Источник

II. Слова и поучения

Январь

1. Поучение пред Крещением Господним (5 янв.)

Да будите ведуще, братие, яко днесь есть пост пред крещением воды, да того ради соберитеся в церковь в шестый час на славословие. Той бо есть день нашего ради спасения, в онь же Господь Бог на воды Иорданския прииде и потопляет в воде обветшавший грехом род наш и главу Свою рабу преклоняет, очистити хотя плоти наша. Тем же, братие, и мы, такового имуще милостиваго Владыку, да на ленимся по вся дни, молящеся Ему за вся грехи, яже есмы сотворили: ово в пиянстве и во лжи, ово в лакомствех и хищениих. О всем бо том отвещати нам есть пред Богом на страшнем судищи Христове – или рабу, или свободну, и богату, и убогу: там бо несть по мзде суждение, ни на лице. Никто же может никому же помощи: ни отец сыну, ни мати дщери, ни брат брату, ни раб господину, но своя дела коегождо или оправят, или осудят. Темже, братие, не таим согрешений наших, но, исповедовавшеся духовным отцем, покаимся их чистым исповеданием. Аще бо я утаим зде, то радость творим большую неприязни, сице ли я исповемы, то плач неприязни сотворим, а Богу радость. Радость бо бывает на небесех, рече Господь, о единем грешнице кающемся паче, нежели девятидесяти ради и девяти праведник, иже не требуют покаяния (Лк. 15:7). Мы же, братие не можем, единою впадше в грех, и до смерти в нем жити и прочая притворающе грехи, но вскочивше от него очистимся, исповедающе и и вопиюще к Богу и глаголюще: «Владыко, согрешихом на небо и пред Тобою и несмы достойны нарещися сынове Твои, но сотвори ны, яко единаго от наемник Твоих, и прости нам согрешений наших, яко и мы прощаем согрешших нам». И да не помышляет никтоже нас в сердце, яко есть ли кому от мертвых возстати или отвещати о делех. Ей, братие, всем возстати и отвещати о содеянных и помыслех и за словеса. Того ради прииде к нам Сын Божий, да разрушит дела неприязненныя, и показа нам путь спасения покаянием, и разруши смерть смертию Своею, и присно зовет ны святыми книгами в Свое царство. Да не можем лишитися его за малую похоть, приити бо имать паки с небесе в славе Своей судити живым и мертвым и воздати комуждо по делом его, да не неверуем убо, яко позде будет. Рече бо о дни том Господь Бог, глаголя: яко никто же весть ею, когда приидет, ни ангели небеснии, токмо Отец един (Мф. 24:36). Темже рече: всегда готови будите ко ответу его, да возмъжете избетути в день зол и стати пред Сыном Божиим непостыдни, славяще Пресвятую Троицу, Отца и Сына и Святаго Духа, ныне и присно и во веки веков.

2. На Крещение Господне (6 янв.)

Присно подобно есть нам, братие, подвиг добр с верою и любовию являющим, спеяти в Законе Господни и разумевати, како и почто от небытия в бытие Богом сотворени быша; таже и лестию змиевою присно живующую жизнь на смерть пременихом и, в тление впадше, злобою удалихомся от Бога; и яже бе в работу нам тварь поручена той повинувшеся, и все боги сотворихом – солнце же, реку, и месяц, и реки, и источники, все тление, даже и до гадов, всему поработихомся. И егда в нечаяние жизнь сию вложихом, тогда посети нас вышния благодати, сила и слава Божия: и Бог в наше естество вмещся и бысть вкупе Бог и человек, сугуб естеством, страсти и недуги наша на Себе восприим, безсеменна плоть бысть. Первее рождение имея безначально и превечно от Отца без матере, вышними силами непрестанно прославляем. Той же паки плотское рождество прият, нас ради, без отца, от Девы Пречистыя, яже и Богородица наричется. Рождеством Своим обнови обветшавший грехом род наш и днесь на воды Иорданския прииде, смирения образ являя, пречистый верх Свой преклоняше под руце бернаго (бренного) естества. Нужно убо сотвори небесным силам, яко в нищетне образе, пришед аки прост человек и главу Свою рабу приклоняет, Его же видев Иордан, и от первых чудес показа Его творца своего, с трепетом шествие свое возврати. Тварь бездушна сущи, со страхом работает Творцу своему, а мы, братие, дуновение и образ суще Его, не почитаем подобно Творца своего, но аки свиния в кале греховнем присно труждаеми есмы: самохотием зависти повинувшеся, гневом исполняющеся, похотьми лестными жития сего омрачающеся, немилосердием и скупостию, паче же леностию лишающеся всего добра. Темже, молю вы, не до конца пребудем в таковем зле, но воспрянем и яко от сна убудимся, покаяние приемлюще, смирением украшающеся, братолюбием и страннолюбием к Богу приближающеся, пощением на небо возносящеся, милостынею сынове Божии сотворяющеся и приемлюще достойне пречистое Тело и Кровь Христову, и тако от грех своих очистимся. Рече убо святый Апостол: аще кто, недостоин сый, приемлет Тело Божие, то грех себе яст и пиет, не разсмотряя Тело Христова (1Кор. 11:27, 29). Несть сия проста, братия, служба или прошение, еже приемлем, но сама жива и вся освящающая словесная Жертва, егоже херувими и серафими со страхом трепещут и вся безплотныя силы не смеют нань взирати, трепетно движутся. Темже убо силам небесным и мы подобимся, братие, со страхом и любовию приемлем Тело Его и добрыми делесы приближимся к Нему и приимем Его, яко да и Той приимет ны в безконечное Свое царствие. Ему же слава, купно со Отцем и со Святым Духом ныне и присно и во веки веков.

3. Св. Василия о ласкосердии (сластолюбии) и о объядении и о пиянстве (8 янв.)

Блюдися убо, да не прельстит тебе враг прадедним грехом и да не лишен будеши райския породы, – иже бо Адама брашном и украдением извлек от жизни, – много паче тебе не стыдится прельстити. Ласкосердием убо Адама в смерть предаде и миру скончание наведе, Ное же в смех бысть, упився бо рече и обнажися, и Хам проклят бысть. Да аще праведник, единою упився, от своего плода поруган бысть, – колико срама и поругания достойни суть, иже не пристают упивающеся, и по самохотию своему и без ума поругаеми суть, в плен диаволу отведошася, якоже и древнии нецыи. Исав убо, по навождению диавола, брашна ради первенства испаде; ласкосердие же Израиля кумиром поклонитися сотвори. Темже, да не лстимся, ни ослабеем к ласкосердию врага, паче же к пиянству и ко объядению, – начало бо злу пища, пиянство же родительство есть всякому скверному делу и смраду. Нас же Господь Бог да избавит от всех сих, Ему же слава ныне и присно и во веки веков.

4. Св. Евагрия о величании (янв. 11)

Молнии просветение глас проповедует грома велика пришествие, – тщеславие же проповедует, егда на высость восходит велику величаваго душа и помыслы не благи и оттуду в глубину его сведет. Камень от горы отторгся вскоре долу падется; отступивый же от Бога скорее того съринется. Величанием недугует отступивый и своею силою написуя исправление. Якоже возлезый на высоту, пад доле, разбиется; тако отпадает и надеяйся на свою силу. Плод мног преклонит ветви древа, – и добродетелей множество смиряет мудрость мужу. Плод изгнил не на потребу делателю; и добродетель величаваго не угодна Богу. Подпора держит ветвь многоплодну, – и страх Божий добродетельную душу. Не даждь величаний твоей души, да не увидиши видений страшных. Душа бо величаваго оставлена бывает от Бога и бывает бесом радость о ней. Глас величествия ужасит величаваго и яко глас воды сокрушит его душу. Иже бо прежде милым отступив от Бога себе Онаго помощи отвергся и страшится от видения худа. Величание с небесе сверже денницу и яко молнию сотвори его пасти на землю. Смиренномудрие же человека возносит на небо и со ангелы ликовствовати сотворит.

5. Св. Афанасия о преступлении закона (12 янв.)

Иже бо не творит воли Божией, сеть есть диаволя. Яко же и птица, аще и не всем телом увязнет, но за едину ногу, под властию бывает положившаго сеть, тако и мы от жития и от веры не благи под властию есмы диаволею. Не всяк бо, рече Господь, глаголяй ми: Господи, Господи, внидет в царство небесное (Мф. 7:21), и паки: не вем вас, отступите от Мене вси делающии беззаконие (Лк. 13:27). Видите ли, кое приобретение от веры без добрых дел? И девам то же речет: не вем. Кое убо приобретение бысть им от девства к толиким трудом, егда не знает их Владыка? И многи инде обретаем о вере не осуждены, от жития же зла мучимы. А иже заповеди не сохранят, тии отнюд погибнут. Понеже и девы не блуда деля не внидоша в жизнь, ни пианства, ни зависти, ни зловерия, но скудостию елеа, иже не творяху милостыни. Елей бо милостыня есть, та бо всяк грех очищает и к Богу приводит. Слышасте бо и самого Господа к немилостивым глаголюща: отъидите от Мене, проклятии, во огнь вечный. Иного ни единаго не помяну греха, но не сотвористе токмо, рече – милости, ни кормисте братии Моея, того ради не знаю вас (Мф. 25:41–45).

6. Евагрия о смиренных и величавых людях (12 янв.)

Почто гордишися, человече, кал сый и гной? И что надымаешися и выше облак возносишися? Посети свое естество, яко земля еси и пепел и по мале в персть расходяся. Ныне горд, по мале червь. Что выю возносиши, по мале изгнивающую? Велий человек, иже помогаем есть Господем, оставлен же быв, позна свою немощь. И никое же добро имаши, еже не от Бога прием. Что чудишися убо, до утрия сый? Что благодатию Божиею красуешися, яко притяжанием? Увеждь Вышняго и не возносися велми, здание Божие сый, не отмещися Создавшаго. Помощь приимая от Бога, не отверзися Благодетеля. На высоту возшел еси жития, но Той даде. Исправил еси добродетель, но Он поспеши, – исповеждь возвысившаго тя. Человек еси, не преходи естества, но познай племя свое, яко твоего же естества. Не злобы ради своея отмещися рода, аще и смирен и худ есть сий, а ты велик, но той же Содетель созда обою. Не преобиди смиреннаго, есть убо тебе тверждший и, по земли ходя, не падет скоро; высок же, аще падет, сокрушится. Гнило седалище гордыня, ибо вседаяй на ню скоро падет; смиренный же всегда крепко стоит, и не движет ему никогда же ногу гордыня. Горд монах, яко же древо без корения, не потерпит бури ветренния. Град и стена смиреная мудрость, и живый в нем не разорим есть. Говор (пузырь) на воде погибает и память гордаго не пребывает по смерти. Слово смиреннаго – крепость души, гордаго же – исполнь ярости. Молитва смиреннаго дойдет к Богу, молитва же гордаго разгневает Бога. Егда взыдеши на верх добрых детелий и тогда тебе не требе есть хвалитися, падый бо на землю скоро возстанет, спадый же с высоты скоро язву смертную приимет. Жезл наказания образ, его же имеяй, преходит Иордан жития; в руках путнику везде и на все потребен и наказание детельное исправляет жизнь мужеви. Жезл испровержен бысть в змию и наказание детелное преступлено бывает сладостию. Богу нашему слава ныне и присно и во веки веков.

7. Поучение о труде и о царствии небеснем (13 янв.)

Не ленитеся, братие, о своем спасении, ни пребывайте аки скоти без воздержания, ядуще и пиюще, ибо не на сию жизнь избрал ны есть Христос, но в царство небесное позвал ны есть и заповедь предал есть нам, юже сотворивше внидем в не. Многими бо скорбми подобает нам внити в царство небесное и нужницы восхищают е: та бо нужда принуждает Бога и подает жизнь. Той бо весть сердца наша, аще во-истину труждаемся его ради в молитвах и во бдениих к церкви текуще, песнми славяще своего Творца, Иже во ангельское достояние возводит работающие ему человеки и томящыя себе Бога ради и презрящыя маловременную сию жизнь. И знаеми суть сии Богови. Весте бо и сами Павла глаголюща, яко неправеднии не внидут в царство небесное, ни блудники, ни прелюбодеи, ни содомский блуд творящии, ни татие, ни клеветницы, ни мздоимцы. (1Кор. 6:9 и сл.). Люте бо зело в сих увязшу и христианину нарицатися, нежели Божия милости чаяти.

8. Наказание-поучение о небеснем царствии и о вечней муце (15 янв.)

Аще бо в велик град внидем, иже есть в сем мире человеки согражден, и паки по мале разоритися ему, и начнем сквозе его ходяще, еже насытится доброты его, межины (площади), и улиц, и дворов, и быхом хотели всегда сквозе и ходити, красоты его деля, – кольми убо паче иже сподобятся в Господень град и в горний Иерусалим внити, идеже начнут присно наслаждатися, егоже похвалы выше доброты. Паки же во дворы царя земного влезше и видевше в нем палаты велики, украшены различным мрамором и златом и сребром, потом же видим царя и мужи стояща лепостны в красных одеждах, и царя седяща одеяна в порфиру и в венце от камения драгого в таковей доброте, и красоте тленне сущей, – кольми паче иже в небесное царствие внидет к Богу, не насытится доброты Его, радуяся и славы Его присносущныя. Аще бо влез в виноград, человеки насажден, и видев и весела взором и овощем всяцем украшена и цветы всяцеми, долго хотя глумитися в нем, сквозе его ходя веселитися, и тленен сущ, – кольми паче в Божий град влезый, иже будет творил заповеди Божия на сем свете, возрадуется славно и духовно во свете невозглаголаннем и во славе неминующей, видя Владыку Господа всех, Своею славою отвсюду осияюща праведники, вельми паче солнца сего сияя в нетленная и безсмертная очеса радующымся и веселящымся духовно присно и прочая величная приемлющым вечная, иже не могут сказаны быти. – Побеседуем же о безконечней муце притчею сего века, якоже и безконечная благая сказахом. Како убо можем стерпети неусыпающаго черви мук? Иже зде худого гомзания (щекотание и кусание) мух и комаров и мшиц (мушек) не можем терпети, но вертящеся на постеле своей и руками сего и онаго тщимся яти, ногты убо по телу чешемся, помощь телу творяще, гомзания ради некотораго. Како же убо огненное родство (геенна) стерпим удобь, иже солнечнаго зноя не можем терпети и под сень подбегаем или в клеть, покоя ищуще? Како же тьму преисподнюю стерпим и скрежет зубный, иже ныне в темне храмине ни единаго дне можем терпети, не сущи болезни, ни плача, ни скрежета зубнаго? Тоже мястися (приходить в смятение) имем и дрожати, глаголюще: когда излести ны из храмины сея, да быхом свет сей видели худый? Аще убо таковая благая вечная и безконечныя муки, якоже се по ряду сказахом, почто ленимся, а не потщимся к Творцу и Богу нашему? Ему же слава ныне и присно и во веки веков.

9. Поучение о небесном царствии (17 янв.)

Царство небесное вечно есть и безсмертно, его же ждут работающии Господеви, егоже деля отверзошася мира сего и всех похотений его – и не достоит нам поминати тех. Се же оставихом заповеди деля Божия, да не паки временная возлюбивше, вечная погубим. Не ложно бо есть слово глаголющаго, яко всяк, иже оставит дом и села, или отца, или матерь, или жену, или дети, или братию и сестры, сторицею приимет зде и в будущий век жизнь вечную (Мф. 19:29). Но яже инии мняще протолкуют, яко о мученых во время гонения имене ради своего рече Господь. Не глаголет бо: яко тии едини мучеми за имя Мое во время гонения, телеса своя на смерть предаша, да жизнь вечную наследуют, но – вси, иже имене ради Моего от злых, мира сего и всех похотей его и всего имения, отвергшеся и жизнь вечную, рекше, с мученики наследуют. И всех нищих духом, и чистых сердцем, и кротких, и боящихся Мене блажа Спас глаголаше: яко ваше есть царство небесное. Мученицы бо, во един час времене подвизавшеся, скончашася, – житие же чернеческое по вся дни страждущий Христа ради мучен бывает. Не противу плоти и крови ополчаяся, по противу владыкам и противу властем, противу миродержцем тмы и противу духовом лукавства до последняго издыхания брань имуще, и страждут, и венчаются, оружие Божие имуще за помогающаго нам и совершающаго ны Христа.

10. Поучение блаж. Макария (19 янв.)

Яко не хотящии по закону творити и не хотящии слышати, егоже не хотят, да ся уготовят слышати и терпети. Аще бо мы умолчим, камение возопиет. Аще кто яже на пользу с дерзновением глаголет приимет мзду, аще ли яже на покой слышащим глаголет, лицемерен приимет суд. Уве бо есть человеку от истины пользу приемлющу возненавидену быти паче, неже от лицемерия вреждену возлюблену быти. Возненавиденныя бо без правды воздвигнет Господь, возлюбленныя же всуе уничижит. Яко мнози путие к покаянию. Первее, еже каятися грехов своих. Второе, еже оставляти ближнему согрешения. Третие, молитва от всего сердца возсылаема. Четвертое, еже милостиню даяти. Пятое, от смирения мудрость. Не можем убо ленитися, но по всем сим по вся дни ходим, зело бо угодни путие суть сии. Богу нашему слава ныне и присно и во веки веков.

11. Нет спасения без милости и без любви (20 янв.)

Приидоша некогда трие братие к некоему старцу в скит и вопроси един, глаголя: отче, навыкох ветхий и новый завет изуст. И отвещав старец рече ему: исполнил еси аер словесы и несть ти пользы. И вторый вопроси его, глаголя: аз ветхий и новый Завет исписах себе. И отвеща старец рече ему: и ты оконца исполнил еси кожами и несть ти пользы. И третий рече ему: а мне на огнищи взросло есть былие. И отвещав старец рече ему: а ты страннолюбие отгнал еси от себе и несть ти пользы. Но аще хощете спастися, имейте ко всем любовь и милости прилежите. Богу нашему слава ныне и присно и во веки веков.

12. Св. Василия о добродетели (21 янв.)

Научися, верный человече, благочестию быти делатель. Научися жити по евангельскому словеси: очима управление, а языку удержание, телу порабощение, уму смирение, помыслы чисты имея, гневу потребление. Понуждайся на добрая дела. Господа ради лишаем, не мсти, ненавидим – люби, гоним – терпи, хулим – моли, умертви грех, распнися с Христом. Всю любовь возложи на Господа, да обрящеши идеже тьмы ангел суть и первенец соборы и апостольстии престоли, жезли патриаршестии, венцы мученичестии и похвалы праведник, тех сам ся причти и возжелей. Егда ли приидет напасть на тя от искушения Божия или нагота, или скорбь, или глад, или ино что, или недуг искушая тело твое, или крови пролитие – Бога ради, терпи с похвалою Божиею, надеяся на Господа милостива. Да со дерзновением несрамно речеши: проидохом сквозе огнь и воду, и извел еси нас во утеху.

13. Косьмы Пресвитера к епископом и попом, пасущим стадо Христово (21 янв.)

Не погребайте таланта в пищах, не крыйте бисера Господня в пиянстве. Аще бо он раб приим един сребреник и того не погубив, но принесе его к Господеви рек: убояхся тебе, яко яр (жесток) еси, жнеши, идеже не сеял еси, и собираеши, уду же не расточал еси, и шед окрых сребреник твой и се имаши твое, – каков слыша ответ, кую ли мзду прият? Злый – рече – рабе, ведяше, яко жну, уду же не сеях, и собираю, уду же не расточих, почто убо не вдал еси сребра моего торжником, да и аз пришед взял бых свое с прибытком? И рече к предстоящим: вверзите, его в геену огненную (Мф. 25:24–30). Послушайте, пастыри, страшнаго сего ответа. Аще убо не погубив сребра Господня, но в плате чисте свое принес владыце, тольми мучен будет, – кольми паче приимшии два сребреника или три, тех не сохранше, но в лености погребше, сугубу и трегубу муку приимут. Послушайте верховнаго апостола, как вас учит, глаголя: пасите еже в вас стадо Божие, присещающе не нуждею, но волею, ни мздою, но любовию, не аки обладающии областию, но образ бывающе стаду, да явитеся Начальнику пастырей и приимите неувядающий славы венец (1Пет. 5:2–4). И паки: трезвитеся и бдите, супостат бо наш диавол аки лев рыкая ходит, ища кого пожрети, ему же противитеся тверде верою (1Пет. 5:8–9). Слышаще сия словеса, епископи, внимайте убо о сем како есть лепо вам прилежати о порученнем стаде, да сподобитеся прияти обещанная благая, о Христе Иисусе Господе нашем.

