Молитва равноапостольному царю Константину и матери его царице Елене

(1 голос5.0 из 5)

О преди́внии и всехва́льнии ца́рие, равноапо́стольнии Константи́не и Еле́но! К вам, те́плым засту́пником, возно́сим на́ша недосто́йныя моли́твы, я́ко ве́лие и́мате дерзнове́ние ко Го́споду. Испроси́те у Него́ мир Це́ркви и всему́ ми́ру благоде́нствие, нача́льником му́дрость, па́стырем попече́ние о па́стве, пасо́мым смире́ние, ста́рцем жела́нное упокое́ние, муже́м кро́тость, жена́м благоле́пие, де́вственником чистоту́, де́тям послуша́ние, младе́нцем христиа́нское воспита́ние, больны́м исцеле́ние, вражду́ющим примире́ние, оби́димым терпе́ние, оби́дящим страх Бо́жий, приходя́щим в храм сей и моля́щимся в нем благослове́ние и всем вся по коего́ждо проше́нию поле́зная, да хва́лим и пое́м Благоде́теля всех Бо́га, в Тро́ице сла́вимаго, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.