, глас 8
Душею и телом очищенный, и житием чистый и духом нетленный, / священнодействитель честный и непорочный, действеннаго врачевания духовный источниче, / плотскаго мудрования отвергийся, Христу чисте последовал еси / и чистою непорочною жертвою Христу принеслся еси, / /священномучениче Киприане, моли милостиваго Бога / даровати Церкве нашей мир и спастися душам нашим.
Или: Тропарь, глас 8
Карфагенския паствы иерарше добродетельный, / церковнаго единства благий радетелю, / священнодействитель честный и непорочный, / действеннаго врачевания духовный источниче, священномучениче Киприане, моли милостиваго Бога / даровати Церкве нашей мир и спастися душам нашим.
Кондак, глас 5
Яко Серафим попалял еси терния согрешений / церковных чад огнем Божественныя любве, / яко Херувим проповедию премудрости Божией слабых и простодушных с пути обмана и лжи / на путь спасения обращал еси, / за чистоту и единство Церкве Божия яко доблественный воин подвизался еси / и венцем мученическим добродетельное свое житие украсил еси: / Того ради от усечения меча скончевается / всечестный святителю Церкве Христовы и Богу возлюбленный Киприан.