14. Св. Иоанна Златоустого о милостыни, како подобает от праведного труда творити милостыню, а не от лихоимства (янв. 24)

Рече Господь: сотворите себе други от мамоны неправеднаго, да приимут вы в вечные кровы (Лк. 16:9), ибо рек сице: не остави токмо до сего, но приложи: от мамоны неправеднаго, да ныне исправление твое будет. Еже бо – рече – стяжал еси зле раздай добре, собрал еси неправдою, ныне каяся расточи; ибо не се добродетель, еже от тех даяти, но еже от тех остатися, ибо последнее беззаконие есть, еже у иного отымати, а иному даяти. Аще бо твориши милость от неправды, тех прежде помилуй, их же преобидел еси. Не иже бо многия милует, той есть милостив, но иже ни единого не обидит; ибо от неправды не отступающии и дары Богу приносящии неприятни суть. Пишется бо: жертвы беззаконных мерзки Богови (Притч. 15:8). Лучше не стяжати такового имения, неже лицемерно дияти Богу. О нетворящих милости к нищим пророком глаголет: затыкаяй уши свои не послушати убогих и сам призовет и не будет послушающаго (Притч. 21:13). Темже положити милость подабает и суд на уме, стяжати убо по суду, раздавати же милостыню по писанному, да тем приближитися к Богу. Тем же в сих да истязует себе каждо и да смотрит, что у него, от своих ли трудов богатство, от негоже хощет дары принести Богови; еда немощным нужду сотвори или под собою сущия облихова (осудил или обидел). Аще бо и властель еси – не насильствуй, ни лихоимствуй, но егда приключится тебе власть, покажи праведное. Аще ли отъемля у убогих и убогим даеши, лучше ти есть не грабити чужих, ни творити милостыни. Почто бо сотворяеши мерзко твое приношение, от неправды приносити начиная? Им же бо хощеши иного помиловати убогаго, лучше того помилуй, егоже обидел еси, ибо лихоимства Бог не приемлет. Милостыня бо от неправды не бывает, ни от клятвы благословение приидет, ни от слез веселие. Темже молю вы, разсуждайте сами себе о всякой вещи и понудитеся заповеди Господня творити, да обрящете покой душам вашим.

15. Об Иове и о нищелюбии (24 янв.)

Послушайте, что глаголет писание о Иове, колико имение бе ему, стада волов и овец, и вельблуд, и прочее все имение, еже поручи Бог Иову, все то огнь сожже. И не рече Иов глагола хульна, но: Господь даде, Господь и взят. Послушай, он толико погубив не похули, но егда прия похвали, и егда взято бысть от него не сжали си. А нынешнии человецы, егда приимут, то давшаго не помянут, егда же ли погубят, то Творца начнут хулити и считают исправления своя. Аще где един спуд (одну меру, пуд) или един хлеб дали будут убогим, или едину свещу вожгли в церкви, или един козлищ на плодоносие принесли, то поминают и глаголют: «сия добрая дела сотворихом, да почто найде на ны злоба сия?» Не точию же худых заповедей поминай, но елико согреши поминай. Вжегл ли еси свещу в церкви – добре, но вниде убогий обиден тобою и воздохнув на ня со слезами и угаси светение твоея свещи. Дал ли еси убогому хлеб – то аз ти послушествую; помяни, яко стада овец твоих всю жатву убогаго пояли суть. Темже не обиди много, добра мало творяй. Не похищай много, подаяй мало. Хощеши ли не обиден быти, то не обиди убогаго, ни ближняго своего, сиротам не досаждай, вдовице насилие не дей, убогаго не презри, южик не отвращайся, со други твоими не ликуй, старцев не гневи, родителя не безчествуй, церкви не отлучайся, позорищам не приближайся, любодеяния отступи, сребролюбия лишися; братолюбия не забывай, злобен вред от сердца своего отжени и любовь в сердце всади; страннолюбия не отмещися и истины не отступи; клеветания бегай далече, смирение возлюби, свара гнушайся. Сие все храни и не имать тебе прияти зло; аще найдет, то не хули. Сия вся сотвори Иов, слуга Господень; егда наидоша ему злая она, то не похули, но похвали Бога, рек: буди имя Господне благословено во веки. Аще убо кто болит или богатства отпадет и его терпение восприим, того венца достоин будет о Христе Иисусе, Господе нашем, Ему же слава ныне и присно и во веки веков.

16. Св. Иоанна Златоустого о милостыни и о воздаянии мзды от Бога (27 янв.)

Иже бо даеши нищым, то в руку Христови влагаеши. И никто же может их исхитити от руку приимшаго, но пребывают мног нам делающе плод; ибо ни человек презрит, но противу воздаст дар, но боле паче Христос, Иже не взаем дает, – и како по взятии не вдаст? Слыши Соломона: милуяй, рече, нищыя, взаим дает Богови. (Притч. 19:17). Видел ли займу вещи преславныя: ин есть вземляй, а ин одолжается и поручает. Не рече бо: милуяй нища дает Богови, но – взаим Богови, да не просто свое возмети, но со многим приходом. Ибо мы в заем даем тем, иже боле воздадят, и кротких ищем – кроткаго же и благоразумиваго Бога, сторицею воздающа, оставляем. Что бо нам чрево воздаст, многая потребляя? – Мотыла (помет, навоз) и тлю. Что ли тщеславие? – Зависть и злобу. Что ли сластолюбие? – Печали и суету. Что же блуд? – Геенну и червь неусыпающий. Та суть богатых и немилостивых достойна: и зде убо им зла, и будущая горка. Не ложь бо есть рекий: ищите прежде царствия небеснаго, и сия вся приложатся вам (Мф. 6:33). Да почто не печемся о милостыни, братие? Милуй, рече, нищыя, взаем дает Богови. То ли взаем емлеши, Господи, у мене, еже к нищему милостыню? Да когда мне ю отдаси? Повеждь ми воздаянию время. Егда сядяет Сын Человеческий на престоле славы своея и поставит милостивыя одесную себе, а лихоимцы и немилостивыя ошуюю, и речет тем, иже одесную Его: придите благословении Отца Моего, наследуйте уготованное вам царствие от сложения мира. Киих ради? Понеже алках – и дасте Ми ясти; возжадах – и напоисте Мя; наг бех – и облекосте Мя (Мф. 25 гл.). И чего ради, Господи, ничто же инех приносиши в память, точию милостыню? Не сужду, рече, согрешивших, но непокаявщихся. Не осуждаю богатыя, но немилостивыя и безчеловечество их препираю, яко имуще такову помощь спасения – милостыню глаголю, еюже всяк грех потребляется – и толико благодеяние презресте. Ибо не сего деля имение приял еси, да в пищи и пиянстве погубиши е пред собою, но да послеши е во он мир руками нищих, в милостыню е истрошив (разделивши, раздавши). Еда бо свое имаши убогих тебе деля дано есть, Бог от своих повелевает ти дати, аще и от своих ти трудов есть, и тою ради свое твориши имение. Еда не можаше Бог отъяти его от Тебе? – Но не творит того, да тя сотворит к нищым любочестна и теми царствия наследника. Ему же слава ныне и присно и во веки веков.

17. Св. Ефрема о покаянии (28 янв.)

Доколе, о друже, держим еси врагом, совершаеши ему угодная? Доколе, о друже, телесным страстем работаеши смертоносным сущем? Приими мой совет оживляющь тя, и очистив твою душу купно же и тело, приступи к Спасу исцеляющему кающыяся; велико ти спасение есть аще к Нему возбнув (пробудившись) не обленишися приити. Паки по днех согрешая и созидая, потребляя, расточая и собирая, детем уподобился еси, яко множицею победил еси скорпию, еяже жало познал еси в себе. Бежи змия, его же губительство веси. Сам преткнувыйся о камень поткнется и пики сторицею сотворит, слен есть и безумен. И се имей на сердцы твоем и со тщанием к покаянию притецы и умоли создавшаго тя. Буди смирен и умилен, алчен и воздыхая. Веселися о предваривших, радуйся о последних. Тако бо иногда и Закхей мытырь спасеся; такоже и блудница, некогда блудне живши и видевши Спасове нозе, разреши плевицы и власы отерши и тако из рова страсти излезе. Тако и ты выю возложи на колену и явися умилен и сим спасешися. Виждь града Содомска и Гоморска, рода непокорива и сквернава; бежи нечиста, на него же одожди Бог огнем и молниями, и весь град их пожже. Виждь града Ниневитска светлость и красно цветуща, грехи же и злобами кипяща и сокрушити и Господь заповедав. Видев же я паки в вретищи и в пепеле ходяща, во алчбе и жажде обледевша, трепещуща и страхом одержимых, всюду плачущихся, друг за друга рыдающя, свободнии, работнии, богатии, нищии и князи и старейшины, старцы и юноты со младенцы, оущедри я, помилова и спасе, суд преложи, иже бе повелел прияти им. Тако бо грешники непокоривыя мучит, не велит же непокорившимся погибнути. Потщися покаятися и спасешися. Готов Бог на милость и на исцеление, скор на помощь, прилежен на избавление, просящим же дает, толкущим отверзает, молящемуся же подаст прощение, простирая дары требующим, не щадит ищущему, не отреет падших, но на спасение руку подает, дарует разрешение ищущим, претит не покоримым. Соблазнил ли ся еси? – воспряни. Пал ли ся еси? – востани. Молися и мил ся дей; припади, проси, ищи хотящаго тя спасти, воспряни и не впади в тину, аще ли впадеши, паки востани. Низложен – исправися, согрешив же – возвратися, исцелен же – пребывай здрав всегда, и спасен быв, отврати недуги, ими же бе побежден еси, да не разжжет тебе огонь, его же погасил еси. Не впади в скверну, юже бе отмыл; не уподобися свиниям, радующимся скверне; не порервнуй псом, поядающим своя блевотины. Никто же бо, возложив на рало руце и зря вспять, управлен будет в царство небесное. Никто же, омывся и паки к скверне притек, чист бывает. Един Xристос, едина вера, едина благодать, едина страсть, едина смерть, едино воскресение. И не подобает заколеному паки жертвою быти, ни избавлению иному за тя быти. Свободил ли ся еси, то не буди раб самоволне; омыл ли ся еси, не осквернися паки, – небо имаши бани тверды на второе омовение. Через естество во гресех погрузився, не отчай себе отнюд, токмо покайся и спасешися о Христе Иисусе Господе нашем.

18. Св. Иоанна Златоустаго, яко подобает молитися за враги и за творящия пакости (29 янв.)

Елико убо ты молишися от души за оклеветающих тя, толико Бог извествует о тебе и сам месть творит за тя: Мне бо, рече, месть, Аз отдам, глаголет Господь. И паки рече Господь: любите враги ваша, добро творите ненавидящим вас, молитеся за творящия вам пакости и изгонящия вы (Мф. 5:44). Чесо ради повеле? да тя избавит от скорби и гнева и злопоминания и своея совершенныя любве сподобит, хощет бо вся человеки спасти и в разум истинный привести. Яко убо Бог естеством сый, всех равно любит, но добродетельнаго прославляет, злаго же в веце сем на благо обращает, яко во тьме ходяща безумием. Съвершеный бо благодатель не весть разнства ни своему, ни чужому, ни рабу, ни свободну, ни верну, ни неверну, но всех равно милует. Несть бо, по апостолу, ни Иудей, ни Еллин, но еси едино суть во Христе (Гал. 3:28), Ему же слава со Отцем и с пресвятым и благим и животворящим Духом, ныне и присно и во веки веков.

19. Слово святаго Иоанна Златоустаго о лжи и клевете (30 янв.)

Да молю вы, братие, оставите пагубный вред, и еще к сему лжу и клевету и насилие отверзите от себе. Лжа бо есть первый грех и ремество диаволе, той бо есть первое солга Адаму и весь наш род введе в пагубу. Аще и простый той мнят грех друзии, по обычаю лжуще друг другу, ины грехи исповедавше и тех оставшеся, лжи не исповедят, ни останутся и не слышат пророка глаголюща: погубиши вси глаголющыя лжу (Пс. 5:7), и паки: оклеветающаго тай искренняго своего сею изгонях (Пс. 100:5). Клевета бу явы домы из корене испроврати (в корне, в основании разрушить);33 един будет оклеветан, обида же и плач во многи внидет, рекше, в дети его и в ближники и в други, да тех плач и воздыхание, колико имать дати клеветников тех молитве доити до слуха Божия, и свещы бо их угасают и просфоры пусты. О них же вправду рече Давид: Потребит Господь вся устны льстивыя, язык велеречив (Пс. 11:4). Яко убо и насильницы творят грех, татие и разбойницы, но они горше суть татей и разбойников, понеже тем худе извет есть, неимение и глад и нагота. Тии же убо нощию во тьме крадут, боящеся, а насилницы и мздоимцы во дне на свете крадут, и свою братию грабяще беды творят им велики, к сему же блуда и всякия скверны полны, их же апостол велит убегати, рекий: бегайте блуда, всяк бо грех, иже творят человецы, вне тела есть, а блудяй во свое тело согрешает (1Кор. 6:18). И паки: не прельщайтеся, ни блудницы, ни любодейцы, ни пияницы не имут внити в царство небесное, аще не покаянием крепким себе очистят (1Кор. 6:9–11). Мнози изветом худым глаголют рекуще: родом будет ин человек тепл, на похоть плотскую сотворен, да не может удержатися, а другий крепким и студеным телом совершен, да может удержатися. Аз же той извет малою притчею разорю: аще бо родом и вещию есть человек не удержим на похоть, то како, егда кто нудим от похоти, хощет нечто зло сотворити и узрит судию сего земного идуща, то речет ли – родом есть таков тать или блудник, да не убежу онаго, или егда узрит и не отбежит греха того, то где ему уже от рода по хотению онаго извет? Аще бо страх судии земного может погубити похоть, вельми паче онаго страшнаго и всевидящаго Судии страх могл бы в нас погубити всю злую похоть. Но понеже не имеем страха Его в себе, тем и сия изветы глаголем, и тех дел нечистых полни есмы. Тоже и еже поносим, аки тяжки нам еси заповедал заповеди, а сами себе не зазираем. Аще бо наш раб возсмеется пред нами или всклонився станет, то велика обидника нарицаем его и ран достойна; а Владыке Небесному, Его же еста очи велми паче солнца, Тому же над нами седящу и видящу ниши грехи и беззакония, не встягнемся ни поне аки земнаго судии – токмо не глаголем: «Ты тамо горе еси, а мы Тебе не боимся». О велие терпение Божие! Ему же слава ныне и присно и во веки веков.

20. Св. Антиоха о пострадании за друга (31 янв.)

Иже пострадати другу со другом, помогати же и труждатися угодно есть Богу. Ибо должни есмы творити, яко раби есмы ближнии Божию слову и служители, да угодим ему яко воини царю, от него же и оброки приемлем, души молитву и спострадание. Источник бо таковый имеяй, источаяй вся добрая: аще имение имать – дает, а в беде кого видит – восплачет, аще ли обидимаго видит – руку помощи подает. Подвизаемся убо, да вера наша и любы и терпение не без ума будет, но яко шлем и копие и всеоружие на врага. Ко всем любовни да будем и долготерпеливы, в крепости живуще, яко же и Господь наш Иисус Христос глаголет; тако подобает быти рабу Господню, убога слезяща не презрити, да не презрима будет молитва наша и слезы. И аще дары принесем велики Богови, не возносимся, но смиренномыслим, сие имеюще, да приимем Божия благодать. Глаголет бо первее спострадавый Иов: Аз бо, рече, о всем плаках немощне, воздохнув же видев мужа в беде суща (Иов. 30:25); аще ли видех нага, облеках, двери же моя отверста быша всякому пришелцу (Иов. 31:19, 32). Тако же и Товиа глаголет: Милостыни, рече, творях многи и егда видех мертвеца повержена опрятав погребах (Тов. 1:16–17); Пророк же рече Иосиа: Поженем познати Господа, зане милости хощет, а не жертвы и не всесожигаемых (Ос. 6:6). И Михиа рече: Аз возвещаю ти, человече, что добро или что ищет Бог от Тебе? – но творити с любовию милостыню (Мих. 6:8). Рече же и в Притчах: Избавляй ведомыя на смерть и убиваемыя от меча искупуй (Притч. 24:11). Иаков же апостол глаголет: Аще брат или сестра нага будета и лишена дневныя пищи, речет же има кто от вас: идита с миром от Мене, не дав има требования телесе, никая же ему полза (Иак. 2:15, 16). Учит же и Павел, глаголя: Облецытеся, яко избраннии Божии святии, во утробу щедрот, благость и смиренномудрие, кротость и терпение, приемлюще друг друга (Кол. 3:12, 13), содержащеся любовию, яко уди телеснии: аще бо страждет един уд, с ним болят вси уди (1Кор. 12:26). Петр же глаголет: Молю вы, возлюбленнии, отгребайтеся от всякаго зла; имущии благотворите, будите единомыслени и податливы, братолюбцы, милосерды, покориви, не воздающе зла за зло, ни клеветы за клевету, но противу благословите, яко на сие щадими есте, да длагословение наследите (1Пет. 8:9). Милосердый же Господь, хотя нас явити спасены от Отца Своего, будите – рече – милостиви (милосерди) яко же и Отец ваш милостив (милосерд) есть (Лк. 6:36).

21. Св. Иоанна Златоустаго о покаянии и о воздаянии суда (31 янв.)

Помыслите, братие, страшный он суд, егда приидет день он, приидет и нощь она страшная, паче же нощь грешных, а день праведных, егда разорится позорище, разыдутся образи злии и лжи, – тогда искусится каждо и делеса его, и честь его, и князь, и царь, муж и жена, егда жития воспросит от нас и добрых дел, а не славнаго величествия, нищеты или худости. Мне, речет, делеса даждь, аще и раб еси, свободнаго болий будеши; аще ли жена, мужа больше будеши по закону Божию и по написанию. Да отвержемся своих воль и да последуем Богу. О колико возстави море в житии и деянии плоти сея? колико воин сотвори? колико мятежей? колико ветров? колико утопаний? колико беззаконий? колико грехов? колико напастей и слез? колико зла во всех градех? колико в домех и на торзе сваров? И что помощь человеча или сила его? Вся страха наполнена суть: рождение его – болезнь, и смерть страшна, и яже по смерти – неизглаголанна, и неисповидима притяжания в сердце нашем добрая и злая, да аможе преклоняется мысль, тамо и ярем притягнет. Удари поспешне, да отверзется тебе скоро. Помяни, яко не по мнозе лете оставиши вся видимая, небо и землю и человеки и делеса. Помяни, яко ничто же еси телом, но и душею мала скорбь возмятет тя, мала болезнь возгорит тя, слово просто огромит тя. Почто убо не омерзе ти житие сие? Аз же ти глаголю: яко преселитися должен еси и горе во вратех небесных сотворити себе кущу и ту во веки пребывати. Но молися Богу и до смерти, да милостию приимет тя и в то время отверзет ти скоро; донеле же на земли еси, преклони колена к Богу. Горе душу имей и лицем присно покрывай землю, да призрит тя, яко паче труждаяся пребуди в молитве; да елико можеши, отверзи сия привременная, она поминай приидущая, злая же и добрая; она бо страх Божий приносят, а сия окрадают дела душевная. Сиры бо есмы вси и никого же имамы, но точию Бога помощника и поспешника, темже распленавше вся, попецемся о себе. Помяни грехи твоя и осуждение твое; помяни яко человек еси смертен и болезнен и страстен, сквернав и нечист; помяни, яко человек еси в житии печалне и бед исполнене и многи погубльшем добрыя и злыя, мудрыя и немудрыя, богатыя и нищия. Помяни, яко человек еси, имея кости смирены от ногу и до главы, не могий ни единаго дне труда понести и ни единыя нощи побдети. Помяни, колико еси согрешил Богови в делех и в словесех и в помыслех. Помяни, яко со львом и со змиею борешися день и нощь. Помяни, колико есть под землею душ, иже преобидеша страх Божий и не получиша покоя малящеся, но в долних земли плачутся блужений своих и лености и питаний и проказьства своих котор. Помяни, яко по мале умрети имаши и осудитися, не престай глаголя, но в своей души напиши си малое сие слово на сердце твоем и обяжи е на твоей выи: согреших, Господи, помилуй мя. Лучше ти есть сие венца царева, оно бо в муку вводит, а сие в жизнь вечную введет. В сих поучайся и в сих присно буди.

Февраль

1. Поучение на предпразднество Сретения Господа нашего Иисуса Христа (1 февр.)

Да есть ведуще, возлюблении, яко в сий день предпразднество есть внесения в церковь Господа нашего Иисуса Христа, еже сотвори закон совершая, Сам сый законодавец. И того ради сие сотвори, яко не начнет глаголати каменно-сердечный род еврейский: «аще бы Сей Бог был или Сын Божий, не бы разорил закон и пророк». Да того ради и се сотворил, повинуяся закону, закон бо беззаконных ради дан бысть, да суда ради боящеся сохранят закон. И се же бе писано в законе: жена егда раждаше детищь, не веляше ей закон яко нечисте влазити в церковь до четыредесять дний. Святая же Дева и Богородица, выше обычая человеча рождьши, не от похоти плотския, но от Святаго Духа заченши, паче смысла, Слова Божия воплощьшагося неизреченно, во двою совершена естеству, и бысть вне, закон хранящи до четыредесяти дний и не входящи во святая святых, ангелом блюдома и посем хранима во Египте от детоубийства Иродова. Умершу же Ироду, ангел Господень явися во сне Иосифу во Египте, глаголя: встав пойми отрача и матерь его и иди в землю Израилеву, изомроша бо ищущии душу отрочате (Мф. 2:20). Тако бо скоро кончается живот противляющихся Богу. Тем же молю вы: отсецыте от себе неподобныя мысли и, яко щит, веру приемше, укрепимся на безбожную лесть, да не явимся делы злыми с Господем борющешся, якоже древле Ирод, но паче да будем поспешницы Богу, любяще Его всем сердцем своим и ближняго, яко и себе, яко же рече Господь. Кии же суть ближнии наши? Не сии ли, с ними же сотворим милость: слепии, хромии, алчнии, страннии, их же Господь братиею нарече? На тех бо, аще сотворим милость, то тии нам отверзут райския двери и без студа введут в породу (в рай), аще не скупостию затворимся. Сам бо ны Господь, в то царство зовый, глаголет: будите милостиви, якоже и Отец ваш небесный милостив есть; будите сынове Вышняго и причастницы царствия Его (Лк. 6:36). Видите ли, братия, како Бог сыны своя милостивыя нарицает. Тем же, послушающе Святых Его словес, напишем на сердцах наших, да услышим глаголюща Его: Приидите бласловении Отца Моего, приимите уготованное вам царство от сложения мира (Мф. 25:34). Тому приимницы будем, славяще святую Троицу, Отца и Сына и Святаго Духа, ныне и присно и во веки веков.

2. Поучение на Сретение Господне (2 февр.)

Днесь убо, братие, Законодавец закон совершаяй, яки младенец вносится в церковь земного Иерусалима. Днесь праведный Симеон, Духом Святым подвизаем, на Сретение Господне тщится; бе бо обещано ему Духом Святым не видети смерти, прежде даже узрит Христа Господня во плоти. Днесь престареи руце Симеони Творца и Бога всех приемлют; днесь радостию исполнився праведный старец отпуста милостивно просит, глаголя: Ныне отпущаеши раба Твоего, Владыко, по глаголу Твоему с миром, яко видеста очи мои спасение Твое, еже еси уготовал пред лицом всех людей (Лк. 2:29–31). Прорицает же и о распятии хотящую быти печаль святей Богородице, и рече: Тебе же самыя душу пройдет оружие (Лк. 2:35), сиречь егда узрит Его распинаема, тугою лютою и печалию тяжкою аки копием прободет свою душу, не домыслящися волнаго распятия. Днесь Анна пророчица исповедается Богу, сиречь хвалу Ему воздает, и в плоть человечу одеявшася видящи на спасение всего мира: «Сей наше сетование обратит на радость, Сей паки райския двери отверзет всем верным, затвореныя преслушанием древле прадеда Адама; Сей разорит клятву, юже приобрете прабаба Ева». Тем же, не исхождаше из церкве, постом и молитвою служащи день и нощь Богови. Той, братие, поревнуем вдовице, пририщуще (спешаще) к церкви день и нощь: та бо есть дом Божий, та есть христианом прибежище и молитва Богови приятна, та есть очищение души и тела, к той святей церкви всяк верою приходяй спасается, ту бо пение и молитва Богу возсылается за весь мир. В той предстоит Святая Божия трапеза, имущи духовное неизреченное брашно, Тело и Кровь Агнца Божия, заклавшагося волею за весь мир и преложишаго тело свое в духовное брашно, и рекша: ядый плоть Мою и пияй кровь Мою (с верою), во Мне пребывает и Аз в нем (Ин. 6:56). Тем же, братие, разумеем, к Кому приступаем и что приемлем, да очистившеся от всякаго зла и мир между собой имуще и тако приступайте к святому Телу и Крови Господней со страхом и трепетом, и потом чисти пребывайте, храняще святыню ту в теле своем, а не аки свиния устремляйтеся на пиянство и на ину скверну, но яко раби Христови и причастницы Таин Его, мир имуще между собою и любовь нелицемерную. Нищелюбцы и страннолюбцы будите и Божию словеси сохранницы, а не послушницы точию. Подвигнемся житием чистым приближитися к Богу, да услышим Его глаголюща: Приидите, благословении Отца Моего, наследуйте уготованное вам царствие от сложения мира (Мф. 25:34); вас бо ради странен бых, от небеси на землю снидох, да вы, устраншыяся от Мене, паки примири ко Отцу Моему и Богу вашему; вас бо ради алчен и жаден бех, да давшим подание подам райския пищи наслаждение и за сию одежду и тленную ризу в нетленныя облеку вы и царскими увяжу вы венцы. Тем же, братие, всею душею и чистою верою прославим пресвятую Троицу, равночестную и равнопрестолную, в триех ипостасях сияющую, неразделно Отца и Сына и Святаго Духа, ныне и присно и во веки веков.

3. Слово о добром хотении и о злем (3 февр.)

Вопроси брат старца: «что, отче, доброе дело и еже злое хотение?» И отвеща отец: «брате, всяк покой плотский мерзок есть Богови, Сам бо рече: тесный и прискорбный путь имети, вводяй в жизнь вечную (Мф. 7:14). Имже бо кто избирает сего пути, то доброе хотение творит, и удержаваяй себе во всякой вещи, скорбь себе сотворяет, еже по силе своей. Рече бо Апостол: воспящаю тело и порабощаю е, добро дело содеваю (1Кор. 9:27). Видиши ли, яко и чрез плотское хотение божественный муж сей хотя плоть свою порабощает. И убо имеяй доброе се хотение спасения во всякой вещи в потребу свою, в малу скорбь да вменяет, яко се что глаголю? Пришед спати на постелю мякку и перием совершену, неугодно дело телу творю. Аз же малу скорбь глаголю верху рогозия лещи, лепости ради телесныя, стыдяй бо ся тако творити – не благ есть. Инии землю точию имут на покой, а инии камень, якоже божественный Арсений и инии мнози; а инии тернии полагаху под главу свою, скорби своя собирающе. И паки воду в поварнице близ имея и пия ю яко безстуден обретается. Аз же делатель есмь и подобает ми делати благая, да малу скорбь приложю, и телеси обрести брашно добро и чисто, но непотребствено моей души. Хлеб подобает ми хуждьший имети, да помышляю отнюд неядущих и прежде всех Владыку нашего Христа, иже горести и оцта не от рекся мене ради вкусити: се есть о Бозе хотение. А еже по плоти есть всяк покой и во всем его любити – пакостно есть и на велий вред души... Того ради просто во всем творим, в пищи, в питии и одеянии, и тако убо отсецем от себе таковое велепое хотение и спасемся. Аще ли повинен еси таковому деянию, сам себе помилуй и отрини от себе таковыя страсти, и избудеши вечныя муки и вся благая получиши, да и на мне грешнем будет милость Господня, понеже многа зла и безчисленные грехи содеял есмь.

4. Св. Иоанна Златоустаго об отношении к пастырям церкви (4 февр.)

Слышите апостола Павла глаголюща: покаряйтеся старейшинам (наставникам) вашим, тии бо бдят о душах ваших, яко слово воздати им о вас в день судный (Евр. 13:17). Братие, добре чтите я: ты бо токмо о своем спасении печешися, аще устроиши точию житие твое добре, а о инех не радиши, за своя си приимеши; иерей же, аще устроит житие свое добре, а о тебе ленится и недобре тебе управит, то зле осудится. Аще ли закон имать неправ, то не послушай его, аще и ангел есть; аще ли право учит, то не жития его смотри, но словес. Но глаголеши: «како мне глаголет, а сам того не творит»? То ему дело есть, еже не ленитися и глаголати ко всем, а не глаголавшу суд прияти; да аще послушаеши его, то не осудишися, глаголет бо Господь: слушаяй вас, Мене слушает, а отметаяйся вас, Мене отметается. а иже хулит вы, Мене хулит (Лк. 10:16). Ни, братие, не подабает овце пастуха хулити, сей бо за тя и за твою братию службы сотворяет, за утра же и вечер за тя Бога молит в церкви, и вне церкве кресты нося – и та молитва за тя есть. Да то все помысливше, всячески его добре снабдите, яко отца. Но глаголеши, яко сквернен есть и зол, – то что до того тебе есть? но аще и добрый за тя Бога молит, что успеет, аще ты будеши зол? Тако же и скверный тебе не вредит, аще еси верен: вся бо благодать от Бога есть, яко иерей точию уста отверзает, но все Бог творит.

5. Св. Иоанна Златоустаго – откуду познается совершенный христианин (б февр.)

Истинну христианину светилу подобает быти миру и от всего знаему – от хождения, и от взора, и от образа, и от гласа, и от стояния, и от седания. Сия же глаголю не на указание, ни на лицемерство, но на утверждение и правду. Ныне же, аще взыщу тебе, откуду убо уведети хощу, везде вижю тя от супротивных являющася. Аще ли от места хощу тя уведети? но на конных уристаниих и позорищах и в беззакониях вижу тя весь день пребывающа и в злых соборищах съходящася с пагубными человеки. Аще ли паки от образа взорнаго хощу тя уведети, то грохохощущя вижу тя и расклабляющася (надсмехаться) и паки рабы некия блудныя и погибающия ничим же вижю добрейша тя. Любо от словес – ни едино изрядно или полезно слышю или здраво беседующа; любо от трапезы – то боле от того оклеветание явится. Да от того прочее (а потому далее) вернаго ища свойства, ни аще человек еси, яве како уведети могу? Егда бо гневаяся, ихаеши аки осел, ржеши, аки конь, на жены; питаешися, аки медведь, дебелиши (упитываеш) тело, аки бык и вепрь; помниши злобу, аки вельблуд; грабиши, аки волк; гневаетися, аки змий; вреждаеши, аки скорпия; лицемерствуеши же, аки лисица; яд же лукавства соблюдаеши, аки аспида и ехидна; ненавидиши человеков, аки рысь; враждуеши же, аки злый бес. И просто рещи, аки коза и щеница, по внешнему блядословию быв, без чувства пребываеши и непобедим, и безстуден. И аще бы еси душу видел такову, да веси зело, яко мнозем добрее лежати растлевшим и камень имети над ними лежащь, неже тягость греховную. Нечувство бо окаянныя воли повлачити, и паки человекоубийному не являтися (обличатися) и не казатися. Богу нашему слава, ныне и присно, и вовеки веков.

6. Наказание-поучение св. Иоанна Златоуста (9 февр.)

Яко два разбоя еста: един иже совлачит со убогаго, а другий – иже не одеждет убогаго, а имеет имение, той есть истинный разбойник. Яко да написуется в твоей мысли всегда второе пришествие и страшная она тайна: судия горд на престоле седит, и книги разверзаемы, делом тайным обличаемым: блужения, любодеяния, татбы, грабления, лихоимания, хулы, клеветы, зависти, разбоя, безчестия. Сия вся помысли и к сим огня негасимаго клокочуща, и тьмы ангел окрест престола предстоящих, и человеческий род испытаем и слово о сотворенных отдающ, от праведных грешницы разлучаемы, и вся напрасно грешником случающаяся. И яко кротость, и правда, и мудрость, милостыня же и тихость, и еже в бедех терпение и прочия добрыя детели – имущия их в небесное вводят царствие. Корень же всех благих звается алчба; якоже корень всех добрых алчба есть, тако путь есть всех злых пища. Яко недостоит злословити мужа праведна, – клевещущии бо и ненавидящии Божия раба во Христа согрешают. Яко душа угождающая человеком и тех славы желающая не узрит царства небеснаго, аще и добрая детели вся творит. Яко треми винами всяко душа словесная Богу прилепитися может: или теплотою веры, или страхом, или наказанием Господним. Яко смирения верх есть, еже терпети ложныя клеветы и напрасныя глаголы с радостию. Яко по истине смиренномудрый обидим не смущается, ни вещает утро, зане обиден бысть, но приемлет на ся клевету, яко истину, не печется препрети человеки, яко оклеветан есть, но прощение просит. Нецыи бо имя хулно на ся наложиша, а не суще такови. Ведомо есть, яко инако врачуется блудник, инако убийца, инако же чародей, инако лихоимец, инако врачуются татие, инако любодейцы лечатся, инако пияницы. Сего ради многия хитрости потреби есть строящему словесныя овцы, яко подобная струпом прилагати былия. Богу нашему слава.

7. Поучение св. Иоанна Златоустаго о напастех и бедах (13 февр.)

Несть праведна, иже не имать ничто же согрешения, и несть грешна, иже не имать ничто же блага. Аще убо видиши преподобнаго боляще или в напасть некую впадша, не смутися, но помысли в себе и рцы: «сей праведен есть и нечто сотворил мало зло, яко человек, того ради восприемлет зде, да тамо мучится». Сего деля и Авраам, понеже случися Лазарю имети грехи и богатому нечто блага, что глаголи? – восприял еси ты благая, а Лазарь злая (Лк. 16:25).

8. Слово о покорении всякаго человека (13 февр.)

Аще досадит ти кто, премолчи, глаголя в себе Христа ради: «яко Тому мене ради досадиша». Аще слышиши некоего ненавидяща тебе и оклеветающа, посли ему дар по силе твоей, да имаши дерзновение рещи в день судный: «остави нам, Владыко, долги наша, яко же и мы оставляем (долги) должником нашим». Аще разленишися востати нощию на утреннюю, не даждь ясти телу твоему, писано бо есть: праздный да не яст (Сол. 3:10). Глаголю бо тебе: аще простый человек украдет, вину имать, – тако вину причтет Бог и всякому невостающему на службу церковную, разве недуга и труда велия. Обаче и от недужнаго и от труднаго истязует Бог молитвы духовныя и служения: они (сии) бо и без дела могут приноситися Богови. Аще оклеветаеши брата твоего и оскорбит тя совесть твоя, шед поклонися ему до земли и рцы: «отдаждь ми, отче, яко оклеветал тя есмь», и ктому описывайся (остерегайся) оклеветати, смерть бо есть оклеветание души. Аще брат любовию принесет ти почесть, и веси, яко нищае тебе есть, даждь ему зело больши твоея почести; аще ли не имаши, поклонися ему до земли, глаголя: «отдаждь ми, брате, Господи ради, зане нищае тебе есмь, а Бог воздаст ти мзду добром». Востая от сна своего, прослави Бога усты твоими и абие начни пения, Божия псалмы; еже бо ум простирати от утра, яко жерновы, тоже мелет весь день или пшеницу, или полову (плевелы). Темже вари прежде и влагай от утра пшеницу, даже враг не вложит половы. И егда ти речет сердце в день или в нощь: «востани, помолися Богу, – разумей, яко святый ангел присещая глаголет ти, той глаголяй ти: «востани, помолися Богу»; тебе же востающу и той востанет с тобою, отгоняя от Тебе злыя духи, рыкающия на тя; аще ли не востанеши и той абие отходит от Тебе, и тогда впадеши в руце враг твоих. Не поминай отнюдь жены в мысли твоей, аще и свята есть, но паче молитву твори и успи; еже бо человек помышляет во дни – се истое и в нощи видит и творит, или добро, или зло. Молися первое о очищении страстей, второе – о избавлении неразумия и третие – от всякия напасти и о оставлении грехов. Единыя проси в молитве твоей правды и царства, рекше, добронравия и разумения, и ина вся приложатся тебе. Аще в болезнь впадеши и просиши у кого вещи некия в востребование и аще не даст ти, – не имей печали в сердце твоем, но паче рцы: «аще бых достоин прияти, Бог бы вложил в сердце брату, и дал бы ми». Аще видиши брата в блуд впадающа или во ин грех, абие рцы: «проклят буди, сатана, твое сие есть дело, а не бы сего брат мой о себе сотворил». Блюдися и утверди сердце твое, еже не осудити брата твоего, да не отыдет от Тебе Святый Дух. Аще ли же оклеветает брат брата пред тобою, не мози срамляяся его рещи: «тако есть», но возбрани ему, да умолчит, или рцы ему: «яко аз, брате, есмь осужден отнюд и не могу иного судити», – и спасеши себе и онаго. Возлежа на одре твоем, помяни гроб твой, глаголя: «будет ли ми востати на утрений день, или не будет». И молися прилежно прежде сна Творцу, и не помысли ничтоже скверна, да приимеши вечная благая от Господа Бога. Ему же слава ныне и присно и во веки веков.

9. Св. Евагрия о осми мыслех (15 февр.)

Ума убо плавающа (блуждающаго) уставит чтение и бдение и молитва, мысль же разженну усушает глад и труд и отшествие. Ярость утолит говение и долготерпение и милость, и сим приносимым содеваются благая. Временная же и уставная бывающая добро есть, безуставная же и безвременная пакостна суть, паче же неполезна. Егда убо различная брашна взыщет наша душа, тогда от хлеба воздержися и воды, да благодарна будет о простом хлебе. Объядения убо различных брашен желая, не получит вечных благ, глад же насыщение всегда блажит, во всякое целомудрие приводит питие водное. Иже убегаяй всех мирских сластей – столп есть печали и неприступен бесу. Печаль убо есть лишение сластей прешедших или чаемых; немощно же врага сего отступити, аще ум наш к земным прилежит, тамо бо полагает сеть и печаль содевает, идеже видит паче входяща в нас. Гнев убо и ненависть умножает ярость, милостыня же и кротость вся грехи наша потребит. О гневе же речено есть от Апостола: солнце да не зайдет во гневе вашем, да не нощию представше беси устрашат твою душу и явления творят в настоящий ум к брани, ибо страшная явления от смущения яростнаго сбываются. Не даждь себе гневному сему помыслу, помышляяй на опечалившаго вооружатися, и паки блудному помыслу, множайшу сласть являющу, – ов убо омрачает душу, сей же к разжжению страстей призывает ю, обои же ум твой сквернен творят и во время молитвы идолы являют. Чистыя молитвы к Богу приноси абие, да не во уныние беса впадеши, иже паче устрашает тя таковыми стоянии, и яко приобщився жилам, тако и душу восхищает естеством ярости. На беса брань твори и противу всякой сласти подвизайся, понеже убо духовну нам сладость приносящим и от сея духовныя сладости к бесом ярости творити понуждаемся. Инии же паки к мирским похотем влекуще нас, яростию чрез естество брань творити с человеки понуждают, да омрачив си ум и разума отпад лишен будет добродетели. Аще кто крепостне умом своим стоит и бегает мирских страстей, получит вечныя блага о Христе Иисусе Господе нашем.

10. Св. Ефрема наказание монахом (18 февр.)

Ты же, друже, понеже убо мира отверглся еси, почто убо покоя ищеши мирскаго? Он не в скорбь ли убо тебе позвал, а ты ослабы ищеши; на наготу позвал еси, а ты риз добрых ищеши; на жажду позван еси, а ты питания ищеши; на брань позван еси, а ты без оружия внити хощеши; на бдение позван еси, а ты сна не сыт еси, на плач и рыдание позван еси, а ты играеши и смеешися; на любовь позван еси, а ты брата своего ненавидиши; на покорение позван еси, а ты прекословиши; наследника царства своего нарекл тя есть, а ты плотская помышляши. И что речеши ему во он страшный последний день? Безмолвник ли еси? помяни седящия в темнице, яко не токмо затворены суть, но и железа на выях своих имут, друзии же в древе забиени суть. Пустынник ли еси? помяни пастухи овчия, какия беды приемлют и терпят в пустынях и горах, како в зиме городятся от студени, в лете же жгоми суть зноем солнечным. Терпение стяжавый, всякой добродетели касается, радуется бо в скорбех и в бедех благоискусен, в напасти веселится, на послушание готов, в любви исполнен, в досаждении славит, во укоризнах смиряется, в безмолвии мужествен, в пениих без лености, в постех готов, в молитвах прилежен терпением, в службах весел, в бедах непоколебим и во ответах нескор, в житии прилежен, в хождении красен, во общей братии благ, во ответех сладок, во бдениих тих, тощно (усердно) прилежен на странныя и немощным разумителен, на целование первый притекатель, в разумении трезвитель и на всяку вещь встанлив. Терпение бо стяжавый стяжал есть упование и всяцеми делы украшен таковый. И сицевый многим дерзновением к Богу вопиет, глаголя: терпя потерпех, Господи, и внят ми (Пс. 39:2). По сему убо пути божественному пойдем, понеже вси идут возлюбльшии Бога: сего пути шествия прискорбна, но покой блажен; сего пути шествия суть сия: покаяние, пост, бдение, молитва, смиренная мудрость, нищета духовная, небрежение плоти, прилежание души, на земли легание, безмолвие, сухоядение, алкота, жажда, нагота, милостыня, слезы, плачь, воздыхание, расхищение, пакости, труды ручнии, беды, совети змия, оклеветану быти и терпети, ненавидиму быти и злострадати, добро за зло воздаяти, отпущати должником долги, полагати душу свою за други, конечное – пролияти свою кровь Господа ради. Блажен, иже возненавидит человеческое житие и с Богом единым поучение его бысть. Блажен, иже на земли бысть яко ангел, подобен серафиму, чист имея помысл всегда. Блажен, имеяй день судный, тщится на исцеление струпон души его слезами. Блажен, иже всегда свобожден о Господе всех земных и временных века сего вещей. Блажен, предспевая детелми чернечества и воздержанием. Блажен, имеяй повеление страшное и хранение устом своим. Блажен, возненавидевый грехи и сотворивый добрыя детели. Блажен, иже в видимых и невидимых Бога единаго возлюбит. Блажен, иже бысть, яко облак, весь в слезах, гася огнь похотный и плотский. Блажен, иже вся имения своя прода и единаго купи небеснаго бисера Христа. Ему же слава ныне и присно и во веки веков.

11. Св. Геннадия, патриарха Царяграда, о страсе Божии (19 февр.)

Что требуеши, человече, книг многих ища, наставляющих тя к полезным, и пытаеши учителей всех, глаголя: «поведите ми, како ми спастися»? Се вся книги учащия в две главизне сходят, глаголю убо – Божий страх и еже имети Господа пред очима всегда, – себе внимай, яко же есть лепо, и разумееши вся заповеди Божия и удержи я. Тако бо суще от века святии угодиша Богу разумом чистым и непременными делы. Друзии же от них ни книг святых имуще, ни учими учители полезных их, от Адама бо и до Моисея различно жиша. Повеждь же ми, како угодиша Богу Авель, Енох, Ной, Мелхиседек, Авраам и Исаак и Иаков и прочии праведнии, иже быша прежде Моисеа, иже книгам не навыкше, яко же речено бысть, ни учителем неким в человецех учившим я, разве разумом Божиим и благими помыслы имеяша Бога пред очима выну? Тако же и по воплощении Господа нашего Иисуса Христа немы многи велегласы бывша суща и при речи, и при разуме: ови от сановитых приключшыяся, а другия от простыя чади, инии от пастух и различных житей, не точию мужи, но и жены, прибегоша к Богу и совершиша заповеди Его. И яве убо есть, яко от инятия (принятия) их прежде реченныя главизны. То уже не извещайся, человече, изветом о гресе, глаголя: «груб есмь и невежа, како есть лепо творити заповеди Господня»? – се тебе показано есть како угодити Богу. И не рцы: «не могу». Аще бо хощеши, с сими приступи ко Владыце, Давидски глаголюще: благости и наказанию и разуму научи мя, яко заповедем Твоим веровах (Пс. 118:66). И паки: научи мя творити волю Твою, Ты бо еси Бог мой (Пс. 142:10), и еже: помози ми – и спасуся и поучуся оправданием Твоим выну (Пс. 118). Всяк бо просяй приемлет и тщай обрящет и толкущему отверзется (Мф. 7:8). Не рцы паки: «в мире есмь и мирскими печалми связан есмь, да не могу творити всех заповедей Божиих». Аще хощеши творити совершенне и отрещися мира и взяти крест твой и ити в след Господа твоего, иже ти добрее всего, то иди. Аще ли не можеши сего сотворити, то и в миру сый, подвигнися угодити Богу, мощно бо и в миру сущу кому творити заповеди Божия. Мнози бо образи покаяния суть и спасения человеков, в нем же кийждо чину есть, аще хощет подвигнутися и твердо положити на уме своем, яко древнии святии в мире суще, с женами и детми живуще, и в богатстве и в домех суще велицех, друзии же и людми владуще поручением Божиим, и болезнь многу и печаль о земных делех имуще, тоже угодиша Богу о всем. Каков бе Авраам и Исаак и Иаков, Давид же и Иосиф и Иов: тии не беша ли в мире и с женами живуще, но занеже вся повеления Господня исправима? Ему же слава ныне и присно и во веки веков.

12. От апостольских уставов, како подобает жити христианом (24 февр.)

Законоуставнику рекшу Моисею Израильтяном, аки от лица Божия: се дах пред лицем вашим путь жизни и путь смерти избери себе жизнь, да живеши (Втор. 30:14–15). Да изряднее мы возследующе учителю Христу глаголем: яко два пути еста, един жизни, а другий смерти. Первый же есть путь жизни, иже закон уставляет: Возлюби Господа твоею от всея души твоея и ближняго твоего, яко и сам себе, и всего, его же не хощеши себе, того ни другу твори (Мф. 19:19; 22:37, 39 и др.). Благослови кленущыя тя, моли за гневающыя тя. Люби враги твоя, – кая бо вам, рече, благодать будет, аще любите любящия вы, кая бо польза вам, яко и язычницы тожде творят (Мф. 5:46; Лк. 6:32). Оставися плотских похотей. Аще кто ударит тя за ланиту, обрати ему и другую. Аще поймет тя кто по силе поприще едино, иди с ним два. И хотящему на суде стати с тобою и ризу твою взяти остави ему и срачицу. И вземлющаго твоего не истязуй. Просящему тебе дай и хотящаго у тебе заяти не отвращайся (Мф. 5:39–42; Лк. 6:27–30). Потщися всем праведное подаяти от своих праведных трудов. Чти же и святыя. И не убий, не любодействуй, содомскаго греха блюдися: проклят бо всяк творяй таковая, не будет бо блудяй в сынех Израилевых. Не укради: Ахар бо крад во Иерихоне, камением побиен, жития отъиде; Гиезий же солгав окрад, наследова Нееманово прокажение; Иуда крад нищих ради богатство и Господа прода, и раскаявся удавися; Анания же и Сапфира крадша своя и искусивша Дух Господень, абие от Петра апостола и друга нашего уморена быста. Не волхвуй, не отрави, не чародействуй: чародей бо;34 рече, не живит, но губит младенцы во утробе, все бо воображение душу приим от Бога, убиено неправедно, мстится. Не похощеши села искренняго, ни жены его, ни вола его, ни осляте его. Не преступай его клятвы; речено бо есть: не клятися без ума (Мф. 5:24). Не обиди, яко оклеветаяй убогаго раздражает сотворшаго и. Не люби оклеветати, ни клеветы приемли на ближняго. Не помни зла, путие бо помнящих зло – смерть. Не буди язычен, муж бо язычен не исправится на земли, и сеть крепка мужеви свои устне. Блюди, да не будет слово твое тще и всуе, – о всяком праздне словеси ответ воздаси и от словес твоих оправдишися и осудишися (Мф. 12:37). Не лжи, погубит бо Бог вся, глаголющия лжу. Не ограби брата твоего граблением злым. Не буди лицемер, да не будет часть твоя с лицемеры положитися. Не буди гордяся, гордым бо Господь противится (Иак. 4:6). Не стыдися лица на суде, яко Господень есть суд. Не возненавиди брата твоего в сердце твоем; обличением обличиши брата твоего, рече, да не приимеши греха его ради. Бегай от всякаго зла и не убоишися. Не буди гневлив, ни величав, ни яряся, ни дерз, да не приимети отместия Каинова и Саулова и Иоавова, яко он уби Авеля, брата своего, имже избрану ему обрестися от Бога; он Давида гоняше, победившаго Голиафа, возревновав о пляшущих доброхвалии; он же два воеводы уби, Авенира и Амесию (Амасию). Не буди обявляя сна своего, да не прелстишися. Не волхвуй и не буди чары творя, ни научися учению злу, вся бо та закон отрече. Не буди студословец (сквернословец), ни намиглив (намизати – подмигивать), ни пияница, от того бо блуд и любодейство бывает. Не буди любив злату (не буди сребролюбец), да не в Бога место поработишися Мамоне. Не буди величав, аки фарисей, яко возносяйся смирится, и высокое в человецех – мерзость есть пред Богом. Не буди жестосерд, ни напрасвив, яко наставляет на хулу обое, но терпелив и кроток в мудрости, кротции убо наследят землю живых. Не буди дерзок, яко муж дерз впадает в зло. Не запрети рабу твоему во гневе души твоея, еда когда воздохнет на тя – и будет на тебе гнев от Бога: не дождь бо, рече, человеку всякому прокляти тебе, кленущему бо тя во гневе души своея услышит сотворивый его. Братий и сердоболий сиих не презри: своих бо, рече, сплеменник не возненавидеши. Не вниди на молитву в день лукавствия твоего, прежде даже не оставешися гнева твоего. Случающыяся тебе страсти тихо приими и напасти без опечаления, ведая, яко мзда ти от Бога дастся, яко Иову и Лазарю. Глаголющыя тебе слово Божие прослави и помни же е день и нощь, почти же его, бывша ти яко добраго ходатая, – иде же бо Божие учение, ту и Бог есть. Взыщи по вся дни лица святых, да почитаеши словеса их, ни сотвориши вражды к ним, помянун Дафана и Авирона, яко опечалиста Моисея, и пожре тыя земля. – Той путь есть, жизни.

Смертный же есть путь, иже в делех злых видимых, в том же есть неуведение Божие, им же бывают блуды, убийства, любодейства и прочая. Всего же зла того надлежащаго избыти, воздержание да возлюбим в ядении и питии, яко же рече апостол: аще ясте, аще пиете, аще ино что творите, все в славу Божию творите (1Кор. 10:31); объястивым же глаголет: их же Бог чрево и слава в студ их (Флп. 3:19), и паки пророком глаголет: будите святи, яко и Аз свят есмь, глаголет Господь (Лев. 19:2; 1Пет. 1:16). И Тому славу возсылаем, не словесы токмо, но и добрыми делы, о Христе Иисусе Господе нашем. Ему же слава и ныне присно и во веки веков.

13. Св. Евагрия монаха о спасении души (25 февр.)

В сердце (ы) кроткаго почиет премудрость, престол же безстрастию душа детелна. Делатели зли воспримут мзду злу, делателем же благим воздастся мзда блага. Положивый сеть увязнет в ней и скрываяй ю уловится ею. Уне есть мирский кроток, паче монаха яра и гневлива. Разум погубляет ярость, долготерпение же собирает его. Яко же ветер крепок в пучине, тако ярость в сердце мужеви, Моляйся Богу убегает напастей, непотребнаго же сердце возмутит мысль. Да не обвеселит тебе питие, ни насыщайся пищами, да не утыет (отолстеет) плоть тела твоего и мысли скверныя да не обступят тебе. Не рцы: «днесь праздник – пием, и заутра Пентикостия – сотворим праздник», – яко несть праздника монахом, еже наполняти чрево свое. Пасха Господня – отшествие зла, Пентикостия же Его – востание душам. Праздник Божий не помнение зла, а злопомнящаго приимут плачи. Пентикостия же Господня – востание любве, ненавидяй же брата своего падет падением изрядным. Праздник Божий – разум истинный; внимая же разуму лживу, умрет сквернено. Уне есть алкати чистым сердцем, неже праздновати нечистою душею. Потребляяй мысли злыя от сердца своего, сий есть разбиваяй младенцы своя о камень. Монах сонлив впадает в злая, бдяй же яко итищь (птичка) есть. Не даждь себе одению (одеянию) тщу и не остави словесе духовна, яко Господь воззрит на душу и изведет тебе от всякаго зла. Сон мног умножает помыслы, бдение же благо истнит я, сон мног наводит печали, бдяй же избежит сих. Поминай присно твой исход и же забывай суда вечнаго, и не будет прегрешения в души твоей. Покаянием исправиши душу, милостынею же и кротостью утверди ю; аще и дух тщинства (тщеславия, чванства) найдет на тя, дому же твоего не остави и не уклонися во время паки полезно; яко же бо кто чистит сребро, тако исчистится сердце твое. Дух смущения отымет слезы, дух же печали сотрет молитвы. Яко же злато и сребро искушено огнем, тако и сердце монаха напастьми. Отъими от Тебе величание и тщеславие далече сотвори. Иже бо ныне не хощет славы, в будущем веце возвеличится о Христе Иисусе Господе нашем. Ему же слава ныне и присно и во веки веков.

14. Поучение Иоанна Златоустаго о смерти (27 февр.)

Молю вы убо, братие, имейте выну смерть пред очима вашима, о сей бо помышляюще не ииаше согрешати. Не вемы бо, в кий час приидет, еда не обрящемся готови и неочищени. Помыслите убо, где суть отцы ваши и братия и друзи? вси убо отыдоша, амо же и нам, аще не днесь, то утре, тамо же отъити. Да будем приготовившеся на вечный путь, поминающе прежде сотвореная прегрешения и о них плачемся, просяще прощения, прежде смерти, у Бога. Се бо ныне покаянию время, а потом несть лзе возвратившеся покаятися. Но егда от тела отлучимся, тогда предстанут нам ангели и бесове, показующе сотвореная нами на сем свете, яже сотворихом во дни или в нощи, или ведуще, или неведуще, вся явят, яже от детства и до последняго издыхания нашего прегрешения, яже сотворихом словом или делом или помышлением, вся бо написана суть на обличение наше. И образы поставят около нас, аки гораздии иконницы. Бесове убо преобразятся в наши дела: яко же бо пошли будем на блуд или на татьбу, или на разбой, или на иныя грехи, тако и обличат ны. И несть возможно будет отпретися, видяще пред собою дела своя, аще ныне покаянием и теплыми слезами не загладим тех написаний образ. Быти же сему есть, братие, несть бо се лжа, но истина глаголющее. Да не ленитеся о своем спасении: яко бо кто всеет, тако и пожнет.

15. Слово св. Григория Двоеслова на подвиг прочитающим и слышащим (29 февр.)

Рече Григорий Двоесловец: большее есть чудо – словесное проповедание молитвы, помогающее еже словом учения обратити грешныя на покаяние, неже воскресити мертвеца. В сем бо востает плоть и паки умирает, во оном же востает душа, во веки живущи. Аще ли от дела разумети хощеши истинно глаголющее: воскреси Бог Лазаря телесно, что сотвори Лазарь? – помолче писание о нем; воскреси Бог душу в Павле, что сотвори душа Павла? – силы многи сотвори учением своим.

Март

1. Слово Иоанна Златоустаго о глаголющих, яко несть мощно спастися в миру (5 мар.)

Известно да есть, яко не спасет место нас, аще не творим воли Божии, но коегождо ум со изволением к Богу. Несть бо пособия от честна сана, ни от места свята нетворящему заповеди Божия. Кий бо сан более Адамова безсмертия? Кое ли место краснее породы (рая), из него же Адам изгнан бысть, преступив Божия заповеди? Что ли укоризне гноица, на нем же седя Иов соблюде Божия заповеди и в рай вселися? И Саул же, в царьстве сый и во многоценных палатах, и сию погуби жизнь, а оноя не улучи. Лот же в содомлянех, в беззанонных людех, сотворив Божия заповеди и бысть спасен, венец со святыми прият. Да еще кто глаголет: «немощно спастися в миру с женою и с детми», тиковый лстит себе невегласством. Везде бо приимет Бог, аще заповеди его творим. А место никого не спасет, ниже осудит, но коегождо дела или осудят, или спасут. Аще и в миру, братие, живем, не отчаемся. Аще и согрешим что, то паки покаянием прибегнем к Богу и будем милостиви и податливи бедным и немощным излишними нашими, тех бо деля излише ти Бог поручил, а ни с кем не бе родилося имение. Того радо сим даждь от себе, ибо много пособие души, еже своею даяти рукою. И не мози послух поимати с собою, егда милостыню твориши. Ближних рода твоего не презри: первее домашних своих и род свой без печали сотвори, тоже милостыню твори иным. Себо лицемерие есть, еже чужия наделяти сироты, а род свой или челядь нази, боси или гладни. Когда же душами их попечешися, телеснаго не исправя? И како в Божий страх приведеши я, а телесными недостатки оскорбляя их? Оле несмыслства и злосердия! Не слышасте ли писания глаголюща: блажен человек, милуя души рабов своих и не оставив скорбети роду своему. Аще бо оскорбляя своих, а инех милуеши, речет и тебе Господь: лицемере, ослеплене злобою, первее бревно изми из очесе твоего и тогда увидиши изяти сучец из очесе брата твоего (Мф. 7:5). И тако убо слышав сия милуй твоих си и попецыся о прокормлении их, да Бога к себе милостива сотвориши. Ему же слава ныне и присно и во веки веков.

2. Слово св. Ефрема о пользе души и о смирении (6 мар.)

Да есте ведуще, возлюбении, яко еси нравы сами себе содержатся союзом любве духовныя. Сердце чисто – от любве Божия, любовь – от радости, радость – от кротости, кротость – от смирения, умиление – от службы боязнены, служба – от Господня упования, упование – от правыя веры и непорочныя, вера – от послушания, послушание – от безлобия. Корень же всем сим добродетелем – беззлобие. Противная же злая, от них же есть погибель души, и тако содержатся к себе. Ненависть – от ярости, ярость – от неверствия, неверство – от жестокосердия, жестокосердие – от слабости, слабость – от чревоугодия, объядение – от гордости, леность – от нетерпения, нетерпение – от велеречия, и прочия злобы сами себе содержатся. Корень же всем сим – зависть. Сих же всех кийждо нас своею волею привязуется. Разны есть погибели сия, тако же разны и добродетели. Да соберем, братие, себе добродетели, и будет труд наш во блогоухание Божие и преселит ны в вечную жизнь.

3. Поучение о милостыни, яко ничто же противится милостыни (6 мар.)

Зиноп царь отъят дщерь насилием у некия вдовица. Вдовица же та, ходящи в церковь, моляшеся святей Богородице со слезами, глаголюще: «мсти мене от Зинопа царя». Сия же творящи ей по многи дни. И явися ей святая Богородица, глаголющи: «веру ими ми, жено, многажды восхотех месть твою сотворити, но рука его возбраняет ми, есть бо милостив зело. Да никто же возможет на милостивыя злобою».

4. Св. Антиоха о царствии небесном и о молитве (6 мар.)

Преждереченныя заповеди Божия соблюдше убо, братие, на царство возвратимся, о нем же мног подвиг и не ведом покой. Аще бо кто восхощет временну царству, то многи мужества показует во бранех и бедах и бдениих и печалех и болезнех. И ничто же непщует приключающияся ему скорби, надеждею обвеселен сновидимаго ему царства, и сему временну и непостоянну сущу. Бывает бо много потом, егда вся болезни скончает кто, и мнится имети уже надеемая, внезапу ин в него место увязеся венцем. Кацех убо нам подвиг требе есть, и тщания и спеха, и бдения и печали и напастей, тайных же и явленных, и ран и смерти, хотящим со Хрпстом безпрестани царствовати? Сего ради прежнии мужие и жены и дети до смерти подвизашася, да царство небесное получат. Нужно бо есть царство небесное (Мф. 11:12), и иже убо о всем нудятся сами, то тии похищают е. Иже бо поистине скопился есть сам царства ради небеснаго или девствовал, то всем должен есть достойно себе явити царства. Не словесем бо, ни образом, ни именем, ни родом, ни крепостию, ни летом царство небесное емлется, но силою веры, являюща дела верна. Что же есть в деле? Яже детелным деянием заповедей Христовых ошаятися сопротивныx плотских, рекше диаволя мудрования, еже есть: любодеяние, нечистота, ярость, клевета, ненависть, памятозлобие. Корень же всему злу – сребролюбие, тщеславие, любославие, самолюбие, величание, еже есть гордость, ей же Бог противится. Сия убо и сим подобная аще кто имать в себе, плотян есть и сын супостатный и земная мудрствует. Мудрость бо плотская вражда есть на Бога, закону бо Божию не повинуется, ни может бо, и в таковем не может жити Дух Божий. Аще бо кто не имать Духа свята, сей несть Егов (Его – Рим. 8:9). Иже бо Дух Божий имать, сей Духу Божию пристает и Духом Божиим деяния телесная умерщвляет. Живет же Богу, воздержая и порабощая плоть, да вселится вонь Святый Дух мирный и наказуем им сотворити плод веры: добродеяния, премудрости, чистоты, воздержания, любве, благости, терпения, упования, единомыслия, целомудрия, хваления, святыни. Сия и сим подобная вводят в царство небесное. Богу нашему слава ныне и присно и во веки веков.

5. Поучение святаго Василия о отходящих мира сего в монашеский чин (7 мар.)

Ты же, человече, иже небесных жительствий рачитель и евангельскаго жития купец и святых ученик Христовых свойственник быти желая, утверди себе к терпении скорбей и мужественне приступи к собору монашескому. И в начале убо отречения твоего мужайся не привлечен быти от пристрастия иже по плоти сродник твоих, пременением мертвеных к безсмертным укрепляем. Внегда же сущих тебе имений твориши отложение, буди непреклонен предпосылати та на небеса извествуем, в недрех убо нищих скрывая та, у Бога же обретая со мнозем прилогом. Другов же и обычных отверзаяся, не бывай прискорбен, Христови совокупляяся, тебе ради распеншемуся, Его же что убо ино вменится вам любезнейше? Внегда же, споспешеством Божиим, первым сим борением победиши врага, да не повержеши себе, яко некий от безчестных сосудов, – уже бо отвержением земных вещей почел еси себе у Христа. Но со мнозем попечением и разумом сотвори обрести мужа предводителя твоего жительства непрелестна, добре сведяща наставляти к Богу идущия, цветуща добродетелми, от своих дел свидетельство имуща, яже к Богу любве. Разум имуща божественных писаний, немного печаловна, несребролюбива, неиметелна, безмолвна, боголюбива, нищелюбива, безгневна, непамятозлобива, многа в созидание приближающымся ему, не тщеславна, не гордостна, неласкательна, непревратна, ничто же предпочитающа паче Бога. И аще обрящеши такова, вдай себе тому, всяку волю твою оплевав и вне поверг, да обращешися яко чист сосуд, яже в тебе влагаемая благая соблюдая к похвале твоей и славе. Аще ли что оставиши в тебе от прежде бывших в тебе страстей, в киселину (квасная гуща) претворил еси влагаемая в тя благая, вне извержен будеши, яко же некий от непотребных сосудов. Богу нашему слава ныне и присно и во веки веков.

6. Св. Ефрема, яко не подобает черноризцу много риз имети (8 мар.)

В мирском житии милуяй тело свое и изменяяй ризы своя, от человек славу себе приемлет. Во обещании же сем, еже сия преобидя, внемля же токмо нужным потребам телеси, славу притваряет (притяжает) себе на небеси, по глаголющему: имуще пищу и одеяние, сими доволни будем (1Тим. 6:8). Работаем богоугодно Господиви, свободившему нас, да не уловлени будем в страсть тленную, яко да не похотим лепу одежу имети или куколя на главу. И яди сладкия смирением проженем и отгоним от себе таковую страсть, а не тщеславная возлюбим, но яко же подоба бяше святым. И о множестве риз не поxвалимся. Бе поминаеши ли овчины Илиины и Исаина вретища, яко же есть писано: иди и сойми вретище с себе и из сандалия изуйся (Ис. 20:2)? Крестителева оболчения не забывай. И ни ризою светлою славен буди, но делы добрыми, да просветится свет твой пред человеки, яко да прославит тя Господь (Мф. 5:16). Та же паки рече: блудный бес блюдет ризы монаховы, яко повседневна есть или ина, паче же беседы ради, и се убо устав блуда есть. Глагола же авва Исаак братии: «яко отец Памво и друзии отцы ветхи ризы и многосшиваны ношаху и толсты, ныне же вы многоценны носите ризы, идите отсюду, исказисте зде устав монастирския заповеди». Егда же хотяше изыти на молитву и глаголаше к ним: «ктому не изыду с вами, яко заповеди не храните». И глагола: «яко авва Пимен рече: правое то покаяние, еже таку достоит черноризцу носити ризу, яко же поврещи ю вне монастиря на три дни, и никто же возмет ю».

7. Св. Василия о взаконеных заповедех христианом (8 мар.)

Христов убо закон и апостолов его учение не монахом дадеся точию, но и мирским. Егда бо глаголет Павел: бдяще во всяком терпении и молитве, и плоти угодия не творите в похотех (Кол. 1:11), – яве, яко не монахом писания, и молчалное и пустынное житие держащим, но и ко всем сущим во градех и селех, живущим с женами и чады. Еда бо мирскому должно есть что множае имети монаха? ни: но развее еже с женою жити токмо, в сем бо точию имать прощение, во инех же никако же, но вся равно со монахом делати тому взаконено есть. И небезделно тому всяко, еже всех заповедей преступление. Тем же мали неции возмогоша, потщавшеся мирския избежати молвы и гознути (убегать) иже во граде плищев (шум, крик) и суетнаго жития, печали же и пристрастия. И тако вне бывше мирских молв, монашеское облобызаша житие. Ибо и наполнися от них Египет и Ливия, Ефиопия и Индия, Мавритания же и Фиваида. Сих и Сирия полна, и Киликия, и Галатия, Понт же и Армения, Междоречие же и Персида вся. Сих исполнена Палестина и Аравия и Кипр, Асия же и окрестнии острови и Еллада вся, еще же и Рим, и Испания, и Галлия. и даже до конца земли, исполнися монастирей и постник, и вся земля благословляется и освещается. Яве убо сих ликостояния же и псаломскаго пения восприем Давид почет, проразумием пояше: мне же зело честни быша друзи Твои, Боже, зело утвердишася владычествия их, изочту их, и паче песка умножатся (Пс. 138:17–18); ибо владычествуют над страстми и бесы и паче сущих в мире силных владыки явишася твердейшии. Кто убо сих не похвалит, отбегших мреж многоплетеннаго жития и крест носящих, и Христу последующих, и на всяк день и час о роде человечестем Бога молящих? И убо и Григорий премудрый, богословием именованный, похваляя тех, рече: «поюще и славяще, и учащеся в законе Господни день и нощь, иже возношения Божия в гортанех носяще; одежди возношение умучающе; пояс неукрашен, красное умаляюще одежди подъятие; ступление благочинно; око незаблуждаемо, осклабление лепо; слово, словом движимо, молчание слова честнейше; хвала солию растворена, а не лицемерием; смеху отчуждение, запрещение благохваления желаннейшее; мера умиления и осклабления. Еже в нищете – богатство, еже во странничестве – устав, еже в безчестии – слава, еже в немощи – сила, еже в небрачии – доброчадие, смирение превыше небес». Ничто же суще в мире и выше мира, еже плоти вне и во плоти, их же часть – Господь. Убози царствия ради, убожества же ради царствующе с Господем нашим Иисусом Христом.

8. Слово святаго Иоанна Златоустого о лечащих болезни волхвованием и наузы (9 мар.)

Жития сего наводимая нам скорбная: или имения лишение, или болезни тяжки, от онех мук ослабу нам творят. Егда бо в недуг впадеши лют, и мнози придут нудящии тя, ови убо к чародеем ити, ови же к волхвом, ты же о Бозе уповая терпи, яко же тебе мучения венец приносит и избавление от онех мук, еже в болезни слежащу благодарити Бога. Христиане почто зовемся? – да повинемся Христу, а не идем ко врагом Божиим: волхвы бо и чародеи – вси врази Божии суть. Лучше есть умрети, неже ко врагом Божиим ити. Кое пособие тело целити, а душу губити? Кая полза зде мало прияти утешение, а онамо посланным быти с бесы в вечный огнь? Слышите исперва бывшая: боле бо Охозия царь и, оставив Божию помощь, посла к волхвом. Бог бо наказоваше и болезнию, дабы своя воспомянул грехи; он же Бога забыв, посла к Ваалу болвану и к жерцем его вопросити: «буду ли жив». О глубина зла! О разум беззаконен! Бога оставль повеле ити к волхвом и о животе вопрошати! Срете же Илия слуги Охозиины и рече им: «шедше рцыте царю своему, понеже Бога остави и закон Его и посла к бесом о животе вопрошати, и се ему от Бога глагол, яко умрети имаши прежде времени, понеже оставив Бога, бесовских слуг о животе вопрошаеши». Тако убо смерть бывает, братие, прежде времени – ходившим к волхвом. Святии убо апостоли прокляша волхвования. Тако и святии отцы отвергоша на соборех и от причастия тех отлучиша на время, иже к ним ходили, и заповедаша им епитимии тяжки, дабы греха того избыли. Отбегните, любимая братия, проклятаго волхвования, да не без времене умерше муку вечную приимете. По что глаголеши: «яко велми оскорбляет (мучит) мя тяжкий недуг»? Но веси уже приял, яко же блаженный Иов: он, по отъятии стад и волов и всего имения его лишении, и по восхищении всего лика детей его, не похули, но рече блаженный: «Господь дал есть, Господь и отъят». И в язе зле слежав седмь лет нетребова волхвованием целбы, но глаголаше: «лучше ми есть умрети, неже благоверие предати». Тако же и раслабленный, иже тридесять и осмь лет в недузе слежа, ни той взыска врачев, ни прииде к чародеем, но ожидаше от Бога помощи. А Лазарь тако же гладен и болен и вся лета живота своего во вратех лежа богатаго, небрегом и поругаем, тако душу предаде, а врачев не взыска. Мы же кую приимем милость? Яко они толикия болезни терпяху, а мы и мало поболим, зелейники (знахари) и волхвы в домы своя приводим. О брате, яко во огни злато очищается, тако и человек от грех болезнию очищается. Воспомяни мученики и пророки и апостолы, како прияша страсти. Елико бо продолжаются кому беды или болезни в веце сем, то болша мзда во царствии небеснем таковому. Помысли, человече, яко не отнимут болезни чаровницы, но точию грех си сотвориши велик и лют. Бога бо оставль к бесом течеши и кую приимеши милость от Него? или како Его призовеши в молитвах? Почто твою душу губиши и како Богу отвещаещи? Малы деля (ради) болезни Бога оставль, волхвов ищеши, како прочее в церкви станеши и како причастшися пречистому Телу? И како прочитаемая услыши? О человече! аще болезнь благодарне стерпиши или ины лютыя беды, то с мученики будеши счетан в день он: они убо мужи терпели, ты же болезни и беде благодарне стерпи.

9. Слово святаго Иоанна Златоустаго о чести священник (10 мар.)

Богоносный Игнатий повелевает, глаголя епископом: внимайте убо себе, да и Бог ваши души приимеет и спасет. Повинующии же ся епископом и священником, служителем церковным, с теми и часть им будет о Бозе. И паки: послух ми есть, его же ради узы приях, яко от уст человечь не разумех, Дух бо проповедует ми, сице глаголя: без епископа не творити ничтоже. Иде же бо явится епископ, тамо множество благинь будет. Иде же бо нарицается Христос, тамо и соборная церковь сходится. Не иде же хотят – и пасутся овчая стада, но иде же я пастуси снабдят. Кроме же стада и пастуха, и оставшия овцы расхитят зверие, и пищу себе сотворят в них. Неподобно убо есть без святителя ни крестити, ни брака творити. Се убо Господеви благоугодно есть, еже святителя чтити, и чтый святителя от Бога почтен будет. А еже без епископа что творити нелепо есть. Священником же подобает повиноватися аки апостолом Христовым надеждею нашею, да видими ими обрящемся. Подобает же и диаконом, рекше служителем Таин Христовых, по всему союзу во всем угождати, зане не брашну убо, ни питию суть служители, но Божиям служат церквам; подобно убо речение их хранити яко огнь. Тем же убо почтите служителя яко отца, а епископа яко самого Христа, попы же яко сопрестолники и супруги апостолом, без них бо церковь не освящается. Послушествует бо сему словеси закон храняй: все, елика аще речет ти священник, сотвори, не уклонися ни налево, ни надесно от глаголемых. Человек бо, аще сотворит презрение, еже не послушати священника, достоин есть смерти. Рече же и пророк Малахия: устну священническу сохрани глаголы, разума и закона взыщи от уст его, зане вестник есть Бога Вседержителя и в мире исправляя ходит и многи обращая от неправды (Мал. 2:6–7). И ин рече: всею душею твоею благочествуй Бога и священником Его честь воздавай, и всею силою возлюби сотворшаго тя, и слуг его не оставляй; бойся Бога, слави священника (Сир. 7:31–33). Павел же к Тимофею пиша сице: прилежащии же добре попы сугубыя чести да сподобляются (1Тим. 5:17). И пики рече закон: сии освящени суть Господем Богом, жертвы бо и дары Богу своему о тебе приносят, и святи суть (Лев. 21:6). И паки рече Господь ко Аарону: глаголи ты к служащим мне в храме свидения, и тии приимут грехи своих людей, и от имения их даждь Левитом, яко мзда ваша за службу вашу (Чис. гл. 18). Исаия же рече: вы же, священницы, наричетеся слуги Божия (Ис. 61:6). И Иеремия рече: возвеличу и напою душу священническу (Иер. 31:14). И Павел рече: всяк бо первосвященник во еже приносити дары же и жертвы поставляем бывает, иже образом и стенем служат небесных; ныне же лучшее улучи служение, поскольку болшаго завета есть Ходатай, иже на лучшее обетование взаконися (Евр. 8:3–6). Такожде и Давид рече: Иереи, Твои облекутся в правду и преподобнии Твои радостию возрадуются (Пс. 131). Молим же, братие, вас: знайте труждающихся у вас и творите любовь к ним. Лепо же убо есть, возлюбленнии, аки други Божия чтити священники, их же избра Господь и прослави. И нужда убо человеком долги воздаяти им, не о себе бо кто приемлет честь, но званный от Бога. Несть речено ныне, ни прежде, священнику противитися, ибо противляющиеся суд себе приемлют. Писано бо есть: старейшине людей твоих да не речеши зла. И Господь, великий старейшина священническ, глаголет: приемляй вас – Мене приемлет, приемляй Мене – приемлет пославшаго Мя; приемляй пророка во имя пророчо – мзду пророчу приемлет, а приемляй праведника во имя праведничо – мзду праведничу приемлет (Мф. 10:40–41). Богу нашему слава ныне и присно и во веки веков.

10. Слово Св. Григория о милостыни (11 мар.)

Во всем разумейте, чада, коль велико дело милостыня есть, яко и в сем веце помогает, и во оном духовныя радости исполняет, и к Богу приближает, и равны ангелом сотворяет. О том бо сама истина глаголет в писании: творите милостыню, да и вам милостив будет Владыка Господь; дадите бо, рече, и дастся вам (Лк. 6:38). Писано бо есть: огнь горящь угасит вода, и милостыня очистит грехи (Сир. 3:30). И паки глаголет: скрыйте милостыню в сердцах нищих, и сии за тебе молят. И паки поучает нас, глаголя, Благий Бог: аще изобилно будет у тебе, то много подаждь, аще ли пооскуду будет, то по силе дати с радостию потщися (Ср. Сих. 14:13; 29:1). Велика бо сила пощению – приятие странных; приемый пророка во имя пророче – мзду пророчу приимет, и приемый праведника во имя праведничо – мзду праведничу приимет (Мф. 10:41). Да сие ведуще, возлюбленная братия, потщимся творити милостыню, да вечную жизнь получим в небесных селениих.

11. Поучение святых отец о нужди смертней (мар. 11)

Ведите убо, братие, яко плач есть настоящее житие се, наполняюще в сем, еже по пророку Иезекиилю реченное от Бога: сыне человечь, хлеб твой с болезнию яждь и воду твою со страданием и скорбию пий (Иез. 12:18). Сицевая убо трапеза, имущих ангелы, на небеса отсылает, ласкосердая же в геену влечет чревныя рабы, яко же богатаго онаго. Ову убо сон смертный пришед приимет, ову же трезвение и бдение, и ову убо мука, ову же небесное царство. По единодневном убо ядении и благодарении многа исполнишеся умиления и теплых слез, ко сну грядут, и толико того приемлюще, елико мало почити. И паки нощи дни творят, во благодарениих и псаломских песнех пребывающе, ведуще известно нужду, юже по отшествии душам от тела пребывающую, и непрестанно поминающе смертное пришествие. Зрят бо тогда божественныя ангелы, страшно же и люто души истязующа; лукавыя же бесы предстояща и оклеветающа прилежно и восхищати к себе начинающа. Таже и татя внезапну вшедша и душу от тела разделиша, и идет с сетованием многим на места страшная и до конца неведомая. Многих убо нам, братие, тогда потреба молитв, многих помощник, многих благих дел. Много убо нам тогда требе святых ангел предстателство. Много нам тогда требе на воздушнем шествии руковождения и помощи. Аще бо в дальную страну и чуждь град зде идуще, требуем ведущаго и наставляющаго: колми паче нам требе помощника и наставника, еже спасти и превести от начал и властей, и иже на пути стоящих воздушных и словоистязателей, их же мытарства – истязания божественное писание нарицает. Тем же убо предварим прежде пришествия и тецем прежде даже не приспеет конец. Житие бо сие кратко, муки же долги; конец близ и страх мног, и разрешаяй никто же. Помысли убо, како суть во аде души, понеже преобидеша страх и Заповеди Божия и малы ослабы получити молятся и не улучают, но в преисподних земли рыдают лености и питания и блуда своего и прочих злодейств. Без ума кающеся, о них же зле содеяша, и плачут без утехи. Сего ради паче вси блажим праведныя и младенцы умирающия, понеже при нас смертная чаша тяжка, при онех же есть спасена. И еже всем нам страшно, овем есть похвално, и еже мы имамы тамо начало мучения, овех есть начало спасения, всяко глаголюще: нас ангели мирно отлучиша от телес; мы безпечални и без поткновения прейдохом начала и власти аерныя, благи наставники имуще, не бо обретоша в вас яже искаху и уповаху. Видеша неблазненое и чистое тело – и постыдешася; видеши независтну и светлу душу – и отвратишася; видеши язык неокалян и нелестен – и умолкоша. Прейдохом и убежахом тех, пройдохом сквозе их и воспевахом, глаголюще: благословен Господь, Иже не даде нас в ловитву зубом их; сеть сокрушися, и мы избавлени быхом. Тем же убо и во сретении радоваxуся ангели; праведницы облобызаху; преподобнии красовахуся с нами глаголюще: добре приидоша, возлюбленнии Христови и вечных благ наследницы, о Христе Иисусе, Господе нашем.

12. Св. Ефрема Сирина к богатым (16 мар.)

Слышите, богатии и внушите, послушайте, домы держащии, не гордитеся во имении своем тлеющем хвалящеся Един богат есть Бог, Иже нетленное имеет богатство и неоскудно дая всякому просящему. А вашего богатства существо есть прах; донеле же тихо есть, о нем веселимся и держим е, и идут к тебе малии и велиции, славнии и неславнии, богатии и убозии, приносяще тебе честь и дары и ногама припадающе, – то благо и даровано от Бога. Но блюдися, еда будет со грехом взято. Еда кто, супротивника своего хотя препрети, варяет тя мздою, и будеши неправедно осуждая человека, во образ Божий сотворена, его же ради Христос кровь Свою пролия. Довлеет ти и дому твоему урок твой, уроченный ти яве, а не отай. Но приемля яко мутное питие, разумевай недуга душевнаго. Блюдися разумом, паче же душею, и страхом Божиим очищайся, аки некиим цедилом, да не имется ти скверна, – и жизнь сия неправедная, и имение душе твоей недуг неизбытный родит. Но, яко же прежде рекох, процежай всяко, да не будет в дому твоем неправда, ни скверна, но все чисто и праведно. Вся, яко же цедило (сосуд для очищения воды), праведно есть и достойно омывати и исполоскати, да будет чисто и несквернено выну текущею водою. Рече разумный о душе своей, срамоту омывати и скверну ея полоскати, яже от неправеднаго богатства стиняется (грязнится). Приими и введи странна и нища в дом твой, посади и накорми и согрей, а Бог не трудится воздати сторицею. Тако бо Сам обеща, и не ложь есть.

13. Слово Иоанна Златоустаго: «его же, рече, любит Господь, того и казнит» (16 мар.)

Аще кого видиши неправдива и злобна человека во здравии и обилно живуща, то ни чудися тому: нечто бо мало сотвори добро Богови и того ради мзду свою зде восприемлет, а овамо услышит, яко богатый он: яко ты благая в животе твоем восприял еси противу малыя добродетели (Лк. 16:25). А в правде живущаго, аще и много видиши беды кого приемлюща и скорби, блажи убо его и позавиди ему, яко зде таковый очищается от грех, а овамо к великой радости пойдет. Его же бо любит Господь, того и наказует (Евр. 12:6). Почто смущаешися, человече, зря святых в печалне житии? Иже бо скорби терпят зде, то тии в небесном царствии водворяются радостно. А иже суть злии лихоимцы, татие же и грабители и клеветницы во обилии живут, таковым вечныя муки огненныя уготоваются. Яко же и богатый он, в пламени сый, моляше Авраама, к нему же Авраам рече: ты, чадо, в животе благая твоя приял еси, а Лазарь злая, да того ради зде утешается, а ты страждеши в пламени жгом (Лк. 16:25). Слышите кая благая богатый прият? – богатство, здравие, питание, власть, славу, и питания многа и драгое вино, и от всех честь. Что же убо Лазарь, не согрешил ли что? Ей убо мала име согрешения. Но егда ты благая приимал еси в животе за малое свое добро, тако же и Лазарь прият злая за малыя его грехи, – того ради ныне утешается, а ты мучишися. Тем же, братие, аще правдива кого видите болезни зде и беды приемлюща, блажите таковаго, яко зде от грех избыв, а онамо к Богу чист отыдет. Аще ли беды ему продолжаются, то множае паче прибыток правде плодится. Ибо и правдивый Иов, иже непорочно заповеди Божия сотворивый, колико страстей тело его прият зде, и чесо ради страдаше? но да онамо преболшу честь приимет. А инии же, аще и зли суть, и в здравии живут, и бед не приемлюще, но никто убо, братие, тому позавиди сицеве славе грешна человека, но плачи о нем, меч бо судный готовится нань. Понеже и Исав богатеяше, скверник сый, а Иаков правдив сый, а многи прият скорби. И Давид пророк сый все время живота в бедах и в трудех поживе, сын же его Соломон царствова четыредясять лет, мир имея велик, и славу, и честь, мудрость же и разум паче всех, но кая бе полза онаго великаго смысла? последи бо отступль от Бога и во идолобесие впаде. Что же Иуде успе Господне учение и многая чудотворения? последи бо удавлением себе погуби. Тем, не иже добре начен, а зле творя, но аще кто добре свершит, той праведен есть. Неции бо яве согрещиша, а отай велми покаяшася; от нас убо грешни мнятся, а у Бога праведни. Того ради несть достойно осуждати. Богу нашему слава, ныне и присно и во веки веков.

14. Св. Иоанна Златоустаго о самовластии (18 мар.)

Коея деля вины быхом самовластни, слышите. Им же то Владыце Христу любо есть, да быхом Его изволением нашим любили и волю Его творили, а не нуждею. И ты бо не тогда раба тебе приятна твориши, егда его связав в оковех держиши, но егда он своею волею прияет (приязнствует) и любит тя. И сам бы не хотел ты, раба связав держиши, но сам он зло себе творит безумием своим; то колми паче Бог не хощет нашея злобы и не престает уча нас святыми книгами и пророки. Понеже и Сам Единородный Сын Божий воплотися, могл бы убо вся погубити согрешающия к Нему и уклоняющияся от Него, но то Ему в любовь есть, еже волею коемуждо нас прилеплятися Ему. Того ради и муку проповедал, и царство обещал, да еже изволил себе – или рай, или муку: самовластны бо Богом сотворени есмы, – или спасемся, или погибнем волею нашею. Мнози бо глаголют: «родом есмы гневливи или блудни, да не можем удержати себе в сих». Рцы ми убо: аще будеши крадяй или блуд творяй и узриши кого идуща, не речеши: родом есмь таков, – но скоро отбегнши и престанеши злое творя. Где убо есть иже от обычая избет предлагающии? Страх бо человеческ примени бытие, колми паче хотящаго судити живыя и мертвыя Бога нашего. Инии же глаголют: «яко родом гневливи есмы и не можем удержатися». Рцы ми, егда на раба господие гневаются и биют и словеса зла дают ему, почто раб терпит и не отмщевает? он убо человеку повинен терпит, мы же повинни Богу. Да того ради терпи, брате, досады и укоризны, а не отмщевай себе, возлюбленне. Предай Богу обидящаго тя и благое дей биющему тя, и Бога моли за него. Разумный бо человек, аще ему случится беда, воспоминая грехи, кается и Богу молится о них. Несмысленный же человек, наказуем, не разумеет и на Бога хулу приносит, своих не воспоминает злоб, и ины виновны творит, а сам не творится что зло сотворит. Аще убо веруете Богу, братие, потщитеся угодная ему сотворити; ум бо коегождо, аще предстанет к Богу, раба имать тело. Аще же кто любит плоть, вся воли ея творит, и не наследит таковый царства небеснаго, и не может спастися. Нас же да сподобит Бог вся добрая творити дела и милость получити от Него. Ему же слава ныне и присно и во веки веков.

15. Слово Иоанна Златоустаго о суде (22 мар.)

Уже помыслите, братие, доколе же живи есмы, каков страх имамы прияти в день судный, егда станем умиленни от злых дел, яже сотворихом в животе сем, играюще и пустощная творяще, поюще и пляшуще и ина много зла творяще, их же не подобает христианом творити. Не речем сего, ни блазнимся глаголюще: «аще бы Бог повелел ни ясти, ни пити, ни веселитися, то почто убо сотворил все то на земли»? Послушайте, аз реку вам: Илия пророк не имел ли хлеба и вина и радости человечи? но вся оставль иде в гору и сотвори четыредесять дни и абие возиде на небо с плотию. И другий пророк Даниил не имел ли что в дому своем, у царя сый властелин великий, злато имея много и всю утварь царску и бисеры безценныя и камение драгое, и вся та оставив, Бога исповеда и приобрете себе жизнь вечную, вержен бо бысть в ров и лизаху лвове ноги его, о исхити его Дух Снятый оттуду. Вы же, человеци неразумнии, о чем надеющеся Бога не боитеся, но ходите зде величанием уповающе и скупостию, душу свою зле гордостию губяще? Почто не помилуете себе, о неразумии человеци? Не лститеся глаголюще: «ко ныне живем, утро же гнием, и земля в землю идет». Но сие ти глаголю: «земли ли еси приязнь, о несмысленне, да земли силы твоея наполниши и душу твою погубиши»? Разумейте, братие, иже кто скорбен зде о души, той онамо небесною славою утвержден будет. О братие, удержитеся от объядения и пиянства, и удержите уши от слышания неподобных словес и руки от грабления. И быстра течения сотворим ногам нашим ко церкви, и будем милостиви и податливи к нищим, и покаянием возопием ко Господу Богу. Слышите, како претерпе Творец от раб своих ругание и распятие, мы же человеци на благая дела сотворени есмы, почто досады не терпим? Отцы и братие, матери и сестры, сего не вещайте глаголюще: мы уже лета изжили и не можем колен пригибати на поклонение. О старии, вам ответи суть уготовани, да не ленитеся о спасении вашем. О братия младая и сестры, не блазнитеся рекуще: яко млади есмы, ныне да ядим и пием и веселимся, утро же покаемся». О братие, не весте ли, яко роса изсыхает солнцем, тако и ваша юность злыми делы изнемогается? О человече, егда спиши, чуеши ли татя пришедша в дом твой? Тако и сего не веси, когда приидет ангел и восхитит душу неготову сущу, и без успеха начнеши каятися тогда. Но донеле же время имамы, братие, поживем добродетельно, сотворяюще заповеди Божия, да царство небесное приимем.

16. Поучение на препразднество Благовещения пресвятыя Богородицы (24 мар.)

Благословен Бог Отец, Господь Вседержитель, Творец небесе и земли, видимых же всех и невидимых. Благословен Единородный Сын и Слово Божие, безначален же и безтлетен от Отца родивыймя, Бог от Бога, мудрость Отчая ипостасная, и содержащая сила, вся сотворшая. Благословен утешитель святый животворящий Дух, от Отца исходяй и чрез Сына явленый человеком. Триипостасная купно единосущная святая Троица, Иже словом своим сотвори всю тварь и духом уст своих всю силу их. Той же и перваго человека от земли созда, по своему образу сотворив его, и славою венчав его. И рай на востоце насади и человека в него введе, поставив его царя всей твари, и самовластием почти И едину заповедь повеле хранити ему, да аще соблюдет, жив будет во веки, славя Бога со ангелы, или, преступив, смерти и тли предастся. Советник же всему злу диавол и завистник всему добру, возревновав ему своим неистовством, научи его преступити заповедь Божию. Да того ради изрину его Бог из рая, рек ему: делай землю и в поте лица твоего да яси хлеб твой и смертию умрети, яко земля еси и в землю паки пойдеши. (Быт. 3:19). И оттоле, братие, вниде в ны печаль и смерть. Да того ради сниде к нам Господь Бог наш Иисус Христос, того образ обновити хотя, истлевший преступлением, плоть нашу на Ся восприим. Показа нам путь к первой жизни, по нему же идуще внидем в туюжде породу (рай). Се же есть показаный путь нам чистота, кротость, смирение, любовь, правда, милостыня, воздержание, покаяние и пощение; покаянием бо и пощением и милостынею отымутся вси греси. Потребо же есть ведати и сие: яко в сий день предпразднество Благовещения Владычицы нашея Богородицы и присно Девы Марии да соберетеся в церковь ни утреню, а в шестый час ни литургию. И потщитеся добрая детели творити, паче же в сия дни святыя; сии бо суть дни Богом уставлени на очищение душам и телесем, да не подобает их леностию и злыми делы провождати. Злато бо аще погубит человек, или ино что, паки точно тому обрящет; время же сие погубивше, инаго не обрящем, тленно бо есть. Тем же, да не можем его жестокосердием провождати, но со тщанием подвигнемся и вся убедим на молитву; леность отрясем и похоти умертвим зависть попрем, гнев отвержем, мир же возмем. Да и к нам речет человеколюбец Господь: по вере вашей буди вам. И вся добрая прошения приимем молящеся Христу Богу нашему.

17. Слово на Благовещение пресвятыя Владычицы нашея Богородицы и присно Девы Марии (25 мар.)

Ныне подобно есть, братие, к вам велегласно изрещи апостольский глагол о сем велицем дни, яко убо сему ясно возгласившу и известне показавшу начало праздников и Царя светлаго дне сего. Глаголет бо святый апостол Павел Святым Духом: нощь успе, а день приближися. Днесь Сын и Слово Божие, Господь и Бог наш, неизреченно во чрево Девы вмещается, хотя тварь, рук Своих создание, Своим вочеловечением обожити и в древний рай пики возвести. Днесь Несозданный в свое создание вмещается. Днесь Невместный в небеса во чрево Девы вмещается. Днесь Невидимый видим бывает. Днесь неосязаемый во чреве Девы зачинается и осязуем бывает. Днесь Божие Слово плоть приемлет, Сын Божий сын Девичь бывает. Иже прежде всех век от Отца без матере рождся несказанно и сый на небесех, ныне дивно и страшно на земли без отца во чреве Девы воплощается. Сугуб по естеству, Бог и человек, разумеваем и сказуем, еже есть с нами Бог. Но аще человечя ради спасения хотяй прииде на землю, весь же Бог со Отцем и Духом на небеси сый и весь на земли равно спрославляем и поклоняем и сцарствуя. Дивно и страшно рождество введе: не ин бо прежде век рождся от Отца без матере, но той есть и от Девы рождся, Единочадный Сын Божий, Иже от Отча существа возсияв явися нам, Свет от Света, Бог истинен от Бога истинна, рожден, а не сотворен. Зиждитель Адамов прииде на землю взыскати заблуждшаго человека. Видев бо нас (ны) впадшия во многобожныя имена и прелестию тех запеньшияся и поработившияся им, не терпя зрети диаволом расхищаема стада своего, но посла первое пророки, возвещая Свое пришествие. Глаголет бо Исаием: се Дева во чреве приимет и родит Сына, и нарекут имя ему Еммануил, иже есть сказуемое с вами Бог. Пришедшу же времени сбытия их, посла свыше архангела Своего Гавриила, рек ему: «иди ко деве Марии и рцы Ей: радуйся, обрадованная (благодатная), Господь с Тобою, благословенна Ты в женах и благословен плод чрева Твоего; Тебе ради прабабная клятва разорится, женою бо процветоша злая и печальная, Тобою же ныне истекают лучшая; се бо зачнеши во чреве и родиши сына и наречеши имя ему Иисус: той бо спасет люда своя от грех их», – яко же слышасте евангелиста глаголюща о прочей беседе (Лк. 1 гл.). Та вся помыслим, братие, колику благодать прияхом днесь и коликих благ сподоблени быхом. Днесь бо супостат наш диавол связан бысть, и бесовская служба и требища их попрана быша. Днесь райския двери отверзаются, и пламенное оружие, отгнавши человечо естество, плещи дает, и человеческий род верою, яже во Христа, и благими делы с радостию паки в рай входит. Днесь Адам ликовствует, приемля в свой состав Зиждителя своего. Днесь Ева змиеви главу стерши, горкому ея прелестнику, на веселие всего мира созывает глаголющи: радуйтеся со мною, яко днесь обретохом радость неизглаголанную и свобождение от всех грех. Днесь и мы, братие, радости исполнившеся и благими делы украсившеся, потщимся достойно препроводити сия святыя дни постныя, воздержащеся от объядения и пиянства и плотских похотей, от гнева и клеветы, от обиды и зависти и многаго сна, та бо дела душу помрачают и от Бога отлучают. Тем же, та вся отложше, подвигнемся святая дни сия миром скончати, да не постигнет нас день смертный в лености и во гресех. Не ложь бо есть рекий пророком древле: в нем же обрящу тя, в том и сужду ти. Тем же молю вы и понуждаю с любовию: трезвенно бдим постящеся, дабы нас день смертный во благих делех обрел и не в злых. Се бо венцедавец предстоит и венцы простирает, сия готовляяй постником. И веселится зря церковь по вся дни не празднику сущу от нас и вскоре в ню предваряющих. В ней же убо и купель предстоит, омыти хотяща прегрешения наша, и трапеза уготована, Телца упитаннаго имущи, за весь мир закалаема, Иисуса Христа, Сына Божия предлежаща на ней и верныя вся созывающа на святое празднество и на живоносное брашно. Еже всяк приемляй верою жив будет во веки, яко же сам Господь рече: ядый Мою плоть и пияй Мою Кровь во Мне пребывает, и Аз в нем; яко же Аз живу Отца ради, и ядый Мя жив будет во веки. И пророком приглашает нам рекий: вкусите и видите, яко благ Господь. К тому приступим яко незлобивии младенцы, ветви в руках держаще, сиречь добрая детели, зовуще и глаголюще Христу: осанна, благословен грядый во имя Господне (грядущ во имени Господни), Бог и Господь явися нам.

18. Слово Иоанна Дамаскина о причащении Тела Христова (25 мар.)

Многи видим Христово Тело приемлюща просто, яко же по прилучаю обычая, а не тако, яко достоит законом и помыслом и умом чистым приимати во святый пост и в Пасхи время. Но достоит святый пост в чистоте соблюсти и совесть очистити и тогда причаститися, ибо нечистый недостоин есть прияти от святыя трапезы Христовы Плоти. Разумей убо, яко иже ветхия приобщающиися жертвы многи требоваху боязни и преочищахуся: ты же приемлеши скверныма рукама и устнама Плоть и Кровь Христову без страха, ея же ангели трепещут. Времени убо ожидаеши, а вещь презираеши. Царя убо земнаго не смееши лобзати смрадными усты: досаждения бо то вещь есть, – то Царя ли убо Небеснаго облобызая смердя молиши? Не слышиши ли проповедника глаголюща: иже во оглашении – изыдите, и елицы иже не в покаянии, да не приемлют? Мнози же божественныя сея жертвы единою летом приемлют инии же дващи (дважды), инии же многащи. К ним же нам се слово, не зде же сущим токмо, но и к тем, иже убо в пустыни седящим, они бо единою летом причащаются, многажды же за два лета. То убо котории приемляют, иже ли единою, или многащи (много раз) или реткажды (редко), но иже с чистою совестию и с житием неповинным, таковии присно да приступают; аще ли не тацы, то ни единою. Почто же? Яко в суд себе приемлют и во осуждение и в муку и в томление. Тем же и священник провозглашает, глаголя: святая святым, сиречь, аще есть кто свят, да приступает. Не просто рече: чист, но свят; иже бо яст хлеб сей и пиет чашу недостойне, повинен есть Телу и Крови Господни (1Кор. 11:27). Ему же слава ныне и присно и веки веков.

19. Слово о страсти Христове юже прият за весь мир (29 мар.)

Егда бысть Иисус тридесяти лет родивыйся от Марии, исполнишася всех пророк прорицания о нем. И крещся, готовяшеся к волней страсти, юже прия Адамля ради преступления. Того ради сниде в плоть и прободеся, и Адам крестися кровию его; ребром бо прободенным Господним изыде кровь и вода, да крестит землю и Адама. Того ради и желчи вкуси и даде избавление роду человечу. Еда не знают отца и желчи, трости и губы? Кая ли земля породи терние, им же венчаше Христа? Или море изнесе ту губу, ею же отроша уста Христу? Кое ли стадо, от него же взята бысть желчь? Кое ли место породи трость? Котории хитрецы, ковали копие и гвоздие, ими же пригвоздиша царя Христа Бога, небесе и земли Творца? Кое ли место роди вино, от него же сотворися оцет он? О великое чудо! Той бе даровал вся благая и земли повеле растити всяческая, то како вся зла прият от своих рабов? О великое чудо! Он прииде от льсти избавити род человеч и от научения диаволя, то како пострада от своих си? Но слава Твоему, Владыко, милосердию; слава Твоему, Христе, смотрению (строению); слава Твоему пришествию, еже не точию к нам земным, но и во ад схождению, Владыко, да изведети и тамо сущия вся с пророки и патриархи, смотрением (строением) Твоим, Господи! И тебе славу возсылаем со Отцем и Святым Духом, ныне и присно и во веки веков.

Апрель

1. Слово св. Иоанна Златоустаго о творящих многая злая, а не приемлющих зде беды (1 апр.)

Фараон царь колика прият долготерпения Божия? терпяше бо ему Бог, творящу многа злая. Видите убо, яко последи за вся злая прият отместие (возмездие) и лютую казнь. Не токмо еже жития сего отлучен есть, но и онамо лете и немилостивно мучим будет. Того деля нам, братие, болши достоит тужити, скорбети же и болезновати паче о тех, иже благодеяния зде и здравия приемлют, в злобе живуще и ничто же творяще добра, скорби же и болезни и никакого (никоего) Божия присещения к себе не видяще. Егда же ли за злая наша дела наводит на ны казни Бог и томления немощми, лжае нам творит о таковых суд. Аще ли по коемждо согрешению терпит, велико нас ожидает злоосуждение. Аще бы никто зде приимал зла, никто бы мнел Бога над нами суща. Аще ли бы паки зде кождо по делом приимал, никто же бы имел, яко быти воскресению мертвых, яко всем по делом приемлющим. Того ради иныя зде томит, а иныя оставляет. Мнози же праведнии за малая согрешения зде восприемлют казни. Многи бо видим злыя здравы телесы и благоденствующа, но онамо будет таковым велми люто. Афанасий Великий рече: «мнози правдивии душу влекут на многи дни болезнми зле, неции же грешнии мирно и вскоре издшут» (умирают). Григорий рече: «многажды благочестивии многи скорби и туги прежде и во время смерти приемлют, зане малы имут некаки грехи, да тех избавятся. Несть бо праведна, иже что неимуща греха, и несть грешника, иже не имать что добра». Анастасий Синайский рече: «по трех лицех праведнии напрасною смертию восхитими бывают: или от зверя и от воды, или от грома и от огня, да и прочии видевше умудряются на добрая дела, а иныя за худыя (малыя) грехи зде томления приемлют; сия убо ведуще, да не смущаемся». Пророк Исаия претрен бе, Стефан камением побиен, Петр апостол распят, Иоанн Предтеча мечем посечен, и инии мнози святии лютыя беды и различныя смерти приимаху. А иже грешнии нужною и лютою умирают смертию, да и прочии убоятся, тех в казни видевшие; а тии, иже умирают люте, часть оставления от мук приимут. Ты же не чудися, егда кого видиши утонувша, или землею подавлена, или с храмины падша, якоже и о детех Иововых, или яко о Маврикии царе, иже Фоце мучителю предан и лютою смертию конец прият: зане же Божия судьбы неведомы суть; его же бо любит Господь, того и наказует. А иже суще зли и во обилии живут и не приемлют бед, таковии люте будут осуждени.

2. Слово Иоанна Златоустаго, како не ленитися чести книги (1 апр.)

Мнози непочитанием божественных писаний с праваго пути совратишася и заблудивше погибоша. Инии же и книги почитающе несовершен имеяху разум, тако же и тии с праваго пути совратишася, Богу попустившу величания ради их, зане разум приимше, а правды не творят по самохотию. Муж бо книжен, а пияница, не может управитися на истину спасения. И аще кто не имея книг мудрует, таковый подобен столпу или оплоту без подпор стоящу: аще будет ветр, то падется. Тако и умуряяйся, а не книжник, аще нань греховней пахнет (дунет) ветр, то падет, не имея подпор словес книжных. Мудрость же и книги, аще обоя вместятся в человеце, то аки обе оце в теле совершенно имуще зрение. Птицам бо того ради криле даны, да сетей человеческих избежат, а человеком книги, яко да всю неприязнену лесть обнажают. Мнози бо суть козни лукаваго диавола, ими же уловляет человеки: оваго бо гневом надымает, а инаго завистию устреляет, инаго же на татьбу и обидети учит, а инех на позоры, и на игры, и на плясания поущает, а инаго на пиянство и на блуд ласкает, а иных на гордость острит и скупости учит; а инаго на кощуны, и на плескание, и на песни, и на гусли поучает; а иных леностию окрадает, да быша к церкви не приходили. Многих бо соблажняет, хотя от Бога отлучити и царства чужды сотворити. Бог же человеком откры святыми книгами вся соблажнения лукаваго диавола, да не прелстит боящихся его. И дарова на диавола крест честный, а на сети его святыя книги, их же послужающе и сотворяюще реченная получим жизнь вечную и со святыми вселение, о Христе Иисусе Господе нашем. Ему же слава, ныне и присно и во веки веков.

3. Слово о исповедании грехов ко иереем (2 апр.)

Аще убо обрящеши мужа духовна и искусна, могущаго тя уврачевати, без срама исповеждься ему, яко Богу и не человеку. Рече бо писание: мудрый о души своей не срамляется. Есть бо студ, наводяй грехи, и есть студ спасаяй. Подражай самаряныню жену, и мы той подобно о своих гресех не срамляемся исповедать Еже бо срамлятися о своем спасении и человеком не открывати грехи своя, то во он день страшный не пред единем человеком, ни пред двема, но всей вселенной зрящей обличатся греси наши. Богу нашему слава, ныне и присно и во веки веков.

4. Слово Иоанна Златоустаго о глаголющих, яко несть грешным муки (3 апр.)

Како убо, братие, убежим мук, злая творяще? Или како глаголете: яко милостив есть Господь и не мучит грешных христианскаго рода? Рцы ми, брате: аще крадеши, или обидиши и грабиши, и блуд твориши, гневаешися же, и завидиши, оклеветуеши, и лжеши, и упиваешися, и иная твориши злая и о том покаяния не приносиши, како глаголеши не быти мучиму тебе, аще сия твориши? Повеждь ми, почто святии трудишася в мире сем? Ови бо мучими и убиваеми бяху и различно томими; инии же пощением и бдением и жестоким житием удручиша телеса своя; инии же в пустынях и горех бедами и частыми напастьми и слезами многими, – и сии вси царствия ради небеснаго трудишися. Аще речеши: злии не мучатся, то и добрии царства не приимут. О братие, не лститеся, диавола слушающе, того бо сие прелщение. Слышах бо некия грехолюбцы глаголющия, яко на страх точию мукою претит Бог: и таковии с еретики осуждени будут. Рцыти ми, иже лестца Бога творите: Адама праотца кто повеле из рая изгнати? И при Нои кто вселенную всю потопи? Кто ли на Содома и Гоморра камение оно горящее и пламень посла? Кто Египтяны в мори погрузи? Кто шестьдесят тем в пустыни прокорми? Кто сонм Авирон пожже? Кто при Корреи и Дафане земли зипути повеле и живы и пожрети я сотвори две тме и три тысящи? Кто седмьдесят тысящ отъят при царстве Давидове? Кто во едину нощь при Иезекии умори осмьнадесять тем и пять тысящ? И ныне убо беды приемлем грех ради наших, овогда ратию, иногда пожаром, овогда гладом, и на скот умертвие посылает Бог, нас казня, и на рабы, и на рабыни; овогда же болезни тяжкия бывают на ны и чад наших умертвие. И за наша грехи все нам беду творит: огнь пожигает, вода потопляет, гром поражает, молния опаляет. И смерти убо различны бывают нам за неправды наша: скот бо в наших руках вскормлен есть и той ны растерзает и смерти предает, и хлеб, в ядь (снедь) данный нам, и той уморяет, в горле став, а инии от пиянства умирают. Яко многи скверныя зде мучит Бог, аще злоб не останутся и не каются истиною, и тамо вечному мучению предает я. Аще не бы Христос претил мукою, то имели бы глаголати не быти муце грешным. Веруйте, братие, истинно, яко есть грешным мука. Вопроси и жидов, и еретиков, еще же и самих бесов, – и вси отвещают ти единогласно, яко есть суд и мука и отдание по делом комуждо. Яко Бог согрешающия мучит, а с правдою пожившия венчает, то увери уже душу твою и научи ю не мястися без ума. Адам бо согрешил, праотец наш, и не бе видел, ни слышал мучима кого греха ради. А мы вся сия известно слышаще, почто не имеем веры? Слышасте бо Каина, ради убиения и зависти и злобы, мучима, и потопом погибший род человеч, любодейства ради. И болши того казнь, содомлян изгорение, того же ради любодеяния, и иныя многи. Ной бо от потопа избавлен есть, а Лот от огня: видесте ли, како правдив есть Бог, яко не погубляет праведника с нечестивыми. А и в земных властелех видите, како казнят, аще кто зло сотворит? О братие, веруйте истинно, яко есть грешным мука. Четыре тысящи лет минуша содомлян изгорение, а и до сего дне курится на страх грешным. Богу нашему слава, ныне и присно и во веки веков.

5. Слово о молитве (5 апр.)

Егда убо речет ти в сердце твоем, или в день, или в нощь, мысль востати, – востани и помолися Богу, брате. Разумей, яко святый ангел присети тебе и той есть глаголяй тебе, востающе же тебе, брате, молитися, и той востанет с тобою и молитву сотворит, и сохранит тя и отженет от Тебе злыя духи. Аще ли не востанеши, абие отходит от Тебе ангел святый, и тогда впадеши в руце враг твоих.

6. Св. Анастасия Синаита о неосуждении ближняго (5 апр.)

Да не осуждаем, братие, молю убо вы, не токмо иерея, но и всякаго человека, да прощения грехов сподобимся. Егда бо видиши согрешающа кого, не веси же, киими делы житие пройдет. Разбойник убо он, иже со Христом распенся, человекоубийца бе, Иуда же ученик Христов и апостол бе от предних ученик, и в мало время пременение обою бысть: разбойник в царство Божие вниде, а ученик в погибель. Да того ради не подобает осуждати человека, аще есть и грешен, брат бо твой; откуду убо ты веси добрая его дела или злая? Ибо мнози многажды согрешиша яве и покаяшася отай прилежно. И мы убо согрешения их видехом, покаяния же их и обращения не разумехом, да от нас яко грешницы осуждаются, а от Бога оправдание улучат. Тем же, молю вы, да ни на кого же зла держим, ниже кого осудим, дóндеже приидет праведный Судия, Иже просветит тайная тьмы и явит советы сердечныя. Найпаче же иерея Божия о тайных или явленых его гресех, елико на него слышиши, не осуди, ни рцы: «грешен есть и приступает к Тайнам, и не приходит дар Святаго Духа», – ничто же таковая помышляй. Он убо есть тайных судия и испытатель. И поразумей себе, яко вышший тебе есть всяко иерей, да остави праведному Судии суд. Аще бо иерей и согрешил есть, в божественных повелениих согрешил есть, прочим же неси ты судия, ни испытатель, ведый убо твою меру и сан. Но речеши: «не подлежит ли судом церковным и каноном иерей»? Но да не тобою тако судится или испытается, но от Бога, или от болшаго святителя. Что судиши пастыря, овча сый? Что восхищаеши фарисейски Божий суд, судя священнический чин, понеже ти не поручен есть, ни предан от Бога? Тем же, молю тя, не осуди никого же, наипаче же святителя Божия. Но с верою приступи и со страхом велиим и покаянием истинным и совестию чистою Божественных Таин и святыни коснися. Аще бо и ангел есть Божий, принося святую жертву безкровную, ты же недостоин сый причащаешися, никако же тебе очистит и ангел от греха, яко же писание глаголет: яко же бо Иуда от Владыки Христа Божий хлеб приим и, понеже недостойне сего причастися, абие вниде вонь сатана, от него же да избавит нас Господь Бог.

7. Поучение к царем и князем, к епископом и попом, и ко всем христианом, еже не упиватися (7 апр.)

Благословение отца духовнаго о Господе к детем. О чада, ведите иже ми дал есть Бог талант, его же хощет от Мене и истязати на страшнем судищи. Что же есть талант? Еже есть пещися вашими душами и сеяти в ваши души семя божественное. Егда бо ходите в законе Господни, тогда ми радуется сердце, а егда вижу вы преступающа заповедь Господню, тогда печаль снедает мя. Того ради и написах сие, чада моя, в показание вам к вашему послушанию, да не злым пиянством побеждаетеся. Рече бо великий апостол Павел: яко пияницы не наследят царства небеснаго, но уготована им мука вечная с разбойники, и с татми, и с прелюбодеи. В первых родех проявлено от Бога, яко велиции мужие и угодницы Божии пиянством погибоша; цари от царства изринушася; святители святительство погубиша; силнии силу свою испровергоша; храбрии мечу предашася, а богатии обнищаша: многолетия живше, скоро изомроша. Без Божия бо суда вскоре пияницы умирают, яко и удавленницы; аще кто в пианстве умрет, то сам себе враг и убийца, и приношение по нем – ненависть Богу. Сыне, в нынешнем роде не возревнуй злым человеком, ни князем, живущим в грехолюбии и в скверности, вся бо сия мерзостна Богу. Но внимати нам лепо, что нам содевает беззаконное пиянство. Ум убо погубляет, орудие же портит, прибытки теряет. Пиянство князем пусту землю сотворяет и людей работы доводит, а простым людем долги содевает. Хитрым мастером питие хитрость портит, казит их ум, не дойдут смыслити дела своего, а простым людем сотворяет болезни, и срамоту, и безчестие, и убожество, зло наводит, братию сваживает, злое питие, в свары и тяжбы; жены от мужей своих отлучает; детей работы доводит; ногам болезни творит, рукам дрожание, зрак от очию погубляет. Пиянство в церковь или возбраняет и не пустит молитися Богу; книг чести не даст, страх Божий от сердца отгонит; смерти предает, во огнь вечный посылает. Пиянство красоту погубляет, смех трезвым сотворяет Кому молва? пиянице. Кому смех? пиянице. Кому сини очи? пиянице. Кому ох и кому горе и люте? пиянице. Кому заутреня проспати? пиянице. Всяк бо пияница отлучится от Бога и от людей и облечется в раздранная рубища. Да се ведуще, братие, оставемся пиянства злаго и запойства. Еще же слышите Господня апостола Павла, самого сосуда избраннаго, глаголюща к Тимофею: мало вкушай пития (1Тим. 5:25), да будет ти души спасение. Братие, будите трезви, яко убо супостат нам диавол трезв есть, а не пиян, иже ищет всех поглотити пияных. О горе, како утаитися пияным, а лежащим аки мертвым, и от Бога отбегшим пиянства ради, и от Святаго Духа удалившимся смрада ради пиянственнаго? Слово Божия не имуще во устех своих гнилости ради пиянственныя. Ангелу хранителю плачущу пиянства ради, бесом же веселящимся и радующимся о пияницах, яже приносят к диаволу жертву пиянственную. И диавол радуяся глаголет: яко николи же тако веселюся и радуюся о жертве поганых человек, яко же убо о пияных христианех, в пияницах бо вся воля моя. Лучше погании пияниц, яко и поганых Бог снабдит, а пияниц ненавидит и гнушается, яко пиянии мои суть, а трезвии Божии. И сия изглаголав диавол рече бесом: идите и поучайте христиан на пиянство и на всю волю моего хотения. Святии же ангели, приходяще к святым отцем, сия вся поведаху с великою печалию о всем том, дабы отлучили христиан от злаго пиянства и запойства, а не от пития, еже в славу Божию и в подобно время и в закон. Святии же отцы, написавше сие честное и святое писание и правоверное учение, предаша святым церквам на слышание христианом, на угождение жизни вечныя и причастие царства небеснаго. Да аще кто послушает правила сего святых и богоносных отец и поживет в трезве уме; дела творя угодная Богу, житель будет вечныя жизни и наслаждения неизреченных благ. А иже не послушает сего праваго учения, то осужден будет со диаволом в вечную муку, от нея же да избавит ны Христос Бог наш.

8. Слово Исаака Сирина о милостыни, яко и по смерти приятна есть, яже от праведнаго имения (9 апр.)

Рече святый Исаак Сирин: яко аще имаши излише дневныя потребы, отдаждь убогим и иди со дерзновением и принеси молитву твою, еже есть глаголати с Богом, яко сын со отцем. Ничто же тако приближит к Богу, яко же милостыня, и ничто же тако сотворит тихости уму, яко же нищета волная. Унши ти есть от многих названу быти невежде простоты ради и немудру и свершену славы ради. Аще кто и на коне ездя прострет руку к тебе прияти милостыню, не отврати его, яко и той требуяй есть прияти милостыню, яко един убогих. Егда же даеши, даждь всею душею и тихим лицем; болше, елика просит, даждь ему; посли бо, рече, твой хлеб пред лицем твоим и не по мнозе времени обращеши воздание. Не разлучи богата от убога и не восхощи уведати достойна от недостойнаго, но да будут ти человецы вси за благо равни. Сим бо образом и недостойная можеши привлещи на благое, зане же скоро привлачится душа от плотных в страх Божий. Господь бо мытарем и блудницам приобщашеся в трапезах и не отлучаще недостойных, да образом сим привлечет вся в страх свой, и да телесными приближатся духовным. Сего ради благим и честию вся человеки управи, аще иудей будет, или неверев, или убийца, и паче яко брат ти есть от естества и кроме разума заблуди от истины. Егда же сотвориши кому благо, не ожидай от него возмездия, и по обоим возмездишися от Бога. Аще же есть мощно, ниже за будущее возмездие благое твори, ище положиши души твоей предел нищеты и благодатию свободишися от попечений и превыша мира будеши в твоей нищете. Блюди убо, да не нищелюбием возлюбиши стяжание, да от того сотвориши милостыню, и вложиши душу твою в смятение; еже восприяти от кого и дати иному, погубиши мзду твою, и виною прошения от человек отпадеши твоего смысла, свобожденнаго печалей житейских, понеже стопы твоя выше степеней милостивых суть. Молюся ти, не повинися; милостыня убо подобна детокормлению, безмолвие же конец совершению есть. Аще имаши стяжания, сия единою расточи; аще ли не имаши, не восхощи имети. Очисти твою келлию и скудота вещей твоих научит тя воздержанию; понеже, егда множество вещей приимем и изобилуем, не можем себе воздержати. Сия слышаще, братия, попечемся о своем спасении.

9. Слово о посте и о клевете (9 апр.)

Аще постишися, покажи ми от дел твоих. Которых? рече. Видев нищаго, помилуй; со врагом смирися; другу благоденствующу, не завиди; жену красотою сиящую видя, премини ю. Нелицемерно же постися, но и очима, и сердцем, и ушима и рукама, и ногами, и всеми уды. Мнят бо пост – брашна удаление, – той бо пост да укоряется. Но воздержи руки от грабления, ноги от ристания, еже на позоры; очи от взора красна, пища бо оку видение. Слуха стяжи не приимати осуждения и лжи, слышания суетна не приемли. Да постятся уста твоя от осуждения; ничто же бо есть еже не ясти мяс или рыб, снедати же плоти братий оклеветанием. Се бо апостол Павел глаголет: аще друг друга снедаете и грызете, блюдитеся сами, да не от друг друга снедени будете. Аще ли кто кого и по вине осуждает, и то велми зло: фарисей бо он, и в правду осуди мытаря, погибе. Тебе же да сохранит Господь от таковых падений. Ему же слава, ныне и присно и во веки веков.

10. Св. Ефрема о суде и о покаянии (11 апр.)

Широта земли и концы ея ничто же нам успеют в страшный день суда. Того ради, братие, дóндеже есмы живи, имеим (будем иметь) память о будущем суде и помышляим во уме негасимаго того пламени мучение нетворящим воли Божией, и воспомянем, яко никто же может кому помощи, но кийждо свое бремя нося предстанет, ожидая осуждения, хотящаго изыти на него; другу бо за други не отвещати, но кийждо о себе ответ даст. О убогий человече, много начнеши тужити тогда и сетовати, егда праведнии возрадуются, славу и венцы приемлюще и царство непреимущееся! О грешный, много плакати начнеши умилно и глаголати со слезами люте стеня: горе мне скверному, неотвергшему бремене сего греховнаго; ныне небесных благ насытился бых и со ангелы бых пребывал; о злаго сего века маловременная прелесть, худаго ради наслаждения, в безконечную осуждаются муку и сласти ради плотныя огню имам предан быти! Праведен убо суд Божий есть: зовом бо бях не послужах, учим бех не внимах. Извествоваху бо ми: яко греховных ради дел родство огненое ожидает и мука вечная и болезненное сетование, аз же о всем том нерадих, во лжу мнех. О, колико врямя изгубих окаянный аз в лености и небрежении! и како мя есть прелстил пустошный ов мир? Како иныя видя трудящияся Бога ради и постящияся и наделяющия сироты и вдовы, аз о всем том нерадих? Книги слышах чтомы, не внимах и чтущим я ругахся. Горе мне, яко не слышах учащих мя, а ныне плачу люте вопия, и не слышит мене Бог! Люте мне, яко сам погубихся и сам поругахся себе; унше ми бяше с телом трудитися и поститися и плакатися, нежели обрестися на месте сем мучения. И что ми усве онаго мира богатство и слава? но вся осташася, аз же погибаю, в лютыя муки осуждаем! Сия на уме имуще, возлюбленнии, потщимся в нынешнем веце с правдою пожити, яко же апостол Павел учит ны глаголя: Братие, отверзите лжу, глаголите истину, и друг ко другу любовь истинну имейте (Еф. 4:25), не грабите, не крадите, не гневайтеся, не завидите, к церкви воставайте и не упивайтеся в пиянство; аще сия сотворите, блажени будете, аще же не сотворите, осуждени будете. Сего ради молитеся, да не внидете в таковая. Богу нашему слава, ныне и присно и во веки веков.

11. Слово св. Макария Вел. (14 апр.)

Яко же младенец новорожден образ совершена имать мужа, сице убо и душа образ есть некий сотворшаго ю Бога. Яко же убо отроча по части растый, по части познавает отца, внегда же возроста достигнет, тогда усвояется сынови отец известно и сын отцу, отрывается же тому и отчее сокровище: сице убо и душа прежде преслушания приспеяти хотящи и в мужа совершенна достигнути будет, преслушания же ради в пучину забытия и во глубину прелести низведена быти имать и во дверех ада вселитися. От многаго убо яко же бы разстояния удалившейся Бога души, немощно той бе приступити и познати Создавшаго. Но Бог первее убо пророки обращаше ю к Себе, и призываше, и к познанию Своему влечаше, последи же и Сам пришед, отъят убо забыть (дремота), отъят же и прелесть, таже и адовы разверз двери, к прелщенной вниде души. Себе образ сей положив, им же мощно ей будет к мере возраста, к совершению духа достигнути. Искушается же Божие Слово от лукаваго по смотрению, таже поношения и уничижения, досаждения же и заушения от рук оных дерзостных и самую последнюю, крестом, смерть претерпевает, образ показуя, яко же рехом, да научимся сице творити к поносящим и уничижающим или смерть нам наводящим, даже и мы, по писанием, яко глуси и неми будем, не отверзающе уст своих, и действа тонкость познается лукавства их. И яко же на кресте гвоздми пригвожденный с воплем крепким возопиет к могущему его избавити от смерти: от тайных моих, рече, очисти мя (пс. 18), и аще не обладают мною, тогда непорочен буду. Тогда убо, непорочен быв, обретает повинувшаго ему всяческая и царствует и почивает со Христом. Ибо преслушания ради, от вещных же и скверных пожерту бывшу помыслу, безсловесна бывает душа. Тем же не мала труда потреба от таковых возникнути вещей и тонкость смотрити лукавствия и пройти, да безначалному уму срастворится. Обаче разумей, яко во мнозем труде и поте, рече, лица твоего восприимеши богатство твое. Ни бо полезно ти есть благобезтрудное стяжание, понеже без труда погубил еси, еже прият, и врагу предал еси наследие. Познаем убо кийждо, что погубихом, и рыдание восприимем пророчо: воистину бо наследие наше обратится чуждим и дом наш странным, еже преслушати заповеди, и своими волями ходити, и скверными и земными сладитися (услаждаться) помыслы.

12. Св. Евагрия о тщеславии (15 апр.)

Тщеславие есть страсть безсловесна и всякому делу благу сплетается и огнушает е. Яко же бо из корене грезн (виноградная кисть) вержен на землю согниет вскоре, тако и добродетель погибает тщеславия ради. Монах тщеславен – делатель безмезден, труд приимая, мзды же не приемлет. Сосуд убо утл не хранит влияннаго вонь, тако и тщеславие изгубит мзду добродетели. Воздержание со тщеславием, яко дым пещный на воздусе разыдется, обою ветр погубляет след, – тако и мужу милостыню и воздержание – тщеславие. Вержение камене не дойдет небесе, тако и молитва человекоугодна не взыдет к Богу. Хранит сокровище муж умен и добродетельныя труды монах разумен. На пространне месте молитися повелевает тщеславие, соблюдаяй же себе в храмине своей молится Богу. Показует богатство свое муж безумен и двизает многия мыслити на не; ты же храни свое, на пути бо еси разбойников, дóндеже приидеши во град и соблюдением храниши ее в темнем сем житии, ведый конец его, и град добре устроенный – будущий век. И не веселися на пути, невеглас (невежда) бо веселие твое воздвигнет мыслящих на тя, и блюдыйся, без пакости во град внидеши и всех восприимеши невозбранно к тому, и ни един же похитит твоя труды. Добродетель тщеславная – сокрушеный принос и не приимется на жертвеник Господень. Во дни же поста да не являеши тайнаго воздержания, ниже покажи тебе яко послухом на свете многим, да видяй тя в тайне Отец воздаст тебе мзду яве. Ему же слава, ныне присно и во веки веков.

13. Св. Моисея о дерзости, яже к Богу на молитву (18 апр.)

Возлюбленная братия, сотворим силу свою в слезах, да в радости пожнем. Плачем убо пред Богом, да умножится благодать Его на нас, и послет нам силу, яко да соблюдет ны, дóндеже боремся со духи злыми, яже сотворихом в начале. Восплачим убо со смирением, да стяжим себе всем желанием к Богу, Иже спасти ны может от любодеяния, дóндеже изыдем от тела. Возлюбим убо милостыню и нищелюбие, да сохранимся от сребролюбия, да срящет ны всходящия от тела. Возлюбим мир ко всем, к малым и великим, да сохранит ны от зависти в зло водящия ны. Стяжим же и долготерпение всякой вещи, да соблюдет ны от малодушия. Возлюбим вся, яко и свою братию, ни единаго ненавидяще в сердце нашем, ни воздающе зла за зло, да соблюдет ны отречения, предыдуща на лица наша. Возлюбим убо смирение, еже понести друг другу тяготу, или досаждение, или поношение единаго, рекшаго нам, да сохранит ны от гордости и величания, предыдущаго в сретение наше. Взыщем друг другу чести и да ни единаго соблазним, да сохранит ны от оклеветания, аще приидет к лицу нашему. Отвержем требование излишнее света сего и славу его, да избавимся от навождения, предыдущаго на лица наша. Научим язык наш в поучение Божие, и в правду, и в молитву, да сохранит ны от лжи, предыдущия на лице наше. Соблюдем сердца наша и тело от пожелания, да избавимся вечнаго огненнаго мучения; добрыя же детели да помогают нам, аще я приобрящем. Кто убо есть мудр, не хотяй дати души своея на смерть, да избавится от всех сих злых. Сотворим убо, братие, вся сия добрая дела всею силою нашею, сила убо Господа Бога и Спаса нашего Иисуса Христа велика есть помогати нам, окаянным человеком. Весть бо, яко человек окаянен есть, и ожидает его покаяния до последняго издыхания. Тем же да будет едина мысль наша к Богу, да сохранит ны от всякаго зла.

14. Слово Иоанна Златоустаго о страсе Божии и о еже како во святей Божией церкви со страхом и благочинием и лице свое крестити крестообразно (18 апр.)

Мнози убо невегласи махающе по лицу своему рукою, творяще крестятся, всуе тружаются, занеже не исправляют истово креста на лице своем, тому бо маханию беси радуются. А еже кто крестится истово, покладая руку свою на челе и на животе и на правом раме и потом на левом, то ангели зряще веселятся истиннаго креста, воображаема на лицах их. И ангел Господень написует тогда входящия в церковь Господню со страхом и с верою. Да аще кто, пришед в церковь, стоит со страхом и со умилением поклонение творя ко образу Божию, той восприимет отпущение грехов и милость Божию; аще ли без страха, то таковый, болший грех получив, отходит. Тем же и мы, вшедше в церковь, стоим со страхом, чающе от Бога великия милости в сий век и в будущий. Ему же слава, ныне и присно и во веки веков.

15. Поучение о спасении душевнем (19 апр.)

Аще не всяк крещеный спасется, но творяй волю Божию, – яве, яко ни всяк постригаяйся спасется, но иже аще сохранит монахом достойная. Оружие бо отцы пение, молитву же стену, омывание же ненорочную слезу наричут; блаженное же послушание исповедание разсудиша, без него же никто же во святых виде Бога, и яве убо есть, яко без того никто же Бога узрит. Мнози бо и кроме повиновения угодиша Богу, яко же Мария Египтяныня, и инех немало. Глаголют убо, яко иже плоть повинув духови и совесть обличителя стяжав, судию си послушателя Божиих Заповедей, бысть прежде шествования послушания к невидимому и разумному преспеванию потребен. Имаши бо Великаго Антония и иже о нем просветившихся, иже невидимаго производят разума многа; а иже не стяжавшим, но и еще от страстей смущаеми, без сего успети не могут. Добре убо рече: «яко без него ни един же может видети Господа». Душевныя убо страсти наричет: тщеславие, гнев, печаль, величание, уныние и яже убо о них бывают. Плотския же: объядение, упивание, сребролюбие, блужение. Глаголют убо: иже душевными страстми смущаемии человека требуют престояща мудра и попущающа мало на плотския, да не яко воздержницы и тщии боле возносятся. А плотскими страстми боримии трябуют наставника мужа мала, а не яко ангелское житие имуща и безплотное, токмо воздержалина яве и безстрастна, яко да постом движения плотская умертвити. И вменишася таковии иже от Содома избежавше и ангельским наставляеми житием. Богу нашему слава, ныне и присно и во веки веков.

16. Слово Анастасия, игумена горы Синайския, о исповедании грехов к духовным отцем и прозорливым, а не к невежам (20 апр.)

Добро есть отнюд и полезно исповедати грехи ко искусным духовным отцем, а не к невежам и неискусным и ни еже о сих не разсмотряющым, да не неполезною их любовию и строением неисцелным и нехитрым повелением епитимия преобидится и неполеза и ленива соделает кающагося. Аще убо обрящеши мужа духовна, могущаго тя уврачевати, не стыдися, исповеждся ему аки Богу, а не к человеку. Рече бо некто от святых: мудрый о души своей не стыдится падением своим и не срамляется своих грехов исповедати и не зазорится. Глаголет бо Иоанн Богослов: аще бо исповемы грехи своя, верен есть Господь и праведен, отпустит нам грехи и очистит ны от всякия неправды (1Ин. 1:9). Но мнози от грубости лицемернии понове, студная деюще дела, не токмо сами ходяще в тимении (тине) злых дел, но и учители бывают на зло, да ни сами приходят к свету, ни хотящим приити попущают. Тем убо и Господь о таковых глагола: горе вам, книжницы и фарисее, лицемери, яко затворяете царство небесное от человек, сами бо вы не входите и хотящим внити не дадите (Мф. 23:13), – и паки: вы есте свет миру и соль земли (Мф. 5:13, 14), и елика аще свяжете на земли, будут связани на небеси (Мф. 18:18). Да того ради несть лзе без епитемии отпущати по мзде согрешения. Тем же, яко человек еси и к человеку исповедайся, а Бог, тем обращая и наказуя, простит, яко же и Нафаном Давида. Тем и глаголаше: обратиша мя боящиися Тебе, Господи, и ведущии свидения Твоя, накажет мя праведник милостию и обличит мя, ибо иереи слуги Божии и сожители ангелом и строители суще спасения. Се бо и апостол глаголаше: тако да мнят нас яко слуги Христовы и строители Тайнам Божиим (1Кор. 4:1). И человек бо человеку помогает, покаянием обличая запрещения, Бог же очищает грехи кающихся и не помянет к тому. Рече бо: глаголи ты первее грехи твоя, да оправдишися (Рим. 3:4). Богу нашему слава, ныне и присно и во веки веков.

17. Св. Кирилла, архиепископа Александрийскаго, о страсе Божии (22 апр.)

Боюся смерти и ужасаюся. Боюся же родства (геенны) огненаго, яко вечен есть и неугасаяй. Боюся же грозы и тмы, яко не прелагается в свет. Боюся же черви, яко безсмертен есть. Боюся же ангел, иже на суде, яко без милости суть. Горе мне, яко вопияху ми, не послушах, – глаголаху ми останися от всего сквернения и всяческих вещей, яже суть мне мерзки. Горе мне, яко Твой храм, Господи, оскверних и Святый Дух оскорбих. Боже, праведна дела Твоя и суды! За мал грех пищи нескончающияся и жизни царства небеснаго лишаюся и не умирая мучитися, за плотския сласти, огневи предаюся. Праведен суд Господень, учаху мя, и не послушах, послушествоваху ми, аз же ругахся. – Тако глаголати начнеши, человече, аще ключится ти прежде покаяния отыти света сего. Тем же, или геенны убойся, или к царствию потщися.

18. Св. Иоанна Златоустаго, како достоит в церкви стояти на молитве (22 апр.)

Церковь убо небеснаго жилища место есть, учением и молитвою. Ныне же церковь ничим же уньши торгу и храма цатоимец (лихоимец). Жены бо собираются к церкви красящеся, да прелстят безумныя. Аще кто хощет повести глаголаши, и мню, иного места не имут обрести повестем, разве церкви. Аще же кто хощет куплю творити, в церкви же творит. Аще ли кто сваритися хощет, или строения домовныя глаголати, или воинския чины слышати, или суд, или какия врачбы, то вся сия в церкви совершают. Тем же по вся дни тужим о сем и печалуем, да бы есмы благая обрели в церкви. Но сице обретохом вы, на пакость и на грех сходящаяся и глаголюща в церкви, о гресех же не печалующаяся, но и кротким пакостствующа глаголании своими. Но глаголеши: «не разумею, что глаголют словеса или о чем чтут». Повествуеши бо в церкви, а не стоиши со страхом, и того ради не разумееши. Виждь, како он скопец на пути сый книги чтяше, ты же, посреди учитель стоя, вину твориши, глаголя: «не вем, ни разумею». Тем молися Господеви, да разумееши я. Подобает же ти молчати в церкви, да Бог, приим твое молчание, и тихость разума сотворит. Не можеши ли молчати, то изыди из церкве, да не иным будеши на пакость. Единому бо подобает гласу быти в церкви токмо, еже пению и молитве во время церковнаго собрания, а не плищеванию, еже друг с другом беседовати и не внимати чтению. И сам бо епископ молчит, а певцы единогласно поют. Почто убо, истину оставлше, стень и сония гоните (преследуете)? Тем, молю вы, свободитеся от вражия детели и от злоб ваших избавитеся, и за мздоимание – милостыню возлюбите, за ненависть же – братолюбие. И тако творяще и нынешних благ, и будущих насладитеся, о Христе Иисусе Господе нашем. Ему же слава и держава со Отцем и со Святым Духом, ныне и присно и во веки веков.

19. Слово Иоанна Златоустаго, яко подобает оставити дело и ити к церкви христианом, егда время приспеет (24 апр.)

О сем убо, друзи и братия, глаголю вам аз, яко бы день от дне боле собиратися людем в церковь на послушание божественных словес, ныне же менше приходите. Аще бы от себе глаголах бых, то добре бысте творили не приходяще; но аз сказую вам волю Божию, юже сотворше, спасени будете. Яко же бо кто грамоту цареву или княжу принесет к подручным его гражданом, они же не испытывают жития принесшаго, богат ли есть, или убог, праведен ли или грешен, но тех чтомых все слушают добре, аще ли не слышит кто, слышавшаго вопрошает. Да аще земнаго князя толик на вас страх есть, колми паче зде в церкви без плища (шум, крик) послушати нам, иде же Творец небесных сил беседуем нами грешными. Тем, молю вы, пришедшия зде, поучати ленивыя, да приходят к церкви; вы бо вкусисте сладости учения, а они никако же: иже бо кто лениваго на угождение Божие возбыстрит, многу приимет от Бога ползу. Сия же убо изрекох, еще же и о молитве поучу вы, тою бо добродетели совершаются. Аще бо (молитвы) от смирена сердца без злобы, то яко фимиам к Богу восходит; о том и пророк рече: да исправится молитва моя, яко кадило пред тобою (Пс. 140:2). Яко же фимиам есть благоуханен егда на огни будет, тако и молитва, егда от горяща сердца бывает, приидет к Богу. Приидите убо, братие и сестры, слышите учение сие святое, еже на спасение душам вашим есть, аще сотворите; а не сотворше осуждени будете, им же учащему не внимаете. Како бысте вы толик путь шли, елико же прейде южская царица слышати премудрость Соломоню; зде же боле Соломона есть: ни бо путем долгим трудитися, ниже около моря ити, ни имения издаяти, ни болезни подъяти. Церковь бо всем есть пристанище, всяк в ню потщися. Аще еси правдив, вниди, да правды не погубиши; аще грешен, прииди, да спасешися. Аз бо не себе деля понуждаю приходити вас, всех бо есмь грешнее, но да учение слышавше спасете своя души. Не слышав бо учения святаго, како кто может душу свою управити? Свет бо слово Божие именуется и боле видимаго есть света, яко душу просвещает. О том и Исаия пророк рече: людие, седящии во тме, свет видеша велик (Ис. 9:2), рекше учение истинное. Елицы убо приходите в церковь, понуждайте и иныя неприходящия, и никто же глаголи, яко непразден есмь. Помысли, брате, о званых на царскую вечерю, иже не идоша: ов рече – супруг волов купих, ин – село, ин – жену поях, и про то на них царь разгневася. А вы не можете ли единаго часа Богу отлучити? Кая бо тягость в церкви отслушав пение и тогда на дело ити? Аще бы злато или сребро по вся дни раздавил, или мед, или пиво, то не бысте ли сами приходили и непризываеми? Зде же, в церкви, повсегда словеса Божия раздаваю, лучши злата и дражши камения многоценна и слаждши меда. Вы же их лишаетеся, заве к церкви не приходите всегда. Того деля за вашу леность злословлю вы и укоряю, яко ходите небрежением к церкви и самохотием лишаетеся духовнаго учения сего, им же бы добре пожити и души спасти, о Христе Иисусе, Господе нашем. Ему же слава, ныне и присно и во веки веков.

20. Слово Иоанна Златоустаго, яко подобает милость творити прежде о домашних своих (27 апр.)

Аще убо насытился ли пищею, помяни алчущаго; напился (напитался) ли еси, помяни жаждущаго; согрел ли ся, согрей трепещущаго зимою; в храме ли высоце и в красне седиши, введи скитающагося в дом твой; возвеселил ли ся еси на трапезе, везвесели скорбящаго; обрадовал ли ся еси о чем, утеши скорбящаго и сетующаго; почтиша ли тя яко богата, присети и ты убогия; весел ли еси от князя ходиши, твори тако же, да и в дому твоем нескорбящии ходят домашнии твои. Немала бо милостыня есть, еже домашния своя без печали сотворити и без воздыхания и без слез. Аще бо достойни будут казни, то в тоя место да помиловани будут, не бо тако ранами, яко же милостию содрогнутся и накажутся. Да аще тако твориши, то и ты в казни место на исход души твоея милость обрящеши. Буди же дом твой покоище служителем Божиим, рекше пресвитером, и всякому церковному чину. Введи таковыя в дом твой и с великою честию посади я; постави им трапезу, яко и самому Христу; сам же пред ними послужи и жена твоя и дети твои; аще ли нудят тя сести, то на нижнем месте сяди. Сотвори же имя твое знаемо, да церкви Божии молитва за тя к Богу яко фимиам возносится, и свеща твоя всегда да светится в церкви, и просфора твоя тако же. Поминай сущия в монастирех, иже ангельский чин держащия и образ монашеский носящия: введи я в дом твой и ноги их омый и постави им трапезу в чин монастирский. И жену твою и дети научи со страхом и молчанием служити яко ангелом Божиим; провожай же их с поклонением и, отпустив их, даждь им потребная монастирю. Много бо и то, аще рекут: Господи, помилуй, единою; купиши у них благословение, и то без цены есть. Писано бо есть: много бо может молитва праведнаго (Иак. 5:16). Да аще един может, колми поче мнози возопиют к Богу. Паче же к сущим в горах потрудися и в пещерах, яко к плотным ангелом, иже мира сего устранишася и единому Богу служат. Донеси же потребная им и приими молитву от них; вложи в сердце твое словеса их, помажися благословением их; помолися убо, да помолят Бога за грехи твоя, и отыдеши в дом твой чист. Клеветы же не приемли на черноризца и ни на коего же святителя. Аще ли видиши кого согрешающа, не суди ему, но послушай Бога, рекшаго: не осуждайте да не осуждени будете (Лк. 6:37). Минующим тя по пути не стыдися главы твоея поклонити; аще бо тако живеши, не сотворит ти пакости власть, ни богатство, но и вождь ти будет к царству небесному, аки друг добр. Богу нашему слава, ныне и присно и во веки веков.

21. Св. Анастасия о казнех Божиих, и о ратех, и о гладех (28 апр.)

Человеколюбец и правдивый судия Бог многажды предает противным нас не на пагубу, но на казнь. Яко же Иеремием ко Израилю рек: дерзайте, людие Мои, не погибнет память Израилева, предани бо бысте языком не на пагубу, но понеже убо разгневасте Бога, и предад противным; раздражисте бо раздражающаго вас и последнюю муку восприимите (Вар. 4:5–7). Нам же подобает ведати, яко беззаконий ради наших предаемся в руце враг наших, по правому суду Божию. Яко же рече Исаия: кто даде на расхищение Израиля? не Бог ли, Ему же согрешиша, ни восхотеша ходити в путех Его, и наведе на ны гнев ярости своея и укрепи на ны гнев и рать. Ничто же бо без правды приходит ни ны; тяжко бо есть нам, согрешающим, – но вся правым судом Божиим наводит на нас. Греси бо наши исходатайствуют нам злая. Самовласти бо есмы своему спасению и пагубе, яко же пишется: яко Бог искони (вначале) человеку положи пред лицем живот и смерть. Свидетель же сему Адам и Ева, иже вражиею лестию восхищшася и равна Богу быти восхотеста, и Божию заповедь приступиста, от рая изгнана быста и смерти наследницы быша. Тем же и ныне, елико их согрешают и гневают Бога, возненавидени будут беззаконий своих ради и потреблени судом Божиим праведным, воздающим комуждо по делом их. Тем и узаконяя, рече: око за око, и зуб за зуб. И еще: аще сотворит человек, воздастся ему; им же бо кто согрешит, тем и мучен будет, аще не покается; аще ли же обратится и покается, добре душу свою упасет. Богу нашему слава, ныне и присно и во веки веков.

22. Слово о обетех и о жертвах и молитвах (29 апр.)

Аще что обещаеши Господеви Богу, принеси скоро и не замедли дати, ими же помолился еси в день печали твоея, молитву твою во благовремя. Не благоволит бо Бог в приносех нечистых, ни множеством жертв очистит грехи их. Но яко же кто закалает сына пред отцем – проклят есть, такожде и приносяй жертву Богови от грабления убогих имения, пишется бо: чти (чествуй) Господа Бога твоего от твоих праведных трудов.

* * *

33

В печат. изд. Пролога, из которого мы приводим настоящее Поучение, это место читается: «Клевета буяны дому из корене исправити», – поправляем по пергам. Прол. Спасо-Прил. монаст. XIV в.

34

В С.-Прил. Прол. место это и дальнейшее читается: «чародей бо, рече, не живет не погуби младенца во оутробе, все бо ограженье от Бога оубьение бо неправедным мьститься». Воображение, въображение – образ, изображение (αντίτυπον, Micl.).


Источник: Памятники древнерусской церковно-учительной литературы. Выпуск 4. Славяно-русский пролог, Ч. 2. Январь-апрель / Издание под редакцией проф. А.И. Пономарева. – С.-Петербург. Типография А.П. Лопухина, 1898. – VII, 228 с.

Комментарии для сайта Cackle